Mak

10 Ọle da sibhi enin re diọbhi eji otọ ọsi Judia sẹle bhi obọ nọnkẹle bhi ẹdẹ Jọdan. Bhi enin, usun ẹbho da gbo bu ọle re. Beji ọle ka lu khẹ, ọle da munhẹn ha man ele emhin. 2 Ibhokhan Farisi da bu ọle re. Ranmhude ele guanọ nin ele dọnmhẹn ọlẹn, ele da nọọn ọlẹn si ọ be khẹke nin okpea khu okhuo ọle fia. 3 Ọle da wanniẹn ele yọle: “Uhi nela Mozis gbe nin ibha?” 4 Ele da yọle: “Mozis re otọ nin imhan rẹ ha re ebe nan rẹ khu okhuo bhi isi ọdọ nin ọne okhuo, yẹ khu ọle fia.” 5 Ọkpakinọn, Jesu da taman ele yọle: “Ranmhude iwobhuhọnmhọn nọnsẹbha, ọle zẹle nin Mozis da gbe ọne uhi nan nin ibha. 6 Sokpan, rẹ na bhi ẹghe umunhẹn ha vade, ọle Osẹnobulua re man ele okpea bi okhuo. 7 Ranmhude ọnan, okpea ki zẹ aba ọle bi inẹn ọlẹn obọ. 8 Sẹyẹ, ele veva ki kiẹn efun ọkpa. Bhiriọ, ele iyẹ da ha yi eva, efun ọkpa ele ki khin. 9 Bhiriọ, ebi Osẹnobulua gba kugbe, ọria soso hẹi wa ọle a.” 10 Ele ki gbo ha ribhi ẹkẹ uwa, ene edibo da munhẹn ha nọọn ọlẹn ẹmhọn ebi ọle tale. 11 Ọle da taman ele yọle: “Ọnọn hi ki rẹ khin nọn khu okhuo ọle fia, yẹ dọ re okhuo ọbhebhe, oghẹ ọle gbele. Ọle yẹ rahiẹ okhuo ọle. 12 Sẹyẹ, ahamiẹn okhuo nọn sibhi isi ọdọ re dọ bọ ọdọ ọbhebhe, oghẹ ọle gbele.”

13 Ẹbho da munhẹn ha muno imọn nesele ji ọle, beji ọle ha da re obọ so ele. Ọkpakinọn, edibo nesọle da ha ne ele gui. 14 Jesu ki daghe ọnan, ẹkẹ da khọ ọle. Ọle da taman ele yọle: “Ibha ji ene ibhokhan da bu imẹn re; ibha hẹi yẹ de ele idobolo, ranmhude, eria ne diabe ene ibhokhan nan, ele nyan Agbejele nọnsi Osẹnobulua. 15 Bhi ọsi ẹmhọanta, imẹn taman ibha ghe, ọria nọn hi ki rẹ khin, nọn bha miẹn Agbejele nọnsi Osẹnobulua ọbhi egbe bọsi obhokhan, ọle ida sabọ nabhọ.” 16 Ọle da si ene ibhokhan kẹ egbe, yẹ ha nan erọnmhọn nin ele. Ọle da ha ne obọ nyan ele.

17 Ọle ki ha khian, okpea ọkpa da runẹ bu ọle re, yẹ dọ diguẹ bhi odalo ọle. Ọne okpea da nọọn ọlẹn yọle: “Ọman-emhin Nọn Mhẹn, be imẹn ha lu nin imẹn da sabọ miẹn iẹnlẹn ọsi ighegheghe?” 18 Jesu da ki taman ọlẹn yọle: “Bezẹle nin uwẹ da tie imẹn ọnọn mhẹn? Gbera Osẹnobulua, ọria soso iribhọ nọn mhẹn. 19 Uwẹ lẹn ene uhi: ‘Hẹi gbugbele, hẹi gboghẹ, hẹi ra, hẹi sọsali ohoghe, hẹi mun ibo ẹ lu, mun ekpẹn nin aba ẹ bi inẹn ẹn.’” 20 Ọne okpea da taman ọlẹn yọle: “Ọman-emhin, imẹn wo ha re obọ rẹkhan ene uhi nan, rẹ na egbe obhokhan ha vade.” 21 Jesu ki ghe ọle, ẹmhọn ọlẹn da wo yẹẹ ọle a. Bhiriọ, ọle da taman ọlẹn yọle: “Emhin ọkpa kẹ uwẹ re. Ha khian dọ khiẹn emhin nesẹ, uwẹ ha re ọne igho nin ene ibhioguele. Ẹghenin, uwẹ ki ha mhọn emhin ne ghanlẹn bhi okhun. Sẹyẹ, uwẹ ha vae dọ ha rẹkhan imẹn.” 22 Ọkpakinọn, ebi Jesu taman ọlẹn da manman ba ọle bhi egbe. Bhiriọ, ọle da kiẹ-egbe kpanọ, ranmhude, ọle wo manman fe.

23 Jesu ki ghe ijerebhe nẹga, ọle da taman edibo nesọle yọle: “Ọ dẹ wo manman nọghọ nin ẹbho ne mhọn igho rẹ nabhi Agbejele nọnsi Osẹnobulua.” 24 Ọkpakinọn, ebi ọle tale da wo han edibo nesọle ilo. Jesu da ki taman ele yọle: “Imọn, ọ dẹ nọghọ gbe nan rẹ nabhi Agbejele nọnsi Osẹnobulua. 25 Nin kẹtẹkẹtẹ* rẹ na bhi uhio agbede gbera, ọle ha lẹkhẹ nẹ, nin ọria nọn fele rẹ nabhi Agbejele nọnsi Osẹnobulua.” 26 Ọne ẹmhọn da wo kie manman han ele ilo. Bhiriọ, ele da nọọn ọlẹn yọle:* “Họla ha ki sabọ miuhọnmhọn?” 27 Jesu ki da ghe ele ẹlo yẹ yọle: “Rẹji eria, ebe ida sabọ sunu nọn, sokpan, ọ iyi iriọ rẹji Osẹnobulua. Ranmhude, a imiẹn ebi Osẹ isabọ lu.” 28 Pita ki da taman ọlẹn yọle: “Ghọle! Imhan zẹ emhin rebhe obọ yẹ rẹkhan uwẹ.” 29 Jesu da yọle: “Bhi ọsi ẹmhọanta, imẹn taman ibha ghe, ọria nọn hi ki rẹ khin nọn zẹ uwa nọnsọle obọ, la ibhio ọle nin ikpea, la ibhio ọle nin ikhuo, la inẹn ọlẹn, la aba ọle, la imọn nesọle, la ugbo nọnsọle, ranmhude elin nọnsẹmhẹn, bi ranmhude ọne ọta nọn mhẹn, 30 ọle dẹ miẹn elele igba iyisẹn* bhi ọne ore nan nian. Ọle dẹ miẹn uwa, ibhio nin ikpea, ibhio nin ikhuo, inẹn, imọn, ugbo, bhi ẹkẹ ekpokpo. Ọle dẹ yẹ miẹn iẹnlẹn ighegheghe bhi agbọn* nọn vade. 31 Ọkpakinọn, ẹbho ne bunbun ne rẹ mun ọkalo dẹ mun ọkike. Sẹyẹ, ene mun ọkike ki mun ọkalo.”

32 Ejayenan nian, ele ki ha khian Jerusalẹm, Jesu da wo khianmhọn bhi odalo. Ọnan da wo han ele ilo. Ọkpakinọn, ofẹn da ha mun ẹbho eso ne rẹkhan ele. Ọle da gbo ne etuegbe igbeva nesọle diọbhi obọ ọkpa, yẹ ha taman ele emhin ne da kẹ sunu ji ọle. Ọle da yọle: 33 “Ghọle! Jerusalẹm mhan khian riọ, a dẹ mun Ọmọn nọnsi okpea nin ene ohẹn ne khua bi ene man uhi. Ele ki yọle nan gbe ọle a, yẹ mun ọlẹn nin ene ribhi ẹkẹ agbọn. 34 Ene eria nan ki zuọzuọ ọle, tuẹsẹn nyan ọlẹn, re asan gbe ọle, yẹ gbe ọle a. Ọkpakinọn, ukpẹdẹ nọnzi ea, ọle ki riọ kpanọ.”

35 Jemis bi Jọni nin imọn nesi Zẹbẹdi da bu ọle re, yẹ taman ọlẹn yọle: “Ọman-emhin, mhan guanọ nin uwẹ lu emhin nọn hi ki rẹ khin nin imhan bhii uwẹ le nin imhan.” 36 Ọle da nọọn ele yọle: “Be ibha guanọ nin imẹn lu nin ibha?” 37 Ele da yọle: “Re otọ nin mhan rẹ dotua sike ẹ bhi Agbejele nọnsẹ.* Ọkpa bhi ẹwẹ mhan ki ha ribhi obera nọnsẹ, ọnọnkẹle ki ha ribhi obọ agobọ nọnsẹ.” 38 Ọkpakinọn, Jesu da taman ele yọle: “Ibha bha lẹn ebi bha bhii imẹn le. Ibha dẹ sabọ wọn bhi ukpu nin imẹn da ha wọn? La bha dẹ be sabọ re egbe na bhi eji mẹn wo ha re egbe na?”* 39 Ele da wanniẹn ọlẹn yọle: “Ehe, imhan dẹ sabọmhin.” Jesu da ki taman ele yọle: “Gene-gene, bha dẹ wọn bhi ukpu nin imẹn da ha wọn. Sẹyẹ, bha dẹ re egbe na bhi eji mẹn wo ha re egbe na.* 40 Ọrẹyiriọ, ọ iyi imẹn ha tare ọnọn ha dotua bhi obera la obọ agobọ nọnsẹmhẹn. Eria nan mhanmhanlẹn khẹ, ele ha dotua bhọ.”

41 Ẹghe nin edibo igbe nekẹle ki rẹ họn ebe sunu, ẹkẹ Jemis bi Jọni da ha khọ ele. 42 Ọkpakinọn, Jesu da tie ele, yẹ taman ele yọle: “Ibha lẹnmhin ghe, ene gbẹloghe ene agbaẹbho denyẹnyẹn ele, sẹyẹ, ene ribhi ihe le ọba nyan ele. 43 Ọ bha khẹke nin emhin dia inian bhi ẹwẹ ibha. Ọkpakinọn, ọkhẹke nin ọria nọn ho nin ọle ha yi okpọria bhi ẹwẹ ibha ha ga enekẹle. 44 Sẹyẹ, ọkhẹke nin ọria nọn ho nin ọle mun ọkalo bhi ẹwẹ ibha ha yi igbọn nọnsẹbha. 45 Ranmhude, Ọmọn nọnsi okpea bhọ vae, ọ iyi nan dọ ha ga ọle, sokpan nin ọle dọ ga ẹbho, yẹ re iẹnlẹn nọnsọle zọese, nin ọle rẹ dẹ ẹbho ne bunbun kiere.”

46 Ele ki da sẹbhi Jẹriko. Ọkpakinọn, ẹghe nin ọle bi edibo nesọle bi usun ẹbho ne bunbun rẹ ha sibhi Jẹriko re, okpea ọkpa nọn ruẹlo, nọn yẹ bhii emhin, natiọle Batimiọs (ọmọn nọnsi Timiọs), da dotua bhi egbe uwedẹ. 47 Ẹghe nin ọle ki rẹ họn ghe Jesu nin obhi Nazarẹt, ọle gbera, ọle da munhẹn ha so yọle: “Jesu, Ọmọn nọnsi Devid, mhọn itohan da imẹn.” 48 Ẹbho ne bunbun da ha nanlẹn gui. Ele da ha taman ọlẹn nọn gue unun. Ọkpakinọn, ọle da kie manman ha so yọle: “Ọmọn nọnsi Devid, mhọn itohan da mẹn!” 49 Jesu da ki mundia, yẹ yọle: “Ibha tie ọle ji imẹn.” Bhiriọ, ele da tie ọne okpea nọn ruẹlo. Ele da taman ọlẹn yọle: “Hẹi ji ofẹn mun uwẹ! Kpanọ mundia; ọle tie ẹ.” 50 Ọle da ban ukpọn nin ọle yọ ke okhun re fia, yẹ jẹje kpanọ mundia bu Jesu. 51 Jesu da nọọn ọlẹn yọle: “Be uwẹ guanọ nin imẹn lu nin uwẹ?” Ọne okpea nọn ruẹlo da taman ọlẹn yọle: “Raboni,* taan mẹn ẹlo a nin imẹn ha daghe.” 52 Jesu ki da taman ọlẹn yọle: “Ha khian, urẹọbhọ nọnsẹ re egbe daan ẹn.” Bhi ọne ẹghe nin tee, ọle da munhẹn ha daghe. Sẹyẹ, ọle da munhẹn ha rẹkhan ọlẹn.