ILUẸMHIN 12

Re Ẹjẹjẹ bi Aria-ji-egbe Man

1 Thessalonians 2:7, 8

EBI UWẸ HA LU: Ha ne eria talọ beji ọ gene dia uwẹ yẹ bhi egbe. Ji ene uwẹ ne talọ lẹn ghe, uwẹ hoẹmhọn ele, uwẹ guanọ nin uwẹ rẹkpa ele.

Ha mhọn eria nin uwẹ da ne talọ bhi ọkhọle. Nin uwẹ rẹ mun ọkhọle nọnsẹ egbe nọnsẹn, ye ọnọghọ nin ele kuẹlo da re. Dọnmhegbe nin uwẹ rẹ ria ẹmhọn ebi emhin dia ele yẹ bhi egbe.
Rẹ ẹwanlẹn hanọn ikpọta nin uwẹ ha noo. Guanọ uwedẹ nin uwẹ ha rẹ re ikoudure nin ene uwẹ ne talọ. Ji ebi uwẹ ha ta fu ele udu re, nọn yẹ re ahu nin ele. Rẹban ẹmhọn nọn ha sabọ rahiẹ ele. Hẹi re unun ha gbe ẹbho ne iyi Esali Jehova, la urẹọbhọ nọnsele.
Rẹman ghe ẹmhọn ele ti uwẹ bhọ. Re obọ, bi egbe, bi uru nọn lọre ha talọ bhi uwedẹ nin ene uwẹ ne talọ ha re lẹn ghe, uwẹ gene hoẹmhọn ele. Lẹn ebi uwẹ rẹ mun ẹlo nọnsẹ yẹ bhi uhọnmhọn; ji ojiẹ ha ribhi unun nọnsẹ ẹghe-ẹghe.

Hẹi ha re ariri ba ebi emhin gene dia uwẹ yẹ bhi egbe. Ahamiẹn uwẹ re ọta man, la uwẹ tie ebe, hẹi lu ọle bhi uwedẹ nan ha rẹ miẹn ghe, uwẹ ọrebhe ki ghe. Ebi ebe nin uwẹ tie, la ọne ọta nin uwẹ rẹman gene dia uwẹ yẹ bhi egbe, irio uwẹ ha rẹ re ọle man. Hẹi lu ọsi nan-ba-daghe-mẹn. Dọnmhegbe nin ọta ne sibhi unun nọnsẹ re ha yi ọta nọn fu, ọta nin oyẹẹ rẹkhan.