Luk

8 Ọnin ki wo gbera, ọle da ha na bhi agbaẹbho rẹ sẹbhi agbaẹbho bi idunmhun rẹ sẹbhi idunmhun. Ọle da ha wewe ẹmhọn ọta esili ọsi Agbejele nọnsi Osẹnobulua. Ene etuegbe igbeva da rẹkhan ọlẹn. 2 Ikhuo eso nin ọle re egbe daan yẹ khu ẹlinmhin-ebe si ele bhi egbe re da yẹ rẹkhan ọlẹn. Eso bhọ hi: Meri nan yẹ tiọle Madalin, nin ọle khu ẹlinmhin-ebe ihinlọn si ọle bhi egbe re; 3 Joana nin okhuo Kuza. Kuza hi ọnọn gbẹloghe uwa nọnsi Hẹrọd; Suzana; bi ikhuo ebhebhe ne bunbun. Ele da ha noo emhin nin ele mhọn rẹ rẹkpa ele.

4 Ẹghe nin usun ẹbho ki rẹ vae dọ deba ene ha rẹkhan ọlẹn na bhi agbaẹbho rẹ sẹbhi agbaẹbho khian, ọle da munhẹn ha noo arẹkhọkhọ rẹ ne ele talọ. Ọle da yọle: 5 “Okpea ọkpa da dagbare dọ kọ emhin. Ọle ki ha kọ ene ikpẹ, eso da denọ bhi egbodẹ. Ẹbho da re idia nunu ọle. Sẹyẹ, afianmhẹn ne tin bhi okhun da le ele. 6 Eso da denọ bhi uke udo. Ele rẹ jẹre, ele da kaka a, ranmhude ele bha miẹn amẹn rẹ wanre. 7 Ikpẹ eso da denọ bhi ẹwẹ igbẹn. Ele bi ene igbẹn ki ko wanre, ene igbẹn da ru ele ze bhi otọ. 8 Ikpẹ nekẹle da denọ bhi otọ nọn mhẹn. Ele ki jẹre, ele da mọn ikpẹ. Ikpẹ nin ele mọn da re igba iyisẹn* bun gbera ọne a rẹ kọ.” Ọle ki ta ene ọta nan fo, ọle da so dagbare yọle: “Ọnọn mhọn ehọ, ọ ha rẹ họn.”

9 Ọkpakinọn, edibo nesọle da nọọn ọlẹn ebi ọne arẹkhọkhọ mundia nan. 10 Ọle da yọle: “A re otọ nin bha rẹ lẹn ọta ẹkhokho ne khiale rẹji Agbejele nọnsi Osẹnobulua. Ọkpakinọn, rẹji ẹbho nekẹle, arẹkhọkhọ mẹn rẹ ne ele talọ. Beji a ha da miẹn ghe, arẹmiẹn ele taan ẹlo a ha ghe, ele idaghe emhin soso. Sẹyẹ, arẹmiẹn ele kaehọ, ele bha lẹn ebi a tẹmhọnlẹn. 11 Ọnan hi ebi ọne arẹkhọkhọ mundia nan: Ọne ikpẹ hi ọta nọnsi Osẹnobulua. 12 Ene denọ bhi egbodẹ, enan hi ene họn ọne ọta, ọkpakinọn, Ojuu da vae dọ re ọne ọta si ele bhi ọkhọle re nin ele hẹi rẹọbhọ, yẹ miẹn uhọnmhọn. 13 Ene denọ bhi uke udo, ele hi ẹbho ne họn ọne ẹmhọn yẹ re eghọnghọn miẹn ọlẹn ọbhi egbe. Ọkpakinọn, ele bha ha mhọn iniẹn. Ele da rẹọbhọ bhi ẹghe eso. Sokpan, ẹghe edọnmhẹn ki vae, ele da de. 14 Rẹji ene denọ bhi ẹwẹ igbẹn, enan hi ẹbho ne họn ọne ẹmhọn. Ọkpakinọn, ikpokpegbe, ikhu-afe bi ọlẹnlẹnbhegbe ọsi ọne agbọn nan da ru ele nyan otọ sẹsẹsẹ. Bhiriọ, ele bha yẹ sabọ wanre. 15 Ene denọ bhi otọ nọn mhẹn, ele hi ene họn ọne ọta yẹ re ọkhọle nọn mhẹn miẹn ọlẹn ọbhi egbe. Ele da yẹ re iziẹngbe ha mọn ikpẹ.

16 “Ọria soso iribhọ nọn ha re orukpa ru, yẹ re ukpamanku gue ọle, la mun ọlẹn ọbhi otọ ibẹd. Eji a mun orukpa i ọle a mun ọlẹn ọi, beji ọrebhe ne nabhi ọne uwa ha da sabọ ha daghe ẹfua. 17 Emhin soso iribhọ nan re nẹhe nọn ida dagbare. Sẹyẹ, emhin soso iribhọ nan fẹkẹ re nẹko nin ẹbho ida lẹn, la nọn ida dagbare bhi ughe. 18 Bhiriọ, bha ha kaehọ nọnsẹn. Ranmhude, ọnọn hi ki rẹ khin nọn mhọnlẹn a ki re ba ọle le. Ọkpakinọn, ọnọn hi ki rẹ khin nọn imhọnlẹn, a ki miẹn ọlẹn ebi ọle rẹ ha riale ọle mhọnlẹn.”

19 Inẹn Jesu bi ibhio ọle nin ikpea da vae dọ miẹn ọlẹn. Ọkpakinọn ele bha sabọ sẹbhi eji ọle ye ranmhude usun ẹbho ne ha ribhi enin. 20 Bhiriọ, ẹbho da dọ taman ọlẹn yọle: “Inẹn ẹn bi ibhio ẹ nin ikpea ribhi ole, ele guanọ nin ele miẹn uwẹ.” 21 Ọle da wanniẹn ele yọle: “Eria ne họn ọta nọnsi Osẹnobulua yẹ re ọle lu, ele hi inẹn imẹn bi ibhio imẹn.”

22 Ẹdẹ ọkpa, ọle bi edibo nesọle da nabhi ẹkẹ okọ. Ọle da taman ele yọle: “Bha ji mhan fan ẹdẹ ra diọbhi obọ nọnkẹle.” Bhiriọ, ele da ha khian. 23 Ọkpakinọn, beji ele ha gua khian, owe da re ọle. Okpahoho da munhẹn ha fi bhi ọne ẹdẹ, sẹyẹ, amẹn da ha nabhi okọ nọnsele, rẹ sẹbhọ ghe ọ da ho nọn ruẹ. 24 Ele ki da dọ riọ ọle bhi owe yẹ taman ọlẹn yọle: “Ọman-emhin, Oman-emhin, mhan khian la fuẹn an!” Bhiriọ, ọle da kpanọ yẹ taman ọne ahoho bi ọne ẹdẹ nọn ha fiyo-fire nọn lọre. Ele da lọre, ijerebhe da wo fure. 25 Ọle ki da taman ele yọle: “Urẹọbhọ nọnsẹbha bho?” Ọkpakinọn, ofẹn da wo ha mun ele, sẹyẹ, ebe sunu da han ele ilo. Ele da ha nọọn egbe ele yọle: “Họla ọne ọria nan gene khin? Ahoho bi okpẹdẹ bhọ hẹnmhọn nanlẹn.”

26 Ele da gua ọne okọ sẹbhi agbaẹbho ọsi Gẹrasa nọn ribhi obọ nọnkẹle bhi okpẹdẹ ọsi Galili. 27 Jesu ki ha sibhi okọ re, okpea ọkpa nin ẹlinmhin-ebe kpokpo da na bhi ọne agbaẹbho bu ọle re. Bhi ẹghe eso nian, eban-eban ọle rẹ ha khian. Sẹyẹ, eji a da re olinmhin tọ ọle ha dia i. Ọle idebhi uwa a. 28 Ọle ki daghe Jesu, ọle da so dagbare yẹ de ọbhi otọ bhi odalo ọle. Ọle da reso yọle: “Be rẹtẹ imẹn bi uwẹ, Jesu nin Ọmọn nọnsi Osẹnobulua nọn Ke Okhun Nẹ? Wowo, hẹi re oya nin mẹn.” 29 (Ranmhude, Jesu wo ha taman ọne ẹlinmhin nọn bha khia nọn si ọne ọkpea bhi egbe re. Ọne ẹlinmhin sẹ wo noo ọle bhi igba ne bunbun.* A sẹ wo re ighan gbanọ ọle obọ bi oẹ igba ne bunbun, yẹ re ọria ọbhọ nọn ha gbega ọle. Ọkpakinọn, ọne okpea ki fanọn ọne ighan ne kua. Ọne ẹlinmhin-ebe ki dia ọle ha khian eje fi ahiẹ a.) 30 Jesu da nọọn ọlẹn yọle: “Be a tie ẹ?” Ọle da yọle: “Usun,” ranmhude, ẹlinmhin-ebe ne bunbun, ele na ọle bhi egbe. 31 Ele da wo ha bhii ọle nin ọle hẹi je ele diọbhi ẹkẹ ọne uhio nọn imhọn ọkpẹnlẹn. 32 Bhi ọne ẹghe nan, usun une ne bunbun da ha le ebale bhi uke oke. Bhiriọ, ele da bhii ọle nin ọle ji ele da nabhi ẹkẹ ene une. Ọle da ji ele da nabhọ. 33 Ene ẹlinmhin-ebe da ki si ọne okpea bhi egbe re, yẹ nabhi ẹkẹ ene une. Ene une rebhe da na bhi ukpunun ọne oke kpono nabhi ẹkẹ ẹdẹ. Ele da ruẹ. 34 Ene re ene une kọn ki daghe ebe sunu, ele da nẹgbe. Ele da dọ ta ebe sunu man ẹbho ne ribhi ọne agbaẹbho, bi ẹbho ne ribhi idunmhun ne nẹga ele.

35 Bhiriọ, ene ẹbho da ha khian dọ daghe ebe sunu. Ele ki sẹbhi eji Jesu ye, ele da miẹn ọne okpea nan khu ẹlinmhin-ebe si ọle bhi egbe re. Ọne okpea ne ukpọn yọ, sẹyẹ, egbe daan ọlẹn. Ọle da dotua sikẹ Jesu. Ofẹn da wo ha mun ele. 36 Ẹbho nin ẹlo ele sẹbhi ebe sunu da taman ele ebi a rẹ re egbe daan ọne okpea nin ẹlinmhin-ebe rẹ ha kpokpo yẹ. 37 Usun ẹbho ne bunbun ne na bhi agbaẹbho ne nẹga Gẹrasa vae, da taman Jesu nọn kpanọ, ranmhude, ofẹn wo manman ha mun ele. Bhiriọ, ọle da nabhi ẹkẹ okọ yẹ muegbe nin ọle rẹ kpanọ. 38 Ọne okpea nin ẹlinmhin-ebe si ọle bhi egbe re da wo ha bhii ọle nin ọle rẹkhan ọlẹn. Ọkpakinọn, ọle bha ji ọle da rẹkhan ọlẹn. Ọle da yọle: 39 “Ha khian uwa, uwẹ ha dọ taman ẹbho ebi Osẹnobulua lu nin uwẹ.” Bhiriọ, ọle da kpanọ dọ ha wewe ọle bhi ọne agbaẹbho rebhe ebi Jesu lu nanlẹn.

40 Jesu ki fikie diọbhi Galili, ene ẹbho da wo miẹn ọlẹn ọbhi egbe, ranmhude, ele wo ha khẹ ọle. 41 Bhi ọne ẹghe nan, okpea ọkpa natiọle Jairọs da vae. Ọwanlẹn nọn gbẹloghe sinagọg ọle khin. Ọle da diguẹ bhi odalo Jesu yẹ ha bhii ọle nọn vae bhi uwa nọnsọle, 42 ranmhude, ukpọmọn okhuo ọkpa sẹsẹ nin ọle mhọnlẹn khian la yu. Ikpe igbeva ọne ọmọn khin.

Jesu ki ha khian isi ọle, usun ẹbho da vẹ rẹkhan ọlẹn. 43 Okhuo ọkpa da ha ribhọ nọn mọn da khọnmhọn emianmhẹn aranlẹn nọn na, rẹ na bhi ikpe igbeva. Ọle bha miẹn ọria nọn sabọ hinmhin ọlẹn. 44 Ọne okhuo da nabhi ikeke vae dọ re obọ so ehọ-ehọ ukpọn nọnsi Jesu. Bhi ọne ẹghenin tee, ọne aranlẹn bha yẹ ha na. 45 Jesu da ki yọle: “Họla re obọ so imẹn?” A bha miẹn ọnọn yọle ọle nọn, Pita da ki yọle: “Ọman-emhin, ẹbho vẹ ruru uwẹ, yẹ ha re egbe piẹnpiẹn uwẹ.” 46 Jesu da sẹyẹ yọle: “Ọria re obọ so imẹn, ranmhude imẹn lẹnmhin ghe ahu si mẹn bhi egbe re.” 47 Ọne okhuo ki kere ghe a lẹn ebi ọle lu, ọle da vae dọ diguẹ bhi odalo Jesu. Ọle da ha guọ. Ọle da taman ọrebhe ebezẹle nin ọle da re obọ so Jesu bi ebi egbe wo rẹ daan ọlẹn yẹ. 48 Jesu da taman ọlẹn yọle: “Ọmọn, urẹọbhọ nọnsẹ re egbe daan ẹn. Ha khian, egbe fu ẹ re.”

49 Beji ọle sẹyẹ ha talọ, okpea ọkpa da na bhi uwa ọsi ọne ọwanlẹn nọn gbẹloghe sinagọg vae. Ọle da ha yọle: “Ọmọn nọnsẹ yu. Hẹi yẹ kpokpo ọne Ọman-emhin.” 50 Jesu ki họn ọnan, ọle da taman Jairọs yọle: “Hẹi ji ofẹn mun uwẹ. Wo ha mhọn urẹọbhọ. A dẹ hinmhin ọlẹn.” 51 Ẹghe nin ọle rẹ sẹbhi ọne uwa, ọle bha ji ọria soso da rẹkhan ọlẹn nabhi ẹkẹ uwa, gbera Pita, Jemis, Jọni bi ene biẹ ọne ọmọn. 52 Ene ẹbho rebhe da ha viẹ yẹ lu akhiẹ ranmhude ọne ọmọn. Ọle da taman ele yọle: “Bha hẹi yẹ viẹ, ranmhude, ọne ọmọn bha yu, owe ọle ye.” 53 Ele ki họn ọnan, ele da ha jiẹ ọle. Ranmhude, ele lẹnmhin ghe ọne ọmọn yu. 54 Jesu da re ọne ọmọn obọ yẹ taman ọlẹn yọle: “Ọmọn, kpanọ!” 55 Ọne ọmọn da kie ha nyẹnlẹn.* Ọle da yẹ re osukpa kpanọ mundia. Jesu da yọle nan re ebale nanlẹn le. 56 Ene biẹ ọne ọmọn da wo manman ha ghọnghọn. Ọkpakinọn, Jesu da taman ele nin ele hẹi taman ọria soso ebe sunu.