IZIKIẸL

1 Evaọ ukpe avọ ọgba, evaọ ẹdẹ avọ isoi amara avọ ene, nọ mẹ jọ udevie ahwo nọ a jọ igbo na+ evaọ akotọ ethẹ Kiba,+ idhiwu na i te rovie, me te mu eruẹaruẹ Ọghẹnẹ họ ẹruẹ. 2 Evaọ ẹdẹ avọ isoi amara na—koyehọ, evaọ ukpe avọ isoi nọ Jehoyakin ovie na ọ rọ jọ igbo+— 3 ẹme Jihova o te bru Izikiẹl* ọmọzae Buzae ozerẹ na ze evaọ akotọ ethẹ Kiba nọ o rrọ ẹkwotọ ahwo Kaldia.+ Obọ Jihova o tẹ ziọ ehru riẹ evaọ etẹe.+

4 Nọ me je rri na, mẹ tẹ ruẹ okpofou ọgaga jọ+ nọ o bi fou no obọ ẹkpẹlobọ ovatha-ọre ze, yọ ẹgho ologbo gbe erae*+ nọ elo ọnwranwra jọ ọ wariẹ họ ọ jariẹ, yọ oware jọ nọ o wọhọ igoru avọ isiliva nọ a gua kugbe o jọ eva erae na.+ 5 Eware jọ nọ e wọhọ emama ene nọ e rrọ uzuazọ e jọ eva riẹ,+ yọ oma ọvuọvo o wọhọ orọ ohwo-akpọ. 6 Ọvuọvo o wo evao ene gbe ibekpe ene.+ 7 Awọ rai ọ jọ liọliọ, evawọ rai e jọ wọhọ erọ ọmọ-eruẹ, yọ i je lo wọhọ epaọ ekọpa nọ a ririe fihọ nwranwranwra.+ 8 A jọ ofẹ ene rai wo abọ ohwo-akpọ evaọ otọ ibekpe rai, yọ emama ene na i wo evao gbe ibekpe. 9 Ibekpe rai i je te ohwohwo. A re kuomarẹriẹ hẹ re a te kpohọ obonọ a be nya; ovavo ọvuọvo rai ọ rẹ nya.+

10 Enẹ evao rai e jọ: Aimane na ọvuọvo o wo ovao ohwo-akpọ avọ ovao okpohrokpo+ evaọ ofẹ obọze, a te je wo ovao eruẹ+ evaọ ofẹ ẹkpẹlobọ, yọ aimane na ọvuọvo o wo ovao ugo.+ 11 Ere evao rai e jọ. A rriẹ ibekpe rai fihọ evaọ obehru rai. Ọvuọvo o wo ibekpe ivẹ nọ i je te ohwohwo, yọ ibekpe ivẹ i ruru oma rai.+

12 Ovavo ọvuọvo rai ọ rẹ nya, a re kpohọ oria kpobi nọ ẹzi na ọ kpọ rai nọ a nya.+ A re kuomarẹriẹ hẹ nọ a be nya na. 13 Oma emama nọ e rrọ uzuazọ na o wọhọ iwowo-erae, yọ oware jọ nọ o wọhọ umure-erae nọ o be ware nwenwenwe o jẹ nya kpemu kparo evaọ udevie emama nọ e rrọ uzuazọ na, yọ elo egbrara o je lo no eva erae na ze.+ 14 Nọ emama nọ e rrọ uzuazọ na e tẹ nyavrẹ je zihe ze, onya rai o rẹ wọhọ elo egbrara.

15 Epanọ me je ro rri emama nọ e rrọ uzuazọ na, mẹ tẹ ruẹ ẹtẹ ọvo jọ nọ ọ rrọ otọ kẹle emama nọ e rrọ uzuazọ nọ i wo evao ene na ọvuọvo.+ 16 O wọhọ nọ oma etẹ na soso u je lo wọhọ krisolaet, yọ oghẹrẹ ovona etẹ ene na e jọ. Oghẹrẹ nọ e rrọ o wọhọ ẹsenọ ẹtẹ jọ ọ rrọ eva ẹtẹ jọ.* 17 Nọ a te bi no oria ruọ oria, a rẹ sae nya kpohọ ofẹ kpobi evaọ ofẹ ene na ababọ oma nọ a re kurẹriẹ nọ a be nya na. 18 Irimu etẹ na i kpehru te epanọ i re ro mu ọwhewhe, yọ ibiaro e vọ irimu ene na wariẹ họ.+ 19 Oke kpobi nọ emama nọ e rrọ uzuazọ na i no oria ruọ oria, etẹ na i re lele ai, yọ okenọ emama nọ e rrọ uzuazọ na i te no otọ kpehru, etẹ na i re no otọ kpehru re.+ 20 A rẹ nya kpohọ oria kpobi nọ ẹzi na ọ kpọ rai nọ a nya, oria kpobi nọ ẹzi na o kpohọ. Etẹ na i re no otọ kpehru kugbe ae, keme ẹzi nọ ọ be kpọ emama nọ e rrọ uzuazọ na* ọ rrọ eva etẹ na re. 21 Nọ i te no oria ruọ oria, enana i re lele ai; nọ i te dikihẹ oria ovo, enana i re dikihẹ oria ovo re; yọ okenọ i te no otọ kpehru, etẹ na i re no otọ kpehru kugbe ae, keme ẹzi nọ ọ be kpọ emama nọ e rrọ uzuazọ na ọ rrọ eva etẹ na re.

22 Oware okẹkẹe jọ nọ u bi lo wọhọ okpalekpa-ame ọnwranwra o jọ ehru izou emama nọ e rrọ uzuazọ na, o rriẹ fihọ evaọ ehru izou rai.+ 23 Ibekpe rai e jọ liọliọ* evaọ otọ oware okẹkẹe na, yọ i te ohwohwo. Ọvuọvo o wo ibekpe ivẹ nọ o ro ruru abọvo oma riẹ jọ, o te je wo ivẹ efa nọ o ro ruru abọdekọ. 24 Nọ me yo edo ibekpe rai, o jọ wọhọ edo ame nọ o bi kporo ẹkẹre, wọhọ edo Erumeru na.+ Nọ a no oria ruọ oria, edo rai ọ jọ wọhọ edo ogbaẹmo. Nọ a te dikihẹ oria ovo, a ve fi ibekpe rai họ otọ.

25 Urru jọ o jẹ ta ẹme evaọ obehru oware okẹkẹe nọ o jọ ehru izou rai na. (Nọ a te dikihẹ oria ovo, a ve fi ibekpe rai họ otọ.) 26 Oware jọ nọ o wọhọ utho safaya+ o jọ obehru oware okẹkẹe nọ o jọ ehru izou rai na, yọ u tho agbara-uvie.+ Ohwo jọ nọ oma riẹ o wọhọ orọ ohwo-akpọ ọ keria agbara-uvie nọ ọ rrọ obehru na.+ 27 Mẹ tẹ ruẹ oware jọ nọ u bi lo wọhọ igoru avọ isiliva nọ a gua kugbe,+ onọ o jọ wọhọ elo erae nọ e be ware evaọ oria nọ o wọhọ eku riẹ je no umuo etẹe kpehru; yọ no umuo eku riẹ kpotọ, mẹ ruẹ oware jọ nọ o wọhọ erae.+ Elo ọnwranwra jọ ọ wariẹ e riẹ họ 28 wọhọ orọ usi-ame+ nọ o rrọ ehru evaọ ẹdẹ oso. Ere elo ọnwranwra nọ ọ wariẹ e riẹ họ na ọ jọ. O jọ wọhọ oruaro Jihova.+ Nọ mẹ ruẹ e riẹ, me te kie vovao tuotọ, me te mu uvou ohwo jọ nọ ọ be ta ẹme họ eyo.

2 Kẹsena ọ tẹ ta kẹ omẹ nọ: “Ọmọ ohwo,* kpama dikihẹ re mẹ ruẹsi lele owhẹ ta ẹme.”+ 2 Nọ ọ ta ẹme kẹ omẹ, ẹzi ọ tẹ ruọ omẹ oma, o tẹ lẹliẹ omẹ kpama dikihẹ+ re mẹ sai yo ẹme Ọnọ ọ be ta ẹme kẹ omẹ na.

3 Ọ tẹ be ta kẹ omẹ nọ: “Ọmọ ohwo, me bi vi owhẹ bru ahwo Izrẹl,+ bru erẹwho ọwọsuọ nọ e wọso omẹ.+ Te ai te esẹ-esẹ rai a raha uzi mẹ rite ẹdẹ inẹnẹ na.+ 4 Me bi vi owhẹ bru emezae aghẹmeeyo* nọ i wo udu ogaga,+ yọ whọ rẹ ta kẹ ae hrọ inọ, ‘Enẹ Jihova Olori nọ Ọ Mai Kpehru na ọ ta.’ 5 Rọ kpahe ae, te a gaviezọ hayo a rọwo gaviezọ họ—keme uwou ọwọsuọ a rrọ+—a te ginẹ riẹ nọ ọruẹaro jọ ọ jọ udevie rai.+

6 “Rekọ rọkẹ owhẹ, ọmọ ohwo, jọ ozọ rai u mu owhẹ hẹ,+ yọ ozọ eme rai u mu owhẹ hẹ dede nọ ekpajẹ gbe idhigbo e wariẹ owhẹ họ,*+ whọ tẹ jẹ be rria udevie ewhọhro-imuomu. Jọ ozọ eme rai u mu owhẹ hẹ,+ yọ who guegue fiki ovao rai hi,+ keme uwou ọwọsuọ a rrọ. 7 Whọ rẹ ta ẹme mẹ kẹ ae hrọ, te a gaviezọ te a gaviezọ họ, keme ahwo ọwọsuọ a rrọ.+

8 “Rekọ rọkẹ owhẹ, ọmọ ohwo, gaviezọ kẹ ẹme nọ mẹ be ta kẹ owhẹ. Whọ wọso wọhọ uwou ọwọsuọ nana ha. Rovie unu ra re whọ re oware nọ mẹ be kẹ owhẹ na.”+

9 Nọ me rri, mẹ tẹ ruẹ obọ jọ nọ a rriẹ bru omẹ ze,+ mẹ tẹ ruẹ uko-obe nọ a kere eme fihọ* nọ o rrọ obọ na.+ 10 Nọ ọ rriẹe fihọ aro mẹ, mẹ tẹ ruẹ nọ a kere eme fihọ te uke te eva riẹ.+ A kere ile uweri gbe eme nọ e rẹ lẹliẹ ahwo weri je kuenu oviẹ fihọ iẹe.+

3 Kẹsena ọ tẹ ta kẹ omẹ nọ: “Ọmọ ohwo, re oware nọ o rrọ aro ra na.* Re uko-obe nana, re whọ nyae ta ẹme kẹ uwou Izrẹl.”+

2 Fikiere me te rovie unu mẹ, o te ru omẹ re uko-obe nana. 3 Ọ tẹ gbẹ jẹ ta kẹ omẹ nọ: “Ọmọ ohwo, re uko-obe nana nọ mẹ be kẹ owhẹ na re o vọ owhẹ eva.” Me te mu ei họ ẹre, o tẹ jẹ mere wọhọ ọnyọ evaọ unu mẹ.+

4 Ọ ta kẹ omẹ nọ: “Ọmọ ohwo, nyaruọ udevie ahwo uwou Izrẹl re whọ ta eme mẹ kẹ ae. 5 Keme orọnikọ ahwo nọ a be ta ẹvẹrẹ ọgaga hayo ẹrọunu nọ a riẹ hẹ me bi vi owhẹ bru hu, rekọ uwou Izrẹl. 6 Orọnikọ ahwo buobu nọ a be ta ẹvẹrẹ ọgaga hayo ẹrọunu nọ a riẹ hẹ me bi vi owhẹ bru hu, enọ whọ rẹ sai wo otoriẹ eme rai hi. Otẹrọnọ me te vi owhẹ bru ae, a te gaviezọ kẹ owhẹ.+ 7 Rekọ uwou Izrẹl o te rọwo gaviezọ kẹ owhẹ hẹ, keme a gwọlọ nọ a rẹ gaviezọ kẹ omẹ hẹ.+ Ahwo uwou Izrẹl kpobi a rrọ uzou gaga jẹ rrọ udu gaga.+ 8 Rri! Me ru ovao ra fihọ gaga no wọhọ epanọ ovao rai o rrọ na, je ru aruezo ra fihọ gaga no wọhọ epanọ aruezo rai ọ rrọ na.+ 9 Me ru aruezo ra wọhọ edaemọno no, me ru rie ga vi utho.+ Jọ ozọ rai u mu owhẹ hẹ hayo who guegue fiki ovao rai hi,+ keme uwou ọwọsuọ a rrọ.”

10 Ọ tẹ gbẹ jẹ ta kẹ omẹ nọ: “Ọmọ ohwo, gaviezọ re who fi eme kpobi nọ mẹ te ta kẹ owhẹ na họ udu. 11 Nyaruọ udevie ahwo ra* nọ a rrọ igbo na+ re whọ ta ẹme kẹ ae. Ta kẹ ae nọ, ‘Enẹ Jihova Olori nọ Ọ Mai Kpehru na ọ ta,’ te a gaviezọ hayo a rọwo gaviezọ họ.”+

12 Ẹzi jọ ọ tẹ wọ omẹ vrẹ,+ mẹ tẹ jọ obemu mẹ yo edo ologbo jọ avọ urru nọ o ta nọ: “Jọ a jiri oruaro Jihova evaọ oria riẹ.” 13 Me je yo edo ibekpe emama nọ e rrọ uzuazọ na nọ e be tehe ohwohwo,+ gbe edo etẹ nọ e kẹle rai na+ jegbe edo ologbo jọ. 14 Ẹzi na ọ tẹ wọ omẹ jẹ rehọ omẹ vrẹ, mẹ tẹ nya avọ ọkora gbe ofu nọ ọ rrọ omẹ eva, obọ Jihova o tẹ jọ ehru mẹ gaga. 15 Fikiere mẹ tẹ nyabru ahwo nọ a rrọ igbo na evaọ Tẹl-ebib, enọ e jẹ rria akotọ ethẹ Kiba,+ mẹ tẹ jọ oria nọ a jẹ rria na; edẹ ihrẹ mẹ jọ udevie rai, yọ eware e rrọ omẹ aro reghe reghe.+

16 Nọ edẹ ihrẹ e gba no, ẹme Jihova o te bru omẹ ze inọ:

17 “Ọmọ ohwo, mẹ rehọ owhẹ mu ororoke kẹ uwou Izrẹl no;+ nọ who te yo ẹme jọ no unu mẹ ze, whọ rẹ vẹvẹ ae unu kẹ omẹ hrọ.+ 18 Nọ mẹ tẹ ta kẹ ohwo omuomu nọ, ‘Whọ te seba ewhu hu,’ rekọ whọ gbẹ vẹvẹ iẹe unu hu, whọ gbẹ jẹ ta ẹme rọ vẹvẹ ohwo omuomu na unu re o kurẹriẹ no edhere omuomu riẹ hẹ re ọ ruẹse jọ uzuazọ,+ ohwo na o ti whu fiki oruthọ riẹ keme ohwo omuomu ọ rrọ,+ rekọ mẹ te nekpẹ azẹ riẹ mi owhẹ.*+ 19 Rekọ otẹrọnọ whọ vẹvẹ ohwo omuomu unu, o gbe kurẹriẹ no umuomu riẹ je no edhere omuomu riẹ hẹ, o ti whu fiki oruthọ riẹ, rekọ whọ te siọ uzuazọ ra ba esiwi hi.+ 20 Rekọ nọ ohwo okiẹrẹe ọ tẹ nyasiọ ẹrẹreokie riẹ ba, o je bi ru oware nọ o thọ,* me ti fi utho ezoruẹ họ aro riẹ, o ve ti whu.+ Otẹrọnọ whọ gbẹ vẹvẹ iẹe unu hu, o ti whu fiki uzioraha riẹ, yọ mẹ te kareghẹhọ iruẹru ikiẹrẹe riẹ hẹ, rekọ mẹ te nekpẹ azẹ riẹ mi owhẹ.*+ 21 Rekọ otẹrọnọ whọ vẹvẹ ohwo okiẹrẹe unu inọ ọ raha uzi hi, ọ gbẹ raha uzi hi, ọ te gbẹ jọ uzuazọ fikinọ a vẹvẹ e riẹ unu,+ yọ who siwi uzuazọ ra no re.”

22 Obọ Jihova o tẹ ziọ ehru mẹ evaọ etẹe, ọ tẹ ta kẹ omẹ nọ: “Kpama re whọ nya kpobọ ukiekpotọ opraprara na, mẹ te jọ obei lele owhẹ ta ẹme.” 23 Fikiere mẹ tẹ kpama, me te kpobọ ukiekpotọ opraprara na, mẹ tẹ jọ etẹe ruẹ oruaro Jihova,+ wọhọ epaọ oruaro nọ mẹ ruẹ evaọ akotọ ethẹ Kiba na,+ me te kie vovao tuotọ. 24 Kẹsena ẹzi ọ tẹ ruọ omẹ oma, o te ru omẹ kpama dikihẹ,+ ọ tẹ ta ẹme kẹ omẹ, inọ:

“Nya, kare ẹthẹ dhe oma evaọ uwou ra. 25 Rọkẹ owhẹ, ọmọ ohwo, a te rọ ifi whaliẹ owhẹ, a vẹ te rehọ ae gba owhẹ re whọ gbẹ sae nya lahwe evaọ udevie rai hi. 26 Yọ me ti ru ẹrọo ra tamu ehru unu ra, whọ te gbẹ sae ta ẹme he, whọ te sae whọku ai hi, keme uwou ọwọsuọ a rrọ. 27 Rekọ okenọ mẹ te ta ẹme kẹ owhẹ, me ti rovie unu ra, yọ whọ rẹ ta kẹ ae hrọ inọ,+ ‘Enẹ Jihova Olori nọ Ọ Mai Kpehru na ọ ta.’ Jọ ọnọ ọ be gaviezọ, ọ gaviezọ,+ jọ ọnọ ọ be rọwo gaviezọ họ, ọ seba, keme uwou ọwọsuọ a rrọ.+

4 “Whẹ ọmọ ohwo, tọlọ ibriki re who fi ei họ aro ra. Kare uwoho okpẹwho jọ fihọ iẹe—Jerusalẹm. 2 Koi họ,+ ma ugbẹhẹ ro koi họ,+ ma ugbuhru ro koi họ,+ fa ivuẹ ro koi họ, je fi ite-ire nọ a re ro zurie inuethẹ gbe igbẹhẹ fihọ otọ wariẹe họ.+ 3 Tọlọ omodhe ayọno nọ a re ro there ebrẹdi, re who fi ei họ udevie ra avọ okpẹwho na re o jọ wọhọ ugbẹhẹ ayọno. Kẹsena whọ vẹ rẹriẹ ovao ku ei, o vẹ jọ oria nọ a ko họ; who re koi họ. Onana yọ oka rọkẹ uwou Izrẹl.+

4 “Kẹsena whọ vẹ rọ ofẹ ẹkpẹlobọ ra kiẹzẹ, who ve fi abe-ọriọ uwou Izrẹl họ ehru omara.*+ Whọ te wha abe-ọriọ rai na evaọ unu edẹ nọ who ro kiẹzẹ rọ ofẹ kọ na. 5 Mẹ te gba owhẹ họ ru onana evaọ edẹ egba esa gbe udhone-gbikpe (390), onọ o rọwokugbe ikpe abe-ọriọ rai,+ yọ whọ te wha abe-ọriọ uwou Izrẹl. 6 Edẹ na e rẹ gba hrọ.

“Kẹsena who ve kiẹzẹ orọ avọ isiava, ofẹ obọze ra who re ro kiẹzẹ, yọ whọ te wha abe-ọriọ uwou Juda+ edẹ udhuvẹ. Edẹ nọ me fihọ kẹ owhẹ na, ẹdẹ ọvo rọkẹ ẹgbukpe, ẹdẹ ọvo rọkẹ ẹgbukpe. 7 Whọ rẹ rẹriẹ ovao ku Jerusalẹm nọ who ko họ na+ avọ ugbobọ ra nọ u kpefihọ, yọ whọ rẹ ruẹaro oware nọ o te via kẹe hrọ.

8 “Rri! Mẹ te rọ ifi gba owhẹ, re whọ gbẹ sai kuomarẹriẹ no ofẹ ra jọ rri ofẹ odekọ họ bẹsenọ edẹ nọ who ro koi họ na e rẹ gba.

9 “Whọ rẹ rehọ iwhiti, ebali, egwa ikpokpoko, ezaa, imilẹte, gbe espẹte,* who ve fi ai họ eva omodhe ọvo, whọ vẹ rehọ ai ru ebrẹdi kẹ omara. Evaọ unu edẹ nọ who ti ro kiẹzẹ rọ ofẹ kọ na, koyehọ edẹ egba esa gbe udhone-gbikpe (390) na, ebrẹdi na whọ rẹ re.+ 10 Shẹkẹl udhe* ọrọ emu whọ rẹ wawọ re kẹdẹ kẹdẹ. Whọ rẹ re iẹe evaọ oke sa-sa nọ a fihọ.

11 “Whọ rẹ wawọ ame da, abọvo abazeza ihini* whọ rẹ wawọ. Whọ rẹ dae evaọ oke sa-sa nọ a fihọ.

12 “Whọ rẹ re iẹe wọhọ epanọ whọ rẹ re ebrẹdi ebali ogheghelie; evaọ iraro rai who re jo there iei, yọ isọ ohwo-akpọ nọ e ya no who re ro koko erae họ.” 13 Jihova ọ tẹ gbẹ jẹ ta nọ: “Enẹ ahwo Izrẹl a te re ebrẹdi rai gbegbe evaọ udevie erẹwho nọ mẹ te vaha ai kpohọ na.”+

14 Mẹ tẹ ta nọ: “Ere he, Jihova Olori nọ Ọ Mai Kpehru na! No anwọ oke uzoge mẹ ze rite enẹna, mẹ re re arao nọ a dihọ owhuowhu hayo arao nọ arao ojihẹ o kpe ro zue oma mẹ hẹ,+ yọ arao nọ ọ fo ho* ọ re ruọ eva unu mẹ hẹ.”+

15 Fikiere ọ tẹ ta kẹ omẹ nọ: “U woma, mẹ te kẹ owhẹ uvẹ re whọ rehọ isọ eruẹ koko erae na họ viukpọ isọ ohwo-akpọ, whọ vẹ jọ ehru riẹ there ebrẹdi ra.” 16 Kẹsena ọ tẹ ta kẹ omẹ nọ: “Ọmọ ohwo, rri, me bi bru emuore dhe* evaọ Jerusalẹm,+ avọ awa ọgaga a te rọ re ẹkẹ ebrẹdi rai nọ a wawọ,+ yọ avọ idudu a te rọ da ẹkẹ ame rai nọ a wawọ.+ 17 Onana o te via, re nọ a gbe wo ebrẹdi gbe ame he, a ve bi rri ohwohwo avọ igbunu, a vẹ dọ kpobi no fiki oruthọ rai.

5 “Rọkẹ owhẹ, ọmọ ohwo, tọlọ ọgbọdọ ọdada re whọ rehọ iẹe ru erezọbledi ohwo nọ ọ rẹ nware eto. Nware eto uzou ra avọ etuagba ra, kẹsena whọ vẹ rehọ iskeli wawọ eto na jẹ ghale ae fihọ ekueko. 2 Whọ rẹ jọ erae mahe abọvo abasa eto na evaọ obeva okpẹwho na nọ edẹ nọ who ro koi họ na e tẹ gba no.+ Kẹsena whọ vẹ rehọ abọvo abasa ọfa, whọ vẹ rọ ọgbọdọ gbẹre iẹe wariẹ okpẹwho na họ,+ whọ vẹ vaha abọvo abasa urere na fihọ ofou, me ve ti yolo ọgbọdọ ro le ai.+

3 “Whọ rẹ jẹ jọ eva eto na tọlọ umutho ibieto jọ, whọ vẹ gba ae fihọ efẹhọ* ewu ra. 4 Whọ vẹ tọlọ ibieto efa gbolo fihọ erae, whọ vẹ mahe ae no. Onana erae i ti no ze ruọ uwou Izrẹl soso.+

5 “Enẹ Jihova Olori nọ Ọ Mai Kpehru na ọ ta: ‘Jerusalẹm ọna. Mẹ rehọ e riẹ vi udevie erẹwho na, avọ ekwotọ nọ e wariẹ e riẹ họ. 6 Rekọ ọ wọso izi oziẹobro mẹ gbe ijaje mẹ, bi ru eware imuomu vi erẹwho gbe ekwotọ nọ e wariẹ e riẹ họ.+ Keme a siọ izi oziẹobro mẹ, yọ a koko ijaje mẹ hẹ.’

7 “Fikiere enẹ Jihova Olori nọ Ọ Mai Kpehru na ọ ta: ‘Fikinọ wha yoma vi erẹwho nọ e wariẹ owhai họ, wha gbe je koko ijaje mẹ hẹ hayo ru lele izi oziẹobro mẹ hẹ, rekọ ukpoye, wha te lele izi oziẹobro erẹwho nọ e wariẹ owhai họ na,+ 8 enẹ Jihova Olori nọ Ọ Mai Kpehru na ọ ta: “Rri, mẹ te rọsuọ owhẹ, O okpẹwho,+ yọ mẹ omamẹ mẹ te rehọ uye te owhẹ evaọ iraro erẹwho na.+ 9 Mẹ te jọ eva ra ru oware nọ me ri ru ẹdẹvo vievie he fiki iruẹru etọtọ ra kpobi, yọ me ti gbe ru oghẹrẹ oware utioye na ofa ha.+

10 “‘“Fikiere esẹ nọ e rrọ eva ra e te re emezae rai,+ emezae e te re esẹ rai, yọ mẹ te jọ eva ra bruoziẹ kpe ahwo, mẹ vẹ te vaha owhai ahwo nọ a kiọkọ kpobi fihọ ofẹ kpobi.”’*+

11 “‘Fikiere nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘fikinọ whọ rehọ emedhọ etọtọ ra kpobi gbe iruẹru etọtọ ra kpobi zue aruẹri mẹ na,+ mẹ te siọ owhẹ* re; o te da omẹ kẹ owhẹ hẹ, yọ me ti dhesẹ ọdawẹ kẹ owhẹ hẹ.+ 12 Okpẹyao nọ o re vo* hayo ohọo nọ u ti mu i ti kpe abọvo abasa ahwo nọ a rrọ eva ra. Ọgbọdọ o ti kpe abọvo abasa ọfa wariẹ owhẹ họ.+ Mẹ vẹ te vaha abọvo abasa urere na fihọ ofẹ kpobi,* yọ me ti yolo ọgbọdọ ro le ai.+ 13 Ẹsiẹe evedha mẹ i ti ro kuhọ, ofu mẹ o ve ti hrẹ, udu mẹ u ve ti totọ.+ Nọ me te siobọno ofu mẹ ku ai re no, a vẹ te riẹ nọ mẹ Jihova mẹ ta ẹme kẹ ae fikinọ mẹ gwọlọ omarọkẹ riẹriẹriẹ.+

14 “‘Me ti ru owhẹ fihọ oria nọ a raha no gbe oware ekela evaọ udevie erẹwho nọ e wariẹ owhẹ họ gbe evaọ ẹro ohwo kpobi nọ ọ be nya etẹe vrẹ.+ 15 Who ti zihe ruọ oware ekela gbe onọ a re ro jijehwẹ,+ oriruo unuovẹvẹ gbe oware idudu kẹ erẹwho nọ e wariẹ owhẹ họ evaọ okenọ mẹ te rọ evedha gbe ofu kẹ owhẹ iye egaga na. Mẹ Jihova, mẹ ta riẹ no.

16 “‘Me ti vi ohọo nọ u ti mu rọsuọ ae wọhọ ese nọ i re kpe, u ve ti kpe ae. Ese nọ me ti vi na e te wha ọraha se owhai.+ Me ti bru emuore rai dhe* re ohọo nọ u ti mu na o jọ gaga kẹ owhai.+ 17 Me ti vi ohọo nọ u ti mu gbe erao ijihẹ rọsuọ owhai,+ i ve ti kpe emọ ra no. Okpẹyao nọ o re vo avọ azẹ-okpe e te vọ eva ra, yọ mẹ te rọ ọgbọdọ ze rọsuọ owhẹ.+ Mẹ Jihova, mẹ ta riẹ no.’”

6 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, rẹriẹ ovao ku igbehru Izrẹl re whọ ruẹaro oware nọ o te via kẹ ae. 3 Whọ rẹ ta hrọ nọ, ‘O igbehru Izrẹl, wha yo ẹme nọ Jihova Olori nọ Ọ Mai Kpehru na ọ ta: Enẹ Jihova Olori nọ Ọ Mai Kpehru na ọ ta kẹ igbehru na, ikpehru na, iko-ame na, gbe ikiekpotọ na: “Rri! Mẹ te rọ ọgbọdọ ze rọsuọ owhai, mẹ vẹ te raha eria ikpehru rai no. 4 A ti kporo egbada-idhe rai no, a ti wiri egbada insẹnse rai no,+ yọ me ti gbolo ahwo ra nọ a kpe fihọ otọ evaọ aro emedhọ etọtọ* rai.+ 5 Me ti gbolo iri ahwo Izrẹl fihọ aro emedhọ etọtọ rai, yọ mẹ te vaha igbenwa rai fihọ otọ wariẹ egbada-idhe rai họ.+ 6 A te raha ikpewho nọ e rrọ eria kpobi nọ wha be rria no,+ yọ a ti kporo eria ikpehru na no, e vẹ te jọ ofofe.+ A ti kporo egbada-idhe rai no jẹ guọghọ ae ehehẹhẹ, emedhọ etọtọ rai e te raha no, a ti bru egbada insẹnse rai fihọ otọ, a ve ti voro iruo abọ rai no otọ. 7 Enọ a kpe i ti kie evaọ udevie rai,+ wha vẹ te riẹ nọ mẹ họ Jihova.+

8 “‘“Rekọ mẹ te nyasiọ ikiọkotọ jọ ba, keme otu rai jọ ọ te jọ udevie erẹwho na va ọgbọdọ na abọ evaọ okenọ a te vaha owhai fihọ ekwotọ na kpobi na.+ 9 Enọ e te vabọ e te kareghẹhọ omẹ evaọ erẹwho nọ a mu rai kpohọ.+ A ti vuhumu nọ mẹ jọ ọkora fiki udu aghẹmeeyo* rai nọ o rẹriẹ siọ omẹ ba,+ gbe fiki ibiaro rai nọ i bi rri emedhọ etọtọ rai avọ isiuru egaga.*+ Eware iyoma avọ eware etọtọ kpobi nọ a ru e te vuọ ae oma jẹ tọtọ ae oma.+ 10 A te riẹ nọ mẹ họ Jihova, jẹ te riẹ nọ eha nọ me se inọ mẹ te rọ okpẹtu nana te ae na e jọ eha ifofe he.”’+

11 “Enẹ Jihova Olori nọ Ọ Mai Kpehru na ọ ta: ‘Tehe abọ ra jẹ rehọ awọ ra fotọ re who weri fiki eware iyoma avọ eware etọtọ kpobi nọ uwou Izrẹl u ru, keme ọgbọdọ, ohọo nọ u ti mu, gbe okpẹyao nọ o re vo i ti kpe ai.+ 12 Okpẹyao nọ o re vo o ti kpe ọnọ ọ rrọ ugbothabọ, ọgbọdọ o ti kpe ọnọ ọ rrọ ekẹloma, ohwo kpobi nọ ọ va eware nana abọ nọ o gbe kiọkọ, ohọo nọ u ti mu u ti kpei; yọ me ti siobọno ofu mẹ kpobi rọsuọ ae.+ 13 Wha vẹ te riẹ nọ mẹ họ Jihova+ evaọ okenọ ahwo rai nọ a kpe a te rriẹ họ otọ evaọ udevie emedhọ etọtọ rai, wariẹ egbada-idhe rai họ,+ evaọ ehru ukpehru okpekpehru kpobi, evaọ obehru igbehru na kpobi, evaọ otọ ure ulogbo kpobi, gbe evaọ otọ egha ire ilogbo nọ a jẹ hae jọ rehọ eware nọ i re gbo ore awere dhe idhe ro kie ofu emedhọ etọtọ+ rai kpobi. 14 Mẹ te rriẹ obọ mẹ rọ họre ae je ru ẹkwotọ na fihọ ofofe, yọ eria rai nọ a be rria kpobi i ti zihe ruọ ofofe tube vi udhude nọ o kẹle Dibla na. A vẹ te riẹ nọ mẹ họ Jihova.’”

7 Ẹme Jihova ọ tẹ wariẹ bru omẹ ze, inọ: 2 “Rọkẹ owhẹ, ọmọ ohwo, enẹ Jihova Olori nọ Ọ Mai Kpehru na ọ ta kẹ ẹkwotọ Izrẹl: ‘Urere ona! Urere ibienẹ ene ẹkwotọ na o ze no. 3 Urere na u te owhẹ oma no, yọ me ti siobọno ofu mẹ rọsuọ owhẹ, me ti bruoziẹ ra wọhọ epaọ idhere ra jẹ rehọ owhẹ guẹdhọ fiki iruẹru etọtọ ra kpobi. 4 O te da omẹ kẹ owhẹ hẹ; yọ me ti wo ọdawẹ kẹ owhẹ hẹ,+ keme me ti ru re eware nọ i no idhere obọra ze i hwẹ ku owhẹ uzou, whọ vẹ te ruẹ uye eware nọ i no iruẹru etọtọ ra ze.+ Wha vẹ te riẹ nọ mẹ họ Jihova.’+

5 “Enẹ Jihova Olori nọ Ọ Mai Kpehru na ọ ta: ‘Rri! Okpẹtu jọ, okpẹtu oghẹrẹsa jọ ọ be tha.+ 6 Urere jọ o be tha; urere na o te tha; o te kpare omariẹ* rọsuọ owhẹ. Rri! O be tha. 7 U te oke ra no,* whẹ ọnọ ọ be rria ẹkwotọ na. Oke na o be tha, ẹdẹ na ọ kẹle no.+ Edo ozighi ọ rrọ ehru igbehru na, orọnikọ edo oghọghọ họ.

8 “‘Uviemenẹ me ti ku ofu mẹ ku owhẹ,+ me ti siobọno ofu mẹ kpobi rọsuọ owhẹ,+ me ti bruoziẹ ra wọhọ epaọ idhere ra jẹ rehọ owhẹ guẹdhọ fiki iruẹru etọtọ ra kpobi. 9 O te da omẹ kẹ owhẹ hẹ; yọ me ti wo ọdawẹ kẹ owhẹ hẹ.+ Me ti ru re eware nọ i no idhere ra ze i hwẹ ku owhẹ uzou, whọ vẹ te ruẹ uye eware nọ i no iruẹru etọtọ obọra ze. Wha vẹ te riẹ nọ mẹ Jihova, mẹ be kẹ owhai uye na.+

10 “‘Rri, ẹdẹ na ọna! Rri, o be tha!+ U te oke ra no;* ọkpọ na ọ whẹ idodo họ no, yọ omorro o dhẹ ze no. 11 Ozighi ọ rro zihe ruọ ọkpọ emuemu no.+ Ọvuọvo rai ọ te zọ họ, yọ uvumọ ekwakwa efe rai, hayo ogbotu ahwo rai, hayo okpodẹ nọ a wo u ti kiọkọ họ. 12 Oke na o te tha, ẹdẹ na ọ te ze. Jọ ọnọ ọ be dẹ ọ ghọghọ họ, jọ ọnọ ọ be zẹ o weri hi, keme ofu ọ be tha rọsuọ ogbotu ahwo rai kpobi.*+ 13 Keme ọnọ ọ be zẹ na o ti zihe bru oware nọ ọ zẹ no ho, o tẹ make rọnọ a vu rie wa uzuazọ, keme ogbotu ahwo na soso eruẹaruẹ na i kiekpahe. Ohwo ọvo o ti zihe ze he, yọ ohwo ọvo o ti siwi uzuazọ riẹ hẹ, fiki oruthọ riẹ.

14 “‘A kporo ọgba na no,+ yọ ohwo kpobi ọ ruẹrẹ oma kpahe no, rekọ ohwo ọvo o bi kpohọ ẹmo na ha, keme ogbotu ahwo na soso me bi mu ofu kẹ.+ 15 Ọgbọdọ na ọ rrọ obọ otafe,+ yọ okpẹyao nọ o re vo na avọ ohọo nọ u bi mu na e rrọ obeva. Ọgbọdọ na o ti kpe ohwo kpobi nọ ọ rrọ obọ ẹwọ, ohọo nọ u ti mu avọ okpẹyao nọ o re vo i ti kpe ahwo nọ a rrọ eva okpẹwho na no.+ 16 Ahwo rai nọ a rọ udugaga vabọ a ti kpobọ igbehru na, yọ wọhọ irueruẹ ikiekpotọ, omomọvo o ti dimẹ fiki oruthọ riẹ.+ 17 Abọ rai kpobi i ti kie fihọ otọ yọlọ, yọ ighilawọ rai kpobi i ti su ame fihọ otọ.*+ 18 A ku ehọ-ekpa* họ no,+ yọ ozọ o be lẹliẹ ai nuhu.* A ti ru oma vuọ ohwo kpobi, yọ uzou kpobi o te jọ rioriorio.*+

19 “‘A ti gbolo isiliva rai fihọ iko-ore, yọ igoru rai i ti zihe ruọ eware nọ i re tuoma rọkẹ ae. Isiliva rai hayo igoru rai e te sai siwi ai hi evaọ ẹdẹ ofu ọgaga Jihova.+ Eva e te vọ ae he,* yọ a te re eva vọ họ, keme i* zihe ruọ utho ezoruẹ nọ o be lẹliẹ ai ru thọ no. 20 A jẹ rehọ erru eware osẹ rai seha, a tẹ rehọ ai* ru emema etọtọ rai, koyehọ emedhọ etọtọ rai.+ Oyejabọ nọ me ti ro ru ai fihọ oware nọ u re tuoma rọkẹ ae na. 21 Mẹ te rehọ ae* họ obọ ahwo erẹwho efa re a kwa ae rehọ, jẹ rehọ ae kẹ irumuomu otọakpọ na re e jọ egbo-ẹmo rai, a ve ti zue ae oma.

22 “‘Me ti ku ovao mẹ kufiẹ siọ ae ba,+ a ve ti zue oria mẹ nọ u siomano na,* iji e vẹ te ruọ eva riẹ, a ve zue ei no.+

23 “‘Ru ogbregba* na,+ keme oziẹobro nọ azẹ o wholo o vọ ẹkwotọ na,+ yọ ozighi ọ vọ okpẹwho na.+ 24 Mẹ te rehọ enọ e mai yoma evaọ erẹwho na ze,+ a vẹ te rehọ iwou rai no,+ me ve ti ru omorro enọ e rrọ gaga na serihọ, a ve ti zue eria aruẹri rai no.+ 25 Okenọ uye rai o te ze, a te gwọlọ udhedhẹ, rekọ a te ruẹ hẹ.+ 26 Okpẹtu ọ te romavia unọjọ utọjọ, a ti yo iyẹrẹ unọjọ utọjọ, ahwo a te gwọlọ eruẹaruẹ mi ọruẹaro,+ rekọ uzi* na u gbe ti no obọ ozerẹ ze he, yọ ohrẹ u gbe ti no obọ ekpako na ze he.+ 27 Ovie na o ti weri,+ osu na ọ te rọ ọkora ọgaga* gọ ẹgọ, yọ abọ ahwo ẹkwotọ na i ti nuhu fiki idudu. Me ti ru ai wọhọ epaọ idhere rai, yọ oghẹrẹ nọ a bruoziẹ amọfa me ti ro bruoziẹ rai. A vẹ te riẹ nọ mẹ họ Jihova.’”+

8 Evaọ ukpe avọ ezeza, evaọ amara avọ ezeza, evaọ ẹdẹ avọ isoi amara na, nọ mẹ keria uwou mẹ yọ ekpako uwou Juda e keria aro mẹ, obọ Jihova Olori nọ Ọ Mai Kpehru na u te kru omẹ evaọ etẹe. 2 Nọ me je rri na, mẹ tẹ ruẹ oware jọ nọ o wọhọ erae; erae e jọ umuo oria nọ o wọhọ eku riẹ kpotọ,+ yọ umuo eku riẹ kpehru o je lo nwranwranwra, wọhọ elo isiliva avọ igoru nọ a gua kugbe.+ 3 Kẹsena ọ tẹ rriẹ oware nọ o wọhọ obọ lahwe, o te kru eto jọ evaọ uzou mẹ, ẹzi jọ ọ tẹ rọ ẹkwoma eruẹaruẹ nọ i no obọ Ọghẹnẹ ze wọ omẹ kpohọ udevie otọakpọ na avọ idhiwu na, ọ tẹ rehọ omẹ ziọ Jerusalẹm, ọ wọ omẹ kpohọ aro unuẹthẹ obeva nọ u rri obọ ẹkpẹlobọ ovatha-ọre,+ oria nọ oka* ihri-eriọ nọ o rẹ wha ihri-eriọ ze na o jọ.+ 4 Whaọ, oruaro Ọghẹnẹ Izrẹl o jọ etẹe,+ o jọ wọhọ onọ mẹ ruẹ evaọ ukiekpotọ opraprara na.+

5 Ọ tẹ ta kẹ omẹ nọ: “Ọmọ ohwo, ivie kpare aro ra rri obọ ofẹ ẹkpẹlobọ ovatha-ọre.” Mẹ tẹ kpare aro mẹ rri obọ ofẹ ẹkpẹlobọ ovatha-ọre na, mẹ tẹ jọ ofẹ ẹkpẹlobọ ovatha-ọre unuẹthẹ agbada-idhe na ruẹ oka* ihri-eriọ na evaọ oria nọ a rẹ rọ ruọ eva na. 6 Ọ tẹ ta kẹ omẹ nọ: “Ọmọ ohwo, kọ whọ be ruẹ eware iyoma etọtọ nọ uwou Izrẹl u bi ru evaọ etenẹ,+ eware nọ e be lẹliẹ omẹ nyasiọ aruẹri mẹ ba thethabọ na?+ Rekọ whọ te ruẹ eware etọtọ nọ i tube yoma vi enana dede.”

7 Kẹsena ọ tẹ rehọ omẹ ziọ obọ unu ighẹ na, nọ me rri, mẹ tẹ ruẹ eghogho jọ evaọ ugbẹhẹ na. 8 Ọ ta kẹ omẹ nọ: “Ọmọ ohwo, ivie zue eghogho họ ugbẹhẹ na lafi.” Fikiere me te zue eghogho họ ugbẹhẹ na lafi, mẹ tẹ ruẹ edhere jọ nọ a rẹ rọ ruọ eva. 9 Ọ tẹ ta kẹ omẹ nọ: “Ruọ eva re whọ ruẹ eware iyoma etọtọ nọ a be jọ etenẹ ru.” 10 Fikiere mẹ tẹ ruọ eva, mẹ tẹ ruẹ oghoghẹrẹ emema eware nọ i re si gbe erao etọtọ+ gbe emedhọ etọtọ* kpobi nọ e rrọ uwou Izrẹl;+ a kare rai fihọ ugbẹhẹ na wariẹ họ. 11 Ekpako udhosa-gbikpe uwou Izrẹl i dikihẹ aro rai, yọ Jeazanaya ọmọzae Shefan+ o dikihẹ kugbe ae. Omomọvo o kru omodhe insẹnse họ obọ, yọ iwiri insẹnse nọ i bi gbo ore awere i bi kuye kpehru.+ 12 Ọ ta kẹ omẹ nọ: “Ọmọ ohwo, kọ whọ be ruẹ oware nọ ekpako uwou Izrẹl i bi ru evaọ ebiebi na, nọ omomọvo ọ rọ rrọ obọ ibrikpẹ obeva nọ o fi emedhọ riẹ họ? Keme a be ta nọ, ‘Jihova ọ be ruẹ omai hi. Jihova ọ nyasiọ ẹkwotọ na ba no.’”+

13 Ọ tẹ gbẹ ta kẹ omẹ nọ: “Whọ te ruẹ eware etọtọ nọ a bi ru nọ i tube yoma vi enana dede.” 14 Fikiere ọ tẹ rehọ omẹ ziọ obọ unuẹthẹ ẹkpẹlobọ ovatha-ọre uwou Jihova, mẹ tẹ jọ etẹe ruẹ eyae nọ e keria be viẹ fiki ọghẹnẹ nọ a re se Tamuz.

15 Ọ tẹ gbẹ ta kẹ omẹ nọ: “Kọ whọ be ruẹ eware nana, ọmọ ohwo? Whọ te ruẹ eware etọtọ nọ i tube yoma vi enana dede.”+ 16 Ọ tẹ rehọ omẹ ziọ ighẹ obeva uwou Jihova na.+ Evaọ obọ unuẹthẹ etẹmpol Jihova na, evaọ udevie ọmọgwa na avọ agbada-idhe na, mẹ tẹ ruẹ ezae udhegbisoi nọ i kiemuku etẹmpol Jihova yọ a rọ ovao rri obọ ovatha-ọre; a je guzou kpotọ kẹ ọre na nọ ọ jọ ofẹ ovatha-ọre.+

17 Ọ ta kẹ omẹ nọ: “Ọmọ ohwo, kọ whọ be ruẹ eware nana? Kọ uwou Juda u bi roro nọ oware osese o rrọ re a ru eware etọtọ nana, re a ru ozighi vọ ẹkwotọ na,+ jẹ ruabọhọ bi ru omẹ eva dha? Rri, a bi duwu ogha ure* na họ inwe mẹ. 18 Fikiere mẹ te rọ ofu ru oware jọ. O te da omẹ kẹ ae he; yọ me ti wo ọdawẹ kẹ ae he.+ A tẹ maki bo gaga fihọ ezọ mẹ dede, me ti yo ubo rai hi.”+

9 Kẹsena ọ tẹ rọ urru oruarua se nọ ezọ mẹ i yo, inọ: “Se ahwo nọ a te kẹ okpẹwho na uye ze, omomọvo o re kru okwakwa ẹmo riẹ nọ ọ te rọ raha ọraha họ obọ!”

2 Mẹ tẹ ruẹ ezae ezeza nọ i bi no ofẹ unuẹthẹ obehru+ nọ u rri ofẹ ẹkpẹlobọ ovatha-ọre ze, omomọvo o kru okwakwa nọ ọ te rọ fa ahwo kpe họ obọ; yọ ọzae jọ ọ jọ usu rai nọ ọ rehọ ewu ohọ-olọlọhọ gọ ẹgọ, yọ okwakwa ame-ugbẹ okere-obe* o rrọ eku riẹ. A tẹ ruọ eva, a te dikihẹ akotọ agbada-idhe ekọpa na.+

3 Kẹsena oruaro Ọghẹnẹ Izrẹl+ o tẹ kparoma no oria nọ o jọ evaọ obehru chẹrub na, o tẹ nya kpobọ aro unuẹthẹ uwou na,+ o te mu ọzae nọ ọ rehọ ewu ohọ-olọlọhọ gọ ẹgọ nọ okwakwa ame-ugbẹ okere-obe o rrọ eku riẹ na họ ese. 4 Jihova ọ tẹ ta kẹe nọ: “Nyaruọ eva okpẹwho na, ruọ eva Jerusalẹm, re who kpe oka họ aruezo ahwo nọ a be fiunu je bi dimẹ+ fiki eware etọtọ kpobi nọ a bi ru evaọ okpẹwho na.”+

5 Me te yo nọ ọ ta kẹ ezae nọ i kiọkọ na nọ: “Wha nyaruọ eva okpẹwho na lele iei re wha kpe ahwo. Jọ o da owhai kẹ ohwo ọvo ho, wha wo ọdawẹ kẹ ohwo ọvo gbe he.+ 6 Wha re kpe ọkpọkuọzae, uzoge ọmọzae, ọmọtẹ-kọkọ, ọmọboba, gbe eyae na muotọ riẹriẹriẹ.+ Rekọ wha re fou kẹle ohwo ọvo nọ o wo oka na ha.+ Aruẹri mẹ wha rẹ jọ muhọ.”+ Fikiere a tẹ rehọ ekpako nọ e jọ aro uwou na muhọ.+ 7 Kẹsena ọ tẹ ta kẹ ae nọ: “Wha zue uwou na no, re iri ahwo na e vọ ighẹ sa-sa nọ e rrọ etẹmpol na.+ Wha nya!” Ere a rọ nyavrẹ, a te kpe ahwo fihọ otọ evaọ okpẹwho na.

8 Okenọ a je kpe ai fihọ otọ na, mẹ ọvo a seba, me te kie vovao tuotọ je bo nọ: “O, Jihova Olori nọ Ọ Mai Kpehru na! Kọ who ti kpe ahwo Izrẹl nọ a kiọkọ kpobi no, nọ who bi ku ofu ra ku Jerusalẹm na?”+

9 Fikiere ọ tẹ ta kẹ omẹ nọ: “Oruthọ uwou Izrẹl avọ Juda ọ rro thesiwa.+ Azẹ-okpe ọ vọ ẹkwotọ na,+ yọ ewhariọ e vọ okpẹwho na.+ Keme a be ta nọ, ‘Jihova ọ nyasiọ ẹkwotọ na ba no, yọ Jihova ọ be ruẹ omai hi.’+ 10 Rekọ rọkẹ omẹ, o te da omẹ kẹ ae he; yọ me ti dhesẹ ọdawẹ kẹ ae he.+ Me ti ru re eware nọ i no idhere rai ze i hwẹ ku uzou obọrai.”

11 Kẹsena mẹ tẹ ruẹ ọzae nọ ọ rehọ ewu ohọ-olọlọhọ gọ ẹgọ nọ okwakwa ame-ugbẹ o rrọ eku riẹ na nọ ọ be niyẹrẹ, inọ: “Me ru epanọ who jie uzi riẹ kẹ omẹ no ẹrẹrẹe.”

10 Epanọ me je ro rri na, mẹ tẹ jọ obehru oware okẹkẹe nọ o jọ ehru izou chẹrub na ruẹ oware jọ nọ o wọhọ utho safaya nọ o be romavia evaọ ehru rai, yọ oghẹrẹ nọ o jọ u tho agbara-uvie.+ 2 Kẹsena ọ tẹ ta kẹ ọzae nọ ọ rehọ ewu ohọ-olọlọhọ gọ ẹgọ na nọ:+ “Nyaruọ udevie ẹtẹ nọ o bi ghelie na,+ evaọ otọ chẹrub na, re whọ jọ udevie chẹrub na whẹ iwowo-erae fihọ abọ ivẹ ra,+ who ve gbolo ai fihọ okpẹwho na.”+ Fikiere ọ tẹ nyaruọ eva epanọ me je ro rri na.

3 Chẹrub na i dikihẹ ofẹ obọze uwou na evaọ okenọ ọzae na ọ rọ nyaruọ eva, yọ ẹgho na ọ vọ ighẹ obeva na. 4 Oruaro Jihova+ o tẹ kparoma no ehru chẹrub na kpobọ aro unuẹthẹ uwou na, ẹgho na+ ọ tẹ rọ ẹmẹrera vọ uwou na, oruaro Jihova nọ u bi lo nwranwranwra o tẹ vọ ighẹ na soso. 5 A je yo edo ibekpe chẹrub na evaọ obọ ighẹ otafe na, wọhọ edo Ọghẹnẹ Erumeru na nọ ọ tẹ be ta ẹme.+

6 Kẹsena ọ tẹ ta kẹ ọzae nọ ọ rehọ ewu ohọ-olọlọhọ gọ ẹgọ na nọ: “Jọ udevie ẹtẹ nọ o bi ghelie na wọ erae, evaọ udevie chẹrub na,” ọ tẹ nyaruọ eva, o te dikihẹ akotọ ẹtẹ na. 7 Kẹsena chẹrub ọvo jọ ọ tẹ rriẹ obọ riẹ lahwe rri erae nọ e jọ udevie chẹrub na.+ Ọ tẹ wọ erae jọ, o te fi ei họ abọ ivẹ ọzae nọ ọ rehọ ewu ohọ-olọlọhọ gọ ẹgọ na,+ ọ tẹ rehọ erae na vrẹ. 8 Chẹrub na i wo oware nọ o wọhọ abọ ohwo-akpọ evaọ otọ ibekpe rai.+

9 Epanọ me je ro rri na, mẹ tẹ ruẹ etẹ ene evaọ akotọ chẹrub na, ẹtẹ ọvo ọ rrọ akotọ chẹrub ọvuọvo, yọ o wọhọ nọ etẹ na i je lo wọhọ utho krisolaet.+ 10 Rọ kpahe oghẹrẹ nọ e jọ, ae ene na e jọ oghẹrẹ ovona, e jọ wọhọ ẹsenọ ẹtẹ jọ ọ rrọ eva ẹtẹ jọ. 11 Nọ a te bi no oria ruọ oria, a rẹ sae nya kpohọ ofẹ kpobi evaọ ofẹ ene na ababọ oma nọ a re kurẹriẹ, keme obonọ uzou na u rri a re kpohọ ababọ oma nọ a re kurẹriẹ. 12 Oma rai soso, uke rai, abọ rai, ibekpe rai, gbe etẹ na, koyehọ etẹ aimane na, e vọ avọ ibiaro wariẹ họ.+ 13 Rọ kpahe etẹ na, me yo urru jọ nọ u se rai nọ, “Ẹtẹ nọ o bi ghelie!”

14 Ọvuọvo* o wo evao ene. Ovao ọsosuọ ovao chẹrub na, ovao avọ ivẹ ovao ọzae,* ovao avọ esa ovao okpohrokpo, ovao avọ ene kọ ovao ugo.+

15 Chẹrub na e rẹ kparoma—ae ọvona họ emama nọ e rrọ uzuazọ* nọ mẹ ruẹ evaọ obọ ethẹ Kiba na+— 16 yọ okenọ chẹrub na i te no oria ruọ oria, etẹ na i re lele ai; yọ okenọ chẹrub na e tẹ kpare ibekpe rai kpehru re i no otọ kpehru, etẹ na i re kuomarẹriẹ hẹ hayo no akotọ rai hi.+ 17 Nọ enana i te dikihẹ oria ovo, a re dikihẹ oria ovo re; yọ okenọ a tẹ kparoma, a re lele ai kparoma, keme ẹzi nọ ọ be kpọ emama nọ e rrọ uzuazọ na* ọ jọ eva rai.

18 Kẹsena oruaro Jihova+ u te no ehru aro unuẹthẹ uwou na, u te dikihẹ oria ovo evaọ ehru chẹrub na.+ 19 Chẹrub na e tẹ kpare ibekpe rai kpehru, i te no otọ kpehru epanọ me je ro rri na. Etẹ na i lele i rai re okenọ a jẹ nyavrẹ na. E tẹ daji evaọ aro unuẹthẹ ovatha-ọre uwou Jihova, yọ oruaro Ọghẹnẹ Izrẹl o jọ ehru rai.+

20 Enana họ emama nọ e rrọ uzuazọ* nọ mẹ jọ obọ ethẹ Kiba ruẹ evaọ otọ Ọghẹnẹ Izrẹl na, mẹ tẹ te riẹ nọ kpakọ chẹrub.+ 21 Chẹrub ene na kpobi i wo evao ene, ibekpe ene, yọ oware nọ o wọhọ abọ ohwo-akpọ o rrọ otọ ibekpe rai.+ 22 Oghẹrẹ nọ evao rai e jọ e wọhọ evao nọ mẹ ruẹ evaọ akotọ ethẹ Kiba na.+ Ovavo ọvuọvo rai ọ rẹ nya.+

11 Ẹzi jọ ọ tẹ wọ omẹ kpehru, ọ tẹ rehọ omẹ ziọ unuẹthẹ ovatha-ọre uwou Jihova, koyehọ unuẹthẹ nọ u rri ofẹ ovatha-ọre.+ Mẹ tẹ jọ aro unuẹthẹ na ruẹ ezae udhegbisoi, yọ Jeazanaya ọmọzae Azzọ avọ Pẹlataya ọmọzae Benaya nọ a rrọ ikpahwo-esuo ahwo na a jọ usu rai.+ 2 Kẹsena Ọghẹnẹ ọ tẹ ta kẹ omẹ nọ: “Ọmọ ohwo, ezae nana họ enọ e be ma omaa umuomu jẹ be kẹ ohrẹ omuomu evaọ* okpẹwho nana. 3 A be ta nọ, ‘Kọ ogbẹrọnọ oke nọ a rẹ rọ bọ iwou ona?+ Okpẹwho na* họ uwho*+ na, mai kọ uwo arao na.’

4 “Fikiere ruẹaro oware nọ o te via kẹ ae. Ọmọ ohwo, ruẹaro.”+

5 Kẹsena ẹzi Jihova ọ tẹ ruọ omẹ oma,+ ọ tẹ ta kẹ omẹ nọ: “Ta nọ, ‘Enẹ Jihova ọ ta: “O uwou Izrẹl, ẹme nọ wha ta na ọ gba, yọ mẹ riẹ oware nọ wha bi roro.* 6 Wha si uwhu kpe ibuobu no evaọ okpẹwho nana, yọ wha rehọ iri na vọ iyẹrẹ riẹ.”’”+ 7 “Fikiere enẹ Jihova Olori nọ Ọ Mai Kpehru na ọ ta: ‘Iri ahwo nọ wha vaha vọ okpẹwho na họ uwo arao na, yọ okpẹwho na họ uwho+ na. Rekọ a te rehọ owhai omarai no eva riẹ.’”

8 “‘Wha be dhozọ ọgbọdọ,+ rekọ mẹ te rehọ ọgbọdọ ze te họre owhai,’ ere Jihova Olori nọ Ọ Mai Kpehru na ọ ta. 9 ‘Mẹ te rehọ owhai no eva riẹ ze, mẹ vẹ rehọ owhai họ obọ ahwo erẹwho efa, a ve ru owhai oware nọ me bruoziẹ riẹ kpahe owhai.+ 10 A te rehọ ọgbọdọ kpe owhai.+ Obọ uwhru Izrẹl mẹ te jọ bruoziẹ rai,+ wha vẹ te riẹ nọ mẹ họ Jihova.+ 11 Okpẹwho na o te jọ uwho kẹ owhai hi, yọ wha te jọ uwo arao nọ o rrọ eva riẹ hẹ; obọ uwhru Izrẹl mẹ te jọ bruoziẹ rai, 12 wha vẹ te riẹ nọ mẹ họ Jihova. Keme wha nya evaọ izi mẹ hẹ, yọ wha ru lele iziẹibro mẹ hẹ,+ rekọ iziẹibro erẹwho nọ e wariẹ owhai họ wha ru lele.’”+

13 Nọ mẹ nwane ruẹaro no, Pẹlataya ọmọzae Benaya o te whu, me te kie vovao tuotọ jẹ rehọ urru oruarua bo nọ: “O Jihova Olori nọ Ọ Mai Kpehru na! Kọ who bi ti kpe ahwo Izrẹl nọ a kiọkọ muotọ?”+

14 Ẹme Jihova ọ tẹ wariẹ bru omẹ ze, inọ: 15 “Ọmọ ohwo, ahwo nọ a be rria Jerusalẹm a ta kẹ imoni ra, imoni ra nọ i wo udu nọ a rẹ rọ dẹ ukuoriọ ra zihe ze gbe uwou Izrẹl soso nọ, ‘Wha kẹnoma thethabọ kẹ Jihova. Ẹkwotọ na ọmai; a rehọ e riẹ kẹ omai no re ma woi.’ 16 Fikiere ta nọ, ‘Enẹ Jihova Olori nọ Ọ Mai Kpehru na ọ ta: “Dede nọ mẹ rehọ e rai vrẹ thethabọ fihọ udevie erẹwho na, jẹ vaha ae fihọ udevie ekwotọ na,+ evaọ omoke kakao me ti zihe ruọ oria aruẹri kẹ ae evaọ ekwotọ nọ a kpohọ na.”’+

17 “Fikiere ta nọ, ‘Enẹ Jihova Olori nọ Ọ Mai Kpehru na ọ ta: “Mẹ te jẹ rehọ owhai no udevie ahwo na ze je koko owhai họ no obọ ekwotọ nọ a vaha owhai kpohọ na ze, mẹ vẹ te kẹ owhai ẹkwotọ Izrẹl.+ 18 A ti zihe kpohọ obei, a ve si eware etọtọ gbe iruẹru etọtọ kpobi nọ e rrọ eva riẹ no.+ 19 Mẹ te kẹ ae udu ọvo,+ me ve fi ẹzi ọkpokpọ họ ae oma;+ me ti si udu nọ o wọhọ utho no ugboma rai,+ mẹ vẹ kẹ ae udu nọ o wọhọ uwo,*+ 20 re a ruẹse nya evaọ izi mẹ je ru lele iziẹibro mẹ. Kẹsena a vẹ te jọ ahwo mẹ, mẹ vẹ te jọ Ọghẹnẹ rai.”’

21 “‘“Rekọ rọkẹ ahwo nọ a rọ udu rai dhe nọ a rẹ ruabọhọ eware etọtọ rai gbe iruẹru etọtọ rai, me ti ru re eware nọ i no idhere rai ze i hwẹ ku uzou rai,” ere Jihova Olori nọ Ọ Mai Kpehru na ọ ta.’”

22 Kẹsena chẹrub na e tẹ kpare ibekpe rai kpehru, yọ etẹ na e kẹle rai,+ oruaro Ọghẹnẹ Izrẹl o tẹ jọ obehru rai.+ 23 Oruaro Jihova+ u te muvrẹ no okpẹwho na, o tẹ daji ehru ugbehru nọ o rrọ ofẹ ovatha-ọre okpẹwho na.+ 24 Ẹzi jọ ọ tẹ wọ omẹ kpehru—ẹkwoma eruẹaruẹ nọ ẹzi Ọghẹnẹ o ru omẹ ruẹ—ọ tẹ rehọ omẹ bru ahwo nọ a rrọ igbo evaọ Kaldia na. Kẹsena eruẹaruẹ nọ mẹ jẹ ruẹ na e tẹ nyasiọ omẹ ba. 25 Me te mu eware kpobi nọ Jihova o dhesẹ kẹ omẹ họ ẹta kẹ ahwo nọ a jọ igbo na.

12 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, whọ be rria eva uwou ọwọsuọ. A wo ibiaro nọ a rẹ rọ ruẹ ude, rekọ a be ruẹ ude he, a wo ezọ nọ a re ro yo ẹme, rekọ a bi yo ho,+ keme uwou ọwọsuọ a rrọ.+ 3 Rọkẹ owhẹ, ọmọ ohwo, kru ewha họ kẹ omara nọ who ti ro kpohọ igbo. Kẹsena evaọ oke uvo nọ a bi rri na, who ve kpohọ igbo. Who re no uwou ra kpohọ oria ofa wọhọ ohwo nọ o bi kpohọ igbo avọ epanọ a bi ro rri na. Ẹsejọhọ a ti muẹrohọ, dede nọ uwou ọwọsuọ a rrọ. 4 Whọ rẹ wọ ewha ra nọ who kokohọ nọ who ti ro kpohọ igbo na lahwe evaọ uvo avọ epanọ a bi ro rri na, kẹsena evaọ owọwọ nọ a bi rri na, whọ vẹ nyavrẹ wọhọ ohwo nọ a bi mu kpohọ igbo.+

5 “Nọ a bi rri na, who re zue eghogho họ ugbẹhẹ na, whọ vẹ wọ eware ra nyae vrẹ.+ 6 Nọ a bi rri na, whọ rẹ wọ eware ra fihọ ẹkoko, whọ vẹ wọ ae vrẹ evaọ ebiebi na. Ruru ovao ra re whọ gbẹ sae ruẹ otọ na ha, keme mẹ be rehọ owhẹ ru oware oka kẹ uwou Izrẹl.”+

7 Nwane epanọ ọ vuẹ omẹ na me ru. Evaọ oke uvo, mẹ wọ ewha mẹ lahwe wọhọ ewha nọ a bi ro kpohọ igbo, evaọ owọwọ mẹ tẹ rehọ obọ zue eghogho họ ugbẹhẹ na lafi. Nọ otọ u muebi no, mẹ tẹ wọ eware mẹ na lahwe, wọ ae fihọ ẹkoko mẹ evaọ iraro rai.

8 Evaọ ohiohiẹ, ẹme Jihova ọ tẹ wariẹ bru omẹ ze, inọ: 9 “Ọmọ ohwo, kọ uwou Izrẹl, uwou ọwọsuọ na, a gbẹ nọ owhẹ nọ, ‘Kinọ eme who bi ru na?’ 10 Ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Owhowhovia nana o kiekpahe osu+ nọ ọ rrọ Jerusalẹm gbe ahwo uwou Izrẹl kpobi nọ a rrọ evaọ okpẹwho na.”’

11 “Ta nọ, ‘Mẹ yọ oware oka rọkẹ owhai.+ Nwane wọhọ epanọ me ru na, ere a ti ru ai re. A ti mu ai vrẹ, a ti kpohọ igbo.+ 12 Osu nọ ọ rrọ udevie rai ọ te wọ eware riẹ fihọ ẹkoko, ọ vẹ nyavrẹ evaọ ebiebi na. O ti zue eghogho họ ugbẹhẹ na, ọ vẹ wọ eware riẹ nyae vrẹ.+ O ti ruru ovao riẹ re ọ gbẹ sae ruẹ otọ na ha.’ 13 Me ti gbolo ẹriri* mẹ fihọ iẹe, ẹriri mẹ o ve ti mu ei.+ Mẹ vẹ te rehọ iẹe ziọ Babilọn, ziọ ẹkwotọ ahwo Kaldia, rekọ ọ te rọ ẹro ruẹ e riẹ hẹ; yọ obei ọ te jọ whu.+ 14 Yọ ahwo kpobi nọ a wariẹ e riẹ họ, enọ i re fiobọhọ kẹe gbe egbaẹmo riẹ, mẹ te vaha ae fihọ ofẹ kpobi;+ yọ me ti yolo ọgbọdọ lahwe ro le ai.+ 15 A vẹ te riẹ nọ mẹ họ Jihova okenọ mẹ te vaha ae fihọ udevie erẹwho na jẹ vaha ae fihọ udevie ekwotọ na. 16 Rekọ me ti ru re ọgbọdọ na, ohọo nọ u ti mu na, gbe okpẹyao nọ o re vo na e siọ umutho rai jọ ba ekpe no, re a ruẹse jọ udevie erẹwho nọ a ti kpohọ na ta kpahe iruẹru etọtọ rai kpobi; a vẹ te riẹ nọ mẹ họ Jihova.”

17 Ẹme Jihova ọ tẹ wariẹ bru omẹ ze, inọ: 18 “Ọmọ ohwo, whọ rẹ re ebrẹdi ra yọ who bi nuhu, jẹ da ame ra avọ okpakpa gbe awa.+ 19 Ta kẹ ahwo ẹkwotọ na nọ, ‘Enẹ Jihova Olori nọ Ọ Mai Kpehru na ọ ta kẹ ahwo nọ a be rria Jerusalẹm evaọ ẹkwotọ Izrẹl: “A te re ebrẹdi rai avọ awa jẹ da ame rai avọ idudu, keme ẹkwotọ rai ọ te jọ ofofe riẹriẹriẹ+ fiki ozighi ahwo kpobi nọ a be rria eva riẹ.+ 20 A te raha ikpewho nọ ahwo a be rria na no, ẹkwotọ na o ve ti zihe ruọ otọ nọ o raha no;+ wha vẹ te riẹ nọ mẹ họ Jihova.”’”+

21 Ẹme Jihova ọ tẹ wariẹ bru omẹ ze, inọ: 22 “Ọmọ ohwo, kinọ didi ohare wha be hai bru evaọ Izrẹl na, inọ, ‘Edẹ na e be nya, yọ eruẹaruẹ ọvo o bi rugba ha’?+ 23 Fikiere ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Me ti ru re a siọ ẹme nana ba ẹta, yọ a gbẹ te rehọ iẹe bru ohare evaọ Izrẹl he.”’ Rekọ ta kẹ ae nọ, ‘Edẹ na e kẹle no,+ yọ eruẹaruẹ kpobi i ti rugba.’ 24 Keme a gbẹ te jọ eva uwou Izrẹl ruẹaro erue hayo gbẹva eviẹhọ ofa ha.+ 25 ‘“Keme mẹ Jihova, mẹ te ta ẹme. Ẹme kpobi nọ mẹ te ta o ti rugba ababọ oke oraha.+ Evaọ edẹ rai,+ O uwou ọwọsuọ, mẹ te ta ẹme je ru ei gba,” ere Jihova Olori nọ Ọ Mai Kpehru na ọ ta.’”

26 Ẹme Jihova ọ tẹ wariẹ bru omẹ ze, inọ: 27 “Ọmọ ohwo, enẹ ahwo* Izrẹl a be ta, ‘Eruẹaruẹ nọ ọ be ruẹ na e rrọ rọkẹ oke krẹkri nọ o be tha, yọ obaro thethabọ ọ be ruẹaro kpahe.’+ 28 Fikiere ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “‘Ẹme mẹ ọvuọvo ọ te raha oke he; oware kpobi nọ mẹ ta o te via,’ ere Jihova Olori nọ Ọ Mai Kpehru na ọ ta.”’”

13 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, ruẹaro oware nọ o te via kẹ eruẹaro Izrẹl,+ re whọ ta kẹ enọ e be ruẹ eruẹaruẹ obọrai* nọ,+ ‘Wha yo ẹme nọ Jihova ọ ta. 3 Enẹ Jihova Olori nọ Ọ Mai Kpehru na ọ ta: “Uye u te eruẹaro igheghẹ na, enọ i bi lele ẹzi obọrai, kpakiyọ a ruẹ oware ovo ho!+ 4 O Izrẹl, eruẹaro ra e wọhọ iruakọ nọ e rrọ eria nọ e raha no. 5 Wha ti kpohọ eria nọ i kporo no evaọ igbẹhẹ itho na ha re wha wariẹ bọ ae kẹ uwou Izrẹl,+ re Izrẹl ọ ruẹsi gbe dikihẹ evaọ ẹmo na evaọ ẹdẹ Jihova.”+ 6 “A ruẹ eruẹaruẹ nọ e rrọ uzẹme he, a tẹ ruẹaro ọrue, ahwo nọ a be ta nọ, ‘Ẹme nọ Jihova ọ ta họ,’ kpakiyọ Jihova omariẹ họ ọnọ o vi rai hi, a tẹ be hẹrẹ re ẹme rai o rugba.+ 7 Kọ ogbẹrọnọ eruẹaruẹ nọ e rrọ uzẹme he wha ruẹ, wha tẹ jẹ ruẹaro ọrue okenọ wha ta nọ, ‘Ẹme nọ Jihova ọ ta họ,’ kpakiyọ mẹ ta oware ovo ho?”’

8 “‘Fikiere enẹ Jihova Olori nọ Ọ Mai Kpehru na ọ ta: “‘Fikinọ wha ta ẹme nọ ọ rrọ uzẹme he na, eruẹaruẹ rai e tẹ jẹ rrọ ọrue na, mẹ te rọsuọ owhai,’ ere Jihova Olori nọ Ọ Mai Kpehru na ọ ta.”+ 9 Obọ mẹ o te rọsuọ eruẹaro nọ eruẹaruẹ rai e rrọ uzẹme he, enọ e be ruẹaro ọrue na.+ A te jọ usu ahwo nọ mẹ rẹ ta eva kẹ hẹ; hayo kọ a ti kere odẹ rai kugbe ahwo uwou Izrẹl he; hayo kọ a ti zihe kpohọ ẹkwotọ Izrẹl he; wha vẹ te riẹ nọ mẹ họ Jihova Olori nọ Ọ Mai Kpehru na.+ 10 Onana kpobi o te via fikinọ a bi su ahwo mẹ thọ, be ta nọ, “Udhedhẹ o riẹ!” kpakiyọ udhedhẹ o riẹ hẹ.+ Nọ a tẹ bọ ugbẹhẹ udedeghe rọ ghale obeva uwou, a vẹ rọ ọda ọfuafo ralọ iẹe.’*+

11 “Ta kẹ ahwo nọ a be rọ ọda ọfuafo ralọ ugbẹhẹ na inọ u ti kie. Okposo nọ o re kporo ẹkẹre ọ te rrọ ze, oso-itho ọ te rrọ,* yọ ifou ọwhibo egaga i ti zurie ei fihọ otọ.+ 12 Nọ ugbẹhẹ na u te kie no, a te nọ owhai nọ, ‘Kọ oware nọ wha rọ ọda ralọ na o rrọ?’+

13 “Fikiere enẹ Jihova Olori nọ Ọ Mai Kpehru na ọ ta: ‘Me ti ru re ifou ọwhibo egaga i fou ze idudhe fiki ofu mẹ, re okposo nọ o re kporo ẹkẹre ọ rrọ fiki evedha mẹ, me ve ti je ru re oso-itho ọ wha ọraha ze fiki ofu ọgaga mẹ. 14 Me ti zurie ugbẹhẹ nọ wha rọ ọda ọfuafo ralọ na fihọ otọ, u ti kie te otọ, a vẹ te ruẹ otọhotọ riẹ. Nọ okpẹwho na o te kie no, wha ti whu evaọ eva riẹ; wha vẹ te riẹ nọ mẹ họ Jihova.’

15 “‘Okenọ me ti siobọno ofu mẹ kpobi ku ugbẹhẹ na gbe ahwo nọ a rọ ọda ọfuafo ralọ iẹe na, mẹ te ta kẹ owhai nọ: “Ugbẹhẹ na o gbẹ riẹ hẹ, yọ ahwo nọ a jẹ ralọ iẹe na a gbẹ riẹ gbe he.+ 16 Eruẹaro Izrẹl e gbẹ riẹ hẹ, enọ e jẹ ruẹaro kẹ Jerusalẹm, nọ e jẹ ruẹ eruẹaruẹ udhedhẹ kẹe, kpakiyọ udhedhẹ o riẹ hẹ na,”’+ ere Jihova Olori nọ Ọ Mai Kpehru na ọ ta.

17 “Rọkẹ owhẹ, ọmọ ohwo, rẹriẹ ovao ku emetẹ ahwo ra nọ e be ruẹ eruẹaruẹ obọrai, re whọ ruẹaro oware nọ o te via kẹ ae. 18 Ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Uye u te eyae nọ i re ko emehọ kugbe nọ a rẹ gba fihọ ugbobọ kpobi,* je ru iveli* nọ e rẹ sai ruru uzou oghẹrẹ ohwo kpobi re a ruẹse gwọlọ uzuazọ ahwo! Kọ uzuazọ ahwo mẹ wha be gwọlọ, wha tẹ be daoma siwi uzuazọ obọrai? 19 Kọ wha re zue omẹ oma evaọ udevie ahwo mẹ fiki ẹkuobọ ebali gbe umutho ebrẹdi jọ gheghe,+ bi kpe enọ* u fo nọ i re whu hu, wha tẹ be nyasiọ enọ* u fo nọ i re whu ba uzuazọ, onọ wha bi ru ẹkwoma erue nọ wha bi gu kẹ ahwo mẹ nọ a be gaviezọ kẹ erue rai?”’+

20 “Fikiere enẹ Jihova Olori nọ Ọ Mai Kpehru na ọ ta: ‘Rri, mẹ te rọsuọ emehọ rai nọ a rẹ rọ gba abọ na, O whai eyae na, enọ wha be rọ gwọlọ ahwo mu wọhọ ẹsenọ a rrọ evra na, mẹ vẹ te sawo ai no ugbobọ rai no, me ve ti siobọno enọ wha be gwọlọ mu wọhọ evra na. 21 Mẹ te bẹre iveli rai no, me ve siwi ahwo mẹ no obọ rai, a gbẹ te jọ oware nọ wha ti mu tobọ nọ wha be gwọlọ ae na ha; wha vẹ te riẹ nọ mẹ họ Jihova.+ 22 Keme wha rọ ọrue rai ru udu no ohwo okiẹrẹe na awọ no+ kpakiyọ mẹ jẹ wha uye ovo* sei hi, yọ wha ru abọ ohwo omuomu na ga,+ onọ u ru nọ o gbe bi ro kurẹriẹ no idhere iyoma riẹ re o wo uzuazọ họ.+ 23 Fikiere, whai eyae na wha gbẹ te ruẹ eruẹaruẹ erue he hayo gbẹva ha;+ yọ me ti siwi ahwo mẹ no obọ rai, wha vẹ te riẹ nọ mẹ họ Jihova.’”

14 Ekpako Izrẹl jọ e tẹ nyaze, a tẹ keria aro mẹ.+ 2 Kẹsena ẹme Jihova o te bru omẹ ze, inọ: 3 “Ọmọ ohwo, ezae nana e gba riẹ mu nọ a re lele emedhọ etọtọ* rai, a tẹ jẹ rehọ utho ezoruẹ nọ u re ru ahwo raha uzi vi no. Kọ mẹ rẹ kẹ ai uvẹ nekpẹ mi omẹ?+ 4 Enẹna lele ae ta ẹme re whọ vuẹ ae nọ, ‘Enẹ Jihova Olori nọ Ọ Mai Kpehru na ọ ta: “Otẹrọnọ ohwo Izrẹl jọ ọ gba riẹ mu nọ o re lele emedhọ etọtọ riẹ jẹ rehọ utho ezoruẹ nọ u re ru ahwo raha uzi vi, kẹsena ọ jẹ nyaze te nekpẹ mi ọruẹaro jọ, mẹ Jihova, mẹ te kẹe uyo nọ u fo wọhọ epanọ emedhọ riẹ i bu te. 5 Keme me ti fi idudu họ udu ahwo uwou Izrẹl* fikinọ aikpobi a siomano omẹ no, a te bi lele emedhọ etọtọ rai.”’+

6 “Fikiere ta kẹ uwou Izrẹl nọ, ‘Enẹ Jihova Olori nọ Ọ Mai Kpehru na ọ ta: “Wha zihe ze, re wha nyasiọ emedhọ etọtọ rai ba je si ovao rai no iruẹru etọtọ rai kpobi.+ 7 Keme otẹrọnọ ohwo Izrẹl jọ hayo ọrara nọ ọ be rria Izrẹl o te siomano omẹ jẹ gbaemu nọ o re lele emedhọ etọtọ riẹ, ọ jẹ rehọ utho ezoruẹ nọ u re ru ahwo raha uzi vi, kẹsena ọ jẹ nyaze te nekpẹ mi ọruẹaro mẹ,+ mẹ Jihova ọvo mẹ te kẹe uyo. 8 Mẹ te rẹriẹ ovao mẹ ku ohwo yena, me ve ti ru ei re ọ jọ oka unuovẹvẹ gbe odẹme nọ a re ro bru ohare. Yọ me ti voro ei no udevie ahwo mẹ;+ wha vẹ te riẹ nọ mẹ họ Jihova.”’

9 “‘Rekọ otẹrọnọ a viẹ ọruẹaro na họ, ọ jẹ kẹ uyo, mẹ Jihova họ ọnọ ọ viẹ ọruẹaro yena họ na.+ Mẹ vẹ te rriẹ obọ mẹ rọsuọ ẹe, me ve kpei no udevie ahwo mẹ, Izrẹl. 10 Abe-ọriọ rai ọ vẹ te jọ uzou rai; abe-ọriọ ọnọ ọ nyaze te nekpẹ na avọ abe-ọriọ ọruẹaro na ọ te jọ epọvo na, 11 re uwou Izrẹl o siọ omẹ ba eghoro seba jẹ siọ oma rai ba ezue fiki izieraha rai kpobi. A vẹ te jọ ahwo mẹ, mẹ vẹ te jọ Ọghẹnẹ rai,’+ ere Jihova Olori nọ Ọ Mai Kpehru na ọ ta.”

12 Ẹme Jihova ọ tẹ wariẹ bru omẹ ze, inọ: 13 “Ọmọ ohwo, otẹrọnọ orẹwho jọ o nyasiọ omẹ ba jẹ rọ ere raha uzi mẹ, mẹ te rriẹ obọ mẹ rọsuọ ẹe, mẹ vẹ raha oria nọ emu riẹ o bi no ze,*+ me ve ti ru re ohọo o jariẹ mu,+ me ve je kpe te ohwo te arao noi no.”+ 14 “‘O tẹ make rọnọ ezae esa nana—Noa,+ Daniẹl,+ gbe Job+—e rrọ eva riẹ dede, omobọ rai ọvo a te sai siwi fiki ẹrẹreokie rai,’+ ere Jihova Olori nọ Ọ Mai Kpehru na ọ ta.”

15 “‘Hayo otẹrọnọ me ru erao ijihẹ nyaruọ eva ẹkwotọ na, i je ru nọ ahwo a gbẹ rrọ eva riẹ hẹ,* i je ru ei zihe ruọ otọ nọ o raha no nọ ohwo ọvo ọ be nyavrẹ hẹ fiki erao ijihẹ na.+ 16 Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘o tẹ make rọnọ ezae esa nana e rrọ eva riẹ dede, a te sai siwi emezae rai hayo emetẹ rai hi; omobọ rai ọvo a te sai siwi, yọ ẹkwotọ na o ti zihe ruọ ofofe.’”

17 “‘Hayo otẹrọnọ mẹ rọ ọgbọdọ ze rọsuọ ẹkwotọ yena,+ mẹ tẹ ta nọ: “Jọ ọgbọdọ ọ nyaruọ ẹkwotọ na,” re o kpe te ohwo te arao nọ ọ rrọ eva riẹ no,+ 18 o tẹ make rọnọ ezae esa nana e rrọ eva riẹ dede, nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘a te sai siwi emezae rai hayo emetẹ rai hi; omobọ rai ọvo a te sai siwi.’”

19 “‘Hayo otẹrọnọ me vi okpẹyao nọ o re vo fihọ ẹkwotọ yena+ je ku ofu mẹ ku ei ẹkwoma azẹ-okpe re me kpe te ohwo te arao noi, 20 o tẹ make rọnọ Noa,+ Daniẹl,+ gbe Job+ a rrọ eva riẹ dede, nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘a te sai siwi emezae rai hayo emetẹ rai hi; omobọ rai ọvo a te sai siwi fiki ẹrẹreokie rai.’”+

21 “Fikiere enẹ Jihova Olori nọ Ọ Mai Kpehru na ọ ta: ‘Ere o te via okenọ me ti vi iye ene mẹ ze*+—ọgbọdọ, ohọo nọ u ti mu, erao ijihẹ, gbe okpẹyao nọ o re vo+—rọsuọ Jerusalẹm re me kpe te ohwo te arao noi no.+ 22 Rekọ, ahwo jọ nọ a kiọkọ eva riẹ a te vabọ, a vẹ te rehọ ae lahwe,+ te emezae te emetẹ. A be nyabru owhai ze, yọ okenọ wha te ruẹ idhere rai avọ iruẹru rai, oma o te ginẹ sasa owhai inọ okpẹtu nọ me ro te Jerusalẹm, koyehọ oware kpobi nọ me ru rie u fo.’”

23 “‘A te sasa owhai oma nọ wha te ruẹ idhere rai avọ iruẹru rai, yọ wha te riẹ nọ gheghe me ro ru ai oware nọ me ru rai na ha,’+ ere Jihova Olori nọ Ọ Mai Kpehru na ọ ta.”

15 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, kọ a sae rehọ ure evaene wawo oghẹrẹ ure ọfa jọ kpobi hayo ogha ure jọ evaọ usu ire owhawho? 3 Kọ a sae rehọ umure nọ u no rie ze ro ru iruo? Hayo kọ ahwo a rẹ rehọ ure riẹ kare umure osiọsiọle nọ a rẹ jẹ ekwakwa họ? 4 Whaọ, a re gbolo iei fihọ erae re e ware, erae na e vẹ mahe oka avọ oka riẹ jẹ to udevie riẹ zihe ruọ ewizi. Kọ a rẹ gbẹ sae rehọ iẹe ru iruo jọ? 5 Makọ okenọ o rọ jọ ọsoso, a sae rehọ iẹe ru oware ovo ho. Kọ okenọ erae e mahe riẹ jẹ to iẹe zihe ruọ ewizi no a rẹ sae rehọ iẹe ru oware jọ?”

6 “Fikiere enẹ Jihova Olori nọ Ọ Mai Kpehru na ọ ta: ‘Nwane wọhọ epanọ ure evaene o rrọ evaọ usu ire nọ e rrọ owhawho na, onọ mẹ kẹ ahwo re a ro koko erae họ na, ere ọvona me ti ru ahwo nọ a be rria Jerusalẹm fihọ.+ 7 Mẹ rẹriẹ ovao mẹ dhe ai no. A vabọ no erae na no, rekọ erae e te mahe ae no. Wha vẹ te riẹ nọ mẹ họ Jihova okenọ mẹ te rẹriẹ ovao mẹ dhe ae.’”+

8 “‘Me ti ru ẹkwotọ na fihọ ofofe+ fikinọ a nyasiọ omẹ ba,’+ ere Jihova Olori nọ Ọ Mai Kpehru na ọ ta.”

16 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, dhesẹ iruẹru etọtọ Jerusalẹm kẹe.+ 3 Whọ rẹ ta nọ, ‘Enẹ Jihova Olori nọ Ọ Mai Kpehru na ọ ta kẹ Jerusalẹm: “Obọ ẹkwotọ ahwo Kenan ọsẹgboni ra a no ze, yọ obei a jọ yẹ owhẹ. Ọsẹ ra ohwo Amọ,+ oni ra kọ ohwo Hit.+ 4 Rọ kpahe eyẹ ra, evaọ ẹdẹ nọ a ro yẹ owhẹ, a bru uwohi ra no ho, a rọ ame họ owhẹ re oma ra o fo ho, a rọ uwhei wholo owhẹ hẹ, yọ a rehọ ehọ variẹ owhẹ hẹ. 5 Ohwo ọvo ọ re ohrọ ra te epanọ o ro ru ọjọ evaọ usu eware nana kẹ owhẹ hẹ. Ohwo ọvo o wo ọdawẹ kẹ owhẹ hẹ. Ukpoye, a gbolo owhẹ fihọ otafe keme a mukpahe owhẹ evaọ ẹdẹ nọ a ro yẹ owhẹ.

6 “‘“Okenọ mẹ jẹ nyavrẹ, mẹ tẹ ruẹ owhẹ nọ whọ jẹ frẹ abọ frẹ awọ evaọ azẹ obọra, avọ epanọ whọ rọ jọ otọ evaọ azẹ ra na, mẹ tẹ ta nọ: ‘Whọ te jọ uzuazọ!’ Ẹhẹ, mẹ ta kẹ owhẹ okenọ whọ rọ jọ otọ avọ azẹ na nọ: ‘Whọ te jọ uzuazọ!’ 7 Me te ru owhẹ fihọ ogbotu nọ o bu gaga, wọhọ ekakọ nọ e be dhẹ ze evaọ udhu, whọ tẹ rro ze te ohwo ziezi, whọ tẹ whẹ eware osẹ nọ e mai woma họ. Ivie ra i te dikihẹ, eto ra i te theri fihọ; rekọ whọ gbẹ jọ ẹbẹba ghele, who ku oware ovo họ họ.”’

8 “‘Okenọ mẹ jẹ nyavrẹ nọ mẹ ruẹ owhẹ, me te muẹrohọ nọ who te ohwo nọ ọzae ọ rẹ dhẹ ruọ oma no. Fikiere mẹ tẹ rriẹ ewu* mẹ ro ruru owhẹ,+ jẹ rọ ere ruru ẹba ra, me te duwu iyei jẹ re ọvọ kugbe owhẹ,’ ere Jihova Olori nọ Ọ Mai Kpehru na ọ ta, ‘who te zihe ruọ ọmẹ. 9 Ofariẹ, mẹ rehọ ame họ owhẹ jẹ wozẹ azẹ no oma ra, mẹ tẹ rọ udẹ wholo owhẹ.+ 10 Kẹsena mẹ tẹ rehọ ewu nọ a zuo eware onaa họ rọ gọ owhẹ ẹgọ jẹ kẹ owhẹ eviẹ nọ a rọ emamọ oviẹ arao* ru, jẹ rehọ emamọ ohọ-olọlọhọ variẹ owhẹ, mẹ tẹ rehọ iwu eghaghae gọ owhẹ ẹgọ. 11 Mẹ rehọ eware osẹ whẹ erru họ owhẹ oma, je fi ifiare-abọ họ abọ ra je fi ufiare họ uriohọ ra. 12 Me te je fi ẹmẹro họ unwe ra je ku emero-ezọ họ ezọ ra, je ku etu-uvie nọ o wo erru họ uzou ra. 13 Whọ ruabọhọ jẹ rehọ igoru avọ isiliva gọ ẹgọ, yọ emamọ iwu ohọ-olọlọhọ nọ o rrọ ghaghae who je ku họ, gbe ewu nọ a zuo eware onaa họ. Emamọ eflawa iwuwuru, ọnyọ, gbe ewhri whọ jẹ re, whọ tẹ rro fihọ avọ erru gaga,+ who te te ohwo nọ ọ rẹ jọ aye ovie.’”*

14 “‘Odẹ ra u te je do ruọ erẹwho+ na fiki erru ra, keme who wo erru thesiwa fikinọ erru mẹ me ku họ owhẹ oma,’+ ere Jihova Olori nọ Ọ Mai Kpehru na ọ ta.”

15 “‘Rekọ whọ tẹ rẹroso erru ra,+ who te zihe ruọ ogberẹ fiki odẹ ra nọ u bi do.+ Whọ jẹ rọ oma ra kẹ ohwo kpobi nọ ọ be nyavrẹ re who lele iei bru igberẹ,+ whọ tẹ rehọ erru ra kẹ ae. 16 Whọ rehọ ehọ ra jọ, whọ tẹ rehọ ae whẹ erru họ eria ikpehru nọ who re jo bru igberẹ+—u fo nọ a re ru eware itieye na ha, yọ u fo nọ e rẹ via vievie he. 17 Whọ tẹ jẹ tọlọ eware osẹ* iwowoma ra nọ a rehọ igoru gbe isiliva ru nọ mẹ kẹ owhẹ na, whọ tẹ rehọ ai ru emema ezae kẹ omara, who te je lele ai bru igberẹ.+ 18 Whọ rehọ iwu ra nọ a zuo eware onaa họ ro ruru ai,* whọ tẹ jẹ rehọ ewhri mẹ gbe insẹnse mẹ dhe idhe kẹ ae.+ 19 Whọ tẹ jẹ rehọ ebrẹdi nọ mẹ kẹ owhẹ—onọ a rehọ emamọ eflawa iwuwuru, ewhri, gbe ọnyọ ru nọ mẹ kẹ owhẹ nọ whọ re—ro dhe idhe nọ i re gbo ore awere* kẹ ae.+ Oware nọ o via dẹẹ oye,’ ere Jihova Olori nọ Ọ Mai Kpehru na ọ ta.”

20 “‘Whọ rehọ emezae ra gbe emetẹ ra nọ who yẹ kẹ omẹ,+ whọ tẹ rehọ ae dhe idhe kẹ emedhọ re a re ae no+—kọ iruẹru igberẹ-ibro ra i gbe ri te? 21 Who kpe emezae mẹ, whọ tẹ jẹ mahe ae evaọ erae je ro dhe idhe.+ 22 Okenọ who je ru iruẹru etọtọ ra gbe iruẹru igberẹ-ibro ra kpobi na, whọ kareghẹhọ oke uzoge ra nọ whọ rọ jọ ẹbẹba ababọ ewu nọ ọ jọ owhẹ oma na ha, okenọ whọ jẹ frẹ abọ frẹ awọ evaọ azẹ obọra. 23 Uye, uye u te owhẹ, fiki eware iyoma nana kpobi nọ who ru na,’+ ere Jihova Olori nọ Ọ Mai Kpehru na ọ ta. 24 ‘Whọ ma ukpehru kẹ omara, je ru oria ukpehru kẹ omara evaọ oko-ore kpobi. 25 Whọ bọ eria ikpehru ra fihọ eria nọ e mae viodẹ evaọ iyẹrẹ kpobi, who te ru erru ra zihe ruọ oware otọtọ ẹkwoma omara nọ whọ jẹ rọ* kẹ ohwo kpobi nọ ọ jẹ nyavrẹ,+ who te ru iruẹru igberẹ-ibro ra fihọ buobu.+ 26 Who bru igberẹ kugbe emezae Ijipti,+ erivẹ ra nọ i wo isiuru egaga kẹ owezẹ ọzae-avọ-aye,* whọ tẹ rehọ iruẹru igberẹ-ibro ra nọ i bu thesiwa ro ru omẹ eva dha. 27 Enẹna, mẹ te rọ obọ mẹ kẹ owhẹ uye je ru ẹkẹ emu ra kawo,+ mẹ vẹ te rehọ owhẹ kẹ eyae nọ i mukpahe owhẹ+ re a ru owhẹ oware nọ o rrọ eva rai, emetẹ ahwo Filistia na, enọ uruemu otọtọ ra u je gbunu.+

28 “‘Fikinọ a sai ru eva vọ owhẹ hẹ, who te lele emezae Asiria bru igberẹ,+ rekọ nọ who lele ai bru igberẹ no, eva e vọ owhẹ ghele he. 29 Fikiere whọ tẹ wọ igberẹ-ibro ra kpobọ ẹkwotọ ethueki* na je kpobọ ahwo Kaldia,+ rekọ eva e vọ owhẹ ghele he. 30 Rri epanọ udu ra o raha* te,* okenọ who je ru eware nana kpobi, je ru wọhọ ogberẹ nọ o wo omovuọ họ na!’ ere Jihova Olori nọ Ọ Mai Kpehru na ọ ta.+ 31 Rekọ nọ whọ bọ ukpehru ra fihọ oria nọ o mae viodẹ evaọ iyẹrẹ kpobi je ru oria ukpehru ra fihọ oko-ore kpobi, whọ jọ wọhọ ogberẹ hẹ, keme whọ rọwo nọ a hwosa kẹ owhẹ hẹ. 32 Whẹ yọ aye nọ o bi bruẹnwae, nọ ọ rẹ gwọlọ erara viukpọ ọzae obọriẹ!+ 33 Ahwo họ enọ e rẹ kẹ igberẹ kpobi okẹ,+ rekọ whẹ họ ọnọ ọ be kẹ ahwo kpobi nọ a be dhẹ lele owhẹ ekẹ,+ yọ whọ rẹ jẹ udi kẹ ae re a no eria kpobi bru owhẹ ze ti bru igberẹ.+ 34 Who wo ohẹriẹ no eyae efa nọ i bi bru igberẹ. Ohwo ọvo o re bru igberẹ oghẹrẹ nọ who bi bru igberẹ na ha! Whọ rẹ hwosa kẹ amọfa, rekọ a rẹ hwosa kẹ owhẹ hẹ. Ora u wo ohẹriẹ.’

35 Fikiere, O ogberẹ,+ yo ẹme nọ Jihova ọ ta. 36 Enẹ Jihova Olori nọ Ọ Mai Kpehru na ọ ta: ‘Fikinọ who dhesẹ isiuru egaga ra via, who te je kpe ẹba ra fihọ evaọ okenọ who je lele ese ra gbe emedhọ etọtọ* ra kpobi nọ i re tuoma bru igberẹ na,+ enọ whọ tubẹ rehọ azẹ emezae ra dhe idhe kẹ dede na,+ 37 me bi koko ese ra kpobi nọ who je ru oma were na họ bru owhẹ ze, enọ who you kpobi te enọ who mukpahe kpobi. Me ti koko ae họ no oria kpobi ze rọsuọ owhẹ, mẹ vẹ te ba owhẹ fihọ rọkẹ ae, a vẹ te ruẹ owhẹ nọ whọ bafihọ gbalọ gbalọ.+

38 “‘Mẹ te kẹ owhẹ iye nọ i fo kẹ eyae nọ e rrọ ibruẹnwae+ gbe eyae nọ i re kpe azẹ,+ a vẹ te rọ ofu gbe ihri-eriọ kpe azẹ ra.+ 39 Mẹ te rehọ owhẹ họ obọ rai, a ve ti kporo ikpehru ra fihọ otọ je zurie eria ikpehru ra fihọ otọ;+ a te ba iwu ra no owhẹ oma+ jẹ te tọlọ eware osẹ* iwowoma ra,+ a vẹ nyasiọ owhẹ ba ẹbẹba ababọ ewu nọ ọ te jọ owhẹ oma. 40 A te rehọ ogbotu ahwo ze rọ họre owhẹ,+ a vẹ te rọ itho fi owhẹ+ jẹ rehọ egbọdọ rai kpe owhẹ.+ 41 A te rọ erae mahe iwou ra no,+ a vẹ te jọ iraro eyae buobu ru owhẹ oware nọ me bruoziẹ riẹ kpahe owhẹ; me ti ru igberẹ-ibro ra serihọ,+ whọ gbẹ te hwosa kẹ ahwo ho. 42 Me ti mu ofu kẹ owhẹ te oka,+ kẹsena mẹ vẹ te siọ eva ba ẹdha kẹ owhẹ;+ mẹ te fọ rirẹ, eva e gbẹ te dha omẹ hẹ.’

43 “‘Fikinọ whọ kareghẹhọ oke uzoge ra ha+ jẹ rehọ eware nana kpobi nọ who ru na ru omẹ eva dha na, me ti ru re eware nọ i no idhere ra ze i hwẹ ku uzou obọra,’ ere Jihova Olori nọ Ọ Mai Kpehru na ọ ta, ‘yọ who gbe ti ru uruemu otọtọ ra avọ iruẹru etọtọ ra kpobi hi.

44 “‘Rri! Ohwo kpobi nọ o bi bru ohare o ti bru ohare nana kpahe owhẹ inọ: “Whọ ruẹ ọmọtẹ na yọ whọ ruẹ oni riẹ no!”+ 45 Whẹ yọ ọmọtẹ oni ra, ọnọ ọ jẹ ọzae riẹ avọ emọ riẹ fiẹ. Whẹ yọ oniọvo-ọmọtẹ inievo-emetẹ ra, enọ e jẹ ezae rai avọ emọ rai fiẹ. Oni ra yọ ohwo Hit, ọsẹ ra kọ ohwo Amọ.’”+

46 “‘Oniọvo-ọmọtẹ ọkpako ra họ Sameria,+ ọnọ avọ emetẹ riẹ* a be rria ofẹ ẹkpẹlobọ ovatha-ọre ra,*+ yọ oniọvo-ọmọtẹ ọmaha ra họ Sọdọm,+ ọnọ avọ emetẹ riẹ a be rria ofẹ obọze ovatha-ọre ra.*+ 47 Orọnikọ whọ jọ idhere rai nya je lele iruemu etọtọ rai ọvo ho, rekọ evaọ omoke kpẹkpẹ, uruemu ra kpobi u te tube yoma vi uruemu rai dede.+ 48 Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘oniọvo-ọmọtẹ ra Sọdọm avọ emetẹ riẹ a ri ru eware nọ whẹ avọ emetẹ ra wha ru na ha. 49 Rri! Oware nọ Sọdọm oniọvo-ọmọtẹ ra o ru thọ ona: Ọyomariẹ avọ emetẹ riẹ+ a wo omorro,+ a te je wo emuore buobu,+ yọ oware ovo u je kpokpo ai hi;+ ghele na a fiobọhọ kẹ enọ e jẹ reoja gbe iyogbe he.+ 50 Omorro o gbẹ jarai oma,+ yọ a je ru eware etọtọ evaọ aro mẹ,+ fikiere mẹ tẹ ruẹ nọ u fo nọ me re si ai no aro mẹ no.+

51 “‘Sameria+ ọ tubẹ raha uzi bu te abọvo izi nọ whọ raha ha. Whọ ruabọhọ je ru iruẹru etọtọ ra dhe ebuebu, i te ti bu vi enọ a ru, te epanọ o rọ wọhọ nọ inievo-emetẹ ra i kiẹrẹe vi owhẹ fiki iruẹru etọtọ ra kpobi.+ 52 Whọ te ruẹ uye omovuọ hrọ, keme whọ rọ uruemu ra dhesẹ nọ uruemu inievo-emetẹ ra na u kiehọ.* Fikinọ who ru eware nọ e tọtọ vi enọ a ru, whọ jẹ rọ ere raha uzi na, a kiẹrẹe vi owhẹ. Fikiere enẹna, oma o vuọ owhẹ re whọ jẹ ruẹ uye omovuọ nọ who ro ru nọ inievo-emetẹ ra e rọ wọhọ ahwo okiẹrẹe.’

53 “‘Me ti koko ahwo rai nọ a mu họ, ahwo Sọdọm nọ a mu avọ emetẹ riẹ gbe ahwo Sameria nọ a mu avọ emetẹ riẹ; me ti je koko ahwo ra nọ a mu họ kugbe ae,+ 54 re whọ ruẹ uye omovuọ ra; oma o vẹ te vuọ owhẹ fiki oware nọ who ru nọ whọ rọ sasa ae oma na. 55 Inievo-emetẹ obọra, Sọdọm avọ emetẹ riẹ, a ti zihe kpohọ epaọ ọsosuọ rai, yọ Sameria avọ emetẹ riẹ a ti zihe kpohọ epaọ ọsosuọ rai, whẹ avọ emetẹ ra, wha ve ti je zihe kpohọ epaọ ọsosuọ rai.+ 56 Sọdọm oniọvo-ọmọtẹ ra o te ohwo nọ whọ rẹ fodẹ hẹ evaọ okenọ who ro wo omorro, 57 taure a tẹ te fere emuemu ra via.+ Whaọ enẹna, emetẹ Siria avọ enọ a gbẹ rrọ okegbe a be poviẹ owhẹ, te emetẹ ahwo Filistia,+ enọ e wariẹ owhẹ họ a be rọ owhẹ jijehwẹ. 58 Whọ te ruẹ uye eware nọ i no uruemu otọtọ ra avọ iruẹru etọtọ ra ze,’ ere Jihova ọ ta.”

59 “Keme enẹ Jihova Olori nọ Ọ Mai Kpehru na ọ ta: ‘Nwane wọhọ epanọ who ru na me ti ru owhẹ,+ keme whọ jẹ iyei nọ who duwu na kufiẹ ẹkwoma ọvọ mẹ nọ whọ raha.+ 60 Rekọ mẹ omamẹ mẹ te kareghẹhọ ọvọ nọ mẹ re kugbe owhẹ evaọ oke uzoge ra, mẹ vẹ te re ọvọ ebẹdẹ bẹdẹ kugbe owhẹ.+ 61 Whọ te kareghẹhọ uruemu ra, oma o vẹ te vuọ owhẹ+ okenọ who ti dede inievo-emetẹ ra rehọ, te enọ e kpako vi owhẹ te enọ e maha vi owhẹ, mẹ vẹ te rehọ ae kẹ owhẹ wọhọ emetẹ ra, rekọ orọnọ fiki ọvọ ra ha.’

62 “‘Mẹ omamẹ mẹ te re ọvọ mẹ kugbe owhẹ; whọ vẹ te riẹ nọ mẹ họ Jihova. 63 Kẹsena whọ vẹ te kareghẹhọ, oma o vẹ te vuọ owhẹ te epanọ whọ te sai ro rovie unu ra ha fiki omovuọ ra,+ evaọ okenọ me ti voro owhẹ oma ghelọ eware kpobi nọ who ru,’+ ere Jihova Olori nọ Ọ Mai Kpehru na ọ ta.”

17 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, ta oze jọ, re whọ jẹ rọ ọtadhesẹ ta ẹme kpahe uwou Izrẹl.+ 3 Whọ rẹ ta nọ, ‘Enẹ Jihova Olori nọ Ọ Mai Kpehru na ọ ta: “Ugo ulogbo+ na nọ o wo ibekpe ilogbo, ileli ithethei, gbe ileli nọ i wo ekọlọ sa-sa nọ e vọ oma riẹ soso, ọ ziọ Lebanọn,+ o te wiri obehru ure sida na.+ 4 O wiri ogha oboba riẹ nọ o mai kpehru, ọ tẹ rehọ iẹe ziọ ẹkwotọ ethueki,* ọ tẹ kọe fihọ okpẹwho ethueki.+ 5 Kẹsena ọ tẹ tọlọ ubi ẹkwotọ na jọ,+ o te fi ei họ otọ nọ u re wou eware. Ọ kọ riẹ fihọ akotọ ame obuobu wọhọ ure iwhilo. 6 O tẹ rro, u te zihe ruọ ure evaene okpẹkpẹe nọ o gbọ fihọ otọ,+ ebe riẹ i rri obeva, yọ awọ riẹ ọ be rro evaọ otọ riẹ. Ere u ro zihe ruọ evaene, u te wo egha eboba, o tẹ za egha fihọ.+

7 “‘“Ugo ulogbo ofa jọ+ nọ u wo ibekpe ilogbo gbe ileli ekẹkẹe+ o tẹ rra ze. Evaene nana ọ tẹ rriẹ awọ riẹ ovovẹrẹ no otọ ọgbọ nọ a kọ riẹ fihọ na bru ei, o tẹ jẹ rriẹ ebe riẹ bru ei re u ku ame ku ei.+ 8 A kọ riẹ fihọ emamọ otọ kẹle ame obuobu no vẹre, re egha e ta noi ze, re o mọ ibi, o vẹ jẹ rro zihe ruọ evaene ologbo.”’+

9 “Ta nọ, ‘Enẹ Jihova Olori nọ Ọ Mai Kpehru na ọ ta: “Kọ o te zọ? Kọ ohwo jọ o gbe ti bru awọ riẹ no,+ u ve ru ibi riẹ gbo no je ru emegha riẹ nọ e ta ze lo no?+ O te ya fia te epanọ u ti ro du gwọlọ nọ a rọ ogaga hayo rọ ahwo buobu wolo awọ riẹ lele iei hi. 10 Dede nọ a wolo i rie nyae kọ fihọ oria ofa na, kọ o te zọ? Kọ u gbe ti whu no riẹriẹriẹ okenọ ofou ovatha-ọre o te fou rie? U ti whu fihọ otọ ọgbọ nọ o dhẹ no ze na.”’”

11 Ẹme Jihova ọ tẹ wariẹ bru omẹ ze, inọ: 12 “Ivie ta kẹ ahwo uwou ọwọsuọ na nọ, ‘Kọ wha gbẹ riẹ otọ eware nana?’ Ta nọ, ‘Rri! Ovie Babilọn ọ ziọ Jerusalẹm, ọ tẹ rehọ ovie riẹ gbe ikpahwo-esuo riẹ, ọ tẹ wha ai lele oma ziọ Babilọn.+ 13 Ofariẹ, ọ rehọ ọmọ* uvie na jọ,+ ọ tẹ re ọvọ kugbei, o te ru ei duwu iyei.+ Kẹsena ọ tẹ wha ezae nọ e viodẹ evaọ ẹkwotọ na vrẹ,+ 14 re o hrẹ uvie na kpotọ, o gbẹ sae kpare oma ha. Yọ okenọ o te koko ọvọ nọ ọ re na ọvo uvie na o sae gbẹ rọ jariẹ.+ 15 Rekọ ukuhọ riẹ, ovie na ọ tẹ wọso ẹe+ ẹkwoma enyukọ riẹ nọ o vi kpobọ Ijipti re a jọ obọrai wo enyenya+ gbe ogbaẹmo ulogbo tobọ.+ Kọ eware e te riẹ nya kẹe? Kọ ohwo nọ o bi ru eware nana ọ te vabọ no uye nọ a te kẹe? Kọ ọ sae raha ọvọ na no, ọ vẹ vabọ ghele?’+

16 “‘“Nọ mẹ rrọ uzuazọ na,” ere Jihova Olori nọ Ọ Mai Kpehru na ọ ta, “Babilọn ọ te jọ whu, oria nọ ovie* nọ ọ rehọ e riẹ* mu ovie na ọ be rria, ọnọ ọyomariẹ ọ jẹ iyei riẹ nọ o duwu kufiẹ jẹ raha ọvọ riẹ.+ 17 Ogbaẹmo ulogbo Fẹro avọ egbaẹmo ibuobu riẹ e te sai fiobọhọ evaọ ẹmo na vievie he,+ evaọ okenọ a te ma igbuhru gbe igbẹhẹ ro koi họ re a kpe ahwo* buobu. 18 Ọ jẹ iyei nọ o duwu kufiẹ jẹ raha ọvọ nọ a re. O ru eware nana kpobi dede nọ ọ ya eyaa,* yọ ọ te vabọ họ.”’

19 “‘Fikiere enẹ Jihova Olori nọ Ọ Mai Kpehru na ọ ta: “Nọ mẹ rrọ uzuazọ na, me ti ru re ọ ruẹ uye iyei nọ me duwu nọ ọ jẹ kufiẹ+ gbe ọvọ mẹ nọ ọ raha na. 20 Me ti gbolo ẹriri* mẹ fihọ iẹe, ẹriri mẹ o ve ti mu ei.+ Mẹ te rehọ iẹe ziọ Babilọn, me ve ti lele iei gu ẹdhọ evaọ etẹe fiki aghẹmeeyo riẹ nọ ọ rọ raha uzi mẹ.+ 21 Ọgbọdọ o ti kpe egbaẹmo riẹ kpobi nọ e be dhẹ dhere, a vẹ te vaha enọ i kiọkọ fihọ ofẹ kpobi.*+ Kẹsena wha vẹ te riẹ nọ mẹ omamẹ, Jihova, mẹ ta riẹ no.”’+

22 “‘Enẹ Jihova Olori nọ Ọ Mai Kpehru na ọ ta: “Mẹ te jọ obehru ure sida othethei na rehọ omogha jọ,+ mẹ vẹ te kọe, mẹ te jọ obọ ẹroro egha esese riẹ wiri ogha oboba jọ,+ mẹ omamẹ mẹ vẹ te kọe fihọ ehru ugbehru jọ nọ u kpehru gaga.+ 23 Obọ ehru ugbehru ukpekpehru Izrẹl mẹ te kọe fihọ; yọ egha riẹ e te rro, o vẹ te mọ ibi je zihe ruọ ure sida ulogbo. Oghẹrẹ ọvra kpobi ọ te rria otọ riẹ jẹ te jọ otọ edhedhẹ ebe riẹ. 24 Ire kpobi nọ e rrọ ẹwọ na e vẹ te riẹ nọ mẹ omamẹ, Jihova, o hrẹ ure othethei na ziọ otọ, mẹ tẹ kpare ure okpẹkpẹe na kpehru;+ me ru nọ ire nọ e rrọ bọbọbọ na i ro whu no, je ru nọ ire nọ i whu no e rọ rrọ bọbọbọ.+ Mẹ omamẹ, Jihova, mẹ ta riẹ je ru ei no.”’”

18 Ẹme Jihova ọ tẹ wariẹ bru omẹ ze, inọ: 2 “Eme họ otọ ohare nana nọ wha be hai bru evaọ ẹkwotọ Izrẹl na inọ, ‘Esẹ e re ibi-ure nọ e ware he, rekọ emezae rai họ enọ ibiakọ e be gheghe’?+

3 “‘Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘wha gbe ti bru ohare nana evaọ Izrẹl he. 4 Rri! Mẹ me wo uzuazọ* kpobi. Te uzuazọ ọsẹ te uzuazọ ọmọ me wo rai. Ohwo* nọ ọ be raha uzi họ ọnọ o ti whu.

5 “‘Ma rehọ iẹe nọ ọzae jọ o kiẹrẹe, yọ o re ru oware nọ o gba je kiehọ. 6 Ọ rẹ re eware nọ a ro dhe idhe kẹ ẹdhọ evaọ ehru igbehru na ha;+ ọ rẹ rẹroso emedhọ etọtọ* uwou Izrẹl he; o re zue aye ọrivẹ riẹ oma ha+ hayo lele aye nọ ọ rrọ oke riẹ wezẹ hẹ;+ 7 o re gboja kẹ ohwo ọvo ho,+ ukpoye o re zihe oware nọ ohwo o ro viowa kẹe;+ o re tho oware ohwo ọvo ho,+ ukpoye ọ rẹ rehọ emu obọriẹ kẹ ọnọ ohọo u bi kpe+ je ku ewu họ ọnọ ọ rrọ ẹbẹba;+ 8 o re mi isuo fihọ oware nọ o momo kẹ ohwo ho hayo momo igho kẹ ohwo avọ isuo buobu hu,+ ukpoye o re ru oware nọ o gbe ro kienyẹ ohwo ho;+ o re bruoziẹ uzẹme nọ imava i te wo ẹme;+ 9 yọ ọ rẹ ruabọhọ nya evaọ ijaje mẹ je koko izi oziẹobro mẹ re ọ ruẹsi ru oware nọ u kiehọ. Ohwo otiọye na o kiẹrẹe, yọ ọ te gbẹ jọ uzuazọ hrọ,’+ ere Jihova Olori nọ Ọ Mai Kpehru na ọ ta.

10 “‘Rekọ otẹrọnọ o yẹ ọmọzae nọ ọ rrọ oji+ hayo ojihẹ*+ hayo nọ o bi ru ọjọ evaọ usu eware edekọ nana 11 (dede nọ ọsẹ na o ru ọvuọvo evaọ usu eware nana ha)—ọ rẹ re eware nọ a ro dhe idhe kẹ ẹdhọ evaọ ehru igbehru na, o re zue aye ọrivẹ riẹ oma, 12 o re gboja kẹ ọnọ ọbẹwẹ ọ rrọ oma gbe oyogbe,+ o re tho eware ahwo, o re zihe oware nọ a ro viowa kẹe he, ọ rẹ rẹroso emedhọ etọtọ na,+ o re wobọ evaọ iruẹru etọtọ,+ 13 o re momo igho kẹ ohwo avọ isuo buobu je mi isuo fihọ oware nọ o momo kẹ ohwo,+—o tẹ rrọ ere, ọmọzae na ọ rẹ gbẹ jọ uzuazọ họ. A re kpei no hrọ fiki eware etọtọ nana kpobi nọ o ru na. Azẹ riẹ ọ rẹ jọ uzou obọriẹ.

14 “‘Rekọ ma rehọ iẹe nọ ọsẹ jọ o wo ọmọzae nọ ọ be ruẹ izi kpobi nọ ọsẹ riẹ ọ be raha, yọ dede nọ ọ be ruẹ e rai, o bi ru eware itieye he. 15 Ọ rẹ re eware nọ a ro dhe idhe kẹ ẹdhọ evaọ ehru igbehru na ha; ọ rẹ rẹroso emedhọ etọtọ uwou Izrẹl he; o re zue aye ọrivẹ riẹ oma ha; 16 o re gboja kẹ ohwo ọvo ho; o re gboro oware nọ a ro viowa kẹe he; o re tho oware ohwo ho; ọ rẹ rehọ emu obọriẹ kẹ ọnọ ohọo u bi kpe je ku ewu họ ọnọ ọ rrọ ẹbẹba; 17 o re ru oware nọ o gbe ro kienyẹ oyogbe he; o re momo igho kẹ ohwo avọ isuo buobu hu hayo mi isuo fihọ oware nọ o momo kẹ ohwo ho; yọ o re ru lele izi oziẹobro mẹ jẹ nya evaọ ijaje mẹ. Ohwo otiọye o re whu fiki oruthọ ọsẹ riẹ hẹ. Ọ te gbẹ jọ uzuazọ hrọ. 18 Rekọ fikinọ ọsẹ riẹ o je fi iwhayo, o tho eware omoni riẹ, je ru eware nọ i yoma evaọ udevie ahwo riẹ, o ti whu fiki oruthọ riẹ.

19 “‘Rekọ wha te ta nọ: “Fikieme ọmọzae na ọ gbẹ reabe fiki oruthọ ọsẹ riẹ hẹ?” Nọ orọnọ ọmọzae na o ru oware nọ o gba je kiẹrẹe na, gbe nọ o koko ijaje mẹ je ru lele ai na, ọ te gbẹ jọ uzuazọ hrọ.+ 20 Ohwo* nọ ọ be raha uzi họ ọnọ o ti whu.+ Ọmọzae ọ te reabe fiki oruthọ ọsẹ riẹ hẹ, yọ ọsẹ ọ te reabe fiki oruthọ ọmọzae riẹ hẹ. Oware ukiẹrẹe nọ ohwo okiẹrẹe na o ru a ti ro bruoziẹ riẹ, yọ umuomu nọ ohwo omuomu na o ru a ti ro bruoziẹ riẹ.+

21 “‘Whaọ otẹrọnọ ohwo omuomu o kurẹriẹ no izieraha kpobi nọ ọ raha no, o je bi koko ijaje mẹ je bi ru oware nọ o gba je kiẹrẹe, ọ te gbẹ jọ uzuazọ hrọ. O ti whu hu.+ 22 A te rọ fiki* uzioraha ovuovo nọ ọ raha rọ kẹe uye he.+ Ọ te gbẹ jọ uzuazọ fiki oware ukiẹrẹe nọ o bi ru.’+

23 “‘Kọ uwhu ohwo omuomu o rẹ were omẹ?’+ ere Jihova Olori nọ Ọ Mai Kpehru na ọ ta. ‘Kọ ogbẹrọnọ idhere riẹ nọ o re kurẹriẹ no ọ vẹ gbẹ jọ uzuazọ họ oware nọ o rẹ were omẹ?’+

24 “‘Rekọ nọ ohwo okiẹrẹe ọ tẹ nyasiọ ẹrẹreokie riẹ ba, o je bi ru oware nọ o thọ,* bi ru eware etọtọ kpobi nọ ahwo omuomu a bi ru, kọ ọ te jọ uzuazọ? A te kareghẹhọ iruẹru ikiẹrẹe ọvuọvo nọ o ru hu.+ O ti whu fiki aghẹmeeyo riẹ gbe uzi nọ ọ raha na.+

25 “‘Rekọ wha te ta nọ: “Edhere Jihova o kiete he.”+ O uwou Izrẹl, ivie wha gaviezọ! Kọ edhere mẹ họ ọnọ o kiete he?+ Kọ ogbẹrọnọ idhere rai họ enọ i kiete he?+

26 “‘Nọ ohwo okiẹrẹe ọ tẹ nyasiọ ẹrẹreokie riẹ ba, o je bi ru oware nọ o thọ je whu fiki riẹ, fiki oruthọ obọriẹ o ro whu.

27 “‘Nọ ohwo omuomu o te kurẹriẹ no imuomu nọ o ru no, o je mu oware nọ o gba je kiẹrẹe họ eru, o ti siwi uzuazọ* obọriẹ.+ 28 Nọ o te vuhu eware nọ o bi ru mu, o je kurẹriẹ no izieraha kpobi nọ ọ raha no, ọ te gbẹ jọ uzuazọ hrọ. O ti whu hu.

29 “‘Rekọ uwou Izrẹl o te ta nọ: “Edhere Jihova o kiete he.” O uwou Izrẹl, kọ idhere mẹ họ enọ i gine kiete he?+ Kọ ogbẹrọnọ idhere rai họ enọ i kiete he?’

30 “‘Fikiere, me ti bruoziẹ omomọvo rai wọhọ epanọ idhere riẹ e rrọ,+ O uwou Izrẹl,’ ere Jihova Olori nọ Ọ Mai Kpehru na ọ ta. ‘Wha kurẹriẹ, ẹhẹ, wha kurẹriẹ no izieraha rai kpobi no riẹriẹriẹ, re e gbẹ jọ utho ezoruẹ nọ u re ru owhai reabe he. 31 Wha si izieraha nọ wha raha kpobi no omarai no,+ re wha wo udu okpokpọ gbe ẹzi ọkpokpọ,*+ kọ fikieme wha re ro whu,+ O uwou Izrẹl?’

32 “‘Uwhu ohwo ọvo o rẹ were omẹ vievie he,’+ ere Jihova Olori nọ Ọ Mai Kpehru na ọ ta. ‘Fikiere wha kuomarẹriẹ re wha jọ uzuazọ.’”+

O je ruẹ fihọ udevie ikpohrokpo egaga,* yọ etẹe ọ jọ yọrọ emọ riẹ.

 3 Ọmọ riẹ jọ nọ ọ yọrọ o te zihe ruọ okpohrokpo ọgaga.+

 5 Oni na ọ tẹ jẹ hẹrẹ, ọ tẹ ruẹ nọ ẹruore ọvo ọ gbẹ riẹ nọ o ti zihe ze he.

Fikiere ọ tẹ rehọ ọmọ riẹ ọfa, o te vi ei vrẹ wọhọ okpohrokpo ọgaga.

 6 Ọ jẹ nya kpenẹ avọ enẹ re evaọ udevie ikpohrokpo na, o te zihe ruọ okpohrokpo ọgaga.

O wuhrẹ epanọ a rẹ za arao ekẹ ivẹ, yọ ọ jẹ tubẹ re ahwo-akpọ no dede.+

 9 A fi rie họ eva ikeji avọ eghọlọ nọ a jẹhọ iẹe, a tẹ rehọ iẹe bru ovie Babilọn ze.

A tẹ jọ obei fi ei họ oria ovo, re a gbẹ jọ ehru igbehru Izrẹl yo edo uvou riẹ ofa ha.

10 Oni ra ọ jọ wọhọ evaene+ evaọ azẹ ra,* onọ a kọ fihọ akotọ ame.

O mọ ibi, u te je wo egha buobu fiki ame nọ ọ dafia na.

11 U te ti wo egha egaga,* enọ e rẹ sae jọ ekpọ-isuẹsu erọ isu.

A wiri egha egaga riẹ, i te whu no,+ erae e tẹ mahe ae no.+

“‘Ole yena yọ ole uweri, yọ ole uweri o te jọ.’”

20 Whaọ evaọ ukpe avọ ihrẹ, evaọ amara avọ isoi, evaọ ẹdẹ avọ ikpe amara na, ekpako Izrẹl jọ e tẹ nyaze, a tẹ keria aro mẹ re a nekpẹ mi Jihova. 2 Kẹsena ẹme Jihova o te bru omẹ ze, inọ: 3 “Ọmọ ohwo, lele ekpako Izrẹl na ta ẹme re whọ vuẹ ae nọ, ‘Enẹ Jihova Olori nọ Ọ Mai Kpehru na ọ ta: “Kọ wha be nyaze te nekpẹ mi omẹ? ‘Nọ mẹ rrọ uzuazọ na, mẹ te kẹ owhai uyo ho,’+ ere Jihova Olori nọ Ọ Mai Kpehru na ọ ta.”’

4 “Kọ whọ ruẹrẹ oma kpahe no re who gu ae ẹdhọ?* Kọ whọ ruẹrẹ oma kpahe no re who gu ae ẹdhọ, ọmọ ohwo? Ru ae riẹ eware etọtọ nọ esẹ-esẹ rai i ru.+ 5 Ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Evaọ ẹdẹ nọ mẹ rọ salọ Izrẹl,+ me duwu iyei* kẹ ọmọ* uwou Jekọp re, yọ me dhesẹ omamẹ via kẹ ae evaọ ẹkwotọ Ijipti.+ Ẹhẹ, me duwu iyei kẹ ae jẹ ta nọ, ‘Mẹ họ Jihova Ọghẹnẹ rai.’ 6 Me duwu iyei kẹ ae evaọ ẹdẹ yena nọ mẹ te rehọ ai no ẹkwotọ Ijipti ze kpohọ ẹkwotọ nọ mẹ gwọlọ via* rọkẹ ae, onọ ame-ivie gbe ọnyọ i bi jo su.+ O jọ ẹkwotọ nọ ọ mai wo erru evaọ usu* ekwotọ na kpobi. 7 Kẹsena mẹ tẹ ta kẹ ae nọ, ‘Whai omomọvo o re gbolo eware etọtọ nọ e rrọ aro rai na kufiẹ hrọ; wha rehọ emedhọ etọtọ* Ijipti zue omarai hi.+ Mẹ họ Jihova Ọghẹnẹ rai.’+

8 “‘“Rekọ a kpareso omẹ, yọ u no rai eva ze nọ a rẹ gaviezọ kẹ omẹ hẹ. A gbolo eware etọtọ nọ e jọ aro rai kufiẹ hẹ, yọ a rọwo nyasiọ emedhọ etọtọ Ijipti ba ha.+ Fikiere mẹ tẹ ya eyaa nọ me ti ku ofu mẹ ku ai, je siobọno ofu ọgaga mẹ kpobi ku ai evaọ ẹkwotọ Ijipti. 9 Rekọ me te ru oware jọ fiki odẹ mẹ re a se iẹe ba egbeku evaọ aro erẹwho nọ a jẹ rria na.+ Keme me dhesẹ omamẹ kẹ ae* evaọ aro erẹwho nana okenọ mẹ rehọ ae* no ẹkwotọ Ijipti ze.+ 10 Fikiere mẹ tẹ rehọ ai no ẹkwotọ Ijipti ze, me te su ae ruọ udhude na.+

11 “‘“Kẹsena mẹ tẹ kẹ ae ijaje mẹ je ru ai riẹ izi oziẹobro mẹ,+ re ohwo nọ o koko i rai o ve wo uzuazọ fiki rai.+ 12 Mẹ tẹ jẹ kẹ ae edijala mẹ+ re o jọ oka evaọ udevie mẹ avọ ae,+ re a ruẹse riẹ nọ mẹ Jihova họ ọnọ o bi ru ai fo.

13 “‘“Rekọ uwou Izrẹl o kpareso omẹ evaọ udhude na.+ A nya evaọ ijaje mẹ hẹ, a tẹ jẹ siọ izi oziẹobro mẹ, enọ i re ru ohwo wo uzuazọ otẹrọnọ o koko i rai. A zue edijala mẹ totọ. Fikiere mẹ tẹ ya eyaa nọ me ti ku ofu ọgaga mẹ ku ai evaọ udhude na re me kpe ai muotọ.+ 14 Me te ru oware jọ fiki odẹ mẹ re a se iẹe ba egbeku evaọ aro erẹwho na, enọ mẹ jọ iraro rai rehọ ae* lahwe.+ 15 Me te je duwu iyei kẹ ae evaọ udhude na nọ mẹ te rehọ ae ziọ ẹkwotọ nọ mẹ kẹ rai na ha+—ẹkwotọ nọ ame-ivie gbe ọnyọ i bi jo su,+ ẹkwotọ nọ ọ mai wo erru evaọ usu* ekwotọ na kpobi— 16 fikinọ a siọ izi oziẹobro mẹ, a nya evaọ ijaje mẹ hẹ, a te je zue edijala mẹ, keme udu rai u je lele emedhọ etọtọ rai.+

17 “‘“Rekọ mẹ re ohrọ rai,* mẹ gbẹ raha ae he; me kpe rai muotọ evaọ udhude na ha. 18 Mẹ ta kẹ emezae rai evaọ udhude na nọ,+ ‘Wha du nya evaọ izi esẹ-esẹ rai hi+ hayo lele iziẹibro rai hi hayo rehọ emedhọ etọtọ rai zue omarai hi. 19 Mẹ họ Jihova Ọghẹnẹ rai. Wha nya evaọ ijaje mẹ, je koko izi oziẹobro mẹ, re wha ru lele ai.+ 20 Wha re ru edijala mẹ fo,+ yọ e rẹ jọ oka evaọ udevie mẹ avọ owhai, re wha ruẹse riẹ nọ mẹ họ Jihova Ọghẹnẹ rai.’+

21 “‘“Rekọ emezae na i te mu omẹ họ ẹkpareso.+ A nya evaọ ijaje mẹ hẹ, yọ a koko izi oziẹobro mẹ je ru lele ai hi, enọ i re ru ohwo wo uzuazọ otẹrọnọ o koko i rai. A zue edijala mẹ. Fikiere mẹ tẹ ya eyaa nọ me ti ku ofu mẹ ku ai, je siobọno ofu ọgaga mẹ kpobi ku ai evaọ udhude na.+ 22 Rekọ me te zihe oma+ je ru oware jọ fiki odẹ mẹ+ re a se iẹe ba egbeku evaọ aro erẹwho na, enọ mẹ jọ iraro rai rehọ ae* lahwe. 23 Ofariẹ, me duwu iyei kẹ ae evaọ udhude na inọ mẹ te vaha ae fihọ udevie erẹwho na jẹ vaha ae fihọ udevie ekwotọ na,+ 24 fikinọ a ru lele izi oziẹobro mẹ hẹ, a tẹ jẹ siọ ijaje mẹ,+ a zue edijala mẹ, yọ a je lele* emedhọ etọtọ esẹ-esẹ rai.+ 25 Mẹ tẹ jẹ kẹ ae uvẹ re a lele ijaje nọ i woma ha gbe izi oziẹobro nọ e rẹ sae kẹ ae uzuazọ họ.+ 26 Mẹ kẹ rai uvẹ re idheidhe obọrai i zue ai oma—okenọ a jẹ mahe ọmọ ọsosuọ kpobi evaọ erae+—re mẹ ruẹsi ru ai fihọ ofofe, re a riẹ nọ mẹ họ Jihova.”’

27 “Fikiere ta ẹme kẹ uwou Izrẹl, O ọmọ ohwo, whọ rẹ vuẹ ae nọ, ‘Enẹ Jihova Olori nọ Ọ Mai Kpehru na ọ ta: “Oghẹrẹ edhere ọvo nana esẹ-esẹ rai a rọ ta eme-aghọ kpahe omẹ okenọ a nyasiọ omẹ ba. 28 Mẹ rehọ e rai ziọ ẹkwotọ nọ me duwu iyei nọ mẹ te kẹ ae.+ Nọ a ruẹ ikpehru ikpekpehru avọ ire nọ i wo ebe ziezi na kpobi,+ a te mu idhe rai họ edhe jẹ be kẹ ekẹ rai nọ e rẹ dha omẹ eva. A jẹ jọ eria eyena dhe idhe nọ i re gbo ore awere,* yọ a je ku idhe udi rai lahwe evaọ eria eyena. 29 Fikiere mẹ tẹ nọ ae nọ, ‘Eme ọ be hae lẹliẹ owhai kpohọ oria ukpehru nana? (A gbe bi sei Oria Ukpehru rite ẹdẹ inẹnẹ na.)’”’+

30 “Whaọ enẹna ta kẹ uwou Izrẹl nọ, ‘Enẹ Jihova Olori nọ Ọ Mai Kpehru na ọ ta: “Kọ wha bi zue omarai wọhọ epanọ esẹ-esẹ rai i ru ẹkwoma emedhọ etọtọ rai nọ wha bi lele, be rọ ere bru igberẹ kugbe ae?*+ 31 Kọ wha gbe bi zue omarai rite ẹdẹ inẹnẹ na ẹkwoma idhe nọ wha bi dhe kẹ emedhọ etọtọ rai kpobi, be mahe emọ rai evaọ erae?+ Nọ wha bi ru eware nana na, kọ u fo nọ mẹ rẹ kẹ owhai uyo nọ wha tẹ nekpẹ mi omẹ, O uwou Izrẹl?”’+

“‘Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘Mẹ te kẹ owhai uyo ho.+ 32 Yọ oware nọ wha wo họ iroro* nọ wha be ta nọ, “Joma jọ wọhọ erẹwho na, wọhọ iviuwou nọ e rrọ ekwotọ edekọ na, enọ e be gọ* ure gbe utho na,”+ o te via vievie he.’”

33 “‘Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘me ti su owhai wọhọ ovie avọ obọ ogaga, avọ ugbobọ nọ o rriẹ fihọ, gbe ofu nọ me ti ku lahwe.+ 34 Mẹ te rehọ owhai no udevie ahwo na ze je koko owhai họ no ekwotọ nọ mẹ vaha owhai kpohọ na ze avọ obọ ogaga, avọ ugbobọ nọ o rriẹ fihọ, gbe ofu nọ me ti ku lahwe.+ 35 Mẹ te rehọ owhai ziọ udhude ahwo na, me ve lele owhai gu ẹdhọ evaọ etẹe ovao dhe ovao.+

36 “‘Nwane wọhọ epanọ me lele esẹ-esẹ rai gu ẹdhọ evaọ udhude ẹkwotọ Ijipti na, ere me ti lele owhai gu ẹdhọ re,’ ere Jihova Olori nọ Ọ Mai Kpehru na ọ ta. 37 ‘Me ti ru owhai nya otọ ọkpọ othuru-igodẹ na vrẹ,+ me ve ti ru owhai koko* ọvọ na. 38 Rekọ me ti si enọ e be kpareso na gbe enọ e be raha izi mẹ na no udevie rai no.+ Keme mẹ te rehọ ae no ẹkwotọ nọ a jọ rrọ erara na ze, rekọ a te ruọ eva ẹkwotọ Izrẹl he;+ wha vẹ te riẹ nọ mẹ họ Jihova.’

39 “Rọkẹ owhai, O uwou Izrẹl, enẹ Jihova Olori nọ Ọ Mai Kpehru na ọ ta: ‘Whai omomọvo ọ nya re ọ gọ emedhọ etọtọ riẹ.+ Rekọ nọ oyena o tẹ vrẹ no, nọ wha gbẹ gaviezọ kẹ omẹ hẹ, wha te gbẹ sae rehọ idheidhe rai gbe emedhọ etọtọ rai ro gbe odẹ ọrẹri mẹ ku hu.’+

40 “‘Keme evaọ ugbehru ọrẹri mẹ, evaọ ehru ugbehru ukpekpehru Izrẹl,’+ ere Jihova Olori nọ Ọ Mai Kpehru na ọ ta, ‘uwou Izrẹl soso, aikpobi a te jọ gọ omẹ evaọ ẹkwotọ na.+ Eva rai e te were omẹ evaọ etẹe, yọ me ti mi owhai azọhọ rai gbe ibi ọsosuọ rai nọ wha be rọ kẹ okẹ, eware ọrẹri rai kpobi.+ 41 Eva rai e te were omẹ fiki ore awere* na evaọ okenọ mẹ te rehọ owhai no udevie ahwo na ze je koko owhai họ no ekwotọ nọ mẹ vaha owhai kpohọ na ze;+ erẹwho na e te ruẹ nọ mẹ yọ ọrẹri evaọ udevie rai.’+

42 “‘Wha vẹ te riẹ nọ mẹ họ Jihova+ okenọ mẹ te rehọ owhai ziọ ẹkwotọ Izrẹl,+ ẹkwotọ nọ me duwu iyei nọ mẹ te kẹ esẹ-esẹ rai na. 43 Wha vẹ te jọ etẹe kareghẹhọ uruemu rai gbe iruẹru rai kpobi nọ wha ro zue omarai,+ oma obọrai* u ve ti tu owhai oma fiki eware iyoma kpobi nọ wha ru.+ 44 Kẹsena wha vẹ te riẹ nọ mẹ họ Jihova evaọ okenọ me ti yerikugbe owhai fiki odẹ mẹ,+ me ti rri uruemu omuomu rai hayo eware etọtọ nọ wha ru hu, O uwou Izrẹl,’ ere Jihova Olori nọ Ọ Mai Kpehru na ọ ta.”

45 Ẹme Jihova ọ tẹ wariẹ bru omẹ ze, inọ: 46 “Ọmọ ohwo, ku ovao ra rẹriẹ rri ofẹ obọze ovatha-ọre na re who woro uworo kẹ obọze ovatha-ọre, whọ vẹ ruẹaro kẹ owhawho nọ o rrọ otọ nọ o rrọ ofẹ obọze ovatha-ọre. 47 Ta kẹ owhawho obọze ovatha-ọre na nọ, ‘Yo ẹme nọ Jihova ọ ta. Enẹ Jihova Olori nọ Ọ Mai Kpehru na ọ ta: “Rri, me bi koko erae họ rọ mahe owhẹ,+ e te mahe ure kpobi nọ o rrọ bọbọbọ gbe ure kpobi nọ u whu no nọ o rrọ eva ra muotọ. A ti furie erae na ha,+ ẹrrorro erae na o ti mu ovao ohwo kpobi, no obọze ovatha-ọre rite ẹkpẹlobọ ovatha-ọre. 48 Uwo kpobi o* vẹ te ruẹ nọ mẹ omamẹ, Jihova, me tu erae họ iẹe no, yọ a ti furie erae na ha.”’”+

49 Mẹ tẹ ta nọ: “O Jihova Olori nọ Ọ Mai Kpehru na! A be ta kpahe omẹ nọ, ‘Kọ ogbẹrọnọ eme oze* gheghe ọ be ta na?’”

21 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, rẹriẹ ovao ku Jerusalẹm re who whowho oware nọ o te via kẹ eria ọrẹri na, jẹ ruẹaro oware nọ o te via kẹ ẹkwotọ Izrẹl. 3 Ta kẹ ẹkwotọ Izrẹl nọ, ‘Enẹ Jihova ọ ta: “Rri, mẹ te rọsuọ owhẹ, yọ me ti yolo ọgbọdọ mẹ no owa riẹ ze,+ me ve kpe ahwo okiẹrẹe gbe ahwo omuomu nọ a rrọ eva ra no. 4 Fikinọ me ti kpe ahwo okiẹrẹe gbe ahwo omuomu nọ a rrọ eva ra no, uwo* kpobi mẹ te rọ ọgbọdọ mẹ nọ me ti yolo no owa riẹ ze na ro kpe, no obọze ovatha-ọre rite obọ ẹkpẹlobọ ovatha-ọre. 5 Ahwo kpobi a vẹ te riẹ nọ mẹ omamẹ, Jihova, me yolo ọgbọdọ mẹ no owa riẹ ze no. U ti zihe ruọ eva ha.”’+

6 “Rọkẹ owhẹ, ọmọ ohwo, whọ rẹ fiunu yọ who bi* nuhu, ẹhẹ, whọ rẹ fiunu gaga evaọ aro rai.+ 7 Yọ otẹrọnọ a nọ owhẹ nọ, ‘Fikieme whọ be rọ fiunu?’ whọ rẹ ta nọ, ‘Fiki iyẹrẹ jọ nọ me yo.’ Keme o te seba ẹtha ha, yọ ozọ o te lẹliẹ udu no ohwo kpobi awọ, obọ kpobi u ti kie fihọ otọ yọlọ, ohwo kpobi ọ te jọ ọkọkora, yọ eghilowọ kpobi o ti su ame fihọ otọ.*+ ‘Rri! O te seba ẹtha ha—o te via,’ ere Jihova Olori nọ Ọ Mai Kpehru na ọ ta.”

8 Ẹme Jihova ọ tẹ wariẹ bru omẹ ze, inọ: 9 “Ọmọ ohwo, ruẹaro re whọ ta nọ, ‘Enẹ Jihova ọ ta: “Ta nọ, ‘Ọgbọdọ jọ! A thọ ọgbọdọ+ jọ kpahe no, yọ a ririe i rie fihọ no nwranwranwra. 10 A thọ riẹ re a rehọ iẹe kpe ahwo buobu; a ririe i rie fihọ nwranwranwra re o lo wọhọ elo agbrara.’”’”

“Kọ u gbe fo re ma ghọghọ?”

“‘Kọ o* te siọ ọkpọ-isuẹsu ọmọzae obọmẹ,+ wọhọ epanọ o be siọ ure kpobi na?

11 “‘A rehọ e riẹ kẹ ohwo re o ririe iei fihọ nwranwranwra, re a je kru ei họ obọ ro kpe ahwo. A thọ ọgbọdọ nana je ririe iei fihọ nwranwranwra no, re a rehọ iẹe họ obọ okpikpakpe jọ.+

12 “‘Ọmọ ohwo, bo via je kuenu oviẹ,+ keme ọgbọdọ na ọ nyaze te rọsuọ ahwo mẹ no; ọ be rọsuọ isu Izrẹl kpobi.+ Ọgbọdọ na o ti kpe ahwo nana kugbe ahwo mẹ. Fikiere tehe ekpokpowọ ra avọ uweri. 13 Keme a ru ọkiẹriwo jọ no,+ kọ eme ọ te via otẹrọnọ ọgbọdọ na ọ siọ ọkpọ-isuẹsu na? Ọ* te gbẹ jọ họ,’+ ere Jihova Olori nọ Ọ Mai Kpehru na ọ ta.

14 “Rọkẹ owhẹ, ọmọ ohwo, ruẹaro jẹ tehe abọ ra re whọ wariẹ ẹme na, ‘Ọgbọdọ jọ!’ isiasa. Nọ ọgbọdọ nọ o kpe ahwo na, ọgbọdọ nọ o kpe ahwo buobu, nọ ọ wariẹ e rai họ.+ 15 Ozọ o te lẹliẹ udu no ai awọ,+ yọ ibuobu i ti whu evaọ inuethẹ okpẹwho na; mẹ te rehọ ọgbọdọ na kpe ahwo. Ẹhẹ, o bi lo wọhọ elo agbrara, yọ a ririe i rie fihọ nwranwranwra kẹ ikpakpe! 16 Gbẹre ziezi rri obọze! Veghe rri ẹkpẹlobọ! Kpohọ oria kpobi nọ a kpọ akọ ra rri! 17 Mẹ te tehe abọ mẹ re, je mu ofu mẹ totọ.+ Mẹ omamẹ, Jihova, mẹ ta riẹ no.”

18 Ẹme Jihova ọ tẹ wariẹ bru omẹ ze, inọ: 19 “Rọkẹ owhẹ, ọmọ ohwo, ka oka họ idhere ivẹ nọ ọgbọdọ ovie Babilọn ọ te rọ nyaze. Ẹkwotọ ọvona idhere ivẹ na i ti no ze, yọ who re fi ọkpọ oka* jọ họ oria nọ idhere ivẹ na e rọ wẹriẹ kpohọ ikpewho ivẹ na. 20 Whọ rẹ ka oka họ edhere jọ nọ ọgbọdọ na ọ te rọ nyae họre Raba+ ọrọ ahwo Ammọn, edhere ọdekọ ọ te jọ ọnọ ọ te rọ nyae họre Jerusalẹm+ nọ a di ogba wariẹ họ* evaọ Juda. 21 Keme ovie Babilọn o dikihẹ re ọ gbẹva evaọ ada-edhere na, evaọ oria nọ idhere ivẹ na e jọ ghale oma kpohọ ọvuọ oboriẹ na. O bi nuhu ese na. Ọ be nekpẹ mi emedhọ riẹ;* ọ be kiẹ edhẹ* na riwi. 22 Okwakwa ẹva-ọgba nọ o rrọ obọ obọze riẹ u bi rri obọ Jerusalẹm, re ọ ruẹrẹ ite-ire nọ a re ro zurie ugbẹhẹ fihọ otọ họ, re ọ kẹ udu nọ a kpe ahwo, re o bo ubo ẹmo, re ọ ruẹrẹ ite-ire nọ a re ro zurie inuethẹ na fihọ otọ họ, re ọ ma ugbuhru ro koi họ, jẹ ma ugbẹhẹ ro koi họ.+ 23 Rekọ o te jọ wọhọ ẹva-ọgba ọrue evaọ ẹro enọ* i lele i rai duwu iyei.+ Rekọ ọ te kareghẹhọ abe-ọriọ rai, o ve ti mu ai.+

24 “Fikiere enẹ Jihova Olori nọ Ọ Mai Kpehru na ọ ta: ‘Wha ru nọ a rọ kareghẹhọ abe-ọriọ rai ẹkwoma iruthọ rai nọ wha bẹre via, je ru nọ a be rọ ruẹ izieraha rai evaọ eware kpobi nọ wha bi ru. Enẹna nọ a kareghẹhọ owhai no na, a te rọ obọ ogaga mu owhai.’*

25 “Rekọ ẹdẹ ra ọ ze no, O whẹ osu omuomu Izrẹl nọ ọ nwoma gaga na,+ oke nọ a te rọ kẹ owhẹ uye urere ra o ze no. 26 Enẹ Jihova Olori nọ Ọ Mai Kpehru na ọ ta: ‘Tọlọ etu-udhọfọ na no, re whọ ba etu-uvie na no.+ Onana o te gbẹ jọ epọvo na ha.+ Kpare ọnọ o kpotọ na kpehru,+ re who hrẹ ọnọ o kpehru na kpotọ.+ 27 Oware nọ o raha no, oware nọ o raha no, oware nọ o raha no me ti ru ei fihọ. Yọ ohwo ọvo o ti woi hi, bẹsenọ ọnọ o wo udu na ọ te nyaze,+ mẹ vẹ te rehọ iẹe kẹe.’+

28 “Rọkẹ owhẹ, ọmọ ohwo, ruẹaro re whọ ta nọ, ‘Enẹ Jihova Olori nọ Ọ Mai Kpehru na ọ ta kpahe ahwo Ammọn gbe eme ekela rai.’ Ta nọ, ‘Ọgbọdọ jọ! A yolo ọgbọdọ jọ lahwe no kẹ ikpakpe; a ririe i rie fihọ nwranwranwra re o kpe ọvo je lo wọhọ elo agbrara. 29 Ghelọ eruẹaruẹ erue gbe ẹva ọrue nọ a gba kpahe owhẹ na, a te kwa owhẹ kokohọ fihọ ehru enọ a kpe na,* koyehọ ezae imuomu nọ ẹdẹ rai ọ ze no na evaọ oke nọ a te rọ kẹ ae uye urere rai. 30 Zihe ọgbọdọ na fihọ owa riẹ. Me ti gu owhẹ ẹdhọ evaọ oria nọ a jọ ma owhẹ, evaọ ẹkwotọ nọ a jọ yẹ owhẹ. 31 Me ti ku evedha mẹ ku owhẹ. Me ti fou erae ofu ọgaga mẹ fihọ ehru ra, yọ mẹ te rehọ owhẹ kẹ ezae egeva, ewena ọraha.+ 32 Who ti zihe ruọ ire erae na;+ a ti kpe azẹ ra evaọ ẹkwotọ na, yọ a gbẹ te kareghẹhọ owhẹ ofa ha, keme mẹ omamẹ, Jihova, mẹ ta riẹ no.’”

22 Ẹme Jihova ọ tẹ wariẹ bru omẹ ze, inọ: 2 “Rọkẹ owhẹ, ọmọ ohwo, kọ whọ ruẹrẹ oma kpahe no re who bruoziẹ* okpẹwho nọ ọ reabe azẹ na,+ re who je dhesẹ eware etọtọ kpobi nọ o bi ru kẹe?+ 3 Whọ rẹ ta nọ, ‘Enẹ Jihova Olori nọ Ọ Mai Kpehru na ọ ta: “O okpẹwho nọ a be jọ eva riẹ kpe azẹ,+ ọnọ oke riẹ o be tha,+ ọnọ o bi ru emedhọ etọtọ* ro zue omariẹ oma,+ 4 azẹ-okpe ra o ru owhẹ reabe no,+ emedhọ etọtọ ra i te je ru owhẹ fihọ ọnọ ọ fo ho no.+ Who ru nọ urere edẹ ra o be rọ tha kpata kpata, yọ urere ikpe ra o ze no. Oyejabọ nọ me ti ro ru owhẹ fihọ oware ekela kẹ erẹwho na gbe oware ijehwẹ kẹ ekwotọ na kpobi na.+ 5 Ekwotọ nọ e kẹle owhẹ gbe enọ i thabọ no owhẹ a te rọ owhẹ jijehwẹ,+ whẹ ọnọ odẹ riẹ o rrọ ọnọ ọ fo ho gbe ọnọ ozighi ọ vọ eva riẹ na. 6 Rri! Omomọvo isu Izrẹl nọ e rrọ eva ra ọ be rọ udu-esuo riẹ ro kpe azẹ.+ 7 A be jọ eva ra rri ọsẹ rai gbe oni rai vo.+ A re fi ọrara nọ ọ be rria udevie rai iwhayo, je gboja kẹ ọmọ nọ o wo ọsẹ hẹ* gbe aye-uku.”’”+

8 “‘Wha be jẹ eria ọrẹri mẹ kufiẹ, je bi zue edijala mẹ.+ 9 Ahwo ọtaraha nọ a gba riẹ mu nọ a re kpe azẹ a rrọ eva ra.+ A be jọ eva ra re eware nọ a ro dhe idhe evaọ ehru igbehru na, a tẹ jẹ be jọ eva ra ru uruemu otọtọ.+ 10 Emọ e be jọ eva ra zue ehwa ọsẹ rai,*+ yọ a re lele aye nọ ọ fo ho nọ ọ rrọ oke riẹ wezẹ.+ 11 Ọzae ọ be jọ eva ra lele aye ọrivẹ riẹ ru eware etọtọ,+ ọfa ọ be rọ uruemu otọtọ zue aye ọmọ riẹ oma,+ yọ ọfa o bi lele oniọvo-ọmọtẹ riẹ wezẹ, ọmọtẹ ọsẹ obọriẹ.+ 12 A be jọ eva ra re udi re a kpe azẹ.+ Who bi momo kẹ ahwo avọ isuo+ hayo re who wo erere,* yọ who bi fru igho mi erivẹ ra.+ Ẹhẹ, mẹ thọrọ owhẹ ẹro no riẹriẹriẹ,’ ere Jihova Olori nọ Ọ Mai Kpehru na ọ ta.

13 “‘Rri! Mẹ be rọ evedha tehe abọ mẹ fiki erere ewhariọ nọ who wo no gbe fiki iruẹru azẹ-okpe nọ e rrọ eva ra. 14 Kọ whọ gbẹ te gudu* je gbe kru obọ ga evaọ oke nọ me ti dhesẹ akpọ kẹ owhẹ?+ Mẹ omamẹ, Jihova, mẹ ta riẹ no, yọ me ti ru oware jọ. 15 Mẹ te vaha owhẹ fihọ udevie erẹwho na jẹ vaha owhẹ fihọ udevie ekwotọ na,+ me ve ti ru egbegbe ra serihọ.+ 16 A ti si ọghọ no owhẹ oma evaọ iraro erẹwho na, whọ vẹ te riẹ nọ mẹ họ Jihova.’”+

17 Ẹme Jihova ọ tẹ wariẹ bru omẹ ze, inọ: 18 “Ọmọ ohwo, uwou Izrẹl u zihe ruọ ekagba nọ i fioka ha kẹ omẹ no. Aikpobi yọ ekọpa, itini,* ayọno gbe elẹdi nọ e rrọ eva umuwou-erae. A zihe ruọ ekagba isiliva no.+

19 “Fikiere enẹ Jihova Olori nọ Ọ Mai Kpehru na ọ ta: ‘Fikinọ whai kpobi wha zihe ruọ ekagba nọ i fioka ha no,+ mẹ be kwa owhai kokohọ eva Jerusalẹm. 20 Nwane wọhọ epanọ a rẹ kwa isiliva, ekọpa, ayọno, elẹdi gbe itini fihọ eva umuwou-erae re a ruẹsi fou erae họ ae e vẹ ghra na, ere mẹ te rọ evedha mẹ avọ ofu ọgaga mẹ kwa owhai kokohọ, me ve ti fou erae họ owhai, wha vẹ ghra no.+ 21 Me ti koko owhai họ, me ve ti fou erae ofu ọgaga mẹ fihọ ehru rai,+ wha vẹ te ghra no evaọ eva riẹ.+ 22 Nwane wọhọ epanọ a rẹ ghra isiliva evaọ umuwou-erae na, ere a te ghra owhai evaọ eva riẹ; wha vẹ te riẹ nọ mẹ omamẹ, Jihova, me ku ofu ọgaga mẹ ku owhai no.’”

23 Ẹme Jihova ọ tẹ wariẹ bru omẹ ze, inọ: 24 “Ọmọ ohwo, ta kẹe nọ, ‘Whẹ yọ ẹkwotọ nọ a ti ru fo ho hayo nọ oso ọ te rrọ ku hu evaọ ẹdẹ evedha. 25 Eruẹaro riẹ e jọ eva riẹ lẹlẹ gba ẹgwae omuomu,+ wọhọ okpohrokpo nọ o bi do enu nọ ọ be za arao nọ o kpe.+ A be re ahwo* no. A be kwa ekwakwa-aghae gbe eware eghaghae rehọ. A ru ibuobu fihọ eyae-uku no evaọ eva riẹ. 26 Izerẹ riẹ e raha uzi mẹ no,+ yọ a gbe bi gbe eria ọrẹri mẹ ku.+ A bi fi ohẹriẹ họ oware ọrẹri avọ oware gheghe he,+ yọ a bi wuhrẹ ahwo ho re a riẹ oware nọ o fo ho gbe oware nọ o fo,+ a be rọwo koko edijala mẹ hẹ, yọ a jọ udevie rai gbe omẹ ku no. 27 Ikpahwo-esuo riẹ nọ e rrọ eva riẹ e wọhọ ijera nọ e be za arao nọ a kpe; a re kpe azẹ je kpe ahwo* ro wo erere ewhariọ.+ 28 Rekọ eruẹaro riẹ e rehọ ọda ọfuafo ralọ iruẹru rai ruru no. A be ruẹ eruẹaruẹ erue jẹ be gbẹva ọrue,+ yọ a be ta nọ: “Enẹ Jihova Olori nọ Ọ Mai Kpehru na ọ ta,” kpakiyọ Jihova omariẹ ọ ta ẹme ọvo ho. 29 Ahwo ẹkwotọ na a fi ahwo iwhayo je tho eware ahwo,+ a gboja kẹ ọnọ ọbẹwẹ ọ rrọ oma gbe oyogbe, a te je fi ọrara nọ ọ be rria udevie rai iwhayo, yọ a rọwo bru uvioziẹ kẹe he.’

30 “‘Mẹ jẹ jọ udevie rai gwọlọ ọzae nọ ọ rẹ sae ruẹrẹ ugbẹhẹ itho na hayo dikihẹ oria nọ u kporo na evaọ aro mẹ rọkẹ ẹkwotọ na, re a gbẹ raha iẹe no ho,+ rekọ mẹ ruẹ uvumọ ohwo ho. 31 Fikiere me ti ku evedha mẹ ku ai jẹ rehọ erae ofu ọgaga mẹ kpe ai muotọ. Me ti ru re eware nọ i no idhere rai ze i hwẹ ku uzou obọrai,’ ere Jihova Olori nọ Ọ Mai Kpehru na ọ ta.”

23 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, eyae ivẹ jọ e jariẹ nọ oni ọvo o yẹ.+ 3 A zihe ruọ igberẹ evaọ obọ Ijipti;+ no anwọ oke uzoge rai ze a je ro bru igberẹ. A jẹ duọ ivie rai evaọ obei, yọ a jẹ rọ abọ whrawhra igbama rai nọ e re te riẹ ọzae he. 4 Edẹ rai họ Ohola,* ọrọ ọkpako, oniọvo-ọmọtẹ riẹ kọ Oholiba.* A zihe ruọ emẹ, a te yẹ emezae gbe emetẹ. Rọ kpahe edẹ rai na, Ohola họ Sameria,+ Oholiba kọ Jerusalẹm.

5 “Ohola o te mu igberẹ họ ebru+ avọ epanọ ọ rọ rrọ ọmẹ na. Ọ rọ isiuru egaga dhẹ lele ese riẹ,+ ahwo Asiria nọ a gbẹ rrọ okegbe.+ 6 A jọ eba nọ e rehọ iwu ekọlọ iburu gọ ẹgọ gbe ethabọ isu, koyehọ uvi emoha kpobi nọ e be dhẹ enyenya rai. 7 Ọ ruabọhọ je lele emezae Asiria kpobi nọ e mai wo erru bru igberẹ, ọ tẹ jẹ rehọ emedhọ etọtọ* ahwo nọ ọ jẹ dhẹ lele na zue omariẹ.+ 8 O siobọno igberẹ nọ o je bru evaọ obọ Ijipti hi, keme a lele i rie wezẹ evaọ oke uzoge riẹ, yọ a jẹ rọ abọ whrawhra igbama riẹ nọ e re te riẹ ọzae he, a jẹ rọ ọwhọ ọgaga lele iei wezẹ.+ 9 Fikiere mẹ tẹ rehọ iẹe họ obọ ese riẹ, emezae Asiria+ nọ ọ jẹ dhẹ lele na. 10 A tẹ bae fihọ+ je mu emezae gbe emetẹ riẹ,+ a tẹ rọ ọgbọdọ kpei. O zihe ruọ aye nọ ọ mai yoma evaọ udevie eyae, a tẹ kẹe uye oziẹ nọ a brukpei.

11 “Nọ Oholiba oniọvo-ọmọtẹ riẹ ọ ruẹ oware nọ o via, isiuru egaga riẹ kẹ owezẹ ọzae-avọ-aye i te tube yoma viere, igberẹ-ibro riẹ i te yoma vi erọ oniọvo-ọmọtẹ riẹ.+ 12 Ọ rọ isiuru egaga dhẹ lele emezae Asiria nọ a gbẹ rrọ okegbe,+ eba na avọ ethabọ isu na nọ i ku iwu iwowoma họ jẹ be dhẹ enyenya—uvi emoha kpobi. 13 Okenọ o zue omariẹ, mẹ tẹ ruẹ nọ edhere ọvona aimava a lele.+ 14 Rekọ ọ ruabọhọ je fiba iruẹru igberẹ-ibro riẹ. Ọ jọ ugbẹhẹ na ruẹ iwoho ezae nọ a kare fihọ iẹe, emema ahwo Kaldia nọ a kare jẹ rehọ ọda ọwawae ralọ, 15 a rehọ imueku mu eku rai, avọ itu-udhọfọ irereghe nọ e rrọ uzou rai, oma rai o wọhọ orọ egbaẹmo, whọ tẹ ruẹ aikpobi whọ rẹ riẹ nọ ahwo Babilọn a rrọ, enọ a yẹ evaọ ẹkwotọ ahwo Kaldia. 16 Nọ ọ nwane ruẹ e rai, o te wo isiuru egaga kẹ ae, o te vi enyukọ bru ai evaọ obọ Kaldia.+ 17 Fikiere emezae Babilọn e tẹ be nyaze obọ ehwa riẹ re a lele iei wezẹ, a tẹ rọ isiuru egaga* rai zue ei oma. Nọ a zue ei oma no, ọ tẹ nyasiọ ae ba fikinọ a bi tu ei oma.

18 “Nọ ọ ruabọhọ bi bru igberẹ ababọ omovuọ je bi kpe ẹba riẹ fihọ,+ mẹ tẹ nyasiọ iẹe ba fikinọ o bi tu omẹ oma, nwane wọhọ epanọ mẹ* nyasiọ oniọvo-ọmọtẹ riẹ ba fikinọ o bi tu omẹ oma na.+ 19 Yọ ọ ruabọhọ je ru iruẹru igberẹ-ibro riẹ dhe ebuebu,+ be kareghẹhọ oke uzoge riẹ nọ o je gbe-ọfariẹ evaọ ẹkwotọ Ijipti.+ 20 Ọ jẹ dhẹ lele ae wọhọ ese ezae nọ ẹba* rai ọ wọhọ ọrọ eketekete gbe anyenya. 21 Uruemu otọtọ nọ who je ru okenọ whọ jọ uzoge evaọ obọ Ijipti+ u je si owhẹ urru, okenọ a jẹ rọ abọ whrawhra igbama ra, ivie nọ who wo evaọ oke uzoge.+

22 “Fikiere Oholiba, enẹ Jihova Olori nọ Ọ Mai Kpehru na ọ ta: ‘Rri, me bi fi ọwhọ họ ese ra oma,+ enọ whọ nyaseba fikinọ a bi tu owhẹ oma na, yọ mẹ te rehọ ae no ofẹ kpobi ze rọsuọ owhẹ,+ 23 emezae Babilọn+ gbe ahwo Kaldia kpobi,+ ezae Pikọd+ gbe Shoa gbe Koa, avọ emezae Asiria kpobi. Aikpobi yọ uvi emoha, eba gbe ethabọ isu, egbaẹmo gbe enọ a salọ,* aikpobi a be dhẹ enyenya. 24 A te họre owhẹ avọ ekẹkẹ ẹmo nọ i wo etẹ nọ i bi ru edo, avọ egbaẹmo buobu, ojese ulogbo avọ ojese osese* gbe etu-ọgaga. A ti dikihẹ wariẹ owhẹ họ, yọ mẹ te kẹ ae udu re a bruoziẹ, a ve ti bruoziẹ ra wọhọ epanọ u kiehọ ae oma.+ 25 Me ti mu ofu kẹ owhẹ, a vẹ te rọ ofu ọgaga dhesẹ akpọ kẹ owhẹ. A ti bru unwe ra avọ ezọ ra no, a vẹ te rọ ọgbọdọ kpe ahwo ra nọ a kiọkọ no. A te rehọ emezae ra gbe emetẹ ra vrẹ, erae e vẹ te mahe ahwo ra nọ a kiọkọ muotọ.+ 26 A te ba iwu ra no owhẹ oma+ je mi owhẹ eware osẹ* iwowoma ra na.+ 27 Me ti ru uruemu otọtọ ra avọ igberẹ-ibro ra serihọ,+ onọ u muhọ evaọ obọ ẹkwotọ Ijipti na.+ Who gbe ti rri rai hi, yọ whọ gbẹ te kareghẹhọ Ijipti ofa ha.’

28 “Keme enẹ Jihova Olori nọ Ọ Mai Kpehru na ọ ta: ‘Rri, mẹ be te rehọ owhẹ họ obọ enọ who mukpahe na, enọ whọ nyaseba fikinọ a bi tu owhẹ oma.+ 29 A te rọ omukpahọ dhesẹ akpọ kẹ owhẹ, a vẹ te rehọ eware kpobi nọ whọ ruẹ uye fihọ vrẹ,+ a vẹ nyasiọ owhẹ ba ẹbẹba ababọ ewu nọ ọ rrọ owhẹ oma. A ti kpe ẹba ra nọ who je ro gbe-ọfariẹ na gbe uruemu otọtọ ra gbe igberẹ-ibro ra fihọ.+ 30 A ti ru owhẹ eware nana fikinọ whọ jẹ dhẹ lele erẹwho na wọhọ ogberẹ,+ keme whọ rehọ emema etọtọ rai zue oma ra.+ 31 Edhere ọvona nọ oniọvo-ọmọtẹ ra o lele who lele re,+ yọ me ti fi egho riẹ họ obọ ra.’+

32 “Enẹ Jihova Olori nọ Ọ Mai Kpehru na ọ ta:

“Keme mẹ omamẹ mẹ ta riẹ no,” ere Jihova Olori nọ Ọ Mai Kpehru na ọ ta.’

35 “Fikiere enẹ Jihova Olori nọ Ọ Mai Kpehru na ọ ta: ‘Fikinọ mẹ thọrọ owhẹ ẹro no, whọ tẹ jẹ jẹ omẹ kufiẹ riẹriẹriẹ na,*+ whọ te ruẹ uye eware nọ i no uruemu otọtọ ra gbe iruẹru igberẹ-ibro ra ze.’”

36 Kẹsena Jihova ọ tẹ ta kẹ omẹ nọ: “Ọmọ ohwo, kọ who ti bruoziẹ Ohola avọ Oholiba+ je dhesẹ iruẹru etọtọ rai kẹ ae? 37 A bruẹnwae no,*+ yọ azẹ ọ rrọ abọ rai. Orọnikọ a lele emedhọ etọtọ rai bruẹnwae ọvo ho, rekọ a mahe emezae rai nọ a yẹ kẹ omẹ re evaọ erae re e jọ emuore kẹ emedhọ rai.+ 38 U te no ere no, oware nọ a ru omẹ ona: A zue aruẹri mẹ evaọ ẹdẹ yena, a te je zue edijala mẹ. 39 Nọ a kpe emezae rai ro dhe idhe kẹ emedhọ etọtọ rai no,+ a tẹ nyaze ti zue aruẹri mẹ+ evaọ ẹdẹdẹ yena. Ere a ru evaọ obeva uwou mẹ. 40 A tube vi ọnyukọ re ọ nyai se ezae no ugbothabọ ze.+ Okenọ a jẹ nyaze, whọ tẹ họ jẹ rọ isiaro si ibiaro ra fihọ, whọ tẹ rọ eware osẹ whẹ erru họ omara.+ 41 Whọ tẹ keria akaba ologbo+ avọ emẹjẹ nọ ọ rrọ aro riẹ,+ onọ who fi insẹnse mẹ+ avọ ewhri mẹ họ.+ 42 A jọ etẹe je yo edo ogbotu ezae nọ e be ruawa oware ovo ho, enọ egba-idi nọ a rehọ no obọ udhude na ze e jọ usu rai. A fi ifiare họ abọ eyae na je ku itu-uvie iwowoma họ uzou rai.

43 “Kẹsena mẹ tẹ ta kpahe ọnọ ọ rehọ ẹnwae-obro raha omariẹ no na nọ: ‘Enẹna ọ te ruabọhọ igberẹ-ibro riẹ.’ 44 Fikiere a tẹ be nyabru ei, nwane wọhọ epanọ a rẹ nyabru ogberẹ na. Ere a jẹ nyabru Ohola gbe Oholiba, eyae nọ i wo uruemu otọtọ na. 45 Rekọ ezae ikiẹrẹe i ti bruoziẹ riẹ wọhọ epanọ u fo ohwo nọ o bruẹnwae+ je kpe azẹ;+ keme ibruẹnwae a rrọ, azẹ ọ tẹ jẹ rrọ abọ rai.+

46 “Keme enẹ Jihova Olori nọ Ọ Mai Kpehru na ọ ta: ‘A te rehọ ogbaẹmo jọ ze rọsuọ ae re u ru ai fihọ oware idudu gbe oware nọ a rẹ kwa rehọ.+ 47 Ogbaẹmo na o te rọ itho fi ai+ jẹ rehọ egbọdọ rai gbẹre ai fihọ otọ. A ti kpe emezae gbe emetẹ rai,+ a vẹ rọ erae mahe iwou rai.+ 48 Me ti ru uruemu otọtọ nọ o rrọ ẹkwotọ na serihọ, eyae na kpobi i ve ti wuhrẹ oware jọ, re a gbẹ rọ aro kele uruemu otọtọ rai hi.+ 49 A ti ru owhai ruẹ uye eware nọ i no uruemu otọtọ rai ze gbe izi nọ wha raha ẹkwoma emedhọ etọtọ rai nọ wha jẹ gọ; wha vẹ te riẹ nọ mẹ họ Jihova Olori nọ Ọ Mai Kpehru na.’”+

24 Ẹme Jihova ọ tẹ wariẹ bru omẹ ze evaọ ukpe avọ izii, evaọ amara avọ ikpe, evaọ ẹdẹ avọ ikpe amara na, inọ: 2 “Ọmọ ohwo, kere ẹdẹ nana* fihọ otọ, uzedhe ẹdẹ inẹnẹ na. Ovie Babilọn o mu Jerusalẹm họ ẹhọre no evaọ uzedhe ẹdẹ inẹnẹ na.+ 3 Bru ohare jọ kpahe uwou ọwọsuọ na, whọ rẹ ta kpahe ae nọ:

“‘Enẹ Jihova Olori nọ Ọ Mai Kpehru na ọ ta:

“Rehọ uwho* na there; wọe fihọ erae na re who ku ame họ eva riẹ.+

 5 Rehọ ogodẹ nọ ọ mai woma evaọ uthuru na+ re who koko ite-ire họ otọ uwho na wariẹ họ.

There ekẹ erao na re whọ jọ eva riẹ there igbenwa na.”’

6 “Fikiere enẹ Jihova Olori nọ Ọ Mai Kpehru na ọ ta:

‘Uye u te okpẹwho azẹ-okpe na,+ uwho nọ u mu ekagba na, onọ a ri si ekagba riẹ no ho na!

Tọlọ ekẹ erao na kpobi noi ọvuọvo;+ whọ rẹ ma ẹta fiki rai hi.

 7 Keme azẹ riẹ ọ rrọ udevie riẹ;+ o ku rie fihọ ehru utho uriorio na.

O ku rie fihọ otọ họ, re o nwo ẹkpẹ ruru iei.+

9 “Fikiere enẹ Jihova Olori nọ Ọ Mai Kpehru na ọ ta:

‘Uye u te okpẹwho azẹ-okpe na!+

Mẹ te kwa ire na fihọ ehru ohwohwo kpekpehru.

Egbegbe riẹ ọ te ghra no oma riẹ,+ ekagba riẹ e vẹ te ghra no.

Gbolo iei fihọ erae avọ ekagba riẹ na!’

13 “‘Uruemu otọtọ ra o wha egbegbe ra ze.+ Mẹ daoma re me ru owhẹ fo, rekọ whọ be sae fo no egbegbe ra ha. Whọ te fo ho bẹsenọ ofu nọ me bi mu kẹ owhẹ o re hrẹ no.+ 14 Mẹ omamẹ, Jihova, mẹ ta riẹ no. U ti rugba. Me ti ru oware jọ ababọ oma nọ me ti si kpemu, ababọ uweri, ababọ ẹda nọ o te da omẹ.+ A ti gu owhẹ ẹdhọ wọhọ epaọ idhere ra gbe iruẹru ra,’ ere Jihova Olori nọ Ọ Mai Kpehru na ọ ta.”

15 Ẹme Jihova ọ tẹ wariẹ bru omẹ ze, inọ: 16 “Ọmọ ohwo, mẹ be te rehọ ọghaghae ra vrẹ siọ owhẹ ba idudhe.+ Who re weri hi;* yọ whọ rẹ viẹ hẹ hayo kọ irui-oviẹ i re su no owhẹ aro ze he. 17 Who re dimẹ fihọ eva, yọ who re ru iruẹru uweri rọkẹ ọnọ o whu na ha.+ Gba etu-udhọfọ ra fihọ uzou,+ re who fi eviẹ ra họ.+ Who re ruru eto-enu* ra ha,+ yọ whọ rẹ re ebrẹdi nọ amọfa a rehọ se owhẹ hẹ.”*+

18 Mẹ ta ẹme kẹ ahwo na evaọ ohiohiẹ, aye mẹ o te whu evaọ owọwọ. Fikiere evaọ ohiohiẹ okiokiọ riẹ me te ru epanọ a jie uzi riẹ kẹ omẹ na dẹẹ. 19 Ahwo na a jẹ ta kẹ omẹ nọ: “Kọ whọ gbẹ vuẹ omai epanọ eware nana nọ who bi ru na i ro kiekpahe omai?” 20 Mẹ tẹ kẹ ae uyo nọ: “Ẹme Jihova o bru omẹ ze, inọ, 21 ‘Ta kẹ uwou Izrẹl nọ: “Enẹ Jihova Olori nọ Ọ Mai Kpehru na ọ ta, ‘Me bi ti zue aruẹri mẹ,+ onọ o be kẹ owhai orro gaga na, oware nọ o rrọ ghaghae kẹ owhai jẹ rrọ isiuru udu rai na. A te rọ ọgbọdọ kpe emezae gbe emetẹ obọrai nọ wha nyaseba na no.+ 22 Kẹsena wha ve ti ru epanọ me ru na dẹẹ. Wha ti ruru eto-enu rai hi, yọ wha te re ebrẹdi nọ amọfa a rehọ se owhai hi.+ 23 Itu-udhọfọ rai e te jọ uzou rai, yọ eviẹ rai e te jọ awọ rai. Wha ti weri hayo viẹ hẹ. Ukpoye, wha ti gbo kufiẹ fiki oruthọ rai,+ wha ve ti dimẹ kẹ ohwohwo. 24 Izikiẹl o zihe ruọ oka kẹ owhai no.+ Nwane epanọ o ru na, ere wha ti ru re. Okenọ o tẹ via no, wha vẹ te riẹ nọ mẹ họ Jihova Olori nọ Ọ Mai Kpehru na.’”’”

25 “Rọkẹ owhẹ, ọmọ ohwo, evaọ ẹdẹ nọ mẹ te rehọ oria adhẹzọ rai mi ai—oware erru nọ o be kẹ ae oghọghọ na, oware nọ o rrọ ghaghae kẹ ae jẹ rrọ isiuru udu rai na—jegbe emezae avọ emetẹ rai na,+ 26 ọnọ ọ dhẹ vabọ ọ rẹ te niyẹrẹ kẹ owhẹ.+ 27 Evaọ ẹdẹ yena who ti rovie unu ra whọ vẹ ta ẹme kẹ ọnọ ọ dhẹ vabọ na, who gbe ti fibo ho.+ Who ti zihe ruọ oka rọkẹ ae, a vẹ te riẹ nọ mẹ họ Jihova.”

25 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, rẹriẹ ovao ku ahwo Ammọn+ re whọ ruẹaro oware nọ o te via kẹ ae.+ 3 Whọ rẹ ta kpahe ahwo Ammọn hrọ inọ, ‘Wha yo ẹme nọ Jihova Olori nọ Ọ Mai Kpehru na ọ ta. Enẹ Jihova Olori nọ Ọ Mai Kpehru na ọ ta: “Fikinọ whọ ta nọ ‘oye u woma!’ kpahe aruẹri mẹ evaọ okenọ a zue ei na, jẹ ta ere kpahe ẹkwotọ Izrẹl evaọ okenọ o jọ ofofe, gbe uwou Juda evaọ okenọ a ro kpohọ igbo na, 4 mẹ be rehọ owhẹ kẹ ahwo obọ Ovatha-Ọre na re a wo owhẹ. A te fa ivuẹ rai* fihọ eva ra jẹ rọ iwou-udhu rai vi evaọ udevie ra. A te re ibi-ire ra jẹ da ame-ivie ra. 5 Me ti ru Raba+ fihọ otọ nọ ekamẹle e rẹ jọ re ẹbe, je ru ẹkwotọ ahwo Ammọn fihọ oria eriosehọ rọkẹ uthuru erao na; wha vẹ te riẹ nọ mẹ họ Jihova.”’”

6 “Keme enẹ Jihova Olori nọ Ọ Mai Kpehru na ọ ta: ‘Fikinọ whọ tehe abọ ra+ jẹ rọ awọ ra fotọ, whọ tẹ jẹ ghọghọ fiki ẹkwotọ Izrẹl avọ oma ẹkoko ọgaga otiọye na,+ 7 mẹ te rriẹ obọ mẹ rọsuọ owhẹ re mẹ rọ owhẹ kẹ erẹwho na wọhọ oware nọ a rẹ kwa rehọ. Me ti kpe owhẹ kufiẹ no udevie ahwo na jẹ raha owhẹ no udevie ekwotọ na.+ Mẹ te raha owhẹ muotọ, whọ vẹ te riẹ nọ mẹ họ Jihova.’

8 “Enẹ Jihova Olori nọ Ọ Mai Kpehru na ọ ta: ‘Fikinọ Moab+ avọ Siya+ a ta nọ, “Rri! Uwou Juda o wọhọ erẹwho edekọ na kpobi,” 9 me bi kpe abotọ* Moab fihọ evaọ abọ ikpewho nọ e rrọ uwhru riẹ, onọ o rrọ erru* ẹkwotọ riẹ, Bẹt-jẹshimọt, Bale-miọn, je rite obọ Kiriateyẹm.+ 10 Mẹ te rehọ iẹe avọ ahwo Ammọn kẹ ahwo obọ Ovatha-Ọre na re a woi,+ re a gbẹ jọ udevie erẹwho na kareghẹhọ ahwo Ammọn ho.+ 11 Me ti ru Moab oware nọ me bruoziẹ riẹ kpahe iẹe,+ a vẹ te riẹ nọ mẹ họ Jihova.’

12 “Enẹ Jihova Olori nọ Ọ Mai Kpehru na ọ ta: ‘Edọm o ru uwou Juda kele, ọ tẹ reabe ologbo fikinọ o ru rai kele;+ 13 fikiere enẹ Jihova Olori nọ Ọ Mai Kpehru na ọ ta: “Mẹ te rriẹ obọ mẹ rọsuọ Edọm re, me ve ti kpe te ohwo te erao noi no, me ve ti ru ei fihọ ofofe.+ Ọgbọdọ o ti kpe ai no Timan rite obọ Didan.+ 14 ‘Ẹkwoma obọ ahwo mẹ Izrẹl me ti ro ru Edọm kele.+ A te rehọ ofu mẹ gbe evedha mẹ te Edọm, re a ruẹ orukele mẹ,’+ ere Jihova Olori nọ Ọ Mai Kpehru na ọ ta.”’

15 “Enẹ Jihova Olori nọ Ọ Mai Kpehru na ọ ta: ‘Fiki omukpahọ rai nọ o bi kuhọ họ, ahwo Filistia a rọ eva iyoma gwọlọ epanọ a re ro ru orukele jẹ wha ọraha ze.+ 16 Fikiere enẹ Jihova Olori nọ Ọ Mai Kpehru na ọ ta: “Rri, mẹ be rriẹ obọ mẹ rọsuọ ahwo Filistia na,+ me ti kpe ahwo Kẹrẹt+ na kufiẹ jẹ raha ahwo nọ a kiọkọ nọ a be rria akotọ abade na no.+ 17 Mẹ te rọ eware ilogbo ro ru ai kele avọ iye egaga nọ mẹ te kẹ ae, nọ me te ru ai kele no, a vẹ te riẹ nọ mẹ họ Jihova.”’”

26 Evaọ ukpe avọ ikpegbọvo, evaọ ẹdẹ ọsosuọ amara na, ẹme Jihova o te bru omẹ ze, inọ: 2 “Ọmọ ohwo, fikinọ Taya ọ ta kpahe Jerusalẹm nọ,+ ‘Oye u woma! A raha unuẹthẹ nọ ahwo na a rẹ rọ ruọ eva na no!+ Oware kpobi u ti bru omẹ ze, me ve ti fe enẹna nọ a raha iẹe no na’; 3 fikiere enẹ Jihova Olori nọ Ọ Mai Kpehru na ọ ta: ‘Rri, mẹ te rọsuọ owhẹ, O Taya, yọ mẹ te rehọ erẹwho buobu ze te rọsuọ owhẹ, nwane wọhọ epanọ ẹkporo abade ọ rẹ wọ ze na. 4 A te raha igbẹhẹ Taya je kporo iwou ikpehru riẹ fihọ otọ,+ yọ mẹ te fọrọ ẹkpẹ noi je ru ei fihọ utho uriorio nọ u bi lo. 5 O ti zihe ruọ oria nọ a rẹ rriẹ esakrosa fihọ re e ya evaọ udevie abade na.’+

“‘Keme mẹ omamẹ mẹ ta riẹ no,’ ere Jihova Olori nọ Ọ Mai Kpehru na ọ ta, ‘o ti zihe ruọ oware nọ erẹwho na e te kwa rehọ. 6 Yọ a te rọ ọgbọdọ kpe ahwo nọ a rrọ iwhre* riẹ nọ e wariẹ e riẹ họ, ahwo a vẹ te riẹ nọ mẹ họ Jihova.’

7 “Enẹ Jihova Olori nọ Ọ Mai Kpehru na ọ ta: ‘Rri, mẹ be rehọ Nebukadneza* ovie Babilọn no obọ ẹkpẹlobọ ovatha-ọre ze te rọsuọ Taya;+ ovie ivie ọ rrọ,+ o wo enyenya,+ ekẹkẹ ẹmo,+ egbaẹmo nọ e be dhẹ enyenya, gbe ogbaẹmo nọ u wo isoja* buobu. 8 Ọ te rọ ọgbọdọ raha iwhre ra nọ e wariẹ owhẹ họ, yọ ọ te ma ugbẹhẹ jẹ ma ugbuhru ro ko owhẹ họ jẹ kpare ojese ulogbo rọsuọ owhẹ. 9 Ọ te rehọ ite-ire riẹ nọ a re ro zurie ugbẹhẹ fihọ otọ* duwu igbẹhẹ ra, ọ vẹ rehọ iwhe* riẹ kporo iwou ikpehru ra fihọ otọ. 10 Enyenya riẹ i ti bu te epanọ ovu rai o ti ro ruru owhẹ, yọ edo egbaẹmo riẹ nọ e be dhẹ enyenya, etẹ na, gbe ekẹkẹ na i ti ru igbẹhẹ ra nuhu okenọ ọ te ruọ eva inuethẹ ra, wọhọ ezae nọ i bi thihi ruọ okpẹwho nọ igbẹhẹ riẹ i kporo no. 11 Ekothawọ enyenya riẹ i ti thihi iyẹrẹ ra kpobi nyaotọ;+ ọ te rọ ọgbọdọ kpe ahwo ra, yọ ipila ilogbo ra i ti kporo fihọ otọ. 12 A ti tho ekwakwa efe ra, kwa eware eki ra rehọ,+ kporo igbẹhẹ ra fihọ otọ, je zurie iwou iwowoma ra fihọ otọ; kẹsena a ve ti gbolo itho ra gbe eware ra nọ whọ rọ ire ru gbe ẹkpẹ ra fihọ ame na.’

13 “‘Me ti ru edo ile ra serihọ, yọ a gbe ti yo edo ekpata ra ofa ha.+ 14 Me ti ru owhẹ fihọ utho uvevẹ nọ u bi lo, who ve ti zihe ruọ oria nọ a rẹ rriẹ esakrosa fihọ re e ya.+ A te wariẹ owhẹ bọ vievie he, keme mẹ omamẹ, Jihova, mẹ ta riẹ no,’ ere Jihova Olori nọ Ọ Mai Kpehru na ọ ta.

15 “Enẹ Jihova Olori nọ Ọ Mai Kpehru na ọ ta kẹ Taya: ‘Kọ ikoliko na i gbe ti nuhu avọ ozọ nọ a ti yo edo ekie ra, okenọ enọ i bi whu* na i ti dimẹ, gbe okenọ a ti kpe ahwo evaọ eva ra?+ 16 Ikpahwo-esuo* abade na kpobi i ti nwrotọ no egbara-uvie rai ze, a vẹ ba iwu ithethei rai* no jẹ ba iwu rai nọ a zuo eware onaa họ no, yọ iguegue i ti kpe ai no.* A te keria otọ je nuhu ọvo, yọ a bi rri owhẹ avọ igbunu.+ 17 A te so ole uweri+ kpahe owhẹ jẹ ta kẹ owhẹ nọ:

19 “Keme enẹ Jihova Olori nọ Ọ Mai Kpehru na ọ ta: ‘Okenọ mẹ te raha owhẹ muotọ wọhọ ikpewho nọ ahwo a be rria ha, okenọ me ti ru ame nọ o bi fi ẹkporo wọ ruru owhẹ, nọ ame obuobu na o je le owhẹ no,+ 20 mẹ te rehọ owhẹ avọ ahwo nọ a bi lele owhẹ kpobọ ọgọdọ* na bru ahwo nọ a whu no oke krẹkri nọ u kpemu; me ti ru owhẹ jọ oria nọ o mai kpotọ, wọhọ eria oke anwae nọ a raha no, kugbe ahwo nọ a bi kpobọ ọgọdọ na,+ re a gbẹ rria eva ra ha. Kẹsena me ve ti ru ẹkwotọ enọ e rrọ uzuazọ na wo oruaro.*

21 “‘Mẹ te whẹ idudu họ owhẹ oma idudhe, yọ whọ gbẹ te jọ họ.+ A te gwọlọ owhẹ, rekọ a gbẹ te ruẹ owhẹ ofa ha,’ ere Jihova Olori nọ Ọ Mai Kpehru na ọ ta.”

“O Taya, whẹ omara whọ ta nọ, ‘Me wo erru gaga.’+

 8 Ahwo nọ a jẹ rria Saedọn avọ ahwo nọ a jẹ rria Avad+ họ enọ i je bi owhẹ.

Ahwo obọra nọ a wo onaa họ ekpokọ nọ e jẹ kpọ owhẹ, O Taya.+

 9 Ezae Gibal nọ e riẹ iruo ziezi*+ je wo onaa họ enọ i je di ighogho ra.+

Ekọ ilogbo abade na kpobi avọ enọ i je bi ai a nyabru owhẹ ze te zẹ eware eki.

10 Ezae Pasia, Lọd, gbe Put+ e jọ ogbaẹmo ra, ezae nọ i re kpohọ ẹmo.

A jẹ ejese gbe itu-egaga rai fihọ owhẹ, a tẹ whẹ erru họ owhẹ oma.

12 “‘“Tashish+ o je lele owhẹ thueki fiki efe obuobu ra.+ A jẹ kẹ owhẹ isiliva, ayọno, itini, gbe elẹdi ro nwene eware ra rehọ.+ 13 Jevan, Tubal,+ gbe Mishẹk+ a je lele owhẹ thueki, a jẹ kẹ owhẹ erigbo+ gbe ekwakwa ekọpa ro nwene eware eki ra rehọ. 14 Ahwo uwou Togama+ a jẹ kẹ owhẹ enyenya gbe enyenya ẹmo gbe isi ro nwene eware ra rehọ. 15 Ahwo Didan+ a je lele owhẹ thueki; whọ jọ ikoliko buobu fi egba-ihreki họ nọ e jẹ thueki kẹ owhẹ; akọ-eni+ gbe ẹlọ-obiebi a jẹ rọ hwa azọhọ kẹ owhẹ. 16 Edọm o lele owhẹ thueki fiki eware buobu nọ who wo. A jẹ kẹ owhẹ itho tọkwọes, iwhulu ogorurẹ, eware onaa nọ i wo ekọlọ sa-sa nọ a re zuo fihọ ehọ, ehọ iwowoma, ikoral, gbe itho rubi ro nwene eware ra rehọ.

17 “‘“Juda avọ ẹkwotọ Izrẹl a je lele owhẹ thueki, a jẹ kẹ owhẹ iwhiti obọ Minit,+ emamọ emuore, ọnyọ,+ ewhri, gbe balsam+ ro nwene eware ra rehọ.+

18 “‘“Damaskọs+ o lele owhẹ thueki fiki eware buobu nọ who wo gbe ekwakwa efe ra kpobi, ọ jẹ rehọ enwaene obọ Hẹlbọn gbe iwhulu obọ Zeha* nwene kẹ owhẹ. 19 Vidan gbe Jevan nọ e rrọ Uzal a jẹ kẹ owhẹ ayọno ọlọlọhọ, kasia,* gbe uti ro nwene eware ra rehọ. 20 Didan+ ọ jẹ rehọ ehọ nọ a re fihọ ehru erao keria dhẹ* nwene kẹ owhẹ. 21 Whọ rehọ ahwo Arab gbe isu Kida+ kpobi iruo, enọ e jọ egba-ihreki nọ e jẹ zẹ imigodẹ, igbo gbe ewe.+ 22 Egba-ihreki Shiba avọ Reama+ a je lele owhẹ thueki; a jẹ kẹ owhẹ oghoghẹrẹ eware nọ i re gbo ore isialẹ nọ e mai woma, itho eghaghae, gbe igoru ro nwene eware ra rehọ.+ 23 Heran,+ Kanẹ, Idẹn,+ egba-ihreki Shiba,+ Asshọ,+ gbe Kilmad a je lele owhẹ thueki. 24 A jọ eki ra jẹ zẹ iwu iwowoma, itogbo nọ a rọ ehọ iburu ko gbe eware onaa nọ i wo ekọlọ sa-sa nọ a re zuo fihọ ehọ, gbe ekapẹte ekọlọ sa-sa, yọ a rehọ ifi gba aikpobi kugbe ziezi.

28 Okenọ ekpokọ nọ e be kpọ owhẹ i ti bo via, ekwotọ nọ e rrọ akotọ abade na i ti nuhu avọ ozọ.

32 Evaọ oke enuobro rai, a te so ole uweri jẹ ta kpahe owhẹ nọ:

‘Ono ọ wọhọ Taya, ọnọ ọ fọ rirẹ no enẹna evaọ udevie abade na?+

33 Okenọ eware ra i je no obọ abade ọraragha na ze, who je ru ahwo buobu eva were.+

Efe obuobu ra avọ eware eki ra i ru ivie otọakpọ na fe.+

36 Egba-ihreki nọ e rrọ erẹwho na e te fiunu fiki oware nọ o via kẹ owhẹ.

28 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, ta kẹ osu Taya nọ, ‘Enẹ Jihova Olori nọ Ọ Mai Kpehru na ọ ta:

“Fikinọ omorro o ruọ udu ra no,+ whọ ruabọhọ be ta nọ, ‘Mẹ yọ ọghẹnẹ.

Mẹ keria agbara-uvie ọghẹnẹ jọ evaọ udevie abade na.’+

 3 Rri! Who wo areghẹ vi Daniẹl.+

A ko eware idhere evo no owhẹ hẹ.

6 “‘Fikiere enẹ Jihova Olori nọ Ọ Mai Kpehru na ọ ta:

 9 Kọ whọ gbẹ te ta kẹ ọnọ o bi kpe owhẹ nọ, ‘Mẹ yọ ọghẹnẹ’?

Ohwo-akpọ gheghe whọ te jọ evaọ obọ enọ e be raha owhẹ na, orọnikọ ọghẹnẹ hẹ.”’

11 Ẹme Jihova ọ tẹ wariẹ bru omẹ ze, inọ: 12 “Ọmọ ohwo, so ole uweri jọ kpahe ovie Taya, re whọ ta kẹe nọ, ‘Enẹ Jihova Olori nọ Ọ Mai Kpehru na ọ ta:

13 Whọ jọ evaọ Idẹn, ọgbọ Ọghẹnẹ.

Ẹdẹ nọ a ma owhẹ a ro ru ai.

14 Mẹ rehọ owhẹ mu chẹrub nọ a wholo nọ o re ruru.

Whọ jọ ugbehru ọrẹri Ọghẹnẹ,+ whọ jẹ nya evaọ udevie itho nọ e be ware erae.

17 Omorro o ruọ udu ra fiki erru ra.+

Whọ raha areghẹ ra fiki oruaro erru ra.+

Me ti gbolo owhẹ fihọ otọ.+

Me ti ru owhẹ fihọ oware nọ ivie i re rri ughe riẹ.

18 Who zue eria aruẹri ra no fiki abe-ọriọ ologbo ra gbe ekiọthuọ ewhariọ ra.

Me ti ru erae muhọ ẹto evaọ eva ra, yọ erae na e te mahe owhẹ muotọ.+

Me ti ru owhẹ to zihe ruọ enwo evaọ otọakpọ na evaọ iraro ahwo kpobi nọ a bi rri owhẹ.

19 Ahwo kpobi nọ a riẹ owhẹ evaọ udevie ahwo na a te tẹrovi owhẹ avọ igbunu.+

20 Ẹme Jihova ọ tẹ wariẹ bru omẹ ze, inọ: 21 “Ọmọ ohwo, rẹriẹ ovao ku Saedọn+ re whọ ruẹaro oware nọ o te via kẹe. 22 Whọ rẹ ta nọ, ‘Enẹ Jihova Olori nọ Ọ Mai Kpehru na ọ ta:

23 Me ti vi okpẹyao nọ o re vo ruọ eva riẹ, azẹ o ve ti su evaọ iyẹrẹ riẹ.

24 “‘“Kẹsena ekpajẹ iyoma gbe idhigbo edada e gbẹ te wariẹ uwou Izrẹl họ họ,+ koyehọ enọ e be rehọ ae jijehwẹ; ahwo a vẹ te riẹ nọ mẹ họ Jihova Olori nọ Ọ Mai Kpehru na.”’

25 “‘Enẹ Jihova Olori nọ Ọ Mai Kpehru na ọ ta: “Evaọ okenọ mẹ te wariẹ koko uwou Izrẹl họ no udevie ahwo nọ a vaha e rai kpohọ ze,+ erẹwho na e te ruẹ nọ mẹ yọ ọrẹri evaọ udevie rai.+ A vẹ te rria ẹkwotọ rai+ nọ mẹ kẹ Jekọp odibo mẹ.+ 26 A te rria eva riẹ avọ omofọwẹ,+ a vẹ te bọ iwou jẹ kọ egbọ evaene,+ yọ a te rria avọ omofọwẹ evaọ okenọ mẹ te rọ uye te ahwo kpobi nọ a wariẹ e rai họ nọ a jẹ rehọ ae jijehwẹ;+ a vẹ te riẹ nọ mẹ họ Jihova Ọghẹnẹ rai.”’”

29 Evaọ ukpe avọ ikpe, evaọ amara avọ ikpe, evaọ ẹdẹ avọ ikpegbivẹ amara na, ẹme Jihova o te bru omẹ ze, inọ: 2 “Ọmọ ohwo, rẹriẹ ovao ku Fẹro ovie Ijipti, re whọ ruẹaro oware nọ o te via kẹe avọ Ijipti soso.+ 3 Ta eme nana: ‘Enẹ Jihova Olori nọ Ọ Mai Kpehru na ọ ta:

Me ru rie kẹ omamẹ.’+

 4 Rekọ mẹ te jẹ eghọlọ họ agba ra, me ve ru iyei nọ e rrọ Naele ra tamu egbẹ ra.

Mẹ te rehọ owhẹ no eva Naele ra ze avọ iyei Naele na kpobi nọ e tamu egbẹ ra.

 5 Me ti gbabọkẹ owhẹ evaọ udhude na, te owhẹ te iyei Naele ra kpobi.

Who ti kie fihọ otọ evaọ ẹwọ na, yọ a ti koko owhẹ họ hayo kwa owhẹ koko ho.+

Mẹ te rehọ owhẹ kẹ erao ijihẹ otọakpọ na gbe evra obọ ehru na re a re owhẹ no.+

8 “‘Fikiere enẹ Jihova Olori nọ Ọ Mai Kpehru na ọ ta: “Rri, mẹ be rehọ ọgbọdọ ze rọ họre owhẹ,+ yọ me ti kpe te ohwo te arao no eva ra. 9 Ẹkwotọ Ijipti o ti zihe ruọ oria ofofe nọ a raha no;+ a vẹ te riẹ nọ mẹ họ Jihova, keme whọ* ta nọ, ‘Mẹ me wo Ethẹ Naele na; mẹ họ ọnọ o ru rie.’+ 10 Fikiere mẹ te rọsuọ owhẹ avọ Naele ra na, me ti ru ẹkwotọ Ijipti fihọ oria nọ a raha no nọ o rrọ yaya, otọ nọ o raha no nọ o rrọ ofofe,+ no Migdọl+ rite Sayini,+ je rite obọ uwhru Ẹtiopia. 11 Ohwo hayo erao e te rọ owọ nya eva riẹ vrẹ hẹ,+ yọ a te rriae he evaọ ikpe udhuvẹ. 12 Me ti ru ẹkwotọ Ijipti fihọ ẹkwotọ nọ ọ mae rrọ ofofe, yọ ikpewho riẹ e te jọ ikpewho nọ e mae rrọ ofofe evaọ ikpe udhuvẹ;+ mẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na.”+

13 “‘Keme enẹ Jihova Olori nọ Ọ Mai Kpehru na ọ ta: “Nọ ikpe udhuvẹ e tẹ vrẹ no, me ti koko ahwo Ijipti na họ no obonọ a vaha kpohọ ze;+ 14 mẹ te rehọ ahwo Ijipti nọ a mu kpohọ igbo zihe kpohọ ẹkwotọ Patrọs,+ kpohọ ẹkwotọ rai nọ a no ze, a vẹ te jọ obei zihe ruọ uvie nọ u te oware ovo ho. 15 Ijipti o ti kpotọ vi ekwotọ-ivie edekọ na, yọ o gbe ti su erẹwho edekọ na ha,+ me ti ru ai kawo te epanọ a gbẹ te sai ro su erẹwho efa ha.+ 16 O gbẹ te jọ oware nọ o be kẹ uwou Izrẹl udu ofa vievie he,+ ukpoye o te kareghẹhọ ae ọvo inọ a ru thọ nọ a rọ dhẹ bru ahwo Ijipti kẹ obufihọ. A vẹ te riẹ nọ mẹ họ Jihova Olori nọ Ọ Mai Kpehru na.”’”

17 Whaọ evaọ ukpe avọ udhegbihrẹ, evaọ amara ọsosuọ, evaọ ẹdẹ ọsosuọ amara na, ẹme Jihova o te bru omẹ ze, inọ: 18 “Ọmọ ohwo, Nebukadneza*+ ovie Babilọn ọ rehọ ogbaẹmo riẹ ru iruo gaga rọsuọ Taya.+ Uzou kpobi o tẹ fa no, ẹkoko kpobi ọ tẹ whra no. Rekọ osohwa ovo u te ọyomariẹ avọ ogbaẹmo riẹ obọ rọkẹ iruo nọ a ru evaọ Taya ha.

19 “Fikiere enẹ Jihova Olori nọ Ọ Mai Kpehru na ọ ta, ‘Rri, mẹ be rehọ ẹkwotọ Ijipti kẹ Nebukadneza* ovie Babilọn,+ ọ te wọ ekwakwa efe riẹ vrẹ jẹ kwa egbo-ẹmo gbe eware buobu mi ei; o vẹ te jọ osa nọ a hwa ogbaẹmo riẹ.’

20 “‘Mẹ te kẹe ẹkwotọ Ijipti re o jọ osa iruo nọ o ru rọ họre iẹe,* keme mẹ a ru rie kẹ,’+ ere Jihova Olori nọ Ọ Mai Kpehru na ọ ta.

21 “Evaọ ẹdẹ yena, me ti ru uzei jọ ta ze rọkẹ uwou Izrẹl,*+ yọ mẹ te kẹ owhẹ uvẹ ta ẹme evaọ udevie rai; a vẹ te riẹ nọ mẹ họ Jihova.”

30 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, ruẹaro jẹ ta nọ, ‘Enẹ Jihova Olori nọ Ọ Mai Kpehru na ọ ta:

“Kuenu oviẹ, ‘O, ẹdẹ na ọ be tha!’

 3 Keme ẹdẹ na ọ kẹle no, ẹhẹ, ẹdẹ Jihova ọ kẹle no.+

O te jọ ẹdẹ ẹgho,+ oke nọ a fihọ kẹ erẹwho.+

 6 Enẹ Jihova ọ ta:

“‘A te rọ ọgbọdọ kpe ai evaọ ẹkwotọ na, no Migdọl+ rite Sayini,’+ ere Jihova Olori nọ Ọ Mai Kpehru na ọ ta. 7 ‘A ti ru ai họ ekwotọ nọ e mae rrọ ofofe, yọ ikpewho obọriẹ i ti zihe ruọ ikpewho nọ a mae raha.+ 8 A vẹ te riẹ nọ mẹ họ Jihova evaọ okenọ me ti tu erae họ Ijipti, jẹ te guọghọ enọ e be thae uke kpobi no. 9 Evaọ ẹdẹ yena, mẹ te rehọ ekọ ilogbo vi enyukọ re a nyai ru Ẹtiopia nọ o fievahọ omobọ riẹ na nuhu; ozọ u ti kpe ai no evaọ ẹdẹ nọ o bi bru Ijipti ze na, keme o te seba ẹtha ha.’

10 “Enẹ Jihova Olori nọ Ọ Mai Kpehru na ọ ta: ‘Mẹ te rọ ẹkwoma obọ Nebukadneza* ovie Babilọn rehọ ogbotu ahwo Ijipti na te oba.+ 11 A te rehọ iẹe avọ egbaẹmo riẹ ze, koyehọ enọ e mae geva evaọ usu erẹwho na,+ re a raha ẹkwotọ na. A ti yolo egbọdọ rai ze rọsuọ Ijipti, a ve kpe ahwo vọ ẹkwotọ na.+ 12 Me ti zihe iko-ame Naele+ ruọ otọ oyaya, mẹ te zẹ ẹkwotọ na kẹ ezae imuomu. Mẹ te rehọ obọ ahwo erẹwho efa ru ẹkwotọ na gbe oware kpobi nọ o rrọ eva riẹ fihọ ofofe.+ Mẹ omamẹ, Jihova, mẹ ta riẹ no.’

13 “Enẹ Jihova Olori nọ Ọ Mai Kpehru na ọ ta: ‘Mẹ te jẹ raha emedhọ etọtọ* na no, jẹ te raha eghẹnẹ Nọf* nọ i fioka ha na no.+ Okpohwo-esuo* o gbe ti no ẹkwotọ Ijipti ze ofa ha, yọ me ti ru ozọ jọ ẹkwotọ Ijipti.+ 14 Me ti ru Patrọs fihọ ofofe,+ me ve tu erae họ Zoan je ru No*+ oware nọ me bruoziẹ riẹ kpahe iẹe. 15 Me ti ku ofu ọgaga mẹ ku Sin, oria omofọwẹ Ijipti, mẹ vẹ te raha ahwo nọ a rrọ No. 16 Me ti tu erae họ Ijipti; idudu e te ruọ Sin oma, a ti kporo ugbẹhẹ No ruọ eva, yọ a te họre Nọf* evaọ uvo kekeke! 17 A te rọ ọgbọdọ kpe izoge emezae Ọn* avọ Paebisẹt, a ve ti mu ahwo ikpewho rai kpohọ igbo. 18 Ẹdẹ na o ti muebi evaọ Tehafnihis okenọ me ti wiri ekpọ owhowha Ijipti evaọ etẹe.+ Ogaga riẹ nọ u bi mu ei na u ti te oba,+ ẹgho o ti ruru iei, a ve ti mu ahwo ewho riẹ kpohọ igbo.+ 19 Me ti ru Ijipti oware nọ me bruoziẹ riẹ kpahe iẹe, a vẹ te riẹ nọ mẹ họ Jihova.’”

20 Evaọ ukpe avọ ikpegbọvo, evaọ amara ọsosuọ, evaọ ẹdẹ avọ ihrẹ amara na, ẹme Jihova o te bru omẹ ze, inọ: 21 “Ọmọ ohwo, me wiri ugbobọ Fẹro ovie Ijipti no; a te gbae re a siwi ei kpo ho, hayo rọ omohọ gbae re o sae ga te epanọ u re ro kru ọgbọdọ họ.”

22 “Fikiere enẹ Jihova Olori nọ Ọ Mai Kpehru na ọ ta: ‘Rri, mẹ te rọsuọ Fẹro ovie Ijipti,+ me ve wiri igbabọ riẹ no, te ọgaga na te onọ u wiri no na,+ me ve ru ọgbọdọ na kie no obọ riẹ.+ 23 Kẹsena mẹ vẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na.+ 24 Me ti ru igbabọ ovie Babilọn jọ gaga,*+ je fi ọgbọdọ mẹ họ obọ riẹ,+ me ve ti wiri igbabọ Fẹro, o ve ti dimẹ gaga wọhọ ohwo nọ o bi whu evaọ aro riẹ.* 25 Me ti ru igbabọ ovie Babilọn jọ gaga, rekọ igbabọ Fẹro i ti kie fihọ otọ yọlọ; a vẹ te riẹ nọ mẹ họ Jihova evaọ okenọ me ti fi ọgbọdọ mẹ họ obọ ovie Babilọn, ọ vẹ te rehọ iẹe họre ẹkwotọ Ijipti.+ 26 Mẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na,+ a vẹ te riẹ nọ mẹ họ Jihova.’”

 4 Ame obuobu na o ru rie rro gaga, iyeri-ame ididi na i ru rie theri kpehru.

 5 Oyejabọ nọ u ro theri vi ire edekọ kpobi nọ e rrọ ẹwọ na.

 8 A rẹ sae rọ ure sida ọfa nọ ọ rrọ ọgbọ Ọghẹnẹ+ wawo iẹe he.

Ure ọfa u wo erru tei evaọ ọgbọ Ọghẹnẹ na ha.

10 “Fikiere enẹ Jihova Olori nọ Ọ Mai Kpehru na ọ ta: ‘Fikinọ o* theri gaga, be kpare ehru riẹ kpehru evaọ ẹgho na, omorro o tẹ jẹ ruọ udu riẹ fiki uthethei riẹ na, 11 mẹ te rehọ iẹe kẹ osu ologbo erẹwho na.+ Ọ te se iẹe ba ẹhọre he, yọ mẹ te se iẹe fiki emuemu riẹ. 12 Ahwo erẹwho efa, enọ e mae geva evaọ usu erẹwho na, a ti koi fihọ otọ, a vẹ te nyase iẹe ba ehru igbehru na, ebe riẹ i ve ti kie fihọ ikiekpotọ na kpobi, yọ egha riẹ i ti wiri fihọ otọ evaọ iko-ame kpobi nọ e rrọ ẹkwotọ na.+ Ahwo otọakpọ na kpobi a ti no otọ edhedhẹ riẹ no jẹ dhẹ siọ iẹe ba. 13 Evra obọ ehru na kpobi e te rria ehru ete riẹ nọ ọ rrọ otọ na, erao ẹwọ na kpobi e vẹ te jọ ehru egha riẹ.+ 14 Onana o rrọ enẹ re ure ovo nọ o kẹle ame na u gbe theri gaga ha hayo kpare ehru riẹ kpehru evaọ ẹgho na ha, jegbe re uvumọ ure nọ a be kẹ ame ziezi u gbe theri te ai hi. Keme a ti kpe aikpobi no, a ve kpobọ otọ ẹkpẹ na, te ai te emọ ohwo-akpọ, enọ i bi kpobọ ọgọdọ na.’*

15 “Enẹ Jihova Olori nọ Ọ Mai Kpehru na ọ ta: ‘Evaọ ẹdẹ nọ o ti kpobọ Uki* na, me ti ru ahwo weri. Fikiere, me ti ruru ame odidi na je di iko-ame riẹ re ame obuobu na o brudhe. Me ti ru Lebanọn muebi fiki riẹ, ire nọ e rrọ ẹwọ na kpobi i ve ti lo no. 16 Me ti ru erẹwho na nuhu fiki edo ekie riẹ evaọ okenọ mẹ te rehọ iẹe kpobọ Uki* kugbe ahwo kpobi nọ a bi kpobọ ọgọdọ na,* yọ ire kpobi nọ e rrọ Idẹn,+ te ire Lebanọn nọ e mae were ahwo gbe enọ e mai woma, ire kpobi nọ a be kẹ ame ziezi, i ti wo omosasọ evaọ obọ otọ ẹkpẹ na. 17 A lele i rie kpobọ Uki* no, bru enọ a rọ ọgbọdọ kpe,+ yọ enọ e jẹ thae uke nọ e jẹ rria* otọ edhedhẹ riẹ evaọ udevie erẹwho na a rrọ kugbei re.’+

18 “‘Kọ ure vẹ evaọ usu ire Idẹn o jọ wọhọ owhẹ evaọ oruaro gbe uthethei?+ Rekọ a te rehọ owhẹ avọ ire Idẹn kpobọ otọ ẹkpẹ na hrọ. Whọ te rriẹ họ otọ evaọ udevie enọ a yawo ho, kugbe enọ a rọ ọgbọdọ kpe. Onana o te via kẹ Fẹro avọ ogbotu ahwo riẹ kpobi,’ ere Jihova Olori nọ Ọ Mai Kpehru na ọ ta.”

 3 Enẹ Jihova Olori nọ Ọ Mai Kpehru na ọ ta:

 7 ‘Okenọ me ti furie owhẹ, me ti ruru idhiwu na, me ve ru isi rai muebi.

11 Keme enẹ Jihova Olori nọ Ọ Mai Kpehru na ọ ta:

‘Ọgbọdọ ovie Babilọn o ti bru owhẹ ze.+

A te rehọ omorro Ijipti ziọ otọ, a vẹ te raha ogbotu ahwo riẹ na kpobi muotọ.+

A te so ẹe fiki Ijipti gbe fiki ogbotu ahwo riẹ kpobi,’ ere Jihova Olori nọ Ọ Mai Kpehru na ọ ta.”

17 Kẹsena evaọ ukpe avọ ikpegbivẹ, evaọ ẹdẹ avọ ikpegbisoi amara na, ẹme Jihova o te bru omẹ ze, inọ: 18 “Ọmọ ohwo, kuenu oviẹ fiki ogbotu ahwo Ijipti re whọ rehọ iẹe kpobọ otọ ẹkpẹ na, tei te emetẹ erẹwho ilogbo na, kugbe enọ i bi kpobọ ọgọdọ na.*

19 “‘Ono who wo erru vi? Kpohọ obotọ, re who kiẹzẹ kugbe enọ a yawo ho!’

20 “‘A ti whu fihọ udevie enọ a rọ ọgbọdọ kpe.+ A rehọ e riẹ kẹ ọgbọdọ na no; si rie avọ ogbotu ahwo riẹ kpobi vrẹ.

21 “‘Egbaẹmo nọ e mae ga e te jọ obọ edidi Uki* na ta ẹme kẹe avọ enọ i bi fiobọhọ kẹe. A te rọ ọgbọdọ kpe ai, yọ a te siọ obotọ ba ekpohọ họ, a ve ti kiẹzẹ nwane wọhọ enọ a yawo ho na. 22 Asiria avọ ogbotu ahwo riẹ kpobi a rrọ etẹe. Iki rai e wariẹ e riẹ họ, ọgbọdọ a ro kpe aikpobi.+ 23 Iki riẹ e rrọ obọ edidi ọgọdọ* na, yọ ogbotu ahwo riẹ kpobi a wariẹ uki riẹ họ, ọgbọdọ a ro kpe aikpobi, keme a jẹ whẹ idudu họ ahwo oma evaọ ẹkwotọ enọ e rrọ uzuazọ.

24 “‘Ilam+ avọ ogbotu ahwo riẹ kpobi a rrọ etẹe wariẹ uki riẹ họ, ọgbọdọ a ro kpe aikpobi. A kpobọ otọ ẹkpẹ na no avọ epanọ a rọ yawo ai hi na, enọ e jẹ whẹ idudu họ ahwo oma evaọ ẹkwotọ enọ e rrọ uzuazọ na. Enẹna oma o te vuọ ae avọ enọ i bi kpobọ ọgọdọ na.* 25 A ruẹrẹ ehwa họ kẹe no evaọ udevie enọ a kpe na, te ogbotu ahwo riẹ kpobi nọ a wariẹ iki riẹ họ. Aikpobi yọ ahwo nọ a yawo ho, ọgbọdọ a ro kpe ai, fikinọ a jẹ whẹ idudu họ ahwo oma evaọ ẹkwotọ enọ e rrọ uzuazọ; yọ oma o te vuọ ae avọ enọ i bi kpobọ ọgọdọ na.* A fi rie họ udevie enọ a kpe na no.

26 “‘Etẹe Mishẹk avọ Tubal+ gbe ogbotu ahwo rai* kpobi a rrọ. Iki rai* e wariẹ e riẹ họ. Aikpobi yọ ahwo nọ a yawo ho, enọ a rọ ọgbọdọ duwu lafi, fikinọ a jẹ whẹ idudu họ ahwo oma evaọ ẹkwotọ enọ e rrọ uzuazọ. 27 Kọ a gbe ti kiẹzẹ kugbe egbaẹmo egaga nọ e yawo ho nọ i whu no, enọ avọ ekwakwa ẹmo rai a kpobọ Uki?* A ti fi egbọdọ rai họ otọ izou rai,* je fi izieraha rai họ ehru igbenwa rai, fikinọ egbaẹmo egaga na i je zighi ahwo evaọ ẹkwotọ enọ e rrọ uzuazọ. 28 Rọkẹ owhẹ, a te guọghọ owhẹ kugbe ahwo nọ a yawo ho na, yọ who ti kiẹzẹ kugbe enọ a rọ ọgbọdọ kpe na.

29 “‘Edọm+ ọ rrọ etẹe, ivie riẹ gbe isu riẹ kpobi, enọ i kiẹzẹ kugbe ahwo nọ a rọ ọgbọdọ kpe, ghelọ ogaga rai; ae omarai a ti kiẹzẹ kugbe ahwo nọ a yawo ho,+ je kugbe enọ i bi kpobọ ọgọdọ na.*

30 “‘Etẹe ikpahwo-esuo* obọ ẹkpẹlobọ ovatha-ọre kpobi e rrọ, gbe ahwo Saedọn+ kpobi, enọ i lele ahwo nọ a rọ ọgbọdọ kpe kpobọ otọ no avọ omovuọ, ghelọ ogaga rai nọ a jẹ rọ whẹ idudu họ ahwo oma na. A ti kiẹzẹ kugbe ahwo nọ a rọ ọgbọdọ kpe ababọ oyawo nọ a yawo rai, yọ oma o te vuọ ae avọ enọ i bi kpobọ ọgọdọ na.*

31 “‘Fẹro ọ te ruẹ enana kpobi, oma o vẹ te sasa iẹe fiki eware kpobi nọ e via kẹ ogbotu ahwo riẹ;+ a te rọ ọgbọdọ kpe Fẹro avọ ogbaẹmo riẹ soso,’ ere Jihova Olori nọ Ọ Mai Kpehru na ọ ta.

32 “‘Fẹro avọ ogbotu ahwo riẹ a ti whu kugbe enọ a yawo ho, enọ a rọ ọgbọdọ kpe, fikinọ ọ jẹ whẹ idudu họ ahwo oma evaọ ẹkwotọ enọ e rrọ uzuazọ,’ ere Jihova Olori nọ Ọ Mai Kpehru na ọ ta.”

6 “‘Rekọ otẹrọnọ ororoke na ọ ruẹ ọgbọdọ na nọ ọ be tha, rekiyọ o kporo onware na ha,+ ọ gbẹ jẹ vẹvẹ ahwo na unu hu, nọ ọgbọdọ ọ jẹ nyaze te rehọ uzuazọ* omọvo rai jọ, ohwo yena o ti whu fiki oruthọ riẹ, rekọ mẹ te nekpẹ azẹ riẹ mi ororoke na.’*+

7 “Rọkẹ owhẹ, ọmọ ohwo, mẹ rehọ owhẹ mu ororoke kẹ uwou Izrẹl no; nọ who te yo ẹme jọ no unu mẹ ze, whọ rẹ vẹvẹ ae unu kẹ omẹ hrọ.+ 8 Nọ mẹ tẹ ta kẹ ohwo omuomu nọ, ‘Ohwo omuomu, whọ te seba ewhu hu!’+ rekọ whọ gbẹ ta ẹme rọ vẹvẹ ohwo omuomu na unu re o nwene edhere riẹ hẹ, o ti whu fiki oruthọ obọriẹ keme ohwo omuomu ọ rrọ,+ rekọ mẹ te nekpẹ azẹ riẹ mi owhẹ. 9 Rekọ otẹrọnọ whọ vẹvẹ ohwo omuomu unu inọ o kurẹriẹ no edhere riẹ, ọ gbẹ rọwo nwene edhere riẹ hẹ, o ti whu fiki oruthọ riẹ,+ rekọ whọ te siọ uzuazọ ra ba esiwi hi.+

10 “Rọkẹ owhẹ, ọmọ ohwo, ta kẹ uwou Izrẹl nọ, ‘Wha ta nọ: “Ọkparesuọ mai gbe izieraha mai e gbẹdẹ vi omai oma, u te ru omai dọ kpobi no;+ kọ ẹvẹ ma te gbẹ rọ jọ uzuazọ?”’+ 11 Ta kẹ ae nọ, ‘“Nọ mẹ rrọ uzuazọ na,” ere Jihova Olori nọ Ọ Mai Kpehru na ọ ta, “uwhu ohwo omuomu o rẹ were omẹ hẹ,+ ukpoye, oware nọ o rẹ were omẹ họ re ohwo omuomu o nwene edhere riẹ,+ ọ vẹ gbẹ jọ uzuazọ.+ Wha kurẹriẹ, wha kurẹriẹ no idhere iyoma rai,+ fikieme wha re ro whu, O uwou Izrẹl?”’+

12 “Rọkẹ owhẹ, ọmọ ohwo, ta kẹ emezae ahwo ra nọ, ‘Ẹrẹreokie ohwo okiẹrẹe na o ti siwi ei hi nọ ọ tẹ kpareso;+ yọ eware imuomu nọ ohwo omuomu na o ru i ti ru ei zoruẹ hẹ nọ o te siobọno umuomu riẹ;+ yọ ohwo okiẹrẹe ọvo ọ te gbẹ sae jọ uzuazọ fiki ẹrẹreokie riẹ hẹ evaọ ẹdẹ nọ ọ raha uzi.+ 13 Nọ mẹ tẹ ta kẹ ohwo okiẹrẹe nọ: “Whọ te gbẹ jọ uzuazọ hrọ,” ọ jẹ rẹroso ẹrẹreokie obọriẹ, o je bi ru oware nọ o thọ,*+ a te kareghẹhọ iruẹru ikiẹrẹe ọvuọvo nọ o ru hu, rekọ o ti whu fiki oware nọ o ru thọ.+

14 “‘Nọ mẹ tẹ ta kẹ ohwo omuomu nọ: “Whọ te seba ewhu hu,” nọ o je kurẹriẹ no uzioraha riẹ je bi ru oware nọ o gba je kiẹrẹe,+ 15 nọ ohwo omuomu na o je zihe oware nọ a ro viowa kẹe+ jẹ hwa oware nọ o tho zihe,+ o je bi koko izi nọ e rẹ kẹ uzuazọ ẹkwoma oware nọ o thọ nọ ọ seba eru no, ọ te gbẹ jọ uzuazọ hrọ.+ O ti whu hu. 16 A te rọ fiki* uzioraha ovuovo nọ ọ raha rọ kẹe uye he.+ Fikinọ o bi ru oware nọ o gba je kiẹrẹe, ọ te gbẹ jọ uzuazọ hrọ.’+

17 “Rekọ ahwo ra a ta nọ, ‘Edhere Jihova o kiete he,’ kpakiyọ edhere rai họ ọnọ o kiete he.

18 “Nọ ohwo okiẹrẹe ọ tẹ nyasiọ ẹrẹreokie riẹ ba, o je bi ru oware nọ o thọ, o re whu hrọ fiki riẹ.+ 19 Rekọ nọ ohwo omuomu o te kurẹriẹ no umuomu riẹ, o je bi ru oware nọ o gba je kiẹrẹe, ọ te gbẹ jọ uzuazọ fiki ere nọ o bi ru na.+

20 “Rekọ wha ta nọ, ‘Edhere Jihova o kiete he.’+ Me ti bruoziẹ omomọvo rai wọhọ epanọ idhere riẹ e rrọ, O uwou Izrẹl.”

21 Nọ u te oke jọ evaọ ukpe avọ ikpegbivẹ, evaọ amara avọ ikpe, evaọ ẹdẹ avọ isoi amara na nọ ma rọ rrọ igbo na, ọzae jọ nọ ọ dhẹ vabọ no obọ Jerusalẹm ze ọ tẹ nyabru omẹ ze,+ ọ tẹ ta nọ: “A fi okpẹwho na kparobọ no!”+

22 Whaọ evaọ owọwọ nọ o vrẹ taure ọzae nọ ọ dhẹ vabọ na ọ tẹ te nyaze, obọ Jihova o ziọ ehru mẹ, yọ o rovie unu mẹ no taure ọzae na ọ tẹ te nyabru omẹ ze evaọ ohiohiẹ na. Ere unu mẹ u ro rovie, me gbe dienu ofa ha.+

23 Kẹsena ẹme Jihova o te bru omẹ ze, inọ: 24 “Ọmọ ohwo, ahwo nọ a be rria eria nana nọ a raha no na+ a be ta kpahe ẹkwotọ Izrẹl nọ, ‘Omọvo Abraham ọ jọ, ghele na ọ rehọ ẹkwotọ na.+ Rekọ ma rrọ buobu; ababọ avro, a rehọ ẹkwotọ na kẹ omai no re ma woi.’

25 “Fikiere ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Wha be re erao avọ azẹ,+ yọ wha be kpare aro rai rri emedhọ etọtọ* rai, wha tẹ jẹ be ruabọhọ azẹ-okpe.+ Kọ fikieme wha re ro wo ẹkwotọ na? 26 Wha rẹroso ọgbọdọ rai,+ wha bi ru eware etọtọ, yọ omomọvo rai o zue aye ọrivẹ riẹ oma.+ Kọ fikieme wha re ro wo ẹkwotọ na?”’+

27 “Enẹ whọ rẹ ta kẹ ae, ‘Enẹ Jihova Olori nọ Ọ Mai Kpehru na ọ ta: “Nọ mẹ rrọ uzuazọ na, ọgbọdọ o ti kpe enọ e be rria eria nọ a raha no na; mẹ te rehọ enọ e rrọ ẹwọ na kẹ erao ijihẹ re a re ae no; ẹyao o ve ti kpe enọ e rrọ eria omofọwẹ gbe ighogho-itho na.+ 28 Me ti ru ẹkwotọ na zihe ruọ otọ nọ o raha no riẹriẹriẹ nọ o rrọ ufofe,+ jẹ rehọ omorro riẹ nọ u bi ru ei fu uke na te oba, yọ igbehru Izrẹl e te jọ ofofe,+ ababọ ohwo ọvo nọ ọ te nya ae vrẹ. 29 A vẹ te riẹ nọ mẹ họ Jihova evaọ okenọ me ti ru ẹkwotọ na zihe ruọ otọ nọ o raha no riẹriẹriẹ nọ o rrọ ufofe,+ fiki eware etọtọ kpobi nọ a ru.”’+

30 “Rọkẹ owhẹ, ọmọ ohwo, ahwo ra a be jọ akotọ igbẹhẹ na gbe evaọ inuethẹ nọ e rrọ iwou na ta ẹme kẹ ohwohwo kpahe owhẹ.+ A be ta ẹme kẹ ohwohwo, be ta kẹ ọvuọ omoni riẹ nọ, ‘Wha nyaze, re ma yo ẹme nọ o no obọ Jihova ze.’ 31 A ti su ze te keria aro ra wọhọ ahwo mẹ; yọ a ti yo eme ra, rekọ a ti ru lele ai hi.+ Keme a be rọ unu rai jiri owhẹ ujiro igbenu,* rekọ a be jọ udu rai thei okpuru erere iwhayo. 32 Rri! Whọ wọhọ ole obẹlẹ rọkẹ ae, onọ a rọ emamọ uvou so jẹ rehọ akpata-ifi kporo avọ onaa. A ti yo eme ra, rekọ ohwo ọvo o ti ru lele ai hi. 33 Okenọ ẹme na o ti rugba—keme o te seba erugba ha—a vẹ te riẹ nọ ọruẹaro jọ ọ jọ udevie rai.”+

34 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, ruẹaro oware nọ o te via kẹ ithuru-igodẹ Izrẹl. Ruẹaro, re whọ ta kẹ ithuru-igodẹ na nọ, ‘Enẹ Jihova Olori nọ Ọ Mai Kpehru na ọ ta: “Uye u te ithuru-igodẹ Izrẹl,+ enọ e be kuọ omobọ rai! Kọ ogbẹrọnọ uthuru na u fo nọ ithuru-igodẹ na e rẹ ko?+ 3 Wha be re iwhri erao na, wha bi ku iwu nọ a rọ eto igodẹ na ru họ, yọ arao nọ ọ mae poriẹ wha re kpe,+ rekọ wha be kuọ uthuru na ha.+ 4 Wha bọ ọnọ oma o lọhọ no ga ha, hayo siwi ọnọ ọ be mọ họ, hayo rehọ omohọ gba ọnọ ọ nwoma ha, hayo rehọ enọ i ghoro vrẹ zihe ze he, hayo gwọlọ enọ i vru hu;+ ukpoye, wha rọ obọ ogaga gbe evega ro su ai.+ 5 Fikiere a vahabọ fikinọ othuru-igodẹ ọvo ọ jariẹ hẹ;+ a vahabọ, a te zihe ruọ emuore kẹ arao ojihẹ kpobi nọ ọ rrọ ẹwọ na. 6 Igodẹ mẹ i je ghoro evaọ ehru igbehru na kpobi gbe evaọ ehru ikpehru ikpekpehru kpobi; igodẹ mẹ e vaha fihọ otọakpọ na soso, yọ ohwo ọvo ọ be kiẹ gwọlọ ae hayo daoma re ọ gwọlọ ae he.

7 “‘“Fikiere, whai ithuru-igodẹ na, wha yo ẹme nọ Jihova ọ ta: 8 ‘“Nọ mẹ rrọ uzuazọ na,” ere Jihova Olori nọ Ọ Mai Kpehru na ọ ta, “fikinọ igodẹ mẹ i zihe ruọ emuore kẹ arao ojihẹ kpobi nọ ọ rrọ ẹwọ na no, keme othuru-igodẹ ọvo ọ jariẹ hẹ, yọ ithuru-igodẹ mẹ a kiẹ gwọlọ igodẹ mẹ hẹ; ukpoye kọ omobọ rai a jẹ ko, a gbẹ kuọ igodẹ mẹ hẹ na,”’ 9 fikiere, whai ithuru-igodẹ na, wha yo ẹme nọ Jihova ọ ta. 10 Enẹ Jihova Olori nọ Ọ Mai Kpehru na ọ ta: ‘Mẹ te rọsuọ ithuru-igodẹ na, mẹ te nọ mi ai epanọ a ru igodẹ mẹ,* me ve ti le ai no re a gbẹ kuọ* igodẹ mẹ hẹ,+ yọ ithuru-igodẹ na e gbẹ te kuọ omobọ rai ofa ha. Me ti siwi igodẹ mẹ no unu rai, e gbẹ te jọ emuore rọkẹ ae he.’”

11 “‘Keme enẹ Jihova Olori nọ Ọ Mai Kpehru na ọ ta: “Mẹ rrọ etenẹ, mẹ omamẹ mẹ te gwọlọ igodẹ mẹ, mẹ vẹ te rẹrote ae.+ 12 Mẹ te rẹrote igodẹ mẹ wọhọ othuru-igodẹ nọ ọ ruẹ igodẹ riẹ nọ e vahabọ, ọ tẹ be kuọ ae.+ Me ti siwi ai no eria kpobi nọ a vaha kpohọ evaọ ẹdẹ ẹgho gbe ebi ọlala ze.+ 13 Mẹ te rehọ ae no obọ ahwo na ze je koko ai họ no ekwotọ na ze, mẹ vẹ rehọ ae ziọ ẹkwotọ rai jẹ kuọ ae evaọ ehru igbehru Izrẹl,+ evaọ akotọ iko-ame na gbe evaọ akotọ eria kpobi nọ ahwo a be rria evaọ ẹkwotọ na. 14 Oria uwowoma nọ erao e rẹ jọ re ẹbe mẹ te jọ kuọ ae, otọ nọ a te jọ re ẹbe o te jọ ehru igbehru ikpekpehru Izrẹl.+ A ti ruẹ fihọ emamọ otọ nọ a rẹ jọ re ẹbe,+ yọ a te re emamọ ẹbe evaọ ehru igbehru Izrẹl.”

15 “‘“Mẹ omamẹ, mẹ te kuọ igodẹ mẹ,+ yọ mẹ omamẹ me ti ru ai kiẹzẹ serihọ,”+ ere Jihova Olori nọ Ọ Mai Kpehru na ọ ta. 16 “Mẹ te gwọlọ ọnọ o vru na,+ mẹ te rehọ ọnọ o ghoro vrẹ na zihe ze, mẹ te rehọ omohọ gba ọnọ ọ nwoma na, yọ me ti ru ọnọ oma o lọhọ no na ga; rekọ me ti kpe ọpoporiẹ na gbe ọgaga na no. Mẹ te rehọ ẹdhoguo kuọ ọyena.”

17 “‘Rọkẹ owhai, igodẹ mẹ, enẹ Jihova Olori nọ Ọ Mai Kpehru na ọ ta: “Me bi ti bruoziẹ ogodẹ jọ avọ ogodẹ ọdekọ, je bruoziẹ igbo na avọ ikri na.+ 18 Kọ ẹbe nọ ọ mai woma nọ wha be re na u gbe te? Kọ o gbahọ nọ wha rẹ jẹ rọ awọ rai thihi ẹbe rai nọ o kiọkọ nyaotọ? Nọ wha tẹ da ame nọ ọ mai gogo na no, kọ o gbahọ nọ wha rẹ rọ awọ rai thihi ame na gbudie ku? 19 Kọ u fo nọ igodẹ mẹ e rẹ re ẹbe nọ wha rọ awọ rai thihi nyaotọ no jẹ da ame nọ wha rọ awọ rai thihi nọ o gbudie ku no?”

20 “‘Fikiere enẹ Jihova Olori nọ Ọ Mai Kpehru na ọ ta kẹ ae: “Mẹ rrọ etenẹ, mẹ omamẹ me ti bruoziẹ ogodẹ ọpoporiẹ avọ ogodẹ ọdọdọ, 21 keme wha ruabọhọ jẹ rehọ abefẹ gbe ikoko rai gele ai, wha jẹ rehọ izei rai tunye enọ e be mọ kpobi bẹsenọ wha rọ vaha ae kpohọ obọfa no. 22 Me ti siwi igodẹ mẹ, a gbẹ te jọ oware nọ a re kpe re he;+ yọ me ti bruoziẹ ogodẹ avọ ogodẹ. 23 Mẹ te rehọ othuru-igodẹ ọvo ro mu re o su ai,+ Devidi odibo mẹ,+ ọ vẹ te kuọ ae. Ọyomariẹ ọ te kuọ ae je zihe ruọ othuru-igodẹ rai.+ 24 Mẹ Jihova, me ti zihe ruọ Ọghẹnẹ rai,+ yọ Devidi odibo mẹ ọ te jọ osu evaọ udevie rai.+ Mẹ omamẹ Jihova, mẹ ta riẹ no.

25 “‘“Mẹ te re ọvọ udhedhẹ kugbe ai,+ me ve ti si erao ijihẹ no ẹkwotọ na no,+ re a sae rria avọ omofọwẹ evaọ udhude na jẹ sae wezẹ ewhawho na.+ 26 Me ti ru ai avọ eria nọ e wariẹ ukpehru mẹ họ re e jọ oghale,+ yọ me ti ru oso rrọ evaọ ẹruoke. Eghale i ti hwẹ ze wọhọ iso.+ 27 Ire ẹwọ na e te mọ ibi rai, yọ otọ na u ti wou eware,+ a vẹ te rria avọ omofọwẹ evaọ ẹkwotọ na. A te riẹ nọ mẹ họ Jihova evaọ okenọ me ti wiri ọkpọ owhowha rai+ je siwi ai no obọ enọ e be rehọ ai ru erigbo. 28 A gbẹ te jọ oware nọ erẹwho na i re kpe re he, yọ erao ijihẹ otọakpọ na e gbẹ te re ai no ho, a vẹ te rria avọ omofọwẹ, ohwo ọvo o gbe ti ru ozọ mu ai hi.+

29 “‘“Mẹ te kọ ọgbọ okpodẹ* kẹ ae, a gbẹ te jọ ẹkwotọ na whu fiki ohọo nọ u bi mu hu,+ yọ erẹwho na i gbe ti kpomovuọ họ ae oma ofa ha.+ 30 ‘Kẹsena a vẹ te riẹ nọ mẹ Jihova Ọghẹnẹ rai, mẹ rrọ kugbe ai, gbe nọ ae omarai, uwou Izrẹl, yọ ahwo mẹ,’+ ere Jihova Olori nọ Ọ Mai Kpehru na ọ ta.”’

31 “‘Rọkẹ owhai, igodẹ mẹ,+ whai igodẹ nọ mẹ be rẹrote, ahwo-akpọ gheghe wha rrọ, mẹ tẹ rrọ Ọghẹnẹ rai,’ ere Jihova Olori nọ Ọ Mai Kpehru na ọ ta.”

35 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, rẹriẹ ovao ku ubrotọ igbehru Siya,+ re whọ ruẹaro oware nọ o te via kẹe.+ 3 Ta kẹe nọ, ‘Enẹ Jihova Olori nọ Ọ Mai Kpehru na ọ ta: “Rri, mẹ te rọsuọ owhẹ, O ubrotọ igbehru Siya, mẹ vẹ te rriẹ obọ mẹ rọsuọ owhẹ, me ve ru owhẹ fihọ otọ nọ o raha no nọ o rrọ ofofe.+ 4 Me ti zihe ikpewho ra ruọ eria nọ a raha no, whọ vẹ te jọ otọ nọ o raha no nọ o rrọ ofofe;+ whọ vẹ te riẹ nọ mẹ họ Jihova. 5 Keme who wo omukpahọ nọ o je kuhọ họ,+ whọ tẹ rehọ ahwo Izrẹl kẹ ọgbọdọ evaọ oke okpẹtu rai, evaọ oke nọ a rọ kẹ ae uye urere rai.”’+

6 “‘Fikiere nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘Mẹ te ruẹrẹ owhẹ kpahe kẹ azẹ-okpe, azẹ-okpe o ve ti le owhẹ.+ Nọ orọnọ azẹ who mukpahe na, azẹ-okpe o ti le owhẹ.+ 7 Me ti ru ubrotọ igbehru Siya fihọ otọ nọ o raha no nọ o rrọ ofofe,+ yọ me ti kpe ohwo kpobi nọ ọ be nyae vrẹ gbe ohwo kpobi nọ o bi zihe ze. 8 Mẹ te rọ enọ a kpe na vọ igbehru riẹ; enọ ọgbọdọ na o kpe i ti kie fihọ ehru ikpehru ra, evaọ ikiekpotọ ra, gbe evaọ iko-ame ra kpobi. 9 Me ti ru owhẹ fihọ oria ofofe bẹdẹ bẹdẹ, a te gbẹ rria ikpewho ra ha;+ wha vẹ te riẹ nọ mẹ họ Jihova.’

10 “Fikinọ whọ ta nọ, ‘Erẹwho ivẹ nana gbe ekwotọ ivẹ nana i ti zihe ruọ emẹ, yọ ma te rehọ ivẹ na no,’+ dede nọ Jihova omariẹ ọ jọ etẹe, 11 ‘fikiere nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘oghẹrẹ evedha gbe ihri-eriọ evona nọ who dhesẹ okenọ who ro mukpahe ae na me ti ro dhesẹ akpọ kẹ owhẹ;+ me ti dhesẹ omamẹ via evaọ udevie rai evaọ okenọ me ti bruoziẹ ra. 12 Kẹsena whọ vẹ te riẹ nọ mẹ omamẹ, Jihova, me yo eware orivo kpobi nọ whọ jẹ ta kpahe igbehru Izrẹl okenọ whọ ta nọ, “A ru rai fihọ ofofe no, yọ a rehọ e rai kẹ omai no re ma re no.”* 13 Wha rọ omoya ta ẹme wọso omẹ, wha tẹ jẹ ta eme buobu wọso omẹ.+ Me yo rai kpobi.’

14 “Enẹ Jihova Olori nọ Ọ Mai Kpehru na ọ ta: ‘Otọakpọ na soso o te ghọghọ evaọ okenọ me ti ru owhẹ fihọ otọ nọ o raha no nọ o rrọ ofofe. 15 Nwane wọhọ epanọ whọ ghọghọ evaọ okenọ ukuoriọ uwou Izrẹl o rọ jọ ofofe na, ere ọvona me ti dhesẹ akpọ kẹ owhẹ.+ O ubrotọ igbehru Siya, ẹhẹ, ẹkwotọ Edọm soso, who ti zihe ruọ oria nọ a raha no;+ a vẹ te riẹ nọ mẹ họ Jihova.’”

36 “Rọkẹ owhẹ, ọmọ ohwo, ruẹaro kpahe igbehru Izrẹl re whọ ta nọ, ‘O igbehru Izrẹl, wha yo ẹme nọ Jihova ọ ta. 2 Enẹ Jihova Olori nọ Ọ Mai Kpehru na ọ ta: “Ọwegrẹ na ọ ta kpahe owhai nọ, ‘Oye u woma! Makọ eria ikpehru anwae na dede i zihe ruọ emai no!’”’+

3 “Fikiere ruẹaro re whọ ta nọ, ‘Enẹ Jihova Olori nọ Ọ Mai Kpehru na ọ ta: “Fikinọ a jọ ofẹ kpobi gbabọkẹ owhai jẹ họre owhai na, re ahwo nọ a zọ* evaọ udevie erẹwho na a ruẹsi wo owhai, ahwo a vẹ be ta ẹme kpahe owhai jẹ ta owhai raha na,+ 4 fikiere, O igbehru Izrẹl, wha yo ẹme nọ Jihova Olori nọ Ọ Mai Kpehru na ọ ta! Enẹ Jihova Olori nọ Ọ Mai Kpehru na ọ ta kẹ igbehru na avọ ikpehru na, iko-ame na avọ ikiekpotọ na, eria nọ e raha no nọ a gbabọkẹ na,+ gbe ikpewho nọ a dhẹ seba na, enọ ahwo nọ a zọ evaọ erẹwho nọ e wariẹ e rai họ a kwa eware rai rehọ no je bi ro se ẹkoko;+ 5 enẹ Jihova Olori nọ Ọ Mai Kpehru na ọ ta kẹ enana: ‘Mẹ te rọ ọwhọ mẹ nọ ọ wọhọ erae+ rọ ta ẹme rọsuọ enọ e zọ evaọ erẹwho na gbe Edọm soso, enọ e rọ oghọghọ ulogbo gbe ẹkoko ọgaga+ gboro ẹkwotọ mẹ rehọ no, re a rehọ etọ riẹ nọ erao e rẹ jọ re ẹbe jẹ kwa eware ẹkwotọ na rehọ.’”’+

6 “Fikiere ruẹaro kpahe ẹkwotọ Izrẹl, re whọ ta kẹ igbehru na avọ ikpehru na, iko-ame na avọ ikiekpotọ na nọ, ‘Enẹ Jihova Olori nọ Ọ Mai Kpehru na ọ ta: “Rri! Mẹ te rọ ọwhọ mẹ gbe ofu ọgaga mẹ ta ẹme, keme wha ruẹ uye omovuọ evaọ obọ erẹwho na no.”’+

7 “Fikiere enẹ Jihova Olori nọ Ọ Mai Kpehru na ọ ta: ‘Mẹ omamẹ, mẹ kpare obọ mẹ ro duwu iyei inọ erẹwho nọ e wariẹ owhai họ na omarai e te ruẹ ẹkẹ uye omovuọ rai.+ 8 Rekọ whai, O igbehru Izrẹl, wha ti wo egha, wha vẹ te mọ ibi kẹ ahwo mẹ Izrẹl,+ keme a ti zihe ze kẹle. 9 Keme mẹ rrọ kugbe owhai, yọ mẹ te rẹriẹ ovao ku owhai, a ve ti kporo owhai jẹ kọ ibi fihọ owhai. 10 Me ti ru ahwo rai vihọ—uwou Izrẹl soso, aikpobi—ahwo a vẹ te rria ikpewho na,+ a vẹ te wariẹ bọ eria nọ e raha no na.+ 11 Ẹhẹ, me ti ru ahwo rai avọ erao rai vihọ;+ a ti dhe ebuebu je yẹ emọ buobu. Me ti ru re a rria owhai wọhọ epanọ o jọ vẹre,+ yọ me ti ru eware woma kẹ owhai vi epanọ o jọ oke nọ u kpemu;+ wha vẹ te riẹ nọ mẹ họ Jihova.+ 12 Me ti ru re ahwo—ahwo mẹ Izrẹl—a nya evaọ ehru rai, a ve ti wo owhai.+ Wha te jọ ukuoriọ rai, wha gbe ti ru ai jọ ababọ ọmọ ofa vievie he.’”+

13 “Enẹ Jihova Olori nọ Ọ Mai Kpehru na ọ ta: ‘Fikinọ a be ta kẹ owhai nọ, “Whẹ yọ ẹkwotọ nọ ọ rẹ re ahwo je ru erẹwho ra jọ ababọ emọ,”’ 14 ‘fikiere, whọ gbẹ te re ahwo hayo ru erẹwho jọ ababọ emọ họ,’ ere Jihova Olori nọ Ọ Mai Kpehru na ọ ta. 15 ‘Me gbe ti ru owhẹ jọ epanọ erẹwho na e rẹ rọ la owhẹ eka ofa ha hayo ru owhẹ ruẹ uye ẹpoviẹ ahwo ho,+ yọ who gbe ti ru erẹwho ra zoruẹ ofa ha,’ ere Jihova Olori nọ Ọ Mai Kpehru na ọ ta.”

16 Ẹme Jihova ọ tẹ wariẹ bru omẹ ze, inọ: 17 “Ọmọ ohwo, okenọ uwou Izrẹl a jẹ rria ẹkwotọ rai, a rọ idhere rai avọ iruẹru rai ru ei fihọ gbegbe.+ Idhere rai e jọ kẹ omẹ wọhọ egbegbe aye nọ ọ rrọ oke riẹ.*+ 18 Fikiere me te ku ofu ọgaga mẹ ku ai fiki azẹ nọ a kpe evaọ ẹkwotọ na+ gbe fikinọ a rehọ emedhọ etọtọ*+ rai ru ẹkwotọ na fihọ oria nọ o fo ho. 19 Fikiere mẹ tẹ vaha ae fihọ udevie erẹwho na jẹ vaha ae fihọ udevie ekwotọ na.+ Epaọ edhere rai gbe eware nọ a ru me ro bruoziẹ rai. 20 Rekọ nọ a nyaze erẹwho yena, ahwo a jẹ raha odẹ ọrẹri mẹ,+ be ta kpahe ae nọ, ‘Ahwo nana yọ ahwo Jihova, rekọ o gba rai họ nọ a re no ẹkwotọ riẹ.’ 21 Fikiere me ti ru oware jọ kpahe odẹ ọrẹri mẹ, onọ uwou Izrẹl u gbeku evaọ udevie erẹwho nọ a kpohọ na.”+

22 “Fikiere ta kẹ uwou Izrẹl nọ, ‘Enẹ Jihova Olori nọ Ọ Mai Kpehru na ọ ta: “O uwou Izrẹl, orọnọ fiki rai me bi ro ru oware na ha, rekọ fiki odẹ ọrẹri mẹ, onọ wha gbeku evaọ udevie erẹwho nọ wha kpohọ na.”’+ 23 ‘Mẹ te siọ odẹ ulogbo mẹ ba erufuọ họ,+ onọ a gbeku evaọ udevie erẹwho na, nọ wha gbeku evaọ udevie rai; yọ erẹwho na e te riẹ nọ mẹ họ Jihova,’+ ere Jihova Olori nọ Ọ Mai Kpehru na ọ ta, ‘evaọ okenọ a te ruẹ nọ mẹ yọ ọrẹri evaọ udevie rai. 24 Mẹ te rehọ owhai no erẹwho na ze je koko owhai họ no ekwotọ na kpobi ze, mẹ vẹ rehọ owhai ziọ ẹkwotọ rai.+ 25 Mẹ te frẹ ame nọ ọ fo ku owhai, wha vẹ te fo;+ me ti ru owhai fo no egbegbe rai kpobi+ je no emedhọ etọtọ+ rai kpobi. 26 Mẹ te kẹ owhai udu okpokpọ+ je fi ẹzi ọkpokpọ họ eva rai.+ Me ti si udu nọ o wọhọ utho+ na no ugboma rai, mẹ vẹ kẹ owhai udu nọ o wọhọ uwo.* 27 Me ti fi ẹzi mẹ họ eva rai, me ve ti ru owhai nya evaọ ijaje mẹ,+ wha ve ti koko je ru lele izi oziẹobro mẹ. 28 Kẹsena wha vẹ te rria ẹkwotọ nọ mẹ kẹ esẹ-esẹ rai na, wha vẹ te jọ ahwo mẹ, mẹ vẹ jọ Ọghẹnẹ rai.’+

29 “‘Me ti siwi owhai no egbegbe rai kpobi, me ve se ibi ekakọ na ze je ru ai vọ oria kpobi, yọ me ti ru nọ ohọo u gbe ti mu hu.+ 30 Me ti ru ibi ure gbe eware nọ a vu no udhu ze vọ oria kpobi, re omovuọ ohọo nọ u bi mu o gbẹ jọ owhai oma ofa vievie he evaọ udevie erẹwho na.+ 31 Kẹsena wha vẹ te kareghẹhọ idhere imuomu rai gbe iruẹru rai nọ i woma ha, oma obọrai u ve ti tu owhai oma fiki abe-ọriọ rai gbe iruẹru etọtọ rai.+ 32 Rekọ wha riẹ onana: Orọnikọ fiki rai me bi ro ru onana ha,’+ ere Jihova Olori nọ Ọ Mai Kpehru na ọ ta. ‘Ukpoye, jọ oma o vuọ owhai, re o jẹ jọ owhai oma nọ a hrẹ owhai kpotọ fiki idhere rai, O uwou Izrẹl.’

33 “Enẹ Jihova Olori nọ Ọ Mai Kpehru na ọ ta: ‘Evaọ ẹdẹ yena nọ me ti ru owhai fo no abe-ọriọ rai kpobi na, me ti ru ahwo rria ikpewho+ na je ru re a wariẹ bọ eria nọ e raha no na.+ 34 A te kọ eware fihọ ẹkwotọ ofofe na, onọ o jọ ofofe re ohwo kpobi nọ ọ be nya etẹe vrẹ ọ ruẹ e riẹ na. 35 Ahwo a te ta nọ; “Ẹkwotọ nọ ọ jọ ofofe na ọ wọhọ ọgbọ Idẹn+ enẹna, yọ ikpewho nọ e raha no, nọ e jọ ofofe, nọ a kporo kuotọ vẹre na, a di ogba wariẹ ae họ no enẹna jẹ be rria ae.”+ 36 Erẹwho nọ i kiọkọ nọ e wariẹ owhai họ e te riẹ nọ mẹ omamẹ Jihova, mẹ bọ oria nọ a kporo kuotọ no, mẹ tẹ jẹ kọ eware fihọ oria nọ o jọ ofofe na no. Mẹ omamẹ, Jihova, mẹ ta riẹ no, me te je ru ei no.’+

37 “Enẹ Jihova Olori nọ Ọ Mai Kpehru na ọ ta: ‘Mẹ te jẹ kẹ uwou Izrẹl uvẹ re a yare omẹ nọ me ru onana kẹ ae, inọ me ru ahwo rai vihọ wọhọ uthuru. 38 Wọhọ ogbotu erẹri na, wọhọ ogbotu ahwo Jerusalẹm* evaọ oke ehaa riẹ,+ ahwo buobu gbidi gbidi a te vọ ikpewho nọ e raha no vẹre na;+ a vẹ te riẹ nọ mẹ họ Jihova.’”

37 Obọ Jihova o jọ ehru mẹ, Jihova ọ tẹ rọ ẹkwoma ẹzi riẹ wọ omẹ, o te fi omẹ họ otọ evaọ udevie ukiekpotọ opraprara na,+ yọ igbenwa e vọ riẹ eva. 2 O te ru omẹ nya ae wariẹ, mẹ tẹ ruẹ nọ igbenwa nọ e rrọ ukiekpotọ opraprara na i bu gaga, yọ e ya fia gaga.+ 3 Ọ nọ omẹ nọ: “Ọmọ ohwo, kọ igbenwa nana e rẹ sae ziọ uzuazọ?” Mẹ tẹ ta nọ: “Jihova Olori nọ Ọ Mai Kpehru na, whẹ họ ọnọ ọ riẹ.”+ 4 Fikiere ọ tẹ ta kẹ omẹ nọ: “Ruẹaro kpahe igbenwa nana, re whọ ta kẹ ae nọ, ‘Whai igbenwa nọ e ya fia, wha yo ẹme nọ Jihova ọ ta:

5 “‘Enẹ Jihova Olori nọ Ọ Mai Kpehru na ọ ta kẹ igbenwa nana: “Me ti ru re ẹwẹ ọ ruọ owhai oma, wha vẹ te ziọ uzuazọ.+ 6 Me ti fi iriẹ gbe uwo họ owhai, mẹ vẹ rọ ohọroma ruru owhai je fi ẹwẹ họ eva rai, wha vẹ te ziọ uzuazọ; wha vẹ te riẹ nọ mẹ họ Jihova.”’”

7 Kẹsena mẹ tẹ ruẹaro wọhọ epanọ o jie uzi kẹ omẹ na. Nọ mẹ nwane ruẹaro no, me te yo edo jọ, edo eware nọ e be kao họ ohwohwo, igbenwa na i te mu oma họ ekugbe, ugbonwa avọ ugbonwa. 8 Mẹ tẹ ruẹ iriẹ gbe uwo nọ e ro rai, ohọroma u te ruru ai. Rekọ ẹwẹ ọ re ruọ ae oma ha.

9 Kẹsena ọ tẹ ta kẹ omẹ nọ: “Ruẹaro kẹ ofou na. Ruẹaro, ọmọ ohwo, re whọ ta kẹ ofou na nọ, ‘Enẹ Jihova Olori nọ Ọ Mai Kpehru na ọ ta: “No ibienẹ ene* na ze, O ofou,* re who fou ku ahwo nana nọ a kpe na, re a ruẹse ziọ uzuazọ.”’”

10 Fikiere mẹ tẹ ruẹaro nwane wọhọ epanọ o jie uzi kẹ omẹ, ẹwẹ* ọ tẹ ruọ ae oma, a tẹ ziọ uzuazọ jẹ rọ awọ rai dikihẹ,+ a jọ ogbaẹmo nọ u bu thesiwa.

11 Kẹsena ọ tẹ ta kẹ omẹ nọ: “Ọmọ ohwo, igbenwa nana yọ uwou Izrẹl soso.+ Keme a be ta nọ, ‘Igbenwa mai e ya fia no, ma gbe wo ẹruore he.+ A bru omai kufiẹ no riẹriẹriẹ.’ 12 Fikiere ruẹaro re whọ ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Me ti rovie iki rai,+ mẹ vẹ kpare owhai no iki rai ze, ahwo mẹ, mẹ vẹ rehọ owhai ziọ ẹkwotọ Izrẹl.+ 13 Wha vẹ te riẹ nọ mẹ họ Jihova evaọ okenọ me ti rovie iki rai gbe okenọ mẹ te kpare owhai no eva iki rai ze, O ahwo mẹ.”’+ 14 ‘Me ti fi ẹzi mẹ họ owhai oma, wha vẹ te ziọ uzuazọ,+ yọ me ti fi owhai họ ẹkwotọ rai re wha rriae; wha vẹ te riẹ nọ mẹ omamẹ Jihova, mẹ ta riẹ no, me te je ru ei no,’ ere Jihova ọ ta.”

15 Ẹme Jihova ọ tẹ wariẹ bru omẹ ze, inọ: 16 “Whẹ ọmọ ohwo, tọlọ umure re who kere fihọ iẹe nọ, ‘Rọkẹ Juda jẹ rọkẹ ahwo Izrẹl nọ a rrọ kugbei.’*+ Kẹsena whọ vẹ tọlọ umure ọfa re who kere fihọ iẹe nọ, ‘Rọkẹ Josẹf, umure Ifremu, gbe ahwo uwou Izrẹl kpobi nọ a rrọ kugbei.’*+ 17 Kẹsena whọ vẹ rehọ ae ze kẹle ohwohwo re i zihe ruọ umure ọvo evaọ obọ ra.+ 18 Nọ ahwo ra* a tẹ ta kẹ owhẹ nọ, ‘Kọ whọ gbẹ vuẹ omai otọ eware nana?’ 19 whọ vẹ ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Mẹ te tọlọ umure Josẹf nọ o rrọ obọ Ifremu na, avọ erua Izrẹl nọ e rrọ kugbei, me ve ku ai kugbe umure Juda; me ve ru ai fihọ umure ọvo,+ a ve zihe ruọ ọvo evaọ obọ mẹ.”’ 20 Imire nọ who kere ẹme fihọ na e rẹ jọ obọ ra re a ruẹ e rai.

21 “Kẹsena whọ vẹ ta kẹ ae nọ, ‘Enẹ Jihova Olori nọ Ọ Mai Kpehru na ọ ta: “Mẹ te rehọ ahwo Izrẹl no udevie erẹwho nọ a kpohọ na ze, me ve koko ai họ no ofẹ kpobi ze, jẹ rehọ ae ziọ ẹkwotọ rai.+ 22 Me ti ru ai fihọ orẹwho ovo evaọ ẹkwotọ na,+ evaọ ehru igbehru Izrẹl, yọ ovie ọvo o ti su aikpobi,+ a gbẹ te jọ erẹwho ivẹ ofa ha; yọ a gbẹ te hẹriẹ ae fihọ ekwotọ-ivie ivẹ ofa ha.+ 23 A gbẹ te rọ emedhọ etọtọ* rai avọ iruẹru etọtọ rai gbe izieraha rai kpobi ro zue omarai ofa ha.+ Me ti siwi ai no eware iyoma kpobi nọ a ru rọ raha uzi, me ve ti ru ai fo. A te jọ ahwo mẹ, mẹ omamẹ mẹ vẹ te jọ Ọghẹnẹ rai.+

24 “‘“Devidi odibo mẹ ọ te jọ ovie rai,+ aikpobi a ti wo othuru-igodẹ ọvo.+ A te nya evaọ izi oziẹobro mẹ jẹ romatotọ koko izi mẹ.+ 25 A te rria ẹkwotọ nọ mẹ rọ kẹ odibo mẹ, Jekọp, oria nọ esẹ-esẹ rai e rria,+ a vẹ te rria eva riẹ bẹdẹ bẹdẹ,+ te ai te emọ* rai gbe emọ emọ rai;+ Devidi odibo mẹ ọ te jọ osu* rai bẹdẹ bẹdẹ.+

26 “‘“Mẹ te re ọvọ udhedhẹ kugbe ai;+ o te jọ ọvọ ebẹdẹ bẹdẹ nọ mẹ re kugbe ai. Me ti ru ai dowọ muotọ je ru ai jọ buobu,+ yọ me ti fi aruẹri mẹ họ udevie rai bẹdẹ bẹdẹ. 27 Uwou-udhu mẹ* o te jọ kugbe* ai, yọ mẹ te jọ Ọghẹnẹ rai, a vẹ te jọ ahwo mẹ.+ 28 Erẹwho na e vẹ te riẹ nọ mẹ Jihova, me bi ru Izrẹl họ ọrẹri evaọ okenọ aruẹri mẹ o te jọ udevie rai bẹdẹ bẹdẹ na.”’”+

38 Ẹme Jihova ọ tẹ wariẹ bru omẹ ze, inọ: 2 “Ọmọ ohwo, rẹriẹ ovao ku Gọg ọrọ ẹkwotọ Magọg,+ olori osu* obọ Mishẹk avọ Tubal,+ re whọ ruẹaro oware nọ o te via kẹe.+ 3 Ta nọ, ‘Enẹ Jihova Olori nọ Ọ Mai Kpehru na ọ ta: “Rri, mẹ te rọsuọ owhẹ, O Gọg, olori osu* obọ Mishẹk avọ Tubal. 4 Me ti ku owhẹ rẹriẹ, mẹ vẹ jẹ eghọlọ họ agba ra,+ me ve si owhẹ avọ ogbaẹmo ra soso lahwe,+ enyenya avọ edhẹ-enyenya, enọ aikpobi a ku iwu iwowoma họ, ogbotu ahwo buobu nọ e wha ejese ilogbo gbe ejese esese,* aikpobi a kru egbọdọ; 5 Pasia, Ẹtiopia, gbe Put+ a rrọ kugbe ai, aikpobi a wha ojese osese gbe etu-ọgaga; 6 Goma avọ egbaẹmo riẹ kpobi, ahwo uwou Togama+ nọ a no eria nọ e mai thabọ evaọ ẹkpẹlobọ ovatha-ọre ze, te egbaẹmo riẹ kpobi—ahwo buobu a rrọ kugbe owhẹ.+

7 “‘“Ruẹrẹ oma kpahe, ruẹrẹ oma ra họ, te owhẹ te egbaẹmo ra kpobi nọ wha gbe kokohọ na, whẹ whọ te jọ ọnọ o wuzou rai.*

8 “‘“A ti ru oware jọ kpahe owhẹ* nọ edẹ buobu e tẹ vrẹ no. Evaọ abọ urere ikpe na, whọ te vẹruọ ẹkwotọ nọ a siwi ahwo riẹ no ọraha ọgbọdọ na no, enọ a kokohọ no udevie ahwo buobu ze ziọ igbehru Izrẹl, enọ e raha fihọ otọ anwọ oke krẹkri nọ u kpemu. Udevie ahwo na a zihe ahwo nọ a be rria ẹkwotọ nana no ze, yọ aikpobi a be rria avọ omofọwẹ.+ 9 Whọ te wọ ze rọsuọ ae wọhọ okpofou, who ve ti ruru ẹkwotọ na wọhọ ẹgho, te owhẹ te egbaẹmo ra kpobi gbe ahwo buobu nọ a rrọ kugbe owhẹ.”’

10 “Enẹ Jihova Olori nọ Ọ Mai Kpehru na ọ ta: ‘Evaọ ẹdẹ yena, iroro jọ e te ruọ owhẹ udu, whọ vẹ te ma omaa uyoma jọ. 11 Whọ te ta nọ: “Mẹ te vẹruọ ẹkwotọ nọ o wo iwhre nọ a di ogba wariẹ hẹ* na.+ Mẹ te wọ ze rọsuọ ahwo nọ a be rria avọ omofọwẹ, ababọ ukpokpoma, aikpobi a be rria iwhre nọ a ma igbẹhẹ wariẹ hẹ, nọ i wo ekpọ nọ a rẹ rọ kare ẹthẹ hẹ, hayo inuethẹ hẹ.” 12 A ti ru onana re a kwa egbo-ẹmo gbe eware buobu rehọ, re a họre eria nọ a raha vẹre nọ a be rria enẹna,+ gbe ahwo nọ a wariẹ kokohọ no erẹwho na ze,+ enọ i bi koko ekwakwa efe gbe eware họ,+ ahwo nọ a be rria udevie otọakpọ na.

13 “‘Shiba+ avọ Didan,+ egba-ihreki Tashish+ avọ egbaẹmo riẹ kpobi* a te ta kẹ owhẹ nọ: “Kọ whọ be vẹruọ ae re whọ kwa egbo-ẹmo avọ eware buobu rehọ? Kọ who koko egbaẹmo ra họ no re a wha isiliva avọ igoru vrẹ, re a kwa ekwakwa efe gbe eware, re a gboro egbo-ẹmo buobu gbidi gbidi?”’

14 “Fikiere ọmọ ohwo, ruẹaro, re whọ ta kẹ Gọg nọ, ‘Enẹ Jihova Olori nọ Ọ Mai Kpehru na ọ ta: “Evaọ ẹdẹ yena nọ ahwo mẹ Izrẹl a te rria avọ omofọwẹ na, kọ whọ gbẹ te riẹ?+ 15 Who ti no oria ra ze, no eria nọ e mai thabọ evaọ ẹkpẹlobọ ovatha-ọre na ze,+ te owhẹ te ahwo buobu nọ a rrọ kugbe owhẹ, enọ aikpobi a be dhẹ enyenya, ogbotu ahwo buobu, ogbaẹmo nọ u bu thesiwa.+ 16 Whọ te wọ ze rọsuọ ahwo mẹ wọhọ ẹgho nọ o ruru ẹkwotọ na. O Gọg, evaọ abọ urere edẹ na, me ti ru owhẹ wọ ze rọsuọ ẹkwotọ mẹ+ re erẹwho na e ruẹse riẹ omẹ evaọ okenọ mẹ te rọ ẹkwoma ra dhesẹ via evaọ iraro rai nọ mẹ yọ ọrẹri.”’+

17 “Enẹ Jihova Olori nọ Ọ Mai Kpehru na ọ ta: ‘Kọ ogbẹrọnọ whẹ ọvona mẹ rọ ẹkwoma idibo mẹ eruẹaro Izrẹl ruẹaro kpahe evaọ okenọ u kpemu, enọ e ruẹaro evaọ ikpe buobu inọ a te rehọ owhẹ ze rọsuọ ae?’

18 “‘Evaọ ẹdẹ yena, evaọ ẹdẹ nọ Gọg ọ te vẹruọ ẹkwotọ Izrẹl na,’ ere Jihova Olori nọ Ọ Mai Kpehru na ọ ta, ‘ofu ọgaga mẹ ọ te wọ ze.+ 19 Mẹ te rọ ọwhọ mẹ, erae ofu ọgaga mẹ rọ ta ẹme; yọ evaọ ẹdẹ yena, otọ u ti nuhu gaga evaọ ẹkwotọ Izrẹl. 20 Fiki mẹ, iyei abade na, evra obọ ehru na, erao ijihẹ obọ ẹwọ, erao kpobi nọ i re si hayo katiẹ evaọ otọ, gbe ahwo kpobi nọ a rrọ otọakpọ na a ti nuhu, yọ a ti kporo igbehru na fihọ otọ,+ eria nọ e galevi evaọ ikpehru i ti bru fihọ otọ, ugbẹhẹ kpobi u ti zurie fihọ otọ re.’

21 “‘Me ti se ọgbọdọ ze rọsuọ ẹe evaọ ehru igbehru mẹ kpobi,’ ere Jihova Olori nọ Ọ Mai Kpehru na ọ ta. ‘Ohwo kpobi ọ te rọ ọgbọdọ riẹ họre omoni obọriẹ.+ 22 Okpẹyao nọ o re vo+ gbe azẹ-okpe me ti ro guẹdhọ riẹ;* yọ me ti ru okposo nọ o re kporo ẹkẹre gbe oso-itho+ gbe erae+ gbe isọ-ọre+ rrọ ze fihọ ehru riẹ avọ ehru egbaẹmo riẹ gbe ehru ahwo buobu nọ a rrọ kugbei na.+ 23 Mẹ te ginẹ kpare omamẹ kpehru, ru omamẹ ọrẹri, je dhesẹ omamẹ via evaọ iraro erẹwho buobu; a vẹ te riẹ nọ mẹ họ Jihova.’

39 “Whẹ ọmọ ohwo, ruẹaro oware nọ o te via kẹ Gọg,+ re whọ ta kẹe nọ, ‘Enẹ Jihova Olori nọ Ọ Mai Kpehru na ọ ta: “Mẹ te rọsuọ owhẹ, Gọg, olori osu* obọ Mishẹk avọ Tubal.+ 2 Me ti ku owhẹ rẹriẹ, me ve ru owhẹ no eria nọ e mai thabọ evaọ ẹkpẹlobọ ovatha-ọre ze,+ mẹ vẹ rehọ owhẹ ziọ ehru igbehru Izrẹl. 3 Mẹ te tehe uze ra no ẹkpẹlobọ ra je ru ese ra kie no obọze ra. 4 Who ti kie fihọ igbehru Izrẹl,+ te owhẹ te egbaẹmo ra kpobi gbe ahwo nọ a rrọ kugbe owhẹ. Mẹ te rehọ owhẹ kẹ oghẹrẹ evra kpobi nọ i re kpe erao gbe erao ijihẹ obọ ẹwọ na re a re owhẹ no.”’+

5 “‘Who ti kie fihọ ẹwọ ovevẹ na,+ keme mẹ omamẹ mẹ ta riẹ no,’ ere Jihova Olori nọ Ọ Mai Kpehru na ọ ta.

6 “‘Me ti vi erae ze te mahe Magọg gbe ahwo nọ a be rria avọ omofọwẹ evaọ ikoliko na,+ a vẹ te riẹ nọ mẹ họ Jihova. 7 Me ti ru re a riẹ odẹ ọrẹri mẹ evaọ udevie ahwo mẹ Izrẹl, mẹ gbẹ te kuvẹ re a gbe odẹ ọrẹri mẹ ku ofa ha; erẹwho na e vẹ te riẹ nọ mẹ họ Jihova,+ ọnọ ọ rrọ Ọrẹri evaọ Izrẹl.’+

8 “‘Ẹhẹ, onana o be tha, o te seba erugba ha,’ ere Jihova Olori nọ Ọ Mai Kpehru na ọ ta. ‘Ẹdẹ nana họ ẹdẹ nọ mẹ ta kpahe na. 9 Ahwo nọ a be rria ikpewho Izrẹl a te nya lahwe, a vẹ rehọ ekwakwa ẹmo na koko erae họ—ejese esese* na avọ ejese ilogbo na, ize avọ ese na, ekpọ* ẹmo* avọ izuẹ na. A te rehọ ai koko erae họ+ evaọ ikpe ihrẹ. 10 A ti du jọ obọ ẹwọ rehọ ire he hayo jọ ewhawho na hwe ire erae he, keme a te rehọ ekwakwa ẹmo na koko erae họ.’

“‘A te kwa egbo-ẹmo mi ahwo nọ a kwa egbo-ẹmo rai rehọ, jẹ kwa eware mi ahwo nọ a jẹ kwa eware rai rehọ,’ ere Jihova Olori nọ Ọ Mai Kpehru na ọ ta.

11 “‘Evaọ ẹdẹ yena, me ti ki Gọg+ fihọ oria jọ evaọ Izrẹl, evaọ ukiekpotọ ahwo nọ a rẹ nya ofẹ ovatha-ọre abade na vrẹ, yọ u ti di edhere ahwo nọ a be nyavrẹ. Etẹe a ti ki Gọg fihọ avọ ogbotu ahwo riẹ kpobi, a ve ti sei Ukiekpotọ Hemọn-Gọg.*+ 12 Emerae ihrẹ o te rehọ ahwo uwou Izrẹl nọ a ti ro ki ai, re a ruẹsi ru ẹkwotọ na fo.+ 13 Ahwo ẹkwotọ na kpobi a ti ki ai, yọ onana u ti ru odẹ rai do evaọ ẹdẹ nọ mẹ te wha orro se omamẹ,’+ ere Jihova Olori nọ Ọ Mai Kpehru na ọ ta.

14 “‘A te rehọ ezae mu nọ e te hae nya ẹkwotọ na wariẹ kẹse kẹse re a ki iri nọ i kiọkọ otọ na, re a ruẹsi ru ei fo. A te gbẹ gwọlọ iri na evaọ emerae ihrẹ. 15 Nọ ahwo nọ a be nya ẹkwotọ na wariẹ na a tẹ ruẹ ugbonwa ohwo, a vẹ ka oka fihọ akotọ riẹ. Kẹsena enọ a ro mu re a ki ahwo na a ve ki ei fihọ Ukiekpotọ Hemọn-Gọg.+ 16 Yọ okpẹwho jọ o te jọ etẹe nọ a re se Hamona.* A ve ti ru ẹkwotọ na fo.’+

17 “Rọkẹ owhẹ, ọmọ ohwo, enẹ Jihova Olori nọ Ọ Mai Kpehru na ọ ta: ‘Ta kẹ oghẹrẹ ọvra kpobi gbe erao ijihẹ obọ ẹwọ na kpobi nọ, “Wha koko omarai họ re wha nyaze. Wha koko wariẹ idheidhe nọ mẹ be ruẹrẹhọ kẹ owhai, idheidhe ilogbo evaọ ehru igbehru Izrẹl.+ Wha te re uwo jẹ da azẹ.+ 18 Wha te re uwo-oma ahwo ologbo jẹ da azẹ isu otọakpọ na—igbo na, imigodẹ, ewe, gbe iruẹ na—erao epoporiẹ Beshan kpobi. 19 Wha te jọ idheidhe nọ mẹ ruẹrẹhọ kẹ owhai na re iwhri vọ eva jẹ da azẹ bẹsenọ i re mu owhai.”’

20 “‘Wha te jọ emẹjẹ mẹ re enyenya avọ ahwo nọ a rẹ dhẹ ekẹkẹ vọ eva, te ahwo ologbo gbe oghẹrẹ egbaẹmo kpobi,’+ ere Jihova Olori nọ Ọ Mai Kpehru na ọ ta.

21 “‘Me ti dhesẹ oruaro mẹ via evaọ udevie erẹwho na, erẹwho na kpobi e vẹ te ruẹ oware nọ me bruoziẹ riẹ nọ me ru no gbe ogaga* nọ me dhesẹ via evaọ udevie rai.+ 22 No umuo ẹdẹ yena vrẹ, uwou Izrẹl o vẹ te riẹ nọ mẹ họ Jihova Ọghẹnẹ rai. 23 Erẹwho na e vẹ te riẹ nọ uwou Izrẹl u kpohọ igbo fiki oruthọ obọrai, fikinọ a nyasiọ omẹ ba.+ Fikiere me te si ovao mẹ dhere no ai+ jẹ rehọ ae kẹ ewegrẹ rai,+ a tẹ rọ ọgbọdọ kpe aikpobi no. 24 Wọhọ epaọ egbegbe rai gbe izieraha rai me ro ru ai oware na, me te si ovao mẹ dhere no ai.’

25 “Fikiere enẹ Jihova Olori nọ Ọ Mai Kpehru na ọ ta: ‘Me ti ru re ahwo Jekọp nọ a mu a zihe ze,+ jẹ re ohrọ uwou Izrẹl soso;+ mẹ vẹ te rọ ọwhọ thothọ* odẹ ọrẹri mẹ.+ 26 Nọ a te kpomovuọ họ ae oma fiki eware kpobi nọ a jọ ghẹmeeyo kẹ omẹ no,+ a vẹ te rria ẹkwotọ rai avọ omofọwẹ, yọ ohwo ọvo o ti ru ozọ mu ai hi.+ 27 Okenọ me ti zihe ai no udevie ahwo na ze je koko ae họ no ekwotọ ewegrẹ rai ze,+ mẹ te jẹ jọ iraro erẹwho buobu dhesẹ omamẹ via inọ mẹ yọ ọrẹri evaọ udevie rai.’+

28 “‘A te riẹ nọ mẹ họ Jihova Ọghẹnẹ rai evaọ okenọ me ti vi ai kpohọ igbo evaọ udevie erẹwho na je koko ai họ zihe ziọ ẹkwotọ rai, mẹ te nyasiọ ọvuọvo rai ba obei hi.+ 29 Me gbe ti si ovao mẹ dhere no ai hi,+ keme me ti ku ẹzi mẹ ku uwou Izrẹl,’+ ere Jihova Olori nọ Ọ Mai Kpehru na ọ ta.”

40 Evaọ ukpe avọ udhegbisoi nọ ma rọ jọ igbo na,+ evaọ obọ emuhọ ukpe na, evaọ ẹdẹ avọ ikpe amara na, evaọ ukpe avọ ikpegbene nọ okpẹwho na o ro kie no na,+ obọ Jihova o jọ ehru mẹ evaọ ẹdẹ yena, ọ tẹ wọ omẹ kpohọ okpẹwho na.+ 2 Ọ wọ omẹ ziọ ẹkwotọ Izrẹl ẹkwoma eruẹaruẹ nọ i no obọ Ọghẹnẹ ze, o te fi omẹ họ ehru ugbehru jọ nọ u kpehru gaga,+ onọ oware jọ nọ o wọhọ okpẹwho o jọ ehru riẹ evaọ ofẹ obọze ovatha-ọre.

3 Okenọ ọ rehọ omẹ ziọ etẹe, mẹ tẹ ruẹ ọzae jọ nọ oma riẹ u je lo wọhọ ekọpa.+ O kru ufi eflase* gbe ukpoko* nọ a rẹ rọ ma oware họ obọ,+ yọ o dikihẹ unuẹthẹ nọ a rẹ rọ ruọ eva na. 4 Ọzae na ọ ta kẹ omẹ nọ: “Ọmọ ohwo, rri ziezi, gaviezọ ziezi, je muẹrohọ* oware kpobi nọ me ti dhesẹ kẹ owhẹ, keme fikioye a rọ rehọ owhẹ ziọ etenẹ na. Whọ rẹ vuẹ uwou Izrẹl oware kpobi nọ whọ te ruẹ.”+

5 Mẹ ruẹ ugbẹhẹ nọ o wariẹ otafe etẹmpol* na họ. Ọzae na o kru ukpoko nọ a rẹ rọ ma oware họ obọ, onọ u theri te ikiubiti ezeza (a fi okẹkẹe iziabọ ene ba ikiubiti ọvuọvo).* O te mu ugbẹhẹ na họ ẹma, okpa riẹ o jọ ukpoko ovo, yọ u kpehru te ukpoko ovo.

6 Kẹsena ọ tẹ nyaze obọ unuẹthẹ nọ u rri obọ ovatha-ọre,+ ọ tẹ gadiẹ istẹpo riẹ. Nọ ọ ma oria unuẹthẹ na, okẹkẹe riẹ o jọ ukpoko ovo, yọ okẹkẹe oria unuẹthẹ abọdekọ o jọ ukpoko ovo re. 7 Ubruwou iroiro na ọvuọvo u theri te ukpoko ovo jẹ kẹre te ukpoko ovo, yọ ibriwou iroiro na e rehọ ikiubiti isoi thabọ no ohwohwo.+ Oria unuẹthẹ na nọ o kẹle ọmọgwa unuẹthẹ nọ u rri obeva na o jọ ukpoko ovo.

8 Ọ ma ọmọgwa unuẹthẹ na nọ u rri obeva na, yọ o jọ ukpoko ovo. 9 Kẹsena ọ tẹ ma ọmọgwa unuẹthẹ na, o jọ ikiubiti eree; ọ tẹ ma ipila akotọ riẹ, e jọ ikiubiti ivẹ; yọ ọmọgwa unuẹthẹ na o jọ ofẹ nọ u rri obeva.

10 Ibriwou iroiro esa e jọ tabọ tabọ unuẹthẹ ovatha-ọre na. Esa na e jọ ẹrẹrẹe, yọ ipila akotọ nọ e rrọ tabọ tabọ na e jọ ẹrẹrẹe.

11 Kẹsena ọ tẹ ma okẹkẹe aro unuẹthẹ na, o jọ ikiubiti ikpe; yọ uthethei unuẹthẹ na o jọ ikiubiti ikpegbesa.

12 Oria nọ a rọ umugbẹhẹ ghale nọ o rrọ aro ibriwou iroiro na evaọ tabọ tabọ o jọ ikiubiti ọvo. Ibriwou iroiro na ọvuọvo evaọ tabọ tabọ e jọ ikiubiti ezeza.

13 Kẹsena ọ tẹ jọ obehru* ibriwou iroiro na ma unuẹthẹ na, ọ ma riẹ no obehru ubruwou iroiro nọ o rrọ ofẹ jọ rite obehru onọ o rrọ ofẹ odekọ, yọ okẹkẹe riẹ o jọ ikiubiti udhegbisoi; eria nọ a rẹ rọ ruọ eva na e rẹriẹ ovao ku ohwohwo.+ 14 Kẹsena ọ tẹ ma ipila akotọ na, enọ i theri te ikiubiti udhosa, jegbe ipila akotọ nọ e rrọ inuethẹ nọ e jọ ighẹ na wariẹ họ. 15 No aro unuẹthẹ na rite aro ọmọgwa nọ ọ rrọ obeva unuẹthẹ na o jọ ikiubiti udhuvẹ-gbikpe.

16 Ibriwou iroiro na avọ ipila akotọ rai nọ e rrọ obeva unuẹthẹ na evaọ tabọ tabọ i wo inwido nọ i wo ifremu ehwahwa.*+ Obeva emegwa na i te je wo inwido evaọ tabọ tabọ, yọ iwoho iriẹ+ e jọ oma ipila akotọ na.

17 Kẹsena ọ tẹ rehọ omẹ ziọ ighẹ otafe na, mẹ tẹ ruẹ ibriwou emuọriọ*+ gbe edhere jọ nọ ọ wariẹ ighẹ na họ. Ibriwou emuọriọ ọgba e jọ edhere na. 18 Okẹkẹe edhere nọ o jọ akotọ inuethẹ na avọ uthethei inuethẹ na ẹrẹrẹe—onana họ edhere obotọ na.

19 Kẹsena ọ tẹ ma epanọ aro unuẹthẹ obotọ na u thabọ* no otafe ighẹ obeva na te. O jọ ikiubiti udhusoi (100) evaọ ofẹ ovatha-ọre gbe ofẹ ẹkpẹlobọ ovatha-ọre.

20 Ighẹ otafe na u wo unuẹthẹ nọ u rri obọ ẹkpẹlobọ ovatha-ọre, ọ tẹ ma uthethei riẹ gbe okẹkẹe riẹ. 21 Ibriwou iroiro esa e jọ tabọ tabọ. Ipila akotọ riẹ avọ ọmọgwa riẹ gbe unuẹthẹ ọsosuọ na oghẹrẹ ovona e rro te. U theri te ikiubiti udhuvẹ-gbikpe, yọ o kẹre te ikiubiti udhegbisoi. 22 Inwido riẹ, ọmọgwa riẹ, gbe iwoho iriẹ+ riẹ avọ enọ e rrọ unuẹthẹ ofẹ ovatha-ọre na oghẹrẹ ovona e rro te. Istẹpo ihrẹ ahwo a rẹ gadiẹ rọ nya tei, yọ ọmọgwa riẹ ọ jọ aro rai.

23 Unuẹthẹ jọ o jọ ighẹ obeva na nọ o rẹriẹ ovao ku unuẹthẹ ẹkpẹlobọ ovatha-ọre, yọ ofa o rẹriẹ ovao ku unuẹthẹ ovatha-ọre na. Ọ ma epanọ unuẹthẹ jọ u thabọ no unuẹthẹ odekọ te, o jọ ikiubiti udhusoi (100).

24 Kẹsena ọ tẹ rehọ omẹ ziọ ofẹ obọze ovatha-ọre, mẹ tẹ ruẹ unuẹthẹ jọ evaọ ofẹ obọze ovatha-ọre na.+ Ọ ma ipila akotọ riẹ gbe ọmọgwa riẹ, yọ avọ edekọ na e jọ ẹrẹrẹe. 25 Inwido e jọ tabọ tabọ riẹ avọ ọmọgwa riẹ, wọhọ epaọ inwido edekọ na. U theri te ikiubiti udhuvẹ-gbikpe, yọ o kẹre te ikiubiti udhegbisoi. 26 Istẹpo ihrẹ a rẹ rọ gadiẹ kpohọ iẹe,+ ọmọgwa riẹ ọ jọ aro rai. Yọ iwoho iriẹ e jọ oma ipila akotọ riẹ, ọvuọvo ọ jọ tabọ tabọ.

27 Ighẹ obeva na u wo unuẹthẹ nọ u rri obọze ovatha-ọre; ọ ma riẹ no unuẹthẹ te unuẹthẹ evaọ ofẹ obọze ovatha-ọre, yọ ikiubiti udhusoi (100) i ro thabọ no ohwohwo. 28 Kẹsena ọ tẹ rọ orọ unuẹthẹ obọze ovatha-ọre na rehọ omẹ ziọ ighẹ obeva na; nọ ọ ma unuẹthẹ obọze ovatha-ọre na, avọ edekọ na e jọ ẹrẹrẹe. 29 Ibriwou iroiro riẹ, ipila akotọ riẹ, gbe ọmọgwa riẹ avọ edekọ na e jọ ẹrẹrẹe. Inwido e jọ tabọ tabọ riẹ avọ ọmọgwa riẹ. U theri te ikiubiti udhuvẹ-gbikpe, yọ o kẹre te ikiubiti udhegbisoi.+ 30 Emegwa e jọ oria kpobi wariẹ; i theri te ikiubiti udhegbisoi, yọ e kẹre te ikiubiti isoi. 31 Ọmọgwa riẹ ọ rẹriẹ ovao ku ighẹ otafe na, yọ iwoho iriẹ e rrọ oma ipila akotọ riẹ,+ istẹpo eree a rẹ rọ gadiẹ kpohọ iẹe.+

32 Nọ ọ rehọ omẹ no obọ ovatha-ọre ziọ ighẹ obeva na, ọ tẹ ma unuẹthẹ na, yọ avọ edekọ na e jọ ẹrẹrẹe. 33 Ibriwou iroiro riẹ, ipila akotọ riẹ, gbe ọmọgwa riẹ avọ edekọ na e jọ ẹrẹrẹe. Inwido e jọ tabọ tabọ riẹ avọ ọmọgwa riẹ. U theri te ikiubiti udhuvẹ-gbikpe, yọ o kẹre te ikiubiti udhegbisoi. 34 Ọmọgwa riẹ ọ rẹriẹ ovao ku ighẹ otafe na, yọ iwoho iriẹ e rrọ oma ipila akotọ riẹ, istẹpo eree a rẹ rọ gadiẹ kpohọ iẹe.

35 Kẹsena ọ tẹ rehọ omẹ ziọ unuẹthẹ ẹkpẹlobọ ovatha-ọre,+ ọ tẹ mae; yọ avọ edekọ na e jọ ẹrẹrẹe. 36 Ibriwou iroiro riẹ, ipila akotọ riẹ, gbe ọmọgwa riẹ avọ edekọ na e jọ ẹrẹrẹe. U wo inwido evaọ tabọ tabọ. U theri te ikiubiti udhuvẹ-gbikpe, yọ o kẹre te ikiubiti udhegbisoi. 37 Ipila akotọ riẹ e rẹriẹ ovao ku ighẹ otafe na, yọ iwoho iriẹ e rrọ oma ipila akotọ riẹ nọ e rrọ tabọ tabọ, istẹpo eree a rẹ rọ gadiẹ kpohọ iẹe.

38 Ubruwou emuọriọ avọ oria nọ a rẹ rọ ruọ eva riẹ o kẹle ipila akotọ inuethẹ na, oria nọ a rẹ jọ wozẹ idhe emahọ na.+

39 Emẹjẹ ivẹ nọ a rẹ jọ va erao idhe emahọ,+ idhe uzioraha,+ gbe idhe abe-ọriọ+ e jọ tabọ tabọ ọmọgwa unuẹthẹ na. 40 Emẹjẹ ivẹ e jọ otafe oria nọ a re ro kpobọ unuẹthẹ ẹkpẹlobọ ovatha-ọre na. Emẹjẹ ivẹ e tẹ jẹ jọ abọdekọ ọmọgwa unuẹthẹ na. 41 Emẹjẹ ene e jọ tabọ tabọ unuẹthẹ na—aikpobi emẹjẹ eree—enọ a rẹ jọ ehru rai va erao nọ a re ro dhe idhe. 42 Itho nọ a bru a ro ru emẹjẹ ene nọ e jọ rọkẹ idhe emahọ na. I theri te ikiubiti ọvo gbe ubro, e kẹre te ikiubiti ọvo gbe ubro, yọ i kpehru te ikiubiti ọvo. Ehru rai a fi eware nọ a rẹ rọ va erao idhe emahọ gbe oghẹrẹ idheidhe efa na họ. 43 A tehe ekọbọdo sa-sa nọ e kẹre te okẹkẹe evabọ fihọ igbẹhẹ obeva na kpobi wariẹ họ; yọ ehru emẹjẹ sa-sa na a rẹ wọ ekẹ erao idhe okẹ na fihọ.

44 Ibriwou emuọriọ nọ e jọ rọkẹ eso-ile na e jọ otafe unuẹthẹ obeva na;+ e jọ ighẹ obeva na kẹle unuẹthẹ ẹkpẹlobọ ovatha-ọre na, yọ e rẹriẹ ovao ku obọze ovatha-ọre. Ubruwou emuọriọ ofa o jọ kẹle unuẹthẹ ovatha-ọre, yọ o rẹriẹ ovao ku ẹkpẹlobọ ovatha-ọre.

45 Ọ ta kẹ omẹ nọ: “Ubruwou emuọriọ nana nọ o rẹriẹ ovao ku obọze ovatha-ọre na o rrọ rọkẹ izerẹ nọ e be rẹrote iruo nọ e rrọ etẹmpol na.+ 46 Ubruwou emuọriọ nọ o rẹriẹ ovao ku ẹkpẹlobọ ovatha-ọre na o rrọ rọkẹ izerẹ nọ e be rẹrote iruo agbada-idhe na.+ Emezae Zedọk a rrọ,+ enọ e rrọ ahwo Livae nọ a ro mu re a ziọ aro Jihova te gbodibo kẹe.”+

47 Kẹsena ọ tẹ ma ighẹ obeva na. U theri te ikiubiti udhusoi (100), yọ o kẹre te ikiubiti udhusoi (100), ibienẹ ene na ẹrẹrẹe. Agbada-idhe na o jọ aro etẹmpol na.

48 Kẹsena ọ tẹ rehọ omẹ ziọ ọmọgwa etẹmpol na,+ ọ tẹ ma ipila akotọ ọmọgwa na, o kẹre te ikiubiti isoi evaọ ofẹ jọ, o tẹ jẹ kẹre te ikiubiti isoi evaọ ofẹ odekọ. Okẹkẹe unuẹthẹ na evaọ ofẹ jọ ikiubiti esa, ofẹ odekọ ikiubiti esa re.

49 Ọmọgwa na o theri te ikiubiti udhe, yọ o kẹre te ikiubiti ikpegbọvo.* Istẹpo na ahwo a rẹ gadiẹ ro kpohọ iẹe. Ipila e kẹle egbẹ akotọ uwou na, ọvuọvo ọ jọ tabọ tabọ.+

41 Kẹsena ọ tẹ rehọ omẹ ziọ aruẹri otafe na,* ọ tẹ ma ipila akotọ na; e kẹre te ikiubiti ezeza* evaọ ofẹ jọ, e tẹ jẹ kẹre te ikiubiti ezeza evaọ ofẹ odekọ. 2 Oria nọ a rẹ rọ ruọ eva na o kẹre te ikiubiti ikpe, yọ igbẹhẹ akotọ* oria nọ a rẹ rọ ruọ eva na o jọ ikiubiti isoi evaọ ofẹ jọ, gbe ikiubiti isoi evaọ ofẹ odekọ. Ọ ma uthethei riẹ, o jọ ikiubiti udhuvẹ, ọ tẹ jẹ ma okẹkẹe riẹ, o jọ ikiubiti udhe.

3 Kẹsena ọ tẹ nyaruọ obeva,* ọ tẹ ma ipila akotọ oria nọ a rẹ rọ ruọ eva na, okpa riẹ o jọ ikiubiti ivẹ, yọ oria nọ a rẹ rọ ruọ eva na o jọ ikiubiti ezeza. Igbẹhẹ akotọ oria nọ a rẹ rọ ruọ eva na e jọ* ikiubiti ihrẹ. 4 Kẹsena ọ tẹ ma ubruwou nọ o rẹriẹ ovao ku aruẹri otafe na, u theri te ikiubiti udhe jẹ kẹre te ikiubiti udhe.+ Ọ tẹ ta kẹ omẹ nọ: “Oria nana họ Ọrẹri Erẹri na.”+

5 Kẹsena ọ tẹ ma ugbẹhẹ etẹmpol na, okpa riẹ o jọ ikiubiti ezeza. Ibriwou akotọ nọ e wariẹ etẹmpol na họ e kẹre te ikiubiti ene.+ 6 Ibriwou akotọ na e jọ uwou ehru idhe esa, e jọ ehru ohwohwo, yọ ibriwou ọgba e jọ edhe ọvuọvo. A ru egbẹ jọ fihọ ugbẹhẹ etẹmpol na wariẹ họ nọ a rehọ ire ibriwou akotọ na kpahe, fikiere a thọrọ ire ibriwou na họ ugbẹhẹ etẹmpol na ha.+ 7 Evaọ tabọ tabọ etẹmpol na, emedhere ọwhawhaliẹ* jọ ọ jariẹ nọ ọ kẹre vrẹ ọvo kpobọ ibriwou obehru na.+ Nọ ohwo ọ tẹ be rọ orọ edhe udevie na gadiẹ no edhe obotọ kpobi kpohọ edhe obehru kpobi, ọ rẹ ruẹ nọ ibriwou edhe jọ e kẹre vi ibriwou edhe ọdekọ.

8 Mẹ ruẹ nọ umukpehru jọ o jariẹ wariẹ etẹmpol na họ, yọ etọhotọ ibriwou akotọ na rite ubienẹ na u te ukpoko ososo nọ u theri te ikiubiti ezeza. 9 Okẹkẹe ugbẹhẹ obeva ibriwou akotọ na o jọ ikiubiti isoi. Oria ovevẹ* jọ o jariẹ evaọ abotọ ibriwou akotọ na nọ o jọ abọjọ etẹmpol na.

10 Oria jọ o jọ udevie etẹmpol na avọ ibriwou emuọriọ* na+ nọ o kẹre te ikiubiti udhe evaọ tabọ tabọ. 11 Oria jọ nọ a rẹ rọ ruọ eva o jọ udevie ibriwou akotọ na avọ oria ovevẹ nọ o rrọ ofẹ ẹkpẹlobọ ovatha-ọre na, oria ofa nọ a rẹ rọ ruọ eva o tẹ jẹ jọ ofẹ obọze ovatha-ọre. Okẹkẹe oria ovevẹ na o jọ ikiubiti isoi wariẹ họ.

12 Uwou nọ o jọ ofẹ ukiediwo-ọre na nọ o rẹriẹ ovao ku oria ovevẹ na o kẹre te ikiubiti udhosa-gbikpe je theri te ikiubiti udhone-gbikpe; okpa ugbẹhẹ uwou na o jọ ikiubiti isoi wariẹ họ.

13 Ọ ma etẹmpol na, yọ u theri te ikiubiti udhusoi (100). Oria ovevẹ na, uwou na,* gbe igbẹhẹ riẹ i theri te ikiubiti udhusoi (100) re. 14 Okẹkẹe aro etẹmpol na nọ u rri obọ ovatha-ọre gbe oria ovevẹ na o jọ ikiubiti udhusoi (100).

15 Ọ ma uthethei uwou nọ o rẹriẹ ovao ku oria ovevẹ na evaọ obemu, kugbe igebara riẹ nọ e rrọ tabọ tabọ, e jọ ikiubiti udhusoi (100).

Ọ tẹ jẹ ma aruẹri otafe na, aruẹri obeva na,+ gbe emegwa nọ e rrọ ighẹ na, 16 jegbe inuwou na, inwido nọ i wo ifremu ehwahwa na,+ gbe igebara nọ e jọ eria esa yena. Kẹle unuwou na, a rọ ewẹ ekpala+ hwa ugbẹhẹ na no otọ duwu inwido na; yọ a rọ oware ruru inwido na. 17 Ọ jọ obehru oria nọ a rẹ rọ ruọ eva na ma, ọ jọ evaọ etẹmpol obeva na ma, ọ tẹ jẹ jọ obọ otafe na gbe ugbẹhẹ na soso wariẹ họ ma. 18 U wo chẹrub nọ a kare+ gbe iwoho iriẹ,+ oriẹ ọvuọvo ọ rrọ udevie chẹrub ivẹ, yọ chẹrub ọvuọvo o wo ovao ivẹ. 19 Ovao ohwo-akpọ na u rri oriẹ na evaọ abọjọ, ovao okpohrokpo* na u te rri oriẹ na evaọ abọdekọ.+ Enẹ a kare e rai fihọ evaọ oma etẹmpol na soso. 20 Chẹrub nọ a kare gbe iwoho iriẹ e jọ ugbẹhẹ aruẹri na no otọ duwu oria nọ o rrọ obehru oria nọ a rẹ rọ ruọ eva na.

21 Abọ ene inuethẹ* aruẹri na e jọ ẹrẹrẹe.+ Evaọ aro oria ọrẹri na,* oware jọ o jariẹ nọ o wọhọ 22 agbada-idhe ure+ nọ u kpehru te ikiubiti esa je theri te ikiubiti ivẹ. U wo ekpọ ibienẹ, yọ ure a ro ru obotọ* riẹ gbe ofẹ ene riẹ. Ọ tẹ ta kẹ omẹ nọ: “Emẹjẹ nana họ emẹjẹ nọ o rrọ aro Jihova.”+

23 Aruẹri otafe na avọ oria ọrẹri na ọvuọvo o wo ethẹ ivẹ.+ 24 Ethẹ na i wo ethẹ ivẹ nọ a rẹ jọ udevie rovie, ẹthẹ ọvuọvo o wo ethẹ ivẹ. 25 Chẹrub nọ a kare gbe iwoho iriẹ e jọ ethẹ aruẹri na, wọhọ enọ e jọ igbẹhẹ na.+ A tẹ jẹ rọ ire ruru ehru aro ọmọgwa nọ ọ jọ otafe na. 26 Inwido nọ i wo ifremu ehwahwa+ gbe iwoho iriẹ e jọ tabọ tabọ ọmọgwa na, jegbe ibriwou akotọ nọ e rrọ etẹmpol na avọ ire nọ i ruru akọ obehru igbẹhẹ na.

42 Kẹsena o te su omẹ kpohọ ighẹ otafe nọ o rrọ ofẹ ẹkpẹlobọ ovatha-ọre.+ Ọ tẹ rehọ omẹ ziọ oria ibriwou emuọriọ nọ o kẹle oria ovevẹ na,+ evaọ ofẹ ẹkpẹlobọ ovatha-ọre uwou nọ o kẹle etẹe.+ 2 Uthethei riẹ evaọ oria nọ a rẹ rọ ruọ eva nọ o rrọ ofẹ ẹkpẹlobọ ovatha-ọre o jọ ikiubiti udhusoi (100),* yọ o kẹre te ikiubiti udhuvẹ-gbikpe. 3 O jọ udevie ighẹ obeva na nọ o kẹre te ikiubiti udhe,+ avọ emedhere nọ ọ jọ ighẹ otafe na. Ibriwou emuọriọ na yọ uwou ehru idhe esa nọ u wo igebara, yọ igebara na e rẹriẹ ovao ku ohwohwo. 4 Edhere jọ nọ ọ kẹre te ikiubiti ikpe je theri te ikiubiti udhusoi (100)* ọ jọ aro ibriwou emuọriọ na,*+ yọ eria nọ a rẹ rọ ruọ ae eva e jọ ofẹ ẹkpẹlobọ ovatha-ọre. 5 Ibriwou emuọriọ edhe obehru uwou na e jọ hwahwa vi erọ edhe obotọ gbe edhe udevie na fikinọ igebara na e rehọ abọ rai jọ ruaro. 6 Uwou ehru idhe esa e jọ, rekọ i wo ipila wọhọ ipila ighẹ na ha. Oyejabọ nọ a ro bru no otọ ibriwou edhe yena vi erọ edhe obotọ avọ edhe udevie na.

7 Ugbẹhẹ itho otafe nọ o kẹle ibriwou emuọriọ na evaọ ofẹ ighẹ otafe nọ o rẹriẹ ovao ku ibriwou emuọriọ edekọ na u theri te ikiubiti udhuvẹ-gbikpe. 8 Uthethei ibriwou emuọriọ nọ e jọ ofẹ ighẹ otafe na o jọ ikiubiti udhuvẹ-gbikpe, rekọ uthethei enọ e rẹriẹ ovao ku aruẹri na o jọ ikiubiti udhusoi (100). 9 Ibriwou emuọriọ na i wo edhere jọ nọ a rẹ rọ ruọ eva rai evaọ ofẹ ovatha-ọre nọ ohwo o te bi no obọ ighẹ otafe na ze.

10 Ibriwou emuọriọ e tẹ jẹ jọ obeva* ugbẹhẹ itho nọ o jọ ighẹ na evaọ ofẹ ovatha-ọre, kẹle oria ovevẹ na avọ uwou na.+ 11 Edhere jọ nọ a rẹ nya ọ jọ aro rai wọhọ epanọ o jọ ibriwou emuọriọ ofẹ ẹkpẹlobọ ovatha-ọre na.+ Uthethei rai avọ okẹkẹe rai epọvo na, oria ovona a re ro no ai, yọ oghẹrẹ ovona a bọ rai. Eria nọ a rẹ rọ ruọ ae 12 e jọ wọhọ eria nọ a rẹ rọ ruọ ibriwou emuọriọ nọ e jọ ofẹ obọze ovatha-ọre na. Oria jọ nọ a rẹ rọ ruọ eva o jọ obọ emuhọ edhere na, evaọ aro ugbẹhẹ itho nọ o kẹle riẹ evaọ ofẹ ovatha-ọre na, onọ ohwo ọ sae rọ ruọ eva.+

13 Kẹsena ọ tẹ ta kẹ omẹ nọ: “Ibriwou emuọriọ nọ e rrọ ofẹ ẹkpẹlobọ ovatha-ọre na avọ ibriwou emuọriọ nọ e rrọ ofẹ obọze ovatha-ọre nọ e kẹle oria ovevẹ na+ họ ibriwou emuọriọ ọrẹri na, eria nọ izerẹ nọ e be ziọ aro Jihova a rẹ jọ re ekẹ nọ e mae rrọ ọrẹri na.+ Etẹe a re fi ekẹ nọ e mae rrọ ọrẹri na họ, gbe eware idhe ibi ekakọ, idhe uzioraha, gbe idhe abe-ọriọ, keme oria na o rrọ ọrẹri.+ 14 Nọ izerẹ na e tẹ ruọ eva no, a re no oria ọrẹri na ruọ ighẹ otafe na ha ajokpanọ a ba iwu nọ a ku họ jẹ rọ gbodibo na no,+ keme e rrọ ọrẹri. A re ku iwu efa họ re a sae nya kpohọ eria nọ a kẹ ahwo na uvẹ nọ a rẹ ruọ eva.”

15 Nọ ọ ma oria etẹmpol obeva* na no, ọ tẹ rọ orọ unuẹthẹ nọ u rri ovatha-ọre na su omẹ ruọ otafe,+ ọ tẹ ma oria na soso.

16 Ọ rehọ ukpoko* nọ a rẹ rọ ma na rọ ma ofẹ ovatha-ọre na. Oria nọ ọ rehọ ukpoko na ma o rehọ ikpoko egba isoi (500) no abọjọ rite abọdekọ.

17 Ọ ma ofẹ ẹkpẹlobọ ovatha-ọre na, yọ oria nọ ọ rehọ ukpoko na ma o rehọ ikpoko egba isoi (500).

18 Ọ ma ofẹ obọze ovatha-ọre na, yọ oria nọ ọ rehọ ukpoko na ma o rehọ ikpoko egba isoi (500).

19 Ọ tẹ nya wariẹ kpobọ ofẹ ukiediwo-ọre. Ọ tẹ rehọ ukpoko na ma oria nọ o rehọ ikpoko egba isoi (500).

20 Ofẹ ene na ọ jọ mae. U wo ugbẹhẹ wariẹ họ+ nọ u theri te ikpoko egba isoi (500) jẹ kẹre te ikpoko egba isoi (500),+ re u fi ohẹriẹ họ oria nọ o rrọ ọrẹri avọ oria nọ o rrọ kẹ ahwo kpobi.+

43 Kẹsena o te su omẹ kpobọ unuẹthẹ nọ u rri obọ ovatha-ọre.+ 2 Mẹ tẹ jọ etẹe ruẹ oruaro Ọghẹnẹ Izrẹl nọ u bi no ofẹ ovatha-ọre ze,+ edo urru riẹ o jọ wọhọ edo ame nọ o bi kporo ẹkẹre;+ yọ oruaro riẹ o wha elo fihọ otọakpọ na.+ 3 Oware nọ mẹ ruẹ o jọ wọhọ eruẹaruẹ nọ mẹ ruẹ okenọ mẹ* nyaze te raha okpẹwho na, yọ o jọ wọhọ oware nọ mẹ ruẹ kẹle ethẹ Kiba na;+ me te kie vovao tuotọ.

4 Kẹsena oruaro Jihova o tẹ rehọ orọ unuẹthẹ nọ u rri obọ ovatha-ọre na ruọ etẹmpol* na.+ 5 Ẹzi jọ ọ tẹ kpare omẹ kpehru, ọ tẹ rehọ omẹ ziọ ighẹ obeva na, mẹ tẹ ruẹ nọ oruaro Jihova o vọ etẹmpol na soso.+ 6 Kẹsena me te yo edo ohwo jọ nọ ọ be ta ẹme kẹ omẹ evaọ obọ etẹmpol na, ọzae na ọ tẹ nyaze, o te dikihẹ abotọ mẹ.+ 7 Ọ ta kẹ omẹ nọ:

“Ọmọ ohwo, etenẹ na họ oria agbara-uvie mẹ+ gbe oria nọ mẹ rẹ rehọ evawọ mẹ kpahe,+ oria nọ mẹ te rria evaọ udevie ahwo Izrẹl bẹdẹ bẹdẹ.+ Uwou Izrẹl u gbe ti gbe odẹ ọrẹri mẹ ku ofa ha,+ te ae te ivie rai, ẹkwoma eghẹnẹ efa nọ a re lele bru igberẹ* gbe ẹkwoma iri ivie rai nọ i whu. 8 A fi unuwou rai họ kẹle unuwou mẹ je fi unuẹthẹ rai họ akotọ unuẹthẹ mẹ, nọ ugbẹhẹ ọvo o rọ rrọ udevie mẹ avọ ae,+ a tẹ rehọ eware etọtọ nọ a ru ro gbe odẹ mẹ ku, fikiere mẹ tẹ rọ ofu raha ai muotọ.+ 9 Enẹna jọ a siọ igberẹ nọ a bi lele eghẹnẹ efa bru na ba,* re a jẹ rehọ iri ivie rai vrẹ thabọ no omẹ, mẹ vẹ te rria udevie rai bẹdẹ bẹdẹ.+

10 “Rọkẹ owhẹ, ọmọ ohwo, dhesẹ etẹmpol na kẹ uwou Izrẹl,+ re oma o vuọ ae fiki iruthọ rai,+ yọ a rẹ romatotọ kiẹ omaa riẹ riwi.* 11 Otẹrọnọ oma o vo rai fiki eware kpobi nọ a ru, who re dhesẹ omaa ebabọ etẹmpol na, ọruẹrẹfihotọ riẹ, eria nọ a re ro noi, gbe eria nọ a rẹ rọ ruọ ẹe rọ kẹ ae.+ Dhesẹ omaa ebabọ riẹ kpobi avọ ijaje riẹ kẹ ae, omaa ebabọ riẹ avọ izi riẹ, yọ whọ rẹ jọ iraro rai kere ai fihọ otọ re a ruẹsi muẹrohọ omaa ebabọ riẹ kpobi je ru lele ijaje riẹ.+ 12 Onana họ uzi etẹmpol na. Ẹkwotọ na soso nọ ọ wariẹ ehru ugbehru na họ yọ oria nọ o mae rrọ ọrẹri.+ Rri! Onana họ uzi etẹmpol na.

13 “Enẹ a ma agbada-idhe na evaọ ikiubiti+ (a fi okẹkẹe iziabọ ene ba ikiubiti ọvuọvo).* Obotọ riẹ ikiubiti ọvo, yọ o kẹre te ikiubiti ọvo. Ọ jọ akọ riẹ wariẹ họ wo igbenu nọ okẹkẹe riẹ o rrọ okẹkẹe evabọ.* Onana họ otọ agbada-idhe na. 14 No obotọ riẹ nọ o rrọ otọ rite ogbẹ obotọ nọ o wariẹ e riẹ họ ikiubiti ivẹ, okẹkẹe riẹ ikiubiti ọvo. No ogbẹ osese nọ o wariẹ e riẹ họ rite ogbẹ ulogbo nọ o wariẹ e riẹ họ ikiubiti ene, okẹkẹe riẹ kọ ikiubiti ọvo. 15 Enyerae agbada-idhe na u kpehru te ikiubiti ene, yọ izei ene na e tehe lahwe evaọ ehru enyerae agbada-idhe na.+ 16 Enyerae agbada-idhe na o wo ibienẹ ene ẹrẹrẹe, u theri te ikiubiti ikpegbivẹ, yọ o kẹre te ikiubiti ikpegbivẹ.+ 17 Abọ ene ogbẹ nọ o wariẹ e riẹ họ na u theri te ikiubiti ikpegbene jẹ kẹre te ikiubiti ikpegbene; igbenu nọ e wariẹ e riẹ họ ubro ikiubiti, yọ otọ riẹ evaọ ofẹ kpobi ikiubiti ọvo.

“Yọ istẹpo riẹ i rri ofẹ ovatha-ọre.”

18 Kẹsena ọ tẹ ta kẹ omẹ nọ, “Ọmọ ohwo, enẹ Jihova Olori nọ Ọ Mai Kpehru na ọ ta: ‘Enana họ eware nọ a re ru lele nọ a te ru agbada-idhe na no, re a ruẹsi dhe idhe emahọ jẹ sae frẹ azẹ fihọ ehru riẹ.’+

19 “‘Whọ rẹ jọ owa iruẹ na rehọ eruẹ ọgaga ze rọkẹ idhe uzioraha,+ whọ vẹ rehọ iẹe kẹ izerẹ nọ e rrọ ahwo Livae na, emọ Zedọk,+ enọ e rẹ ziọ aro mẹ te gbodibo na,’ ere Jihova Olori nọ Ọ Mai Kpehru na ọ ta. 20 ‘Whọ rẹ rehọ azẹ na jọ, whọ vẹ rehọ iẹe wholo izei ene agbada-idhe na, ibienẹ ene ogbẹ nọ o wariẹ e riẹ họ na, gbe igbenu na wariẹ họ, re whọ ruẹsi ru ei fo no uzioraha je ru omavoro kẹe.+ 21 Kẹsena whọ vẹ rehọ eruẹ na, nọ ọ rrọ rọkẹ idhe uzioraha na, re a ruẹse mahe iẹe evaọ oria nọ a fihọ evaọ etẹmpol na, evaọ obọ otafe aruẹri na.+ 22 Evaọ ẹdẹ avọ ivẹ, whọ rẹ rehọ okri nọ ọ rrọ omakọkọ ze rọkẹ idhe uzioraha; a ve ru agbada-idhe na fo no uzioraha nwane wọhọ epanọ a rehọ eruẹ na ru ei fo no uzioraha na.’

23 “‘Nọ who te ru ei fo no uzioraha re no, whọ rẹ rehọ eruẹ nọ ọ rrọ omakọkọ evaọ owa iruẹ na gbe egbo nọ ọ rrọ omakọkọ evaọ uthuru na ro dhe idhe. 24 Whọ rẹ rehọ ae kẹ Jihova, yọ izerẹ na e rẹ vravra uwhei fihọ ae hrọ,+ a vẹ rehọ ae dhe idhe emahọ kẹ Jihova. 25 Evaọ edẹ ihrẹ, whọ rẹ rehọ okri dhe idhe uzioraha kẹdẹ kẹdẹ,+ jegbe eruẹ evaọ owa iruẹ na gbe egbo evaọ uthuru na; whọ rẹ rehọ erao nọ oware ovo o jọ oma rai thọ họ ro dhe idhe. 26 Evaọ edẹ ihrẹ, a re ru omavoro kẹ agbada-idhe na, a re ru ei fo hrọ jẹ ruẹrẹ iẹe kpahe. 27 Nọ edẹ na e tẹ gba no, evaọ ẹdẹ avọ eree+ je no oke yena vrẹ, izerẹ na e rẹ jọ ehru agbada-idhe na dhe idhe emahọ gbe idhe ọriẹyeri rai;* oma rai o vẹ te were omẹ,’+ ere Jihova Olori nọ Ọ Mai Kpehru na ọ ta.”

44 Ọ tẹ rehọ edhere unuẹthẹ otafe aruẹri na nọ u rri obọ ovatha-ọre+ rọ rehọ omẹ zihe ze, yọ a si rie họ.+ 2 Kẹsena Jihova ọ tẹ ta kẹ omẹ nọ: “Enẹ ọvo a ti si ẹthẹ nana họ ẹsikpobi. A re rovie iei hi, yọ ohwo ọvo ọ rẹ rehọ iẹe ruọ eva ha; keme Jihova Ọghẹnẹ Izrẹl ọ rehọ e riẹ ruọ eva no,+ fikiere epanọ a ro si ei họ na o rẹ jọ ẹsikpobi hrọ. 3 Rekọ osu na ọ te keria eva riẹ re ọ re ebrẹdi evaọ aro Jihova,+ keme osu ọ rrọ. Ọ te rehọ ọmọgwa unuẹthẹ na ruọ eva, ọ vẹ jẹ rehọ iẹe ruọ otafe.”+

4 Kẹsena ọ tẹ rehọ orọ unuẹthẹ ẹkpẹlobọ ovatha-ọre rehọ omẹ kpohọ obaro etẹmpol na. Nọ me rri, mẹ tẹ ruẹ nọ oruaro Jihova o vọ etẹmpol Jihova na soso.+ Fikiere me te kie vovao tuotọ.+ 5 Kẹsena Jihova ọ tẹ ta kẹ omẹ nọ: “Ọmọ ohwo, muẹrohotọ,* rri, re whọ jẹ gaviezọ ziezi kẹ oware kpobi nọ mẹ te ta kẹ owhẹ kpahe ijaje gbe izi etẹmpol Jihova na. Muẹrohọ eria nọ a rẹ rọ ruọ etẹmpol na ziezi gbe eria kpobi nọ a re ro no eva aruẹri na.+ 6 Whọ rẹ ta kẹ ahwo uwou ọwọsuọ Izrẹl na hrọ inọ, ‘Enẹ Jihova Olori nọ Ọ Mai Kpehru na ọ ta: “Iruẹru etọtọ rai na i te no, O uwou Izrẹl. 7 Nọ wha be rehọ ahwo erẹwho efa nọ e yawo ho evaọ udu gbe uwo ziọ aruẹri mẹ na, a bi gbe etẹmpol mẹ ku. Wha rẹ rehọ ebrẹdi, koyehọ iwhri erao gbe azẹ ro se omẹ, yọ evaọ oke ovona wha be raha ọvọ mẹ fiki iruẹru etọtọ rai kpobi. 8 Wha be rẹrote eware ọrẹri mẹ hẹ.+ Ukpoye, wha bi fi amọfa họ re a rẹrote iruo nọ e rrọ aruẹri mẹ.”’

9 “‘Enẹ Jihova Olori nọ Ọ Mai Kpehru na ọ ta: “Ohwo orẹwho ọfa ọvo nọ ọ yawo ho evaọ udu gbe uwo nọ ọ be rria Izrẹl ọ rẹ ruọ eva aruẹri mẹ hẹ.”’

10 “‘Rekọ ahwo Livae nọ a ghoro thabọ siọ omẹ ba+ evaọ okenọ Izrẹl o ro ghoro siọ omẹ ba nyai lele emedhọ etọtọ* rai na, a te ruẹ uye eware nọ i no oruthọ rai ze. 11 A te jọ egbodibo evaọ aruẹri mẹ re a rẹrote inuethẹ etẹmpol+ na jẹ gbodibo evaọ etẹmpol na. A ti kpe arao idhe emahọ na gbe ọrọ idheidhe rọkẹ ahwo na, yọ a ti dikihẹ aro ahwo na re a gbodibo kẹ ae. 12 Fikinọ a gbodibo kẹ ae evaọ aro emedhọ rai, a je zihe ruọ utho ezoruẹ nọ u ru uwou Izrẹl raha uzi na,+ oye mẹ rọ kpare obọ mẹ duwu iyei rọsuọ ae,’ ere Jihova Olori nọ Ọ Mai Kpehru na ọ ta, ‘yọ a te ruẹ uye eware nọ i no oruthọ rai ze. 13 A te nyabru omẹ ze re a jọ izerẹ mẹ hẹ hayo nya kẹle uvumọ eware ọrẹri mẹ hẹ hayo eware mẹ nọ e mae rrọ ọrẹri hi, a te ruẹ uye omovuọ fiki eware etọtọ nọ a ru. 14 Rekọ me ti fi ae họ enọ e rẹ rẹrote ewha-iruo etẹmpol na, re a rẹrote iruo riẹ gbe eware kpobi nọ u fo nọ a rẹ jọ eva riẹ ru.’+

15 “‘Rọkẹ izerẹ nọ e rrọ ahwo Livae na, emọ Zedọk,+ enọ e jẹ rẹrote ewha-iruo aruẹri mẹ evaọ okenọ ahwo Izrẹl a ro ghoro siọ omẹ ba na,+ a te nya kẹle omẹ re a gbodibo kẹ omẹ, yọ a ti dikihẹ aro mẹ re a rehọ iwhri erao+ gbe azẹ+ ro dhe idhe kẹ omẹ,’ ere Jihova Olori nọ Ọ Mai Kpehru na ọ ta. 16 ‘Ae họ enọ e te ruọ eva aruẹri mẹ, a te nya kẹle emẹjẹ mẹ re a gbodibo kẹ omẹ,+ yọ a te rẹrote iruo rai nọ a re ru kẹ omẹ.+

17 “‘Okenọ a tẹ be ziọ eva inuethẹ ighẹ obeva na, iwu ohọ-olọlọhọ a re ku họ.+ A re ku uvumọ ewu iwhulu họ họ nọ a tẹ be gbodibo evaọ inuethẹ ighẹ obeva na hayo evaọ obeva riẹ. 18 A re ku etu-udhọfọ ohọ-olọlọhọ họ uzou rai, yọ a rẹ rọ ohọ-olọlọhọ gba-ọgọdọ ro ruru eku rai.+ A re ku oware ovo nọ o rẹ lẹliẹ ae royẹ họ họ. 19 Taure a tẹ te nya kpobọ ighẹ otafe na—ighẹ otafe nọ ahwo na a rrọ na—a rẹ ba iwu nọ a ku họ jẹ rọ gbodibo na no,+ a ve fi ai họ ibriwou emuọriọ ọrẹri* na.+ Kẹsena a ve ku iwu efa họ re a gbẹ rọ iwu rai ru ahwo na fihọ ọrẹri hi.* 20 A rẹ fọrọ uzou rai hi+ hayo kuvẹ re eto uzou rai i theri hi. A re vo eto uzou rai kpotọ ọvo. 21 Izerẹ na e rẹ da enwaene he nọ a tẹ be ruọ eva ighẹ obeva na.+ 22 A rẹ rehọ aye-uku hu hayo aye nọ orọo riẹ o fa no ho;+ rekọ a rẹ sae rehọ ọmọtẹ-kọkọ nọ ọ rrọ ọmọ ohwo Izrẹl hayo aye-uku nọ ozerẹ o whu seba.’+

23 “‘A re wuhrẹ ahwo mẹ ohẹriẹ nọ o rrọ oware ọrẹri avọ oware gheghe; a ve je wuhrẹ ai ohẹriẹ nọ o rrọ oware nọ o fo ho avọ oware nọ o fo.+ 24 A rẹ jọ ibruoziẹ evaọ oke ẹdhoguo;+ yọ o gba rai họ nọ a re bruoziẹ na rọwokugbe izi oziẹobro mẹ.+ A re koko izi mẹ gbe ijaje mẹ kpahe ehaa mẹ kpobi,+ a ve je ru edijala mẹ fo. 25 A rẹ nya kẹle ohwo ọvo nọ o whu no ho, o gbẹ rrọ ere he a ve ti zihe ruọ enọ e fo ho. Rekọ a rẹ sai ru omarai fihọ enọ e fo ho fiki ọsẹ rai, oni rai, ọmọzae rai, ọmọtẹ rai, oniọvo-ọmọzae rai, hayo oniọvo-ọmọtẹ rai nọ ọ re rọo ho.+ 26 Nọ a te ru ozerẹ fo no, a re kele edẹ ihrẹ kẹe. 27 Evaọ ẹdẹ nọ ọ te rọ ruọ oria ọrẹri na, nọ ọ te ruọ eva ighẹ obeva na re ọ gbodibo evaọ oria ọrẹri na, o re dhe idhe uzioraha riẹ,’+ ere Jihova Olori nọ Ọ Mai Kpehru na ọ ta.

28 “‘Yọ onana o te jọ ukuoriọ rai: Mẹ họ ukuoriọ rai.+ Wha rẹ kẹ ae oware ovo evaọ Izrẹl he, keme mẹ a wo. 29 Ae họ enọ e te re idhe ibi ekakọ na,+ idhe uzioraha na, gbe idhe abe-ọriọ na,+ yọ oware kpobi nọ a rọ kẹ Ọghẹnẹ no evaọ Izrẹl u ti zihe ruọ orai.+ 30 Ibi nọ e mai woma evaọ usu ibi ọsosuọ rai kpobi nọ e ware gbe oghẹrẹ azọhọ kpobi nọ o no obọ rai ze e te jọ kẹ izerẹ na.+ Wha rẹ rehọ ibi ekakọ rai nọ a wuhu yẹ tere he nọ e kake lahwe rọkẹ izerẹ na.+ Onana u ti ru ahwo iwou rai wo oghale.+ 31 Izerẹ na e rẹ re ọvra hayo arao nọ a dihọ owhuowhu hu hayo ọnọ arao ojihẹ ọ za ekekẹ hẹ.’+

45 “‘Okenọ wha te ghale otọ na rọ reuku,+ wha rẹ jọ otọ na rehọ abọjọ kẹ Jihova nọ o rẹ jọ ẹkẹ otọ ọrẹri.+ Uthethei riẹ o rẹ jọ ikiubiti* idu udhegbisoi (25,000), okẹkẹe riẹ kọ ikiubiti idu ikpe (10,000).+ Oma otọ na soso* o te jọ ẹkẹ otọ ọrẹri. 2 Ẹkẹ otọ jọ nọ u re wo abane ẹrẹrẹe o te jọ oria nana rọkẹ oria ọrẹri na, onọ u re theri te ikiubiti egba isoi (500) jẹ kẹre te ikiubiti egba isoi (500),*+ yọ o rẹ jọ abọ ọvuọvo wo otọ nọ erao e rẹ jọ re ẹbe nọ u te ikiubiti udhuvẹ-gbikpe.+ 3 Whọ rẹ jọ oria nana ma oria nọ u theri te idu udhegbisoi (25,000) jẹ kẹre te idu ikpe (10,000), yọ eva riẹ aruẹri na o te jọ, oware nọ o mae rrọ ọrẹri. 4 O te jọ ẹkẹ otọ ọrẹri evaọ otọ na rọkẹ izerẹ na,+ enọ e rẹ gbodibo evaọ aruẹri na, nọ e rẹ ziọ aro Jihova te gbodibo.+ O te jọ oria nọ iwou rai e te jọ gbe oria ọrẹri kẹ aruẹri na.

5 “‘Rọkẹ ahwo Livae na, enọ e rẹ gbodibo evaọ etẹmpol na, ẹkẹ otọ nọ u theri te ikiubiti idu udhegbisoi (25,000) jẹ kẹre te ikiubiti idu ikpe (10,000)+ o te jọ rọkẹ ae, yọ a ti wo ibriwou emuọriọ udhe*+ nọ e te jọ erai.

6 “‘Wha rẹ rehọ oria nọ u theri te ikiubiti idu udhegbisoi (25,000) kẹ okpẹwho na (o rẹ jọ ẹrẹrẹe kugbe ẹkẹ otọ ọrẹri na), yọ o rẹ kẹre te ikiubiti idu isoi (5,000).+ Ahwo uwou Izrẹl kpobi a ti woi.

7 “‘Rọkẹ osu na, o ti wo otọ evaọ tabọ tabọ ẹkẹ otọ ọrẹri na gbe oria nọ a kẹ okpẹwho na. O te kẹle ẹkẹ otọ ọrẹri na avọ ẹkẹ otọ okpẹwho na. O te jọ ofẹ ukiediwo-ọre avọ ofẹ ovatha-ọre. Uthethei riẹ evaọ uwhru obọ ukiediwo-ọre rite uwhru obọ ovatha-ọre o rẹ jọ ẹrẹrẹe kugbe ekẹ otọ erua na jọ.+ 8 Ẹkẹ otọ nana ọ te jọ oriẹ evaọ Izrẹl. Isu mẹ i gbe ti gboja kẹ ahwo mẹ ofa ha,+ yọ a te rọ ẹkwotọ na kẹ uwou Izrẹl wọhọ epanọ a rọ rrọ erua rai.’+

9 “Enẹ Jihova Olori nọ Ọ Mai Kpehru na ọ ta: ‘Wha nya thabọ te no, whai isu Izrẹl!’

“‘Wha siọ ozighi gbe okienyẹ rai ba, re wha ru oware nọ o gba je kiẹrẹe.+ Wha siọ eware ahwo mẹ ba egboro,’+ ere Jihova Olori nọ Ọ Mai Kpehru na ọ ta. 10 ‘Iskeli egbagba, owawọ ifa* ogbagba gbe owawọ ebate* ogbagba wha rẹ rọ wawọ eware.+ 11 Oghẹrẹ owawọ ovona a re fihọ kẹ owawọ ifa avọ owawọ ebate. Abọvo abakpe homa* o rẹ vọ owawọ ebate na, yọ abọvo abakpe homa o rẹ vọ owawọ ifa na. Homa na o rẹ jọ oware nọ a re lele rọ wawọ eware. 12 Gira* udhe o rẹ jọ shẹkẹl.*+ A te ku shẹkẹl udhe kugbe shẹkẹl udhegbisoi je kugbe shẹkẹl ikpegbisoi, o rẹ jọ mena* ọvo kẹ owhai.’

13 “‘Onana họ azọhọ nọ wha rẹ rehọ ze: abọvo abazeza ifa evaọ homa iwhiti ọvuọvo, gbe abọvo abazeza ifa evaọ homa ebali ọvuọvo. 14 Owawọ ebate a rẹ rọ wawọ unu ewhri nọ a rẹ rehọ ze. Ebate yọ abọvo abakpe kọr,* yọ ebate ikpe họ homa, keme ebate ikpe e rẹ vọ homa. 15 Evaọ igodẹ ahwo Izrẹl, a rẹ jọ usu igodẹ egba ivẹ (200) kpobi rehọ ogodẹ ọvo ze. Enana e te jọ rọkẹ idhe ibi ekakọ na,+ idhe emahọ na,+ gbe idhe ọriẹyeri na,+ re a ruẹsi ru omavoro kẹ ahwo na,’+ ere Jihova Olori nọ Ọ Mai Kpehru na ọ ta.

16 “‘Ahwo ẹkwotọ na kpobi a rẹ rehọ azọhọ+ nana ze ro se osu nọ ọ rrọ Izrẹl. 17 Rekọ osu na họ ọnọ ọ te rehọ eware ze rọkẹ idhe emahọ na,+ idhe ibi ekakọ na,+ gbe idhe udi na evaọ etoke ehaa sa-sa na,+ ehaa ọvẹre ọkpokpọ na, Edijala na,+ gbe ehaa kpobi nọ a ta kẹ uwou Izrẹl nọ a re ru.+ Ọye ọ te rehọ idhe uzioraha na ze, te idhe ibi ekakọ na, idhe emahọ na, gbe idhe ọriẹyeri na, re ọ ruẹsi ru omavoro fiki uwou Izrẹl.’

18 “Enẹ Jihova Olori nọ Ọ Mai Kpehru na ọ ta: ‘Evaọ amara ọsosuọ, evaọ ẹdẹ ọsosuọ amara na, whọ rẹ rehọ eruẹ nọ ọ rrọ omakọkọ evaọ owa iruẹ na, who ve ru aruẹri na fo no uzioraha.+ 19 Ozerẹ na ọ te rehọ azẹ idhe uzioraha na jọ, ọ vẹ rehọ iẹe wholo unuẹthẹ etẹmpol na,+ ibienẹ ene ogbẹ nọ o wariẹ agbada-idhe na họ na, gbe ire unuẹthẹ ighẹ obeva na. 20 Ere who re ru evaọ ẹdẹ avọ ihrẹ amara na fiki ohwo kpobi nọ ọ rọ ethobọ hayo ogbori raha uzi;+ yọ wha re ru omavoro kẹ etẹmpol na.+

21 “‘Evaọ amara ọsosuọ na, evaọ ẹdẹ avọ ikpegbene amara na, wha re ru ehaa Ọnyavrẹ na.+ Wha rẹ re ebrẹdi nọ ọ kare ẹvi evaọ edẹ ihrẹ.+ 22 Evaọ ẹdẹ yena, osu na ọ te rehọ eruẹ ze nọ a re ro dhe idhe uzioraha fiki omobọ riẹ gbe fiki ahwo ẹkwotọ na kpobi.+ 23 Evaọ edẹ ihrẹ ehaa na, ọ te rehọ iruẹ ihrẹ nọ e rrọ omakọkọ avọ igbo ihrẹ nọ e rrọ omakọkọ ze nọ a re ro dhe idhe emahọ kẹ Jihova kẹdẹ kẹdẹ evaọ edẹ ihrẹ na,+ yọ ọ te jẹ rehọ okri ze kẹdẹ kẹdẹ nọ a re ro dhe idhe uzioraha. 24 Ọ rẹ jẹ rehọ ifa ọvo ze rọkẹ eruẹ ọvuọvo, gbe ifa ọvo rọkẹ egbo ọvuọvo, jẹ rehọ ihini* ewhri ze rọkẹ ifa ọvuọvo nọ a re ro dhe idhe ibi ekakọ.

25 “‘Evaọ amara avọ ihrẹ, evaọ ẹdẹ avọ ikpegbisoi amara na, evaọ edẹ ihrẹ etoke ehaa na,+ ọ rẹ jẹ rehọ oghẹrẹ idhe uzioraha, idhe emahọ, idhe ibi ekakọ, gbe oghẹrẹ ewhri ọvona ze.’”

46 “Enẹ Jihova Olori nọ Ọ Mai Kpehru na ọ ta: ‘A re si ẹthẹ ighẹ obeva na nọ u rri ofẹ ovatha-ọre+ na họ ẹsikpobi+ evaọ edẹ ezeza nọ a re ru iruo na,+ rekọ evaọ ẹdẹ Ẹdijala gbe ẹdẹ ehaa ọvẹre ọkpokpọ a re rovie iei. 2 Osu na ọ rẹ rehọ edhere nọ ọ rrọ ọmọgwa nọ ọ rrọ unuẹthẹ na ruọ eva nọ o te bi no obọ otafe ze,+ yọ o re dikihẹ akotọ unuẹthẹ na. Izerẹ na i ve dhe idhe emahọ riẹ gbe idhe ọriẹyeri riẹ, o ve guzou kpotọ evaọ unuwou unuẹthẹ na, kẹsena ọ vẹ ruọ otafe. Rekọ a re si ẹthẹ na họ ri bọo owọwọ họ. 3 Ahwo ẹkwotọ na a re guzou kpotọ kẹ Jihova re evaọ oria nọ a rẹ rọ ruọ unuẹthẹ yena evaọ Edijala na gbe evaọ edẹ ehaa ọvẹre ọkpokpọ na.+

4 “‘Idhe emahọ nọ osu na ọ rẹ rọ kẹ Jihova evaọ ẹdẹ Ẹdijala e rẹ jọ imigodẹ ezae ezeza nọ e rrọ omakọkọ gbe egbo nọ ọ rrọ omakọkọ.+ 5 Idhe ibi ekakọ nọ ọ rẹ rehọ ze o rẹ jọ ifa* ọvo rọkẹ egbo na jegbe oware kpobi nọ ọ rẹ sae rehọ ze nọ o rẹ jọ rọkẹ imigodẹ ezae na avọ ihini* ewhri nọ u re lele ifa ọvuọvo.+ 6 Evaọ ẹdẹ ehaa ọvẹre ọkpokpọ na, eware nọ ọ rẹ rehọ ze họ eruẹ nọ ọ rrọ omakọkọ evaọ owa iruẹ na, imigodẹ ezae ezeza, gbe egbo; e rẹ jọ enọ oma rai o rrọ kọkọ.+ 7 Eware nọ ọ rẹ rehọ ze kẹ idhe ibi ekakọ họ ifa ọvo rọkẹ eruẹ na, ifa ọvo rọkẹ egbo na, jegbe oware kpobi nọ ọ rẹ sae rehọ ze nọ o rẹ jọ rọkẹ imigodẹ ezae na. Ọ rẹ rehọ ihini ewhri ze kugbe ifa ọvuọvo.

8 “‘Nọ osu na ọ tẹ be ruọ eva, edhere nọ ọ rrọ ọmọgwa nọ ọ rrọ unuẹthẹ na ọ rẹ rọ ruọ eva, yọ edhere ọvo yena ọ rẹ rọ ruọ otafe.+ 9 Nọ ahwo ẹkwotọ na a tẹ nyaze aro Jihova evaọ etoke ehaa sa-sa,+ enọ e rehọ unuẹthẹ ofẹ ẹkpẹlobọ ovatha-ọre+ ruọ eva ze te gọ a rẹ rehọ unuẹthẹ ofẹ obọze ovatha-ọre ruọ otafe,+ yọ enọ e rehọ unuẹthẹ ofẹ obọze ovatha-ọre ruọ eva a rẹ rehọ unuẹthẹ ofẹ ẹkpẹlobọ ovatha-ọre ruọ otafe. Uvumọ ohwo ọ rẹ rehọ unuẹthẹ nọ ọ rọ ruọ eva na zihe he, unuẹthẹ nọ o rẹriẹ ovao ku onọ a rọ ruọ eva na a rẹ rọ ruọ otafe. 10 Rọkẹ osu nọ ọ rrọ udevie rai, ọ rẹ ruọ eva evaọ okenọ a tẹ be ruọ eva, yọ ọ rẹ ruọ otafe evaọ okenọ a tẹ be ruọ otafe. 11 Evaọ oke ehaa na gbe evaọ ezi ehaa na, eware nọ ọ rẹ rọ ze kẹ idhe ibi ekakọ e rẹ jọ ifa ọvo rọkẹ eruẹ na, ifa ọvo rọkẹ egbo na, jegbe oware kpobi nọ ọ rẹ sae rehọ ze nọ o rẹ jọ rọkẹ imigodẹ ezae na avọ ihini ewhri nọ u re lele ifa ọvuọvo.+

12 “‘Otẹrọnọ osu na ọ be rehọ idhe emahọ+ hayo idhe ọriẹyeri ze rọ kẹ Jihova okẹ unevaze, a re rovie unuẹthẹ nọ u rri ofẹ ovatha-ọre na kẹe, ọ vẹ rehọ idhe emahọ riẹ gbe idhe ọriẹyeri riẹ na ze nwane wọhọ epanọ o re ru evaọ ẹdẹ Ẹdijala na.+ Nọ ọ tẹ ruọ otafe no, a ve si ẹthẹ na họ.+

13 “‘Kẹdẹ kẹdẹ whọ rẹ rehọ omogodẹ ọzae nọ ọ rrọ omakọkọ nọ ọ rrọ ukpe ọsosuọ riẹ ze nọ a re ro dhe idhe emahọ kẹ Jihova.+ Who re ru onana kohiohiẹ kohiohiẹ. 14 Eware nọ whọ rẹ rehọ ze kugbei kohiohiẹ kohiohiẹ họ, abọvo abazeza ifa nọ a re ro dhe idhe ibi ekakọ, jegbe abọvo abasa ihini ewhri nọ a rẹ frẹ fihọ emamọ eflawa iwuwuru nọ a re ro dhe idhe ibi ekakọ kẹ Jihova kẹse kẹse. Onana yọ ujaje nọ o rẹ jọ ribri. 15 Kohiohiẹ kohiohiẹ a rẹ rehọ omogodẹ ọzae, idhe ibi ekakọ, gbe ewhri ze hrọ, nọ a re ro dhe idhe emahọ kẹse kẹse.’

16 “Enẹ Jihova Olori nọ Ọ Mai Kpehru na ọ ta: ‘Otẹrọnọ osu na ọ kẹ emezae riẹ ọvuọvo okẹ re a rọ reuku, u re zihe ruọ oware emezae riẹ na. Yọ oware nọ a rọ ukuoriọ wo. 17 Rekọ otẹrọnọ ọ jọ ukuoriọ riẹ kẹ odibo riẹ jọ okẹ, o rẹ jọ orọ odibo na ri bọo ukpe obusino;+ kẹsena u ve zihe ruọ orọ osu na. Ukuoriọ emezae riẹ ọvo họ onọ o rẹ jọ bẹdẹ bẹdẹ. 18 Osu na ọ rẹ rehọ ogaga le ahwo na no otọ rai hi re ọ rehọ ukuoriọ rai jọ. Otọ obọriẹ ọ rẹ jọ kẹ emezae riẹ ukuoriọ, re a gbe le ohwo ọvo nọ ọ rrọ udevie ahwo mẹ no otọ riẹ hẹ.’”

19 Kẹsena ọ tẹ rọ edhere+ nọ o kẹle unuẹthẹ nọ a rẹ nya kpobọ ibriwou emuọriọ ọrẹri* izerẹ na rehọ omẹ ruọ eva, onọ u rri obọ ẹkpẹlobọ ovatha-ọre,+ mẹ tẹ jọ etẹe ruẹ oria jọ nọ o rrọ obemu evaọ ofẹ ukiediwo-ọre na. 20 Ọ ta kẹ omẹ nọ: “Etenẹ na họ oria nọ izerẹ na e te jọ there erao idhe abe-ọriọ na gbe idhe uzioraha na, yọ etenẹ a te jọ kakọ eware idhe ibi ekakọ na,+ re a gbẹ wha oware ọvo ruọ obọ ighẹ otafe na ha, onọ u re ru ahwo na fihọ ọrẹri.”*+

21 Ọ tẹ rehọ omẹ lahwe ziọ ighẹ otafe na, o te su omẹ nya ibienẹ ene ighẹ na vrẹ, yọ mẹ jọ akotọ ibienẹ ighẹ otafe na ọvuọvo ruẹ ighẹ jọ. 22 Ighẹ esese jọ e jọ ibienẹ ene ighẹ na, enọ i theri te ikiubiti* udhuvẹ jẹ kẹre te ikiubiti ọgba. Ighẹ ene na kpobi e jọ ẹrẹrẹe.* 23 Egbẹ* e jọ ighẹ ene na wariẹ họ, yọ a bọ eria nọ a rẹ jọ there erao idhe na fihọ obotọ egbẹ na. 24 Kẹsena ọ tẹ ta kẹ omẹ nọ: “Enana họ iwou nọ enọ e rẹ gbodibo evaọ etẹmpol na a rẹ jọ there erao idheidhe ahwo na.”+

47 Kẹsena ọ tẹ rehọ omẹ zihe ziọ obọ unuẹthẹ etẹmpol na,+ mẹ tẹ jọ etẹe ruẹ ame nọ o bi su no otọ unuwou etẹmpol na+ kpohọ ofẹ ovatha-ọre, keme aro etẹmpol na u rri obọ ovatha-ọre. Obotọ ofẹ obọze etẹmpol na, koyehọ ofẹ obọze ovatha-ọre agbada-idhe na ame na o je su no ze kpobọ otọ.

2 Ọ tẹ rọ orọ edhere unuẹthẹ ẹkpẹlobọ ovatha-ọre+ na su omẹ ruọ otafe, ọ tẹ rọ omẹ nya wariẹ kpobọ unuẹthẹ otafe nọ u rri obọ ovatha-ọre,+ mẹ tẹ ruẹ ame nọ o bi su omomoto no ofẹ obọze ze.

3 Nọ ọzae na ọ ruọ otafe avọ ufi nọ a rẹ rọ ma oware nọ o riẹe obọ,+ ọ tẹ ma ikiubiti* odu ọvo (1,000), ọ tẹ ta nọ mẹ nya ame na vrẹ; ame na o te ẹkuowọ.

4 Kẹsena ọ tẹ wariẹ ma odu ọvo (1,000) ọfa jẹ ta nọ mẹ nya ame na vrẹ, ame na o te ighilawọ.

Ọ tẹ wariẹ ma odu ọvo (1,000) ọfa jẹ ta nọ mẹ nyae vrẹ, ame na o te eku.

5 Nọ ọ wariẹ ma odu ọvo (1,000) ọfa, o tẹ jọ ethẹ nọ mẹ sae rọ owọ fa vrẹ hẹ, keme ame na o kodo te epanọ o rọ gwọlọ nọ ẹya ohwo ọ rẹ yae vrẹ, ame nọ o bi kporo ẹkẹre nọ a rẹ sae rọ owọ fa vrẹ hẹ.

6 Ọ nọ omẹ nọ: “Ọmọ ohwo, kọ whọ be ruẹ oware nana?”

Kẹsena ọ tẹ ta nọ mẹ nya zihe kpobọ akotọ oko-ame na. 7 Nọ me zihe, mẹ tẹ ruẹ nọ ire buobu gaga e rrọ akotọ oko-ame na evaọ tabọ tabọ.+ 8 Kẹsena ọ tẹ ta kẹ omẹ nọ: “Ame nana o bi su kpobọ ubrotọ obọ ovatha-ọre, je bi su nya Araba*+ na vrẹ erere nyae ruọ abade na. Nọ o ti su ruọ abade na,+ u ti ru ame nọ ọ rrọ etẹe fihọ dhidhidhi. 9 Emama buobu gbidi gbidi nọ e rrọ uzuazọ e te sae rria oria kpobi nọ ame na o su kpohọ.* Fikinọ ame nana o ti su kpohọ etẹe, iyei buobu e te jariẹ. U ti ru ame abade na fihọ dhidhidhi, yọ oware kpobi o te jọ uzuazọ evaọ oria kpobi nọ oko-ame na o te.

10 “Ikuori i ti dikihẹ akotọ riẹ, no Ẹn-gẹdi+ rite obọ Ẹn-egleyẹm, oria nọ a rẹ rriẹ esakrosa fihọ re e ya o te jọ etẹe. Oghoghẹrẹ iyei buobu gbidi gbidi e te jariẹ, wọhọ iyei Abade Ologbo na.*+

11 “U ti wo evo gbe epata, yọ u ti ru ame eria nana fihọ dhidhidhi hi. Uwhei ọvo ọ te jarai ẹsikpobi.+

12 “Oghoghẹrẹ ire nọ a rẹ re ibi rai e te dhẹ fihọ akotọ oko-ame na evaọ tabọ tabọ. Ebe rai i ti lo ho; yọ e te siọ ibi ba ẹmọ họ. Kamara kamara e te mọ ibi ekpokpọ keme ame nọ o bi su ruọ ae na yọ onọ u bi su no obọ aruẹri na ze.+ Ibi rai e te jọ emuore, yọ ebe rai e te jọ rọkẹ usiwo.”+

13 Enẹ Jihova Olori nọ Ọ Mai Kpehru na ọ ta: “Onana họ ẹkwotọ nọ wha rẹ ghale re o jọ ẹkwotọ ukuoriọ erua ikpegbivẹ Izrẹl, yọ ekẹ otọ ivẹ i re te Josẹf.+ 14 Wha te rehọ iẹe reuku, yọ a te ghale iẹe kẹ owhai ẹrẹrẹe.* Me duwu iyei nọ mẹ rẹ rehọ ẹkwotọ nana kẹ esẹ-esẹ rai,+ yọ enẹna a ghale riẹ kẹ* owhai no re o jọ ukuoriọ rai.

15 “Onana họ uwhru ẹkwotọ na evaọ ofẹ ẹkpẹlobọ ovatha-ọre: O nya no obọ Abade Ologbo na nọ o rrọ akotọ edhere nọ a re ro kpobọ Hẹtlọn+ nọ u rri obọ Zidad,+ 16 Hemat,+ Bẹrota,+ gbe Sibreyẹm, onọ o rrọ udevie ẹkwotọ Damaskọs avọ ẹkwotọ Hemat, kpobọ Heza-hatikọn, onọ o rrọ akotọ uwhru Hauran.+ 17 Fikiere uwhru na o te nya no obọ abade na rite obọ Heza-inọn,+ evaọ akotọ uwhru Damaskọs nọ o rrọ ofẹ ẹkpẹlobọ ovatha-ọre, gbe uwhru Hemat.+ Onana họ uwhru ofẹ ẹkpẹlobọ ovatha-ọre.

18 “Ofẹ ovatha-ọre o nya udevie Hauran avọ Damaskọs vrẹ, o tẹ jẹ nya akotọ Ethẹ Jọdan nọ o rrọ udevie Giliad+ avọ ẹkwotọ Izrẹl vrẹ. Wha rẹ mae no uwhru na* kpobọ abade ofẹ ovatha-ọre na.* Onana họ uwhru ofẹ ovatha-ọre.

19 “Uwhru ofẹ obọze ovatha-ọre* na u re no Tama kpobọ ame Mẹribat-kedẹsh,+ je kpobọ Uto* na gbe Abade Ologbo na.+ Onana họ uwhru ofẹ obọze ovatha-ọre.*

20 “Abade Ologbo na ọ rrọ ofẹ ukiediwo-ọre, no uwhru na rite oria jọ nọ o rẹriẹ ovao ku Libo-hemat.*+ Onana họ uwhru ofẹ ukiediwo-ọre.”

21 “Wha rẹ ghale ẹkwotọ nana kẹ omarai, rọkẹ erua ikpegbivẹ Izrẹl na. 22 Wha rẹ ghale iẹe kẹ omarai re o jọ ukuoriọ rai, wha rẹ jẹ ghale kẹ erara nọ e be rria kugbe owhai nọ i yẹ emọ evaọ okenọ a be rọ rria kugbe owhai na; yọ wha rẹ rehọ ae wọhọ emotọ Izrẹl. A re wo ukuoriọ kugbe owhai evaọ udevie erua Izrẹl. 23 Wha rẹ kẹ ọrara nọ ọ be rria udevie rai ukuoriọ evaọ ẹkwotọ orua nọ ọ be rria,” ere Jihova Olori nọ Ọ Mai Kpehru na ọ ta.

48 “Enana họ edẹ erua na, muhọ no obọ oka ẹkpẹlobọ ovatha-ọre ze: Ẹkẹ otọ Dan+ ọ nya akotọ edhere Hẹtlọn rite Libo-hemat*+ je rite Heza-inan, evaọ akotọ uwhru Damaskọs evaọ ofẹ ẹkpẹlobọ ovatha-ọre, kẹle Hemat;+ yọ u no uwhru ofẹ ovatha-ọre rite uwhru ofẹ ukiediwo-ọre. 2 Ẹkẹ otọ Asha+ o kẹle uwhru Dan, no uwhru ofẹ ovatha-ọre rite uwhru ofẹ ukiediwo-ọre. 3 Ẹkẹ otọ Naftalae+ o kẹle uwhru Asha, no uwhru ofẹ ovatha-ọre rite uwhru ofẹ ukiediwo-ọre. 4 Ẹkẹ otọ Manasẹ+ o kẹle uwhru Naftalae, no uwhru ofẹ ovatha-ọre rite uwhru ofẹ ukiediwo-ọre. 5 Ẹkẹ otọ Ifremu o kẹle uwhru Manasẹ,+ no uwhru ofẹ ovatha-ọre rite uwhru ofẹ ukiediwo-ọre. 6 Ẹkẹ otọ Rubẹn o kẹle uwhru Ifremu,+ no uwhru ofẹ ovatha-ọre rite uwhru ofẹ ukiediwo-ọre. 7 Ẹkẹ otọ Juda o kẹle uwhru Rubẹn,+ no uwhru ofẹ ovatha-ọre rite uwhru ofẹ ukiediwo-ọre. 8 Evaọ uwhru Juda, no uwhru ofẹ ovatha-ọre rite uwhru ofẹ ukiediwo-ọre, otọ nọ wha rẹ nyaseba o rẹ kẹre te ikiubiti* idu udhegbisoi (25,000),+ yọ uthethei riẹ o rẹ jọ ẹrẹrẹe kugbe ekẹ otọ erua edekọ na no uwhru ofẹ ovatha-ọre rite uwhru ofẹ ukiediwo-ọre. Aruẹri na o te jọ udevie riẹ.

9 “Ẹkẹ otọ nọ wha rẹ nyaseba kẹ Jihova o re theri te ikiubiti idu udhegbisoi (25,000) jẹ kẹre te idu ikpe (10,000). 10 Onana o te jọ ẹkẹ otọ ọrẹri rọkẹ izerẹ na.+ O te jọ ikiubiti idu udhegbisoi (25,000) evaọ ofẹ ẹkpẹlobọ ovatha-ọre, idu ikpe (10,000) evaọ ofẹ ukiediwo-ọre, idu ikpe (10,000) evaọ ofẹ ovatha-ọre, gbe idu udhegbisoi (25,000) evaọ ofẹ obọze ovatha-ọre. Aruẹri Jihova o te jọ udevie riẹ. 11 O te jọ rọkẹ izerẹ nọ a ru fo no evaọ usu emezae Zedọk,+ enọ e rẹrote owha-iruo rai nọ mẹ kẹ rai, nọ i ghoro vrẹ hẹ evaọ okenọ ahwo Izrẹl avọ ahwo Livae na a ro ghoro vrẹ.+ 12 A te jọ otọ nọ a nyaseba na wo ẹkẹ otọ jọ nọ o te jọ oware nọ o mae rrọ ọrẹri. O te kẹle uwhru ahwo Livae na.

13 “Ahwo Livae na a ti wo ẹkẹ otọ nwane kẹle otọ izerẹ na, u re theri te ikiubiti idu udhegbisoi (25,000) jẹ kẹre te idu ikpe (10,000). (Oma otọ na soso u ti theri te idu udhegbisoi [25,000] jẹ kẹre te idu ikpe [10,000].) 14 A rẹ zẹe he, rehọ oware ofa nwene iei hi, hayo rehọ emamọ ekẹ otọ enana ọvuọvo kẹ omọfa ha, keme oware ọrẹri o rrọ kẹ Jihova.

15 “Oria nọ o kiọkọ nọ o kẹre te ikiubiti idu isoi (5,000) nọ o rrọ akotọ uwhru ikiubiti idu udhegbisoi (25,000) na o te jọ rọkẹ okpẹwho na nọ a rẹ jọ ru eware sa-sa,+ nọ a rẹ bọ iwou fihọ, gbe otọ nọ erao e rẹ jọ re ẹbe. Okpẹwho na o te jọ udevie riẹ.+ 16 Enẹ a rẹ ma okpẹwho na: Uwhru ofẹ ẹkpẹlobọ ovatha-ọre ikiubiti idu ene gbe egba isoi (4,500), uwhru ofẹ obọze ovatha-ọre idu ene gbe egba isoi (4,500), uwhru ofẹ ovatha-ọre idu ene gbe egba isoi (4,500), yọ uwhru ofẹ ukiediwo-ọre idu ene gbe egba isoi (4,500). 17 Otọ nọ erao e rẹ jọ re ẹbe evaọ okpẹwho na o te jọ ikiubiti egba ivẹ gbe udhuvẹ-gbikpe (250) evaọ ofẹ ẹkpẹlobọ ovatha-ọre, egba ivẹ gbe udhuvẹ-gbikpe (250) evaọ ofẹ obọze ovatha-ọre, egba ivẹ gbe udhuvẹ-gbikpe (250) evaọ ofẹ ovatha-ọre, gbe egba ivẹ gbe udhuvẹ-gbikpe (250) evaọ ofẹ ukiediwo-ọre.

18 “Uthethei ẹkẹ otọ nọ o kiọkọ na avọ ẹkẹ otọ ọrẹri na o te jọ ẹrẹrẹe,+ ikiubiti idu ikpe (10,000) evaọ ofẹ ovatha-ọre gbe idu ikpe (10,000) evaọ ofẹ ukiediwo-ọre. O te jọ ẹrẹrẹe kugbe ẹkẹ otọ ọrẹri na, yọ eware nọ i ti noi ze e te jọ emuore kẹ enọ e be gbodibo kẹ okpẹwho na. 19 Enọ e be gbodibo kẹ okpẹwho na nọ i no erua Izrẹl kpobi ze e rẹ te kọ eware fihọ otọ na.+

20 “Ẹkẹ otọ na soso ọ rro te ikiubiti idu udhegbisoi (25,000), yọ u wo abọ ene ẹrẹrẹe. Wha rẹ nyase iẹe avọ ẹkẹ otọ okpẹwho na ba re e jọ ẹkẹ otọ ọrẹri.

21 “Osu na họ ọnọ o ti wo oria nọ o kiọkọ evaọ tabọ tabọ ẹkẹ otọ ọrẹri na avọ ẹkẹ otọ okpẹwho na.+ O te jọ akotọ iwhru ikiubiti idu udhegbisoi (25,000) nọ e rrọ ofẹ ovatha-ọre avọ ukiediwo-ọre ẹkẹ otọ ọrẹri na. O te jọ ẹrẹrẹe kugbe ekẹ otọ nọ e kẹle riẹ, yọ o te jọ rọkẹ osu na. Ẹkẹ otọ ọrẹri na avọ aruẹri etẹmpol na e te jọ udevie riẹ.

22 “Ẹkẹ otọ ahwo Livae na avọ ẹkẹ otọ okpẹwho na e te jọ udevie ẹkẹ otọ nọ o rrọ rọkẹ osu na. Ẹkẹ otọ osu na o te jọ udevie uwhru Juda+ avọ uwhru Bẹnjamin.

23 “Rọkẹ erua nọ i kiọkọ, ẹkẹ otọ Bẹnjamin u no uwhru ofẹ ovatha-ọre rite uwhru ofẹ ukiediwo-ọre.+ 24 Ẹkẹ otọ Simiọn o rrọ akotọ uwhru Bẹnjamin,+ no uwhru ofẹ ovatha-ọre rite uwhru ofẹ ukiediwo-ọre. 25 Ẹkẹ otọ Isaka+ o rrọ akotọ uwhru Simiọn, no uwhru ofẹ ovatha-ọre rite uwhru ofẹ ukiediwo-ọre. 26 Ẹkẹ otọ Zẹbulọn o rrọ akotọ uwhru Isaka,+ no uwhru ofẹ ovatha-ọre rite uwhru ofẹ ukiediwo-ọre.+ 27 Ẹkẹ otọ Gad o rrọ akotọ uwhru Zẹbulọn,+ no uwhru ofẹ ovatha-ọre rite uwhru ofẹ ukiediwo-ọre. 28 Uwhru ofẹ obọze ovatha-ọre nọ o rrọ akotọ uwhru Gad u ti no Tama+ rite obọ ame Mẹribat-kedẹsh,+ rite obọ Uto*+ na je rite obọ Abade Ologbo na.*

29 “Onana họ otọ nọ wha rẹ ghale re e jọ ukuoriọ kẹ erua Izrẹl,+ yọ enana e te jọ ekẹ otọ rai,”+ ere Jihova Olori nọ Ọ Mai Kpehru na ọ ta.

30 “Eria nana e te jọ eria nọ a re ro no okpẹwho na: Uwhru ofẹ ẹkpẹlobọ ovatha-ọre o te jọ ikiubiti idu ene gbe egba isoi (4,500).+

31 “Edẹ erua Izrẹl a ti ro se inuethẹ okpẹwho na. Evaọ inuethẹ esa nọ e rrọ ofẹ ẹkpẹlobọ ovatha-ọre na, unuẹthẹ jọ o rrọ kẹ Rubẹn, unuẹthẹ jọ o rrọ kẹ Juda, unuẹthẹ jọ o tẹ jẹ rrọ kẹ Livae.

32 “Uwhru ofẹ ovatha-ọre u ti theri te ikiubiti idu ene gbe egba isoi (4,500), yọ u wo inuethẹ esa: unuẹthẹ jọ o rrọ kẹ Josẹf, unuẹthẹ jọ o rrọ kẹ Bẹnjamin, unuẹthẹ jọ o tẹ jẹ rrọ kẹ Dan.

33 “Uwhru ofẹ obọze ovatha-ọre o te jọ ikiubiti idu ene gbe egba isoi (4,500), yọ u wo inuethẹ esa: unuẹthẹ jọ o rrọ kẹ Simiọn, unuẹthẹ jọ o rrọ kẹ Isaka, unuẹthẹ jọ o tẹ jẹ rrọ kẹ Zẹbulọn.

34 “Uwhru ofẹ ukiediwo-ọre u ti theri te ikiubiti idu ene gbe egba isoi (4,500), yọ u wo inuethẹ esa: unuẹthẹ jọ o rrọ kẹ Gad, unuẹthẹ jọ o rrọ kẹ Asha, unuẹthẹ jọ o tẹ jẹ rrọ kẹ Naftalae.

35 “Okpẹwho na soso wariẹ họ o te jọ ikiubiti idu ikpegberee (18,000). Odẹ okpẹwho na no umuo ẹdẹ yena vrẹ o te jọ Jihova Ọ Rrọ Etẹe.”+