25 Jihova o ru Solomọn kpehru gaga evaọ aro ahwo Izrẹl kpobi, ọ tẹ jẹ kẹe oruaro esuo uvie, utionọ ovie Izrẹl ọvuọvo o ri wo vẹre he.+

9 Fikiere me te ti fe gaga jẹ rro vi ohwo kpobi nọ ọ kake rọ omẹ rria Jerusalẹm no.+ Yọ areghẹ mẹ ọ gbẹ rrọ omẹ uzou.

28 Ofariẹ, fikieme wha jẹ be ruawa kpahe iwu nọ wha re kuhọ? Wha wuhrẹ mi idodo obọ ẹwọ, epanọ e be rọ rro; i re kporo udhu hu, hayo ko iwu* hu; 29 rekọ mẹ be ta kẹ owhai nọ makọ epanọ Solomọn+ o wo oruaro te na, ọ gọ ẹgọ woma te idodo nana ọvuọvo ho.

42 Ovie-aye obọ obọze ovatha-ọre avọ oge nana a te kparoma ze evaọ oke ẹdhoguo na, o ve ti brukpe oge nana, keme o no obọ oka otọakpọ na ze te gaviezọ kẹ eme areghẹ Solomọn.+ Rekọ rri! ohwo nọ ọ rro vi Solomọn ọ rrọ etenẹ.+