16 Wha re kele edẹ udhuvẹ-gbikpe+ te ẹdẹ nọ o lele Ẹdijala avọ ihrẹ na, kẹsena wha ve dhe idhe ibi ekakọ ekpokpọ kẹ Jihova.+

18 Yọ wha rẹ rehọ imigodẹ ezae ihrẹ nọ e rrọ omakọkọ, enọ e kpako te ukpe ọvo no, gbe eruẹ ọvo gbe igbo ivẹ kugbe ikulu ebrẹdi na ze.+ A rẹ rehọ ae dhe idhe emahọ kẹ Jihova avọ idhe ibi ekakọ nọ u fo nọ u re lele iei gbe idhe udi nọ u fo nọ u re lele iei, wọhọ idhe nọ a rẹ rọ erae mahe, onọ u re gbo ore awere* kẹ Jihova.