Filipai
1 Pọl bi Timoti nin igbọn nesi Jesu Kristi, ele gbẹn ọne ebe nan ji ene khiale rebhe ne rẹkhan Jesu Kristi bhi otọ Filipai, rẹ sẹbhi ene ewanlẹn bi ene rẹkpa ene ewanlẹn* bhi agbotu:
2 Mẹn bhii nin Osẹnobulua nin Aba mhan bi Jesu Kristi nin Ebeanlẹn imhan manman mhọn ifuẹkẹ da bha yẹ re ọfure nin bha.
3 Ẹghe nọn hi ki rẹ khin nin mẹn rẹ ria ẹmhọn bha, mẹn ki wo ha khuẹnmhẹn Osẹnobulua. 4 Ẹghe rebhe mẹn rẹ nan erọnmhọn ji bha rebhe. Eghọnghọn mẹn rẹ nan erọnmhọn, 5 ranmhude ẹsọn nin bha wo ha miẹn, nin bha rẹ ha wewe ọne ọta nọn mhẹn, rẹ na bhi ukpẹdẹ ọhẹnhẹn nan tale man bha rẹ dọ sẹbhi ọne ẹghe nan. 6 Mẹn wo rẹọbhọ ghe, Osẹnobulua nọn mun ọne iwẹnna esili nan hẹn bhi egbe nọnsẹbha dẹ lu ọle sotọ. Ọle dẹ lu iriọ rẹ sẹbhi ukpẹdẹ nin Jesu Kristi ha vae. 7 Ọ wo khẹke nin mẹn re inian ha ria ẹmhọn bha, ranmhude, mẹn wo manman hoẹmhọn bha. Imẹn bi ibha Osẹnobulua ko mhọn ifuẹkẹ da. Bha da yẹ wo ha rẹkpa mẹn ẹghe nin mẹn rẹ ha ribhi ighan, bi ẹghe nin mẹn rẹ ha guiẹzọ bhi ikotu, beji mẹn ha da miẹn isẹhoa rẹ ha ta ọne ọta nọn mhẹn.
8 Osẹnobulua lẹnmhin ghe ẹlo bha wo nyan mẹn. Mẹn wo manman hoẹmhọn bha beji Jesu Kristi rẹ hoẹmhọn bha. 9 Mẹn wo ha bhii nin oyẹẹ nin bha mhọn wo ha tuẹn okhun, sẹyẹ, nin bha ha mhọn ilẹnmhin nọn gbale, bi ilẹn-otọ-emhin nọn dinmhin. 10 Mẹn yẹ wo bhii, nin bha sabọ lẹn emhin ne lu uhọnmhọn-emhin nẹ, beji a ha da miẹn, rẹ sẹbhi ukpẹdẹ nin Kristi ha vae, bha ki khia, sẹyẹ, bha ida lu emhin nọn ha wẹghẹ urẹọbhọ ọsi eria ọbhebhe a. 11 Mẹn sẹyẹ bhii, nin bha sabọ miẹn elele bhi ene iwẹnna esili rebhe nin Jesu Kristi rẹkpa bha rẹ ha lu, yẹ re uyi bi ogẹn ji Osẹnobulua.
12 Ibhio, mẹn guanọ nin bha lẹn ghe idia nin mẹn ye wo re iwẹnna itẹmhọn Osẹnobulua manman ha tuẹn okhun. 13 Egbanegbe rebhe ne gbega ọnojie bi ene ẹbho nekẹle rebhe bhọ dọ lẹn ghe ranmhude odibo nọnsi Kristi mẹn khin, ọle zẹle nan da mun mẹn khue. 14 Ejayenan nian, ranmhude ighan nin mẹn ye, ibhio mhan ne bunbun nin mhan ko ga wo dọ manman ha mhọn izebhudu, ele wo ha re izebhudu rẹ tẹmhọn Osẹnobulua, ofẹn iyẹ mun ele.
15 Ẹmhọanta nọn ghe, ikhu bi oyadan, ọle rẹ ẹbho eso ha wewe ẹmhọn Kristi, ọkpakinọn, eso ribhọ ne re ọkhọle esili ha lu ọle. 16 Ele wo ha wewe ẹmhọn Kristi ranmhude ele hoẹmhọn ọlẹn. Ele lẹnmhin ghe, a zẹ imẹn nin mẹn dọ wewe ọne ọta esili. 17 Bhi obọ nọnkẹle, ọkhọle ebe ene re ikhu ha tẹmhọn Osẹnobulua mhọnlẹn. Ele guanọ nin ele si ẹmhọn ji mẹn bhi ighan. 18 Be ki nabhọre? Ebe nabhọre hi ghe, aharẹmiẹn ikpunun ele rẹ ha wewe ẹmhọn Kristi, la ẹkẹata ele rẹ ha lu ọle, a wo ha hẹnmhọn Kristi bhi ijerebhe. Ọnan wo re imẹn ha ghọnghọn. Bhi ọsi ẹmhọanta, mẹn dẹ wo ha ghọnghọn. 19 Mẹn lẹnmhin ghe, ọnan dẹ re umiẹnfan nin mẹn, ranmhude erọnmhọn nin bha wo ha nan nin mẹn bi urẹkpa nin ẹlinmhin nọnsi Jesu Kristi wo ha re nin mẹn. 20 Ọnan wo diẹn mun emhin nin mẹn guanọ, nin mẹn yẹ wo ha khẹ, ghe, emhin soso ida re ẹkhọle lo mẹn. Mẹn lẹnmhin ghe, mẹn dẹ sẹyẹ wo ha talọ beji ọ rẹ ghọn mẹn, beji a ha da miẹn ghe, imẹn ki sabọ re uyi ji Kristi bhi ejayenan beji mẹn ka lu khẹ, aharẹmiẹn mẹn ribhi agbọn la mẹn yu.
21 Bhi ọsẹmhẹn, beji mẹn sẹyẹ ribhi agbọn, Kristi mẹn nyẹnlẹn nan. Ọkpakinọn, mẹn ha yu, mẹn dẹ miẹn elele bhọ. 22 Mẹn ha sẹyẹ ha ribhi agbọn, mẹn ki miẹn otọ rẹ manman ha lu iwẹnna nọnsẹmhẹn. Ọrẹyiriọ, mẹn bha lẹn ọnọn ha yẹẹ mẹn nẹ. 23 Mẹn bha lẹn ọne imẹn ha zẹ bhi ene emhin nan veva. Mẹn wo rẹ ha guanọ nan re imẹn sibhi ọne egbe nan re, beji mẹn ha da bu Kristi. Bhi ọsi ẹmhọanta, ọnan bhọ hi ebe mhẹn nẹ. 24 Ọkpakinọn, ọ sẹyẹ wo manman khẹke nin mẹn ha ribhi agbọn ranmhude ibha. 25 Ranmhude ọnan, ọle zẹle nin mẹn ha da sẹyẹ deba bha ha ribhi agbọn, beji mẹn ha da rẹkpa bha rẹ ha lu re alo, yẹ ha ghọnghọn bhi oga. 26 Ẹghe nin mẹn ha rẹ fikie bu bha re, urẹọbhọ nin bha mhọn da Jesu Kristi dẹ wo ziẹn ọbhọ ranmhude imẹn.
27 Bha wo ha lu emhin bọsi eria ne lẹn ọne ọta nọn mhẹn rẹji Kristi, beji a da miẹn ghe, aharẹmiẹn mẹn vae bhi eji bha ye la mẹn bha vae, mẹn ki wo ha họn ghe ibha deziẹn bhi oga, ghe bha mhọn okugbe. Mẹn ki yẹ họn ghe ibha re ọkhọle ọkpa re wẹnna kugbe rẹ ziẹn urẹọbhọ nin bha mhọn da ọne ọta nọn mhẹn. 28 Bha hẹi ji ofẹn eghian bha ha mun bha. Izebhudu nin bha mhọnlẹn dẹ rẹman ele ghe a dẹ gbe ele khuelo. Ọ ki yẹ rẹman bha ghe bha dẹ miẹn umiẹnfan. Osẹnobulua hi ọnọn ha lu ọnan. 29 A re ọne isẹhoa nin bha rẹ mhọn urẹọbhọ da Kristi, yẹ loya nanlẹn. 30 Ọnọghọ nin mẹn miẹn bhi egbe, ọle bha tobọbha yẹ kuẹlo da. Ẹkẹ ọne ọnọghọ mẹn bhọ sẹyẹ ye nian.