Jerimaya
42 Kẹsena iletu ogbaẹmo na kpobi gbe Johenan+ ọmọzae Kariya, Jezanaya ọmọzae Hoshaya, gbe ahwo na kpobi, no ọnọ ọ mae kawo rite ọnọ ọ mae rro, a tẹ nyaze, 2 a tẹ ta kẹ Jerimaya ọruẹaro na nọ: “Ivie, kezọ kẹ ayare mai rọkẹ aruoriwo re whọ lẹ se Jihova Ọghẹnẹ ra fiki mai, fiki ikiọkotọ nana kpobi, keme umutho ahwo jọ ọvo a kiọkọ evaọ usu ahwo nọ a jọ buobu na,+ wọhọ epanọ whọ be ruẹ na. 3 Jọ Jihova Ọghẹnẹ ra ọ vuẹ omai edhere nọ u fo nọ ma rẹ nya gbe oware nọ u fo nọ ma re ru.”
4 Jerimaya ọruẹaro na ọ tẹ ta kẹ ae nọ: “Me yo ẹme rai no, yọ mẹ te lẹ se Jihova Ọghẹnẹ rai wọhọ epanọ wha yare na; mẹ te vuẹ owhai ẹme kpobi nọ Jihova ọ ta kẹ owhai. Mẹ te ko ẹme ọvo dhere owhai hi.”
5 A tẹ kpahe kẹ Jerimaya nọ: “Jọ Jihova ọ jọ osẹri uzẹme gbe ọnọ a re fievahọ nọ o re se isẹri kpe omai otẹrọnọ ma gbe ru epanọ Jihova Ọghẹnẹ ra ọ te rehọ owhẹ ta kẹ omai na ẹrẹrẹe he. 6 Te u woma te u yoma, ma ti yoẹme kẹ urru Jihova Ọghẹnẹ mai, ọnọ ma bi vi owhẹ bru na, re eware e ruẹsi woma kẹ omai fikinọ ma yoẹme kẹ urru Jihova Ọghẹnẹ mai.”
7 Whaọ nọ edẹ ikpe e ruemu no, ẹme Jihova o te bru Jerimaya ze. 8 Fikiere o te se Johenan ọmọzae Kariya avọ iletu ogbaẹmo na kpobi nọ e jọ kugbei, gbe ahwo na kpobi, no ọnọ ọ mae kawo rite ọnọ ọ mae rro.+ 9 Ọ tẹ ta kẹ ae nọ: “Enẹ Jihova Ọghẹnẹ Izrẹl, ọnọ wha vi omẹ nọ mẹ ta kẹ re o wo aruoriwo kẹ owhai na ọ ta: 10 ‘Otẹrọnọ wha tẹ ginẹ daji ẹkwotọ nana, ẹsiẹe mẹ te rọ bọ owhai dikihẹ, yọ me ti kporo owhai fihọ otọ họ, mẹ te kọ owhai, yọ me ti vi owhai no otọ họ, keme okpẹtu nọ me ro te owhai no na o te da omẹ.*+ 11 Jọ ozọ u mu owhai fiki ovie Babilọn ho, ọnọ wha be dhozọ riẹ na.’+
“‘Jọ ozọ u mu owhai fiki riẹ hẹ,’ ere Jihova ọ ta, ‘keme mẹ rrọ kugbe owhai re me siwi owhai jẹ thọ owhai no obọ riẹ. 12 Mẹ te re owhai ohrọ,+ yọ ọ te re owhai ohrọ re, ọ vẹ te rehọ owhai zihe ziọ ẹkwotọ obọrai.
13 “‘Rekọ otẹrọnọ wha tẹ ta nọ, “Ijo, ma te jọ ẹkwotọ nana ha!” wha jẹ ghẹmeeyo kẹ urru Jihova Ọghẹnẹ rai, 14 be ta nọ, “Ijo, ukpoye obọ ẹkwotọ Ijipti ma te nya,+ obonọ ma te jọ ruẹ ẹmo ho hayo yo edo onware he hayo nọ ohọo ebrẹdi o te jọ kpe omai hi; obei ma te rria,” 15 wha yo ẹme nọ Jihova ọ ta, O ikiọkotọ Juda. Enẹ Jihova olori egbaẹmo, Ọghẹnẹ Izrẹl ọ ta: “Otẹrọnọ wha tẹ gbaemu riẹriẹriẹ inọ obọ Ijipti wha rẹ nya, wha je kpohọ obei nyae rria,* 16 uzedhe ọgbọdọ nọ wha be dhozọ riẹ na o ti bru owhai ze obei evaọ obọ ẹkwotọ Ijipti, yọ uzedhe ohọo nọ u ti mu nọ wha be dhozọ riẹ na u ti lele owhai kpobọ Ijipti, wha vẹ te jọ obei whu.+ 17 Yọ ọgbọdọ, ohọo nọ u ti mu, gbe okpẹyao nọ o re vo* i ti kpe ahwo kpobi nọ a gba riẹ mu nọ a re kpobọ Ijipti nyae rria. Ọvuọvo rai ọ te zọ hayo va okpẹtu nọ me ti ro te ai na abọ họ.”’
18 “Keme enẹ Jihova olori egbaẹmo, Ọghẹnẹ Izrẹl ọ ta: ‘Nwane wọhọ epanọ me ku evedha mẹ gbe ofu mẹ ku ahwo nọ a jẹ rria Jerusalẹm na,+ ere me ti ku ofu mẹ ku owhai re otẹrọnọ wha te kpobọ Ijipti, wha vẹ te jọ oware nọ a rẹ rọ bọwo ehao, oware idudu, uye, gbe oware ekela,+ yọ wha te gbẹ wariẹ ruẹ oria nana vievie he.’
19 “Jihova ọ ta oware nọ o te via kẹ owhai no, O ikiọkotọ Juda. Wha kpobọ Ijipti hi. Jọ wha riẹ vevẹ nọ mẹ vẹvẹ owhai unu no nẹnẹ na 20 inọ oruthọ rai o ti si uwhu kpe owhai.* Keme wha vi omẹ bru Jihova Ọghẹnẹ rai, inọ, ‘Lẹ se Jihova Ọghẹnẹ mai fiki mai, re whọ vuẹ omai oware kpobi nọ Jihova Ọghẹnẹ mai ọ ta, yọ ma ti ru ei.’+ 21 Mẹ be vuẹ owhai nẹnẹ na, rekọ wha ti yoẹme kẹ urru Jihova Ọghẹnẹ rai hi hayo ru oware ovo nọ o vi omẹ nọ mẹ vuẹ owhai hi.+ 22 Fikiere, wha riẹ vevẹ nọ ọgbọdọ, ohọo nọ u ti mu, gbe okpẹyao nọ o re vo i ti kpe owhai evaọ oria nọ u bi si owhai urru nọ wha rẹ nyae rria na.”+