ILUẸMHIN 10

Re Uru Nọn Khẹke Talọ

Proverbs 8:4, 7

EBI UWẸ HA LU: Ji ebi uwẹ ta khia bhi ehọ, ji ọle rẹso eria bhi ọkhọle. Nin uwẹ rẹ lu ọnan, uwẹ dẹ si uru okhun la si ọle re otọ, tua ta ọta la siọ ọta bhi otọ bhi eji ọ da khẹke. Yẹ ha fi uru denọ rẹ talọ beji ọ rẹ khẹke ọta nin uwe ta.

EBI A RẸ LU ỌLE YẸ:

Ha si uru okhun yẹ si uru re otọ beji ọ rẹ khẹke. Si uru okhun sade uwẹ sounun bhi ọta kpataki ne ribhi ọta nin uwẹ rẹman, bi sade uwẹ guanọ nin ene uwẹ ne talọ ha mhọn ọtibhọ rẹ re obọ rẹkhan ebi uwẹ ta. Sẹyẹ si uru okhun sade uwẹ tie iBaibo nan da ha wewe uhọnmhunje ọsi ibhohiẹn rẹji ọria la agbaẹbho. Si uru re otọ sade uwẹ guanọ nin uwẹ re ọle ha yẹẹ eria rẹ họn ebi uwẹ ho nin uwẹ ta, la sade uwẹ ho nin uwẹ tẹmhọn nọn ha re ofẹn ha mun ọria, la nọn ha sabọ re ọria ha kpokpo egbe.

Ahamiẹn ẹghe rebhe uwẹ rẹ wo si uru okhun, ọ ki diabe ghe, uwẹ so ene uwẹ ne talọ bhi uhọnmhọn. Fẹkẹ re ariri ba ebi uwẹ ta, nan hẹi do miẹn ghe, uwẹ ẹbho rebhe ki ghe.
Ha fi uru denọ rẹ talọ beji ọ rẹ khẹke ọta nin uwe ta. Beji uwedẹ nin mhan rẹ talọ sade mhan ghọnghọn rẹ dikẹ bhi uwedẹ nin mhan rẹ talọ sade mhan lu akhiẹ, iriọ mhan ha yẹ rẹ fi uru denọ sade mhan tẹmhọn emhin eghọnghọn la emhin akhiẹ. Ahamiẹn uwẹ guanọ nin uwe re ukpọnọmhin, la ukheremhin, la utanmhin ọsi emhin man, uwẹ sabọ rẹ siọ ikpebe ọsi ikpọta eso bhi otọ. Bhi ọsi ijiẹmhin, uwẹ sabọ rẹ siọ “e” bhi “ree,” nin uwẹ rẹ rẹman ghe ọ manman ree.
Tua ta ọta la siọ ọta bhi otọ bhi eji ọ da khẹke. Ahamiẹn ghe emhin nan ha rẹ ọtibhọ ta uwẹ ho nin uwẹ ta, tua tale. Ahamiẹn ọta kpataki uwẹ guanọ nin uwẹ ta, siọ tale.

Hẹi wo re isukpa fidenọ ha tua talọ, la re isukpa mundia ha siọ ọta bhi otọ. Uwẹ ha lu iriọ, ene uwẹ ne talọ ki ha riale ghe ọ bha fure mun uwẹ. Hẹi tua talọ gbe sẹbhi eji a ha da miẹn ghe, ebi uwẹ ta bha yẹ khia bhi ehọ nọnsẹn.