JOB

“Ẹbẹba me ro no edhede oni mẹ ze,

Yọ ẹbẹba me ti ro zihe.+

 3 “Jọ ẹdẹ nọ a ro yẹ omẹ ọ raha,+

Te aso nọ ohwo jọ ọ rọ ta nọ: ‘A di eva ọzae họ no!’

Jọ Ọghẹnẹ nọ ọ rrọ obọ ehru na o gbolaro kẹe;

Jọ elo ọvuọvo o lo fihọ iẹe he.

 6 Jọ ebi ọlala ọ rehọ aso yena no;+

Jọ ẹdẹ yena o lele edẹ efa nọ e rrọ ukpe na ghọghọ họ,

Jọ a kele iei kugbe edẹ nọ e rrọ emerae na ha.

 7 Evaọ uzẹme! Jọ aso yena ọ jọ ọga;

Jọ a yo edo oghọghọ ovuọvo evaọ eva riẹ hẹ.

 8 Jọ enọ e rẹ bọwo ẹdẹ ehao, e bọwo ẹdẹ yena ehao,

Enọ e rẹ sae rọwo Levayatan* no owezẹ ze.+

 9 Jọ isi ohiohiẹ* riẹ i zihe ruọ ebi;

Jọ ọ hẹrẹ oke nọ u re rrie bẹ,

Jọ ọ ruẹ elo oke nọ u bi rrie ze he.

10 Keme ọ kare ẹthẹ edhede oni mẹ hẹ;+

Yọ ọ ko uye dhere aro mẹ hẹ.

12 Fikieme ighilawọ nọ a wọ omẹ fihọ e rọ jariẹ?

Fikieme evie ọ rọ jariẹ nọ a kẹ omẹ?

13 Keme enẹ yọ me kiẹzẹ ababọ oware ovo nọ u bi kpokpo omẹ;+

Enẹ yọ mẹ rrọ owezẹ bi serihọ+

14 Kugbe ivie otọakpọ na avọ ekiroro rai,

Enọ e bọ eria kẹ omarai nọ e raha no enẹna,*

15 Hayo kugbe emezae-ivie nọ i wo igoru,

Enọ isiliva e vọ iwou rai.

16 Hayo fikieme eva mẹ e gbẹ lẹlẹ no oni mẹ hẹ,

Wọhọ emọ nọ e ruẹ elo vievie he?

17 Irumuomu dede a gbe wo idhọvẹ hẹ evaọ obei;

Enọ oma o rrọ no na a rrọ obei serihọ.+

18 Enọ a fihọ uwou-odi a rrọ obei kugbe dhedhẹ;

A bi yo urru ohwo nọ ọ be gba ae họ ru iruo ho.

19 Te ohwo ologbo avọ oruori ẹrẹrẹe a rrọ evaọ obei,+

Ọrigbo o wo ufuoma no obọ olori riẹ no.

20 Fikieme ọ rọ rehọ elo kẹ ọnọ ọ be ruẹ uye

Jẹ rọ uzuazọ kẹ enọ idhọvẹ egaga e rrọ oma?*+

A tubẹ tọ gwọlọ iẹe vi ekwakwa-aghae nọ a ko dhere,

22 Enọ e be ghọghọ gaga,

Nọ eva e rẹ were nọ a tẹ ruẹ uki.

23 Fikieme ọ rọ rehọ elo kẹ ọzae nọ o vru no edhere nọ ọ be nya,

Ọnọ Ọghẹnẹ ọ ma ogba wariẹ họ?+

24 Keme unuofiẹ o rehọ ẹta emu mẹ no,+

Yọ imẹ-idio mẹ+ i bi hwẹ ze wọhọ ame.

25 Keme oware nọ mẹ jẹ ruawa riẹ na u te omẹ oma no,

Yọ oware nọ mẹ jẹ dhozọ riẹ na o via kẹ omẹ no.

26 Me wo udhedhẹ hẹ, me wo ufuoma ha, me wo eriosehọ họ,

Rekọ uye u bi bru omẹ ze ọvo.”

 3 Ginọ uzẹme nọ whọ kpọ ahwo buobu vi no,

Yọ who je ru abọ nọ e ga ha na ga.

 4 Eme ra e jẹ kpare ohwo kpobi nọ o bi zoruẹ,

Whọ jẹ bọ enọ ighilawọ rai i bi nuhu ga.

 5 Whaọ enẹna o via kẹ owhẹ no, whọ gbẹ riẹ onọ who re ru hu;*

U te owhẹ no, whọ tẹ rrọ awawa.

 8 Oware nọ mẹ ruẹ no họ, te enọ e rẹ kọ ubi umuomu*

Gbe enọ e rẹ gwọlọ ẹme, oware ovona a re vu.

 9 Ẹwẹ nọ Ọghẹnẹ o ku ọ rẹ raha ai no,

Yọ ọ rẹ rehọ ofu riẹ tehe ai kpe.

10 Okpohrokpo o re do enu, ọmọ okpohrokpo ọ rẹ gua,

Ghele na, ibiakọ ikpohrokpo egaga* dede e rẹ kpare.

11 Okpohrokpo o re whu nọ ọ gbẹ ruẹ arao kpe he,

Emọ okpohrokpo e vẹ vaha.

12 Whaọ a lẹlẹ ta ẹme jọ kẹ omẹ,

Ẹme na o fi ruọ omẹ ezọ.

13 Mẹ ruẹ eruẹaruẹ evaọ aso nọ e kẹ omẹ idhọvẹ,

Okenọ ahwo a wezẹ diwi no,

14 Iguegue e tẹ ruọ omẹ oma,

O tẹ wha idudu fihọ igbenwa mẹ kpobi.

15 Ẹzi jọ ọ nya aro mẹ vrẹ;

Eto ohọroma mẹ e tẹ zare vi.

16 Kẹsena o te dikihẹ oria ọvo,

Rekọ me vuhu i rie he.

Oware jọ o jọ aro mẹ;

Oria kpobi o tẹ fọ rirẹ, me te yo urru jọ inọ:

18 Rri! O fievahọ idibo riẹ vievie he,

Yọ ọ be jọ oma ikọ-odhiwu* riẹ gwọlọ oruthọ.

19 Kọ ẹvẹ ọ rẹ jọ oma enọ e be rria iwou nọ a rọ ọviẹ bọ ruẹ iruthọ te,

Enọ otọhotọ rai o rrọ ẹkpẹ,*+

Nọ a rẹ sae pẹhẹ lọlọhọ wọhọ ẹwowo!

20 A be pẹhẹ ae no riẹriẹriẹ no ohiohiẹ rite owọwọ;

A bi whu no bẹdẹ bẹdẹ, yọ ohwo ọvo o bi muẹrohọ họ.

 2 Keme evedha i ti kpe ohwo ogheghẹ,

Yọ ihri-eriọ i ti kpe ohwo nọ a rẹ viẹhọ lọlọhọ.

 3 Mẹ ruẹ ogheghẹ na nọ ọ be ta awọ họ otọ,

Rekọ idudhe na a tẹ bọwo oria nọ ọ be rria ehao.

 4 Oma o fọ emezae riẹ vievie he,

A bi kienyẹ* ae evaọ obọ unuẹthẹ okpẹwho na,+ yọ ohwo ọvo o bi siwi ai hi.

 5 Ọnọ ohọo u bi kpe ọ be re eware nọ o bi vu,

Ọ be rehọ ai no udevie idhigbo ze dede,

Agbefẹ o mu eware rai.

 6 Keme orọnikọ ẹkpẹ* eware enwoma i re no ze he,

Yọ otọ uye u re no ze he.

 7 Keme a yẹ ohwo re ọ ruẹ uye,

Wọhọ epanọ erae e rẹ siọ ehru ba ẹsa rri hi na.

 8 Rekọ mẹ te wọ ẹdhọ mẹ se Ọghẹnẹ,

Ọghẹnẹ me ti tu ẹdhọ mẹ bru,

 9 Ọnọ o bi ru eware ilogbo gbe eware nọ a rẹ sae kiẹ otọ rai via ha na,

Eware igbunu nọ i wo unu hu.

10 O re ru oso rrọ fihọ otọakpọ na

Je ru ame hwẹ fihọ etọ na.

11 Ọ rẹ kpare iruori na kpehru,

Yọ ọ rẹ kpare enọ e rrọ ọkora kpehru re a wo esiwo.

12 Ọ rẹ raha omaa ahwo ẹghẹ,

Re a gbẹ sai ru eware nọ a ma omaa rai hi.

13 O re mu* iwareghẹ na evaọ ẹghẹ rai,+

Re o ku omaa iwareghẹ na ku.

14 A rẹ nyaku ebi evaọ uvo,

Yọ a rẹ rọ abọ rara kpenẹ avọ enẹ evaọ uvo kekeke wọhọ ẹsenọ o rrọ aso.

15 O re siwi ahwo no ọgbọdọ unu rai,

O re siwi oyogbe no obọ ọgba,

16 Re oruori na ọ ruẹsi wo ẹruore,

O ve ruru unu enọ i kiẹrẹe he na.

17 Rri! Ohwo nọ Ọghẹnẹ ọ whọku o re wo evawere;

Fikiere whọ siọ ọwhọkuo Erumeru na ha!

18 Keme o re ru ohwo wo edada, rekọ ọ rẹ gba emela riẹ;

O re wiri abava, rekọ ọ rẹ rehọ abọ riẹ siwi kpo.

19 O ti siwi owhẹ no eware okpẹtu ezeza,

Makọ orọ avọ ihrẹ dede o te nwa owhẹ oma ha.

20 O ti siwi* owhẹ no uwhu evaọ etoke nọ ohọo u bi mu,

Je siwi owhẹ no ọgbọdọ evaọ etoke ẹmo.

21 A te thọ owhẹ no ẹrọo nọ a rẹ rọ fa ohwo,+

Yọ whọ te dhozọ họ nọ ọraha ọ tẹ ze.

22 Whọ te hwẹ ọraha avọ ohọo,

Yọ whọ te dhozọ erao ijihẹ otọakpọ na ha.

23 Keme itho obọ ẹwọ na e te nwa owhẹ oma ha,*

Yọ erao ijihẹ obọ ẹwọ na i ti lele owhẹ rria dhedhẹ.

24 Whọ te ruẹ nọ uwou-udhu ra u wo ufuoma,*

Yọ oware ovo u ti vru hu* okenọ who ti rri otọ ra nọ erao e rẹ jọ re ẹbe.

25 Who ti wo emọ buobu,

Yọ emọ ra e te jọ buobu wọhọ ẹbe otọakpọ na.

26 Whọ te gbẹ jọ gaga okenọ who ti kpobọ uki,

Wọhọ ikru ekakọ* nọ a kokohọ evaọ ezi rai.

 2 “Dodokọ a rẹ wawọ idhọvẹ mẹ+ kpobi

Re a fi ei họ iskeli kugbe uye mẹ!

 4 Ese Erumeru na e sa omẹ no,

Yọ ẹzi* mẹ ọ be da obi rai;+

Eware imuozọ nọ i bi no obọ Ọghẹnẹ ze i dhe uhie họ bi bru omẹ ze.

 5 Kọ eketekete ẹwọ+ o re bo nọ ọ tẹ be ruẹ ẹbe re,

Hayo kọ eruẹ o re bo nọ o te wo emu nọ ọ rẹ re?

 6 Kọ a rẹ re emu nọ o wo awere he ababọ uwhei,

Hayo kọ awere jọ ọ rrọ ame ure malo?

 8 Dodokọ a re ru ayare mẹ kẹ omẹ

Re Ọghẹnẹ o ru ẹgwọlọ mẹ kẹ omẹ!

 9 Koyehọ, re Ọghẹnẹ o kpe omẹ no,

Re ọ rriẹ obọ riẹ ro kpe omẹ no!+

10 Makọ oyena dede o te wha omosasọ se omẹ;

Me ve ti duola oghọghọ dede nọ edada mẹ i bi serihọ họ,

Keme mẹ siọ eme Ọrẹri na ha.+

13 Kọ edhere jọ ọ riẹ nọ me re ro ru oware jọ kẹ omamẹ

Nọ a mi omẹ eware kpobi nọ me bi ro yeri akpọ no na?

14 Ohwo kpobi nọ ọ be siọ uyoyou nọ o rẹ hiẹ hẹ ba edhesẹ kẹ ọrivẹ riẹ+

Ọ be dhozọ Erumeru na ha.+

15 Eviẹhọ e da inievo mẹ oma fia+ wọhọ uto nọ ame ọ rẹ jọ evaọ ezi ekpahe,*

Wọhọ ame ito nọ e rẹ kpọ no nọ ezi ekpahe* ọ tẹ vrẹ no.

16 Ekpalekpa-ame i ru rai fihọ viẹviẹ,

Yọ ekpalekpa-ame nọ e be ghra i dhere eva rai.

17 Rekọ oke u ti te nọ ame ọ rẹ rọ kpọ no ai no, e vẹ ya fia;

Nọ ẹrrorro ọ tẹ ze no, e vẹ kpọ muotọ.

18 I re su kpohọ ofẹ ọfa;

I re su kpobọ udhude na, e vẹ kpọ.

19 Ahwo Tima avọ ekamẹle rai+ a be gwọlọ ae;

Ahwo nọ a bi kpohọ erẹ nọ a no obọ Shiba ze*+ a be hẹrẹ ae.

20 Oma o vo rai fikinọ a rẹroso ae;

Nọ a te etẹe a ruẹ ame he.

21 Ere wha rrọ kẹ omẹ;+

Wha ruẹ uye ogaga nọ o rrọ omẹ oma, ozọ u te mu owhai.+

23 Kọ mẹ yare nọ a thọ omẹ no obọ ọwegrẹ

Hayo inọ a siwi* omẹ no obọ enọ i bi kienyẹ omẹ?

24 Ta ẹme kẹ omẹ,* me ti fibo;+

Fiobọhọ kẹ omẹ vuhu ethobọ mẹ mu.

26 Kọ wha be gwọlọ oria nọ mẹ jọ ta thọ re wha whọku omẹ,

Eme ohwo nọ uye o be bẹ,+ nọ ofou o re fou kufiẹ?

27 Koyehọ wha te ma ẹta fiki ọmọ nọ o wo ọsẹgboni hi re,+

Wha vẹ te jẹ zẹ* ogbẹnyusu obọrai!+

28 Fikiere wha kuomarẹriẹ re wha rri omẹ,

Keme mẹ te ta ọrue kẹ owhai hi.

29 Ivie wha wariẹ roro onana, wha mu omẹ brukpe he,

Ẹhẹ wha wariẹ roro iei, keme ẹrẹreokie mẹ ọ gbẹ rrọ kothi.

7 “Kọ uzuazọ ohwo evaọ otọakpọ na o gbẹ wọhọ iruo ọgbahọ,

Kọ edẹ riẹ e gbẹ wọhọ erọ ohwo nọ a rehọ iruo?+

 2 Wọhọ ọrigbo, o bi rẹro eriosehọ* gaga,

Wọhọ ohwo nọ a rehọ iruo, ọ be hẹrẹ osa riẹ.+

 3 Fikiere a kẹ omẹ emerae erọ uye-oruẹ kufiẹ

Yọ a kẹ omẹ eso buobu nọ mẹ rẹ rọ reakọ.+

 5 Ihoi gbe okpa iluhu e vọ omẹ oma;+

Emela nọ e va fihọ gbe eruẹso nọ e ruọ ori no e vọ ohọroma mẹ.+

 6 Edẹ mẹ e be dhẹ vẹrẹ vi ọkpọ nọ a whaliẹ ufi fihọ bi ro zuo eware,+

Yọ i ti kuhọ ababọ ẹruore.+

 7 Kareghẹhọ nọ uzuazọ mẹ yọ ofou,+

Inọ ubiẹro mẹ o gbẹ te ruẹ evawere* ofa ha.

 8 Ubiẹro nọ o be ruẹ omẹ enẹna o gbẹ te ruẹ omẹ ofa ha;

Ibiaro rai e te gwọlọ omẹ, rekiyọ mẹ nyavrẹ no.+

 9 Wọhọ ẹgho nọ ọ rẹ hiẹ jẹ rayẹ no,

Ọnọ o bi kpobọ Uki* o re gbe zihe ze he.+

10 Ọ rẹ gbẹ wariẹ zihe kpobọ uwou riẹ hẹ,

Yọ a gbẹ te ruẹ e riẹ evaọ oria riẹ ofa ha.*+

Mẹ te rehọ evedha mẹ ta ẹme;

Mẹ te rehọ idhọvẹ egaga nọ e rrọ omẹ oma* ta ẹme!+

12 Kọ mẹ yọ abade hayo arao ologbo obọ abade,

Nọ who bi ro fi umuo họ kẹ omẹ?

13 Nọ mẹ tẹ ta nọ, ‘Ehwa mẹ e te sasa omẹ oma;

Gbe nọ ehwa mẹ i ti ru oma voro omẹ omojọ,’

14 Whọ vẹ rọ ewezẹ ru ozọ mu omẹ

Jẹ rọ eruẹaruẹ fi idudu họ omẹ oma,

15 Re mẹ* salọ nọ mẹ rẹ seba ẹwẹ,*

Ẹhẹ, uwhu viukpọ ugboma mẹ nana.*+

17 Eme ohwo-akpọ ọ rrọ nọ who je bi fiẹrohọ iẹe

Nọ whọ jẹ tẹrovi ei?*+

18 Fikieme who bi ro rri rie kohiohiẹ kohiohiẹ

Nọ whọ be rọ dawo iẹe evaọ oke kpobi?+

19 Kọ who gbe si ẹro ra no omẹ re who rri obọfa?

Kọ whọ gbẹ kẹ omẹ uvẹ kri te epanọ me re ro si eya lọ?+

21 Fikieme whọ gbẹ rọ iruthọ mẹ vrẹ omẹ hẹ

Jẹ kpairoro vrẹ uzioraha mẹ hẹ?

Keme kẹle na me ti kiẹzẹ evaọ ẹkpẹ,+

Whọ te gwọlọ omẹ, rekiyọ mẹ nyavrẹ no.”

 3 Kọ Ọghẹnẹ ọ rẹ siọ oziẹ okiẹrẹe ba ebru,

Hayo kọ Erumeru na ọ rẹ siọ oware nọ u kiẹrẹe ba eru?

 4 Otẹrọnọ emezae ra a raha uzi riẹ,

Ọ kuvẹ re uye u te ai fiki ọkparesuọ rai;*

 5 Rekọ otẹrọnọ who re bo se Ọghẹnẹ+

Jẹ lẹ Erumeru na inọ o rri owhẹ aro,

 6 Yọ otẹrọnọ whọ ginẹ fo je kiete,+

Ọ te gaviezọ kẹ owhẹ*

Je zihe owhẹ ziọ epanọ whọ jọ vẹre.

 7 Yọ dede nọ eware nọ who wo evaọ emuhọ i tulo ho,

Akpọ ra o ti woma gaga evaọ obaro.+

 8 Ivie, nọ mi oge nọ ọ vrẹ,

Re whọ jẹ gaviezọ kẹ eware nọ esẹ rai a ruẹ vuhumu.+

 9 Keme odẹnukpo gheghe a yẹ omai, yọ ma riẹ oware ovo ho,

Edẹ uzuazọ mai evaọ otọakpọ na e wọhọ uwoho.

10 Kọ a gbẹ te vuẹ owhẹ oware nọ who re ru

Jẹ ta oware nọ a riẹ kẹ owhẹ?*

12 Nọ ọ gbẹ rrọ ọboba* na, nọ a re nawo iẹe he na,

O vẹ te kake rehọ ebe efa whu no.

13 Enẹ ahwo kpobi nọ a kiukeku Ọghẹnẹ a re ro ku uzuazọ rai họ,*

Keme irẹro ahwo nọ a be gọ Ọghẹnẹ hẹ* i re rugba ha,

14 Enọ evaifihọ rai o rrọ uvrẹvru

Enọ ẹruọrọsuọ rai ọ rrọ deghe deghe wọhọ uwou aruẹ.*

15 Ọ te roma rẹrẹ uwou riẹ, rekọ u ti dikihẹ kri hi;

Ọ te gwọlọ gbe kru rie, rekọ u ti kri ẹraha ha.

16 Ohwo yena yọ ẹbe nọ ọ rrọ vuavo nọ ọ rrọ uvo,

Nọ egha riẹ e za fihọ evaọ ọgbọ na.+

17 Awọ riẹ i thuru ohwohwo evaọ otọ itho nọ a kwa koko,

Ọ be gwọlọ uwou evaọ udevie itho.*

18 Rekọ nọ a te vi ei* no oria riẹ no,

Oria yena o vẹ te se iẹe inọ, ‘Mẹ re ruẹ owhẹ ẹdẹvo ho.’+

19 Nwanọ ere o ti ro whu;*+

Kẹsena efa i ve ti no otọ ze.

20 Evaọ uzẹme, ohwo nọ o kru ẹgbakiete riẹ,* Ọghẹnẹ ọ rẹ se iẹe he;

Yọ o re fiobọhọ kẹ* ahwo omuomu hu,

21 Keme o ti ru re ehwẹ e jọ owhẹ unu ẹsikpobi

Je ru re who bo ubo oghọghọ ẹsikpobi.

22 A ti ku omovuọ họ oma enọ i bi mukpahe owhẹ wọhọ ewu,

Yọ uwou-udhu ahwo omuomu o gbẹ te jọ họ.”

 3 Otẹrọnọ ohwo jọ ọ gwọlọ lele iei vro avro,*+

Ohwo yena ọ sae za onọ ọvo ho nọ ọ tẹ nọ enọ odu ọvo (1,000).

 5 Ọ rẹ wọ* igbehru no oria, ohwo ọvo ọ rẹ riẹ hẹ;

Ọ rẹ rọ evedha gele ai kie.

 6 O re nuhu otọakpọ na no ẹta riẹ,

Ipila riẹ i ve muhọ enuhu.+

 7 O jie uzi kẹ ọre na nọ ọ va ze he

O di elo isi na;+

 8 Ọye ọvo ọ rriẹ odhiwu na họ,+

Yọ ọ rẹ nya ehru ẹkporo ọgaga abade.+

 9 Ọ ma ẹko isi Ash,* ẹko isi Kisil,* gbe ẹko isi Kaema,*+

Te eko isi nọ e rrọ ehru evaọ obọze ovatha-ọre na;*

10 O re ru eware ilogbo nọ a rẹ sae kiẹ otọ rai via ha,+

Eware igbunu nọ a rẹ sai kele mu hu.+

11 Ọ rẹ nya akotọ mẹ vrẹ, yọ mẹ rẹ sae ruẹ e riẹ hẹ;

Ọ rẹ nyavrẹ omẹ, rekọ mẹ rẹ riẹ hẹ.*

13 Ọghẹnẹ ọ te gba ofu riẹ hẹ;+

Makọ enọ i bi fiobọhọ kẹ Rehab*+ a ti guzou kpotọ kẹe.

14 O tubẹ mae gwọlọ nọ mẹ rẹ romakpotọ nọ mẹ tẹ be kpahe ẹme kẹe

Mẹ rẹ nabe ma ẹme mẹ te nọ me te bi lele iei vro avro!

U mu omẹ ẹro nọ ọ te gaviezọ kẹ urru mẹ hẹ,

17 Keme ọ be rehọ ofou ọwhibo guọghọ omẹ.

Yọ ọ be nwa omẹ oma ẹnwẹnwa dede nọ me ru oware ovo thọ họ.+

18 Ọ be jọ omẹ wẹ hẹ;

Eware eyayare ọvo ọ be kẹ omẹ re.

20 Otẹrọnọ mẹ họ ọnọ ọ riẹ ru, unu obọmẹ u ti brukpe omẹ;

Mẹ tẹ maki kru ẹgbakiete mẹ,* o ti bruoziẹ nọ mẹ reabe.*

21 Mẹ tẹ maki kru ẹgbakiete mẹ,* mẹ rẹ sae robọ sudu hu;*

Uzuazọ mẹ o vẹso omẹ no.*

22 Eware na kpobi epọvo na. Oyejabọ nọ mẹ rọ ta nọ,

‘Ọ rẹ raha ahwo nọ a ru oware ovo thọ họ* kugbe ahwo omuomu.’

23 Otẹrọnọ owhe nọ ọ rẹ wọ ze ẹsiẹvo o kpe ahwo idudhe,

Ọ rẹ hwẹ ahwo nọ a ru oware ovo thọ họ nọ uye o be bẹ.

24 A fi otọakpọ họ obọ ahwo omuomu no;+

O ruru aro* ibruoziẹ riẹ.

25 Whaọ enẹna edẹ uzuazọ mẹ e be dhẹ vẹrẹ vi ohwo nọ ọ be dhẹ ohrẹ;+

E be dhẹ vrẹ ababọ oware uwoma nọ mẹ be ruẹ.

26 E be whra vrẹ ọvo wọhọ okọ nọ a rehọ ikpoko ku,

Wọhọ igo nọ i bi vo mu oware nọ a bi mu.

27 Mẹ tẹ ta nọ, ‘Mẹ rẹ siọ eware nọ e be kẹ omẹ uye ba ẹta via,

Mẹ rẹ sasa ovao jẹ wereva,’

28 Ozọ u ti mu omẹ ghele fiki edada mẹ kpobi,+

Yọ mẹ riẹ nọ mẹ te rease evaọ obọ ra ha.

30 Mẹ tẹ rọ ame nọ ọ ghra no ekpalekpa-ame ze rọ họ,

Jẹ rehọ odha* wozẹ abọ mẹ fo,+

31 Who ve ti duwu omẹ họ ọgọdọ,

Re mẹ jọ tọtọtọ rọkẹ iwu mẹ dede.

32 Keme ọ rrọ ohwo wọhọ omẹ hẹ nọ mẹ jẹ kpahe ẹme kẹe,

Nọ mẹ avọ iẹe ma re ro kpohọ okọto.+

33 Ohwo ọvo ọ riẹ hẹ nọ o ti bruoziẹ* mai,

Ọnọ ọ sae jọ obruoziẹ mai.*

34 Otẹrọnọ ọ rẹ siọ omẹ ba ekpe*

Jẹ siọ idudu riẹ ba ẹwhẹhọ omẹ oma,+

35 Mẹ vẹ te ta ẹme kẹe ababọ ozọ,

Keme mẹ riẹ epanọ a rẹ rọ ozọ ta ẹme he.

 3 Kọ who re wo erere jọ nọ who te bi kienyẹ ohwo,

Re iruo abọ ra e dha owhẹ eva+

Nọ ohrẹ ohwo omuomu o be rọ were owhẹ?

 4 Kọ ibiaro ahwo-akpọ who wo,

Hayo who re rri oware oghẹrẹ nọ ohwo-akpọ gheghe* o re rri oware?

 5 Kọ edẹ uzuazọ ra e wọhọ edẹ uzuazọ ahwo-akpọ,

Hayo kọ ikpe ra e wọhọ erọ ohwo,+

 6 Nọ whọ be rọ kiẹ oruthọ mẹ via

Jẹ be gwọlọ izieraha mẹ kẹse kẹse?+

 7 Whọ riẹ nọ mẹ reabe he;+

Yọ ohwo ọvo ọ rẹ sai siwi omẹ no obọ ra ha.+

 8 Whẹ ọvo ọ rehọ abọ ra ruẹrẹ omẹ họ jẹ ma omẹ,+

Rekọ obọnana whọ be raha omẹ no riẹriẹriẹ.

 9 Ivie kareghẹhọ nọ ọviẹ whọ rọ ma omẹ,+

Rekọ obọnana who bi ru omẹ zihe kpohọ ovu.*+

10 Kọ ogbẹrọnọ whẹ họ ọnọ o ku omẹ fihọ oria wọhọ ame-ivie

Je ru omẹ dhẹmu wọhọ ichizi?*

11 Whọ rehọ ohọroma gbe uwo ruru omẹ,*

Jẹ rehọ igbenwa gbe iriẹ ro zuo omẹ kugbe.+

12 Whọ kẹ omẹ uzuazọ je dhesẹ uyoyou nọ o rẹ hiẹ hẹ kẹ omẹ;

Whọ rẹrote uzuazọ* mẹ jẹ sẹro riẹ.+

14 Mẹ tẹ raha uzi, whọ rẹ riẹ,*+

Yọ whọ rẹ rehọ iruthọ mẹ vrẹ omẹ hẹ.

O tẹ make rọnọ me ru oware ovo thọ họ, mẹ rẹ sae kpare uzou mẹ hẹ,+

Keme omovuọ gbe oja-oriọ e da omẹ oma fia.+

16 Mẹ tẹ kpare uzou mẹ kpehru, who ve mu omẹ họ ẹgwọlọ tuatuatua wọhọ okpohrokpo+

Whọ vẹ wariẹ dhesẹ ogaga ra kẹ omẹ.

17 Whọ rehọ isẹri ekpokpọ ze re a se isẹri kpe omẹ

Ofu ra kpahe omẹ o tẹ jẹ wariẹ ga,

Ebẹbẹ i te bi kie ruru omẹ unọjọ utọjọ.

19 O hae jọ wọhọ ẹsenọ mẹ ziọ uzuazọ vievie he;

A hae nwane wọ omẹ no edhede ze kpobọ uki ovavo.’

20 Kọ edẹ mẹ e gbẹ kawo?+ Jọ ọ kẹ omẹ uvẹ;

Jọ o si ibiaro riẹ no omẹ re oma o dina fọ omẹ*+

21 Taure mẹ tẹ te nyavrẹ, nọ me gbe ti ro zihe ze he+

Kpobọ ẹkwotọ okpa ebi,*+

22 Obọ ẹkwotọ nọ ebi ọvo ọ rrọ,

Ẹkwotọ okpa ebi,* nọ eware kpobi e jẹ rrọ whọhọ whọhọ,

Oria nọ makọ elo riẹ dede ọ wọhọ ebi ọlala.”

 2 “Kọ a re fibo nọ a gbẹ kpahe ẹme ọvuọvo fihọ eme nana kpobi hi,

Hayo kọ ọtabuo o re ru ohwo fihọ emamọ ohwo?*

 4 Keme whọ ta nọ, ‘Eware nọ me bi wuhrẹ e rrọ gbagba,*+

Yọ mẹ rrọ fuafo evaọ aro ra.’+

 5 Dodokọ Ọghẹnẹ ọvo ọ rẹ ta ẹme

Re o rovie igbenu riẹ kẹ owhẹ!+

 6 O ve ti dhesẹ edidi areghẹ kẹ owhẹ,

Keme uvi areghẹ u re wo abọ buobu.

 7 Kọ whọ sae kiẹ eware ididi Ọghẹnẹ via

Hayo riẹ oware kpobi kpahe* Erumeru na?

 9 U theri vi otọakpọ na

Jẹ kẹre vi abade na.

10 Otẹrọnọ ọ nya akotọ ohwo vrẹ o je kru ohwo, nọ o je se ahwo ziọ ekọto,

Ono ọ rẹ sae whaha iẹe?*

12 Rekọ ohwo nọ ọ kare iroro o ti wo otoriẹ riẹ

Otẹrọnọ eketekete ẹwọ ọ rẹ sai yẹ ohwo-akpọ.*

13 Dodokọ whọ rẹ ruẹrẹ udu ra họ

Re whọ rriẹ abọ ra bru ei.

14 Otẹrọnọ whọ be rọ obọ ra ru oware uyoma, siomanoi thethabọ,

Whọ jọ umuomu ovuovo o jọ eva iwou-udhu ra ha.

15 Kẹsena whọ vẹ sae kpare ovao ra kpehru ababọ epe;

Whọ vẹ sai dikihẹ kothi ababọ ozọ.

16 Uye ra o vẹ te thọrọ owhẹ ẹro no;

Whọ vẹ te kareghẹhọ iẹe wọhọ ame nọ o su vrẹ owhẹ no.

17 Uzuazọ ra u ve ti lo vi uvo kekeke;

Makọ ebi riẹ dede o te jọ wọhọ ohiohiẹ.

18 Udu o te jọ owhẹ awọ keme who wo ẹruore,

Who ve ti rri wariẹ họ je kiẹzẹ avọ omofọwẹ.

19 Who ti kiẹzẹ ababọ ohwo jọ nọ o re ru ozọ mu owhẹ,

Yọ ahwo buobu a te gwọlọ aruoriwo ra.

20 Rekọ ibiaro ahwo omuomu i ti tu;

A te ruẹ oria ovuovo nọ a rẹ rọ dhẹ vabọ họ,*

Ẹruore nọ a ti wo kpobi họ uwhu.”*+

 2 “Whai họ ahwo nọ a mae riẹ eware,*

Yọ areghẹ o ti lele owhai whu!

 4 Me zihe ruọ ohwo nọ erivẹ mẹ a be rọ ta atahwẹ no,+

Ọnọ o bi bo se Ọghẹnẹ re o yo kẹe.+

 5 Ohwo nọ ọ be reakpọ ọ rẹ gwọlọ uye vievie he,

O re roro nọ oyena o rrọ kẹ ahwo nọ awọ rai ọ dọmu otọ họ* ọvo.

 6 Udhedhẹ o rrọ iwou-udhu igbulegbu,+

Yọ enọ i bi ru eva dha Ọghẹnẹ a wo omofọwẹ,+

Enọ emedhọ rai e rrọ obọ rai.

 7 Rekọ, ivie, nọ erao na, a ti wuhrẹ owhẹ;

Gbe evra obọ ehru* na, a te vuẹ owhẹ.

 8 Hayo nabi rri* otọakpọ na, o ti wuhrẹ owhẹ;

Yọ iyei obọ abade na a te vuẹ owhẹ.

 9 Ọvẹ evaọ usu enana kpobi ọ riẹ hẹ

Inọ obọ Jihova u ru eware nana?

10 Obọ riẹ uzuazọ* oware kpobi nọ o be rria uzuazọ o rrọ

Gbe ẹzi* ohwo-akpọ* kpobi.+

11 Kọ ogbẹrọnọ ozọ o rẹ dawo ẹme

Wọhọ epanọ ẹrọo* ọ rẹ dawo emu na?+

12 Kọ ogbẹrọnọ ahwo nọ a kpako no a re wo areghẹ,+

Kọ ahwo nọ a rria akpọ kri no a re wo otoriẹ?

13 Ọye họ ọnọ o wo areghẹ gbe ogaga;+

O wo ẹjiroro* gbe otoriẹ.+

14 Nọ o te kporo oware jọ fihọ otọ, a rẹ sae wariẹ bọe he;+

Oware nọ ọ kare, ohwo ọvo ọ rẹ sai rovie iei hi.

15 O gbe siobọno ame he, oware kpobi o rẹ ya fia;+

O te siobọnoi ze, o ve ruru otọakpọ na.+

16 Ọye họ ọnọ o wo ẹgba gbe uvi areghẹ;+

Ọye o wo ọnọ ọ be nyathọ gbe ọnọ o bi su ohwo thọ;

17 O ru ekohrẹ be nya awọ gheghe,*

O ru ibruoziẹ fihọ gheghẹ.+

18 Ọ fere ifi nọ ivie e rọ gba ahwo no,+

Ọ tẹ rọ umueku mu eku rai.

19 O ru izerẹ nya awọ gheghe,+

Yọ o si enọ e dowọ muotọ kothi evaọ isuẹsu no esuo rai;+

20 O ru nọ ekiroro nọ a fievahọ a gbẹ be ruẹ ẹme ta ha

Yọ o mi ekpọkuezae* areghẹ;

21 O kpomovuọ họ ikpahwo oma,+

O te je ru egba fihọ eyẹlẹ;*

22 O bi dhesẹ eware ididi nọ e rrọ eva ebi via,+

Yọ o bi ru elo lo fihọ okpa ebi;

23 O bi ru erẹwho rro re ọ ruẹse raha ae no;

O bi ru ẹkwotọ erẹwho kẹre, re o su ai kpohọ igbo.

24 O mi isu ahwo na areghẹ*

Je ru ai bi ghoro evaọ etọ nọ e raha no nọ idhere e rrọ họ.+

25 A be rọ abọ rara evaọ ebi,+ oria nọ elo ọvo ọ rrọ họ;

O ru rai bi ghoro kpenẹ avọ enẹ wọhọ ezae nọ e da idi bẹ.+

13 “Ẹhẹ, ubiẹro mẹ o ruẹ eware nana kpobi no,

Ozọ mẹ u yo no, yọ me wo otoriẹ rai no.

 2 Eware nọ wha riẹ, mẹ riẹ rai re;

Orọnikọ wha riẹ* vi omẹ hẹ.

 3 Rọkẹ omẹ, Erumeru na mẹ gwọlọ ta ẹme mẹ kẹ;

Ọghẹnẹ họ ọnọ mẹ gwọlọ gu ẹdhọ mẹ kẹ.+

 4 Rekọ wha be rọ ọrue họ omẹ;

Whai kpobi yọ ebo-imu nọ i fioka ha.*+

 5 O hai woma re wha fibo ọvo,

Oyena u ti dhesẹ nọ wha wo areghẹ.+

 6 Ivie wha gaviezọ kẹ ẹkẹ unu mẹ,

Jẹ kezọ kẹ eware nọ mẹ be rọ igbenu mẹ yare na.

 7 Kọ wha rẹ ta ogbẹta inọ Ọghẹnẹ wha be thọ,

Jẹ ta eme eviẹhọ kpahe iẹe?

 8 Kọ whai họ enọ e be thọe,*

Kọ wha be gwọlọ dikihẹ kẹ Ọghẹnẹ uzẹme na evaọ ẹdhọ riẹ?

10 Ọ te siọ owhai ba ẹwhọkuo ho

Wha tẹ be gwọlọ lẹlẹ dhesẹ ọriẹwẹ.+

11 Kọ oruaro riẹ o gbẹ te lẹliẹ ozọ mu owhai

Nọ idudu riẹ e te rọ ruọ owhai oma?

12 Eme areghẹ* rai yọ ehare nọ e wọhọ enwo;

Eme nọ wha be ta ro gu ẹkẹ unu* rai i wo ẹgba ha wọhọ ugbẹhẹ nọ a rọ ọviẹ ma.

14 Fikieme me re ro fi oma mẹ họ ọza*

Je fi uzuazọ* mẹ họ evabọ mẹ?

15 Dede nọ ọ rẹ sai kpe omẹ kufiẹ, mẹ te gbẹ hẹrẹ ghele;+

Me ti gu ẹkẹ unu mẹ* evaọ aro riẹ.

16 Kẹsena o ve ti zihe ruọ osiwi mẹ,+

Keme ohwo nọ ọ be gọ Ọghẹnẹ hẹ* ọ sae nyaziọ aro riẹ hẹ.+

17 Wha gaviezọ ziezi kẹ eme mẹ;

Wha nabe kezọ kẹ eme nọ mẹ be ta.

18 Whaọ rri, mẹ ruẹrẹ ẹdhọ nọ me ti gu kpahe no;

Mẹ riẹ nọ me ru thọ họ.

20 Ru eware ivẹ ọvo kẹ omẹ,* O Ọghẹnẹ,

Re mẹ gbẹ ko oma mẹ dhere owhẹ hẹ:

21 Wọ obọ ogbẹgbẹdẹ ra thabọ no oma mẹ no,

Whọ jọ ozọ ra o whẹ iguegue họ omẹ oma ha.+

22 Se omẹ, me ti yo kẹ owhẹ,

Hayo jọ omẹ ta ẹme, re whọ kpahe kẹ omẹ.

24 Fikieme whọ rọ kuọ ovao ra dhere+

Nọ whọ rọ rehọ omẹ wọhọ ọwegrẹ ra?+

25 Kọ whọ rẹ gwọlọ epanọ who re ro guegue ohẹhẹ-obe nọ ofou o bi fou

Hayo le ẹbe ọyaya?

26 Keme whọ ruabọhọ bi kere eware iyoma nọ me ru hu fihotọ,

Yọ whọ be kẹ omẹ uye fiki izi nọ mẹ raha evaọ oke uzoge mẹ.

27 Whọ kare awọ mẹ fihọ ewẹ-ekpala ekarọ,*

Whọ be kiẹ otọ idhere mẹ kpobi,

Yọ who bi lele ithihi awọ mẹ kpobi.

28 Fikiere ohwo* o te bi gbo no wọhọ oware ugbogbo,

Wọhọ ewu nọ emera e re no.

14 “Ohwo nọ aye o yẹ,

Ọ rẹ tọ họ,+ yọ uzuazọ riẹ o vọ avọ uye.*+

 2 Ọ rẹ rro ze bọbọbọ wọhọ ododo kẹsena o ve lo no;*+

Ọ rẹ dhẹ vẹrẹ vẹrẹ wọhọ uwoho, a gbẹ ruẹ e riẹ hẹ.+

 3 Ẹhẹ, whọ tẹrovi ei,

Yọ whọ rehọ e riẹ* ze ti guẹdhọ.+

 5 Otẹrọnọ a fodẹ unu edẹ nọ ọ te rria no,

Unu emerae riẹ e rrọ owhẹ obọ;

Who fi umuo nọ ọ rẹ rria ba fihọ kẹe no, yọ ọ rẹ sae rria vrẹ ere he.+

 6 Si ibiaro ra nọ whọ tọvi ei na no re ọ ruẹsi serihọ,

Bẹsenọ o re ru iruo okpẹdẹ riẹ re, wọhọ ohwo nọ a rehọ iruo.+

A te koi fihọ otọ, o rẹ wariẹ ta ze,

Egha riẹ e rẹ ruabọhọ rro ọvo.

 8 Otẹrọnọ awọ riẹ o kri otọ no

Yọ ehri riẹ o whu fihọ otọ no,

 9 Nọ o te se ore ame, ọ vẹ ta ze;

Ọ vẹ ta egha ze wọhọ okakọ oboba.

10 Rekọ ohwo o te whu, o re gbe wo ogaga ovo ho;

Nọ ohwo-akpọ o te se ẹwẹ họ no, bovẹ ọ rrọ?+

11 Ame o re no eva abade,

Yọ ethẹ o re su kpọ ọ vẹ ya muotọ.

Bẹsenọ odhiwu ọ rẹ vrẹ no, ọ rẹ rọwo ze he,

Yọ a rẹ sae rọwo iẹe no owezẹ riẹ ze he.+

13 O dodokọ who re si omẹ no họ obọ Uki,*+

Re who si omẹ no bẹsenọ ofu ra ọ rẹ vrẹ,

Re who fi oke jọ họ kẹ omẹ jẹ kareghẹhọ omẹ!+

Mẹ te hẹrẹ evaọ edẹ iruo ọgbahọ mẹ kpobi

Ri bọo oke obusino mẹ.+

16 Rekọ enẹna, who bi kele ithihi awọ mẹ kpobi;

Yọ izieraha mẹ ọvo who bi rri.

17 Who fi izieraha mẹ họ ẹkpa, whọ tẹ gbae di,

Whọ rehọ egọmu gba iruthọ mẹ di.

18 Wọhọ epanọ igbehru i re kie guọghọ kufiẹ na

Nọ itho i re no eria rai na,

19 Wọhọ epanọ ame ọ rẹ fa itho no na,

Nọ ẹkẹre ame ọ rẹ fa ẹkpẹ vrẹ na,

Ere whọ raha ẹruore ohwo-akpọ no.

20 Whọ be ga obọ vi ei bẹsenọ o re whu no;+

Who nwene oghẹrẹ nọ ọ rrọ, who te vi ei vrẹ.

21 A kẹ emezae riẹ orro, rekọ ọ riẹ hẹ;

A zihe ruọ enọ i fioka ha, rekọ o vuhu i rie mu hu.+

22 Nọ ọ gbẹ rrọ uzuazọ na ọvo oware o rẹ rọ dae;

Nọ ọ* gbẹ rrọ uzuazọ na ọvo o re ro weri.”

 2 “Kọ ohwo nọ o wo areghẹ ọ rẹ kpahe eme nọ i fioka ha,*

Hayo kọ ọ rẹ rọ ofou obọ ovatha-ọre vọ eva riẹ?

 3 Eme gheghe nọ a rẹ rọ whọku ohwo u wo otọ họ,

Yọ ẹmeọta gheghe ọ rẹ wha erere ọvuọvo ze he.

 4 Keme who se ozodhẹ Ọghẹnẹ gboware ovo ho,

Yọ whọ be daezọ Ọghẹnẹ hẹ.

 5 Keme oruthọ ra o be lẹliẹ owhẹ ta eme nọ whọ be ta na,*

Whọ salọ eme ẹghẹ.

 6 Unu obọra ọvo u bi bruoziẹ kpe owhẹ na orọnikọ omẹ hẹ;

Igbenu obọra ọvo i bi se isẹri kpe owhẹ na.+

 7 Kọ whẹ họ ohwo ọsosuọ nọ a yẹ,

Manikọ a yẹ owhẹ no taure ikpehru na e tẹ te ze?

 8 Kọ whọ be hae gaviezọ kẹ eme idhere* Ọghẹnẹ,

Hayo kọ who roro nọ whẹ ọvo o wo areghẹ?

10 Te enọ i wo eza-uzou no gbe enọ e kpako no a rrọ udevie mai,+

Ezae nọ i vi ọsẹ ra thethabọ.

11 Kọ omosasọ nọ Ọghẹnẹ ọ be kẹ owhẹ u gbe te kẹ owhẹ,

Te eme nọ a be nabe rọ unu kpotọ ta kẹ owhẹ?

12 Fikieme udu ra u bi ro su owhẹ thọ,

Ẹvẹ ibiaro ra i bi ro dhesẹ nọ ofu ọ rrọ owhẹ eva?

13 Keme who bi mu ofu kẹ* Ọghẹnẹ omariẹ,

Yọ whọ be kuvẹ re eme itieye na i no unu ra ze.

14 Kọ ono họ ohwo-akpọ gheghe* nọ ọ rẹ rọ jọ fuafo,

Hayo ohwo nọ aye o yẹ nọ o re ro kiẹrẹe?+

15 Rri! O fievahọ erẹri riẹ hẹ,

Makọ odhiwu na dede ọ fo evaọ aro riẹ hẹ.+

16 Kabikọ ohwo nọ ọ rrọ tọtọtọ jẹ rrọ muomu,+

Ohwo nọ ọ be da umuomu wọhọ ame!

Me ti gbiku oware nọ mẹ ruẹ no,

18 Oware nọ ezae iwareghẹ a gbiku rai no nọ a yo mi esẹ rai,+

Eware nọ a ko dhere he.

19 Ae ọvo a rehọ otọ na kẹ,

Ọrara ọvuọvo ọ nya udevie rai vrẹ hẹ.

20 Ohwo omuomu ọ rẹ reoja evaọ edẹ uzuazọ riẹ kpobi,

Evaọ ikpe kpobi nọ a fihọ kẹ osu ọgeva.

21 Ọ be rehọ ezọ riẹ yo edo ozọ;+

Evaọ oke udhedhẹ itu igbulegbu a rẹ wọ ohọre bru ei ze.

22 U mu rie ẹro nọ ọ te dhẹ vabọ no ebi hi;+

Ọgbọdọ ọ be hẹrẹ iẹe.

24 Idhọvẹ gbe uye i bi ru ozọ mu ei;

E ga vi ei wọhọ ovie nọ ọ ruẹrẹ oma kpahe no re ọ wọ ohọre ze.

25 Keme ọ kpare obọ riẹ wọso Ọghẹnẹ omariẹ

Erumeru na ọ be gwọlọ rri vo* na;

26 Ọ be gbaudu họrọ bru ei,

Avọ ojese ọgaga riẹ nọ u wo okpa.*

27 Iwhri e lẹliẹ ovao riẹ fu fihọ,

Yọ igbeku riẹ e rro fihọ fiki iwhri;*

28 Ọ be rria ikpewho nọ a te raha no,

Eva iwou nọ ohwo ọvo ọ te rria ha,

Nọ i ti zihe ruọ ezuzu itho.

29 O ti fe he, yọ eware riẹ i ti bu hu,

Ekwakwa riẹ e te vọ ẹkwotọ na gbe he.

30 Ọ te dhẹ vabọ no ebi hi;

Ebruerae o ti ru omogha riẹ nọ o be ta ze* yamu,

Yọ erri ofu nọ o no unu Ọghẹnẹ* ze o ti kpei no.+

31 Jọ ọ nyathọ họ re o fievahọ oware nọ u fioka ha,

Keme oware nọ u ti noi ze tei u ti fioka gbe he;

32 O te via taure ẹdẹ riẹ o te ti te,

Yọ egha riẹ e te rro vievie he.+

33 Ọ te wọhọ ure evaene nọ ibi riẹ nọ e re ware he i bi kie kufiẹ,

Jẹ wọhọ ure olivi nọ idodo riẹ i bi kie kufiẹ.

34 Keme ogbotu ahwo nọ a be gọ Ọghẹnẹ hẹ* a re wo oware ovo ho,+

Yọ erae e te mahe iwou-udhu udi-oriọ.

35 A re di eva uye họ a ve yẹ oware umuomu,

Yọ edhede rai ọ vọ avọ eviẹhọ.”

O hae jọ nọ whai oware nana o via kẹ,*

Mẹ hae sae yẹ ẹme kẹ owhai re

Je nuhu uzou mẹ kẹ owhai.+

 5 Rekọ ukpoye, mẹ hae te rọ ẹmeunu mẹ bọ owhai ga,

Jẹ rehọ eme omosasọ nọ i bi no igbenu mẹ ze ru oma voro owhai.+

 6 Mẹ tẹ ta ẹme, u re ru edada mẹ serihọ họ,+

Yọ mẹ tẹ siọ ẹme ba ẹta, kọ edada mẹ i re gine kpotọ?

 7 Rekọ enẹna o ru oma rrọ omẹ no;+

Ọ raha uwou mẹ* kpobi kuotọ no.

 8 Whọ tẹ jẹ duọ omẹ, onana o tẹ rrọ isẹri,

Oma mẹ nọ o dọ fihọ na u bi se isẹri kpe omẹ.

10 A rovie unu rai fihọ kẹkẹe rọsuọ omẹ,+

Yọ a be rọ omẹ jijehwẹ, be tehe omẹ abovao;

A kokohọ buobu ze rọsuọ omẹ.+

11 Ọghẹnẹ ọ rehọ omẹ họ obọ emezae eboba na,

O tu omẹ họ obọ ahwo omuomu.+

12 Me wo idhọvẹ vẹre he, rekọ ọ tẹ bẹre omẹ fihotọ;+

Ọ jọ obemu duọ omẹ uriohọ, ọ tẹ guọghọ omẹ no;

Ọ tẹ be họre omẹ.

13 Ahwo riẹ nọ a rẹ sa ese e wariẹ omẹ họ;+

Ọ sa* ibieku mẹ+ ababọ ọdawẹ;

O ku ẹvẹvẹ* mẹ fihọ otọ.

14 O bi kporo ighogho fihọ omẹ oma ọvo wọhọ ugbẹhẹ;

Ọ họrọ mu omẹ wọhọ ọgbaẹmo.

15 Me ko ehọ-ekpa* ro ruru ohọroma mẹ,+

Me ki orro* mẹ fihọ otọ ẹkpẹ no.+

16 Mẹ viẹ aro ware no,+

Ebi* o ruru ikuele-aro* mẹ,

17 Onana o via dede nọ mẹ rọ abọ ru oware ozighi ovuovo ho

Yọ mẹ lẹ emamọ olẹ.

19 Makọ enẹna, obọ odhiwu osẹri mẹ ọ rrọ;

Ọnọ ọ rẹ sai se isẹri kẹ omẹ ọ rrọ oria nọ u kpehru.

20 Egbẹnya mẹ a be rọ omẹ se ẹkoko+

Nọ ẹro mẹ ọ be viẹ se Ọghẹnẹ na.*+

21 Jọ ohwo jọ ọ nyaze ti bruoziẹ ohwo-akpọ avọ Ọghẹnẹ,

Wọhọ epanọ ohwo o re bruoziẹ ohwo avọ ọrivẹ riẹ na.+

22 Keme ikpe nọ e be tha na i te oware ovo ho,

Yọ mẹ te nyavrẹ kpohọ obonọ a re zihe no ze he.+

17 “Ẹzi mẹ o kporo kuotọ no, a furie uzuazọ mẹ no;

Uki o be hẹrẹ omẹ.+

 2 Isẹkoko e wariẹ omẹ họ,+

Yọ o gbahọ nọ ẹro mẹ o re rri* uruemu ọwọsuọ rai.

 4 Keme whọ ko orimuo dhere udu rai;+

Oyejabọ nọ whọ gbẹ be rọ kpare ae kpehru hu na.

 5 Ọ rẹ sae ghale eware kẹ egbẹnyusu riẹ,

Yọ ibiaro emọ riẹ i bi kie rueva no.

 6 O ru omẹ fihọ ohwo nọ a bi ro jijehwẹ,*+

Me te zihe ruọ ọnọ a bi nwo eya ku ovao.+

 7 Mẹ gbẹ be sae ruẹ ude ziezi hi fiki ebẹbẹ,+

Te abọ te awọ mẹ e dọ fihọ rigẹ* no.

 8 Ahwo nọ a kiete a bi rri onana yọ akpọ o bi gbe ai unu,

Yọ uzuazọ enọ e be gọ Ọghẹnẹ hẹ na* o be kẹ emamọ ahwo uye.

 9 Okiẹrẹe na ọ ruabọhọ be nya edhere owoma riẹ,+

Yọ ọnọ abọ riẹ ọ fo o bi dhe ẹgẹga.+

10 Rekọ, whai kpobi wha sae nyaze re wha wariẹ mu avro rai họ,

Keme mẹ re ruẹ ohwo ọvo nọ o wo areghẹ evaọ usu rai hi.+

11 Edẹ mẹ i re no;+

Omaa mẹ kpobi, eware nọ mẹ gwọlọ kpobi e raha no.+

12 A ruabọhọ bi zihe aso ruọ uvo,

Be ta nọ, ‘U muẹro nọ oke o joma ke no keme oke u muebi.’

13 Otẹrọnọ mẹ hẹrẹ, Uki* u ti zihe ruọ uwou mẹ;+

Me ti fi ehwa mẹ họ ebi.+

16 O* ti kpobọ unuẹthẹ Uki* nọ a rọ eware where na

Okenọ mai kpobi ma te ruọ eva ẹkpẹ na.”+

 3 Fikieme who bi ro rri omai wọhọ erao+

Je rri omai wọhọ ahwo ogheghẹ?*

 4 Whọ tẹ maki mu ofu va oma* ra ekekẹ

Kọ ahwo a te dhẹ no otọakpọ na no fiki ra,

Hayo kọ utho na u ti no oria riẹ no?

 5 Ẹhẹ, a ti furie ukpẹ ohwo omuomu na,

Yọ erae riẹ e te kẹ elo ho.+

 6 Elo nọ ọ rrọ eva uwou-udhu riẹ o ti zihe ruọ ebi,

Yọ a ti furie ukpẹ nọ u bi lo kẹe.

 7 Ugbowọ nọ ọ be zare na o te kpẹre,

Yọ ohrẹ obọriẹ u ti gele iei kie.+

 8 Keme awọ riẹ o ti su ei ruọ ẹriri,

Yọ o ti ghoro ruọ ighogho ifi ẹriri.

 9 Ẹta o ti mu ei ethihrowọ,

Yọ agbefẹ o ti mu ei.+

10 A kpahe ufi nọ a ko dhere fihọ otọ kẹe,

Ẹta ọ rrọ edhere riẹ.

11 Eware nọ i bi ru ozọ mu ei i bi no kabọ kabọ ze+

E rọ kpahe awọ riẹ tuatuatua.

12 O gbe wo ẹgba ha,

Yọ okpẹtu+ o ti ru ei zoruẹ.*

13 Ohọroma riẹ o raha no;

Ẹyao nọ ọ mai yoma kpobi* ọ raha abọ gbe awọ riẹ no.

14 A le rie no uwou-udhu riẹ nọ ọ jọ wo omofọwẹ no+

A tẹ rehọ iẹe bru ovie imuozọ.*

15 Erara e te* rria uwou-udhu riẹ;

A te vaha isọ-ọre fihọ uwou riẹ.+

16 Awọ riẹ nọ e ta họ otọ i ti whu no evaọ obotọ,

Yọ egha riẹ nọ e rrọ ehru riẹ i ti lo no.

17 A gbẹ te jọ otọakpọ na kareghẹhọ iẹe he,

Yọ a gbẹ te jọ evaọ iyẹrẹ na riẹ odẹ riẹ hẹ.*

18 A ti lei no elo ruọ ebi

Je lei no otọakpọ na.

19 O ti yẹ ọmọ họ yọ o ti wo uyẹ ovuovo evaọ udevie ahwo riẹ hẹ,

Ohwo riẹ ọvuọvo o ti whu kiọkọ họ evaọ oria nọ ọ be rria.*

20 Nọ ẹdẹ riẹ o te te no, akpọ o ti gbe ahwo obọ Ukiediwo-Ọre na unu

Yọ ozọ u ti mu ahwo nọ a rrọ obọ Ovatha-Ọre.

21 Ona họ oware nọ o rẹ via kẹ iwou-udhu ohwo nọ o bi ru oware uyoma

Gbe oria ohwo nọ ọ riẹ Ọghẹnẹ hẹ.”

 2 “Ẹvẹ wha re ru eva dha omẹ* kri te,+

Be rọ eme fa omẹ ovao?+

 3 Wha whọku omẹ* isia ikpe no;

Oma o be vuọ owhai hi re wha dhuaro kẹ omẹ.+

 4 O tẹ ginẹ rrọ nọ me ru thọ,

Uzou mẹ iruthọ na e rrọ.

 5 Wha tẹ gbaemu nọ wha rẹ wọ oma rai kpehru vi omẹ,

Be ta nọ eware nọ e be via kẹ omẹ na i fo kẹ omẹ,

 6 Jọ wha riẹ nọ Ọghẹnẹ họ ọnọ o su omẹ thọ,

Ọ rehọ ẹriri riẹ mu omẹ no.

 7 Rri! Me bi bo ọvo nọ, ‘Oja yo!’* rekọ ohwo ọvo ọ be kẹ uyo ho;+

Me bi bo ọvo kẹ obufihọ, rekọ a bi bru uvioziẹ hẹ.+

 8 Ọ bọ ugbẹhẹ itho ro gbere edhere mẹ, fikiere mẹ rẹ sae nyavrẹ hẹ;

Ọ rehọ ebi ruru edhere mẹ.+

 9 Ọ ba orro mẹ no omẹ oma

Je si etu-uvie no omẹ uzou.

10 Ọ be jọ kabọ kabọ guọghọ omẹ fihọ otọ bẹsenọ me re whu;

O vi ẹruore mẹ no otọ wọhọ ure.

11 O bi mu ofu ọgaga kẹ omẹ,

O te je rri omẹ fihọ ọwegrẹ riẹ.+

12 Egbaẹmo riẹ a kokohọ, a te ko omẹ họ,

A fa evuẹ wariẹ uwou-udhu mẹ họ.

13 O le inievo obọmẹ thabọ no omẹ,

Yọ ahwo nọ a riẹ omẹ a siomano omẹ.+

14 Egbẹnya mẹ nọ e kpekpe omẹ oma* a gbẹ riẹ hẹ,

Yọ ahwo nọ mẹ riẹ ziezi a kpairoro vrẹ omẹ no.+

15 Erara nọ e rrọ uwou mẹ+ gbe erigbo emetẹ mẹ a bi rri omẹ fihọ ọrara;

Mẹ yọ ohwo orẹwho ọfa evaọ aro rai.

16 Me se odibo mẹ rekọ o yo kẹ omẹ hẹ;

Mẹ rọ unu mẹ na lẹe re o wo ọdawẹ kẹ omẹ.

17 Ẹwẹ nọ me bi ku ze dede o bi tu aye mẹ oma,+

Me bi gbo ekpehre ore su inievo obọmẹ.*

18 Makọ emọ eboba dede a be jẹ omẹ fiẹ;

Mẹ tẹ kpama, a ve mu omẹ họ ẹrọzaharo.

19 Mẹ be tọtọ egbẹnyusu ekpekpe mẹ kpobi oma,+

Yọ ahwo nọ me you a be wọso omẹ.+

20 Ohọroma mẹ avọ uwo-oma mẹ e tamu igbenwa mẹ,+

Yọ ohọrọ ibiakọ mẹ ọvo mẹ rọ dhẹ vabọ.

21 Jọ wha re ohrọ mẹ egbẹnya mẹ, wha re ohrọ mẹ,

Keme obọ Ọghẹnẹ u te omẹ no.+

22 Fikieme wha be rọ rehọ uye bẹ omẹ wọhọ epanọ Ọghẹnẹ o bi ru,+

Be họre omẹ ababọ eriosehọ?*+

23 Dodokọ a re kere eme mẹ fihotọ,

Dodokọ a re kere ai fihọ obe!

24 O, dodokọ a rẹ kare ae fihọ utho bẹdẹ bẹdẹ,

Rehọ ugbẹ ayọno gbe elẹdi kare ae!

25 Keme mẹ riẹ vevẹ nọ osiwi mẹ*+ ọ rrọ uzuazọ;

Ọ te nyaze ẹsiẹfa o ve ti dikihẹ ehru akpọ na.*

26 Nọ a tẹ raha ohọroma mẹ no,

Nọ uwo-oma mẹ o gbẹ rrọ na, mẹ te ruẹ Ọghẹnẹ,

27 Ọnọ mẹ omamẹ mẹ te ruẹ,

Ọnọ mẹ te rọ ibiaro obọmẹ ruẹ, orọnikọ erọ omọfa ha.+

29 Jọ whai omarai wha dhozọ ọgbọdọ na,+

Keme ọgbọdọ a rẹ rọ kẹ ahwo nọ a ru thọ uye;

Jọ wha riẹ nọ obruoziẹ jọ ọ riẹ.”+

 2 “Fiki onana iroro nọ e be kẹ omẹ uye e be rọ lẹliẹ oma kpakpa omẹ re mẹ kpahe ẹme na,

Fiki oware nọ o be kẹ omẹ idhọvẹ.

 3 Me yo ọwhọkuo nọ o rrọ ekela kẹ omẹ;

Otoriẹ nọ me wo* o tẹ be wọ omẹ kpahe ẹme.

 4 Ababọ avro, whọ riẹ onana anwẹdẹ,

Keme ere o rrọ anwọ okenọ a ro fi ohwo* họ otọakpọ na,+

 5 Inọ edo oghọghọ ohwo omuomu o rẹ jọ ubroke

Yọ oghọghọ ohwo nọ ọ be gọ Ọghẹnẹ hẹ* u re kri hi.+

 6 Dede nọ oruaro riẹ u kpehru te obọ odhiwu

Yọ uzou riẹ u bi duwu ẹgho na,

 7 Ọ te raha no bẹdẹ bẹdẹ wọhọ isọ obọriẹ;

Ahwo nọ a jẹ ruẹ e riẹ vẹre a te nọ inọ, ‘Bovẹ ọ rrọ?’

 8 Ọ te thọrọ ẹro no wọhọ ewezẹ, a te gbẹ ruẹ e riẹ hẹ;

A ti lei vrẹ wọhọ eruẹaruẹ aso.

 9 Ubiẹro nọ o ruẹ e riẹ vẹre o te gbẹ ruẹ e riẹ ofa ha,

Yọ oria riẹ o te gbẹ ruẹ e riẹ hẹ.+

10 Emọ obọriẹ a te gwọlọ obufihọ iyogbe,

Yọ ọye ọvo ọ te rọ abọ riẹ zihe efe riẹ.+

11 Igbenwa riẹ e jọ gaga avọ ẹgba uzoge,

Rekọ o* ti kiẹzẹ ovu gheghe kugbei.

12 Otẹrọnọ oware uyoma o rẹ mere iẹe unu,

Otẹrọnọ o si rie no họ otọ ẹrọo riẹ,

 13 Otẹrọnọ o be were iẹe unu gaga nọ o gbe bi ro si rie lọ họ

Nọ o tẹ gbẹ riẹe unu,

 14 Emu riẹ ọ te jọ obọ eva riẹ ke no;

U ti zihe ruọ enua* ibi* evaọ oma riẹ.

15 Ọ lọ efe fihọ eva, rekọ ọ te kpae ze;

Ọghẹnẹ o ti si ei kpobi no eva riẹ ze.

16 O ti se obi* ọrọza da;

Ibiakọ* ọriwhẹ i ti kpei no.

17 Ọ te ruẹ iko-ame vievie he,

Te ẹkẹre ọnyọ avọ ebọta.

18 O ti zihe eware riẹ, ọ te re* ọvuọvo ho;

Ọ te re omawere efe nọ o wo no ekiọthuọ riẹ ze he.+

19 Keme o kienyẹ iyogbe na je gbabọkẹ ae;

Ọ rehọ ogaga mi ahwo uwou, onọ ọ bọ họ.

20 Rekọ o ti wo udhedhẹ ovuovo evaọ udu riẹ hẹ;

Efe riẹ o ti fiobọhọ kẹe dhẹ vabọ họ.

21 Oware ovo u gbe kiọkọ kẹe nọ ọ rẹ re he;

Oyejabọ nọ efe riẹ na ọ gbẹ te rọ tọ họ na.

22 Nọ efe riẹ ọ tẹ rro thesiwa no, awaọruọ o ve ti kpei no;

Idabolo i ve ti kie ruru iei.

23 Nọ ọ be re eva vọ na,

Ọghẹnẹ o ve ti mu ofu ọgaga riẹ kẹe,

O ti ku ofu riẹ fihọ iẹe eva.

24 Nọ ọ be dhẹ fiki ekwakwa ẹmo ayọno na,

Ese nọ a rọ uze ekọpa sa i ve duwu iei.

25 O wolo ose no uke riẹ ze,

O wolo okwakwa ẹmo nọ o bi lo nwranwranwra no ẹvẹvẹ* riẹ ze,

Idudu e tẹ ruọ ẹe oma.+

26 Ebi ọlala ọ be hẹrẹ ekwakwa-aghae riẹ;

Erae nọ ohwo ọvo o fou hu e te to ẹe no;

Okpẹtu o be hẹrẹ ohwo kpobi nọ ọ jọ uwou-udhu riẹ zọ.

27 Odhiwu ọ te bẹre oruthọ riẹ via;

Otọakpọ na o te kpareso ẹe.

28 Owhe o ti su uwou riẹ vrẹ;

Ẹkẹre na ọ te jọ gaga evaọ ẹdẹ ofu Ọghẹnẹ* na.

29 Ona họ oware nọ Ọghẹnẹ ọ rẹ kẹ orumuomu,

Ukuoriọ nọ Ọghẹnẹ o jie uzi nọ u re tei obọ.”

 2 “Wha gaviezọ ziezi kẹ ẹme mẹ;

Jọ onana o jọ omosasọ nọ wha rẹ kẹ omẹ.

 3 Wha thihakọ kẹ omẹ nọ mẹ be te ta ẹme na;

Mẹ tẹ ta no, wha sae rọ omẹ jijehwẹ.+

 5 Wha tẹrovi omẹ re wha ruẹ eware nọ i ti gbe owhai unu;

Wha rọ obọ ruru unu rai.

 6 Me te roro kpahe iẹe, o rẹ kẹ omẹ uye,

Oma mẹ kpobi u ve bi nuhu zighi zighi.

 7 Fikieme ahwo omuomu a be rọ rria tọ,+

Nọ a be rọ who, je fe?*+

 8 Emọ rai e rẹ jọ kugbe ai ẹsikpobi,

A rẹ tọ te epanọ a rẹ rọ ruẹ emọ-emọ rai.

 9 Iwou rai i wo omofọwẹ, a be dhozọ ovuovo ho,+

Yọ Ọghẹnẹ ọ rẹ rọ ọkpọ riẹ fa ae he.

10 Iruẹ rai i bi yẹ ababọ ẹbẹbẹ;

Iruẹ eyae rai i bi yẹ ababọ eva nọ i bi no ai.

11 Emezae rai e rẹ dhẹ ruọ otafe wọhọ uthuru erao,

Yọ emọ rai a re duola kpenẹ avọ enẹ.

12 A rẹ so ile avọ ojẹjẹ gbe akpata nọ a bi kporo

Jẹ ghọghọ nọ a te yo edo urete.*+

13 A be reakpọ kuoma evaọ edẹ uzuazọ rai kpobi

A ve kpobọ Uki* tou.*

18 Kọ a re zihe ruọ orara nọ ofou ọ rẹ wọ vrẹ

Jẹ wọhọ ohọrọ nọ ofou ọwhibo o re fou vrẹ?

20 Jọ ibiaro obọriẹ e ruẹ ọraha nọ o bi tei,

Jọ ọyomariẹ ọvo ọ da ofu Erumeru na.+

21 Kọ eme u te rie te oware nọ o via evaọ uwou riẹ nọ ọ tẹ nyavrẹ* no

Nọ a te bru unu emerae uzuazọ riẹ kpẹre?*+

22 Kọ ohwo jọ ọ sai wuhrẹ Ọghẹnẹ eriariẹ,*+

Kpakiyọ Ọye họ ọnọ o bi guẹdhọ enọ e tubẹ mai kpehru?+

23 Ohwo jọ ọ sai whu nọ ẹgba riẹ kpobi ọ gbẹ riẹe oma+

Nọ o wo idhọvẹ ọvuọvo ho nọ ọ be reakpọ kuoma,+

24 Nọ ikpekpawọ riẹ e rrọ fuẹfu*

Yọ igbenwa riẹ e rrọ gaga.*

25 Rekọ omọfa ọ sai whu avọ akọriọ,*

Yọ emamọ eware i te rie unu ẹdẹvo ho.

26 Ẹkpẹ* aimava a ti kiẹzẹ,+

Yọ ihoi i ti ruru aimava.+

27 Rri! Mẹ riẹ oware nọ wha bi roro

Te omaa uyoma nọ wha be jọ eva rai ma kpahe omẹ.*+

28 Keme wha be ta nọ, ‘Uwou okpohwo na ọ rrọ,

Kọ uwou-udhu nọ ohwo omuomu na ọ jẹ rria na ọ rrọ?’+

Kọ wha be hae romatotọ roro kpahe eware* nọ a muẹrohọ,

30 Inọ ohwo oyoma o re whu hu evaọ ẹdẹ okpẹtu

Yọ a re siwi ei evaọ ẹdẹ ofu?

31 Ono ọ te nọe kpahe idhere riẹ,

Kọ ono ọ te hwosa oware nọ o ru kẹe?

32 Okenọ a te wọe kpobọ uki,

A ti rou uki riẹ.

33 Ikulu ẹkpẹ ukiekpotọ* na e te were iẹe oma,+

Yọ ahwo-akpọ kpobi a ti lele iei*+

Wọhọ ibuobu nọ e kake rehọ iẹe jọ.

 3 Kọ Erumeru na ọ be daezọ* inọ who kiẹrẹe,

Hayo kọ erere jọ o re tei fikinọ who bi yeri uzuazọ ẹgbakiete?+

 4 Kọ ọ te kẹ owhẹ uye

Je lele owhẹ gu ẹdhọ fikinọ who wo adhẹẹ kẹe gaga?

 5 Kọ ogbẹrọnọ fiki epanọ umuomu ra o rro gaga

Yọ iruthọ ra i wo umuo ho?+

 6 Keme who re gboro oware nọ inievo ra a ro viowa mi ai ababọ ororokẹ,*

Yọ who re mi ahwo iwu rai, whọ vẹ nyase ae ba ẹbẹba.*+

 7 Whọ rẹ rọ ame kẹ enọ uruame u bi kpe he,

Yọ whọ rẹ rọ emu gbọ enọ ohọo u bi kpe ogbọ.+

 8 Ohwo nọ o wo ogaga ọye o wo otọ na,+

Yọ ọnọ a you ọye ọ be rriae.

 9 Rekọ who le eyae-uku kpo ababọ oware nọ whọ kẹ rai,

Yọ who wiri igbabọ emọ nọ i wo esẹ hẹ.*

10 Oyejabọ nọ eta* e rọ wariẹ owhẹ họ na,+

Nọ eware imuozọ idudhe e be rọ wha idudu họ owhẹ oma na;

11 Oyejabọ nọ oria kpobi u ro muebi te epanọ whọ be rọ ruẹ ude he na,

Nọ ame owhe ọ rọ wọ ruru owhẹ na.

14 Ẹgho o gbere i rie, ọ be ruẹ ude he

Nọ ọ be nya kpenẹ avọ enẹ evaọ obọ odhiwu nọ o riama fihọ reghe reghe* na.’

15 Kọ whọ te nya edhere anwae na

Onọ ahwo omuomu a nya na,

16 Ezae nọ a mu vrẹ* taure oke rai u te ti te,

Nọ owhe* ọ wọ otọhotọ rai vrẹ?+

19 Ahwo okiẹrẹe a te ruẹ onana a vẹ te ghọghọ,

Yọ enọ i ru oware ovo thọ họ a te hwẹ ae inọ:

20 ‘A raha enọ e wọso omai no,

Erae e te mahe eware kpobi nọ i kiọkọ evaọ oma rai no.’

21 Daoma riẹ Ọghẹnẹ, oma o te fọ owhẹ;*

Kẹsena eware iwoma i ve ti te owhẹ obọ.

22 Jẹ uzi nọ u bi no unu riẹ ze rehọ,

Re who kru eme riẹ fihọ udu ra.+

23 Who te zihe bru Erumeru na ze, eware e te wariẹ woma kẹ owhẹ;+

Who te si umuomu no uwou-udhu ra,

24 Who te gbolo igoru* ra fihọ ẹkpẹ

Je gbolo igoru Ofaya+ na fihọ ikiekpotọ* itho na,

25 Kẹsena Erumeru na o ve ti zihe ruọ igoru* ra,

Ọ vẹ te jọ isiliva nọ e mai woma kẹ owhẹ.

26 Eva Erumeru na e vẹ te were owhẹ,

Whọ vẹ te kpare ovao ra rri Ọghẹnẹ.

27 Nọ whọ tẹ lẹe, o ti ru ẹgwọlọ ra kẹ owhẹ;

Whọ vẹ te hwa eyaa ra.

28 Oware kpobi nọ whọ gwọlọ ru u ti woma kẹ owhẹ,

Yọ elo o ti lo fihọ edhere ra.

29 Keme a ti kpomovuọ họ owhẹ oma nọ whọ tẹ ta ẹme avọ omorro,

Rekọ o ti siwi ọnọ ọ be romakpotọ.*

30 O ti siwi enọ i ru oware ovo thọ họ;

Otẹrọnọ abọ ra ọ fo, o ti gine siwi owhẹ.”

 2 “Makọ inẹnẹ na, mẹ te gbaudu gu ẹkẹunu mẹ;*+

Ẹgba mẹ o re kpobi no fiki unuofiẹ mẹ.

 4 Mẹ hai ti gu ẹdhọ mẹ kẹe

Jẹ rọ unu mẹ gu oware kpobi nọ o be kẹ omẹ uye;

 5 Mẹ vẹ ruẹ ẹme nọ ọ te kpahe kẹ omẹ

Je muẹrohọ ẹme nọ ọ te ta kẹ omẹ.

 7 Etẹe ohwo nọ o kiete o ti jo ku ẹme nọ avọ iẹe a wo họ,

Yọ Obruoziẹ mẹ o ti bruoziẹ kẹ omẹ re ẹme na o kuhọ riẹriẹriẹ.

 8 Rekọ me te kpohọ abọ ovatha-ọre, ọ rrọ obei hi;

Nọ me zihe ze, mẹ ruẹ e riẹ hẹ.

 9 Nọ ọ tẹ be nya evaọ abọ ẹkpẹlobọ, mẹ sai rri rie he;

Kẹsena ọ tẹ nya rri abọ obọze, ghele na mẹ ruẹ e riẹ hẹ.

11 Awọ mẹ i lele ithihi riẹ kpekpekpe;

Mẹ nya edhere riẹ, me no rie vievie he.+

14 O ti ru oware kpobi nọ ọ gwọlọ nọ o rẹ via kẹ omẹ* gba,

Yọ o wo eware itieye na buobu nọ ọ ruẹrẹ kpahe no.

15 Oyejabọ nọ mẹ be rọ ruawa fiki riẹ na;

Me te roro kpahe iẹe, ozọ u ve mu omẹ ga.

16 Ọghẹnẹ o ru nọ udu u bi ro bru omẹ gaga,

Erumeru na o ru nọ ozọ u bi ro mu omẹ.

17 Rekọ ebi na o ri ruru omẹ unu hu

Yọ okpa ebi na o ri ruru ovao mẹ hẹ.

 2 Ahwo a bi go eware nọ a rọ ka oka họ uwhru;*+

A bi tho ithuru erao kpohọ etọ rai nọ erao e rẹ jọ re ẹbe.

 3 A bi le eketekete emọ nọ i wo esẹ hẹ vrẹ

Je bi gboro eruẹ aye-uku re o jọ oware nọ o ro viowa fihọ oware nọ o momo.*+

 4 A re gele iyogbe no edhere;

Iruori otọakpọ na e rẹ dhẹ dhere kẹ ae.+

 5 Iyogbe na a re ghoro gwọlọ emu wọhọ eketekete ẹwọ+ nọ e rrọ obọ udhude;

A rẹ jọ udhude na gwọlọ emu kẹ emọ rai.

 6 O gbahọ nọ udhu omọfa a rẹ jọ kọrọ*

A ve je si isogẹ evaọ ọgbọ evaene ohwo omuomu.

 7 A re kiẹzẹ ẹbẹba evaọ aso, ababọ ewu nọ a re fihọ;+

A wo ohọ ovo nọ a re fihọ oma fiki ekpahe he.

 8 Okposo obọ igbehru o re kpe ai;

A rẹ daji eva itho keme a wo uwou nọ a re kpohọ họ.

 9 A vo ọmọ nọ o wo ọsẹ hẹ na no unuevie;+

Yọ a bi gboro iwu iyogbe re e jọ eware nọ a ro viowa fihọ oware nọ a momo,+

10 Onọ o wha riẹ ze nọ a be rọ nya ẹbẹba, ababọ ewu nọ a fihọ,

Avọ ohọo nọ u bi kpe ai, yọ a wọ ekru ekakọ.*

11 A bi ru iruo egaga evaọ udevie igbẹhẹ nọ e rrọ egbọ na yọ uvo u bi kpe ai;*

A bi thihi ibi-ire evaọ ọgọdọ udi-uruo na, ghele na a be ruẹ oware ovo da ha.+

12 Enọ i bi whu a bi dimẹ evaọ okpẹwho na;

Enọ e nwoma gaga* na a bi bo kẹ obufihọ,+

Rekọ Ọghẹnẹ ọ be ruẹ oware ovo nọ o jọ onana thọ họ.*

13 Ahwo jọ a riẹ nọ a be wọso elo;+

A daezọ idhere riẹ hẹ,

Yọ a be nya idhere riẹ hẹ.

14 Ojihẹ na ọ rẹ kpama nọ oke o tẹ ke no;

O re kpe iruori gbe iyogbe,+

Evaọ aso o ve tho uji.

15 Ubiẹro obruẹnwae na o rẹ hẹrẹ oke nọ ọre o ti kiediwi no,+

Ọ rẹ ta nọ, ‘Ohwo ọvo ọ te ruẹ omẹ hẹ!’+

16 A re kporo ruọ* iwou evaọ aso;

Nọ oke o tẹ ke no a rẹ kare ẹthẹ dhe oma.

17 Keme oghẹrẹ ovona ohiohiẹ avọ udevie aso o rrọ kẹ ae;

Idudu okpa ebi o reria e rai oma no.

19 Nwane wọhọ epanọ uvo gbe ẹrrorro i re se ame ekpalekpa-ame nọ e ghra no rehọ na,

Ere Uki* o rẹ lọ enọ e raha uzi!+

21 Ọ be re aye nọ ọ rrọ ọga muotọ,

Yọ o bi gboja kẹ aye-uku.

22 Ọghẹnẹ ọ te rehọ ẹgba riẹ kpe enọ e goma no;

Dede nọ a ti dikihẹ, imuẹro ọvo ọ riẹ hẹ inọ a ti wo uzuazọ.

23 Ọghẹnẹ ọ kẹ rai uvẹ re udu o jarai awọ, re a je wo omofọwẹ,+

Rekọ ibiaro riẹ e rrọ oware kpobi nọ a bi ru.*+

A re hrẹ rai kpotọ a ve koko ai họ+ wọhọ amọfa kpobi;

A re bru rai no wọhọ igbe ibi ekakọ.

25 Whaọ obọnana ono ọ rẹ sai dhesẹ nọ mẹ yọ ọtọrue

Hayo vro ẹme mẹ?”

 2 “Ọye o wo isuẹsu gbe ogaga imuozọ;

O ru nọ udhedhẹ o rọ rrọ obọ odhiwu.*

 4 Kọ ẹvẹ ohwo-akpọ gheghe* ọ sai ro kiẹrẹe evaọ aro Ọghẹnẹ,+

Hayo kọ ẹvẹ ohwo nọ aye o yẹ ọ sae rọ kare abe?*+

 5 Makọ ọvẹre na o bi lo te he

Yọ isi na e fo ho evaọ aro riẹ,

 6 Kabikọ ohwo-akpọ gheghe nọ ọ rrọ ohoi,

Gbe ọmọ ohwo, nọ ọ rrọ adha!”

 4 Ono whọ be gwọlọ ta ẹme kẹ na,

Obọ ono eme nana nọ whọ be ta na i no ze?*

 5 Enọ i whu no nọ i wo ogaga ovo ho a re nuhu;

Obonọ a rrọ u tube kodo vi ame obuobu na gbe eware nọ e be rriae eva.

 6 Uki* u kpefihọ evaọ aro Ọghẹnẹ,*+

Yọ oria ọraha na u rovie fihọ.*

 7 Ọ rriẹ idadeghe obọ ẹkpẹlobọ ovatha-ọre* na fihọ evevẹ* na,+

O fi otọakpọ na họ ehru oware ovo ho;

 8 Ọ rehọ ẹgho riẹ variẹ ame obuobu na,+

Re ẹgho na ọ gbẹ bẹre no fiki ẹgbẹdẹ riẹ hẹ;

 9 O ruru oria agbara-uvie riẹ re a se iẹe ba ẹruẹ,

Ọ rriẹ ẹgho riẹ ruru iei.+

10 O fi umuo họ kẹ idadeghe na, onọ o wọhọ ẹsenọ o rehọ abọ duwu otọ* evaọ ehru ame obuobu na;+

O fi uwhru họ udevie elo avọ ebi.

11 Ipila obọ odhiwu i bi nuhu;

Ọwhọkuo riẹ ọ lẹliẹ e rai mudhe avọ ozọ.

12 Ọ rẹ rọ ogaga riẹ wha ẹvohẹ họ abade na,+

Yọ ọ rẹ rọ otoriẹ riẹ bru arao ologbo abade na* ekekẹ.+

13 Ọ rẹ rehọ ẹwẹ-okuo* riẹ ru ehru na ghariẹ;

Obọ riẹ u re duwu araomuomu ẹghẹ* na.

14 Rri! Enana yọ amabọ jọ gheghe orọ idhere riẹ;+

Emedo kakao ọvo a yo kpahe iẹe no!

 2 “Nọ Ọghẹnẹ nọ ọ rọwo bru uvioziẹ kẹ omẹ hẹ na ọ rrọ uzuazọ na,+

Nọ Erumeru nọ o ru uzuazọ* mẹ yayare na ọ rrọ uzuazọ na,+

 3 Nọ mẹ gbẹ be wẹ na

Nọ ẹzi nọ o no obọ Ọghẹnẹ ze ọ gbẹ rrọ ighogho-inwe mẹ na,+

 4 Igbenu mẹ e rẹ ta eme imuomu hu;

Yọ ẹrọo mẹ ọ rẹ ta eme eviẹhọ gbe he!

 6 Mẹ rẹ ruabọhọ ẹrẹreokie mẹ, me re siobọnoi vievie he;+

Udu mẹ u re brukpe* omẹ hẹ evaọ edẹ uzuazọ mẹ kpobi.*

 7 Jọ o via kẹ ewegrẹ mẹ wọhọ epanọ o te jọ kẹ irumuomu,

Jọ o via kẹ enọ e be họre omẹ wọhọ epanọ o te jọ kẹ enọ i kiẹrẹe he.

 8 Keme, ẹruore vẹ ohwo nọ ọ be gọ Ọghẹnẹ hẹ* o wo nọ a tẹ raha iẹe no,+

Nọ Ọghẹnẹ ọ tẹ rehọ uzuazọ* riẹ?

 9 Kọ Ọghẹnẹ o ti yo ubo riẹ

Nọ uye u te tei oma?+

11 Me ti wuhrẹ owhẹ kpahe ogaga* Ọghẹnẹ;

Mẹ te ko oware ovo dhere kpahe Erumeru na ha.

12 Whaọ, otẹrọnọ whai kpobi wha ruẹ eruẹaruẹ,

Ẹvẹ eme rai i gbe ro fioka vievie he?

13 Onana họ oware nọ Ọghẹnẹ ọ rẹ kẹ ohwo omuomu,+

Ukuoriọ nọ Erumeru na ọ rẹ kẹ ohwo ọgeva.

14 Otẹrọnọ emezae riẹ i bu gaga no, a ti whu uwhu ọgbọdọ,+

Yọ emọ-emọ riẹ i ti wo emu nọ o re te ai re he.

15 Ẹyao* o ti kpe enọ o whu seba,

Yọ eyae rai e te viẹ ae he.

16 O tẹ make rọnọ o koko isiliva họ wọhọ ẹkpẹ

Je koko emamọ iwu họ wọhọ ọviẹ,

17 Dede nọ o koko i rai họ,

Ohwo okiẹrẹe na o ti fi ai họ oma,+

Yọ enọ i ru oware ovo thọ họ a te ghale isiliva riẹ.

18 Uwou nọ ọ bọ ọ rrọ deghe deghe wọhọ uwou ẹwowo,*

Wọhọ uwou-owhre+ nọ ororoke ọ bọ.

19 Ọ te jọ ọdafe evaọ okenọ o ti kiẹzẹ rekọ o ti koko oware ovo họ họ;

Nọ ọ tẹ rọwo ze, ọ te ruẹ oware ovo evaọ etẹe he.

20 Eware idudu i ti bru ei ze wọhọ owhe;

Ofou ọwhibo ọ te wọe vrẹ evaọ aso.+

21 Ofou obọ ovatha-ọre ọ te wọe vrẹ, a gbẹ te ruẹ e riẹ hẹ;

O ti fou rie no oria riẹ kufiẹ.+

22 O te wọ ze tehe iẹe ababọ ohrọ-oriọ+

Nọ ọ be dawo ẹgba riẹ kpobi re ọ dhẹ no ọraha riẹ na.+

23 Ọ tehe abọ ku ei

Jẹ viọlọ oviọlọ+ kẹe no oria riẹ ze.*

28 “U wo oria nọ a rẹ jọ tọ isiliva

Gbe oria nọ a rẹ jọ ruẹ igoru nọ ahwo a re ru fo na;+

 2 Otọ a rẹ rehọ ayọno no ze,

Yọ itho a rẹ ghra* ekọpa no ze.+

 3 Ohwo-akpọ ọ be ruọ eva ebi;

Ọ be gwọlọ te oka evaọ oria ebi gbe okpa ebi,

Be gwọlọ itho nọ a rẹ rehọ ekwakwa eghaghae no ze.*

 4 Ọ rẹ tọ eghogho thabọ no oria nọ ahwo a be rria,

Eria nọ e thọrọ ẹro no, nọ i thabọ no oria nọ ahwo a rẹ nya;

Ahwo jọ a re kpobọ otọ a vẹ jọ oria* nọ a re jo veghe.

 5 Ekakọ nọ a rẹ rọ kuọ oma e rẹ dhẹ fihọ otọakpọ na;

Rekọ evaọ obotọ, ẹvohẹ ọ rrọ obei wọhọ ẹsenọ a tu erae họ iẹe.*

 6 Safaya ọ rrọ eva itho na,

Yọ igoru ọ rrọ eva ẹkpẹ na.

 7 Ọvra ọvuọvo nọ o re mu erao ọ riẹ edhere nọ a re ro kpohọ obei hi;

Ubiẹro ẹgodi obiebi o re ruẹ e riẹ hẹ.

 8 Erao imuozọ evuevo e re nya etẹe vrẹ hẹ;

Okpohrokpo ọgaga ọ re kuẹlẹ te etẹe he.

 9 Ohwo-akpọ ọ be rọ obọ riẹ kpe utho ọgaga;

Ọ be tọ igbehru na vurie evaọ obọ otọhotọ rai.

10 O bi bru ito ame+ fihọ eva utho na;

Ibiaro riẹ e be ruẹ okwakwa oghaghae kpobi.

11 O bi di eria nọ ame ethẹ o bi no ze

Ọ tẹ be rehọ eware nọ a ko dhere lahwe.

12 Rekọ diẹse a rẹ jọ ruẹ areghẹ,+

Diẹse otoriẹ u re no ze?+

13 Ohwo ọvo ọ riẹ epanọ o ghare te he,+

Yọ a rẹ sae jọ ẹkwotọ enọ e rrọ uzuazọ ruẹ e riẹ hẹ.

15 A rẹ sae rehọ emamọ igoru dẹe he;

Yọ a rẹ sae wawọ isiliva ro nwene iei hi.+

16 A rẹ sae rehọ igoru Ofaya+ dẹe he

Hayo oniks nọ a rẹ kake ruẹ hẹ na, gbe safaya.

17 A rẹ sae rọ igoru gbe ighẹgbe wawo iẹe he;

Yọ a rẹ sae rọ okwakwa emamọ igoru* nwene iei hi.+

18 A re tube du fodẹ ikoral* gbe kristal* ha,+

Keme ẹkpa nọ ọ vọ avọ areghẹ ọ ghare vi ọnọ ọ vọ avọ izuu.

19 A rẹ sae rọ utho topaz+ obọ Kush wawo iẹe he;

A rẹ sae tubẹ rehọ emamọ igoru dẹe he.

20 Rekọ bovẹ areghẹ o re no ze,

Diẹse otoriẹ u re no ze?+

21 A si rie no họ ibiaro omama kpobi nọ o rrọ uzuazọ+

A ko riẹ dhere evra obọ ehru* na.

22 Ọraha avọ uwhu a ta nọ,

‘Ezọ mai ọvo ma ro yo kpahe iẹe.’

23 Ọghẹnẹ ọ riẹ edhere nọ a rẹ rọ ruẹ e riẹ;

Ọye ọvo ọ riẹ oria nọ o be rria,+

24 Keme o re rri te obọ oka avọ oka otọakpọ na,

Yọ ọ rẹ ruẹ oware kpobi nọ o rrọ otọ idhiwu na.+

25 Okenọ ọ ma ogaga* ofou+

Jẹ wawọ* ame obuobu na,+

26 Okenọ o fi uzi họ kẹ oso+

Je ru edhere kẹ ẹgho nọ egbrara avọ okposo i re no ze,+

27 Ọ tẹ ruẹ areghẹ je dhesẹ oghẹrẹ nọ o rrọ via;

O ru rie dikihẹ jẹ dawo iẹe.

‘Rri! Ozodhẹ Jihova họ areghẹ,+

Re a kẹnoma kẹ oware uyoma họ otoriẹ.’”+

 2 “Dodokọ mẹ gbẹ rrọ etoke emerae nọ e vrẹ,

Evaọ oke nọ Ọghẹnẹ ọ jẹ rẹrote* omẹ,

 3 Okenọ ukpẹ riẹ u je lo fihọ uzou mẹ,

Nọ mẹ jẹ rọ elo riẹ ruẹ ude nya ebi vrẹ,+

 4 Okenọ mẹ jọ oke* udhu mẹ,

Okenọ usu kugbe Ọghẹnẹ o jọ gaga evaọ uwou-udhu mẹ,+

 5 Okenọ Erumeru na ọ gbẹ jọ kugbe omẹ,

Nọ emọ* mẹ kpobi a wariẹ omẹ họ,

 6 Okenọ me je zue awọ họ ebọta,

Nọ ẹkẹre ewhri o je su no itho na ze kẹ omẹ.+

 7 Okenọ mẹ jẹ hae nya kpobọ unuẹthẹ okpẹwho na+

Mẹ vẹ keria agbara evaọ oko-ore na,+

 8 Izoge emezae na a tẹ ruẹ omẹ a vẹ kẹnoma,*

Makọ ekpọkuezae na dede a jẹ hae kpama, a ve dikihẹ ọvo.+

 9 Ikpahwo-esuo* a jẹ hae sae ta ẹme he;

A jẹ hae rọ obọ ruru unu.

10 Enọ ahwo a riẹ odẹ a jẹ hai fibo ọvo;

Ẹrọo rai ọ jẹ hae tamu ehru unu rai.

11 Ohwo kpobi nọ o yo ẹme mẹ ọ jẹ hae ta ẹme ezi mẹ,

Yọ enọ e ruẹ omẹ a jẹ hai se isẹri kẹ omẹ.

12 Keme mẹ jẹ hae thọ oyogbe nọ o bi bo kẹ obufihọ,+

Te ọmọ nọ o wo ọsẹ hẹ gbe ohwo kpobi nọ o wo ohwo nọ o re fiobọhọ kẹe he.+

13 Ohwo nọ ọ joma te uwhu no ọ rẹ lẹ ẹro eghale kẹ omẹ,+

Yọ me ru eva were aye-uku.+

14 Me fi ẹrẹreokie họ oma wọhọ ewu;

Uvioziẹ mẹ o jọ wọhọ ewu othethei* gbe etu-udhọfọ.

15 Mẹ jọ ibiaro kẹ enọ i tuaro

Gbe awọ kẹ enọ e ko.

16 Mẹ jọ ọsẹ kẹ iyogbe;+

Mẹ jẹ hae romatotọ kiẹ otọ ẹdhọ ahwo nọ mẹ riẹ hẹ.+

17 Mẹ jẹ hae kpare agba ọnọ o ru oware uyoma+

Me ve si ọnọ o bi kpe na no akọ riẹ.

18 Mẹ jẹ hae ta nọ, ‘Eva uwou obọmẹ* mẹ te jọ whu,+

Yọ edẹ uzuazọ mẹ e te jọ buobu wọhọ uwẹkpẹ.

19 Mẹ te ta awọ kpobọ otọ ruọ ame,

Yọ igrigri e te jọ egha mẹ aso okioke.

20 Ọghọ ọ rrọ omẹ oma kẹse kẹse,

Yọ mẹ te rehọ uze nọ o rrọ obọ mẹ sa ẹsẹsa.’

21 Ahwo a rẹ gaviezọ hẹrẹ oware nọ mẹ te ta,

A re fibo hẹrẹ ohrẹ mẹ.+

22 Nọ mẹ tẹ ta ẹme no, a rẹ gbẹ ruẹ oware ovo ta ha.

Eme mẹ i re kie* fihọ ae ezọ rirẹ.

23 A jẹ hae hẹrẹ omẹ wọhọ oso;

Yọ a rovie unu rai fihọ kẹkẹe wọhọ ẹsenọ a be hẹrẹ iso obọ ekuhọ okiewhru.+

24 Nọ mẹ tẹ hwẹ kẹ ae, u ve gbe ai unu;

Ovao osasa mẹ u ve ru udu kie ai vi.*

25 Mẹ jẹ vuẹ ae oware nọ a re ru wọhọ ọnọ o wuzou rai,

Yọ mẹ jọ wọhọ ovie nọ o bi su egbaẹmo riẹ evaọ udevie rai,+

Wọhọ ọnọ ọ rẹ sasa enọ i bi weri oma.+

30 “Obọnana a be hwẹ omẹ+

Ezae nọ e maha vi omẹ,

Enọ mẹ hae rọwo fi esẹ rai

Họ kugbe erakọ nọ i bi rou uthuru erao mẹ hẹ.

 3 Uvuhu avọ ohọo u kpe rai oma yolo no;

A be rehọ akọ kariẹ otọ nọ o ya fia

Otọ nọ a raha muotọ je ru fihọ ofofe no.

 4 A bi bru obe uwhei no obọ ẹwọ ze;

Awọ ire họ emu rai.

 5 A le rai no ẹwho no;+

Ahwo a re kuegho họ ae wọhọ epanọ a re kuegho họ oji.

 6 A be rria eria nọ i kuwhrẹrẹ evaọ ikiekpotọ ehwahwa* na,

Eva egọdọ nọ e rrọ otọ gbe eva itho.

 7 A bi bo evaọ obọ ẹwọ

Je su koko udevie ebe osokpọ.

 8 Fikinọ a rrọ emọ ahwo ogheghẹ gbe enọ i wo odẹ hẹ,

A le* rai no otọ na no.

 9 Rekọ enẹna a be rọ omẹ zaharo makọ evaọ ile rai;+

Me zihe ruọ ohwo nọ a bi ro jijehwẹ* no.+

10 A bi rri omẹ tọtọtọ jẹ be kẹnoma kẹ omẹ;+

Ozọ u bi mu ai hi re a nwo eya ku omẹ ovao.+

11 Fikinọ Ọghẹnẹ o mi omẹ ose* je hrẹ omẹ kpotọ no,

A bi kru oma rai vievie he* evaọ aro mẹ.

12 Evaọ obọze mẹ, a wọ ze wọhọ otu-ugbarugba;

A fou omẹ họ ohrẹ-odhẹ

A tẹ rehọ eware nọ e rẹ wha uwhu ze gbere edhere kẹ omẹ.

13 A raha idhere mẹ no

A te je ru uye mẹ ga,+

Ababọ ohwo nọ ọ be whaha ae.*

14 A ruọ eva wọhọ ẹsenọ oria okẹkẹe nọ a kporo evaọ ugbẹhẹ a rọ nyaze;

A su ruọ eva ghelọ ọraha na.

15 Idudu e da omẹ oma fia;

A le adhẹẹ mẹ vrẹ wọhọ oware nọ ofou o fou kufiẹ,

Yọ irẹro inọ a ti siwi omẹ o rayẹ no wọhọ ẹgho.

16 Enẹna uzuazọ* mẹ o be rọ ẹmẹrera no omẹ oma no;+

Edẹ oja-oriọ+ i bru omẹ ze no.

17 Igbenwa mẹ e be da omẹ gaga* evaọ aso;+

Edada egaga na i bi serihọ vievie he.+

18 A rọ ofu ọgaga raha ewu mẹ no;*

Wọhọ uriohọ-ewu mẹ, o be gba omẹ uvou.

19 Ọghẹnẹ o gbolo omẹ fihọ ọloho no;

Me zihe ruọ ovu gbe enwo no.

20 Me bi bo se owhẹ re who fiobọhọ kẹ omẹ, rekọ who bi yo kẹ omẹ hẹ;+

Mẹ kpama dikihẹ, rekọ eriwi ọvo who rri omẹ.

21 Whọ rehọ evega mu ofu kẹ omẹ;+

Whọ rehọ ogaga kpobi nọ who wo họre omẹ.

22 Who kru omẹ kpama, whọ tẹ rọ ofou wọ omẹ vrẹ;

Whọ tẹ be rọ ofou ọwhibo na fou omẹ kpenẹ avọ enẹ.*

23 Mẹ riẹ nọ whọ te rehọ omẹ kpobọ uki,*

Obọ uwou nọ ahwo kpobi nọ a rrọ uzuazọ a te jọ ruẹ oma.

24 Rekọ ohwo ọvo ọ rẹ họre ohwo nọ o kie fihọ otọ no ho*+

Ọnọ o bi bo kẹ obufihọ evaọ oke nọ ọ rrọ uye.

26 Dede nọ me je rẹro ewoma, eyoma ọ tẹ ze;

Me rẹro elo, rekọ ebi ọ ze.

27 Ẹvohẹ nọ ọ rrọ obeva mẹ o ri serihọ họ;

Edẹ oja-oriọ i bru omẹ ze.

29 Me zihe ruọ oniọvo ikozi

Gbe ogbẹnyusu emetẹ ogomugoro.+

30 Ohọroma mẹ u ru fihọ biebi no jẹ be fa kufiẹ;+

Ẹrrorro* na ọ be mahe igbenwa mẹ.

31 Akpata mẹ ọ rrọ kẹ uweri ọvo,

Yọ urete* mẹ o rrọ kẹ edo oviẹ.

 2 Me te ru ere, eme u re no obọ Ọghẹnẹ nọ ọ rrọ obehru na ze te omẹ,

Ukuoriọ vẹ u re no obọ Erumeru nọ ọ rrọ obehru na ze?

 3 Kọ okpẹtu o gbẹ be hẹrẹ ohwo nọ o ru oware uyoma?

Kọ uye o gbẹ be hẹrẹ enọ i bi ru eware nọ e rẹ wha ebẹbẹ ze?+

 4 Kọ ọ gbẹ be ruẹ idhere mẹ+

Je kele ithihi awọ mẹ kpobi?

 6 Jọ Ọghẹnẹ ọ rehọ iskeli egbagba rọ wawọ omẹ;+

Kẹsena o ve ti vuhu ẹgbakiete mẹ mu.+

 7 Otẹrọnọ awọ mẹ ọ nya no edhere na+

Hayo udu mẹ u siuru eware nọ ibiaro mẹ e ruẹ+

Hayo me gbe abọ mẹ ku,

 8 Jomẹ kọ ibi re omọfa ọ re ae,+

Jọ a vi eware nọ mẹ kọ kufiẹ.*

 9 Otẹrọnọ udu mẹ u wo isiuru kẹ aye jọ+

Me je kiekọ unuwou ọrivẹ mẹ be hẹrẹ,+

10 Jọ aye mẹ o wuhu eka kẹ ọzae ọfa,

Jọ ezae efa a lele iei wezẹ.*+

11 Keme oyena yọ uruemu omovuọ,

Oware uyoma nọ u fo nọ ibruoziẹ a rẹ rọ fiki riẹ kẹ ohwo uye.+

12 Oyena yọ erae nọ e rẹ to jẹ raha eware no,*+

Onọ o rẹ tubẹ to awọ* ekakọ mẹ kpobi no.

13 Otẹrọnọ mẹ se inọ me re bru uvioziẹ kẹ idibo ezae gbe erọ eyae mẹ hẹ

Nọ a tẹ ta oware jọ nọ me ru nọ o kẹ rai uye,*

14 Eme mẹ rẹ sai ru nọ Ọghẹnẹ ọ tẹ nọ omẹ unu?*

16 Otẹrọnọ mẹ rọwo ho inọ mẹ rẹ kẹ iyogbe na oware nọ o were rai+

Hayo ru aye-uku rẹro bẹ;*+

17 Otẹrọnọ mẹ ọvo mẹ re emu mẹ

Nọ mẹ gbẹ kẹ emọ nọ i wo esẹgbini hi;+

18 (Keme no oke uzoge mẹ ze, ọmọ nọ o wo ọsẹgboni hi ọ jọ kugbe omẹ wọhọ ẹsenọ mẹ rrọ ọsẹ riẹ,

Yọ mẹ sẹro aye-uku no emaha mẹ ze.*)

19 Mẹ tẹ ruẹ ohwo nọ ekpahe i bi kpe whu no fikinọ o wo ewu hu

Hayo oyogbe nọ o wo oware ovuovo nọ o re ro ruru oma riẹ hẹ;+

20 Otẹrọnọ ọ lẹ ẹro* siwi omẹ hẹ+

Nọ ọ be rehọ iwhulu nọ i no igodẹ mẹ ze ru oma riẹ ruọruọ na;

21 Otẹrọnọ me nuhu obọ mẹ wọso ọmọ nọ o wo ọsẹgboni hi+

Nọ ọ tẹ gwọlọ obufihọ mẹ evaọ obọ unuẹthẹ okpẹwho na;*+

22 Jọ ugbobọ* mẹ u kie no ẹkoko mẹ,

Jọ ugbobọ mẹ u wiri evaọ eghilobọ mẹ.*

23 Keme mẹ dhozọ okpẹtu nọ o re no obọ Ọghẹnẹ ze,

Gbe nọ mẹ rẹ sai dikihẹ rri oruaro riẹ hẹ.

24 Otẹrọnọ mẹ rẹroso igoru

Hayo ta kẹ emamọ igoru nọ, ‘Whẹ họ ẹruore mẹ!’+

25 Otẹrọnọ efe obuobu mẹ oye oghọghọ mẹ u bi no ze+

Fiki ekwakwa ibuobu nọ me wo;+

26 Otẹrọnọ mẹ ruẹ ọre* na nọ o bi lo

Hayo ọvẹre na nọ o bi ghelie avọ erru;+

27 Udu mẹ o tẹ lẹlẹ wo isiuru,*

Yọ unu mẹ o tẹ viọlọ obọ mẹ be gọ ae;+

28 Oyena yọ oware uyoma nọ u fo nọ ibruoziẹ a rẹ rọ fiki riẹ kẹ ohwo uye,

Keme yọ mẹ siọ Ọghẹnẹ uzẹme nọ ọ rrọ obehru na no.

29 Kọ mẹ ghọghọ no ẹdẹ jọ fiki ọraha nọ o te ọwegrẹ mẹ+

Hayo wereva fiki oware uyoma nọ o via kẹe?

30 Mẹ kẹ unu mẹ uvẹ vievie he re o raha uzi

Re me duwu iyei inọ o* whu.+

31 Kọ ezae nọ e be rria uwou mẹ a gbẹ ta nọ,

‘Ono ọ rẹ ruẹ ohwo jọ dhesẹ nọ ọ re re emu* riẹ vọ eva ha?’+

32 U du gwọlọ nọ ọrara* ọvuọvo ọ rẹ wezẹ otafe asohẹrioke he;+

Me rovie ethẹ mẹ fihọ kẹ ohwo nọ o bi kpohọ erẹ.

33 Kọ mẹ daoma ko iruthọ mẹ dhere no ẹdẹ jọ, wọhọ epanọ amọfa a bi ru,+

Re me si izieraha mẹ no họ ẹkpa ewu mẹ?

34 Kọ mẹ jẹ dhozọ oghẹrẹ nọ o te jọ ahwo buobu oma,

Hayo kọ mẹ dhozọ ekpehre ubiẹro nọ iviuwou efa a ti ro rri omẹ,

Onọ u ru omẹ fibo jẹ dhozọ inọ mẹ rẹ ruọ otafe he?

36 Mẹ rẹ rọ ẹkoko mẹ whae,

Yọ me re thuru iei fihọ uzou mẹ wariẹ họ wọhọ etu-uvie.

37 Mẹ rẹ niyẹrẹ kẹe kpahe owọ kpobi nọ mẹ jẹ;

Mẹ rẹ nyabru ei ududu wọhọ osu.*

38 Otẹrọnọ otọ obọmẹ u re bo via fiki mẹ

Yọ udevie ikuele ithethei nọ e rrọ otọ na kpobi e rẹ viẹ;

39 Otẹrọnọ mẹ re ubi riẹ ababọ osa nọ mẹ hwa,+

Hayo otẹrọnọ me ru enọ* i wo rie vioja;+

40 Jọ idhigbo e dhẹ ze kẹ omẹ viukpọ iwhiti

Gbe ẹbe nọ o re gbo ekpehre ore viukpọ ebali.”

“Ọmaha mẹ rrọ*

Yọ whai ezae nana wha kpako no.+

Fikioye mẹ rọ kẹ owhai adhẹẹ be gba omamẹ,+

Me yiwi vuẹ owhai oware nọ mẹ riẹ vievie he.

 7 Mẹ jọ eva mẹ ta nọ, ‘Jọ enọ e kpako no* e ta ẹme,

Jọ enọ e rria ikpe buobu no a ta eme areghẹ via.’

 8 Rekọ ẹzi nọ ọ rrọ ahwo oma,

Ẹwẹ Erumeru na, oye o rẹ kẹ ahwo otoriẹ.+

 9 Orọnikọ ikpe* ibuobu ọvo i re ru ohwo wo areghẹ hẹ,

Yọ orọnikọ ezae nọ e kpako no ọvo a rẹ riẹ oware nọ u kiehọ họ.+

10 Fikioye mẹ rọ ta nọ, ‘Wha gaviezọ kẹ omẹ,

Re mẹ jẹ vuẹ owhai oware nọ mẹ riẹ.’

11 Rri! Mẹ jẹ hẹrẹ re me yo eme rai;

Mẹ ruabọhọ jẹ gaviezọ nọ wha be ta oghẹrẹ nọ wha roro na+

Nọ wha be gwọlọ oware nọ wha rẹ ta na.+

12 Mẹ gaviezọ ziezi kẹ owhai,

Rekọ whai ọvuọvo ọ sae ta oware nọ u dhesẹ nọ Job o ru thọ họ*

Hayo kpahe emamọ ẹme ọvo fihọ eme riẹ hẹ.

13 Fikiere wha du ta ha inọ, ‘Ma wo areghẹ no;

Ọghẹnẹ họ ọnọ o dhesẹ nọ ọ riẹ ru hu, orọnikọ ohwo-akpọ họ.’

14 Orọnikọ mẹ ọ ta ẹme riẹ kẹ hẹ,

Fikiere mẹ te rọ eme rai na kpahe fihọ ẹme riẹ hẹ.

15 Akpọ o gbe rai unu, a gbe wo ẹme ọfa nọ a rẹ kpahe he;

A gbe wo oware ovo nọ a rẹ ta ha.

16 Mẹ hẹrẹ e rai, rekọ a gbẹ ta ẹme ọvo ho;

A dikihẹ etẹe ọvo, ababọ ẹme ọfa nọ a kpahe.

17 Fikiere mẹ omamẹ mẹ te kpahe ẹme;

Mẹ omamẹ mẹ te ta oware nọ mẹ riẹ,

18 Keme eme e vọ omẹ eva;

Ẹzi nọ ọ rrọ omẹ oma o be wọ omẹ re mẹ ta ẹme.

19 Obeva mẹ o wọhọ enwaene nọ o wo oria nọ ofu o bi ro noi hi,

Wọhọ oviẹ-udi okpokpọ nọ o be te sa bẹre no.+

21 Me ti rri ohwo ọvo ovao ho;+

Yọ me ti jiri ohwo-akpọ ọvuọvo ujiro igbenu hu,*

22 Keme mẹ riẹ oghẹrẹ nọ a re jiri ujiro igbenu hu;

Me te ru ere, Ọnọ ọ ma omẹ o re kpe omẹ no ababọ oke oraha.

33 “Rekọ obọnana, Job, ivie gaviezọ kẹ eme mẹ;

Gaviezọ kẹ oware kpobi nọ mẹ te ta.

 2 Ivie, rri! Me re rovie unu mẹ hrọ;

Mẹ rẹ rọ ẹrọo mẹ ta ẹme hrọ.*

 3 Eme mẹ i ti dhesẹ nọ udu mẹ u kiete,+

Yọ igbenu mẹ e te ta uzẹme oware nọ mẹ riẹ.

 4 Ọghẹnẹ ọ rehọ ẹzi riẹ ma omẹ,+

Ẹwẹ Erumeru na ọ kẹ omẹ uzuazọ.+

 5 Kpahe ẹme kẹ omẹ otẹrọnọ who wo ẹme jọ nọ whọ rẹ sae ta;

Gu ẹkẹ unu ra ze evaọ iraro mẹ; ruẹrẹ oma ra kpahe.

 6 Rri! Mẹ avọ owhẹ epọvo na evaọ aro Ọghẹnẹ uzẹme na;

Ọviẹ a rọ ma omẹ re.+

 7 Fikiere jọ ozọ mẹ u mu owhẹ vievie he,

Jọ erri ẹme mẹ ọ ga hrọ kẹ owhẹ hẹ.

 8 Rekọ whọ ta eware jọ nọ me yo,

Ẹhẹ, me je yo eme nana eyeyo, inọ

 9 ‘Mẹ rrọ fuafo, ababọ uzioraha;+

Abọ mẹ ọ rrọ fuafo, ababọ oruthọ.+

10 Rekọ Ọghẹnẹ ọ ruẹ eware nọ ọ be rọ fiki rai wọso omẹ;

Ọ rehọ omẹ fihọ ọwegrẹ riẹ.+

11 Ọ kare awọ mẹ fihọ ewẹ-ekpala ekarọ;*

Ọ be kiẹ otọ idhere mẹ kpobi.’+

14 Keme Ọghẹnẹ ọ rẹ ta ẹme ẹsiẹvo jẹ ta orọ avọ isiava,

Rekọ ohwo ọvo ọ rẹ gaviezọ họ,

15 Evaọ ewezẹ, eruẹaruẹ aso na,+

Nọ ahwo a tẹ wezẹ diwi no

Nọ a tẹ be wezẹ evaọ ehwa rai.

16 Kẹsena o ve rovie ezọ rai+

O ve ru re ithubro riẹ i te ai udu,*

17 Re o si ovao ohwo no uzioraha+

Jẹ thọ ohwo no omoya.+

18 Ọghẹnẹ o re siwi uzuazọ* riẹ no ọgọdọ,*+

O re siwi uzuazọ riẹ no uwhu ọgbọdọ.*

19 Edada nọ ohwo o re wo evaọ ehwa riẹ yọ ọwhọkuo re

Yọ edada nọ o re wo evaọ igbenwa riẹ kẹse kẹse e rẹ whọku ei,

20 Te epanọ ebrẹdi i re ro tu ei* oma,

Nọ ọ* rẹ rọ tubẹ siọ emamọ emu dede.+

21 A gbẹ be ruẹ uwo-oma riẹ hẹ,

Igbenwa riẹ nọ i siomano vẹre e tẹ bẹre oma via.*

22 Uzuazọ* riẹ u si kẹle ọgọdọ;*

Uzuazọ riẹ u si kẹle enọ e rẹ wha uwhu ze.

23 Otẹrọnọ ọwhovuẹ* jọ ọ rrọ kẹe,

Amiunugu ọvo evaọ usu odu ahwo,

Nọ ọ rẹ vuẹ ohwo-akpọ oware nọ u kiete,

24 Kẹsena Ọghẹnẹ o te rri rie aro jẹ ta nọ,

‘Vu ei wa re ọ siọ obọ ọgọdọ* ba ẹnya!+

25 Jọ uwo-oma riẹ o bọbọ* vi oke uzoge riẹ;+

Jọ o zihe kpohọ oke ẹgba uzoge riẹ.’+

26 Ọ te lẹ Ọghẹnẹ,+ ọnọ ọ te jẹe rehọ,

Yọ ọ te ruẹ ovao Riẹ avọ ubo oghọghọ,

O ti ru ohwo-akpọ wariẹ wo ẹrẹreokie Riẹ.

27 Ohwo yena o ti whowho* kẹ ahwo-akpọ, inọ

‘Mẹ raha uzi no+ jẹ vẹ uzẹme tu,

Rekọ a ru omẹ epanọ u fo nọ a re ru omẹ hẹ.*

28 O siwi uzuazọ* mẹ re mẹ siọ ọgọdọ* ba ẹruọ,+

Yọ uzuazọ mẹ o te ruẹ elo.’

29 Evaọ uzẹme, Ọghẹnẹ o re ru eware nana kpobi

Isiava, isiasa, rọkẹ ohwo,

30 Re o zihe uzuazọ* riẹ no obọ ọgọdọ* ze,

Re ọ ruẹse reawere elo uzuazọ.+

33 Otẹrọnọ who wo oware ovo nọ whọ rẹ ta ha, gaviezọ kẹ omẹ;

Fọ ọvo, me ti wuhrẹ owhẹ areghẹ.”

 2 “Wha gaviezọ kẹ eme mẹ, whai enọ i wo areghẹ;

Wha gaviezọ kẹ omẹ, whai enọ e riẹ gaga.

 3 Keme ozọ o rẹ dawo ẹme

Nwane wọhọ epanọ ẹrọo* ọ rẹ dawo emu na.

 4 Joma jọ omoma mai na dhesẹ oware nọ u kiehọ ze;

Joma jọ omoma mai na rọwo fihọ oware nọ u woma.

 5 Keme Job ọ ta nọ, ‘Mẹ riẹ ru,+

Rekọ Ọghẹnẹ ọ rọwo bru uvioziẹ kẹ omẹ hẹ.+

 7 Ọzae vẹ ọ wọhọ Job,

Nọ ọ rẹ da ẹpoviẹ wọhọ ame?

 8 Ọ rrọ kugbe ahwo nọ a bi ru oware uyoma

Jẹ rrọ udevie ezae imuomu.+

 9 Keme ọ ta nọ, ‘Ohwo o re wo erere he

Nọ ọ tẹ be daoma ru Ọghẹnẹ eva were.’+

Ọghẹnẹ uzẹme na ọ rẹ sai ru oware umuomu vievie he,+

Erumeru na ọ rẹ sai ru oware nọ o thọ họ!+

11 Keme ọ rẹ hwosa kẹ ohwo wọhọ epaọ eware nọ o ru+

Je ru re ọ ruẹ uye oware nọ u re no iruẹru riẹ ze.

12 Keme u muẹro nọ Ọghẹnẹ o re ru oware uyoma ha;+

Erumeru na ọ rẹ vẹ ẹdhọ tu hu.+

13 Kọ ohwo jọ ọye ọ rehọ e riẹ mu ọnọ ọ rẹ rẹrote otọakpọ na,

Kọ ohwo jọ ọye ọ kẹ riẹ udu re o wuzou akpọ na soso?*

14 Ọ tẹ rẹriẹ ovao ku* ai,

Ọ tẹ rehọ ẹgba uzuazọ* gbe ẹwẹ rai mi ai,+

15 Ahwo-akpọ* kpobi a re whu,

Ahwo-akpọ a re zihe kpohọ ẹkpẹ.*+

16 Fikiere, otẹrọnọ wha wo otoriẹ, wha gaviezọ kẹ onana;

Wha gaviezọ ziezi kẹ ẹme nọ mẹ be ta na.

17 Kọ ohwo nọ o mukpahe uvioziẹ ọ sae jọ osu,

Hayo kọ whọ sai brukpe ọgba nọ o kiẹrẹe?

19 Ọjọ ọ riẹ nọ o re dhesẹ ọriẹwẹ kẹ emezae-ivie he*

Yọ ọ rẹ jẹ edafe rehọ o ve kienyẹ iyogbe he,*+

Keme aikpobi na yọ iruo abọ riẹ.+

20 A sai whu idudhe,+ evaọ udevie aso;

A re nuhu zighi zighi a ve whu;+

Makọ egba dede a re si ai no oria rai, rekọ orọnikọ ẹkwoma abọ ohwo-akpọ họ.+

21 Keme ibiaro Ọghẹnẹ e be ruẹ idhere ohwo-akpọ,+

Yọ ọ* be ruẹ ithihi awọ riẹ kpobi.

22 Ebi hayo okpa ebi ọvuọvo ọ riẹ hẹ,

Nọ ahwo nọ a bi ru oware uyoma a rẹ sai dhere.+

23 Keme Ọghẹnẹ o fi oke họ kẹ ohwo ọvuọvo ho

Nọ ọ rẹ rọ ziọ aro riẹ kẹ ẹdhoguo.

24 O re wiri egba na, u du gwọlọ nọ ọ rẹ kiẹ otọ ẹme rai tao ho

O ve fi amọfa họ ẹta rai.+

25 Keme ọ riẹ eware nọ a bi ru;+

O re si ai no ọkwa rai evaọ aso, ọ vẹ guọghọ ae.+

26 Ọ rẹ tehe ae fihọ otọ fiki imuemu rai,

Evaọ oria nọ ahwo kpobi a rẹ jọ ruẹ e rai,+

27 Keme a nyase iẹe ba no, a gbe bi lele iei hi+

Yọ a be daezọ edhere riẹ ọvuọvo ho;+

28 A bi ru nọ iyogbe a bi ro bo sei,

O tẹ whae ze nọ o bi ro yo edo oviẹ iruori na.+

O te ru ei kẹ orẹwho hayo omọvo, epọvo na o rẹ jọ,

30 Re ohwo nọ ọ be gọ Ọghẹnẹ hẹ* o gbe su hu+

Hayo kpahe egbefẹ kẹ ahwo ho.

31 Kọ ohwo jọ ọ rẹ ta kẹ Ọghẹnẹ nọ,

‘A kẹ omẹ uye, dede nọ me ru oware ovo thọ họ;+

32 Vuẹ* omẹ oware nọ me vuhumu hu* na;

Otẹrọnọ me ru oware jọ thọ, me ti gbe ru ei hi’?

34 Enẹ ezae nọ i wo otoriẹ* a te ta kẹ omẹ

Enẹ ọzae owareghẹ kpobi nọ o bi yo ẹme mẹ ọ te ta, inọ

35 ‘Job ọ ta ẹme ababọ eriariẹ,+

Yọ eme riẹ e kare ovuhumuo.’*

36 Jọ a dawo Job* te oka

Keme eme nọ ọ be kpahe e wọhọ erọ ahwo omuomu!

37 O fi ọkparesuọ ba uzioraha riẹ;+

Ọ tehe abọ riẹ ku omai

Jẹ ta eme buobu wọso Ọghẹnẹ uzẹme na!”+

 2 “Kọ u mu owhẹ ẹro ziezi inọ who kiẹrẹe, te epanọ whọ be rọ ta nọ,

‘Me kiẹrẹe vi Ọghẹnẹ’?+

 4 Mẹ te kpahe fihọ onana kẹ owhẹ

Avọ egbẹnya+ ra nọ e rrọ kugbe owhẹ.

 5 Rri obọ ehru na re whọ ruẹ,

Nabi rri ẹgho na,+ nọ ọ rrọ obọ ehru na.

 7 Otẹrọnọ who kiẹrẹe, eme whọ kẹ riẹ;

Eme o mi owhẹ?+

 8 Ohwo-akpọ wọhọ owhẹ ọvo umuomu ra u re kpomahọ,

Yọ ọmọ ohwo-akpọ ẹrẹreokie ra o re fiobọhọ kẹ.

 9 Ahwo a re bo via nọ a te bi kienyẹ ae gaga;

A re bo re a wo ufuoma no obọ ogaga nọ egba na a bi ro su ai.+

10 Rekọ ohwo ọvo ọ be ta ha inọ, ‘Diẹse Ọghẹnẹ, Ọmemama Oride nọ ọ ma omẹ na ọ rrọ,+

Ọnọ o bi ru nọ ahwo a be hae rọ so ile evaọ aso na?’+

11 O bi wuhrẹ omai+ vi erao nọ e rrọ otọakpọ na,+

Yọ o bi ru omai wo areghẹ vi evra obọ ehru* na.

12 Ahwo a re bo via, rekọ o re yo kẹ ae he,+

Fiki omorro ahwo omuomu.+

13 Evaọ uzẹme, Ọghẹnẹ ọ rẹ gaviezọ kẹ oviẹ ufofe* he;+

Erumeru na ọ rẹ daezọ riẹ hẹ.

15 Keme ọ rọ ofu se owhẹ ẹdhọ họ;

Yọ o bi rri omuru ra nọ ọ vrẹta ha.+

16 Job o rovie unu riẹ be ta eme nọ i wo erere he;

Ọ be ta eme buobu ababọ eriariẹ.”+

 2 “Gbe wo odiri kẹ omẹ omojọ re me ru ẹme na vẹ,

Keme me gbe wo eme nọ mẹ te ta kpahe Ọghẹnẹ.

 3 Mẹ te ta eme buobu kpahe eware nọ mẹ riẹ,

Yọ me ti dhesẹ nọ Ọnọ ọ ma omẹ o kiẹrẹe.+

 4 Evaọ uzẹme, mẹ be ta ọrue he;

Ọnọ o wo eriariẹ egbagba+ na ọ rrọ etenẹ kugbe owhẹ.

 5 Evaọ uzẹme, Ọghẹnẹ ọ re gaga+ yọ ọ rẹ siọ ohwo ọvo ho;

O wo ogaga ulogbo nọ o re ro wo otoriẹ eware.*

 6 O ti siwi uzuazọ irumuomu hu,+

Rekọ o ti bru uvioziẹ kẹ enọ a bi gboja kẹ.+

 7 O re si ubiẹro riẹ no ikiẹrẹe na ha;+

Ọ rẹ rehọ ae keria kugbe ivie,*+ yọ a te kpare ai kpehru bẹdẹ bẹdẹ.

 8 Otẹrọnọ a rehọ egbregba gba ae

Jẹ rehọ ifi oja-oriọ gba ae,

 9 O ve dhesẹ oware nọ a ru na kẹ ae,

Izieraha rai nọ omorro rai o wha ze.

10 O re rovie ezọ rai kẹ ọkpọvio

Ọ vẹ ta kẹ ae nọ a siọ oware uyoma ba eru.+

11 Otẹrọnọ a yoẹme jẹ gọe,

Eware i ti woma kẹ ae evaọ edẹ uzuazọ rai kpobi,

Yọ ikpe uzuazọ rai e te vọ avọ omawere.+

12 Rekọ a gbe yoẹme he, a ti whu uwhu ọgbọdọ*+

A ti whu ababọ eriariẹ.

14 A re whu* nọ a gbẹ rrọ ọmaha,+

A rẹ raha oke rai* kugbe igberẹ ezae etẹmpol.+

15 Rekọ Ọghẹnẹ ọ rẹ thọ enọ e be reoja evaọ etoke oja-oriọ rai;

O re rovie ezọ rai re a yo ẹme riẹ nọ a te bi kienyẹ ae.

16 O re si owhẹ no akotọ ẹbẹbẹ+

Kpohọ oria nọ o rrọ kẹkẹe nọ awhaha ọ rrọ họ,+

Avọ emamọ emu nọ ọ rrọ ehru emẹjẹ ra nọ ọ rẹ rọ sasa owhẹ oma.+

17 Kẹsena oziẹ nọ a ti brukpe irumuomu na o vẹ te vọ owhẹ eva,+

Nọ a te guẹdhọ na je bru uvioziẹ no.

18 Rekọ yọroma re ofu ọ gbẹ lẹliẹ owhẹ jẹ egrẹ hẹ,*+

Yọ whọ kuvẹ re udi-oriọ ulogbo u su owhẹ thọ họ.

19 Kọ oviẹ ra kẹ obufihọ

Hayo omodawọ ogaga ra u ti si owhẹ no idhọvẹ?+

20 Who du rẹro aso gaga ha,

Okenọ a rẹ gbẹ rọ ruẹ ahwo evaọ eria nọ a jọ họ.

21 Yọroma re whọ siọ umuomu ba eru,

Whọ salọ oyena ha, ukpoye salọ oja-oriọ.+

22 Rri! A kpare Ọghẹnẹ kpehru fiki ogaga ulogbo riẹ;

Owuhrẹ vẹ ọ wọhọ e riẹ?

23 Ono o dhesẹ edhere kẹe* no ẹdẹ jọ+

Hayo ta kẹe nọ, ‘Oware nọ who ru na o thọ’?+

24 Kareghẹhọ jiri iruẹru riẹ,+

Enọ ahwo-akpọ a rọ so ile no.+

25 Ahwo-akpọ kpobi a ruẹ onana no,

Ohwo-akpọ o bi rri no ugbothabọ ze.

26 Evaọ uzẹme, ma rẹ sae riẹ epanọ Ọghẹnẹ ọ rro te he;+

A rẹ sae riẹ epanọ ikpe riẹ i bu te he.*+

27 O re se egẹgẹ ame kpehru;+

I ve zihe ruọ oso nọ o bi no igrigri riẹ ze;

28 Kẹsena o ve hwẹ no ẹgho na ze fihọ otọ;+

Ọ vẹ rrọ fihọ ahwo-akpọ.

29 Kọ ohwo jọ ọ rẹ sae riẹ oghẹrẹ nọ ẹgho na ọ rrọ,

Gbe egbrara nọ i bi no uwou-udhu* riẹ ze?+

30 Rri epanọ o ru elo egbrara riẹ lo fihọ oma riẹ soso+

Je ruru edidi* abade na.

31 Enana ọ be rọ rẹrote* ahwo na;

Ọ be kẹ ae emu buobu.+

32 Ọ be rọ abọ riẹ ruru elo egbrara na,

Yọ ọ rẹ kpọe bru ọnọ ọ gwọlọ rehọ iẹe tehe.+

33 Egbrara riẹ e be ta kpahe iẹe,

Makọ uthuru erao i re vuhu ohwo* nọ ọ be tha.

37 “Whaọ obọnana udu mẹ u bi kie kpikpikpi

U bi duola no ẹta riẹ.

 2 Gaviezọ ziezi kẹ urru riẹ nọ o be go

Gbe egbrara nọ i bi no unu riẹ ze.

 3 O siobọnoi evaọ otọ odhiwu na soso

O te vi elo egbrara riẹ+ kpohọ oka avọ oka otọakpọ na.

 4 Nọ oyena o vrẹ no, edo ologbo o te bi do;

Urru ulogbo riẹ u bi ru edo egbrara,+

Yọ ọ rẹ whaha iẹe he nọ a te yo urru riẹ.

 5 Ọghẹnẹ ọ rẹ rọ urru riẹ ru edo egbrara+ evaọ edhere igbunu;

O re ru eware igbunu nọ ma rẹ sai wo otoriẹ rai vievie he.+

 7 Ọghẹnẹ ọ rẹ da iruẹru ohwo-akpọ kpobi ji*

Re ohwo-akpọ kpobi ọ vẹ riẹ iruo Ọghẹnẹ.

 8 Erao ijihẹ e rẹ ruọ eva iwou rai

A vẹ daji iwou rai.

 9 Ofou ọwhibo o re fou no oria riẹ ze,+

Yọ ekpahe i re lele ofou obọ ẹkpẹlobọ ovatha-ọre ze.+

10 Nọ Ọghẹnẹ o te kuẹwẹ, ame o ve dhẹmu fihọ ukpulu,+

Ame obuobu orereghe na o ve dhẹmu fihọ gaga.+

11 Ẹhẹ, ọ rọ ame* ru ẹgho na fihọ gbẹgbẹdẹ;

Ọ vaha elo egbrara riẹ+ fihọ ẹgho na;

12 I re kpohọ oria kpobi nọ ọ kpọ rai rri;

I re ru oware kpobi nọ o jie uzi riẹ+ evaọ otọakpọ na nọ a rẹ rria na.*

13 Te o ru rie fikinọ ọ gwọlọ rehọ iẹe kẹ ahwo uye*+ hayo fiki otọ na

Hayo fiki uyoyou riẹ nọ o rẹ hiẹ hẹ, ọye o ru nọ o rọ via.+

14 Gaviezọ kẹ onana, Job;

Dhizu re whọ romatotọ roro kpahe iruo igbunu Ọghẹnẹ.+

15 Kọ whọ riẹ oghẹrẹ nọ Ọghẹnẹ ọ be rọ kpọ* ẹgho na

Gbe epanọ o bi ro ru elo egbrara na lo no ẹgho riẹ ze?

17 Fikieme iwu ra e rẹ rọ rrorro

Nọ otọakpọ na o tẹ rrọ rirẹ fiki ofou obọze ovatha-ọre na?+

18 Kọ whọ sae rriẹ* idadeghe na họ* wọhọ epanọ o ru na+

Re e jọ gaga wọhọ ughẹgbe ayọno?

19 Vuẹ omai oware nọ ma rẹ ta kẹe;

Ma sae kpahe ẹme he keme eva ebi ma rrọ.

21 A rẹ sae tubẹ ruẹ elo* na ha,

Dede nọ o bi lo gaga evaọ obehru,

Bẹsenọ ofou o re fou ze o ve ru ehru* na ghariẹ.

22 Elo ọnwranwra igoru o re no obọ ẹkpẹlobọ ovatha-ọre ze;

Oruaro Ọghẹnẹ+ u re mu ọwhewhe.

23 Ma sai wo otoriẹ oware kpobi kpahe Erumeru na ha;+

O wo ogaga ulogbo,+

O re ru oware nọ o wọso uvioziẹ riẹ+ gbe ẹrẹreokie ologbo riẹ vievie he.+

 2 “Nọ ono ọna, nọ o bi ruru oware nọ mẹ gwọlọ* na

Nọ ọ be ta oware nọ ọ riẹ hẹ na?+

 3 Ivie, mu eku ra ga wọhọ ọzae;

Mẹ te nọ owhẹ enọ, whọ vẹ te kẹ omẹ iyo.

 5 Ono o dhesẹ oghẹrẹ nọ ọ rẹ rro te, otẹrọnọ whọ riẹ,

Hayo kọ ono ọ rriẹ ufi fihọ iẹe rọ mae?

 6 Ehru eme a fi otọhotọ riẹ họ,*

Hayo kọ ono ọ rehọ utho ubienẹ riẹ vi,+

 7 Okenọ isi ohiohiẹ na+ kpobi a bo ubo oghọghọ,

Nọ emọ* Ọghẹnẹ* kpobi+ a jẹ koyẹ jiri ei?

 8 Ono o di ogba wariẹ abade na họ je fi ethẹ họ iẹe+

Okenọ ọ tehe no edhede na lahwe,

 9 Nọ me ku ẹgho fihọ iẹe wọhọ ewu

Jẹ rọ ẹgho ọlala variẹ iẹe,*

10 Nọ me fi oria nọ mẹ gwọlọ nọ ọ rẹ nya ba họ kẹe

Je fi ethẹ riẹ họ gbe ekpọ nọ a rẹ rọ kare ae,+

11 Mẹ tẹ ta nọ, ‘Whọ sae nyate etenẹ, rekọ whọ rẹ nyavrẹ etenẹ hẹ;

Etenẹ họ oria nọ ẹkporo ọgaga ra ọ rẹ nya ba’?+

12 Kọ who jie uzi kẹ ohiohiẹ no ẹdẹ jọ*

Hayo dhesẹ oria nọ oke o rẹ jọ ke no,+

13 Re o ke te oka avọ oka otọakpọ na

Je le irumuomu no eva riẹ?+

14 U re nwene wọhọ ọviẹ nọ ọ rrọ otọ oware nọ a bi ro fi oka họ iẹe,

Eware kpobi nọ e rrọ eva riẹ e vẹ romavia wọhọ onaa sa-sa nọ a ru fihọ ewu.

15 Rekọ a mi irumuomu na elo rai no,

A wiri ugbobọ rai nọ a kpare kpehru na no.

16 Kọ who te obotọ no, obonọ ame abade na o bi no ze

Hayo whọ nyae kiẹ ame odidi na riwi no?+

17 Kọ a dhesẹ inuethẹ uwhu+ kẹ owhẹ no,

Hayo kọ whọ ruẹ inuethẹ okpa ebi* no?+

Diẹse họ oria ebi na,

20 Re whọ rehọ iẹe kpobọ ẹkwotọ riẹ

Jẹ riẹ idhere nọ a re ro kpobọ uwou riẹ?

21 Kọ whọ riẹ onana keme a yẹ owhẹ no vẹre

Ikpe* uzuazọ ra e tẹ jẹ rrọ buobu?

22 Kọ whọ ruọ eva iwou nọ a be jọ rawo* ekpalekpa-ame no,+

Hayo kọ whọ ruẹ iwou nọ a be jọ rawo oso-itho no,+

23 Enọ mẹ ruẹrẹ fihọ kẹ oke okpẹtu,

Rọkẹ ẹdẹ ohọre gbe ẹmo?+

24 Ofẹ vẹ elo* o bi no ze ruọ eria kpobi,

Bovẹ ofou obọ ovatha-ọre na o bi ro fou fihọ otọakpọ na?+

25 Ono o bru oko nọ ame o re su vrẹ fihọ kẹ owhe na

Je ru edhere họ kẹ ẹgho nọ egbrara avọ elo egbrara ọ rẹ va no ze,+

26 Re o rrọ oso fihọ oria nọ ohwo ọvo ọ be rria ha,

Fihọ udhude nọ ohwo-akpọ ọvo ọ rrọ họ,+

27 Re o kẹ etọ nọ e raha no oware kpobi nọ e gwọlọ

Je ru ẹbe dhẹ ze?+

28 Kọ oso o wo ọsẹ,+

Hayo ono họ ọsẹ igrigri na?+

29 Edhede ono ame nọ o dhẹmu fihọ ikpulu na o no ze,

Ono o yẹ ekpalekpa-ame obọ odhiwu na+

30 Nọ ehru ame na kpobi o wọhọ utho,

Nọ ehru ame odidi na kpobi o dhẹmu fihọ gaga?+

31 Kọ whọ sai thuru ifi ẹko isi Kaema* na

Hayo kọ whọ sae rra ifi ẹko isi Kisil* na?+

32 Kọ whọ sai su ẹko isi* lahwe nọ ezi riẹ o te te

Hayo kọ whọ sae kpọ ẹko isi Ash* na kugbe emọ riẹ?

33 Kọ whọ riẹ izi nọ e be kpọ idhiwu na,+

Kọ whọ sae rọ izi nọ e be kpọe* su otọakpọ na?

34 Kọ whọ sae kpare urru se ẹgho na

Re u siobọno ame obuobu ze fihọ* owhẹ?+

36 Ono o fi areghẹ họ eva ẹgho na*+

Hayo ono ọ kẹ eware nọ e rẹ via evaọ ehru na* otoriẹ?+

37 Ono o wo areghẹ te epanọ ọ sai ro kele ẹgho,

Hayo ono ọ rẹ sae gale ekana ame obọ odhiwu na vi+

38 Re ovu na o zihe ruọ etọtọ nọ i bi su vrẹ

Re ikulu ẹkpẹ otọakpọ na e tamu ohwohwo?

39 Kọ whọ sai kpe arao kẹ okpohrokpo

Hayo whọ sae kẹ ikpohrokpo egaga oware nọ o rẹ vọ ae eva+

40 Nọ a te rruẹ fihọ iwou rai

Hayo kuẹlẹ fihọ iwou rai?

41 Ono o bi ru re ekọlọbe na a wo emu+

Nọ emọ riẹ a tẹ viẹ se Ọghẹnẹ nọ o fiobọhọ kẹ ae

Nọ a je bi ghoro kpenẹ avọ enẹ fikinọ oware ovo o riẹ nọ a rẹ re he?

 3 A re rruẹ fihọ otọ nọ a te bi yẹ emọ rai,

Kẹsena edada eyẹ rai i ve kuhọ.

 4 Oma emọ rai o vẹ ga, a vẹ whẹro evaọ obọ ẹwọ na;

A rẹ nyavrẹ, yọ a re gbe zihe bru ai ze he.

 5 Ono o siobọno eketekete ẹwọ* na vrẹ,+

Kọ ono ọ rra ifi no eketekete ẹwọ na?

 6 Me ru udhude opraprara na họ uwou riẹ no,

Gbe ẹkwotọ uwhei na re o jọ oria nọ ọ rẹ rria.

 7 Edo okpẹwho o rẹ dhae eva;

Yọ o re yo edo ọnọ ọ rẹ rọ erao ru iruo ho.

 8 Ọ rẹ nya kpenẹ avọ enẹ evaọ ikpehru na be gwọlọ ẹbe nọ ọ rẹ re,

Be gwọlọ ẹbe ọrọrọ kpobi.

10 Kọ whọ sae rọ ufi si ogholi nyai kporo udhu,*

Kọ o ti lele owhẹ nyai kporo udhu evaọ ukiekpotọ?

11 Kọ whọ te rẹroso ẹgba ologbo riẹ

Re o ru iruo egaga ra kẹ owhẹ?

12 Kọ whọ te rẹroso ẹe inọ ọ te wọ ivuẹvu* ra se owhẹ,

Kọ o ti koko ai họ nyai fihọ oria nọ whọ rẹ jọ si ibi no igbe ekakọ ra?

13 Ogomugoro ọ rẹ frẹ* ibekpe riẹ avọ evawere,

Ghele na, kọ a sae rọ ibekpe gbe ileli riẹ wawo erọ ogbodu?+

14 Keme ọ rẹ nyasiọ ike riẹ ba otọ ẹkpẹ,

Ọ rẹ nyasiọ ae ba ẹkpẹ re e jọ ruọruọruọ.

15 O rẹ thọrọ iẹe ẹro nọ ohwo jọ ọ sae rọ awọ thihi ai whọlọ

Hayo inọ arao ẹwọ jọ ọ sai thihi ai vrẹ.

16 O re gboja kẹ emọ riẹ, wọhọ ẹsenọ e rrọ emọ riẹ hẹ;+

Ozọ u re mu ei hi inọ uye riẹ o sae jọ uvrẹvru.

17 Keme Ọghẹnẹ ọ kẹ riẹ areghẹ hẹ*

Ọ kẹ riẹ otoriẹ ovuovo gbe he.

18 Rekọ nọ ọ tẹ kpama jẹ frẹ* ibekpe riẹ be dhẹ ohrẹ,

Ọ rẹ hwẹ anyenya gbe ọnọ ọ be dhẹe.

21 Ọ rẹ la evaọ ukiekpotọ na, o ve duola no otọ avọ ẹgba;+

O re duwu ruọ eva ẹmo.*+

23 Owha-ese u bi ru edo evaọ ehru riẹ,

Ọgbọdọ avọ ozuẹ i bi lo nwranwranwra.

24 Avọ oma nọ o be kpakpa iẹe, o ve duola kpobọ aro,*

Ọ rẹ sai dikihẹ oria ovo ho* nọ o te yo edo onware.

O re yo ore* ẹmo evaọ ugbo

Je yo edo enọ i wuzou egbaẹmo gbe ubo ẹmo.+

26 Kọ otoriẹ ra ọso ọ be sae rọ rra,

Nọ ọ rẹ rọ rriẹ ibekpe riẹ rri ofẹ obọze ovatha-ọre?

27 Hayo kọ whẹ họ ọnọ ọ ta kẹ ugo nọ ọ rra rri obọ ehru+

Jẹ bọ uwou riẹ fihọ oria ukpekpehru,+

28 Inọ ọ wezẹ obehru ugbehru,

Jẹ rria oria omofọwẹ riẹ evaọ ugbehru-utho?*

29 Obei o re rri no ze gwọlọ emu;+

Ibiaro riẹ e rẹ ruẹ thethabọ.

30 Emọ riẹ e rẹ da azẹ;

Yọ oria kpobi nọ iri e rrọ, etẹe ọ rẹ jọ.”+

 5 Mẹ ta ẹme ẹsiẹvo, rekọ mẹ gbẹ te wariẹ ta ẹme he;

Mẹ ta ẹme isiava, rekọ mẹ gbẹ te ta ha.”

 7 “Ivie, mu eku ra ga wọhọ ọzae;

Mẹ te nọ owhẹ enọ, whọ vẹ te kẹ omẹ iyo.+

 9 Kọ who wo ugbobọ nọ u wo ẹgba wọhọ orọ Ọghẹnẹ uzẹme na,+

Hayo kọ urru ra o sai ru edo egbrara wọhọ oriẹ?+

10 Ivie, rọ adhẹẹ gbe oruaro gọ omara ẹgọ;

Fi ọghọ avọ orro họ omara wọhọ ewu.

11 Dhesẹ ofu ọgaga ra via;

Rri ohwo kpobi nọ o wo omorro, re whọ rehọ iẹe ziọ otọ.

12 Rri ohwo kpobi nọ o wo omorro, re who hrẹ riẹ kpotọ,

Re who thihi irumuomu na nyaotọ evaọ oria nọ a dikihẹ.

13 Si ai kpobi no fihọ ẹkpẹ;*

Gba ae* fihọ oria nọ u siomano,

14 Kẹsena mẹ omamẹ mẹ vẹ te rọwo*

Inọ obọze ra o rẹ sai siwi owhẹ.

16 Rri ẹgba nọ ọ rrọ eku riẹ

Gbe ogaga nọ o rrọ iriẹ eva riẹ!

17 O re ru uweli riẹ gaga wọhọ ure sida;

A zuo iriẹ ikpekpawọ riẹ kugbe.

18 Igbenwa riẹ e wọhọ ekpọ ekọpa;

Abọ gbe awọ riẹ e wọhọ ekpọ ayọno.

19 Evaọ usu emama itieye na, ọye họ ọrọ ọsosuọ* evaọ iruo Ọghẹnẹ;

Ọnọ ọ ma riẹ na ọvo ọ rẹ sae nyabru ei avọ ọgbọdọ riẹ.

20 Keme evaọ igbehru na ọ rẹ jọ ruẹ emu re,

Oria nọ erao ẹwọ na kpobi a rẹ jọ zaharo.

21 O re kiẹzẹ otọ ire lotọs,

Ọ rẹ jọ otọ ikpoko oria nọ o rrọ ameame.

22 Ire lotọs e rẹ kẹe edhedhẹ riẹ,

Yọ ire pọpla ukiekpotọ* na e wariẹ e riẹ họ.

24 Kọ ohwo jọ ọ rẹ sai mu ei yọ o bi rri rie,

Hayo jẹ oghọlọ* fihọ unwe riẹ?

41 “Kọ whọ sae rọ oghọlọ emeri ro mu Levayatan*+

Hayo rọ ufi gba ẹrọo riẹ fihotọ?

 2 Kọ whọ sae thọrọ ufi* nya ighogho-inwe riẹ vrẹ

Hayo jẹ oghọlọ* họ agba riẹ?

 3 Kọ ọ te lẹ owhẹ ẹlẹlẹ,

Hayo kọ ọ te rọ unu kpotọ ta ẹme kẹ owhẹ?

 4 Kọ o ti lele owhẹ re ọvọ,

Re whọ rehọ iẹe ru ọrigbo ra evaọ edẹ uzuazọ riẹ kpobi?

 5 Kọ whọ te rehọ iẹe zaharo wọhọ ọvra

Hayo thuru iei fihọ ufi kẹ emetẹ esese ra?

 7 Kọ whọ te rọ ogha* fi ohọroma riẹ soso+

Hayo rehọ ọjọ* fi uzou riẹ?

 8 Rọ obọ ra kpahe iẹe;

Whọ te kareghẹhọ ohọre na, who gbe ti ru ei ofa ha!

12 Mẹ rẹ siọ ẹme ba ẹta kpahe abọ gbe awọ riẹ hẹ,

Te ogaga riẹ gbe ugboma riẹ nọ a nabe riẹ ma ziezi na.

15 Uke riẹ u wo ihie egbẹ*

Nọ e nabe tamu ohwohwo.

16 Aikpobi a nabe tamu ohwohwo

Te epanọ uvumọ ofou ọ rẹ sae rọ ruọ eva rai hi.

17 E tamu omoma rai;

E tamu ohwohwo gaga, a rẹ sae hẹriẹ ae he.

18 Ọ tẹ fiẹ inwe,* u re ru elo lo via,

Yọ ibiaro riẹ e wọhọ elo oke nọ u bi rrie.

19 Elo egbrara i re no unu riẹ ze;

Erae e rẹ la noi ze.

20 Iwiri i re kuye no ighogho-inwe riẹ ze,

Wọhọ umuwou-erae nọ a rọ irihi koko erae họ.

21 Ẹwẹ nọ o ku ọ rẹ lẹliẹ iwowo-erae mi erae,

Yọ erae i re hwẹ no unu riẹ ze.

22 Ẹgba ologbo ọ rrọ uriohọ riẹ,

Udu u re no enọ i zere i rie kpobi awọ.

23 Eware nọ i ruru uwo-oma riẹ e tamu kothi;

E tamu gaga wọhọ ẹsenọ a ghra rai fihọ oma riẹ, i re nuhu hu.

24 Ubiudu riẹ o rrọ gaga wọhọ utho,

Ẹhẹ, o rrọ gaga wọhọ utho nọ a rẹ jọ wuhu eware.

25 Nọ ọ tẹ kpama, makọ egba dede a re guegue;

Nọ o te bi fou kurẹriẹ, idudu e rẹ ruọ ohwo oma.

26 Ọgbọdọ ọvuọvo nọ o te rie nọ ọ rẹ ruọ oma riẹ ọ rrọ họ;

Te ozuẹ, ododo, hayo ose.+

27 Ayọno ọ wọhọ ẹbe ọyaya kẹe,

Ekọpa o wọhọ ure ugbogbo.

28 Ọ rẹ ruẹ ose dhẹ hẹ;

Ibitho nọ a rehọ udeme fi i te tei oma e vẹ wọhọ ẹbe ọyaya.*

29 Ọkpọ* ọ wọhọ ẹbe ọyaya kẹe,

Ọ tẹ ruẹ ozuẹ nọ a bi veghe, ọ vẹ hwẹ.

30 Okpeva riẹ o wọhọ ewẹ othẹ nọ e rrọ kpakre kpakre;

Ọ rẹ rriẹ oma họ ọloho wọhọ ẹwẹ akpala nọ a re ro si ibi no igbe ekakọ.+

31 O re ru ame odidi na họrọ wọhọ uwho;

O re gbudu abade na ku wọhọ uwho nọ a be jọ there udẹ.

33 Oware ovo nọ o wọhọ e riẹ o rrọ otọakpọ na ha,

Omama nọ a ma ozodhẹ kẹ hẹ.

 2 “Obọnana mẹ riẹ nọ whọ rẹ sai ru oware kpobi

Gbe nọ oware ovo nọ who wo họ iroro inọ who ti ru nọ whọ rẹ sai ru hu o rrọ họ.+

Whaọ mẹ ruẹ no inọ mẹ ta eware nọ mẹ riẹ otọ rai hi

Eware nọ e rro vi omẹ, enọ mẹ riẹ hẹ.+

 5 Mẹ rehọ ezọ yo kpahe owhẹ no,

Rekọ obọnana mẹ be rọ ibiaro mẹ ruẹ owhẹ.

 6 Oyejabọ nọ mẹ rọ wariẹ unu,*+

Mẹ tẹ keria ovu gbe enwo ro dhesẹ nọ me kurẹriẹ.”*+