Ebi Mhan Ha Rẹ Sabọ Manman Ha Mhọn Eghọnghọn Yẹ Bhi Iwẹnna Itẹmhọn Osẹnobulua

1. Be ọ dia ẹbho eso bhi egbe yẹ rẹ ha ne ẹbho zilo bhi inẹbho? (Yẹ fẹ ifoto ghe.)

MHAN tẹmhọn Osẹnobulua man ẹbho ranmhude mhan hoẹmhọn Aba mhan nọn ribhi okhun, sẹyẹ, mhan ho nin mhan rẹkpa idiake nesẹmhan rẹ dọ lẹn ọlẹn. Ibhio mhan ne bunbun manman wo sọnyẹnmhẹn bhi ọne iwẹnna nan. Ọkpakinọn, eso i sọnyẹnmhẹn bhọ. Bezẹle? Ẹkhọ sabọ rẹ ha lo eso, la ha riale ghe ele i guẹ rẹ man emhin nọnsẹn. Ọ nọghọ eso rẹ wo bu ẹbho bhi uwa dọ ha tẹmhọn Osẹnobulua man ele. Eso sabọ rẹ ha mun ofẹn ghe ẹbho dẹ fi bhi ẹlo mun ele. Ranmhude uwedẹ nan rẹ bẹẹ eso bhi ẹwẹ mhan wanre, ele i zẹwẹ ho nin ele bi ẹbho ko miẹn ẹmhọn. Arẹmiẹn ene ibhio mhan nan manman hoẹmhọn Jehova, ọ nọghọ ele rẹ bu ọria nin ele bha ka lẹn khẹ wo dọ nin ọle ha zilo. Ọrẹyiriọ, ele lẹn ebi ọne iwẹnna lu uhọnmhọn emhin sẹ yẹ, sẹyẹ ele dọnmhegbe rẹ ha lu ọle ẹghe rebhe. Edandan i ribhọ ghe ọnan wo re Jehova ghọnghọn!

2. Bezẹle nọn bha da khẹke nin uwẹ ji ọ re egbe lọ uwẹ sade uwẹ i manman sọnyẹnmhẹn bhi inẹbho?

² Ene emhin nan be re ọle nọghọ uwẹ rẹ ha sọnyẹnmhẹn bhi iwẹnna itẹmhọn Osẹnobulua ẹgheso? Ọ ha yi riọ, hei ji egbe lọ uwẹ. Nin uwẹ rẹ ha riale ghe uwẹ bha guẹ sẹ rẹman ghe uwẹ mhọn idegbere, sẹyẹ uwẹ bha ho nin uwẹ ha tie bhi egbe. Sẹyẹ, ọ rẹman ghe uwẹ bha guanọ nin uwẹ nin ẹbho ha gbugan. Ọria i ribhọ nọn ghọnghọn bhọ sade a bha miẹn ọlẹn bhi egbe, manman nọn sade urẹkpa ọle ho nin ọle rẹkpa. Aba ẹ nọn ribhi okhun wo lẹn ene ọnọghọ nin uwẹ kuẹlo da, sẹyẹ, ọle muegbe nin ọle rẹ re urẹkpa nin uwẹ guanọ nin uwẹ. (Isa. 41:13) Bhi ọne uhọnmhọn-ọta nan, mhan dẹ zilo nyan emhin isẹn ne ha sabọ rẹkpa mhan rẹ khọn ene ọnọghọ nan, yẹ rẹ sabọ ha ghọnghọn bhi iwẹnna itẹmhọn Osẹnobulua.

ỌTA NỌNSI OSẸNOBULUA DẸ SABỌ RE AHU NIN UWẸ

3. Be rẹkpa Jerimaya nin akhasẹ rẹ ha tẹmhọn Osẹnobulua?

³ Rẹ na otọ ha de, ọta nọnsi Osẹnobulua sẹ wo re ahu nin eguọmhandia nesọle rẹ sabọ miẹnsọn nọn bha lẹkhẹ. Bha ji mhan fẹ ijiẹmhin ọsi Jerimaya nin akhasẹ ghe. Ọle da ha si egbe re ikeke ẹghe nin Jehova rẹ taman ọlẹn nin ọle dọ wewe ẹmhọn ọlẹn. Jerimaya da yọle: “Mẹn bha lẹn ebi a rẹ talọ yẹ ranmhude obhokhan mẹn gheghe khin.” (Jer. 1:6) Ọkpakinọn, be re izebhudu nanlẹn rẹ sabọ lu ọne iwẹnna? Ọta nọnsi Osẹnobulua re ahu nanlẹn. Ọle da yọle: “Ọ da diabe a kuẹ eranlẹn ọbhi iguẹ nesẹmhẹn. Imẹn bha yẹ sabọ mun ọlẹn mhọn.” (Jer. 20:​8, 9) Arẹmiẹn ẹbho bha zẹwẹ ha ka Jerimaya ehọ bhi eji ọle da ha lu ọne iwẹnna itẹmhọn Osẹnobulua, ọne uhọnmhunje nan taman ọlẹn nin ọle dọ wewe da re ahu nọn khẹke nanlẹn rẹ sabọ miẹn ọne ẹsọn.

4. Be nabhọre sade mhan tie Ọta nọnsi Osẹnobulua yẹ ria eria nyan ọlẹn? (Kolose 1:​9, 10)

⁴ Ẹmhọn ne ribhi Baibo wo re ahu nin eria ne ga Osẹnobulua. Bhi ilẹta nin Pọl nin odibo gbẹn ji agbotu nọn ribhi Kolose, ọle da yọle ghe, ele da ha luẹ Baibo, ọ dẹ re ahu nin ele rẹ “ha lu emhin bii eria ne ga Jehova” yẹ wo “ha lu emhin esili rebhe.” (Tie Kolose 1:​9, 10.) Nan rẹ ha wewe ẹmhọn Agbejele deba bhi ọne emhin esili nan. Bhiriọ, ọ ziẹn urẹọbhọ nọnsẹmhan sade mhan tie Ọta nọnsi Osẹnobulua yẹ ria eria nyan ọlẹn, sẹyẹ, ọ rẹkpa mhan rẹ lẹn ebezẹlẹ nọn da manman lu uhọnmhọn emhin nin mhan rẹ ha tẹmhọn Agbejele man ẹbho.

5. Be imhan ha rẹ sabọ manman ha miẹn elele yẹ bhi Baibo nin mhan tie?

⁵ Ahamiẹn uwẹ ho nin uwẹ manman miẹn elele bhi Ọta nọnsi Osẹnobulua, ọ bha khẹke nin uwẹ re otua-otua ha tie ọle yẹ ria eria nyan ọlẹn. Wo re ẹghe ọbhi otọ re ha lu ọle. Ahamiẹn uwẹ tie ijeso nọn bha lẹkhẹ nin uwẹ rẹ lẹn otọle, hẹi wo san gbera ọle. Sokpan, noo Watch Tower Publications Index, la Research Guide for Jehovah’s Witnesses rẹ fẹ ebi a rẹ gbotọ ọne ulọnlẹn fanọan yẹ. Ahamiẹn uwẹ re ẹghe ọbhi otọ rẹ ha luẹ Ọta nọnsi Osẹnobulua, uwẹ ki wo dọ manman rẹọbhọ ghe, ẹmhọanta emhin rebhe ne ribhi Baibo khin. (1 Tẹsẹ. 5:21) Beji uwẹ ha rẹ manman ha rẹọbhi emhin rebhe nin Baibo tale, iriọ ọ ha rẹ manman ha ghọn uwẹ rẹ ha tẹmhọn emhin nin uwẹ luẹ man ẹbho.

MUEGBE ỌBHI OTỌ NỌNSẸN ỌKUẸSẸ UWẸ DAGBARE BHI INẸBHO

6. Bezẹle nọn da khẹke nin mhan muegbe ọbhi otọ nọnsẹn ọkuẹsẹ mhan dagbare bhi inẹbho?

⁶ Ahamiẹn uwẹ manman muegbe ọbhi otọ nọnsẹn ọkuẹsẹ uwẹ dagbare bhi inẹbho, asabọmiẹn ofẹn i da ha mun uwẹ sade uwẹ nin ẹbho zilo. Jesu da rẹkpa edibo nesọle rẹ muegbe ọbhi otọ nọnsẹn ọkuẹsẹ ọle je ele dagbare bhi inẹbho. (Luk 10:​1-11) Ranmhude ene edibo re obọ rẹkhan emhin nin Jesu man ele le, ele da ha ghọnghọn bhi emhin nin ele sabọ lu.—Luk 10:17.

7. Be mhan ha rẹ sabọ muegbe inẹbho ọbhi otọ yẹ? (Yẹ fẹ ifoto ghe.)

⁷ Be imhan ha rẹ sabọ ha muegbe ọbhi otọ yẹ? Ọkhẹke nin mhan ria eria nyan ebi mhan ha rẹ nin ẹbho zilo yẹ, bi ebi mhan ha rẹ lu ọle yẹ tee. Ọ dẹ ha mhẹn nin mhan rẹ ria eria nyan eva, la ea bhi ene uwedẹ nin ẹbho kẹ rẹ ne mhan lu emhin bhi inẹbho, bi ebi mhan ha rẹ re ele khian yẹ. Ahamiẹn mhan nin ẹbho zilo, ọkhẹke nin mhan dọnmhegbe ku ẹgbe ọi, nin ele lu ẹmhin bọsi imọẹ, yẹ mun ojiẹ koko bhi unun.

8. Beji Pọl nin odibo tẹmhọnlẹn, be bhọ Kristiẹn rẹ diabe akhe nan re ekẹn man yẹ?

⁸ Pọl nin odibo da taman ibhio ọle nin ele ko ga ghe, inian “mhan diabe akhe nan re ekẹn man, Osẹnobulua da mun iwẹnna oga nọn ghanlẹn mhan bhi obọ.” (2 Kọr. 4:7) Be bhọ hi ọne iwẹnna oga nọn ghanlẹn? Ọle hi ẹmhọn Agbejele nin mhan wewe man ẹbho beji ele ha da miẹn umiẹnfan. (2 Kọr. 4:1) Be bhọ ene akhe nan re ekẹn man? Ele mundia nin eguọmhandia nesi Osẹnobulua ne wewe ọne ọta nọn mhẹn man ẹbho. Bhi ẹghe ọsi Pọl, akhe nan re ekẹn man ẹbho ne do ẹki noo rẹ muno emhin ne ghanlẹn, emhin bii, ebale, anyọn bi igho. Iriọ Jehova yẹ rẹ noo mhan rẹ tẹmhọn ọlẹn man ẹbho. Ranmhude Jehova ri mhan bhi ikeke, mhan dẹ sabọ miẹn ahu rẹ miẹn ọne ẹsọn sotọ.

BHII JEHOVA NỌN RE IZEBHUDU NIN UWẸ

9. Be imhan ha rẹ sabọ khọn ofẹn eria yẹ, la ọne ofẹn ghe a i da miẹn mhan ọbhi egbe? (Yẹ fẹ ifoto ghe.)

⁹ Ẹgheso, ofẹn eria sabọ rẹ ha mun mhan, la mhan sabọ ha riale ghe a i da miẹn mhan ọbhi egbe. Be imhan ha rẹ sabọ khọn ọne ọnọghọ nan yẹ? Bha ji mhan fẹ erọnmhọn nin ene edibo nan beji a taman ele nin ele hẹi yẹ tẹmhọn Osẹnobulua. Ele bha ji ofẹn ha mun ele, sokpan ele da bhii Jehova nọn rẹkpa ele “rẹ ha re izebhudu ta ọta [nọnsọle].” Jehova da wo wanniẹn erọnmhọn nọnsele. (Iwẹnna 4:​18, 29, 31) Bọsi ene edibo, ahamiẹn ofẹn mun mhan ẹgheso, ọkhẹke nin mhan bhii Jehova nọn rẹkpa mhan. Bhii ọle nọn rẹkpa uwẹ rẹ manman hoẹmhọn ẹbho beji a ha da miẹn ofẹn bha ha mun uwẹ rẹ tẹmhọn Agbejele man ele.

10. Be Jehova rẹ rẹkpa mhan yẹ rẹ sabọ wo ha sọsali nanlẹn? (Isaiah 43:​10-12)

¹⁰ Jehova zẹ mhan nin mhan ha sọsali nanlẹn, sẹyẹ, ọle ve ghe ọle dẹ rẹkpa mhan rẹ ha mhọn izebhudu. (Tie Isaiah 43:​10-12.) Bha ji mhan fẹ uwedẹ enẹn ghe nin ọle rẹ lu ọnan. Ọhẹnhẹn, Jesu ri mhan bhi ikeke ẹghe nọn hi ki rẹ khin nin mhan rẹ wewe ọne ọta nọn mhẹn. (Mat. 28:​18-20) Ọzeva, Jehova je ene ẹhi ne ha rẹkpa mhan. (Arẹm. 14:6) Ọzea, Jehova re ẹlinmhin nọn khiale nin mhan nọn ha ye mhan ene emhin nin mhan ka luẹ re. (Jọni 14:​25, 26) Ọzenẹn, ọle ne ibhio nin mhan bhi agbotu ne ha rẹkpa mhan. Ranmhude urẹkpa nin mhan miẹn bhi obọ Jehova, bi bhi obọ ene ibhio mhan nin mhan ko ga, mhan dẹ wo sabọ re izebhude ha tẹmhọn ọlẹn, yẹ lu ọle sotọ.

HA FI UWEDẸ NIN UWẸ RẸ TẸMHỌN OSẸNOBULUA DENỌ, YẸ HA MHỌN ỌLẸN BHI ỌKHỌLE GHE EMHIN ESILI DẸ NABHỌRE

11. Be uwẹ ha rẹ sabọ manman miẹn ẹbho ne zilo yẹ sade uwẹ ribhi inẹbho? (Yẹ fẹ ifoto ghe.)

¹¹ Ọ be re egbe lọ uwẹ sade uwẹ bha manman ke ẹbho re bhi uwa? Ọ dẹ ha mhẹn nin uwẹ rẹ nọọn egbe ẹ ene inọnta nan: ‘Ji ẹbho ne ribhi idunmhun nin mẹn da tẹmhọn Osẹnobulua ye nian?’ (Iwẹnna 16:13) ‘Iwẹnna ele be ye nian la ẹki?’ Ọ ha yi iriọ, uwẹ dẹ be sabọ dọ debhi egbe ukhuo a dọ ha tẹmhọn Osẹnobulua? Obhio mhan natiọle Joshua da yọle: “Mẹn sẹ wo miẹn isẹhoa rẹ tẹmhọn Osẹnobulua bhi eji a da do ẹki, bi bhi eji ẹbho da manman bunbun.” Ọle bi okhuo ọle nin Bridget sẹ wo manman ke ẹbho re bhi uwa nin ele rẹ dọ ha tẹmhọn Osẹnobulua ọsemuan bi ọsodamhẹn bhi ẹdẹ Sọnde.—Ẹfẹ. 5:​15, 16.

12. Be mhan ha rẹ sabọ lẹn ebi ẹbho rẹọ i yẹ, la emhin nọn rẹtẹ ele?

¹² Ahamiẹn ẹbho bha manman re ehọ ọbhi uhọnmhuje nin uwẹ wewe, dọnmhegbe rẹ lẹn otọ ebe ele rẹọ i, la ebe rẹtẹ ele. Inọnta ne ribhi odalo itrati nọnsẹmhan, ele Joshua bi Bridget kẹ wo noo sade ele ho nin ele munhẹn ha ne ọria zilo. Bhi ọsi ijiẹmhin, ahamiẹn ele noo itrati nọn yọle, Be Uwẹ Ghe IBaibo Yẹ? ele ki yọle: “Ẹbho eso rẹọbhọ ghe Osẹnobulua nyan Baibo, ọkpakinọn eso bha manman rẹọbhọ, be uwẹ riale yẹ?” Ọne uwedẹ nan wo re ọle lẹkhẹ nin ele rẹ nin ẹbho zilo.

13. Aharẹmiẹn ẹbho bha ka mhan ehọ, bezẹle nin mhan ha da sabọ yọle ghe iwẹnna itẹmhọn Osẹnobulua nin mhan lu kiọnlẹn? (Proverbs 27:11)

¹³ Ọ i yi uwedẹ nin ẹbho rẹ ka mhan ehọ ha rẹman si iwẹnna itẹmhọn Osẹnobulua nin mhan lu kiọnlẹn. Bezẹle nin mhan da ta iriọ? Ranmhude mhan miẹn ọne ẹsọn nin Jehova bi Ọmọn nọnsọle mun nin mhan, ọnin hi, nin mhan rẹ wewe ẹmhọn Agbejele. (Iwẹnna 10:42) Bhiriọ, aharẹmiẹn mhan bha miẹn ẹbho ne talọ, la ẹbho bha miẹn uhọnmhunje nọnsẹmhan ọbhi egbe, mhan dẹ sabọ ha ghọnghọn ranmhude mhan lẹn sẹ ghe mhan lu emhin nọn ti Aba mhan nọn ribhi okhun bhọ.—Tie Proverbs 27:11.

14. Bezẹle nin mhan ha da sabọ ha ghọnghọn sade obhio mhan miẹn ọria nọn muegbe rẹ luẹ ẹmhọanta bhi idunmhun nin mhan da tẹmhọn Osẹnobulua?

¹⁴ Mhan dẹ yẹ sabọ ha ghọnghọn sade obhio mhan ọbhebhe miẹn ọria nọn muegbe rẹ luẹ ẹmhọanta bhi idunmhun nin mhan da tẹmhọn Osẹnobulua. Ebe Ọkhẹughe nọnsẹmhan sẹ wo re iwẹnna nin mhan lu rẹ khọkhọ uwedẹ nan rẹ guanọ obhokhan nọn yulua. Ẹbho ne bunbun kugbe guanọ ọle na bhi ije rebhe. A ha miẹn ọne ọmọn, ọ i yi ọria nọn miẹn ọlẹn ọkpa ghọnghọn, ọrebhe ne kugbe guanọ ọle ko ghọnghọn. Iriọ yẹ nọn, imhan rebhe kugbe lu ọne iwẹnna nan rẹ re ẹbho kiẹn edibo. Ọrebhe bhi agbotu ko dagbare dọ ha tẹmhọn Osẹnobulua bhi idunmhun nin mhan da lu ọle. Sẹyẹ, mhan rebhe ko ghọnghọn ọbhọ sade ọria munhẹn ha vae bhi ikolo oga nesẹmhan.

HA RIA ẸMHỌN OYẸẸ NIN UWẸ MHỌN DA JEHOVA BI IDIAKE NESẸ

15. Be ẹmhọn nọn ribhi Matiu 22:​37-39 ha rẹ rẹkpa mhan yẹ rẹ manman ha mhọn ọyaya bhi iwẹnna itẹmhọn Osẹnobulua? (Yẹ fẹ adudu nọn ribhi odalo ọle ghe.)

¹⁵ Mhan dẹ sabọ manman ha mhọn ọyaya bhi iwẹnna itẹmhọn Osẹnobulua sade mhan ria ẹmhọn oyẹẹ nin mhan mhọn da Jehova bi idiake nesẹmhan. (Tie Matiu 22:​37-39.) Ria ẹmhọn ebi ọ rẹ re Jehova ghọnghọn yẹ sade ọle daghe mhan lu ọne iwẹnna, bi ebi ẹbho ha rẹ ha ghọnghọn yẹ sade ele munhẹn ha luẹ Baibo. Sẹyẹ, ria ẹmhọn umiẹnfan nin eria ne re ehọ ọbhi uhọnmhunje nin mhan wewe ha miẹn.—Jọni 6:40; 1 Tim. 4:16.

16. Be mhan ha rẹ sabọ ha ghọnghọn bhi iwẹnna itẹmhọn Osẹnobulua yẹ ahamiẹn mhan i yẹ sabọ sibhi uwa re? Re ijiẹmhin ọbhọ.

¹⁶ Idia nin uwẹ ye be re uwẹ miẹn ghe uwẹ i yẹ sabọ sibhi uwa re? Ọ ha yi iriọ, dọnmhegbe rẹ lu ebi uwẹ ha sabọ lu rẹ re oyẹẹ nin uwẹ mhọn da Jehova bi idiake nesẹ man. Bhi ẹghe emianmhẹn KOVID-19, Samuel bi okhuo ọle nin Dania bha yẹ sabọ ha sibhi uwa re. Bhi ene ẹghe nan, ele da wo ha re ifoni rẹ tẹmhọn Osẹnobulua, ha gbẹn ilẹta, yẹ re zumu rẹ man ẹbho Baibo. Samuel da ha tẹmhọn Osẹnobulua man ẹbho nin ọle miẹn bhi họspita nin ọle da ha gbẹloghe egbe bhi emianmhẹn Kansa nin ọle ha khọnmhọn. Ọle da yọle: “Ahamiẹn mhan ribhi ọkakale, egbe sabọ rẹ lọ mhan, sẹyẹ mhan ki manman ha kpokpo egbe. Rẹ deba ọnin, ọ sabọ rẹ ha nọghọ mhan rẹ ziẹngbe. Bhiriọ, ọkhẹke nin mhan ha ghọnghọn bhi eka nin mhan sabọ lu nin Jehova.” Bhi ẹkẹ enan rebhe Dania da dere. Ranmhude ọnan, ije ọkpa ọle ki ha yẹ bhi ẹkẹ uki ea. Emhin nin eria ne i sabọ khian noo rẹ khian ọle ki ha noo bhi ẹkẹ uki ehan. Ọle da yọle: “Mẹn da dọnmhegbe lu eka nin idia nọnsẹmhẹn re otọ nin mẹn rẹ lu. Mẹn da tẹmhọn Osẹnobulua man ọkpa bhi eria ne gbẹloghe mẹn nọn dọ fẹ mẹn ghe, bi eria ne ha muno emhin ji mhan bhi uwa. Sẹyẹ mẹn da re foni rẹ tẹmhọn Osẹnobulua man okhuo ọkpa nọn wẹnna bhi họspita.” Ẹmhọanta nọn ghe, idia nin Samuel bi Dania ye bha yẹ re otọ nin ele rẹ lu eka nin ele ka lu khẹ. Ọkpakinọn, ele da dọnmhegbe rẹ lu eka nin ele ha sabọ lu, yẹ ji ọ re ele ha ghọnghọn.

17. Be ọkhẹke nin uwẹ lu sade uwẹ ho nin uwẹ manman miẹn elele bhi ene emhin nan tẹmhọnlẹn bhi ọne uhọnmhọn-ọta nan?

¹⁷ Dọnmhegbe re obọ rẹkhan ene emhin isẹn nin mhan zilo ọle bhi ọne uhọnmhọn-ọta nan. Inian ọdeọde bhi ẹwẹ ele diabe emhin kẹkẹ nan rẹ nyẹn ebale. A ha noo ene emhin rebhe kugbe, ọne ebale ki wo manman ha mhẹn bhi unun. Iriọ yẹ nọn, ahamiẹn mhan re obọ rẹkhan ene emhin nin mhan luẹ bhi ọne uhọnmhọn-ọta nan, ọ ki rẹkpa mhan rẹ lẹn ebi mhan ha rẹ ha re emhin nin mhan miẹn bhi inẹbho khian yẹ, sẹyẹ mhan ki manman ha sọnyẹnmhẹn bhọ.