31 Keme utho rai ọ wọhọ Utho mai hi,+

Makọ ewegrẹ mai dede a vuhu onana mu.+

 2 Ohwo ọvo nọ ọ rrọ ọrẹri wọhọ Jihova ọ rrọ họ,

Ohwo ọvo ọ wọhọ owhẹ hẹ,+

Yọ utho ọvo nọ o wọhọ Ọghẹnẹ mai o rrọ họ.+

33 Ọghẹnẹ uzẹme na họ oria adhẹzọ mẹ,+

Yọ o ti ru edhere mẹ jọ liọliọ.+

34 O re ru awọ mẹ jọ wọhọ awọ orua;

O re ru omẹ dikihẹ eria ikpekpehru.+

35 O bi wuhrẹ abọ mẹ kẹ ẹmo-ofio;

Abọ mẹ ọ rẹ sae vẹ uze ekọpa.

36 Whọ kẹ omẹ ojese esiwo ra,

Yọ omaurokpotọ ra u bi ru omẹ fihọ ohwo ologbo.+

37 Who ru edhere na kẹre kẹ ithihi awọ mẹ;

Otọ o te whra awọ* mẹ hẹ.+

38 Me ti le ewegrẹ mẹ, mẹ vẹ raha ai no;

Me ti zihe ze he bẹsenọ me re kpe ai muotọ.

39 Me ti kpe ai muotọ jẹ pẹhẹ ai no, re a gbẹ sae kparoma ha;+

A ti kie fihọ otọ evawọ mẹ.

40 Whọ te kẹ omẹ ẹgba nọ me ti ro fi ẹmo na;+

Who ti ru ewegrẹ mẹ kie kẹ omẹ.+

41 Who ti ru ewegrẹ mẹ dhẹ kẹ omẹ;*+

Me ti kpe* ahwo nọ a mukpahe omẹ no.+

42 A bi bo kẹ obufihọ, rekọ ohwo ọvo ọ riẹ nọ o re siwi ai hi;

A bi tube bo se Jihova, rekọ ọ be kẹ ai uyo ho.+

43 Me ti duwu ai wuru wuru wọhọ ẹkpẹ otọ* na;

Me ti kpe ai ehehẹhẹ je thihi ai wọhọ ọloho nọ ọ rrọ iyẹrẹ.