8 Kẹsena o te ru ẹwẹ-ohọ igbama na+ wọhọ epaọ ohwo nọ o re zuo onaa họ iwu, wọhọ oghẹrẹ nọ a ru ẹfọd na, eware nọ a ro ru ei họ, igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.+ 9 Abọ ene riẹ e jọ ẹrẹrẹe nọ a te kpiri ei ibro ivẹ. A ru ẹwẹ-ohọ igbama na, onọ a te kpiri ei, uthethei gbe okẹkẹe riẹ o rẹ jọ okẹkẹe evabọ.* 10 A ta ihie ene erọ itho mu ei. Itho uhie ọsosuọ họ rubi, topaz, gbe ẹmerald. 11 Itho uhie avọ ivẹ họ tọkwọes, safaya, gbe jaspa. 12 Itho uhie avọ esa họ leshẹm,* ageti, gbe ametist. 13 Yọ itho uhie avọ ene họ krisolaet, oniks, gbe jed. A ta rai mu emeware igoru. 14 Unu itho na o rọwokugbe edẹ emezae ikpegbivẹ Izrẹl, yọ a kare edẹ na fihọ ai wọhọ epanọ a rẹ kare oka fihọ oware, odẹ ọvuọvo u dikihẹ kẹ erua ikpegbivẹ na ọvuọvo.