IRUO-IZERẸ

1 Kẹsena Jihova o te se Mosis ọ tẹ ta ẹme kẹe no uwou-udhu omakugbe na+ ze, inọ: 2 “Ta kẹ ahwo Izrẹl* nọ, ‘Otẹrọnọ ohwo jọ evaọ usu rai ọ be kẹ Jihova okẹ rono erao ẹwho ze, wha rẹ rehọ okẹ rai no owa erao hayo uthuru erao ze.+

3 “‘Otẹrọnọ okẹ riẹ yọ idhe emahọ nọ ọ be rehọ no owa erao ze, ọrọ ọzae nọ ọ rrọ omakọkọ ọ rẹ rehọ ze.+ O rẹ jọ okẹ nọ ọ be rọ iroro obọriẹ kẹ+ evaọ aro Jihova evaọ unuẹthẹ uwou-udhu omakugbe na. 4 Ọ rẹ rọ obọ riẹ kpahe uzou arao idhe emahọ na, yọ a rẹ rehọ iẹe mi ei ro ru omavoro kẹe.

5 “‘Kẹsena a ve kpe eruẹ ọsese na evaọ aro Jihova, emezae Erọn, izerẹ na,+ a vẹ rehọ azẹ na ze kẹ idhe na a vẹ frẹ azẹ na fihọ tabọ tabọ agbada-idhe na kpobi wariẹ họ,+ onọ o rrọ aro unuẹthẹ uwou-udhu omakugbe na. 6 A re ku ohọrọ no arao idhe emahọ na a vẹ vae ekekẹ.+ 7 Emezae Erọn, izerẹ na a re koko erae họ agbada-idhe na,+ a rẹ ruẹrẹ ire họ erae na. 8 Emezae Erọn, izerẹ na a rẹ ruẹrẹ ekẹ-arao nọ a bi ti ro dhe idhe na họ+ kugbe uzou na avọ iwhri* na fihọ ehru ire nọ e rrọ erae na evaọ ehru agbada-idhe na. 9 A rẹ rehọ ame wozẹ ivu riẹ gbe awọ riẹ, yọ ozerẹ na o re ru oma riẹ kpobi kuye iwiri evaọ ehru agbada-idhe na re o jọ idhe emahọ, idhe nọ a rọ erae mahe nọ u re gbo ore awere* kẹ Jihova.+

10 “‘Otẹrọnọ ọ be rehọ okẹ idhe emahọ riẹ no uthuru erao ze,+ evaọ usu emọ igbo na hayo ewe na ọ rẹ jọ rehọ, yọ ọrọ ọzae nọ ọ rrọ omakọkọ ọ rẹ rehọ ze.+ 11 A re kpei evaọ abọ ẹkpẹlobọ ovatha-ọre agbada-idhe na evaọ aro Jihova, yọ emezae Erọn izerẹ na a rẹ frẹ azẹ riẹ fihọ tabọ tabọ agbada-idhe na kpobi wariẹ họ.+ 12 Ọ rẹ vae ekekẹ, yọ ozerẹ na ọ rẹ ruẹrẹ iẹe họ kugbe uzou riẹ avọ iwhri riẹ,* ọ rẹ ruẹrẹ ae họ ehru ire nọ e rrọ erae na evaọ ehru agbada-idhe na. 13 Ọ rẹ rehọ ame wozẹ ivu riẹ gbe awọ riẹ, yọ ozerẹ na ọ rẹ rehọ oma riẹ kpobi dhe idhe, o re ru ei kuye iwiri evaọ ehru agbada-idhe na. Onana yọ idhe emahọ, idhe nọ a rọ erae mahe nọ u re gbo ore awere* kẹ Jihova.

14 “‘Rekọ otẹrọnọ evra ọ be rọ kẹ Jihova okẹ orọ idhe emahọ, ọ rẹ rehọ okẹ riẹ no irueruẹ hayo emọ ilekuku ze.+ 15 Ozerẹ na ọ rẹ rehọ iẹe ze agbada-idhe na ọ vẹ sawo eghogho fihọ uriohọ riẹ je ru ei kuye iwiri evaọ ehru agbada-idhe na, rekọ a re ru azẹ riẹ hwẹ noi oma fihọ akotọ agbada-idhe na. 16 O re si akpohọe riẹ gbe ileli riẹ no o ve ku ai fihọ ofẹ agbada-idhe na nọ o rrọ abọ ovatha-ọre na, evaọ oria nọ a re ku enwo* fihọ na.+ 17 Ọ rẹ bẹre iẹe evaọ oria ibekpe riẹ rekọ o re bru ei ekẹ ivẹ hẹ. Kẹsena ozerẹ na o ve ru ei kuye iwiri evaọ ehru agbada-idhe na evaọ ehru ire nọ e rrọ erae na. Onana yọ idhe emahọ, idhe nọ a rọ erae mahe nọ u re gbo ore awere* kẹ Jihova.

2 “‘Whaọ otẹrọnọ ohwo* jọ ọ be rehọ idhe ibi ekakọ+ kẹ Jihova okẹ, okẹ riẹ o rẹ jọ emamọ eflawa iwuwuru hrọ, yọ o re ku ewhri fihọ iẹe je fi frankinsẹns họ iẹe.+ 2 Kẹsena ọ vẹ rehọ iẹe bru emezae Erọn, izerẹ na, ozerẹ na ọ vẹ jọ emamọ eflawa iwuwuru avọ ewhri gbe frankinsẹns riẹ kpobi na whẹ ẹkuobọ vọ, o ve ru ei kuye iwiri wọhọ amabọ jọ idhe*+ na evaọ ehru agbada-idhe na, idhe nọ a rẹ rọ erae mahe nọ i re gbo ore awere* kẹ Jihova. 3 Oware kpobi nọ u kiọkọ evaọ idhe ibi ekakọ na, o rẹ jọ orọ Erọn avọ emezae+ riẹ wọhọ oware nọ o mae rrọ ọrẹri+ nọ a rehọ no idhe nọ a rẹ rọ erae mahe kẹ Jihova ze.

4 “‘Otẹrọnọ idhe ibi ekakọ nọ a beki evaọ ovini whọ be rọ kẹ okẹ, o rẹ jọ orọ emamọ eflawa iwuwuru, ikulu ebrẹdi nọ ọ kare ẹvi* nọ a rọ ewhri gua nọ a ru wọhọ ẹmẹro hayo ebrẹdi ekpakpala nọ e kare ẹvi nọ a gbe ewhri họ.+

5 “‘Otẹrọnọ okẹ ra yọ idhe ibi ekakọ nọ a rọ omodhe nọ a rọ kpahe erae ru,+ o rẹ jọ emamọ eflawa iwuwuru, nọ e kare ẹvi, nọ a rọ ewhri gua. 6 A re bru ei ibribro, yọ who re ku ewhri fihọ iẹe.+ Onana yọ idhe ibi ekakọ.

7 “‘Otẹrọnọ okẹ ra yọ idhe ibi ekakọ nọ a rẹ jọ uwho ru, emamọ eflawa iwuwuru avọ ewhri a re ro ru ei. 8 Whọ rẹ rehọ idhe ibi ekakọ nọ a rọ eware nana ru se Jihova, a vẹ rehọ iẹe kẹ ozerẹ na, ọnọ ọ rẹ rehọ iẹe ziọ obọ agbada-idhe na. 9 Ozerẹ na ọ vẹ jọ idhe ibi ekakọ na tọlọ ejọ re o jọ amabọ jọ idhe* na,+ o ve ru ei kuye iwiri evaọ ehru agbada-idhe na, o vẹ jọ idhe nọ a rọ erae mahe nọ u re gbo ore awere* kẹ Jihova.+ 10 Oware nọ u kiọkọ evaọ idhe ibi ekakọ na o rẹ jọ orọ Erọn avọ emezae riẹ wọhọ oware nọ o mae rrọ ọrẹri orọ idhe nọ a rọ erae mahe kẹ Jihova.+

11 “‘A re fi ẹvi họ idhe ibi ekakọ evuevo nọ wha be rọ kẹ Jihova ha,+ keme wha re ru ukulu ovuovo nọ a fi ẹvi họ hayo ame ibi-ire* kuye iwiri vievie he wọhọ idhe nọ a rọ erae mahe kẹ Jihova.

12 “‘Wha sae rehọ ae kẹ Jihova wọhọ okẹ ibi ọsosuọ,+ rekọ a rẹ rehọ ae ziọ agbada-idhe na vievie he ro dhe idhe nọ i re gbo ore awere.*

13 “‘A re fi uwhei họ okẹ idhe ibi ekakọ kpobi nọ whọ be kẹ; yọ whọ rẹ kuvẹ vievie he re uwhei ọvọ Ọghẹnẹ ra o kare idhe ibi ekakọ ra. Evaọ okẹ kpobi nọ whọ be kẹ, whọ rẹ rehọ uwhei+ ze bae.

14 “‘Whọ tẹ be rehọ okẹ idhe ibi ekakọ orọ ibi ọsosuọ nọ e ware kẹ Jihova, whọ rẹ kẹ ibi ekakọ ekpokpọ* nọ a rọ erae tọ, ibi ekpokpọ nọ a wuhu yẹ tere he, wọhọ idhe ibi ekakọ orọ ibi ọsosuọ ra nọ e ware.+ 15 Who re fi ewhri họ iẹe je fi frankinsẹns họ iẹe. Onana yọ idhe ibi ekakọ. 16 Ozerẹ na o re ru ei kuye iwiri wọhọ amabọ jọ idhe* na,+ koyehọ, ibi ekakọ na jọ nọ a wuhu yẹ tere he na avọ ewhri gbe frankinsẹns riẹ kpobi, wọhọ idhe nọ a rọ erae mahe kẹ Jihova.

3 “‘Otẹrọnọ okẹ riẹ yọ idhe ọriẹyeri*+ yọ ọ be rehọ iẹe no owa erao ze, te ọrọ ọzae hayo aye, arao nọ ọ rrọ omakọkọ ọ rẹ rọ ziọ aro Jihova. 2 Ọ rẹ rọ obọ riẹ kpahe uzou arao riẹ nọ ọ be rọ kẹ okẹ na, a ve kpei evaọ aro unuẹthẹ uwou-udhu omakugbe na; emezae Erọn, izerẹ na a vẹ frẹ azẹ na fihọ tabọ tabọ agbada-idhe na kpobi wariẹ họ. 3 Ọ rẹ rọ abọjọ idhe ọriẹyeri na kẹ okẹ nọ a rẹ rọ erae mahe kẹ Jihova:+ iwhri+ nọ e tamu ivu na, iwhri kpobi nọ e rrọ ivu na wariẹ họ, 4 avọ ibieku ivẹ na kugbe iwhri nọ e tamu ae kẹle eku na. O re je si iwhri nọ e tamu edhẹ na no kugbe ibieku+ na. 5 Emezae Erọn a ve ru ei kuye iwiri evaọ ehru agbada-idhe na evaọ ehru idhe emahọ nọ a fihọ ehru ire nọ e rrọ erae+ na; onana yọ idhe nọ a rọ erae mahe nọ i re gbo ore awere* kẹ Jihova.+

6 “‘Otẹrọnọ uthuru erao ọ be rehọ okẹ riẹ nọ a re ro dhe idhe ọriẹyeri kẹ Jihova no ze, ọ rẹ rehọ arao ọzae hayo ọrọ aye nọ ọ rrọ omakọkọ+ ze. 7 Otẹrọnọ egbo ọ be rọ kẹ okẹ riẹ na, ọ rẹ rehọ iẹe ziọ aro Jihova. 8 Ọ rẹ rọ obọ riẹ kpahe uzou arao riẹ nọ ọ be rọ kẹ okẹ na, a ve kpei evaọ aro unuẹthẹ uwou-udhu omakugbe na. Emezae Erọn a vẹ frẹ azẹ riẹ fihọ tabọ tabọ agbada-idhe na kpobi wariẹ họ. 9 Ọ rẹ rọ iwhri erọ idhe ọriẹyeri na ze ro dhe idhe nọ a rẹ rọ erae mahe kẹ Jihova.+ O re si uweli nọ o rrọ iwhriwhri na kpobi nọ o kẹle ugbonwa-uke na no, iwhri nọ e tamu ivu na, iwhri kpobi nọ e rrọ ivu na wariẹ họ, 10 avọ ibieku ivẹ na kugbe iwhri nọ e tamu ae kẹle eku na. O re je si iwhri nọ e tamu edhẹ na no kugbe ibieku+ na. 11 Ozerẹ na ọ vẹ jọ agbada-idhe na ru ei kuye iwiri wọhọ emu,* idhe nọ a rẹ rọ erae mahe kẹ Jihova.+

12 “‘Otẹrọnọ ẹwe ọ be rọ kẹ okẹ riẹ, ọ rẹ rehọ iẹe ziọ aro Jihova. 13 Ọ rẹ rọ obọ riẹ kpahe uzou arao na, a ve kpei evaọ aro unuẹthẹ uwou-udhu omakugbe na, yọ emezae Erọn a rẹ frẹ azẹ riẹ fihọ tabọ tabọ agbada-idhe na kpobi wariẹ hrọ. 14 Oware nọ ọ te jariẹ rehọ ro dhe idhe nọ a rẹ rọ erae mahe kẹ Jihova họ iwhri nọ e tamu ivu na, iwhri kpobi nọ e rrọ ivu na wariẹ họ,+ 15 avọ ibieku ivẹ na kugbe iwhri nọ e tamu ae kẹle eku na. O re je si iwhri nọ e tamu edhẹ na no kugbe ibieku na. 16 Ozerẹ na o ve ru ai kuye iwiri evaọ agbada-idhe na wọhọ emu,* idhe nọ a rẹ rọ erae mahe nọ i re gbo ore awere.* Iwhri na kpobi yọ erọ Jihova.+

17 “‘Onana yọ uzi nọ o rẹ jọ ribri kẹ ige rai kpobi, evaọ oria kpobi nọ wha be rria: Wha rẹ re iwhri evuovo hayo azẹ+ ọvuọvo vievie he.’”

4 Jihova ọ tẹ gbẹ ta kẹ Mosis nọ: 2 “Vuẹ ahwo Izrẹl nọ, ‘Otẹrọnọ ohwo* jọ ọ rọ ogbori* raha uzi+ nọ o ro ru oware jọ evaọ usu eware nọ Jihova o jie uzi nọ a re ru hu:

3 “‘Otẹrọnọ ozerẹ nọ a wholo+ na ọ raha uzi+ o je ru nọ ahwo na a rọ reabe, ọ rẹ rehọ eruẹ nọ ọ rrọ omakọkọ ze hrọ kẹ Jihova nọ a re ro dhe idhe uzioraha fiki uzi nọ ọ raha+ na. 4 Ọ rẹ rehọ eruẹ na ziọ aro unuẹthẹ uwou-udhu omakugbe+ na evaọ aro Jihova ọ vẹ rọ obọ kpahe uzou eruẹ na, o ve kpe eruẹ na evaọ aro Jihova.+ 5 Kẹsena ozerẹ nọ a wholo+ na ọ vẹ rehọ azẹ eruẹ na jọ ọ vẹ rehọ iẹe ziọ eva uwou-udhu omakugbe na; 6 ozerẹ na o ve dhe uziobọ riẹ họ azẹ+ na ọ vẹ jọ azẹ na frẹ isiahrẹ+ fihọ aro Jihova evaọ aro ekọtini oria ọrẹri na. 7 Ozerẹ na ọ rẹ jẹ rehọ azẹ na jọ fihọ izei agbada-idhe insẹnse nọ i re gbo ore awere na,+ nọ o rrọ aro Jihova evaọ uwou-udhu omakugbe na; yọ o re ku azẹ nọ o kiọkọ kpobi họ otọ agbada-idhe idhe emahọ+ na, nọ o rrọ aro unuẹthẹ uwou-udhu omakugbe na.

8 “‘Kẹsena o ve si iwhri eruẹ idhe uzioraha na kpobi noi, te iwhri nọ e tamu ivu na, gbe iwhri nọ e rrọ ivu na wariẹ họ, 9 avọ ibieku ivẹ na kugbe iwhri nọ e tamu ae kẹle eku na. Yọ o re si iwhri nọ e tamu edhẹ na no kugbe ibieku+ na. 10 O rẹ jọ eware evona nọ a re si no eruẹ idhe ọriẹyeri+ na. Yọ ozerẹ na o re ru ai kuye iwiri evaọ ehru agbada-idhe idhe emahọ na.

11 “‘Rekọ kpahe ohọroma eruẹ na avọ iwo riẹ kpobi kugbe uzou riẹ, awọ riẹ, ivu riẹ, avọ isọ riẹ+— 12 abọ eruẹ na nọ o kiọkọ kpobi, ọ rẹ rehọ iẹe kpobọ ughe evuẹ na kpohọ oria nọ o rrọ oria ofuafo nọ a re ku enwo* na fihọ na, ọ vẹ jọ ehru ire nọ e rrọ erae na mahe ae.+ A rẹ mahe ae evaọ oria nọ a re ku enwo fihọ na.

13 “‘Whaọ otẹrọnọ ukoko Izrẹl soso o reabe fikinọ a rọ ogbori* raha uzi,+ rekọ ukoko na o riẹ hẹ inọ o ru oware jọ nọ Jihova o jie uzi kẹ ae nọ a ru hu,+ 14 rekọ a tẹ te riẹ kpahe uzioraha na uwhremu na, ukoko na o rẹ rehọ eruẹ ze hrọ rọkẹ idhe uzioraha yọ a rẹ rehọ iẹe ze aro unuẹthẹ uwou-udhu omakugbe na. 15 Ekpako ahwo na a rẹ rọ abọ rai kpahe uzou eruẹ na evaọ aro Jihova, a ve kpe eruẹ na evaọ aro Jihova.

16 “‘Kẹsena ozerẹ nọ a wholo na ọ vẹ rehọ azẹ eruẹ na jọ ziọ eva uwou-udhu omakugbe na. 17 Ozerẹ na o re dhe uziobọ riẹ họ azẹ na ọ vẹ jọ azẹ na frẹ isiahrẹ fihọ aro Jihova evaọ aro ekọtini+ na. 18 Kẹsena ọ vẹ rehọ azẹ na jọ fihọ izei agbada-idhe+ nọ o rrọ aro Jihova na, onọ o rrọ evaọ uwou-udhu omakugbe na; o ve ku azẹ nọ o kiọkọ kpobi họ otọ agbada-idhe idhe emahọ na, nọ o rrọ aro unuẹthẹ uwou-udhu omakugbe na.+ 19 O re si iwhri riẹ kpobi no o ve ru ei kuye iwiri evaọ agbada-idhe na.+ 20 O re ru eruẹ na nwane wọhọ epanọ o ru eruẹ ọdekọ nọ a ro dhe idhe uzioraha na. Ere o re ru ei, ozerẹ na o ve ru omavoro kẹ ae,+ a vẹ rọvrẹ rai. 21 Ọ rẹ rehọ eruẹ na kpobọ ughe evuẹ na a vẹ mahe iẹe, nwane wọhọ epanọ ọ mahe eruẹ ọsosuọ na.+ Onana yọ idhe uzioraha kẹ ukoko+ na soso.

22 “‘Otẹrọnọ ohwo nọ o wuzou+ ọ rehọ ogbori* raha uzi nọ o ro ru oware jọ evaọ usu eware kpobi nọ Jihova, Ọghẹnẹ riẹ o jie uzi nọ a re ru hu yọ ọ reabe no, 23 hayo otẹrọnọ uwhremu na ọ rọ riẹ kpahe uzi jọ nọ ọ raha evaọ usu izi na, ọ rẹ rehọ omokri nọ oma riẹ o rrọ kọkọ ze hrọ nọ a re ro dhe idhe kẹe. 24 Ọ rẹ rọ obọ riẹ kpahe uzou omokri na a ve kpei evaọ oria nọ a re jo kpe arao idhe emahọ na evaọ aro Jihova.+ Onana yọ idhe uzioraha. 25 Ozerẹ na ọ rẹ rọ uziobọ riẹ rehọ azẹ idhe uzioraha na jọ o ve su ei fihọ izei+ agbada-idhe idhe emahọ na, o ve ku azẹ riẹ nọ o kiọkọ họ otọ agbada-idhe idhe emahọ na.+ 26 O re ru iwhri riẹ kpobi kuye iwiri evaọ ehru agbada-idhe na wọhọ iwhri idhe ọriẹyeri na;+ ozerẹ na o ve ru omavoro kẹe rọkẹ uzioraha riẹ, a vẹ rọ uzioraha na rọvrẹ riẹ.

27 “‘Otẹrọnọ ohwo* jọ kpobi evaọ usu ahwo ẹkwotọ na ọ rọ ogbori* raha uzi nọ ọ jẹ reabe fikinọ o ru oware jọ evaọ usu eware nọ Jihova o jie uzi nọ a re ru hu,+ 28 hayo uwhremu na ọ tẹ te riẹ kpahe uzi jọ nọ ọ raha, ọ rẹ rehọ ọmọ ẹwe aye nọ oma riẹ o rrọ kọkọ ze nọ a re ro dhe idhe kẹe fiki uzi nọ ọ raha na. 29 Ọ rẹ rọ obọ riẹ kpahe uzou arao idhe uzioraha na a ve kpei evaọ oria nọ a re jo kpe arao idhe emahọ na.+ 30 Ozerẹ na ọ rẹ rọ uziobọ riẹ rehọ azẹ idhe uzioraha na jọ o ve su ei fihọ izei agbada-idhe idhe emahọ na, o ve ku azẹ riẹ nọ o kiọkọ kpobi họ otọ agbada-idhe na.+ 31 O re si iwhri+ riẹ kpobi no, nwane wọhọ epanọ a re si iwhri arao idhe ọriẹyeri+ na no na, ozerẹ na o ve ru ei kuye iwiri evaọ ehru agbada-idhe na re u gbo ore awere* kẹ Jihova; ozerẹ na o ve ru omavoro kẹe, a vẹ rọ uzioraha na rọvrẹ riẹ.

32 “‘Rekọ otẹrọnọ omogodẹ ọ be rọ ze kẹ idhe uzioraha riẹ, ọ rẹ rehọ omogodẹ aye nọ oma riẹ o rrọ kọkọ ze. 33 Ọ rẹ rọ obọ riẹ kpahe uzou arao idhe uzioraha na a ve kpei wọhọ idhe uzioraha evaọ oria nọ a re jo kpe arao idhe emahọ na.+ 34 Ozerẹ na ọ rẹ rọ uziobọ riẹ rehọ azẹ idhe uzioraha na jọ o ve su ei fihọ izei agbada-idhe idhe emahọ na,+ o ve ku azẹ riẹ nọ o kiọkọ kpobi họ otọ agbada-idhe na. 35 O re si iwhri riẹ kpobi no wọhọ epanọ a re si iwhri eruẹ idhe ọriẹyeri na no na, ozerẹ na o ve ru ai kuye iwiri evaọ ehru agbada-idhe na evaọ ehru idhe Jihova nọ a rẹ rọ erae mahe;+ ozerẹ na o ve ru omavoro kẹe rọkẹ uzi nọ ọ raha na, a vẹ rọ uzioraha na rọvrẹ riẹ.+

5 “‘Otẹrọnọ ohwo* jọ ọ raha uzi fikinọ o yo okenọ a jọ ẹgbede woro inọ jọ a nyaze ti se isẹri*+ yọ ọyomariẹ yọ osẹri hayo ọ ruẹ oware nọ o via hayo ọ riẹ kpahe iẹe rekọ ọ ta ha, ọ rẹ ruẹ uye oruthọ riẹ.

2 “‘Hayo otẹrọnọ ohwo* ọ rọ obọ te oware jọ kpobi nọ o fo ho, o tẹ make rọnọ arao ẹwọ owhuowhu nọ ọ fo ho, arao ẹwho nọ ọ fo ho, hayo emama nọ e rẹ jọ usu ovo buobu* nọ e fo ho,+ ọyomariẹ ọ fo ho ọ tẹ jẹ reabe no o tẹ make rọnọ ọ riẹ hẹ. 3 Hayo otẹrọnọ ohwo jọ fikinọ ọ riẹ hẹ ọ tẹ rọ obọ te egbegbe ohwo-akpọ*+—oware jọ kpobi nọ o fo ho nọ o rẹ sai ru ọyomariẹ fihọ gbegbe—ọ tẹ te riẹ kpahe iẹe uwhremu na, yọ ọ reabe no.

4 “‘Hayo otẹrọnọ ohwo* jọ ọ rehọ okpakpa duwu iyei inọ o ti ru oware jọ—te oware uwoma ọ gwọlọ ru hayo oware uyoma ọ gwọlọ ru, oghẹrẹ oware kpobi nọ ọ gwọlọ ru kẹhẹ, yọ ọ riẹ vẹre he, rekọ ọ tẹ te riẹ nọ okpakpa o ro duwu iyei na, yọ ọ reabe+ no.*

5 “‘Otẹrọnọ ọ reabe evaọ usu eware nana jọ, ọ rẹ feva+ hrọ kpahe oghẹrẹ nọ ọ rọ raha uzi na. 6 Ọ rẹ jẹ rehọ idhe abe-ọriọ riẹ se Jihova rọkẹ uzi nọ ọ raha na,+ ọ rẹ rọ arao aye no uthuru erao ze, o rẹ jọ omogodẹ aye hayo ọmọ ẹwe aye, rọkẹ idhe uzioraha. Kẹsena ozerẹ na o ve ru omavoro kẹe rọkẹ uzi nọ ọ raha na.

7 “‘Rekọ otẹrọnọ obọ riẹ u gbe te ogodẹ hẹ, ọ rẹ rọ irueruẹ ivẹ hayo emọ ilekuku ivẹ+ se Jihova hrọ rọkẹ idhe abe-ọriọ riẹ orọ uzi nọ ọ raha na, ọvo jọ rọkẹ idhe uzioraha ọdekọ rọkẹ idhe emahọ.+ 8 Ọ rẹ rehọ ae se ozerẹ na, ọnọ ọ rẹ kake rọ ọrọ idhe uzioraha na lahwe ọ vẹ sawo eghogho fihọ uriohọ riẹ evaọ aro uriohọ riẹ, rekọ o re bru ei no ho. 9 Ọ vẹ frẹ azẹ idhe uzioraha na jọ fihọ akotọ agbada-idhe na, rekọ azẹ nọ o kiọkọ na o ve ru ei hwẹ noi oma fihọ otọ agbada-idhe na.+ Onana yọ idhe uzioraha. 10 Ọ rẹ rọ ọnọ o kiọkọ na dhe idhe emahọ lele oghẹrẹ nọ a dhesẹ nọ a rẹ hai ro ru ei na;+ ozerẹ na o ve ru omavoro kẹe rọkẹ uzi nọ ọ raha na, a vẹ rọ uzioraha na rọvrẹ riẹ.+

11 “‘Rekọ otẹrọnọ obọ riẹ u gbe te irueruẹ ivẹ hayo emọ ilekuku ivẹ hẹ, ọ rẹ rehọ abọvo abakpe ifa*+ orọ emamọ eflawa iwuwuru ze hrọ rọkẹ uzi nọ ọ raha na re a ro dhe idhe uzioraha. O re fi ewhri họ iẹe he hayo fi frankinsẹns họ iẹe he, keme onana yọ idhe uzioraha. 12 Ọ rẹ rehọ iẹe se ozerẹ na, ozerẹ na ọ vẹ jariẹ whẹ ẹkuobọ vọ wọhọ amabọ jọ idhe* na, o ve ru ei kuye iwiri evaọ ehru agbada-idhe na evaọ ehru idhe Jihova nọ a rẹ rọ erae mahe. Onana yọ idhe uzioraha. 13 Ozerẹ na o ve ru omavoro kẹe rọkẹ uzi nọ ọ raha na, evaọ usu izieraha nana, a vẹ rọ uzioraha na rọvrẹ riẹ.+ Onọ u kiọkọ evaọ idhe na u ve zihe ruọ orọ ozerẹ na+ nwane wọhọ idhe ibi ekakọ na.’”+

14 Jihova ọ tẹ gbẹ jẹ ta kẹ Mosis nọ: 15 “Otẹrọnọ ohwo* jọ o ru oware nọ u fo ho nọ ọ rọ rehọ ogbori* raha uzi kpahe eware ọrẹri Jihova,+ ọ rẹ rehọ egbo nọ ọ rrọ omakọkọ no uthuru erao ze kẹ Jihova nọ a re ro dhe idhe abe-ọriọ;+ unuigho riẹ nọ a fihọ evaọ shẹkẹl* isiliva u re lele epaọ shẹkẹl oria ọrẹri na.*+ 16 Yọ ọ rẹ hwosa fihọ uzi nọ ọ raha kpahe oria ọrẹri na je fi abọvo abasoi riẹ bae.+ Ọ rẹ rehọ iẹe kẹ ozerẹ na, re ozerẹ na ọ rọ egbo idhe abe-ọriọ na ru omavoro+ kẹe, a vẹ rọ uzioraha na rọvrẹ riẹ.+

17 “Otẹrọnọ ohwo* jọ ọ raha uzi nọ o ro ru oware jọ evaọ usu eware nọ Jihova o jie uzi nọ a re ru hu, o tẹ make rọnọ ọ riẹ kpahe iẹe he, ọ reabe ghele yọ ọ rẹ ruẹ uye oruthọ+ riẹ. 18 Ọ rẹ rehọ egbo nọ ọ rrọ omakọkọ no uthuru erao ze se ozerẹ na nọ u re te unuigho nọ a fihọ inọ u re te na, rọkẹ idhe abe-ọriọ.+ Kẹsena ozerẹ na o ve ru omavoro kẹe rọkẹ ethobọ nọ ọ rọ ogbori ru na, oware nọ o ru nọ ọ riẹ hẹ na, a vẹ rọ uzioraha na rọvrẹ riẹ. 19 Onana yọ idhe abe-ọriọ. Ọ ginẹ reabe uzioraha kpahe Jihova.”

6 Jihova ọ tẹ gbẹ ta kẹ Mosis nọ: 2 “Otẹrọnọ ohwo* jọ ọ raha uzi nọ o ro ru oware nọ u fo ho kpahe Jihova+ nọ ọ rọ viẹ ọrivẹ riẹ họ kpahe oware jọ nọ a mu họ iẹe obọ+ hayo oware jọ nọ a rọ kẹe kru, hayo ọ rehọ ogaga mi ọrivẹ riẹ oware hayo o fi ọrivẹ riẹ iwhayo, 3 hayo ọ ruẹ oware jọ nọ u vru rekọ ọ be gbenu kpahe iẹe, o te duwu iyei ọrue kpahe uzioraha utioye jọ nọ ọ raha,+ oware nọ o re ru ona: 4 Otẹrọnọ ọ raha uzi jẹ reabe no, o re zihe oware nọ o tho na hrọ, oware nọ ọ rọ ofruriọ wo na, oware nọ ọ rọ iwhayo wo na, oware nọ a mu họ iẹe obọ na, hayo oware nọ u vru nọ ọ ruẹ na, 5 hayo oware kpobi nọ o duwu iyei ọrue fihọ, ọ rẹ hwosa riẹ gbagba hrọ,+ yọ o re fi abọvo abasoi oware na bae. Ọ rẹ rehọ iẹe kẹ ohwo nọ o wo rie evaọ ẹdẹ nọ a ro dhesẹ via vevẹ nọ ọ reabe na. 6 Ọ rẹ rehọ egbo nọ ọ rrọ omakọkọ no uthuru erao ze se ozerẹ na rọkẹ idhe abe-ọriọ riẹ kẹ Jihova lele unuigho nọ a roro nọ u re te, rọkẹ idhe abe-ọriọ.+ 7 Ozerẹ na o ve ru omavoro kẹe evaọ aro Jihova, a vẹ rọ uzioraha kpobi nọ ọ raha nọ o wha riẹ ze nọ ọ rọ reabe+ na rọvrẹ riẹ.”

8 Jihova ọ tẹ gbẹ jẹ ta kẹ Mosis nọ: 9 “Ta kẹ Erọn avọ emezae riẹ nọ, ‘Onana họ uzi idhe emahọ na:+ Oware nọ a ro dhe idhe emahọ na o rẹ jọ ehru agbada-idhe na aso okioke rite ohiohiẹ, yọ a re ru re erae na e to ọvo evaọ ehru agbada-idhe na. 10 Ozerẹ na o re ku ewu ozerẹ ohọ-olọlọhọ+ riẹ họ, o ve fi ohọ-olọlọhọ nọ ọ rẹ rọ gba-ọgọdọ*+ na họ ruru oma riẹ. Kẹsena o ve si enwo*+ idhe emahọ nọ erae e to fihọ eva ehru agbada-idhe na no o ve ku ai fihọ akotọ agbada-idhe na. 11 Kẹsena o ve si iwu riẹ no+ o ve fi iwu efa họ ọ vẹ rehọ enwo na kpohọ oria nọ o rrọ oria ofuafo evaọ otafe evuẹ na.+ 12 A re ru re erae na e to ọvo evaọ ehru agbada-idhe na. I re fu vievie he. Ozerẹ na o re fi ire họ erae na+ hrọ kohiohiẹ kohiohiẹ re e to ọ vẹ ruẹrẹ idhe emahọ na fihọ ehru riẹ, yọ o re ru iwhri idhe ọriẹyeri na kuye iwiri evaọ ehru riẹ.+ 13 A re ru re erae e to kẹse kẹse evaọ ehru agbada-idhe na. I re fu vievie he.

14 “‘Onana họ uzi idhe ibi ekakọ na:+ Whai emezae Erọn wha rẹ rehọ iẹe ze aro Jihova evaọ aro agbada-idhe na. 15 Omọvo rai jọ ọ rẹ whẹ ẹkuobọ vọ no emamọ eflawa iwuwuru na ze avọ ewhri riẹ jọ gbe frankinsẹns kpobi nọ e rrọ idhe ibi ekakọ na, o ve ru ei kuye iwiri evaọ ehru agbada-idhe na re o jọ idhe nọ i re gbo ore awere* wọhọ amabọ jọ idhe* na kẹ Jihova.+ 16 Erọn avọ emezae riẹ a rẹ re oware nọ o jariẹ kiọkọ.+ A rẹ re iẹe wọhọ ebrẹdi nọ e kare ẹvi evaọ oria ọrẹri. A rẹ re iẹe evaọ ighẹ uwou-udhu omakugbe na.+ 17 A rẹ rọ oware ovo nọ u wo ẹvi+ ro beki riẹ hẹ. Mẹ rehọ e riẹ kẹ ae no wọhọ ẹkẹ abọ rai evaọ idhe mẹ nọ a rọ erae mahe.+ Yọ oware nọ o mae rrọ ọrẹri,+ wọhọ idhe uzioraha na jẹ wọhọ idhe abe-ọriọ na. 18 Ọzae kpobi evaọ udevie emezae Erọn ọ rẹ re iẹe.+ Onana yọ oware nọ a rẹ kẹ ae ribri evaọ ige rai kpobi evaọ idhe Jihova nọ a rọ erae mahe.+ Oware kpobi nọ u te rai* u re zihe ruọ oware ọrẹri.’”

19 Jihova ọ tẹ wariẹ ta ẹme kẹ Mosis nọ: 20 “Onana họ idhe nọ Erọn avọ emezae riẹ a re dhe kẹ Jihova evaọ ẹdẹ nọ a ro wholo iei:+ abọvo abakpe ifa*+ orọ emamọ eflawa iwuwuru wọhọ idhe ibi ekakọ+ ikẹse kẹse, abọvo riẹ evaọ ohiohiẹ, abọvo riẹ evaọ owọwọ. 21 A rẹ rọ ewhri ru ei evaọ omodhe nọ a rọ kpahe erae.+ Who re fi ewhri họ iẹe ziezi whọ vẹ rehọ iẹe ze, whọ rẹ rehọ ekẹ riẹ nọ a beki no na ze ro dhe idhe ibi ekakọ nọ i re gbo ore awere* kẹ Jihova. 22 Ozerẹ nọ a wholo nọ ọ rehọ ẹta riẹ evaọ usu emezae+ riẹ o re ru ei. Onana yọ ujaje nọ o rẹ jọ ribri: Idhe soso nọ a re ru kuye iwiri kẹ Jihova. 23 Idhe ibi ekakọ kpobi erọ ozerẹ e rẹ jọ idhe soso. A rẹ re iẹe vievie he.”

24 Jihova ọ tẹ wariẹ ta ẹme kẹ Mosis, ọ ta kẹe nọ: 25 “Ta kẹ Erọn avọ emezae riẹ nọ, ‘Onana họ uzi idhe uzioraha na:+ Evaọ oria nọ a re jo kpe arao idhe emahọ na,+ etẹe ọvona a re jo kpe arao idhe uzioraha na evaọ aro Jihova. Onana yọ oware nọ o mae rrọ ọrẹri. 26 Ozerẹ nọ ọ be rehọ iẹe dhe idhe uzioraha na ọ rẹ re iẹe.+ A rẹ re iẹe evaọ oria ọrẹri, evaọ ighẹ uwou-udhu omakugbe na.+

27 “‘Oware kpobi nọ u te uwo riẹ u re zihe ruọ oware ọrẹri, yọ ohwo jọ ọ tẹ frẹ azẹ riẹ fihọ ewu riẹ, whọ rẹ wozẹ oware nọ a frẹ azẹ ku na evaọ oria ọrẹri. 28 A re kpe uwho nọ a rọ ẹkpẹ ma nọ a ro there iei na. Rekọ otẹrọnọ uwho ekọpa a ro there iei, a rẹ fọrọ uwho na hrọ a vẹ jẹ rọ ame wozẹ iẹe.

29 “‘Ọzae kpobi evaọ udevie izerẹ na ọ rẹ re iẹe.+ Yọ oware nọ o mae rrọ ọrẹri.+ 30 Rekọ a rẹ re idhe uzioraha vievie he otẹrọnọ a rehọ azẹ riẹ jọ ziọ uwou-udhu omakugbe na re a ro ru omavoro evaọ oria ọrẹri na.+ A rẹ rọ erae mahe iẹe.

7 “‘Onana họ uzi idhe abe-ọriọ na:+ Onana yọ oware nọ o mae rrọ ọrẹri. 2 A re kpe arao idhe abe-ọriọ na evaọ oria nọ a re jo kpe arao idhe emahọ na, yọ a rẹ frẹ azẹ+ riẹ fihọ tabọ tabọ agbada-idhe na kpobi wariẹ họ.+ 3 Ọ rẹ rọ iwhri+ riẹ kpobi ro dhe idhe, kugbe uweli nọ o rrọ iwhriwhri na, iwhri nọ e tamu ivu na, 4 avọ ibieku ivẹ na kugbe iwhri nọ e tamu ae kẹle eku na. O re je si iwhri nọ e tamu edhẹ na no kugbe ibieku+ na. 5 Ozerẹ na o ve ru ai kuye iwiri evaọ agbada-idhe na wọhọ idhe nọ a rẹ rọ erae mahe kẹ Jihova.+ Onana yọ idhe abe-ọriọ. 6 Ọzae kpobi evaọ udevie izerẹ na ọ rẹ re iẹe,+ yọ a rẹ re iẹe evaọ oria ọrẹri. Onana yọ oware nọ o mae rrọ ọrẹri.+ 7 Uzi idhe uzioraha na a re lele re evaọ idhe abe-ọriọ na; o rẹ jọ orọ ozerẹ nọ ọ rehọ e riẹ ru omavoro+ na.

8 “‘Nọ ozerẹ o te dhe idhe emahọ kẹ ohwo jọ, ohọrọ+ arao idhe emahọ nọ a rọ kẹ ozerẹ na o rẹ jọ oriẹ.

9 “‘Idhe ibi ekakọ kpobi nọ a beki evaọ ovini hayo nọ a jọ uwho ru hayo nọ a rọ omodhe nọ a rọ kpahe erae+ ru yọ orọ ozerẹ nọ ọ be rehọ iẹe dhe idhe na. O rẹ jọ oriẹ.+ 10 Rekọ idhe ibi ekakọ kpobi nọ a fi ewhri+ họ hayo nọ o rrọ yaya+ o rẹ jọ orọ emezae Erọn kpobi; ẹkẹ nọ o re te omomọvo ọ rẹ jọ ẹrẹrẹe.

11 “‘Whaọ onana họ uzi idhe ọriẹyeri*+ na nọ ohwo ọ rẹ sai dhe kẹ Jihova: 12 Otẹrọnọ onana yọ idhe nọ ọ be rọ kẹ uyere,+ eware nana ọ rẹ rọ ze kugbe idhe uyere na, ikulu ebrẹdi nọ ọ kare ẹvi* nọ a rọ ewhri gua nọ a ru wọhọ ẹmẹro, ebrẹdi ekpakpala nọ e kare ẹvi nọ a gbe ewhri họ, gbe ikulu ebrẹdi nọ a rọ emamọ eflawa iwuwuru ru wọhọ ẹmẹro, nọ a gua kugbe ziezi jẹ nabi ru ewhri daruọ oma ziezi. 13 Ọ rẹ rehọ idhe riẹ ze kugbe ikulu ebrẹdi nọ a fi ẹvi họ nọ a ru wọhọ ẹmẹro gbe idhe uyere orọ idhe ọriẹyeri riẹ. 14 Ọ rẹ jọ enana rehọ ovuọvo ze wọhọ ẹkẹ ọrẹri rọkẹ Jihova; ozerẹ nọ ọ be frẹ azẹ idhe ọriẹyeri+ na o re woi. 15 A rẹ re uwo idhe uyere orọ idhe ọriẹyeri riẹ na evaọ ẹdẹ nọ ọ rọ rehọ iẹe dhe idhe na. Ọ rẹ siọ* ọvuọvo riẹ ba te ohiohiẹ vievie he.+

16 “‘Otẹrọnọ okẹ idhe riẹ na yọ orọ eyaa+ hayo okẹ unevaze,+ a rẹ re iẹe evaọ ẹdẹ nọ o ro dhe idhe riẹ na, yọ a sae jẹ re oware nọ o jariẹ kiọkọ evaọ ẹdẹ nọ o lele i rie. 17 Rekọ oware nọ u kiọkọ kpobi evaọ uwo arao idhe na evaọ ẹdẹ avọ esa a rẹ rọ erae mahe iẹe.+ 18 Rekọ, otẹrọnọ a re uwo arao idhe ọriẹyeri riẹ na jọ evaọ ẹdẹ avọ esa, a rẹ jẹ ohwo nọ o bi dhe idhe na rehọ họ. A re kele onana kẹe wọhọ oware uwoma ha; onana yọ oware uyoma, yọ ohwo* nọ ọ jariẹ re ọ rẹ ruẹ uye oruthọ riẹ.+ 19 Uwo nọ u te oware kpobi nọ o fo ho a rẹ re iẹe he. A rẹ rọ erae mahe iẹe. Ohwo kpobi nọ ọ fo ọ rẹ sae re uwo nọ o fo na.

20 “‘Rekọ ohwo* kpobi nọ ọ fo ho nọ ọ re uwo idhe ọriẹyeri na nọ o rrọ kẹ Jihova na, a re kpe ohwo* yena no udevie ahwo riẹ+ hrọ. 21 Otẹrọnọ ohwo* jọ ọ rọ obọ te oware jọ kpobi nọ o fo ho, te orọ egbegbe ohwo-akpọ*+ hayo arao nọ ọ fo ho+ hayo oware otọtọ jọ kpobi nọ o fo ho,+ ọ tẹ re uwo jọ evaọ idhe ọriẹyeri na nọ o rrọ kẹ Jihova na, a re kpe ohwo* yena no udevie ahwo riẹ hrọ.’”

22 Jihova ọ tẹ gbẹ jẹ ta kẹ Mosis nọ: 23 “Ta kẹ ahwo Izrẹl nọ, ‘Wha rẹ re iwhri+ evuevo vievie he, te orọ eruẹ hayo egbo hayo ẹwe. 24 A sae rọ iwhri arao nọ a dihọ owhuowhu hayo iwhri arao nọ arao ọfa jọ o kpe ro ru oware ofa kpobi, rekọ wha rẹ re iẹe vievie he.+ 25 Keme ohwo kpobi nọ ọ re iwhri evaọ arao nọ o ro dhe idhe nọ a rọ erae mahe kẹ Jihova a re kpei no udevie ahwo riẹ hrọ.

26 “‘Wha rẹ re azẹ+ ọvuọvo vievie he evaọ oria kpobi nọ wha be rria, te ọrọ evra hayo ọrọ erao. 27 Ohwo* kpobi nọ ọ re azẹ jọ kpobi a re kpei+ no udevie ahwo riẹ hrọ.’”

28 Jihova ọ tẹ gbẹ jẹ ta kẹ Mosis nọ: 29 “Ta kẹ ahwo Izrẹl nọ, ‘Ohwo kpobi nọ o bi dhe idhe ọriẹyeri riẹ kẹ Jihova ọ rẹ rehọ abọjọ no idhe ọriẹyeri riẹ ze kẹ Jihova.+ 30 Ọ rẹ rehọ abọ riẹ rọ iwhri+ na avọ ẹkpudu na ze wọhọ idhe nọ a rẹ rọ erae mahe kẹ Jihova, o ve veghe ai kpemu kparo wọhọ idhe iveghe+ evaọ aro Jihova. 31 Ozerẹ na o ve ru iwhri na kuye iwiri evaọ ehru agbada-idhe na,+ rekọ ẹkpudu na ọ rẹ jọ ọrọ Erọn avọ emezae riẹ.+

32 “‘Wha rẹ rọ owọ obọze na kẹ ozerẹ na wọhọ ẹkẹ ọrẹri evaọ idhe ọriẹyeri+ rai. 33 Ọmọzae Erọn nọ ọ be rọ azẹ idhe ọriẹyeri na dhe idhe avọ iwhri na o re wo owọ obọze na wọhọ ẹkẹ riẹ.+ 34 Keme mẹ rehọ ẹkpudu idhe iveghe na avọ owọ ẹkẹ ọrẹri na no idhe ọriẹyeri ahwo Izrẹl ze, yọ mẹ rehọ e rai kẹ Erọn ozerẹ na avọ emezae riẹ wọhọ ujaje nọ o rẹ jọ ribri kẹ ahwo Izrẹl.+

35 “‘Onana họ ẹkẹ nọ a rẹ jọ idhe Jihova nọ a rẹ rọ erae mahe fihọ akotọ kẹ izerẹ na, rọkẹ Erọn avọ emezae riẹ, evaọ ẹdẹ nọ a rọ rehọ ae ze re a jọ izerẹ kẹ Jihova.+ 36 Jihova o jie uzi inọ a kẹ ae ẹkẹ nana evaọ Izrẹl evaọ ẹdẹ nọ o ro wholo ai.+ Onana yọ uzi nọ o rẹ jọ ribri rọkẹ ige rai kpobi.’”

37 Onana họ uzi kpahe idhe emahọ+ na, idhe ibi ekakọ+ na, idhe uzioraha+ na, idhe abe-ọriọ+ na, idhe eromuo+ na, gbe idhe ọriẹyeri+ na, 38 nwane wọhọ epanọ Jihova o jie uzi kẹ Mosis evaọ Ugbehru Saena+ evaọ ẹdẹ nọ ọ rọ ta kẹ ahwo Izrẹl nọ a kẹ Jihova ekẹ evaọ obọ udhude Saena.+

8 Jihova ọ tẹ gbẹ jẹ ta kẹ Mosis nọ: 2 “Rehọ Erọn avọ emezae riẹ kugbei,+ iwu na,+ ewhri eromuo* na,+ eruẹ idhe uzioraha na, igbo ivẹ na, gbe ekete ebrẹdi nọ ọ kare ẹvi na,+ 3 re whọ ta kẹ ogbotu na soso nọ a kokohọ aro unuẹthẹ uwou-udhu omakugbe na.”

4 Mosis ọ tẹ nwani ru epanọ Jihova ọ ta kẹe na, ogbotu na o te kokohọ aro unuẹthẹ uwou-udhu omakugbe na. 5 Mosis ọ tẹ ta kẹ ogbotu na nọ: “Onana họ oware nọ Jihova ọ ta kẹ omai nọ ma ru.” 6 Fikiere Mosis ọ tẹ rehọ Erọn avọ emezae riẹ ze kẹle ọ tẹ rọ ame họ ae.+ 7 Kẹsena o te ku ewu othethei+ na họ iẹe, rọ umueku+ na gbae, o te ku ukotu nọ u wo abọ họ+ na họ iẹe, je ku ẹfọd+ na họ iẹe, ọ tẹ rọ umueku* ẹfọd na nọ a zuo+ na gbae, o te thuru iei mu ei ziezi. 8 Nọ o ru oyena no, o te fi ẹwẹ-ohọ igbama+ na họ iẹe je fi Yurim avọ Tumim+ na họ eva ẹwẹ-ohọ igbama na. 9 Kẹsena o te ku etu-udhọfọ+ na họ iẹe uzou, o te fi ẹwẹ-odhe ọnwranwra na họ aro etu-udhọfọ na, oka omauromudhe ọrẹri*+ na, nwane wọhọ epanọ Jihova ọ ta kẹ Mosis nọ o ru.

10 Kẹsena Mosis ọ tẹ rehọ ewhri eromuo na o te wholo uwou-udhu na gbe eware kpobi nọ e rrọ eva riẹ+ o te ru ai fo.* 11 Nọ o ru oyena no, ọ tẹ frẹ azẹ na jọ fihọ agbada-idhe na isiahrẹ je wholo agbada-idhe na avọ ekwakwa riẹ kpobi gbe odhe na avọ oware nọ a rẹ wọe fihọ re ọ ruẹsi ru ai fo.* 12 Ukuhọ riẹ o te ku ewhri eromuo* na jọ họ uzou Erọn ro wholo iei re ọ ruẹsi ru ei fo.*+

13 Kẹsena Mosis ọ tẹ rehọ emezae Erọn ze kẹle o te ku iwu ithethei họ ai je thuru imueku rai mu ai, je ku itu họ ai,*+ nwane wọhọ epanọ Jihova ọ ta kẹ Mosis nọ o ru.

14 Kẹsena o te su eruẹ idhe uzioraha na ze, Erọn avọ emezae riẹ a tẹ rọ abọ rai kpahe uzou eruẹ idhe uzioraha+ na. 15 Mosis o te kpei jẹ rọ uziobọ riẹ rehọ azẹ+ eruẹ na je su ei họ izei agbada-idhe na evaọ tabọ tabọ riẹ kpobi, o te ru agbada-idhe na fo no uzioraha, rekọ o te ku azẹ nọ o kiọkọ họ otọ agbada-idhe na, re ọ ruẹsi ru ei fo je ru omavoro kẹe.* 16 Nọ o ru oyena no, ọ tẹ rehọ iwhri kpobi nọ e tamu ivu na, iwhri nọ e tamu edhẹ na, gbe ibieku ivẹ na avọ iwhri rai, Mosis o te ru ai kuye iwiri evaọ agbada-idhe+ na. 17 Kẹsena ọ tẹ rehọ eria nọ i kiọkọ evaọ eruẹ na, ohọrọ riẹ, uwo riẹ, gbe isọ riẹ, ọ tẹ rọ erae mahe ae evaọ otafe evuẹ+ na, nwane wọhọ epanọ Jihova ọ ta kẹ Mosis nọ o ru.

18 Ọ tẹ rehọ egbo idhe emahọ na ze kẹle, Erọn avọ emezae riẹ a tẹ rọ abọ rai kpahe uzou egbo+ na. 19 Kẹsena Mosis o te kpei jẹ frẹ azẹ riẹ họ tabọ tabọ agbada-idhe na kpobi wariẹ họ. 20 Ọ tẹ va egbo na fihọ abọ sa-sa riẹ, Mosis o te ru uzou riẹ, abọ sa-sa riẹ na, gbe iwhri* riẹ kuye iwiri. 21 Ọ rọ ame wozẹ ivu na avọ awọ na, Mosis o te ru egbo na soso kuye iwiri evaọ ehru agbada-idhe na. Onana o jọ idhe emahọ nọ i re gbo ore awere.* O jọ idhe nọ a rọ erae mahe kẹ Jihova, nwane wọhọ epanọ Jihova ọ ta kẹ Mosis nọ o ru.

22 Kẹsena ọ tẹ rọ egbo avọ ivẹ na ze, egbo eromuo+ na, Erọn avọ emezae riẹ a tẹ rọ abọ rai kpahe uzou egbo na.+ 23 Mosis o te kpei jẹ rehọ azẹ riẹ jọ ọ tẹ rehọ iẹe te ẹroro-ozọ obọze Erọn gbe uziobọ-uzou obọze riẹ gbe uziowọ-uzou obọze riẹ. 24 Kẹsena Mosis ọ tẹ rehọ emezae Erọn ziọ aro ọ tẹ rehọ azẹ na jọ te ẹroro-ozọ obọze rai gbe uziobọ-uzou obọze rai gbe uziowọ-uzou obọze rai; rekọ Mosis ọ tẹ frẹ azẹ nọ o kiọkọ na fihọ tabọ tabọ agbada-idhe+ na kpobi wariẹ họ.

25 Kẹsena ọ tẹ rehọ iwhri na, uweli nọ o rrọ iwhriwhri na, iwhri nọ e jọ ivu na kpobi, iwhri nọ e tamu edhẹ na, ibieku ivẹ na avọ iwhri rai, gbe owọ obọze+ na. 26 Ọ jọ ekete ebrẹdi nọ ọ kare ẹvi na nọ o jọ aro Jihova na rehọ ukulu ebrẹdi nọ ọ kare ẹvi ọvo nọ a ru wọhọ ẹmẹro,+ ukulu ebrẹdi nọ a rọ ewhri gua+ ọvo nọ a ru wọhọ ẹmẹro, gbe ebrẹdi ọkpakpala ọvo. O te fi ai họ ehru ekẹ iwhri na avọ owọ obọze na. 27 Nọ o ru oyena no, o te fi ai kpobi họ evabọ Erọn avọ evabọ emezae riẹ o te mu ai họ eveghe kpemu kparo wọhọ idhe iveghe evaọ aro Jihova. 28 Kẹsena Mosis ọ tẹ rehọ ai no evabọ rai o te ru ai kuye iwiri evaọ ehru agbada-idhe idhe emahọ na. Enana e jọ idhe eromuo nọ i re gbo ore awere.* O jọ idhe nọ a rọ erae mahe kẹ Jihova.

29 Mosis ọ tẹ rehọ ẹkpudu na o te veghe iei kpemu kparo wọhọ idhe iveghe evaọ aro Jihova.+ Onana o jọ ẹkẹ nọ o te Mosis evaọ egbo eromuo na, nwane wọhọ epanọ Jihova ọ ta kẹ Mosis nọ o ru.+

30 Mosis ọ tẹ rehọ ewhri eromuo+ na jọ gbe azẹ jọ nọ ọ jọ agbada-idhe na ọ tẹ frẹ riẹ họ Erọn avọ iwu riẹ gbe emezae riẹ avọ iwu emezae riẹ nọ e jọ kugbei. Kọ enẹ o ro ru Erọn avọ iwu riẹ gbe emezae riẹ+ avọ iwu rai fo.*+

31 Kẹsena Mosis ọ tẹ ta kẹ Erọn avọ emezae riẹ nọ: “Wha there+ uwo arao na evaọ aro unuẹthẹ uwou-udhu omakugbe na, yọ wha rẹ jọ etẹe re iẹe avọ ebrẹdi nọ ọ rrọ ekete eromuo na, nwane wọhọ epanọ a jie uzi riẹ kẹ omẹ na, ‘Erọn avọ emezae riẹ a rẹ re iẹe.’+ 32 Onọ u kiọkọ evaọ uwo arao na gbe ebrẹdi na wha rẹ rọ erae mahe iẹe.+ 33 Wha rẹ nya no aro unuẹthẹ uwou-udhu omakugbe na vievie he evaọ edẹ ihrẹ, bẹsenọ edẹ eromuo rai e rẹ gba no, keme o te rehọ edẹ ihrẹ re a rehọ owhai mu izerẹ.*+ 34 Jihova o jie uzi nọ ma ru oware nọ ma ru nẹnẹ na re a ruẹsi ru omavoro kẹ owhai.+ 35 Wha rẹ jọ evaọ aro unuẹthẹ uwou-udhu omakugbe na te aso te uvo edẹ ihrẹ+ re wha ru oware nọ Jihova ọ gwọlọ mi owhai,+ re wha seba ewhu; keme ere a jie uzi riẹ kẹ omẹ.”

36 Erọn avọ emezae riẹ a ru eware kpobi nọ Jihova o jie uzi rai ẹkwoma Mosis.

9 Evaọ ẹdẹ avọ eree,+ Mosis o te se Erọn avọ emezae riẹ gbe ekpako ahwo Izrẹl. 2 Ọ tẹ ta kẹ Erọn nọ: “Rehọ ọmọ-eruẹ kẹ omara rọkẹ idhe uzioraha+ gbe egbo rọkẹ idhe emahọ, enọ e rrọ omakọkọ, re whọ rehọ ae ziọ aro Jihova. 3 Rekọ whọ rẹ ta kẹ ahwo Izrẹl nọ, ‘Wha rehọ okri ze rọkẹ idhe uzioraha gbe ọmọ-eruẹ avọ ọmọ egbo, enọ e kpako te ukpe ọvo no, nọ e rrọ omakọkọ, rọkẹ idhe emahọ, 4 gbe eruẹ avọ egbo rọkẹ idhe ọriẹyeri,+ re a rehọ ae dhe idhe evaọ aro Jihova, gbe idhe ibi ekakọ+ nọ a rọ ewhri gua, keme nẹnẹ na Jihova ọ te romavia kẹ owhai.’”+

5 Fikiere a tẹ rehọ eware nọ Mosis ọ ta na ziọ aro unuẹthẹ uwou-udhu omakugbe na. Kẹsena ogbotu na soso a tẹ nyaze a te dikihẹ aro Jihova. 6 Mosis ọ tẹ ta kẹ ae nọ: “Onana họ oware nọ Jihova ọ ta nọ wha ru, re oruaro Jihova o ruẹse romavia kẹ owhai.”+ 7 Kẹsena Mosis ọ tẹ ta kẹ Erọn nọ: “Nya kpobọ agbada-idhe na re who dhe idhe uzioraha+ ra avọ idhe emahọ ra, re who ru omavoro kẹ omara+ gbe ahwo uwou ra; re who dhe idhe ahwo na,+ je ru omavoro kẹ ae,+ nwane wọhọ epanọ Jihova ọ ta.”

8 Erọn ọ tẹ nwane nya kpobọ agbada-idhe na o te kpe ọmọ-eruẹ idhe uzioraha nọ o rrọ kẹ ọyomariẹ+ na. 9 Kẹsena emezae Erọn a tẹ rehọ azẹ+ na kẹe, o te dhe uziobọ riẹ họ azẹ na, o te su ei họ izei agbada-idhe na, o te ku azẹ nọ o kiọkọ na họ otọ agbada-idhe+ na. 10 Ọ rehọ iwhri na avọ ibieku na gbe iwhri nọ e tamu edhẹ arao idhe uzioraha na o te ru ai kuye iwiri ọ tẹ mahe ae evaọ ehru agbada-idhe na, nwane wọhọ epanọ Jihova ọ ta kẹ Mosis.+ 11 Ọ tẹ rọ erae mahe uwo arao na avọ ohọrọ riẹ evaọ otafe evuẹ+ na.

12 Kẹsena o te kpe arao idhe emahọ na, emezae Erọn a tẹ rehọ azẹ na kẹe, ọ tẹ frẹ riẹ họ tabọ tabọ agbada-idhe na kpobi wariẹ họ.+ 13 A tẹ rọ ekẹ arao idhe emahọ na kẹe kugbe uzou na, o te ru ai kuye iwiri evaọ ehru agbada-idhe na. 14 Kẹsena ọ tẹ wozẹ ivu na avọ awọ na o te ru ai kuye iwiri evaọ ehru idhe emahọ nọ e rrọ agbada-idhe na.

15 O te dhe idhe ahwo na, ọ rehọ ẹwe idhe uzioraha nọ o rrọ kẹ ahwo na ze o te kpei ọ tẹ rehọ iẹe dhe idhe uzioraha wọhọ epanọ o ru ọrọ ọsosuọ na. 16 O te dhe idhe emahọ na, o ru rie lele oghẹrẹ nọ a dhesẹ nọ a rẹ hai ro ru ei na.+

17 Kẹsena o te dhe idhe ibi ekakọ+ na, ọ kwa ejọ vọ obọ riẹ o te ru ai kuye iwiri evaọ ehru agbada-idhe na, kugbe idhe emahọ ohiohiẹ+ na.

18 Kẹsena o te kpe eruẹ na gbe egbo idhe ọriẹyeri na nọ o rrọ kẹ ahwo na. Kẹsena emezae Erọn a tẹ rehọ azẹ na kẹe, ọ tẹ frẹ riẹ họ tabọ tabọ agbada-idhe na kpobi wariẹ họ.+ 19 Rọ kpahe ekẹ iwhri eruẹ+ na, uweli nọ o rrọ iwhriwhri orọ egbo na, iwhri nọ i ruru ekwakwa obeva na, ibieku na, gbe iwhri nọ e tamu edhẹ+ na, 20 a fi ekẹ iwhri yena kpobi họ ehru ẹkpudu na, kẹsena o te ru ekẹ iwhri na kuye iwiri evaọ ehru agbada-idhe+ na. 21 Rekọ Erọn o veghe ẹkpudu na avọ owọ obọze na kpemu kparo wọhọ idhe iveghe kẹ Jihova, nwane wọhọ epanọ Mosis ọ ta.+

22 Kẹsena Erọn ọ tẹ kpare abọ riẹ rri ahwo na ọ tẹ lẹ ẹro eghale kẹ ae,+ o te nwrotọ no oria idhe uzioraha avọ idhe emahọ gbe idhe ọriẹyeri nọ o je dhe na ze. 23 Ukuhọ riẹ Mosis avọ Erọn a tẹ ruọ eva uwou-udhu omakugbe na jẹ ruọ otafe a tẹ lẹ ẹro eghale kẹ ahwo na.+

Kẹsena oruaro Jihova o tẹ romavia kẹ ahwo na kpobi,+ 24 erae i te no obọ Jihova ze+ i te mu idhe emahọ na avọ ekẹ iwhri nọ e jọ ehru agbada-idhe na họ ẹmahe. Nọ ahwo na kpobi a ruẹ e riẹ a te muhọ ebo a te kie vovao tuotọ.+

10 Oke jọ o vrẹ no, Nedab avọ Abaihu+ emezae Erọn a tẹ rehọ ọvuọ omodhe erae riẹ a te fi erae họ iẹe je fi insẹnse+ họ iẹe. A te mu idhe nọ e rọwokugbe uzi hi+ họ edhe* evaọ aro Jihova, onọ o jie uzi riẹ kẹ ae nọ a ru hu. 2 Erae i te no aro Jihova ze e tẹ mahe ae,+ fikiere a te whu evaọ aro Jihova.+ 3 Mosis ọ tẹ ta kẹ Erọn nọ: “Enẹ Jihova ọ ta, ‘Mẹ rẹ jọ ọrẹri evaọ udevie ahwo nọ a kẹle omẹ,+ yọ me re wo oruaro evaọ aro ahwo na kpobi.’” Erọn o te fibo ọvo.

4 Fikiere Mosis o te se Mishẹl avọ Ẹlzefan emezae Uziẹl,+ oniọvo-ọsẹ Erọn, ọ tẹ ta kẹ ae nọ: “Wha nyaze re wha wọ imoni rai no aro oria ọrẹri na kpohọ oria jọ evaọ obọ otafe evuẹ na.” 5 Fikiere a tẹ nyaze a tẹ wọ ezae na avọ iwu ithethei rai nọ e rrọ ae oma kpohọ oria jọ evaọ obọ otafe evuẹ na wọhọ epanọ Mosis ọ ta kẹ ae.

6 Kẹsena Mosis ọ tẹ ta kẹ Erọn avọ emezae riẹ nọ i kiọkọ Ẹlieza avọ Itama, inọ: “Wha nyasiọ uzou rai ba jẹvu jẹvu hu hayo bẹre iwu rai hi,+ re wha gbe whu hu yọ eva e gbẹ dha Ọghẹnẹ kpahe ogbotu na kpobi hi. Inievo rai erọ uwou Izrẹl soso a te viẹ enọ Jihova ọ rehọ erae kpe na. 7 Wha re no unuẹthẹ uwou-udhu omakugbe na vievie he o gbẹ rrọ ere he wha ti whu, keme ewhri eromuo Jihova ọ rrọ owhai oma.”+ Fikiere a te ru lele epanọ Mosis ọ ta.

8 Kẹsena Jihova ọ tẹ ta kẹ Erọn nọ: 9 “Whọ da enwaene hayo oghẹrẹ idi egaga efa ha, te owhẹ te emezae ra okenọ wha tẹ be nyaziọ uwou-udhu omakugbe+ na, re wha seba ewhu. Onana yọ uzi nọ o rẹ jọ ribri rọkẹ ige rai kpobi. 10 Re u fi ohẹriẹ họ udevie oware nọ o rrọ ọrẹri avọ oware oma-uzue gbe udevie oware nọ o fo ho avọ onọ o fo,+ 11 re wha je wuhrẹ ahwo Izrẹl ijaje kpobi nọ Jihova ọ kẹ rai ẹkwoma Mosis.”+

12 Kẹsena Mosis ọ tẹ ta kẹ Erọn avọ Ẹlieza gbe Itama emezae riẹ nọ i kiọkọ nọ: “Rehọ oware nọ u kiọkọ evaọ idhe ibi ekakọ na evaọ idhe Jihova nọ a rọ erae mahe na re wha re iẹe wọhọ ebrẹdi nọ ọ kare ẹvi kẹle agbada-idhe+ na, keme onana yọ oware nọ o mae rrọ ọrẹri.+ 13 Wha rẹ re iẹe hrọ evaọ oria ọrẹri,+ keme onana yọ oware nọ a rẹ kẹ owhẹ gbe oware nọ a rẹ kẹ emezae ra evaọ idhe Jihova nọ a rọ erae mahe, keme onana họ oware nọ a jie uzi riẹ kẹ omẹ. 14 Wha rẹ jẹ re ẹkpudu idhe iveghe na gbe owọ ẹkẹ ọrẹri+ na evaọ oria ofuafo, te owhẹ te emezae ra gbe emetẹ ra,+ keme a rehọ eware nana kẹ no wọhọ eware nọ a rẹ kẹ owhẹ gbe eware nọ a rẹ kẹ emezae ra evaọ idhe ọriẹyeri ahwo Izrẹl. 15 A rẹ rehọ owọ ẹkẹ ọrẹri na ze gbe ẹkpudu idhe iveghe na kugbe idhe iwhri nọ a rẹ rọ erae mahe, re a ruẹsi veghe idhe iveghe na kpemu kparo evaọ aro Jihova; yọ e rẹ jọ eware nọ a rẹ kẹ owhẹ gbe emezae ra+ ribri, wọhọ epanọ Jihova ọ ta.”

16 Mosis ọ tẹ romatotọ gwọlọ ẹwe idhe uzioraha+ na, ọ tẹ ruẹ nọ a mahe e riẹ no. Fikiere eva e tẹ dhae kpahe Ẹlieza avọ Itama emezae Erọn nọ i kiọkọ, ọ tẹ ta nọ: 17 “Fikieme wha gbẹ re idhe uzioraha na evaọ oria ọrẹri+ na ha, nọ orọnọ onana yọ oware nọ o mae rrọ ọrẹri yọ a rehọ e riẹ kẹ owhai re wha ruẹse wha oruthọ ogbotu na je ru omavoro kẹ ae evaọ aro Jihova? 18 Rri! A rehọ azẹ riẹ ziọ eva oria ọrẹri+ na ha. Wha hae ruẹ nọ wha re riẹ evaọ oria ọrẹri na, nwane wọhọ epanọ a jie uzi riẹ kẹ omẹ.” 19 Erọn o te yo kẹ Mosis nọ: “Rri! Nẹnẹ a dhe idhe uzioraha rai gbe idhe emahọ rai evaọ aro Jihova,+ ghele na eware nana e via kẹ omẹ. Otẹrọnọ mẹ hae re idhe uzioraha na nẹnẹ na, kọ oyena o hae te were Jihova?” 20 Nọ Mosis o yo oyena, o tẹ vọe eva.

11 Kẹsena Jihova ọ tẹ ta kẹ Mosis avọ Erọn nọ: 2 “Ta kẹ ahwo Izrẹl nọ, ‘Enana họ emama nọ e rrọ uzuazọ erọ otọakpọ* na nọ wha rẹ sae re:+ 3 Arao kpobi nọ ọ bẹre ekothawọ nọ ekothawọ riẹ e bẹre te otọ, nọ ọ rẹ wariẹ re eware nọ ọ re no vẹre, a rẹ sae re iẹe.

4 “‘Rekọ erao nana nọ e rẹ wariẹ re eware nọ a re no vẹre hayo nọ i wo ekothawọ nọ e bẹre na, wha rẹ re ae vievie he: ekamẹle, nọ ọ rẹ wariẹ re eware nọ ọ re no vẹre rekọ ekothawọ riẹ e bẹre he. Yọ arao nọ ọ fo ho kẹ owhai.+ 5 Ere ọvona kpahe ebaja nọ ọ rẹ rria eghogho-utho+ na, keme ọ rẹ wariẹ re eware nọ ọ re no vẹre rekọ ekothawọ riẹ ọ bẹre he. Yọ arao nọ ọ fo ho kẹ owhai. 6 Ere ọvona kpahe uriri, keme ọ rẹ wariẹ re eware nọ ọ re no vẹre rekọ ekothawọ riẹ ọ bẹre he. Yọ arao nọ ọ fo ho kẹ owhai. 7 Ere ọvona kpahe esi,+ keme o wo ekothawọ nọ ọ bẹre nọ ekothawọ riẹ ọ bẹre te otọ rekọ ọ rẹ wariẹ re eware nọ ọ re no vẹre he. Yọ arao nọ ọ fo ho kẹ owhai. 8 Wha rẹ re uwo rai ọvuọvo hayo rọ obọ te owhuowhu rai vievie he. Yọ erao nọ e fo ho kẹ owhai.+

9 “‘Enana họ eware nọ wha rẹ sae re evaọ usu eware kpobi nọ e rrọ obọ ame: Oware kpobi nọ o rrọ eva ame nọ o wo efọlefọ gbe egbẹ, nọ e rrọ eva ebade hayo ithẹ, wha rẹ sae re ai.+ 10 Rekọ oware kpobi nọ o rrọ eva ebade gbe ithẹ nọ o wo efọlefọ họ gbe egbẹ hẹ, evaọ usu emama nọ e rẹ jọ usu ovo buobu* gbe omama* ofa kpobi nọ o rrọ uzuazọ nọ o be rria ame, yọ oware otọtọ kẹ owhai. 11 Ẹhẹ, e rẹ jọ eware etọtọ kẹ owhai, yọ wha rẹ re uwo rai ọvuọvo vievie he,+ wha re rri owhuowhu rai tọtọtọ hrọ. 12 Oware kpobi nọ o rrọ eva ame nọ o wo efọlefọ họ gbe egbẹ hẹ yọ oware otọtọ kẹ owhai.

13 “‘Enana họ emama nọ e rẹ rra nọ wha re rri tọtọtọ; a rẹ re ae he, keme e rrọ tọtọtọ: ugo,+ ọso ọgaga, udele obiebi,+ 14 ẹgodi ọwawae gbe koghẹrẹ koghẹrẹ ẹgodi obiebi kpobi, 15 koghẹrẹ koghẹrẹ ọkọlọbe kpobi, 16 ogomugoro, okpukpuru, ayesa, koghẹrẹ koghẹrẹ ọso kpobi, 17 okpukpuru ọsese na, ọkẹkẹlẹ, okpukpuru nọ o wo ezọ ithethei, 18 ọkọlọbe-abade, okpitolo, udele, 19 ogbodu, koghẹrẹ koghẹrẹ eruele kpobi, akia-eni, gbe adha. 20 Koghẹrẹ koghẹrẹ emama nọ e rẹ jọ usu ovo buobu kpobi nọ i wo ibekpe* nọ e rẹ rehọ awọ ane na kpobi nya, yọ eware etọtọ kẹ owhai.

21 “‘Evaọ usu emama nọ e rẹ jọ usu ovo buobu kpobi nọ i wo ibekpe nọ e rẹ rehọ awọ ane na kpobi nya, enọ wha rẹ sae re ọvo họ enọ i wo awọ nọ i wo ezo nọ i re kpiri nọ a re ro duola evaọ otọ nọ i kpehru vi awọ edekọ rai. 22 Usu enana wha rẹ sae jọ re: oghoghẹrẹ ebaka-ẹkpẹ nọ e rẹ kwa no oria ruọ oria, oghẹrẹ ebaka-ẹkpẹ+ efa nọ a rẹ sae re, erọ,* gbe ebaka. 23 Emama efa nọ e rẹ jọ usu ovo buobu kpobi nọ i wo ibekpe nọ e rẹ rehọ awọ ane na kpobi nya yọ eware etọtọ kẹ owhai. 24 Enana e rẹ sai ru owhai fihọ ahwo nọ a fo ho. Ohwo kpobi nọ ọ rọ obọ te owhuowhu rai ọ rẹ jọ ọnọ ọ fo ho ri bọo owọwọ.+ 25 Ohwo kpobi nọ ọ wọ owhuowhu rai jọ kpobi ọ rẹ fọrọ iwu riẹ;+ ọ rẹ jọ ọnọ ọ fo ho ri bọo owọwọ.

26 “‘Arao kpobi nọ ọ bẹre ekothawọ rekọ nọ ekothawọ riẹ ọ bẹre te otọ họ yọ ọ rẹ wariẹ re eware nọ ọ re no vẹre he yọ ọnọ ọ fo ho kẹ owhai. Ohwo kpobi nọ ọ rọ obọ te ai ọ rẹ jọ ọnọ ọ fo ho.+ 27 Omama kpobi nọ o rrọ uzuazọ nọ ọ rẹ rọ ikpituawọ nya evaọ usu emama kpobi nọ e rẹ rọ awọ ane na kpobi nya yọ ọnọ ọ fo ho kẹ owhai. Ohwo kpobi nọ ọ rọ obọ te owhuowhu rai ọ rẹ jọ ọnọ ọ fo ho ri bọo owọwọ. 28 Ọnọ ọ wọ owhuowhu rai ọ rẹ fọrọ iwu riẹ,+ yọ ọ rẹ jọ ọnọ ọ fo ho ri bọo owọwọ.+ Yọ eware nọ e fo ho kẹ owhai.

29 “‘Enana họ emama nọ e rẹ jọ usu ovo buobu* erọ otọakpọ na nọ e fo ho kẹ owhai: ọdhokpa nọ ọ rẹ tọ otọ, odhogbi,+ koghẹrẹ koghẹrẹ oghogho kpobi, 30 ọhọruwou, owozo,* ọwewe, oghogho ẹkpẹ, gbe ewhewhẹ. 31 Emama nana nọ e rẹ jọ usu ovo buobu na yọ eware nọ e fo ho kẹ owhai.+ Ohwo kpobi nọ ọ rọ obọ te owhuowhu rai ọ rẹ jọ ọnọ ọ fo ho ri bọo owọwọ.+

32 “‘Whaọ oware kpobi nọ owhuowhu rai o kie fihọ o rẹ jọ oware nọ o fo ho, te okwakwa-uwou nọ a rọ ure ru, ewu, oviẹ-arao,* hayo ẹwẹ ohọ-ekpa.* Okwakwa-uwou kpobi nọ a re ro ru oware, a re duwu iei fihọ ame leno, o rẹ jọ oware nọ o fo ho ri bọo owọwọ; kẹsena o vẹ tẹ te fo. 33 Otẹrọnọ a kie fihọ okwakwa nọ a rọ ẹkpẹ ma, wha re kpe okwakwa na no, yọ oware kpobi nọ o jọ eva riẹ o rẹ jọ oware nọ o fo ho.+ 34 Oghẹrẹ emu kpobi nọ ame nọ o no okwakwa oyena ze o te, o rẹ jọ oware nọ o fo ho, yọ oware kpobi nọ a rẹ da nọ o rrọ eva okwakwa oyena o rẹ jọ oware nọ o fo ho. 35 Oware kpobi nọ owhuowhu rai o kie fihọ o rẹ jọ oware nọ o fo ho. Makọ ovini hayo enyerae nọ a ma, a re kporo iei ehehẹhẹ. Yọ eware nọ e fo ho, yọ e rẹ jọ eware nọ e fo ho kẹ owhai. 36 Eyeri-ame gbe ọgọdọ-ame nọ a rẹ jọ sẹro* ame ọvo e rẹ gbẹ jọ eware nọ e fo, rekọ ohwo kpobi nọ ọ rọ obọ te owhuowhu rai ọ rẹ jọ ọnọ ọ fo ho. 37 Otẹrọnọ owhuowhu rai o kie fihọ ubi okakọ nọ a gwọlọ kọ, o rẹ gbẹ jọ oware nọ o fo. 38 Rekọ otẹrọnọ a fi ame họ ubi kẹsena abọ owhuowhu rai jọ o je kie fihọ iẹe, ubi na o rẹ jọ onọ o fo ho kẹ owhai.

39 “‘Whaọ otẹrọnọ arao nọ wha rẹ re o whu, ohwo kpobi nọ ọ rọ obọ te arao owhuowhu na ọ rẹ jọ ọnọ ọ fo ho ri bọo owọwọ.+ 40 Ohwo kpobi nọ ọ jọ arao owhuowhu na re ọ rẹ fọrọ iwu riẹ, yọ ọ rẹ jọ ọnọ ọ fo ho ri bọo owọwọ.+ Ohwo kpobi nọ ọ wọ arao owhuowhu na vrẹ ọ rẹ fọrọ iwu riẹ, yọ ọ rẹ jọ ọnọ ọ fo ho ri bọo owọwọ. 41 Emama nọ e rẹ jọ usu ovo buobu kpobi evaọ otọakpọ na yọ eware etọtọ.+ A rẹ re ae vievie he. 42 Wha rẹ re omama ovuovo nọ o rẹ rọ okpeva si hi, omama kpobi nọ o rẹ rọ awọ ane na kpobi nya, hayo emama nọ e rẹ jọ usu ovo buobu kpobi evaọ otọakpọ na nọ i wo awọ buobu, keme yọ eware etọtọ.+ 43 Wha rọ ẹkwoma emama nọ e rẹ jọ usu ovo buobu na ọvuọvo ru omarai* fihọ tọtọtọ họ, yọ wha rehọ ae zue omarai hi re i ru owhai fihọ enọ e fo ho.+ 44 Keme mẹ họ Jihova Ọghẹnẹ rai,+ yọ wha re ru omarai fo hrọ wha vẹ jọ ahwo ọrẹri,+ keme mẹ ọrẹri.+ Fikiere wha rẹ rọ ẹkwoma emama nọ e rẹ jọ usu ovo buobu nọ e be nya evaọ otọakpọ na ọvuọvo ru omarai* fihọ enọ e fo ho vievie he. 45 Keme mẹ họ Jihova, ọnọ o bi su owhai no ẹkwotọ Ijipti re me dhesẹ kẹ owhai nọ mẹ họ Ọghẹnẹ rai,+ yọ wha rẹ jọ ọrẹri+ hrọ, keme mẹ yọ ọrẹri.+

46 “‘Onana họ uzi kpahe erao na, emama nọ e rẹ rra, emama* kpobi nọ e rrọ uzuazọ nọ e be nya evaọ ame, jẹ kpahe emama* nọ e rẹ jọ usu ovo buobu* evaọ otọakpọ na, 47 re u fi ohẹriẹ họ udevie onọ o fo ho avọ onọ o fo gbe udevie emama nọ e rrọ uzuazọ nọ a rẹ sae re gbe enọ a rẹ sae re he.’”+

12 Jihova ọ tẹ gbẹ ta kẹ Mosis nọ: 2 “Ta kẹ ahwo Izrẹl nọ, ‘Otẹrọnọ aye o dihọ o je yẹ ọmọzae, ọ rẹ jọ ọnọ ọ fo ho edẹ ihrẹ, nwane wọhọ epanọ ọ rẹ jọ evaọ edẹ egbegbe riẹ nọ ọ tẹ rrọ oke riẹ+ na. 3 Evaọ ẹdẹ avọ eree, a rẹ yawo+ ọmọzae na a ve bru uwoliwo* riẹ no. 4 Ọ rẹ ruabọhọ ru oma riẹ fo no azẹ na evaọ edẹ ọgbagbesa nọ i lele i rie. Ọ rẹ rọ obọ te oware ọrẹri ọvo ho, yọ ọ rẹ nyaziọ oria ọrẹri na ha bẹsenọ ọ rẹ rria edẹ oma-urufuọ riẹ gba no.

5 “‘Otẹrọnọ o yẹ ọmọtẹ, ọ rẹ jọ ọnọ ọ fo ho evaọ edẹ ikpegbene, nwane wọhọ epanọ ọ rẹ jọ evaọ etoke nọ ọ tẹ rrọ oke riẹ. Ọ rẹ gbẹ hai ru oma riẹ fo no azẹ na evaọ edẹ udhosa-gbezeza nọ i lele i rie. 6 Nọ edẹ oma-urufuọ riẹ fiki ọmọzae hayo ọmọtẹ e tẹ gba no, ọ rẹ rehọ egbo nọ ọ rrọ ukpe ọsosuọ riẹ ze rọkẹ idhe emahọ+ avọ ọmọ olekuku hayo erueruẹ rọkẹ idhe uzioraha, ọ rẹ rehọ ae ziọ aro unuẹthẹ uwou-udhu omakugbe na bru ozerẹ na ze. 7 Ozerẹ na ọ rẹ rehọ ae ziọ aro Jihova o ve ru omavoro kẹe, ọ vẹ fo no azẹ nọ o hwẹ na. Onana họ uzi kpahe aye nọ o yẹ ọmọzae hayo ọmọtẹ. 8 Rekọ otẹrọnọ obọ riẹ u gbe te ogodẹ hẹ, ọ rẹ rọ irueruẹ ivẹ hayo emọ ilekuku ivẹ+ ze hrọ, ọvo jọ rọkẹ idhe emahọ ọdekọ rọkẹ idhe uzioraha, ozerẹ na o ve ru omavoro kẹe, kẹsena ọ vẹ fo.’”

13 Jihova ọ tẹ gbẹ ta kẹ Mosis avọ Erọn nọ: 2 “Otẹrọnọ oria jọ evaọ ohọroma* ohwo u fu, u wo omola nọ o yamu, hayo amahe* yọ o rẹ sai zihe ruọ ẹyao oti*+ evaọ ohọroma riẹ, a rẹ rehọ iẹe se Erọn ozerẹ na hrọ hayo omọvo emezae riẹ izerẹ na.+ 3 Ozerẹ na o re rri oware nọ u ru ohọroma riẹ na ziezi. Nọ eto nọ e rrọ oria nọ oware u ru na i te ku ovao rẹriẹ be fo yọ oware nọ u ru oria na u ru wọhọ nọ u kodo vi ohọroma na, onana yọ ẹyao oti. Ozerẹ na o re rri rie ziezi ọ vẹ ta via nọ ọ fo ho. 4 Rekọ otẹrọnọ amahe* nọ ọ rrọ ohọroma na o be fo yọ u ru wọhọ nọ u kodo vi ohọroma na ha yọ eto na i ri ku ovao rẹriẹ be fo ho, ozerẹ na o re fi ohwo nọ oware u ru oma na họ oria riẹ sa edẹ ihrẹ.+ 5 Kẹsena ozerẹ na o ve rri ohwo na ziezi evaọ ẹdẹ avọ ihrẹ na, yọ otẹrọnọ o wọhọ nọ oware nọ u ru rie oma na u gbe bi yoma ha yọ o kẹre viere he evaọ ohọroma na, ozerẹ na o re fi ei họ oria riẹ sa edẹ ihrẹ efa.

6 “Ozerẹ na ọ rẹ wariẹ rri rie ziezi evaọ ẹdẹ avọ ihrẹ na, yọ otẹrọnọ oware nọ u ru rie oma na u bi voro no yọ o kẹre viere he evaọ ohọroma na, ozerẹ na o ve kuenu kẹe nọ ọ fo;+ oware na yọ omola gheghe nọ o yamu. Ohwo na ọ vẹ fọrọ iwu riẹ ọ vẹ jọ ọnọ ọ fo. 7 Rekọ otẹrọnọ o rrọ vevẹ nọ omola nọ o yamu* na o kẹre viere evaọ ohọroma na yọ ọ nyabru ozerẹ na kẹ oma-urufuọ riẹ no vẹre, ọ rẹ wariẹ nya* re o dhesẹ oma riẹ kẹ ozerẹ na. 8 Ozerẹ na o re rri rie ziezi, yọ otẹrọnọ omola nọ o yamu na o kẹre viere evaọ ohọroma na, kẹsena ozerẹ na ọ vẹ ta via nọ ohwo na ọ fo ho. Onana yọ oti.+

9 “Otẹrọnọ ẹyao oti ọ ruọ ọzae oma, a rẹ rehọ iẹe bru ozerẹ na ze hrọ, 10 ozerẹ na o re rri rie ziezi.+ Otẹrọnọ oria nọ u fu evaọ ohọroma riẹ na o be fo, yọ u ru eto na ku ovao rẹriẹ be fo yọ u wo omola nọ u rovie enu fihọ+ evaọ oria nọ u fu na, 11 yọ oti nọ ọ rẹ kaki kpo ho ọ rrọ ohọroma riẹ na, ozerẹ na ọ rẹ ta via nọ ohwo na ọ fo ho. O re fi ei họ oria riẹ sa+ ha, keme ọ fo ho. 12 Whaọ otẹrọnọ oti na ọ bẹre via evaọ ohọroma na kpobi, yọ oti na ọ rehọ oma ohwo na kpobi no uzou te evawọ, oria kpobi nọ ozerẹ na ọ rẹ sae ruẹ, 13 yọ ozerẹ na o rri rie ziezi no jẹ ruẹ nọ oti na ọ ruọ ohọroma riẹ kpobi no, kẹsena o ve kuenu kẹ ohwo nọ oware u ru oma na nọ ọ fo.* Omariẹ kpobi u ku ovao rẹriẹ no be fo, ohwo na ọ fo. 14 Rekọ oke kpobi nọ omola nọ u rovie enu fihọ u te noi ze, ohwo na ọ rẹ jọ ọnọ ọ fo ho. 15 Nọ ozerẹ na ọ tẹ ruẹ omola nọ u rovie enu fihọ na, ọ vẹ ta via nọ ohwo na ọ fo ho.+ Omola nọ u rovie enu fihọ na o fo ho. Onana yọ oti.+ 16 Rekọ otẹrọnọ omola nọ u rovie enu fihọ na o wariẹ ku ovao rẹriẹ be fo, kẹsena ọ vẹ nyabru ozerẹ na ze. 17 Ozerẹ na o re rri rie ziezi,+ yọ otẹrọnọ oware nọ u ru rie oma na u ku ovao rẹriẹ be fo, ozerẹ na o ve kuenu kẹ ohwo nọ oware u ru oma na nọ ọ fo. Ohwo na ọ fo.

18 “Otẹrọnọ ẹruẹso o mu ohwo ohọroma, yọ u kpo no, 19 rekọ oria nọ ẹruẹso o mu vẹre na o te fu fihọ fuafo hayo amahe* nọ ọ rrọ fuafo jẹ be ware ọ tẹ romavia evaọ oria na, o re dhesẹ oma riẹ kẹ ozerẹ na hrọ. 20 Ozerẹ na o re rri rie ziezi,+ yọ u te ru wọhọ nọ u kodo vi ohọroma riẹ yọ eto riẹ i ku ovao rẹriẹ be fo, ozerẹ na ọ rẹ ta via nọ ohwo na ọ fo ho. Ẹyao oti ọye ọ bẹre via no oria ẹruẹso na ze na. 21 Rekọ otẹrọnọ ozerẹ na o rri rie ziezi ọ jẹ ruẹ nọ eto efuafo evuevo e riẹ hẹ yọ u kodo vi ohọroma na ha, yọ u ru wọhọ nọ u bi voro no, ozerẹ na o re fi ei họ oria riẹ sa edẹ ihrẹ.+ 22 Yọ o tẹ rrọ vevẹ nọ o kẹre ruọ ohọroma na no, ozerẹ na ọ rẹ ta via nọ ohwo na ọ fo ho. Onana yọ ẹyao. 23 Rekọ otẹrọnọ amahe* na ọ daji oria ovo, o kẹre viere he evaọ ohọroma na, onana yọ oria nọ u fu gheghe no oria ẹruẹso na ze, ozerẹ na o ve kuenu kẹ ohwo na nọ ọ fo.+

24 “Hayo otẹrọnọ erae e mahe omola fihọ ohwo oma, uwo-oma nọ o rrọ oria omola na u je zihe ruọ amahe* nọ ọ rrọ fuafo jẹ be ware hayo amahe* ọfuafo, 25 ozerẹ na o re rri rie ziezi. Otẹrọnọ eto nọ e rrọ amahe* na i ku ovao rẹriẹ no be fo yọ u ru wọhọ nọ u kodo vi ohọroma na, yọ ẹyao oti ọ romavia evaọ oria omola na, ozerẹ na ọ rẹ ta via nọ ohwo na ọ fo ho. Onana yọ ẹyao oti. 26 Rekọ otẹrọnọ ozerẹ na o rri rie ziezi ọ jẹ ruẹ nọ eto efuafo evuevo e rrọ amahe* na ha yọ u kodo vi ohọroma na ha, yọ u bi voro no, ozerẹ na o re fi ei họ oria riẹ sa edẹ ihrẹ.+ 27 Ozerẹ na o re rri ohwo na ziezi evaọ ẹdẹ avọ ihrẹ na, yọ otẹrọnọ o rrọ vevẹ nọ o kẹre viere no evaọ ohọroma na, ozerẹ na ọ rẹ ta via nọ ohwo na ọ fo ho. Onana yọ ẹyao oti. 28 Rekọ otẹrọnọ amahe* na ọ daji oria ovo, o kẹre viere he evaọ ohọroma na, yọ o bi voro no, onana yọ oria nọ u fu gheghe fiki omola na, ozerẹ na o ve kuenu kẹ ohwo na nọ ọ fo, keme yọ oria omola nọ u fu.

29 “Nọ oware jọ u te ru fihọ uzou hayo agbotọ ọzae hayo aye, 30 ozerẹ na o re rri oware nọ u ru fihọ iẹe na+ ziezi. Otẹrọnọ u ru wọhọ nọ u kodo vi ohọroma na yọ eto na e rrọ iyẹlo jẹ rrọ fafa, ozerẹ na ọ rẹ ta via nọ ohwo na ọ fo ho; ẹyao ọ ruọ otọ uzou hayo etuagba na. Onana yọ oti uzou hayo ọrọ agbotọ. 31 Rekọ otẹrọnọ ozerẹ na ọ ruẹ nọ oria nọ oware u ru na u ru wọhọ nọ u kodo vi ohọroma na ha yọ eto ibiebi evuevo e riẹ hẹ, ozerẹ na o re fi ei họ oria riẹ sa edẹ ihrẹ.+ 32 Ozerẹ na o re rri oware nọ u ru rie na ziezi evaọ ẹdẹ avọ ihrẹ na, yọ otẹrọnọ oria nọ oware u ru na o kẹre viere he, yọ eto iyẹlo evuevo e riẹ hẹ yọ o wọhọ nọ oria nọ oware u ru na u kodo vi ohọroma na ha, 33 ohwo na ọ rẹ nware eto riẹ, rekọ ọ rẹ nware eto oria nọ oware u ru na ha. Kẹsena ozerẹ na o ve fi ohwo nọ oware u ru na họ oria riẹ sa edẹ ihrẹ.

34 “Ozerẹ na ọ rẹ wariẹ rri oria nọ oware u ru na ziezi evaọ ẹdẹ avọ ihrẹ na, yọ otẹrọnọ oware nọ u ru otọ uzou avọ etuagba na o kẹre viere he evaọ ohọroma na, yọ u ru wọhọ nọ u kodo vi ohọroma na ha, ozerẹ na o re kuenu kẹ ohwo na hrọ inọ ọ fo, yọ ọ rẹ fọrọ iwu riẹ ọ vẹ jọ ọnọ ọ fo. 35 Rekọ otẹrọnọ o rrọ vevẹ nọ oware nọ u ru rie na o kẹre viere evaọ ohọroma na yọ a ru oma-urufuọ kẹe no vẹre, 36 ozerẹ na o re rri rie ziezi, yọ otẹrọnọ oware nọ u ru fihọ iẹe na o kẹre viere no evaọ ohọroma na, u gbe du gwọlọ nọ ozerẹ na o rri gwọlọ eto iyẹlo ho; ohwo yena ọ fo ho. 37 Rekọ nọ o te rri rie ziezi ọ jẹ ruẹ nọ oware nọ u ru fihọ iẹe na o re kẹre viere he yọ eto ibiebi i di fihọ iẹe no, koyehọ oware nọ u ru fihọ iẹe na u kpo no. Ohwo na ọ fo, yọ ozerẹ na o re kuenu kẹ ohwo na nọ ọ fo.+

38 “Otẹrọnọ amahe* o ru fihọ ohọroma* ọzae hayo aye yọ amahe* na ọ rrọ fuafo, 39 ozerẹ na o re rri rie ziezi.+ Otẹrọnọ amahe* nọ ọ rrọ ohọroma na ọ rrọ fuafo viẹviẹ, onana yọ emezẹ gheghe nọ e romavia evaọ ohọroma na. Ohwo yena ọ fo.

40 “Otẹrọnọ eto uzou ọzae e fa no nọ ọ jẹ fa oko uzou, ohwo na ọ fo. 41 Otẹrọnọ eto aro uzou riẹ e fa ọ jẹ fa oko uzou evaọ aro uzou riẹ, ohwo na ọ fo. 42 Rekọ otẹrọnọ omola nọ o rrọ fuafo jẹ be ware o romavia evaọ oria nọ o fa oko evaọ otọ uzou riẹ hayo aruezo riẹ na, yọ oti ọ be romavia evaọ otọ uzou riẹ hayo aruezo riẹ na. 43 Ozerẹ na o re rri rie ziezi, yọ otẹrọnọ oria nọ u fu fiki oware nọ u ru fihọ iẹe na o rrọ fuafo jẹ be ware evaọ oria nọ o fa oko evaọ ehru uzou riẹ hayo aruezo riẹ na, yọ u ru wọhọ oti evaọ ohọroma riẹ, 44 ohwo na yọ ọmoti. Ohwo na ọ fo ho, yọ ozerẹ na ọ rẹ ta via nọ ohwo na ọ fo ho fiki ẹyao nọ ọ rrọ uzou riẹ na. 45 Rọkẹ ọmoti nọ o wo ẹyao na, o re fi iwu nọ e bẹre no họ, ọ vẹ jẹ nyasiọ uzou riẹ ba jẹvu jẹvu, o re ruru etuagba riẹ yọ o re bo nọ, ‘Ọnọ ọ fo ho, ọnọ ọ fo ho!’ 46 Ọ rẹ jọ ohwo nọ ọ fo ho evaọ oke na kpobi nọ ẹyao na ọ rọ riẹe oma na. Nọ orọnọ ọ fo ho na, ọye ọvo ọ rẹ rria oria riẹ sa. Oria nọ ọ rẹ rria o rẹ jọ obọ otafe evuẹ na.+

47 “Otẹrọnọ ẹyao oti ọ ruọ ewu o te gbei ku, makọ ewu iwhulu hayo ewu ohọ-olọlọhọ, 48 te evaọ ilulu nọ e nya uthethei hayo ilulu nọ e nya okẹkẹe ọrọ ewu ohọ-olọlọhọ na hayo iwhulu na, hayo evaọ oviẹ-arao hayo oware kpobi nọ a rọ oviẹ-arao ru, 49 yọ epe igrini nọ ọ wọhọ iyẹlo hayo epe ọwawae ọrọ ẹyao na ọ ruọ ewu na, oviẹ-arao, ilulu nọ e nya uthethei ewu, ilulu nọ e nya okẹkẹe ewu, hayo oware kpobi nọ a rọ oviẹ-arao ru je gbei ku, oyena yọ ogbekuo nọ o no oti ze, a re dhesẹ iẹe kẹ ozerẹ na. 50 Ozerẹ na o re rri ẹyao na ziezi, yọ o re fi ei họ oria riẹ sa edẹ ihrẹ+ hrọ. 51 Nọ o te rri ẹyao na ziezi evaọ ẹdẹ avọ ihrẹ na ọ jẹ ruẹ nọ o kẹre viere no evaọ ewu na, evaọ ilulu nọ e nya uthethei ewu na, evaọ ilulu nọ e nya okẹkẹe ewu na, hayo evaọ oviẹ-arao na, (makọ oware nọ a rọ oviẹ-arao na ru kẹhẹ), yọ oti ọgaga, oware na o fo ho.+ 52 Ọ rẹ mahe ewu na, te ọ rrọ ilulu nọ e nya uthethei hayo ilulu nọ e nya okẹkẹe ọrọ ewu iwhulu na hayo ọrọ ohọ-olọlọhọ na hayo oware kpobi nọ a rọ oviẹ-arao ru nọ ẹyao na ọ ro no, keme onana yọ oti ọgaga. A rẹ rehọ erae mahe iẹe.

53 “Rekọ otẹrọnọ ozerẹ na o rri rie ziezi yọ ẹyao na ọ kẹre viere he evaọ ewu na, hayo evaọ ilulu nọ e nya uthethei ewu na, evaọ ilulu nọ e nya okẹkẹe ewu na, hayo evaọ oware jọ kpobi nọ a rọ oviẹ-arao ru, 54 kẹsena ozerẹ na ọ vẹ ta nọ a fọrọ oware nọ ẹyao na o gbeku na, yọ o re fi ei họ oria riẹ sa edẹ ihrẹ efa. 55 Ozerẹ na o ve rri oware nọ ẹyao na o gbeku na ziezi nọ a tẹ nabe fọrọ iẹe no. Otẹrọnọ ovao oria nọ ẹyao na o gbeku na u ri nwene he, o tẹ make rọnọ ẹyao na ọ kẹre viere he, yọ oware na o fo ho. Whọ rẹ rọ erae mahe iẹe keme o ruọ oma oware na kpobi no, no obeva riẹ ze hayo no otafe riẹ ze.

56 “Rekọ otẹrọnọ ozerẹ na o rri rie ziezi no yọ oria nọ ẹyao na o gbeku na o bi voro no nọ a nabe fọrọ iẹe no, ọ rẹ bẹre oria na no ewu na hayo oviẹ-arao na hayo ilulu nọ e nya uthethei hayo ilulu nọ e nya okẹkẹe riẹ na. 57 Rekọ o tẹ gbẹ romavia evaọ oria ofa evaọ ewu na hayo ilulu nọ e nya uthethei ewu hayo ilulu nọ e nya okẹkẹe ewu hayo oware kpobi nọ a rọ oviẹ-arao ru, koyehọ ọ be kẹre, whọ rẹ rọ erae mahe+ oware kpobi nọ ẹyao na o gbeku. 58 Rekọ nọ epe ogbekuo na o te no ewu na hayo ilulu nọ e nya uthethei ewu hayo ilulu nọ e nya okẹkẹe ewu hayo oware kpobi nọ a rọ oviẹ-arao ru na no evaọ okenọ whọ fọrọ iẹe, a rẹ fọrọ iẹe orọ avọ isiava, o vẹ jọ oware nọ o fo.

59 “Onana họ uzi kpahe ẹyao oti evaọ ewu iwhulu hayo ọrọ ohọ-olọlọhọ, hayo evaọ ilulu nọ e nya uthethei ewu hayo evaọ ilulu nọ e nya okẹkẹe ewu, hayo oware kpobi nọ a rọ oviẹ-arao ru, nọ a rẹ rọ ta via nọ oware na o fo hayo o fo ho.”

14 Jihova ọ tẹ gbẹ jẹ ta kẹ Mosis nọ: 2 “Onana họ uzi nọ a re lele kpahe ọmoti evaọ ẹdẹ erufuọ riẹ, nọ a re ro dhesẹ via nọ ọ fo no, evaọ ẹdẹ nọ a rẹ rọ rehọ iẹe bru ozerẹ na.+ 3 Ozerẹ na o re kpohọ otafe evuẹ na o ve rri rie ziezi. Otẹrọnọ oti ọmoti na o kpo no, 4 ozerẹ na ọ rẹ ta kẹe nọ ọ rehọ evra ivẹ nọ e fo nọ e rrọ uzuazọ ze, ure sida, omohọ owawae ogbagba, gbe hisọp rọkẹ erufuọ+ riẹ. 5 Ozerẹ na ọ rẹ ta nọ a kpe ọvra ọvo jọ evaọ othẹ ẹkpẹ evaọ ehru ame nọ a vo no eyeri-ame ze.* 6 Rekọ ọ rẹ rehọ ọvra nọ ọ rrọ uzuazọ na avọ ure sida na, omohọ owawae ogbagba na, gbe hisọp na, o ve duwu ai kpobi fihọ azẹ ọvra nọ a kpe evaọ ehru ame nọ a vo no eyeri-ame ze na.* 7 Kẹsena ọ vẹ frẹ riẹ isiahrẹ fihọ ọnọ a bi ru fo no oti na ọ vẹ ta via nọ ohwo na ọ fo no, o ve siobọno ọvra nọ ọ rrọ uzuazọ na re ọ rra vrẹ ruọ obọ ẹwọ.+

8 “Ọnọ a bi ru fo na ọ rẹ fọrọ iwu riẹ hrọ jẹ nware eto riẹ kpobi no ọ vẹ rọ ame họ,* ọ vẹ jọ ohwo nọ ọ fo. Kẹsena ọ vẹ nyaze evuẹ na, rekọ ọ rẹ rria otafe uwou-udhu riẹ edẹ ihrẹ. 9 Evaọ ẹdẹ avọ ihrẹ na, ọ rẹ nware eto uzou riẹ kpobi no gbe eto agbotọ riẹ gbe eto ikpe-aro riẹ. Nọ ọ tẹ nware eto riẹ kpobi no, ọ rẹ fọrọ iwu riẹ jẹ rọ ame họ,* ọ vẹ jọ ohwo nọ ọ fo.

10 “Evaọ ẹdẹ avọ eree, ọ rẹ rehọ igbo ivẹ nọ e rrọ omakọkọ ze, omogodẹ aye+ nọ ọ rrọ omakọkọ nọ ọ rrọ ukpe ọsosuọ riẹ, abasa abakpe ifa* orọ emamọ eflawa iwuwuru nọ a rọ ewhri gua rọkẹ idhe ibi ekakọ,+ gbe owawọ lọg* ọvo orọ ewhri;+ 11 ozerẹ nọ o kuenu kẹ ohwo na inọ ọ fo na ọ rẹ rehọ ohwo nọ a bi ru fo na avọ eware idhe riẹ ziọ aro Jihova evaọ aro unuẹthẹ uwou-udhu omakugbe na. 12 Ozerẹ na ọ rẹ rehọ egbo ọvo jọ ọ vẹ rehọ iẹe ze rọkẹ idhe abe-ọriọ+ avọ owawọ lọg orọ ewhri na, o re veghe ai kpemu kparo wọhọ idhe iveghe evaọ aro Jihova.+ 13 Kẹsena o ve kpe egbo na evaọ oria nọ a re jo kpe+ arao idhe uzioraha gbe ọrọ idhe emahọ na, evaọ oria ọrẹri, keme wọhọ idhe uzioraha na, idhe abe-ọriọ na yọ orọ ozerẹ+ na. Onana yọ oware nọ o mae rrọ ọrẹri.+

14 “Kẹsena ozerẹ na ọ vẹ rehọ azẹ idhe abe-ọriọ na jọ, ozerẹ na ọ vẹ rehọ iẹe te ẹroro-ozọ obọze ohwo nọ a bi ru fo na gbe uziobọ-uzou obọze riẹ gbe uziowọ-uzou obọze riẹ. 15 Ozerẹ na ọ vẹ jọ owawọ lọg orọ ewhri na rehọ ewhri+ jọ o ve ku ei fihọ evabọ ẹkpẹlobọ omobọ riẹ. 16 Ozerẹ na o ve dhe uziobọ obọze riẹ fihọ ewhri nọ ọ rrọ evabọ ẹkpẹlobọ riẹ na ọ vẹ rọ uziobọ riẹ frẹ ewhri na jọ isiahrẹ fihọ aro Jihova. 17 Kẹsena ozerẹ na ọ vẹ jọ ewhri nọ o kiọkọ iẹe evabọ na rọ ojọ te ẹroro-ozọ obọze ohwo nọ a bi ru fo na gbe uziobọ-uzou obọze riẹ gbe uziowọ-uzou obọze riẹ evaọ ehru azẹ idhe abe-ọriọ na nọ o ro tei no vẹre na. 18 Ozerẹ na o re fi ewhri nọ o kiọkọ evabọ riẹ họ uzou ohwo nọ a bi ru fo na, ozerẹ na o ve ru omavoro kẹe evaọ aro Jihova.+

19 “Ozerẹ na ọ rẹ rehọ arao idhe uzioraha+ na dhe idhe o ve ru omavoro kẹ ọnọ a bi ru fo no egbegbe riẹ na, kẹsena o ve kpe arao idhe emahọ na. 20 Ozerẹ na o ve dhe idhe emahọ na avọ idhe ibi ekakọ+ na evaọ ehru agbada-idhe na, ozerẹ na o ve ru omavoro kẹe,+ ọ vẹ jọ ohwo nọ ọ fo.+

21 “Rekọ otẹrọnọ oyogbe ọ rrọ yọ o wo eware tere he, ọ vẹ rehọ egbo ọvo ze rọkẹ idhe abe-ọriọ nọ a re ro dhe idhe iveghe, re a ruẹsi ru omavoro kẹe, kugbe abọvo abakpe ifa* orọ emamọ eflawa iwuwuru nọ a rọ ewhri gua rọkẹ idhe ibi ekakọ, gbe owawọ lọg ọvo orọ ewhri, 22 gbe irueruẹ ivẹ hayo emọ ilekuku ivẹ, wọhọ epanọ o wo te. Ọvo ọ rẹ jọ kẹ idhe uzioraha ọdekọ ọ vẹ jọ kẹ idhe emahọ.+ 23 Evaọ ẹdẹ avọ eree,+ ọ rẹ rehọ ae ze kẹ erufuọ riẹ, nọ a re ro dhesẹ via nọ ọ fo no, ọ rẹ rehọ ai se ozerẹ na evaọ aro unuẹthẹ uwou-udhu omakugbe na evaọ aro Jihova.+

24 “Ozerẹ na ọ rẹ rehọ egbo idhe abe-ọriọ+ na avọ owawọ lọg orọ ewhri na, ozerẹ na o re veghe ai kpemu kparo wọhọ idhe iveghe evaọ aro Jihova.+ 25 Kẹsena o ve kpe egbo idhe abe-ọriọ na, ozerẹ na ọ vẹ rehọ azẹ idhe abe-ọriọ na jọ ọ vẹ rehọ iẹe te ẹroro-ozọ obọze ohwo nọ a bi ru fo na gbe uziobọ-uzou obọze riẹ gbe uziowọ-uzou obọze+ riẹ. 26 Ozerẹ na o ve ku ewhri na jọ fihọ evabọ ẹkpẹlobọ+ omobọ riẹ, 27 kẹsena ọ vẹ rehọ uziobọ obọze riẹ te ewhri nọ ọ rrọ evabọ ẹkpẹlobọ riẹ na ọ vẹ jariẹ frẹ ojọ isiahrẹ fihọ aro Jihova. 28 Ozerẹ na ọ vẹ jọ ewhri nọ ọ rrọ evabọ riẹ na rehọ ojọ te ẹroro-ozọ obọze ohwo nọ a bi ru fo na gbe uziobọ-uzou obọze riẹ gbe uziowọ-uzou obọze riẹ evaọ eria evona nọ ọ rehọ azẹ idhe abe-ọriọ na te vẹre na. 29 Kẹsena ozerẹ na o ve fi ewhri nọ o kiọkọ evabọ riẹ na họ uzou ohwo nọ a bi ru fo na, re ọ ruẹsi ru omavoro kẹe evaọ aro Jihova.

30 “Ọ rẹ rehọ ọvo jọ evaọ irueruẹ na hayo ọvo jọ evaọ emọ ilekuku na dhe idhe, wọhọ epanọ o wo te,+ 31 wọhọ epanọ obọ riẹ u te, ọvo jọ rọkẹ idhe uzioraha ọdekọ rọkẹ idhe emahọ+ kugbe idhe ibi ekakọ na; ozerẹ na o ve ru omavoro kẹ ohwo nọ a bi ru fo na evaọ aro Jihova.+

32 “Onana họ uzi rọkẹ ohwo nọ ẹyao oti ọ jọ oma vẹre rekọ o wo eware nọ a gwọlọ dẹẹ hẹ nọ ọ rẹ rọ ze kẹ erufuọ riẹ evaọ okenọ a bi ro dhesẹ via nọ ọ fo.”

33 Kẹsena Jihova ọ tẹ ta kẹ Mosis avọ Erọn nọ: 34 “Okenọ wha tẹ nyaze ẹkwotọ Kenan+ no, onọ mẹ be rọ kẹ owhai re o jọ orai+ na, mẹ jẹ rehọ ẹyao oti+ te uwou jọ evaọ ẹkwotọ rai, 35 ọnọ o wo uwou na ọ rẹ nyaze ọ vẹ ta kẹ ozerẹ na nọ, ‘Oghẹrẹ epe jọ o romavia evaọ ugbẹhẹ uwou mẹ.’ 36 Ozerẹ na ọ rẹ ta nọ a kwa eware no uwou na taure ọ tẹ te nyaze ti rri epe na ziezi, re ọ gbẹ ta nọ eware kpobi nọ e rrọ uwou na e fo ho ho; nọ a te ru onana no ozerẹ na ọ vẹ nyaze ti rri uwou na. 37 O re rri oria nọ epe na ọ rrọ na ziezi, yọ otẹrọnọ eria nọ e nyẹ rueva evaọ igbẹhẹ uwou na i wo ipe igrini nọ e wọhọ iyẹlo hayo ipe ewawae yọ o wọhọ nọ e ruọ obeva ugbẹhẹ na, 38 ozerẹ na o ve no uwou na ruọ otafe kpohọ oria nọ a rẹ rọ nyaruọ uwou na ọ vẹ kare uwou na edẹ ihrẹ+ re ohwo ọvo ọ gbẹ ruọ uwou na ha.

39 “Kẹsena ozerẹ na o ve zihe evaọ ẹdẹ avọ ihrẹ na o ve rri uwou na. Otẹrọnọ epe na ọ kẹre no evaọ igbẹhẹ uwou na, 40 ozerẹ na ọ vẹ kẹ udu, a re kporo itho nọ ipe na e rrọ na no hrọ a ve gbolo ai fihọ otafe okpẹwho na evaọ oria nọ o fo ho. 41 Kẹsena ọ vẹ ruẹ nọ a nabe fọrọ obeva uwou na, yọ a re ku ọviẹ nọ a rọ ralọ je ro di itho uwou na nọ a fọrọ noi ze na fihọ obọ otafe okpẹwho na evaọ oria nọ o fo ho. 42 Kẹsena a ve fi itho efa họ eria itho nọ a si no na, yọ ọ rẹ rehọ ọviẹ ọfa ro di ai jẹ ralọ uwou na.

43 “Rekọ otẹrọnọ ipe na e wariẹ zihe ze jẹ va via evaọ uwou na evaọ okenọ a kporo itho uwou na no, fọrọ iẹe jẹ wariẹ ralọ iẹe no, 44 ozerẹ na ọ rẹ ruọ eva riẹ o ve rri rie. Otẹrọnọ epe na ọ kẹre no evaọ igbẹhẹ uwou na, yọ oti ọgaga+ ọ rrọ uwou na. Uwou na o fo ho. 45 Ọ vẹ ta nọ a kporo uwou na fihọ otọ, te itho riẹ, ire riẹ, gbe ọviẹ nọ a rọ ralọ iẹe je ro di uwou na kpobi, a vẹ wọ ae kpobọ otafe okpẹwho na evaọ oria nọ o fo ho.+ 46 Rekọ ohwo kpobi nọ ọ ruọ eva uwou na evaọ usu edẹ nọ a rọ kare+ iẹe na kpobi ọ rẹ jọ ohwo nọ ọ fo ho ri bọo owọwọ;+ 47 yọ ohwo kpobi nọ o kiẹzẹ uwou na ọ rẹ fọrọ iwu riẹ, yọ ohwo kpobi nọ ọ jọ eva uwou na re emu ọ rẹ fọrọ iwu riẹ.

48 “Rekọ otẹrọnọ ozerẹ na ọ nyaze ọ jẹ ruẹ nọ epe na ọ kẹre viere he evaọ uwou na nọ a wariẹ uwou na ralọ no na, ozerẹ na ọ vẹ ta via nọ uwou na o fo, keme epe na o voro no.* 49 Re a ruẹsi ru uwou na fo no egbegbe,* ọ rẹ rehọ evra ivẹ, ure sida, omohọ owawae ogbagba, gbe hisọp.+ 50 O re kpe ọvra ọvo jọ evaọ othẹ ẹkpẹ evaọ ehru ame nọ a vo no eyeri-ame ze.* 51 Kẹsena ọ vẹ rehọ ure sida na, hisọp na, omohọ owawae ogbagba na, avọ ọvra nọ ọ rrọ uzuazọ na o ve duwu ai fihọ azẹ ọvra nọ a kpe na gbe ame nọ a vo no eyeri-ame ze na,* yọ ọ rẹ frẹ riẹ rri uwou na isiahrẹ+ hrọ. 52 Ọ vẹ rọ azẹ ọvra na, ame nọ a vo no eyeri-ame ze na,* ọvra nọ ọ rrọ uzuazọ na, ure sida na, hisọp na, gbe omohọ owawae ogbagba na ru uwou na fo no egbegbe.* 53 Kẹsena o ve siobọno ọvra nọ ọ rrọ uzuazọ na ruọ otafe okpẹwho na re ọ rra vrẹ ruọ obọ ẹwọ, o ve ru omavoro kẹ uwou na, uwou na o vẹ fo.

54 “Onana họ uzi kpahe oghẹrẹ oti kpobi, oware nọ u ru ohwo otọ uzou hayo etuagba,+ 55 oti ewu+ hayo uwou,+ 56 avọ oware nọ u fu, omola nọ o yamu, gbe amahe,*+ 57 nọ a rẹ rọ riẹ okenọ oware o tẹ rrọ onọ o fo ho gbe okenọ oware o tẹ rrọ onọ o fo.+ Onana họ uzi kpahe oti.”+

15 Jihova ọ tẹ gbẹ jẹ ta kẹ Mosis avọ Erọn nọ: 2 “Ta kẹ ahwo Izrẹl nọ, ‘Ame o te bi no oma* ọzae ze, ame nọ o bi noi oma ze oghẹrẹ utionana u re ru ei jọ ohwo nọ ọ fo ho.+ 3 Ọ fo ho fiki ame nọ o bi noi oma ze na, o tẹ make rọnọ ame na o bi no oma* riẹ ze ọvo hayo o kare riẹ dhe, ghele na ọ fo ho.

4 “‘Ehwa kpobi nọ ohwo nọ ame o bi no oma ze na o kiẹzẹ o rẹ jọ onọ o fo ho, yọ oware kpobi nọ ọ keria o rẹ jọ onọ o fo ho. 5 Ohwo nọ ọ rọ obọ te ehwa riẹ ọ rẹ fọrọ iwu riẹ hrọ, yọ ọ rẹ rọ ame họ* ọ vẹ jọ ohwo nọ ọ fo ho ri bọo owọwọ.+ 6 Ohwo kpobi nọ ọ keria oware nọ ohwo nọ ame o bi no oma ze na ọ keria ọ rẹ fọrọ iwu riẹ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 7 Ohwo kpobi nọ ọ rọ obọ te uwo-oma ọnọ ame o bi no oma ze na ọ rẹ fọrọ iwu riẹ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 8 Otẹrọnọ ohwo nọ ame o bi no oma ze na o nwo eya ku ohwo nọ ọ fo, ohwo yena ọ rẹ fọrọ iwu riẹ hrọ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 9 Oware-ẹkeria kpobi nọ a rẹ wọ fihọ ehru arao keria nọ ohwo nọ ame o bi no oma ze na ọ keria rọ dhẹ arao o rẹ jọ onọ o fo ho. 10 Ohwo kpobi nọ ọ rọ obọ te oware kpobi nọ o jọ otọ riẹ ọ rẹ jọ ohwo nọ ọ fo ho ri bọo owọwọ, yọ ohwo kpobi nọ ọ wọ eware eyena ọ rẹ fọrọ iwu riẹ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 11 Otẹrọnọ ohwo nọ ame o bi no oma ze+ na ọ re rọ ame wozẹ abọ riẹ hẹ ọ jẹ rọ obọ te ohwo jọ, ohwo yena ọ rẹ fọrọ iwu riẹ hrọ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 12 A re kpe okwakwa nọ a rọ ẹkpẹ ma, jẹ rọ ame wozẹ+ okwakwa kpobi nọ a rọ ure kare nọ ohwo nọ ame o bi no oma ze na ọ rọ obọ te.

13 “‘Nọ ame nọ o bi no ohwo na oma ze na o te serihọ no nọ ohwo na ọ jẹ fo noi no, o re kele edẹ ihrẹ rọkẹ erufuọ riẹ, yọ ọ rẹ fọrọ iwu riẹ hrọ, ọ rẹ rehọ ame eyeri-ame* họ, ọ vẹ jọ ohwo nọ ọ fo.+ 14 Evaọ ẹdẹ avọ eree, ọ rẹ rehọ irueruẹ ivẹ hayo emọ ilekuku ivẹ,+ ọ vẹ nyaze aro Jihova evaọ aro unuẹthẹ uwou-udhu omakugbe na ọ vẹ rehọ ae kẹ ozerẹ na. 15 Ozerẹ na ọ vẹ rehọ ai dhe idhe, ọvo jọ rọkẹ idhe uzioraha ọdekọ rọkẹ idhe emahọ, ozerẹ na o ve ru omavoro kẹe evaọ aro Jihova fiki ame nọ o no oma riẹ ze na.

16 “‘Whaọ otẹrọnọ ame-oma o no oma ọzae ze, ọ rẹ rọ ame họ oma riẹ kpobi* ọ vẹ jọ ohwo nọ ọ fo ho ri bọo owọwọ.+ 17 Ọ rẹ rọ ame fọrọ ewu kpobi gbe oviẹ-arao kpobi nọ ame-oma na o te hrọ, yọ oware yena o rẹ jọ oware nọ o fo ho ri bọo owọwọ.

18 “‘Nọ ọzae o te lele aye wezẹ nọ ame-oma o je noi oma ze, a rẹ rọ ame họ* a vẹ jọ ahwo nọ a fo ho ri bọo owọwọ.+

19 “‘Otẹrọnọ aye o bi hwẹ azẹ, ọ rẹ gbẹ jọ etoke egbegbe oke riẹ edẹ ihrẹ.+ Ohwo kpobi nọ ọ rọ obọ tei ọ rẹ jọ ohwo nọ ọ fo ho ri bọo owọwọ.+ 20 Oware kpobi nọ o kiẹzẹ evaọ etoke egbegbe oke riẹ na o rẹ jọ onọ o fo ho, yọ oware kpobi nọ ọ keria o rẹ jọ onọ o fo ho.+ 21 Ohwo kpobi nọ ọ rọ obọ te ehwa riẹ ọ rẹ fọrọ iwu riẹ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 22 Ohwo kpobi nọ ọ rọ obọ te oware kpobi nọ aye na ọ keria ọ rẹ fọrọ iwu riẹ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ. 23 Otẹrọnọ ọ keria ehwa hayo oware ofa jọ, obọ nọ ohwo o ro te oware yena, u re ru ohwo na fihọ ọnọ ọ fo ho ri bọo owọwọ.+ 24 Yọ otẹrọnọ ọzae o bi lele iei wezẹ, egbegbe oke riẹ o jẹ nyaze te ọzae na oma,+ ọzae na ọ rẹ jọ ohwo nọ ọ fo ho evaọ edẹ ihrẹ, yọ ehwa kpobi nọ ọzae na o kiẹzẹ o rẹ jọ oware nọ o fo ho.

25 “‘Nọ aye o te bi hwẹ azẹ edẹ buobu+ yọ o rrọ oke nọ ọ rẹ rọ ruẹ oke riẹ hẹ,+ hayo nọ o te bi hwẹ azẹ kri vi epanọ oke riẹ u re kri te, ọ rẹ jọ ohwo nọ ọ fo ho evaọ edẹ nọ o bi ro hwẹ azẹ na kpobi, wọhọ epanọ ọ rẹ jọ evaọ edẹ egbegbe oke riẹ. 26 Ehwa kpobi nọ aye na o kiẹzẹ evaọ edẹ nọ o bi ro hwẹ azẹ na o rẹ jọ wọhọ ehwa etoke egbegbe oke riẹ,+ yọ oware kpobi nọ ọ keria u re zihe ruọ onọ o fo ho wọhọ epaọ egbegbe ọrọ etoke egbegbe oke riẹ. 27 Ohwo kpobi nọ ọ rọ obọ te ai ọ rẹ jọ ohwo nọ ọ fo ho, yọ ọ rẹ fọrọ iwu riẹ hrọ, ọ rẹ rọ ame họ,* ọ vẹ jọ ohwo nọ ọ fo ho ri bọo owọwọ.+

28 “‘Rekọ aye na ọ tẹ fo no azẹ nọ o bi hwẹ na no, o re kele edẹ ihrẹ kẹ oma riẹ, kẹsena ọ vẹ jọ ohwo nọ ọ fo.+ 29 Evaọ ẹdẹ avọ eree, ọ rẹ rehọ irueruẹ ivẹ hayo emọ ilekuku ivẹ,+ ọ vẹ rehọ ae bru ozerẹ na evaọ aro unuẹthẹ uwou-udhu omakugbe+ na. 30 Ozerẹ na ọ vẹ rehọ ọvo jọ dhe idhe uzioraha jẹ rọ ọdekọ dhe idhe emahọ, ozerẹ na o ve ru omavoro kẹe evaọ aro Jihova fiki azẹ nọ o hwẹ na.+

31 “‘Ere wha re ro ru ahwo Izrẹl hẹriẹ oma no egbegbe rai, re a gbe whu hu evaọ egbegbe rai nọ a re ro zue uwou-udhu mẹ, onọ o rrọ udevie rai.+

32 “‘Onana họ uzi kpahe ọzae nọ ame o bi no oma riẹ ze, ọzae nọ ọ fo ho fiki ame-oma nọ o bi no oma riẹ ze,+ 33 aye nọ ọ rrọ etoke egbegbe oke riẹ,+ ọzae hayo aye kpobi nọ oware jọ o bi no oma ze,+ gbe ọzae nọ o lele aye nọ ọ fo ho wezẹ.’”

16 Jihova ọ tẹ ta ẹme kẹ Mosis nọ emezae ivẹ Erọn i whu no fikinọ a nyaze aro Jihova.+ 2 Jihova ọ ta kẹ Mosis nọ: “Ta kẹ Erọn oniọvo ra inọ orọnikọ oke kpobi nọ u je rie ọ rẹ rọ nyaze oria ọrẹri+ na ha nọ o rrọ obeva ekọtini+ na, evaọ aro ururu nọ o rrọ Etehe na, re ọ seba ewhu,+ keme mẹ te romavia evaọ ehru ururu+ na evaọ ẹgho.+

3 “Enana họ eware nọ Erọn ọ rẹ rehọ ze nọ ọ tẹ be nyaze oria ọrẹri na: eruẹ rọkẹ idhe uzioraha+ gbe egbo rọkẹ idhe emahọ.+ 4 O re fi ewu othethei+ ọrẹri orọ ohọ-olọlọhọ na họ, yọ ohọ-olọlọhọ nọ a rẹ rọ gba-ọgọdọ*+ na u re ruru oma riẹ,* yọ ọ rẹ rehọ umueku+ nọ a rọ ohọ-olọlọhọ ru na gba jẹ rọ etu-udhọfọ+ nọ a rọ ohọ-olọlọhọ ru na fare uzou riẹ. Enana yọ iwu ọrẹri.+ Ọ rẹ rọ ame họ oma riẹ*+ o ve fi ae họ.

5 “Ọ rẹ jọ udevie ogbotu ahwo Izrẹl+ rehọ imikri ivẹ rọkẹ idhe uzioraha gbe egbo ọvo rọkẹ idhe emahọ.

6 “Erọn ọ rẹ rehọ eruẹ idhe uzioraha na ze, onọ o rrọ kẹ omariẹ na, yọ o re ru omavoro fiki omariẹ+ gbe uwou riẹ.

7 “Kẹsena ọ vẹ rehọ ewe ivẹ na ọ vẹ rehọ ae dikihẹ aro Jihova evaọ aro unuẹthẹ uwou-udhu omakugbe na. 8 Erọn ọ rẹ ma ẹta kpahe ewe ivẹ na, ọvo jọ rọkẹ Jihova ọdekọ rọkẹ Azazẹl.* 9 Erọn ọ rẹ rehọ ẹwe nọ ẹta+ o mu kẹ Jihova na ọ vẹ rehọ iẹe dhe idhe uzioraha. 10 Rekọ ẹwe nọ ẹta o mu kẹ Azazẹl na, a rẹ rehọ iẹe ze ọkpokpọ ro dikihẹ aro Jihova re a ruẹsi ru omavoro na evaọ ehru riẹ, re a siobọnoi vrẹ kẹ Azazẹl kpobọ udhude.+

11 “Erọn ọ rẹ rehọ eruẹ idhe uzioraha na ze, onọ o rrọ kẹ omariẹ na, yọ o re ru omavoro fiki omariẹ gbe uwou riẹ; kẹsena o ve kpe eruẹ idhe uzioraha na, onọ o rrọ kẹ omariẹ+ na.

12 “Ọ vẹ rehọ omodhe erae+ na nọ iwowo-erae e vọ na no agbada-idhe+ na ze evaọ aro Jihova avọ ekuobọ ivẹ emamọ insẹnse+ nọ i re gbo ore awere, ọ vẹ rehọ ae ziọ obeva ekọtini+ na. 13 O re je fi insẹnse na họ erae evaọ aro Jihova,+ iwiri insẹnse na i ve ruru ururu Etehe na+ nọ o rrọ ehru Isẹri+ na wọhọ ẹgho, re ọ seba ewhu.

14 “Ọ rẹ rehọ azẹ+ eruẹ na jọ ọ vẹ rọ uziobọ riẹ frẹ riẹ họ aro ururu na evaọ abọ ovatha-ọre na, yọ ọ rẹ rọ uziobọ riẹ frẹ azẹ na jọ isiahrẹ fihọ aro ururu na.+

15 “Kẹsena o ve kpe ẹwe idhe uzioraha na, onọ o rrọ kẹ ahwo na,+ ọ vẹ rehọ azẹ riẹ ziọ obeva ekọtini+ na, ọ vẹ rehọ azẹ+ riẹ ru oware ovona nọ ọ rehọ azẹ eruẹ na ru na; ọ rẹ frẹ riẹ rri ururu na jẹ frẹ riẹ họ aro ururu na.

16 “O re ru omavoro kẹ oria ọrẹri na hrọ fiki iruẹru igbegbe ahwo Izrẹl nọ a bi ru gbe fiki imuemu rai gbe izieraha+ rai, yọ o re ru onana kẹ uwou-udhu omakugbe na onọ o rrọ udevie rai evaọ udevie iruẹru igbegbe rai na.

17 “Omọfa ọ rẹ jọ eva uwou-udhu omakugbe na ha no okenọ ọ rọ ruọ eva re o ru omavoro evaọ oria ọrẹri na rite okenọ ọ rẹ ruọ otafe. O re ru omavoro fiki omariẹ gbe uwou riẹ+ jegbe fiki ukoko ahwo Izrẹl soso.+

18 “Kẹsena ọ vẹ nyaze agbada-idhe+ na, onọ o rrọ aro Jihova, o ve ru omavoro kẹe, ọ rẹ rehọ azẹ eruẹ na jọ avọ azẹ ẹwe na jọ o ve su ei fihọ izei agbada-idhe na evaọ tabọ tabọ riẹ kpobi. 19 Ọ rẹ jẹ rọ uziobọ riẹ frẹ azẹ na jọ isiahrẹ fihọ iẹe o ve ru ei fo je ru ei hẹrioma no iruẹru igbegbe ahwo Izrẹl.

20 “Nọ o te ru omavoro+ kẹ oria ọrẹri na gbe uwou-udhu omakugbe na gbe agbada-idhe+ na no, ọ rẹ jẹ rọ ẹwe nọ ọ rrọ uzuazọ na ze.+ 21 Erọn ọ rẹ rọ abọ ivẹ riẹ kpahe uzou ẹwe nọ ọ rrọ uzuazọ na ọ vẹ feva iruthọ ahwo Izrẹl kpobi gbe imuemu rai kpobi gbe izieraha rai kpobi fihọ uzou riẹ, o ve fi ai họ uzou ẹwe na+ o ve siobọnoi vrẹ ruọ udhude, o re siobọnoi kẹ ohwo nọ a salọ re o su ei vrẹ.* 22 Ẹwe na ọ rẹ rọ uzou riẹ wha iruthọ+ rai kpobi vrẹ kpobọ udhude,+ o re siobọno ẹwe na vrẹ ruọ udhude.+

23 “Kẹsena Erọn ọ vẹ ruọ eva uwou-udhu omakugbe na ọ vẹ ba iwu ohọ-olọlọhọ nọ o fi họ okenọ o kpohọ oria ọrẹri na no oma o ve fi ai họ otọ etẹe. 24 Ọ rẹ rọ ame+ họ oma riẹ* hrọ evaọ oria ọrẹri, o ve fi iwu+ riẹ họ; kẹsena ọ vẹ nya lahwe o ve dhe idhe emahọ+ riẹ gbe idhe emahọ+ ahwo na, o ve ru omavoro kẹ omariẹ jẹ rọkẹ ahwo na.+ 25 O re ru iwhri idhe uzioraha na kuye iwiri evaọ ehru agbada-idhe na.

26 “Ọzae nọ o su ẹwe Azazẹl+ vrẹ na ọ rẹ fọrọ iwu riẹ jẹ rọ ame họ oma riẹ,* kẹsena ọ vẹ tẹ nyaziọ evuẹ na.

27 “Yọ eruẹ idhe uzioraha na gbe ẹwe idhe uzioraha na, enọ a rehọ azẹ rai ziọ oria ọrẹri na ro ru omavoro na, a rẹ rehọ ai kpobọ otafe evuẹ na, a vẹ rọ erae mahe+ ehọrọ rai gbe uwo rai gbe isọ rai. 28 Ohwo nọ ọ mahe rai na ọ rẹ fọrọ iwu riẹ jẹ rọ ame họ oma riẹ,* kẹsena ọ vẹ tẹ nyaziọ evuẹ na.

29 “Onana yọ uzi nọ o rẹ jọ ribri kẹ owhai: Evaọ amara avọ ihrẹ, evaọ ẹdẹ avọ ikpe amara na, wha re gboja kẹ omarai,* yọ wha re ru iruo evuevo vievie he,+ te ọmotọ hayo ọrara nọ ọ be rria udevie rai. 30 Evaọ ẹdẹ nana, a re ru omavoro+ kẹ owhai, re a ta nọ wha fo. Wha rẹ te fo no izieraha rai kpobi evaọ aro Jihova.+ 31 Onana yọ ẹdijala eriosehọ riẹriẹriẹ rọkẹ owhai, yọ wha re gboja kẹ omarai.*+ Onana yọ uzi nọ o rẹ jọ ribri.

32 “Ozerẹ nọ a wholo+ je ro mu* re ọ jọ ozerẹ+ evaọ ẹta ọsẹ riẹ+ o re ru omavoro yọ o re fi iwu nọ a rọ ohọ-olọlọhọ ru+ na họ, iwu ọrẹri+ na. 33 O re ru omavoro kẹ oria aruẹri ọrẹri+ na, uwou-udhu omakugbe+ na, gbe agbada-idhe+ na; yọ o re ru omavoro kẹ izerẹ na jẹ rọkẹ ahwo ukoko na kpobi.+ 34 Onana yọ uzi nọ o rẹ jọ ribri rọkẹ owhai,+ re a ru omavoro kẹ ahwo Izrẹl fiki izieraha rai kpobi ẹsiẹvo ẹgbukpe.”+

Fikiere ọ tẹ nwani ru epanọ Jihova ọ ta kẹ Mosis na.

17 Jihova ọ tẹ gbẹ ta kẹ Mosis nọ: 2 “Ta kẹ Erọn avọ emezae riẹ gbe ahwo Izrẹl kpobi nọ, ‘Onana họ uzi nọ Jihova o jie:

3 “‘“Otẹrọnọ ohwo jọ evaọ uwou Izrẹl o kpe eruẹ hayo egbo hayo ẹwe evaọ evuẹ na hayo o kpe rie evaọ obọ otafe evuẹ na, 4 ukpenọ ọ rẹ rehọ iẹe ziọ aro unuẹthẹ uwou-udhu omakugbe na re ọ rehọ iẹe kẹ Jihova okẹ evaọ aro uwou-udhu Jihova, ohwo yena ọ reabe azẹ. O kpe azẹ, yọ a re kpe ohwo yena no udevie ahwo riẹ hrọ. 5 Ẹjiroro onana họ re ahwo Izrẹl a rehọ idhe nọ a bi dhe evaọ otafe enẹna bru Jihova ze, ziọ unuẹthẹ uwou-udhu omakugbe na, bru ozerẹ na ze. A rẹ rehọ enana dhe idhe ọriẹyeri kẹ Jihova.+ 6 Ozerẹ na ọ rẹ frẹ azẹ na họ agbada-idhe Jihova, evaọ aro unuẹthẹ uwou-udhu omakugbe na, o ve ru iwhri na kuye iwiri re i gbo ore awere* kẹ Jihova.+ 7 Fikiere a re gbe dhe idhe kẹ idhivẹri+ nọ e wọhọ ewe na ha,* enọ a bi lele bru igberẹ na.+ Onana o rẹ jọ uzi nọ o rẹ jọ ribri kẹ owhai evaọ ige rai kpobi.”’

8 “Whọ rẹ ta kẹ ae nọ, ‘Ohwo jọ evaọ uwou Izrẹl hayo ohwo orẹwho ọfa nọ ọ be rria udevie rai nọ o dhe idhe emahọ hayo idhe jọ, 9 yọ ọ rehọ e riẹ ziọ aro unuẹthẹ uwou-udhu omakugbe na re ọ rehọ iẹe kẹ Jihova ha, a re kpei no udevie ahwo riẹ hrọ.+

10 “‘Otẹrọnọ ohwo jọ evaọ uwou Izrẹl hayo ohwo orẹwho ọfa nọ ọ be rria udevie rai ọ re oghẹrẹ azẹ+ jọ kpobi, mẹ te rẹriẹ ovao mẹ ku ohwo* yena nọ ọ be re azẹ na hrọ, yọ me ti kpe ohwo yena no udevie ahwo riẹ hrọ. 11 Keme evaọ azẹ+ na uzuazọ* omama* na o rrọ, yọ mẹ omamẹ mẹ rehọ e riẹ fihọ agbada-idhe+ na kẹ owhai re wha rehọ iẹe ru omavoro kẹ omarai,* keme azẹ na o re ru omavoro+ na ẹkwoma uzuazọ* nọ o rrọ eva riẹ na. 12 Oyejabọ nọ mẹ rọ ta kẹ ahwo Izrẹl nọ: “Whai* ọvuọvo ọ rẹ re azẹ hẹ, yọ ohwo orẹwho ọfa ọvuọvo nọ ọ be rria udevie rai+ ọ rẹ re azẹ hẹ.”+

13 “‘Otẹrọnọ ohwo Izrẹl jọ hayo ohwo orẹwho ọfa jọ nọ ọ be rria udevie rai o kpohọ ibẹfi o je mu arao ẹwọ hayo ọvra nọ a rẹ sae re, o re ru azẹ riẹ hwẹ noi oma+ hrọ, o ve nwo ẹkpẹ ruru iei. 14 Keme azẹ oghẹrẹ omama kpobi họ uzuazọ* riẹ, keme eva riẹ uzuazọ* na o rrọ. Fikiere mẹ ta kẹ ahwo Izrẹl nọ: “Wha rẹ re azẹ oghẹrẹ omama ovuọvo vievie he keme azẹ oghẹrẹ omama kpobi họ uzuazọ* riẹ. Ohwo kpobi nọ ọ re riẹ, a re kpei no.”+ 15 Otẹrọnọ ohwo* jọ, te ọmotọ hayo ọrara, ọ re arao nọ a dihọ owhuowhu hayo ọnọ arao ojihẹ o kpe,+ ọ rẹ fọrọ iwu riẹ hrọ jẹ rọ ame họ,* ọ vẹ jọ ohwo nọ ọ fo ho ri bọo owọwọ;+ kẹsena ọ vẹ tẹ te fo. 16 Rekọ ọ gbẹ fọrọ iwu riẹ hẹ yọ ọ họ oma riẹ* hẹ, ọ rẹ ruẹ uye oruthọ riẹ.’”+

18 Jihova ọ tẹ gbẹ jẹ ta kẹ Mosis nọ: 2 “Ta kẹ ahwo Izrẹl nọ, ‘Mẹ họ Jihova, Ọghẹnẹ rai.+ 3 Wha re ru epanọ a re ru evaọ obọ ẹkwotọ Ijipti vievie he, oria nọ wha jẹ rria vẹre, yọ wha re ru eware nọ a bi ru evaọ ẹkwotọ Kenan vievie he, oria nọ mẹ be rehọ owhai ze na.+ Yọ wha re lele izi rai vievie he. 4 Wha re ru lele izi oziẹobro mẹ, yọ wha re koko ijaje mẹ jẹ nya lele ai.+ Mẹ họ Jihova, Ọghẹnẹ rai. 5 Wha re koko ijaje mẹ gbe izi oziẹobro mẹ hrọ; ohwo kpobi nọ o bi ru ere ọ te jọ uzuazọ fiki rai.+ Mẹ họ Jihova.

6 “‘Ọzae ọvuọvo evaọ udevie rai o re bi kẹle omoni ọkpekpe riẹ ọvuọvo ho re o lele iei wezẹ.*+ Mẹ họ Jihova. 7 Who re lele ọsẹ ra wezẹ vievie he, yọ who re lele oni ra wezẹ vievie he. Oni ra ọ rrọ, who re lele iei wezẹ vievie he.

8 “‘Who re lele aye ọsẹ ra wezẹ vievie he.+ Yọ omovuọ who bi kpehọ ọsẹ ra oma na.*

9 “‘Who re lele oniọvo-ọmọtẹ ra wezẹ vievie he, te ọmọtẹ ọsẹ ra hayo ọmọtẹ oni ra, te a yẹ riẹ evaọ uwou ovona hayo a yẹ riẹ evaọ obọ otafe.+

10 “‘Who re lele ọmọtẹ ọmọzae ra hayo ọmọtẹ ọmọtẹ ra wezẹ vievie he, keme enana yọ ẹba obọra.

11 “‘Who re lele ọmọtẹ aye ọsẹ ra wezẹ vievie he, ọmọ ọsẹ ra, keme oniọvo-ọmọtẹ ra ọ rrọ.

12 “‘Who re lele oniọvo-ọmọtẹ ọsẹ ra wezẹ vievie he. Avọ ọsẹ ra azẹ ọvona.+

13 “‘Who re lele oniọvo-ọmọtẹ oni ra wezẹ vievie he, keme avọ oni ra azẹ ọvona.

14 “‘Who re kpomovuọ họ oniọvo ọsẹ ra oma* vievie he ẹkwoma aye riẹ nọ who re lele wezẹ. Keme yọ omoni ra.*+

15 “‘Who re lele aye ọmọzae ra wezẹ vievie he.+ Aye ọmọzae ra ọ rrọ, who re lele iei wezẹ vievie he.

16 “‘Who re lele aye oniọvo ra wezẹ vievie he,+ keme yọ omovuọ who bi kpehọ oniọvo ra oma na.*

17 “‘Who re lele aye avọ ọmọtẹ riẹ wezẹ vievie he.+ Whọ rẹ rehọ ọmọtẹ ọrọ ọmọzae riẹ vievie he gbe ọmọtẹ ọrọ ọmọtẹ riẹ vievie he re who lele ai wezẹ. Enana yọ imoni ekpekpe riẹ; oyena yọ uruemu ugbogbo.*

18 “‘Whọ rẹ rehọ oniọvo-ọmọtẹ aye tu aye wọhọ ovruvrẹ+ vievie he re who lele iei wezẹ nọ oniọvo-ọmọtẹ riẹ ọ gbẹ rrọ uzuazọ na.

19 “‘Who re bi kẹle aye evaọ etoke egbegbe oke riẹ re who lele iei wezẹ vievie he.+

20 “‘Who re lele aye ọrivẹ ra* wezẹ vievie he, re who ru omara fihọ ohwo nọ ọ fo ho.+

21 “‘Whọ rẹ kuvẹ re a rehọ ọmọ ra jọ kẹ* Molẹk+ vievie he. Whọ rẹ rehọ edhere yena gbe odẹ Ọghẹnẹ ra ku vievie he.+ Mẹ họ Jihova.

22 “‘Who re lele ọzae wezẹ vievie he wọhọ epanọ who re lele aye wezẹ na.+ Onana yọ oware otọtọ.

23 “‘Ọzae o re lele arao wezẹ vievie he re ọ rọ ere ru omariẹ fihọ ọnọ ọ fo ho; yọ aye ọ rẹ rehọ omariẹ kẹ arao ho re o lele iei wezẹ.+ Onana o wọso oghẹrẹ nọ Ọghẹnẹ ọ ma riẹ no emuhọ ze.

24 “‘Wha rehọ eware nana evuevo ru omarai fihọ ahwo nọ a fo ho ho, keme eware nana kpobi erẹwho nọ me bi le no kẹ owhai na a ro ru omarai họ enọ e fo ho.+ 25 Fikiere ẹkwotọ na ọ fo ho, yọ mẹ te rehọ uye tei fiki oruthọ riẹ, ẹkwotọ na ọ te kpa ahwo nọ a be rriae kufiẹ.+ 26 Rekọ whai omarai wha re koko ijaje mẹ gbe izi oziẹobro+ mẹ hrọ, wha re ru eware etọtọ nana ọvuọvo ho, te ọmotọ hayo ọrara nọ ọ be rria udevie rai.+ 27 Keme ahwo nọ a jẹ rria ẹkwotọ na taure wha tẹ te nyaze a je ru eware etọtọ nana,+ yọ u ru nọ ẹkwotọ na ọ gbẹ fo ho. 28 Re ẹkwotọ na ọ gbẹ kpa owhai no eva riẹ kufiẹ hẹ fikinọ wha bi zue ei no, wọhọ epanọ ọ te kpa erẹwho nọ e kake rọ owhai jọ eva riẹ kufiẹ na. 29 Otẹrọnọ ohwo jọ o ru eware etọtọ nana jọ, ohwo* kpobi nọ o bi ru ai a re kpei no udevie ahwo riẹ hrọ. 30 Wha re ru oware nọ mẹ gwọlọ mi owhai hrọ ẹkwoma iruemu etọtọ nana nọ a bi ru taure wha tẹ te nyaze na nọ wha re ru hu,+ re wha gbẹ rọ fiki rai ru omarai fihọ enọ e fo ho ho. Mẹ họ Jihova, Ọghẹnẹ rai.’”

19 Jihova ọ tẹ gbẹ ta kẹ Mosis nọ: 2 “Ta kẹ ogbotu ahwo Izrẹl soso nọ: ‘Wha rẹ jọ ọrẹri, keme mẹ, Jihova, Ọghẹnẹ rai yọ ọrẹri.+

3 “‘Whai omomọvo ọ rẹ rọ adhẹẹ kẹ* oni riẹ avọ ọsẹ riẹ,+ yọ wha re koko edijala mẹ.+ Mẹ họ Jihova, Ọghẹnẹ rai. 4 Wha nyabru eghẹnẹ nọ i fioka ha na ha+ hayo ghra ayọno ro ru eghẹnẹ kẹ omarai hi.+ Mẹ họ Jihova, Ọghẹnẹ rai.

5 “‘Whaọ wha te bi dhe idhe ọriẹyeri kẹ Jihova,+ wha re dhe idhe na evaọ oghẹrẹ nọ wha re ro wo ọjẹrehọ kẹ omarai.+ 6 A rẹ re iẹe evaọ ẹdẹ nọ wha rọ rehọ iẹe dhe idhe na gbe ẹdẹ nọ o lele i rie, rekọ onọ o jariẹ kiọkọ te ẹdẹ avọ esa, a rẹ rọ erae mahe iẹe.+ 7 Rekọ otẹrọnọ a re abọjọ riẹ evaọ ẹdẹ avọ esa na, onana yọ oware uyoma nọ a re jo wo ọjẹrehọ họ. 8 Ohwo nọ ọ re riẹ ọ rẹ ruẹ uye oruthọ riẹ keme o zue oware ọrẹri Jihova no, yọ a re kpe ohwo* yena no udevie ahwo riẹ hrọ.

9 “‘Nọ wha te bi vu ekakọ otọ rai, wha re vu akọ udhu rai kpobi no riẹriẹriẹ hẹ yọ wha rẹ kwa isogẹ* ivuẹvu rai hi.+ 10 U te no ere no, wha rẹ kwa enọ i kiọkọ ọgbọ evaene rai hi hayo tọlọ ibi ọgbọ evaene rai nọ e vaha fihọ otọ họ. Wha rẹ nyasiọ ae ba kẹ iyogbe*+ gbe erara nọ e be rria udevie rai. Mẹ họ Jihova, Ọghẹnẹ rai.

11 “‘Wha re tho uji vievie he,+ wha rẹ viẹ ohwo họ vievie he,+ yọ wha rẹ rọ eviẹhọ lele ohwohwo yeri vievie he. 12 Wha rẹ rọ odẹ mẹ duwu iyei erue vievie he+ re wha rọ ere zue odẹ Ọghẹnẹ rai. Mẹ họ Jihova. 13 Who re fi ọrivẹ ra iwhayo vievie he+ yọ whọ rẹ rehọ ogaga mi ohwo oware vievie he.+ Who re kru ugho ohwo nọ a rehọ iruo ho re o rria owhẹ obọ aso okioke rite ohiohiẹ.+

14 “‘Whọ rẹ la ohwo nọ o diezọ eka* vievie he hayo fi oware họ edhere kẹ ohwo nọ o tuaro vievie he,+ yọ whọ rẹ dhozọ Ọghẹnẹ ra hrọ.+ Mẹ họ Jihova.

15 “‘Who re bruoziẹ okienyẹ vievie he. Who re dhesẹ ọriẹwẹ kẹ oyogbe vievie he hayo rri ọdafe ovao vievie he.+ Who re bruoziẹ okiẹrẹe evaọ ẹme ọrivẹ ra.

16 “‘Whọ rẹ jọ udevie ahwo ra nya be vaha eme-ọtaraha vievie he.+ Who re dikihẹ rọsuọ uzuazọ* ọrivẹ ra vievie he.*+ Mẹ họ Jihova.

17 “‘Whọ rẹ jọ udu ra mukpahe oniọvo ra vievie he.+ Whọ rẹ ruẹ nọ whọ whọku ọrivẹ ra,+ re who gbe lele iei reabe uzioraha ha.

18 “‘Who re ru orukele vievie he+ hayo fi ẹgo họ eva kpahe emọ* ahwo ra vievie he, yọ who re you ọrivẹ ra wọhọ omara hrọ.+ Mẹ họ Jihova.

19 “‘Wha re koko izi mẹ: Who re ru re erao ẹwho ivẹ ra nọ e rrọ oghẹrẹsa a kuomagbe yẹ emọ vievie he. Whọ rẹ rọ oghẹrẹ ibi ekakọ ivẹ kọ udhu ra vievie he,+ yọ who re ku ewu nọ a gua oghẹrẹ ilulu ivẹ kugbe ro ru fihọ vievie he.+

20 “‘Whaọ otẹrọnọ ọzae o lele aye wezẹ yọ aye na yọ odibo nọ a ta nọ a te rọ kẹ ọzae jọ no, rekiyọ a re dẹe zihe he hayo a ri siobọnoi hi, a rẹ kẹ ae uye. Rekọ a re kpe ai hi, keme yọ a ri siobọno aye na ha. 21 Ọzae na ọ rẹ rehọ idhe abe-ọriọ riẹ se Jihova evaọ aro unuẹthẹ uwou-udhu omakugbe na, egbo idhe abe-ọriọ.+ 22 Ozerẹ na ọ rẹ rehọ egbo idhe abe-ọriọ na ru omavoro kẹe evaọ aro Jihova fiki uzi nọ ọ raha na, a vẹ rọ uzi nọ ọ raha na rọvrẹ riẹ.

23 “‘Nọ wha tẹ ziọ ẹkwotọ na no, wha jẹ kọ ure jọ rọkẹ emu, wha re rri ibi riẹ inọ yọ oware nọ ọ fo ho nọ a rẹ re vievie he.* Evaọ ikpe esa o rẹ jọ oware nọ wha rẹ re he.* A rẹ re iẹe vievie he. 24 Rekọ evaọ ukpe avọ ene, ibi riẹ kpobi e rẹ jọ oware ọrẹri nọ a rẹ rọ ghọghọ evaọ aro Jihova.+ 25 Kẹsena evaọ ukpe avọ isoi, wha rẹ sae re ibi riẹ re wha fi ibi riẹ ba ivuẹvu rai.* Mẹ họ Jihova, Ọghẹnẹ rai.

26 “‘Whọ rẹ re oware ovuọvo nọ azẹ ọ rrọ vievie he.+

“‘Whọ rẹ gwọlọ oka oware nọ o te via vievie he hayo ru emajiki vievie he.+

27 “‘Wha rẹ nware eto abotọ uzou rai* vievie he hayo bru akọ etuagba rai fihọ fariẹ fariẹ vievie he.+

28 “‘Wha re bru ibrẹbru fihọ oma rai fiki ohwo nọ o whu* vievie he,+ yọ wha re ru tatu* fihọ oma rai vievie he. Mẹ họ Jihova.

29 “‘Who si ọghọ no ọmọtẹ ra oma ha nọ who re ro ru ei fihọ ogberẹ,+ re otọ na u gbe bru igberẹ hẹ jẹ vọ avọ iruemu etọtọ.+

30 “‘Wha re koko edijala mẹ hrọ,+ yọ wha rẹ rọ ọghọ* kẹ oria aruẹri mẹ hrọ. Mẹ họ Jihova.

31 “‘Wha rẹ nyabru ahwo nọ a re lele izi ta ẹme he,+ yọ wha rẹ nyae nekpẹ mi egbẹva ha+ re a ru owhai fihọ ahwo nọ a fo ho. Mẹ họ Jihova, Ọghẹnẹ rai.

32 “‘Wha rẹ kpama kẹ ohwo nọ o wo eza-uzou,+ wha rẹ rọ adhẹẹ kẹ ọkpako-soso hrọ,+ yọ wha rẹ dhozọ Ọghẹnẹ rai hrọ.+ Mẹ họ Jihova.

33 “‘Ọrara ọ tẹ be rria kugbe owhai evaọ otọ rai, wha re ru ei yoyoma vievie he.+ 34 Ọrara nọ ọ be rria kugbe owhai ọ rẹ jọ kẹ owhai wọhọ ọmotọ evaọ udevie rai;+ yọ who re you rie wọhọ omara hrọ, keme wha jọ erara evaọ ẹkwotọ Ijipti.+ Mẹ họ Jihova, Ọghẹnẹ rai.

35 “‘Wha rẹ rehọ oware ewhariọ rọ ma uthethei vievie he hayo wawọ ẹgbẹdẹ, hayo ubu eware vievie he.+ 36 Iskeli egbagba wha rẹ rọ wawọ eware, owawọ-oware ogbagba nọ a rẹ rọ wawọ ẹgbẹdẹ, owawọ-oware ogbagba* nọ a rẹ rọ wawọ oware oyaya, gbe owawọ-oware ogbagba* nọ a rẹ rọ wawọ eware nọ e wọhọ ame.+ Mẹ họ Jihova, Ọghẹnẹ rai, ọnọ ọ rehọ owhai no ẹkwotọ Ijipti ze. 37 Wha re koko ijaje mẹ kpobi gbe izi oziẹobro mẹ kpobi hrọ, wha re lele ai hrọ.+ Mẹ họ Jihova.’”

20 Jihova ọ tẹ gbẹ ta kẹ Mosis nọ: 2 “Whọ rẹ ta kẹ ahwo Izrẹl nọ, ‘Ohwo Izrẹl jọ hayo ohwo orẹwho ọfa nọ ọ be rria Izrẹl nọ ọ rehọ ọmọ riẹ jọ kẹ Molẹk, a re kpei no hrọ.+ Ahwo ẹkwotọ na a rẹ rọ itho fi ei kpe. 3 Mẹ omamẹ mẹ te rẹriẹ ovao mẹ ku ohwo yena, yọ me ti kpei no udevie ahwo riẹ, keme ọ rehọ emọ riẹ jọ kẹ Molẹk yọ o zue oria ọrẹri mẹ+ je gbe odẹ ọrẹri mẹ ku. 4 Otẹrọnọ ahwo ẹkwotọ na a keke aro fihọ gbolaro kufiẹ kẹ oware nọ ohwo na o ru na nọ ọ rọ rehọ ọmọ riẹ kẹ Molẹk, a gbe kpe ohwo na no ho,+ 5 mẹ omamẹ mẹ vẹ te rẹriẹ ovao mẹ ku ohwo yena avọ uviuwou riẹ.+ Me ti kpe ohwo yena no udevie ahwo riẹ te ahwo kpobi nọ a kuomagbei lele Molẹk bru igberẹ na.

6 “‘Ohwo* nọ ọ nyabru ahwo nọ i re lele izi ta ẹme+ gbe egbẹva+ re o lele ai bru igberẹ,* mẹ te wọso ohwo* yena hrọ je kpei no udevie ahwo riẹ.+

7 “‘Wha re ru omarai fo hrọ wha vẹ jọ ọrẹri,+ keme mẹ họ Jihova, Ọghẹnẹ rai. 8 Wha re koko izi mẹ jẹ nya lele ai hrọ.+ Mẹ họ Jihova, ọnọ o bi ru owhai fo.*+

9 “‘Otẹrọnọ ohwo jọ ọ la ọsẹ riẹ hayo oni riẹ eka,* a re kpei no hrọ.+ Nọ orọnọ ọ la ọsẹ riẹ hayo oni riẹ eka na, azẹ riẹ ọ rrọ uzou obọriẹ.

10 “‘Rọ kpahe ọzae nọ o lele aye ọzae ọfa bruẹnwae: A re kpe ọnọ o lele aye ọzae ibe riẹ bruẹnwae na no hrọ, ọzae nọ o bruẹnwae na avọ aye nọ o bruẹnwae na.+ 11 Ọzae nọ o lele aye ọsẹ riẹ wezẹ, o kpomovuọ họ ọsẹ riẹ oma.*+ A re kpe aimava na no hrọ. Azẹ rai ọ rrọ uzou obọrai. 12 Otẹrọnọ ọzae o lele aye ọmọzae riẹ wezẹ, a re kpe aimava na no hrọ. A ru oware nọ o wọso oghẹrẹ nọ Ọghẹnẹ ọ ma riẹ no emuhọ ze. Azẹ rai ọ rrọ uzou obọrai.+

13 “‘Ọzae o te lele ọzae wezẹ epanọ a re lele aye wezẹ na, aimava na a ru oware otọtọ.+ A re kpe ai no hrọ. Azẹ rai ọ rrọ uzou obọrai.

14 “‘Ọzae ọ tẹ rehọ aye avọ oni riẹ, onana yọ uruemu ugbogbo.*+ A rẹ rọ erae mahe ọyomariẹ gbe aimava na no,+ re uruemu ugbogbo o gbẹ jọ udevie rai hi.

15 “‘Ọzae o te lele arao wezẹ, a re kpei no hrọ, yọ wha re kpe arao na no.+ 16 Aye o te bi kẹle arao re o lele iei wezẹ,+ wha re kpe aye na avọ arao na no. A re kpe ai no hrọ. Azẹ rai ọ rrọ uzou obọrai.

17 “‘Ọzae o te lele oniọvo-ọmọtẹ riẹ wezẹ, koyehọ ọmọtẹ ọsẹ riẹ hayo ọmọtẹ oni riẹ, ọ jẹ ruẹ ẹba ọmọtẹ na yọ ọmọtẹ na ọ ruẹ ẹba riẹ, yọ oware omovuọ.+ A re kpe ai no evaọ iraro emọ ahwo rai. O kpomovuọ họ oniọvo-ọmọtẹ riẹ oma.* Ọ rẹ ruẹ uye oruthọ riẹ.

18 “‘Ọzae o te lele aye nọ ọ rrọ oke riẹ kiẹzẹ o je lele iei wezẹ, te ọyomariẹ te aye na a kpe azẹ riẹ nọ o bi hwẹ fihọ.+ A re kpe aimava na no udevie ahwo rai no hrọ.

19 “‘Who re lele oniọvo-ọmọtẹ oni ra hayo oniọvo-ọmọtẹ ọsẹ ra wezẹ vievie he, keme oyena u re kpomovuọ họ omoni ohwo oma.+ A rẹ ruẹ uye oruthọ rai. 20 Ọzae nọ o lele aye oniọvo ọsẹ riẹ wezẹ o kpomovuọ họ oniọvo ọsẹ riẹ oma.*+ A rẹ ruẹ uye uzioraha rai. A re whu ababọ ọmọ. 21 Ọzae ọ tẹ rehọ aye oniọvo riẹ, yọ oware otọtọ gaga.+ O kpomovuọ họ oniọvo riẹ oma.* A re whu ababọ ọmọ.

22 “‘Wha re koko ijaje mẹ kpobi gbe izi oziẹobro mẹ kpobi hrọ+ jẹ nya lele ai,+ re ẹkwotọ nọ mẹ be rehọ owhai ze te rria na ọ gbẹ kpa owhai no eva riẹ kufiẹ hẹ.+ 23 Wha re lele izi erẹwho nọ me bi le no kẹ owhai na vievie he;+ keme a ru eware nana kpobi yọ a bi tu omẹ oma.+ 24 Oyejabọ nọ mẹ rọ ta kẹ owhai nọ: “Wha te rehọ ẹkwotọ rai, yọ mẹ te rehọ iẹe kẹ owhai re o jọ ọrai, ẹkwotọ nọ ame-ivie gbe ọnyọ i bi jo su.+ Mẹ họ Jihova, Ọghẹnẹ rai, ọnọ ọ hẹriẹ owhai no udevie ahwo na.”+ 25 Wha re fi ohẹriẹ họ udevie arao nọ ọ fo avọ ọnọ ọ fo ho, gbe udevie ọvra nọ ọ fo ho avọ ọnọ ọ fo;+ wha rẹ rehọ arao hayo ọvra hayo oware jọ nọ u bi si evaọ otọ na nọ mẹ hẹriẹ no kẹ owhai inọ wha re rri wọhọ oware nọ o fo ho na ro ru omarai* fihọ tọtọtọ vievie he.+ 26 Wha rẹ jọ ọrẹri kẹ omẹ hrọ, keme mẹ Jihova, mẹ ọrẹri,+ yọ mẹ be hẹriẹ owhai no ahwo na re wha jọ emẹ.+

27 “‘Ọzae hayo aye kpobi nọ ọ rrọ ọnọ o re lele izi ta ẹme hayo ọgbẹva* a re kpei no hrọ.+ Ahwo na a rẹ rọ itho fi ai kpe. Azẹ rai ọ rrọ uzou obọrai.’”

21 Jihova ọ tẹ gbẹ ta kẹ Mosis nọ: “Ta ẹme kẹ izerẹ na, emezae Erọn, ta kẹ ae nọ, ‘Ohwo ọvuọvo o re zue oma riẹ hẹ fiki ohwo nọ o whu* evaọ udevie ahwo riẹ.+ 2 Rekọ ọ rẹ sai ru ere fiki ohwo uwou riẹ nọ ọ kpekpe riẹ oma gaga, rọkẹ oni riẹ, ọsẹ riẹ, ọmọzae riẹ, ọmọtẹ riẹ, oniọvo-ọmọzae riẹ, 3 yọ ọ rẹ sai zue oma riẹ fiki oniọvo-ọmọtẹ riẹ otẹrọnọ ọ rrọ ọmọtẹ-kọkọ nọ ọ kpekpe riẹ oma yọ ọ re rọo ho. 4 O re gbe oma riẹ ku hu re o zue oma riẹ fiki aye nọ o wo ọzae no evaọ udevie ahwo riẹ. 5 A rẹ nware uzou rai rioriorio ho+ hayo nware akotọ etuagba rai hi hayo bru ibrẹbru fihọ oma rai hi.+ 6 A rẹ jọ ọrẹri kẹ Ọghẹnẹ rai,+ a re gbe odẹ Ọghẹnẹ rai ku hu,+ keme ae a bi dhe idhe Jihova nọ a rẹ rọ erae mahe, ebrẹdi* Ọghẹnẹ rai, fikiere a rẹ jọ ọrẹri hrọ.+ 7 A rẹ rehọ ogberẹ hẹ,+ aye nọ a zue oma no, hayo aye nọ orọo riẹ avọ ọzae riẹ o fa,+ keme ozerẹ yọ ohwo ọrẹri kẹ Ọghẹnẹ riẹ. 8 Ọ rẹ jọ ọrẹri kẹ owhai hrọ,+ keme ọye ọ be rehọ ebrẹdi Ọghẹnẹ rai dhe idhe. Wha rẹ rehọ iẹe wọhọ ohwo ọrẹri, keme mẹ Jihova, ọnọ o bi ru owhai fo* na, mẹ ọrẹri.+

9 “‘Whaọ otẹrọnọ ọmọtẹ ozerẹ o zue oma riẹ ẹkwoma igberẹ-ibro, o bi zue ọsẹ riẹ oma. A rẹ rọ erae mahe ọmọtẹ na kpe.+

10 “‘Ọnọ ọ rrọ ozerẹ okpehru na evaọ usu inievo-emezae riẹ, ọnọ a ku ewhri eromuo na họ uzou riẹ+ nọ a ro mu* re o ku iwu ozerẹ na họ na,+ ọ rẹ nyasiọ uzou riẹ ba jẹvu jẹvu hu hayo bẹre iwu riẹ hẹ.+ 11 Ọ rẹ nya kẹle ohwo ọvuọvo nọ o whu no ho;*+ o re zue oma riẹ hẹ makọ rọkẹ ọsẹ riẹ hayo oni riẹ. 12 Ọ rẹ nyaruọ otafe no oria aruẹri na ha yọ o re gbe oria aruẹri Ọghẹnẹ riẹ ku hu,+ keme oka omauromudhe na, ewhri eromuo Ọghẹnẹ riẹ+ o rrọ uzou riẹ. Mẹ họ Jihova.

13 “‘Aye nọ ọ rẹ rehọ ọ rẹ jọ ọmọtẹ-kọkọ hrọ.+ 14 Ọ sae rehọ aye-uku hu, hayo aye nọ orọo riẹ o fa no, hayo ọnọ a zue oma no, hayo ogberẹ; rekọ ọ rẹ jọ udevie ahwo riẹ rehọ ọmọtẹ-kọkọ re ọ jọ aye riẹ. 15 O re zue emọ* riẹ oma ha evaọ udevie ahwo riẹ,+ keme mẹ họ Jihova, ọnọ o bi ru ei fo.’”*

16 Jihova ọ tẹ gbẹ jẹ ta kẹ Mosis nọ: 17 “Ta kẹ Erọn nọ, ‘Ọzae ọvuọvo evaọ emọ* ra evaọ ige ra kpobi nọ oware jọ o thọ evaọ oma riẹ ọ rẹ nya kẹle re ọ rehọ ebrẹdi Ọghẹnẹ riẹ dhe idhe he. 18 Otẹrọnọ u wo ọzae jọ nọ oware jọ o thọ evaọ oma riẹ, ọ rẹ nya kẹle he: ọzae nọ o tuaro hayo ọnọ ọ rrọ ọmo hayo ọnọ oware jọ u ru ovao riẹ* hayo ọnọ obọ hayo owọ riẹ jọ u theri vi odekọ, 19 ọzae nọ o wiri owọ hayo ọnọ o wiri obọ, 20 otuluke hayo ọnọ ọ ko dhotọ,* hayo ọzae nọ o wo ẹbẹbẹ ubiẹro, hayo nọ ewe e rrọ oma hayo nọ o wo ẹmẹvohrẹ hayo ọnọ oware jọ o thọ kugbe ibite riẹ.+ 21 Ọzae ọvuọvo ọrọ emọ* Erọn ozerẹ na nọ oware jọ o thọ evaọ oma riẹ ọ rẹ nya kẹle he re o dhe idhe Jihova nọ a rẹ rọ erae mahe. Fikinọ oware jọ o thọ evaọ oma riẹ, ọ rẹ sae nya kẹle re ọ rehọ ebrẹdi Ọghẹnẹ riẹ dhe idhe he. 22 Ọ rẹ sae re ebrẹdi Ọghẹnẹ riẹ evaọ usu eware nọ e mae rrọ ọrẹri na+ gbe evaọ usu eware nọ e rrọ ọrẹri na.+ 23 Rekọ ọ rẹ nya kẹle ekọtini na ha,+ yọ ọ rẹ nya kẹle agbada-idhe na ha,+ keme oware jọ o thọ evaọ oma riẹ; o re gbe oria aruẹri mẹ ku hu,+ keme mẹ họ Jihova, ọnọ o bi ru ai fo.’”*+

24 Fikiere Mosis ọ tẹ ta ẹme kẹ Erọn avọ emezae riẹ gbe ahwo Izrẹl kpobi.

22 Jihova ọ tẹ gbẹ ta kẹ Mosis nọ: 2 “Ta kẹ Erọn avọ emezae riẹ nọ a rẹ yọroma kpahe oghẹrẹ nọ a re ru* eware ọrẹri ahwo Izrẹl re a gbe gbe odẹ ọrẹri mẹ ku+ hu evaọ eware nọ a bi ru fo* kẹ omẹ na.+ Mẹ họ Jihova. 3 Ta kẹ ae nọ, ‘Evaọ ige rai kpobi, ọmọ rai kpobi nọ ọ nyaze kẹle eware ọrẹri nọ ahwo Izrẹl a be hẹriẹ fihọ akotọ kẹ Jihova evaọ etoke nọ ọ rọ fo ho, a re kpe ohwo* yena no aro mẹ no.+ Mẹ họ Jihova. 4 Ọzae ọvuọvo evaọ emọ Erọn nọ o wo oti+ hayo nọ ame o bi no oma ze+ ọ rẹ re eware ọrẹri na ha bẹsenọ ọ rẹ fo no,+ te ohwo nọ ọ rọ obọ te ohwo nọ ọ fo ho fikinọ ohwo yena ọ rọ obọ te ohwo nọ o whu no,*+ hayo ọzae nọ ame-oma o bi no oma riẹ ze,+ 5 hayo ohwo nọ ọ rọ obọ te ọjọ evaọ emama nọ e rẹ jọ usu ovo buobu nọ e fo ho+ hayo nọ ọ rọ obọ te ohwo nọ ọ fo ho fiki oware jọ kpobi yọ ohwo na ọ rẹ sai ru ei fihọ ohwo nọ ọ fo ho.+ 6 Ohwo* nọ ọ rọ obọ te ọjọ evaọ usu enana kpobi ọ rẹ jọ ọnọ ọ fo ho ri bọo owọwọ yọ ọ rẹ sae re eware ọrẹri na ọvuọvo ho, rekọ ọ rẹ rọ ame họ oma riẹ.*+ 7 Nọ ọre o te kiediwi no, ọ rẹ jọ ohwo nọ ọ fo, kẹsena ọ vẹ tẹ te sae re eware ọrẹri na jọ keme emu riẹ ọye.+ 8 Ofariẹ, ọ rẹ re arao nọ a dihọ owhuowhu hu hayo ọnọ arao ojihẹ o kpe re u ru ei fihọ ohwo nọ ọ fo ho.+ Mẹ họ Jihova.

9 “‘A re ru oware nọ mẹ gwọlọ mi ai hrọ, re a gbẹ reabe uzioraha fiki riẹ hẹ re a rọ fiki riẹ whu fikinọ a zue eware ọrẹri na. Mẹ họ Jihova, ọnọ o bi ru ai fo.*

10 “‘Ohwo nọ a kẹ udu hu* ọ rẹ re oware ovuovo nọ o rrọ ọrẹri hi.+ Ohwo orẹwho ọfa ọvuọvo nọ ọ rrọ kugbe ozerẹ hayo ohwo nọ a rehọ iruo ọ rẹ re oware ovuovo nọ o rrọ ọrẹri hi. 11 Rekọ otẹrọnọ ozerẹ ọ rehọ ugho obọriẹ dẹ ohwo* jọ, ohwo yena ọ rẹ sae re iẹe. Erigbo nọ a jọ uwou riẹ yẹ a rẹ sae jẹ jọ emu riẹ re.+ 12 Otẹrọnọ ọmọtẹ ozerẹ ọ rehọ ohwo nọ ọ rrọ ozerẹ hẹ,* ọ rẹ sae re eware ọrẹri nọ a rọ ze na ha. 13 Rekọ otẹrọnọ ọmọtẹ ozerẹ o zihe ruọ aye-uku hayo orọo riẹ avọ ọzae riẹ o fa yọ o wo ọmọ ọvuọvo ho o je zihe ziọ uwou ọsẹ riẹ wọhọ epaọ oke uzoge riẹ, ọ rẹ sae re emu ọsẹ riẹ jọ;+ rekọ ohwo nọ a kẹ udu hu* ọ rẹ re iẹe he.

14 “‘Whaọ otẹrọnọ ohwo ọ rọ ethobọ re oware ọrẹri, o re fi abọvo abasoi riẹ bae ọ vẹ rehọ okẹ ọrẹri na se ozerẹ na.+ 15 Re a gbe zue eware ọrẹri ahwo Izrẹl na ha nọ a be rọ kẹ Jihova okẹ+ 16 re a si uye fihọ uzou rai fiki abe-ọriọ rai nọ a rọ re eware ọrẹri rai; keme mẹ họ Jihova, ọnọ o bi ru ai fo.’”*

17 Jihova ọ tẹ gbẹ jẹ ta kẹ Mosis nọ: 18 “Ta kẹ Erọn avọ emezae riẹ gbe ahwo Izrẹl kpobi nọ, ‘Nọ ohwo Izrẹl hayo ọrara nọ ọ be rria Izrẹl ọ tẹ be rehọ okẹ idhe emahọ+ se Jihova re o ru eyaa riẹ gba hayo re ọ rọ kẹ okẹ unevaze,+ 19 ọ rẹ rehọ arao ọzae nọ oma riẹ o rrọ kọkọ+ no owa erao ze, igbo, hayo ewe, re ọ ruẹsi wo ọjẹrehọ. 20 Wha rẹ rehọ arao ọvuọvo nọ oware jọ o thọ evaọ oma riẹ rọ kẹ okẹ vievie he,+ keme wha te jariẹ wo ọjẹrehọ họ.

21 “‘Otẹrọnọ ohwo ọ be kẹ Jihova okẹ idhe ọriẹyeri+ re ọ rọ hwa eyaa hayo re ọ rọ kẹ okẹ unevaze, o rẹ jọ arao nọ oma riẹ o rrọ kọkọ nọ ọ rehọ no owa erao hayo uthuru erao ze, re ọ ruẹsi wo ọjẹrehọ. Oware ovuovo o rẹ jọ oma arao na thọ vievie he. 22 A rẹ rọ arao nọ o tuaro, nọ o wiri oria, nọ o bru oria jọ, nọ oware jọ o ta no oma ze, nọ o wo omola, hayo ẹmẹvohrẹ kẹ okẹ hẹ; wha rẹ rọ oghẹrẹ arao otiọna ọvuọvo kẹ Jihova okẹ hẹ hayo rehọ otiọye jọ dhe idhe evaọ agbada-idhe na kẹ Jihova ha. 23 Whọ rẹ sae rọ eruẹ hayo ogodẹ nọ obọ hayo owọ riẹ jọ u theri hayo kpẹre vi odekọ kẹ okẹ unevaze, rekọ whọ tẹ rehọ iẹe dhe idhe eyaa nọ whọ ya, a re mi owhẹ hẹ re whọ jariẹ wo ọjẹrehọ. 24 Wha rẹ kẹ Jihova arao nọ oware jọ o thọ kugbe ibite riẹ vievie he hayo nọ e whọlọ no hayo nọ a si no hayo nọ a bru no, yọ wha rẹ rọ erao itieye na kẹ okẹ evaọ ẹkwotọ rai hi. 25 Wha rẹ rehọ erao itienana evuevo mi ohwo orẹwho ọfa vievie he re wha ro dhe idhe ebrẹdi Ọghẹnẹ rai, keme i gbeku yọ oware jọ o thọ evaọ oma rai. A te rehọ ae mi owhai hi re wha wo ọjẹrehọ.’”

26 Jihova ọ tẹ gbẹ ta kẹ Mosis nọ: 27 “Nọ a te yẹ eruẹ hayo egbo hayo ẹwe, ọ rẹ jọ kugbe oni riẹ evaọ edẹ ihrẹ,+ rekọ no umuo ẹdẹ avọ eree vrẹ, a rẹ sae jẹe rehọ nọ a tẹ rehọ iẹe dhe idhe, idhe nọ a rẹ rọ erae mahe kẹ Jihova. 28 Kpahe eruẹ hayo ogodẹ, wha re kpei avọ ọmọ riẹ evaọ ẹdẹ ọvona vievie he.+

29 “Otẹrọnọ wha bi dhe idhe uyere kẹ Jihova,+ wha re dhe idhe na re wha jariẹ wo ọjẹrehọ kẹ omarai. 30 Evaọ ẹdẹdẹ yena a rẹ rọ re iẹe. Wha rẹ siọ ọvuọvo riẹ ba te ohiohiẹ vievie he.+ Mẹ họ Jihova.

31 “Wha re koko izi mẹ jẹ nya lele ai hrọ.+ Mẹ họ Jihova. 32 Wha re gbe odẹ ọrẹri mẹ ku vievie he,+ whai ahwo Izrẹl wha re ru omẹ ọrẹri hrọ.+ Mẹ họ Jihova, ọnọ o bi ru owhai fo,*+ 33 ọnọ ọ be rehọ owhai no ẹkwotọ Ijipti re me dhesẹ kẹ owhai nọ mẹ họ Ọghẹnẹ rai.+ Mẹ họ Jihova.”

23 Jihova ọ tẹ gbẹ jẹ ta kẹ Mosis nọ: 2 “Ta kẹ ahwo Izrẹl nọ, ‘Ehaa ezi-ezi+ erọ Jihova nọ wha re woro+ yọ ikokohọ ọrẹri. Enana họ ehaa ezi-ezi mẹ:

3 “‘Edẹ ezeza a sai ro ru iruo, rekọ ẹdẹ avọ ihrẹ na yọ ẹdijala eriosehọ riẹriẹriẹ,+ okokohọ ọrẹri. Wha re ru oghẹrẹ iruo evuevo ho. O rẹ jọ ẹdijala kẹ Jihova evaọ oria kpobi nọ wha be rria.+

4 “‘Enana họ ehaa ezi-ezi erọ Jihova, ikokohọ ọrẹri nọ wha re woro evaọ oke nọ a fihọ kẹ ae: 5 Evaọ amara ọsosuọ, evaọ ẹdẹ avọ ikpegbene amara na,+ nọ ọre o te kiediwi no* yọ ẹdẹ Ọnyavrẹ+ rọkẹ Jihova.

6 “‘Ẹdẹ avọ ikpegbisoi amara nana họ Ehaa Ebrẹdi nọ Ọ Kare Ẹvi rọkẹ Jihova.+ Edẹ ihrẹ wha rẹ re ebrẹdi nọ ọ kare ẹvi.*+ 7 Evaọ ẹdẹ ọsosuọ na, wha re ru okokohọ ọrẹri.+ Wha re ru iruo egaga evuevo ho. 8 Rekọ wha re dhe idhe nọ a rẹ rọ erae mahe kẹ Jihova evaọ edẹ ihrẹ. A re ru okokohọ ọrẹri evaọ ẹdẹ avọ ihrẹ na. Wha re ru iruo egaga evuevo ho.’”

9 Jihova ọ tẹ gbẹ jẹ ta kẹ Mosis nọ: 10 “Ta kẹ ahwo Izrẹl nọ, ‘Okenọ wha tẹ ziọ ẹkwotọ nọ mẹ be rọ kẹ owhai no nọ wha je vu ivuẹvu riẹ no, wha rẹ rọ ekru ekakọ* erọ ibi ọsosuọ+ ivuẹvu rai se ozerẹ na hrọ.+ 11 O ve ti veghe ekru ekakọ na kpemu kparo evaọ aro Jihova re o ru owhai wo ọjẹrehọ. Ozerẹ na o re veghe iei evaọ ẹdẹ nọ o lele Ẹdijala na. 12 Evaọ ẹdẹ nọ a ro veghe ekru ekakọ na, wha rẹ rehọ egbo nọ ọ rrọ ukpe ọsosuọ riẹ dhe idhe hrọ, wọhọ idhe emahọ kẹ Jihova. 13 Idhe ibi ekakọ riẹ o rẹ jọ abava orọ abakpe ifa* orọ emamọ eflawa iwuwuru nọ a rọ ewhri gua, wọhọ idhe nọ a rẹ rọ erae mahe kẹ Jihova, onọ u re gbo ore awere.* Idhe udi riẹ o rẹ jọ abọvo abane ihini* orọ enwaene. 14 Wha rẹ re ebrẹdi evuovo vievie he, eka nọ a sasa,* hayo ibi ekakọ ekpokpọ bẹsenọ ẹdẹ nana o re te, bẹsenọ wha rẹ rehọ okẹ rai se Ọghẹnẹ rai. Onana yọ uzi nọ o rẹ jọ ribri kẹ ige rai kpobi evaọ oria kpobi nọ wha be rria.

15 “‘Wha re kele edijala ihrẹ no ẹdẹ nọ o lele Ẹdijala na, no umuo ẹdẹ nọ wha rọ rehọ ekru ekakọ idhe iveghe na ze.+ E rẹ jọ ekpoka soso. 16 Wha re kele edẹ udhuvẹ-gbikpe+ te ẹdẹ nọ o lele Ẹdijala avọ ihrẹ na, kẹsena wha ve dhe idhe ibi ekakọ ekpokpọ kẹ Jihova.+ 17 Wha rẹ jọ evaọ eria nọ wha be rria rehọ ikulu ebrẹdi ivẹ ze nọ a re ro dhe idhe iveghe. Abava abakpe ifa* orọ emamọ eflawa iwuwuru a re ro ru ai. A rẹ gua ẹvi kugbe ai ro beki rai,+ wọhọ ibi ọsosuọ nọ e ware rọkẹ Jihova.+ 18 Yọ wha rẹ rehọ imigodẹ ezae ihrẹ nọ e rrọ omakọkọ, enọ e kpako te ukpe ọvo no, gbe eruẹ ọvo gbe igbo ivẹ kugbe ikulu ebrẹdi na ze.+ A rẹ rehọ ae dhe idhe emahọ kẹ Jihova avọ idhe ibi ekakọ nọ u fo nọ u re lele iei gbe idhe udi nọ u fo nọ u re lele iei, wọhọ idhe nọ a rẹ rọ erae mahe, onọ u re gbo ore awere* kẹ Jihova. 19 Yọ wha rẹ rehọ ọmọ ẹwe ọvo dhe idhe uzioraha+ jẹ rehọ imigodẹ ezae ivẹ, enọ e kpako te ukpe ọvo no ro dhe idhe ọriẹyeri.+ 20 Ozerẹ na o re veghe ai kpemu kparo kugbe ikulu ebrẹdi ibi ọsosuọ rai nọ e ware na wọhọ idhe iveghe evaọ aro Jihova, kugbe imigodẹ ezae ivẹ na. E rẹ jọ eware nọ e rrọ ọrẹri kẹ Jihova nọ e rrọ kẹ ozerẹ na.+ 21 Evaọ ẹdẹ nana wha re woro+ okokohọ ọrẹri nọ wha re ru kẹ omarai. Wha re ru iruo egaga evuevo ho. Onana yọ uzi nọ o rẹ jọ ribri rọkẹ ige rai kpobi evaọ oria kpobi nọ wha be rria.

22 “‘Nọ wha te bi vu ekakọ otọ rai, wha re vu akọ udhu rai kpobi no riẹriẹriẹ hẹ yọ wha rẹ kwa enọ i kiọkọ evaọ ivuẹvu rai hi.+ Wha rẹ nyasiọ ae ba kẹ iyogbe*+ avọ erara nọ e be rria udevie rai.+ Mẹ họ Jihova, Ọghẹnẹ rai.’”

23 Jihova ọ tẹ gbẹ jẹ ta kẹ Mosis nọ: 24 “Ta kẹ ahwo Izrẹl nọ, ‘Evaọ amara avọ ihrẹ na, evaọ ẹdẹ ọsosuọ amara na, yọ ẹdẹ eriosehọ riẹriẹriẹ kẹ owhai, ekareghẹhọ nọ a re kporo ọgba ro je ahwo na riẹ,+ okokohọ ọrẹri. 25 Wha re ru iruo egaga evuevo ho, yọ wha re dhe idhe nọ a rẹ rọ erae mahe kẹ Jihova.’”

26 Jihova ọ tẹ gbẹ ta kẹ Mosis nọ: 27 “Rekọ, ẹdẹ avọ ikpe ọrọ amara avọ ihrẹ nana họ Ẹdẹ Omavoro na.+ Wha re ru okokohọ ọrẹri, wha re gboja kẹ omarai* hrọ+ je dhe idhe nọ a rẹ rọ erae mahe kẹ Jihova. 28 Wha re ru oghẹrẹ iruo evuevo ho evaọ ẹdẹ nana keme ọnana yọ ẹdẹ omavoro nọ a re ro ru omavoro+ kẹ owhai evaọ aro Jihova, Ọghẹnẹ rai. 29 Ohwo* kpobi nọ o gboja kẹ omariẹ hẹ* evaọ ẹdẹ nana, a re kpei no udevie ahwo riẹ.+ 30 Yọ me ti kpe ohwo* kpobi nọ o ru oghẹrẹ iruo jọ kpobi evaọ ẹdẹ nana no udevie ahwo riẹ. 31 Wha re ru oghẹrẹ iruo evuevo vievie he. Onana yọ uzi nọ o rẹ jọ ribri kẹ ige rai kpobi evaọ oria kpobi nọ wha be rria. 32 Ọnana yọ ẹdijala eriosehọ riẹriẹriẹ kẹ owhai, yọ wha re gboja kẹ omarai*+ evaọ ẹdẹ avọ izii amara na evaọ owọwọ. Wha re koko ẹdijala rai no owọwọ rite owọwọ.”

33 Jihova ọ tẹ gbẹ jẹ ta kẹ Mosis nọ: 34 “Ta kẹ ahwo Izrẹl nọ, ‘Ẹdẹ avọ ikpegbisoi amara avọ ihrẹ nana họ Ehaa Iwou-Owhre* nọ a re ru edẹ ihrẹ kẹ Jihova.+ 35 A re ru okokohọ ọrẹri evaọ ẹdẹ ọsosuọ riẹ, yọ wha re ru iruo egaga evuevo ho. 36 Wha re dhe idhe nọ a rẹ rọ erae mahe kẹ Jihova evaọ edẹ ihrẹ hrọ. Evaọ ẹdẹ avọ eree na, wha re ru okokohọ ọrẹri,+ yọ wha re dhe idhe nọ a rẹ rọ erae mahe kẹ Jihova. Ọnana yọ okokohọ urirẹ. Wha re ru iruo egaga evuevo ho.

37 “‘Enana họ ehaa ezi-ezi+ erọ Jihova nọ wha re woro nọ a rẹ jọ ru ikokohọ ọrẹri+ nọ wha rẹ jọ dhe idhe nọ a rẹ rọ erae mahe kẹ Jihova: idhe emahọ+ na avọ idhe ibi ekakọ+ orọ idhe na gbe idhe udi+ lele ọruẹrẹfihotọ ikẹdẹ kẹdẹ na. 38 A re ku enana kugbe eware nọ a re ro dhe idhe evaọ edijala Jihova,+ gbe ekẹ rai,+ eware nọ wha ya eyaa nọ wha te rọ kẹ okẹ,+ gbe ekẹ unevaze rai,+ enọ wha rẹ kẹ Jihova. 39 Rekọ evaọ ẹdẹ avọ ikpegbisoi ọrọ amara avọ ihrẹ na, nọ wha tẹ kwa ivuẹvu otọ na kokohọ no, wha re ru ehaa Jihova edẹ ihrẹ.+ Ẹdẹ ọsosuọ na yọ ẹdẹ eriosehọ riẹriẹriẹ yọ ẹdẹ avọ eree na yọ ẹdẹ eriosehọ riẹriẹriẹ.+ 40 Evaọ ẹdẹ ọsosuọ na, wha rẹ rehọ ibi-ire erọ ire nọ e mai woma na, eya iriẹ,+ egha ire nọ i wo ebe ziezi gbe pọpla ukiekpotọ* na, yọ wha rẹ ghọghọ+ evaọ aro Jihova, Ọghẹnẹ rai evaọ edẹ ihrẹ.+ 41 Wha re ru ehaa na kẹ Jihova edẹ ihrẹ evaọ ukpe na.+ Onana yọ uzi nọ o rẹ jọ ribri evaọ ige rai kpobi, wha re ru ehaa na evaọ amara avọ ihrẹ. 42 Wha rẹ rria iwou-owhre edẹ ihrẹ.+ Emotọ Izrẹl kpobi a rẹ rria iwou-owhre na, 43 re ige rai nọ e be tha evaọ obaro a ruẹse riẹ+ nọ iwou-owhre me ru ahwo Izrẹl rria okenọ mẹ jẹ rehọ ae no ẹkwotọ Ijipti ze.+ Mẹ họ Jihova, Ọghẹnẹ rai.’”

44 Fikiere Mosis ọ tẹ vuẹ ahwo Izrẹl kpahe ehaa ezi-ezi erọ Jihova.

24 Jihova ọ tẹ gbẹ jẹ ta kẹ Mosis nọ: 2 “Ta kẹ ahwo Izrẹl nọ a rehọ obọdẹ ewhri ibi olivi* nọ a duwu se owhẹ nọ a re ro tu ikpẹ na, re a ro ru ikpẹ na lo kẹse kẹse.+ 3 Evaọ otafe ekọtini nọ o rrọ aro Isẹri* na evaọ uwou-udhu omakugbe na, Erọn o re ru ọruẹrẹfihotọ nọ ikpẹ na i re ro lo no owọwọ rite ohiohiẹ evaọ aro Jihova kẹse kẹse. Onana yọ uzi nọ o rẹ jọ ribri kẹ ige rai kpobi. 4 Ọ rẹ ruẹrẹ ikpẹ na họ evaọ ọkpọ-edada ukpẹ+ ọrọ emamọ igoru* na nọ ọ rrọ aro Jihova kẹse kẹse.

5 “Whọ rẹ rehọ emamọ eflawa iwuwuru ro beki ikulu ebrẹdi ikpegbivẹ nọ a ru wọhọ ẹmẹro. Abava abakpe ifa* a re ro ru ukulu ovuọvo. 6 Who re fi ai họ eko ivẹ evaọ ehru ohwohwo,+ ezeza evaọ ẹko ọvo, evaọ emẹjẹ ọrọ emamọ igoru* na nọ ọ rrọ aro Jihova.+ 7 Who re fi emamọ frankinsẹns* họ ehru ẹko ọvuọvo, o vẹ jọ wọhọ ebrẹdi orọ amabọ jọ idhe*+ nọ a rọ erae mahe kẹ Jihova. 8 Evaọ ẹdẹ Ẹdijala kpobi, ọ rẹ ruẹrẹ iẹe họ aro Jihova kẹse kẹse.+ Onana yọ ọvọ nọ ọ rẹ jọ ribri kugbe ahwo Izrẹl. 9 O rẹ jọ orọ Erọn avọ emezae riẹ,+ yọ a rẹ re iẹe evaọ oria ọrẹri,+ keme onana yọ oware nọ o mae rrọ ọrẹri kẹe nọ u no idhe nọ a rẹ rọ erae mahe kẹ Jihova ze, wọhọ ujaje nọ o rẹ jọ ribri.”

10 Whaọ evaọ udevie ahwo Izrẹl u wo ọmọzae aye Izrẹl jọ nọ o yẹ kẹ ọzae Ijipti,+ ohọre o tẹ romavia evaọ udevie riẹ avọ ọzae Izrẹl ọfa evaọ evuẹ na. 11 Ọmọzae aye na ọ tẹ jẹ rehọ Odẹ* na zaharo jẹ be lae eka.*+ Fikiere a tẹ rehọ iẹe bru Mosis.+ A tẹ ruẹ nọ odẹ oni riẹ Shilomit, ọmọtẹ Dibrae ọrọ orua Dan. 12 A te kru rie fihọ etẹe bẹsenọ a rọ vuẹ ae vevẹ oware nọ Jihova ọ ta.+

13 Kẹsena Jihova ọ tẹ ta kẹ Mosis nọ: 14 “Rehọ ọnọ ọ la eka na kpobọ otafe evuẹ na, yọ ahwo kpobi nọ a yo okenọ ọ jẹ la eka na a rẹ rọ abọ rai kpahe uzou riẹ, kẹsena ogbotu na kpobi a vẹ rọ itho fi ei kpe.+ 15 Yọ whọ rẹ ta kẹ ahwo Izrẹl nọ, ‘Otẹrọnọ ohwo jọ ọ la Ọghẹnẹ riẹ eka, ọ rẹ ruẹ uye uzioraha riẹ. 16 Ọnọ ọ rehọ odẹ Jihova zaharo a re kpei no hrọ.+ Ogbotu ahwo na kpobi a rẹ rọ itho fi ei hrọ. A re kpe ọrara nọ ọ be rria udevie rai epanọ a re kpe ọmotọ nọ ọ rehọ Odẹ na zaharo.

17 “‘Otẹrọnọ ohwo o kpe ohwo, a re kpei hrọ.+ 18 Ohwo kpobi nọ ọ fa arao ẹwho o je kpei ọ rẹ hwosa fihọ iẹe, uzuazọ rọkẹ uzuazọ.* 19 Otẹrọnọ ohwo jọ ọ nwa ọrivẹ riẹ oma, a re ru ei oware nọ o ru ọrivẹ riẹ na.+ 20 Ohwo o te wiri onwa ohwo a re wiri onwa riẹ, ubiẹro rọkẹ ubiẹro, ubiakọ rọkẹ ubiakọ, oghẹrẹ oma nọ ọ nwa ohwo na a rẹ nwae re.+ 21 Ohwo nọ ọ fa arao o je kpei ọ rẹ hwosa fihọ iẹe,+ rekọ ọnọ ọ fa ohwo o je kpei a re kpei re.+

22 “‘Uzi oziẹobro ọvona o rrọ kẹ owhai kpobi, te ọrara nọ ọ be rria udevie rai te ọmotọ,+ keme mẹ họ Jihova, Ọghẹnẹ rai.’”

23 Kẹsena Mosis ọ tẹ ta ẹme na kẹ ahwo Izrẹl, a tẹ rehọ ọnọ ọ la eka na kpobọ otafe evuẹ na, a tẹ rehọ itho fi ei kpe.+ Kọ ere ahwo Izrẹl a ro ru wọhọ epanọ Jihova o jie uzi riẹ kẹ Mosis.

25 Jihova ọ tẹ gbẹ ta kẹ Mosis evaọ Ugbehru Saena nọ: 2 “Ta kẹ ahwo Izrẹl nọ, ‘Okenọ wha tẹ ziọ ẹkwotọ nọ mẹ be rọ kẹ owhai no,+ otọ na u re koko ẹdijala kẹ Jihova.+ 3 Ikpe ezeza wha rẹ kọ ibi họ otọ rai, yọ ikpe ezeza wha re bru egha ọgbọ evaene rai, wha ve koko eware nọ otọ na o mọ họ.+ 4 Rekọ ukpe avọ ihrẹ na o rẹ jọ orọ ẹdijala eriosehọ riẹriẹriẹ kẹ otọ na, ẹdijala rọkẹ Jihova. Wha rẹ kọ ibi họ otọ rai hi hayo bru egha ọgbọ evaene rai hi. 5 Nọ ibi ekakọ nọ wha nyaseba evaọ oke ivuẹvu e tẹ dhẹ ze, wha re vu ai vievie he, yọ evaene rai nọ wha bru egha rai hi,* wha rẹ kọrọ ibi rai kokohọ vievie he. Otọ na u re wo ukpe soso orọ eriosehọ riẹriẹriẹ. 6 Rekọ, wha rẹ sae re eware nọ e dhẹ no otọ na ze evaọ etoke ẹdijala riẹ; te owhai, te erigbo ezae avọ erigbo eyae rai, ahwo nọ wha rehọ iruo, te ahwo orẹwho ọfa nọ a be rria kugbe owhai a rẹ sae re ae, 7 te erao ẹwho gbe erao ẹwọ nọ e rrọ ẹkwotọ rai. Oware kpobi nọ otọ na o mọ wha rẹ sae re iẹe.

8 “‘Wha re kele ikpe ẹdijala ihrẹ, ikpe ihrẹ eko ihrẹ, yọ edẹ ikpe ẹdijala ihrẹ na e rẹ jọ ikpe udhuvẹ-gbizii. 9 Kẹsena wha ve kporo onware na do ziezi evaọ amara avọ ihrẹ na, evaọ ẹdẹ avọ ikpe amara na; evaọ Ẹdẹ Omavoro na,+ wha re kporo onware na nọ a re yo edo riẹ evaọ ẹkwotọ rai kpobi. 10 Wha re ru ukpe avọ udhuvẹ-gbikpe na fihọ ọrẹri hrọ je woro obusino evaọ ẹkwotọ na rọkẹ ahwo nọ a be rriae kpobi.+ O rẹ te jọ Ukpe Obusino kẹ owhai, omomọvo rai o ve zihe kpohọ otọ riẹ, yọ omomọvo rai o re zihe bru uviuwou riẹ.+ 11 Ukpe avọ udhuvẹ-gbikpe na o rẹ jọ Ukpe Obusino kẹ owhai. Wha rẹ kọ ibi hi hayo vu eware nọ eye ọvo e dhẹ ze no udevie ibi ekakọ nọ wha nyaseba ha hayo kọrọ ibi erọ evaene nọ wha bru egha rai hi hi.*+ 12 Keme yọ Ukpe Obusino. O rẹ jọ ọrẹri kẹ owhai. Oware nọ wha rẹ sae re ọvo họ onọ oye ọvo o dhẹ no otọ na ze.+

13 “‘Evaọ Ukpe Obusino nana, omomọvo rai o re zihe kpohọ otọ riẹ.+ 14 Otẹrọnọ whọ zẹ oware jọ kẹ ọrivẹ ra hayo whọ dẹ mi ei, wha wha ohwohwo re he.+ 15 Whọ tẹ be dẹ oware mi ọrivẹ ra, who re roro unu ikpe nọ e vrẹ no anwọ Ukpe Obusino na, yọ o re roro unu ikpe nọ i kiọkọ rọkẹ ekakọ rọ zẹ kẹ owhẹ.+ 16 Otẹrọnọ ikpe buobu i kiọkọ, ọ rẹ sae kpare unuigho nọ ọ be rọ zẹe kpehru, rekọ otẹrọnọ ikpe kakao i kiọkọ, o re si unuigho nọ ọ be rọ zẹe kpotọ, keme unu ekakọ nọ i ti no otọ na ze ọ be zẹ kẹ owhẹ na. 17 Jọ ohwo ọvo evaọ usu rai ọ wha ọrivẹ riẹ re he,+ wha rẹ dhozọ Ọghẹnẹ rai hrọ,+ keme mẹ họ Jihova, Ọghẹnẹ rai.+ 18 Wha te koko ijaje mẹ je lele izi oziẹobro mẹ, wha te rria ẹkwotọ na avọ omofọwẹ.+ 19 Otọ na o te mọ ibi ziezi,+ yọ wha te re eva vọ jẹ rria ẹkwotọ na avọ omofọwẹ.+

20 “‘Rekọ otẹrọnọ wha rẹ ta nọ: “Kọ eme ma te re evaọ ukpe avọ ihrẹ na otẹrọnọ ma rẹ kọ ibi hi yọ ma rẹ kwa ekakọ mai kokohọ họ?”+ 21 Me ti vi eghale mẹ se owhai evaọ ukpe avọ ezeza na, otọ na o vẹ te mọ ibi nọ i re te re ikpe esa.+ 22 Kẹsena wha vẹ te kọ ibi evaọ ukpe avọ eree na, yọ wha te re ekakọ anwae na rite ukpe avọ izii na. Bẹsenọ ekakọ riẹ e rẹ who, erọ anwae na wha te jọ re.

23 “‘A rẹ zẹ otọ na no obọ no riẹriẹriẹ hẹ,+ keme otọ na omẹ.+ Whai yọ erara gbe enọ e rrọ ukane evaọ aro mẹ.+ 24 Evaọ ẹkwotọ rai kpobi, wha rẹ kẹ udu nọ a rẹ rọ wariẹ fa* otọ zihe.

25 “‘Otẹrọnọ oniọvo ra o zihe ruọ oyogbe ọ jẹ zẹ otọ riẹ jọ, ohwo nọ o wo udu nọ ọ rẹ rọ wariẹ dẹe zihe ze* nọ ọ rrọ omoni riẹ nọ ọ kẹle riẹ ọ rẹ dẹ oware nọ oniọvo riẹ ọ zẹ na zihe ze hrọ.+ 26 Otẹrọnọ ohwo jọ o wo ohwo nọ ọ rẹ wariẹ dẹ oware zihe ze kẹe he rekọ eware i te ti woma kẹe, o je wo obọ te epanọ ọ rẹ rọ wariẹ dẹe zihe ze no, 27 o re roro unuigho otọ na evaọ etoke ikpe nọ otọ na o rọ jọ ohwo nọ ọ dẹ riẹ obọ na, o ve si ugho yena no ugho otọ na kpobi, o ve zihe ugho nọ u kiọkọ kẹ ohwo na. Kẹsena otọ na o vẹ wariẹ zihe ruọ oriẹ.+

28 “‘Rekọ otẹrọnọ obọ riẹ u gbe te epanọ ọ rẹ rọ wariẹ dẹe zihe mi ohwo nọ ọ zẹ riẹ kẹ na ha, oware nọ ọ zẹ na o rẹ jọ obọ ohwo nọ ọ dẹ riẹ ri bọo Ukpe Obusino na,+ kẹsena o vẹ wariẹ zihe ruọ oriẹ evaọ Ukpe Obusino na, o ve zihe kpohọ otọ riẹ.+

29 “‘Whaọ otẹrọnọ ohwo ọ zẹ uwou evaọ okpẹwho nọ a bọ ugbẹhẹ wariẹ họ, o re wo udu nọ a rẹ rọ wariẹ dẹ oware zihe ze bẹsenọ ukpe na u re re, rono umuo okenọ ọ rọ zẹe no obọ na; o wo udu nọ ọ rẹ rọ wariẹ dẹe zihe ze+ ukpe soso. 30 Rekọ ọ gbẹ sae dẹe zihe ze bẹsenọ ukpe soso u ro re he, uwou nọ o rrọ evaọ okpẹwho nọ a bọ ugbẹhẹ wariẹ họ na u ve zihe ruọ oware ohwo nọ ọ dẹ riẹ na bẹdẹ bẹdẹ, no ige te ige. A re siobọnoi hi evaọ Ukpe Obusino na. 31 Rekọ, a rẹ rehọ iwou nọ e rrọ iwhre nọ a bọ ugbẹhẹ wariẹ hẹ wọhọ abọjọ etọ nọ e rrọ ughe ẹwho. Ohwo o re wo udu nọ a rẹ rọ wariẹ dẹ ae zihe ze, yọ a re siobọno ai evaọ Ukpe Obusino na.

32 “‘Rọkẹ iwou ahwo Livae nọ e rrọ ikpewho rai,+ ahwo Livae na a wo udu nọ a rẹ rọ wariẹ dẹ ae zihe ze oke kpobi. 33 Otẹrọnọ a gbẹ dẹ oware nọ o rrọ orọ ahwo Livae zihe ze he, uwou nọ a zẹ evaọ okpẹwho nọ o rrọ orọ ahwo Livae na a re je siobọnoi evaọ Ukpe Obusino na,+ keme iwou ikpewho ahwo Livae na yọ eware rai evaọ udevie ahwo Izrẹl.+ 34 U te no ere no, a rẹ zẹ etọ nọ erao e rẹ jọ re ẹbe+ nọ e wariẹ ikpewho rai họ họ, keme yọ otọ rai bẹdẹ bẹdẹ.

35 “‘Otẹrọnọ oniọvo ra nọ ọ be rria kẹle owhẹ o zihe ruọ oyogbe yọ ọ be sae rẹrote omariẹ hẹ, whọ rẹ rẹrotei hrọ+ wọhọ epanọ who re ru kẹ ọrara nọ ọ be rria udevie rai gbe ọnọ ọ rrọ ukane,+ re ọ ruẹse gbẹ jọ uzuazọ kugbe owhẹ. 36 Who mi ei isuo ho, hayo jọ obọ riẹ wo erere he.*+ Whọ rẹ dhozọ Ọghẹnẹ ra hrọ,+ oniọvo ra ọ vẹ ruẹse gbẹ jọ uzuazọ kugbe owhẹ. 37 Who re su ugho nọ who bi momo kẹe vievie he+ hayo wo erere evaọ emu nọ whọ be kẹe he. 38 Mẹ họ Jihova Ọghẹnẹ rai, ọnọ ọ rehọ owhai no ẹkwotọ Ijipti ze+ re mẹ kẹ owhai ẹkwotọ Kenan, re me dhesẹ kẹ owhai nọ mẹ họ Ọghẹnẹ rai.+

39 “‘Otẹrọnọ oniọvo ra nọ ọ be rria kẹle owhẹ o zihe ruọ oyogbe nọ onana o jẹ gbae họ nọ ọ rọ zẹ omariẹ kẹ owhẹ,+ whọ rẹ gbae họ ru iruo ọrigbo vievie he.+ 40 A re ru ei wọhọ ohwo nọ a rehọ iruo,+ wọhọ ọnọ ọ rrọ ukane. Ọ rẹ gbodibo kẹ owhẹ ri bọo Ukpe Obusino na. 41 Kẹsena ọ vẹ nyasiọ owhẹ ba, tei te emọ* riẹ, o ve zihe bru ahwo uwou riẹ. O re zihe kpohọ otọ esẹ-esẹ riẹ.+ 42 Keme erigbo mẹ a rrọ, enọ mẹ rehọ no ẹkwotọ Ijipti ze.+ A rẹ zẹ omarai oghẹrẹ nọ a rẹ zẹ ọrigbo na ha. 43 Whọ rẹ rọ evega lele iei yeri hi,+ whọ rẹ dhozọ Ọghẹnẹ ra.+ 44 Enọ e rẹ jọ erigbo ezae gbe erigbo eyae ra e rẹ jọ enọ i no erẹwho nọ e wariẹ owhai họ ze, udevie rai wha rẹ jọ dẹ ọrigbo ọzae hayo ọrigbo aye. 45 Yọ wha rẹ sae jọ usu emọ ahwo orẹwho ọfa nọ e rrọ ukane nọ e be rria udevie rai+ gbe ahwo iviuwou rai nọ a yẹ kẹ ae evaọ ẹkwotọ rai dẹ erigbo, i ve zihe ruọ erai. 46 E rẹ sai zihe ruọ ukuoriọ emezae rai nọ u te no owhai no, e vẹ jọ erai bẹdẹ bẹdẹ. Wha rẹ sae rehọ ai ru iruo wọhọ iruiruo, rekọ wha rẹ rọ evega gboja kẹ inievo rai ahwo Izrẹl he.+

47 “‘Rekọ otẹrọnọ ọrara nọ ọ be rria udevie rai hayo ọnọ ọ rrọ ukane o fe no, oniọvo rai o te ti yogbe evaọ abotọ riẹ, o jẹ gbae họ nọ ọ rẹ zẹ omariẹ kẹ ọrara na hayo ọnọ ọ rrọ ukane nọ ọ be rria udevie rai na, hayo rọkẹ ohwo uwou ọrara na jọ, 48 o re gbe wo udu nọ a rẹ rọ wariẹ dẹe zihe ze nọ ọ tẹ zẹ omariẹ no. Oniọvo riẹ jọ ọ rẹ sae dẹe zihe ze,+ 49 hayo oniọvo-ọmọzae ọsẹ riẹ hayo ọmọzae nọ ọ rrọ ọmọ oniọvo-ọmọzae ọsẹ riẹ ọ rẹ sae dẹe zihe ze, hayo omoni ọkpekpe riẹ* kpobi, ọnọ ọ rrọ ohwo uwou riẹ, ọ rẹ sae dẹe zihe ze.

“‘Hayo otẹrọnọ ọyomariẹ o fe no, ọ rẹ sae jẹ dẹ omariẹ zihe ze.+ 50 O re lele ọnọ ọ dẹ riẹ kele oke na no ukpe nọ ọ rọ zẹ omariẹ rite Ukpe Obusino na,+ yọ unu ikpe na a re ro roro unuigho nọ ọ rọ zẹ omariẹ na.+ A rẹ rehọ unuigho nọ a rẹ hwa ohwo nọ a rehọ iruo ro kele unuigho edẹ iruo riẹ evaọ etoke yena.+ 51 Otẹrọnọ ikpe buobu i kiọkọ, o re kele ikpe nọ i kiọkọ rọ hwa unuigho nọ ọ rẹ rọ dẹ omariẹ zihe ze. 52 Rekọ otẹrọnọ ikpe jọ kakao ọvo i kiọkọ taure Ukpe Obusino na u te ti te, o re kele iei kẹ omariẹ o ve kele unu ikpe nọ i kiọkọ na rọ hwa unuigho nọ ọ rẹ rọ dẹ omariẹ zihe ze. 53 Ọ rẹ hae gbodibo kẹe no ukpe te ukpe wọhọ ọnọ a rehọ iruo; yọ wha re muẹrohọ nọ ọ be rọ evega gboja kẹe he.+ 54 Rekọ otẹrọnọ ọ rẹ sae dẹ omariẹ zihe ze evaọ idhere nana ha, o ve no obọ riẹ evaọ Ukpe Obusino na,+ tei te emọ* riẹ.

55 “‘Keme ahwo Izrẹl yọ erigbo mẹ. Erigbo mẹ nọ mẹ rehọ no ẹkwotọ Ijipti ze a rrọ.+ Mẹ họ Jihova, Ọghẹnẹ rai.

26 “‘Wha re ru eghẹnẹ nọ i fioka ha kẹ omarai vievie he,+ yọ wha rẹ rọ ẹmema ọvuọvo nọ a kare+ hayo ipila ọrẹri* vi kẹ omarai vievie he, yọ wha rẹ rọ ẹmema utho+ ro vi evaọ ẹkwotọ rai nọ wha re guzou kpotọ kẹ vievie he;+ keme mẹ họ Jihova, Ọghẹnẹ rai. 2 Wha re koko edijala mẹ jẹ rọ ọghọ* kẹ oria aruẹri mẹ. Mẹ họ Jihova.

3 “‘Otẹrọnọ wha ruabọhọ be nya evaọ izi mẹ je bi koko ijaje mẹ je bi ru lele ai,+ 4 me ti ru iso rrọ kẹ owhai evaọ ẹruoke rai,+ yọ otọ na u ti wou eware,+ yọ ire obọ ẹwọ na e te mọ ibi rai. 5 Ezi nọ wha re ro si ibi no igbe ekakọ rai ọ te jọ rite ezi nọ wha rẹ rọ kọrọ ibi-ire rai, yọ ezi nọ wha te rọ kọrọ ibi-ire rai ọ te jọ rite ezi nọ wha rẹ rọ kọ ibi, yọ wha te re ebrẹdi rai bẹ jẹ rria ẹkwotọ rai avọ omofọwẹ.+ 6 Me ti fi udhedhẹ họ ẹkwotọ na,+ yọ wha ti kiẹzẹ ababọ ohwo nọ o ti ru ozọ mu owhai;+ me ti si erao ijihẹ no ẹkwotọ na, yọ ọgbọdọ ẹmo ọ te nya ẹkwotọ rai vrẹ hẹ. 7 Ababọ avro, wha ti le ewegrẹ rai, wha vẹ te rọ ọgbọdọ kpe ai fihọ otọ. 8 Imasoi rai a ti le ahwo udhusoi (100), yọ ahwo udhusoi (100) rai a ti le idu ikpe (10,000), wha vẹ te rọ ọgbọdọ kpe ewegrẹ rai.+

9 “‘Me ti vi eghale mẹ bru* owhai ze, me ve ti ru owhai vihọ je bu,+ yọ me ti koko ọvọ mẹ kugbe owhai.+ 10 Nọ wha gbẹ be re ekakọ anwae erọ ukpe nọ o vrẹ na, o te gwọlọ nọ wha si erọ anwae na no re wha ruẹrẹ oria họ kẹ ekpokpọ na. 11 Mẹ te rọ uwou-udhu mẹ vi udevie rai,+ yọ mẹ* te siọ owhai hi. 12 Mẹ te nya evaọ udevie rai jẹ jọ Ọghẹnẹ rai,+ yọ whai omarai wha te jọ ahwo mẹ.+ 13 Mẹ họ Jihova, Ọghẹnẹ rai, ọnọ ọ rehọ owhai no ẹkwotọ Ijipti ze re wha gbẹ jọ erigbo rai ofa ha, me te bru ekpọ owhowha rai je ru owhai nya kpomavi.

14 “‘Rekọ, otẹrọnọ wha gbẹ gaviezọ kẹ omẹ hẹ hayo koko ijaje nana kpobi hi,+ 15 yọ wha tẹ siọ izi mẹ,+ je mukpahe izi oziẹobro mẹ, nọ wha gbe koko ijaje mẹ kpobi hi, nọ wha jẹ raha ọvọ mẹ,+ 16 mẹ omamẹ, me ti ru owhai eware nana: Mẹ te kẹ owhai uye nọ o te wha idhọvẹ se owhai, avọ owọre ogaga gbe ifiva egaga, nọ u ti ru ibiaro rai dhe no jẹ raha uzuazọ* rai fihotọ. Ibi rai nọ wha te kọ o te jọ uye-oruẹ kufiẹ, keme ewegrẹ rai họ enọ e te re ae.+ 17 Mẹ te rẹriẹ ovao mẹ ku owhai, yọ ewegrẹ rai i ti fi owhai kparobọ;+ enọ i mukpahe owhai a ti thihi owhai nyaotọ,+ yọ wha te dhẹ ababọ ohwo nọ o bi le owhai.+

18 “‘Otẹrọnọ enana i gbe ru owhai gaviezọ kẹ omẹ ghele he, mẹ te kẹ owhai uye gaga te isiahrẹ fiki izieraha rai. 19 Mẹ te raha ogaga omorro rai je ru ihru* rai ga wọhọ ayọno+ gbe otọ rai wọhọ ekọpa. 20 Wha te rehọ ẹgba rai ruiruo kufiẹ, keme otọ rai u ti wou eware he,+ yọ ire nọ e rrọ otọ na e te mọ ibi hi.

21 “‘Rekọ wha tẹ ruabọhọ be wọso omẹ jẹ se nọ wha rẹ gaviezọ kẹ omẹ hẹ, kẹsena mẹ vẹ te tehe owhai gaga te isiahrẹ wọhọ epanọ izieraha rai e rrọ. 22 Me ti vi erao ijihẹ obọ ẹwọ na ruọ udevie rai,+ yọ a ti kpe emọ rai+ je kpe erao nọ wha bi thuru je ru unu ahwo rai kawo, idhere rai e vẹ te jọ fọfọ.+

23 “‘Otẹrọnọ ghele eware nana kpobi wha jẹ ọkpọvio mẹ rehọ họ+ wha tẹ gbẹ be wọso omẹ, 24 kẹsena mẹ omamẹ mẹ vẹ te wọso owhai re, yọ mẹ te tehe owhai isiahrẹ fiki izieraha rai. 25 Mẹ te rọ ọgbọdọ orukele bru owhai ze fikinọ wha raha ọvọ na.+ Otẹrọnọ wha kokohọ ikpewho rai, me ti vi ẹyao ruọ udevie rai,+ yọ a te rehọ owhai họ obọ ọwegrẹ.+ 26 Okenọ mẹ tẹ raha oria* nọ ebrẹdi* rai o bi no ze no,+ eyae ikpe a te sae jọ ovini ọvo beki ebrẹdi rai a vẹ te wawọ ebrẹdi na omomoto ghale kẹ owhai;+ wha te re rekọ eva e te vọ owhai hi.+

27 “‘Otẹrọnọ ghele eware nana kpobi wha gaviezọ kẹ omẹ hẹ yọ wha gbẹ be wọso omẹ, 28 mẹ te wọso owhai vi epaọ ọsosuọ,+ mẹ omamẹ mẹ vẹ te kẹ owhai uye isiahrẹ fiki izieraha rai. 29 Wha vẹ te re uwo emezae rai, yọ wha te re uwo emetẹ rai.+ 30 Mẹ te raha eria ikpehru erẹri rai+ je bru egbada insẹnse rai fihọ otọ, mẹ vẹ te kwa iri rai fihọ ehru iri emedhọ etọtọ* rai,+ mẹ* vẹ te rehọ evedha nyasiọ owhai ba.+ 31 Me ti siobọno ikpewho rai kẹ ọgbọdọ na+ je ru eria aruẹri rai fihọ ifofe, yọ me ti se ore awere* idhe rai hi. 32 Me ti ru otọ na fihọ ofofe,+ yọ ewegrẹ rai nọ e be rria eva riẹ a ti rri rie avọ igbunu.+ 33 Mẹ te vaha owhai fihọ udevie erẹwho na,+ yọ me ti yolo ọgbọdọ lahwe ro le owhai;+ a ve ti ru otọ rai fihọ ofofe,+ a vẹ te raha ikpewho rai no.

34 “‘Evaọ oke yena otọ na o vẹ te hwa edijala riẹ evaọ edẹ kpobi nọ ọ te rọ jọ ofofe na, yọ oke yena wha rrọ obọ orẹwho ewegrẹ rai. Evaọ oke yena otọ na u ve ti serihọ,* keme ọ rẹ hwosa edijala riẹ hrọ.+ 35 O ti serihọ evaọ edẹ kpobi nọ ọ te rọ jọ ofofe na, keme o serihọ họ evaọ edijala rai okenọ wha jẹ rriae.

36 “‘Rọkẹ enọ e zọ,+ me ti ru uweri da udu rai fia evaọ erẹwho ewegrẹ rai; yọ edo obe nọ ofou o bi fou o te lẹliẹ ae dhẹ, a vẹ te dhẹ wọhọ ohwo nọ ọ be dhẹ fiki ọgbọdọ je kie ababọ ohwo nọ o bi le ai.+ 37 A ti kpawọ họ ohwohwo kie wọhọ ahwo nọ a be dhẹ fiki ọgbọdọ, dede nọ ohwo ọvo o bi le ai hi. Wha te sai dikihẹ kẹ ewegrẹ rai hi.+ 38 Wha ti whu evaọ udevie erẹwho na,+ yọ ẹkwotọ ewegrẹ rai ọ te re owhai no. 39 Whai enọ i kiọkọ, a te nyasiọ owhai ba re wha gbo evaọ erẹwho ewegrẹ rai+ fiki iruthọ rai. Ẹhẹ, a ti gbo kufiẹ fiki iruthọ esẹ rai.+ 40 Kẹsena a vẹ te feva iruthọ rai+ gbe iruthọ avọ izieraha esẹ rai jẹ rọwo nọ a ru oware nọ u fo ho nọ a jẹ rọ nya evaọ idhere nọ e wọso omẹ.+ 41 Kẹsena mẹ omamẹ mẹ tẹ wọso ae+ re nọ mẹ rọ rehọ ae ziọ orẹwho ewegrẹ rai.+

“‘Ẹsejọhọ evaọ oke yena udu rai nọ a yawo ho* na u ti brukpe ai,+ a vẹ te hwosa iruthọ rai. 42 Mẹ vẹ te kareghẹhọ ọvọ mẹ kugbe Jekọp,+ gbe ọvọ mẹ kugbe Aiziki,+ yọ mẹ te kareghẹhọ ọvọ mẹ kugbe Abraham,+ yọ mẹ te kareghẹhọ ẹkwotọ na. 43 Evaọ etoke nọ a rọ nyasiọ otọ na ba na, o jẹ hwosa edijala riẹ,+ o jọ ofofe nọ a jariẹ hẹ na, yọ ae omarai a be hwosa oruthọ rai, keme a siọ izi oziẹobro mẹ yọ a* mukpahe ijaje mẹ.+ 44 Rekọ ghele enana kpobi, nọ a rrọ evaọ orẹwho ewegrẹ rai na, mẹ te siọ ae riẹriẹriẹ vievie he+ hayo gbolo ai kufiẹ te epanọ me re ro kpe ai kpobi no ho, onọ o rẹ raha ọvọ mẹ+ kugbe ai, keme mẹ họ Jihova, Ọghẹnẹ rai. 45 Fiki rai, mẹ te kareghẹhọ ọvọ mẹ kugbe esẹ-esẹ rai+ nọ mẹ rehọ no ẹkwotọ Ijipti ze evaọ iraro erẹwho na,+ re mẹ ruẹsi dhesẹ nọ mẹ họ Ọghẹnẹ rai. Mẹ họ Jihova.’”

46 Enana họ ijaje, izi oziẹobro, gbe izi nọ Jihova o fihọ udevie riẹ avọ ahwo Izrẹl evaọ Ugbehru Saena ẹkwoma Mosis.+

27 Jihova ọ tẹ gbẹ jẹ ta kẹ Mosis nọ: 2 “Ta kẹ ahwo Izrẹl nọ, ‘Otẹrọnọ ohwo ọ ya eyaa obọdẹ+ inọ ọ te rehọ unuigho nọ a fihọ nọ ohwo* ọsoso o re te rọ kẹ Jihova okẹ, 3 unuigho nọ a fihọ rọkẹ ọzae nọ ọ rrọ umuo ikpe udhe rite udhosa o rẹ jọ shẹkẹl* isiliva udhuvẹ-gbikpe lele epaọ shẹkẹl oria ọrẹri na.* 4 Rekọ o tẹ rrọ aye, unuigho nọ a fihọ nọ o re te o rẹ jọ shẹkẹl ọgba. 5 Otẹrọnọ ohwo na ọ rrọ umuo ikpe isoi rite udhe, rọkẹ ọzae, unuigho nọ a fihọ nọ o re te o rẹ jọ shẹkẹl isiliva udhe, orọ aye kọ shẹkẹl ikpe. 6 Otẹrọnọ ohwo na ọ rrọ umuo amara ọvo rite ikpe isoi, rọkẹ ọzae, unuigho nọ a fihọ nọ o re te o rẹ jọ shẹkẹl isiliva isoi, orọ aye kọ shẹkẹl isiliva esa.

7 “‘Otẹrọnọ ohwo nọ ọ rrọ ikpe udhosa hayo nọ ọ vrẹ ere no, rọkẹ ọzae, unuigho nọ a fihọ nọ o re te o rẹ jọ shẹkẹl ikpegbisoi, orọ aye kọ shẹkẹl ikpe. 8 Rekọ otẹrọnọ o yogbe te epanọ ọ gbẹ sae rọ hwa unuigho nọ a fihọ nọ o re te na ha,+ ohwo na o ve dikihẹ aro ozerẹ na, ozerẹ na o ve fi unuigho jọ họ iẹe uzou. Unuigho nọ ozerẹ na o re fihọ iẹe o rẹ jọ onọ ohwo nọ ọ be ya eyaa na ọ rẹ sae rọ ze.+

9 “‘Otẹrọnọ eyaa na i kiekpahe arao nọ o fo nọ a re ro dhe idhe kẹ Jihova, oware kpobi nọ ọ rẹ rọ kẹ Jihova u re zihe ruọ oware ọrẹri. 10 O re nwene iei hi hayo rọ uwoma nwene uyoma hayo rọ uyoma nwene uwoma ha. Rekọ otẹrọnọ ọ rẹ rọ arao jọ ro nwene arao ọfa, arao ọsosuọ na avọ ọnọ a ro nwene iei na i re zihe ruọ eware ọrẹri. 11 Ọ tẹ rrọ arao nọ ọ fo ho+ nọ a rẹ sai ro dhe idhe kẹ Jihova ha, ọ rẹ rọ arao na dikihẹ aro ozerẹ na. 12 Ozerẹ na o ve fi unuigho nọ ọ rẹ sai te họ, sọ o woma hayo o yoma. A re nwene unuigho nọ ọ rẹ sai te nọ ozerẹ na o fihọ na ha. 13 Rekọ otẹrọnọ ọ gwọlọ nọ ọ rẹ dẹe zihe ze, ọ rẹ rọ abọvo abasoi riẹ ze kugbe unuigho nọ a fodẹ nọ o re te na hrọ.+

14 “‘Whaọ otẹrọnọ ohwo ọ rehọ uwou riẹ kẹ* re o jọ oware ọrẹri kẹ Jihova, ozerẹ na o re fi unuigho nọ o rẹ sai te họ, sọ o woma hayo o yoma. Unuigho nọ ozerẹ na o fihọ, oye o rẹ jọ unuigho riẹ.+ 15 Rekọ otẹrọnọ ọnọ ọ rehọ uwou na kẹ okẹ na ọ gwọlọ wariẹ dẹe zihe ze, ọ rẹ rọ abọvo abasoi unuigho nọ a fihọ nọ o rẹ sai te na ze kugbe ugho na hrọ, o vẹ jọ oriẹ.

16 “‘Otẹrọnọ ohwo ọ be rehọ abọjọ otọ nọ o wo kẹ Jihova okẹ, a re fi unuigho nọ otọ na u re te fihọ lele epanọ ibi nọ a rẹ kọ fihọ iẹe i re bu te: homa* ọvo orọ ibi ebali o rẹ jọ shẹkẹl isiliva udhuvẹ-gbikpe. 17 Otẹrọnọ ọ rehọ otọ riẹ kẹ okẹ* no Ukpe Obusino vrẹ,+ unuigho nọ a fihọ nọ o rẹ sai te na u re nwene he. 18 Otẹrọnọ ọ rehọ otọ riẹ kẹ okẹ nọ Ukpe Obusino o vrẹ no, ozerẹ na o re roro unuigho na kẹe lele unu ikpe nọ i kiọkọ taure Ukpe Obusino ofa u te ti te, kẹsena a ve si ugho no ugho nọ a fihọ nọ o rẹ sai te na.+ 19 Rekọ otẹrọnọ ọnọ ọ rehọ e riẹ kẹ okẹ na ọ be wariẹ dẹ otọ na zihe ze, ọ rẹ rọ abọvo abasoi ugho nọ a fihọ nọ o rẹ sai te na ze kugbe ugho na hrọ, o vẹ gbẹ jọ oriẹ. 20 Whaọ otẹrọnọ ọ gbẹ dẹ otọ na zihe ze he nọ a jẹ zẹ otọ na kẹ omọfa no, a rẹ gbẹ sae wariẹ dẹe zihe ze he. 21 Nọ a te siobọno otọ na no evaọ Ukpe Obusino, u re zihe ruọ oware ọrẹri kẹ Jihova wọhọ otọ nọ a kẹ riẹ. U ve zihe ruọ oware izerẹ na.+

22 “‘Otẹrọnọ ohwo ọ rehọ otọ nọ ọ dẹ nọ o rrọ usu eware ukuoriọ riẹ hẹ kẹ Jihova,+ 23 ozerẹ na o re roro unuigho nọ udhu na u re te rite Ukpe Obusino kẹe, yọ ọ rẹ hwa unuigho nọ a fihọ nọ udhu na u re te evaọ ẹdẹ yena.+ Onana yọ oware ọrẹri kẹ Jihova. 24 Evaọ Ukpe Obusino na, otọ na o vẹ wariẹ zihe ruọ orọ ohwo nọ ọ dẹ riẹ mi na, ohwo nọ o wo otọ na.+

25 “‘Unuigho nọ a re fihọ kẹ oware kpobi u re lele epaọ shẹkẹl oria ọrẹri na. Shẹkẹl na o rẹ jọ gira* udhe.

26 “‘Rekọ ohwo ọvo ọ rẹ rehọ ọmọ ọsosuọ arao kẹ okẹ hẹ,* keme a yẹ riẹ wọhọ ọmọ ọsosuọ kẹ Jihova no.+ Te ọ rrọ eruẹ hayo ogodẹ, o rrọ orọ Jihova no vẹre.+ 27 Otẹrọnọ ọ rrọ usu erao nọ e fo ho yọ ọ be rehọ unuigho nọ a fihọ nọ o rẹ sai te rọ dẹe zihe ze, ọ rẹ rọ abọvo abasoi unuigho nọ a fihọ nọ o rẹ sai te na ze kugbe ugho na.+ Rekọ otẹrọnọ a dẹ riẹ zihe ze he, a rẹ zẹe evaọ unuigho nọ a fihọ nọ o rẹ sai te na.

28 “‘Rekọ oware kpobi nọ ohwo ọ rọ kẹ Jihova no riẹriẹriẹ* evaọ usu eware riẹ, a rẹ zẹe hayo dẹe zihe ze he, te ọ rrọ ohwo-akpọ hayo arao hayo otọ nọ o wo. Oware kpobi nọ a rọ kẹ no yọ oware nọ o mae rrọ ọrẹri kẹ Jihova.+ 29 U te no ere no, a rẹ dẹ ohwo ọvuọvo nọ a brukpe, nọ a ta nọ a ti kpe no zihe ze he.+ A re kpei no hrọ.+

30 “‘Abọvo abakpe kpobi+ orọ otọ na, makọ orọ ekakọ obọ ẹwọ hayo ibi ire, yọ erọ Jihova. Onana yọ oware ọrẹri kẹ Jihova. 31 Otẹrọnọ ohwo ọ gwọlọ dẹ abọvo abakpe oware riẹ jọ zihe ze, ọ rẹ rọ abọvo abasoi unuigho nọ a fihọ nọ o rẹ sai te na ze kugbe ugho na. 32 Rọkẹ abọvo abakpe kpobi orọ owa erao gbe uthuru erao, enọ e nya otọ ọkpọ othuru-igodẹ na vrẹ kpobi, arao* avọ ikpe na yọ oware ọrẹri kẹ Jihova. 33 O re rri rie ziezi hi sọ o woma hayo o yoma, yọ o re nwene iei hi. Rekọ otẹrọnọ ọ gwọlọ nwene iei, arao ọsosuọ na avọ ọnọ a ro nwene iei na i re zihe ruọ eware ọrẹri.+ A rẹ gbẹ sae wariẹ dẹ ai zihe ze he.’”

34 Enana họ ijaje nọ Jihova ọ kẹ Mosis rọkẹ ahwo Izrẹl evaọ Ugbehru Saena.+