ẸZRA

1 Evaọ ukpe ọsosuọ Sairọs+ ovie Pasia, re ẹme Jihova nọ Jerimaya+ ọ ta o ruẹsi rugba, Jihova o te duobọte udu* Sairọs ovie Pasia re o woro ovuẹ jọ evaọ ẹkwotọ-uvie riẹ soso, onọ a kere fihotọ re,+ inọ:

2 “Enẹ Sairọs ovie Pasia ọ ta, ‘Jihova Ọghẹnẹ obọ idhiwu na ọ kẹ omẹ ekwotọ-ivie kpobi nọ e rrọ otọakpọ na no,+ yọ o vi omẹ nọ mẹ bọ uwou kẹe evaọ Jerusalẹm,+ onọ o rrọ Juda. 3 Ohwo kpobi evaọ udevie rai nọ ọ rrọ omọvo ahwo riẹ, jọ Ọghẹnẹ riẹ ọ jọ kugbei, re ọ nya kpobọ Jerusalẹm, onọ o rrọ Juda, nyae wariẹ bọ uwou Jihova Ọghẹnẹ Izrẹl, ọye họ Ọghẹnẹ uzẹme na, ọnọ uwou riẹ o jọ Jerusalẹm.* 4 Ohwo orẹwho ọfa kpobi nọ ọ be rria udevie rai,+ evaọ oria kpobi nọ ọ rrọ, jọ erivẹ riẹ* a fiobọhọ kẹe re a kẹe isiliva gbe igoru, ekwakwa efa gbe erao, gbe okẹ unevaze rọkẹ uwou Ọghẹnẹ uzẹme na,+ onọ o jọ Jerusalẹm.’”

5 Kẹsena enọ i wuzou inuwou abọ esẹ evaọ orua Juda gbe orọ Bẹnjamin gbe izerẹ na gbe ahwo Livae na, ohwo kpobi nọ Ọghẹnẹ uzẹme na o duobọte udu riẹ, a tẹ ruẹrẹ oma kpahe re a nyae wariẹ bọ uwou Jihova nọ o jọ Jerusalẹm. 6 Ahwo kpobi nọ a wariẹ e rai họ a fiobọhọ kẹ ae ẹkwoma* ekwakwa isiliva gbe erọ igoru nọ a kẹ rai, ekwakwa efa, erao, gbe eware eghaghae, kugbe ekẹ unevaze na kpobi.

7 Sairọs ovie na ọ tẹ jẹ rehọ ekwakwa uwou Jihova lahwe, enọ Nebukadneza ọ rehọ no obọ Jerusalẹm ze nọ o fihọ uwou ọghẹnẹ riẹ.+ 8 Sairọs ovie Pasia ọ ta kẹ Mitredat okrigho na nọ ọ rehọ ae ze, ọnọ o kele i rai fihọ obọ Shẹshbaza*+ osu Juda.

9 Whaọ unu rai ona: idhe igoru ọgba nọ a ru wọhọ ekete, idhe isiliva odu ọvo (1,000) nọ a ru wọhọ ekete, imidhe udhegbizii nọ a sai ro nwene ae, 10 imidhe ikokodo esese erọ igoru ọgba, imidhe ikokodo esese erọ isiliva egba ene gbe ikpe (410), ekwakwa efa odu ọvo (1,000). 11 Ekwakwa igoru gbe erọ isiliva na kpobi i bu te idu isoi gbe egba ene (5,400). Shẹshbaza ọ rehọ eware na kpobi ze okenọ a jẹ rehọ ahwo nọ a mu kpohọ igbo+ na no Babilọn ziọ Jerusalẹm.

2 Enana họ ahwo ubrotọ* na nọ i no udevie ahwo nọ a mu kpohọ igbo ze,+ enọ Nebukadneza ovie Babilọn o mu kpohọ igbo Babilọn+ nọ i zihe ziọ Jerusalẹm gbe Juda uwhremu na, aikpobi a zihe kpohọ ọvuọ okpẹwho riẹ,+ 2 enọ i lele Zerubabẹl,+ Jeshua,+ Nehemaya, Seraya, Riẹlaya, Mọdekae, Bilshan, Mispa, Bigvai, Rihọm, gbe Benah zihe ze.

Unu ezae Izrẹl nọ a kele na i kugbe:+ 3 emezae Perọsh, idu ivẹ gbe udhoree gbe ikpegbivẹ (2,172); 4 emezae Shẹfataya, egba esa gbe udhosa gbe ikpegbivẹ (372); 5 emezae Erah,+ egba ihrẹ gbe udhosa gbe ikpegbisoi (775); 6 emezae Pehat-moab,+ nọ e rrọ emezae Jeshua avọ Joab, idu ivẹ gbe egba eree gbe ikpegbivẹ (2,812); 7 emezae Ilam,+ odu ọvo gbe egba ivẹ gbe udhuvẹ gbe ikpegbene (1,254); 8 emezae Zatu,+ egba izii gbe udhuvẹ-gbisoi (945); 9 emezae Zakae, egba ihrẹ gbe udhosa (760); 10 emezae Benae, egba ezeza gbe udhuvẹ-gbivẹ (642); 11 emezae Bibae, egba ezeza gbe udhegbesa (623); 12 emezae Azgad, odu ọvo gbe egba ivẹ gbe udhegbivẹ (1,222); 13 emezae Adonaekam, egba ezeza gbe udhosa-gbezeza (666); 14 emezae Bigvai, idu ivẹ gbe udhuvẹ gbe ikpegbezeza (2,056); 15 emezae Edin, egba ene gbe udhuvẹ gbe ikpegbene (454); 16 emezae Eta, ọrọ Hẹzikaya, udhone gbe ikpegberee; 17 emezae Bizai, egba esa gbe udhegbesa (323); 18 emezae Jora, udhusoi gbe ikpegbivẹ (112); 19 emezae Heshọm,+ egba ivẹ gbe udhegbesa (223); 20 emezae Gibba, udhone gbe ikpegbisoi; 21 emezae Bẹtlẹhẹm, udhozeza-gbesa (123); 22 ezae Nẹtofa, udhuvẹ gbe ikpegbezeza; 23 ezae Anatọt,+ udhozeza-gberee (128); 24 emezae Azmevẹt, udhuvẹ-gbivẹ; 25 emezae Kiriat-jierim, Kẹfaera, gbe Biẹrọt, egba ihrẹ gbe udhuvẹ-gbesa (743); 26 emezae Rema+ gbe Giba,+ egba ezeza gbe udhegbọvo (621); 27 ezae Mikmas, udhozeza-gbivẹ (122); 28 ezae Bẹtẹl gbe Ai,+ egba ivẹ gbe udhegbesa (223); 29 emezae Nibo,+ udhuvẹ gbe ikpegbivẹ; 30 emezae Mabish, udhuhrẹ gbe ikpegbezeza (156); 31 emezae Ilam ọdekọ, odu ọvo gbe egba ivẹ gbe udhuvẹ gbe ikpegbene (1,254); 32 emezae Herẹm, egba esa gbe udhe (320); 33 emezae Lọd, Hedid, gbe Ono, egba ihrẹ gbe udhegbisoi (725); 34 emezae Jẹriko, egba esa gbe udhuvẹ-gbisoi (345); 35 emezae Sẹneya, idu esa gbe egba ezeza gbe ọgba (3,630).

36 Izerẹ na:+ emezae Jedeya,+ ọrọ uwou Jeshua,+ egba izii gbe udhosa gbe ikpegbesa (973); 37 emezae Ima,+ odu ọvo gbe udhuvẹ gbe ikpegbivẹ (1,052); 38 emezae Pashọ,+ odu ọvo gbe egba ivẹ gbe udhuvẹ-gbihrẹ (1,247); 39 emezae Herẹm,+ odu ọvo gbe ikpegbihrẹ (1,017).

40 Ahwo Livae:+ emezae Jeshua gbe Kadmiẹl,+ erọ emezae Họdavaya, udhosa gbe ikpegbene. 41 Eso-ile na:+ emezae Esaf,+ udhozeza-gberee (128). 42 Emezae irou-unuẹthẹ* na:+ emezae Shalọm, emezae Eta, emezae Talmọn,+ emezae Akọb,+ emezae Hataeta, emezae Shobai, aikpobi udhozeza gbe ikpegbizii (139).

43 Idibo etẹmpol na:*+ emezae Zaeha, emezae Hasufa, emezae Tabeọt, 44 emezae Kirọs, emezae Saya, emezae Pedọn, 45 emezae Lebana, emezae Hagaba, emezae Akọb, 46 emezae Hegab, emezae Salmae, emezae Henan, 47 emezae Gidẹl, emezae Geha, emezae Rieya, 48 emezae Rizin, emezae Nekoda, emezae Gazam, 49 emezae Uza, emezae Pasiya, emezae Bisai, 50 emezae Asna, emezae Mẹyunẹm, emezae Nẹfusim, 51 emezae Bakbọk, emezae Hakufa, emezae Hahọ, 52 emezae Bazlut, emezae Mahaeda, emezae Hasha, 53 emezae Bakọs, emezae Sisera, emezae Timah, 54 emezae Nezaya, emezae Hataefa.

55 Emezae idibo Solomọn: emezae Sotae, emezae Sofirẹt, emezae Pẹruda,+ 56 emezae Jealah, emezae Dakọn, emezae Gidẹl, 57 emezae Shẹfataya, emezae Hẹtil, emezae Pokirẹt-hazebeim, emezae Emae.

58 Idibo etẹmpol na* kpobi gbe emezae idibo Solomọn i bu te egba esa gbe udhone gbe ikpegbivẹ (392).

59 Enana a no Tẹl-mila, Tẹl-hasha, Kirub, Addọn, gbe Ima ze, rekọ a sai dhesẹ unuwou abọ ọsẹ rai gbe oria nọ a no ze he, sọ ahwo Izrẹl a ginẹ rrọ:+ 60 emezae Delaya, emezae Tobaya, emezae Nekoda, egba ezeza gbe udhuvẹ gbe ikpegbivẹ (652). 61 Yọ emezae izerẹ na họ: emezae Habaya, emezae Hakọz,+ emezae Bazilae, ọnọ ọ jọ usu emetẹ Bazilae+ ohwo Giliad na wo aye, ọnọ a rọ odẹ ọsẹ aye riẹ se. 62 Enana a gwọlọ eria nọ a kere ikuigbe uyẹ rai fihọ re a sai dhesẹ uyẹ nọ a no ze, rekọ a ruẹ e rai hi, fikiere a tẹ ta kẹ ae nọ a te enọ e rẹ jọ ọkwa-ozerẹ hẹ.*+ 63 Ọba* na ọ ta kẹ ae nọ a rẹ sae re eware nọ e mae rrọ ọrẹri na ha+ bẹsenọ a rẹ ruẹ ozerẹ nọ ọ rẹ rehọ Yurim avọ Tumim gwọlọ otọ onana via no.+

64 Ogbotu* na soso a bu te idu udhuvẹ-gbivẹ gbe egba esa gbe udhosa (42,360),+ 65 yọ a kele erigbo emezae gbe erọ emetẹ rai kugbe he, enọ i bu te idu ihrẹ gbe egba esa gbe ọgbagbihrẹ (7,337); u te no ere no a wo eso-ile emezae gbe emetẹ nọ i bu te egba ivẹ (200). 66 Enyenya rai i bu te egba ihrẹ gbe ọgbagbezeza (736), isi* rai i bu te egba ivẹ gbe udhuvẹ-gbisoi (245), 67 ekamẹle rai i bu te egba ene gbe ọgbagbisoi (435), eketekete rai i bu te idu ezeza gbe egba ihrẹ gbe udhe (6,720).

68 Okenọ a te uwou Jihova nọ o rrọ Jerusalẹm, ejọ nọ i wuzou unuwou abọ ọsẹ rai a tẹ kẹ ekẹ unevaze+ rọkẹ uwou Ọghẹnẹ uzẹme na, re a wariẹ bọe fihọ oria nọ o jọ vẹre.+ 69 Epanọ a wo te a rọ kẹ okẹ na, igho nọ a fihọ ẹkpa-ugho ebabọ na họ edrakma* igoru idu udhosa-gbọvo (61,000), emaina* isiliva idu isoi (5,000),+ gbe iwu ithethei udhusoi (100) rọkẹ izerẹ na. 70 Kẹsena izerẹ na, ahwo Livae, ahwo na jọ, eso-ile na, irou-unuẹthẹ* na, gbe idibo etẹmpol na* a te mu ikpewho rai họ ẹria, ahwo Izrẹl nọ a kiọkọ kpobi* a te mu ikpewho rai họ ẹria re.+

3 Nọ amara avọ ihrẹ+ o te no nọ ahwo Izrẹl* a mu ikpewho rai họ ẹria no, a te kokohọ Jerusalẹm evaọ okugbe ọvo. 2 Jeshua+ ọmọzae Jehozadak gbe ibe izerẹ riẹ gbe Zerubabẹl+ ọmọzae Shealtiẹl+ gbe inievo riẹ a tẹ kpama a tẹ bọ agbada-idhe Ọghẹnẹ Izrẹl, re a sae jariẹ dhe idhe emahọ, wọhọ epanọ a kere fihọ Uzi Mosis,+ ohwo Ọghẹnẹ uzẹme na.

3 Fikiere a tẹ bọ agbada-idhe na fihọ oria nọ ọ jọ vẹre, dede nọ ozọ ahwo ekwotọ nọ e wariẹ e rai họ u je mu ai,+ a tẹ jariẹ mu idhe emahọ họ edhe kẹ Jihova, te idhe emahọ ohiohiẹ gbe erọ owọwọ.+ 4 A te ru Ehaa Iwou-Owhre* wọhọ epanọ a kere i rie,+ yọ kẹdẹ kẹdẹ a je dhe unu idhe emahọ nọ o gwọlọ nọ a re dhe evaọ ẹdẹ kpobi.+ 5 Kẹsena a te dhe idhe emahọ ikẹse kẹse na+ gbe idhe ehaa ọvẹre ọkpokpọ+ gbe erọ ezi ehaa ọrẹri+ Jihova kpobi, gbe erọ ahwo nọ a rọ eva obọrai+ kẹ Jihova okẹ. 6 No ẹdẹ ọsosuọ amara avọ ihrẹ+ na vrẹ, a te mu idhe emahọ họ edhe kẹ Jihova, dede nọ a ri fi otọhotọ etẹmpol Jihova họ họ.

7 A rehọ ugho kẹ enọ i re bru itho+ gbe ewena,+ jẹ rọ emu gbe udi gbe ewhri kẹ ahwo Saedọn gbe ahwo Taya re a fa ite-ire sida nya abade no obọ Lebanọn ziọ Jọpa,+ wọhọ epanọ Sairọs ovie Pasia ọ kẹ rai udu nọ a ru.+

8 Evaọ ukpe avọ ivẹ nọ a nyaze uwou Ọghẹnẹ uzẹme na evaọ Jerusalẹm no, evaọ amara avọ ivẹ, Zerubabẹl ọmọzae Shealtiẹl, Jeshua ọmọzae Jehozadak gbe inievo rai nọ i kiọkọ, izerẹ na gbe ahwo Livae, gbe ahwo kpobi nọ a no igbo na ziọ Jerusalẹm+ a te mu iruo na họ; a rọ ahwo Livae nọ e rrọ umuo ikpe udhe kpohọ ehru mu re a jọ enọ e rẹ rẹrote iruo uwou Jihova na. 9 Fikiere Jeshua, gbe emezae riẹ gbe inievo-emezae riẹ, gbe Kadmiẹl gbe emezae riẹ, emezae Juda, a te kuomagbe re a rẹrote enọ i bi ru iruo uwou Ọghẹnẹ uzẹme na, kugbe emezae Hẹnadad,+ te emezae rai gbe inievo-emezae rai, ahwo Livae.

10 Nọ ebebabọ na a fi otọhotọ etẹmpol Jihova họ,+ izerẹ na avọ iwu izerẹ rai nọ a ku họ, avọ egba,+ te ahwo Livae, emezae Esaf, avọ igogo, a te dikihẹ re a jiri Jihova lele ọruẹrẹfihotọ nọ Devidi ovie Izrẹl o fihọ.+ 11 A te mu ile họ ẹso be za kẹ ohwohwo+ ro jiri je yere Jihova, “keme ọ rrọ wowoma; uyoyou nọ o rẹ hiẹ hẹ nọ o wo kẹ Izrẹl o rẹ jọ bẹdẹ bẹdẹ.”+ Kẹsena ahwo na kpobi a tẹ koyẹ avọ edo ọgaga orọ ujiro kẹ Jihova keme a fi otọhotọ uwou Jihova họ no. 12 Ibuobu izerẹ na, ahwo Livae, gbe enọ i wuzou inuwou abọ ọsẹ rai, koyehọ ekpako nọ e ruẹ uwou ọsosuọ na+ a te kuenu oviẹ nọ a ruẹ otọhotọ uwou nana nọ a fihọ na, yọ amọfa buobu a be rọ ẹgba rai kpobi koyẹ avọ edo oghọghọ.+ 13 Fikiere ahwo na a gbe je vuhu edo oghọghọ gbe edo oviẹ hẹ, keme ahwo na a je do edo gaga te epanọ a jẹ rọ jọ ugbo gaga yo edo na.

4 Nọ ewegrẹ Juda gbe Bẹnjamin+ a yo nọ ahwo nọ a no igbo ze na+ a be bọ etẹmpol kẹ Jihova Ọghẹnẹ Izrẹl, 2 a tẹ nwane nyabru Zerubabẹl avọ enọ i wuzou inuwou abọ ọsẹ rai ababọ oke oraha, a tẹ ta kẹ ae nọ: “Joma lele owhai bọ; keme wọhọ owhai, ma be gọ* Ọghẹnẹ rai+ je bi dhe idhe kẹe anwọ edẹ Isa-hadọn+ ovie Asiria nọ ọ rehọ omai ziọ etenẹ.”+ 3 Rekọ Zerubabẹl gbe Jeshua avọ otu nọ o kiọkọ evaọ usu enọ i wuzou inuwou abọ ọsẹ rai evaọ Izrẹl a tẹ ta kẹ ae nọ: “Wha re lele omai bọ uwou kẹ Ọghẹnẹ mai hi,+ mai ọvo ma te bọ uwou kẹ Jihova Ọghẹnẹ Izrẹl, nwane wọhọ epanọ Sairọs ovie Pasia o jie uzi kẹ omai.”+

4 Kẹsena ahwo ẹkwotọ na a tẹ ruabọhọ be ta ahwo Juda oma lọhọ* je ru udu lọhọ ae re a siọ ebabọ na ba.+ 5 A haya ekiroro* re a raha omaa rai+ evaọ etoke esuo Sairọs ovie Pasia kpobi rite oke esuo Dariọs ovie+ Pasia. 6 Evaọ emuhọ esuo Ahasuirọs, a te kere eme iyoma kpahe ahwo nọ a be rria Juda gbe Jerusalẹm. 7 Yọ evaọ edẹ Atazazis ovie Pasia, Bishlam, Mitredat, Tabiẹl, gbe otu riẹ nọ o kiọkọ a kere ileta se Atazazis ovie na; a fa ileta na fihọ ẹvẹrẹ Aramaik,+ rọ ibieme Aramaik kere iei.*

8 * Rihọm ohwo egọmeti nọ o wuzou na gbe Shimshae okere-obe na, a kere ileta iyoma kpahe Jerusalẹm se Atazazis ovie na, inọ: 9 (Ahwo nọ a kere onana họ Rihọm ohwo egọmeti nọ o wuzou na, Shimshae okere-obe na gbe otu rai nọ o kiọkọ, ibruoziẹ na gbe eba esese na, ikere-obe na, ahwo Irẹk,+ ahwo Babilọn, ahwo nọ a be rria Susa,+ koyehọ ahwo Ilam,+ 10 gbe erẹwho nọ i kiọkọ nọ Asenapa ologbo nọ o wo ọghọ na o mu kpohọ igbo je fihọ ikpewho Sameria re a rria etẹe,+ gbe enọ i kiọkọ ubrotọ Abọdekọ Ethẹ* na, yọ 11 ileta nọ a vi sei na ona.)

“Ro se Atazazis ovie na, enọ i kere onana họ idibo ra, ahwo ofẹ Abọdekọ Ethẹ na: Yọ obọnana 12 jọ ovie na ọ riẹ nọ ahwo Ju nọ a no obora bru omai ziọ obonẹ na a te Jerusalẹm no. A be wariẹ bọ okpẹwho ọkparesuọ omuomu na, yọ a bọ igbẹhẹ riẹ joma re no+ jẹ be ruẹrẹ otọhotọ riẹ. 13 Obọnana jọ ovie na ọ riẹ nọ otẹrọnọ a wariẹ bọ okpẹwho nana gbe igbẹhẹ riẹ re, a te gbẹ hwa osa-uzou, azọhọ,+ hayo osa-edhere he, yọ onana o te whae ze nọ ugho o gbẹ te ruọ ẹkpa-ugho ivie na ha. 14 Nọ orọnọ ighẹ ovie osa mai u bi no ze na,* u woma ha re ma kpe aro fihọ rri oware nọ u ti kiekpe ovie na, oyejabọ nọ ma bi ro vi ovuẹ nana ze re ma jọ ovie na riẹ kpahe onana, 15 re a kiẹ ebe iku anwae oke esẹ-esẹ ra nọ a kere fihotọ riwi.+ Whọ te jọ ebe nọ a kere iku anwae fihọ na ruẹ nọ okpẹwho nana yọ okpẹwho ọkparesuọ, onọ o rẹ wha ebẹbẹ se ivie gbe ahwo ibrotọ* sa-sa, yọ ahwo nọ a rẹ kpareso isuẹsu a rrọ eva riẹ no oke anwae ze. Oyejabọ nọ a rọ raha okpẹwho nana.+ 16 Ma be jọ ovie na riẹ nọ otẹrọnọ a wariẹ bọ okpẹwho nana gbe igbẹhẹ riẹ re, whọ te sai su* ofẹ Abọdekọ Ethẹ na ha.”+

17 Ovie na o te vi uwou se Rihọm ohwo egọmeti nọ o wuzou na gbe Shimshae okere-obe na gbe otu rai nọ o kiọkọ nọ e be rria Sameria gbe ofẹ Abọdekọ Ethẹ na, inọ:

“Me yere owhai! Obọnana mẹ be jọ owhai riẹ nọ 18 obe nọ wha kere se omai na, a se rie vevẹ kẹ omẹ no.* 19 Mẹ kẹ udu, a tẹ kiẹ otọ ẹme na riwi, a tẹ ruẹ nọ anwọ oke krẹkri nọ u kpemu ze ahwo okpẹwho na a bi ro ru ozighi wọso ivie, yọ ọkparesuọ gbe ọwọsuọ e jariẹ eva.+ 20 Ivie egaga i su Jerusalẹm gbe ofẹ Abọdekọ Ethẹ na soso no, yọ a jẹ hwa osa-uzou, azọhọ, gbe osa-edhere kẹ ae. 21 Fikiere, obọnana jie uzi kẹ ezae nana re a siọ iruo na ba, re a gbẹ wariẹ bọ okpẹwho na ha bẹsenọ mẹ rẹ kẹ udu nọ a ru ere. 22 Daoma ruẹ nọ who re gbolaro kẹ onana vievie he, re a siọ oware nọ u re kiekpe ovie na ba eru haro.”+

23 Whaọ nọ a se obe nọ Atazazis ovie na o kere ze kẹ Rihọm gbe Shimshae okere-obe na avọ otu rai no, a tẹ nwani kpobọ Jerusalẹm bru ahwo Ju na ovovẹrẹ jẹ rọ ogaga dobọ iruo na ji. 24 Oke yena iruo uwou Ọghẹnẹ nọ o jọ Jerusalẹm i ro serihọ; yọ e daji bọo ukpe avọ ivẹ ọrọ esuo Dariọs ovie Pasia.+

5 Kẹsena eruẹaro na Hagai+ avọ Zẹkaraya+ ọmọ-uruọmọ Idọ+ a tẹ ruẹaro kẹ ahwo Ju nọ a jọ Juda gbe Jerusalẹm, evaọ odẹ Ọghẹnẹ Izrẹl nọ ọ jọ kugbe ai. 2 Ẹsiẹe Zerubabẹl+ ọmọzae Shealtiẹl gbe Jeshua+ ọmọzae Jehozadak a rọ wariẹ mu uwou Ọghẹnẹ nọ o jọ Jerusalẹm họ ẹbọ;+ yọ eruẹaro Ọghẹnẹ e jọ kugbe ai jẹ thọ ae uke.+ 3 Evaọ oke yena Tatenai ọba ofẹ Abọdekọ Ethẹ* na gbe Shita-bozenae avọ otu rai a tẹ nyabru ai ze a tẹ nọ ae nọ: “Ono ọ kẹ owhai udu inọ wha bọ uwou nana jẹ bọ ebabọ nana re?”* 4 A tẹ jẹ nọ ae nọ: “Didi odẹ ezae nọ i bi ru iruo ebabọ na?” 5 Rekọ Ọghẹnẹ ọ jẹ sẹro* ekpako ahwo Ju na,+ a whaha e rai iruo na ha bẹsenọ a ro vi ovuẹ se Dariọs je wo ovuẹ no obọ riẹ ze kpahe onana.

6 Onana họ eme ileta nọ Tatenai ọba ofẹ Abọdekọ Ethẹ na gbe Shita-bozenae avọ otu riẹ, eba esese erọ ofẹ Abọdekọ Ethẹ na a vi se Dariọs ovie na; 7 a niyẹrẹ na kẹe, yọ enẹ a kere:

“Ro se Dariọs ovie na:

“Udhedhẹ u te owhẹ! 8 Jọ ovie na ọ riẹ nọ ma kpohọ ubrotọ* Juda obọ uwou Ọghẹnẹ ologbo na, yọ a bi ghelie itho ilogbo fihọ iẹe rọ bọe, jẹ be tọ ite-ire họ igbẹhẹ na. Ahwo na a be rọ ọwhọ ru iruo na yọ iruo na e be nyaharo fiki omodawọ rai. 9 Kẹsena ma tẹ nọ ekpako rai nọ: ‘Ono ọ kẹ owhai udu inọ wha bọ uwou nana jẹ bọ ebabọ nana re?’*+ 10 Ma tẹ jẹ nọ ae edẹ rai re ma jọ owhẹ riẹ, re ma sai kere edẹ ezae nọ e kobaro iruo na se owhẹ.

11 “Uyo nọ a kẹ omai ona: ‘Mai idibo Ọghẹnẹ idhiwu gbe otọakpọ na, yọ ma be wariẹ bọ uwou nọ a bọ ikpe buobu nọ i kpemu, onọ ovie ologbo Izrẹl jọ ọ bọ jẹ bọe re.+ 12 Rekọ, fikinọ esẹ mai a ru Ọghẹnẹ idhiwu na eva dha,+ ọ tẹ rehọ ae kẹ Nebukadneza+ ovie Babilọn, ohwo Kaldia na, ọnọ o kporo uwou nana+ je mu ahwo na kpohọ igbo evaọ obọ Babilọn.+ 13 Dede na, evaọ ukpe ọsosuọ orọ Sairọs ovie Babilọn, Sairọs ovie na ọ tẹ kẹ udu nọ a wariẹ bọ uwou Ọghẹnẹ nana.+ 14 Ofariẹ, ekwakwa igoru gbe isiliva erọ uwou Ọghẹnẹ nọ Nebukadneza ọ rehọ no etẹmpol Jerusalẹm ze kpohọ etẹmpol Babilọn, Sairọs ovie na ọ rehọ e rai no etẹmpol Babilọn ze.+ A tẹ rehọ ae kẹ ọzae nọ a re se Shẹshbaza,*+ nọ Sairọs o ro mu ọba.+ 15 Sairọs ọ ta kẹe nọ: “Rehọ ekwakwa nana. Nya, re who fi ai họ etẹmpol nọ ọ rrọ Jerusalẹm na, re a wariẹ bọ uwou Ọghẹnẹ fihọ oria nọ o jọ vẹre.”+ 16 Kẹsena Shẹshbaza nana ọ tẹ nyaze, o te fi otọhotọ uwou Ọghẹnẹ+ nọ o rrọ Jerusalẹm họ; yọ anwọ oke yena ze a be rọ bọe rite enẹna, rekọ a re bọe re no ho.’+

17 “Enẹna otẹrọnọ u kiehọ evaọ aro ovie na, jọ a kiẹ oria ovie na nọ a re fi ekwakwa-aghae họ evaọ obọ Babilọn, re a riẹ sọ Sairọs ovie na ọ kẹ udu inọ a wariẹ bọ uwou Ọghẹnẹ nọ o rrọ Jerusalẹm;+ wha ve vi oware nọ ovie na ọ ta kpahe onana se omai.”

6 Evaọ oke yena Dariọs ovie na ọ rọ kẹ udu, a tẹ kiẹ eria* nọ a re fi ekwakwa efe Babilọn họ. 2 A tẹ ruẹ uko-obe jọ evaọ oria adhẹzọ nọ o rrọ Ẹkbatana evaọ ubrotọ* Midia, yọ a kere ovuẹ nana fihọ iẹe:

3 “Evaọ ukpe ọsosuọ orọ Sairọs ovie na, Sairọs ovie na ọ kẹ udu kpahe uwou Ọghẹnẹ evaọ Jerusalẹm inọ:+ ‘Jọ a wariẹ bọ uwou na re o jọ oria nọ a rẹ jọ dhe idhe, jọ a fi otọhotọ riẹ họ; u re kpehru te ikiubiti udhosa,* okẹkẹe riẹ o rẹ jọ ikiubiti udhosa,+ 4 avọ itho ilogbo nọ a ghelie fihọ ehru ohwohwo isiasa gbe uhie ovo ọrọ ite-ire nọ a wọ fihọ ehru riẹ;+ yọ uwou ovie na a rẹ rehọ ugho no ze rọ hwosa araha na.+ 5 U te no ere no, jọ a zihe ekwakwa igoru gbe isiliva erọ uwou Ọghẹnẹ nọ Nebukadneza ọ rehọ no etẹmpol nọ ọ jọ Jerusalẹm ziọ Babilọn na,+ re a fi ai họ oria rai evaọ etẹmpol nọ o rrọ Jerusalẹm na, evaọ uwou Ọghẹnẹ na.’+

6 “Fikiere, enẹna whẹ Tatenai ọba ofẹ Abọdekọ Ethẹ na,* Shita-bozenae, gbe otu rai, eba esese ofẹ Abọdekọ Ethẹ na,+ wha kẹnoma no etẹe. 7 Wha du wha ozighi họ iruo uwou Ọghẹnẹ na ha. Ọba ahwo Ju na gbe ekpako ahwo Ju na a rẹ wariẹ bọ uwou Ọghẹnẹ na fihọ oria nọ o jọ vẹre. 8 U te no ere no, me bi jie uzi kẹ owhai kpahe oware nọ wha re ru kẹ ekpako ahwo Ju nana evaọ ọwariẹbọ uwou Ọghẹnẹ na: Wha jọ ẹkpa-ugho ovie na,+ evaọ osa-uzou nọ wha bi mi evaọ ofẹ Abọdekọ Ethẹ na rehọ ugho kẹ ezae nana ovovẹrẹ re a rọ ruabọhọ iruo na ababọ ebrudhe.+ 9 Yọ oware kpobi nọ o gwọlọ, emọ iruẹ+ gbe igbo+ gbe imigodẹ+ nọ a re ro dhe idhe emahọ kẹ Ọghẹnẹ odhiwu na, iwhiti,+ uwhei,+ enwaene,+ gbe ewhri,+ nwane wọhọ epanọ izerẹ nọ e rrọ obọ Jerusalẹm a ta, wha rẹ rehọ ae kẹ ae hrọ kẹse kẹse, no ẹdẹ te ẹdẹ, 10 re a ruẹse hai dhe idhe nọ e rẹ were Ọghẹnẹ idhiwu na kẹe kẹse kẹse jẹ lẹ kẹ uzuazọ ovie na avọ emezae riẹ.+ 11 Me jie uzi no re inọ otẹrọnọ ohwo jọ ọ la uzi nana vrẹ, a re wolo ure no uwou riẹ ze a vẹ kare iẹe fihọ ure na, a ve zihe uwou riẹ ruọ oria ame-okuo* rọkẹ ahwo kpobi fiki uziothọ nana. 12 Jọ Ọghẹnẹ nọ o fi odẹ riẹ họ etẹe na+ o kpe ovie kpobi gbe ahwo kpobi nọ a la uzi nana vrẹ jẹ raha uwou Ọghẹnẹ nọ o rrọ Jerusalẹm na. Mẹ Dariọs, o jie uzi nana. Jọ a ru ei ovovẹrẹ.”

13 Kẹsena Tatenai ọba ofẹ Abọdekọ Ethẹ na, Shita-bozenae+ gbe otu rai a tẹ nwani ru eware kpobi nọ Dariọs ovie na o jie uzi rai na. 14 Ekpako ahwo Ju na a tẹ ruabọhọ ebabọ na je bi ru ei nyaharo,+ yọ Hagai+ ọruẹaro na avọ Zẹkaraya+ ọmọ-uruọmọ Idọ a be rọ aruọruẹ rai tuduhọ ae awọ; a bọ riẹ re wọhọ epaọ uzi Ọghẹnẹ Izrẹl+ gbe uzi Sairọs+ gbe Dariọs+ gbe Atazazis+ ovie Pasia. 15 A bọ uwou na re evaọ ẹdẹ avọ esa amara Edar,* evaọ ukpe avọ ezeza orọ esuo Dariọs ovie na.

16 Kẹsena ahwo Izrẹl, izerẹ na, ahwo Livae,+ gbe ahwo nọ a kiọkọ nọ a jọ igbo vẹre na a te ru ehaa eromudhe* uwou Ọghẹnẹ na avọ oghọghọ. 17 A rehọ erao nana ze kẹ eromudhe uwou Ọghẹnẹ na, iruẹ udhusoi (100), igbo egba ivẹ (200), imigodẹ egba ene (400), yọ a rehọ ikri ikpegbivẹ ze rọkẹ idhe uzioraha Izrẹl soso rọwokugbe unu erua Izrẹl.+ 18 A tẹ rọ izerẹ na mu itu sa-sa rai je fi ahwo Livae họ eko sa-sa rai rọkẹ iruo Ọghẹnẹ evaọ Jerusalẹm,+ wọhọ epanọ a kere fihọ obe Mosis.+

19 Ahwo nọ a jọ igbo vẹre na a te ru ehaa Ọnyavrẹ na evaọ ẹdẹ avọ ikpegbene amara ọsosuọ na.+ 20 Izerẹ na gbe ahwo Livae na kpobi a ru omarai fo,+ fikiere aikpobi a tẹ jọ fuafo; a kpe arao idhe ọnyavrẹ na rọkẹ ahwo nọ a jọ igbo vẹre na, rọkẹ ibe izerẹ rai, jẹ rọkẹ omarai. 21 Kẹsena ahwo Izrẹl nọ a no igbo kpozi na a tẹ jariẹ re, te ohwo kpobi nọ o kuomagbe ai je siomano egbegbe erẹwho nọ e rrọ otọ na re ọ gọ* Jihova Ọghẹnẹ Izrẹl.+ 22 A te je ru Ehaa Ebrẹdi nọ Ọ Kare Ẹvi na+ edẹ ihrẹ avọ oghọghọ, keme Jihova o ru rai wo oghọghọ je ru ovie Asiria wo emamọ eva kpahe ae,+ nọ o ro fiobọhọ kẹ ae* evaọ iruo ebabọ uwou Ọghẹnẹ uzẹme na, Ọghẹnẹ Izrẹl.

7 Nọ eware nana e vrẹ no, evaọ etoke esuo Atazazis+ ovie Pasia, Ẹzra*+ o te zihe kpozi. Ọ jọ ọmọzae Seraya,+ ọmọzae Azaraya, ọmọzae Hilkaya,+ 2 ọmọzae Shalọm, ọmọzae Zedọk, ọmọzae Ahaetọb, 3 ọmọzae Amaraya, ọmọzae Azaraya,+ ọmọzae Mereyọt, 4 ọmọzae Zerahaya, ọmọzae Uzzai, ọmọzae Bukai, 5 ọmọzae Abishua, ọmọzae Finihas,+ ọmọzae Ẹlieza,+ ọmọzae Erọn+ olori izerẹ na. 6 Ẹzra nana o no obọ Babilọn ze. Ọ jọ okere-obe nọ ọ riẹ* Uzi Mosis na ziezi,+ onọ Jihova Ọghẹnẹ Izrẹl ọ kẹ na. Ovie na ọ kẹ riẹ eware kpobi nọ ọ yare, keme obọ Jihova Ọghẹnẹ riẹ o jọ ehru riẹ.

7 Ahwo Izrẹl jọ, izerẹ na, ahwo Livae,+ eso-ile na,+ irou-unuẹthẹ,*+ gbe idibo etẹmpol na*+ a kpobọ Jerusalẹm evaọ ukpe avọ ihrẹ Atazazis ovie na. 8 Ẹzra ọ ziọ Jerusalẹm evaọ amara avọ isoi, evaọ ukpe avọ ihrẹ ovie na. 9 Evaọ ẹdẹ ọsosuọ amara ọsosuọ ọ rọ ruọ edhere no Babilọn, yọ o te Jerusalẹm evaọ ẹdẹ ọsosuọ amara avọ isoi, keme obọ uwoma Ọghẹnẹ riẹ o jọ kugbei.+ 10 Ẹzra ọ ruẹrẹ udu riẹ kpahe no re ọ kiẹ Uzi Jihova je ru oware nọ o ta,+ jẹ rehọ ijaje gbe iziẹibro nọ e rrọ eva riẹ wuhrẹ evaọ Izrẹl.+

11 Enana họ eme ileta nọ Atazazis ovie na ọ kẹ Ẹzra ozerẹ gbe okere-obe na, ọnọ o wo eriariẹ* izi Jihova gbe ijaje riẹ nọ ọ kẹ Izrẹl:

12 * “Atazazis,+ ovie ivie na, ro se Ẹzra ozerẹ na, okere-obe Uzi Ọghẹnẹ idhiwu na: Jọ uvi udhedhẹ u te owhẹ. Obọnana 13 mẹ kẹ udu no inọ ohwo kpobi evaọ otọ esuo mẹ nọ ọ rrọ ohwo Izrẹl gbe izerẹ rai gbe ahwo Livae nọ u no eva ze inọ o re lele owhẹ kpobọ Jerusalẹm, jọ ọ nya.+ 14 Keme ovie na avọ ekiroro* ihrẹ riẹ a vi owhẹ nọ whọ nyae kiẹ sọ a bi lele Uzi Ọghẹnẹ ra nọ o rrọ owhẹ obọ na evaọ obọ Juda gbe Jerusalẹm, 15 re whọ jẹ rehọ isiliva gbe igoru nọ ovie na avọ ekiroro* riẹ a rọ eva obọrai kẹ Ọghẹnẹ Izrẹl, ọnọ ọ be rria Jerusalẹm, 16 gbe isiliva avọ igoru kpobi nọ a kẹ owhẹ* evaọ ubrotọ* Babilọn soso, gbe okẹ nọ ahwo na avọ izerẹ na a rọ eva obọrai rehọ kẹ uwou Ọghẹnẹ rai nọ o rrọ obọ Jerusalẹm.+ 17 Yọ whọ rẹ rehọ ugho nana dẹ iruẹ,+ igbo,+ imigodẹ,+ gbe eware idhe ibi ekakọ rai+ avọ idhe udi rai+ ababọ oke oraha, whọ vẹ rehọ ae dhe idhe evaọ agbada-idhe uwou Ọghẹnẹ ra evaọ Jerusalẹm.

18 “Yọ oware kpobi nọ u kiehọ evaọ aro ra gbe inievo ra inọ wha re ru, wha sae rehọ isiliva gbe igoru nọ i kiọkọ na ru, wọhọ epanọ o rrọ oreva Ọghẹnẹ ra. 19 Yọ ekwakwa kpobi nọ a kẹ owhẹ rọkẹ iruo uwou Ọghẹnẹ ra na, who re fi ai họ aro Ọghẹnẹ evaọ obọ Jerusalẹm.+ 20 Yọ eware efa nọ e roja evaọ uwou Ọghẹnẹ ra nọ o gwọlọ nọ who re ru, whọ rẹ jọ ẹkpa-ugho ovie na rehọ ugho ro ru ai.+

21 “Mẹ Atazazis ovie na o jie uzi kẹ ikrigho kpobi nọ e rrọ ofẹ Abọdekọ Ethẹ* na no, inọ oware kpobi nọ Ẹzra+ ozerẹ na, okere-obe Uzi Ọghẹnẹ idhiwu na ọ yare mi owhai, wha re ru ei ababọ oke oraha, 22 tube te etalẹnte* isiliva udhusoi (100), owawọ kọr* iwhiti udhusoi (100), owawọ ebate* enwaene udhusoi (100),+ owawọ ebate ewhri udhusoi (100),+ gbe uwhei+ nọ u wo umuo ho. 23 Oware kpobi nọ Ọghẹnẹ idhiwu na ọ ta, wha ru ei avọ ajọwha kẹ uwou Ọghẹnẹ idhiwu na,+ re o gbe mu ofu kẹ ubrotọ esuo ovie na avọ emezae riẹ hẹ.+ 24 Yọ mẹ be jẹ jọ owhai riẹ inọ mẹ kẹ owhai uvẹ hẹ re wha mi izerẹ na avọ ahwo Livae na, ikporo-ile na,+ iriẹthẹ na, idibo etẹmpol na,*+ gbe iruiruo uwou Ọghẹnẹ nana osa-uzou, azọhọ,+ hayo osa-edhere.

25 “Yọ whẹ omara, Ẹzra, rehọ areghẹ nọ Ọghẹnẹ ra ọ kẹ owhẹ* rọ iguẹdhọ gbe ibruoziẹ mu re a bruoziẹ ahwo kpobi nọ a rrọ ofẹ Abọdekọ Ethẹ na, ahwo kpobi nọ a riẹ izi Ọghẹnẹ ra; yọ who re wuhrẹ ohwo kpobi nọ ọ riẹ rai hi.+ 26 Yọ ohwo kpobi nọ o koko Uzi Ọghẹnẹ ra ha gbe uzi ovie na ha a re bruoziẹ kpei ababọ oke oraha, o sae jọ orọ uwhu, ele no ẹwho, eho, hayo uwou-odi.”

27 Jọ ujiro u te Jihova Ọghẹnẹ esẹ-esẹ mai, ọnọ o fi rie họ udu ovie na re ọ whẹ erru họ uwou Jihova evaọ Jerusalẹm!+ 28 Yọ o dhesẹ uyoyou nọ o rẹ hiẹ hẹ kẹ omẹ evaọ aro ovie na+ gbe ekiroro* riẹ+ gbe ikpahwo-esuo ovie na kpobi. Fikiere me te kru udu ga* keme obọ Jihova Ọghẹnẹ mẹ o jọ ehru mẹ, me te koko ezae* nọ e be kobaro evaọ Izrẹl họ re a lele omẹ nya.

8 Whaọ enana họ edẹ enọ i wuzou inuwou abọ ọsẹ rai gbe edẹ uyẹ ahwo nọ a kere fihotọ nọ i lele omẹ no obọ Babilọn ze evaọ etoke esuo Atazazis ovie na:+ 2 ọrọ emezae Finihas,+ Gẹshọm; ọrọ emezae Itama,+ Daniẹl; ọrọ emezae Devidi, Hatọsh; 3 ọrọ emezae Shẹkenaya, ọrọ emezae Perọsh, Zẹkaraya, avọ ezae udhuhrẹ-gbikpe (150) nọ a kere edẹ rai fihotọ kugbei; 4 ọrọ emezae Pehat-moab,+ Ẹlaeho-inai ọmọzae Zerahaya, yọ ezae egba ivẹ (200) e jọ kugbei; 5 ọrọ emezae Zatu,+ Shẹkenaya ọmọzae Jehazaẹl, yọ ezae egba esa (300) e jọ kugbei; 6 ọrọ emezae Edin,+ Ibẹd ọmọzae Jonatan, yọ ezae udhuvẹ-gbikpe e jọ kugbei; 7 ọrọ emezae Ilam,+ Jesheya ọmọzae Atalaya, yọ ezae udhosa-gbikpe e jọ kugbei; 8 ọrọ emezae Shẹfataya,+ Zebadaya ọmọzae Maekẹl, yọ ezae udhone e jọ kugbei; 9 ọrọ emezae Joab, Obedaya ọmọzae Jehayẹl, yọ ezae egba ivẹ gbe ikpegberee (218) e jọ kugbei; 10 ọrọ emezae Benae, Shilomit ọmọzae Josifaya, yọ ezae udhoree (160) e jọ kugbei; 11 ọrọ emezae Bibae,+ Zẹkaraya ọmọzae Bibae, yọ ezae udhegberee e jọ kugbei; 12 ọrọ emezae Azgad,+ Johenan ọmọzae Hakatan, yọ ezae udhusoi-gbikpe (110) e jọ kugbei; 13 ọrọ emezae Adonaekam,+ enọ e jọ erọ urere, edẹ rai ena: Ẹlifelẹt, Jeayẹl, gbe Shimaya, yọ ezae udhosa e jọ kugbe ai; 14 yọ ọrọ emezae Bigvai,+ Yutai avọ Zabọd, yọ ezae udhosa-gbikpe e jọ kugbe ai;

15 Me koko i rai họ akotọ ethẹ nọ ọ ziọ obọ Aheva,+ ma te wohọ etẹe edẹ esa. Rekọ nọ mẹ kiẹ ahwo na gbe izerẹ na riwi, mẹ ruẹ ohwo Livae ọvuọvo evaọ etẹe he. 16 Fikiere me te vi uwou se Ẹli-iza, Eriẹl, Shimaya, Ẹlnetan, Jerib, Ẹlnetan, Netan, Zẹkaraya, gbe Mẹshulam ezae nọ e be kobaro, gbe Joyarib avọ Ẹlnetan nọ e rrọ iwuhrẹ re a nyaze. 17 Kẹsena me te vi ai bru Idọ, ọnọ ọ jọ ohwo nọ o wuzou evaọ oria nọ a re se Kasifaya. Mẹ ta kẹ ae nọ a vuẹ Idọ avọ inievo-emezae riẹ, idibo etẹmpol na* nọ e rrọ Kasifaya, re a rọ egbodibo se omai rọkẹ uwou Ọghẹnẹ mai. 18 Fikinọ obọ uwoma Ọghẹnẹ mai o rrọ kugbe omai, a tẹ rehọ ọzae jọ nọ o wo areghẹ no udevie emezae Mahlae ze,+ ọmọ-uruọmọ Livae ọmọzae Izrẹl, ọnọ a re se Shẹrẹbaya,+ gbe emezae riẹ avọ inievo-emezae riẹ, ezae ikpegberee; 19 gbe Hashabaya, yọ Jesheya nọ ọ rrọ ohwo unuwou Mẹrari ọ jọ kugbei,+ te inievo-emezae riẹ gbe emezae rai, ezae udhe. 20 Yọ ahwo egba ivẹ gbe udhe (220) nọ e rrọ idibo etẹmpol na* e jariẹ, enọ Devidi avọ ikpahwo-esuo na a rọ kẹ ahwo Livae na re a lele ai ru iruo, enọ a kere edẹ rai kpobi fihotọ.

21 Kẹsena me te woro nọ ohwo kpobi ọ siọ emuọriọ ba evaọ ethẹ Aheva, re ma hrẹ omamai kpotọ kẹ Ọghẹnẹ mai, re ma yare obufihọ riẹ re o su omai evaọ erẹ mai na, te omai gbe emọ mai jegbe eware mai kpobi. 22 Oma o jẹ vuọ omẹ re mẹ yare ovie na nọ ọ kẹ omai egbaẹmo gbe edhẹ-enyenya re a thọ omai fiki ewegrẹ evaọ edhere, keme ma ta kẹ ovie na no vẹre nọ: “Obọ uwoma Ọghẹnẹ mai o rrọ kugbe ahwo kpobi nọ a be gwọlọ iẹe,+ rekọ ẹgba riẹ gbe ofu riẹ e rẹ rọsuọ ahwo kpobi nọ a be nyase iẹe ba.”+ 23 Fikiere ma tẹ siọ emuọriọ ba jẹ lẹ Ọghẹnẹ mai kpahe onana, yọ ọ gaviezọ kẹ ayare mai.+

24 Mẹ tẹ salọ ezae ikpegbivẹ evaọ usu enọ i wuzou izerẹ na, ae họ Shẹrẹbaya avọ Hashabaya,+ gbe inievo-emezae ikpe rai. 25 Kẹsena mẹ tẹ wawọ isiliva gbe igoru gbe ekwakwa na kẹ ae, enọ ovie na avọ ekiroro* riẹ gbe ikpahwo-esuo riẹ gbe ahwo Izrẹl kpobi nọ a jọ etẹe a rọ ze kẹ uwou Ọghẹnẹ mai.+ 26 Eware nọ mẹ wawọ fihọ ae obọ họ etalẹnte* isiliva egba ezeza gbe udhuvẹ-gbikpe (650), ekwakwa isiliva udhusoi (100) nọ e ghare te etalẹnte ivẹ, etalẹnte igoru udhusoi (100), 27 imidhe ikokodo esese erọ igoru udhe nọ e ghare te edariki* odu ọvo (1,000), gbe ekwakwa ekọpa owowoma ivẹ, nọ e be ware gbagbagba, nọ i re siuru wọhọ igoru.

28 Kẹsena mẹ tẹ ta kẹ ae nọ: “Whai ahwo ọrẹri rọkẹ Jihova,+ yọ ekwakwa na ọrẹri, yọ isiliva avọ igoru na yọ okẹ unevaze rọkẹ Jihova Ọghẹnẹ esẹ-esẹ rai. 29 Wha sẹro rai ziezi bẹsenọ wha rẹ wawọ ae evaọ iraro enọ i wuzou izerẹ na gbe ahwo Livae na gbe ikpahwo-esuo inuwou abọ esẹ erọ ahwo Izrẹl evaọ Jerusalẹm,+ evaọ ibriwou* uwou Jihova.” 30 Izerẹ na gbe ahwo Livae na a tẹ rehọ isiliva gbe igoru gbe ekwakwa nọ a wawọ kẹ ae na, re a rehọ ae ziọ Jerusalẹm ziọ uwou Ọghẹnẹ mai.

31 Kẹsena ma tẹ wọ no akotọ ethẹ Aheva+ evaọ ẹdẹ avọ ikpegbivẹ amara ọsosuọ+ bi kpohọ Jerusalẹm, yọ obọ Ọghẹnẹ mai o jọ kugbe omai, yọ ọ thọ omai no obọ ewegrẹ je no obọ enọ i re dhere hẹrẹ ahwo evaọ edhere. 32 Fikiere ma te ti te Jerusalẹm+ jẹ rria etẹe edẹ esa. 33 Yọ evaọ ẹdẹ avọ ene, ma tẹ wawọ isiliva avọ igoru na gbe ekwakwa na evaọ uwou Ọghẹnẹ mai+ jẹ rehọ ae kẹ Mẹremọt+ ọmọzae Uraejah ozerẹ na, yọ Ẹlieza ọmọzae Finihas ọ jọ kugbei, yọ ahwo Livae nana Jozebad+ ọmọzae Jeshua avọ Noadaya ọmọzae Binua a jọ kugbe ai.+ 34 A kele eware na kpobi jẹ wawọ ae, je kere unu nọ a wawọ e rai kpobi fihotọ. 35 Enọ i bi no igbo ze, nọ e jọ igbo vẹre na, a tẹ rehọ erao nana ze re a ro dhe idhe emahọ kẹ Ọghẹnẹ Izrẹl, iruẹ ikpegbivẹ+ rọkẹ ahwo Izrẹl kpobi, igbo udhone gbe ikpegbezeza,+ imigodẹ ezae udhosa gbe ikpegbihrẹ, ikri ikpegbivẹ+ rọkẹ idhe uzioraha; enana kpobi yọ idhe emahọ kẹ Jihova.+

36 Kẹsena ma tẹ rehọ ijaje ovie na+ rọkẹ enọ e rrọ setrap* ovie na gbe eba nọ e rrọ ofẹ Abọdekọ Ethẹ* na,+ a te fiobọhọ kẹ ahwo na gbe iruo uwou Ọghẹnẹ uzẹme na.+

9 Nọ a nwani ru eware nana no, ikpahwo-esuo na e tẹ nyabru omẹ ze a tẹ ta nọ: “Ahwo Izrẹl gbe izerẹ na gbe ahwo Livae a re hẹriẹ omarai no ahwo erẹwho na ha gbe iruemu etọtọ rai,+ erọ ahwo Kenan, ahwo Hit, ahwo Pẹriz, ahwo Jebus, ahwo Ammọn, ahwo Moab, ahwo Ijipti,+ gbe ahwo Amọ.+ 2 A rehọ emetẹ rai jọ kẹ omarai gbe emezae rai no.+ Whaọ ae omarai, emọ* ọrẹri+ na a mu usu kugbe ahwo erẹwho na no.+ Ikpahwo-esuo na gbe ethabọ isu na họ enọ e kobaro evaọ uzioraha nana.”

3 Nọ mẹ nwani yo onana, mẹ tẹ bẹre ewu mẹ gbe ukotu mẹ nọ u wo abọ họ jẹ sawo eto uzou gbe etuagba mẹ jọ no, mẹ tẹ keria otọ keme akpọ o gbe omẹ unu. 4 Kẹsena ahwo kpobi nọ a wo ozodhẹ* kẹ eme Ọghẹnẹ Izrẹl a te koko wariẹ omẹ họ fiki aghẹmeeyo ahwo nọ a no igbo ze na, yọ mẹ keria otọ avọ akpọ nọ o gbe omẹ unu bọo oke idhe ibi ekakọ owọwọ.+

5 Evaọ oke idhe ibi ekakọ owọwọ na,+ mẹ tẹ kpama no otọ avọ ewu mẹ gbe ukotu mẹ nọ u wo abọ họ nọ e bẹre no, me te kigwẹ jẹ rriẹ abọ mẹ rri Jihova Ọghẹnẹ mẹ. 6 Mẹ tẹ ta nọ: “O Ọghẹnẹ mẹ, oma o be vuọ omẹ re mẹ kpare ovao mẹ rri owhẹ, O Ọghẹnẹ mẹ, keme iruthọ mai i bu omai uzou thesiwa no yọ abe-ọriọ mai o kpehru te obọ idhiwu no.+ 7 No anwọ oke esẹ-esẹ mai ze rite inẹnẹ abe-ọriọ mai ọ re ruaro;+ yọ fiki iruthọ mai, who siobọno omai, ivie mai, gbe izerẹ mai kẹ ivie erẹwho na, ọgbọdọ,+ igbo,+ ekwakwa mai nọ a rẹ kwa rehọ,+ gbe omovuọ, wọhọ epanọ o rrọ nẹnẹ na.+ 8 Rekọ obọnana, evaọ omoke kpẹkpẹe, Jihova Ọghẹnẹ mai o dhesẹ aruoriwo kẹ omai no nọ o ro ru ikiọkotọ jọ vabọ jẹ kẹ omai oria nọ o foma* evaọ oria ọrẹri riẹ,+ re u ru omai sasa ovao,* O Ọghẹnẹ mai, je ru omai dhidhi aro vi omojọ evaọ igbo mai. 9 Keme dede nọ mai erigbo,+ Ọghẹnẹ mai ọ nyasiọ omai ba igbo ho; rekọ o dhesẹ uyoyou riẹ nọ o rẹ hiẹ hẹ kẹ omai evaọ aro ivie Pasia,+ re o ru omai dhidhi aro vi re ma ruẹse kpare uwou Ọghẹnẹ mai kpehru+ jẹ ruẹrẹ eria riẹ nọ i kporo kuotọ, jẹ kẹ omai ugbẹhẹ itho* evaọ Juda gbe evaọ Jerusalẹm.

10 “Rekọ obọnana, eme ma rẹ sae ta, O Ọghẹnẹ mai, ghelọ eware nana kpobi na? Keme ma nyasiọ ijaje ra ba no, 11 enọ whọ kẹ omai ẹkwoma idibo ra eruẹaro na, inọ: ‘Ẹkwotọ nọ wha be nyae rehọ na yọ ẹkwotọ nọ ọ fo ho fiki egbegbe ahwo nọ a be rria ẹkwotọ na, fiki iruemu etọtọ rai nọ a rọ vọe no oka te oka avọ egbegbe rai.+ 12 Fikiere wha siobọno emetẹ rai kẹ emezae rai hi, hayo rọwo nọ emezae rai a rehọ emetẹ rai hi;+ yọ wha rẹ gwọlọ udhedhẹ rai gbe ewoma rai vievie he,+ re wha ruẹse jọ gaga jẹ re eware iwoma otọ na jẹ rehọ iẹe re emezae rai a woi bẹdẹ bẹdẹ.’ 13 Ghelọ eware kpobi nọ i te omai no fiki eyoma mai gbe abe-ọriọ ologbo mai, O Ọghẹnẹ mai, whọ kẹ omai uye wọhọ epaọ iruthọ mai hi,+ whọ kẹ omai nọ e rrọ etenẹ na uvẹ re ma vabọ+— 14 kọ ma rẹ jẹ wariẹ raha izi ra nọ ma rẹ rọ ruọ orọo kugbe ahwo nọ a bi ru iruemu etọtọ nana?+ Kọ eva e gbẹ te dha owhẹ te epanọ whọ te rọ raha omai no riẹriẹriẹ, nọ whọ te gbẹ rọ nyasiọ ikiọkotọ ọvuọvo ba kẹ omai hi hayo ohwo jọ nọ ọ rẹ zọ? 15 O Jihova Ọghẹnẹ Izrẹl, who kiẹrẹe,+ keme mai ejọ ma kiọkọ jẹ zọ rite inẹnẹ. Ma rrọ aro ra avọ abe-ọriọ mai, keme ohwo ọvo ọ sai dikihẹ aro ra fiki onana ha.”+

10 Nọ Ẹzra ọ be lẹ+ jẹ be feva izieraha avọ oviẹ yọ o kiẹzẹ vovao tuotọ evaọ aro uwou Ọghẹnẹ uzẹme na, ogbotu ezae, eyae, gbe emaha Izrẹl a te koko wariẹe họ, yọ ahwo na a be viẹ gaga. 2 Kẹsena Shẹkenaya ọmọzae Jehayẹl+ ọnọ o no uyẹ Ilam+ ze ọ tẹ ta kẹ Ẹzra nọ: “Ma raha uzi Ọghẹnẹ mai no keme ma rehọ eyae erẹwho efa* evaọ udevie ahwo nọ a be rria otọ na.+ Ghele na, ẹruore ọ gbẹ rrọ kẹ Izrẹl. 3 Obọnana joma re ọvọ kugbe Ọghẹnẹ mai+ inọ ma re siobọno eyae na kpobi gbe emọ nọ a yẹ kẹ omai, wọhọ epanọ Jihova o jie uzi kẹ omai, jẹ wọhọ epanọ ahwo nọ a wo ozodhẹ* kẹ uzi Ọghẹnẹ mai a ta na.+ Joma ru epanọ Uzi na o ta. 4 Kpama, keme whẹ họ ọnọ o wo iruo nana, yọ ma rrọ owhẹ emu. Kru udu ga re who ru oware jọ.”

5 Kẹsena Ẹzra ọ tẹ kpama ọ tẹ ta kẹ enọ i wuzou izerẹ na, ahwo Livae, gbe Izrẹl kpobi inọ a duwu iyei nọ a re ru oware nọ a ta na.+ Fikiere a te duwu iyei. 6 Ẹzra ọ tẹ kpama no aro uwou Ọghẹnẹ uzẹme na ọ tẹ nya kpobọ ubruwou* Jehohenan ọmọzae Elayashib. Dede nọ o kpohọ etẹe, ọ re emu hu yọ ọ da ame he, keme o je weri fiki aghẹmeeyo ahwo nọ a no igbo ze na.+

7 Kẹsena a tẹ jọ Juda gbe Jerusalẹm kpobi woro nọ jọ ahwo kpobi nọ a no igbo kpozi na a kokohọ obọ Jerusalẹm; 8 yọ wọhọ epanọ ikpahwo-esuo na gbe ekpako na a gba, ohwo kpobi nọ ọ nyaze he ri bọo edẹ esa a re mi ei* eware riẹ kpobi, a ve je lei no ukoko ahwo nọ a no igbo ze na.+ 9 Fikiere ezae Juda gbe Bẹnjamin kpobi a te kokohọ Jerusalẹm taure edẹ esa e tẹ te gba, koyehọ evaọ amara avọ izii, evaọ ẹdẹ avọ udhe amara na. Ahwo na kpobi a keria ighẹ uwou Ọghẹnẹ uzẹme na, yọ a bi nuhu fiki ẹme nọ ọ jọ otọ na jegbe fiki okposo nọ ọ jẹ rrọ.

10 Kẹsena Ẹzra ozerẹ na ọ tẹ kpama ọ tẹ ta kẹ ae nọ: “Wha raha uzi nọ wha rọ rehọ eyae erẹwho efa,+ yọ wha rọ ere fiba abe-ọriọ Izrẹl no. 11 Obọnana wha feva kẹ Jihova Ọghẹnẹ esẹ-esẹ rai re wha ru oreva riẹ. Wha hẹriẹ omarai no ahwo otọ na gbe eyae erẹwho efa nana.”+ 12 Ukoko na soso o tẹ rọ urru oruarua yo nọ: “Owha-iruo mai o rrọ re ma ru epanọ whọ ta na ẹrẹrẹe. 13 Rekọ, ahwo na a rrọ buobu, o tẹ jẹ rrọ ezi iso. Ma sai ti dikihẹ otafe he, yọ orọnikọ ẹdẹ ọvo hayo ivẹ ọvo ẹme na ọ te rehọ họ, keme ma nyathọ gaga no evaọ ẹme nana. 14 Fikiere, ivie, jọ ikpahwo-esuo mai a dikihẹ kẹ ukoko na soso;+ re ahwo kpobi evaọ ikpewho mai nọ a rehọ eyae erẹwho efa a nyaze evaọ oke nọ a fihọ, avọ ekpako na gbe ibruoziẹ okpẹwho ọvuọvo, bẹsenọ ma re kie ofu ọgaga Ọghẹnẹ mai no evaọ ẹme nana.”

15 Rekọ, Jonatan ọmọzae Asahẹl gbe Jazaya ọmọzae Tikva a rọwo fihọ onana ha, yọ ahwo Livae nọ a re se Mẹshulam avọ Shabẹtae+ a jọ abọ rai. 16 Rekọ ahwo nọ a jọ igbo vẹre na a ru oware nọ a rọwo fihọ na; Ẹzra ozerẹ na avọ enọ i wuzou inuwou abọ esẹ rai, aikpobi nọ a se edẹ rai, ae ọvo a te kokohọ evaọ ẹdẹ ọsosuọ amara avọ ikpe na re a jiroro kpahe ẹme na; 17 evaọ ẹdẹ ọsosuọ amara ọsosuọ na a ro ku ẹme ezae kpobi nọ e rehọ eyae erẹwho efa na họ. 18 Yọ a ruẹ nọ emezae izerẹ na jọ a rehọ eyae erẹwho efa:+ evaọ usu emezae Jeshua+ ọmọzae Jehozadak gbe inievo-emezae riẹ, Measaya, Ẹli-iza, Jerib, gbe Gẹdelaya. 19 Rekọ a ya eyaa* nọ a re le eyae rai kpo, yọ fikinọ a reabe na, a rẹ rehọ egbo no uthuru rai ze ro dhe idhe fiki abe-ọriọ rai.+

20 Erọ emezae Ima+ nọ e jariẹ họ Hanenae gbe Zebadaya; 21 yọ erọ emezae Herẹm,+ Measaya, Elaejah, Shimaya, Jehayẹl, gbe Uzaya; 22 erọ emezae Pashọ,+ Ẹlio-inae, Measaya, Ishmẹl, Nẹtanẹl, Jozebad, gbe Ẹliesa. 23 Yọ erọ ahwo Livae nọ a jariẹ họ Jozebad, Shimia, Kẹlaya, (ọye ọvona họ Kẹlaeta), Pẹtahaya, Juda, gbe Ẹli-iza; 24 gbe evaọ usu eso-ile na Elayashib; gbe evaọ usu irou-unuẹthẹ* na Shalọm, Tilẹm, gbe Yurae.

25 Erọ ahwo Izrẹl, erọ emezae Perọsh+ họ Remaya, Izaya, Malkaejah, Mijamin, Ẹlieza, Malkaejah, gbe Benaya; 26 yọ erọ emezae Ilam,+ Matanaya, Zẹkaraya, Jehayẹl,+ Abdae, Jeremọt, gbe Elaejah; 27 gbe erọ emezae Zatu,+ Ẹlio-inae, Elayashib, Matanaya, Jeremọt, Zebad, gbe Azaeza; 28 erọ emezae Bibae,+ Jehohenan, Hananaya, Zabae, gbe Athlae; 29 yọ erọ emezae Benae, Mẹshulam, Malọk, Adaya, Jeshọb, Shiẹl, gbe Jeremọt; 30 erọ emezae Pehat-moab,+ Adna, Kilal, Benaya, Measaya, Matanaya, Bẹzalẹl, Binua, gbe Manasẹ; 31 yọ erọ emezae Herẹm,+ Ẹli-iza, Ishaejah, Malkaejah,+ Shimaya, Shimiọn, 32 Bẹnjamin, Malọk, gbe Shẹmaraya; 33 erọ emezae Heshọm,+ Matinae, Matatah, Zebad, Ẹlifelẹt, Jeremai, Manasẹ, gbe Shimia; 34 erọ emezae Benae, Meadeya, Amram, Uẹl, 35 Benaya, Bẹdaya, Kẹluhae, 36 Vanaya, Mẹremọt, Elayashib, 37 Matanaya, Matinae, gbe Jeasu; 38 erọ emezae Binua, Shimia, 39 Shẹlẹmaya, Netan, Adaya, 40 Maknadebae, Sheshae, Sherae, 41 Azarẹl, Shẹlẹmaya, Shẹmaraya, 42 Shalọm, Amaraya, gbe Josẹf; 43 gbe erọ emezae Nibo, Jeayẹl, Matataya, Zebad, Zebaena, Jadae, Joẹl, gbe Benaya. 44 Enana kpobi a rehọ eyae erẹwho efa,+ yọ a le eyae rai na kpo, te emọ rai.+