JONA
1 Ẹme Jihova o te bru Jona*+ ọmọzae Amitae ze, inọ: 2 “Kparoma re who kpohọ Nanivi+ okpẹwho ologbo na, re who whowho kẹ ae nọ a te raha iẹe no, keme umuomu rai u do te omẹ oma no.”
3 Rekọ Jona ọ tẹ kparoma re ọ dhẹ siọ Jihova ba kpohọ Tashish; o te kpohọ Jọpa, ọ tẹ ruẹ okọ ulogbo nọ u bi kpohọ Tashish. Ọ tẹ hwa ugho ofa riẹ, ọ tẹ ruọ eva re o lele ai kpohọ Tashish, re ọ ruẹse dhẹ siọ Jihova ba.
4 Jihova o te ru re ofou ọgaga ọ jọ abade na, ofou ọgaga o te muhọ efou evaọ abade na te epanọ okọ na o jẹ rọ gwọlọ zue. 5 Ozọ u mu ibiokọ na gaga te epanọ ae omomọvo o ro mu ọvuọ ọghẹnẹ riẹ họ ebo se kẹ obufihọ. A te mu eware nọ e rrọ okọ na họ egbolo fihọ abade na re u ru okọ na vori.+ Rekọ evaọ oke yena Jona ọ nya kpobọ eva okọ na* no, oria nọ ọ nyai kiẹzẹ, yọ ọ jọ owezẹ udidi. 6 Ọnọ o wuzou okọ na ọ tẹ nyabru ei, ọ tẹ ta kẹe nọ: “Fikieme whọ be rọ wezẹ? Kpama re who bo se ọghẹnẹ ra! Ẹsejọhọ Ọghẹnẹ uzẹme na ọ te re ohrọ mai re ma seba ewhu.”+
7 Kẹsena a tẹ ta kẹ ohwohwo nọ: “Wha nyaze re ma ma ẹta,+ re ma riẹ ohwo nọ ọ wha okpẹtu nana ze.” Fikiere a tẹ ma ẹta, ẹta na o te mu Jona.+ 8 A tẹ nọe nọ: “Ivie ta kẹ omai, kọ whẹ ọ wha okpẹtu nana se omai na? Didi iruo who re ru, bovẹ who no ze? Whẹ yọ ohwo orẹwho vẹ, kọ amono họ ahwo ra?”
9 O te yo kẹ ae nọ: “Mẹ yọ ohwo Hibru, yọ mẹ rẹ dhozọ* Jihova Ọghẹnẹ nọ ọ rrọ obọ idhiwu na, Ọnọ ọ ma abade gbe otọ oyaya na.”
10 Onana o tẹ lẹliẹ ozọ mu ezae na vi epaọ ọsosuọ, a tẹ nọe nọ: “Eme who ru?” (Ezae na e tẹ te riẹ nọ ọ be dhẹ siọ Jihova ba keme ọ ta kẹ ai no.) 11 A tẹ nọe nọ: “Eme ma re ru owhẹ re abade na ọ sae fọ kẹ omai?” Keme ẹkporo abade na o je dhe ẹgẹga. 12 O te yo kẹ ae nọ: “Wha wọ omẹ re wha gbolo omẹ fihọ abade na, abade na ọ te fọ kẹ owhai; keme mẹ riẹ nọ fiki mẹ ofou ọgaga nana o bi ro fou owhai na.” 13 Rekọ ezae na i te je bi gaga* re a sai bi okọ na zihe kpobọ okpa, rekọ a sai ru ere he, keme ofou gbe ẹkporo nọ ọ jọ abade na o je dhe ẹgẹga wariẹ ae họ.
14 Kẹsena a te bo se Jihova nọ: “O Jihova, ivie, joma whu fiki ọzae nana ha! Who du kru omai nọ ma kpe azẹ ekueku hu, nọ orọnọ who ru onọ o were owhẹ no na, O Jihova.” 15 Kẹsena a tẹ wọ Jona, a te gbolo iei fihọ abade na; abade na ọ tẹ fọ rirẹ. 16 Ozọ Jihova u te mu ezae na gaga,+ a te dhe idhe kẹ Jihova jẹ ya eyaa.
17 Jihova o te vi eri ologbo jọ nyae lọ Jona, Jona ọ tẹ jọ eva eri na edẹ esa gbe eso esa.+
2 Kẹsena Jona ọ tẹ lẹ se Jihova Ọghẹnẹ riẹ evaọ obọ eva eri na,+ 2 ọ lẹ nọ:
“Evaọ udevie uye mẹ me jo bo se Jihova, o te yo kẹ omẹ.+
Evaọ obọ edidi* Uki* na me jo bo kẹ obufihọ.+
Who yo urru mẹ.
3 Nọ who gbolo omẹ fihọ edidi na, fihọ udevie abade ọraragha na,
Ẹkẹre na o te su omẹ vrẹ.+
Ẹkporo ọgaga ra ọ tẹ wọ ruru omẹ.+
4 Mẹ tẹ ta nọ, ‘Who le omẹ no aro ra no!
Kọ ẹvẹ mẹ te sae rọ wariẹ ruẹ etẹmpol ọrẹri ra?’
5 Ame ọ wọ ruru omẹ je fi uzuazọ mẹ họ ọza;+
Ame na o le omẹ no.
Ẹbe ọ whaliẹ uzou mẹ.
6 Me kiediwi kpobọ otọ igbehru na.
Ethẹ otọakpọ na e jẹ kare dhe omẹ bẹdẹ bẹdẹ.
Rekọ who siwi uzuazọ mẹ no eva ọgọdọ na ze, O Jihova Ọghẹnẹ mẹ.+
7 Nọ uzuazọ mẹ o jẹ rọ ẹmẹrera re no, Jihova họ Ọnọ mẹ kareghẹhọ.+
Mẹ tẹ lẹ se owhẹ, olẹ mẹ o ziọ etẹmpol ọrẹri ra.+
8 Ahwo nọ a romakẹ emedhọ nọ i fioka ha a gbabọkẹ ọnọ o bi dhesẹ uyoyou nọ o rẹ hiẹ hẹ kẹ ae.
9 Rekọ rọkẹ omẹ, mẹ te rehọ uvou mẹ jiri owhẹ je dhe idhe kẹ owhẹ.
Mẹ te hwa oware nọ mẹ ya eyaa riẹ.+
Obọ Jihova esiwo o re no ze.”+
10 Nọ u te oke jọ, Jihova ọ tẹ ta ẹme kẹ eri na, eri na ọ tẹ kpa Jona fihọ okpa.
3 Kẹsena ẹme Jihova ọ tẹ wariẹ bru Jona ze orọ avọ isiava, inọ:+ 2 “Kparoma re who kpohọ Nanivi+ okpẹwho ologbo na, re who whowho ovuẹ nọ mẹ be ta kẹ owhẹ na kẹ ae.”
3 Fikiere Jona ọ tẹ kparoma o te kpobọ Nanivi+ wọhọ epanọ Jihova ọ ta kẹe na.+ Whaọ Nanivi ọ jọ okpẹwho nọ ọ rro gaga*—nọ a rẹ rehọ edẹ esa nya wariẹ. 4 Jona ọ tẹ ruọ okpẹwho na, ọ tẹ nya ugbo nọ o rẹ rehọ okpẹdoke soso, yọ o bi whowho nọ: “Edẹ udhuvẹ ọvo i kiọkọ re a raha Nanivi no.”*
5 Ahwo Nanivi a te fi ẹrọwọ họ Ọghẹnẹ,+ a te whowho nọ a siọ emuọriọ ba, a te ku ehọ-ekpa* họ, no ọnọ ọ mae rro rite ọnọ ọ mae kawo. 6 Nọ ovuẹ na u te ovie Nanivi oma, ọ tẹ kparoma no agbara-uvie riẹ, ọ tẹ ba iwu ovie riẹ no oma, o te ku ohọ-ekpa* họ, ọ tẹ keria enwo. 7 U te no ere no, ọ ta nọ a jọ Nanivi soso whowho nọ,
“Onana họ uzi nọ ovie na avọ ikpahwo riẹ a jie: Jọ uvumọ ohwo hayo arao, owa erao hayo uthuru erao a re oware ovo vievie he. A rẹ re emu hu, yọ a rẹ da ame gbe he. 8 Jọ ahwo gbe erao a ku ehọ-ekpa* họ; re a rehọ eva rai kpobi bo se Ọghẹnẹ, re a kurẹriẹ no idhere imuomu rai je siobọno ozighi nọ a bi ru. 9 Ono ọ riẹ sọ Ọghẹnẹ uzẹme na ọ te wariẹ roro kpahe oware nọ ọ gwọlọ ru na,* ọ vẹ siọ ofu ọgaga riẹ na ba, re ma seba ewhu?”
10 Nọ Ọghẹnẹ uzẹme na ọ ruẹ oware nọ a ru, oghẹrẹ nọ a ro kurẹriẹ no idhere imuomu rai,+ ọ tẹ wariẹ roro kpahe ọraha nọ ọ ta nọ ọ te raha ai na,* ọ gbẹ raha ae he.+
4 Rekọ onana o were Jona vievie he, eva e tẹ jẹ dhae gaga. 2 Fikiere ọ tẹ lẹ se Jihova nọ: “O Jihova, kọ ogbẹrọnọ onana mẹ jẹ ruawa kpahe okenọ mẹ jọ obọ orẹwho mẹ? Oyejabọ nọ mẹ jẹ rọ gwọlọ dhẹ kpobọ Tashish+ evaọ oke ọsosuọ na; keme mẹ riẹ nọ whẹ yọ Ọghẹnẹ nọ o wo ọdawẹ* je wo ohrọ-oriọ, nọ ọ rẹ kaki mu ofu hu jẹ vọ avọ uyoyou nọ o rẹ hiẹ hẹ,+ ọnọ o re nwene iroro riẹ ọ vẹ kpairoro vrẹ okpẹtu nọ ọ jẹ te rọ ze. 3 Whaọ enẹna Jihova, ivie rehọ uzuazọ mẹ no, keme o mai woma kẹ omẹ re me whu viukpenọ mẹ rẹ jọ uzuazọ.”+
4 Jihova ọ tẹ nọe nọ: “Kọ u kiehọ re who mu ofu ga tere?”
5 Jona o te no okpẹwho na, ọ tẹ keria ofẹ ovatha-ọre okpẹwho na. Ọ tẹ jọ etẹe rehọ agbada vi kẹ omariẹ, ọ tẹ keria otọ riẹ be hẹrẹ re ọ ruẹ oware nọ o te via kẹ okpẹwho na.+ 6 Kẹsena Jihova Ọghẹnẹ o te ru nọ ure owhala o rọ rro ze ruru Jona, re u ru edhedhẹ họ uzou riẹ je ru idhọvẹ riẹ kpotọ. Eva e tẹ were Jona gaga fiki ure owhala na.
7 Rekọ Ọghẹnẹ uzẹme na o te vi ohoi nyae re ure owhala na nọ oke o ke no evaọ okiokiọ riẹ, ure na u te lo no. 8 Nọ ọre ọ va ze no, Ọghẹnẹ o te je vi ofou ovatha-ọre nọ ọ vọ avọ ẹrrorro ọgaga ze, uvo u te bi mu Jona uzou, oma u te mu ei họ ẹlọhọ. Ọ tẹ be ta nọ ọ gwọlọ whu, ọ jẹ ta nọ, “O mai woma kẹ omẹ re me whu viukpenọ mẹ rẹ jọ uzuazọ.”+
9 Ọghẹnẹ ọ tẹ nọ Jona nọ: “Kọ u kiehọ re who mu ofu ga tere fiki ure owhala na?”+
Ọ tẹ kẹ uyo nọ: “Ofu nọ me bi mu na u kiehọ, yọ ofu na ọ ga te epanọ mẹ rọ gwọlọ whu dede.” 10 Rekọ Jihova ọ tẹ ta nọ: “O be da owhẹ kẹ ure owhala nọ whọ kọ họ, hayo nọ who ru rro ho; nọ o rro ze evaọ aso ọvo je whu evaọ aso ọvo. 11 Kọ o gbẹ da omẹ kẹ ahwo Nanivi okpẹwho ologbo na re,+ onọ ahwo nọ a bu vi idu udhozeza (120,000) a rrọ nọ a tubẹ riẹ oware uwoma gbe uyoma ha,* te erao ibuobu rai?”+
Otofa riẹ họ “Erueruẹ.”
Hayo “oria nọ a tehe ruru evaọ okọ na.”
Hayo “gọ.”
Hayo “e tẹ jẹ daoma gaga.”
Evaọ Hibru, “eva.”
Hayo “Sheol.” Rri oria Otofa Eme.
Evaọ Hibru, “okpẹwho nọ o rrọ ruaro evaọ aro Ọghẹnẹ.”
Hayo “re a fi Nanivi kparobọ.”
Hayo “ehọ-ẹkporo.”
Hayo “ohọ-ẹkporo.”
Hayo “ehọ-ẹkporo.”
Hayo “oware nọ Ọghẹnẹ uzẹme na ọ gwọlọ ru na o te dae.”
Hayo “ẹraha nọ ọ ta nọ ọ te raha ai na o tẹ dae.”
Hayo “ọ rrọ wowou.”
Hayo “a riẹ obọze avọ ẹkpẹlobọ rai hi.”