EMUHỌ

1 Evaọ emuhọ Ọghẹnẹ ọ ma idhiwu gbe otọakpọ na.+

2 Whaọ otọakpọ na o nwani wo oghẹrẹ nọ a rẹ sai dhesẹ iẹe he yọ o jọ ofofe, ebi ọ jọ ehru ame obuobu* na,+ yọ ogaga-iruo* Ọghẹnẹ+ u je kpenẹ avọ enẹ evaọ ehru ame na.+

3 Ọghẹnẹ ọ tẹ ta nọ: “Jọ elo ọ romavia.” Elo ọ tẹ romavia.+ 4 Nọ oyena o vrẹ no, Ọghẹnẹ ọ tẹ ruẹ nọ elo na o woma, Ọghẹnẹ o te mu elo na họ ẹhẹriẹ no ebi na. 5 Ọghẹnẹ o te se elo na Uvo,* rekọ o se ebi na Aso.+ Owọwọ o tẹ ze, kẹsena ohiohiẹ o tẹ ze, ẹdẹ ọsosuọ.

6 Ọghẹnẹ ọ tẹ ta nọ: “Jọ idadeghe*+ ọ jọ udevie ame avọ ame na, jọ ame ọ hẹriẹ no ame.”+ 7 Kẹsena Ọghẹnẹ ọ tẹ ma idadeghe na, jẹ hẹriẹ ame nọ ọ rrọ otọ idadeghe na no ame nọ ọ rrọ ehru idadeghe na. O tẹ jọ ere.+ 8 Ọghẹnẹ o te se idadeghe na Odhiwu.* Owọwọ o tẹ ze, kẹsena ohiohiẹ o tẹ ze, ẹdẹ avọ ivẹ.

9 Ọghẹnẹ ọ tẹ ta nọ: “Jọ ame nọ ọ rrọ otọ idhiwu na o kokohọ oria ọvo, re otọ oyaya na o romavia.”+ O tẹ jọ ere. 10 Ọghẹnẹ o te se otọ oyaya na Otọakpọ,+ rekọ o se ame nọ o kokohọ na Ebade.+ Ọghẹnẹ ọ tẹ ruẹ nọ u woma.+ 11 Kẹsena Ọghẹnẹ ọ tẹ ta nọ: “Jọ otọakpọ na u ru ẹbe dhẹ ze, ekakọ nọ e rẹ mọ ibi gbe ire nọ e rẹ mọ ibi-ire ọvuọ oghoghẹrẹ rai, nọ e rẹ mọ ibi-ire nọ i wo ibi evaọ otọakpọ na.” O tẹ jọ ere. 12 Otọakpọ na u te mu ẹbe họ ẹdhẹ, ekakọ nọ e rẹ mọ ibi+ gbe ire nọ e rẹ mọ ibi-ire nọ i wo ibi, ọvuọ oghoghẹrẹ rai. Ọghẹnẹ ọ tẹ ruẹ nọ u woma. 13 Owọwọ o tẹ ze, kẹsena ohiohiẹ o tẹ ze, ẹdẹ avọ esa.

14 Ọghẹnẹ ọ tẹ ta nọ: “Jọ eware nọ e rẹ kẹ elo e romavia+ evaọ idadeghe idhiwu na re e hẹriẹ uvo* no aso,+ e vẹ jẹ jọ eka rọkẹ ezi sa-sa, gbe edẹ gbe ikpe.+ 15 E rẹ jọ eware nọ e rẹ kẹ elo evaọ idadeghe idhiwu na re i lo fihọ otọakpọ na.” O tẹ jọ ere. 16 Kẹsena Ọghẹnẹ o te ru eware ilogbo ivẹ nọ e rẹ kẹ elo na, oware nọ o rẹ kẹ elo nọ o mae rro na o rrọ rọkẹ uvo*+ na yọ oware nọ o rẹ kẹ elo nọ o kawo vi oyena o rrọ rọkẹ aso, gbe isi na re.+ 17 Fikiere Ọghẹnẹ o te fi ai họ idadeghe idhiwu na re i lo fihọ otọakpọ na 18 re i lo evaọ uvo* gbe aso jẹ hẹriẹ elo no ebi.+ Ọghẹnẹ ọ tẹ ruẹ nọ u woma. 19 Owọwọ o tẹ ze, kẹsena ohiohiẹ o tẹ ze, ẹdẹ avọ ene.

20 Ọghẹnẹ ọ tẹ ta nọ: “Jọ emama* nọ e rrọ uzuazọ e jọ buobu gbidi gbidi evaọ ame na, jọ emama nọ e rẹ rra e rra evaọ ehru otọakpọ na evaọ idadeghe idhiwu* na.”+ 21 Ọghẹnẹ ọ tẹ ma emama ilogbo obọ abade na gbe emama* nọ e rrọ uzuazọ kpobi nọ e rẹ nya vọ ame na buobu ọvuọ oghoghẹrẹ rai gbe omama kpobi nọ o rẹ rra ọvuọ oghoghẹrẹ riẹ. Ọghẹnẹ ọ tẹ ruẹ nọ u woma. 22 Kẹsena Ọghẹnẹ ọ tẹ ghale ae, inọ: “Wha vihọ re wha jọ buobu jẹ vọ ame abade na,+ jọ emama nọ e rẹ rra e jọ buobu evaọ otọakpọ na.” 23 Owọwọ o tẹ ze, kẹsena ohiohiẹ o tẹ ze, ẹdẹ avọ isoi.

24 Ọghẹnẹ ọ tẹ ta nọ: “Jọ otọakpọ na o rọ emama* nọ e rrọ uzuazọ ze ọvuọ oghoghẹrẹ rai, erao ẹwho gbe erao nọ i re si* gbe erao ẹwọ otọakpọ na ọvuọ oghoghẹrẹ rai.”+ O tẹ jọ ere. 25 Kẹsena Ọghẹnẹ ọ tẹ ma erao ẹwọ otọakpọ na ọvuọ oghoghẹrẹ rai gbe erao ẹwho ọvuọ oghoghẹrẹ rai gbe erao kpobi nọ i re si* evaọ otọ na ọvuọ oghoghẹrẹ rai. Ọghẹnẹ ọ tẹ ruẹ nọ u woma.

26 Ọghẹnẹ ọ tẹ ta nọ: “Joma+ ma ohwo evaọ uwoho mai,+ nọ o re tho omai,+ re a su iyei abade na gbe emama nọ e rẹ rra evaọ ehru* na gbe erao ẹwho na, gbe otọakpọ na kpobi gbe arao nọ o re si kpobi nọ ọ be nya evaọ otọakpọ na.”+ 27 Ọghẹnẹ ọ tẹ ma ohwo evaọ uwoho riẹ, uwoho Ọghẹnẹ ọ rọ mae; ọzae gbe aye ọ ma rai.+ 28 Kẹsena, Ọghẹnẹ ọ tẹ ghale ae, Ọghẹnẹ ọ tẹ ta kẹ ae nọ: “Wha vihọ* re wha jọ buobu, wha vọ otọakpọ na+ je woi,*+ je su+ iyei abade na gbe emama nọ e rẹ rra evaọ obọ ehru* na gbe omama nọ o rrọ uzuazọ kpobi nọ o rẹ nya evaọ otọakpọ na.”

29 Ọghẹnẹ ọ tẹ ta nọ: “Mẹ rehọ okakọ kpobi nọ o rẹ mọ ibi nọ o rrọ otọakpọ na soso gbe ure kpobi nọ o rẹ mọ ibi-ire nọ i wo ibi kẹ owhai no. Jọ e jọ emuore kẹ owhai.+ 30 Yọ mẹ rehọ ẹbe ọrọrọ kpobi kẹ erao ẹwọ otọakpọ na kpobi gbe omama kpobi nọ o rẹ rra evaọ obọ ehru* na gbe omama* kpobi nọ o rẹ nya evaọ otọakpọ na nọ u wo uzuazọ re e jọ emuore kẹ ae.”+ O tẹ jọ ere.

31 Nọ oyena o vrẹ no, Ọghẹnẹ ọ tẹ ruẹ nọ eware kpobi nọ ọ ma i woma gaga.+ Owọwọ o tẹ ze, kẹsena ohiohiẹ o tẹ ze, ẹdẹ avọ ezeza.

2 Enẹ ẹma idhiwu gbe otọakpọ na gbe eware kpobi nọ e rrọ eva rai* o ro kuhọ.+ 2 Re ẹdẹ avọ ihrẹ na o te ti muhọ, yọ Ọghẹnẹ o ku iruo nọ o je ru na họ no, o te mu eriosehọ họ evaọ ẹdẹ avọ ihrẹ na rono iruo riẹ kpobi nọ o je ru.+ 3 Ọghẹnẹ ọ tẹ ghale ẹdẹ avọ ihrẹ na o te sei ọrẹri, keme evaọ ẹdẹ yena Ọghẹnẹ o ro mu eriosehọ riẹ họ rono iruo emama riẹ kpobi, eware kpobi nọ ọ jiroro nọ ọ rẹ ma.

4 Onana họ ikuigbe idhiwu gbe otọakpọ na evaọ okenọ a rọ ma ae, evaọ ẹdẹ nọ Jihova* Ọghẹnẹ ọ rọ ma otọakpọ gbe odhiwu.+

5 Ẹbe ẹwọ ọvuọvo ọ re jọ otọakpọ na ha yọ okakọ ovuovo u ri muhọ ẹdhẹ hẹ, keme Jihova Ọghẹnẹ o ri ru oso rrọ fihọ otọakpọ na ha yọ ohwo ọvo ọ jariẹ hẹ nọ ọ rẹ kọ oware fihọ otọ na. 6 Rekọ igrigri e jẹ hai no otọakpọ na ze, e vẹ vo otọ na soso.

7 Jihova Ọghẹnẹ ọ tẹ ma ohwo rono ẹkpẹ*+ otọ na ze o te ku ẹwẹ uzuazọ họ ighogho-inwe riẹ,+ ohwo na o te zihe ruọ ohwo* nọ ọ rrọ uzuazọ.+ 8 Kẹsena Jihova Ọghẹnẹ ọ tẹ kọ ọgbọ fihọ Idẹn,+ evaọ ofẹ ovatha-ọre; kọ etẹe o fi ohwo nọ ọ ma na fihọ.+ 9 Ere Jihova Ọghẹnẹ o ro ru ure kpobi nọ o rẹ were ohwo eriwo dhẹ no otọ na ze, gbe onọ u woma kẹ emuore gbe ure uzuazọ+ evaọ udevie ọgbọ na gbe ure eriariẹ ewoma gbe eyoma.+

10 Whaọ ethẹ jọ o je su no Idẹn ze nọ u je ku ame ku ọgbọ na, u te no etẹe ghale oma kpohọ ithẹ ene.* 11 Odẹ ọrọ ọsosuọ Paeshọn; yọ ọye ọ wariẹ ẹkwotọ Havila soso họ, oria nọ igoru e rrọ. 12 Igoru ẹkwotọ yena i woma. Egọmu dẹliọm gbe itho oniks e rrọ etẹe re. 13 Odẹ ethẹ avọ ivẹ Gaehọn; yọ ọye ọ wariẹ ẹkwotọ Kush soso họ. 14 Odẹ ethẹ avọ esa Hidikẹl;*+ yọ ọye o kpobọ ovatha-ọre Asiria.+ Yọ ethẹ avọ ene na họ Yufretis.+

15 Jihova Ọghẹnẹ ọ tẹ rehọ ọzae na o te fi ei họ ọgbọ Idẹn na re ọ hae ruẹrẹ iẹe* jẹ rẹrotei.+ 16 Jihova Ọghẹnẹ ọ tẹ jẹ kẹ ọzae na uzi nana: “Whọ rẹ sae jọ ure kpobi evaọ ọgbọ na re epanọ o were owhẹ.+ 17 Rekọ ure eriariẹ ewoma gbe eyoma na, whọ rẹ jariẹ re vievie he, keme evaọ ẹdẹ nọ whọ re riẹ who ti whu hrọ.”+

18 Kẹsena Jihova Ọghẹnẹ ọ tẹ ta nọ: “U woma ha re ọzae na ọvo ọ gbẹ jọ. Mẹ be te ma ofiobọhọ kẹe, ọnọ o re ru ei gba.”+ 19 Whaọ Jihova Ọghẹnẹ ọ jẹ ma arao ẹwọ kpobi no otọ na ze gbe omama kpobi nọ o rẹ rra evaọ ehru* na, o te mu ae họ ẹrehọ bru ọzae na re ọ gwọlọ odẹ nọ o re se ọvuọvo; yọ odẹ kpobi nọ ọzae na o se omama* nọ o rrọ uzuazọ kpobi, oye họ odẹ riẹ.+ 20 Fikiere ọzae na o te mu odẹ kẹ erao ẹwho kpobi gbe emama kpobi nọ e rẹ rra evaọ ehru* na gbe arao ẹwọ kpobi, rekọ ọzae na o wo ofiobọhọ nọ o re ru ei gba ha. 21 Fikiere Jihova Ọghẹnẹ o te ru ọzae na kie ruọ owezẹ udidi, nọ ọ jẹ wezẹ na, ọ tẹ rehọ ubiofẹ riẹ jọ, kẹsena ọ tẹ rehọ uwo-oma na ruru oria na zihe. 22 Jihova Ọghẹnẹ ọ tẹ rehọ ubiofẹ nọ ọ rehọ no oma ọzae na ze na ma aye, ọ tẹ rehọ aye na se ọzae na.+

23 Kẹsena ọzae na ọ tẹ ta nọ:

24 Oyejabọ nọ ọzae ọ rẹ rọ nyasiọ ọsẹ riẹ gbe oni riẹ ba ọ vẹ talamu aye riẹ,* a ve zihe ruọ uwo ovo.+ 25 Aimava a tẹ gbẹ jọ ẹbẹba,+ ọzae na avọ aye riẹ; rekọ oma o jẹ vuọ ai hi.

3 Whaọ araomuomu na+ ọ jọ arao nọ ọ rẹ mai fiẹrohotọ* evaọ usu erao ẹwọ kpobi nọ Jihova Ọghẹnẹ ọ ma na. Fikiere ọ tẹ ta kẹ aye na nọ: “Kọ Ọghẹnẹ ọ ginẹ ta nọ wha rẹ re ubi-ure* kpobi evaọ ọgbọ na ha?”+ 2 Aye na ọ tẹ ta kẹ araomuomu na nọ: “Ma rẹ sae re ibi-ire ọgbọ na.+ 3 Rekọ Ọghẹnẹ ọ ta kpahe ubi orọ ure nọ o rrọ udevie ọgbọ na nọ:+ ‘Wha rẹ jariẹ re vievie he, ijo, wha rẹ rọ obọ tei vievie he; o gbẹ rrọ ere he wha ti whu.’” 4 Araomuomu na ọ tẹ ta kẹ aye na nọ: “Wha ti whu vievie he.+ 5 Keme Ọghẹnẹ ọ riẹ nọ evaọ ẹdẹ nọ wha re riẹ, ibiaro rai i ti rovie, yọ wha te jọ wọhọ Ọghẹnẹ, wha vẹ te riẹ ewoma gbe eyoma.”+

6 Kẹsena aye na ọ tẹ ruẹ nọ ure na u woma kẹ emuore o tẹ jẹ rrọ oware nọ u re si ibiaro na urru, ẹhẹ, ure na o jọ oware nọ o rẹ were eriwo. Fikiere o te mu ubi riẹ họ ẹkọrọ je mu ei họ ẹre.+ Onana o vrẹ no, ọ tẹ jẹ kẹ ọzae riẹ okenọ ọ jọ kugbei, o te muhọ ẹre.+ 7 Kẹsena ibiaro aimava i te rovie, a te ti vuhumu nọ a rrọ ẹbẹba. Fikiere a te ko ebe ure ifigi kugbe nọ a ro ruru eku rai.+

8 Uwhremu na, a te yo urru Jihova Ọghẹnẹ nọ ọ jẹ nya evaọ ọgbọ na evaọ okenọ ofou o re ro fou ziezi evaọ ẹdẹ na, ọzae na avọ aye riẹ a te dhere udevie ire ọgbọ na rono aro Jihova Ọghẹnẹ. 9 Jihova Ọghẹnẹ o te je se ọzae na, be ta nọ: “Whẹ ọ rrọ?” 10 Uwhremu na, ọ tẹ ta nọ: “Me yo urru ra evaọ ọgbọ na, rekọ ozọ u je mu omẹ keme mẹ rrọ ẹbẹba, fikiere me te dhere.” 11 Ọ tẹ nọe nọ: “Ono ọ vuẹ owhẹ nọ whọ rrọ ẹbẹba?+ Kọ whọ re ubi-ure* nọ me jie uzi kẹ owhẹ nọ whọ re he na?”+ 12 Ọzae na ọ tẹ ta nọ: “Aye nọ whọ kẹ omẹ nọ ọ jọ kugbe omẹ, ọ kẹ omẹ ubi-ure* na, fikiere mẹ tẹ re.” 13 Jihova Ọghẹnẹ ọ tẹ ta kẹ aye na nọ: “Kinọ eme who ru na?” Aye na ọ tẹ ta nọ: “Araomuomu na ọ viẹ omẹ họ, fikiere mẹ tẹ re.”+

14 Kẹsena Jihova Ọghẹnẹ ọ tẹ ta kẹ araomuomu na nọ:+ “Fiki oware nana nọ who ru na, mẹ bọwo owhẹ ehao evaọ usu erao ẹwho kpobi gbe usu erao ẹwọ kpobi. Okpeva ra who ti ro si, yọ ẹkpẹ* whọ te re evaọ edẹ uzuazọ ra kpobi. 15 Yọ me ti fi egrẹ*+ họ udevie ra+ avọ aye na+ gbe udevie ọmọ* ra+ avọ ọmọ* riẹ.+ Ọ* te whọlọ uzou ra,+ yọ whọ te rowo iẹe* ethihrowọ.”+

16 Ọ tẹ ta kẹ aye na nọ: “Me ti fiba edada udihọ ra gaga; evaọ edada who ti ro yẹ emọ, yọ who ti wo ẹgwọlọ ọgaga kẹ ọzae ra, yọ o ti su owhẹ.”

17 Ọ tẹ ta kẹ Adamu* nọ: “Fikinọ whọ gaviezọ kẹ urru aye ra whọ jẹ re ubi orọ ure nọ me jie uzi kẹ owhẹ nọ,+ ‘Whọ rẹ jariẹ re vievie he’ na, mẹ bọwo otọ na ehao fiki ra.+ Evaọ uye* whọ te jọ re emu riẹ evaọ edẹ uzuazọ ra kpobi.+ 18 Idhigbo gbe enwẹnwẹ e te dhẹ noi ze kẹ owhẹ, yọ ekakọ obọ ẹwọ* whọ te re. 19 Evaọ ẹroyẹ whọ te jọ re emu bẹsenọ who re zihe kpohọ otọ, keme otọ a rehọ owhẹ no ze.+ Keme whẹ yọ ẹkpẹ* yọ ẹkpẹ* who ti zihe kpohọ.”+

20 Nọ onana o vrẹ no, Adamu o te mu Ivi* kẹ aye riẹ, keme ọye ọ te jọ oni ohwo kpobi nọ ọ rrọ uzuazọ.+ 21 Jihova Ọghẹnẹ ọ tẹ rọ oviẹ-arao ru iwu ithethei kẹ Adamu avọ aye riẹ re a ku họ.+ 22 Kẹsena Jihova Ọghẹnẹ ọ tẹ ta nọ: “Whaọ ọzae na ọ wọhọ omai no evaọ ẹriẹ ewoma gbe eyoma.+ Re ọ gbẹ jẹ rriẹ obọ riẹ re ọ kọrọ ubi-ure evaọ ure uzuazọ na ha,+ onọ ọ tẹ re ọ vẹ rria bẹdẹ bẹdẹ,*—” 23 Fikiere Jihova Ọghẹnẹ o te lei no ọgbọ Idẹn+ re ọ nyai kporo otọ nọ a rehọ e riẹ no ze na.+ 24 O te le ọzae na ruọ otafe, o te fi chẹrub+ avọ ọgbọdọ nọ ọ be ware nwenwenwe jẹ be thahe kurẹriẹ ababọ eriosehọ fihọ ofẹ ovatha-ọre ọgbọ Idẹn na re i gbere edhere nọ a re ro kpobọ ure uzuazọ na.

4 Adamu o te lele Ivi aye riẹ wezẹ, o te dihọ.+ Nọ o yẹ Keni,+ ọ* tẹ ta nọ: “Mẹ rehọ obufihọ Jihova yẹ* ọmọzae no.” 2 Kẹsena o te yẹ ọmọ ọfa, oniọvo-ọmọzae riẹ Ebẹle.+

Ebẹle ọ tẹ te jọ othuru-igodẹ nọ ọ jẹ rẹrote igodẹ,* rekọ Keni ọ jọ ọwhẹrẹ. 3 Nọ oke jọ o vrẹ no, Keni ọ tẹ rehọ ekakọ otọ na jọ ze re o ro dhe idhe kẹ Jihova. 4 Rekọ Ebẹle ọ tẹ rehọ igodẹ nọ e mai woma*+ jọ no uthuru erao riẹ ze, kugbe iwhri rai. Jihova ọ jẹ Ebẹle rehọ te idhe riẹ,+ 5 rekọ ọ jẹ Keni rehọ vievie he avọ idhe riẹ. Fikiere eva e tẹ dha Keni gaga, o te mu ovao họ.* 6 Jihova ọ tẹ ta kẹ Keni nọ: “Ẹvẹ eva e be rọ dha owhẹ ga tere yọ who mu ovao họ? 7 Otẹrọnọ who re nwene re who ru ewoma, kọ a gbẹ te jẹ owhẹ rehọ?* Rekọ who gbe nwene re who ru ewoma ha, uzioraha o rrọ unuẹthẹ hẹrẹ, yọ o gwọlọ nọ o re su owhẹ; kọ who ti ru re whọ vae abọ?”

8 Nọ oyena o vrẹ no, Keni ọ tẹ ta kẹ Ebẹle oniọvo riẹ nọ: “Joma kpobọ ẹwọ.” Nọ a jọ obọ ẹwọ na, Keni ọ tẹ fa Ebẹle oniọvo riẹ kpe.+ 9 Kẹsena Jihova ọ tẹ nọ Keni nọ: “Oniọvo ra Ebẹle ọ rrọ?” ọ tẹ ta nọ: “Mẹ riẹ hẹ. Mẹ họ ọnọ ọ be rẹrote oniọvo mẹ?” 10 Ọghẹnẹ ọ tẹ ta nọ: “Kinọ eme who ru na? Gaviezọ! Azẹ oniọvo ra ọ be viẹ se omẹ no otọ na ze.+ 11 Enẹna mẹ bọwo owhẹ ehao, me bi le owhẹ no otọ nọ u rovie unu riẹ da azẹ oniọvo ra nọ who kpe na.+ 12 Nọ whọ tẹ kọ eware họ otọ na, u ti wou eware kẹ owhẹ hẹ.* Who ti ghoro jẹ jọ ọnọ ọ be dhẹ dhere evaọ otọakpọ na.” 13 Kẹsena Keni ọ tẹ ta kẹ Jihova nọ: “Uye uzioraha mẹ o rro hrọ kẹ omẹ. 14 Nẹnẹ na who bi le omẹ no otọ* na, mẹ gbẹ te jọ aro ra ha; mẹ vẹ te jọ ọnọ o bi ghoro gbe ọnọ ọ be dhẹ dhere evaọ otọakpọ na, yọ ohwo kpobi nọ ọ ruẹ omẹ o ti kpe omẹ no.” 15 Fikiere Jihova ọ tẹ ta kẹe nọ: “Fiki oyena, ohwo kpobi nọ o kpe Keni ọ te ruẹ uye orukele isiahrẹ.”

Fikiere Jihova o te fi oka họ kẹ Keni re ohwo kpobi nọ ọ ruẹ e riẹ o gbe kpei hi. 16 Keni o te no aro Jihova ọ tẹ nyae rria ẹkwotọ Igbo,* evaọ ofẹ ovatha-ọre Idẹn.+

17 Nọ oyena o vrẹ no, Keni o te lele aye riẹ wezẹ,+ o te dihọ o te yẹ Enọk. Kẹsena o te mu okpẹwho jọ họ ẹbọ jẹ rehọ odẹ ọmọzae riẹ Enọk ro se okpẹwho na. 18 Kẹsena a te yẹ Aerad kẹ Enọk. Aerad họ ọsẹ Mahujael, Mahujael họ ọsẹ Metushẹl, Metushẹl họ ọsẹ Lemẹk.

19 Lemẹk o te wo eyae ivẹ. Odẹ ọrọ ọsosuọ họ Edah, odẹ ọrọ avọ ivẹ Zila. 20 Edah o te yẹ Jebal. Ọye ọ jọ ohwo ọsosuọ nọ ọ rria iwou-udhu je wo ithuru erao. 21 Odẹ oniọvo-ọmọzae riẹ Jubal. Ọye ọ jọ ohwo ọsosuọ nọ o kporo akpata gbe urete. 22 Zila o te yẹ Tubal-ken, ọnọ o je duwu oghẹrẹ okwakwa ekọpa gbe ayọno kpobi. Yọ oniọvo-ọmọtẹ Tubal-ken họ Neama. 23 Lemẹk ọ tẹ ta eme nana kẹ eyae riẹ Edah avọ Zila:

25 Adamu ọ tẹ wariẹ lele aye riẹ wezẹ, o te yẹ ọmọzae. O* te se odẹ riẹ Sẹt*+ keme ọ ta nọ, “Ọghẹnẹ ọ rehọ ọmọ* ọfa mu kẹ omẹ no evaọ ẹta Ebẹle, keme Keni o kpe rie.”+ 26 Yọ a yẹ ọmọzae kẹ Sẹt, o te se odẹ riẹ Enọsh.+ Evaọ oke yena ahwo a te mu odẹ Jihova họ ese.

5 Onana họ obe ikuigbe Adamu. Evaọ ẹdẹ nọ Ọghẹnẹ ọ ma Adamu, ọ ma riẹ wọhọ ọyomariẹ.+ 2 Ọzae gbe aye ọ ma rai.+ Evaọ ẹdẹ nọ ọ rọ ma ae,+ ọ ghale rai o te se ai Ohwo.*

3 Adamu ọ rria ikpe udhozeza-gbikpe (130), kẹsena o te yẹ ọmọzae nọ ọ wọhọ e riẹ, nọ ọ rrọ uwoho riẹ, o te se odẹ riẹ Sẹt.+ 4 Nọ o yẹ Sẹt no, Adamu ọ tẹ rria ikpe egba eree (800). Yọ o yẹ emezae gbe emetẹ. 5 Fikiere edẹ uzuazọ Adamu nọ ọ rria kpobi i bu te ikpe egba izii gbe ọgba (930), kẹsena o te whu.+

6 Sẹt ọ rria ikpe udhusoi-gbisoi (105), kẹsena o te yẹ Enọsh.+ 7 Nọ o yẹ Enọsh no, Sẹt ọ tẹ rria ikpe egba eree gbe ihrẹ (807). Yọ o yẹ emezae gbe emetẹ. 8 Fikiere edẹ uzuazọ Sẹt nọ ọ rria kpobi i bu te ikpe egba izii gbe ikpegbivẹ (912), kẹsena o te whu.

9 Enọsh ọ rria ikpe udhone-gbikpe, kẹsena o te yẹ Kinan. 10 Nọ o yẹ Kinan no, Enọsh ọ tẹ rria ikpe egba eree gbe ikpegbisoi (815). Yọ o yẹ emezae gbe emetẹ. 11 Fikiere edẹ uzuazọ Enọsh nọ ọ rria kpobi i bu te ikpe egba izii gbe isoi (905), kẹsena o te whu.

12 Kinan ọ rria ikpe udhosa-gbikpe, kẹsena o te yẹ Mahalalẹl.+ 13 Nọ o yẹ Mahalalẹl no, Kinan ọ tẹ rria ikpe egba eree gbe udhuvẹ (840). Yọ o yẹ emezae gbe emetẹ. 14 Fikiere edẹ uzuazọ Kinan nọ ọ rria kpobi i bu te ikpe egba izii gbe ikpe (910), kẹsena o te whu.

15 Mahalalẹl ọ rria ikpe udhosa-gbisoi, kẹsena o te yẹ Jerẹd.+ 16 Nọ o yẹ Jerẹd no, Mahalalẹl ọ tẹ rria ikpe egba eree gbe ọgba (830). Yọ o yẹ emezae gbe emetẹ. 17 Fikiere edẹ uzuazọ Mahalalẹl nọ ọ rria kpobi i bu te ikpe egba eree gbe udhone gbe ikpegbisoi (895), kẹsena o te whu.

18 Jerẹd ọ rria ikpe udhoree-gbivẹ (162), kẹsena o te yẹ Enọk.+ 19 Nọ o yẹ Enọk no, Jerẹd ọ tẹ rria ikpe egba eree (800). Yọ o yẹ emezae gbe emetẹ. 20 Fikiere edẹ uzuazọ Jerẹd nọ ọ rria kpobi i bu te ikpe egba izii gbe udhosa-gbivẹ (962), kẹsena o te whu.

21 Enọk ọ rria ikpe udhosa-gbisoi, kẹsena o te yẹ Mẹtusẹla.+ 22 Nọ o yẹ Mẹtusẹla no, Enọk ọ ruabọhọ lele Ọghẹnẹ uzẹme na* nya evaọ ikpe egba esa (300). Yọ o yẹ emezae gbe emetẹ. 23 Fikiere edẹ uzuazọ Enọk nọ ọ rria kpobi i bu te ikpe egba esa gbe udhosa-gbisoi (365). 24 Enọk ọ ruabọhọ lele Ọghẹnẹ uzẹme na nya.+ Kẹsena ọ gbẹ jọ họ, keme Ọghẹnẹ ọ rehọ e riẹ.+

25 Mẹtusẹla ọ rria ikpe udhuzii-gbihrẹ (187), kẹsena o te yẹ Lemẹk.+ 26 Nọ o yẹ Lemẹk no, Mẹtusẹla ọ tẹ rria ikpe egba ihrẹ gbe udhone-gbivẹ (782). Yọ o yẹ emezae gbe emetẹ. 27 Fikiere edẹ uzuazọ Mẹtusẹla nọ ọ rria kpobi i bu te ikpe egba izii gbe udhosa-gbizii (969), kẹsena o te whu.

28 Lemẹk ọ rria ikpe udhuzii-gbivẹ (182), kẹsena o te yẹ ọmọzae. 29 O te se odẹ riẹ Noa,*+ inọ: “Ọnana ọ te wha omosasọ* se omai rono iruo egaga mai gbe uye nọ o be bẹ omai fiki otọ na nọ Jihova ọ bọwo ehao na.”+ 30 Nọ o yẹ Noa no, Lemẹk ọ tẹ rria ikpe egba isoi gbe udhone gbe ikpegbisoi (595). Yọ o yẹ emezae gbe emetẹ. 31 Fikiere edẹ uzuazọ Lemẹk nọ ọ rria kpobi i bu te ikpe egba ihrẹ gbe udhosa gbe ikpegbihrẹ (777), kẹsena o te whu.

32 Nọ Noa ọ kpako te ikpe egba isoi (500) no, o te yẹ Shẹm,+ Ham+ gbe Jafẹt.+

6 Whaọ nọ ahwo a muhọ ebu no evaọ otọakpọ na je bi yẹ emetẹ, 2 emọ* Ọghẹnẹ uzẹme na*+ a te bi muẹrohọ nọ emetẹ ahwo-akpọ a wo erru. Fikiere a te mu eyae nọ e were rai kpobi họ ẹrehọ kẹ omarai. 3 Kẹsena Jihova ọ tẹ ta nọ: “Me* ti thihakọ kẹ ohwo-akpọ ribri hi,+ keme uwo gheghe ọ rrọ.* Fikiere, edẹ riẹ e te jọ ikpe udhozeza (120).”+

4 Nẹfilim* na a jọ otọakpọ na evaọ oke yena gbe ikpe nọ i lele i rie. Evaọ oke yena emọ Ọghẹnẹ uzẹme na a je lele emetẹ ahwo-akpọ wezẹ, yọ a yẹ emezae kẹ ae. Ae a jọ egba evaọ oke nọ u kpemu, ahwo nọ odẹ rai u je do.

5 Fikiere, Jihova ọ tẹ ruẹ nọ umuomu ohwo-akpọ o re ruaro evaọ otọakpọ na yọ eware kpobi nọ ọ be jọ udu riẹ roro ẹsikpobi eyoma ọvo.+ 6 O tẹ da Jihova nọ ọ ma ahwo fihọ otọakpọ na, yọ o kẹ riẹ uye evaọ udu.*+ 7 Fikiere Jihova ọ tẹ ta nọ: “Me ti hwere ahwo nọ mẹ ma no otọ na no, te ahwo te erao ẹwho, erao nọ i re si* evaọ otọ, te emama nọ e rẹ rra evaọ obọ ehru,* keme o da omẹ nọ mẹ ma rai.” 8 Rekọ Noa ọ jọ emamọ ohwo evaọ aro Jihova.

9 Onana họ ikuigbe Noa.

Noa ọ jọ ọzae okiẹrẹe.+ Ọ jọ ohwo nọ ọ kare oruthọ* evaọ udevie ahwo oke riẹ. Noa o lele Ọghẹnẹ uzẹme na nya.+ 10 Nọ oke o be nyaharo na, Noa o te yẹ emezae esa, Shẹm, Ham, gbe Jafẹt.+ 11 Rekọ otọakpọ na o raha no evaọ aro Ọghẹnẹ uzẹme na, yọ ozighi ọ vọ otọakpọ na. 12 Ẹhẹ, Ọghẹnẹ o rri otọakpọ na, ọ tẹ ruẹ nọ o raha no;+ ahwo kpobi nọ a rrọ otọakpọ na a raha no.+

13 Kẹsena Ọghẹnẹ ọ tẹ ta kẹ Noa nọ: “Mẹ jiroro no inọ mẹ te raha ahwo kpobi no, keme ozighi ọ vọ otọakpọ na fiki rai, fikiere mẹ be raha ae kugbe otọakpọ na.+ 14 Rehọ emamọ ure* ku okọ* kẹ omara.+ Who re ku ibriwou fihọ okọ na jẹ rehọ ikota ralọ iẹe,+ te obeva te otafe. 15 Enẹ who ti ku ei: Okọ na u re theri te ikiubiti* egba esa (300), o rẹ kẹre te ikiubiti udhuvẹ-gbikpe, yọ u re kpehru te ikiubiti ọgba. 16 Who re ru unwido fihọ okọ na nọ elo ọ rẹ rọ ruọ eva riẹ,* no umuo ikiubiti ọvo no obehru ze. Who re ru unuẹthẹ okọ na fihọ ofẹ uthethei riẹ,+ yọ okọ na u re wo edhe ọsosuọ, edhe avọ ivẹ, gbe edhe avọ esa.

17 “Rọkẹ omẹ, mẹ be te rehọ owhe ku+ otọakpọ na nọ mẹ te rọ raha omama kpobi nọ u wo ẹwẹ uzuazọ* no otọ idhiwu na. Oware kpobi nọ o rrọ otọakpọ na u ti whu.+ 18 Yọ mẹ be re ọvọ kugbe owhẹ, whọ rẹ ruọ eva okọ na, whẹ, emezae ra, aye ra, gbe eyae emezae ra.+ 19 Who re su koghẹrẹ koghẹrẹ omama kpobi nọ o rrọ uzuazọ ivivẹ ruọ eva okọ na+ re e ruẹse zọ, te ọrọ ọzae te ọrọ aye;+ 20 emama nọ e rẹ rra ọvuọ oghoghẹrẹ rai, erao ẹwho ọvuọ oghoghẹrẹ rai, erao nọ i re si evaọ otọ kpobi ọvuọ oghoghẹrẹ rai, ivivẹ evaọ oghẹrẹ ọvuọvo e te nyabru owhẹ ziọ eva okọ na re e ruẹse zọ.+ 21 Rọkẹ owhẹ, who re koko oghoghẹrẹ emu kpobi họ nọ whọ rẹ rehọ lele oma ruọ okọ na+ nọ whẹ avọ erao na a te re.”

22 Noa o te ru eware kpobi nọ Ọghẹnẹ ọ ta kẹe. Nwanọ ere o ru.+

7 Nọ oyena o vrẹ no, Jihova ọ tẹ ta kẹ Noa nọ: “Ruọ eva okọ na, whẹ avọ ekru ra kpobi, keme whẹ họ ohwo nọ mẹ ruẹ nọ o kiẹrẹe evaọ aro mẹ evaọ oge nana.+ 2 Whọ rẹ rehọ koghẹrẹ koghẹrẹ arao nọ ọ fo ihrẹ,*+ ọrọ ọzae avọ aye riẹ; yọ koghẹrẹ koghẹrẹ arao nọ ọ fo ho ivẹ ọvo, ọrọ ọzae avọ aye riẹ; 3 yọ emama nọ e rẹ rra evaọ ehru ihrẹ,* ọrọ ọzae avọ ọrọ aye, re e ruẹse zọ je yẹ fihọ otọakpọ na soso.+ 4 Keme edẹ ihrẹ ọvo i kiọkọ, me ti ru oso rrọ+ fihọ otọakpọ na edẹ udhuvẹ gbe eso udhuvẹ,+ yọ me ti hwere oware kpobi nọ o rrọ uzuazọ nọ mẹ ma no otọ na.”+ 5 Noa o te ru oware kpobi nọ Jihova ọ ta kẹe.

6 Ikpe egba ezeza (600) Noa ọ jọ nọ owhe na o ro ku otọakpọ na.+ 7 Fikiere Noa, avọ emezae riẹ, aye riẹ, gbe eyae emezae riẹ a tẹ ruọ eva okọ na taure owhe na ọ tẹ te ze.+ 8 Koghẹrẹ koghẹrẹ arao nọ ọ fo gbe koghẹrẹ koghẹrẹ arao nọ ọ fo ho gbe emama nọ e rẹ rra gbe omama kpobi nọ o rẹ nya evaọ otọ na,+ 9 e tẹ ruọ eva okọ na bru Noa ivivẹ, te ọrọ ọzae avọ ọrọ aye, nwane wọhọ epanọ Ọghẹnẹ ọ ta kẹ Noa. 10 Nọ edẹ ihrẹ e vrẹ no, owhe na o te ku otọakpọ na.

11 Evaọ ukpe avọ egba ezeza (600) ọrọ uzuazọ Noa, evaọ amara avọ ivẹ, evaọ ẹdẹ avọ ikpegbihrẹ amara na, evaọ ẹdẹ yena iyeri-ame erọ ame obuobu orereghe na* kpobi e tẹ sa zue, inuethẹ ame obọ idhiwu na i te rovie.+ 12 Oso ọ tẹ rrọ fihọ otọakpọ na edẹ udhuvẹ gbe eso udhuvẹ. 13 Evaọ ẹdẹdẹ yena, Noa ọ tẹ ruọ eva okọ na, tei te emezae riẹ, Shẹm, Ham, avọ Jafẹt,+ gbe aye riẹ gbe eyae esa emezae riẹ.+ 14 A tẹ ruọ eva kugbe arao ẹwọ kpobi ọvuọ oghoghẹrẹ riẹ, gbe arao ẹwho kpobi ọvuọ oghoghẹrẹ riẹ, gbe arao nọ o re si* evaọ otọ kpobi evaọ otọakpọ na ọvuọ oghoghẹrẹ riẹ, gbe omama nọ o rẹ rra kpobi ọvuọ oghoghẹrẹ riẹ, ọvra kpobi, omama kpobi nọ u wo ibekpe. 15 I te je kpobọ okọ na bru Noa, ivivẹ ọrọ omama kpobi nọ u wo ẹwẹ uzuazọ.* 16 Fikiere a tẹ ruọ eva, omama kpobi, ọrọ ọzae avọ ọrọ aye, nwane wọhọ epanọ Ọghẹnẹ ọ ta kẹe. Kẹsena Jihova ọ tẹ kare ẹthẹ na.

17 Oso na ọ tẹ jẹ rrọ fihọ otọakpọ na edẹ udhuvẹ, ame na o te je dhe ebuebu, o te mu okọ na họ ẹwọ no otọ, okọ na u te je vori evaọ ehru otọakpọ na. 18 Ame na ọ tẹ te vọ oria kpobi je bi dhe ebuebu evaọ otọakpọ na rekọ okọ na u je vori evaọ ehru ame na. 19 Ame na ọ vọ otọakpọ na te epanọ o ro ruru igbehru kpobi nọ i kpehru gaga evaọ otọ idhiwu na soso.+ 20 Ame na ọ rehọ ikiubiti* ikpegbisoi kpehru vi igbehru na.

21 Fikiere emama kpobi nọ e rrọ uzuazọ nọ e jẹ nya evaọ otọakpọ na i te whu,+ emama nọ e rẹ rra, erao ẹwho, erao ẹwọ, emama nọ e rẹ jọ usu ovo buobu,* gbe ahwo-akpọ kpobi.+ 22 Omama kpobi nọ o jọ otọ oyaya na nọ u wo ẹwẹ uzuazọ* evaọ ighogho-inwe riẹ u te whu.+ 23 Fikiere Ọghẹnẹ o te hwere oware kpobi nọ o rrọ uzuazọ no otọakpọ na, te ohwo, erao, erao nọ i re si evaọ otọ, gbe emama nọ e rẹ rra evaọ ehru. A hwere i rai kpobi no otọakpọ na;+ Noa avọ enọ e jọ okọ na kugbei ọvo a zọ.+ 24 Ame na o te gbe ruru otọakpọ na edẹ udhuhrẹ-gbikpe (150).+

8 Rekọ Ọghẹnẹ ọ tẹ kareghẹhọ* Noa gbe erao ẹwọ gbe erao ẹwho kpobi nọ e jọ okọ na kugbei,+ Ọghẹnẹ o te ru re ofou o fou otọakpọ na, ame na o te muhọ ẹkpọ. 2 Iyeri-ame obọ ehru na gbe inuethẹ ame obọ idhiwu na e tẹ kare, fikiere oso nọ ọ jẹ rrọ no obọ idhiwu ze na ọ tẹ ka.*+ 3 Kẹsena ame na o te muhọ ẹkpọ no otọakpọ na ẹmẹrera. Nọ edẹ udhuhrẹ-gbikpe (150) e vrẹ no, yọ ame na o kpotọ no. 4 Evaọ amara avọ ihrẹ, evaọ ẹdẹ avọ ikpegbihrẹ amara na, okọ na u te muotọ evaọ igbehru Ararat. 5 Yọ ame na ọ jẹ rọ ẹmẹrera kpọ rite amara avọ ikpe. Evaọ amara avọ ikpe na, evaọ ẹdẹ ọsosuọ amara na, ehru igbehru na e tẹ romavia.+

6 Fikiere nọ edẹ udhuvẹ e vrẹ no, Noa o te rovie unwido+ nọ o ru fihọ okọ na 7 je vi ọkọlọbe jọ ruọ otafe; ọ jẹ hae rra vrẹ jẹ rra zihe ze bẹsenọ ame na ọ rọ kpọ no otọakpọ na no.

8 Uwhremu na, o te vi erueruẹ vrẹ re ọ riẹ sọ ame na ọ kpọ no otọ na no. 9 Erueruẹ na ọ ruẹ oria eriosehọ ọvuọvo nọ o re kiemu hu,* fikiere o te zihe bru ei ziọ okọ na, keme ame ọ gbẹ rrọ otọakpọ na soso.+ Fikiere ọ tẹ rriẹ obọ ruọ otafe ọ tẹ rehọ iẹe ruọ okọ na. 10 Ọ tẹ hẹrẹ edẹ ihrẹ efa, ọ tẹ wariẹ vi erueruẹ na no okọ na vrẹ. 11 Nọ erueruẹ na o zihe bru ei ze evaọ ubrobọ owọwọ, ọ tẹ ruẹ nọ obe ure olivi nọ a kọrọ obọ o rrọ ugbunu riẹ! Fikiere Noa ọ tẹ riẹ nọ ame na ọ kpọ no otọakpọ na no.+ 12 Ọ tẹ jẹ hẹrẹ edẹ ihrẹ efa. Kẹsena o te vi erueruẹ na ruọ otafe, rekọ o gbe zihe bru ei ze ofa ha.

13 Evaọ ukpe avọ egba ezeza gbe ọvo (601),+ evaọ amara ọsosuọ, evaọ ẹdẹ ọsosuọ amara na, yọ ame na ọ kpọ no otọakpọ na no; Noa o te rovie abọ obehru okọ na* jẹ ruẹ nọ otọ na u muhọ ẹya no. 14 Evaọ amara avọ ivẹ, evaọ ẹdẹ avọ udhegbihrẹ amara na, yọ otọakpọ na o ya kpobi no.

15 Kẹsena Ọghẹnẹ ọ tẹ ta kẹ Noa nọ: 16 “No evaọ okọ na ze, whẹ, aye ra, emezae ra, gbe eyae emezae ra.+ 17 Rehọ koghẹrẹ koghẹrẹ emama kpobi nọ e rrọ uzuazọ lele oma ruọ otafe,+ emama nọ e rẹ rra gbe erao na gbe erao kpobi nọ i re si* evaọ otọakpọ na, re i yẹ* evaọ otọakpọ na, a ve vihọ jẹ jọ buobu evaọ otọakpọ na.”+

18 Fikiere Noa ọ tẹ ruọ otafe, avọ emezae riẹ,+ aye riẹ, gbe eyae emezae riẹ. 19 Omama kpobi nọ o rrọ uzuazọ, arao kpobi nọ o re si evaọ otọ gbe omama kpobi nọ o rẹ rra gbe omama kpobi nọ o rẹ nya evaọ otọakpọ na, e tẹ nya no okọ na ze uyuyẹ.+ 20 Kẹsena Noa ọ tẹ bọ agbada-idhe+ kẹ Jihova, ọ tẹ jọ usu koghẹrẹ koghẹrẹ erao kpobi nọ e fo gbe koghẹrẹ koghẹrẹ emama nọ e rẹ rra kpobi nọ e fo rehọ erao jọ ze+ ro dhe idhe emahọ evaọ ehru agbada-idhe na.+ 21 Jihova o te mu ore awere* họ eyo. Fikiere Jihova ọ tẹ jọ evaọ udu riẹ ta nọ: “Mẹ rẹ gbẹ rọ fiki ohwo-akpọ bọwo otọ na ehao* ofa ha,+ keme eware nọ ohwo ọ be jọ udu riẹ roro i yoma no oke emaha riẹ ze;+ yọ mẹ te gbẹ wariẹ raha oware kpobi nọ o rrọ uzuazọ ofa ha wọhọ epanọ me ru na.+ 22 No umuo enẹna vrẹ, oke ovo o te jariẹ hẹ evaọ otọakpọ na nọ oke ekakọ gbe ivuẹvu, edhedhẹ gbe ẹrrorro, ezi ivo gbe ezi ekpahe,* gbe ẹdẹ* gbe aso i ti ro notọ.”+

9 Ọghẹnẹ ọ tẹ ghale Noa avọ emezae riẹ, ọ tẹ ta kẹ ae nọ: “Wha vihọ re wha jọ buobu jẹ vọ otọakpọ na.+ 2 Ozọ rai gbe idudu rai e te jọ oma omama kpobi nọ u wo uzuazọ evaọ otọakpọ na gbe omama kpobi nọ o rẹ rra evaọ ehru,* omama kpobi nọ o rẹ nya evaọ otọ na gbe iyei abade na kpobi. A rehọ e rai họ owhai obọ no.*+ 3 Arao kpobi nọ ọ rẹ nya nọ ọ rrọ uzuazọ ọ rẹ sae jọ emuore kẹ owhai.+ Nwane wọhọ epanọ mẹ kẹ owhai ẹbe ọrọrọ na, ere mẹ be rehọ aikpobi kẹ owhai.+ 4 Rekọ uwo na ọvo wha rẹ re, wha rẹ re uzuazọ* riẹ hẹ, koyehọ azẹ+ riẹ.+ 5 U te no ere no, mẹ te nekpẹ azẹ uzuazọ* rai. Mẹ te nekpẹ mi omama kpobi nọ o rrọ uzuazọ; yọ mẹ te jọ obọ ohwo kpobi nekpẹ uzuazọ oniọvo riẹ.+ 6 Ohwo kpobi nọ o kpe azẹ ohwo, ohwo o ti kpe azẹ riẹ re,+ keme uwoho Ọghẹnẹ oye Ọghẹnẹ ọ rọ ma ohwo.+ 7 Rọkẹ owhai, wha vihọ* re wha jọ buobu, re wha vihọ gaga evaọ otọakpọ na je dhe ebuebu.”+

8 Kẹsena Ọghẹnẹ ọ tẹ ta kẹ Noa avọ emezae riẹ nọ: 9 “Obọnana mẹ be re ọvọ mẹ kugbe owhai+ je kugbe emọ rai nọ i ti lele owhai, 10 je kugbe omama* kpobi nọ o rrọ uzuazọ nọ o rrọ kugbe owhai, evra na, erao na, gbe emama kpobi nọ e rrọ uzuazọ evaọ otọakpọ na kugbe owhai, enọ i no okọ na ze kpobi, omama kpobi nọ o rrọ uzuazọ evaọ otọakpọ na.+ 11 Ẹhẹ, mẹ be re ọvọ mẹ kugbe owhai: Ame owhe ọ te gbẹ wariẹ raha uwo* kpobi ofa ha, yọ owhe ọ te gbẹ wariẹ raha otọakpọ na ofa ha.”+

12 Ọghẹnẹ o fibae nọ: “Onana họ oka ọvọ nọ mẹ be re kugbe owhai gbe omama* kpobi nọ o rrọ uzuazọ nọ o rrọ kugbe owhai, rọkẹ ige obaro kpobi. 13 Me bi fi usi-ame mẹ họ ẹgho na, yọ o te jọ oka ọvọ nọ ọ rrọ udevie mẹ avọ otọakpọ na. 14 Oke kpobi nọ me ru ẹgho fihọ ehru otọakpọ na, usi-ame na o te romavia hrọ evaọ ẹgho na. 15 Yọ mẹ te ginẹ kareghẹhọ ọvọ mẹ nọ mẹ re kugbe owhai gbe koghẹrẹ koghẹrẹ omama* kpobi nọ o rrọ uzuazọ; yọ ame o ti gbe zihe ruọ owhe nọ ọ rẹ raha uwo kpobi ofa ha.+ 16 Usi-ame na o te romavia evaọ ẹgho na, yọ mẹ te ruẹ e riẹ hrọ jẹ kareghẹhọ ọvọ ebẹdẹ bẹdẹ nọ ọ rrọ udevie Ọghẹnẹ avọ koghẹrẹ koghẹrẹ omama* kpobi nọ o rrọ uzuazọ evaọ otọakpọ na.”

17 Ọghẹnẹ ọ tẹ wariẹ ẹme na kẹ Noa nọ: “Onana họ oka ọvọ nọ mẹ be re kugbe uwo kpobi nọ o rrọ otọakpọ na.”+

18 Emezae Noa nọ i no okọ na ze họ Shẹm, Ham, gbe Jafẹt.+ Uwhremu na Ham o te yẹ Kenan.+ 19 Esa nana e jọ emezae Noa, yọ oma rai ahwo otọakpọ na kpobi a no ze jẹ vaha ruọ eria kpobi.+

20 Whaọ Noa o te mu iruo ọwhẹrẹ họ, ọ tẹ kọ ọgbọ evaene. 21 Nọ ọ da enwaene na, u te mu ei, ọ tẹ bafihọ evaọ uwou-udhu riẹ. 22 Ham ọsẹ Kenan ọ ruẹ ẹba ọsẹ riẹ, ọ tẹ vuẹ inievo* ivẹ riẹ evaọ obọ otafe. 23 Fikiere Shẹm avọ Jafẹt a tẹ rehọ ohọ a te fi ei họ ẹkoko rai jẹ nya ukuke ruọ eva. A tẹ rọ ere ruru ẹba ọsẹ rai yọ a ku ovao fiẹ, fikiere a ruẹ ẹba ọsẹ rai hi.

24 Nọ Noa ọ rọwo no ibiaro udi na ze jẹ riẹ oware nọ ọmọzae riẹ nọ ọ mae maha o ru rie, 25 ọ tẹ ta nọ:

“Mẹ bọwo Kenan ehao.+

Jọ ọ jọ ọrigbo nọ ọ mai kpotọ kẹ inievo riẹ.”+

26 O te fibae nọ:

Jọ Kenan ọ jọ ọrigbo kẹe re.”

28 Noa ọ tẹ gbẹ rria ikpe egba esa gbe udhuvẹ-gbikpe (350) nọ owhe na o ku vrẹ no.+ 29 Fikiere edẹ uzuazọ Noa kpobi i bu te ikpe egba izii gbe udhuvẹ-gbikpe (950), kẹsena o te whu.

10 Onana họ ikuigbe emezae Noa, Shẹm,+ Ham, gbe Jafẹt.

A yẹ emọ nọ Owhe na o ku vrẹ no.+ 2 Emezae Jafẹt họ Goma,+ Magọg,+ Medeyai, Jevan, Tubal,+ Mishẹk,+ gbe Taeras.+

3 Emezae Goma họ Ashkenaz,+ Raefat, gbe Togama.+

4 Emezae Jevan họ Elaeshah,+ Tashish,+ Kitim,+ gbe Dodenim.

5 Oma ahwo nana ahwo nọ a rẹ rria ikoliko na a no ze vaha ruọ ekwotọ rai, ọvuọ evẹrẹ rai gbe iviuwou rai gbe erẹwho rai.

6 Emezae Ham họ Kush, Mizreyẹm,+ Put,+ gbe Kenan.+

7 Emezae Kush họ Siba,+ Havila, Sabta, Reama,+ gbe Sabtika.

Emezae Reama họ Shiba avọ Didan.

8 Kush họ ọsẹ Nimrọd. Ọye họ ohwo ọsosuọ nọ o zihe ruọ ohwo ologbo evaọ otọakpọ na. 9 O zihe ruọ ozuẹ ologbo nọ ọ wọso Jihova. Oyejabọ nọ a rẹ rọ ta nọ: “Wọhọ Nimrọd, ozuẹ ologbo nọ ọ wọso Jihova.” 10 Emuhọ uvie riẹ o jọ* Bebẹl,+ Irẹk,+ Akad, gbe Kalnẹ, evaọ ẹkwotọ Shaena.+ 11 O no ẹkwotọ yena kpohọ Asiria+ ọ tẹ bọ Nanivi,+ Rehobọt-Iyẹr, Kela, 12 gbe Risẹn, evaọ udevie Nanivi avọ Kela: Onana họ okpẹwho ologbo na.*

13 Mizreyẹm họ ọsẹ Ludim,+ Anamim, Lẹhebim, Naftuhim,+ 14 Patrusim,+ Kasluhim, (ọnọ ahwo Filistia+ a no oma riẹ ze), gbe Kaftorẹm.+

15 Kenan họ ọsẹ Saedọn,+ ọmọ ọsosuọ riẹ, gbe Hẹt,+ 16 jegbe ahwo Jebus,+ ahwo Amọ,+ ahwo Gẹgash, 17 ahwo Hiv,+ ahwo uyẹ Arkae, ahwo Sin, 18 ahwo Avad,+ ahwo Zẹma, gbe ahwo Hemat.+ Uwhremu na, iviuwou ahwo Kenan e tẹ vaha. 19 Fikiere uwhru ahwo Kenan u no Saedọn rite obọ Gira,+ kẹle Gaza,+ je te obọ Sọdọm, Gomora,+ Adma, gbe Zeboyẹm,+ kẹle Lesha. 20 Enana họ emezae Ham lele ọvuọ iviuwou rai gbe evẹrẹ rai, ekwotọ rai gbe erẹwho rai.

21 Shẹm o yẹ emọ re, ọye họ ọsẹ-esẹ emezae Iba+ kpobi gbe oniọvo-ọmọzae Jafẹt ọkpako rai kpobi.* 22 Emezae Shẹm họ Ilam,+ Asshọ,+ Apakshad,+ Lọd, gbe Eram.+

23 Emezae Eram họ Ọz, Họl, Gita, gbe Mash.

24 Apakshad họ ọsẹ Shila,+ Shila họ ọsẹ Iba.

25 Emezae ivẹ a yẹ kẹ Iba. Odẹ ọjọ Pilẹg,*+ keme evaọ oke uzuazọ riẹ, otọakpọ na o hẹriẹ.* Odẹ oniọvo riẹ họ Jọktan.+

26 Jọktan họ ọsẹ Almodad, Shilẹf, Hezamevẹt, Jira,+ 27 Hedoram, Uzal, Dikla, 28 Obal, Abimẹl, Shiba, 29 Ofaya,+ Havila, gbe Jobab; enana kpobi yọ emezae Jọktan.

30 Ẹkwotọ nọ a jẹ rria o no Misha te obọ Sifa, ubrotọ igbehru obọ Ovatha-Ọre na.

31 Enana họ emezae Shẹm lele ọvuọ iviuwou rai gbe evẹrẹ rai, ekwotọ rai gbe erẹwho rai.+

32 Enana họ iviuwou emezae Noa lele ọvuọ iviuwou rai gbe erẹwho rai. Oma enana erẹwho na a vaha no ze ruọ otọakpọ na nọ Owhe na o ku vrẹ no.+

11 Whaọ otọakpọ na kpobi o jẹ ta ẹvẹrẹ ọvo gbe oghẹrẹ eme evo. 2 Nọ a jẹ nya rri ofẹ ovatha-ọre na, a tẹ ruẹ ukiekpotọ opraprara jọ evaọ ẹkwotọ Shaena,+ a te mu etẹe họ ẹria. 3 Kẹsena a tẹ ta kẹ ohwohwo nọ: “Wha nyaze! Joma ma ibriki jẹ rọ erae ru ai ga.” Fikiere ibriki a jẹ rọ bọ viukpọ itho, yọ bitumẹn* a jẹ yẹ fihọ ai rọ ta ai kugbe. 4 A tẹ ta nọ: “Wha nyaze! Joma bọ okpẹwho kẹ omamai gbe uwou ukpehru nọ u re kpehru te obọ idhiwu, re ma wo odẹ nọ u re do kẹ omamai, re ma gbẹ vaha ruọ otọakpọ na soso ho.”+

5 Kẹsena Jihova ọ tẹ ze otọ re ọ ruẹ okpẹwho na gbe uwou ukpehru nọ emọ ahwo a be bọ na. 6 Jihova ọ tẹ ta nọ: “Rri! Ahwo ọvo a rrọ, yọ a be ta ẹvẹrẹ ọvo,+ who rri oware nọ a muhọ eru no! Whaọ oware ovo o riẹ hẹ nọ a ti wo họ iroro inọ a re ru nọ a te sai ru hu. 7 Nyaze! Joma+ kpobọ otọ re ma fi ozighi họ ẹvẹrẹ rai re a gbe yo ẹvẹrẹ ohwohwo ho.” 8 Fikiere Jihova ọ tẹ vaha ae no etẹe ruọ otọakpọ na soso,+ a tẹ rọ ẹmẹrera siọ okpẹwho na ba ẹbọ. 9 Oyejabọ nọ a ro sei Bebẹl,*+ keme etẹe Jihova o jo fi ozighi họ ẹvẹrẹ otọakpọ na kpobi, Jihova ọ tẹ vaha ae no etẹe ruọ otọakpọ na soso.

10 Onana họ ikuigbe Shẹm.+

Shẹm ọ jọ ikpe udhusoi (100) nọ o yẹ Apakshad,+ ikpe ivẹ nọ Owhe na o ku vrẹ no. 11 Nọ o yẹ Apakshad no, Shẹm ọ tẹ gbẹ rria ikpe egba isoi (500). Yọ o yẹ emezae gbe emetẹ.+

12 Apakshad ọ rria ikpe ọgbagbisoi, kẹsena o te yẹ Shila.+ 13 Nọ o yẹ Shila no, Apakshad ọ tẹ gbẹ rria ikpe egba ene gbe esa (403). Yọ o yẹ emezae gbe emetẹ.

14 Shila ọ rria ikpe ọgba, kẹsena o te yẹ Iba.+ 15 Nọ o yẹ Iba no, Shila ọ tẹ gbẹ rria ikpe egba ene gbe esa (403). Yọ o yẹ emezae gbe emetẹ.

16 Iba ọ rria ikpe ọgbagbene, kẹsena o te yẹ Pilẹg.+ 17 Nọ o yẹ Pilẹg no, Iba ọ tẹ gbẹ rria ikpe egba ene gbe ọgba (430). Yọ o yẹ emezae gbe emetẹ.

18 Pilẹg ọ rria ikpe ọgba, kẹsena o te yẹ Riu.+ 19 Nọ o yẹ Riu no, Pilẹg ọ tẹ gbẹ rria ikpe egba ivẹ gbe izii (209). Yọ o yẹ emezae gbe emetẹ.

20 Riu ọ rria ikpe ọgbagbivẹ, kẹsena o te yẹ Sirọg. 21 Nọ o yẹ Sirọg no, Riu ọ tẹ gbẹ rria ikpe egba ivẹ gbe ihrẹ (207). Yọ o yẹ emezae gbe emetẹ.

22 Sirọg ọ rria ikpe ọgba, kẹsena o te yẹ Nahọ. 23 Nọ o yẹ Nahọ no, Sirọg ọ tẹ gbẹ rria ikpe egba ivẹ (200). Yọ o yẹ emezae gbe emetẹ.

24 Nahọ ọ rria ikpe udhegbizii, kẹsena o te yẹ Tera.+ 25 Nọ o yẹ Tera no, Nahọ ọ tẹ gbẹ rria ikpe udhusoi gbe ikpegbizii (119). Yọ o yẹ emezae gbe emetẹ.

26 Tera ọ rria ikpe udhosa-gbikpe, kẹsena o te yẹ Abram,+ Nahọ,+ gbe Heran.

27 Onana họ ikuigbe Tera.

Tera o yẹ Abram, Nahọ, gbe Heran; Heran o te yẹ Lọt.+ 28 Nọ Tera ọsẹ riẹ ọ gbẹ jọ uzuazọ, Heran o te whu evaọ ẹkwotọ nọ a jọ yẹi, evaọ Ọr+ ọrọ ahwo Kaldia.+ 29 Abram avọ Nahọ a wo eyae. Odẹ aye Abram họ Serai,+ odẹ aye Nahọ kọ Milka,+ ọmọtẹ Heran, ọsẹ Milka gbe Iska. 30 Whaọ Serai ọ jọ ọga; o wo ọmọ họ.+

31 Tera ọ tẹ rehọ Abram ọmọzae riẹ gbe Lọt ọmọ-uruọmọ riẹ,+ ọnọ ọ rrọ ọmọzae Heran, gbe Serai aye ọmọ riẹ, aye Abram ọmọzae riẹ, a te lele iei no ẹwho Ọr ọrọ ahwo Kaldia re a kpohọ ẹkwotọ Kenan.+ A te ti te Heran+ je mu etẹe họ ẹria. 32 Edẹ uzuazọ Tera i bu te ikpe egba ivẹ gbe isoi (205). Kẹsena Tera o te whu evaọ Heran.

12 Jihova ọ tẹ ta kẹ Abram nọ: “Nya no ẹkwotọ ra gbe udevie imoni ra gbe uwou ọsẹ ra re who kpohọ ẹkwotọ nọ me bi ti dhesẹ kẹ owhẹ.+ 2 Me ti ru owhẹ fihọ orẹwho ulogbo, mẹ te ghale owhẹ, me ti ru odẹ ra rro, yọ who ti zihe ruọ oghale.+ 3 Mẹ te ghale enọ e ghale owhẹ, ohwo nọ o duwu owhẹ iyei mẹ te bọwo iẹe ehao,+ yọ oghale u ti gine te iviuwou otọ na kpobi* ẹkwoma ra.”+

4 Fikiere Abram ọ tẹ nya nwane wọhọ epanọ Jihova ọ ta kẹe na, yọ Lọt o lele i rie. Abram ọ jọ ikpe udhosa gbe ikpegbisoi nọ o no Heran.+ 5 Abram ọ rehọ aye riẹ Serai+ gbe Lọt ọmọ oniọvo riẹ+ gbe eyero kpobi nọ a kokohọ+ gbe idibo* nọ a jọ Heran wo, a tẹ ruọ edhere bi kpobọ ẹkwotọ Kenan.+ Nọ a te ẹkwotọ Kenan, 6 Abram ọ tẹ nya ẹkwotọ na duwu rite oria nọ a re se Shẹkẹm+ nọ o kẹle ire ilogbo Morẹ.+ Evaọ oke yena ahwo Kenan a jọ ẹkwotọ na. 7 Kẹsena Jihova ọ tẹ romavia kẹ Abram jẹ ta kẹe nọ: “Mẹ te rehọ ẹkwotọ nana+ kẹ emọ* ra.”+ Fikiere ọ tẹ bọ agbada-idhe fihọ etẹe kẹ Jihova nọ ọ romavia kẹe na. 8 Kẹsena ọ tẹ wọ no etẹe kpohọ ubrotọ igbehru nọ o rrọ ovatha-ọre Bẹtẹl,+ kọ etẹe ọ rọ uwou-udhu riẹ vi yọ Bẹtẹl ọ rrọ ofẹ ukiediwo-ọre riẹ avọ Ai+ nọ ọ rrọ ofẹ ovatha-ọre riẹ. Ọ tẹ bọ agbada-idhe fihọ etẹe kẹ Jihova+ je mu odẹ Jihova họ ese.+ 9 Nọ oke jọ o vrẹ no, Abram ọ tẹ wọ no etẹe jẹ rọ ovao rri obọ Negẹb,*+ jẹ wọ no oria ruọ oria.

10 Whaọ ohọo u te je mu evaọ ẹkwotọ na, Abram o te bi kpobọ Ijipti re ọ rria obei etoke jọ,*+ keme ohọo nọ u je mu evaọ ẹkwotọ na o jọ gaga.+ 11 Nọ ọ be te ruọ eva Ijipti, ọ tẹ ta kẹ aye riẹ Serai nọ: “Ivie gaviezọ! Mẹ riẹ nọ whẹ yọ aye nọ o wo erru gaga.+ 12 Fikiere nọ ahwo Ijipti a te ruẹ owhẹ, a te seba ẹta ha inọ ‘Nọ aye riẹ.’ Kẹsena a ve ti kpe omẹ no rekọ a vẹ te siọ owhẹ ba uzuazọ. 13 Ivie ta nọ whẹ yọ oniọvo-ọmọtẹ mẹ, re oma o sae fọ omẹ fiki ra, re a siọ omẹ* ba ekpe no.”+

14 Nọ Abram ọ nwane ruọ eva Ijipti, ahwo Ijipti a te muẹrohọ nọ aye na o wo erru gaga. 15 Ikpahwo-esuo Fẹro a ruẹ e riẹ re, a te mu ei họ ejiri kẹ Fẹro, fikiere a tẹ rehọ iẹe ziọ uwou Fẹro. 16 Ọ riẹ Abram ru fiki riẹ, o te wo igodẹ, iruẹ, eketekete ezae gbe erọ eyae, idibo-emezae gbe idibo-emetẹ, gbe ekamẹle.+ 17 Kẹsena Jihova ọ tẹ rehọ eyao* egaga tehe Fẹro avọ ahwo uwou riẹ fiki Serai aye Abram.+ 18 Fikiere Fẹro o te se Abram ọ tẹ ta kẹe nọ: “Kinọ eme who ru omẹ na? Fikieme whọ gbẹ vuẹ omẹ nọ aye ra ha? 19 Fikieme whọ jẹ ta nọ, ‘Oniọvo-ọmọtẹ mẹ,’+ nọ o lẹliẹ omẹ jẹ te rehọ iẹe re ọ jọ aye mẹ? Aye ra ọna. Rehọ iẹe whọ nya!” 20 Fikiere Fẹro ọ tẹ kpokpa họ ahwo riẹ obọ kpahe Abram, a tẹ rehọ iẹe avọ aye riẹ gbe eware nọ o wo kpobi vrẹ.+

13 Kẹsena Abram o te no Ijipti bi kpobọ Negẹb,*+ ọyomariẹ avọ aye riẹ gbe eware kpobi nọ o wo, te Lọt. 2 Abram o fe gaga, o wo erao gbe isiliva gbe igoru buobu.+ 3 O je wohọ eria avọ eria nọ o je no Negẹb* kpobọ Bẹtẹl, bẹsenọ o ro te oria nọ uwou-udhu riẹ o jọ vẹre evaọ udevie Bẹtẹl avọ Ai,+ 4 oria nọ ọ bọ agbada-idhe fihọ vẹre na. Abram ọ jọ etẹe se odẹ Jihova.

5 Whaọ Lọt nọ o bi lele Abram, o wo igodẹ re, iruẹ, gbe iwou-udhu. 6 Fikiere otọ na u te epanọ aikpobi a rẹ rọ rria oria ovona ha; eware rai i bu gaga te epanọ a gbẹ sae rọ rria kugbe he. 7 Onana o tẹ whae ze nọ ẹwhọ ọ rọ romavia evaọ udevie enọ i bi su erao Abram gbe enọ i bi su erao Lọt. (Evaọ oke yena ahwo Kenan gbe ahwo Pẹriz a jẹ rria ẹkwotọ na.)+ 8 Fikiere Abram ọ tẹ ta kẹ Lọt nọ:+ “Ivie, u fo re ẹwhọ ọ jọ udevie mẹ avọ owhẹ hẹ gbe udevie enọ i bi su erao mẹ avọ enọ i bi su erao ra, keme mai inievo. 9 Kọ otọ na soso u gbe riama fihọ kẹ owhẹ? Ivie, hẹriẹ no omẹ. Who te kpohọ ẹkpẹlobọ, me ve kpohọ obọze; rekọ otẹrọnọ who kpohọ obọze me ve kpohọ ẹkpẹlobọ.” 10 Fikiere Lọt ọ tẹ kpare aro riẹ, ọ tẹ ruẹ nọ ubrotọ Jọdan na soso+ yọ ubrotọ nọ u wo ame ziezi (taure Jihova ọ tẹ te raha Sọdọm avọ Gomora), o jọ wọhọ ọgbọ Jihova,+ wọhọ ẹkwotọ Ijipti, rite ugbo obọ Zoa.+ 11 Lọt ọ tẹ salọ ubrotọ Jọdan na soso kẹ omariẹ, Lọt ọ tẹ kwa kpohọ ofẹ ovatha-ọre na. A tẹ hẹriẹ no ohwohwo. 12 Abram ọ tẹ jẹ rria ẹkwotọ Kenan, rekọ Lọt ọ tẹ jẹ rria ofẹ ikpewho nọ e rrọ ubrotọ na.+ Ukuhọ riẹ ọ tẹ rọ uwou-udhu riẹ vi kẹle Sọdọm. 13 Whaọ ahwo Sọdọm a jọ ahwo omuomu, erahaizi ilogbo evaọ aro Jihova.+

14 Nọ Lọt ọ hẹriẹ no Abram no, Jihova ọ tẹ ta kẹ Abram nọ: “Ivie kpare aro ra, re whọ jọ oria nọ whọ rrọ na rri kpobọ ẹkpẹlobọ ovatha-ọre gbe obọze ovatha-ọre, ovatha-ọre gbe ukiediwo-ọre, 15 keme ẹkwotọ nọ whọ be ruẹ na kpobi, mẹ te rehọ iẹe kẹ owhẹ avọ emọ* ra re o jọ ọrai bẹdẹ bẹdẹ.+ 16 Yọ me ti ru emọ* ra wọhọ ibi-ẹkpẹ* otọakpọ na, re otẹrọnọ ohwo jọ ọ rẹ sai kele ibi-ẹkpẹ otọakpọ na, a te sai kele emọ* ra.+ 17 Kpama, re whọ nya ẹkwotọ na duwu, uthethei gbe okẹkẹe otọ na, keme whẹ mẹ te rehọ iẹe kẹ.” 18 Fikiere Abram ọ tẹ gbẹ jẹ rria iwou-udhu. Uwhremu na ọ tẹ nyaze te rria udevie ire ilogbo Mamre,+ nọ e rrọ Hebrọn,+ ọ tẹ bọ agbada-idhe fihọ etẹe kẹ Jihova.+

14 Whaọ evaọ edẹ Amrafẹl ovie Shaena,+ Eriọk ovie Ẹlesar, Kẹdọlaoma+ ovie Ilam,+ gbe Taedal ovie Goyẹm, 2 enana e tẹ wọ ẹmo bru Bira ovie Sọdọm,+ Biẹsha ovie Gomora,+ Shaenab ovie Adma, Shẹmiba ovie Zeboyẹm,+ gbe ovie Bila, koyehọ Zoa. 3 Enana kpobi a te kuomagbe evaọ Ukiekpotọ* Sidim,+ koyehọ Abade Uwhei na.*+

4 Ikpe ikpegbivẹ a rọ gbodibo kẹ Kẹdọlaoma no, rekọ evaọ ukpe avọ ikpegbesa, a tẹ kpareso ẹe. 5 Fikiere evaọ ukpe avọ ikpegbene, Kẹdọlaoma avọ ivie nọ e jọ abọ riẹ, a tẹ wọ ze, a te fi ahwo Rẹfeyẹm kparobọ evaọ Ashterọt-kaneyim, ahwo Zuzim evaọ Ham, ahwo Imim+ evaọ Shevẹ-kiriateyẹm, 6 gbe ahwo Họr+ evaọ ugbehru rai nọ o rrọ Siya+ rite Ẹl-peran nọ o rrọ udhude na. 7 Kẹsena a te kuomarẹriẹ jẹ ziọ Ẹn-mishpat, koyehọ Kedẹsh,+ a te fi ẹkwotọ ahwo Amalẹk soso+ kparobọ gbe ahwo Amọ+ nọ a jẹ rria Hazazọn-tama.+

8 Evaọ oke nana, ovie Sọdọm ọ tẹ wọ ẹmo, gbe ovie Gomora, ovie Adma, ovie Zeboyẹm, gbe ovie Bila, koyehọ Zoa, a tẹ ruẹrẹ omarai họ utu ẹmo bru rai evaọ Ukiekpotọ* Sidim, 9 bru Kẹdọlaoma ovie Ilam, Taedal ovie Goyẹm, Amrafẹl ovie Shaena, gbe Eriọk ovie Ẹlesar,+ ivie ene wọso ivie isoi. 10 Whaọ egọdọ bitumẹn* e vọ Ukiekpotọ* Sidim, ivie Sọdọm avọ Gomora a tẹ jẹ gwọlọ dhẹ vabọ rekọ a te kie fihọ ae, enọ i kiọkọ a tẹ dhẹ kpobọ ubrotọ igbehru na. 11 Kẹsena enọ i fi kparobọ na a tẹ kwa eware Sọdọm gbe Gomora kpobi rehọ, gbe emu rai, a tẹ ruọ edhere.+ 12 A mu Lọt ọmọ oniọvo Abram re, ọnọ ọ jẹ rria Sọdọm,+ a tẹ jẹ kwa eware riẹ, a tẹ ruabọhọ onya rai.

13 Kẹsena ọzae jọ nọ ọ dhẹ vabọ ọ tẹ nyaze te vuẹ Abram ohwo Hibru na. Evaọ oke yena ọ jẹ rria* udevie ire ilogbo Mamre ohwo Amọ na,+ oniọvo-ọmọzae Ẹshkọl avọ Ena.+ Ezae nana a jọ ahwo Abram. 14 Kọ ere Abram o ro yo nọ a mu omoni* riẹ+ rehọ no. Ọ tẹ nwane rehọ ezae riẹ nọ o wuhrẹ, idibo egba esa gbe ikpegberee (318) nọ a jọ uwou riẹ yẹ, o te mu ahwo na họ ele rite Dan.+ 15 Evaọ aso, ọ tẹ ghale idibo riẹ fihọ itu, tei te idibo riẹ a tẹ họre ai je fi ai kparobọ. O te le ai te Hoba, nọ o rrọ ẹkpẹlobọ ovatha-ọre Damaskọs. 16 O te mi ai eware na kpobi zihe ze, je mi ai Lọt omoni riẹ re, ekwakwa riẹ, eyae na, gbe ahwo nọ i kiọkọ na.

17 Nọ Abram o zihe kpozi no ohọre nọ o jo fi Kẹdọlaoma avọ ivie nọ e jọ abọ riẹ kparobọ no, ovie Sọdọm ọ tẹ nyabru Abram evaọ Ukiekpotọ* Shevẹ, koyehọ Ukiekpotọ Ovie na.+ 18 Mẹlkizẹdẹk+ ovie Salẹm+ ọ tẹ rehọ ebrẹdi avọ enwaene ze; ọ jọ ozerẹ Ọghẹnẹ nọ Ọ Mai Kpehru na.+

19 Kẹsena ọ tẹ lẹ ẹro eghale kẹe, ọ ta nọ:

Abram ọ tẹ rehọ abọvo abakpe eware kpobi kẹe.+

21 Nọ oyena o vrẹ no, ovie Sọdọm ọ tẹ ta kẹ Abram nọ: “Kẹ omẹ ahwo* na, rekọ rehọ eware na kẹ omara.” 22 Rekọ Abram ọ tẹ ta kẹ ovie Sọdọm nọ: “Mẹ kpare obọ mẹ kpehru ro duwu iyei evaọ aro Jihova Ọghẹnẹ nọ Ọ Mai Kpehru na, Ọnọ ọ ma odhiwu gbe otọakpọ na, 23 inọ mẹ rẹ rehọ oware ra ovo ho, no olulu rite ufi-eviẹ, re whọ gbẹ ta ha inọ, ‘Mẹ o ru Abram fe.’ 24 Mẹ te rehọ oware ovo ho, ajokpaọ eware nọ emoha na a re no na. Yọ kpahe ẹkẹ ahwo nọ a lele omẹ na, Ena, Ẹshkọl, gbe Mamre,+ jọ a rehọ ẹkẹ rai.”

15 Nọ onana o vrẹ no, ẹme Jihova o te bru Abram ze evaọ eruẹaruẹ inọ: “Jọ ozọ u mu owhẹ hẹ+ Abram. Mẹ yọ ojese kẹ owhẹ.+ Osohwa ra o te jọ ruaro gaga.”+ 2 Abram ọ tẹ ta kẹe nọ: “Jihova Olori nọ Ọ Mai Kpehru, eme whọ te kẹ omẹ, nọ orọnọ rite enẹna me ri wo ọmọ họ, yọ ohwo nọ ọ te rehọ uwou mẹ reuku ohwo Damaskọs, Ẹli-iza?”+ 3 Abram o te fibae nọ: “Whọ kẹ omẹ ọmọ họ,*+ yọ ohwo* uwou mẹ ọ be te jọ ọreuku mẹ.” 4 Rekọ rri! Ẹme nọ Jihova ọ ta kẹe họ, “Ọzae nana ọ te jọ ọreuku ra ha, rekọ ọmọ obọra* ọ te jọ ọreuku ra.”+

5 Kẹsena ọ tẹ rehọ iẹe ziọ otafe ọ tẹ ta kẹe nọ: “Rri ehru, ivie, rri obọ idhiwu na re who kele isi na, sọ whọ sai kele ai.” Kẹsena ọ tẹ ta kẹe nọ: “Ere emọ* ra e te jọ.”+ 6 O te fi ẹrọwọ họ Jihova,+ O te kele oyena kẹe* wọhọ ẹrẹreokie.+ 7 Kẹsena o te fibae nọ: “Mẹ họ Jihova ọnọ ọ rehọ owhẹ no obọ Ọr ọrọ ahwo Kaldia ze re mẹ rehọ ẹkwotọ nana kẹ owhẹ re o jọ ọra.”+ 8 Ọ tẹ ta nọ: “Jihova Olori nọ Ọ Mai Kpehru, ẹvẹ mẹ te rọ riẹ nọ u ti gine zihe ruọ omẹ?” 9 O te yo kẹe nọ: “Rehọ eruẹ ikpe esa, ẹwe aye ikpe esa, egbo ikpe esa, erueruẹ, gbe ọmọ olekuku.” 10 Fikiere ọ tẹ rehọ enana kpobi je bru rai ekẹ ivivẹ, o te fi ẹkẹ ọvuọvo họ abọjọ je fi ẹkẹ riẹ nọ o kiọkọ rẹriẹ ovao ku ei,* rekọ o bru evra na ha. 11 Kẹsena evra nọ i re kpe erao re i te muhọ ẹrra ze fihọ ehru erao na, rekọ Abram o te je le ai.

12 Nọ ọre o je ru re o kiediwi, Abram o te kie ruọ owezẹ udidi, ebi ọlala nọ o re muozọ o te ruru iei. 13 Kẹsena ọ tẹ ta kẹ Abram nọ: “Riẹ vevẹ nọ emọ ra e* te jọ erara evaọ ẹkwotọ nọ ọ rrọ ọrai hi yọ ahwo ẹkwotọ na a te rehọ ai ru erigbo je gboja kẹ ae ikpe egba ene (400).+ 14 Rekọ me ti gu orẹwho nọ a te gbodibo kẹ na ẹdhọ,+ kẹsena a ve ti noi ze avọ eware buobu.+ 15 Rọkẹ owhẹ, whọ te nyabru esẹ-esẹ ra dhedhẹ; whọ te who ziezi re who te ti whu.+ 16 Rekọ a ti zihe ze etenẹ+ evaọ oge avọ ene na, keme oke osohwa oruthọ ahwo Amọ u ri te he.”+

17 Nọ ọre o kiediwi no nọ otọ u je muebi gaga no, umuwou-erae nọ u bi kuye iwiri o tẹ romavia, umure nọ o be ware erae o tẹ nya udevie ekẹ erao na vrẹ. 18 Evaọ ẹdẹ yena Jihova ọ re ọvọ kugbe Abram,+ inọ: “Mẹ te rehọ ẹkwotọ+ nana kẹ emọ* ra, no ethẹ Ijipti rite ethẹ ologbo na, ethẹ Yufretis:+ 19 ẹkwotọ ahwo Kẹn,+ ahwo Kẹniz, ahwo Kadmọn, 20 ahwo Hit,+ ahwo Pẹriz,+ ahwo Rẹfeyẹm,+ 21 ahwo Amọ, ahwo Kenan, ahwo Gẹgash, gbe ahwo Jebus.”+

16 Whaọ Serai aye Abram o yẹ ọmọ ọvo kẹe he,+ rekọ o wo odibo jọ nọ ọ rrọ ohwo Ijipti yọ odẹ riẹ Hega.+ 2 Fikiere Serai ọ tẹ ta kẹ Abram nọ: “Whaọ ivie, Jihova ọ kẹ omẹ ọmọ yẹ hẹ. Ivie, lele odibo mẹ wezẹ. Ẹsejọhọ mẹ sae rọ ẹkwoma riẹ wo emọ.”+ Fikiere Abram ọ tẹ gaviezọ kẹ oware nọ Serai ọ ta na. 3 Nọ Abram ọ rria ẹkwotọ Kenan ikpe ikpe no, Serai aye Abram ọ tẹ rehọ odibo riẹ Hega nọ ọ rrọ ohwo Ijipti kẹ Abram ọzae riẹ re ọ jọ aye kẹe. 4 Fikiere o te lele Hega wezẹ, o te dihọ. Nọ ọ riẹ nọ o dihọ no, o te mu oni-uwou na họ ẹjẹfiẹ.

5 Fiki onana, Serai ọ tẹ ta kẹ Abram nọ: “Whẹ ọ wha orivo nana nọ a bi rri omẹ vo na ze. Mẹ o fi odibo mẹ họ owhẹ abọ,* rekọ nọ ọ riẹ nọ o dihọ no, o te mu omẹ họ ẹjẹfiẹ. Jọ Jihova o bruoziẹ mẹ avọ owhẹ.” 6 Fikiere Abram ọ tẹ ta kẹ Serai nọ: “Rri! Odibo ra ọ rrọ otọ ra. Ru ei oware kpobi nọ who roro nọ u fo.” Kẹsena Serai o te hrẹ riẹ kpotọ,* fikiere ọ tẹ dhẹ no uwou.

7 Uwhremu na, ukọ-odhiwu Jihova ọ tẹ ruẹ e riẹ evaọ oria eyeri-ame jọ evaọ obọ udhude, eyeri-ame nọ ọ jọ edhere nọ a re ro kpohọ Shọ.+ 8 Ọ tẹ ta nọ: “Hega, odibo Serai, bovẹ who no ze, bovẹ whọ be nya?” Ọ tẹ ta nọ: “Mẹ be dhẹ no uwou kẹ Serai oni-uwou mẹ.” 9 Ukọ-odhiwu Jihova ọ tẹ ta kẹe nọ: “Zihe bru oni-uwou ra re whọ rọ omara kpotọ kẹe.” 10 Kẹsena ukọ-odhiwu Jihova ọ tẹ ta nọ: “Me ti ru emọ* ra bu gaga, re i bu vi ekele.”+ 11 Ukọ-odhiwu Jihova o te fibae nọ: “Whaọ who dihọ, yọ who ti yẹ ọmọzae, yọ who re se odẹ riẹ Ishmẹl,* keme Jihova o yo oviẹ oja-oriọ ra no. 12 Ọ te jọ wọhọ eketekete ẹwọ.* Obọ riẹ o te rọsuọ ohwo kpobi, yọ obọ ohwo kpobi o te rọsuọ ẹe, yọ ọ te rria rẹriẹ ovao ku inievo riẹ kpobi.”*

13 Kẹsena o te se odẹ Jihova, ọnọ ọ jẹ ta ẹme kẹe na inọ: “Whẹ yọ Ọghẹnẹ nọ ọ rẹ ruẹ ude,”+ keme ọ ta nọ: “Koyehọ ọnọ ọ be ruẹ omẹ na mẹ ginẹ jọ etenẹ ruẹ no na?” 14 Oyejabọ nọ a ro se oza na Biẹ-leha-rae.* (O jọ udevie Kedẹsh avọ Birẹd.) 15 Hega o te yẹ ọmọzae kẹ Abram, Abram o te mu Ishmẹl kẹ ọmọzae riẹ nọ Hega o yẹ na.+ 16 Abram ọ jọ ikpe udhone-gbezeza okenọ Hega o yẹ Ishmẹl kẹe.

17 Nọ Abram ọ jọ ikpe udhone gbe ikpegbizii, Jihova ọ tẹ romavia kẹ Abram ọ tẹ ta kẹe nọ: “Mẹ họ Ọghẹnẹ Erumeru na. Nya evaọ edhere mẹ jẹ daoma kare oruthọ.* 2 Me ti ru ọvọ mẹ nọ ọ rrọ udevie mẹ avọ owhẹ dikihẹ,+ me ti ru owhẹ bu gaga.”+

3 Kẹsena Abram o te kie vovao tuotọ, Ọghẹnẹ o te gbe je lele iei ta ẹme, be ta kẹe nọ: 4 “Rọkẹ omẹ, rri! mẹ re ọvọ mẹ kugbe owhẹ,+ who ti zihe ruọ ọsẹ erẹwho buobu hrọ.+ 5 Odẹ ra o te gbẹ jọ Abram* hu; odẹ ra o te jọ Abraham,* keme me ti ru owhẹ họ ọsẹ erẹwho buobu. 6 Me ti ru owhẹ bu gaga je ru owhẹ zihe ruọ erẹwho, yọ ivie i ti no oma ra ze.+

7 “Yọ me ti koko ọvọ mẹ nọ ọ rrọ udevie mẹ avọ owhẹ+ gbe emọ* ra nọ i ti lele owhẹ evaọ ige rai kpobi re o jọ ọvọ ebẹdẹ bẹdẹ, re mẹ jọ Ọghẹnẹ kẹ owhẹ gbe ọmọ* ra nọ o ti lele owhẹ. 8 Yọ mẹ te rehọ ẹkwotọ nọ whọ rria wọhọ ọrara na+ kẹ owhẹ avọ emọ* ra nọ i ti lele owhẹ, ẹkwotọ Kenan soso re o jọ ọrai bẹdẹ bẹdẹ, yọ mẹ te jọ Ọghẹnẹ rai.”+

9 Ọghẹnẹ ọ tẹ gbẹ ta kẹ Abraham nọ: “Rọkẹ owhẹ, who re koko ọvọ mẹ, whẹ avọ emọ* ra nọ i ti lele owhẹ evaọ ige rai kpobi. 10 Onana họ ọvọ mẹ nọ ọ rrọ udevie mẹ avọ owhẹ, nọ whẹ avọ emọ* ra nọ i ti lele owhẹ a re koko: Ọmọzae kpobi nọ ọ rrọ udevie rai ọ rẹ yawo hrọ.+ 11 Wha rẹ yawo* hrọ, yọ oye o te jọ oka ọvọ nọ ọ rrọ udevie mẹ avọ owhai.+ 12 Evaọ ige rai kpobi, ọmọzae kpobi nọ ọ rrọ udevie rai nọ ọ gba edẹ eree no ọ rẹ yawo hrọ,+ ohwo kpobi nọ a yẹ evaọ uwou na gbe ọnọ ọ rrọ ọmọ* ra ha nọ a rehọ ugho dẹ mi ọrara. 13 Ọzae kpobi nọ a yẹ evaọ uwou ra gbe ọzae kpobi nọ a rehọ ugho ra dẹ ọ rẹ yawo hrọ,+ yọ ọvọ mẹ nọ ọ rrọ uwo rai ọ rẹ jọ ọvọ nọ ọ rẹ jọ ribri hrọ. 14 Otẹrọnọ ọzae jọ nọ ọ re yawo ho ọ rọwo nọ ọ rẹ yawo* ho, a re kpe ohwo* yena no udevie ahwo riẹ hrọ. Ọ raha ọvọ mẹ.”

15 Kẹsena Ọghẹnẹ ọ tẹ ta kẹ Abraham nọ: “Rọkẹ aye ra Serai,*+ who re gbe sei Serai ofa ha, keme Sera* o te jọ odẹ riẹ. 16 Mẹ te ghale iẹe jẹ rehọ ẹkwoma riẹ kẹ owhẹ ọmọzae;+ mẹ te ghale iẹe o ve ti zihe ruọ erẹwho; ivie ahwo i ti no oma riẹ ze.” 17 Abraham o te kie vovao tuotọ o te muhọ ẹhwẹ jẹ be jọ udu riẹ ta nọ:+ “Kọ ọzae nọ ọ kpako te ikpe udhusoi (100) no ọ sai gbe yẹ ọmọ, kọ Sera, aye nọ ọ kpako te ikpe udhone-gbikpe no, ọ sai gbe yẹ ọmọ?”+

18 Fikiere Abraham ọ tẹ ta kẹ Ọghẹnẹ uzẹme na nọ: “O dodokọ whọ rẹ rehọ Ishmẹl!”+ 19 Ọghẹnẹ ọ tẹ kpahe fihọ onana nọ: “Aye ra Sera o ti yẹ ọmọzae kẹ owhẹ hrọ, yọ odẹ nọ who re mu kẹe họ Aiziki.*+ Yọ mẹ te re ọvọ mẹ kugbei re o jọ ọvọ ebẹdẹ bẹdẹ rọkẹ emọ* riẹ nọ i ti lele iei nọ u te noi no.+ 20 Rekọ kpahe Ishmẹl, me yo ẹme ra na. Rri! Mẹ te ghale iẹe je ru ei vihọ je ru ei bu gaga. O ti yẹ isu ikpegbivẹ, yọ me ti ru ei zihe ruọ orẹwho ulogbo.+ 21 Rekọ, mẹ te re ọvọ mẹ kugbe Aiziki,+ ọnọ Sera o ti yẹ kẹ owhẹ evaọ oke utiona ukpe notha na.”+

22 Nọ Ọghẹnẹ o lele iei ta ẹme re no, ọ tẹ nyavrẹ siọ Abraham ba. 23 Kẹsena Abraham ọ tẹ rehọ Ishmẹl ọmọzae riẹ gbe ezae kpobi nọ a yẹ evaọ uwou riẹ gbe ohwo kpobi nọ ọ rehọ ugho riẹ dẹ, ọzae kpobi nọ ọ rrọ uwou Abraham, ọ tẹ yawo ae* ẹdẹdẹ yena, nwane wọhọ epanọ Ọghẹnẹ ọ ta kẹe.+ 24 Abraham ọ jọ ikpe udhone gbe ikpegbizii nọ ọ yawo.*+ 25 Yọ Ishmẹl ọmọzae riẹ ọ jọ ikpe ikpegbesa nọ a yawo iẹe.*+ 26 Evaọ ẹdẹdẹ yena Abraham ọ rọ yawo, ere Ishmẹl ọmọzae riẹ re. 27 Ezae kpobi nọ e rrọ uwou riẹ, ohwo kpobi nọ a yẹ evaọ uwou riẹ gbe ohwo kpobi nọ a rehọ ugho dẹ mi ọrara, a lele i rie yawo re.

18 Uwhremu na, Jihova+ ọ tẹ romavia kẹe evaọ udevie ire ilogbo Mamre+ okenọ ọ keria unuwou uwou-udhu na evaọ oke uvo gbagbagba. 2 Ọ kpare ovao ọ tẹ ruẹ ezae esa jọ nọ i dikihẹ thabọ noi omojọ.+ Nọ ọ ruẹ e rai, ọ tẹ dhẹ ohrẹ no unuwou uwou-udhu na bru rai, o te kigwẹ guzou kpotọ. 3 Kẹsena ọ tẹ ta nọ: “Jihova, otẹrọnọ whọ jẹ omẹ rehọ, ivie, whọ nya odibo ra vrẹ ere ọvo ho. 4 Ivie, jọ a rọ ame jọ ze re a wozẹ awọ rai;+ re wha te keria otọ ure na. 5 Nọ orọnọ wha ziọ etenẹ bru odibo rai ze na, jomẹ rehọ ẹmẹwẹ ebrẹdi jọ ze re u ru owhai oma ga.* Kẹsena wha vẹ ruabọhọ onya rai.” A tẹ ta nọ: “U woma. Whọ sai ru epanọ whọ ta na.”

6 Fikiere Abraham ọ tẹ dhẹ vẹrẹ vẹrẹ kpobọ uwou-udhu na bru Sera jẹ ta kẹe nọ: “Ovẹrẹ! Rehọ owawọ esa* orọ emamọ eflawa iwuwuru, ma ai fihọ ikulu, re who ru ebrẹdi.” 7 Kẹsena Abraham ọ tẹ dhẹ kpobọ owa erao na, ọ tẹ salọ emamọ eruẹ ọsese ọpoporiẹ jọ. Ọ tẹ rehọ iẹe kẹ odibo riẹ, ọnọ ọ rọ ovovẹrẹ nyai ru ei ze. 8 Ọ tẹ rehọ ebọta gbe ame-ivie gbe eruẹ ọsese nọ o ye no na, ọ tẹ wọ emu na họ otọ kẹ ae. O te dikihẹ kẹle ae evaọ otọ ure na nọ a be re na.+

9 A tẹ ta kẹe nọ: “Kọ aye ra Sera ọ rrọ?”+ Ọ tẹ ta nọ: “Ọ rrọ eva uwou-udhu na.” 10 Fikiere omọvo rai jọ ọ tẹ ta nọ: “Me ti zihe bru owhẹ tha hrọ evaọ oke utiona ukpe notha, yọ rri! aye ra Sera o ti yẹ ọmọzae.”+ Whaọ Sera ọ jẹ gaviezọ evaọ unuwou uwou-udhu na nọ o jọ emu ọzae na. 11 Abraham avọ Sera a who no, a kpako gaga no.+ Sera ọ kpako vrẹ oke ọmọ-oyẹ no.*+ 12 Fikiere Sera o te muhọ ẹhwẹ kẹ omariẹ, be ta nọ: “Kọ mẹ nana nọ mẹ ya fia no na yọ olori mẹ ọ who no na, mẹ sai gine wo omaweromẹ nana?”+ 13 Kẹsena Jihova ọ tẹ ta kẹ Abraham nọ: “Fikieme Sera ọ rọ hwẹ jẹ ta nọ, ‘Kọ mẹ te sai gine yẹ ọmọ nọ orọnọ mẹ who no na?’ 14 Kọ oware jọ o rẹ bẹ Jihova eru?+ Me ti zihe bru owhẹ tha evaọ oke utiona ukpe notha, yọ Sera o ti yẹ ọmọzae.” 15 Rekọ Sera ọ tẹ gbenu, inọ, “Mẹ hwẹ hẹ!” keme ozọ u je mu ei. Fikiere ọ tẹ ta nọ: “Ee! Whọ hwẹ.”

16 Nọ ezae na a kpama re a nyavrẹ je rri kpobọ Sọdọm,+ Abraham ọ jẹ nya lele ai re o su ai họ aro. 17 Jihova ọ tẹ ta nọ: “Kọ mẹ be ko oware nọ mẹ gwọlọ ru dhere no Abraham?+ 18 Whaọ Abraham o ti gine zihe ruọ orẹwho ulogbo nọ u wo ogaga, yọ oghale u ti te erẹwho otọakpọ na kpobi* ẹkwoma riẹ.+ 19 Keme me mu usu kugbei* re ọ ruẹsi wuhrẹ emọ* riẹ gbe ahwo uwou riẹ nọ i ti lele iei re a nya evaọ edhere Jihova ẹkwoma oware nọ o gba je kiehọ nọ a re ru,+ re Jihova ọ ruẹsi ru oware nọ ọ ya eyaa riẹ kpahe Abraham gba.”

20 Kẹsena Jihova ọ tẹ ta nọ: “Ubo kpahe Sọdọm avọ Gomora o ginẹ rrọ ruaro,+ yọ uzioraha rai o gbẹdẹ gaga.+ 21 Me re nwrotọ re mẹ ruẹ sọ a bi gine ru epaọ ubo nọ u do te omẹ oma na. Yọ otẹrọnọ ere o rrọ họ, mẹ te riẹ.”+

22 Kẹsena ezae na a te no etẹe vrẹ jẹ nya rri obọ Sọdọm, rekọ Jihova+ ọ tẹ gbẹ jọ kugbe Abraham. 23 Kẹsena Abraham o te bi kẹle iẹe, ọ tẹ ta nọ: “Kọ who ti gine hwere ikiẹrẹe na kugbe irumuomu na kufiẹ?+ 24 Kọ otẹrọnọ ahwo udhuvẹ-gbikpe nọ i kiẹrẹe a rrọ okpẹwho na? Kọ whọ te raha ae kufiẹ nọ whọ gbẹ te rọ fiki ikiẹrẹe udhuvẹ-gbikpe nọ e riẹe eva rọvrẹ riẹ hẹ? 25 Yọ oware nọ o rẹ ziọ iroro vievie he inọ who re ru ere re who kpe ohwo okiẹrẹe kugbe ohwo omuomu re oware nọ o rẹ via kẹ ohwo okiẹrẹe avọ ohwo omuomu o jọ ovona!+ Yọ oware nọ a rẹ sai roro kpahe owhẹ vievie he!+ Kọ Obruoziẹ otọakpọ na soso o gbe ru oware nọ u kiehọ?”+ 26 Kẹsena Jihova ọ tẹ ta nọ: “Otẹrọnọ mẹ jọ Sọdọm ruẹ ahwo udhuvẹ-gbikpe nọ i kiẹrẹe evaọ okpẹwho na, mẹ rẹ rọ fiki rai rọvrẹ oria na soso.” 27 Rekọ Abraham ọ tẹ wariẹ ta kẹe nọ: “Ivie, mẹ wharo nọ me bi ro lele Jihova ta ẹme dede nọ mẹ yọ ẹkpẹ* gbe enwo. 28 Kọ otẹrọnọ isoi i no udhuvẹ-gbikpe nọ i kiẹrẹe na? Kọ whọ te rọ fiki isoi na raha okpẹwho na soso?” Ọ tẹ kpahe kẹe nọ: “Mẹ te raha iẹe he otẹrọnọ mẹ jariẹ ruẹ udhuvẹ-gbisoi.”+

29 Rekọ ọ tẹ gbẹ wariẹ ta kẹe nọ: “Kọ otẹrọnọ a jọ eva riẹ ruẹ udhuvẹ?” O te yo nọ: “Me ti ru ei hi fiki udhuvẹ na.” 30 Rekọ ọ tẹ gbẹ ta nọ: “Jihova, ivie, jọ ofu o mu owhẹ hẹ,+ rekọ jomẹ gbẹ ta ẹme: Kọ otẹrọnọ ọgba ọvo a jọ eva riẹ ruẹ?” O te yo nọ: “Me ti ru ei hi otẹrọnọ mẹ jariẹ ruẹ ọgba.” 31 Rekọ ọ tẹ gbẹ ta nọ: “Ivie, mẹ wharo nọ me bi ro lele Jihova ta ẹme: Kọ otẹrọnọ udhe ọvo a jọ eva riẹ ruẹ?” O te yo nọ: “Mẹ te raha iẹe he fiki udhe na.” 32 Ukuhọ riẹ ọ tẹ ta nọ: “Jihova, ivie, jọ ofu o mu owhẹ hẹ, rekọ jomẹ ta ẹsiẹvo nana ọvo: Kọ otẹrọnọ ikpe ọvo a jọ eva riẹ ruẹ?” O te yo nọ: “Mẹ te raha iẹe he fiki ikpe na.” 33 Nọ Jihova o lele Abraham ta ẹme re no, ọ tẹ nyavrẹ,+ kẹsena Abraham o te zihe kpohọ oboriẹ.

19 Ikọ-odhiwu ivẹ na a te Sọdọm evaọ owọwọ, yọ Lọt ọ keria unu ẹwho Sọdọm. Nọ Lọt ọ ruẹ e rai, ọ tẹ kpama nyabru rai je kigwẹ vovao tuotọ.+ 2 Ọ tẹ ta nọ: “Ivie, ilori mẹ, wha wẹriẹ, ivie, wha ruọ uwou odibo rai re wha wezẹ hẹrioke re a jẹ wozẹ awọ rai. Kẹsena wha sae kpama evaọ irioke re wha ruabọhọ erẹ rai.” A tẹ ta kẹe nọ: “Ijo, ma te wezẹ oko-ore na hẹrioke.” 3 Rekọ o lele i rai si te epanọ a ro lele iei kpobọ uwou riẹ. Kẹsena o te ru emu kẹ ae je ru ebrẹdi nọ ọ kare ẹvi, a tẹ re.

4 Rekọ taure a te ti kiẹzẹ, ezae okpẹwho na, ezae Sọdọm no ọmọzae rite ọkpọkuọzae, aikpobi a tẹ wọ ze wariẹ uwou na họ. 5 A te je se Lọt be ta kẹe nọ: “Ezae nọ e nyabru owhẹ ze aso nana a rrọ? Rehọ ae ziọ otafe bru omai ze re ma lele ae wezẹ.”+

6 Kẹsena Lọt ọ tẹ ruọ otafe bru rai kpohọ aro unuwou na, ọ tẹ kare ẹthẹ na. 7 Ọ tẹ ta nọ: “Ivie, inievo mẹ wha ru oware umuomu hu. 8 Ivie, me wo emetẹ ivẹ nọ e rrọ etenẹ nọ i ri lele ọzae wezẹ ẹdẹvo ho. Ivie, jomẹ rehọ ae bru owhai ziọ otafe re wha ru ai oware kpobi nọ u kiehọ evaọ aro rai. Rekọ wha ru ezae nana oware ovo ho, keme a nyaze ti wohọ uwou mẹ.”*+ 9 A tẹ kpahe kẹe nọ: “Kẹnoma!” A te fibae nọ: “Ọrara nana nọ ọye ọvo ọ ziọ etenẹ te rria na ọ be gwọlọ gu omai ẹdhọ! Whaọ ma bi ti ru owhẹ oware nọ u yoma vi onọ ma ti ru ai.” A tẹ whẹ ruru Lọt* je tunye ruọ aro re a bẹre ẹthẹ na fihọ otọ. 10 Fikiere ezae na a tẹ rriẹ obọ no uwou na ze a te si Lọt rehọ ruọ eva uwou na a tẹ kare ẹthẹ na. 11 Rekọ a te ru ezae nọ e jọ aro uwou na tuaro, no ọnọ ọ mae kawo rite ọnọ ọ mae rro, fikiere a daoma bẹ re a ruẹ unuẹthẹ na.

12 Kẹsena ezae na a tẹ ta kẹ Lọt nọ: “Kọ who gbe wo omọfa jọ evaọ etenẹ? Te egọ, emezae ra, emetẹ ra, gbe ahwo ra kpobi evaọ okpẹwho na, rehọ ai no etenẹ na! 13 Keme ma be te raha oria nana, keme ubo kpahe ae nọ u do te Jihova oma o rrọ ruaro gaga,+ fikiere Jihova o te vi omai ze re ma raha okpẹwho na.” 14 Fikiere Lọt ọ tẹ nya o te mu ezae nọ e be te rehọ emetẹ riẹ họ ẹvuẹ, o te je dhe ai ẹtẹta kẹ nọ: “Wha kpama! Wha no etenẹ na, keme Jihova ọ te raha okpẹwho na!” Rekọ evaọ aro ezae nọ e gwọlọ rehọ emetẹ riẹ na, o wọhọ nọ emiehwẹ ọ jẹ ta.+

15 Nọ oke u muhọ ẹke no, ikọ-odhiwu na a tẹ jẹ kpakpa Lọt oma, be ta nọ: “Kpama! Rehọ aye ra gbe emetẹ ivẹ ra nọ e rrọ etenẹ kugbe owhẹ na, re a gbe hwere owhẹ kufiẹ fiki oruthọ okpẹwho na ha!”+ 16 Nọ o gbe je ru ulehie, fiki ọdawẹ nọ Jihova o wo kẹe,+ ezae na a tẹ nwani kru obọ riẹ gbe obọ aye riẹ gbe abọ emetẹ ivẹ riẹ, a tẹ rehọ iẹe ruọ otafe jẹ rehọ iẹe kpohọ otafe okpẹwho na.+ 17 Nọ a nwane rehọ ae te ughe ẹwho na no, omọvo ezae na jọ ọ tẹ ta nọ: “Dhẹ kẹ uzuazọ* ra! Who rri emu ra ha+ yọ who dikihẹ oria ovo evaọ ubrotọ na ha!+ Dhẹ kpobọ ubrotọ igbehru na re a siọ owhẹ ba ehwere kufiẹ!”

18 Kẹsena Lọt ọ tẹ ta kẹ ae nọ: “O jọ obei hi, ivie, Jihova! 19 Ivie, whaọ whọ jẹ odibo ra rehọ no yọ who bi dhesẹ uwowou ulogbo* kẹ omẹ ẹkwoma uzuazọ* mẹ nọ who bi siwi na,+ rekọ mẹ te sae dhẹ kpobọ ubrotọ igbehru na ha keme ozọ u bi mu omẹ nọ okpẹtu ọ sai te omẹ me ve ti whu.+ 20 Whaọ ivie, ẹwho nana ọ kẹle yọ mẹ sae dhẹ kpohọ iẹe; yọ ọ rrọ kakao. Ivie, kọ mẹ gbẹ dhẹ kpohọ etẹe? Ọ rrọ kakao. Re mẹ jọ uzuazọ.” 21 Fikiere ọ tẹ ta kẹe nọ: “U woma, mẹ te jẹ re owhẹ ohrọ+ nọ mẹ gbẹ te raha ẹwho nọ whọ ta na ha.+ 22 Ovẹrẹ! Dhẹ kpohọ etẹe, keme mẹ sai ru oware ovuovo ho bẹsenọ who re te etẹe no!”+ Oyejabọ nọ o ro se odẹ ẹwho na Zoa.*+

23 Ọre ọ va ze no evaọ ẹwho na okenọ Lọt o te Zoa. 24 Kẹsena Jihova o te ru isọ-ọre gbe erae rrọ fihọ Sọdọm avọ Gomora, i no obọ Jihova ze, no obọ idhiwu na ze.+ 25 Ọ tẹ raha ikpewho nana, ẹhẹ, ubrotọ na soso, kugbe enọ e be rria ikpewho na kpobi gbe ẹbe otọ na.+ 26 Rekọ aye Lọt nọ ọ jọ emu riẹ o te mu emu họ eriwi, o te zihe ruọ ukulu uwhei.+

27 Whaọ Abraham ọ tẹ kpama evaọ irioke frifri ọ tẹ nya kpohọ oria nọ ọ jọ dikihẹ aro Jihova vẹre na.+ 28 Nọ o rri kpobọ Sọdọm avọ Gomora gbe ubrotọ yena soso, oware nọ ọ ruẹ u gbe rie unu. Iwiri egaga i bi kuye no otọ na kpobọ ehru wọhọ iwiri ovini!*+ 29 Fikiere nọ Ọghẹnẹ ọ raha ikpewho ubrotọ na, Ọghẹnẹ ọ kareghẹhọ Abraham ẹkwoma Lọt nọ ọ rehọ no ikpewho nọ ọ raha na, ikpewho nọ Lọt ọ jẹ rria na.+

30 Uwhremu na, Lọt ọ tẹ kwa no Zoa avọ emetẹ ivẹ riẹ, a te mu ubrotọ igbehru na họ ẹria,+ keme ozọ u je mu ei re ọ rria Zoa.+ Fikiere o te mu eghogho-utho họ ẹria tei te emetẹ ivẹ riẹ. 31 Ọmọ ọsosuọ na ọ tẹ ta kẹ ọrọ ọmaha na nọ: “Ọsẹ mai ọ kpako no, yọ ọzae ọvuọvo ọ rrọ ẹkwotọ na nọ o ti lele omai wezẹ hẹ wọhọ epanọ a re ru evaọ otọakpọ na soso. 32 Nyaze, joma kẹ ọsẹ mai idi* da, re ma lele iei wezẹ re ma ruẹse rọ ẹkwoma ọsẹ mai yẹ emọ.”

33 Fikiere evaọ aso yena a tẹ jẹ kẹ ọsẹ rai idi da; kẹsena ọrọ ọkpako na ọ tẹ nya, o te lele ọsẹ rai wezẹ, rekọ ọsẹ riẹ ọ riẹ okenọ o ro lele iei wezẹ gbe okenọ ọ rọ kpama ha. 34 Kẹsena evaọ ẹdẹ nọ o lele i rie, ọrọ ọkpako na ọ tẹ ta kẹ ọrọ ọmaha na nọ: “Whaọ me lele ọsẹ mai wezẹ aso nọ o kpo. Joma wariẹ kẹe idi da aso nana re. Kẹsena whọ vẹ nyai lele iei wezẹ, re ma ruẹse rọ ẹkwoma ọsẹ mai yẹ emọ.” 35 Fikiere evaọ aso yena re, a tẹ kẹ ọsẹ rai idi da unuẹse buobu; kẹsena ọrọ ọmaha na ọ tẹ nya o te lele iei wezẹ, rekọ ọsẹ riẹ ọ riẹ okenọ o ro lele iei wezẹ gbe okenọ ọ rọ kpama ha. 36 Fikiere emetẹ ivẹ Lọt a tẹ rọ ere dihọ kẹ ọsẹ rai. 37 Ọrọ ọkpako na o te yẹ ọmọzae o te se odẹ riẹ Moab.+ Ọye họ ọsẹ ahwo Moab inẹnẹ na.+ 38 Ọrọ ọmaha na o te yẹ ọmọzae re, o te se odẹ riẹ Bẹn-ami. Ọye họ ọsẹ ahwo Ammọn+ inẹnẹ na.

20 Abraham ọ tẹ kwa evuẹ riẹ no etẹe+ kpobọ ẹkwotọ Negẹb,* o te mu udevie Kedẹsh+ avọ Shọ+ họ ẹria. Okenọ ọ jẹ rria* Gira,+ 2 Abraham ọ jẹ hae ta kpahe aye riẹ Sera nọ: “Oniọvo-ọmọtẹ mẹ.”+ Fikiere Abimẹlẹk ovie Gira ọ tẹ ta nọ a rehọ Sera sei, ọ tẹ rehọ iẹe.+ 3 Nọ onana o via no, Ọghẹnẹ ọ tẹ nyabru Abimẹlẹk ze evaọ ewezẹ evaọ aso, ọ tẹ ta kẹe nọ: “Uwhu u te owhẹ oma re no fiki aye nọ whọ wọ na,+ keme ọ rọo no yọ aye omọfa ọ rrọ.”+ 4 Rekọ Abimẹlẹk o ri go kẹle iẹe he.* Fikiere ọ tẹ ta nọ: “Jihova, kọ who re kpe orẹwho nọ u gine ru thọ họ?* 5 Kọ ogbẹrọnọ ọye ọ ta kẹ omẹ nọ, ‘Oniọvo-ọmọtẹ mẹ,’ yọ ogbẹrọnọ aye na omariẹ ọ ta kẹ omẹ re nọ, ‘Oniọvo-ọmọzae mẹ’? Udu ofuafo gbe abọ ọfuafo me ro ru onana.” 6 Kẹsena Ọghẹnẹ uzẹme na ọ tẹ ta kẹe evaọ ewezẹ na nọ: “Mẹ riẹ nọ udu ofuafo who ro ru ei, oyejabọ nọ me ro ru owhẹ re whọ siọ uzi mẹ ba ẹraha. Yọ oyejabọ nọ mẹ gbẹ rọ kẹ owhẹ uvẹ re whọ rọ obọ tei hi na. 7 Whaọ enẹna zihe aye ọzae na sei, keme ọruẹaro ọ rrọ,+ yọ ọ te lẹ* kẹ owhẹ+ re whọ gbẹ jọ uzuazọ. Rekọ otẹrọnọ whọ be rehọ iẹe zihe he, riẹ nọ who ti gine whu, te owhẹ te ahwo ra kpobi.”

8 Abimẹlẹk ọ tẹ kpama evaọ irioke frifri o te se idibo riẹ kpobi ọ tẹ vuẹ ae eware nana kpobi, ozọ u te mu ai gaga. 9 Kẹsena Abimẹlẹk o te se Abraham ọ tẹ ta kẹe nọ: “Kinọ eme who ru omai na? Oware uyoma vẹ me ru owhẹ nọ whọ be rọ wha uzioraha ulogbo utiona se omẹ gbe uvie mẹ soso? Oware nọ who ru omẹ na u woma ha.” 10 Abimẹlẹk ọ tẹ gbẹ ta kẹ Abraham nọ: “Eme who wo họ iroro nọ who ro ru oware nana?”+ 11 Abraham ọ tẹ ta nọ: “Keme mẹ ta kẹ oma mẹ nọ, ‘Ozodhẹ Ọghẹnẹ o rrọ oria nana vievie he, yọ a ti kpe omẹ no fiki aye mẹ.’+ 12 Yọ u te no ere no, oniọvo-ọmọtẹ mẹ ọ ginẹ rrọ, ọmọ ọsẹ mẹ rekọ ọmọ oni mẹ hẹ, mẹ tẹ rehọ iẹe.+ 13 Fikiere okenọ Ọghẹnẹ o ru omẹ ghoro no uwou ọsẹ mẹ,+ mẹ tẹ ta kẹe nọ: ‘Jọ onana o jọ edhere nọ who re ro dhesẹ uyoyou nọ o rẹ hiẹ hẹ kẹ omẹ: Oria kpobi nọ ma nya, ta kpahe omẹ nọ, “Oniọvo-ọmọzae mẹ.”’”+

14 Abimẹlẹk ọ tẹ rehọ igodẹ gbe iruẹ gbe idibo-emezae gbe idibo-emetẹ kẹ Abraham, o te zihe aye riẹ Sera kẹe. 15 Abimẹlẹk ọ tẹ jẹ ta nọ: “Ẹkwotọ mẹ o riama fihọ kẹ owhẹ. Rria oria kpobi nọ o were owhẹ.” 16 Ọ tẹ ta kẹ Sera nọ: “Mẹ be rọ ewẹ isiliva odu ọvo (1,000) kẹ oniọvo-ọmọzae ra.+ Onana o rẹ jọ oka nọ u dhesẹ nọ abọ ra ọ fo* rọkẹ ahwo kpobi nọ a rrọ kugbe owhẹ gbe evaọ aro ohwo kpobi, yọ a si ekela no owhẹ uzou no.” 17 Abraham o te mu olẹ ayare-ọgaga họ ẹlẹ se Ọghẹnẹ uzẹme na, Ọghẹnẹ o te siwi Abimẹlẹk avọ aye riẹ gbe idibo-emetẹ riẹ, a te mu emọ họ eyẹ; 18 keme Jihova o ru eyae kpobi nọ e rrọ uwou Abimẹlẹk họ ega* no fiki Sera, aye Abraham.+

21 Jihova ọ tẹ kareghẹhọ Sera nwane wọhọ epanọ ọ ta vẹre, Jihova o te ru oware nọ ọ ya na gba kẹ Sera.+ 2 Fikiere Sera o te dihọ+ o te yẹ ọmọzae kẹ Abraham evaọ oke owho riẹ evaọ oke nọ Ọghẹnẹ ọ ya eyaa kẹe nọ o te rọ via na.+ 3 Abraham o te mu Aiziki kẹ ọmọzae riẹ nọ a yẹ kẹe obọ na, ọnọ Sera o yẹ kẹe na.+ 4 Abraham ọ tẹ yawo ọmọzae riẹ Aiziki nọ o te edẹ eree no, nwane wọhọ epanọ Ọghẹnẹ ọ ta kẹe.+ 5 Abraham ọ jọ ikpe udhusoi (100) nọ a yẹ ọmọzae riẹ Aiziki kẹe. 6 Kẹsena Sera ọ tẹ ta nọ: “Ọghẹnẹ ọ wha ehwẹ se omẹ no; ohwo kpobi nọ o yo rie o ti lele omẹ hwẹ.”* 7 O te fibae nọ: “Ono ọ hae sae ta kẹ Abraham nọ, ‘Sera ọ te kẹ emọ evie hrọ’? Ghele na, me yẹ ọmọzae kẹe no evaọ oke owho riẹ.”

8 Ọmọ na ọ tẹ te whẹro, a te bru ei evie, Abraham o te ru ehaa ilogbo evaọ ẹdẹ nọ a ro bru Aiziki evie. 9 Rekọ Sera o je muẹrohọ nọ ọmọzae Hega+ ohwo Ijipti na, ọnọ o yẹ kẹ Abraham na ọ be rọ Aiziki jijehwẹ.+ 10 Fikiere ọ tẹ ta kẹ Abraham nọ: “Le ọrigbo ọmọtẹ nana avọ ọmọzae riẹ na vrẹ, keme ọmọzae ọrigbo ọmọtẹ nana o ti lele ọmọzae mẹ Aiziki jọ ọreuku hu!”+ 11 Rekọ oware nọ ọ ta kpahe ọmọzae riẹ na o dha Abraham eva gaga.+ 12 Kẹsena Ọghẹnẹ ọ tẹ ta kẹ Abraham nọ: “Whọ jọ oware nọ Sera ọ be ta kẹ owhẹ kpahe ọmọzae ra na gbe ọrigbo ọmọtẹ ra na o dha owhẹ eva ha. Gaviezọ kẹe,* keme oma Aiziki ọnọ a ti se ọmọ* ra o ti no ze.+ 13 Rọkẹ ọmọ ọrigbo ọmọtẹ na,+ me ti ru ei zihe ruọ orẹwho,+ keme ọmọ* ra ọ rrọ.”

14 Fikiere Abraham ọ tẹ kpama evaọ irioke frifri ọ tẹ rehọ ebrẹdi gbe ẹkpa oviẹ-arao nọ ame ọ rrọ rọkẹ Hega. Ọ tẹ wọ ai họ ẹkoko riẹ ọ tẹ ta kẹ ae nọ a nyavrẹ tei te ọmọ na.+ Fikiere ọ tẹ nyavrẹ je bi ghoro evaọ udhude Biẹ-shiba.+ 15 Ame nọ ọ rrọ ẹkpa oviẹ-arao na o te ti re no, o te gele ọmọ na fihọ otọ ẹbe jọ. 16 Ọ tẹ nyaharo te oria nọ u thabọ te ugbo nọ a sae sa ose te, ọye ọvo ọ tẹ keria etẹe, keme ọ ta nọ: “Mẹ gwọlọ rri ọmọ na okenọ o ti whu hu.” Fikiere ọ tẹ kẹnoma no etẹe nyae keria o te muhọ ẹviẹ gaga je bi kuenu oviẹ.

17 Kẹsena Ọghẹnẹ o te yo uvou ọmọ na,+ ukọ-odhiwu Ọghẹnẹ o te se Hega no obọ idhiwu ze ọ tẹ ta kẹe nọ:+ “Eme o bi ru owhẹ, Hega? Jọ ozọ u mu owhẹ hẹ, keme Ọghẹnẹ o yo uvou ọmọ na no evaọ oria nọ ọ rrọ. 18 Kpama, kru ọmọ na kpama re who kru rie obọ, keme me ti ru ei zihe ruọ orẹwho ulogbo.”+ 19 Kẹsena Ọghẹnẹ o te rovie aro riẹ ọ tẹ ruẹ oza jọ nọ ame ọ rrọ, ọ tẹ nya o te vo ame fihọ ẹkpa oviẹ-arao na ọ tẹ kẹ ọmọ na ame da. 20 Ọghẹnẹ ọ jọ kugbe ọmọ na+ nọ ọ be kpako ze na. Udhude ọ jẹ rria o te ti zihe ruọ ọnọ ọ rẹ sa ose. 21 O te mu udhude Peran họ ẹria,+ oni riẹ ọ tẹ jọ obọ Ijipti rehọ aye kẹe.

22 Evaọ oke yena Abimẹlẹk avọ Faekọl oletu ogbaẹmo riẹ a tẹ ta kẹ Abraham nọ: “Ọghẹnẹ ọ rrọ kugbe owhẹ evaọ oware kpobi nọ who bi ru.+ 23 Fikiere jọ etenẹ duwu iyei kẹ omẹ evaọ aro Ọghẹnẹ inọ whọ te rọ eviẹhọ lele omẹ avọ emọ* mẹ gbe emọ-emọ mẹ yeri hi, inọ ọkpọ uyoyou nọ o rẹ hiẹ hẹ nọ me dhesẹ kẹ owhẹ na oye ovona who ti dhesẹ kẹ omẹ avọ ẹkwotọ nọ whọ be rria na.”+ 24 Fikiere Abraham ọ tẹ ta nọ: “Me duwu iyei nọ o jọ ere.”

25 Rekọ Abraham ọ tẹ vuẹ Abimẹlẹk kpahe oza riẹ nọ idibo Abimẹlẹk a rọ ogaga rehọ.+ 26 Abimẹlẹk ọ tẹ ta nọ: “Mẹ riẹ ohwo nọ o ru onana ha; whọ vuẹ omẹ kpahe iẹe he, yọ me ri yo oware ovo kpahe iẹe he rite inẹnẹ na.” 27 Kẹsena Abraham ọ tẹ rehọ igodẹ gbe iruẹ ọ tẹ rehọ ae kẹ Abimẹlẹk, aimava a tẹ re ọvọ. 28 Nọ Abraham ọ jọ uthuru erao na rehọ imigodẹ eyae ihrẹ fihọ oria rai sa, 29 Abimẹlẹk ọ tẹ nọ Abraham nọ: “Fikieme who ro fi imigodẹ eyae ihrẹ nana họ oria rai sa evaọ etenẹ?” 30 Kẹsena ọ tẹ ta nọ: “Who re mi omẹ imigodẹ eyae ihrẹ na no obọ re e jọ isẹri inọ mẹ họ ọnọ ọ tọ oza nana.” 31 Oyejabọ nọ o ro se oria yena Biẹ-shiba,*+ keme etẹe aimava a jọ duwu iyei. 32 Fikiere a tẹ re ọvọ+ evaọ Biẹ-shiba, kẹsena Abimẹlẹk ọ tẹ kpama avọ Faekọl oletu ogbaẹmo riẹ, a te zihe kpobọ ẹkwotọ ahwo Filistia.+ 33 Kẹsena ọ tẹ kọ ure tamarisk fihọ Biẹ-shiba, ọ tẹ jọ etẹe se odẹ Jihova,+ Ọghẹnẹ ebẹdẹ bẹdẹ na.+ 34 Abraham ọ tẹ rria* ẹkwotọ ahwo Filistia oke krẹkri.*+

22 Nọ onana o vrẹ no, Ọghẹnẹ uzẹme na ọ tẹ dawo Abraham,+ ọ tẹ ta kẹe nọ: “Abraham!” o te yo nọ: “Mẹ na!” 2 Ọ tẹ ta nọ: “Ivie, rehọ ọmọzae ra, ọmọzae ọvo ra nọ who you gaga na,+ Aiziki,+ re who kpobọ ẹkwotọ Moraya+ re whọ rehọ iẹe dhe idhe emahọ evaọ ugbehru jọ nọ me ti dhesẹ kẹ owhẹ.”

3 Fikiere Abraham ọ tẹ kpama evaọ irioke frifri jẹ ruẹrẹ eketekete riẹ họ, ọ tẹ rehọ idibo ivẹ riẹ jọ kugbe oma gbe ọmọzae riẹ Aiziki. Ọ tẹ bẹre ire idhe emahọ na, kẹsena ọ tẹ kpama jẹ ruọ edhere kpohọ oria nọ Ọghẹnẹ uzẹme na o dhesẹ kẹe. 4 Evaọ ẹdẹ avọ esa, nọ Abraham ọ kpare ovao ọ tẹ ruẹ oria na evaọ ugbo. 5 Abraham ọ tẹ ta kẹ idibo riẹ na nọ: “Wha jọ etenẹ kugbe eketekete na, rekọ mẹ avọ ọmọzae mẹ ma bi kpohọ obei na nyae gọ kẹsena ma ve ti zihe bru owhai ze.”

6 Fikiere Abraham ọ tẹ rehọ ire idhe emahọ na ọ tẹ wọ ae họ ọmọzae riẹ Aiziki. Kẹsena ọ tẹ wọ erae gbe amagha,* aimava na a tẹ gbẹ nya usu vrẹ. 7 Kẹsena Aiziki o te se ọsẹ riẹ Abraham nọ: “Ọsẹ mẹ!” O te yo kẹe nọ: “Ẹhẹ, ọmọzae mẹ!” Ọmọ na ọ tẹ ta nọ: “Whaọ erae na gbe ire na ena, kọ ogodẹ nọ a ti ro dhe idhe emahọ na ọ rrọ?” 8 Abraham o te yo kẹe nọ: “Ọghẹnẹ ọvo ọ te rọ ogodẹ idhe emahọ na ze,+ ọmọzae mẹ.” Aimava a tẹ ruabọhọ onya.

9 Uwhremu na, a te ti te oria nọ Ọghẹnẹ uzẹme na o dhesẹ kẹe na, Abraham ọ tẹ bọ agbada-idhe fihọ etẹe jẹ ruẹrẹ ire na họ ehru riẹ. Ọ tẹ gba ọmọzae riẹ Aiziki abọ gbe awọ ọ tẹ wọe họ ehru ire agbada-idhe na.+ 10 Kẹsena Abraham ọ tẹ rriẹ obọ tọlọ amagha* na re o kpe ọmọzae riẹ.+ 11 Rekọ ukọ-odhiwu Jihova o te se Abraham no obọ idhiwu na ze, inọ: “Abraham, Abraham!” o te yo kẹe nọ: “Mẹ na!” 12 Ọ tẹ ta nọ: “Whọ nwa ọmọ na oma ha, yọ who ru ọmọ na oware ovo ho, keme obọnana mẹ riẹ no nọ who wo ozodhẹ Ọghẹnẹ keme whọ rọ ọmọzae ra, ọmọ ọvo ra na gbọ omẹ ogbọ họ.”+ 13 Abraham ọ tẹ kpare ovao, ọ tẹ ruẹ egbo nọ izei riẹ e yagha etuetue jọ kẹle etẹe. Fikiere Abraham ọ tẹ nya ọ tẹ rehọ egbo na jẹ rehọ iẹe dhe idhe emahọ viukpọ ọmọzae riẹ. 14 Abraham o te se oria na Jihova-jaire.* Oyejabọ nọ a gbẹ be rọ ta nẹnẹ nọ: “A te rehọ iẹe ze evaọ ugbehru Jihova.”+

15 Ukọ-odhiwu Jihova o te se Abraham orọ avọ isiava no obọ idhiwu ze, 16 ọ tẹ ta nọ: “Enẹ Jihova ọ ta, ‘Mẹ rehọ omobọ mẹ duwu iyei+ inọ fiki oware nana nọ who ru na, nọ whọ gbẹ rọ ọmọzae ra, ọmọ ọvo ra gbọ omẹ ogbọ họ na,+ 17 mẹ te ghale owhẹ hrọ, yọ me ti ru ọmọ* ra vihọ hrọ wọhọ isi obọ ehru* na jẹ wọhọ uwẹkpẹ nọ o rrọ akotọ abade,+ yọ ọmọ* ra ọ te rehọ unuẹthẹ* ewegrẹ riẹ.+ 18 Yọ ẹkwoma ọmọ* ra+ erẹwho otọakpọ na kpobi a ti wo oghale kẹ omarai fikinọ whọ gaviezọ kẹ urru mẹ.’”+

19 Kẹsena Abraham o te zihe bru idibo riẹ, a tẹ kpama aikpobi a te zihe kpobọ Biẹ-shiba;+ Abraham ọ tẹ gbẹ jẹ rria Biẹ-shiba.

20 Nọ onana o vrẹ no, a tẹ vuẹ Abraham nọ: “Milka o yẹ emezae kẹ Nahọ oniọvo-ọmọzae ra no re:+ 21 Ọz ọmọ ọsosuọ riẹ, Buz oniọvo-ọmọzae riẹ, Kẹmuẹl (ọsẹ Eram), 22 Kisẹd, Hezọ, Pildash, Jidlaf, gbe Bẹthuẹl.”+ 23 Bẹthuẹl o te yẹ Rebeka.+ Milka o yẹ emọ eree nana kẹ Nahọ oniọvo-ọmọzae Abraham. 24 Ọse riẹ nọ a re se Ruma o yẹ emezae re: Tiba, Geham, Tehash, gbe Meaka.

23 Sera ọ tẹ rria ikpe udhozeza-gbihrẹ (127); enana họ ikpe uzuazọ Sera.+ 2 Sera o te whu evaọ Kiriat-aba,+ koyehọ Hebrọn,+ evaọ ẹkwotọ Kenan,+ Abraham o te muhọ eweri jẹ be viẹ Sera. 3 Kẹsena Abraham ọ tẹ kpama no aro aye riẹ nọ o whu fihọ otọ ọ tẹ ta kẹ emezae Hẹt nọ:+ 4 “Mẹ yọ ohwo orẹwho ọfa nọ ọ kwa ze te rria udevie rai.+ Wha kẹ omẹ otọ re o jọ oria nọ me re ki ahwo fihọ evaọ udevie rai re mẹ wọ ori mẹ nyai ki.” 5 Fikiere emezae Hẹt a tẹ ta kẹ Abraham nọ: 6 “Gaviezọ kẹ omai, olori mẹ. Whẹ yọ ohwo ologbo Ọghẹnẹ* evaọ udevie mai.+ Whọ sai ki ori ra fihọ oria nọ o mai woma evaọ usu eria nọ ma re ki ahwo fihọ. Mai ọvuọvo ọ te rọ oria riẹ nọ o re ki ahwo fihọ gbọ owhẹ ogbọ họ re o whaha owhẹ ori ra nọ who re ki.”

7 Fikiere Abraham ọ tẹ kpama o je guzou kpotọ kẹ ahwo ẹkwotọ na, emezae Hẹt,+ 8 ọ tẹ ta kẹ ae nọ: “Otẹrọnọ o ruọ owhai* nọ wha rẹ kẹ omẹ uvẹ re mẹ wọ ori mẹ nyai ki, wha gaviezọ kẹ omẹ re wha lẹ Ifrọn ọmọzae Zoha kẹ omẹ 9 re ọ zẹ eghogho-utho Mak-pila kẹ omẹ, onọ o rrọ oriẹ; nọ o rrọ oka otọ riẹ na. Jọ ọ zẹe kẹ omẹ evaọ iraro rai evaọ unu isiliva kpobi nọ a rẹ sae zẹ otọ na+ re me wo oria nọ me re ki ahwo fihọ.”+

10 Oke nana yọ Ifrọn ọ keria udevie emezae Hẹt. Fikiere Ifrọn ohwo Hit na ọ tẹ jọ iraro* emezae Hẹt gbe aro ahwo kpobi nọ a rehọ unuẹthẹ okpẹwho riẹ ruọ eva ta kẹ Abraham+ nọ: 11 “Ijo, olori mẹ! Gaviezọ kẹ omẹ. Mẹ kẹ owhẹ otọ na gbe eghogho-utho nọ ọ rrọ eva riẹ. Mẹ be rehọ iẹe kẹ owhẹ evaọ iraro emezae ahwo mẹ. Nyai ki ori ra.” 12 Kẹsena Abraham o te guzou kpotọ kẹ ahwo ẹkwotọ na 13 ọ tẹ ta kẹ Ifrọn evaọ iraro* ahwo na inọ: “Gaviezọ kẹ omẹ, otẹrọnọ u no owhẹ eva ze! Mẹ te kẹ owhẹ unu isiliva kpobi nọ a rẹ sae zẹ otọ na. Rehọ iẹe mi omẹ, re mẹ sai ki ori mẹ fihọ etẹe.”

14 Ifrọn ọ tẹ kpahe kẹ Abraham nọ: 15 “Olori mẹ, gaviezọ kẹ omẹ. Otọ nana u te shẹkẹl* isiliva egba ene (400), kọ oyena yọ oware jọ evaọ udevie mẹ avọ owhẹ? Nyai ki ori ra.” 16 Abraham ọ rọwo ẹme Ifrọn, Abraham ọ tẹ wawọ unu isiliva nọ ọ jọ iraro* emezae Hẹt fodẹ na kẹ Ifrọn, shẹkẹl* isiliva egba ene (400) wọhọ epaọ ẹgbẹdẹ onọ egba-ihreki a re mi.+ 17 Fikiere otọ Ifrọn nọ o rrọ Mak-pila, nọ o rrọ aro Mamre, te otọ na te eghogho-utho nọ o riẹe gbe ire kpobi nọ e riẹe eva, a te siobọno ai kẹ 18 Abraham, u te zihe ruọ otọ nọ ọ dẹ evaọ iraro emezae Hẹt, evaọ iraro ahwo kpobi nọ a be rọ unuẹthẹ okpẹwho riẹ ruọ eva. 19 Kẹsena Abraham o te ki aye riẹ Sera fihọ eghogho-utho otọ Mak-pila nọ o rrọ aro Mamre, koyehọ Hebrọn, evaọ ẹkwotọ Kenan. 20 Fikiere emezae Hẹt a te siobọno otọ na gbe eghogho-utho nọ o riẹe eva kẹ Abraham re o jọ oria nọ o re ki ahwo fihọ.+

24 Oke nana yọ Abraham ọ who no, ọ kpako gaga no, yọ Jihova ọ ghale Abraham evaọ oware kpobi.+ 2 Abraham ọ tẹ ta kẹ odibo riẹ, ọrọ ọkpako kpobi evaọ uwou riẹ nọ ọ jẹ rẹrote eware nọ o wo kpobi, inọ:+ “Ivie fi obọ ra họ otọ ekpokpowọ mẹ, 3 me ti ru owhẹ duwu iyei evaọ odẹ Jihova, Ọghẹnẹ idhiwu gbe Ọghẹnẹ otọakpọ na, inọ whọ rẹ jọ udevie emetẹ ahwo Kenan nọ mẹ be rria udevie rai na rehọ aye kẹ ọmọzae mẹ hẹ.+ 4 Ukpoye, who re kpobọ orẹwho mẹ bru imoni mẹ+ nyae rehọ aye kẹ ọmọzae mẹ, Aiziki.”

5 Rekọ odibo na ọ tẹ ta kẹe nọ: “Kọ otẹrọnọ aye na ọ gbẹ rọwo nọ o re lele omẹ ziọ ẹkwotọ nana ha? Kọ me zihe ọmọzae ra kpohọ ẹkwotọ nọ who no ze na?”+ 6 Abraham ọ tẹ ta kẹe nọ: “Ruẹ nọ whọ rẹ rehọ ọmọzae mẹ kpohọ obei vievie he.+ 7 Jihova Ọghẹnẹ idhiwu na nọ ọ rehọ omẹ no uwou ọsẹ mẹ je no ẹkwotọ imoni mẹ,+ ọnọ ọ ta ẹme kẹ omẹ je duwu iyei kẹ omẹ nọ:+ ‘Mẹ te rehọ ẹkwotọ nana+ kẹ ọmọ* ra,’+ o ti vi ukọ-odhiwu riẹ karo kẹ owhẹ,+ yọ whọ te jọ obei rehọ aye kẹ ọmọzae mẹ hrọ.+ 8 Rekọ otẹrọnọ aye na ọ gbẹ rọwo lele owhẹ nyaze he, yọ iyei nana i no owhẹ uzou no. Rekọ whọ rẹ rehọ ọmọzae mẹ kpohọ obei vievie he.” 9 Odibo na o te fi obọ riẹ họ otọ ekpokpowọ Abraham olori riẹ o te duwu iyei kẹe kpahe onana.+

10 Fikiere odibo na ọ tẹ rehọ ekamẹle ikpe olori riẹ ọ tẹ ruọ edhere, ọ rehọ oghoghẹrẹ eware iwoma kpobi mi olori riẹ lele oma. Kẹsena ọ tẹ ruọ edhere bi kpohọ Mẹsopotemia, bi kpobọ okpẹwho Nahọ. 11 O te ru ekamẹle na ruwẹ fihọ otọ kẹle oza jọ evaọ otafe okpẹwho na. O jọ ubrobọ owọwọ okenọ eyae na a rẹ rọ nyai vo ame. 12 Ọ tẹ ta nọ: “Jihova, Ọghẹnẹ olori mẹ Abraham, ivie fiobọhọ kẹ omẹ wo obokparọ nẹnẹ na, re who dhesẹ uyoyou ra nọ o rẹ hiẹ hẹ kẹ olori mẹ Abraham. 13 Me dikihẹ etenẹ kẹle oza, yọ emetẹ ezae okpẹwho na a be nyaze ti vo ame. 14 Jọ ọmọtẹ nọ mẹ te ta kẹ nọ, ‘Ivie go omothẹ ame ra kpotọ re mẹ jariẹ da,’ nọ ọ te kpahe kẹ omẹ nọ, ‘Rehọ whọ da, yọ me ti vo ame kẹ ekamẹle ra re,’ jọ ọnana ọ jọ ọnọ whọ salọ kẹ odibo ra Aiziki; re whọ rọ onana ru omẹ riẹ nọ who dhesẹ uyoyou ra nọ o rẹ hiẹ hẹ kẹ olori mẹ no.”

15 Rekọ taure ọ tẹ te ta re, Rebeka ọmọtẹ Bẹthuẹl+ ọmọzae Milka+ aye Nahọ,+ oniọvo-ọmọzae Abraham ọ tẹ nyaze avọ omothẹ ame nọ ọ rrọ ẹkoko riẹ. 16 Whaọ ọmọtẹ na o wo erru gaga, ọmọtẹ-kọkọ; ọzae ọvuọvo o rri lele iei wezẹ hẹ. Ọ tẹ nya kpobọ oza na, vo ame fihọ omothẹ riẹ, kẹsena o te zihe ze. 17 Odibo na ọ tẹ nwane dhẹ bru ei, ọ tẹ ta kẹe nọ: “Ivie jọ omothẹ ra na kẹ omẹ amame jọ da.” 18 Ọ tẹ ta kẹe nọ: “Da, olori mẹ.” Ọ tẹ nwani wo omothẹ na fihọ obọ ọ tẹ kẹe ame da. 19 Nọ ọ kẹe ame da no, ọ tẹ ta nọ: “Me ti vo ame kẹ ekamẹle ra re bẹsenọ a rẹ da eva vọ no.” 20 Fikiere ọ tẹ nwani ku ame nọ ọ rrọ omothẹ riẹ na vẹrẹ vẹrẹ fihọ udo ame erao na, o te je dhe eziezihe kpohọ obọ oza na re o vo ame, ọ tẹ ruabọhọ je vo ame kẹ ekamẹle riẹ kpobi. 21 Oke nana kpobi yọ ọzae na ọ fọ kpoko bi rri rie avọ igbunu, bi roro sọ Jihova ọ ghale onya riẹ no hayo ọ re ghale iẹe he.

22 Nọ ekamẹle na e da ame no, ọzae na ọ tẹ rehọ ẹmẹro unwe igoru nọ o gbẹdẹ te ubro shẹkẹl* gbe ifiare igoru ivẹ nọ e gbẹdẹ te shẹkẹl* ikpe rọ kẹe, 23 ọ tẹ ta kẹe nọ: “Ivie ta kẹ omẹ, whẹ ọmọ ono? Kọ ubruwou jọ o rrọ uwou ọsẹ ra nọ ma rẹ sae wezẹ aso nana?” 24 Ọ tẹ ta kẹe nọ: “Mẹ yọ ọmọtẹ Bẹthuẹl+ ọmọzae Milka, nọ o yẹ kẹ Nahọ.”+ 25 O te fibae nọ: “Ma wo ẹbe ọyaya gbe emu-erao buobu gbe oria nọ wha rẹ wezẹ.” 26 Kẹsena ọzae na o te guzou kpotọ je kiẹzẹ vovao tuotọ kẹ Jihova, 27 ọ tẹ ta nọ: “Jọ ujiro u te Jihova, Ọghẹnẹ olori mẹ Abraham, keme ọ re siọ uyoyou riẹ nọ o rẹ hiẹ hẹ gbe ọtẹruo riẹ ba edhesẹ kẹ olori mẹ hẹ. Jihova o su omẹ ziọ uwou inievo olori mẹ no.”

28 Ọmọtẹ na ọ tẹ dhẹ bru ahwo uwou oni riẹ nyae vuẹ ae eware nana. 29 Whaọ Rebeka o wo oniọvo-ọmọzae jọ nọ a re se Leban.+ Fikiere Leban ọ tẹ dhẹ bru ọzae na nọ ọ rrọ otafe evaọ obọ oza na. 30 Nọ ọ ruẹ ẹmẹro unwe gbe ifiare nọ e rrọ abọ oniọvo-ọmọtẹ riẹ je yo ẹme nọ oniọvo-ọmọtẹ riẹ Rebeka ọ be ta inọ, “Enẹ gbe enẹ ọzae na ọ ta kẹ omẹ,” ọ tẹ nyabru ọzae na nọ ọ gbẹ jọ etẹe nọ o dikihẹ kẹle ekamẹle riẹ evaọ obọ oza na. 31 Ọ tẹ nwane ta nọ: “Nyaze, whẹ ọnọ Jihova ọ ghale no na. Fikieme who gbe ro dikihẹ obọ otafe obonẹ? Mẹ ruẹrẹ uwou na kpahe no gbe oria nọ ekamẹle na e te jọ.” 32 Kẹsena ọzae na ọ tẹ nyaze uwou na, ọ* tẹ rra ifi gbe ewha no ekamẹle na jẹ rọ ẹbe ọyaya gbe emu ze rọkẹ ekamẹle na, ọ tẹ rọ ame ze re ọ rọ wozẹ awọ riẹ gbe awọ ezae nọ e jọ kugbei. 33 Rekọ nọ a wọ emu fihọ aro riẹ re ọ re, ọ tẹ ta nọ: “Mẹ te re emu hu bẹsenọ mẹ rẹ vuẹ owhai oware nọ mẹ gwọlọ ta.” Fikiere Leban ọ tẹ ta nọ: “Ta ze.”

34 Kẹsena ọ tẹ ta nọ: “Mẹ yọ odibo Abraham.+ 35 Yọ Jihova ọ ghale olori mẹ gaga no, yọ o ru rie fe gaga no, ọ kẹ riẹ igodẹ avọ iruẹ, isiliva avọ igoru, idibo-emezae avọ idibo-emetẹ, gbe ekamẹle avọ eketekete.+ 36 U te no ere no, Sera aye olori mẹ o yẹ ọmọzae kẹ olori mẹ evaọ oke nọ ọ kpako no,+ yọ ọ te rehọ eware kpobi nọ o wo kẹe.+ 37 Fikiere olori mẹ o te ru omẹ duwu iyei inọ: ‘Whọ rẹ jọ udevie emetẹ ahwo Kenan nọ mẹ be rria ẹkwotọ rai na rehọ aye kẹ ọmọzae mẹ vievie he.+ 38 Ijo, rekọ who re kpobọ uwou ọsẹ mẹ, obọ orua mẹ+ nyae rehọ aye kẹ ọmọzae mẹ.’+ 39 Rekọ mẹ tẹ ta kẹ olori mẹ nọ: ‘Kọ otẹrọnọ aye na ọ gbẹ rọwo lele omẹ nyaze he?’+ 40 Ọ tẹ ta kẹ omẹ nọ: ‘Jihova nọ me lele nya no rite enẹna,+ o ti vi ukọ-odhiwu riẹ+ lele owhẹ jẹ ghale onya ra hrọ, yọ whọ rẹ jọ orua mẹ gbe uwou ọsẹ mẹ rehọ aye kẹ ọmọzae mẹ hrọ.+ 41 Otẹrọnọ who kpobọ orua mẹ rekọ a gbẹ rọwo siobọno aye na kẹ owhẹ hẹ, yọ iyei nọ who duwu na i no owhẹ uzou no. Onana u re si iyei nọ who duwu na no owhẹ uzou.’+

42 “Nọ me te obọ oza na nẹnẹ, mẹ tẹ ta nọ: ‘Jihova, Ọghẹnẹ olori mẹ Abraham, otẹrọnọ whọ te ghale onya mẹ na, 43 me dikihẹ kẹle oza. Yọ oware nọ o rẹ via họ, nọ ọmọtẹ+ ọ tẹ nyaze ti vo ame, mẹ te ta nọ, “Ivie, mẹ jọ omothẹ ame ra na da amame jọ,” 44 ọ vẹ te ta kẹ omẹ nọ: “Rehọ whọ da, yọ me ti vo ame kẹ ekamẹle ra re.” Jọ aye yena ọ jọ ọnọ Jihova ọ salọ kẹ ọmọzae olori mẹ.’+

45 “Rekọ taure mẹ tẹ te ta ẹme na re evaọ udu mẹ, Rebeka ọ tẹ be nyaze avọ omothẹ ame riẹ nọ ọ rrọ ẹkoko riẹ, o te kpobọ oza na je mu ame họ evo. Kẹsena mẹ tẹ ta kẹe nọ: ‘Ivie, kẹ omẹ ame mẹ da.’+ 46 Fikiere o te wo omothẹ riẹ no ẹkoko riẹ ze ovovẹrẹ, ọ tẹ ta nọ: ‘Rehọ whọ da,+ yọ me ti vo ame kẹ ekamẹle ra re.’ Kẹsena mẹ tẹ da ame, ọ tẹ jẹ kẹ ekamẹle na ame da re. 47 Mẹ tẹ nọe nọ, ‘Whẹ ọmọ ono?’ ọ tẹ ta nọ, ‘Mẹ yọ ọmọtẹ Bẹthuẹl ọmọzae Nahọ nọ Milka o yẹ kẹe.’ Fikiere me te fi ẹmẹro na họ unwe riẹ je fi ifiare na họ abọ riẹ.+ 48 Me te guzou kpotọ je kiẹzẹ vovao tuotọ kẹ Jihova je jiri Jihova, Ọghẹnẹ olori mẹ Abraham,+ ọnọ o su omẹ nya emamọ edhere re mẹ rehọ ọmọtẹ oniọvo olori mẹ kẹ ọmọzae riẹ. 49 Whaọ enẹna wha vuẹ omẹ sọ wha ti dhesẹ uyoyou nọ o rẹ hiẹ hẹ gbe ọtẹruo kẹ olori mẹ; rekọ o gbẹ rrọ ere he, wha vuẹ omẹ, re mẹ riẹ onọ me re ru.”*+

50 Kẹsena Leban avọ Bẹthuẹl a tẹ ta nọ: “Obọ Jihova onana u no ze. Ma sae ta nọ Ee hayo ijo kẹ owhẹ hẹ.* 51 Rebeka ọna ọ rrọ aro ra na. Rehọ iẹe re who kpo, re ọ jọ aye ọmọzae olori ra nwane wọhọ epanọ Jihova ọ ta na.” 52 Nọ odibo Abraham o yo eme rai na, ọ tẹ nwani kigwẹ fihọ otọ je guzou kpotọ kẹ Jihova. 53 Odibo na o te mu ekwakwa isiliva gbe igoru gbe iwu họ ẹrehọ ze, ọ tẹ rehọ ae kẹ Rebeka, ọ tẹ jẹ kẹ oniọvo-ọmọzae riẹ gbe oni riẹ eware eghaghae. 54 Kẹsena ọyomariẹ avọ ezae nọ e jọ kugbei a tẹ re jẹ da, a tẹ wezẹ etẹe asohẹrioke.

Nọ ọ kpama evaọ ohiohiẹ, ọ tẹ ta nọ: “Wha siobọno omẹ re me kpo bru olori mẹ.” 55 Rekọ oniọvo-ọmọzae riẹ avọ oni riẹ a tẹ ta nọ: “Jọ ọmọtẹ na ọ rria kugbe omai, o tẹ kawo edẹ ikpe. Kẹsena o ve te ti kpo.” 56 Rekọ ọ tẹ ta kẹ ae nọ: “Wha kru omẹ fihọ otọ họ, nọ Jihova ọ ghale onya mẹ no na. Wha siobọno omẹ re me kpo bru olori mẹ.” 57 Fikiere a tẹ ta nọ: “Joma se ọmọtẹ na re ma nọe.” 58 A te se Rebeka a tẹ nọe nọ: “Kọ who bi lele ọzae nana kpo?” O te yo nọ: “O ruọ omẹ nọ mẹ rẹ nya.”

59 Fikiere a te siobọno oniọvo-ọmọtẹ rai Rebeka+ gbe ọyọrọ-ọmọ* riẹ+ gbe odibo Abraham avọ ezae nọ i lele i rie. 60 A tẹ lẹ ẹro eghale kẹ Rebeka a tẹ ta kẹe nọ: “Oniọvo-ọmọtẹ mai, jọ who zihe ruọ idu eko idu ikpe,* jọ emọ* ra a rehọ unuẹthẹ* enọ i mukpahe ae.”+ 61 Kẹsena Rebeka avọ idibo-emetẹ riẹ a tẹ kpama, ruọ ehru ekamẹle, a te lele ọzae na. Odibo na ọ tẹ rehọ Rebeka jẹ ruọ edhere.

62 Whaọ Aiziki o no ofẹ obọ Biẹ-leha-rae ze no,+ keme ọ jẹ rria ẹkwotọ Negẹb na.+ 63 Yọ Aiziki ọ jẹ nya evaọ otọ na evaọ owọwọ na re o roro didi.+ Nọ ọ kpare ovao, ọ tẹ ruẹ nọ ekamẹle e be nyaze! 64 Nọ Rebeka ọ kpare ovao, ọ tẹ ruẹ Aiziki, o te nwrotọ no ekamẹle na ovovẹrẹ. 65 Kẹsena ọ tẹ nọ odibo na nọ: “Yọ ọzae vẹ ọ rrọ obei evaọ otọ na nọ ọ be nyabru omai ze na?” Odibo na ọ tẹ ta nọ: “Yọ olori mẹ.” Fikiere ọ tẹ rehọ iveli* riẹ ro ruru oma. 66 Odibo na ọ tẹ vuẹ Aiziki eware kpobi nọ o ru. 67 Kẹsena Aiziki ọ tẹ rehọ aye riẹ kpobọ uwou-udhu Sera oni riẹ.+ Fikiere ọ tẹ rehọ Rebeka re ọ jọ aye riẹ, ọ tẹ dhẹ ruọ ẹe oma,+ Aiziki o te ti wo omosasọ nọ oni riẹ o whu no.+

25 Abraham ọ tẹ wariẹ wo aye, odẹ riẹ Ketura. 2 O te ti yẹ Zimran, Jọkshan, Midan, Midian,+ Ishbak, gbe Shuah+ kẹe.

3 Jọkshan họ ọsẹ Shiba gbe Didan.

Emezae Didan họ Ashurim, Lẹtushim, gbe Lẹ-ọmim.

4 Emezae Midian họ Ifa, Ifẹ, Henọk, Abaeda, gbe Ẹldeya.

Enana kpobi yọ emezae Ketura.

5 Uwhremu na, Abraham ọ tẹ rehọ eware kpobi nọ o wo kẹ Aiziki,+ 6 rekọ Abraham ọ tẹ kẹ emezae riẹ nọ ese* riẹ i yẹ kẹe na ekẹ. Nọ ọ gbẹ jọ uzuazọ, ọ tẹ ta kẹ ae nọ a kpohọ ofẹ ovatha-ọre kẹnoma no Aiziki ọmọzae riẹ,+ kpobọ ẹkwotọ Ovatha-Ọre. 7 Ikpe uzuazọ Abraham i bu te ikpe udhoree gbe ikpegbisoi (175). 8 Kẹsena Abraham o te ku ẹwẹ urere riẹ, o te whu nọ ọ who gaga no, yọ ọ who je yeri uzuazọ nọ o da riẹ ẹro, a te koko iei họ bru ahwo riẹ.* 9 Emezae riẹ Aiziki avọ Ishmẹl a te ki ei fihọ eghogho-utho Mak-pila evaọ otọ Ifrọn ọmọzae Zoha ohwo Hit na nọ o rrọ aro Mamre,+ 10 otọ nọ Abraham ọ dẹ mi emezae Hẹt. Etẹe a ki Abraham fihọ, oria nọ a ki Sera fihọ.+ 11 Nọ Abraham o whu no, Ọghẹnẹ ọ gbẹ jẹ ghale ọmọzae riẹ Aiziki,+ yọ Aiziki ọ jẹ rria kẹle Biẹ-leha-rae.+

12 Onana họ ikuigbe Ishmẹl+ ọmọzae Abraham nọ Hega+ ohwo Ijipti na, odibo Sera o yẹ kẹ Abraham.

13 Whaọ enana họ edẹ emezae Ishmẹl, edẹ rai lele enọ i mu inuwou rai họ: Ọmọ ọsosuọ Ishmẹl họ Nebeyọt,+ kẹsena Kida,+ Adbiẹl, Mibsam,+ 14 Mishma, Duma, Masa, 15 Hedad, Tima, Jitọ, Nefish, gbe Kẹdema. 16 Enana họ emezae Ishmẹl, yọ enana họ edẹ rai wọhọ epanọ a jẹ rọ rria ọvuọ eria rai gbe ọvuọ evuẹ rai,* ezae ikpegbivẹ enọ i wuzou erua rai.+ 17 Ishmẹl ọ tẹ rria ikpe udhozeza gbe ikpegbihrẹ (137). Kẹsena o te ku ẹwẹ urere riẹ, o te whu a te koko iei họ bru ahwo riẹ.* 18 Emọ riẹ a tẹ jẹ rria Havila,+ onọ o kẹle Shọ,+ nọ o kẹle Ijipti, rite obọ Asiria. Ọ jẹ rria kẹle inievo riẹ kpobi.*+

19 Onana họ ikuigbe Aiziki ọmọzae Abraham.+

Abraham họ ọsẹ Aiziki. 20 Aiziki ọ jọ ikpe udhuvẹ nọ ọ rehọ Rebeka ọmọtẹ Bẹthuẹl+ ohwo Eram ọrọ Padan-eram, oniọvo-ọmọtẹ Leban ohwo Eram na. 21 Aiziki ọ tẹ jẹ lẹ Jihova kpahe aye riẹ, keme ọ jọ ọga; fikiere Jihova o te ru ayare riẹ kẹe, aye riẹ Rebeka o te dihọ. 22 Emezae nọ e jọ eva riẹ a te mu ohwohwo họ elele hrowo oma,+ fikiere ọ tẹ ta nọ: “Otẹrọnọ enẹ o rrọ, fikieme mẹ rẹ gbẹ rọ jọ uzuazọ?” Fikiere ọ tẹ nọ Jihova kpahe onana. 23 Jihova ọ tẹ ta kẹe nọ: “Erẹwho ivẹ e rrọ edhede ra,+ yọ eko ahwo ivẹ i ti no oma ra ze;+ orẹwho jọ o te ga vi orẹwho ọdekọ,+ yọ ọrọ ọkpako na ọ te gbodibo kẹ ọrọ ọmaha na.”+

24 Nọ oke nọ o re ro yẹ u te, rri! ejime e rrọ edhede riẹ. 25 Ọrọ ọsosuọ ọ tẹ lahwe avọ oma riẹ kpobi nọ o rrọ wawae jẹ rrọ etueto wọhọ ewu oviẹ-arao,+ fikiere a te mu odẹ kẹe nọ Esọ.*+ 26 Kẹsena oniọvo-ọmọzae riẹ ọ tẹ lahwe avọ obọ riẹ nọ o ro kru ethihrowọ Esọ,+ fikiere a te mu odẹ kẹe nọ Jekọp.*+ Aiziki ọ jọ ikpe udhosa nọ aye riẹ o yẹ ai.

27 Nọ emezae na a be rro na, Esọ ọ tẹ te jọ emamọ ozuẹ,+ ohwo ẹwọ, rekọ Jekọp ọ jọ ohwo nọ ọ kare afuẹwẹ, nọ ọ jẹ rria iwou-udhu.+ 28 Aiziki o you Esọ keme ọye o re ru arao ẹwọ tei unu, rekọ Rebeka o you Jekọp.+ 29 Evaọ ẹdẹ jọ, Jekọp o je there izuwo okenọ Esọ o no obọ ẹwọ ze avọ oma nọ o rrọ riẹ no. 30 Fikiere Esọ ọ tẹ ta kẹ Jekọp nọ: “Ovẹrẹ, ivie, kẹ omẹ omojọ* evaọ izuwo ewawae ra nọ e rrọ etẹe na,* keme oma o rrọ omẹ no!”* Oyejabọ nọ odẹ riẹ o jẹ rrọ Edọm.*+ 31 Jekọp ọ tẹ ta kẹe nọ: “Kake zẹ ọkwa ọmọ-ọkpako ra kẹ omẹ!”+ 32 Esọ ọ tẹ ta nọ: “Uwhu mẹ rrọ na! Kọ eme mẹ be rọ ọkwa ọmọ-ọkpako ru?” 33 Jekọp o te fibae nọ: “Kaki duwu iyei kẹ omẹ tao!” Fikiere o te duwu iyei kẹe ọ tẹ zẹ ọkwa ọmọ-ọkpako riẹ kẹ Jekọp.+ 34 Kẹsena Jekọp ọ tẹ kẹ Esọ ebrẹdi gbe izuwo egua,* ọ tẹ re jẹ da, ọ tẹ kpama ọ jẹ nyavrẹ. Kọ ere Esọ o ro rri ọkwa ọmọ-ọkpako na vo.

26 Whaọ ohọo u te je mu evaọ ẹkwotọ na, wọhọ epanọ ohọo u mu evaọ edẹ Abraham na,+ fikiere Aiziki ọ tẹ nyabru Abimẹlẹk ovie ahwo Filistia evaọ Gira. 2 Kẹsena Jihova ọ tẹ romavia kẹe, ọ tẹ ta kẹe nọ: “Who kpobọ Ijipti hi. Rria ẹkwotọ nọ me dhesẹ kẹ owhẹ. 3 Rria wọhọ ọrara evaọ ẹkwotọ nana,+ mẹ te jọ kugbe owhẹ yọ mẹ te ghale owhẹ keme whẹ avọ emọ* ra mẹ te rehọ ekwotọ nana kpobi kẹ,+ yọ me ti ru iyei nọ me duwu kẹ ọsẹ ra Abraham gba, inọ:+ 4 ‘Me ti ru ọmọ* ra vihọ wọhọ isi obọ ehru* na;+ yọ mẹ te rehọ ekwotọ nana kpobi kẹ emọ* ra;+ yọ ẹkwoma ọmọ* ra, erẹwho otọakpọ na kpobi a ti wo oghale kẹ omarai,’+ 5 fikinọ Abraham ọ gaviezọ kẹ urru mẹ, ọ ruabọhọ je ru eware nọ mẹ gwọlọ, o koko ijaje mẹ, gbe izi mẹ.”+ 6 Fikiere Aiziki ọ tẹ gbẹ jẹ rria Gira.+

7 Okenọ ezae oria na a jẹ hae nọ kpahe aye riẹ, ọ jẹ hae ta nọ: “Oniọvo-ọmọtẹ mẹ.”+ Ozọ u je mu ei re ọ ta nọ, “Aye mẹ,” keme ọ ta nọ, “Ahwo oria nana a sai kpe omẹ no fiki Rebeka,” keme o wo erru.+ 8 Nọ oke jọ o vrẹ no, Abimẹlẹk ovie Filistia o te je rri unwido, ọ tẹ ruẹ Aiziki nọ ọ be bẹlẹ* Rebeka aye riẹ.+ 9 Abimẹlẹk ọ tẹ nwani se Aiziki ọ tẹ ta kẹe nọ: “Kpakọ aye ra! Fikieme whọ rọ ta nọ, ‘Oniọvo-ọmọtẹ mẹ’?” Aiziki ọ tẹ ta kẹe nọ: “Mẹ ta ere fiki ozọ inọ a ti kpe omẹ no fiki riẹ.”+ 10 Rekọ Abimẹlẹk ọ tẹ ta nọ: “Kinọ eme who ru omai na?+ Ohwo jọ ọ hai ti lele aye ra wezẹ no, yọ whọ hae te rọ ere ru omai reabe no!”+ 11 Kẹsena Abimẹlẹk o te jie uzi kẹ ahwo na kpobi nọ: “Ohwo kpobi nọ ọ rọ obọ te ọzae nana avọ aye riẹ a re kpei hrọ!”

12 Aiziki o te mu ibi họ ẹkọ fihọ otọ na, yọ evaọ ukpe yena o vu akwa udhusoi (100) eware nọ ọ kọ, keme Jihova ọ jẹ ghale iẹe.+ 13 Ọzae na o te ti fe, eware i je woma kẹe vrẹ ọvo bẹsenọ o ro fe gaga. 14 O wo ithuru igodẹ gbe ewa iruẹ gbe idibo buobu,+ ahwo Filistia a te mu ei ihri họ ẹriọ.

15 Fikiere ahwo Filistia na a tẹ whẹ ẹkpẹ ruru eza kpobi nọ idibo ọsẹ riẹ a tọ evaọ edẹ Abraham.+ 16 Kẹsena Abimẹlẹk ọ tẹ ta kẹ Aiziki nọ: “Kwa no okegbe mai no, keme whọ rro gaga vi omai no.” 17 Fikiere Aiziki ọ tẹ kwa no etẹe ọ tẹ fa evuẹ riẹ họ ukiekpotọ* Gira+ o te mu etẹe họ ẹria. 18 Aiziki ọ tẹ wariẹ tọ eza nọ a tọ evaọ edẹ ọsẹ riẹ Abraham nọ ahwo Filistia a nwo di okenọ Abraham o whu no,+ o te se ai edẹ nọ ọsẹ riẹ o mu kẹ ae vẹre.+

19 Nọ idibo Aiziki a jẹ tọ evaọ ukiekpotọ* na, a tẹ ruẹ oza nọ emamọ ame ọ rrọ. 20 Ithuru-igodẹ ahwo Gira a te mu ithuru-igodẹ Aiziki họ elele whọ, inọ: “Ame na ọmai!” Fikiere o te se oza na Isẹk,* keme a lele i rie whọ. 21 A te mu oza ofa họ ẹtọ, a te je mu ọnana họ ẹwhọ fihọ re. Fikiere o te sei Sitna.* 22 Uwhremu na ọ tẹ kwa no etẹe ọ tẹ tọ oza ofa, rekọ a whọ fihọ ọnana ha. Fikiere o te sei Rehobọt,* ọ tẹ ta nọ: “Keme enẹna Jihova ọ kẹ omai oria lelele no yọ o ru omai vihọ no evaọ ẹkwotọ na.”+

23 Kẹsena o te no etẹe kpobọ Biẹ-shiba.+ 24 Evaọ aso yena Jihova ọ tẹ romavia kẹe jẹ ta kẹe nọ: “Mẹ họ Ọghẹnẹ ọsẹ ra Abraham.+ Jọ ozọ u mu owhẹ hẹ,+ keme mẹ rrọ kugbe owhẹ, yọ mẹ te ghale owhẹ je ru emọ* ra vihọ fiki Abraham odibo mẹ.”+ 25 Fikiere ọ tẹ bọ agbada-idhe fihọ etẹe je se odẹ Jihova.+ Aiziki ọ tẹ rọ uwou-udhu riẹ vi etẹe,+ idibo riẹ a tẹ tọ oza fihọ etẹe.

26 Nọ oke jọ o vrẹ no, Abimẹlẹk o te no obọ Gira bru ei ze avọ Ahọzat ọkiroro* ọkpekpe riẹ gbe Faekọl oletu ogbaẹmo riẹ.+ 27 Aiziki ọ tẹ ta kẹ ae nọ: “Fikieme wha rọ nyabru omẹ ze, kpakiyọ wha mukpahe omẹ je le omẹ no okegbe rai?” 28 A tẹ kpahe kẹe nọ: “Ma ruẹ vuhumu vevẹ no inọ Jihova ọ rrọ kugbe owhẹ.+ Fikiere ma tẹ ta nọ, ‘Ivie, joma duwu iyei nọ e rẹ gba omai gbe owhẹ kugbe, re ma re ọvọ kugbe owhẹ+ 29 inọ who ti ru omai oware uyoma ovo ho nwane wọhọ epanọ ma ru owhẹ oware enwoma ovo ho na, keme ewoma ma ru owhẹ nọ ma rọ udhedhẹ ta kẹ owhẹ nọ who no okegbe mai. Whaọ Jihova ọ ghale owhẹ no.’” 30 Kẹsena o te there okpemu kẹ ae, a tẹ re jẹ da. 31 Evaọ ohiohiẹ a tẹ kake kpama a te duwu iyei kẹ ohwohwo.+ Kẹsena Aiziki o te siobọno ai kpo, a te kpo avọ udhedhẹ.

32 Evaọ ẹdẹ yena idibo Aiziki a tẹ nyaze te vuẹe kpahe oza nọ a tọ,+ a tẹ ta kẹe nọ: “Ma ruẹ ame no!” 33 Fikiere o te sei Shaeba. Oyejabọ nọ odẹ okpẹwho na o rọ rrọ Biẹ-shiba+ rite inẹnẹ.

34 Nọ Esọ ọ kpako te ikpe udhuvẹ no, ọ tẹ rehọ Judit ọmọtẹ Bierae ohwo Hit re ọ jọ aye riẹ gbe Basemat ọmọtẹ Ilọn ohwo Hit.+ 35 A jẹ wha uweri ulogbo se Aiziki avọ Rebeka.*+

27 Whaọ nọ Aiziki ọ kpako no nọ ibiaro riẹ i dhe no nọ ọ gbẹ be ruẹ ude he, o te se Esọ+ ọmọzae ọkpako riẹ ọ tẹ ta nọ: “Ọmọzae mẹ!” O te yo nọ: “Mẹ na!” 2 Ọ tẹ ta nọ: “Whaọ mẹ kpako no. Yọ mẹ riẹ ẹdẹ uwhu mẹ hẹ. 3 Fikiere enẹna, ivie rehọ ekwakwa ra, owha-ese ra avọ uze ra, re who kpobọ ẹwọ re who kpe arao ẹwọ jọ se omẹ.+ 4 Who ve there oghẹrẹ emu ọwewere nọ ọ rẹ were omẹ gaga na whọ vẹ wọe se omẹ. Mẹ vẹ re iẹe re mẹ* ruẹse ghale owhẹ taure me te ti whu.”

5 Rekọ Rebeka ọ jẹ gaviezọ okenọ Aiziki ọ jẹ ta ẹme kẹ Esọ ọmọzae riẹ na. Esọ ọ tẹ ruọ otafe o te kpobọ ẹwọ nyai kpe arao ẹwọ ze.+ 6 Rebeka ọ tẹ ta kẹ Jekọp ọmọzae riẹ nọ:+ “Me yo obọnana nọ ọsẹ ra ọ be ta kẹ oniọvo ra Esọ nọ, 7 ‘Nyai kpe arao ẹwọ jọ se omẹ re who there emu ọwewere kẹ omẹ. Mẹ vẹ re iẹe re mẹ ruẹse ghale owhẹ evaọ aro Jihova taure me te ti whu.’+ 8 Obọnana ọmọzae mẹ, gaviezọ ziezi re who ru oware nọ mẹ be te vuẹ owhẹ na.+ 9 Ivie, kpobọ owa erao na re whọ rehọ emọ ewe ivẹ nọ e mai woma no etẹe ze re mẹ rehọ ae there emu ọwewere kẹ ọsẹ ra, nwanọ oghẹrẹ nọ o rẹ were iẹe na. 10 Kẹsena whọ vẹ wọe se ọsẹ ra re ọ re, re ọ ruẹse ghale owhẹ taure o te ti whu.”

11 Jekọp ọ tẹ ta kẹ oni riẹ Rebeka nọ: “Rekọ Esọ oniọvo mẹ o wo eto vọ oma,+ yọ oma mẹ o rrọ rioriorio. 12 Kọ ọsẹ mẹ ọ tẹ rọ obọ rara omẹ oma?+ O vẹ te wọhọ nọ mẹ be rehọ iẹe zaharo, mẹ vẹ te wha ekela se omamẹ viukpọ oghale.”* 13 Oni riẹ ọ tẹ ta kẹe nọ: “Jọ eka kpobi nọ a la owhẹ e jọ uzou mẹ, ọmọzae mẹ. Thakpi ru oware nọ mẹ ta na, nya, rehọ ae se omẹ.”+ 14 Fikiere ọ tẹ nya ọ tẹ rehọ ae se oni riẹ, oni riẹ o te there emu ọwewere, nwanọ oghẹrẹ nọ o rẹ were ọsẹ riẹ. 15 Kẹsena Rebeka ọ tẹ rehọ iwu Esọ ọmọzae ọkpako riẹ enọ e mai woma, nọ o wo evaọ uwou na, o te ku ae họ ọmọzae ọmaha riẹ Jekọp.+ 16 O te fi oviẹ emọ ewe na họ abọ riẹ gbe eria nọ eto e rrọ họ evaọ uriohọ riẹ.+ 17 Ọ tẹ wọ emu ọwewere na gbe ebrẹdi nọ o there na kẹ Jekọp ọmọzae riẹ.+

18 Fikiere ọ tẹ ruọ eva bru ọsẹ riẹ ọ tẹ ta nọ: “Ọsẹ mẹ!” o te yo nọ: “Mẹ rrọ etenẹ! Whẹ ono, ọmọzae mẹ?” 19 Jekọp ọ tẹ ta kẹ ọsẹ riẹ nọ: “Mẹ Esọ ọmọ ọsosuọ ra.+ Me ru epanọ whọ ta kẹ omẹ no. Ivie, kpama keria re whọ re arao ẹwọ mẹ, re whọ* ruẹse ghale omẹ.”+ 20 Kẹsena Aiziki ọ tẹ nọ ọmọzae riẹ nọ: “Ẹvẹ whọ rọ ruẹ e riẹ vẹrẹ ere, ọmọzae mẹ?” O te yo nọ: “Keme Jihova Ọghẹnẹ ra ọ rehọ e riẹ se omẹ.” 21 Aiziki ọ tẹ ta kẹ Jekọp nọ: “Ivie, bi kẹle omẹ, re mẹ rọ obọ rara owhẹ, ọmọzae mẹ, re mẹ riẹ sọ whẹ ginọ Esọ ọmọzae mẹ hayo ọye he.”+ 22 Fikiere Jekọp o te bi kẹle Aiziki ọsẹ riẹ, ọ tẹ rọ obọ rara iẹe, kẹsena ọ tẹ ta nọ: “Urru na urru Jekọp, rekọ abọ na abọ Esọ.”+ 23 O vuhu i rie he keme abọ riẹ ọ jọ etueto wọhọ abọ oniọvo riẹ Esọ. Fikiere ọ tẹ ghale iẹe.+

24 Kẹsena ọ tẹ nọe nọ: “Whẹ ginọ ọmọzae mẹ Esọ?” o te yo nọ: “Mẹ ọye.” 25 Ọ tẹ ta nọ: “Jọ arao ẹwọ na rehọ omojọ se omẹ re mẹ re, ọmọzae mẹ, kẹsena mẹ* vẹ te ghale owhẹ.” Ọ tẹ wọe kẹe ọ tẹ re, ọ tẹ rọ udi* kẹe ọ tẹ da. 26 Aiziki ọsẹ riẹ ọ tẹ ta kẹe nọ: “Bi kẹle omẹ, ivie, re whọ viọlọ omẹ ọmọzae mẹ.”+ 27 Fikiere o te bi kẹle iẹe ọ tẹ viọlọ iẹe, o te se ore iwu riẹ.+ Kẹsena ọ tẹ ghale iẹe ọ tẹ ta nọ:

“Rri, ore ọmọzae mẹ o wọhọ ore otọ nọ Jihova ọ ghale no. 28 Jọ Ọghẹnẹ uzẹme na ọ kẹ owhẹ igrigri obọ ehru* na+ gbe etọ nọ i re wou ekakọ evaọ otọakpọ na+ gbe ugbidigbi ibi ekakọ gbe enwaene ọkpokpọ.+ 29 Jọ ahwo a gbodibo kẹ owhẹ, jọ erẹwho i guzou kpotọ kẹ owhẹ. Jọ olori kẹ inievo ra, jọ emezae oni ra a guzou kpotọ kẹ owhẹ.+ Ekela i te ohwo kpobi nọ ọ la owhẹ eka, jọ oghale u te ohwo kpobi nọ ọ lẹ ẹro eghale kẹ owhẹ.”+

30 Whaọ nọ Aiziki ọ nwane ghale Jekọp no, nọ Jekọp ọ nwane nya no aro Aiziki ọsẹ riẹ no, Esọ oniọvo riẹ o te no ibẹfi ze.+ 31 Ọyomariẹ o te je there emu ọwewere ọ tẹ wọe se ọsẹ riẹ, ọ tẹ ta kẹ ọsẹ riẹ nọ: “Jọ ọsẹ mẹ ọ kpama re ọ re arao ẹwọ ọmọzae riẹ, re whọ* ruẹse ghale omẹ.” 32 Rekọ ọsẹ riẹ Aiziki ọ tẹ nọe nọ: “Whẹ yọ ono?” ọ tẹ ta nọ: “Mẹ yọ ọmọzae ra, ọmọ ọsosuọ ra, Esọ.”+ 33 Aiziki o te muhọ enuhu kpakpakpa, ọ tẹ ta nọ: “Kọ ono o kpe arao ẹwọ nọ ọ wọ se omẹ? Whaọ mẹ re riẹ no taure whọ tẹ nyaze, yọ mẹ ghale riẹ no—yọ oghale na u ti tei obọ hrọ!”

34 Nọ o yo eme ọsẹ riẹ, Esọ o te muhọ ẹviẹ bi kuenu oviẹ bi bruenu ọ tẹ ta kẹ ọsẹ riẹ nọ: “Ghale omẹ, Ee, ghale omẹ re, ọsẹ mẹ!”+ 35 Rekọ ọ tẹ ta nọ: “Oniọvo ra ọ rọ eviẹhọ nyaze re ọ ruẹse rehọ eghale nọ e hae jọ era.” 36 Ọ tẹ ta nọ: “Kọ odẹ nọ a mu kẹe na, Jekọp,* u gbe mu ei oma no, nọ o ro mi omẹ otọ anwọ isiava nana?+ Ọ rehọ ọkwa ọmọ-ọkpako mẹ mi omẹ no,+ whaọ obọnana ọ rehọ oghale mẹ no re!”+ O te fibae nọ: “Kọ whọ nyasiọ oghale ovo ba kẹ omẹ?” 37 Rekọ Aiziki ọ tẹ kpahe kẹ Esọ nọ: “Whaọ mẹ rehọ e riẹ mu olori kẹ owhẹ no,+ yọ mẹ rehọ inievo-emezae riẹ kpobi kẹe no re e jọ idibo riẹ, yọ mẹ rehọ ibi ekakọ gbe enwaene ọkpokpọ kẹe no re ọ rọ kuọ oma.+ Eme ọfa o gbe kiọkọ nọ mẹ rẹ sai ru kẹ owhẹ ọmọzae mẹ?”

38 Esọ ọ tẹ ta kẹ ọsẹ riẹ nọ: “Kọ who gbe wo oghale ọvo dede, ọsẹ mẹ? Ghale omẹ, Ee, ghale omẹ re, ọsẹ mẹ!” Esọ o te bo gaga jẹ va ruọ oviẹ.+ 39 Fikiere ọsẹ riẹ Aiziki ọ tẹ ta kẹe nọ:

“Rri, whọ te rria thabọ no etọ nọ i re wou ekakọ evaọ otọakpọ na, je thabọ no igrigri obọ ehru* na.+ 40 Ọgbọdọ ra whọ te rọ rria,+ yọ whọ te gbodibo kẹ oniọvo ra.+ Rekọ okenọ whọ tẹ rova bẹ no, who ti wiri owhowha riẹ no uriohọ ra.”+

41 Rekọ Esọ o fi egrẹ họ eva kẹ Jekọp fiki oghale nọ ọsẹ riẹ ọ kẹ riẹ,+ yọ Esọ ọ jẹ hae jọ udu riẹ ta nọ: “Edẹ nọ a ti ro weri ọsẹ mẹ e be kẹle.+ Nọ oyena o tẹ vrẹ no, me ve ti kpe Jekọp oniọvo mẹ.” 42 Nọ a vuẹ Rebeka eme nọ ọmọzae ọkpako riẹ Esọ ọ be ta, ọ tẹ nwane ta nọ a se Jekọp ọmọzae ọmaha riẹ ze, ọ tẹ ta kẹe nọ: “Rri! Oniọvo ra Esọ ọ be ma omaa epanọ o re ro kpe owhẹ no re ọ rọ ere ru owhẹ kele.* 43 Whaọ obọnana, ọmọzae mẹ, ru oware nọ mẹ be te ta na. Kpama re whọ dhẹ bru oniọvo-ọmọzae mẹ Leban evaọ obọ Heran.+ 44 Lele iei rria omoke jọ bẹsenọ ofu oniọvo ra o re hrẹ no, 45 bẹsenọ ofu oniọvo ra kpahe owhẹ o re kpotọ nọ oware nọ who ru rie na o rẹ thọrọ iẹe ẹro no. Kẹsena me ve ti vi uwou se owhẹ re whọ nyaze. Fikieme whai aimava wha jẹ va omẹ abọ ẹdẹ ọvo?”

46 Nọ oyena o vrẹ no, Rebeka ọ tẹ jẹ hae ta kẹ Aiziki nọ: “Akpọ ọ vẹso omẹ no fiki emetẹ Hẹt.+ Otẹrọnọ Jekọp ọ jọ udevie emetẹ Hẹt wo aye, wọhọ emetẹ nana, erọ ẹkwotọ na, kọ uzuazọ mẹ u gbe fioka ere na?”+

28 Fikiere Aiziki o te se Jekọp ọ tẹ ghale iẹe ọ tẹ ta kẹe nọ: “Whọ jọ udevie emetẹ Kenan rehọ aye vievie he.+ 2 Kpobọ Padan-eram, obọ uwou Bẹthuẹl ọsẹ oni ra, re whọ jọ obei rehọ aye evaọ udevie emetẹ Leban+ oniọvo-ọmọzae oni ra. 3 Ọghẹnẹ Erumeru na ọ te ghale owhẹ, o ti ru owhẹ vihọ je ru owhẹ bu, yọ who ti zihe ruọ ogbotu ahwo buobu hrọ.+ 4 Yọ ọ te rehọ oghale Abraham kẹ owhẹ,+ te owhẹ te emọ* ra, re whọ rehọ ẹkwotọ nọ whọ be rria wọhọ ọrara na re o jọ ora, onọ Ọghẹnẹ ọ kẹ Abraham no na.”+

5 Fikiere Aiziki o te vi Jekọp vrẹ, ọ tẹ ruọ edhere bi kpobọ Padan-eram, be nyabru Leban ọmọzae Bẹthuẹl ohwo Eram,+ oniọvo-ọmọzae Rebeka,+ oni Jekọp avọ Esọ.

6 Esọ ọ ruẹ nọ Aiziki ọ ghale Jekọp o te je vi ei kpohọ Padan-eram re ọ jọ obei rehọ aye, yọ okenọ ọ jẹ ghale iẹe na ọ ta kẹe nọ: “Whọ jọ udevie emetẹ Kenan rehọ aye he,”+ 7 yọ Jekọp o yoẹme ọsẹ riẹ avọ oni riẹ o te bi kpobọ Padan-eram.+ 8 Kẹsena Esọ o te vuhumu nọ emetẹ Kenan e were ọsẹ riẹ Aiziki hi,+ 9 fikiere Esọ ọ tẹ nyabru Ishmẹl, ọ tẹ rehọ Mehalat ọmọtẹ Ishmẹl ọmọzae Abraham, nọ ọ rrọ oniọvo-ọmọtẹ Nebeyọt, kugbe eyae nọ o wo no vẹre.+

10 Jekọp o te no Biẹ-shiba ọ tẹ ruabọhọ bi kpobọ Heran.+ 11 O te ti te oria jọ, o te ru epanọ ọ rẹ rọ wezẹ etẹe aso yena keme ọre o kiediwi no. Fikiere ọ tẹ jọ usu itho nọ e rrọ etẹe rehọ utho jọ o te fi ei họ re ọ rehọ iẹe tha uzou o te kiẹzẹ etẹe.+ 12 Kẹsena ọ tẹ wezẹ ewezẹ, whaọ rri! a ru istẹpo* fihọ otọakpọ na, nọ u kpehru te obọ idhiwu; yọ ikọ-odhiwu Ọghẹnẹ a be gadiẹ iẹe kpehru jẹ gadiẹ iẹe ziọ otọ.+ 13 Yọ rri! Jihova ọ rrọ obọ ehru riẹ, ọ tẹ ta nọ:

“Mẹ họ Jihova, Ọghẹnẹ Abraham ọsẹ ra gbe Ọghẹnẹ Aiziki.+ Mẹ te rehọ otọ nọ who kiẹzẹ na kẹ owhẹ avọ emọ* ra.+ 14 Emọ* ra a te wọhọ ibi-ẹkpẹ* otọakpọ na hrọ,+ yọ who ti bu vaha ruọ obọ ukiediwo-ọre gbe obọ ovatha-ọre gbe obọ ẹkpẹlobọ ovatha-ọre gbe obọ obọze ovatha-ọre, yọ oghale u ti gine te iviuwou otọ na kpobi* ẹkwoma ra gbe ẹkwoma ọmọ* ra.+ 15 Mẹ rrọ kugbe owhẹ, mẹ te sẹro ra evaọ oria kpobi nọ whọ nya, yọ me ti zihe owhẹ ziọ ẹkwotọ nana.+ Mẹ te nyasiọ owhẹ ba ha bẹsenọ me ti ru oware nọ mẹ ya eyaa riẹ kẹ owhẹ na gba no.”+

16 Kẹsena Jekọp ọ tẹ rọwo no owezẹ ze ọ tẹ ta nọ: “Evaọ uzẹme, Jihova ọ rrọ oria nana, yọ mẹ riẹ hẹ.” 17 Ozọ u te mu ei o te fibae nọ: “Oria nana u mu ọwhewhe kẹhẹ! Ababọ avro, nọ uwou Ọghẹnẹ,+ yọ unuẹthẹ idhiwu ọna.”+ 18 Fikiere Jekọp ọ tẹ kpama evaọ irioke frifri ọ tẹ wọ utho nọ ọ rọ tha uzou na ọ tẹ rehọ iẹe vi wọhọ upila, o te ku ewhri họ ehru riẹ.+ 19 Fikiere o te se odẹ oria na Bẹtẹl,* rekọ vẹre a je se odẹ okpẹwho na Lọz.+

20 Kẹsena Jekọp ọ tẹ ya eyaa nọ: “Otẹrọnọ Ọghẹnẹ ọ te jọ kugbe omẹ jẹ sẹro mẹ evaọ erẹ mẹ na jẹ kẹ omẹ ebrẹdi nọ mẹ rẹ re gbe iwu nọ me re ku họ, 21 me ve je zihe ziọ uwou ọsẹ mẹ gbẹsinẹdẹ, yọ Jihova o gine dhesẹ no inọ ọye họ Ọghẹnẹ mẹ. 22 Yọ utho nana nọ me ro vi wọhọ upila na u ve ti zihe ruọ uwou Ọghẹnẹ,+ yọ mẹ te kẹ owhẹ abọvo abakpe oware kpobi nọ whọ kẹ omẹ hrọ.”

29 Nọ oyena o vrẹ no, Jekọp ọ tẹ ruabọhọ erẹ riẹ o te kpobọ ẹkwotọ ahwo obọ Ovatha-Ọre. 2 Ọ tẹ ruẹ oza jọ evaọ ẹwọ na gbe ewa igodẹ esa nọ i ruẹ fihọ otọ kẹle iẹe, keme oza yena a re jo vo ame kẹ ewa igodẹ na da. Utho ulogbo jọ o jọ unu oza na. 3 Nọ a te koko ewa igodẹ na kpobi họ etẹe no, a ve ghelie utho na no unu oza na a vẹ kẹ igodẹ na ame da, kẹsena a vẹ wariẹ ghelie utho na zihe fihọ unu oza na.

4 Fikiere Jekọp ọ tẹ nọ ae nọ: “Inievo mẹ, bovẹ wha no ze?” a tẹ ta nọ: “Obọ Heran ma no ze.”+ 5 Ọ tẹ nọ ae nọ: “Kọ wha riẹ Leban+ ọmọ-uruọmọ* Nahọ?”+ a tẹ ta nọ: “Ma riẹ riẹ.” 6 Kẹsena ọ tẹ nọ ae nọ: “Kọ ọ sasa?” A te yo nọ: “Ọ sasa. Yọ ọmọtẹ riẹ Reshẹl+ o bi su igodẹ ze na!” 7 Ọ tẹ ta nọ: “O gbẹ rrọ oke uvo. U ri te oke nọ a re ro koko ewa erao na họ họ. Wha kẹ igodẹ na ame, re wha su ae nyae re ẹbe.” 8 A tẹ kpahe nọ: “A kẹ omai uvẹ nọ ma ru ere he bẹsenọ ewa igodẹ na kpobi i re kokohọ no a ve ghelie utho na no unu oza na no. Kẹsena ma vẹ kẹ igodẹ na ame.”

9 Nọ o gbe je lele ae ta ẹme na, Reshẹl o te su igodẹ ọsẹ riẹ ze, keme ọ jọ ọmọtẹ nọ o re su igodẹ. 10 Nọ Jekọp ọ ruẹ Reshẹl, ọmọtẹ Leban nọ ọ rrọ oniọvo-ọmọzae oni riẹ, gbe igodẹ Leban, Jekọp ọ tẹ nwane nya o te ghelie utho na no unu oza na ọ tẹ kẹ igodẹ Leban oniọvo-ọmọzae oni riẹ ame da. 11 Kẹsena Jekọp ọ tẹ viọlọ Reshẹl jẹ kpare urru riẹ muhọ ẹviẹ. 12 Jekọp o te mu Reshẹl họ ẹta kẹ inọ ọye yọ omoni* ọsẹ riẹ gbe nọ ọye yọ ọmọzae Rebeka. Ọ tẹ dhẹ nyae vuẹ ọsẹ riẹ.

13 Nọ Leban+ ọ nwani yo kpahe Jekọp ọmọzae oniọvo-ọmọtẹ riẹ, ọ tẹ dhẹ bru ei. Ọ tẹ gbalọ iẹe jẹ viọlọ iẹe, ọ tẹ rehọ iẹe ziọ uwou riẹ. O te mu Leban eware nana kpobi họ ẹta kẹ. 14 Leban ọ tẹ ta kẹe nọ: “Whẹ ginọ ugbonwa mẹ gbe uwo mẹ.”* Fikiere o te lele iei rria amara soso.

15 Kẹsena Leban ọ tẹ ta kẹ Jekọp nọ: “Fikinọ whẹ yọ omoni* mẹ,+ who ve ru iruo kẹ omẹ ọvọvẹ? Vuẹ omẹ, eme họ osa ra nọ mẹ te hwa owhẹ?”+ 16 Whaọ Leban o wo emetẹ ivẹ. Odẹ ọrọ ọkpako Lia, yọ odẹ ọrọ ọmaha Reshẹl.+ 17 Ibiaro Lia i wo erru hu, rekọ Reshẹl yọ aye nọ o re siuru nọ o wo erru gaga. 18 Whaọ Reshẹl ọ dhẹ ruọ Jekọp oma no, fikiere ọ tẹ ta nọ: “Mẹ gwọlọ nọ mẹ rẹ gbodibo kẹ owhẹ ikpe ihrẹ rọkẹ ọmọtẹ ọmaha ra na Reshẹl.”+ 19 Leban ọ tẹ ta kẹe nọ: “U woma re mẹ rehọ iẹe kẹ owhẹ viukpenọ mẹ rẹ rehọ iẹe kẹ ọzae ọfa. Gbe lele omẹ rria.” 20 Jekọp ọ tẹ gbodibo ikpe ihrẹ fiki Reshẹl,+ rekọ evaọ ibiaro riẹ e jọ wọhọ umutho edẹ jọ ọvo fiki uyoyou nọ o wo kẹe.

21 Kẹsena Jekọp ọ tẹ ta kẹ Leban nọ: “Kẹ omẹ aye mẹ keme edẹ mẹ e gba no, re me lele iei wezẹ.” 22 Fikiere Leban o te se ezae oria na kpobi kokohọ o te ru ehaa. 23 Rekọ evaọ owọwọ, kọ ọmọtẹ riẹ Lia o ro sei re o lele iei wezẹ. 24 Leban ọ tẹ jẹ rehọ Zilpa odibo-ọmọtẹ riẹ kẹ Lia ọmọtẹ riẹ re ọ jọ odibo kẹe.+ 25 Evaọ ohiohiẹ Jekọp ọ tẹ te ruẹ nọ kpakọ Lia! Fikiere ọ tẹ ta kẹ Leban nọ: “Kinọ eme who ru omẹ na? Kọ ogbẹrọnọ Reshẹl mẹ rọ fiki riẹ gbodibo kẹ owhẹ? Fikieme whọ rọ viẹ omẹ họ?”+ 26 Leban ọ tẹ ta nọ: “O rrọ uruemu mai evaọ obonẹ hẹ re ma kake rehọ ọmọtẹ ọmaha kpohọ orọo siọ ọrọ ọkpako ba. 27 Ru ehaa aye nana ẹkpoka nana. Kẹsena mẹ vẹ te rehọ aye ọdekọ na kẹ owhẹ re whọ gbodibo kẹ omẹ ikpe ihrẹ efa.”+ 28 Jekọp o te ru ere, o te ru ehaa aye na ẹkpoka na, kẹsena ọ tẹ rehọ ọmọtẹ riẹ Reshẹl kẹe re ọ jọ aye riẹ. 29 U te no ere no, Leban ọ rehọ Bilha+ odibo-ọmọtẹ riẹ kẹ Reshẹl ọmọtẹ riẹ re ọ jọ odibo kẹe.+

30 Jekọp o te lele Reshẹl wezẹ re, yọ o you Reshẹl vi Lia, ọ tẹ gbodibo kẹ Leban ikpe ihrẹ efa.+ 31 Nọ Jihova ọ ruẹ nọ a you Lia ha,* o te ru nọ o ro dihọ*+ rekọ Reshẹl ọ jọ ọga.+ 32 Fikiere Lia o te dihọ o te yẹ ọmọzae, o te se odẹ riẹ Rubẹn,*+ keme ọ ta nọ: “Fikinọ Jihova ọ ruẹ oja-oriọ mẹ no,+ yọ enẹna ọzae mẹ o ti mu omẹ họ eyou.” 33 Ọ tẹ wariẹ dihọ je yẹ ọmọzae, kẹsena ọ tẹ ta nọ: “Fikinọ Jihova o yo no, keme a you omẹ hẹ, fikiere ọ tẹ wariẹ kẹ omẹ ọnana re.” O te se odẹ riẹ Simiọn.*+ 34 Ọ tẹ jẹ wariẹ di eva ọfa họ o te yẹ ọmọzae, ọ tẹ ta nọ: “Whaọ enẹna ọzae mẹ o ti kuomagbe omẹ, keme me yẹ emezae esa kẹe no.” Fikiere o te se odẹ riẹ Livae.*+ 35 Ọ tẹ jẹ wariẹ dihọ o te yẹ ọmọzae, ọ tẹ ta nọ: “Enẹna me re jiri Jihova.” O te se odẹ riẹ Juda.*+ Kẹsena ọ tẹ seba eyẹ.

30 Nọ Reshẹl ọ ruẹ nọ o ri yẹ ọmọ ọvo kẹ Jekọp ho, ọ tẹ jẹ re oniọvo-ọmọtẹ riẹ ihri je mu Jekọp họ ẹta kẹ nọ: “Kẹ omẹ emọ o gbẹ rrọ ere he me ti whu.” 2 Onana o tẹ lẹliẹ ofu mu Jekọp kpahe Reshẹl, ọ tẹ ta nọ: “Kọ mẹ rrọ ẹta Ọghẹnẹ, ọnọ ọ whaha owhẹ emọ-iyẹ?”* 3 Fikiere ọ tẹ ta nọ: “Odibo-ọmọtẹ mẹ Bilha ọna.+ Lele iei wezẹ re ọ ruẹsi yẹ emọ kẹ omẹ* re mẹ rọ ẹkwoma riẹ wo ẹkẹ emọ mẹ re.” 4 Ọ tẹ rehọ Bilha odibo riẹ kẹe wọhọ aye, Jekọp o te lele iei wezẹ.+ 5 Bilha o te dihọ o te yẹ ọmọzae kẹ Jekọp. 6 Reshẹl ọ tẹ ta nọ: “Ọghẹnẹ o zihe ruọ obruoziẹ mẹ no, ọ tẹ jẹ gaviezọ kẹ urru mẹ no, fikiere ọ tẹ kẹ omẹ ọmọzae.” Oyejabọ nọ o ro se odẹ riẹ Dan.*+ 7 Bilha odibo Reshẹl ọ tẹ wariẹ dihọ o te yẹ ọmọzae avọ ivẹ kẹ Jekọp. 8 Kẹsena Reshẹl ọ tẹ ta nọ: “Me lele oniọvo-ọmọtẹ mẹ muabọ gaga no. Yọ me fi kparobọ no re!” Fikiere o te se odẹ riẹ Naftalae.*+

9 Nọ Lia ọ ruẹ nọ ọ siọ emọ ba eyẹ no, ọ tẹ rehọ Zilpa odibo riẹ kẹ Jekọp wọhọ aye.+ 10 Zilpa odibo Lia o te yẹ ọmọzae kẹ Jekọp. 11 Lia ọ tẹ ta nọ: “Eware i woma kẹ omẹ no!” Fikiere o te se odẹ riẹ Gad.*+ 12 Oyena o vrẹ no, Zilpa odibo Lia o te yẹ ọmọzae avọ ivẹ kẹ Jekọp. 13 Kẹsena Lia ọ tẹ ta nọ: “Evewerọ mẹ! Keme emetẹ na a ti se omẹ ọnọ o wo evawere.”+ Fikiere o te se odẹ riẹ Asha.*+

14 Whaọ nọ Rubẹn+ ọ jẹ nya evaọ oke ivuẹvu iwhiti, ọ tẹ ruẹ ibi emandreki evaọ obọ ẹwọ. Ọ tẹ rehọ ae se Lia oni riẹ. Reshẹl ọ tẹ ta kẹ Lia nọ: “Ivie, jọ ibi emandreki ọmọzae ra kẹ omẹ omojọ.” 15 Ọ tẹ ta kẹe nọ: “Kọ ọzae mẹ nọ who mi omẹ u ri te?+ Whọ be te jẹ rehọ emandreki ọmọzae mẹ re?” Fikiere Reshẹl ọ tẹ ta nọ: “U woma. O ti lele owhẹ wezẹ aso inẹnẹ re o jọ osa emandreki ọmọzae ra.”

16 Nọ Jekọp o je no obọ ẹwọ ze evaọ owọwọ, Lia ọ tẹ nyai zere iei ọ tẹ ta nọ: “Mẹ who ti lele wezẹ, keme mẹ rehọ emandreki ọmọzae mẹ dẹ owhẹ no.” Fikiere o te lele iei wezẹ aso yena. 17 Ọghẹnẹ o te yo jẹ kẹ Lia uyo, o te dihọ o te yẹ ọmọzae avọ isoi kẹ Jekọp. 18 Lia ọ tẹ ta nọ: “Ọghẹnẹ ọ kẹ omẹ osa mẹ* no keme mẹ rehọ odibo mẹ kẹ ọzae mẹ.” Fikiere o te se odẹ riẹ Isaka.*+ 19 Lia ọ tẹ wariẹ dihọ o te yẹ ọmọzae avọ ezeza kẹ Jekọp.+ 20 Lia ọ tẹ ta nọ: “Ọghẹnẹ o bru ọghọ họ omẹ oma no, ẹhẹ, o bru emamọ ọghọ họ omẹ oma no. Enẹna ọzae mẹ o ti rri omẹ ovao,+ keme me yẹ emezae ezeza kẹe no.”+ Fikiere o te se odẹ riẹ Zẹbulọn.*+ 21 Nọ oke jọ o vrẹ no o te yẹ ọmọtẹ o te se odẹ riẹ Daena.+

22 Uwhremu na Ọghẹnẹ ọ tẹ kareghẹhọ Reshẹl, Ọghẹnẹ o te yo jẹ kẹe uyo nọ o ro ru re o dihọ.*+ 23 O te dihọ o te yẹ ọmọzae. Ọ tẹ ta nọ: “Ọghẹnẹ o si ẹpoviẹ mẹ no!”+ 24 Fikiere o te se odẹ riẹ Josẹf,*+ inọ: “Jihova o bi fi ọmọzae ọfa ba kẹ omẹ.”

25 Nọ Reshẹl o yẹ Josẹf no, Jekọp ọ tẹ nwane ta kẹ Leban nọ: “Siobọno omẹ re me kpobọ ẹwho mẹ gbe ẹkwotọ mẹ.+ 26 Rehọ eyae mẹ gbe emọ mẹ kẹ omẹ, enọ mẹ rọ fiki rai gbodibo kẹ owhẹ na re me kpo, keme whọ riẹ epanọ mẹ gbodibo kẹ owhẹ te.”+ 27 Leban ọ tẹ ta kẹe nọ: “Ivie rri omẹ aro,—keme mẹ rọ ẹkwoma ẹta ruẹ* no inọ Jihova ọ be ghale omẹ fiki ra.” 28 O te fibae nọ: “Vuẹ omẹ osohwa ra, mẹ te rehọ iẹe kẹ owhẹ.”+ 29 Fikiere Jekọp ọ tẹ ta kẹe nọ: “Whọ riẹ epanọ mẹ gbodibo kẹ owhẹ te gbe epanọ owa erao ra o jọ evaọ obọ mẹ;+ 30 erao ra i tulo ho re mẹ tẹ te nyaze, rekọ owa erao ra u bu je vihọ no, yọ Jihova ọ ghale owhẹ no anwẹnọ mẹ rọ nyaze na. Kọ oke vẹ me ti ro ru orọ uwou obọmẹ?”+

31 Kẹsena ọ tẹ ta nọ: “Eme mẹ rẹ kẹ owhẹ?” Jekọp ọ tẹ ta nọ: “Whọ kẹ omẹ oware ovo ho! Otẹrọnọ who re ru oware ovo nana kẹ omẹ, mẹ te wariẹ mu uthuru erao ra họ esu jẹ sẹro riẹ.+ 32 Mẹ te nya udevie uthuru erao ra soso vrẹ nẹnẹ na. Jọ usu rai salọ ogodẹ kpobi nọ ọ rrọ ipipe jẹ rrọ keri keri gbe ogodẹ kpobi nọ ọ rrọ wawae evaọ udevie imigbo na gbe ọnọ ọ rrọ keri keri jẹ rrọ ipipe evaọ udevie ewe eyae na. No umuo enẹna vrẹ, enana e rẹ jọ osohwa mẹ.+ 33 Ẹrẹreokie* mẹ o ve ti se isẹri kẹ omẹ evaọ ẹdẹ obaro nọ whọ tẹ nyaze ti rri enọ whọ rọ hwosa kẹ omẹ na; ọnọ ọ rrọ ipipe he jẹ rrọ keri keri hi evaọ udevie ewe eyae na kpobi gbe ọnọ ọ rrọ wawae he evaọ udevie imigbo na nọ whọ jọ obọ mẹ ruẹ, koyehọ etho me tho rie.”

34 Leban ọ tẹ kpahe fihọ iẹe nọ: “U woma ere! Jọ o jọ epanọ whọ ta na.”+ 35 Evaọ ẹdẹ yena, ọ tẹ hẹriẹ ikri nọ oma rai u si isi jẹ rrọ keri keri gbe ewe eyae kpobi nọ e rrọ ipipe jẹ rrọ keri keri fihọ oria sa, ọnọ o wo epe ọfuafo kpobi gbe ọnọ ọ rrọ wawae kpobi evaọ udevie imigbo na, ọ tẹ rehọ ae kẹ emezae riẹ re a rẹrote ai. 36 Kẹsena ọ tẹ hẹriẹ oma no Jekọp thabọ te ugbo nọ a rẹ nya edẹ esa, yọ Jekọp o bi su uthuru erao Leban nọ i kiọkọ.

37 Jekọp ọ tẹ nawo imire ure storas, ure almọnd, gbe ure pleni, ọ tẹ kare imire na godogodo re ipe efuafo e jọ imire na nọ i re kpefihọ. 38 Kẹsena o te fi imire nọ ọ kare na fihọ aro uthuru erao na, evaọ egọdọ na, evaọ ido ame nọ ithuru na e rẹ nyaze te jọ da ame na, re oma o ruẹse kpare ae evaọ aro imire na nọ a tẹ nyaze te da ame.

39 Fikiere oma o jẹ kpare erao na evaọ aro imire na, erao na i te je yẹ emọ nọ oma rai u si isi, nọ e rrọ ipipe, jẹ rrọ keri keri. 40 Kẹsena Jekọp ọ tẹ hẹriẹ imigbo na, ọ tẹ kpọ ovao ithuru na rri enọ oma rai u si isi gbe enọ e rrọ wawae kpobi evaọ ithuru Leban. Kẹsena ọ tẹ hẹriẹ ithuru obọriẹ no, o ku rai kugbe ithuru Leban he. 41 Yọ oke kpobi nọ oma o rẹ rọ kpare erao epoporiẹ na, Jekọp o ve fi imire na họ egọdọ na evaọ aro ithuru na, re oma o ruẹse kpare ae evaọ aro imire na. 42 Rekọ o tẹ rrọ erao iririlo, o re fi imire na họ etẹe he. Fikiere iririlo na e vẹ be jọ erọ Leban, rekọ epoporiẹ na e vẹ be jọ erọ Jekọp.+

43 Ọzae na o te ti fe gaga, o te wo ithuru erao buobu gbe idibo-emezae avọ idibo-emetẹ gbe ekamẹle gbe eketekete buobu.+

31 Nọ oke o be nyaharo na o te yo ẹme nọ emezae Leban a be ta inọ: “Jekọp ọ rehọ eware kpobi nọ ọsẹ mai o wo no, eware ọsẹ mai o ro fe efe nana kpobi na.”+ 2 Nọ Jekọp o te rri ovao Leban, ọ jẹ ruẹ nọ uruemu riẹ kpahe iẹe o gbẹ wọhọ epaọ ọsosuọ họ.+ 3 Ukuhọ riẹ Jihova ọ tẹ ta kẹ Jekọp nọ: “Zihe kpohọ ẹkwotọ esẹ ra gbe imoni ra,+ yọ mẹ te jọ kugbe owhẹ.” 4 Kẹsena Jekọp o te vi uwou se Reshẹl avọ Lia inọ a nyaze obọ ẹwọ, ziọ obọ uthuru erao riẹ, 5 ọ tẹ ta kẹ ae nọ:

“Mẹ ruẹ nọ uruemu ọsẹ rai kpahe omẹ u nwene no,+ rekọ Ọghẹnẹ ọsẹ mẹ ọ rrọ kugbe omẹ ẹsikpobi.+ 6 Whai omarai wha riẹ vevẹ inọ mẹ rehọ ogaga mẹ kpobi gbodibo kẹ ọsẹ rai.+ 7 Rekọ ọsẹ rai ọ jẹ gwọlọ epanọ ọ rẹ rọ wha omẹ re, yọ o nwene osa mẹ isia ikpe; rekọ Ọghẹnẹ ọ re kẹe uvẹ re o ru omẹ oware uyoma ha. 8 Nọ ọ tẹ ta nọ, ‘Enọ e rrọ ipipe na e rẹ jọ osa ra,’ uthuru erao na soso u ve yẹ enọ e rrọ ipipe; rekọ nọ ọ jẹ ta nọ, ‘Enọ oma rai u si isi na e rẹ jọ osa ra,’ uthuru erao na soso u ve yẹ enọ oma rai u si isi.+ 9 Fikiere Ọghẹnẹ ọ tẹ jẹ rehọ uthuru erao ọsẹ ra mi ei jẹ be rehọ ae kẹ omẹ. 10 Oke jọ nọ oma o jẹ kpare erao na, mẹ tẹ jọ ewezẹ kpare aro mẹ, mẹ tẹ ruẹ nọ oma ikri nọ e be gba erao nọ e rrọ uthuru na u si isi, o rrọ ipipe, jẹ rrọ keri keri.+ 11 Kẹsena ukọ-odhiwu Ọghẹnẹ uzẹme na o te se omẹ evaọ ewezẹ na inọ, ‘Jekọp!’ me te yo nọ, ‘Mẹ na.’ 12 Ọ tẹ ta nọ, ‘Ivie kpare aro ra, rri, oma ikri kpobi nọ e be gba erao nọ e rrọ uthuru na u si isi, o rrọ ipipe, jẹ rrọ keri keri, keme mẹ ruẹ eware kpobi nọ Leban o bi ru owhẹ no.+ 13 Mẹ họ Ọghẹnẹ uzẹme na ọrọ Bẹtẹl,+ oria nọ whọ jọ ku ewhri họ upila, oria nọ whọ jọ ya eyaa kẹ omẹ.+ Whaọ enẹna kpama, no ẹkwotọ nana, re who zihe kpobọ ẹkwotọ nọ a jọ yẹ owhẹ.’”+

14 Kẹsena Reshẹl avọ Lia a tẹ ta kẹe nọ: “Kọ oware jọ u gbe kiọkọ kẹ omai evaọ uwou ọsẹ mai nọ ma te rọ reuku? 15 Kọ ọ gbẹ rehọ omai wọhọ erara, nọ orọnọ ọ zẹ omai no na jẹ be re igho nọ a hwa fihọ omai na?+ 16 Efe kpobi nọ Ọghẹnẹ ọ rehọ mi ọsẹ mai yọ ọmai gbe ọrọ emọ mai.+ Fikiere ru oware kpobi nọ Ọghẹnẹ ọ ta kẹ owhẹ nọ who ru.”+

17 Kẹsena Jekọp ọ tẹ kpama, ọ tẹ wọ emọ riẹ gbe eyae riẹ fihọ ehru ekamẹle,+ 18 o te mu owa erao riẹ kpobi họ esu vrẹ gbe eyero kpobi nọ o kokohọ,+ uthuru riẹ nọ o wo no evaọ Padan-eram, re o kpo bru ọsẹ riẹ Aiziki evaọ obọ otọ Kenan.+

19 Whaọ Leban ọ nyai bru eto igodẹ riẹ, Reshẹl o te tho emema tẹrafim*+ ọsẹ riẹ.+ 20 U te no ere no, Jekọp o ru Leban ohwo Eram na ẹghẹ, keme ọ vuẹ riẹ nọ ọ be te dhẹ hẹ. 21 Rekọ ọ tẹ dhẹ jẹ fa Ethẹ* na vrẹ,+ ọyomariẹ avọ eware nọ o wo kpobi. Ọ tẹ rọ ovao rri ubrotọ igbehru obọ Giliad.+ 22 Evaọ ẹdẹ avọ esa a tẹ vuẹ Leban nọ Jekọp ọ dhẹ no. 23 Fikiere ọ tẹ rehọ inievo-emezae* riẹ kugbe oma o te lei evaọ ugbo nọ o rẹ rehọ edẹ ihrẹ, kẹsena o te lei mu evaọ ubrotọ igbehru obọ Giliad. 24 Kẹsena Ọghẹnẹ ọ tẹ romavia kẹ Leban ohwo Eram+ na evaọ ewezẹ evaọ aso,+ ọ tẹ ta kẹe nọ: “Yọroma kpahe ẹme nọ whọ rẹ ta kẹ Jekọp, te owoma hayo oyoma.”*+

25 Fikiere Leban ọ tẹ nyabru Jekọp, oke yena yọ Jekọp ọ rọ uwou-udhu riẹ vi ugbehru yọ Leban avọ inievo-emezae riẹ a wohọ ubrotọ igbehru Giliad. 26 Kẹsena Leban ọ tẹ ta kẹ Jekọp nọ: “Kinọ eme who ru na? Fikieme whọ rọ jiroro nọ who re ru omẹ ẹghẹ nọ whọ rọ wọ emetẹ mẹ vrẹ wọhọ ahwo nọ a rọ egbọdọ mu bi kpohọ igbo? 27 Fikieme whọ rọ lẹlẹ dhẹ nọ who ro ru omẹ ẹghẹ, nọ whọ gbẹ rọ vuẹ omẹ hẹ? Orọnọ whọ vuẹ omẹ, mẹ hae te rehọ oghọghọ avọ ile gbe ojẹjẹ gbe akpata ro ru ehaa ukpo kẹ owhẹ. 28 Rekọ whọ kẹ omẹ uvẹ re mẹ viọlọ emọ-iruọmọ* mẹ gbe emetẹ mẹ hẹ. Oware ugheghẹ who ru na. 29 Me wo ogaga nọ mẹ sai ro ru owhẹ oware uyoma, rekọ Ọghẹnẹ ọsẹ ra ọ ta kẹ omẹ aso nọ ọ vrẹ na nọ, ‘Yọroma kpahe ẹme nọ whọ rẹ ta kẹ Jekọp, re o gbẹ jọ oyoma ha rekọ owoma.’+ 30 Whaọ who bi kpo keme urru epanọ who re ro zihe kpobọ uwou ọsẹ ra u bi si owhẹ anwẹdẹ, rekọ fikieme who ro tho edhọ mẹ?”+

31 Jekọp o te yo kẹ Leban nọ: “Keme ozọ u je mu omẹ, keme mẹ ta kẹ omamẹ nọ, ‘Ẹsejọhọ whọ te rọ ogaga mi omẹ emetẹ ra.’ 32 Ohwo kpobi nọ whọ jọ obọ riẹ ruẹ edhọ ra o re whu. Jọ iraro inievo mai kiẹ eware mẹ, re whọ rehọ onọ o rrọ ora.” Rekọ Jekọp ọ riẹ nọ Reshẹl o tho rai hi. 33 Fikiere Leban ọ tẹ ruọ eva uwou-udhu Jekọp gbe eva uwou-udhu Lia gbe eva uwou-udhu idibo-emetẹ ivẹ na,+ rekọ ọ ruẹ e rai hi. Kẹsena o te no eva uwou-udhu Lia ze ọ tẹ ruọ eva uwou-udhu Reshẹl. 34 Evaọ oke yena yọ Reshẹl ọ tọlọ emema tẹrafim na no o te fi ai họ eva ekete eyae na nọ a rẹ wọ fihọ ehru ekamẹle, ọ tẹ keria ehru rai. Leban ọ tẹ gwọlọ eva uwou-udhu na soso rekọ ọ ruẹ e rai hi. 35 Kẹsena ọ tẹ ta kẹ ọsẹ riẹ nọ: “Eva e dha owhẹ hẹ, olori mẹ, keme mẹ te sae kpama kẹ owhẹ hẹ keme oware nọ u re ru eyae na u bi ru omẹ.”+ Fikiere ọ tẹ romatotọ gwọlọ vrẹ rekọ ọ ruẹ emema tẹrafim na ha.+

36 Fikiere eva e tẹ dha Jekọp o te mu Leban họ ẹfo. Jekọp ọ tẹ ta kẹ Leban nọ: “Eme me ru thọ, uzi vẹ mẹ thọ nọ who bi ro le omẹ kiti kiti na? 37 Whaọ nọ whọ kiẹ eware mẹ kpobi no na, oware uwou ra vẹ whọ ruẹ? Fi ei họ etenẹ evaọ aro inievo ra gbe inievo mẹ, re a bruoziẹ mẹ avọ owhẹ. 38 Anwọ ikpe udhe nana nọ mẹ rọ rrọ kugbe owhẹ na, eva i no igodẹ ra gbe ewe ra ẹdẹvo ho,+ yọ mẹ re igbo nọ e rrọ uthuru erao ra ẹdẹvo ho. 39 Mẹ rehọ arao ọvo nọ erao ijihẹ e za se owhẹ hẹ.+ O tẹ via ere mẹ rẹ hwae. Te aso a tho arao na hayo uvo a tho rie, whọ rẹ vuẹ omẹ nọ mẹ hwae. 40 Evaọ oke uvo, ẹrrorro uvo ọ rẹ mahe omẹ oma, evaọ aso kọ ekpahe, yọ mẹ jẹ rọ owezẹ te ẹro ho.+ 41 Anwọ ikpe udhe ena nọ mẹ rọ rrọ uwou ra na. Mẹ gbodibo kẹ owhẹ ikpe ikpegbene rọkẹ emetẹ ivẹ ra gbe ikpe ezeza rọkẹ uthuru erao ra, yọ who nwene osa mẹ isia ikpe.+ 42 Ọghẹnẹ ọsẹ mẹ,+ Ọghẹnẹ Abraham gbe Ọnọ Aiziki ọ be dhozọ riẹ*+ ọ gbẹ rrọ abọ mẹ hẹ, ababọ whọ hai ro vi omẹ kpo. Ọghẹnẹ ọ ruẹ oja-oriọ mẹ gbe iruo egaga abọ mẹ, oyejabọ nọ ọ rọ whọku owhẹ aso nọ ọ vrẹ na.”+

43 Kẹsena Leban ọ tẹ kpahe kẹ Jekọp nọ: “Emetẹ na emetẹ mẹ, emọ na emọ mẹ, uthuru erao na uthuru mẹ, yọ eware kpobi nọ who bi rri na emẹ gbe erọ emetẹ mẹ. Oware uyoma vẹ mẹ rẹ sai ru enana gbe emọ rai nọ a yẹ? 44 Fikiere nyaze re ma re ọvọ, mẹ avọ owhẹ, re o jọ isẹri evaọ udevie mẹ avọ owhẹ.” 45 Fikiere Jekọp ọ tẹ wọ utho ọ tẹ rehọ iẹe vi wọhọ upila.+ 46 Kẹsena Jekọp ọ tẹ ta kẹ inievo riẹ nọ: “Wha wọ itho ze!” Fikiere a tẹ wọ itho kokohọ dudurudu. Kẹsena a tẹ jọ evaọ etẹe re emu evaọ ehru itho nọ a wọ kokohọ dudurudu na. 47 Leban o te mu ei họ ese Jiga-sahaduta,* rekọ Jekọp o se rie Galiẹd.*

48 Kẹsena Leban ọ tẹ ta nọ: “Ẹre-itho nana yọ isẹri evaọ udevie mẹ avọ owhẹ nẹnẹ na.” Oyejabọ nọ o ro sei Galiẹd,+ 49 gbe Uwou-Eroro na, keme ọ ta nọ: “Jọ Jihova o rou omẹ avọ owhẹ evaọ okenọ ma be ruẹ ohwohwo ho. 50 Whọ tẹ rọ oja re emetẹ mẹ hayo nọ who te mu eyae efa họ ẹrehọ tu emetẹ mẹ, dede nọ ohwo ọvo ọ rrọ kugbe omai hi, kareghẹhọ nọ Ọghẹnẹ ọ te jọ isẹi evaọ udevie mẹ avọ owhẹ.” 51 Leban ọ tẹ gbẹ ta kẹ Jekọp nọ: “Ẹre-itho na ọna ọ rrọ etenẹ na, yọ upila nọ me ru fihọ udevie mẹ avọ owhẹ ọna ọ rrọ etenẹ na. 52 Ẹre-itho nana yọ isẹri, yọ upila na yọ oware nọ u ti se isẹri,+ inọ mẹ rẹ nyavrẹ ẹre-itho nana ti ru owhẹ oware uyoma ha, yọ whọ rẹ nyavrẹ ẹre-itho nana gbe upila nana ti ru omẹ oware uyoma ha. 53 Jọ Ọghẹnẹ Abraham+ gbe Ọghẹnẹ Nahọ gbe Ọghẹnẹ ọsẹ rai o bruoziẹ mẹ avọ owhẹ.” Jekọp ọ tẹ rọ Ọnọ ọsẹ riẹ Aiziki ọ be dhozọ riẹ* duwu iyei.+

54 Nọ oyena o vrẹ no, Jekọp o te dhe idhe evaọ ehru ugbehru na, o te zizie inievo riẹ re a re ebrẹdi. Fikiere a tẹ re jẹ wezẹ ehru ugbehru na asohẹrioke. 55 Leban ọ tẹ kpama evaọ irioke frifri ọ tẹ viọlọ emọ-iruọmọ* riẹ+ gbe emetẹ riẹ jẹ ghale ai.+ Kẹsena Leban ọ tẹ ruọ edhere bi zihe kpo.+

32 Kẹsena Jekọp ọ tẹ ruabọhọ onya riẹ, ikọ-odhiwu Ọghẹnẹ a tẹ nyaku ei. 2 Nọ ọ nwane ruẹ e rai, Jekọp ọ tẹ ta nọ: “Etenẹ na yọ evuẹ Ọghẹnẹ!” Fikiere o te se odẹ oria yena Mehaneyẹm.*

3 Kẹsena Jekọp o te vi enyukọ karo bru Esọ oniọvo riẹ evaọ ẹkwotọ Siya,+ ẹkwotọ* Edọm,+ 4 ọ tẹ kpokpa họ ae obọ nọ: “Enẹ wha rẹ ta kẹ olori mẹ Esọ, ‘Enẹ odibo ra Jekọp ọ ta: “Me lele Leban rria* oke krẹkri no rite enẹna.+ 5 Yọ me wo iruẹ ezae, eketekete, igodẹ, gbe idibo-emezae avọ idibo-emetẹ,+ yọ me bi vi uwou nana re mẹ rọ jọ olori mẹ riẹ, re who rri omẹ aro.”’”

6 Nọ oke jọ o vrẹ no, enyukọ na a te zihe bru Jekọp ze, a tẹ ta nọ: “Ma ruẹ oniọvo ra Esọ, yọ obọnana ọ rrọ edhere be nyabru owhẹ ze, yọ ezae egba ene (400) e rrọ kugbei.”+ 7 Ozọ u te mu Jekọp gaga ọ tẹ be ruawa.+ Fikiere ọ tẹ ghale ahwo nọ a jọ kugbei na, ithuru na, iruẹ na, gbe ekamẹle na fihọ ivuẹ ivẹ. 8 Ọ ta nọ: “Otẹrọnọ Esọ ọ wọ ohọre ruọ evuẹ jọ, evuẹ nọ o kiọkọ ọ vẹ sae vabọ.”

9 Kẹsena Jekọp ọ tẹ ta nọ: “O Ọghẹnẹ ọsẹ mẹ Abraham gbe Ọghẹnẹ ọsẹ mẹ Aiziki, O Jihova, whẹ ọnọ ọ be ta kẹ omẹ nọ, ‘Zihe kpobọ ẹkwotọ ra gbe imoni ra, me ti ru eware woma kẹ owhẹ,’+ 10 me te ohwo nọ who re dhesẹ uyoyou nọ o rẹ hiẹ hẹ nana kpobi gbe ọtẹruo nana kpobi kẹ hẹ, onọ who dhesẹ kẹ odibo ra na,+ keme ọkpọ mẹ ọvo mẹ rọ fa Jọdan nana vrẹ rekọ obọnana me zihe ruọ ivuẹ* ivẹ no.+ 11 Mẹ lẹ owhẹ, siwi omẹ+ no obọ oniọvo mẹ Esọ, keme ozọ riẹ u bi mu omẹ inọ ọ sae nyaze te họre omẹ,+ te iniemọ na avọ emọ rai. 12 Yọ whọ ta nọ: ‘Me ti ru eware woma kẹ owhẹ hrọ, yọ me ti ru emọ* ra bu wọhọ uwẹkpẹ abade nọ u bu vi ekele.’”+

13 Ọ tẹ jọ etẹe aso yena. Ọ tẹ rehọ eware riẹ jọ re ọ rọ kẹ Esọ oniọvo riẹ okẹ:+ 14 Ewe eyae egba ivẹ (200), ikri udhe, igodẹ eyae egba ivẹ (200), igbo udhe, 15 ekamẹle ọgba nọ i wo emọ, iruẹ eyae udhuvẹ, iruẹ ezae ikpe, eketekete eyae udhe gbe eketekete ezae ilogbo ikpe.+

16 Ọ tẹ rehọ ae kẹ idibo riẹ, uthuru ọvuọvo unọjọ utọjọ, ọ tẹ ta kẹ idibo riẹ nọ: “Wha fa vrẹ karo kẹ omẹ, yọ wha rẹ ruẹ nọ ẹko uthuru ọvuọvo ọ hẹrioma thabọ no ọdekọ.” 17 Ọ tẹ jẹ kpokpa họ ọrọ ọsosuọ obọ nọ: “Otẹrọnọ Esọ oniọvo mẹ o zere owhẹ jẹ nọ inọ, ‘Ono họ olori ra, yọ bovẹ whọ be nya, gbe ono o wo enana nọ e rrọ aro ra na?’ 18 whọ vẹ ta nọ, ‘Erọ odibo ra Jekọp. Anọ enana yọ okẹ nọ o ro se olori mẹ, Esọ,+ yọ rri! ọyomariẹ ọ rrọ obemu mai re.’” 19 Ọ tẹ jẹ kpokpa họ ọrọ avọ ivẹ obọ, gbe ọrọ avọ esa, gbe enọ i bi lele ithuru na kpobi obọ nọ: “Ẹme nana wha rẹ ta kẹ Esọ nọ wha te zere iei. 20 Yọ wha rẹ jẹ ta nọ, ‘Odibo ra Jekọp ọ rrọ obemu mai.’” Keme ọ ta kẹ omariẹ nọ: ‘Otẹrọnọ me vi okẹ karo sei re me ro kie ofu riẹ,+ nọ ọ jẹ te ruẹ omẹ, ẹsejọhọ o ti dede omẹ rehọ.’ 21 Fikiere a tẹ fa eware okẹ na vrẹ karo kẹe, rekọ ọyomariẹ ọ tẹ jọ evuẹ na aso yena.

22 Kẹsena evaọ aso yena, ọ tẹ kpama ọ tẹ rehọ eyae ivẹ riẹ+ gbe idibo-emetẹ ivẹ riẹ+ gbe emezae esese ikpegbọvo riẹ, ọ tẹ fa oria okpakpafua Jabọk na vrẹ.+ 23 Ọ tẹ rehọ ae fa oko-ame* na vrẹ, ọ tẹ jẹ rehọ eware kpobi nọ o wo fa vrẹ re.

24 Ukuhọ riẹ Jekọp ọvo ọ tẹ jọ oria. Kẹsena ọzae jọ o te mu ei họ elele muabọ bẹsenọ oke o rọ ke.+ 25 Nọ ọ ruẹ nọ ọ sai fi ei kparobọ họ, ọ tẹ rọ obọ te ẹzo ọthọ riẹ; ọthọ Jekọp o te no ẹta evaọ okenọ o je lele iei muabọ na.+ 26 Kẹsena ọ tẹ ta nọ: “Siobọno omẹ mẹ nyavrẹ, keme oke u muhọ ẹke no.” Rekọ ọ tẹ ta kẹe nọ: “Me ti siobọno owhẹ nyavrẹ hẹ bẹsenọ whọ rẹ ghale omẹ.”+ 27 Fikiere ọ tẹ nọe nọ: “Didi odẹ ra?” ọ tẹ ta nọ: “Jekọp.” 28 Kẹsena ọ tẹ ta nọ: “Odẹ ra o gbẹ te jọ Jekọp ho rekọ Izrẹl,*+ keme who lele Ọghẹnẹ gbe ahwo muabọ,+ yọ who fi kparobọ no.” 29 Jekọp omariẹ ọ tẹ ta kẹe nọ: “Ivie, se odẹ ra kẹ omẹ.” Rekọ ọ tẹ ta nọ: “Fikieme whọ be rọ nọ onọ odẹ mẹ?”+ Kẹsena ọ tẹ ghale iẹe evaọ etẹe. 30 Fikiere Jekọp o te se odẹ oria na Pẹnayẹl,*+ keme ọ ta nọ, “Mẹ ruẹ Ọghẹnẹ ovao dhe ovao, ghele na a nyasiọ omẹ* ba uzuazọ.”*+

31 Ọre ọ tẹ va ze nọ ọ nwane nyavrẹ Pẹnuẹl* no, rekọ ọ jẹ nya segbe segbe fiki ọthọ riẹ.+ 32 Oyejabọ nọ rite inẹnẹ na o gbẹ rrọ uruemu emezae Izrẹl he na re a re uriẹ ekpokpowọ, onọ o rrọ ẹzo ọthọ na, keme ọ rọ obọ te ẹzo ọthọ Jekọp evaọ oria uriẹ ekpokpowọ na.

33 Whaọ nọ Jekọp ọ kpare ovao riẹ ọ tẹ ruẹ Esọ nọ ọ be nyaze, yọ ezae egba ene (400) e rrọ kugbei.+ Fikiere ọ tẹ ghale emọ na kẹ Lia, Reshẹl, gbe idibo-emetẹ ivẹ na.+ 2 O te fi idibo-emetẹ na avọ emọ rai họ obaro,+ o te fi Lia avọ emọ riẹ kẹle ae,+ o te fi Reshẹl+ avọ Josẹf họ emu rai. 3 Kẹsena ọyomariẹ ọ tẹ nya kpobọ aro rai je kigwẹ rọ uzou te otọ isiahrẹ nọ ọ be nya kẹle oniọvo riẹ na.

4 Rekọ Esọ ọ tẹ dhẹ bru ei, ọ tẹ gbalọ iẹe jẹ viọlọ iẹe, a tẹ va ruọ oviẹ. 5 Nọ ọ kpare ovao riẹ jẹ ruẹ eyae na avọ emọ na, ọ tẹ nọ nọ: “Enana nọ e rrọ kugbe owhẹ na yọ amono?” ọ tẹ ta nọ: “Emọ nọ Ọghẹnẹ ọ rọ ghale odibo ra.”+ 6 Kẹsena idibo-emetẹ na a tẹ nyaze avọ emọ rai a te guzou kpotọ, 7 Lia omariẹ ọ tẹ nyaze avọ emọ riẹ, a te guzou kpotọ. Kẹsena Josẹf ọ tẹ nyaze avọ Reshẹl, a te guzou kpotọ.+

8 Esọ ọ tẹ nọ nọ: “Eme itu ahwo nana kpobi nọ mẹ nyaku evaọ edhere na e rrọ kẹ?”+ O te yo nọ: “Re olori mẹ ọ ruẹsi rri omẹ aro.”+ 9 Kẹsena Esọ ọ tẹ ta nọ: “Oniọvo mẹ, me wo eware buobu gbidi gbidi.+ Rehọ eware ra.” 10 Rekọ Jekọp ọ tẹ ta nọ: “Ijo, ivie. Otẹrọnọ who rri omẹ aro, who re mi omẹ okẹ mẹ na no obọ hrọ, keme mẹ rehọ e rai ze re mẹ sae ruẹ ovao ra. Yọ ovao ra nọ mẹ ruẹ na o wọhọ ẹsenọ mẹ be ruẹ ovao Ọghẹnẹ, keme whọ rehọ evawere dede omẹ rehọ.+ 11 Ivie rehọ okẹ oghale mẹ nọ a ro se owhẹ na,+ keme Ọghẹnẹ ọ ghale omẹ no yọ me wo oware kpobi nọ mẹ gwọlọ.”+ Ọ tẹ jẹ tẹzẹ iẹe re ọ rehọ ae, fikiere ọ tẹ rehọ ae.

12 Uwhremu na Esọ ọ tẹ ta nọ: “Joma ruọ edhere re ma nya, re mẹ jọ aro kẹ owhẹ.” 13 Rekọ ọ tẹ ta kẹe nọ: “Olori mẹ ọ riẹ nọ emọ na a gbẹ maha,+ yọ me wo igodẹ gbe iruẹ nọ i wo emọ nọ i bi vi evie. A te su ai kiti ga hrọ evaọ ẹdẹ ọvo, uthuru erao na soso u re whu. 14 Ivie jọ olori mẹ ọ nyavrẹ siọ odibo riẹ ba, rekọ mẹ te nyaze ẹmẹrera wọhọ epanọ uthuru erao na gbe emọ na a sae nya vẹrẹ te bẹsenọ me re te olori mẹ oma evaọ obọ Siya.”+ 15 Kẹsena Esọ ọ tẹ ta nọ: “Ivie, jomẹ nyasiọ ahwo mẹ jọ ba kẹ owhẹ.” Ọ tẹ kpahe fihọ onana nọ: “Fikieme who re ro ru onana? Nọ olori mẹ o rri omẹ aro no na, oyena u te.” 16 Fikiere evaọ ẹdẹ yena Esọ ọ tẹ nyavrẹ zihe kpobọ Siya.

17 Jekọp ọ tẹ nya kpobọ Sọkọt,+ ọ tẹ bọ uwou kẹ omariẹ jẹ bọ iwou kẹ owa erao riẹ. Oyejabọ nọ o ro se odẹ oria na Sọkọt.*

18 Evaọ ukuhọ onya riẹ no obọ Padan-eram ze,+ Jekọp o te te okpẹwho Shẹkẹm gbẹsinẹdẹ+ evaọ ẹkwotọ Kenan,+ ọ tẹ fa evuẹ riẹ kẹle okpẹwho na. 19 Kẹsena ọ tẹ rọ ewẹ igho udhusoi (100) dẹ oria jọ evaọ otọ na mi emezae Hemọ, ọsẹ Shẹkẹm, ọ tẹ rọ uwou-udhu riẹ vi etẹe.+ 20 Ọ tẹ bọ agbada-idhe fihọ etẹe je sei Ọghẹnẹ, Ọghẹnẹ Izrẹl.+

34 Whaọ Daena, ọmọtẹ Jekọp nọ Lia o yẹ kẹe+ ọ jẹ hai weze bru* emetẹ ẹkwotọ na.+ 2 Nọ Shẹkẹm ọmọzae Hemọ ohwo Hiv na,+ omọvo enọ i wuzou evaọ ẹkwotọ na ọ ruẹ e riẹ o te kru rie o te lele iei wezẹ o te zue ei oma. 3 Daena ọmọtẹ Jekọp na ọ tẹ dhẹ ruọ ẹe oma* gaga, o te you ọmọtẹ na, ọ tẹ ta ẹme ruọ ẹe oma.* 4 Kẹsena Shẹkẹm ọ tẹ ta kẹ Hemọ+ ọsẹ riẹ nọ: “Rehọ ọmọtẹ nana kẹ omẹ re ọ jọ aye mẹ.”

5 Okenọ Jekọp o yo nọ Shẹkẹm o zue Daena ọmọtẹ riẹ oma yọ emezae riẹ e jọ kugbe owa erao riẹ evaọ obọ ẹwọ. Fikiere Jekọp o te fibo bẹsenọ a re zihe ze. 6 Kẹsena Hemọ ọsẹ Shẹkẹm ọ tẹ nya re o lele Jekọp ta ẹme. 7 Rekọ emezae Jekọp a yo kpahe oware nọ o via na a te zihe no obọ ẹwọ ze ababọ oke oraha. O kẹ rai uye gaga yọ eva e dha rai gaga keme ọ wha omovuọ se Izrẹl nọ o ro lele ọmọtẹ Jekọp wezẹ,+ oware nọ u fo eruo vievie he.+

8 Hemọ o te lele ai ta ẹme, inọ: “Ọmọtẹ rai ọ were Shẹkẹm ọmọzae mẹ.* Ivie wha rehọ iẹe kẹe re ọ jọ aye riẹ, 9 re wha hae ruọ orọo kugbe omai.* Wha rehọ emetẹ rai kẹ omai re wha jẹ rehọ emetẹ mai.+ 10 Wha sai lele omai rria, yọ ẹkwotọ na ọ te jọ kẹ owhai. Wha rria ẹkwotọ na jẹ jariẹ kọ okọ, jẹ jọ etenẹ.” 11 Kẹsena Shẹkẹm ọ tẹ ta kẹ ọsẹ Daena gbe inievo-emezae riẹ nọ: “Wha rri omẹ aro, mẹ te kẹ owhai oware kpobi nọ wha ta kẹ omẹ. 12 Wha sai bru igho ọmọtẹ na ruaro gbe eware nọ wha gwọlọ buobu.+ Mẹ rẹ hwa oware kpobi nọ wha ta kẹ omẹ. Wha thakpe kẹ omẹ ọmọtẹ na re ọ jọ aye mẹ.”

13 Emezae Jekọp a tẹ rọ eviẹhọ kẹ Shẹkẹm avọ Hemọ ọsẹ riẹ uyo keme o zue Daena oniọvo-ọmọtẹ rai oma. 14 A ta kẹ ae nọ: “Ma sai ru oware utioye vievie he, re ma rehọ oniọvo-ọmọtẹ mai kẹ ọzae nọ ọ yawo ho,*+ keme yọ oware omovuọ kẹ omai. 15 Ajokpaọ onana ọvo ma sae rọ rọwo kẹ owhai: inọ wha rẹ jọ wọhọ omai re wha yawo ezae rai kpobi.+ 16 Kẹsena ma vẹ te rehọ emetẹ mai kẹ owhai, ma vẹ te rehọ emetẹ rai kẹ omamai, ma vẹ te rria kugbe owhai je zihe ruọ ahwo ọvo. 17 Rekọ wha gbẹ gaviezọ kẹ omai re wha yawo ho, ma te rehọ ọmọtẹ mai ma vẹ nyavrẹ.”

18 Ẹme rai na ọ were Hemọ+ avọ Shẹkẹm ọmọzae riẹ.+ 19 Ọmoha na ọ raha oke he re o ru oware nọ a ta kẹe na,+ keme ọmọtẹ Jekọp na ọ were riẹ, yọ ọye* ọ mai wo ọghọ evaọ uwou ọsẹ riẹ soso.

20 Fikiere Hemọ avọ ọmọzae riẹ Shẹkẹm a tẹ nya kpobọ unuẹthẹ okpẹwho na a tẹ ta kẹ ezae okpẹwho rai+ nọ: 21 “Ezae nana a gwọlọ lele omai rria dhedhẹ. Wha kẹ ae uvẹ re a rria ẹkwotọ na jẹ jariẹ kọ okọ, keme ẹkwotọ na ọ rro te epanọ ọ rẹ rọ gba ae. Ma sae rehọ emetẹ rai wọhọ eyae jẹ rehọ emetẹ mai kẹ ae.+ 22 Oware nana ọvo ma re ru nọ a sae rọ rọwo rria kugbe omai re ma jọ ahwo ọvo: ọzae kpobi evaọ udevie mai ọ rẹ yawo wọhọ epanọ ae omarai a yawo na.+ 23 Kọ eware rai, efe rai, gbe uthuru erao rai kpobi i gbe ti zihe ruọ emai? Fikiere joma ru epanọ a ta na re a rria kugbe omai.” 24 Ahwo kpobi nọ a be rọ unuẹthẹ okpẹwho riẹ ruọ otafe a gaviezọ kẹ Hemọ avọ ọmọzae riẹ Shẹkẹm, ezae na kpobi a tẹ yawo, enọ e be rehọ unuẹthẹ okpẹwho na ruọ otafe kpobi.

25 Rekọ evaọ ẹdẹ avọ esa, nọ a gbẹ jọ edada oyawo na, emezae ivẹ Jekọp, Simiọn avọ Livae inievo-emezae Daena+ a tẹ tọlọ ọvuọ ọgbọdọ riẹ, a tẹ ruọ okpẹwho na ọza, a te kpe ọzae kpobi.+ 26 A rọ ọgbọdọ kpe Hemọ avọ ọmọzae riẹ Shẹkẹm a tẹ rehọ Daena no uwou Shẹkẹm a tẹ nyavrẹ. 27 Emezae Jekọp nọ i kiọkọ a tẹ ruọ udevie ezae nọ a kpe fihọ otọ evaọ okpẹwho na a tẹ kwa eware rai rehọ fikinọ a zue oniọvo-ọmọtẹ rai oma.+ 28 A rehọ ithuru erao rai, ewa erao rai, eketekete rai, gbe oware kpobi nọ o jọ okpẹwho na gbe obọ ẹwọ. 29 A tẹ jẹ rehọ ekwakwa rai kpobi, a mu emọ esese rai gbe eyae rai kpobi, jẹ kwa eware kpobi nọ e jọ iwou rai.

30 Fikiere Jekọp ọ tẹ ta kẹ Simiọn gbe Livae nọ:+ “Wha wha uye ulogbo se omẹ* no keme wha ru omẹ fihọ utuoma kẹ ahwo nọ a be rria ẹkwotọ na, ahwo Kenan gbe ahwo Pẹriz. Ahwo mẹ a tulo ho, yọ a ti kuomagbe wọ ohọre bru omẹ ze a ve ti kpe omẹ no, te omẹ te uwou mẹ.” 31 Rekọ a tẹ ta nọ: “Kọ ohwo jọ o re ru oniọvo-ọmọtẹ mai wọhọ ogberẹ?”

35 Nọ oyena o vrẹ no, Ọghẹnẹ ọ tẹ ta kẹ Jekọp nọ: “Kpama, kpobọ Bẹtẹl+ re whọ rria obei, re whọ bọ agbada-idhe fihọ obei kẹ Ọghẹnẹ uzẹme na, ọnọ ọ romavia kẹ owhẹ okenọ whọ jẹ dhẹ fiki Esọ oniọvo ra.”+

2 Kẹsena Jekọp ọ tẹ ta kẹ ahwo uwou riẹ gbe ahwo kpobi nọ a jọ kugbei nọ: “Wha si eghẹnẹ erẹwho efa nọ e rrọ udevie rai na no,+ re wha ru omarai fo je nwene iwu rai, 3 re ma kpama re ma kpobọ Bẹtẹl. Mẹ te jọ obei bọ agbada-idhe kẹ Ọghẹnẹ uzẹme na, ọnọ o yo kẹ omẹ evaọ oke uye mẹ, ọnọ ọ be jọ kugbe omẹ evaọ oria kpobi* nọ mẹ nya.”+ 4 Fikiere a tẹ rehọ eghẹnẹ erẹwho efa nọ a wo kpobi gbe emero-ezọ nọ e jọ ezọ rai kẹ Jekọp, Jekọp ọ tẹ tọ ae fihọ otọ* evaọ otọ ure ulogbo nọ o kẹle Shẹkẹm.

5 Nọ a jọ edhere be nyavrẹ na, iguegue Ọghẹnẹ e tẹ ruọ ikpewho nọ e wariẹ e rai họ, fikiere a gbe le emezae Jekọp ho. 6 Jekọp o te ti te Lọz,+ koyehọ Bẹtẹl, evaọ ẹkwotọ Kenan, tei te ahwo kpobi nọ a jọ kugbei. 7 Ọ tẹ bọ agbada-idhe fihọ etẹe o je se oria na Ẹl-bẹtẹl,* keme etẹe Ọghẹnẹ uzẹme na ọ jọ romavia kẹe okenọ ọ dhẹ fiki oniọvo riẹ.+ 8 Uwhremu na Debora,+ ọyọrọ-ọmọ Rebeka o te whu a te ki ei kẹle Bẹtẹl fihọ otọ ure ok. Fikiere o te se odẹ oria na Alọn-bakọt.*

9 Ọghẹnẹ ọ wariẹ romavia kẹ Jekọp okenọ o je no Padan-eram ze na ọ tẹ ghale iẹe. 10 Ọghẹnẹ ọ ta kẹe nọ: “Odẹ ra Jekọp.+ Rekọ odẹ ra o gbẹ te jọ Jekọp ho, Izrẹl o te jọ odẹ ra.” O te mu ei Izrẹl họ ese.+ 11 Ọghẹnẹ ọ tẹ gbẹ ta kẹe nọ: “Mẹ họ Ọghẹnẹ Erumeru.+ Vihọ re whọ jọ buobu. Erẹwho gbe ogbotu erẹwho i ti no oma ra ze,+ yọ ivie i ti no oma ra ze.*+ 12 Ẹkwotọ nọ mẹ rọ kẹ Abraham gbe Aiziki na, whẹ mẹ te rehọ iẹe kẹ, yọ mẹ te rehọ ẹkwotọ na kẹ emọ* ra nọ i ti lele owhẹ.”+ 13 Kẹsena Ọghẹnẹ ọ tẹ nyase iẹe ba oria nọ ọ jọ lele iei ta ẹme na.

14 Fikiere Jekọp ọ tẹ rọ upila vi oria nọ ọ jọ lele iei ta ẹme na, upila utho, o te ku idhe udi* fihọ iẹe je ku ewhri fihọ ehru riẹ.+ 15 Jekọp o te gbe je se oria nọ Ọghẹnẹ ọ jọ lele iei ta ẹme na Bẹtẹl.+

16 Kẹsena a tẹ wọ no Bẹtẹl. Rekọ nọ a gbe thabọ no Efrat, Reshẹl o te muhọ eyẹ, yọ eyẹ riẹ ọ jọ gaga. 17 Rekọ nọ ọ jẹ thuẹ othuẹ eyẹ na, aye nọ o re yẹ eyae na ọ tẹ ta kẹe nọ: “Jọ ozọ u mu owhẹ hẹ, keme who ti wo ọmọzae nana re.”+ 18 Nọ uzuazọ* riẹ u je kuhọ,* koyehọ nọ o bi whu vrẹ na, o te mu odẹ kẹe nọ Bẹn-oni,* rekọ ọsẹ riẹ o te mu Bẹnjamin* kẹe.+ 19 Fikiere Reshẹl o te whu a te ki ei nọ a jọ edhere je kpobọ Efrat, koyehọ Bẹtlẹhẹm.+ 20 Jekọp ọ tẹ rọ upila vi ehru uki riẹ; oye họ upila uki Reshẹl rite inẹnẹ.

21 Nọ oyena o vrẹ no, Izrẹl ọ tẹ wọ no etẹe ọ tẹ rọ uwou-udhu riẹ vi dina thabọ no uwou ukpehru Ida. 22 Okenọ Izrẹl ọ jẹ rria ẹkwotọ yena, Rubẹn ọ tẹ nya o te lele Bilha ọse* ọsẹ riẹ wezẹ, Izrẹl o te yo kpahe iẹe.+

Emezae ikpegbivẹ Jekọp o wo. 23 Emezae nọ Lia o yẹ kẹe họ Rubẹn ọmọ ọsosuọ Jekọp,+ kẹsena Simiọn, Livae, Juda, Isaka, gbe Zẹbulọn. 24 Emezae nọ Reshẹl o yẹ kẹe họ Josẹf avọ Bẹnjamin. 25 Yọ emezae nọ Bilha odibo Reshẹl o yẹ kẹe họ Dan avọ Naftalae. 26 Yọ emezae nọ Zilpa odibo Lia o yẹ kẹe họ Gad avọ Asha. Enana họ emezae Jekọp nọ a yẹ kẹe evaọ Padan-eram.

27 Uwhremu na, Jekọp o te ti te oria nọ Aiziki ọsẹ riẹ ọ jọ evaọ Mamre,+ evaọ Kiriat-aba, koyehọ Hebrọn, oria nọ Abraham avọ Aiziki a rria wọhọ erara.+ 28 Aiziki ọ rria ikpe udhuzii (180).+ 29 Kẹsena Aiziki o te ku ẹwẹ urere riẹ o te whu a te koko iei họ bru ahwo riẹ,* ọ rria kri je yeri uzuazọ nọ o da riẹ ẹro;* emezae riẹ Esọ avọ Jekọp a te ki ei.+

36 Onana họ ikuigbe Esọ, koyehọ Edọm.+

2 Udevie emetẹ Kenan Esọ o jo wo eyae riẹ: Edah+ ọmọtẹ Ilọn ohwo Hit;+ avọ Oholibema+ ọmọtẹ Enah, ọmọ-uruọmọ Zibiọn ohwo Hiv na; 3 gbe Basemat,+ ọmọtẹ Ishmẹl, nọ ọ rrọ oniọvo-ọmọtẹ Nebeyọt.+

4 Edah o yẹ Ẹlifaz kẹ Esọ, Basemat o yẹ Ruẹl,

5 yọ Oholibema o yẹ Jiẹsh, Jelam, gbe Kora.+

Enana họ emezae Esọ nọ a yẹ kẹe evaọ ẹkwotọ Kenan. 6 Kẹsena Esọ ọ tẹ rehọ eyae riẹ, emezae riẹ, emetẹ riẹ, ahwo* uwou riẹ kpobi, owa erao riẹ gbe erao efa riẹ kpobi, gbe efe kpobi nọ o kokohọ no+ evaọ ẹkwotọ Kenan o te kpohọ ẹkwotọ ọfa nọ o thabọ no Jekọp oniọvo riẹ.+ 7 Keme eware rai i bu gaga vi epanọ a sae rọ rria kugbe no, yọ ẹkwotọ nọ a jẹ rria* na o gbe je te kẹ ai hi fiki ewa erao rai. 8 Fikiere Esọ ọ tẹ jẹ rria ubrotọ igbehru obọ Siya.+ Esọ họ Edọm.+

9 Onana họ ikuigbe Esọ ọsẹ Edọm evaọ ubrotọ igbehru obọ Siya.+

10 Enana họ edẹ emezae Esọ: Ẹlifaz ọmọzae Edah, aye Esọ; Ruẹl ọmọzae Basemat, aye Esọ.+

11 Emezae Ẹlifaz họ Timan,+ Omar, Zifo, Getam, gbe Kinaz.+ 12 Timna ọ jọ ọse Ẹlifaz, ọmọzae Esọ. O te ti yẹ Amalẹk+ kẹ Ẹlifaz. Enana họ emezae Edah, aye Esọ.

13 Enana họ emezae Ruẹl: Nehat, Zira, Shamah, gbe Miza. Enana họ emezae Basemat,+ aye Esọ.

14 Enana họ emezae Oholibema ọmọtẹ Enah, ọmọ-uruọmọ Zibiọn, aye Esọ, enọ o yẹ kẹ Esọ: Jiẹsh, Jelam, gbe Kora.

15 Enana họ iletu-orua emezae Esọ: Emezae Ẹlifaz, ọmọ ọsosuọ Esọ:+ Timan oletu-orua, Omar oletu-orua, Zifo oletu-orua, Kinaz oletu-orua,+ 16 Kora oletu-orua, Getam oletu-orua, gbe Amalẹk oletu-orua. Enana họ iletu-orua Ẹlifaz+ evaọ ẹkwotọ Edọm. Enana họ emezae nọ Edah o yẹ.

17 Enana họ emezae Ruẹl, ọmọzae Esọ: Nehat oletu-orua, Zira oletu-orua, Shamah oletu-orua, gbe Miza oletu-orua. Enana họ iletu-orua Ruẹl evaọ ẹkwotọ Edọm.+ Enana họ emezae nọ Basemat aye Esọ o yẹ.

18 Orọ urere, enana họ emezae Oholibema, aye Esọ: Jiẹsh oletu-orua, Jelam oletu-orua, gbe Kora oletu-orua. Enana họ iletu-orua emezae Oholibema ọmọtẹ Enah, aye Esọ.

19 Enana họ emezae Esọ, yọ enana họ iletu-orua rai. Ọye họ Edọm.+

20 Enana họ emezae Siya ohwo Họr na, ahwo nọ a jẹ rria ẹkwotọ na:+ Lotan, Shobal, Zibiọn, Enah,+ 21 Daeshọn, Izẹ, gbe Daeshan.+ Enana họ iletu-orua ahwo Họr, emezae Siya, evaọ ẹkwotọ Edọm.

22 Emezae Lotan họ Horae avọ Himam, yọ oniọvo-ọmọtẹ Lotan họ Timna.+

23 Enana họ emezae Shobal: Alvan, Manahat, Ibal, Shifo, gbe Onam.

24 Enana họ emezae Zibiọn:+ Eya avọ Enah. Enah nana họ ọnọ ọ ruẹ iyeri-ame nọ ame ọrrorro o bi no ze evaọ udhude okenọ ọ jẹ rẹrote eketekete Zibiọn ọsẹ riẹ.

25 Enana họ emọ Enah: Daeshọn avọ Oholibema ọmọtẹ Enah.

26 Enana họ emezae Daeshọn: Hẹmdan, Ẹshban, Itran, gbe Kiran.+

27 Enana họ emezae Izẹ: Bilhan, Zeavan, gbe Ekan.

28 Enana họ emezae Daeshan: Ọz avọ Eran.+

29 Enana họ iletu-orua ahwo Họr: Lotan oletu-orua, Shobal oletu-orua, Zibiọn oletu-orua, Enah oletu-orua, 30 Daeshọn oletu-orua, Izẹ oletu-orua, gbe Daeshan oletu-orua.+ Enana họ iletu-orua ahwo Họr wọhọ epanọ a rọ rrọ iletu-orua evaọ ẹkwotọ Siya.

31 Whaọ enana họ ivie nọ i su evaọ ẹkwotọ Edọm+ taure ovie o te ti su ahwo Izrẹl.*+ 32 Bila ọmọzae Biọ o su evaọ Edọm, yọ odẹ okpẹwho riẹ họ Dinhaba. 33 Nọ Bila o whu no, Jobab ọmọzae Zira nọ o no Bọzra ze o te muhọ esuo evaọ ẹta riẹ. 34 Nọ Jobab o whu no, Husham nọ o no ẹkwotọ ahwo Timan ze o te muhọ esuo evaọ ẹta riẹ. 35 Nọ Husham o whu no, Hedad ọmọzae Bidad, ọnọ o fi ahwo Midian kparobọ+ evaọ ẹkwotọ* Moab o te muhọ esuo evaọ ẹta riẹ, yọ odẹ okpẹwho riẹ họ Evit. 36 Nọ Hedad o whu no, Samla nọ o no Masrika ze o te muhọ esuo evaọ ẹta riẹ. 37 Nọ Samla o whu no, Sheọl nọ o no Rehobọt nọ o rrọ akotọ Ethẹ na ze o te muhọ esuo evaọ ẹta riẹ. 38 Nọ Sheọl o whu no, Bale-henan ọmọzae Akbọ o te muhọ esuo evaọ ẹta riẹ. 39 Nọ Bale-henan ọmọzae Akbọ o whu no, Heda o te muhọ esuo evaọ ẹta riẹ. Odẹ okpẹwho riẹ họ Peyu, yọ odẹ aye riẹ Mẹhetabẹl, ọmọtẹ Metrẹd ọmọtẹ Mizahab.

40 Fikiere enana họ edẹ iletu-orua erọ Esọ wọhọ epaọ inuwou rai, wọhọ epanọ a rọ jọ ọvuọ oria rai, edẹ rai ena: Timna oletu-orua, Alva oletu-orua, Jitẹt oletu-orua,+ 41 Oholibema oletu-orua, Ilah oletu-orua, Paenọn oletu-orua, 42 Kinaz oletu-orua, Timan oletu-orua, Mibza oletu-orua, 43 Magdiẹl oletu-orua, gbe Aeram oletu-orua. Enana họ iletu-orua Edọm wọhọ epaọ ọvuọ oria riẹ evaọ ẹkwotọ rai.+ Ọnana họ Esọ ọsẹ Edọm.+

37 Jekọp ọ tẹ gbẹ jẹ rria ẹkwotọ Kenan, oria nọ ọsẹ riẹ ọ rria wọhọ ọrara.+

2 Onana họ ikuigbe Jekọp.

Nọ Josẹf+ ọ jọ ikpe ikpegbihrẹ, ọmoha na ọ jẹ rẹrote uthuru erao na,+ te ọyomariẹ te emezae Bilha+ gbe emezae Zilpa,+ eyae ọsẹ riẹ. Josẹf ọ tẹ nyaze te vuẹ ọsẹ rai oware uyoma nọ a ru. 3 Whaọ Izrẹl o you Josẹf vi emezae riẹ nọ i kiọkọ+ keme ọye ọ jọ ọmọ oke owho riẹ, yọ o ko obọdẹ ewu othethei* jọ kẹe. 4 Nọ inievo-emezae riẹ a ruẹ nọ ọsẹ rai o you rie vi inievo-emezae riẹ kpobi, a te mu ei họ emukpahe, a gbẹ jẹ ta ẹme kẹe dhedhẹ hẹ.

5 Kẹsena Josẹf ọ tẹ wezẹ ewezẹ ọ tẹ ta ewezẹ na kẹ inievo-emezae riẹ,+ a tẹ ruẹ ẹjiroro ọfa nọ a re ro mukpahe iẹe. 6 Ọ ta kẹ ae nọ: “Ivie wha gaviezọ kẹ ewezẹ nana nọ mẹ wezẹ na. 7 Ma jẹ gba ikru ekakọ* evaọ udevie udhu, ekru mẹ ọ tẹ kpama dikihẹ kpomavi, ikru rai e tẹ wariẹ ọmẹ họ je guzou kpotọ kẹ ekru mẹ.”+ 8 Inievo riẹ a tẹ nọe nọ: “Kọ who bi ti gine ru omara fihọ ovie kẹ omai je su omai?”+ Fikiere a tẹ ruẹ ẹjiroro ọfa nọ a re ro mukpahe iẹe, fiki ewezẹ riẹ gbe ẹme nọ ọ ta na.

9 Nọ oyena o vrẹ no, ọ tẹ wezẹ ewezẹ efa, ọ tẹ ta ewezẹ na kẹ inievo riẹ nọ: “Mẹ wezẹ ewezẹ efa. Evaọ ọnana ọre na gbe ọvẹre na gbe isi ikpegbọvo a je guzou kpotọ kẹ omẹ.”+ 10 Kẹsena ọ tẹ ta ewezẹ na kẹ ọsẹ riẹ gbe inievo riẹ, ọsẹ riẹ ọ tẹ whọku ei ọ tẹ ta kẹe nọ: “Eme họ otofa ewezẹ ra na? Kọ mẹ avọ oni ra gbe inievo ra ma te ginẹ nyaze ti kigwẹ rọ uzou te otọ kẹ owhẹ?” 11 Inievo riẹ a tẹ jẹ re iẹe ihri,+ rekọ ọsẹ riẹ ọ jẹ jọ eva riẹ roro ẹme na.

12 Inievo riẹ a te su uthuru erao ọsẹ rai nyae re ẹbe kẹle Shẹkẹm.+ 13 Kẹsena Izrẹl ọ tẹ ta kẹ Josẹf nọ: “Inievo ra a be rẹrote ithuru erao na kẹle Shẹkẹm, manikọ ere he? Nyaze re me vi owhẹ bru rai.” Ọ tẹ ta kẹ ọsẹ riẹ nọ: “Mẹ na!” 14 Fikiere ọ tẹ ta kẹe nọ: “Ivie nya re whọ ruẹ sọ eware e be riẹ nya kẹ inievo ra. Nyae ruẹ epanọ uthuru erao na o rrọ re whọ nyaze te vuẹ omẹ.” O te vi ei vrẹ no ukiekpotọ* Hebrọn,+ ọ tẹ nya rri obọ Shẹkẹm. 15 Uwhremu na, ọzae jọ ọ tẹ ruẹ e riẹ nọ o bi ghoro evaọ ọgbudhu jọ. Ọzae na ọ tẹ nọe nọ: “Eme whọ be gwọlọ?” 16 Ọ tẹ ta kẹe nọ: “Mẹ be gwọlọ inievo mẹ. Ivie vuẹ omẹ, bovẹ a be jọ rẹrote ithuru erao na?” 17 Ọzae na ọ tẹ ta kẹe nọ: “A no etenẹ no, keme me yo nọ a jẹ ta nọ, ‘Joma kpobọ Dotan.’” Fikiere Josẹf ọ tẹ gwọlọ inievo riẹ kpohọ obei ọ tẹ ruẹ e rai evaọ obọ Dotan.

18 A tẹ jọ ugbo kparo ruẹ e riẹ, yọ taure o te ti te ai oma, a te mu ẹgwae epanọ a re ro kpei no họ ẹgba. 19 Fikiere a tẹ ta kẹ ohwohwo nọ: “Rri! Ọwezẹ-ewezẹ na ọ be nyaze.+ 20 Wha nyaze re ma kpei no re ma gbolo iei fihọ ọgọdọ ame na jọ, ma vẹ ta nọ arao ojihẹ jọ ọ re riẹ no. Re ma ruẹ epanọ ewezẹ riẹ na i ti ro rugba.” 21 Nọ Rubẹn+ o yo onana, ọ tẹ daoma re o siwi ei no obọ rai. Fikiere ọ tẹ ta nọ: “Ma kpei hi.”+ 22 Rubẹn ọ ta kẹ ae nọ: “Wha kpe azẹ hẹ.+ Wha gbolo iei fihọ ọgọdọ ame nana nọ ọ rrọ udhude na, wha nwae oma ha.”*+ Ẹjiroro riẹ họ re o siwi ei no obọ rai re o zihe iei se ọsẹ riẹ.

23 Fikiere nọ Josẹf ọ nwani te inievo riẹ oma, a tẹ ba ewu othethei Josẹf noi oma, obọdẹ ewu othethei nọ o kuhọ na,+ 24 a te kru ei a te gbolo iei fihọ ọgọdọ ame na. Evaọ oke yena ọgọdọ na ọ jọ ofofe; ame ọ jọ eva riẹ hẹ.

25 Kẹsena a tẹ keria re a re emu. Nọ a kpare ovao, a tẹ ruẹ ahwo Ishmẹl avọ ekamẹle rai+ nọ a bi no obọ Giliad ze. Ekamẹle rai e wha egọmu labdanọm, gbe balsam, avọ ehọrọ ire nọ i wo ame,+ yọ a jọ edhere je kpobọ Ijipti. 26 Fikiere Juda ọ tẹ ta kẹ inievo riẹ nọ: “Kọ erere vẹ ọ riẹ otẹrọnọ ma kpe oniọvo mai je ruru azẹ riẹ?+ 27 Wha nyaze re ma zẹe+ kẹ ahwo Ishmẹl na, ma rọ obọ mai kpei hi. Keme oniọvo mai ọ rrọ, uwo-oma mai.” Fikiere a tẹ gaviezọ kẹ oniọvo rai. 28 Nọ egba-ihreki ahwo Midian+ na a jẹ nyavrẹ, a te si Josẹf no eva ọgọdọ ame na ze a tẹ zẹe kẹ ahwo Ishmẹl na ewẹ isiliva udhe.+ Ezae nana a tẹ wha Josẹf kpobọ Ijipti.

29 Uwhremu na nọ Rubẹn o zihe kpobọ ọgọdọ ame na nọ ọ jẹ ruẹ nọ Josẹf ọ rrọ ọgọdọ ame na ha, ọ tẹ bẹre iwu riẹ. 30 Nọ o zihe bru inievo riẹ o te bo nọ: “Ọmọ na ọ riẹ hẹ! Kọ eme me bi ti ru na?”

31 Fikiere a tẹ rehọ ewu othethei Josẹf, a te kpe okri a je duwu ewu othethei na họ azẹ riẹ. 32 Kẹsena a tẹ rehọ obọdẹ ewu othethei na se ọsẹ rai jẹ ta nọ: “Nọ oware nọ ma ruẹ. Ivie rri rie sọ nọ ewu othethei ọmọzae ra hayo ọye he.”+ 33 Fikiere o te rri rie o te bo nọ: “Nọ ewu othethei ọmọzae mẹ! Arao ojihẹ jọ ọ re riẹ no na! A za Josẹf ekekẹ no!” 34 Jekọp ọ tẹ bẹre iwu riẹ ọ tẹ rehọ ohọ-ekpa* zuo eku riẹ, o te weri ọmọzae riẹ edẹ buobu. 35 Emezae riẹ kpobi gbe emetẹ riẹ kpobi a tẹ jẹ daoma re a sasa iẹe oma, rekọ ọ jẹ rọwo nọ a sasa iẹe oma ha, ọ jẹ ta nọ: “Me ti weri ọmọzae mẹ ruọ eva Uki!”*+ Ọsẹ riẹ ọ tẹ ruabọhọ je weri ei.

36 Whaọ ahwo Midian na a tẹ jọ obọ Ijipti zẹe kẹ Pọtifa nọ ọ rrọ oletu evaọ ogbẹgwae Fẹro+ gbe oletu iroiro na.+

38 Evaọ oke yena Juda ọ tẹ kwa siọ inievo riẹ ba, ọ tẹ rọ uwou-udhu riẹ vi kẹle ohwo Adọlam jọ nọ a re se Haera. 2 Juda ọ tẹ jọ etẹe ruẹ ọmọtẹ Shua, ohwo Kenan jọ.+ Ọ tẹ rehọ iẹe, o te lele iei wezẹ, 3 o te dihọ. O te ti yẹ ọmọzae, o te se odẹ riẹ Ẹr.+ 4 Ọ tẹ wariẹ dihọ o te yẹ ọmọzae o te se odẹ riẹ Onan. 5 Ọ tẹ jẹ wariẹ yẹ ọmọzae o te se odẹ riẹ Shila. Ọ* jẹ rria Akzib+ evaọ okenọ o yẹi.

6 Nọ oke jọ o vrẹ no, Juda o te wo aye kẹ Ẹr ọmọ ọsosuọ riẹ, odẹ riẹ Tama.+ 7 Rekọ Ẹr, ọmọ ọsosuọ Juda ọ jẹ dha Jihova eva, fikiere Jihova o te kpei no. 8 Fikiere Juda ọ tẹ ta kẹ Onan nọ: “Lele aye oniọvo ra wezẹ re whọ ruọ orọo aye-uku kugbei, re who yẹ ọmọ kẹ oniọvo ra.”+ 9 Rekọ Onan ọ riẹ nọ a ti rri ọmọ na wọhọ ọriẹ hẹ.+ Fikiere nọ o te bi lele aye oniọvo riẹ wezẹ, o re ku ame-oma riẹ fihọ otọ re ọ siọ ọmọ ba eyẹ kẹ oniọvo riẹ.+ 10 Oware nọ o ru na o thọ evaọ aro Jihova, fikiere o te kpei re.+ 11 Juda ọ tẹ ta kẹ Tama aye ọmọzae riẹ nọ: “Rria uwou ọsẹ ra wọhọ aye-uku bẹsenọ ọmọzae mẹ Shila o re te ohwo no,” keme ọ ta kẹ omariẹ nọ: ‘Ọ sai whu wọhọ inievo-emezae riẹ re.’+ Fikiere Tama ọ tẹ nyae rria uwou ọsẹ riẹ.

12 Nọ oke jọ o vrẹ no, aye Juda ọmọtẹ Shua+ o te whu. Juda o te weri etoke uweri na gba, kẹsena ọ tẹ nyabru ahwo nọ a re bru eto igodẹ riẹ evaọ obọ Timnah,+ tei te ogbẹnyusu riẹ Haera ohwo Adọlam na.+ 13 A tẹ vuẹ Tama nọ: “Ọsẹ ọzae ra o bi kpobọ Timnah nyai bru eto igodẹ riẹ.” 14 Fikiere ọ tẹ ba iwu aye-uku nọ o kuhọ no ọ tẹ rehọ ohọ ruru ovao riẹ jẹ rehọ ẹwẹ-ohọ wowo ọ tẹ keria oria nọ a rẹ rọ ruọ evaọ Eneyim nọ ọ rrọ edhere nọ a re ro kpohọ Timnah, keme ọ ruẹ nọ Shila o te ohwo no ghele na a re rehọ iẹe kẹe re ọ jọ aye riẹ hẹ.+

15 Nọ Juda ọ ruẹ e riẹ, ọ tẹ nwani roro nọ ogberẹ, keme o ruru ovao riẹ. 16 Fikiere ọ tẹ wẹriẹ bru ei evaọ akotọ edhere na, ọ tẹ ta nọ: “Ivie jọ me lele owhẹ wezẹ,” keme ọ riẹ nọ aye ọmọzae riẹ hẹ.+ Rekọ ọ tẹ nọe nọ: “Eme whọ te kẹ omẹ re whọ ruẹsi lele omẹ wezẹ?” 17 O te yo nọ: “Mẹ te jọ owa erao mẹ rehọ ọmọ ẹwe jọ vi se owhẹ.” Rekọ ọ tẹ ta nọ: “Kọ whọ te rehọ oware jọ viowa kẹ omẹ bẹsenọ who re vi ei ze?” 18 Ọ tẹ nọe nọ: “Eme whọ gwọlọ nọ me ro viowa kẹ owhẹ?” ọ tẹ kpahe kẹe nọ: “Ẹmẹro oka-ukpehọ* ra+ na avọ ufi riẹ gbe ọkpọ ra nọ ọ rrọ owhẹ obọ na.” Ọ tẹ rehọ ae kẹe, o te lele iei wezẹ, o te dihọ kẹe. 19 Kẹsena ọ tẹ kpama ọ jẹ nyavrẹ, o te si ẹwẹ-ohọ na no, o te ku iwu aye-uku na họ.

20 Juda ọ tẹ rọ ọmọ ẹwe na kẹ ogbẹnyusu riẹ ohwo Adọlam na vi sei,+ re o mi aye na eware nọ o ro viowa na ze rekọ ọ ruẹ e riẹ hẹ. 21 Ọ tẹ nọ ezae oria na nọ: “Ogberẹ etẹmpol nọ ọ be hae jọ Eneyim evaọ akotọ edhere na ọ rrọ?” A tẹ ta nọ: “Ogberẹ etẹmpol ọvuọvo ọ re jọ oria nana ẹdẹvo ho.” 22 Kẹsena o te zihe bru Juda ọ tẹ ta nọ: “Mẹ ruẹ e riẹ hẹ, yọ ezae oria na a ta nọ, ‘Ogberẹ etẹmpol ọvo ọ re jọ oria nana ẹdẹvo ho.’” 23 Fikiere Juda ọ tẹ ta nọ: “Jọ ọ rehọ ae, re ma gbẹ wha omovuọ se omamai hi. Oghẹrẹ kpobi kẹhẹ, me vi ọmọ ẹwe na, rekọ whọ ruẹ e riẹ hẹ.”

24 Rekọ nọ oware wọhọ emerae esa e vrẹ no, a tẹ vuẹ Juda nọ: “Tama aye ọmọ ra o bru igberẹ, yọ o dihọ no fiki igberẹ-ibro riẹ.” Fikiere Juda ọ tẹ ta nọ: “Wha rehọ iẹe ze re a mahe iẹe.”+ 25 Nọ a jẹ rehọ iẹe ze, o te vi uwou se ọsẹ ọzae riẹ nọ: “Ọzae nọ o wo eware nana ọye ọ kẹ omẹ eva.” O te fibae nọ: “Ivie rri rai ziezi re whọ riẹ ohwo nọ o wo eware nana, ẹmẹro oka-ukpehọ* na avọ ufi riẹ gbe ọkpọ na.”+ 26 Kẹsena Juda o te rri rai ziezi ọ tẹ ta nọ: “O kiẹrẹe vi omẹ, keme mẹ rehọ e riẹ kẹ Shila ọmọzae mẹ hẹ.”+ Nọ oyena o vrẹ no, o gbe lele iei wezẹ ofa ha.

27 Nọ oke nọ o re ro yẹ o te, a tẹ ruẹ nọ ejime e jọ eva riẹ. 28 Nọ o je yẹ, ọjọ o te vi obọ lahwe, aye nọ o re yẹ eyae na ọ tẹ nwane rehọ olulu ọwawae o te thuru iei fihọ obọ riẹ, inọ: “Ọnana ọ kake lahwe.” 29 Rekọ nọ ọ nwani vi obọ rehọ no, oniọvo-ọmọzae riẹ ọ tẹ lahwe, aye na o te bo nọ: “Kinọ oghẹrẹ edulahwe jọ!” Fikiere a te se odẹ riẹ Pirẹz.*+ 30 Kẹsena oniọvo-ọmọzae riẹ ọ tẹ lahwe, ọnọ a thuru olulu ọwawae fihọ obọ riẹ na, a te se odẹ riẹ Zira.+

39 A rehọ Josẹf kpobọ Ijipti,+ yọ ohwo Ijipti jọ nọ a re se Pọtifa,+ oletu evaọ ogbẹgwae Fẹro gbe oletu iroiro na ọ dẹ riẹ mi ahwo Ishmẹl+ nọ a rehọ e riẹ kpohọ obei na. 2 Rekọ Jihova ọ jọ kugbe Josẹf.+ Fikiere eware e jẹ riẹ nya kẹe a te fi ei họ ọnọ o wuzou iruẹru uwou olori riẹ, ohwo Ijipti na. 3 Olori riẹ ọ ruẹ nọ Jihova ọ rrọ kugbei gbe nọ Jihova o bi ru nọ eware kpobi nọ o bi ru e be rọ riẹ nya kẹe.

4 Josẹf ọ jẹ were iẹe, o te zihe ruọ odibo riẹ nọ ọ rẹ gbodibo kẹ ọyomariẹ. Fikiere ọ tẹ rehọ iẹe mu ọnọ o wuzou iruẹru uwou riẹ, o te fi ei họ ọnọ o wuzou eware riẹ kpobi. 5 No umuo oke nọ ọ rọ rehọ iẹe mu ọnọ o wuzou iruẹru uwou riẹ gbe ọnọ o wuzou eware riẹ kpobi, Jihova ọ tẹ jẹ ghale uwou ohwo Ijipti na fiki Josẹf, yọ Jihova ọ jẹ ghale eware kpobi nọ o wo evaọ uwou riẹ gbe evaọ obọ ẹwọ.+ 6 O te ti fi eware kpobi nọ o wo họ obọ Josẹf, o gbe je du roro kpahe oware ovo ho ajokpaọ emu nọ ọ rẹ re. Ofariẹ, Josẹf o te ti te ọzae fihọ ziezi avọ erru.

7 Nọ eware nana e vrẹ no, aye olori riẹ o te mu ẹro họ efihọ Josẹf, ọ tẹ jẹ ta kẹe nọ: “Lele omẹ wezẹ.” 8 Rekọ ọ se, ọ tẹ ta kẹ aye olori riẹ nọ: “Whaọ olori mẹ ọ riẹ eware nọ e rrọ obọ mẹ evaọ uwou na ha, yọ o fi eware kpobi nọ o wo họ obọ mẹ no. 9 Ohwo ọvo ọ jọ uwou nana rro vi omẹ hẹ, yọ oware ovo o riẹ hẹ nọ o fihọ otọ mẹ hẹ ajokpaọ owhẹ, keme whẹ yọ aye riẹ. Kọ ẹvẹ me re ro ru oware uyoma ulogbo nana re mẹ ginẹ raha uzi Ọghẹnẹ?”+

10 Fikiere kẹdẹ kẹdẹ ọ jẹ hae ta ẹme kẹ Josẹf, rekọ ọ rọwo vievie he inọ o re lele iei wezẹ hayo jọ kugbei. 11 Rekọ evaọ ẹdẹ jọ nọ ọ ruọ eva uwou na re o ru iruo riẹ, idibo uwou na ọvuọvo ọ jọ eva uwou na ha. 12 Ọ tẹ jobọ kru ewu riẹ ọ tẹ ta nọ: “Lele omẹ wezẹ!” Rekọ ọ tẹ dhẹ siọ ewu riẹ ba obọ riẹ ọ tẹ dhẹ ruọ otafe. 13 Nọ ọ nwane ruẹ nọ ọ nyasiọ ewu riẹ ba obọ riẹ jẹ dhẹ ruọ otafe no, 14 o te muhọ ebo se ezae uwou na ọ tẹ ta kẹ ae nọ: “Rri! Ọ rehọ ohwo Hibru nana se omai re o ru omai fihọ enọ a rẹ rọ ta atahwẹ. Ọ nyabru omẹ ze inọ o re lele omẹ wezẹ, rekọ me te muhọ ebo gaga. 15 Nọ ọ nwani yo nọ mẹ be kpare urru mẹ bi bo, ọ tẹ nyasiọ ewu riẹ ba akotọ mẹ ọ tẹ dhẹ ruọ otafe.” 16 Kẹsena o te fi ewu riẹ na họ akotọ riẹ bẹsenọ olori riẹ o ro kpozi.

17 Ọ tẹ vuẹe ẹme ọvona, inọ: “Odibo Hibru nọ whọ rehọ se omai na ọ nyabru omẹ ze re o ru omẹ họ ọnọ a rẹ rọ ta atahwẹ. 18 Rekọ nọ mẹ nwane kpare urru mẹ je muhọ ebo, ọ tẹ nyasiọ ewu riẹ ba akotọ mẹ ọ tẹ dhẹ ruọ otafe.” 19 Nọ olori riẹ ọ nwani yo eme nọ aye riẹ ọ ta kẹe na, inọ: “Enẹ gbe enẹ odibo ra o ru omẹ,” ofu o te mu ei gaga. 20 Fikiere olori Josẹf ọ tẹ rehọ iẹe o te fi ei họ uwou-odi, oria nọ a re fi ahwo nọ ovie na o mu fihọ, ọ tẹ jọ etẹe evaọ uwou-odi na.+

21 Rekọ Jihova ọ gbẹ jọ kugbe Josẹf yọ o je dhesẹ uyoyou nọ o rẹ hiẹ hẹ kẹe o te ru nọ ọ jẹ rọ were ọnọ o wuzou uwou-odi na.+ 22 Fikiere ọnọ o wuzou uwou-odi na o te fi Josẹf họ ọnọ o wuzou ahwo kpobi nọ a fihọ uwou-odi na, yọ oware kpobi nọ a je ru evaọ etẹe, ọye ọ jẹ ruẹ nọ a ru rie.+ 23 Ọnọ o wuzou uwou-odi na ọ jẹ kiẹ otọ oware ovuovo nọ a mu họ obọ Josẹf ho, keme Jihova ọ jọ kugbe Josẹf yọ Jihova o ru nọ oware kpobi nọ o bi ru o jẹ rọ riẹ nya kẹe.+

40 Nọ eware nana e vrẹ no, ọwọ-egho*+ ovie Ijipti avọ othere-ebrẹdi* nọ o wuzou na a te ru olori rai, ovie Ijipti thọ. 2 Fikiere eva e tẹ dha Fẹro kpahe idibo ivẹ riẹ na, ọwọ-egho nọ o wuzou na avọ othere-ebrẹdi* nọ o wuzou na,+ 3 o te fi ai họ uwou-odi orọ uwou oletu iroiro na,+ uwou-odi nọ Josẹf ọ jọ.+ 4 Kẹsena oletu iroiro na o te fi Josẹf họ re ọ jọ kugbe ai jẹ rẹrote ai,+ a tẹ jọ evaọ uwou-odi na etoke* jọ.

5 Ọwọ-egho gbe othere-ebrẹdi* ovie Ijipti nọ a fihọ uwou-odi na, aimava a wezẹ ewezẹ evaọ aso ọvona, yọ ewezẹ na i wo ọvuọ otofa riẹ. 6 Evaọ ohiohiẹ okiokiọ riẹ nọ Josẹf ọ nyaze jẹ ruẹ e rai, a mu ovao họ. 7 Fikiere ọ tẹ nọ idibo Fẹro nọ e rrọ uwou-odi kugbei evaọ uwou-odi olori riẹ na nọ: “Fikieme wha ro mu ovao họ nẹnẹ?” 8 A tẹ ta kẹe nọ: “Mai imava ma wezẹ ewezẹ, rekọ ohwo ọvo ọ rrọ kugbe omai nọ ọ rẹ fa otọ rai hi.” Josẹf ọ tẹ ta kẹ ae nọ: “Kọ ogbẹrọnọ Ọghẹnẹ họ ọnọ ọ rẹ fa otọ eware?+ Ivie, wha ta ae kẹ omẹ.”

9 Fikiere ọwọ-egho nọ o wuzou na ọ tẹ ta ewezẹ riẹ kẹ Josẹf, ọ ta kẹe nọ: “Mẹ jọ ewezẹ mẹ ruẹ ure evaene. 10 Yọ ure evaene na u wo egha esa, nọ egha eboba e be ta noi ze na, o tẹ whẹ ivo họ, ekru ibi riẹ e tẹ ware. 11 Yọ egho Fẹro ọ jọ omẹ obọ, mẹ tẹ rehọ ibi na je mi ai fihọ egho Fẹro. Kẹsena mẹ tẹ wọ egho na fihọ obọ Fẹro.” 12 Josẹf ọ tẹ ta kẹe nọ: “Otofa riẹ ona: Egha esa na yọ edẹ esa. 13 Evaọ edẹ esa nọ e be tha, Fẹro ọ te rehọ owhẹ no etenẹ no,* o ve ti zihe owhẹ kpohọ iruo ra,+ yọ whọ te wọ egho Fẹro fihọ obọ riẹ wọhọ epanọ who je ru vẹre okenọ whọ jọ ọwọ-egho riẹ.+ 14 Rekọ, whọ rẹ kareghẹhọ omẹ hrọ nọ eware i te woma kẹ owhẹ no. Ivie dhesẹ uyoyou nọ o rẹ hiẹ hẹ kẹ omẹ re whọ vuẹ Fẹro kpahe omẹ re ọ ruẹsi si omẹ no oria nana. 15 Emu a mu omẹ rehọ no obọ ẹkwotọ ahwo Hibru ze,+ yọ me ru oware ovo evaọ obonẹ hẹ nọ a rẹ rọ fiki riẹ fi omẹ họ uwou-odi.”*+

16 Nọ othere-ebrẹdi* nọ o wuzou na ọ ruẹ nọ emamọ oware Josẹf ọ fa no ewezẹ na ze, ọ tẹ ta kẹe nọ: “Mẹ omamẹ mẹ wezẹ ewezẹ re, ikete esa erọ ebrẹdi efuafo e jọ uzou mẹ, 17 yọ evaọ ekete nọ ọ jọ obehru kpobi na, oghoghẹrẹ emu nọ a there no e jariẹ rọkẹ Fẹro, yọ evra e be jọ ekete nọ ọ rrọ ehru uzou mẹ na soro ae.” 18 Kẹsena Josẹf ọ tẹ ta kẹe nọ: “Otofa riẹ ona: Ikete esa na yọ edẹ esa. 19 Evaọ edẹ esa nọ e be tha, Fẹro o ti bru uzou ra* no ọ vẹ te tehe owhẹ fihọ ure, evra e vẹ te re uwo-oma ra no.”+

20 Whaọ ẹdẹ avọ esa na ọ tẹ jọ ẹdẹ-eyẹ Fẹro,+ o te se ehaa kẹ idibo riẹ kpobi, ọ tẹ rehọ* ọwọ-egho nọ o wuzou na gbe othere-ebrẹdi* nọ o wuzou na lahwe evaọ aro idibo riẹ. 21 O te zihe ọwọ-egho nọ o wuzou na kpohọ iruo ọwọ-egho riẹ, ọ tẹ ruabọhọ iruo egho nọ ọ rẹ wọ kẹ Fẹro. 22 Rekọ ọ tẹ tehe othere-ebrẹdi* nọ o wuzou na fihọ ure, nwane wọhọ epanọ Josẹf ọ fa otọ ewezẹ na kẹ ae.+ 23 Rekọ ọwọ-egho nọ o wuzou na ọ kareghẹhọ Josẹf ho; ọ thọrọ e riẹ ẹro.+

41 Nọ ikpe ivẹ gbagba e vrẹ no, Fẹro ọ tẹ wezẹ ewezẹ+ nọ ọ jọ dikihẹ akotọ Ethẹ Naele. 2 Iruẹ ihrẹ epoporiẹ nọ e rrọ wowoma i te bi no ethẹ na ze, e tẹ jẹ re ẹbe Ethẹ Naele na.+ 3 Iruẹ ihrẹ efa nọ e rrọ yoyoma dọdọ i te bi no Ethẹ Naele na ze lele ae, i te dikihẹ kẹle iruẹ epoporiẹ na evaọ akotọ Ethẹ Naele na. 4 Iruẹ nọ e rrọ yoyoma dọdọ na i te mu iruẹ ihrẹ epoporiẹ nọ e rrọ wowoma na họ ẹre. Kẹsena Fẹro ọ tẹ rọwo ze.

5 Ọ tẹ wariẹ kiẹzẹ ọ tẹ wezẹ ewezẹ efa. Iru eka ihrẹ e tẹ be ta no ugbe-ọka ọvo ze, e rrọ bọbọbọ jẹ rrọ wowoma ziezi.+ 6 Iru eka ihrẹ efa nọ e rrọ dọdọ nọ ofou obọ ovatha-ọre ọ ya no e tẹ ta ze lele ai. 7 Iru eka edọdọ na i te mu iru eka ihrẹ nọ e rrọ bọbọbọ jẹ rrọ wowoma ziezi na họ ẹlọ. Kẹsena Fẹro ọ tẹ rọwo ze ọ tẹ ruẹ nọ kpakọ ewezẹ.

8 Rekọ evaọ ohiohiẹ, ẹzi riẹ ọ tẹ jẹ rova. Fikiere ọ tẹ ta nọ a se izerẹ Ijipti nọ i re ru emajiki kpobi gbe ezae iwareghẹ riẹ kpobi ze. Fẹro ọ tẹ ta ewezẹ riẹ kẹ ae, rekọ ọvuọvo ọ sae fa otọ rai kẹ Fẹro ho.

9 Kẹsena ọwọ-egho nọ o wuzou na ọ tẹ ta kẹ Fẹro nọ: “Mẹ be feva izieraha mẹ nẹnẹ. 10 Eva e dha Fẹro kẹ idibo riẹ. Fikiere o te fi omẹ họ uwou-odi orọ uwou oletu iroiro na, te omẹ te othere-ebrẹdi* nọ o wuzou na.+ 11 Kẹsena mai imava ma tẹ wezẹ ewezẹ aso ọvona. Ewezẹ riẹ avọ ewezẹ mẹ i wo ọvuọ otofa riẹ.+ 12 Yọ ọmoha Hibru jọ ọ jọ kugbe omai, odibo oletu iroiro na.+ Nọ ma ta ewezẹ na kẹe,+ ọ tẹ fa otọ ọvuọ ewezẹ riẹ kẹ omai. 13 Epanọ ọ fa otọ rai kẹ omai, ere o nwane via. A zihe omẹ ziọ ọkwa mẹ, rekọ a tẹ tehe ọzae ọdekọ na họ ure.”+

14 Fikiere Fẹro ọ tẹ ta nọ a se Josẹf ze,+ a tẹ rehọ iẹe no uwou-odi* na ze vẹrẹ vẹrẹ.+ Ọ tẹ nware etuagba riẹ je nwene iwu riẹ ọ tẹ nyabru Fẹro ze. 15 Kẹsena Fẹro ọ tẹ ta kẹ Josẹf nọ: “Mẹ wezẹ ewezẹ, rekọ ohwo ọvo ọ riẹ nọ ọ rẹ sae fa otọ riẹ hẹ. Whaọ me yo kpahe owhẹ inọ a tẹ ta ewezẹ kẹ owhẹ whọ rẹ sae fa otọ riẹ.”+ 16 Josẹf o te yo kẹ Fẹro nọ: “Orọnikọ ogaga mẹ hẹ! Ọghẹnẹ ọ te ta epanọ eware i re ro kiehọ kẹ Fẹro.”+

17 Fẹro ọ tẹ ta kẹ Josẹf nọ: “Evaọ ewezẹ mẹ, me dikihẹ akotọ Ethẹ Naele. 18 Iruẹ ihrẹ epoporiẹ nọ e rrọ wowoma i te bi no Ethẹ Naele na ze, i te mu ẹbe Ethẹ Naele na họ ẹre.+ 19 Iruẹ ihrẹ efa e tẹ rọ kpahe ae, yọ e rrọ yaya jẹ rrọ yoyoma dọdọ. Mẹ re ruẹ oghẹrẹ iruẹ iyoyoma itieye evaọ ẹkwotọ Ijipti soso ẹdẹvo ho. 20 Iruẹ edọdọ iyoyoma na i te mu iruẹ ihrẹ ọsosuọ nọ e rrọ fuẹfu na họ ẹre. 21 Rekọ nọ a re ae no, ohwo ọvo ọ rẹ sae riẹ nọ a re rai vievie he, keme a gbẹ jọ gado gado wọhọ epanọ a jọ vẹre evaọ emuhọ na. Mẹ tẹ rọwo ze.

22 “Kẹsena mẹ tẹ ruẹ iru eka ihrẹ nọ e jẹ ta no ugbe-ọka ọvo ze, e rrọ bọbọbọ jẹ rrọ wowoma ziezi.+ 23 Iru eka ihrẹ nọ e ko no nọ e rrọ dọdọ nọ ofou obọ ovatha-ọre ọ ya no e tẹ ta ze lele ai. 24 Kẹsena iru eka edọdọ na i te mu iru eka ihrẹ iwowoma na họ ẹlọ. Mẹ tẹ ta ewezẹ na kẹ izerẹ nọ i re ru emajiki na,+ rekọ ọvuọvo ọ sae fa otọ rai kẹ omẹ hẹ.”+

25 Josẹf ọ tẹ ta kẹ Fẹro nọ: “Ewezẹ ivẹ Fẹro na ọvo yọ otofa ovona i wo. Ọghẹnẹ uzẹme na ọ vuẹ Fẹro oware nọ o ti ru no.+ 26 Iruẹ ihrẹ iwowoma na yọ ikpe ihrẹ. Epọvo na re, iru eka ihrẹ iwowoma na yọ ikpe ihrẹ. Ewezẹ ivẹ na ọvo, yọ otofa ovona i wo. 27 Iruẹ ihrẹ edọdọ iyoyoma nọ i lele i rai na yọ ikpe ihrẹ, yọ iru eka ihrẹ ifofe nọ ofou obọ ovatha-ọre ọ ya no na e te jọ ikpe ihrẹ nọ ohọo u ti ro mu. 28 Nwane wọhọ epanọ mẹ vuẹ Fẹro na inọ: Ọghẹnẹ uzẹme na o ru Fẹro ruẹ oware nọ o ti ru no.

29 “Ikpe ihrẹ e te jariẹ nọ emu ọ te jọ buobu gaga evaọ ẹkwotọ Ijipti soso. 30 Rekọ ikpe ihrẹ nọ ohọo u ti ro mu i ti lele ai hrọ, yọ emu obuobu nọ ọ te jọ ẹkwotọ Ijipti na kpobi o te thọrọ ẹro hrọ, yọ ohọo na u ti ru otọ na ya fia.+ 31 Yọ a te kareghẹhọ emu obuobu nọ ọ jọ ẹkwotọ na vẹre na ha fiki ohọo nọ u ti lele iei na keme o te ga thesiwa. 32 A dhesẹ ewezẹ na kẹ Fẹro isiava keme Ọghẹnẹ uzẹme na ọ gba riẹ mu no inọ oware nana o rẹ via hrọ, yọ Ọghẹnẹ uzẹme na o ti ru ei kẹle na.

33 “Fikiere jọ Fẹro ọ gwọlọ ọzae nọ o wo orimuo avọ areghẹ re o fi ei họ ọnọ o wuzou iruẹru ẹkwotọ Ijipti. 34 Jọ Fẹro o ru oware jọ re ọ rehọ esẹro mu evaọ ẹkwotọ na, yọ o re mi abọvo abasoi ekakọ Ijipti evaọ ikpe ihrẹ emu obuobu na.+ 35 Jọ a koko emu na kpobi họ evaọ ikpe nana nọ eware i ti woma na, jọ a koko emu họ nọ ọ rẹ jọ otọ udu-esuo Fẹro re a fi emu na họ eva ikpewho na jẹ sẹro rai evaọ etẹe.+ 36 Enana e te jọ emu kẹ ẹkwotọ na evaọ ikpe ihrẹ nọ ohọo u ti mu evaọ ẹkwotọ Ijipti na, re ohọo na u gbe kpe orẹwho na no ho.”+

37 Ẹme nana o kiehọ evaọ aro Fẹro gbe idibo riẹ kpobi. 38 Fikiere Fẹro ọ tẹ ta kẹ idibo riẹ nọ: “Kọ a sae ruẹ ọzae ọfa nọ ọ wọhọ ọnana nọ ẹzi Ọghẹnẹ ọ rrọ oma?” 39 Fẹro ọ tẹ ta kẹ Josẹf nọ: “Nọ orọnọ Ọghẹnẹ o ru owhẹ riẹ eware nana kpobi na, ohwo ọvo ọ riẹ hẹ nọ o wo orimuo avọ areghẹ wọhọ owhẹ. 40 Whẹ o ti wuzou iruẹru uwou mẹ, yọ ahwo mẹ kpobi a ti yoẹme kẹ owhẹ evaọ oware kpobi.+ Ọkwa ovie nọ mẹ rrọ* na ọvo mẹ te rọ rro vi owhẹ.” 41 Fẹro ọ tẹ jẹ ta kẹ Josẹf nọ: “Rri, mẹ be rọ owhẹ mu ọnọ o wuzou iruẹru ẹkwotọ Ijipti soso.”+ 42 Kẹsena Fẹro o te si ẹmẹro oka-ukpehọ* riẹ no obọ riẹ o te fi ei họ obọ Josẹf o te ku iwu emamọ ehọ-elọlọhọ fihọ iẹe je fi ufiare igoru họ uriohọ riẹ. 43 Kẹsena ọ tẹ rehọ iẹe keria akẹkẹ ọghọ avọ ivẹ nọ o wo re a rehọ iẹe dhẹ wariẹ, yọ a be jọ aro riẹ bo nọ, “Avrẹk!”* Ere ọ rọ rehọ iẹe mu ọnọ o wuzou iruẹru ẹkwotọ Ijipti soso.

44 Fẹro ọ tẹ jẹ ta kẹ Josẹf nọ: “Mẹ họ Fẹro, rekọ ababọ udu nọ whọ kẹ, ohwo ọvo o re ru uvumọ oware* evaọ ẹkwotọ Ijipti soso ho.”+ 45 Kẹsena Fẹro o te mu odẹ na Zafenat-pania kẹ Josẹf, ọ tẹ rehọ Asenat+ ọmọtẹ Pọtaefẹra ozerẹ Ọn* kẹe re ọ jọ aye riẹ. Josẹf o te mu ẹkwotọ Ijipti họ eriwi.*+ 46 Josẹf ọ jọ ikpe ọgba+ okenọ o ro dikihẹ aro* Fẹro ovie Ijipti.

Kẹsena Josẹf ọ tẹ nyavrẹ no aro Fẹro ọ tẹ nya ẹkwotọ Ijipti soso duwu. 47 Evaọ ikpe ihrẹ emu obuobu na, otọ na o tẹ jẹ mọ ibi buobu.* 48 O te je koko emu ikpe ihrẹ na kpobi họ evaọ ẹkwotọ Ijipti, o ve koko emu na họ ikpewho na. Ọ jẹ jọ evaọ okpẹwho ọvuọvo sẹro emu nọ a kokohọ no idhu nọ e wariẹ e riẹ họ ze. 49 Josẹf o te je koko ibi ekakọ buobu gaga họ, wọhọ uwẹkpẹ abade, bẹsenọ a rọ siọ ai ba ẹwawọ keme a gbẹ jẹ sae wawọ ai hi.

50 Taure ukpe nọ ohọo na u ro muhọ u te ti te, a yẹ emezae ivẹ kẹ Josẹf,+ Asenat ọmọtẹ Pọtaefẹra ozerẹ Ọn* o yẹ rai kẹe. 51 Josẹf o se odẹ ọmọ ọsosuọ na Manasẹ,*+ keme ọ ta nọ, “Ọghẹnẹ o ru omẹ kpairoro vrẹ uye mẹ kpobi gbe uwou ọsẹ mẹ kpobi no.” 52 Yọ o se odẹ ọrọ avọ ivẹ na Ifremu,*+ keme ọ ta nọ, “Ọghẹnẹ o ru omẹ vihọ no evaọ ẹkwotọ oja-oriọ mẹ.”+

53 Kẹsena ikpe ihrẹ nọ emu ọ jọ buobu evaọ ẹkwotọ Ijipti na i te ti re,+ 54 ikpe ihrẹ ohọo na i te muhọ, nwane wọhọ epanọ Josẹf ọ ta na.+ Ohọo na u te je mu evaọ ekwotọ na kpobi, rekọ emu ọ jọ ẹkwotọ Ijipti soso.+ 55 Uwhremu na ohọo na u te ti te ẹkwotọ Ijipti soso, ahwo na a te muhọ ẹviẹ bru Fẹro re ọ kẹ ae emu.+ Fẹro ọ tẹ ta kẹ ahwo Ijipti kpobi nọ: “Wha nyabru Josẹf, re wha ru oware kpobi nọ ọ ta kẹ owhai.”+ 56 Ohọo na u te je mu evaọ otọakpọ na kpobi.+ Kẹsena Josẹf o te mu iwou ibi ekakọ nọ e jọ udevie rai na họ erovie jẹ be zẹ kẹ ahwo Ijipti,+ keme ohọo na u je mu gaga evaọ ẹkwotọ Ijipti. 57 Yọ ahwo otọakpọ na kpobi a jẹ ziọ Ijipti te dẹ mi Josẹf, keme ohọo na u je mu gaga evaọ otọakpọ na kpobi.+

42 Nọ Jekọp o yo nọ emu* ọ rrọ obọ Ijipti,+ ọ tẹ ta kẹ emezae riẹ nọ: “Ẹvẹ wha bi ro rri ohwohwo ọvo?” 2 O te fibae nọ: “Me yo nọ emu* ọ rrọ obọ Ijipti. Wha kpohọ obei re wha dẹ emu* ze kẹ omai, re ma ruẹse jọ uzuazọ, re ma seba ewhu.”+ 3 Fikiere inievo-emezae ikpe Josẹf+ a te kpobọ Ijipti nyae dẹ emu.* 4 Rekọ Jekọp o vi Bẹnjamin,+ oniọvo Josẹf lele inievo riẹ nọ i kiọkọ họ, keme ọ ta nọ: “Ẹsejọhọ oware uyoma jọ o sae via kẹe.”+

5 Fikiere emezae Izrẹl a te lele amọfa nọ a jẹ nyae dẹ emu nya, keme ohọo na u te obọ ẹkwotọ Kenan no.+ 6 Josẹf họ ohwo nọ o wuzou iruẹru ẹkwotọ na,+ yọ ọye ọ jẹ zẹ emu* kẹ ahwo otọakpọ na kpobi.+ Fikiere inievo Josẹf a tẹ nyaze a te guzou kpotọ vovao tuotọ kẹe.+ 7 Nọ Josẹf ọ ruẹ inievo riẹ, ọ tẹ nwani vuhu ai, rekọ o ru re a gbe vuhu iei hi.+ Fikiere ọ jẹ ta eme egaga kẹ ae inọ: “Bovẹ wha no ze?” a te yo nọ: “Obọ ẹkwotọ Kenan ma no ze te dẹ emu.”+

8 Josẹf o vuhu inievo riẹ, rekọ a vuhu i rie he. 9 Josẹf ọ tẹ nwane kareghẹhọ ewezẹ nọ ọ wezẹ kpahe ai,+ ọ tẹ ta kẹ ae nọ: “Whai yọ ekiotọ! Wha nyaze ti rri eria nọ a sae rọ vẹruọ ẹkwotọ na!”* 10 A tẹ ta kẹe nọ: “Ijo, olori mẹ, emu idibo ra a nyaze te dẹ. 11 Mai kpobi yọ emezae ọzae ọvo. Mai yọ ahwo nọ a kiete. Idibo ra yọ ekiotọ họ.” 12 Rekọ ọ tẹ ta kẹ ae nọ: “Ijo! Wha nyaze ti rri eria nọ a sae rọ vẹruọ ẹkwotọ na!” 13 A tẹ ta nọ: “Idibo ra yọ inievo-emezae ikpegbivẹ.+ Mai emezae ọzae ọvo+ evaọ obọ ẹkwotọ Kenan, yọ ọrọ ọmaha kpobi ọ rrọ kugbe ọsẹ mai,+ rekọ ọnọ o kiọkọ ọ gbẹ riẹ hẹ.”+

14 Rekọ Josẹf ọ tẹ ta kẹ ae nọ: “Epanọ mẹ vuẹ owhai na, ‘Whai yọ ekiotọ!’ 15 Onana mẹ te rọ dawo owhai: Nọ Fẹro ọ rrọ uzuazọ na, wha ti no etenẹ hẹ bẹsenọ oniọvo-ọmọzae ọmaha rai kpobi ọ rẹ ziọ etenẹ.+ 16 Wha vi omọvo rai jọ nyae rehọ oniọvo rai ze re whai nọ i kiọkọ wha jọ uwou-odi. Enẹ mẹ te rọ riẹ sọ uzẹme wha be ginẹ ta. Yọ o gbẹ rrọ ere he, nọ Fẹro ọ rrọ uzuazọ na, kiyọ whai yọ ekiotọ.” 17 O te fi ai họ uwou-odi kugbe edẹ esa.

18 Josẹf ọ tẹ ta kẹ ae evaọ ẹdẹ avọ esa nọ: “Wha ru onana re wha jọ uzuazọ, keme mẹ be dhozọ Ọghẹnẹ. 19 Otẹrọnọ whai yọ ahwo nọ a kiete, jọ oniọvo rai jọ ọ gbẹ jọ uwou-odi nọ wha rrọ na, rekọ whai nọ i kiọkọ wha sai kpo re wha rehọ emu* kẹ ahwo uwou rai nọ ohọo u bi kpe.+ 20 Re wha rehọ oniọvo-ọmọzae ọmaha rai kpobi se omẹ, re mẹ riẹ nọ eme rai uzẹme re wha gbe whu hu.” A te ru ere.

21 A tẹ ta kẹ ohwohwo nọ: “Uye oware uyoma nọ ma ru oniọvo mai ma be ruẹ na,+ keme ma ruẹ ẹrova riẹ okenọ ọ lẹ omai nọ ma dhesẹ ọdawẹ, rekọ ma gaviezọ họ. Oyejabọ nọ uye nana u bi ro te omai na.” 22 Kẹsena Rubẹn ọ tẹ kpahe kẹ ae nọ: “Mẹ vuẹ owhai nọ, ‘Wha raha uzi kpahe ọmọ na ha,’ rekọ wha yo ho?+ Whaọ azẹ riẹ a be nekpẹ riẹ na.”+ 23 Rekọ a riẹ hẹ inọ Josẹf o bi yo, keme ohwo jọ ọ jọ udevie riẹ avọ ae omarai nọ ọ jẹ fa eme rai. 24 Fikiere ọ tẹ nyasiọ ae ba o te muhọ ẹviẹ.+ Nọ o zihe ze jẹ wariẹ ta ẹme kẹ ae, ọ tẹ rehọ Simiọn+ no udevie rai ọ tẹ jọ iraro rai gbae fihọ uwou-odi.+ 25 Josẹf ọ tẹ kẹ udu nọ a whẹ emu* vọ ekpa* rai je zihe ugho omomọvo fihọ ọvuọ ẹkpa riẹ re a jẹ kẹ ae eware nọ a rẹ re evaọ edhere. A te ru ere kẹ ae.

26 Kẹsena a tẹ wọ emu* rai họ eketekete rai a tẹ ruọ edhere. 27 Nọ omọvo rai jọ o rovie ẹkpa riẹ re ọ kẹ eketekete riẹ emu evaọ oria nọ a wohọ, ọ tẹ ruẹ ugho riẹ evaọ unu ẹkpa riẹ. 28 Ọ tẹ ta kẹ inievo riẹ nọ: “A zihe ugho mẹ ze, yọ ona o rrọ eva ekpa mẹ na!” Udu u te no ai awọ, a te bi nuhu, a te rri ohwohwo jẹ ta nọ: “Kinọ eme Ọghẹnẹ o ru omai na?”

29 Nọ a kpozi bru Jekọp ọsẹ rai evaọ obọ ẹkwotọ Kenan, a tẹ vuẹe eware nọ e via kẹ ae kpobi inọ: 30 “Ọzae nọ ọ rrọ olori orẹwho na ọ ta eme egaga kẹ omai+ jẹ bọwo omai ota inọ ma nyae kiẹ otọ orẹwho na. 31 Rekọ ma ta kẹe nọ, ‘Mai yọ ahwo nọ a kiete. Mai yọ ekiotọ họ.+ 32 Mai inievo-emezae ikpegbivẹ,+ emọ ọsẹ ọvo. Ọvo jọ ọ gbẹ riẹ hẹ,+ yọ ọrọ ọmaha kpobi ọ rrọ kugbe ọsẹ mai evaọ obọ ẹkwotọ Kenan.’+ 33 Rekọ ọzae nọ ọ rrọ olori orẹwho na ọ ta kẹ omai nọ, ‘Onana mẹ te rọ riẹ nọ whai yọ ahwo nọ a kiete: Wha nyasiọ oniọvo rai jọ ba kẹ omẹ.+ Wha rehọ emu* kẹ ahwo uwou rai nọ ohọo u bi kpe re wha kpo.+ 34 Re wha rehọ oniọvo-ọmọzae ọmaha rai kpobi se omẹ re mẹ riẹ nọ whai yọ ekiotọ họ rekọ ahwo nọ a kiete. Kẹsena me ve ti zihe oniọvo rai kẹ owhai, yọ wha sae thueki evaọ ẹkwotọ na.’”

35 Nọ a je si eware no ekpa rai, a tẹ ruẹ ugho omomọvo evaọ ẹkpa riẹ. Nọ te ai te ọsẹ rai a ruẹ ekpa-ugho rai, ozọ u te mu ai. 36 Jekọp ọsẹ rai o te bo kẹ ai nọ: “Mẹ wha fihọ ababọ emọ no na!+ Josẹf ọ gbẹ riẹ hẹ,+ Simiọn ọ gbẹ riẹ hẹ,+ yọ Bẹnjamin wha gwọlọ rehọ vrẹ na! Mẹ eware nana kpobi i bi kie tehe na!” 37 Rekọ Rubẹn ọ tẹ ta kẹ ọsẹ riẹ nọ: “Whọ sai kpe emezae ivẹ mẹ otẹrọnọ mẹ gbẹ whae zihe se owhẹ hẹ.+ Rehọ iẹe họ obọ mẹ, me ti zihe iei se owhẹ.”+ 38 Rekọ ọ tẹ ta nọ: “Ọmọzae mẹ o re lele owhẹ nya ha, keme oniọvo riẹ o whu no yọ ọye ọvo o kiọkọ.+ Oware uyoma jọ o tẹ via kẹe evaọ onya nọ wha te nya na, wha ve ti ru eza mẹ kpobọ Uki*+ avọ uweri.”+

43 Whaọ ohọo na o jọ gaga evaọ ẹkwotọ na.+ 2 Fikiere nọ a re emu* nọ a wha no obọ Ijipti ze re no,+ ọsẹ rai ọ tẹ ta kẹ ae nọ: “Wha zihe re wha dẹ ememu jọ ze kẹ omai.” 3 Juda ọ tẹ ta kẹe nọ: “Ọzae na ọ vẹvẹ omai unu gaga nọ, ‘Wha rẹ gbẹ ruẹ ovao mẹ ofa ha ajokpanọ oniọvo-ọmọzae rai ọ rrọ kugbe owhai.’+ 4 Who te vi oniọvo-ọmọzae mai lele omai, ma te nyae dẹ emu se owhẹ. 5 Rekọ who gbe vi ei lele omai hi, ma be nya ha, keme ọzae na ọ ta kẹ omai nọ, ‘Wha rẹ gbẹ ruẹ ovao mẹ ofa ha ajokpanọ oniọvo-ọmọzae rai ọ rrọ kugbe owhai.’”+ 6 Izrẹl+ ọ tẹ nọ nọ: “Fikieme wha rọ wha uye nana se omẹ nọ wha rọ vuẹ ọzae na nọ wha wo oniọvo-ọmọzae ọfa?” 7 A te yo nọ: “Ọzae na ọ nọ omai kpahe omamai gbe imoni mai dẹẹ, inọ, ‘Kọ ọsẹ rai ọ gbẹ rrọ uzuazọ? Kọ wha wo oniọvo-ọmọzae ọfa jọ?’ ma tẹ ta uzẹme eware nana kẹe.+ Ẹvẹ ma hae rọ riẹ nọ ọ te ta nọ, ‘Wha rehọ oniọvo-ọmọzae rai ze’?”+

8 Kẹsena Juda ọ tẹ jẹ tẹzẹ Izrẹl ọsẹ riẹ nọ: “Vi ọmọ na lele omẹ,+ re ma ruọ edhere re ma sae jọ uzuazọ re ma seba ewhu,+ te omai te owhẹ te emọ mai.+ 9 Mẹ be rọ omamẹ viowa nọ oware ovo u ti ru ei hi.*+ Oware jọ o tẹ via, kru omẹ. Otẹrọnọ me gbe zihe iei se owhẹ jẹ rehọ iẹe kẹ owhẹ hẹ, koyehọ me ru owhẹ thọ no evaọ edẹ uzuazọ mẹ kpobi. 10 Rekọ ma gbẹ be raha oke he, enẹ yọ ma nya nya kpozi isiava no.”

11 Fikiere Izrẹl ọsẹ rai ọ tẹ ta kẹ ae nọ: “Otẹrọnọ ere o rẹ jọ hrọ, wha ru enẹ: Wha rehọ eware ẹkwotọ na nọ e mai woma fihọ ekpa* rai re wha wha ae nya rọ kẹ ọzae na okẹ:+ umutho balsam jọ,+ ọmọnyọ jọ, labdanọm, ehọrọ ure nọ u wo ame,+ ibi pistakio, gbe almọnd. 12 Wha wha akuava ugho na lele oma; wha vẹ jẹ wha igho nọ a zihe fihọ unu ekpa rai na zihe.+ Ẹsejọhọ o thọ ae obọ. 13 Wha rehọ oniọvo-ọmọzae rai re wha nya, wha zihe bru ọzae na. 14 Jọ Ọghẹnẹ Erumeru na o ru ọzae na re ohrọ rai, re o siobọno oniọvo rai nọ o kiọkọ gbe Bẹnjamin kẹ owhai. Rekọ rọkẹ omẹ, otẹrọnọ mẹ rẹ jọ ababọ emọ, jomẹ jọ ababọ emọ!”+

15 Fikiere ezae na a tẹ rehọ okẹ na, a tẹ rehọ akuava ugho na fihọ obọ gbe Bẹnjamin. A tẹ kpama a tẹ ruọ edhere kpobọ Ijipti a tẹ wariẹ dikihẹ aro Josẹf.+ 16 Nọ Josẹf ọ ruẹ Bẹnjamin evaọ usu rai, ọ tẹ nwane ta kẹ ọzae nọ o wuzou iruẹru uwou riẹ nọ: “Rehọ ezae na kpobọ uwou re who kpe erao je there emu, keme ezae na a ti lele omẹ re emu evaọ oke uvo.” 17 Ọzae na ọ tẹ nwani ru epanọ Josẹf ọ ta na ababọ oke oraha,+ ọ tẹ rehọ ae kpobọ uwou Josẹf. 18 Rekọ ozọ u te mu ezae na nọ a rehọ ae kpobọ uwou Josẹf, a te muhọ ẹta nọ: “Fiki igho nọ a zihe fihọ ekpa mai evaọ orọ ẹdẹ nọ ma rọ nyaze na a rọ rehọ omai ziọ etenẹ na. Whaọ a ti kpe omai a ve ti ru omai fihọ erigbo a vẹ te rehọ eketekete mai!”+

19 Fikiere a te go kẹle ọzae nọ o wuzou iruẹru uwou Josẹf na, a tẹ ta ẹme kẹe evaọ aro uwou na. 20 A ta nọ: “Rọvrẹ omai, olori mẹ! Ma kake nyaze te dẹ emu no vẹre.+ 21 Rekọ nọ ma te oria nọ ma wohọ je mu ekpa mai họ erovie, ma tẹ ruẹ ugho omomọvo evaọ unu ẹkpa riẹ, ugho mai kpobi o gba kọkọ.*+ Fikiere ona mai ọvo ma bi zihe ze na. 22 Yọ ma wha ugho ọfa ze re ma rọ dẹ emu. Ma riẹ ohwo nọ o fi igho mai họ ekpa mai hi.”+ 23 Kẹsena ọ tẹ ta nọ: “U woma. Jọ ozọ u mu owhai hi. Ọghẹnẹ rai gbe Ọghẹnẹ ọsẹ rai o fi efe họ ekpa rai. Mẹ ugho rai o kaki te obọ.” Kẹsena ọ tẹ rehọ Simiọn lahwe ro se ai.+

24 Ọzae na ọ tẹ rehọ ae ziọ uwou Josẹf ọ tẹ kẹ ae ame re a rọ wozẹ awọ rai, ọ tẹ jẹ kẹ ae emu re a rọ kẹ eketekete rai. 25 A tẹ ruẹrẹ okẹ na kpahe+ kẹ Josẹf nọ ọ te nyaze evaọ uvo, keme a yo nọ a te jọ etẹe re emu.+ 26 Nọ Josẹf ọ ruọ eva uwou na, a tẹ rehọ okẹ rai ruọ eva ro sei evaọ uwou na a te kiẹzẹ vovao tuotọ kẹe.+ 27 Kẹsena ọ tẹ nọ ae kpahe epanọ eware e rrọ kẹ ae jẹ nọ ae nọ: “Ẹvẹ ọsẹ rai nọ ọ kpako no nọ wha vuẹ omẹ kpahe na? Kọ ọ gbẹ rrọ uzuazọ?”+ 28 A te yo nọ: “Odibo ra, ọsẹ mai ọ sasa. Ọ gbẹ rrọ uzuazọ.” Kẹsena a te guzou kpotọ je kiẹzẹ vovao tuotọ.+

29 Nọ ọ kpare ovao jẹ ruẹ Bẹnjamin oniọvo riẹ, ọmọzae oni riẹ,+ ọ tẹ ta nọ: “Kọ oniọvo rai, ọrọ ọmaha kpobi nọ wha vuẹ omẹ kpahe na ọna?”+ O te fibae nọ: “Jọ Ọghẹnẹ o dhesẹ aruoriwo riẹ kẹ owhẹ, ọmọzae mẹ.” 30 Josẹf ọ tẹ nyavrẹ vẹrẹ vẹrẹ, keme oviẹ o gba riẹ udu fiki oniọvo riẹ, ọ tẹ gwọlọ oria nọ ọ rẹ jọ viẹ. Fikiere ọ tẹ ruọ eva ubrukpẹ nọ ohwo ọvo ọ rrọ họ o te muhọ ẹviẹ evaọ etẹe.+ 31 Kẹsena ọ tẹ wozẹ ovao riẹ ọ tẹ nyaze nọ udu riẹ u kpotọ no, ọ tẹ ta nọ: “Wha wọ emu na ze.” 32 A tẹ wọ emu riẹ kẹe sa jẹ wọ ọrai kẹ ae sa, ahwo Ijipti nọ a jọ kugbei a tẹ re ọrai sa, keme ahwo Ijipti a re lele ahwo Hibru re emu hu, keme oyena o jọ oware otọtọ kẹ ahwo Ijipti.+

33 Inievo riẹ a tẹ keria* aro riẹ, ọrọ ọkpako epaọ oria ọkpako riẹ+ yọ ọrọ ọmaha kpobi epaọ oria ọmaha riẹ, a te je rri ohwohwo avọ igbunu. 34 O te je vi emu no emẹjẹ riẹ kpohọ ọrai, rekọ o je ru ẹkẹ Bẹnjamin akuasoi bu vi erọ ahwo edekọ kpobi.+ A te je lele iei re jẹ da bẹsenọ eva e rọ vọ ae.

44 Uwhremu na ọ tẹ ta kẹ ọzae nọ o wuzou iruẹru uwou riẹ nọ: “Whẹ emu vọ ekpa ezae na te epanọ a rẹ sae wha, re who fi ugho omomọvo họ unu ẹkpa riẹ.+ 2 Rekọ who re fi egho mẹ, egho isiliva na họ unu ẹkpa ọrọ ọmaha kpobi na hrọ, kugbe ugho riẹ nọ ọ rọ dẹ emu.”* O te ru epanọ Josẹf ọ ta na.

3 Evaọ ohiohiẹ nọ oke u vẹ no, a te siobọno ezae na avọ eketekete rai kpo. 4 A ri thabọ no okpẹwho na ha nọ Josẹf ọ ta kẹ ọzae nọ o wuzou iruẹru uwou riẹ nọ: “Kpama! Le ezae na! Nọ who te le ai mu, ta kẹ ae nọ, ‘Fikieme wha rọ rehọ eyoma hwosa ewoma? 5 Kọ ogbẹrọnọ egho nana olori mẹ ọ rẹ rọ da jẹ rọ kiẹ otọ eware oka via gbagba? Oware umuomu wha ru na.’”

6 Fikiere o te le ai mu jẹ ta eme nana kẹ ae. 7 Rekọ a tẹ ta kẹe nọ: “Emejabọ nọ olori mẹ ọ be rọ ta oware utiona? Yọ oware nọ o rẹ ziọ iroro vievie he inọ idibo ra a re ru oware utioye. 8 Whaọ ugho nọ ma jọ unu ekpa mai ruẹ ma zihe i rie no obọ ẹkwotọ Kenan ze se owhẹ.+ Kọ ẹvẹ ma rẹ rọ jọ uwou olori ra tho isiliva hayo igoru? 9 Otẹrọnọ a jọ obọ ọrigbo ra jọ ruẹ e riẹ, jọ o whu, mai nọ i kiọkọ ma ve je zihe ruọ erigbo kẹ olori mẹ.” 10 Fikiere ọ tẹ ta nọ: “Jọ o jọ epanọ wha ta na: Ọnọ a jọ obọ riẹ ruẹ e riẹ o ti zihe ruọ ọrigbo mẹ, rekọ whai nọ i kiọkọ abọ rai ọ fo.” 11 Omomọvo ọ tẹ rọ ovovẹrẹ wọ ẹkpa riẹ fihọ otọ je rovie iei. 12 Ọ tẹ romatotọ kiẹ ae, muhọ no ọrọ ọkpako rite ọrọ ọmaha kpobi. Ukuhọ riẹ, a tẹ jọ ẹkpa Bẹnjamin ruẹ egho na.+

13 A tẹ bẹre iwu rai, omomọvo ọ tẹ wọ owha riẹ zihe fihọ ehru eketekete riẹ a te kuomarẹriẹ zihe kpobọ okpẹwho na. 14 Nọ Juda+ avọ inievo riẹ a ruọ eva uwou Josẹf, ọ gbẹ jọ etẹe; a te kie gbulotọ kẹe.+ 15 Josẹf ọ tẹ ta kẹ ae nọ: “Kinọ eme wha ru na? Kọ wha gbẹ riẹ nọ ohwo wọhọ omẹ na ọ rẹ sae kiẹ otọ eware oka via gbagba?”+ 16 Kẹsena Juda ọ tẹ ta nọ: “Kọ eme ma rẹ sae ta kẹ olori mẹ? Eme ma rẹ sae ta? Ẹvẹ ma sai ro dhesẹ nọ ma kiẹrẹe? Ọghẹnẹ uzẹme na ọ fere oruthọ erigbo ra via no.+ Obọnana mai erigbo kẹ olori mẹ, te omai te ọnọ a jọ obọ riẹ ruẹ egho na!” 17 Rekọ ọ tẹ ta nọ: “Yọ oware nọ o rẹ ziọ iroro vievie he re me ru oware utioye! Ọzae nọ a jọ obọ riẹ ruẹ egho na, ọye o re zihe ruọ ọrigbo mẹ.+ Whai nọ i kiọkọ, wha kpo tou bru ọsẹ rai.”

18 Juda o te bi kẹle iẹe ọ tẹ ta nọ: “Mẹ lẹ owhẹ, olori mẹ, ivie jọ ọrigbo ra ọ ta ẹme kẹ owhẹ olori mẹ, jọ eva e dha owhẹ kẹ ọrigbo ra ha, keme whẹ wọhọ Fẹro omariẹ.+ 19 Olori mẹ ọ nọ erigbo riẹ nọ, ‘Kọ wha wo ọsẹ hayo oniọvo-ọmọzae?’ 20 Fikiere ma tẹ ta kẹ olori mẹ nọ, ‘Ma wo ọsẹ nọ ọ kpako no gbe ọmọ oke owho riẹ, ọrọ ọmaha kpobi.+ Rekọ oniọvo-ọmọzae riẹ o whu no,+ fikiere ọye ọvo họ ọmọzae oni riẹ nọ o kiọkọ,+ yọ ọsẹ riẹ o you rie.’ 21 Kẹsena whọ tẹ ta kẹ erigbo ra nọ, ‘Wha rehọ iẹe se omẹ re mẹ ruẹ e riẹ.’+ 22 Rekọ ma tẹ ta kẹ olori mẹ nọ, ‘Ọmọ na ọ rẹ sae nyasiọ ọsẹ riẹ ba ha. Ọ tẹ nyase iẹe ba, ọsẹ riẹ ọ rẹ seba ewhu hu.’+ 23 Kẹsena whọ tẹ ta kẹ erigbo ra nọ, ‘Ajokpanọ oniọvo-ọmọzae ọmaha rai kpobi o re lele owhai nyaze, o gbẹ rrọ ere he, wha rẹ gbẹ ruẹ ovao mẹ ofa ha.’+

24 “Fikiere ma tẹ nyabru ọrigbo ra ọsẹ mẹ ma tẹ ta eme olori mẹ kẹe. 25 Oke jọ o vrẹ no, ọsẹ mai ọ tẹ ta nọ, ‘Wha zihe re wha dẹ ememu jọ ze kẹ omai.’+ 26 Rekọ ma tẹ ta nọ, ‘Ma sae nya ha. Oniọvo-ọmọzae ọmaha mai kpobi ọ tẹ rrọ kugbe omai ma rẹ nya, keme ma rẹ sae ruẹ ovao ọzae na ha ajokpanọ oniọvo-ọmọzae ọmaha mai kpobi ọ rrọ kugbe omai.’+ 27 Kẹsena ọrigbo ra ọsẹ mẹ ọ tẹ ta kẹ omai nọ, ‘Wha riẹ vevẹ nọ emezae ivẹ aye mẹ o yẹ kẹ omẹ.+ 28 Rekọ ọvo rai jọ ọ tẹ nyasiọ omẹ ba, mẹ tẹ ta nọ: “Arao ojihẹ jọ ọ za riẹ ekekẹ no na!”+ yọ mẹ re ruẹ e riẹ rite enẹna ha. 29 Wha tẹ jẹ rehọ ọnana no aro mẹ nọ oware uyoma jọ o tẹ via kẹe, wha ve ti ru eza mẹ kpobọ Uki*+ avọ uye.’+

30 “Whaọ me te zihe bru ọrigbo ra ọsẹ mẹ ababọ ọmọzae na nọ ọ rrọ kugbe omai, nọ orọnọ uzuazọ* riẹ avọ uzuazọ* ọnana e gba kugbe na, 31 nọ ọ tẹ nwane ruẹ nọ ọmọzae na ọ riẹ hẹ, o ti whu, erigbo ra a ve ti ru eza ọrigbo ra ọsẹ mai kpobọ Uki* avọ uweri. 32 Ọrigbo ra o viowa kẹ ọsẹ riẹ kpahe ọmọzae na, inọ, ‘Otẹrọnọ me gbe zihe iei se owhẹ hẹ, koyehọ me ru ọsẹ mẹ thọ no evaọ edẹ uzuazọ mẹ kpobi.’+ 33 Fikiere, ivie jọ ọrigbo ra ọ daji viukpọ ọmọzae na re ọ jọ ọrigbo olori mẹ, re ọmọzae na ọ ruẹsi lele inievo riẹ zihe. 34 Ẹvẹ mẹ sai ro zihe bru ọsẹ mẹ ababọ ọmọzae na nọ ọ rrọ kugbe omẹ? Mẹ te sae ruẹ ẹro rri ọsẹ mẹ nọ ọ te ruẹ uye nana ha!”

45 Fiki onana, Josẹf ọ gbẹ jẹ sae gba oma riẹ hẹ evaọ iraro idibo riẹ kpobi.+ Fikiere o te bo nọ: “Jọ ohwo kpobi ọ nyavrẹ!” Ohwo ọvo ọ jọ kugbei hi okenọ Josẹf o dhesẹ oma kẹ inievo riẹ.+

2 O te muhọ ẹviẹ gaga te epanọ ahwo Ijipti a ro yo, yọ uwou Fẹro u yo re. 3 Ukuhọ riẹ, Josẹf ọ tẹ ta kẹ inievo riẹ nọ: “Mẹ họ Josẹf. Kọ ọsẹ mẹ ọ gbẹ rrọ uzuazọ?” Rekọ inievo riẹ a sae kpahe ẹme kẹe vievie he, keme akpọ o gbe rai unu fiki riẹ. 4 Fikiere Josẹf ọ tẹ ta kẹ inievo riẹ nọ: “Wha bi kẹle omẹ, ivie.” Fikiere a te bi kẹle iẹe.

Kẹsena ọ tẹ ta nọ: “Mẹ họ Josẹf oniọvo rai nọ wha zẹ kpobọ Ijipti.+ 5 Rekọ obọnana wha dha eva kẹ ohwohwo ho yọ wha fuọ ohwohwo ho fikinọ wha zẹ omẹ ziọ obonẹ; keme Ọghẹnẹ o vi omẹ karo kẹ owhai re ọ ruẹsi siwi izuazọ.+ 6 Onana họ ukpe avọ ivẹ ohọo na evaọ ẹkwotọ na,+ yọ ikpe isoi i gbe kiọkọ nọ a ti kporo hayo vu hu. 7 Rekọ Ọghẹnẹ o vi omẹ karo kẹ owhai re a ruẹsi siwi ikiọkotọ jọ kẹ owhai+ evaọ otọakpọ* na je ru re wha gbẹ jọ uzuazọ ẹkwoma esiwo ologbo. 8 Fikiere orọnikọ whai họ enọ i vi omẹ ziọ obonẹ hẹ, rekọ Ọghẹnẹ uzẹme na, re ọ rehọ omẹ mu ọkiroro* ologbo kẹ Fẹro gbe olori kẹ uwou riẹ kpobi gbe osu nọ o wuzou iruẹru ẹkwotọ Ijipti soso.+

9 “Wha zihe bru ọsẹ mẹ vẹrẹ vẹrẹ, re wha vuẹe nọ, ‘Enẹ ọmọzae ra Josẹf ọ ta: “Ọghẹnẹ ọ rehọ omẹ mu olori nọ o wuzou iruẹru Ijipti soso no.+ Nyabru omẹ ze. Whọ raha oke he.+ 10 Re whọ rria ẹkwotọ Goshẹn,+ oria nọ whọ rẹ jọ kẹle omẹ oma, whẹ, emezae ra, emọ-iruọmọ ra, ithuru ra, ewa erao ra, gbe eware kpobi nọ who wo. 11 Mẹ te kẹ owhẹ emu evaọ etẹe, keme ikpe isoi i gbe kiọkọ nọ ohọo u re ti mu.+ O gbẹ rrọ ere he, uvuhu u ve ti kpe owhẹ avọ uwou ra gbe eware kpobi nọ who wo.”’ 12 Whai avọ oniọvo mẹ Bẹnjamin wha be rọ ibiaro obọrai ruẹ enẹna inọ mẹ họ ọnọ ọ be ginẹ ta ẹme kẹ owhai na.+ 13 Fikiere wha rẹ vuẹ ọsẹ mẹ hrọ kpahe oruaro mẹ kpobi evaọ Ijipti gbe eware kpobi nọ wha ruẹ na. Wha nya vẹrẹ re wha rehọ ọsẹ mẹ ziọ obonẹ.”

14 Kẹsena ọ tẹ gbalọ* Bẹnjamin oniọvo riẹ ọ tẹ va ruọ oviẹ, Bẹnjamin ọ tẹ jẹ viẹ avọ abọ riẹ nọ ọ rọ gbalọ uriohọ riẹ.*+ 15 Ọ tẹ viọlọ inievo riẹ kpobi jẹ be viẹ epanọ ọ rọ gbalọ ae na, kẹsena inievo riẹ a tẹ ta ẹme kẹe.

16 Usi na u te do te obọ uwou Fẹro inọ: “Inievo Josẹf a nyaze!” Yọ onana u kiehọ evaọ aro Fẹro gbe idibo riẹ. 17 Fikiere Fẹro ọ tẹ ta kẹ Josẹf nọ: “Ta kẹ inievo ra nọ, ‘Wha ru onana: Wha wọ eware fihọ erao rai re wha kpobọ ẹkwotọ Kenan, 18 re wha rehọ ọsẹ rai gbe ahwo uwou rai kpobi re wha nyaze obonẹ bru omẹ ze. Mẹ te kẹ owhai eware iwoma Ijipti, yọ wha te re abọ nọ ọ mai woma* evaọ ẹkwotọ na.’*+ 19 Yọ mẹ kẹ owhẹ udu re whọ vuẹ ae nọ:+ ‘Wha ru enẹ: Wha rehọ ekẹkẹ+ evaọ ẹkwotọ Ijipti nọ e rẹ wọ emọ rai gbe eyae rai, yọ wha rehọ ọvo jọ wọ ọsẹ rai re wha ziọ obonẹ.+ 20 Wha ruawa eyero rai hi,+ keme eware nọ e mai woma evaọ ẹkwotọ Ijipti soso erai.’”

21 Emezae Izrẹl a te ru ere, yọ Josẹf ọ kẹ rai ekẹkẹ wọhọ epanọ Fẹro ọ kẹ udu, yọ ọ kẹ rai eware rọkẹ erẹ na. 22 Ọ kẹ omomọvo rai ewu nọ o re ro nwene, rekọ ọ kẹ Bẹnjamin ewẹ isiliva egba esa (300) gbe iwu isoi nọ o re ro nwene.+ 23 O te vi eware nana se ọsẹ riẹ: eketekete ikpe nọ e wọ emamọ eware Ijipti gbe eketekete eyae ikpe nọ e wọ emu* gbe ebrẹdi gbe eware nọ ọsẹ riẹ ọ te rọ rẹrote oma evaọ erẹ na. 24 O te siobọno inievo riẹ vrẹ, yọ okenọ a jẹ nyavrẹ ọ tẹ ta kẹ ae nọ: “Wha dha eva kẹ ohwohwo evaọ edhere he.”+

25 Kẹsena a te no Ijipti a tẹ te ziọ ẹkwotọ Kenan bru ọsẹ rai Jekọp ze. 26 A te gbiku kẹe nọ: “Josẹf ọ gbẹ rrọ uzuazọ, yọ ọye họ osu nọ o wuzou iruẹru ẹkwotọ Ijipti soso!”+ Rekọ u te rie udu hu keme ọ rọwo ẹme rai hi.+ 27 Nọ a jẹ te vuẹe eme kpobi nọ Josẹf ọ ta kẹ ae, ọ jẹ te jẹ ruẹ ekẹkẹ nọ Josẹf o vi ze inọ a rọ wọe, ẹzi Jekọp ọsẹ rai o te muhọ edhidhivi. 28 Izrẹl o te bo nọ: “U te no! Ọmọzae mẹ Josẹf ọ gbẹ rrọ uzuazọ! Mẹ rẹ nyae ruẹ e riẹ taure me te whu!”+

46 Fikiere Izrẹl ọ tẹ rehọ eware nọ o wo kpobi* ọ tẹ ruọ edhere. Nọ o te Biẹ-shiba,+ o te dhe idhe kẹ Ọghẹnẹ ọsẹ riẹ Aiziki.+ 2 Kẹsena Ọghẹnẹ ọ tẹ jọ eruẹaruẹ ta ẹme kẹ Izrẹl evaọ aso, ọ ta nọ: “Jekọp, Jekọp!” o te yo nọ: “Mẹ na!” 3 Ọ tẹ ta nọ: “Mẹ họ Ọghẹnẹ uzẹme na, Ọghẹnẹ ọsẹ ra.+ Jọ ozọ ekpohọ obọ Ijipti u mu owhẹ hẹ, keme mẹ te jọ obei ru owhẹ fihọ orẹwho ulogbo.+ 4 Mẹ omamẹ me ti lele owhẹ kpobọ Ijipti, yọ mẹ omamẹ mẹ te jẹ rehọ owhẹ no obei ze,+ yọ Josẹf ọ te rehọ obọ riẹ kpahe owhẹ aro.”*+

5 Kẹsena Jekọp o te no Biẹ-shiba, emezae Izrẹl a tẹ rehọ ekẹkẹ nọ Fẹro o vi ze inọ a rọ wọe na wọ Jekọp ọsẹ rai gbe emọ rai gbe eyae rai. 6 A rehọ ewa erao rai gbe eware rai lele oma, enọ a kokohọ evaọ ẹkwotọ Kenan. A tẹ ziọ obọ Ijipti, te Jekọp te emọ riẹ kpobi. 7 Ọ wha emezae riẹ avọ emọ-iruọmọ riẹ erọ emezae, gbe emetẹ riẹ avọ emọ-iruọmọ riẹ erọ emetẹ lele oma ziọ Ijipti, koyehọ emọ riẹ kpobi.

8 Enana họ edẹ emezae Izrẹl nọ e ziọ Ijipti,+ Jekọp avọ emezae riẹ: Ọmọ ọsosuọ Jekọp họ Rubẹn.+

9 Emezae Rubẹn họ Henọk, Palu, Hẹzrọn, gbe Kamae.+

10 Emezae Simiọn+ họ Jẹmuẹl, Jemin, Ohad, Jekin, Zoha, gbe Sheọl+ ọmọzae nọ aye Kenan o yẹ kẹe.

11 Emezae Livae+ họ Gẹshọn, Kohat, gbe Mẹrarae.+

12 Emezae Juda+ họ Ẹr, Onan, Shila,+ Pirẹz,+ gbe Zira.+ Rekọ Ẹr avọ Onan a whu evaọ obọ ẹkwotọ Kenan.+

Emezae Pirẹz họ Hẹzrọn avọ Hemọl.+

13 Emezae Isaka họ Tola, Puva, Yọb, gbe Shimrọn.+

14 Emezae Zẹbulọn+ họ Sirẹd, Ilọn, gbe Jaliẹl.+

15 Enana họ emezae Lia nọ o yẹ kẹ Jekọp evaọ Padan-eram, kugbe ọmọtẹ riẹ Daena.+ Te emezae te emetẹ riẹ* kpobi ọgbagbesa.

16 Emezae Gad+ họ Zifiọn, Hẹgae, Shunae, Ẹzbọn, Irae, Arodae, gbe Arilae.+

17 Emezae Asha+ họ Imnah, Ishva, Ishvae, gbe Bẹraya, yọ oniọvo-ọmọtẹ rai họ Sira.

Emezae Bẹraya họ Hiba avọ Malkiẹl.+

18 Enana họ emezae Zilpa,+ ọnọ Leban ọ rọ kẹ Lia ọmọtẹ riẹ. Ọye o yẹ enana kẹ Jekọp: aikpobi emọ* ikpegbezeza.

19 Emezae Reshẹl aye Jekọp họ Josẹf+ avọ Bẹnjamin.+

20 A jọ obọ ẹkwotọ Ijipti yẹ Manasẹ+ avọ Ifremu+ kẹ Josẹf, Asenat+ ọmọtẹ Pọtaefẹra ozerẹ Ọn* o yẹ rai kẹe.

21 Emezae Bẹnjamin+ họ Bila, Bika, Ashbẹl, Gira,+ Neaman, Ihae, Rọsh, Mọpim, Họpim,+ gbe Ard.+

22 Enana họ emezae Reshẹl nọ o yẹ kẹ Jekọp: aikpobi emọ* ikpegbene.

23 Ọmọzae* Dan+ họ Hushim.+

24 Emezae Naftalae+ họ Jaziẹl, Gunae, Jiza, gbe Shilẹm.+

25 Enana họ emezae Bilha, ọnọ Leban ọ rọ kẹ Reshẹl ọmọtẹ riẹ. Ọye o yẹ enana kẹ Jekọp: aikpobi emọ* ihrẹ.

26 Ahwo* nọ i no oma Jekọp ze kpobi nọ i lele i rie kpobọ Ijipti, u te no eyae emezae Jekọp no, ahwo udhosa-gbezeza.+ 27 Emezae Josẹf nọ a yẹ kẹe evaọ Ijipti ivẹ. Ahwo* uwou Jekọp kpobi nọ a ziọ obọ Ijipti udhosa-gbikpe.+

28 Jekọp o te vi Juda+ karo re ọ nyae vuẹ Josẹf inọ ọ rrọ edhere bi kpobọ Goshẹn. Nọ a ziọ obọ ẹkwotọ Goshẹn no,+ 29 Josẹf ọ tẹ ruẹrẹ akẹkẹ riẹ họ, ọ tẹ nyae ruẹ Izrẹl ọsẹ riẹ evaọ obọ Goshẹn. Nọ ọ rọ oma via kẹe, ọ tẹ nwane gbalọ iẹe* ọ tẹ viẹ evaọ etoke jọ.* 30 Kẹsena Izrẹl ọ tẹ ta kẹ Josẹf nọ: “Enẹna mẹ sai whu; mẹ ruẹ ovao ra no jẹ ruẹ no nọ whọ gbẹ rrọ uzuazọ.”

31 Josẹf ọ tẹ ta kẹ inievo riẹ gbe ahwo uwou ọsẹ riẹ nọ: “Jomẹ nya re mẹ vuẹ Fẹro+ re mẹ ta kẹe nọ, ‘Inievo mẹ gbe ahwo uwou ọsẹ mẹ nọ a jọ obọ ẹkwotọ Kenan a ziọ obonẹ bru omẹ ze no.+ 32 Ezae na yọ ithuru-igodẹ,+ a re thuru erao,+ yọ a wha ithuru rai gbe ewa erao rai gbe eware kpobi nọ a wo ze.’+ 33 Nọ Fẹro o te se owhai jẹ nọ nọ, ‘Didi okọ wha be kọ?’ 34 wha rẹ ta nọ, ‘Erao idibo ra a bi thuru no oke emaha ze rite inẹnẹ, te omai te esẹ-esẹ mai,’+ re wha ruẹse rria ẹkwotọ Goshẹn,+ keme ohwo kpobi nọ o re su igodẹ o re tu* ahwo Ijipti oma.”+

47 Fikiere Josẹf ọ tẹ nya ọ tẹ vuẹ Fẹro nọ:+ “Ọsẹ mẹ gbe inievo mẹ gbe ithuru erao rai gbe ewa erao rai gbe eware kpobi nọ a wo a no obọ ẹkwotọ Kenan ze no, a rrọ ẹkwotọ Goshẹn.”+ 2 Ọ tẹ rehọ inievo isoi riẹ jọ nyai dhesẹ kẹ Fẹro.+

3 Fẹro ọ tẹ nọ inievo riẹ nọ: “Didi okọ wha be kọ?” A te yo kẹ Fẹro nọ: “Idibo ra yọ ahwo nọ a re su igodẹ, te omai te esẹ-esẹ mai.”+ 4 Kẹsena a tẹ ta kẹ Fẹro nọ: “Ma nyaze re ma rria wọhọ erara evaọ ẹkwotọ na,+ keme ẹbe ọ riẹ kẹ uthuru erao idibo ra ha, keme ohọo na o rrọ gaga evaọ obọ ẹkwotọ Kenan.+ Fikiere, ivie, jọ idibo ra a rria ẹkwotọ Goshẹn.”+ 5 Kẹsena Fẹro ọ tẹ ta kẹ Josẹf nọ: “Ọsẹ ra gbe inievo ra a ziọ obonẹ bru owhẹ ze no. 6 Ẹkwotọ Ijipti ọ rrọ owhẹ obọ. Rehọ abọ nọ ọ mai woma evaọ ẹkwotọ na kẹ ọsẹ ra gbe inievo ra re a rria.+ Jọ a rria ẹkwotọ Goshẹn, yọ otẹrọnọ whọ riẹ ezae jọ evaọ usu rai nọ i te ziezi, fi ai họ re a rẹrote* erao mẹ.”

7 Kẹsena Josẹf ọ tẹ rehọ Jekọp ọsẹ riẹ ze ti dhesẹ iẹe kẹ Fẹro, Jekọp ọ tẹ lẹ ẹro eghale kẹ Fẹro. 8 Fẹro ọ tẹ nọ Jekọp nọ: “Ẹvẹ whọ kpako te no?” 9 Jekọp ọ tẹ ta kẹ Fẹro nọ: “Ikpe nọ me ro ghoro* no i bu te udhozeza-gbikpe (130). Ikpe nọ mẹ rria uzuazọ no i bu hu yọ e vọ avọ uye,+ yọ i tube bu te ikpe uzuazọ esẹ-esẹ mẹ hẹ evaọ etoke nọ a je ro ghoro.”*+ 10 Kẹsena Jekọp ọ tẹ lẹ ẹro eghale kẹ Fẹro ọ tẹ nyavrẹ no aro riẹ.

11 Fikiere Josẹf o te fi ọsẹ riẹ gbe inievo riẹ họ oria nọ a rẹ rria, ọ kẹ rai otọ evaọ ẹkwotọ Ijipti, evaọ abọ nọ ọ mai woma evaọ orẹwho na, evaọ ẹkwotọ Ramesis+ nwane wọhọ epanọ Fẹro ọ ta. 12 Josẹf ọ jẹ hae kẹ ọsẹ riẹ gbe inievo riẹ gbe ahwo uwou ọsẹ riẹ kpobi emu* lele epanọ emọ rai i bu te.

13 Whaọ emu* ọ gbẹ jọ ẹkwotọ na soso ho, keme ohọo na o ga thesiwa, ẹkwotọ Ijipti gbe ẹkwotọ Kenan kpobi ọ tẹ te ya fia fiki ohọo na.+ 14 Josẹf o je mi igho kpobi nọ e jọ ẹkwotọ Ijipti gbe ẹkwotọ Kenan rọkẹ emu* nọ ahwo na a jẹ dẹ,+ yọ Josẹf ọ jẹ rehọ igho na ziọ uwou Fẹro. 15 Nọ oke o be nya na, igho nọ e jọ ẹkwotọ Ijipti gbe ẹkwotọ Kenan i te re no, ahwo Ijipti kpobi a te mu Josẹf họ ẹnyabru ze be ta nọ: “Kẹ omai emu! Fikieme ma re ro whu yọ who bi rri omai fikinọ igho mai i re no?” 16 Kẹsena Josẹf ọ tẹ ta nọ: “Otẹrọnọ igho rai i re no, wha rọ erao rai ze, mẹ vẹ te kẹ owhai emu ro nwene erao rai.” 17 Fikiere a te mu erao rai họ ẹrehọ se Josẹf, Josẹf ọ tẹ jẹ kẹ ae emu ro nwene enyenya rai, uthuru erao gbe owa erao rai, gbe eketekete na, ọ tẹ jẹ kẹ ae emu ro nwene erao rai kpobi evaọ ukpe yena.

18 Nọ ukpe yena u re no, a te mu ei họ ẹnyabru ze evaọ ukpe nọ u lele i rie be ta nọ: “Ma ti si onana no họ olori mẹ hẹ inọ ma rehọ ugho gbe owa erao mai kẹ olori mẹ no. Ma gbe wo oware ofa nọ u kiọkọ họ nọ ma rẹ kẹ olori mẹ ajokpaọ oma mai gbe otọ mai. 19 Fikieme ma re ro whu yọ who bi rri omai, te omai te otọ mai? Dẹ omai gbe otọ mai re whọ kẹ omai emu, re mai gbe otọ mai ma zihe ruọ erigbo kẹ Fẹro. Kẹ omai ibi re ma ruẹse jọ uzuazọ re ma seba ewhu re ẹkwotọ mai ọ gbẹ jọ ofofe he.” 20 Josẹf ọ tẹ dẹ otọ ahwo Ijipti kpobi kẹ Fẹro keme ohwo Ijipti kpobi ọ zẹ otọ riẹ, keme ohọo na o ga thesiwa; otọ na u te zihe ruọ orọ Fẹro.

21 Kẹsena ọ tẹ kwa ahwo na fihọ ikpewho, rono oka ẹkwotọ Ijipti rite oka odekọ riẹ.+ 22 Otọ izerẹ na ọvo ọ dẹ hẹ,+ keme ẹkẹ emu izerẹ na o je no obọ Fẹro ze yọ ẹkẹ emu nọ Fẹro ọ jẹ kẹ ae na a jẹ rọ kuọ oma. Oyejabọ nọ a gbẹ zẹ otọ rai hi. 23 Kẹsena Josẹf ọ tẹ ta kẹ ahwo na nọ: “Rri, nẹnẹ na mẹ dẹ owhai avọ otọ rai kẹ Fẹro no. Wha mi ibi re wha kọ fihọ otọ na. 24 Nọ e tẹ mọ no, wha rẹ rọ abọvo abasoi kẹ Fẹro,+ rekọ abane ọ vẹ jọ ibi rai nọ wha rẹ kọ fihọ otọ na gbe emu nọ wha rẹ rọ kuọ omarai, ahwo nọ a rrọ iwou rai gbe emọ rai.” 25 Fikiere a tẹ ta nọ: “Who siwi izuazọ mai no.+ Jọ olori mẹ o rri omai aro, ma rẹ te jọ erigbo Fẹro.”+ 26 Kẹsena Josẹf o te ru ei fihọ uzi, onọ o gbẹ rrọ otọ rite inẹnẹ evaọ ẹkwotọ Ijipti, inọ abọvo abasoi yọ orọ Fẹro. Otọ izerẹ na ọvo u zihe ruọ orọ Fẹro ho.+

27 Izrẹl ọ tẹ jẹ rria ẹkwotọ Goshẹn+ evaọ orẹwho Ijipti, etẹe a jẹ rria yọ a je vihọ je bu gaga.+ 28 Jekọp ọ tẹ rria ẹkwotọ Ijipti ikpe ikpegbihrẹ, fikiere ikpe uzuazọ Jekọp e tẹ jọ ikpe udhuhrẹ-gbihrẹ (147).+

29 Oke uwhu Izrẹl u te je si kẹle,+ fikiere o te se ọmọzae riẹ Josẹf ọ tẹ ta nọ: “Otẹrọnọ who wo aruoriwo kẹ omẹ, ivie fi obọ ra họ otọ ekpokpowọ mẹ rọ kẹ imuẹro nọ who ti dhesẹ uyoyou nọ o rẹ hiẹ hẹ gbe ọtẹruo kẹ omẹ. Ivie, who ki omẹ fihọ Ijipti hi.+ 30 Nọ me te whu,* whọ rẹ wọ omẹ no Ijipti hrọ who ve ki omẹ fihọ uki esẹ-esẹ mẹ.”+ Fikiere ọ tẹ ta nọ: “Me ti ru epanọ whọ ta na dẹẹ.” 31 Kẹsena ọ tẹ ta nọ: “Duwu iyei kẹ omẹ.” Fikiere o te duwu iyei kẹe.+ Kẹsena Izrẹl o te guzou kpotọ fihọ uzou ehwa riẹ.+

48 Nọ eware nana e vrẹ no, a tẹ vuẹ Josẹf nọ: “Rri, oma ọsẹ ra o lọhọ gaga no.” Kẹsena ọ tẹ rehọ emezae ivẹ riẹ Manasẹ avọ Ifremu kugbe oma.+ 2 A tẹ vuẹ Jekọp nọ: “Ọmọzae ra Josẹf ọ nyabru owhẹ ze.” Fikiere Izrẹl ọ tẹ rọ ẹgbẹgba kpama keria ehru ehwa riẹ. 3 Jekọp ọ tẹ ta kẹ Josẹf nọ:

“Ọghẹnẹ Erumeru na ọ romavia kẹ omẹ evaọ Lọz evaọ ẹkwotọ Kenan ọ tẹ ghale omẹ.+ 4 Ọ tẹ ta kẹ omẹ nọ, ‘Me bi ru owhẹ vihọ, yọ me ti ru owhẹ bu, yọ me ti ru owhẹ fihọ ogbotu ahwo buobu,+ yọ mẹ te rehọ ẹkwotọ nana kẹ emọ* ra nọ i ti lele owhẹ re o jọ ọrai bẹdẹ bẹdẹ.’+ 5 Emezae ivẹ ra nọ a yẹ kẹ owhẹ evaọ ẹkwotọ Ijipti taure mẹ tẹ te nyabru owhẹ ziọ obọ Ijipti obonẹ na yọ emẹ.+ Ifremu avọ Manasẹ a ti zihe ruọ emẹ nwane wọhọ epanọ Rubẹn avọ Simiọn a rrọ emẹ na.+ 6 Rekọ emọ ra efa nọ a yẹ tu ai e rẹ te jọ era. Odẹ inievo rai a ti ro se ai evaọ ukuoriọ rai.+ 7 Whaọ okenọ me je no obọ Padan ze, Reshẹl o te whu+ evaọ abotọ mẹ evaọ ẹkwotọ Kenan, yọ ma gbe thabọ no Efrat.+ Fikiere me te ki ei họ etẹe nọ ma jọ edhere je kpobọ Efrat, koyehọ Bẹtlẹhẹm.”+

8 Kẹsena Izrẹl ọ tẹ ruẹ emezae Josẹf ọ tẹ nọ inọ: “Nọ amono?” 9 Josẹf ọ tẹ ta kẹ ọsẹ riẹ nọ: “Nọ emezae mẹ nọ Ọghẹnẹ ọ kẹ omẹ evaọ obonẹ.”+ Kẹsena ọ tẹ ta nọ: “Rehọ ai se omẹ, ivie, re mẹ lẹ ẹro eghale kẹ ae.”+ 10 Whaọ ibiaro Izrẹl i dhe no fiki owho, ọ gbẹ jẹ ruẹ ude he. Fikiere Josẹf ọ tẹ rehọ ae kẹle iẹe, ọ tẹ viọlọ ae jẹ gbalọ ae. 11 Izrẹl ọ tẹ ta kẹ Josẹf nọ: “Me roro nọ mẹ te gbẹ ruẹ ovao ra ofa ha,+ rekọ Ọghẹnẹ o ru omẹ ruẹ emọ* ra no re.” 12 Kẹsena Josẹf ọ tẹ rehọ ai no ighilawọ Izrẹl, o te kigwẹ rọ uzou te otọ.

13 Josẹf ọ tẹ rehọ emọ ivẹ na, ọ tẹ rehọ obọze riẹ kru Ifremu+ fihọ ẹkpẹlobọ Izrẹl jẹ rọ ẹkpẹlobọ riẹ kru Manasẹ+ fihọ obọze Izrẹl, ọ tẹ rehọ ai tei oma. 14 Rekọ Izrẹl ọ tẹ rriẹ obọze riẹ ọ tẹ rehọ iẹe kpahe uzou Ifremu, dede nọ ọye họ ọrọ ọmaha, ọ tẹ rehọ obọ ẹkpẹlobọ riẹ kpahe uzou Manasẹ. O keke aro fihọ fi abọ riẹ họ ere, dede nọ ọ riẹ nọ Manasẹ họ ọmọ ọsosuọ.+ 15 Kẹsena ọ tẹ lẹ ẹro eghale kẹ Josẹf ọ tẹ ta nọ:+

17 Nọ Josẹf ọ ruẹ nọ ọsẹ riẹ ọ gbẹ rọ obọze riẹ kpahe uzou Ifremu, o tẹ jẹ kẹe uye, fikiere ọ tẹ jẹ daoma kru obọ ọsẹ riẹ re o si ei no uzou Ifremu fihọ uzou Manasẹ. 18 Josẹf ọ ta kẹ ọsẹ riẹ nọ: “Ere he, ọsẹ mẹ, keme ọnana họ ọmọ ọsosuọ.+ Fi obọze ra họ uzou riẹ.” 19 Rekọ ọsẹ riẹ ọ tẹ jẹ se, ọ ta nọ: “Mẹ riẹ ere, ọmọzae mẹ, mẹ riẹ ere. Ọyomariẹ o ti zihe ruọ ahwo buobu re, yọ ọyomariẹ ọ te jọ ruaro re. Rekọ oniọvo ọmaha riẹ ọ te rro vi ei,+ yọ emọ* riẹ i ti bu te erẹwho buobu.”+ 20 Fikiere ọ tẹ ruabọhọ jẹ lẹ ẹro eghale kẹ ae evaọ ẹdẹ yena+ inọ:

Fikiere ọ tẹ jẹ rọ Ifremu karo kẹ Manasẹ.

21 Kẹsena Izrẹl ọ tẹ ta kẹ Josẹf nọ: “Rri, ewhu mẹ rrọ na,+ rekọ Ọghẹnẹ ọ te gbẹ jọ kugbe owhẹ hrọ, yọ o ti zihe owhẹ kpobọ ẹkwotọ esẹ-esẹ ra.+ 22 Mẹ be kẹ owhẹ ẹkẹ otọ ọvo jọ* kugbe re ora u bu vi orọ inievo ra, onọ mẹ rehọ ọgbọdọ gbe uze mẹ mi ahwo Amọ.”

49 Jekọp o te se emezae riẹ ọ tẹ ta nọ: “Wha kokohọ re mẹ vuẹ owhai oware nọ o te via kẹ owhai evaọ abọ urere edẹ na. 2 Wha kokohọ re wha gaviezọ, whai emezae Jekọp, ẹhẹ, wha gaviezọ kẹ Izrẹl ọsẹ rai.

3 “Rubẹn,+ whẹ họ ọmọ ọsosuọ mẹ,+ ẹgba mẹ gbe ọmọ nọ me ro mu eyẹ họ,* ọghọ nọ ọ mae rro gbe ogaga nọ o mae rro. 4 Fikinọ whọ sai kru oma ra ha wọhọ ame nọ ọ be vohẹ, whọ te karo ho, keme whọ ruọ ehwa ọsẹ ra.+ Evaọ oke yena who zue ehwa mẹ.* Ọ ginẹ ruọ ehru riẹ!

5 “Simiọn avọ Livae yọ inievo.+ Ekwakwa ozighi họ ekwakwa ikpakpe rai.+ 6 Jomẹ ruọ usu rai hi. Who kuomagbe usu rai hi, O ọghọ* mẹ, keme a mu ofu nọ a ro kpe ahwo,+ yọ a wiri awọ iruẹ ro ru eva were omarai. 7 Ekela i te ofu rai, keme ofu omuomu, gbe evedha rai, keme o ga hrọ.+ Jomẹ vaha ae ruọ udevie Jekọp, jomẹ vaha ae ruọ udevie Izrẹl.+

8 “Rọkẹ owhẹ Juda,+ inievo ra a ti jiri owhẹ.+ Obọ ra o te jọ uriohọ ewegrẹ ra.+ Emezae ọsẹ ra a ti guzou kpotọ kẹ owhẹ.+ 9 Juda yọ ọmọ okpohrokpo.+ Whọ te kpama no ehru arao nọ who kpe ze, ọmọzae mẹ. O rruẹ fihọ otọ jẹ rriẹ oma fihọ otọ wọhọ okpohrokpo, yọ wọhọ okpohrokpo, ono o re yiwi ru ei kpama? 10 Ọkpọ-isuẹsu na o ti no Juda ha,+ yọ ọkpọ osu na o ti no agada riẹ hẹ, bẹsenọ Shailo* ọ rẹ nyaze,+ yọ ọye ahwo na a ti yoẹme kẹ.+ 11 Ọ te gba eketekete riẹ si evaene gbe ọmọ eketekete riẹ si emamọ evaene, ọ vẹ te fọrọ ehọ riẹ evaọ enwaene jegbe ewu riẹ evaọ azẹ ibi evaene. 12 Ibiaro riẹ e be ware fiki enwaene nọ ọ da, yọ ibiakọ riẹ e be fo fiki ame-ivie nọ ọ da.

13 “Zẹbulọn+ ọ te rria akotọ abade, unueri nọ ekọ ilogbo e rẹ kpahe,+ yọ oka uwhru riẹ o te jọ ofẹ obọ Saedọn.+

14 “Isaka+ yọ eketekete nọ ọ ga ugbonwa, nọ o rruẹ fihọ otọ avọ ekpa-owha ivẹ nọ e rrọ ehru riẹ tabọ tabọ. 15 Yọ ọ te ruẹ nọ oria eriosehọ na u woma gbe nọ otọ na u kiehọ oma. O ti go ẹkoko riẹ kpotọ re ọ wọ owha yọ ọ te rọwo ru iruo ọgbahọ.

16 “Dan+ o ti bruoziẹ ahwo riẹ wọhọ ọvo jọ evaọ erua Izrẹl.+ 17 Jọ Dan ọ jọ araomuomu nọ ọ rrọ akotọ edhere, araomuomu nọ o wo izei nọ ọ rrọ akotọ edhere, nọ ọ rẹ rowo ithihrawọ anyenya u ve ru ọnọ ọ be dhẹe na kie kpobọ emu.+ 18 Mẹ te hẹrẹ esiwo nọ o ti no obọ ra ze, O Jihova.

19 “Rọkẹ Gad,+ egbaẹmo e te wọ bru ei ze, rekọ ọ te rọ tua ae yọ a be dhẹ.+

20 “Ebrẹdi* Asha+ e te jọ buobu,* yọ ọ te rehọ emu nọ o fo kẹ ovie ze.+

21 “Naftalae+ yọ orua* aye nọ ọ rrọ oma kakao. Ọ be ta eme awere.+

22 “Josẹf+ yọ ogha ure nọ o be mọ ibi, ure nọ o be mọ ibi nọ o rrọ akotọ eyeri-ame, nọ o za egha ruọ abọdekọ ugbẹhẹ. 23 Rekọ enọ e rẹ sa ose a jẹ họre iẹe, a sa riẹ je fi egrẹ họ eva kẹe.+ 24 Ghele na uze riẹ o daji ẹta riẹ,+ yọ abọ riẹ e jọ gaga jẹ jọ gragragra.+ Obọ ọnọ ọ rrọ ọgba Jekọp onana u no ze, obọ othuru-igodẹ na, utho Izrẹl na. 25 Obọ Ọghẹnẹ ọsẹ ra o* no ze, yọ o ti fiobọhọ kẹ owhẹ, ọ rrọ kugbe Erumeru na, yọ ọ te rọ eghale obọ idhiwu na ghale owhẹ, gbe eghale edidi na,+ kugbe eghale ivie avọ edhede. 26 Eghale ọsẹ ra i ti kpehru vi eghale igbehru ebẹdẹ bẹdẹ na je kpehru vi eware nọ i re siuru erọ ikpehru ebẹdẹ bẹdẹ na.+ E te jọ uzou Josẹf, oko uzou ọnọ a salọ no udevie inievo riẹ ze.+

27 “Bẹnjamin+ ọ te za ekekẹ vrẹ ọvo wọhọ ojera.+ Evaọ ohiohiẹ ọ te re erao nọ o kpe, yọ evaọ owọwọ ọ te ghale egbo-ẹmo.”+

28 Enana kpobi họ erua ikpegbivẹ Izrẹl, yọ eware nana ọsẹ rai ọ ta kẹ ae okenọ ọ jẹ ghale ae. Ọ kẹ rai omomọvo oghale nọ u fo rie.+

29 Kẹsena ọ tẹ ta kẹ ae nọ: “A bi koko omẹ họ bru ahwo mẹ.*+ Wha ki omẹ kugbe esẹ mẹ fihọ eghogho-utho nọ o rrọ otọ Ifrọn ohwo Hit na,+ 30 eghogho-utho nọ o rrọ otọ Mak-pila nọ o rrọ aro Mamre evaọ ẹkwotọ Kenan, otọ nọ Abraham ọ dẹ mi Ifrọn ohwo Hit na re o jọ oria nọ o re ki ahwo fihọ. 31 Etẹe a ki Abraham avọ aye riẹ Sera fihọ.+ Etẹe a ki Aiziki+ avọ aye riẹ Rebeka fihọ, yọ etẹe me ki Lia fihọ. 32 A dẹ otọ na gbe eghogho-utho nọ o riẹe eva na mi emezae Hẹt.”+

33 Jekọp o te ku eme nana nọ ọ jẹ ta kẹ emezae riẹ na họ. Kẹsena ọ tẹ wọ awọ riẹ fihọ ehru ehwa na o te se ẹwẹ urere riẹ a te koko iei họ bru ahwo riẹ.*+

50 Josẹf o te kie fihọ ọsẹ riẹ+ ọ tẹ viẹ fihọ oma riẹ jẹ viọlọ iẹe. 2 Kẹsena Josẹf ọ tẹ ta kẹ idibo riẹ, ebo-imu na, re a bamu+ ọsẹ riẹ. Fikiere ebo-imu na a tẹ bamu Izrẹl, 3 a rehọ edẹ udhuvẹ gbagba ru onana kẹe, keme unu edẹ nana gbagba a re ro ru ẹbamu na, ahwo Ijipti na a tẹ ruabọhọ oviẹ fiki riẹ edẹ udhosa-gbikpe.

4 Nọ edẹ nọ a ro weri ei e vrẹ no, Josẹf ọ tẹ ta kẹ ogbẹgwae* Fẹro nọ: “Otẹrọnọ me wo ọjẹrehọ rai, wha vuẹ Fẹro uwou nana: 5 ‘Ọsẹ mẹ o ru omẹ duwu iyei,+ ọ ta nọ: “Rri! ewhu mẹ rrọ na.+ Who re ki omẹ fihọ uki mẹ,+ onọ me bru fihọ obọ otọ Kenan.”+ Ivie, jomẹ nya re me ki ọsẹ mẹ, nọ me te ru no me ti zihe ze.’” 6 Fẹro ọ tẹ ta nọ: “Nyai ki ọsẹ ra wọhọ epanọ o ru owhẹ duwu iyei na.”+

7 Fikiere Josẹf ọ tẹ nya re o ki ọsẹ riẹ, yọ idibo Fẹro kpobi a lele i rie, ekpako+ ogbẹgwae riẹ gbe ekpako otọ Ijipti kpobi 8 gbe ahwo uwou Josẹf kpobi gbe inievo riẹ gbe ahwo uwou ọsẹ riẹ.+ Emọ esese rai gbe ithuru rai gbe ewa erao rai ọvo a nyaseba otọ Goshẹn. 9 Ekẹkẹ+ gbe edhẹ-enyenya i lele i rie nya re, utu ahwo na o jọ buobu gaga. 10 Kẹsena a te te oria nọ a rẹ jọ si ibi no igbe ekakọ ọrọ Etad, nọ o rrọ ẹkwotọ Jọdan, a jọ etẹe viẹ gaga je weri gaga, ọ tẹ ruabọhọ weri ọsẹ riẹ edẹ ihrẹ. 11 Ahwo nọ a be rria otọ na, ahwo Kenan, a ruẹ e rai nọ a je weri evaọ oria nọ a rẹ jọ si ibi no igbe ekakọ ọrọ Etad, a te bo nọ: “Onana yọ uweri ulogbo kẹ ahwo Ijipti!” Oyejabọ nọ a ro se odẹ riẹ Ebẹl-mizreyẹm,* onọ o rrọ ẹkwotọ Jọdan.

12 Fikiere emezae riẹ a te ru epanọ ọ ta kẹ ae na kẹe ẹrẹrẹe.+ 13 Emezae riẹ a wọ riẹ kpobọ otọ Kenan a te ki ei fihọ eghogho-utho nọ o rrọ otọ Mak-pila, otọ nọ o rrọ aro Mamre nọ Abraham ọ dẹ mi Ifrọn ohwo Hit na re o jọ oria nọ o re ki ahwo fihọ.+ 14 Nọ o ki ọsẹ riẹ no, Josẹf o te zihe kpobọ Ijipti kugbe inievo riẹ gbe ahwo kpobi nọ a lele i rie nyai ki ọsẹ riẹ.

15 Nọ inievo Josẹf a ruẹ nọ ọsẹ rai o whu no, a tẹ ta nọ: “O sae jọ nọ Josẹf o fi egrẹ họ eva kẹ omai yọ ẹsejọhọ o ti ru omai kele fiki eware iyoma kpobi nọ ma ru rie.”+ 16 Fikiere a te vi uwou se Josẹf nọ: “Ọsẹ ra ọ ta enẹ taure o te ti whu inọ: 17 ‘Enẹ wha rẹ ta kẹ Josẹf: “Mẹ lẹ owhẹ, ivie rọ oruthọ inievo ra rọvrẹ rai gbe uzi nọ a raha nọ a rọ wha uye utioye se owhẹ.”’ Fikiere, ivie, rọ oruthọ idibo Ọghẹnẹ ọsẹ ra rọvrẹ rai.” Josẹf ọ tẹ viẹ nọ a ta ẹme nana kẹe. 18 Kẹsena inievo riẹ a tẹ nyaze re, a te kigwẹ fihọ aro riẹ, a tẹ ta nọ: “Enẹna mai erigbo kẹ owhẹ!”+ 19 Josẹf ọ tẹ ta kẹ ae nọ: “Jọ ozọ u mu owhai hi. Kọ mẹ rrọ ẹta Ọghẹnẹ? 20 Dede nọ wha gwọlọ ru omẹ oware uyoma,+ Ọghẹnẹ o wo rie họ iroro nọ o re zihe iei ruọ oware uwoma re o siwi uzuazọ ahwo buobu, wọhọ epanọ o bi ru nẹnẹ na.+ 21 Fikiere jọ ozọ u mu owhai hi. Mẹ te gbẹ hae kẹ owhai gbe emọ esese rai emu.”+ Ọ tẹ rọ ere sasa ae oma jẹ kẹ ae imuẹro.

22 Josẹf ọ tẹ gbẹ jẹ rria Ijipti, tei te ahwo uwou ọsẹ riẹ, Josẹf ọ rria ikpe udhusoi-gbikpe (110). 23 Josẹf ọ ruẹ oge avọ esa ọrọ emezae Ifremu,+ gbe emezae Meka+ ọmọzae Manasẹ. A yẹ rai fihọ ighilawọ* Josẹf. 24 Uwhremu na Josẹf ọ tẹ ta kẹ inievo riẹ nọ: “Ewhu mẹ rrọ na, rekọ Ọghẹnẹ ọ te rẹriẹ ovao rri owhai hrọ,+ yọ ọ te ginẹ rehọ owhai no otọ nana kpohọ otọ nọ o duwu iyei nọ ọ te kẹ Abraham, Aiziki, gbe Jekọp.”+ 25 Fikiere Josẹf o te ru emezae Izrẹl duwu iyei, ọ ta nọ: “Ọghẹnẹ ọ te rẹriẹ ovao rri owhai hrọ. Wha rẹ rehọ igbenwa mẹ no etenẹ hrọ.”+ 26 Josẹf o te whu nọ ọ kpako te ikpe udhusoi-gbikpe (110) no, a tẹ bamu riẹ,+ a te fi ei họ etehe-ori evaọ Ijipti.