Be Uwedẹ Nọn Mhẹn Nẹn Nin Mhan Arẹ Muegbe Khẹ Eba Luẹ Bhi Ikolo Oga?

Ahamiẹn uwẹ nin Esali Jehova luẹ iBaibo, asabọ miẹn ghe uwẹ muegbe ọbhi otọ. Iriọ ọyẹ khẹke nin mhan rẹ ha muegbe khẹ ikolo oga, sade mhan ho nin mhan miẹn elele bhọ. Elele nọn mhẹn mhan ha miẹn bhọ sade mhan lu ọnan ẹghe rebhe.

Uwẹ da tobọ ẹ zẹ ẹghe bi eji uwẹ ha da muegbe ikolo. Ẹghe la uwẹ ha rẹ sabọ de ẹlo re rẹ lu ọnin iluẹmhin nan? Ọsi ewewiẹ uwẹ kuẹ muhẹn ha wẹnna, la ọsi emuan sade enin ibhokhian nowẹ fo? Arẹmiẹn uwẹ bha sabọ lu ọnan bue, mhanmhanlẹn ọbhi ẹghe nọn fuẹ bhi egbe, hẹi ji emhin si uwẹ obọ ri ikeke. Guanọ eje fi ahiẹ a, eji uwẹ ha da sabọ mun ẹlo ọbhi ebi uwẹ luẹ nọnsẹn. Nan erọnmhọn fo ukuẹ munhẹn, nuwẹ ha da sabọ mun ọkhọle ọbhi ebi uwẹ luẹ bhi ẹkẹ iBaibo nọnsẹn.​—⁠Philippians 4:​6, 7.

Ri iyaman ọbhọ, beji uwẹ ha da sabọ deba ọnin izilo. Ka lẹn ebi ọnin ebe ta. Zilo nyan uhọnmhọn-ọta ọsi ọnin iluẹmhin, zilo nyan uhọnmhọn-ọta rẹsi uhọnmhọn-ọta nọn ribhi ẹkẹ ọle. Yẹ fẹ enin adudu ghe bi inọnta ne ribhi ẹkẹ ọle nọn a rẹkpa ẹ rẹ lẹn ebe ribhi ọnin ebe. Tie udu ọle ne ribhọ, guanọ ewaniẹn rẹji inọnta ne ribhọ. Tie iBaibo ne rẹkhan lẹn, zilo nyan ebi ọle rẹ rẹsui ebi uwẹ luẹ yẹ. (Acts 17:11) Uwẹ ha min ọnin ewaniẹn, ri iyaman ọbhọ. Ọnin a rẹkpa ẹ rẹ yere. Uwẹ a ki a ribhi ikolo oga, uwẹ ki sabọ ri obọ okhun rẹ ri ewaniẹn ọbhọ sade a tie ẹ.

Uwẹ a zilo nyan uhọnmhọn-ọta kikẹ nan ha luẹ bhi ikolo oga, uzana rẹsi uzana, ọki rẹkpa ẹ rẹ lẹn ba ilẹnmhin iBaibo nuwẹ ka mhọn khẹ.​—⁠Matthew 13:​51, 52.

• Uwedẹ nela mhẹn nẹn nuwẹ arẹ a muegbe ikolo oga?

• Be uwẹ arẹ muegbe yẹ nuwẹ ada sabọ re ewaniẹn ọbhi inọnta bhi ikolo oga?