ẸSTA

1 Whaọ evaọ oke Ahasuirọs,* koyehọ Ahasuirọs nọ o je su ibrotọ* udhozeza-gbihrẹ (127) na,+ no India rite Ẹtiopia,* 2 evaọ oke yena nọ Ahasuirọs ovie na ọ keria agbara-uvie riẹ evaọ Shushan*+ oria adhẹzọ* na, 3 evaọ ukpe avọ esa esuo riẹ o ru ehaa emuọriọ kẹ ikpahwo-esuo riẹ kpobi gbe idibo riẹ. Egbaẹmo Pasia+ gbe Midia,+ ikpahwo na gbe isu ibrotọ* na e jọ kugbei, 4 o te dhesẹ efe uvie ulogbo riẹ gbe urirẹ avọ oruaro ulogbo riẹ kẹ ae edẹ buobu, edẹ udhuzii (180). 5 Nọ edẹ nana e gba no, ovie na o te ru ehaa emuọriọ edẹ ihrẹ rọkẹ ahwo kpobi nọ a jọ Shushan,* oria adhẹzọ* na, no ọnọ ọ mae rro rite ọnọ ọ mae kawo, evaọ ọgbọ nọ ọ rrọ ighẹ ovie na. 6 Ehọ-elọlọhọ, ehọ efuafo iwowoma, gbe ehọ iburu nọ a rọ ifi ehọ iwowoma thuru e jariẹ, gbe iwhulu ogorurẹ nọ a jẹhọ emero isiliva, gbe ipila marbo, egbara ithethei igoru gbe isiliva evaọ otọ nọ a rọ itho pọfari, marbo, uzuu, gbe marbo ibiebi ro ru.

7 A jẹ rọ igho igoru jẹ udi;* igho na kpobi i wo ohẹriẹ no ohwohwo, yọ udi ovie na o dafia, wọhọ epanọ ovie na o wo bu te. 8 Evaọ udi nọ a jẹ da na, uzi o gba* ohwo ọvuọvo ho, keme ovie na ọ ta kẹ iletu uwou-ovie na nọ ohwo kpobi ọ sai ru epanọ o were riẹ.

9 Vashti aye ovie na+ o ru ehaa emuọriọ kẹ eyae na re evaọ uwou ovie* Ahasuirọs ovie na.

10 Evaọ ẹdẹ avọ ihrẹ na, okenọ eva e jẹ were ovie na fiki enwaene, ọ tẹ ta kẹ Mahuman, Biztha, Habona,+ Bigtha, Abagtha, Zitha, gbe Kakas, iletu ihrẹ ogbẹgwae ovie na enọ e rrọ idibo Ahasuirọs ovie na omariẹ, 11 inọ a rọ Vashti aye ovie na ziọ aro ovie na, avọ etu* aye ovie nọ o fihọ, re o dhesẹ erru riẹ kẹ ahwo na gbe ikpahwo-esuo na, keme o wo erru gaga. 12 Rekọ Vashti aye ovie na ọ tẹ jẹ se nọ ọ rẹ nyaze he nọ ovie na o vi iletu ogbẹgwae riẹ nyai sei. Onana u te ru eva dha ovie na gaga, ofu o te mu ei gaga.

13 Kẹsena ovie na ọ tẹ ta kẹ ezae iwareghẹ nọ i wo otoriẹ udidi kpahe oware nọ uzi o ta* (keme enẹ a jẹ hai fi ẹme ovie hotọ kẹ ahwo kpobi nọ a riẹ uzi gbe edhọ-iguo lafi, 14 yọ enọ e mae kẹle iẹe họ Kashina, Shitha, Admetha, Tashish, Mirẹs, Masina, gbe Memukan, ikpahwo-esuo ihrẹ+ erọ Pasia gbe Midia, enọ e rẹ sae nyate ovie na oma a te je wo ekwa nọ e mai kpehru evaọ uvie na). 15 Ovie na ọ tẹ nọ inọ: “Wọhọ epanọ uzi o ta, eme u fo nọ a re ru Vashti aye ovie na, nọ orọnọ o yoẹme kẹ Ahasuirọs ovie na ha okenọ o vi iletu ogbẹgwae riẹ bru ei?”

16 Kẹsena Memukan ọ tẹ jọ iraro ovie na gbe ikpahwo-esuo na ta nọ: “Orọnikọ ovie na ọvo Vashti aye ovie na o ru thọ họ,+ rekọ te ikpahwo-esuo na kpobi gbe ahwo kpobi nọ e rrọ ibrotọ* Ahasuirọs ovie na kpobi. 17 Keme eyae na kpobi a ti yo oware nọ aye ovie na o ru na, a ve ti rri ezae rai vo a vẹ te ta nọ, ‘Ahasuirọs ovie na ọ ta nọ a rehọ Vashti aye ovie na ziọ aro riẹ, rekọ ọ rọwo nya ha.’ 18 Nẹnẹ na, eyae ikpahwo-esuo* Pasia gbe Midia nọ e riẹ kpahe oware nọ aye ovie na o ru na a te ta ẹme kẹ ikpahwo-esuo erọ ovie na kpobi, onọ o te wha orivo ologbo gbe evedha ze. 19 Otẹrọnọ o were ovie na, jọ ovie na o fi uzi họ, re a je kere iei kugbe izi ahwo Pasia gbe Midia nọ a rẹ sai nwene he,+ inọ Vashti ọ rẹ gbẹ nyaze aro Ahasuirọs ovie na ofa ha; re ovie na ọ jẹ rehọ ọkwa aye ovie na kẹ aye ọfa nọ o woma vi ei. 20 Re nọ a jẹ te jọ ẹkwotọ esuo ologbo ovie na kpobi yo uzi ovie na, eyae kpobi e vẹ rọ ọghọ kẹ ezae rai, no ọnọ ọ mae rro rite ọnọ ọ mae kawo.”

21 Ẹme nana ọ were ovie na gbe ikpahwo-esuo na, ovie na o te ru oware nọ Memukan ọ ta na. 22 Fikiere o te vi ileta kpohọ ibrotọ uvie* na+ kpobi, ro se ubrotọ* ọvuọvo evaọ ọvuọ oghẹrẹ ekere* riẹ gbe ahwo kpobi evaọ ọvuọ ẹvẹrẹ rai, re ọzae kpobi ọ jọ olori* evaọ ọvuọ uwou riẹ jẹ ta ẹvẹrẹ ahwo riẹ.

2 Nọ eware nana e vrẹ no, nọ ofu Ahasuirọs ovie na+ o kpotọ no, ọ tẹ kareghẹhọ oware nọ Vashti o ru na+ gbe oware nọ a ta nọ a ti ru ei.+ 2 Kẹsena iletu nọ e rẹ gbodibo kẹ ovie na omariẹ a tẹ ta nọ: “Jọ a nyae gwọlọ emetẹ-kọkọ nọ i wo erru kẹ ovie na. 3 Jọ ovie na ọ rehọ ahwo mu evaọ ibrotọ esuo riẹ kpobi+ re a koko emetẹ-kọkọ nọ i wo erru kpobi họ ziọ Shushan* oria adhẹzọ* na, re a rehọ ae ziọ uwou eyae na.* Jọ a fi ae họ otọ ẹruọsa Hegae+ ọwharọ ovie na gbe ọsẹro eyae na, re a ru oma rai woma ziezi.* 4 Kẹsena ọmọtẹ nọ ọ mae were ovie na ọ vẹ te jọ aye ovie nọ a re ro nwene Vashti.”+ Ẹme nana ọ were ovie na, yọ ere o ru.

5 Ọzae Ju jọ ọ jọ Shushan,*+ oria adhẹzọ* na, odẹ riẹ Mọdekae,+ ọmọzae Jeya, ọmọzae Shimia, ọmọzae Kish, ohwo orua Bẹnjamin,+ 6 nọ a mu no Jerusalẹm kpohọ igbo evaọ usu ahwo nọ a mu kugbe Jẹkonaya*+ ovie Juda, ọnọ Nebukadneza ovie Babilọn o mu kpohọ igbo. 7 Ọye ọ jẹ yọrọ* Hadasa,* koyehọ Ẹsta, ọmọ oniọvo ọsẹ riẹ,+ keme o wo ọsẹ hayo oni hi. Ọmọtẹ na o wo erru evaọ ugboma je siuru gaga, okenọ ọsẹ riẹ avọ oni riẹ a whu no, Mọdekae ọ tẹ rehọ iẹe wọhọ ọmọtẹ riẹ. 8 Nọ a whowho ẹme ovie na avọ uzi riẹ no, okenọ a je koko emetẹ buobu họ ziọ Shushan,* oria adhẹzọ* na re Hegae+ ọ rẹrote ae, a rehọ Ẹsta kpobọ uwou* ovie na re je fi ei họ otọ ẹruorote Hegae, ọsẹro eyae na.

9 Whaọ ọmọtẹ na ọ were riẹ ọ tẹ jẹ dhẹ ruọ ẹe oma,* fikiere ọ tẹ nwani ru ọruẹrẹfihotọ orọ oma riẹ nọ a re ru woma ziezi*+ gbe emu riẹ nọ a rẹ kẹe, ọ tẹ jẹ kẹe emetẹ ihrẹ nọ a salọ no uwou ovie na ze. Ọ tẹ jẹ rehọ iẹe avọ emetẹ riẹ nọ e be gbodibo kẹe kpohọ oria nọ o mai woma evaọ uwou eyae na.* 10 Ẹsta ọ ta ẹme ọvo kpahe ahwo riẹ+ hayo imoni riẹ hẹ, keme Mọdekae+ ọ ta kẹe nọ ọ vuẹ ohwo ọvo ho.+ 11 Kẹdẹ kẹdẹ Mọdekae ọ jẹ hae nya aro uwou eyae na* re ọ riẹ epanọ Ẹsta ọ rrọ gbe oware nọ o be via kẹe.

12 Ọmọtẹ kpobi o wo oke nọ a fihọ kẹe nọ ọ rẹ rọ nyabru Ahasuirọs ovie na nọ a te ru oma riẹ woma ziezi no evaọ emerae ikpegbivẹ nọ a fihọ kẹ emetẹ na, keme enẹ a ta nọ a re ro ru oma rai woma ziezi,* udẹ mọr+ emerae ezeza, udẹ balsam+ gbe oghẹrẹ idẹ efa nọ a re ro ru oma woma ziezi* emerae ezeza. 13 A te ru enana kpobi no, yọ ọmọtẹ na ọ ruẹrẹ oma kpahe no re ọ nyabru ovie na, yọ oware kpobi nọ ọ yare nọ a kẹe a rẹ rehọ iẹe kẹe nọ o te bi no uwou eyae na* kpobọ uwou ovie na. 14 Ọ rẹ nya evaọ owọwọ, kẹsena evaọ ohiohiẹ o ve zihe kpobọ uwou avọ ivẹ orọ eyae na,* onọ o rrọ otọ ẹruọsa Sheyashgaz ọwharọ ovie na+ nọ ọ rrọ ọsẹro ese ovie na. O re gbe zihe bru ovie na ha, ajokpanọ ọ were ovie na gaga yọ ovie na ọvo o se odẹ riẹ nọ a rehọ iẹe sei.+

15 Nọ u te okenọ Ẹsta ọmọtẹ Abẹhel, nọ ọ rrọ oniọvo ọsẹ Mọdekae, nọ Mọdekae ọ rehọ wọhọ ọmọtẹ riẹ+ ọ rẹ rọ nyabru ovie na, ọ yare oware ovo ho ajokpaọ oware nọ Hegae ọwharọ ovie na nọ ọ be rẹrote eyae na ọ ta nọ a kẹe ọvo. (Evaọ oke nana kpobi, Ẹsta ọ jẹ were ohwo kpobi nọ ọ ruẹ e riẹ.) 16 A rehọ Ẹsta se Ahasuirọs ovie na evaọ ighẹ ovie* na evaọ amara avọ ikpe, koyehọ amara Tibẹt,* evaọ ukpe avọ ihrẹ+ esuo riẹ. 17 Ovie na o te you Ẹsta vi emetẹ nọ i kiọkọ kpobi, ọ tẹ were iẹe je wo ọjẹrehọ riẹ* vi emetẹ-kọkọ edekọ na kpobi. Fikiere o te ku etu* aye ovie na họ iẹe uzou ọ tẹ rehọ iẹe mu aye ovie+ ro nwene ẹta Vashti.+ 18 Ovie na o te ru ehaa emuọriọ ologbo kẹ ikpahwo-esuo riẹ kpobi gbe idibo riẹ, ehaa emuọriọ Ẹsta. O te woro obusino kẹ ibrotọ* na, ọ tẹ jẹ kẹ ahwo ekẹ wọhọ epanọ obọ ovie na u te.

19 Whaọ okenọ a wariẹ koko emetẹ-kọkọ*+ họ orọ avọ isiava, yọ Mọdekae ọ keria unuighẹ ovie na. 20 Ẹsta ọ ta ẹme ọvo kpahe imoni riẹ gbe ahwo riẹ hẹ,+ keme ere Mọdekae ọ ta kẹe; Ẹsta ọ ruabọhọ je ru oware nọ Mọdekae ọ ta, nwane wọhọ epanọ o je ru evaọ okenọ ọ jọ obọ riẹ.+

21 Evaọ oke yena nọ Mọdekae ọ jẹ keria unuighẹ ovie na, Bigthan avọ Tirẹsh, iruiruo ivẹ evaọ ighẹ ovie na nọ e rrọ iriẹthẹ, a tẹ jẹ dha eva, a tẹ gba ẹgwae nọ a re kpe* Ahasuirọs ovie na no. 22 Rekọ Mọdekae ọ tẹ riẹ kpahe iẹe, ọ tẹ vuẹ Ẹsta aye ovie na vẹrẹ vẹrẹ. Kẹsena Ẹsta ọ tẹ rọ odẹ Mọdekae vuẹ ovie na ẹme na. 23 Fikiere a tẹ kiẹ otọ ẹme na jẹ ruẹ nọ ẹme na uzẹme, a tẹ tehe ezae ivẹ na fihọ ure; yọ a kere eware nana kpobi fihọ obe ikuigbe oke yena evaọ iraro ovie na.+

3 Nọ onana o vrẹ no, Ahasuirọs ovie na ọ tẹ wọ Heman+ ọmọzae Hamẹdeta ohwo Agag na+ kpehru je ru ei rro ẹkwoma ọkwa* riẹ nọ ọ kpare kpehru vi orọ ikpahwo-esuo* edekọ kpobi nọ e jọ kugbei.+ 2 Idibo ovie na kpobi nọ e jọ unuighẹ ovie na a je guzou kpotọ je kiẹzẹ vovao tuotọ kẹ Heman, keme enẹ ovie na o jie uzi nọ a ru kẹe. Rekọ Mọdekae ọ se nọ o re guzou kpotọ hayo kiẹzẹ vovao tuotọ họ. 3 Fikiere idibo ovie na nọ e jọ unuighẹ ovie na a tẹ ta kẹ Mọdekae nọ: “Fikieme who gbe bi lele uzi ovie na ha?” 4 Kẹdẹ kẹdẹ a jẹ hae nọe, rekọ ọ jẹ gaviezọ kẹ ae he. Kẹsena a tẹ nọ Heman sọ a sae kpairoro vrẹ uruemu Mọdekae na;+ keme ọ vuẹ rai no nọ ọyomariẹ yọ ohwo Ju.+

5 Nọ Heman ọ ruẹ nọ Mọdekae ọ se nọ o re guzou kpotọ je kiẹzẹ vovao tuotọ kẹe he, eva e tẹ dha Heman thesiwa.+ 6 Rekọ o rri nọ o kawo hrọ kẹe re o kpe* Mọdekae ọvo, keme a vuẹ riẹ kpahe ahwo Mọdekae no. Fikiere Heman ọ tẹ jẹ gwọlọ epanọ o re ro kpe ahwo Ju kpobi nọ a rrọ ẹkwotọ esuo Ahasuirọs soso no, ahwo Mọdekae kpobi.

7 Evaọ amara ọsosuọ, koyehọ, amara Nisan,* evaọ ukpe avọ ikpegbivẹ+ Ahasuirọs ovie na, a tẹ ma Pu+ (koyehọ, Ẹta) evaọ aro Heman re a riẹ ẹdẹ na gbe amara na, u te kie fihọ amara avọ ikpegbivẹ, koyehọ amara Edar.*+ 8 Kẹsena Heman ọ tẹ ta kẹ Ahasuirọs ovie na nọ: “U wo ahwo jọ nọ a vaha ruọ udevie ahwo+ nọ a rrọ ibrotọ esuo ra kpobi,+ enọ izi rai i wo ohẹriẹ no erọ amọfa kpobi; a bi koko izi ovie na ha, yọ o rrọ oware uwoma kẹ ovie na ha re a kẹ ae uvẹ ere ọvo. 9 Otẹrọnọ o rẹ were ovie na, jọ a kere uzi fihotọ inọ a kpe ai no. Mẹ te hwa etalẹnte* isiliva idu ikpe (10,000) kẹ ahwo ovie na re a fihọ ẹkpa-ugho ovie na.”*

10 Ovie na o te si ẹmẹro oka-ukpehọ* riẹ+ no obọ jẹ rehọ iẹe kẹ Heman+ ọmọzae Hamẹdeta ohwo Agag na,+ nọ ọ jọ ọwegrẹ ahwo Ju na. 11 Ovie na ọ tẹ ta kẹ Heman nọ: “A rehọ isiliva na gbe ahwo na kẹ owhẹ no re who ru ai epanọ who roro nọ u fo.” 12 Kẹsena a te se ikere-obe ovie na+ evaọ ẹdẹ avọ ikpegbesa amara ọsosuọ na. A te kere eware+ kpobi nọ Heman o jie uzi rai se enọ e rrọ setrap ovie na, eba nọ i bi su ibrotọ* na, gbe ikpahwo-esuo sa-sa na, ro se ubrotọ* kpobi evaọ ọvuọ oghẹrẹ ekere* riẹ je ro se ahwo kpobi evaọ ẹvẹrẹ rai. Odẹ Ahasuirọs ovie na a ro kere iei, yọ ẹmẹro oka-ukpehọ* ovie na a ro fi oka họ iẹe.+

13 A rọ ẹkwoma ewhovuẹ vi ileta na kpohọ ibrotọ* ovie na kpobi, ro jie uzi kẹ ae nọ a kpe jẹ raha ahwo Ju kpobi muotọ, te emaha te ekpako, te emọ te eyae, evaọ ẹdẹ ọvo, evaọ ẹdẹ avọ ikpegbesa ọrọ amara avọ ikpegbivẹ, koyehọ amara Edar,+ a vẹ jẹ kwa eware rai rehọ.+ 14 A re ru eme obe nana fihọ uzi evaọ ubrotọ* kpobi a ve je whowho iei kẹ ahwo na kpobi, re a ruẹrẹ oma kpahe kẹ ẹdẹ yena. 15 Ewhovuẹ na e tẹ dhẹ vrẹ vẹrẹ vẹrẹ+ wọhọ epanọ ovie na o jie uzi kẹ ae; a jie uzi na evaọ Shushan,*+ oria adhẹzọ* na. Ovie na avọ Heman a tẹ keria re a da udi, rekọ okpẹwho Shushan* o duwuku.

4 Nọ Mọdekae+ o yo eware kpobi nọ a ru na,+ ọ tẹ bẹre iwu riẹ o te ku ohọ-ekpa* họ jẹ whẹ enwo họ oma. Kẹsena ọ tẹ ruọ oko-ore okpẹwho na, be viẹ gaga je kuenu oviẹ. 2 Unuighẹ ovie na ọ nya ba, keme ohwo nọ o ku ohọ-ekpa* họ ọ rẹ ruọ eva ighẹ ovie na ha. 3 Yọ evaọ ubrotọ* kpobi+ nọ ẹme ovie na gbe uzi riẹ na u te, uweri ulogbo o jọ ahwo Ju oma, a siọ emuọriọ ba+ jẹ viẹ je weri. Ibuobu i kiẹzẹ ehru ehọ-ekpa* avọ enwo.+ 4 Nọ idibo-emetẹ Ẹsta avọ ewharọ riẹ a nyaze jẹ vuẹe, o tẹ kẹ aye ovie na uye gaga. Kẹsena o te vi iwu se Mọdekae re o kuhọ re o si ohọ-ekpa* na no oma, rekọ ọ rehọ e rai hi. 5 Fikiere Ẹsta o te se Hetak omọvo ewharọ ovie na nọ o ro mu re ọ gbodibo kẹe, o te vi ei nọ ọ nyae nọ Mọdekae oware nọ onana u dhesẹ gbe oware nọ o be via.

6 Fikiere Hetak ọ tẹ nyabru Mọdekae evaọ oko-ore okpẹwho na evaọ aro unuighẹ ovie na. 7 Mọdekae ọ tẹ vuẹe eware kpobi nọ e via kẹe gbe uzedhe unuigho+ nọ Heman ọ ya eyaa nọ ọ rẹ hwa fihọ ẹkpa-ugho ovie na re a ruẹsi kpe ahwo Ju no.+ 8 Ọ tẹ jẹ kẹe obe uzi nọ a kere je whowho evaọ Shushan*+ rọkẹ okpemuotọ rai na. Ọ gwọlọ nọ o re dhesẹ iẹe kẹ Ẹsta je ru ẹme na vẹ kẹe jẹ ta kẹe+ nọ ọ nyabru ovie na re ọ lẹe nọ ọ re ohrọ rai jẹ rọ unu obọriẹ lẹ ovie na kẹ ahwo riẹ.

9 Hetak o te zihe ze ọ tẹ vuẹ Ẹsta ẹme nọ Mọdekae ọ ta. 10 Ẹsta ọ tẹ ta kẹ Hetak inọ ọ ta kẹ Mọdekae nọ:+ 11 “Idibo ovie na gbe ahwo ibrotọ* ovie na kpobi a riẹ nọ ọzae hayo aye jọ ọ tẹ ruọ ighẹ obeva ovie na+ yọ orọnọ a se rie he, uzi ovuọvo o rrọ kpahe onana: A re kpei no; oware ovo nọ o rẹ sai ru ei jọ uzuazọ họ otẹrọnọ ovie na ọ rriẹ ọkpọ-isuẹsu igoru riẹ rri rie.+ Yọ anwọ edẹ ọgba ena nọ a ri ro se omẹ bru ovie na ha na.”

12 Nọ a vuẹ Mọdekae oware nọ Ẹsta ọ ta, 13 ọ tẹ vuẹ zihe se Ẹsta nọ: “Who du roro nọ fikinọ whọ rrọ uviuwou ovie na o te mae lọhọ kẹ owhẹ vi ahwo Ju nọ i kiọkọ kpobi re whọ vabọ họ. 14 Keme who te fibo evaọ oke nana, ufuoma gbe esiwo u ti no oria ofa ze kẹ ahwo Ju,+ rekọ whẹ avọ unuwou ọsẹ ra wha ve ti whu. Yọ ono ọ riẹ sọ fiki oke utionana who ro wo ọkwa uvie na?”+

15 Kẹsena Ẹsta ọ tẹ vuẹ zihe se Mọdekae nọ: 16 “Nya, re who koko ahwo Ju kpobi nọ e rrọ Shushan* họ re wha siọ emuọriọ ba+ fiki mẹ. Wha re hayo da ha evaọ edẹ esa,+ te aso te uvo. Mẹ avọ idibo-emetẹ mẹ ma te siọ emuọriọ ba re. Mẹ te nyabru ovie na, dede nọ o wọso uzi, otẹrọnọ me re whu, jọ me whu.” 17 Fikiere Mọdekae ọ tẹ nyavrẹ o te ru eware kpobi nọ Ẹsta ọ ta kẹe nọ o ru.

5 Evaọ ẹdẹ avọ esa na,+ Ẹsta o te ku iwu ithethei aye ovie riẹ họ, o te dikihẹ ighẹ obeva uwou* ovie na nọ o rẹriẹ aro ku uwou ovie na, yọ ovie na ọ keria agbara-uvie riẹ evaọ uwou ovie na nọ o rẹriẹ aro ku oria nọ a rẹ rọ ruọ eva na. 2 Nọ ovie na ọ nwane ruẹ Ẹsta aye ovie na nọ o dikihẹ eva ighẹ na, eva riẹ e tẹ were ovie na, ovie na ọ tẹ rriẹ ọkpọ-isuẹsu igoru+ nọ ọ rrọ obọ riẹ rri Ẹsta. Kẹsena Ẹsta ọ tẹ nyabru ei ọ tẹ rọ obọ te ẹroro ọkpọ-isuẹsu na.

3 Ovie na ọ tẹ nọe nọ: “Eme ọ be via, Ẹsta aye ovie na? Eme whọ gwọlọ? O tẹ maki te* abọvo uvie mẹ dede, a rẹ rehọ iẹe kẹ owhẹ!” 4 Ẹsta o te yo kẹe nọ: “Otẹrọnọ o rẹ were ovie na, jọ ovie na avọ Heman+ a nyaze ẹkeriotọ emuọriọ nọ mẹ ruẹrẹhọ kẹe nẹnẹ.” 5 Fikiere ovie na ọ tẹ ta kẹ ahwo riẹ nọ: “Wha ta kẹ Heman nọ ọ nyaze kpata kpata, wọhọ epanọ Ẹsta ọ yare na.” Fikiere ovie na avọ Heman a te kpohọ ẹkeriotọ emuọriọ nọ Ẹsta ọ ruẹrẹhọ na.

6 Evaọ ẹkeriotọ emuọriọ gbe udi-oda* na, ovie na ọ tẹ ta kẹ Ẹsta nọ: “Eme whọ gwọlọ? A rẹ rehọ iẹe kẹ owhẹ! Eme whọ gwọlọ yare? O tẹ maki te* abọvo uvie mẹ dede, a re ru ei!”+ 7 Ẹsta ọ tẹ ta nọ: “Oware nọ mẹ gwọlọ gbe ayare mẹ họ, 8 Otẹrọnọ ovie na o re rri omẹ aro yọ otẹrọnọ o rẹ were ovie na re o ru oware nọ mẹ gwọlọ je ru oware nọ mẹ yare, jọ ovie na avọ Heman a nyaze ẹkeriotọ emuọriọ nọ mẹ te ruẹrẹhọ kẹ ae evaọ odẹnotha; odẹnotha me ve ti ru epanọ ovie na ọ ta na.”

9 Evaọ ẹdẹ yena Heman ọ tẹ nyavrẹ be ghọghọ avọ eva nọ e be were iẹe. Rekọ nọ Heman ọ ruẹ Mọdekae evaọ unuighẹ ovie na je muẹrohọ nọ ọ kpama dikihẹ je nuhu kẹe he, eva Mọdekae e tẹ dha Heman thesiwa.+ 10 Rekọ Heman ọ gba omariẹ o te kpobọ uwou riẹ. Kẹsena o te se egbẹnyusu riẹ gbe Zirẹsh+ aye riẹ. 11 Heman o te je seha fiki efe ologbo riẹ, emezae ibuobu riẹ,+ gbe epanọ ovie na ọ rọ wọe kpehru je ru ei rro vi ikpahwo-esuo gbe idibo ovie na.+

12 Heman o te fibae nọ: “U te no ere no, Ẹsta aye ovie na o zizie omọfa ha rekọ omẹ inọ me lele ovie na kpohọ ẹkeriotọ emuọriọ nọ ọ ruẹrẹhọ.+ O te je zizie omẹ nọ odẹnotha mẹ nyaze ti kuomagbei avọ ovie na.+ 13 Rekọ eware nana kpobi i bi ru eva were omẹ hẹ nọ mẹ gbẹ be ruẹ Mọdekae ohwo Ju na nọ ọ be keria unuighẹ ovie na.” 14 Fikiere Zirẹsh aye riẹ gbe egbẹnyusu riẹ kpobi a tẹ ta kẹe nọ: “Ta nọ a thihi ure fihọ otọ nọ u theri te ikiubiti udhuvẹ-gbikpe.* Evaọ ohiohiẹ, whọ vẹ ta kẹ ovie na nọ a tehe Mọdekae fihọ iẹe.+ Kẹsena who ve lele ovie na nyae reakpọ kuoma evaọ ẹkeriotọ emuọriọ na.” Iroro nana e were Heman, fikiere o te ru nọ a ro thihi ure na fihọ otọ.

6 Aso yena ovie na ọ sae wezẹ hẹ.* Fikiere ọ tẹ ta nọ a rehọ obe ikuigbe oke yena ze,+ a te sei kẹ ovie na. 2 A tẹ ruẹ nọ a kere oware nọ Mọdekae o gu kpahe Bigthana avọ Tirẹsh fihọ iẹe, iruiruo ivẹ ovie na nọ e jọ iriẹthẹ, enọ e gba ẹgwae nọ a re kpe* Ahasuirọs ovie na no.+ 3 Ovie na ọ tẹ nọ inọ: “Ọghọ gbe osohwa vẹ a kẹ Mọdekae no kẹ oware nana?” Idibo nọ e rẹ gbodibo kẹ ovie na omariẹ a tẹ ta nọ: “A ri ru oware ovo kẹe he.”

4 Kẹsena ovie na ọ tẹ ta nọ: “Yọ ono ọ rrọ eva ighẹ na?” Whaọ Heman ọ nyaze obọ ighẹ otafe uwou*+ ovie na re ọ vuẹ ovie na kpahe epanọ a rẹ rọ tehe Mọdekae fihọ ure nọ ọ ruẹrẹhọ kẹe na.+ 5 Idibo ovie na a tẹ ta kẹe nọ: “Heman+ o dikihẹ eva ighẹ na.” Fikiere ovie na ọ tẹ ta nọ: “Wha ta kẹe nọ ọ ziọ obeva obonẹ.”

6 Nọ Heman ọ ruọ eva, ovie na ọ tẹ nọe nọ: “Eme a re ru kẹ ohwo nọ ovie na ọ gwọlọ bru ọghọ họ oma?” Heman ọ tẹ jọ udu riẹ ta nọ: “Ono ovie na ọ te gwọlọ bru ọghọ họ oma u te no omẹ no?”+ 7 Fikiere Heman ọ tẹ ta kẹ ovie na nọ: “Enẹ a re ru kẹ ohwo nọ ovie na ọ gwọlọ bru ọghọ họ oma, 8 jọ a rehọ ewu ovie+ nọ ovie na o re ku họ gbe anyenya nọ ovie na ọ rẹ dhẹ avọ etu uvie nọ o re ku họ uzou ze. 9 Kẹsena a vẹ rehọ ewu na gbe anyenya na kẹ omọvo ikpahwo-esuo ovie na jọ, a ve ku ewu na họ ohwo nọ ovie na ọ gwọlọ bru ọghọ họ oma na, a vẹ rehọ iẹe keria anyenya na jẹ rehọ iẹe dhẹ oko-ore okpẹwho na vrẹ. Yọ a be jọ aro riẹ bo nọ: ‘Enẹ a re ru kẹ ohwo nọ ovie na ọ gwọlọ bru ọghọ họ oma!’”+ 10 Ovie na ọ tẹ nwane ta kẹ Heman nọ: “Ovẹrẹ! Rehọ ewu na gbe anyenya na re who ru epanọ whọ ta na kẹ Mọdekae, ohwo Ju nọ ọ rẹ keria unuighẹ ovie na. Whọ siọ oware ovo ba eru hu evaọ usu eware nọ whọ ta na.”

11 Fikiere Heman ọ tẹ rehọ ewu na gbe anyenya na, o te ku ewu na họ Mọdekae+ jẹ rehọ iẹe dhẹ oko-ore okpẹwho na vrẹ jẹ be jọ aro riẹ bo nọ: “Enẹ a re ru kẹ ohwo nọ ovie na ọ gwọlọ bru ọghọ họ oma!” 12 Nọ onana o vrẹ no, Mọdekae o te zihe ziọ unuighẹ ovie na, rekọ Heman ọ tẹ nya vẹrẹ vẹrẹ kpobọ uwou riẹ bi weri yọ o ruru uzou riẹ. 13 Nọ Heman o gbiku eware nọ e via kẹe kpobi kẹ Zirẹsh+ aye riẹ gbe egbẹnyusu riẹ kpobi, ezae iwareghẹ riẹ gbe Zirẹsh aye riẹ a tẹ ta kẹe nọ: “Otẹrọnọ Mọdekae ọnọ who muhọ ekie evaọ aro riẹ no na yọ ohwo Ju,* whọ te sai fi ei kparobọ họ; whọ te se iẹe ba ekie kẹ hẹ.”

14 Nọ a gbe bi lele iei ta ẹme na, iletu ogbẹgwae ovie na a tẹ nyaze a tẹ rehọ Heman vẹrẹ vẹrẹ kpohọ ẹkeriotọ emuọriọ nọ Ẹsta ọ ruẹrẹhọ na.+

7 Fikiere ovie na avọ Heman+ a tẹ ziọ ẹkeriotọ emuọriọ nọ Ẹsta aye ovie na ọ ruẹrẹhọ na. 2 Ovie na ọ tẹ wariẹ ta kẹ Ẹsta evaọ ẹdẹ avọ ivẹ evaọ ẹkeriotọ emuọriọ gbe udi-oda na, inọ: “Eme whọ gwọlọ, Ẹsta aye ovie? A rẹ rehọ iẹe kẹ owhẹ. Eme họ ayare ra? O tẹ maki te* abọvo uvie mẹ dede, a re ru ei!”+ 3 Ẹsta aye ovie na o te yo nọ: “Otẹrọnọ who re rri omẹ aro, O ovie, yọ otẹrọnọ o rẹ were ovie na, mẹ be yare nọ jọ a raha uzuazọ* mẹ gbe orọ ahwo mẹ hẹ.+ 4 Keme a zẹ omai no,+ te omẹ te ahwo mẹ re a kpe jẹ raha omai muotọ.+ O hae jọ nọ a zẹ omai gheghe wọhọ erigbo emezae gbe emetẹ, mẹ hai fibo. Rekọ okpẹtu na o fo ho, keme o te wha enwoma se ovie na.”

5 Kẹsena Ahasuirọs ovie na ọ tẹ ta kẹ Ẹsta aye ovie na nọ: “Ono ọye, diẹse ohwo nọ ọ dawo oware utionana ọ rrọ?” 6 Ẹsta ọ tẹ ta nọ: “Heman omuomu ọnana họ ojihẹ gbe ọwegrẹ na.”

Idudu e tẹ ruọ Heman oma fiki ovie na gbe aye ovie na. 7 Ovie na ọ tẹ rọ ofu kpama no ẹkeriotọ emuọriọ gbe udi-oda na jẹ nya kpobọ ọgbọ ighẹ ovie na, rekọ Heman ọ tẹ kpama re ọ lẹ Ẹsta aye ovie na kẹ uzuazọ* riẹ, keme ọ ruẹ nọ ovie na ọ gba riẹ mu no nọ ọ rẹ kẹe uye. 8 Ovie na o te zihe no obọ ọgbọ ighẹ ovie na ziọ uwou ẹkeriotọ emuọriọ gbe udi-oda na, ọ tẹ ruẹ nọ Heman o kie fihọ agbara othethei nọ Ẹsta ọ jọ. Ovie na o te bo nọ: “Kọ ọ be te jẹ gba aye ovie na du evaọ uwou obọmẹ?” Nọ eme nana e nwani no unu ovie na ze, a te ruru ovao Heman. 9 Habona+ omọvo iletu ogbẹgwae ovie na ọ tẹ ta nọ: “Heman o thihi ure fihọ otọ kẹ Mọdekae re,+ ọnọ o gu oware nọ u siwi ovie na.+ A thihi ure na fihọ obọ ighẹ Heman, yọ u theri te ikiubiti udhuvẹ-gbikpe.”* Kẹsena ovie na ọ tẹ ta nọ: “Wha tehe iẹe fihọ iẹe.” 10 Fikiere a tẹ tehe Heman fihọ ure nọ o thihi fihọ kẹ Mọdekae na, ofu ovie na o te kpotọ.

8 Evaọ ẹdẹ yena Ahasuirọs ovie na ọ tẹ rehọ uwou Heman*+ ọwegrẹ ahwo Ju na+ kẹ Ẹsta aye ovie na; Mọdekae ọ tẹ ziọ aro ovie na, keme Ẹsta ọ vuẹ riẹ no epanọ aimava a rọ rrọ imoni.+ 2 Kẹsena ovie na ọ tẹ ba ẹmẹro oka-ukpehọ* riẹ na no,+ onọ o mi Heman na, ọ tẹ rehọ iẹe kẹ Mọdekae. Ẹsta o te fi Mọdekae họ ọnọ o wuzou uwou Heman.*+

3 Kẹsena Ẹsta ọ tẹ wariẹ ta ẹme kẹ ovie na. O kie fihọ awọ riẹ ọ tẹ be viẹ jẹ be lẹe nọ ọ za okpẹtu nọ Heman ohwo Agag na ọ wha ze gbe omaa uyoma riẹ kpahe ahwo Ju na dhe.+ 4 Ovie na ọ tẹ rriẹ ọkpọ-isuẹsu igoru riẹ rri Ẹsta,+ Ẹsta ọ tẹ kpama o te dikihẹ aro ovie na. 5 Ọ tẹ ta nọ: “Otẹrọnọ o rẹ were ovie na yọ otẹrọnọ o re rri omẹ aro, otẹrọnọ u kiehọ evaọ aro ovie na yọ mẹ were ovie na, jọ a kere uzi nọ o rẹ raha obe ohwo ẹgwae omuomu na Heman+ ọmọzae Hamẹdeta ohwo Agag na,+ onọ o kere re a ro kpe ahwo Ju nọ e rrọ ibrotọ* ovie na kpobi. 6 Keme ẹvẹ mẹ sai ro thihakọ rri okpẹtu nọ o bi bru ahwo mẹ ze, ẹvẹ mẹ sai ro thihakọ rọ ẹro ruẹ ọraha nọ o bi ti te imoni mẹ?”

7 Fikiere Ahasuirọs ovie na ọ tẹ ta kẹ Ẹsta aye ovie na gbe Mọdekae ohwo Ju na nọ: “Rri! Mẹ rehọ uwou Heman* kẹ Ẹsta no+ yọ mẹ tehe riẹ fihọ ure no+ fiki ẹgwae omuomu riẹ nọ ọ gwọlọ rọ họre* ahwo Ju. 8 Enẹna whọ sae rọ odẹ ovie na kere oware kpobi nọ who roro nọ u fo kẹ ahwo Ju whọ vẹ rọ ẹmẹro oka-ukpehọ* ovie na rọ ka oka họ iẹe, keme uzi nọ a rọ odẹ ovie na kere jẹ rọ ẹmẹro oka-ukpehọ ovie na rọ ka oka họ, a rẹ sai nwene iei hi.”+

9 Fikiere a te se ikere-obe ovie na evaọ oke yena evaọ amara avọ esa na, koyehọ amara Saevan,* evaọ ẹdẹ avọ udhegbesa, a te kere oware kpobi nọ Mọdekae o jie uzi riẹ se ahwo Ju na, je ro se enọ e rrọ setrap ovie na,+ eba na, gbe ikpahwo-esuo ibrotọ* na+ no India rite Ẹtiopia, ibrotọ* udhozeza-gbihrẹ (127), ro se ubrotọ* kpobi evaọ ọvuọ oghẹrẹ ekere* riẹ je ro se ahwo kpobi evaọ ẹvẹrẹ rai je ro se ahwo Ju evaọ oghẹrẹ ekere* rai gbe ẹvẹrẹ rai.

10 Ọ rọ odẹ Ahasuirọs ovie na kere iei jẹ rọ ẹmẹro oka-ukpehọ* ovie na ka oka họ iẹe,+ ọ tẹ rọ ẹkwoma ewhovuẹ nọ e rẹ dhẹ enyenya vi ebe nọ a kere na; a dhẹ enyenya nọ a rẹ rọ wha evuẹ, nọ e rẹ dhẹ siawọ gaga, enọ a ruẹrẹhọ kẹ iruo ovie. 11 Evaọ ebe nana ovie na ọ kẹ ahwo Ju evaọ ikpewho na kpobi udu re a kokohọ kugbe re a thọ omarai,* re a je kpe jẹ raha utu ahwo hayo ubrotọ* kpobi nọ o wọ ohọre bru ae, te eyae te emọ, a vẹ jẹ kwa eware rai rehọ.+ 12 A re ru onana evaọ ẹdẹ ọvona evaọ ibrotọ* Ahasuirọs ovie na kpobi, evaọ ẹdẹ avọ ikpegbesa amara avọ ikpegbivẹ na, koyehọ, amara Edar.*+ 13 A re ru eme obe nana fihọ uzi evaọ ibrotọ* na kpobi. A re whowho iei kẹ ahwo na kpobi, re ahwo Ju a ruẹrẹ oma kpahe kẹ ẹdẹ yena re a kioja omarai ẹkwoma ewegrẹ rai nọ a rẹ họre.+ 14 Ewhovuẹ na nọ e jẹ dhẹ enyenya nọ a rẹ rọ wha evuẹ na, enọ a ruẹrẹhọ kẹ iruo ovie na a dhẹ vrẹ vẹrẹ vẹrẹ ababọ oke oraha wọhọ epanọ ovie na o jie uzi kẹ ae. A jie uzi na evaọ Shushan,*+ oria adhẹzọ* na re.

15 Mọdekae o te no aro ovie na avọ ewu ovie orọ ekọlọ iburu gbe ofuafo nọ o kuhọ, avọ etu-uvie igoru ologbo gbe otogbo owowoma orọ ohọ iwhulu ogorurẹ. Okpẹwho Shushan*+ o te bo ubo oghọghọ. 16 Udu u te te ahwo Ju otọ,* a te je wo oghọghọ gbe evawere gbe ọghọ. 17 Yọ evaọ ibrotọ* na kpobi gbe ikpewho na kpobi, oria kpobi nọ ẹme ovie na gbe uzi riẹ na u te, ahwo Ju a jẹ ghọghọ jẹ wereva, a jẹ re jẹ da kuoma je ru ehaa. Ahwo ẹkwotọ na buobu a te je se omarai ahwo Ju,+ keme idudu ahwo Ju e ro rai oma no.

9 Evaọ ẹdẹ avọ ikpegbesa amara avọ ikpegbivẹ na, koyehọ, amara Edar,*+ nọ a ti ro ru ẹme ovie na avọ uzi riẹ gba na,+ evaọ ẹdẹ nọ ewegrẹ ahwo Ju a je rẹro nọ a te ga obọ vi ae, ẹkẹre o te kurẹriẹ, ahwo Ju a te fi ahwo nọ a mukpahe ae kparobọ.+ 2 Ahwo Ju na a te kokohọ kugbe evaọ ikpewho rai evaọ ibrotọ* Ahasuirọs ovie na+ kpobi re a họre ahwo nọ a be gwọlọ ai kpe na, rekọ ohwo ọvo ọ sai dikihẹ lele ae họre he, keme idudu rai e ruọ ahwo na kpobi oma no.+ 3 Isu ibrotọ* na, enọ e rrọ setrap ovie na,+ eba na gbe ahwo nọ a bi ru iruo kẹ ovie na a jọ abọ ahwo Ju, keme a jẹ dhozọ Mọdekae. 4 Mọdekae o zihe ruọ ohwo ologbo no+ evaọ uwou* ovie na, yọ odẹ riẹ u je do evaọ ibrotọ* na kpobi keme ogaga Mọdekae u je dhe ẹruẹro.

5 Ahwo Ju na a rọ ọgbọdọ kpe ewegrẹ rai kpobi, a je kpe ai jẹ raha ae; a ru enọ i mukpahe ae oware kpobi nọ u je rai.+ 6 Evaọ Shushan*+ oria adhẹzọ* na, ahwo Ju a kpe ezae egba isoi (500). 7 Yọ a kpe Pashandeta, Dalfọn, Aspetha, 8 Poreta, Adelia, Aridetha, 9 Pamashta, Aresae, Aredae, gbe Vaizeta, 10 emezae ikpe Heman ọmọzae Hamẹdeta, ọwegrẹ ahwo Ju na.+ Rekọ nọ a kpe ai no, a kwa uvumọ oware rehọ họ.+

11 Evaọ ẹdẹ yena, a niyẹrẹ unu ahwo nọ a kpe evaọ Shushan* oria adhẹzọ* na kẹ ovie na.

12 Ovie na ọ tẹ ta kẹ Ẹsta aye ovie na nọ: “Ahwo Ju na a jọ Shushan* oria adhẹzọ* na kpe ezae egba isoi (500) gbe emezae ikpe Heman no. Kọ eme a ru no evaọ ibrotọ* ovie na nọ i kiọkọ?+ Eme whọ gwọlọ enẹna? A rẹ rehọ iẹe kẹ owhẹ. Ayare ọfa vẹ who wo? A re ru ei.” 13 Ẹsta o te yo nọ: “Otẹrọnọ o rẹ were ovie na,+ jọ a kẹ ahwo Ju evaọ Shushan* uvẹ re odẹnotha a wariẹ ru wọhọ epaọ uzi inẹnẹ na;+ a vẹ jẹ tehe emezae ikpe Heman fihọ ure.”+ 14 Fikiere ovie na ọ tẹ kẹ udu nọ a ru ere. A te jie uzi evaọ Shushan,* a tẹ tehe emezae ikpe Heman fihọ ure.

15 Ahwo Ju evaọ Shushan* a tẹ wariẹ kokohọ kugbe evaọ ẹdẹ avọ ikpegbene amara Edar+ a te kpe ezae egba esa (300) evaọ Shushan,* rekọ a kwa uvumọ oware rehọ họ.

16 Ahwo Ju nọ i kiọkọ evaọ ibrotọ* ovie na a kokohọ kugbe re, jẹ họre kẹ uzuazọ* rai.+ A raha ewegrẹ rai,+ a kpe ahwo idu udhosa gbe ikpegbisoi (75,000) nọ i mukpahe ai; rekọ a kwa uvumọ oware rehọ họ. 17 Onana o via evaọ ẹdẹ avọ ikpegbesa amara Edar, a te serihọ evaọ ẹdẹ avọ ikpegbene na je ru ei họ ẹdẹ ehaa emuọriọ gbe oghọghọ.

18 Ahwo Ju evaọ Shushan* a kokohọ kugbe evaọ ẹdẹ avọ ikpegbesa+ gbe ẹdẹ avọ ikpegbene na,+ a te serihọ evaọ ẹdẹ avọ ikpegbisoi je ru ei họ ẹdẹ ehaa emuọriọ gbe oghọghọ. 19 Oyejabọ nọ ahwo Ju nọ e jẹ rria ikpewho efa nọ e rrọ ibrotọ na a ro ru ẹdẹ avọ ikpegbene amara Edar họ ẹdẹ oghọghọ gbe akpọriọ, ẹdẹ ehaa,+ gbe oke nọ a re ro vi emu se ohwohwo.+

20 Mọdekae+ o te kere eware nana fihotọ je vi ileta se ahwo Ju kpobi evaọ ibrotọ* kpobi erọ Ahasuirọs ovie na, te enọ e kẹle gbe enọ i thabọ. 21 Ọ ta kẹ ae nọ a hai koko ẹdẹ avọ ikpegbene amara Edar, gbe ẹdẹ avọ ikpegbisoi na, kukpe kukpe, 22 keme evaọ edẹ yena ahwo Ju a ro wo ufuoma no obọ ewegrẹ rai yọ evaọ amara yena uweri rai u ro zihe ruọ oghọghọ yọ ọkora rai+ o zihe ruọ ẹdẹ ehaa. A re koko ae wọhọ edẹ ehaa emuọriọ gbe oghọghọ gbe oke nọ a re ro vi emu se ohwohwo je vi ekẹ se iyogbe.

23 Ahwo Ju a rọwo nọ a rẹ ruabọhọ ehaa nọ a muhọ na je ru oware nọ Mọdekae o kere se ai na. 24 Keme Heman+ ọmọzae Hamẹdeta ohwo Agag na,+ ọwegrẹ ahwo Ju kpobi na ọ gba ẹgwae omuomu kpahe ahwo Ju inọ ọ rẹ raha ae no,+ yọ ọ ma Pu,+ koyehọ, Ẹta, re o fi awa họ ai oma jẹ raha ai no. 25 Rekọ nọ Ẹsta ọ nyaze aro ovie na, ovie na o te jie uzi onọ a kere nọ:+ “Jọ ẹgwae omuomu nọ ọ gba kpahe ahwo Ju na+ u hwẹ fihọ uzou obọriẹ”; a tẹ tehe iẹe gbe emezae riẹ fihọ ure.+ 26 Oyejabọ nọ a ro se edẹ yena Purim, keme Pu* họ odẹ ẹta na.+ Yọ fiki eware kpobi nọ a kere fihọ ileta nana gbe oware nọ a rọ ẹro ruẹ evaọ ẹme nana gbe oware nọ o via kẹ ae, 27 ahwo Ju na a te ru ei fihọ oware ọgbahọ kẹ omarai gbe ahwo uyẹ rai gbe ahwo kpobi nọ a bi kuomagbe ai+ re a koko edẹ ivẹ nana ababọ oware ovo nọ o rẹ whaha iẹe je ru oware nọ a kere kpahe ae evaọ oke nọ a fihọ na kukpe kukpe. 28 A rẹ kareghẹhọ je koko edẹ nana evaọ oge kpobi, evaọ uviuwou kpobi, ubrotọ* kpobi, gbe okpẹwho kpobi; yọ a re si edẹ Purim nana no otọ evaọ udevie ahwo Ju hu, yọ ahwo uyẹ rai a rẹ siọ ekareghẹhọ rai ba eru hu.

29 Kẹsena Ẹsta aye ovie na ọmọtẹ Abẹhel, gbe Mọdekae ohwo Ju na a tẹ rọ udu ulogbo nọ a wo kere ileta avọ ivẹ ro fiẹgba họ Purim na. 30 A vi ileta na se ahwo Ju kpobi evaọ ibrotọ* udhozeza-gbihrẹ (127) na,+ ẹkwotọ esuo Ahasuirọs na,+ evaọ eme udhedhẹ gbe uzẹme 31 re a ro fiẹgba họ ekoko Purim na evaọ oke nọ a fihọ na, nwane wọhọ epanọ Mọdekae ohwo Ju na gbe Ẹsta aye ovie na a ta kẹ ae nọ a ru na+ jẹ nwane wọhọ epanọ ae omarai a ru rie fihọ oware ọgbahọ kẹ omarai* gbe ahwo uyẹ rai no nọ a re ru na,+ te emuọriọ-ọseba+ gbe olẹ ayare-ọgaga na.+ 32 Uzi nọ Ẹsta o fihọ na u fiẹgba họ eme nana kpahe Purim,+ yọ a kere i rie fihọ obe.

10 Ahasuirọs ovie na o te ru nọ ahwo ẹkwotọ na gbe ikoliko abade na a je ro ru iruo ọgbahọ.

2 Kọ ikpeware nọ o ru kpobi, gbe ikuigbe epanọ ogaga Mọdekae+ o rro te, onọ ovie na ọ kẹ riẹ nọ ọ kpare iẹe kpehru,+ a gbe kere ai fihọ obe iku eware nọ e via evaọ etoke+ ivie Midia gbe Pasia?+ 3 Keme Mọdekae ohwo Ju na ọ jọ ohwo avọ ivẹ, Ahasuirọs ovie na ọvo ọ rro vi ei. Ọ jọ ohwo ologbo* evaọ udevie ahwo Ju yọ ogbotu inievo riẹ a jẹ rọ adhẹẹ kẹe, ọ jẹ họre kẹ ewoma ahwo riẹ yọ o je ru epanọ eware i re ro kiehọ kẹ* ahwo uyẹ rai kpobi.