23 Fikiere Mosis ọ tẹ rriẹ ọkpọ riẹ rri obọ idhiwu na, Jihova o te vi egbrara gbe oso-itho ze, erae* i te kie ziọ otọakpọ na, Jihova o te ru nọ oso-itho ọ jẹ rọ rrọ ku ẹkwotọ Ijipti. 24 Oso-itho ọ jẹ rrọ, yọ erae e be ware evaọ udevie oso-itho na. Ọ ga thesiwa; ọkpọ riẹ ọ re romavia ẹdẹvo ho evaọ ẹkwotọ na anwọ okenọ Ijipti o ro zihe ruọ orẹwho.+ 25 Oso-itho na ọ raha oware kpobi nọ o jọ ẹwọ evaọ ẹkwotọ Ijipti soso, no ohwo rite arao, ọ raha ẹbe kpobi jẹ raha ire ẹwọ kpobi.+ 26 Ẹkwotọ Goshẹn nọ ahwo Izrẹl a jọ ọvo oso-itho na o te he.+