Jerimaya

44 Ẹme nọ o bru Jerimaya ze rọkẹ ahwo Ju kpobi nọ a be rria ẹkwotọ Ijipti,+ enọ e be rria Migdọl,+ Tapanhis,+ Nọf,*+ gbe ẹkwotọ Patrọs,+ inọ: 2 “Enẹ Jihova olori egbaẹmo, Ọghẹnẹ Izrẹl ọ ta, ‘Wha ruẹ okpẹtu kpobi nọ me ro te Jerusalẹm+ gbe ikpewho Juda kpobi, yọ nẹnẹ na e raha fihọ otọ no, ababọ ohwo nọ ọ be rria ae eva.+ 3 O rrọ enẹ fiki eware iyoma nọ a ru ro ru omẹ eva dha, nọ a jẹ rọ nyabru eghẹnẹ efa nọ a riẹ vẹre he, a te je dhe idhe kẹ ae,+ jẹ gọ ae, te owhai te esẹ-esẹ rai.+ 4 Mẹ ruabọhọ je vi idibo mẹ kpobi eruẹaro na se owhai, me je dhe ai evievi,* be ta nọ: “Ivie wha ru oware otọtọ nana nọ me mukpahe na ha.”+ 5 Rekọ a gaviezọ họ, yọ a fi ezọ rai hotọ gbe he re a kurẹriẹ no eyoma rai ẹkwoma idhe nọ a rẹ siọ eghẹnẹ efa ba edhe kẹ.+ 6 Fikiere me te ku evedha mẹ gbe ofu mẹ lahwe, e tẹ jẹ ware evaọ ikpewho Juda gbe evaọ iyẹrẹ Jerusalẹm, i te zihe ruọ eria nọ e raha no gbe otọ nọ o raha no, wọhọ epanọ e rrọ nẹnẹ na.’+

7 “Whaọ enẹna, enẹ Jihova, Ọghẹnẹ olori egbaẹmo na, Ọghẹnẹ Izrẹl ọ ta, ‘Fikieme wha be rọ wha okpẹtu ologbo se omarai,* re ọzae avọ aye kpobi, ọmaha avọ ọmọboba kpobi, a whu no Juda no, nọ wha gbe ti ro wo ikiọkotọ ọvo ho? 8 Fikieme wha be rọ rehọ iruo abọ rai ru omẹ eva dha ẹkwoma eghẹnẹ efa nọ wha bi dhe idhe kẹ evaọ ẹkwotọ Ijipti nọ wha nyae rria na? Wha ti whu, wha ve ti zihe ruọ oware nọ a rẹ rọ bọwo ehao gbe oware ekela evaọ udevie erẹwho kpobi nọ e rrọ otọakpọ na.+ 9 Kọ iruẹru imuomu esẹ-esẹ rai gbe iruẹru imuomu ivie Juda+ gbe iruẹru imuomu eyae ivie na,+ jegbe iruẹru imuomu obọrai gbe iruẹru imuomu eyae rai+ e thọrọ owhai ẹro no, enọ a ru evaọ ẹkwotọ Juda gbe evaọ iyẹrẹ Jerusalẹm? 10 Rite ẹdẹ inẹnẹ na, a ri hrẹ omarai kpotọ họ,* a wo ozodhẹ hẹ,+ yọ a be nya evaọ izi mẹ gbe ijaje mẹ nọ me fihọ kẹ owhai avọ esẹ-esẹ rai hi.’+

11 “Fikiere enẹ Jihova olori egbaẹmo, Ọghẹnẹ Izrẹl ọ ta, ‘Rri, mẹ gba riẹ mu no nọ mẹ rẹ rọ okpẹtu te owhai, re mẹ raha Juda soso no. 12 Me ti kru ikiọkotọ Juda nọ e gba riẹ mu nọ a re kpobọ ẹkwotọ Ijipti nyae rria na, aikpobi a ve ti whu evaọ ẹkwotọ Ijipti.+ A te rọ ọgbọdọ kpe ai, yọ ohọo nọ u ti mu na o te wha uwhu se ai; ọgbọdọ avọ ohọo nọ u ti mu i ti kpe ai, no ọnọ ọ mae kawo rite ọnọ ọ mae rro. A ve ti zihe ruọ oware nọ a rẹ rọ bọwo ehao, oware idudu, uye, gbe oware ekela.+ 13 Mẹ te kẹ ahwo nọ a be rria ẹkwotọ Ijipti uye nwane wọhọ epanọ mẹ rehọ ọgbọdọ, ohọo nọ u mu, gbe okpẹyao nọ o re vo* kẹ Jerusalẹm uye na.+ 14 Yọ ikiọkotọ Juda nọ e nyae rria ẹkwotọ Ijipti na e te vabọ hayo zọ họ re a zihe kpobọ ẹkwotọ Juda. A te gwọlọ zihe re a rria obei, rekọ a ti zihe he, ajokpaọ umutho ahwo jọ nọ a te vabọ.’”

15 Ezae kpobi nọ e riẹ nọ eyae rai e be hai dhe idhe kẹ eghẹnẹ efa gbe eyae na kpobi nọ i dikihẹ etẹe, enọ e jọ buobu, gbe ahwo kpobi nọ a jẹ rria ẹkwotọ Ijipti,+ evaọ Patrọs,+ a tẹ kpahe kẹ Jerimaya nọ: 16 “Ma te gaviezọ kẹ ẹme nọ whọ rọ odẹ Jihova ta kẹ omai na ha. 17 Ukpoye, ma te siọ ẹme kpobi nọ ma rọ unu mai ta ba eru hu, inọ ma re dhe idhe kẹ Ovie-aye Odhiwu* na je ku idhe udi kẹe,+ nwane wọhọ epanọ mai, esẹ-esẹ mai, ivie mai, gbe ikpahwo-esuo mai i ru evaọ ikpewho Juda gbe evaọ iyẹrẹ Jerusalẹm, evaọ okenọ ma jẹ re ebrẹdi bẹ, yọ eware i woma kẹ omai, okenọ okpẹtu o je te omai vievie he. 18 No anwọ okenọ ma rọ siọ idhe ba edhe kẹ Ovie-aye Odhiwu* na jẹ siọ idhe udi ba eku kẹe, ma gbe wo oware ovo ho, yọ ọgbọdọ gbe ohọo nọ u bi mu i kpe omai no.”

19 Eyae na i te fibae nọ: “Nọ ma je dhe idhe kẹ Ovie-aye Odhiwu* na je ku idhe udi kẹe, kọ ogbẹrọnọ ezae mai họ enọ e kẹ omai uvẹ inọ ma ru ikeki nọ a re ro dhe idhe nọ e wọhọ uwoho riẹ, ma te ku idhe udi kẹe?”

20 Kẹsena Jerimaya ọ tẹ ta kẹ ahwo na kpobi, ezae na avọ eyae rai gbe ahwo kpobi nọ a jẹ ta ẹme kẹe na nọ: 21 “Idhe nọ whai omarai, esẹ-esẹ rai, ivie rai, ikpahwo-esuo rai, gbe ahwo ẹkwotọ na a dhe evaọ ikpewho Juda gbe evaọ iyẹrẹ Jerusalẹm+—Jihova ọ kareghẹhọ ae, e tẹ ziọ udu riẹ! 22 Ukuhọ riẹ, Jihova ọ gbẹ sai thihakọ eware iyoma nọ wha ru gbe eware etọtọ nọ wha ru hu, ẹkwotọ rai o te zihe ruọ oria nọ a raha no, oware idudu gbe onọ a rẹ rọ bọwo ehao, onọ ohwo ọvo ọ be rria ha, wọhọ epanọ o rrọ nẹnẹ na.+ 23 Okpẹtu nana o te owhai, wọhọ epanọ o rrọ nẹnẹ na, fikinọ wha je dhe idhe enana gbe fikinọ wha raha uzi Jihova ẹkwoma urru Jihova nọ wha yoẹme kẹ hẹ, gbe uzi riẹ, ijaje riẹ avọ ekareghẹhọ riẹ nọ wha lele he.”+

24 Jerimaya ọ tẹ ruabọhọ be ta kẹ ahwo na kpobi gbe eyae na kpobi nọ: “Wha yo ẹme nọ Jihova ọ ta, whai ahwo Juda kpobi nọ a rrọ ẹkwotọ Ijipti. 25 Enẹ Jihova olori egbaẹmo, Ọghẹnẹ Izrẹl ọ ta, ‘Oware nọ whai avọ eyae rai wha rọ unu rai ta, wha rehọ abọ rai ru ei gba no, keme wha ta nọ: “Ma te siọ eyaa nọ ma ya ba erugba ha inọ ma ti dhe idhe kẹ Ovie-aye Odhiwu* na je ku idhe udi kẹe.”+ Whai eyae na wha te siọ eyaa rai ba erugba ha.’

26 “Fikiere wha yo ẹme nọ Jihova ọ ta, whai ahwo Juda kpobi nọ a be rria ẹkwotọ Ijipti: ‘“Rri, mẹ be rọ odẹ ulogbo mẹ duwu iyei,” ere Jihova ọ ta, “inọ ohwo Juda+ ọvo ọ gbẹ te rọ odẹ mẹ duwu iyei evaọ ẹkwotọ Ijipti soso ho, inọ, ‘Nọ Jihova Olori nọ Ọ Mai Kpehru na ọ rrọ uzuazọ na!’+ 27 Whaọ me bi rri rai re mẹ rehọ okpẹtu te ai, orọnikọ re me ru oware uwoma kẹ ae he;+ ọgbọdọ avọ ohọo nọ u ti mu i ti kpe ahwo Juda kpobi nọ a rrọ ẹkwotọ Ijipti, bẹsenọ a ti ro whu muotọ.+ 28 Umutho ahwo jọ ọvo a te va ọgbọdọ na abọ, a ve zihe no ẹkwotọ Ijipti kpobọ ẹkwotọ Juda.+ Kẹsena ikiọkotọ Juda kpobi nọ e ziọ ẹkwotọ Ijipti te rria na e vẹ te riẹ ẹme ohwo nọ o rugba, sọ ẹme mẹ hayo ọrai!”’”

29 “‘Yọ onana họ oka rọkẹ owhai,’ ere Jihova ọ ta, ‘inọ mẹ te kẹ owhai uye evaọ oria nana, re wha riẹ nọ eme mẹ nọ mẹ rọ ya eyaa nọ okpẹtu o ti te owhai na e te seba erugba ha. 30 Enẹ Jihova ọ ta: “Rri, mẹ be rehọ Fẹro Hofra, ovie Ijipti họ obọ ewegrẹ riẹ gbe obọ enọ e be gwọlọ uzuazọ* riẹ kpe, nwane wọhọ epanọ mẹ rehọ Zẹdikaya ovie Juda họ obọ Nebukadneza* ovie Babilọn na, ọnọ ọ jọ ọwegrẹ riẹ nọ ọ jẹ gwọlọ uzuazọ* riẹ kpe.”’”+