Ọtausiuwoma Na
3 Oware kpobi u wo oke riẹ,
Oware kpobi nọ a bi ru evaọ otọ idhiwu na u wo oke:
2 Oke eyẹ gbe oke uwhu;
Oke nọ a rẹ rọ kọ gbe oke nọ a re ro vi oware nọ a kọ no otọ;
3 Oke nọ a re ro kpe gbe oke nọ a re ro siwi;
Oke nọ a re ro kporo kuotọ gbe oke nọ a rẹ rọ bọ;
4 Oke nọ a rẹ rọ viẹ gbe oke nọ a rẹ rọ hwẹ;
Oke nọ a re ro kuenu oviẹ gbe oke nọ a re ro gbile;*
5 Oke nọ a re ro gbolo itho kufiẹ gbe oke nọ a rẹ rọ kwa itho kokohọ;
Oke nọ a re ro dede oma gbe oke nọ a rẹ rọ siọ oma ba edede;
6 Oke nọ a rẹ rọ gwọlọ gbe oke nọ a rẹ rọ kpairoro vrẹ inọ u vru no;
Oke nọ a rẹ rọ sẹro oware gbe oke nọ a re ro gbolo kufiẹ;
7 Oke nọ a rẹ rọ bẹre oware+ gbe oke nọ a re ro ko kugbe;
Oke nọ a re ro fibo+ gbe oke nọ a rẹ rọ ta ẹme;+
8 Oke nọ a re ro you gbe oke nọ a re ro mukpahe;+
Oke ẹmo-ofio gbe oke udhedhẹ.
9 Erere vẹ o re te oruiruo evaọ iruo riẹ kpobi?+ 10 Mẹ ruẹ iruo nọ Ọghẹnẹ ọ rọ kẹ emọ ahwo nọ a bi ru ẹsikpobi. 11 O ru oware kpobi wowoma* evaọ oke riẹ.+ O tube fi ebẹdẹ bẹdẹ họ udu rai; ghele na ohwo-akpọ ọ rẹ sae kiẹ iruo nọ Ọghẹnẹ uzẹme na o ru no emuhọ te ekuhọ via vievie he.
12 Me ku rie họ no inọ oware ovuovo nọ u woma kẹ ae vi onana o riẹ hẹ, koyehọ re a ghọghọ je ru ewoma evaọ etoke uzuazọ rai,+ 13 gbe nọ ohwo kpobi ọ rẹ re jẹ da jẹ re omaweromẹ iruo egaga riẹ kpobi. Onana yọ okẹ Ọghẹnẹ.+
14 Me vuhumu no inọ oware kpobi nọ Ọghẹnẹ uzẹme na o ru o te jọ bẹdẹ bẹdẹ. Oware ovuovo o riẹ nọ a re fibae he yọ oware ovuovo o riẹ nọ a re si noi hi. Enẹ Ọghẹnẹ uzẹme na o ru rie re ahwo a ruẹse dhozọ riẹ.+
15 Oware kpobi nọ o via yọ oware nọ o via no vẹre, oware nọ o te tha yọ oware nọ o rrọ no vẹre;+ rekọ Ọghẹnẹ uzẹme na ọ rẹ gwọlọ oware nọ a je kie lele.*
16 Mẹ ruẹ onana no re evaọ otọ ọre na, inọ: Umuomu o rrọ oria nọ uvioziẹ o rẹ jọ, yọ umuomu o rrọ oria nọ ẹrẹreokie ọ rẹ jọ.+ 17 Fikiere mẹ tẹ jọ udu mẹ ta nọ: “Ọghẹnẹ uzẹme na o ti guẹdhọ ikiẹrẹe na gbe irumuomu,+ keme iruẹru kpobi gbe owojẹ kpobi u wo oke.”
18 Mẹ tẹ jẹ ta evaọ udu mẹ nọ Ọghẹnẹ uzẹme na ọ te dawo emọ ahwo re o dhesẹ kẹ ae nọ a wọhọ erao, 19 keme u wo oware nọ o te via kẹ ahwo-akpọ yọ u wo oware nọ o te via kẹ erao; oware ovona o te via kẹ aikpobi.+ Epanọ ọjọ o re whu ere ọdekọ o re whu re; ẹzi* ọvona aikpobi a wo.+ Fikiere ohwo-akpọ o kpehru vi erao ho, keme oware kpobi ufofe. 20 Aikpobi a bi kpohọ oria ovona.+ Ẹkpẹ* aikpobi a no ze,+ yọ ẹkpẹ* aikpobi a bi zihe kpohọ.+ 21 Kọ ono ọ ginẹ riẹ sọ ẹzi ohwo-akpọ o re kpobọ ehru, hayo sọ ẹzi arao o re kpobọ otọ?+ 22 Mẹ ruẹ nọ oware ovuovo nọ u woma vi onana o riẹ hẹ re ohwo-akpọ ọ re omaweromẹ iruo riẹ,+ keme onana họ osohwa riẹ;* kọ ono ọ rẹ sai fiobọhọ kẹe re ọ ruẹ oware nọ o te via nọ o te whu no?+