JOẸL
1 Ẹme Jihova nọ o bru Joẹl* ọmọzae Pẹtuẹl ze:
Kọ oware utiona o via no ẹdẹ jọ evaọ edẹ rai
Hayo evaọ edẹ esẹ-esẹ rai?+
3 Wha gbiku riẹ kẹ emezae rai,
Jọ emezae rai i gbiku riẹ kẹ emezae rai re,
Emezae-emezae rai i ve je gbiku riẹ kẹ oge nọ ọ kẹle rai.
4 Eware nọ ebaka-ẹkpẹ ọraha e re kiọkọ, ebaka-ẹkpẹ nọ e rẹ jọ usu ovo buobu e re rai no;+
Eware nọ ebaka-ẹkpẹ nọ e rẹ jọ usu ovo buobu e re kiọkọ, ebaka-ẹkpẹ nọ i wo ibekpe he e re rai no;
Yọ eware nọ ebaka-ẹkpẹ nọ i wo ibekpe he e re kiọkọ, ebaka-ẹkpẹ nọ e rẹ re oware muotọ e re rai no.+
5 Wha rọwo no owezẹ ze whai egba-idi,+ re wha viẹ!
Wha kuenu oviẹ, whai kpobi nọ e rẹ da enwaene,
Keme a si enwaene ọwewere na no unu rai no.+
6 Keme orẹwho jọ nọ o rrọ gaga, nọ ahwo riẹ a bu wo umuo ho o vẹruọ ẹkwotọ mẹ no.+
Ibiakọ riẹ e wọhọ ibiakọ okpohrokpo,+ agba riẹ ọ wọhọ ọrọ okpohrokpo.
7 O raha evaene mẹ no je bru ure ifigi mẹ mu ehri,
Ọ kpẹ ehọrọ rai kpobi no je gbolo ai fihọ akotọ,
Makọ egha rai dede e rrọ fuafo.
8 Wha viẹ wọhọ epanọ ọmọtẹ-kọkọ* nọ o ku ehọ-ekpa* họ ọ rẹ viẹ
Fiki ọzae nọ ọ sa riẹ họ otọ* nọ o whu.
9 A gbe bi dhe idhe ibi ekakọ+ gbe idhe udi+ evaọ uwou Jihova ha;
Izerẹ na, nọ e rẹ gbodibo kẹ Jihova, a rrọ uweri.
10 A raha udhu na no, otọ na u bi weri;+
A raha ibi ekakọ na no, enwaene ọkpokpọ ọ ya muotọ no, ewhri o re no.+
11 Ewhẹrẹ i reghe no, eruẹrẹ-ọgbọ i bi kuenu oviẹ,
Fiki iwhiti gbe ebali na;
Keme eware nọ a jọ udhu na vu e raha no.
12 Ure evaene u whu no,
Ure ifigi u lo no.
Ure pọmegranet, oriẹ, gbe ure apo,
Ire kpobi nọ e rrọ ẹwọ na i whu no;+
Keme oghọghọ u zihe ruọ omovuọ no evaọ udevie ahwo na.
13 Wha ku ehọ-ekpa* họ je weri,* whai izerẹ;
Wha kuenu oviẹ, whai enọ e rẹ gbodibo evaọ agbada-idhe na.+
Wha ruọ eva re wha jọ etenẹ okioke avọ ehọ-ekpa* nọ e rrọ owhai oma, whai egbodibo Ọghẹnẹ mẹ;
Keme a siọ idhe ibi ekakọ+ gbe idhe udi+ ba edhe no evaọ uwou Ọghẹnẹ rai.
14 Woro nọ a siọ emuọriọ ba;* zizie ahwo na kẹ okokohọ urirẹ.+
Koko ekpako na gbe ahwo kpobi nọ a be rria ẹkwotọ na họ
Ziọ obọ uwou Jihova Ọghẹnẹ rai,+ re wha bo se Jihova kẹ obufihọ.
15 Ẹdẹ yena ọ te jọ ẹdẹ uye!
Keme ẹdẹ Jihova ọ kẹle no,+
Yọ ọ te tha wọhọ ọraha nọ o no obọ Erumeru na ze!
16 Kọ ogbẹrọnọ evaọ iraro mai na a jọ rehọ emu vrẹ,
Je si evawere avọ oghọghọ no uwou Ọghẹnẹ mai?
17 Ibi* na i siku no evaọ otọ eshọvẹle rai.
Iwou nọ a rẹ jọ sẹro* eware e rrọ ifofe.
A kporo iwou ibi ekakọ fihọ otọ no, keme ibi ekakọ na e ya fia no.
18 Makọ erao dede i bi dimẹ!
Ewa iruẹ i bi ghoro fikinọ a reghe no, keme a be ruẹ ẹbe re he!
Yọ igodẹ nọ e rrọ uthuru sa-sa e be ruẹ uye.
19 O Jihova, whẹ me re bo se;+
Keme erae e to ebe nọ e rrọ udhude na no,
Erae e tẹ jẹ mahe ire kpobi nọ e rrọ ẹwọ na no.
20 Makọ erao ẹwọ dede e be gwọlọ owhẹ,
Keme iko-ame na e kpọ yamu no
Erae e tẹ jẹ to ebe udhude na no.”
2 “Wha kporo onware evaọ Zayọn!+
Wha bo ubo ẹmo evaọ ugbehru ọrẹri mẹ.
Orẹwho jọ o riẹ nọ ahwo riẹ a rrọ buobu jẹ rrọ gaga;+
Orẹwho utioye o re jọ no emuhọ ze vievie he,
Yọ utioye ofa o gbẹ te jọ vievie he
Evaọ ige na kpobi.
3 Erae e be to eware kpobi nọ e rrọ obaro riẹ,
Erae e tẹ jẹ be mahe eware kpobi nọ e rrọ obemu riẹ.+
Ẹkwotọ nọ ọ rrọ obaro riẹ ọ wọhọ ọgbọ Idẹn,+
Rekọ obemu riẹ yọ udhude nọ a gbabọkẹ no,
Yọ oware ovo o sae vabọ họ.
4 Oma rai o wọhọ orọ enyenya,
A be dhẹ wọhọ enyenya-ẹmo.+
5 Nọ a bi duola evaọ ehru igbehru na, edo rai ọ wọhọ ọrọ ekẹkẹ,+
Wọhọ edo ebruerae nọ e be mahe ẹbe ọyaya.
A wọhọ egba nọ i dhe uhie ẹmo họ.+
6 Ahwo a te jọ awawa fiki rai.
Ovao kpobi o te vọ avọ ozọ.
7 A rẹ họrọ mu oware wọhọ egbaẹmo,
A rẹ gadiẹ ugbẹhẹ wọhọ isoja,
Ọvuọ edhere riẹ a rẹ tẹrovi,
A re vughu no edhere rai hi.
8 A re kpomahọ ohwohwo ho;
Omomọvo rai ọ be dhẹ haro evaọ edhere riẹ.
Otẹrọnọ a rọ ekwakwa ẹmo* sa ejọ kie,
Enọ i kiọkọ e rẹ vahabọ họ.
9 A rẹ họrọ ruọ okpẹwho, a rẹ dhẹ evaọ ugbẹhẹ.
A rẹ gadiẹ ruọ iwou, inwido a rẹ rọ ruọ eva wọhọ oji.
10 Otọ na gbe idhiwu na i bi nuhu evaọ aro rai.
Ọre gbe ọvẹre i muebi no,+
Yọ isi na e gbẹ be sai lo ziezi hi.
11 Jihova ọ te kpare urru riẹ evaọ aro ogbaẹmo riẹ,+ keme ogbaẹmo riẹ o rrọ buobu.+
Ọnọ o bi ru ẹme Riẹ gba na ọ rrọ gaga;
Keme ẹdẹ Jihova yọ ẹdẹ ologbo, gbe ẹdẹ nọ o re mu ọwhewhe gaga.+
Ono ọ rẹ sai thihakọ riẹ?”+
12 “O make rrọ ere na,” ere Jihova ọ ta, “wha rehọ udu rai kpobi zihe bru omẹ ze,+
Avọ emuọriọ-ọseba+ gbe oviẹ gbe enu oviẹ okuo.
13 Wha bẹre udu rai,+ orọnikọ iwu rai hi,+
Je zihe bru Jihova Ọghẹnẹ rai ze,
Keme o wo ọdawẹ* je wo ohrọ-oriọ, ọ rẹ kaki mu ofu hu,+ ọ vọ avọ uyoyou nọ o rẹ hiẹ hẹ,+
Ọ te wariẹ roro* kpahe okpẹtu na.
14 Ono ọ riẹ sọ o ti kuomarẹriẹ re ọ wariẹ roro*+
Ọ vẹ ghale owhai,
Re wha sai dhe idhe ibi ekakọ gbe idhe udi kẹ Jihova Ọghẹnẹ rai?
15 Kporo onware evaọ Zayọn!
Woro nọ a siọ emuọriọ ba;* zizie ahwo na kẹ okokohọ urirẹ.+
16 Koko ahwo na họ; ru ukoko na fo.+
Koko ekpọkuezae* na họ; koko emaha na gbe emọ unuevie họ.+
Jọ ọva o no obọ ukpẹ riẹ ze, ọmọtibobo o ve je no obọ ubrukpẹ riẹ ze.
17 Jọ izerẹ na, enọ e rẹ gbodibo kẹ Jihova
A jọ udevie ọmọgwa na avọ agbada-idhe na+ viẹ jẹ ta nọ:
‘O Jihova, jọ ohrọ ahwo ra o re owhẹ;
Who ru ukuoriọ ra fihọ oware nọ a re ro jijehwẹ hẹ,
Be kuvẹ re erẹwho na i su ai.
Kọ fikieme ahwo a rẹ rọ ta nọ, “Bovẹ Ọghẹnẹ rai ọ rrọ?”’+
19 Jihova o ti yo kẹ ahwo riẹ nọ:
‘Rri, me bi vi ibi ekakọ gbe enwaene ọkpokpọ gbe ewhri se owhai,
Wha te re eva vọ jẹ da bẹ;+
Me ti gbe ru owhai jọ oware ekela evaọ udevie erẹwho na ha.+
20 Me ti le ohwo ẹkpẹlobọ ovatha-ọre na thabọ no owhẹ;
Me ti lei kpohọ otọ nọ o raha no nọ o rrọ yaya jẹ rrọ ofofe,
Me ve ti le egbaẹmo obaro* riẹ rri obọ abade ovatha-ọre,*
Egbaẹmo obemu riẹ kọ obọ abade ukiediwo-ọre.*
Ekpehre ore oma riẹ u ti gbo via;
Ore ugbogbo riẹ u ti dhe egbegbo;+
Keme Ọghẹnẹ o ti ru eware igbunu.’
21 Ozọ u mu owhẹ hẹ, O ẹkwotọ.
Wha ghọghọ jẹ wereva, keme Jihova o ti ru eware igbunu.
22 Jọ ozọ u mu owhai hi, whai erao ẹwọ,
Keme ẹbe udhude na ọ te jọ bọbọbọ,+
Ire na e te mọ ibi;+
Ure ifigi avọ evaene e te mọ ibi buobu hrọ.+
23 Whai emezae Zayọn, wha ghọghọ jẹ wereva fiki Jihova Ọghẹnẹ rai;+
Keme o ti ru oso obọ emuhọ okiewhru rrọ kẹ owhai te epanọ o gwọlọ,
O ti ru okposo rrọ kẹ owhai,
Te iso obọ emuhọ okiewhru gbe iso obọ ekuhọ okiewhru wọhọ epanọ o jọ vẹre.+
24 Ibi ekakọ nọ a frẹ no e te vọ eria nọ a rẹ jọ si ibi no igbe ekakọ,
Enwaene ọkpokpọ gbe ewhri e te vọ egọdọ udi-uruo na.+
25 Mẹ te hwa osa eware nọ e raha ku owhai evaọ ikpe na kpobi zihe kẹ owhai,
Eware nọ ebaka-ẹkpẹ nọ e rẹ jọ usu ovo buobu e re, enọ ebaka-ẹkpẹ nọ i wo ibekpe he e re, enọ ebaka-ẹkpẹ nọ e rẹ re oware muotọ e re, gbe enọ ebaka-ẹkpẹ ọraha e re,
Ogbaẹmo ulogbo mẹ nọ me vi bru owhai ze.+
26 Wha te ginẹ re eva vọ,+
Wha ve ti jiri odẹ Jihova Ọghẹnẹ rai,+
Ọnọ o ru eware igbunu kẹ owhai na;
A gbẹ te wariẹ ru oma vuọ ahwo mẹ vievie he.+
A gbẹ te wariẹ ru oma vuọ ahwo mẹ vievie he.
28 Oyena o tẹ vrẹ no, me ti ku ẹzi mẹ+ ku oghẹrẹ uwo kpobi,
Emezae gbe emetẹ rai e te ruẹaro,
Ekpọkuezae rai e te wezẹ ewezẹ,
Izoge emezae rai e te ruẹ eruẹaruẹ.+
29 Yọ makọ erigbo mẹ nọ e rrọ ezae gbe erigbo mẹ nọ e rrọ eyae dede
Me ti ku ẹzi mẹ ku ae evaọ edẹ yena.
31 Ọre na o ti zihe ruọ ebi, ọvẹre na o ve ti zihe ruọ azẹ+
Taure ẹdẹ ologbo Jihova nọ o re mu ọwhewhe na ọ tẹ te ze.+
32 Yọ ohwo kpobi nọ o bi se odẹ Jihova a ti siwi ei;+
Keme ejọ e rẹ te jọ nọ e te dhẹ vabọ evaọ Ugbehru Zayọn gbe evaọ Jerusalẹm,+ nwane wọhọ epanọ Jihova ọ ta,
Enọ e te zọ nọ Jihova o se.”
3 “Keme rri! evaọ edẹ yena gbe evaọ oke yena,
Nọ mẹ te rehọ ahwo Juda gbe Jerusalẹm nọ a mu kpohọ igbo zihe ze na,+
2 Me ti koko erẹwho na kpobi họ re,
Etẹe mẹ te jọ lele ai gu ẹdhọ+
Fiki Izrẹl, enọ e rrọ ahwo mẹ gbe ukuoriọ mẹ,
Keme a vaha e rai fihọ erẹwho na,
A tẹ ghale ẹkwotọ mẹ fihọ omoma rai.+
3 A be rehọ ẹta-ọma ghale ahwo mẹ;+
A rẹ rehọ ọmọzae ro nwene ogberẹ
Jẹ zẹ ọmọtẹ re a ruẹ enwaene nọ a rẹ da.
4 Ofariẹ, eme me ro ru owhai thọ,
O Taya gbe Saedọn gbe ibrotọ Filistia kpobi?
Kọ wha bi ru omẹ kele fiki oware jọ?
Otẹrọnọ wha bi ru omẹ kele,
Me ti zihe orukele rai na ziọ uzou rai vẹrẹ vẹrẹ.+
5 Keme wha kwa isiliva gbe igoru mẹ rehọ,+
Wha te fi ekwakwa-aghae mẹ họ etẹmpol rai;
6 Wha zẹ ahwo Juda gbe Jerusalẹm kẹ ahwo Griki,+
Re wha ruẹse rehọ ae thabọ no ẹkwotọ obọrai;
7 Rri, mẹ te rehọ ai no obonọ wha zẹ rai kpohọ zihe ze,+
Me ve ti zihe orukele rai na ziọ uzou obọrai.
8 Mẹ te zẹ emezae gbe emetẹ rai kẹ ahwo Juda,+
A vẹ te zẹ ae kẹ ahwo Shiba, orẹwho nọ o rrọ thethabọ;
Keme Jihova omariẹ ọ ta riẹ no.
9 Wha whowho onana evaọ udevie erẹwho na:+
‘Wha ruẹrẹ oma kpahe kẹ ẹmo!* Tuduhọ egba na awọ!
Jọ isoja na kpobi a wọ lahwe, re a nyae họre!+
10 Wha duwu etẹkpẹ rai zihe ruọ egbọdọ gbe ibrẹbe rai zihe ruọ izuẹ.
Jọ ọyẹlẹ na ọ ta nọ: “Mẹ yọ ọgba.”
11 Wha nyaze ti fiobọhọ, whai erẹwho ekẹloma kpobi, wha koko oma họ!’”+
O Jihova, rehọ egba* ra ziọ oria yena.
12 “Jọ erẹwho na e kparoma re a nyaze obọ Ukiekpotọ* Jehoshafat;
Keme etẹe mẹ te keria jo bruoziẹ erẹwho ekẹloma na kpobi.+
13 Rehọ ojale muhọ ẹkọrọ, keme ibi na e ware no.
Nyaze ti thihi, keme ọgọdọ udi-uruo na ọ vọ no.+
Egọdọ na e vọ kpọhọhwẹ no, keme eware iyoma nọ erẹwho na i ru i bu thesiwa.
14 Ogbotu ahwo buobu, ogbotu ahwo buobu a rrọ ukiekpotọ* oziẹobro na,
Keme ẹdẹ nọ Jihova o ti ro bruoziẹ ahwo evaọ ukiekpotọ* oziẹobro na ọ kẹle no.+
15 Ọre avọ ọvẹre i ti muebi,
Yọ isi na e gbẹ te sai lo ziezi hi.
16 Jihova o ti do enu evaọ Zayọn,
Ọ te kpare urru riẹ kpehru evaọ Jerusalẹm.
Odhiwu gbe otọakpọ i ti nuhu;
Rekọ Jihova ọ te jọ oria adhẹzọ kẹ ahwo riẹ,+
Oria ufuoma rọkẹ ahwo Izrẹl.
17 Wha vẹ te riẹ nọ mẹ họ Jihova Ọghẹnẹ rai, ọnọ ọ be rria Zayọn, ugbehru ọrẹri mẹ na.+
18 Evaọ ẹdẹ yena, enwaene ọwewere u ti su no igbehru na ze,+
Ame-ivie o ti su evaọ ikpehru na,
Ame o ve ti su evaọ iko-ame Juda kpobi.
19 Rekọ Ijipti o ti zihe ruọ otọ ufofe,+
Edọm o ve ti zihe ruọ udhude nọ a gbabọkẹ no,+
Fiki ahwo Juda nọ a họre,+
Enọ a jọ ẹkwotọ rai kpe azẹ ekueku.+
20 Rekọ ahwo a te rria Juda ẹsikpobi,
Gbe Jerusalẹm no oge ruọ oge.+
Otofa riẹ họ “Jihova Họ Ọghẹnẹ.”
Hayo “otọakpọ.”
Hayo “ọmọtẹ.”
Hayo “ehọ-ẹkporo.”
Hayo “ọzae oke uzoge riẹ.”
Hayo “ehọ-ẹkporo.”
Hayo “jẹ tehe igbama rai.”
Hayo “ehọ-ẹkporo.”
Evaọ Hibru, “Wha ru emuọriọ-ọseba fo.”
Hayo o sae jọ nọ, “Ifigi eyaya.”
Hayo “rawo.”
Hayo “otọakpọ.”
Hayo “ese.”
Hayo “ọ rrọ wowou.”
Hayo “O te dae.”
Hayo “o vẹ dae.”
Evaọ Hibru, “Ru emuọriọ-ọseba fo.”
Hayo “ekpako.”
Hayo “wo ajọwha kẹ.”
Evaọ Hibru, “ovao.”
Koyehọ, Abade Owhuowhu na.
Koyehọ, Abade Mediterenia.
Hayo “eka.”
Hayo “Ukiekpotọ Opraprara.”
Otofa riẹ họ “Jihova Họ Obruoziẹ.”
Evaọ Hibru, “Wha ru ẹmo fo!”
Hayo “egbaẹmo.”
Hayo “Ukiekpotọ Opraprara.”
Hayo “ukiekpotọ opraprara.”
Hayo “ukiekpotọ opraprara.”
Hayo “ahwo erẹwho efa.”
Hayo “Uto.”
Hayo “tovo tovo.”