NAHUM
1 Owhowhovia ẹdhoguo kpahe Nanivi:+ Obe eruẹaruẹ Nahum* ohwo Ẹlkosh:
2 Jihova yọ Ọghẹnẹ nọ ọ gwọlọ omarọkẹ riẹriẹriẹ,+ yọ o re ru kele;
Jihova o re ru kele yọ ọ ruẹrẹ oma kpahe re o dhesẹ ofu riẹ via.+
Jihova o re ru ewegrẹ riẹ kele,
Yọ o re mu ofu kẹ ewegrẹ riẹ.
3 Jihova ọ rẹ kaki mu ofu hu+ yọ o wo ogaga ulogbo,+
Rekọ Jihova ọ rẹ siọ irumuomu uye nọ u fo rai ba ẹkẹ hẹ.+
Nọ ọ be nya yọ ofou ọraha gbe ofou ọwhibo i bi fou,
Yọ ẹgho họ ovu nọ ọ be rra no otọ awọ riẹ ze.+
Ẹbe Beshan avọ Kamẹl o re lo no,+
Yọ idodo Lebanọn i re lo no.
5 Igbehru i re nuhu fiki riẹ,
Yọ ikpehru na e rẹ ghra.+
Otọakpọ na u ti duwuku fiki ovao riẹ,
Te ẹkwotọ na gbe enọ e be rria eva riẹ kpobi.+
6 Ono ọ rẹ sai dikihẹ rọ ovao dhe ofu riẹ?+
Ono ọ rẹ sae rọ oma za ẹrrorro evedha riẹ?+
Ọ te kpare ofu riẹ ku ai wọhọ erae,
Yọ itho na i ti kporo ehehẹhẹ fiki riẹ.
7 Jihova o woma,+ ọye họ oria omofọwẹ evaọ ẹdẹ uye.+
O bi muẹrohọ* enọ e be rẹroso ẹe kẹ adhẹzọ.+
8 Ọ te rehọ owhe ologbo raha oria riẹ* muotọ,
Yọ ewegrẹ Ọghẹnẹ a te jọ ebi.
9 Ẹgwae omuomu vẹ whọ rẹ sae gba kpahe Jihova?
Ọ be raha ae muotọ.
Uye o gbẹ te tha orọ avọ isiava ha.+
10 Keme a wọhọ idhigbo nọ e whaliẹ ohwohwo,
Yọ a wọhọ enọ e da ebiẹ* thomawa;
Rekọ a te to zẹghẹ zẹghẹ wọhọ ẹbe ọyaya.
11 Ọnọ ọ rẹ te gba ẹgwae omuomu kpahe Jihova o re ti no eva ra ze,
Ọ te kẹ ohrẹ nọ u fioka ha.
12 Enẹ Jihova ọ ta:
“Dede nọ a rrọ gaga jẹ rrọ buobu,
A re ti kpe ai no, a gbẹ te jọ ofa ha.*
Me gboja kẹ owhẹ,* rekọ me gbe ti gboja kẹ owhẹ ofa ha.
13 Whaọ enẹna me ti wiri ọkpọ owhowha riẹ no ikoko ra,+
Mẹ te sawo ifi nọ a rọ gba owhẹ na ibro ivẹ.
14 Jihova o jie uzi kpahe owhẹ* no nọ,
‘A gbe ti yo odẹ ra ofa ha.
Mẹ te raha emema nọ a kare gbe emema ayọno* no uwou* eghẹnẹ ra.
Mẹ te tọ uki kẹ owhẹ, keme who fioka ha.’
15 Rri! Awọ ọnọ ọ be wha usi uwoma ze ọ rrọ ehru igbehru na,
Ọnọ o bi whowho udhedhẹ.+
Wha ru ehaa rai,+ O Juda, wha ru eyaa rai gba,
Keme ọnọ o fioka ha na ọ gbẹ te nya udevie ra vrẹ ofa ha.
A rẹ te raha iẹe muotọ.”
2 Ọnọ ọ rẹ vaha na ọ wọ bru owhẹ* ze no.+
Rou eria nọ a di egba wariẹ họ* na.
Hai rou edhere na.
Ruẹrẹ oma kpahe* re who je se ofu họ igbabọ.
2 Keme Jihova o ti zihe orro Jekọp ze,
Te orro Izrẹl,
Keme enọ e rẹ raha ọraha na e raha e rai no;+
Yọ a raha egha esese rai nọ e be ta ze no.
3 A rehọ ọda ọwawae ralọ ejese egbaẹmo riẹ,
Egbaẹmo riẹ a fi iwu nọ e rrọ wawae gaga họ.
Ekwakwa ayọno erọ ekẹkẹ ẹmo riẹ i bi lo wọhọ erae
Evaọ ẹdẹ nọ ọ be rọ ruẹrẹ oma kpahe kẹ ẹmo,
Yọ a bi veghe izuẹ nọ a rọ ure junipa ru.
4 Ekẹkẹ ẹmo na e be dhẹ siawọ gaga evaọ iyẹrẹ na.
A be dhẹ kpenẹ avọ enẹ evaọ oko-ore ẹwho na.
A bi lo wọhọ imire-erae je bi lo wọhọ elo egbrara.
5 O ti se egbaẹmo riẹ.
A ti zoruẹ nọ a be nyaze na.
A dhẹ kpobọ ugbẹhẹ riẹ;
A te di ogba họ iẹe.
7 A jie uzi na no:* A fere riẹ via no,
A wọ riẹ vrẹ, yọ idibo-emetẹ riẹ a bi sigbi oviẹ;
Nọ a be tehe igbama rai na edo rai ọ wọhọ edo irueruẹ.
8 Evaọ edẹ riẹ kpobi Nanivi+ ọ wọhọ ẹtẹre-ame,
Rekọ obọnana a be dhẹ.
“Wha dikihẹ! Wha dikihẹ!”
Rekọ ohwo ọvo o bi kuomarẹriẹ hẹ.+
9 Wha kwa isiliva, wha kwa igoru!
Ekwakwa-aghae na i wo umuo ho.
Oghẹrẹ eware eghaghae kpobi e rrọ eva riẹ.
10 Okpẹwho na ọ rrọ ofofe, ohwo ọvo ọ rrọ eva riẹ hẹ, a raha e riẹ no!+
Udu rai o rrọ awawa, ighilawọ e be lọhọ ae, eku rai o bi nuhu;
Ovao rai kpobi o vọ avọ ozọ.
11 Kọ uwou ikpohrokpo na o rrọ,+ oria nọ ikpohrokpo egaga* na a rẹ jọ re emu,
Oria nọ okpohrokpo na o re su ọmọ riẹ no ze,
Ababọ ohwo jọ nọ o re ru ozọ mu ai?
12 Okpohrokpo na o je kpe erao nọ i re te emọ riẹ re kẹ ae
O je kpe kẹ ikpohrokpo eyae riẹ.
O je kpe erao vọ ighogho riẹ ẹsikpobi,
Erao nọ ọ za ekekẹ e jẹ vọ ighogho riẹ.
13 “Rri! Mẹ te rọsuọ owhẹ,” ere Jihova olori egbaẹmo ọ ta,+
“Mẹ te mahe ekẹkẹ ẹmo riẹ i ve ti kuye iwiri,+
Ọgbọdọ o ti kpe ikpohrokpo egaga ra.*
Me ti ru nọ whọ te gbẹ ruẹ ọvuọvo kpe evaọ otọakpọ na ha,
A gbe ti yo urru enyukọ ra ofa ha.”+
3 Uye u te okpẹwho azẹ-okpe na!
Eviẹhọ gbe uji-utho e da riẹ fia.
Obọ riẹ u bi no ikpakpe he!
2 Edo oviaviẹ gbe edo etẹ ekẹkẹ e rrọ etẹe,
Anyenya nọ ọ be dhẹ vẹrẹ vẹrẹ gbe akẹkẹ nọ o bi ru edo.
3 Ọdhẹ-anyenya nọ ọ keria ehru anyenya, ọgbọdọ nọ o bi lo, gbe ozuẹ nọ o bi lo nwranwranwra,
Ogbotu enọ a kpe fihọ otọ gbe iri nọ e vọ otọ
—Iri i bu thesiwa.
A bi dhe ezezoruẹ evaọ ehru iri na.
4 O rrọ ere fiki igberẹ-ibro egaga ogberẹ na,
Ọnọ o wo erru je bi lo, ọgbẹva ologbo,
Ọnọ ọ be rọ igberẹ-ibro riẹ si erẹwho na ruọ ẹta jẹ be rehọ ẹva-ọgba riẹ si iviuwou ruọ ẹta.
5 “Rri! Mẹ te rọsuọ owhẹ,”* ere Jihova olori egbaẹmo ọ ta,+
“Mẹ te yẹ ibuluku ra kpehru fihọ ovao ra;
Me ti ru erẹwho na ruẹ ẹba ra,
Je ru ekwotọ-ivie ruẹ omovuọ ra.
6 Mẹ te kpare eware etọtọ ku owhẹ
Je ru owhẹ fihọ tọtọtọ;
Me ti ru owhẹ fihọ ọnọ ahwo a re rri ughe riẹ.+
7 Ohwo kpobi nọ ọ ruẹ owhẹ ọ te dhẹ siọ owhẹ ba+ jẹ ta nọ,
‘A raha Nanivi no!
Ono o ti weri kẹe?’
Diẹse mẹ te jọ ruẹ enọ e rẹ sasa owhẹ oma?
8 Kọ who woma vi No-emọn,*+ nọ ọ rrọ akotọ ethẹ Naele?+
Ame ọ wariẹ e riẹ họ;
Abade na ọ jọ efe riẹ, abade na ọ tẹ jẹ jọ ugbẹhẹ riẹ.
9 Ẹtiopia họ ọnọ ọ jẹ kẹe ogaga nọ u wo umuo ho na, te Ijipti re.
Put+ gbe ahwo Libia a je fiobọhọ kẹe.+
10 Rekọ a mu ọyomariẹ kpohọ igbo re;
O kpohọ igbo.+
A tehe emọ riẹ kpe re evaọ akotọ iyẹrẹ kpobi.*
A ma ẹta rọ ghale ahwo riẹ nọ a rri ruaro,
A rọ egbregba gba ahwo ologbo riẹ.
11 Whọ te da idi bẹ re;+
Whọ te dhẹ dhere.
Whọ te gwọlọ oria adhẹzọ fiki ọwegrẹ na.
12 Eria ra nọ a di ogba wariẹ họ* kpobi e wọhọ ire ifigi nọ ibi ọsosuọ rai e ware no;
A te nuhu ai, i re kie fihọ unu enọ e gwọlọ re ai no.
13 Rri! Egbaẹmo ra a wọhọ eyae.
Inuethẹ ẹwho ra i ti kpefihọ kẹ ewegrẹ ra.
Erae e te mahe ekpọ inuethẹ ra no.
14 Vo ame kpahe keme a bi ti ko owhẹ họ!+
Ru ogba ra* ga ziezi.
Ruọ eva oluhu na je thihi ọviẹ na;
Wọ etehe nọ a rẹ rọ ma ibriki na.
15 Makọ evaọ etẹe na erae e te mahe owhẹ.
Ọgbọdọ o ti kpe owhẹ.+
Ọ te raha owhẹ wọhọ epanọ emọ ebaka-ẹkpẹ e rẹ raha ọraha na.+
Ru ahwo ra buobu wọhọ emọ ebaka-ẹkpẹ!
Ẹhẹ, ru ahwo ra buobu wọhọ ebaka-ẹkpẹ!
16 Who koko egba-ihreki buobu fihọ kẹ omara nọ i bu vi isi obọ ehru.*
Emọ ebaka-ẹkpẹ na a ku ohọrọ no oma a tẹ rra vrẹ.
17 Enọ i bi rou owhẹ a wọhọ ebaka-ẹkpẹ,
Yọ egbaẹmo ra a wọhọ owa ebaka-ẹkpẹ.
A re dhere ighogho igbẹhẹ* evaọ oke ekpahe,
Rekọ nọ ọre ọ tẹ va ze a vẹ rra vrẹ;
Yọ ohwo ọvo ọ riẹ oria nọ a rrọ họ.
18 Owezẹ u bi su ithuru-igodẹ ra, O ovie Asiria;
Ikpahwo ra a rrọ iwou rai.
Ahwo ra a vaha fihọ ehru igbehru na,
Yọ ohwo ọvo o bi koko ai họ họ.+
19 Who ti no uye ra ha.
A rẹ sai siwi omola ra ha.
Otofa riẹ họ “Ọnọ Ọ rẹ Sasa Ahwo Oma.”
Hayo “Ọ be rẹrote.” Evaọ Hibru, “Ọ riẹ.”
Koyehọ, Nanivi.
Hayo “ebiẹ iwhiti.”
Hayo o sae jọ nọ, “ọ te nya udevie rai vrẹ.”
Koyehọ, “Juda.”
Koyehọ, Asiria.
Hayo “emema nọ a ghra eware ro ru.”
Hayo “etẹmpol.”
Koyehọ, Nanivi.
Hayo “e rẹ bẹ ẹvẹruọ.”
Evaọ Hibru, “Mu eku ra ga.”
Hayo “Uwou-ovie na u ti kie.”
Hayo “A ta riẹ mu no.”
Hayo “ikpohrokpo egaga nọ e rrọ whẹvu.”
Hayo “ikpohrokpo egaga ra nọ e rrọ whẹvu.”
Koyehọ, Nanivi.
Koyehọ, Tebẹs.
Evaọ Hibru, “evaọ uzou iyẹrẹ kpobi.”
Hayo “e rẹ bẹ ẹvẹruọ.”
Hayo “oria ra nọ o rẹ bẹ ẹvẹruọ.”
Hayo “idhiwu.”
Hayo “iwou-erao itho.”