Kọrint Nin Ọhẹnhẹn
13 Mẹn ha rẹ zẹ urolo ọsi eria la urolo ọsi ẹhi, nin mẹn ida mhọn oyẹẹ, inian mẹn diabe agogo nọn rolo, bi simba* nọn gheghe ha de. 2 Ahamiẹn mẹn sabọ kha akhasẹ, ahamiẹn mẹn lẹn otọ ọta ẹkhokho rebhe nọnsi Osẹnobulua, yẹ lẹn emhin rebhe, sẹyẹ, aharẹmiẹn mẹn mhọn urẹọbhọ nọn ha sabọ vu oke mun diọbhi ije ebhebhe, nin mẹn ida mhọn oyẹẹ, mẹn iyi emhin soso. 3 Aharẹmiẹn mẹn re emhin rebhe nesẹmhẹn rẹ re ebale nin ẹbho le, la mẹn re egbe nọnsẹmhẹn zọese nin ẹbho beji mẹn ha da ha dẹgbọ, ọkpakinọn, mẹn imhọn oyẹẹ, ebi mẹn lu ida ha yi emhin soso.
4 Ọria nọn mhọn oyẹẹ ziẹngbe emhin, ọ mhọn ifuẹkẹ. Ọ imhọn ikhu. Ọ idẹgbọ, ọ itọn egbe mun. 5 Ọ re ekpẹn lu emhin, ọ ikhu ọsi egbe ọle ọkpa, ẹkẹ ikẹ khọ ọle. Ọ ire ẹmhọn gbanọ bhi ẹkẹ. 6 Ọ ighọnghọn bhi ebe bha dia, ọkpakinọn, ọ ghọnghọn bhi ebe gbale. 7 Ọria nọn mhọn oyẹẹ miẹn emhin rebhe ọbhi egbe, ọ rẹọ bhi emhin rebhe, ọ mhọn ikhuaẹloghe bhi emhin rebhe, ọ yẹ ziẹngbe emhin rebhe.
8 Oyẹẹ ida fo ghee. Aharẹmiẹn mhan sabọ kha akhasẹ, la mhan sabọ zẹ urolo kẹkẹ, ene emhin nan dẹ siegbe kie. Sẹyẹ, aharẹmiẹn mhan mhọn ilẹnmhin, ọ dẹ gbera kie. 9 Ọ iyi emhin rebhe mhan lẹn bhi ejayenan nian. Sẹyẹ, akhasẹ nin mhan kha bha gba fo. 10 Ọkpakinọn, ẹghe nin ọne emhin nọn gbale ha rẹ vae, ene bha gba fo nan ki siegbe kie. 11 Ẹghe nin mẹn rẹ ha yi obhokhan, mẹn da ha talọ bii obhokhan, mẹn da ha ria eria bii obhokhan, mẹn da ha ghe emhin bii obhokhan. Ọkpakinọn, beji mẹn ki wanre nian, mẹn iyẹ lu emhin bii obhokhan. 12 Ejayenan nian, ebi mhan daghe bha gbanọn an. Inian ọ diabe mhan re ughegbe nọn bha gbanọn an rẹ ghe egbe. Ọkpakinọn, ẹghenin, ọ ki ha yi ghe-mẹn-ghe-uwẹ. Ọ iyi emhin rebhe mẹn sẹ lẹn nọnsẹn nian. Ọkpakinọn, ẹghenin, mẹn dẹ lẹn emhin rebhe nọnsẹn, beji a yẹ rẹ lẹn mẹn nọnsẹn. 13 Ene emhin ea nan dẹ sẹyẹ ha ribhọ: urẹọbhọ, ikhuaẹloghe bi oyẹẹ. Ọkpakinọn, ọnọn ke okhun nẹ bhi ẹwẹ ele hi oyẹẹ.