MAEKA
1 Ẹme Jihova nọ o bru Maeka*+ ohwo Morẹshẹt ze evaọ oke Jotam,+ Ehaz,+ gbe Hẹzikaya,+ ivie Juda,+ gbe ẹme nọ ọ jọ eruẹaruẹ yo kpahe Sameria gbe Jerusalẹm:
2 “Wha yo whai ahwo kpobi!
Gaviezọ, O otọakpọ gbe eware nọ e rrọ eva riẹ,
Jọ Jihova Olori nọ Ọ Mai Kpehru na o se isẹri kpe owhai+
—Jihova ọ rrọ evaọ etẹmpol ọrẹri riẹ.
3 Keme rri! Jihova o bi no oria riẹ vrẹ;
Ọ te ziọ otọ, o ve thihi eria ikpehru otọakpọ na.
4 Igbehru na e te ghra evaọ otọ awọ riẹ,+
Ikiekpotọ* e te hẹriẹ
Wọhọ iwhri nọ erae e be ghra,
Wọhọ ame nọ a ku fihọ oria nọ u kuwhrẹrẹ gaga.
Ono ọ wha ọkparesuọ Jekọp ze?
Kọ ogbẹrọnọ Sameria?+
Kọ ono o ru nọ eria ikpehru e rọ rrọ Juda?+
Kọ ogbẹrọnọ Jerusalẹm?
6 Me ti ru Sameria zihe ruọ ẹko ẹwhere nọ ọ rrọ udhu,
Oria nọ a rẹ kọ egbọ-evaene fihọ;
Me ti gbolo* itho riẹ fihọ ukiekpotọ na,
Mẹ te tọ etọhotọ riẹ rovie fihọ.
Mẹ te raha emedhọ riẹ kpobi no.
Keme osa igberẹ-ibro o ro wo ai,
A vẹ te rehọ ae hwosa kẹ igberẹ evaọ eria efa.”
Ubo mẹ o te jọ wọhọ orọ ikozi,
Uweri mẹ o vẹ te jọ wọhọ orọ igomugoro.
Omonwa na o kẹre te unuẹthẹ ahwo mẹ no, Jerusalẹm.+
10 “Wha whowho iei evaọ Gat he;
Wha viẹ vievie he.
Wha jọ otọ ghelie evaọ Bẹt-afra.*
11 Wha rọ ẹbẹba gbe omovuọ nyavrẹ, O ahwo nọ a be rria* Shefẹ.
Ahwo nọ a be rria Zeanan a* re wọ lahwe he.
A te jọ Bẹt-izẹl kuenu oviẹ, ọ gbẹ te sae tha owhai uke he.
12 Ahwo nọ a be rria Merọt a* be hẹrẹ nọ ewoma ọ te ze,
Rekọ oware uyoma u no obọ Jihova ziọ unuẹthẹ Jerusalẹm no.
13 Wha gba akẹkẹ na fihọ enyenya na, O ahwo nọ a be rria* Lekish.+
Whai họ enọ e wha uzioraha ọmọtẹ Zayọn ze,
Keme eva riẹ a jọ ruẹ ọkparesuọ Izrẹl.+
14 Whọ te kẹ Morẹshẹt-gat ekẹ rọ hẹriẹ iẹe uwou.*
Iwou Akzib+ e jọ oware eviẹhọ kẹ ivie Izrẹl.
15 Mẹ te rehọ ọnọ o re fi kparobọ* na bru owhai ze,+ O ahwo nọ a be rria* Marishah.+
Oruaro Izrẹl o te nya thabọ te obọ Adọlam.+
16 Wha nware eto rai jẹ fọrọ eto uzou rai muotọ fiki emọ eghaghae rai.
2 “Uye u te ahwo nọ a rẹ gba ẹgwae oware uyoma,
Enọ e rẹ jọ ehwa rai ma omaa umuomu!
Nọ oke o tẹ ke no, a ve ru oware nọ a ma omaa riẹ na,
Fikinọ a wo ogaga nọ a re ro ru ei.+
2 Idhu ahwo i re si ai urru, a vẹ rọ ogaga mi ae rehọ;+
Iwou ahwo i re si ai urru re, a vẹ rehọ ae;
A rẹ rehọ iwhayo mi ohwo uwou riẹ,+
Jegbe ukuoriọ riẹ.
3 Fikiere enẹ Jihova ọ ta:
‘Mẹ be ma omaa okpẹtu kpahe uviuwou nana+ nọ wha te sae dhẹ vabọ no ho.*+
Wha te gbẹ nya fu uke he,+ keme o te jọ oke okpẹtu.+
A te ta nọ: “A raha omai muotọ no riẹriẹriẹ!+
Ọ rehọ ẹkẹ nọ o te ahwo mẹ kẹ amọfa no—ọ rehọ e riẹ siọ omẹ ba no!+
Ọ rehọ idhu mai kẹ ahwo nọ a be gọe he.”
5 Fikiere who gbe ti wo ohwo ọvo nọ ọ te rriẹ ufi nọ a rẹ rọ ma na ha,
Re a ghale otọ na evaọ ukoko Jihova.
6 “Wha seba ewhowho!” rekọ a bi whowho,
“Jọ a whowho eware nana ha;
A ti ru oma vuọ omai hi!”
7 O uwou Jekọp, kọ a be ta nọ:
“Kọ odiri nọ ẹzi Jihova o wo o re no?
Kọ ọye o bi ru eware enana?”
Kọ eme mẹ e gbẹ be wha ewoma se ahwo nọ a bi yeri uzuazọ ukiẹrẹe?
8 Rekọ enẹna, ahwo obọmẹ a bi ru wọhọ ọwegrẹ.
Wha be jọ ẹgbede si oware osẹ uwowoma na no ewu
Ahwo nọ a be nyavrẹ ududu, nọ a be nya wọhọ ahwo nọ a bi no ẹmo kpozi.
9 Wha bi le eyae ahwo mẹ no iwou iwoma rai;
Wha bi mi emọ rai emamọ eware nọ mẹ rọ ghale ae no bẹdẹ bẹdẹ.
10 Kpama, re whọ nyavrẹ, keme oria nana o rrọ oria eriosehọ họ.
Ọraha, ọraha ọgaga+ ọ rrọ otọ na fiki egbegbe.+
11 Otẹrọnọ ohwo jọ ọ be nya lele ofou gbe eviẹhọ jẹ be ta ọrue nana, inọ:
“Mẹ te ta kẹ owhai kpahe enwaene gbe udi ogaga,”
Kiyọ ọ te jọ ọnọ o ti whowho oware nọ o te were ahwo nana!+
Me ti ru ae jọ okugbe ọvo wọhọ igodẹ nọ e rrọ eva ogba,
Wọhọ uthuru erao nọ o be re ẹbe;+
Edo ahwo ọ te vọ oria kpobi.’+
13 Ọnọ o re zue eghogho họ oria ọ te karo kẹ ae;
A ti kporo eghogho na rro viere, a vẹ te nya unuẹthẹ na vrẹ ruọ otafe.+
Ovie rai ọ te nyae vrẹ karo kẹ ae,
Yọ Jihova o ti wuzou rai.”+
Wha gbe te epanọ wha rẹ rọ riẹ oware nọ u kiete?
2 Rekọ wha mukpahe oware uwoma,+ wha te you oware uyoma;+
Wha be wọrọ ohọroma ahwo mẹ no je bi si uwo no igbenwa rai.+
3 Wha tẹ jẹ be re uwo ahwo mẹ+
Je bi ku ohọroma rai no,
Be whọlọ igbenwa rai ehehẹhẹ,+
Wọhọ oware nọ a there evaọ uwho,* wọhọ arao nọ a bi there evaọ uwho.
4 Evaọ oke yena, a ti bo se Jihova kẹ obufihọ,
Rekọ o ti yo kẹ ae he.
5 Enẹ Jihova ọ ta kpahe eruẹaro nọ i bi su ahwo mẹ thọ,+
Enọ i re whowho ‘Udhedhẹ!’+ nọ a te wo oware jọ nọ a be rowo* evaọ ibiakọ rai,+
Rekọ nọ e rẹ wọ ẹmo bru ohwo nọ o fi oware ovo họ unu rai hi:
Ọre na o ti fu dhe eruẹaro na.
Oke uvo u ve ti muebi kẹ ae.+
Aikpobi a te rọ abọ ruru eto-enu* rai,
Keme Ọghẹnẹ ọ be kẹ ae uyo ho.’”
8 Rọkẹ omẹ, ẹzi Jihova ọ kẹ omẹ ogaga,
Jegbe uvioziẹ gbe ẹgba,
Re mẹ vuẹ Jekọp kpahe ọkparesuọ riẹ jẹ vuẹ Izrẹl kpahe uzioraha riẹ.
9 Ivie wha yo onana, whai enọ i wuzou uwou Jekọp
Gbe whai isu uwou Izrẹl,+
Enọ uvioziẹ u re tuoma, nọ e rẹ gẹle oware kpobi nọ o rrọ liọliọ,+
10 Enọ e be rehọ azẹ-okpe bọ Zayọn jẹ rehọ umuomu+ bọ Jerusalẹm.
Ghele na a be rẹroso Jihova,* be ta nọ:
“Kọ Jihova ọ gbẹ rrọ kugbe omai?+
Okpẹtu ọvuọvo o ti te omai hi.”+
12 Fikiere, a ti kporo Zayọn
Wọhọ udhu fiki rai,
Jerusalẹm o ti zihe ruọ okpẹwho nọ a raha kuotọ,+
Yọ ugbehru Uwou* na o te jọ wọhọ eria ikpehru nọ e rrọ owhawho.*+
A ti ru ugbehru uwou Jihova+
Dikihẹ gaga evaọ obọ ehru igbehru na,
A te kpare iẹe kpehru vi ikpehru na,
Yọ ahwo a ti zurie kpohọ iẹe.+
2 Erẹwho buobu e te nya, a vẹ ta nọ:
“Wha nyaze re ma kpobọ ugbehru Jihova
Je kpobọ uwou Ọghẹnẹ Jekọp.+
O ti wuhrẹ omai kpahe idhere riẹ,
Yọ ma te nya evaọ idhere riẹ.”
Keme uzi* u ti no Zayọn ze,
Ẹme Jihova o ve ti no Jerusalẹm ze.
A ti duwu egbọdọ rai zihe ruọ etẹkpẹ
A ve ti duwu izuẹ rai zihe ruọ ibrẹbe.+
Orẹwho o gbẹ te kpare ọgbọdọ rọsuọ orẹwho ho,
Yọ a ti gbe wuhrẹ ẹmo-ofio ofa ha.+
4 Omomọvo rai ọ te keria* ọvuọ otọ ure evaene gbe otọ ure ifigi riẹ,+
Ohwo ọvo o ti ru ozọ mu ai hi,+
Keme Jihova olori egbaẹmo ọ rehọ unu riẹ tae no.
5 Ahwo na kpobi a te rehọ ọvuọ odẹ ọghẹnẹ riẹ nya,
Rekọ ma te rehọ odẹ Jihova Ọghẹnẹ mai nya+ bẹdẹ bẹdẹ.
6 “Evaọ ẹdẹ yena,” ere Jihova ọ ta,
“Me ti koko ọnọ* ọ jẹ nya segbe segbe na họ,
Je koko ọnọ a vaha fihọ eria sa-sa na họ,+
Jegbe enọ me gboja kẹ.
7 Me ti ru ọnọ* ọ jẹ nya segbe segbe na fihọ okiọkotọ,+
Je ru ọnọ a rehọ vrẹ thethabọ na fihọ orẹwho ulogbo;+
Jihova ọ vẹ te jọ ovie nọ o ti su ai evaọ Ugbehru Zayọn,
No enẹna vrẹ rite ebẹdẹ bẹdẹ.
8 Rọkẹ owhẹ, O uwou ukpehru uthuru erao,
Oria ukpehru ọmọtẹ Zayọn,+
Whẹ o ti bru ze, ẹhẹ, whẹ esuo ọsosuọ na o ti bru ze,+
Uvie nọ o rrọ kẹ ọmọtẹ Jerusalẹm.+
9 Kọ fikieme who bi ro bo gaga?
10 O ọmọtẹ Zayọn, thuẹ avọ imẹ-idio,
Wọhọ aye nọ o bi yẹ,
Keme who ti no okpẹwho na, whọ vẹ te rria obọ ẹwọ.
Who ti te ugbo obọ Babilọn,+
Yọ obei a te jọ siwi owhẹ;+
Obei Jihova ọ te jọ dẹ owhẹ zihe ze evaọ obọ ewegrẹ ra.+
11 Whaọ erẹwho buobu i ti kokohọ rọsuọ owhẹ;
A te ta nọ, ‘Jọ a zue ei oma,
Jọ ibiaro mai e ruẹ onana nọ o te via kẹ Zayọn.’
12 Rekọ a riẹ oware nọ Jihova o wo họ iroro ho,
A wo otoriẹ ẹjiroro riẹ hẹ;
Keme o ti koko ai họ wọhọ ekru eka nọ a kọrọ obọ kpohọ oria nọ a rẹ jọ si ibi no igbe ekakọ.
13 O ọmọtẹ Zayọn, kpama re who mu eka họ ẹkpare;+
Keme me ti nwene izei ra zihe ruọ ayọno,
Me ti nwene ekothawọ ra zihe ruọ ekọpa,
Whọ te pẹhẹ ahwo buobu.+
Whọ te rehọ erere rai nọ a rọ ewhariọ wo na kẹ Jihova,
Jẹ rehọ ekwakwa rai kẹ Olori uzẹme otọakpọ na soso.”+
A be rọ ọkpọ fa obruoziẹ Izrẹl agba.+
Ọnọ ọ kawo vi epanọ ọ rẹ rọ jọ usu inuwou* Juda,
Eva ra ọnọ ọ te jọ osu kẹ omẹ evaọ Izrẹl o ti no ze,+
Ọnọ emuhọ riẹ ọ rrọ no oke anwae ze, no oke krẹkri nọ u kpemu ze.
3 Fikiere o ti siobọno ai kẹ ewegrẹ
Bẹsenọ aye nọ o bi yẹ na o ti yẹ no.
Inievo riẹ nọ i kiọkọ i ve ti zihe bru ahwo Izrẹl.
4 Ọ te kpama, ọ vẹ rọ ẹgba Jihova rẹrote uthuru na,+
Avọ udu nọ o ti ro ru eware evaọ odẹ ulogbo Jihova Ọghẹnẹ riẹ.
Nọ ohwo Asiria na ọ tẹ vẹruọ otọ mai jẹ be nya evaọ iwou ikpehru mai nọ e rẹ bẹ ẹvẹruọ,+
Ma te rehọ ithuru-igodẹ ihrẹ, ẹhẹ, isu* eree mu evaọ udevie ahwo-akpọ, enọ e te zae họ.
O ti siwi omai no obọ ohwo Asiria na,+
Nọ ọ tẹ vẹruọ otọ mai jẹ be nya evaọ ẹkwotọ mai.
7 Emọ Jekọp nọ i kiọkọ e te jọ udevie ahwo buobu
Wọhọ igrigri nọ i no obọ Jihova ze,
Wọhọ oso nọ ọ rẹ rrọ ku ẹbe
Nọ ọ rẹ rẹroso ohwo-akpọ họ
Hayo hẹrẹ ahwo-akpọ họ.
8 Emọ Jekọp nọ i kiọkọ e te jọ udevie erẹwho na,
Evaọ udevie ahwo buobu,
Wọhọ okpohrokpo nọ ọ rrọ udevie erao nọ e rrọ ẹwọ,
Wọhọ okpohrokpo ọgaga* nọ ọ rrọ udevie igodẹ,
Nọ ọ tẹ ruọ udevie rai, ọ jẹ vabọ tu ọjọ, ọ vẹ zae ekekẹ;
Yọ ohwo ọvo ọ riẹ nọ o re siwi ai hi.
9 Who ti fi ewegrẹ ra kparobọ,
Yọ a te raha ewegrẹ ra kpobi no.”
10 “Evaọ ẹdẹ yena,” ere Jihova ọ ta,
“Me ti kpe enyenya ra no udevie ra jẹ raha ekẹkẹ ra no.
11 Mẹ te raha ikpewho nọ e rrọ ẹkwotọ ra no
Je kporo eria ra kpobi nọ a di ogba wariẹ họ* fihọ otọ.
13 Mẹ te raha emema ra gbe ipila ra no udevie ra no,
Who gbe ti guzou kpotọ kẹ iruo abọ ra ha.+
15 Evedha avọ ofu me ti ro ru
Erẹwho nọ i yoẹme he na kele.”
6 Ivie, wha yo ẹme nọ Jihova ọ be ta.
Wha kpama, re wha gu ẹkẹ unu rai evaọ aro igbehru na,
Re ikpehru na i je yo edo urru rai.+
2 O igbehru, wha yo ẹkẹ unu Jihova nọ o ti gu,
Whai etọhotọ egaga otọakpọ na,+
Keme Jihova avọ ahwo riẹ a wo ẹdhọ;
Ahwo Izrẹl o ti lele gu:+
3 “Ahwo mẹ, eme me ru owhai?
Ẹvẹ me ro ru oma rrọ owhai?+
Wha se isẹi mu omẹ.
4 Keme mẹ rehọ owhai no ẹkwotọ Ijipti ze,+
Obonọ wha jẹ jọ igbo mẹ ta owhai no ze;+
Me vi Mosis, Erọn, gbe Miriam karo kẹ owhai.+
5 Ahwo mẹ, ivie wha kareghẹhọ oware nọ Belak ovie Moab ọ ma omaa riẹ,+
Jegbe uyo nọ Belam ọmọzae Biọ ọ kẹ riẹ+
—Oware nọ o via evaọ Shitim+ rite Gilgal+—
Re wha ruẹse riẹ iruẹru ikiẹrẹe Jihova.”
6 Kọ eme mẹ te wha ze aro Jihova?
Eme mẹ te wha lele oma nọ me ti kigwẹ kẹ Ọghẹnẹ nọ ọ rrọ obọ ehru?
Kọ eware nọ a re ro dhe idhe-emahọ mẹ te wha ze aro riẹ,
Emọ-iruẹ nọ i te ukpe no?+
7 Kọ a sae rehọ igbo nọ i bu te idu buobu ro ru Jihova eva were?
Manikọ idu ikpe eko buobu erọ ikpomoku ewhri?+
Kọ ọmọzae ọkpako* mẹ mẹ te rọ kẹe fiki ọkparesuọ mẹ,
Ubi nọ u no oma mẹ ze mẹ te rọ kẹe fiki uzioraha mẹ?+
8 O, whẹ ohwo-akpọ, ọ vuẹ owhẹ oware nọ u woma no.
Kọ eme Jihova ọ gwọlọ mi* owhẹ?
Oware nọ ọ gwọlọ mi owhẹ kpobi họ, re who bru uvioziẹ,*+ re who rri uyoyou nọ o rẹ hiẹ hẹ ghaghae,*+
9 Urru Jihova u bi se okpẹwho na;
Ahwo nọ a wo uvi areghẹ a te dhozọ odẹ ra.
Kezọ kẹ ọkpọ na gbe ọnọ ọ rehọ e riẹ mu.+
10 Kọ ekwakwa-aghae nọ a rọ umuomu wo gbe owawọ ifa* iwhayo nọ o rrọ nyenyenye
E gbẹ rrọ uwou ahwo omuomu?
11 Kọ uruemu mẹ o rẹ sae jọ fuafo* nọ me te wo iskeli eviẹhọ,
Hayo nọ me te wo itho owawọ iwhayo evaọ ẹkpa mẹ?+
13 “Fikiere, mẹ te fa owhẹ nwoma,+
Je ru owhẹ họ oria ofofe fiki izieraha ra.
14 Whọ te re emu rekọ eva e te vọ owhẹ hẹ;
Eva ra e te jọ ofofe.+
Eware nọ whọ wọ, whọ te sae sẹro rai gbẹsinẹdẹ hẹ,
Yọ enọ whọ sae sẹro rai dede, mẹ te rehọ ae kẹ ọgbọdọ na.
15 Whọ te kọ ibi, rekọ who ti vu hu.
Who ti thihi ibi olivi, rekọ whọ te rehọ ewhri na ru oware ovo ho;
Who ti ru enwaene ọkpokpọ, rekọ whọ te da enwaene he.+
16 Keme who bi koko izi Omri je bi ru eware kpobi nọ uwou Ehab u ru,+
Who te je bi ru lele ohrẹ rai.
Oyejabọ nọ me ti ro ru owhẹ họ oware idudu
Je ti ru ahwo nọ a be rria eva okpẹwho na họ oware nọ a rẹ rọ fiki riẹ fiunu;+
Yọ ahwo a te rehọ owhẹ se ẹkoko.”+
7 Uye u te omẹ! Mẹ wọhọ ohwo
Nọ ọ be ruẹ ibi-ire
Gbe ibi ifigi ọsosuọ nọ i bi si omẹ urru lalọ họ
Evaọ okenọ a koko ibi-ire ezi ivo họ re no,
Je si isogẹ re no evaọ ezi nọ a rẹ rọ kọrọ ibi-ire.
2 Ọnọ ọ be romakpotọ na o whu no evaọ otọakpọ na;
Ohwo ọvo nọ o kiete evaọ usu ahwo na ọ rrọ họ.+
Aikpobi a dhere be hẹrẹ ohwo nọ a ti kpe.+
Omomọvo rai ọ be rọ osakrosa ko oniọvo obọriẹ họ.
3 Abọ rai ọ riẹ epanọ a re ru oware uyoma totọ;+
Osu* ọ be ta nọ a kẹe ekẹ,
Obruoziẹ ọ be yare osohwa,+
Ọnọ a riẹ odẹ ọ be ta ẹgwọlọ riẹ via,*+
Yọ a re kuobọgbe ru ei.*
4 Ọnọ ọ mai woma evaọ usu rai ọ wọhọ idhigbo,
Ọnọ ọ mai kiete evaọ usu rai o yoma vi ogba idhigbo.
Ẹdẹ nọ iroroke ra a ta kpahe na gbe ẹdẹ nọ a te rọ hwosa kẹ owhẹ ọ be tha.+
A ti nuhu evaọ oke yena.+
5 Who fi ẹrọwọ họ ogbẹnyusu ra ha
Hayo fievahọ ogbẹnyusu ọkpekpe ra ha.+
Riẹ oghẹrẹ ẹme nọ whọ rẹ ta kẹ ọnọ ọ rọ oma rẹrẹ igbama ra.
6 Keme ọmọzae o bi rri ọsẹ riẹ vo,
Ọmọtẹ ọ be wọso oni riẹ,+
Aye uwou-orọo ọ be wọso oniọrọo riẹ;+
Ahwo uwou obọ ohwo họ ewegrẹ riẹ.+
7 Rekọ rọkẹ omẹ, me ti fiẹrohotọ re mẹ riẹ oke nọ Jihova ọ te rọ jowọ.+
Mẹ te rọ odiri hẹrẹ Ọghẹnẹ esiwo mẹ.+
Ọghẹnẹ mẹ ọ te gaviezọ kẹ omẹ.+
8 O ọwegrẹ* mẹ, who du ghọghọ fiki mẹ hẹ.
Dede nọ me kie no, mẹ te kparoma;
Dede nọ mẹ rrọ evaọ ebi, Jihova ọ te jọ elo mẹ.
9 Me ti thihakọ ofu Jihova
—Keme mẹ thọ uzi riẹ no+—
Bẹsenọ ọ rẹ jọ abọ mẹ evaọ ẹdhọ mẹ je bru uvioziẹ kẹ omẹ.
Ọ te rehọ omẹ lahwe ziọ elo;
Me ve ti rri iruo ikiẹrẹe riẹ.
10 Ọwegrẹ mẹ ọ vẹ te jẹ ruẹ,
Yọ oma o te vuọ ọnọ ọ jẹ nọ omẹ nọ:
“Jihova Ọghẹnẹ ra na ọ rrọ?”+
Ibiaro mẹ i ti rri ọwegrẹ na.
Whaọ, a ti thihi ei evaọ iyẹrẹ na wọhọ ọloho.
11 O te jọ ẹdẹ nọ a te rọ ma igbẹhẹ itho ra;
Evaọ ẹdẹ yena, a ti ru uwhru na kẹre.*
12 Evaọ ẹdẹ yena a te nyabru owhẹ ze
No ugbo obọ Asiria gbe ikpewho Ijipti ze,
No obọ Ijipti rite obọ Ethẹ* na ze;
No abade rite abade ze je no ugbehru rite ugbehru ze.+
13 Ẹkwotọ na o te jọ ofofe fiki ahwo nọ a be rriae eva,
Fiki eware nọ a ru.*
14 Rehọ ọkpọ ra su ahwo ra, uthuru nọ o rrọ ukuoriọ ra,+
Ọnọ ọye ọvo ọ jẹ rria igbrẹwọ—evaọ udevie ọgbọ ekakọ.
Jọ a jọ Beshan avọ Giliad re emu+ wọhọ epanọ o jọ oke anwae.
15 “Me ti dhesẹ eware igbunu kẹe,+
Wọhọ epanọ o jọ evaọ oke nọ who ro no ẹkwotọ Ijipti ze.
16 Erẹwho e te ruẹ, oma o vẹ te vuọ ae ghelọ ogaga rai kpobi.+
A te whẹ abọ họ enu;
Ezọ rai i ti di no.
17 A te lalọ ẹkpẹ wọhọ eraomuomu;+
A ti no eria omofọwẹ rai ze wọhọ erao nọ i re si hayo katiẹ evaọ otọakpọ na yọ a bi nuhu.
A te nyabru Jihova Ọghẹnẹ mai ze avọ idudu,
Yọ a te dhozọ ra.”+
18 Ono họ Ọghẹnẹ wọhọ owhẹ,
Nọ ọ rẹ kpairoro vrẹ iruthọ jẹ rehọ izieraha rọvrẹ+ ikiọkotọ ukuoriọ riẹ?+
O ti mu ofu bẹdẹ bẹdẹ hẹ,
Keme uyoyou nọ o rẹ hiẹ hẹ o rẹ were iẹe.+
19 Ọ te wariẹ re omai ohrọ;+ jẹ kpairoro vrẹ iruthọ mai.*
Who ti gbolo izieraha rai kpobi fihọ edidi abade.+
20 Who ti ru ẹme nọ whọ ta kẹ Jekọp gba,
Je ti dhesẹ uyoyou nọ o rẹ hiẹ hẹ kẹ Abraham,
Wọhọ epanọ whọ ya eyaa kẹ esẹ-esẹ mai no anwọ oke anwae ze.+
Ubro odẹ na, Maekẹl (onọ otofa riẹ o rrọ “Ono Ọ Wọhọ Ọghẹnẹ?”) hayo Maekaya (onọ otofa riẹ o rrọ “Ono Ọ Wọhọ Jihova?”).
Hayo “Ikiekpotọ epraprara.”
Evaọ Hibru, “ku.”
Hayo “osa igberẹ-ibro riẹ kpobi.”
Hayo “evaọ uwou Afra.”
Evaọ Hibru, “aye nọ ọ be rria.”
Evaọ Hibru, “Aye nọ ọ be rria Zeanan ọ.”
Evaọ Hibru, “Aye nọ ọ be rria Merọt ọ.”
Evaọ Hibru, “aye nọ ọ be rria.”
Hayo “ekẹ akodẹ.”
Hayo “ọnọ o re mi ahwo eware rai rehọ no.”
Evaọ Hibru, “aye nọ ọ be rria.”
Ẹme Hibru nọ a fa udele na o sai je dhesẹ ugo.
Evaọ Hibru, “wha ti si uriohọ rai no ho.”
Hayo “uwho nọ enu riẹ o rrọ kẹkẹe.”
Hayo o sae jọ nọ, “nọ a te wo oware jọ nọ a rẹ re.”
Hayo “whabọ họ enu.”
Evaọ Hibru, “Enọ i wuzou.”
Hayo “isiliva.”
Hayo “a be ta nọ a rẹroso Jihova.”
Hayo “ugbehru etẹmpol.”
Hayo “otọ nọ ikpire e vọ.”
Hayo “Evaọ edẹ urere na.”
Hayo “uthubro.”
Hayo “rria.”
Evaọ Hibru, “aye nọ.”
Evaọ Hibru, “aye nọ.”
Evaọ Hibru, “idu.”
Hayo “ikpahwo-esuo.”
Evaọ Hibru, “rọ ọgbọdọ su otọ Asiria.”
Hayo “okpohrokpo nọ ọ rrọ whẹvu.”
Hayo “e rẹ bẹ ẹvẹruọ.”
Evaọ Hibru, “nọ o rrọ obọ ra.”
Rri oria Otofa Eme.
Hayo “ọnwara.”
Hayo “be nọ mi.”
Hayo “ru oware nọ u kiete; siọ ọriẹwẹ ba edhesẹ.”
Hayo “jọ wowou.” Evaọ Hibru, “you uyoyou nọ o rẹ hiẹ hẹ.”
Hayo “riẹ ọnyaba ra nọ who bi lele Ọghẹnẹ ra nya na!”
Rri Ẹme-Ofiba B14.
Hayo “abọ mẹ ọ rẹ sae fo.”
Hayo “Okpohwo-esuo.”
Evaọ Hibru, “oware nọ u bi si nifẹsh riẹ urru.” Rri oria Otofa Eme.
Evaọ Hibru, “ku obọ kugbe zuo iei.”
Ẹme Hibru nọ a re se “ọwegrẹ” u kiekpahe aye.
Hayo o sae jọ nọ, “uzi na o te jọ thethabọ.”
Koyehọ, Yufretis.
Evaọ Hibru, “Fiki ibi nọ i no iruẹru rai ze.”
Hayo “je thihi iruthọ mai nyaotọ; je fi iruthọ mai kparobọ.”