HAGAI

1 Evaọ ukpe avọ ivẹ Dariọs ovie na, evaọ amara avọ ezeza, evaọ ẹdẹ ọsosuọ amara na, ẹme Jihova ọ tẹ rọ ẹkwoma Hagai*+ ọruẹaro na bru Zerubabẹl+ ọba Juda, ọmọzae Shealtiẹl, gbe Joshua ozerẹ okpehru na, ọmọzae Jehozadak, re ọ ta kẹ ae nọ:

2 “Enẹ Jihova olori egbaẹmo ọ ta, ‘Ahwo nana a be ta nọ, “Oke nọ a rẹ rọ bọ* uwou* Jihova u ri te he.”’”+

3 Jihova ọ tẹ wariẹ vi Hagai+ ọruẹaro na re ọ ta kẹ ae nọ: 4 “Kọ oke nọ wha rẹ rọ rria iwou rai nọ wha rọ ire whẹ erru họ oye u te no, yọ uwou mẹ o raha kuotọ?+ 5 Whaọ enẹ Jihova olori egbaẹmo ọ ta, ‘Wha fi udu rai họ* idhere rai. 6 Wha kọ ibi buobu, rekọ umutho wha bi vu.+ Wha be re, rekọ eva e be vọ owhai hi. Wha be da, rekọ wha be ruẹ da te epanọ wha gwọlọ họ. Wha bi ku iwu họ, rekọ oma ohwo ọvo o be ruọruọ họ. Ọnọ o bi ru iruo o bi fi osa riẹ họ ẹkpa nọ ighogho e vọ.’”

7 “Enẹ Jihova olori egbaẹmo ọ ta, ‘Wha fi udu rai họ* idhere rai.’

8 “‘Wha kpobọ ugbehru na re wha wọ ire ze.+ Re wha bọ uwou na,+ re me wo omawere fiki riẹ re o wha oruaro se omẹ,’+ ere Jihova ọ ta.”

9 “‘Wha je rẹro eware buobu rekọ umutho wha bi wo; yọ okenọ wha rehọ ae ziọ eva uwou, me te fou rai kufiẹ.+ Eme ọ wha riẹ ze?’ ere Jihova olori egbaẹmo ọ ta. ‘Fikinọ uwou mẹ o raha kuotọ, rekọ whai omomọvo ọ be dhogbo epanọ o re ro ru eware uwou obọriẹ.+ 10 Fikiere ihru na i gbe siobọno igrigri rai hi, otọakpọ na o gbẹ kẹ ẹvi riẹ hẹ. 11 Me te ru nọ oso ọ gbẹ rrọ ku otọ na ha, te igbehru na, ibi ekakọ, enwaene ọkpokpọ, ewhri, ekakọ nọ e be dhẹ no otọ ze, ahwo-akpọ gbe erao, gbe iruo abọ rai kpobi.’”

12 Zerubabẹl+ ọmọzae Shealtiẹl+ gbe Joshua ozerẹ okpehru na, ọmọzae Jehozadak,+ gbe ahwo nọ a kiọkọ kpobi a tẹ gaviezọ kẹ urru Jihova Ọghẹnẹ rai gbe eme Hagai ọruẹaro na, keme Jihova Ọghẹnẹ rai họ ọnọ o vi rie ze; ahwo na a te mu ozọ họ ẹdhẹ fiki Jihova.

13 Kẹsena Hagai ọnyukọ Jihova ọ tẹ vuẹ ahwo na ovuẹ nana nọ Jihova o vi rie nọ ọ vuẹ ae na: “‘Mẹ rrọ kugbe owhai,’+ ere Jihova ọ ta.”

14 Jihova o te duobọte udu*+ Zerubabẹl ọba Juda,+ ọmọzae Shealtiẹl, je duobọte udu Joshua+ ozerẹ okpehru na, ọmọzae Jehozadak, gbe udu ahwo nọ a kiọkọ kpobi; a tẹ nyaze a te mu uwou Jihova olori egbaẹmo na Ọghẹnẹ rai họ ẹbọ.+ 15 Onana o jọ ẹdẹ avọ udhegbene amara avọ ezeza evaọ ukpe avọ ivẹ Dariọs ovie na.+

2 Evaọ amara avọ ihrẹ, evaọ ẹdẹ avọ udhegbọvo amara na, ẹme Jihova ọ tẹ ze ẹkwoma Hagai+ ọruẹaro na, inọ, 2 “Ivie, nọ Zerubabẹl+ ọba Juda,+ ọmọzae Shealtiẹl, gbe Joshua+ ozerẹ okpehru na, ọmọzae Jehozadak+ gbe ahwo nọ a kiọkọ kpobi inọ: 3 ‘Ono o kiọkọ evaọ udevie rai nọ ọ ruẹ oruaro nọ uwou* nana u wo evaọ oke ọsosuọ?+ Kọ ẹvẹ o rrọ enẹna? Kọ o gbẹ wọhọ oware nọ u fioka ha nọ a tẹ rehọ iẹe wawo epanọ o jọ oke ọsosuọ?’+

4 “‘Rekọ obọnana kru udu ga Zerubabẹl,’ ere Jihova ọ ta, ‘kru udu ga Joshua ozerẹ okpehru na, ọmọzae Jehozadak.’

“‘Wha kru udu ga, whai ahwo ẹkwotọ na kpobi,’+ ere Jihova ọ ta, ‘re wha ru iruo.’

“‘Keme mẹ rrọ kugbe owhai,’+ ere Jihova olori egbaẹmo ọ ta. 5 ‘Wha kareghẹhọ oware nọ mẹ ya eyaa riẹ kẹ owhai okenọ wha no Ijipti ze,+ yọ ẹzi mẹ ọ gbẹ rrọ udevie rai.*+ Jọ ozọ u mu owhai hi.’”+

6 “Keme enẹ Jihova olori egbaẹmo ọ ta, ‘Omojọ u kiọkọ, mẹ te wariẹ nuhu idhiwu gbe otọakpọ na gbe abade gbe otọ oyaya na ẹsiẹvo ọfa.’+

7 “‘Yọ me ti nuhu erẹwho na kpobi, eware eghaghae* erẹwho na kpobi e vẹ te ze;+ yọ mẹ te rehọ oruaro vọ uwou nana,’+ ere Jihova olori egbaẹmo ọ ta.

8 “‘Isiliva na emẹ, yọ igoru na emẹ,’ ere Jihova olori egbaẹmo ọ ta.

9 “‘Oruaro nọ o te jọ uwou nana o te rro vi orọ ọsosuọ na,’+ ere Jihova olori egbaẹmo ọ ta.

“‘Yọ mẹ te kẹ owhai udhedhẹ evaọ oria nana,’+ ere Jihova olori egbaẹmo ọ ta.”

10 Evaọ ẹdẹ avọ udhegbene amara avọ izii, evaọ ukpe avọ ivẹ Dariọs, ẹme Jihova o te bru Hagai+ ọruẹaro na ze, inọ: 11 “Enẹ Jihova olori egbaẹmo ọ ta, ‘Ivie, nọ izerẹ na kpahe uzi na inọ:+ 12 “Otẹrọnọ ohwo ọ wọ uwo arao nọ ọ rrọ ọrẹri* fihọ ewu riẹ, ewu na o te te ebrẹdi hayo izuwo hayo enwaene hayo ewhri hayo oghẹrẹ emu kpobi, kọ u re ru emu na fihọ ọrẹri?”’”

Izerẹ na a te yo nọ: “Ijo!”

13 Kẹsena Hagai ọ tẹ nọ nọ: “Otẹrọnọ ohwo nọ ọ rrọ gbegbe fikinọ o dhobọte ori* ọ rehọ obọ te ojọ evaọ usu eware nana, kọ u re ru oware na jọ gbegbe?”+

Izerẹ na a te yo nọ: “U re ru oware na jọ gbegbe.”

14 Fikiere Hagai ọ tẹ ta nọ: “‘Ere ahwo nana a rrọ, yọ ere orẹwho nana o rrọ evaọ aro mẹ,’ ere Jihova ọ ta, ‘yọ ere iruo abọ rai kpobi e rrọ; oware kpobi nọ a be jọ etẹe kẹ omẹ o rrọ gbegbe.’

15 “‘Rekọ obọnana, ivie, wha fi udu rai họ* onana no umuo ẹdẹ nana vrẹ: Taure a tẹ te wọ utho fihọ ehru utho evaọ etẹmpol Jihova,+ 16 ẹvẹ o jọ evaọ oke yena? Okenọ ohwo o te kpohọ oria nọ a koko ibi ekakọ fihọ bi rẹro nọ o ti wo ewawọ udhe noi ze, kọ ikpe ọvo o je wo; yọ okenọ ohwo o te kpohọ ọgọdọ udi-uruo re ọ jẹ ewawọ udhuvẹ-gbikpe, kọ udhe ọvo ọ jẹ ruẹ jẹ;+ 17 Mẹ rehọ uvo ogaga gbe izuzu+ gbe oso-itho tehe owhẹ, te iruo abọ ra kpobi, rekọ ohwo ọvo evaọ usu rai o zihe bru omẹ ze he,’ ere Jihova ọ ta.

18 “‘Ivie, wha fi udu rai họ* onana no umuo ẹdẹ nana vrẹ, no ẹdẹ avọ udhegbene amara avọ izii vrẹ, no ẹdẹ nọ a ro fi otọhotọ etẹmpol Jihova họ;+ wha fi udu rai họ onana: 19 Kọ ubi o gbẹ rrọ uwou nọ a rẹ jọ sẹro* eware na?*+ Evaene, ifigi, pọmegranet, gbe ure olivi e re mọ ibi hi, manikọ e mọ no? No umuo ẹdẹ nana vrẹ me ti vi oghale ze.’”+

20 Ẹme Jihova o te bru Hagai ze orọ avọ isiava evaọ ẹdẹ avọ udhegbene amara na,+ inọ: 21 “Ta kẹ Zerubabẹl ọba Juda nọ, ‘Me ti nuhu idhiwu na gbe otọakpọ na.+ 22 Me ti gele agbara-uvie ekwotọ-ivie kie, jẹ te raha ẹgba ekwotọ-ivie erẹwho na;+ yọ me ti gele akẹkẹ na avọ enọ e be dhẹe kie, enyenya na avọ enọ e be dhẹ ae a ti kie, omomọvo ọ te rọ ọgbọdọ kpe oniọvo riẹ.’”+

23 “‘Evaọ ẹdẹ yena,’ enẹ Jihova olori egbaẹmo ọ ta, ‘Mẹ te rehọ owhẹ, Zerubabẹl odibo mẹ+ ọmọzae Shealtiẹl,’+ ere Jihova ọ ta, ‘me ve ru owhẹ wọhọ ẹmẹro oka-ukpehọ,* keme whẹ họ ọnọ mẹ salọ,’ ere Jihova olori egbaẹmo ọ ta.”