IRUẸRU IKỌ

1 O Tiofilọs, mẹ jọ obe ọsosuọ mẹ kere kpahe eware kpobi nọ Jesu o muhọ eru gbe enọ o wuhrẹ+ 2 ri bọo ẹdẹ nọ a rọ rehọ iẹe vrẹ kpobọ ehru,+ nọ ọ rehọ ẹkwoma ẹzi ọfuafo na kẹ ikọ nọ ọ salọ na ehrẹ no.+ 3 Nọ ọ ruẹ uye je whu no, o dhesẹ omariẹ kẹ ae avọ imuẹro ivevẹ buobu inọ ọ kparoma ze no.+ A ruẹ e riẹ evaọ edẹ udhuvẹ soso, yọ ọ jẹ ta ẹme kpahe Uvie Ọghẹnẹ.+ 4 Ẹdẹ jọ nọ ọ jọ kugbe ai, ọ ta* kẹ ae nọ: “Wha no Jerusalẹm ho,+ rekọ wha hẹrẹ oware nọ Ọsẹ na ọ ya eyaa riẹ,+ onọ wha yo mi omẹ na; 5 keme Jọn ọ rọ ame họ ahwo ame, rekọ a te rọ ẹzi ọfuafo họ owhai ame+ nọ emedẹ jọ e tẹ vrẹ no.”

6 Fikiere nọ a kokohọ no, a tẹ nọe nọ: “Olori, kọ who bi zihe uvie na ziọ Izrẹl evaọ oke nana?”+ 7 Ọ tẹ ta kẹ ae nọ: “U du gwọlọ nọ wha rẹ riẹ oke hayo ezi na ha onọ Ọsẹ na ọvo o wo udu riẹ.+ 8 Rekọ wha ti wo ogaga nọ ẹzi ọfuafo na o te bru owhai ze no,+ wha ve ti se isẹri+ kpahe omẹ evaọ Jerusalẹm,+ evaọ Judia soso gbe Sameria,+ je rite oria nọ o mai thabọ evaọ otọakpọ na.”*+ 9 Nọ ọ ta eme nana no, nọ a gbe bi rri na, o te bi muvrẹ kpobọ ehru, ẹgho o te ruru iei, a gbẹ ruẹ e riẹ hẹ.+ 10 Epanọ a bi ro rri ehru nọ o bi muvrẹ na, ẹsiẹvo na, ezae ivẹ nọ i ku iwu efuafo+ họ a te dikihẹ kẹle ae, 11 a tẹ ta nọ: “Ezae Galili, fikieme wha ro dikihẹ bi rri ehru? Jesu nana nọ a rehọ vrẹ kpobọ ehru siọ owhai ba na, ọ te nyaze evaọ oghẹrẹ ovona nọ wha ruẹ nọ o bi ro muvrẹ kpobọ ehru na.”

12 A te zihe ziọ Jerusalẹm+ no ugbehru nọ a re se Ugbehru Olivi ze, onọ o kẹle Jerusalẹm, nọ o rehọ oware wọhọ ikilomita ọvo* thabọ no etẹe. 13 Nọ a te obei no, a te kpobọ ubruwou ehru nọ a jọ na. Enọ e jọ etẹe họ Pita, Jọn, Jemis, Andru, Filip, Tọmọs, Batolomio, Matiu, Jemis ọmọzae Alfiọs, Saemọn ohwo ajọwha na, gbe Judas ọmọzae Jemis.+ 14 Aikpobi a jẹ rọ ẹjiroro ọvo ruabọhọ olẹ, eyae jọ e jọ kugbe ai+ te Meri oni Jesu avọ inievo riẹ.+

15 Evaọ oke yena, Pita ọ tẹ kpama evaọ udevie inievo na (ahwo* na kpobi a bu te oware wọhọ udhozeza [120]) ọ tẹ ta nọ: 16 “Ezae, inievo, o roja inọ ikereakere na i re rugba onọ ẹzi ọfuafo ọ rọ ẹkwoma Devidi ruẹaro fihotọ kpahe Judas+ na, ọnọ o su ahwo nọ e nyai mu Jesu.+ 17 Keme ọ jọ omọvo mai+ yọ o wobọ re evaọ odibọgba nana. 18 (Ọzae nana ọ rehọ igho nọ a rọ hwa osa oware umuomu dẹ otọ,+ o kie galuzovi ọ tẹ sa bẹre,* ekwakwa eva riẹ kpobi e tẹ lahwe.+ 19 Ahwo kpobi nọ a be rria Jerusalẹm a tẹ te riẹ onana, fikiere a tẹ rọ ẹvẹrẹ rai se otọ na Akẹldama, koyehọ, “Otọ Azẹ.”) 20 Keme a jọ obe Ilezi kere nọ, ‘Jọ oria nọ ọ be rria o zihe ruọ ofofe, jọ ohwo ọvo ọ rria etẹe he,’+ gbe nọ ‘Jọ omọfa ọ rehọ iruo ọsẹro riẹ.’+ 21 Fikiere, o roja inọ a rẹ rọ ohwo jọ nwene iei evaọ usu ezae nọ e jọ kugbe omai evaọ oke kpobi nọ Olori na Jesu o ro ru iruo riẹ* evaọ udevie mai na, 22 no oke nọ Jọn ọ rọ họe ame+ rite oke nọ a rọ rehọ iẹe kpobọ ehru siọ omai ba+ na. Ọ rẹ jọ osẹri ẹkparomatha riẹ wọhọ omai.”+

23 Fikiere a tẹ fodẹ imava jọ, Josẹf nọ a re se Basabas, ọnọ a je se Jọstọs re, avọ Matayas. 24 Kẹsena a tẹ lẹ nọ: “O Jihova,* whẹ nọ ọ riẹ udu ahwo kpobi,+ dhesẹ ọnọ whọ jọ usu ezae ivẹ nana salọ 25 re ọ rehọ oria odibọgba nana gbe iruo ukọ, onọ Judas ọ nyaseba nyai ru orọ obọriẹ.”+ 26 A tẹ ma ẹta fiki rai,+ ẹta na o te dhesẹ nọ Matayas a salọ, a te kele iei kugbe* ikọ ikpegbọvo na.

2 Whaọ evaọ ẹdẹ Ehaa Pẹntikọst,+ ilele na kpobi a kokohọ oria ovo. 2 Idudhe na, edo jọ o te do no obọ odhiwu ze wọhọ edo ofou ọgaga, o tẹ vọ uwou nọ a keria na.+ 3 A tẹ ruẹ eware jọ nọ e wọhọ ẹrọo nọ e be ware wọhọ erae, e tẹ ghale oma fihọ ehru uzou rai omomọvo, 4 ẹzi ọfuafo ọ tẹ vọ aikpobi oma,+ a te mu evẹrẹ* sa-sa họ ẹjẹ wọhọ epanọ ẹzi na o fiobọhọ kẹ ae jẹ ta.+

5 Evaọ oke yena, ahwo Ju nọ a se egagọ gboja nọ a no erẹwho akpọ* na kpobi ze a jọ Jerusalẹm.+ 6 Fikiere nọ edo nana o do ze, ogbotu ahwo a tẹ dhẹ kuku, u te gbe ai unu gaga keme ae omomọvo ọ be jọ unu ilele na yo ẹvẹrẹ riẹ. 7 Evaọ uzẹme, u gbe rai unu thesiwa a tẹ ta nọ: “Rri, kọ ogbẹrọnọ ahwo nana kpobi nọ a be ta ẹme na ahwo Galili?+ 8 Kọ ẹvẹ ma be rọ jọ unu rai yo ọvuọ ẹvẹrẹ ẹwho mai?* 9 Ahwo Pathia, ahwo Midia,+ ahwo Elam,+ enọ e be rria Mẹsopotemia, Judia, Kapadosia, Pọntọs, gbe ubrotọ Esia,+ 10 Frijia, Pamfilia, Ijipti, gbe ibrotọ Libia nọ e kẹle Sairini, enọ i no obọ Rom ze, te ahwo Ju gbe enọ i kurẹriẹ ruọ egagọ ahwo Ju,+ 11 ahwo Kriti; gbe ahwo Arebia, ma bi yo nọ a be rọ evẹrẹ mai ta kpahe iruo urirẹ Ọghẹnẹ.” 12 Ẹhẹ, u gbe rai kpobi unu gaga yọ a wo otoriẹ oware nọ o be via ha, a tẹ jẹ ta kẹ ohwohwo nọ: “Eme onana u dhesẹ?” 13 Rekọ amọfa a te je se ae ẹkoko nọ: “A da enwaene ọwewere* bẹ no.”

14 Rekọ Pita avọ ikọ Ikpegbọvo edekọ na a tẹ kpama,+ ọ tẹ be rọ urru oruarua ta kẹ ae nọ: “Whai ahwo* Judia gbe enọ e be rria Jerusalẹm kpobi, wha gaviezọ ziezi kẹ ẹme mẹ re wha wo otoriẹ onana. 15 Ahwo nana a da idi hi, wọhọ epanọ wha bi roro na, keme auwa avọ esa* oke o rrọ na. 16 Ukpoye, onana yọ oware nọ a rọ ẹkwoma Joẹl ọruẹaro na ta: 17 ‘Ọghẹnẹ ọ ta nọ, “Yọ evaọ edẹ urere na, mẹ te jọ ẹzi mẹ ku ẹzi jọ ku oghẹrẹ uwo kpobi, emezae gbe emetẹ rai e te ruẹaro, izoge emezae rai e te ruẹ eruẹaruẹ, ekpọkuezae rai e te wezẹ ewezẹ,+ 18 yọ makọ erigbo mẹ nọ e rrọ ezae gbe erigbo mẹ nọ e rrọ eyae dede, mẹ te jọ ẹzi mẹ ku ẹzi jọ ku ae evaọ edẹ yena, a vẹ te ruẹaro.+ 19 Me ti ru eware igbunu* evaọ odhiwu, jẹ jọ evaọ otọakpọ ru eware eka—azẹ gbe erae gbe iwiri nọ i ti kuye dududu. 20 Ọre na o ti zihe ruọ ebi, ọvẹre na o ve ti zihe ruọ azẹ taure ẹdẹ ologbo Jihova* nọ o re mu urirẹ ọ tẹ te ze. 21 Yọ ohwo kpobi nọ o bi se odẹ Jihova* a ti siwi ei.”’+

22 “Whai ahwo Izrẹl, wha gaviezọ kẹ ẹme nana: Jesu ohwo Nazarẹt na yọ ohwo nọ Ọghẹnẹ o dhesẹ via kẹ owhai ẹkwoma iruo ilogbo, eware igbunu, gbe eware eka nọ Ọghẹnẹ ọ rehọ e riẹ ru evaọ udevie rai,+ nwane wọhọ epanọ whai omarai wha riẹ na. 23 A siobọno ọzae nana kẹ owhai, wọhọ epaọ oreva* Ọghẹnẹ gbe oware nọ ọ riẹ no anwẹdẹ,+ wha tẹ rehọ iẹe kẹ enọ i re koko uzi hi re a tehe iẹe fihọ ure, wha te gine kpei.+ 24 Rekọ Ọghẹnẹ ọ kpare riẹ no uwhu ze+ ẹkwoma edada* uwhu nọ o si rie no, keme uwhu u wo ẹgba nọ u re ro kru rie ribri hi.+ 25 Keme Devidi ọ ta kpahe iẹe nọ: ‘Me fi Jihova* họ aro mẹ kẹse kẹse, fikinọ ọ rrọ obọze mẹ, oware ovo u re nuhu omẹ vievie he. 26 Fiki onana udu mẹ o tẹ vọ avọ evawere, ẹrọo mẹ o te bo ubo oghọghọ. Yọ mẹ* te rria avọ ẹruore; 27 keme whọ te siọ omẹ* ba Uki* hi, yọ whọ te kuvẹ re ọnọ ọ talamu owhẹ na o gbo ho.+ 28 Who dhesẹ edhere uzuazọ kẹ omẹ no; who ti ru omẹ wo oghọghọ ulogbo evaọ aro ra.’+

29 “Whai ahwo, inievo, jọ mẹ ta ẹme kẹ owhai ududu kpahe Devidi ọnọ o wuzou unuwou na, inọ o whu a te ki ei,+ yọ uki riẹ o rrọ kugbe omai rite inẹnẹ. 30 Fikinọ ọ jọ ọruẹaro ọ tẹ jẹ riẹ nọ Ọghẹnẹ ọ ya eyaa kẹe avọ iyei iduwu inọ ọ te rehọ ọmọ riẹ jọ* keria agbara-uvie riẹ,+ 31 ọ kparo ruẹ ẹkparomatha Kristi na jẹ ta ẹme kpahe iẹe, inọ a nyase iẹe ba Uki* hi, yọ ugboma riẹ u gbo ho.*+ 32 Ọghẹnẹ ọ kpare Jesu nana no uwhu ze, yọ mai kpobi ma rẹ sai se isẹri onana.+ 33 Whaọ fikinọ a kpare riẹ kpehru kpohọ obọze Ọghẹnẹ no,+ yọ Ọsẹ na ọ kẹ riẹ ẹzi ọfuafo nọ ọ ya eyaa riẹ na no,+ o te ku ẹzi na ku omai, oye wha be ruẹ je yo eme nọ ọ be wọ omai ta na. 34 Keme Devidi o muvrẹ kpobọ idhiwu hu, rekọ ọyomariẹ ọ ta nọ, ‘Jihova* ọ ta kẹ Olori mẹ nọ: “Keria obọze mẹ 35 bẹsenọ me re ru ewegrẹ ra họ akpala nọ whọ rẹ rọ awọ ra kpahe.”’+ 36 Fikiere jọ uwou Izrẹl soso a riẹ vevẹ inọ Ọghẹnẹ o ru Jesu nana nọ wha tehe fihọ ure kpe+ na họ Olori+ gbe Kristi.”

37 Whaọ nọ a yo ẹme nana, o tẹ kẹ ae uye gaga,* a tẹ ta kẹ Pita avọ ikọ edekọ na nọ: “Ezae, inievo, kọ eme ma re ru?” 38 Pita ọ tẹ ta kẹ ae nọ: “Wha kurẹriẹ,+ re whai omomọvo ọ họ-ame+ evaọ odẹ Jesu Kristi re wha sai wo erọvrẹ izieraha rai,+ wha ve ti wo okẹ ọvọvẹ orọ ẹzi ọfuafo na. 39 Keme whai gbe emọ rai a ya eyaa+ na kẹ, gbe ahwo kpobi nọ a rrọ ugbothabọ, ahwo kpobi nọ Jihova* Ọghẹnẹ mai o ti si te oma.”+ 40 Yọ ọ rọ eme efa buobu se isẹri ziezi jẹ tuduhọ ae awọ nọ: “Wha siomano oge omuomu nana re wha sae zọ.”+ 41 Fikiere enọ e rehọ evawere dede eme riẹ rehọ a tẹ họ-ame,+ yọ evaọ ẹdẹ ọyena ahwo* nọ a bu te oware wọhọ idu esa (3,000) a kuomagbe ai.+ 42 A tẹ jẹ romakẹ iwuhrẹ ikọ na, jẹ hai kuomagbe,* jẹ re emu kugbe,+ jẹ hae lẹ ẹsikpobi.+

43 Fikiere ozọ u te mu ahwo* na kpobi họ emu, eware igbunu gbe eware eka buobu e tẹ jẹ romavia ẹkwoma ikọ na.+ 44 Enọ i kurẹriẹ* na kpobi a jọ kugbe, a te je wo eware kpobi kugbe, 45 a jẹ zẹ ekwakwa rai+ gbe etọ* rai a vẹ ghale igho nọ a rọ zẹ ae na kẹ ahwo kpobi, wọhọ epanọ ẹgwọlọ omomọvo ọ rrọ.+ 46 Yọ kẹdẹ kẹdẹ a je kuomagbe evaọ etẹmpol na avọ ẹjiroro ọvo, yọ a jẹ hae re emu evaọ iwou ohwohwo jẹ ghale emu rai kẹ ohwohwo avọ oghọghọ ulogbo gbe eva efuafo, 47 bi jiri Ọghẹnẹ yọ eva rai e jẹ were ahwo na kpobi. Evaọ oke ovona, Jihova* o te je ku enọ o bi ti siwi kugbe ai kẹdẹ kẹdẹ.+

3 Ẹdẹ jọ nọ Pita avọ Jọn a je kpobọ etẹmpol na evaọ auwa olẹ, onọ o rrọ auwa avọ izii,* 2 ahwo a tẹ be wọ ọzae jọ ze ọnọ ọ ko anwẹnọ a ro yẹi. Kẹdẹ kẹdẹ a jẹ hae wọe kẹle unuẹthẹ etẹmpol na nọ a re se Owowoma, re ọ sae yare igho* mi enọ e be ruọ eva etẹmpol na. 3 Nọ ọ ruẹ Pita avọ Jọn nọ a be gwọlọ ruọ etẹmpol na, ọ tẹ be yare ae ugho.* 4 Rekọ Pita avọ Jọn a te rri rie a tẹ ta kẹe nọ: “Rri omai.” 5 Fikiere ọ tẹ tẹrovi ai, bi rẹro nọ a be te kẹe oware jọ. 6 Rekọ Pita ọ tẹ ta nọ: “Me wo isiliva gbe igoru hu, rekọ mẹ te kẹ owhẹ oware nọ me wo. Evaọ odẹ Jesu Kristi ohwo Nazarẹt na, kpama re whọ nya!”+ 7 Pita o te kru obọze riẹ rọ kpare iẹe kpama.+ Ẹsiẹvo na evawọ gbe ekuawọ riẹ e tẹ ga;+ 8 ọ tẹ nwani dikihẹ,+ o te muhọ ẹnya. O te lele ai ruọ eva etẹmpol na, be nya, bi duola, je bi jiri Ọghẹnẹ. 9 Ahwo na kpobi a ruẹ e riẹ nọ ọ be nya yọ o bi jiri Ọghẹnẹ na. 10 A te mu ei họ evuhu, inọ ọzae nana họ ohwo nọ ọ jẹ hae keria re a kẹe igho* evaọ akotọ unuẹthẹ etẹmpol na nọ a re se Unuẹthẹ Owowoma na,+ oware nọ o via kẹe na u te gbe ai unu thesiwa jẹ lẹliẹ ae ghọghọ gaga.

11 Nọ ọzae na o gbe kru Pita avọ Jọn obọ na, ahwo na kpobi a tẹ dhẹ bru rai ze evaọ oria nọ a re se Ogebara Solomọn*+ avọ akpọ nọ o gbe rai unu thesiwa. 12 Nọ Pita ọ ruẹ onana, ọ tẹ ta kẹ ahwo na nọ: “Whai ahwo Izrẹl, fikieme onana u bi ro gbe owhai unu, kọ fikieme wha bi ro rri omai wọhọ ẹsenọ ogaga obọmai ma ro ru ei nya hayo fiki epanọ ma romakẹ Ọghẹnẹ te? 13 Ọghẹnẹ Abraham gbe ọrọ Aiziki gbe ọrọ Jekọp,+ Ọghẹnẹ esẹ-esẹ mai, ọ kẹ Jesu+ Odibo riẹ oruaro no,+ ọnọ wha rehọ kẹ+ Pailet jẹ se evaọ iraro riẹ dede nọ ọ jiroro nọ o re siobọnoi. 14 Ẹhẹ, wha siọ ohwo yena nọ ọ rrọ ọrẹri je kiẹrẹe na, wha tẹ yare nọ o siobọno ogbulegbu kẹ owhai,+ 15 wha te kpe Ọnyukọ Ologbo ọrọ uzuazọ na.+ Rekọ Ọghẹnẹ ọ kpare riẹ no uwhu ze, yọ mai isẹri onana.+ 16 Yọ ẹkwoma odẹ riẹ, avọ ẹrọwọ nọ ma fihọ odẹ riẹ oye u ru nọ oma ọzae nana nọ wha be ruẹ nọ wha riẹ na o rọ ga. Ẹrọwọ nọ ma fihọ iẹe oye u ru nọ oma ọzae nana nọ ọ rrọ aro rai na o rọ ga ziezi na. 17 Whaọ inievo, mẹ riẹ nọ ogbori wha ro ru onana,+ wọhọ epanọ isu rai a ru re.+ 18 Rekọ edhere nana Ọghẹnẹ o ro ru eware nọ ọ rọ eruẹaro na kpobi whowho via anwẹdẹ gba, inọ Kristi riẹ na ọ te ruẹ uye.+

19 “Fikiere, wha kurẹriẹ,+ wha nwene idhere rai*+ re a sai voro izieraha rai no,+ re ezi omosasọ o ruẹsi no obọ Jihova omariẹ* ze te owhai 20 re ọ ruẹsi vi Kristi nọ a ro mu kẹ owhai na ze, Jesu. 21 Ọnana ọ rẹ jọ obọ odhiwu hrọ bẹsenọ oke ẹruẹrẹhọ eware kpobi u re te, onọ Ọghẹnẹ ọ rehọ eruẹaro erẹri riẹ erọ oke anwae ta kpahe na. 22 Evaọ uzẹme, Mosis ọ ta nọ: ‘Jihova* Ọghẹnẹ rai ọ te jọ udevie inievo rai rọ ọruẹaro nọ ọ wọhọ omẹ ro mu kẹ owhai.+ Wha rẹ gaviezọ kẹ oware kpobi nọ ọ ta kẹ owhai hrọ.+ 23 Evaọ uzẹme, ohwo* kpobi nọ ọ gaviezọ kẹ Ọruẹaro yena ha a ti kpei kufiẹ no udevie ahwo na.’+ 24 Yọ eruẹaro na kpobi, no Samuẹle rite enọ i lele i rie kpobi a ta vevẹ kpahe edẹ nana re.+ 25 Whai yọ emọ eruẹaro na gbe ereuku ọvọ nọ Ọghẹnẹ ọ re kugbe esẹ-esẹ rai,+ nọ ọ ta kẹ Abraham nọ: ‘Yọ ẹkwoma ọmọ* ra iviuwou otọakpọ na kpobi a ti wo oghale.’+ 26 Nọ Ọghẹnẹ ọ rọ Odibo riẹ mu no, ọ tẹ kaki vi ei se owhai+ re ọ ghale owhai ẹkwoma obọ nọ o re fihọ kẹ owhai kurẹriẹ no iruẹru imuomu rai.”

4 Nọ Pita avọ Jọn a jẹ ta ẹme kẹ ahwo na, izerẹ na, oletu etẹmpol na, gbe otu Sadusi+ na a tẹ nyabru rai ze. 2 Eva e jẹ dha ae fikinọ ikọ na a bi wuhrẹ ahwo jẹ be jọ ẹgbede whowho ẹkparomatha Jesu.+ 3 A te kru* ai, a te fi ai họ etẹe+ bọo okiokiọ riẹ keme owọwọ u te no. 4 Rekọ ibuobu nọ e gaviezọ kẹ eme rai a rọwo, unu ezae na u te ti bu te oware wọhọ idu isoi (5,000).+

5 Okiokiọ riẹ, isu ahwo na, ekpako na, gbe otu ikere-obe na a te kokohọ evaọ Jerusalẹm, 6 yọ Anas+ olori izerẹ na, Kayafas,+ Jọn, Alẹkzanda, gbe imoni olori izerẹ na kpobi a jariẹ re. 7 A tẹ rọ Pita avọ Jọn dikihẹ udevie rai, a te mu ae enọ họ ẹnọ inọ: “Ogaga vẹ hayo odẹ ono wha ro ru oware nana?” 8 Kẹsena Pita nọ ẹzi ọfuafo ọ vọ oma,+ ọ tẹ ta kẹ ae nọ:

“Whai isu ahwo na gbe ekpako na, 9 otẹrọnọ fiki oware uwoma nọ ma ru kẹ ọzae nọ ọ ko+ wha be rọ rehọ omai gu ẹdhọ nẹnẹ na, yọ wha gwọlọ riẹ ohwo nọ o siwi ọzae nana, 10 jọ whai kpobi gbe ahwo Izrẹl kpobi a riẹ inọ, evaọ odẹ Jesu Kristi ohwo Nazarẹt+ na, ọnọ wha kare fihọ ure kpe+ rekọ nọ Ọghẹnẹ ọ kpare no uwhu ze na,+ ẹkwoma riẹ ọzae nana o ro dikihẹ aro rai omakọkọ na. 11 Ọnana họ ‘utho nọ whai ebebabọ na wha se gbe oware ovo ho nọ u zihe ruọ utho ubienẹ nọ o mai wuzou* no na.’+ 12 Ofariẹ, ohwo ọfa ọ riẹ hẹ nọ a rẹ rọ ẹkwoma riẹ wo esiwo, keme odẹ ọfa+ o rrọ otọakpọ* na ha nọ Ọghẹnẹ ọ kẹ nọ a re ro siwi omai.”+

13 Whaọ nọ a ruẹ epanọ Pita avọ Jọn a be ta ẹme ududu,* je muẹrohọ nọ a kpohọ isukulu hu* yọ a viodẹ hẹ,+ u te gbe ai unu. A te ti muhọ evuhumu inọ a jọ kugbe Jesu.+ 14 Nọ a be ruẹ ọzae nọ a siwi na nọ o dikihẹ kugbe ai na,+ a sae ruẹ ẹme ọvo nọ a rẹ kpahe kẹ ae he.+ 15 Fikiere a tẹ ta kẹ ae nọ a ruọ otafe ọgwa Sanhẹdrin na, a te bi sumẹ, 16 be ta nọ: “Eme ma ti ru ahwo nana?+ Keme uzẹme riẹ họ, oware igbunu a gine ru na, yọ ahwo kpobi nọ a be rria Jerusalẹm a riẹ kpahe iẹe no,+ yọ ma rẹ sae vro riẹ hẹ. 17 Re onana o seba ẹvaha viere evaọ udevie ahwo na, joma ta eme nọ e rẹ lẹliẹ ozọ mu ai jẹ ta kẹ ae nọ a gbẹ rọ odẹ nana ta ẹme kẹ ohwo ọvo vievie he.”+

18 Fikiere a te se ai ruọ eva, a tẹ vẹvẹ ai unu inọ a gbẹ ta ẹme ọvuọvo kpahe odẹ Jesu hayo rehọ iẹe wuhrẹ hẹ. 19 Rekọ Pita avọ Jọn a tẹ kpahe kẹ ae nọ: “Sọ u kiehọ evaọ aro Ọghẹnẹ re ma gaviezọ kẹ owhai viukpọ Ọghẹnẹ, wha bruoziẹ na kẹ omarai. 20 Rekọ rọkẹ omai, ma rẹ sae siọ ẹme ba ẹta kpahe eware nọ ma ruẹ je yo ho.”+ 21 Fikiere, nọ a ta eme efa nọ e rẹ lẹliẹ ozọ mu ai no, a te siobọno ai nọ orọnọ a jọ obọ rai ruẹ oruthọ ọvo nọ a rẹ rọ kẹ ae uye he na gbe fiki ahwo na,+ keme aikpobi a bi jiri Ọghẹnẹ fiki oware nọ o via na. 22 Ọzae nọ a rọ edhere igbunu* siwi na ọ kpako vrẹ ikpe udhuvẹ no.

23 Nọ a siobọno ai no, a tẹ nyabru ilele edekọ na, a te gbiku eware nọ ilori izerẹ gbe ekpako na a ta kẹ ae. 24 Nọ a yo onana, a tẹ rọ okugbe ọvo kpare irru rai lẹ se Ọghẹnẹ nọ:

“Olori nọ Ọ Mai Kpehru, whẹ họ Ọnọ ọ ma odhiwu gbe otọakpọ gbe abade gbe eware kpobi nọ e rrọ eva rai,+ 25 gbe ọnọ ọ kẹ Devidi ọsẹ-esẹ mai, odibo ra, ẹzi ọfuafo rọ ta nọ:+ ‘Fikieme erẹwho na a je bi mu ofu, yọ ahwo a bi roro kpahe eware ifofe? 26 Ivie otọakpọ na a mugba yọ isu na a kuomagbe wọhọ omọvo be wọso Jihova* gbe ọnọ o wholo.’*+ 27 Ere o ginẹ via, te Herọd avọ Pọntiọs Pailet+ gbe ahwo erẹwho na avọ ahwo Izrẹl a kuomagbe evaọ okpẹwho nana wọso Jesu, odibo ra nọ ọ rrọ ọrẹri, ọnọ who wholo,+ 28 re a ru oware nọ whọ rọ obọ ra gbe oreva ra rọ jiroro riẹ kpahotọ no anwẹdẹ inọ o te via.+ 29 Whaọ, Jihova,* kezọ kẹ eme nọ a be ta rọ gwọlọ ru ozọ mu omai na, re whọ kẹ idibo ra aruọwha nọ a rẹ rọ ruabọhọ ta ẹme ra ududu, 30 re whọ gbẹ rriẹ obọ ra ro siwi ahwo, re ma gbẹ rọ odẹ Jesu odibo ra nọ ọ rrọ ọrẹri na ru eware eka+ gbe eware igbunu.”+

31 Nọ a lẹ olẹ ayare-ọgaga no,* oria nọ a kokohọ na u te nuhu, ẹzi ọfuafo na ọ tẹ vọ aikpobi oma,+ a tẹ jẹ ta ẹme Ọghẹnẹ ududu.+

32 Ofariẹ, ogbotu ahwo nọ a rọwo na a jẹ rọ eva evo* gbe iroro* evo ru eware, yọ ọvuọvo rai dede ọ jẹ ta nọ eware nọ o wo yọ erọ obọriẹ hẹ, rekọ a wo eware na kpobi kugbe.+ 33 Yọ ikọ na a ruabọhọ je se isẹri ziezi kpahe ẹkparomatha Olori na Jesu,+ yọ Ọghẹnẹ o je dhesẹ uwowou ulogbo kẹ aikpobi gaga. 34 Evaọ uzẹme, oware ovo o kare ọvuọvo evaọ usu rai hi,+ keme ahwo kpobi nọ a wo etọ hayo iwou a jẹ zẹ ae a vẹ rọ igho na ze, 35 a vẹ rehọ ae kẹ* ikọ na.+ Ikọ na a vẹ ghale igho na kẹ omomọvo wọhọ epaọ ẹgwọlọ riẹ.+ 36 Whaọ Josẹf, ọnọ ikọ na a je se Banabas+ re (onọ otofa riẹ o rrọ, “Ọmọ Omosasọ”), ohwo Livae, ọmotọ Saiprọs, 37 o wo otọ jọ, ọ tẹ zẹe, ọ tẹ rọ igho na se* ikọ na.+

5 Whaọ ọzae jọ nọ a re se Ananayas, avọ aye riẹ Safira, a zẹ otọ jọ nọ a wo. 2 Rekọ ọ tẹ lẹlẹ si abọjọ igho na no, yọ aye riẹ ọ riẹ kpahe iẹe, ọ tẹ rehọ abọjọ ọvo se* ikọ na.+ 3 Rekọ Pita ọ tẹ ta nọ: “Ananayas, fikieme whọ rọ kẹ Setan uvẹ nọ o ro ru owhẹ gbaudu gu ọrue+ kẹ ẹzi ọfuafo+ na nọ whọ rọ lẹlẹ si abọjọ igho nọ whọ zẹ otọ na no? 4 Kọ ogbẹrọnọ whẹ o wo otọ na taure whọ tẹ te zẹe? Yọ whọ make zẹe no na, kọ ogbẹrọnọ oware nọ u je owhẹ whọ rẹ rehọ ugho na ru? Fikieme who ro roro oware utiona evaọ udu ra? Ọghẹnẹ who gu ọrue kẹ na orọnikọ ahwo-akpọ họ.” 5 Nọ Ananayas o yo eme nana, o te kie fihọ otọ o te whu. Ozọ u te mu ahwo kpobi nọ a yo kpahe onana gaga. 6 Kẹsena emoha na a tẹ kpama, a tẹ rọ ehọ variẹ iẹe, a tẹ wọe vrẹ, a te ki ei.

7 Nọ oware wọhọ euwa esa e vrẹ no aye riẹ ọ tẹ nyaze, ọ riẹ oware nọ o via ha. 8 Pita ọ tẹ nọe nọ: “Ta kẹ omẹ, kọ unuigho nana whai imava wha zẹ otọ na?” Ọ tẹ kẹ uyo nọ: “Ee unuigho yena.” 9 Pita ọ tẹ ta kẹe nọ: “Fikieme whai imava wha rọ ta mu nọ wha rẹ dawo ẹzi Jihova?* Rri! Awọ ahwo nọ a ki ọzae ra e kẹle unuẹthẹ na no, yọ a te wọ owhẹ vrẹ re.” 10 Ọ tẹ nwani kie fihọ aro riẹ o te whu. Nọ emoha na a ruọ eva, a tẹ ruẹ nọ o whu no a tẹ wọe vrẹ a te ki ei kẹle ọzae riẹ. 11 Fikiere ozọ ulogbo o tẹ ruọ ukoko na soso gbe ahwo kpobi nọ a yo kpahe eware nana.

12 U te no ere no, ikọ na a gbe je ru eware eka gbe eware igbunu evaọ udevie ahwo na;+ yọ aikpobi a jẹ hai kuomagbe evaọ Ogebara Solomọn.*+ 13 Evaọ uzẹme, ohwo ọvuọvo evaọ usu ahwo edekọ na o gbe wo udu nọ o re ro kuomagbe ai hi; ghele na, ahwo na a jẹ ta eme ezi rai gaga. 14 U te no ere no, enọ e rọwo Olori na i je dhe ebuebu, te ezae buobu gbe eyae buobu.+ 15 A jẹ tubẹ wọ ahwo nọ a be mọ ziọ iyẹrẹ nọ i re zurie, a vẹ wọ ae fihọ ehru ehwa esese gbe ito, re nọ Pita ọ tẹ be nyavrẹ, makọ uwoho riẹ ọvo dede u ve te ejọ rai.+ 16 Ofariẹ, ogbotu ahwo a je zurie no ikpewho nọ e wariẹ Jerusalẹm họ ze, yọ a jẹ wọ ahwo nọ a be mọ gbe enọ izi igbegbe i bi kpokpo lele oma, a ve siwi aikpobi.

17 Rekọ ozerẹ okpehru na ọ tẹ kpama, avọ enọ e rrọ kugbei kpobi, nọ e rrọ utu ahwo Sadusi, yọ a vọ avọ ihri-eriọ. 18 A te kru* ikọ na, a te fi ai họ uwou-odi okpẹwho na.+ 19 Rekọ evaọ aso, ukọ-odhiwu Jihova* o te rovie ethẹ uwou-odi na,+ ọ tẹ rehọ ae lahwe jẹ ta nọ: 20 “Wha kpobọ etẹmpol na re wha gbẹ vuẹ ahwo na eme kpobi nọ i kiekpahe uzuazọ nana.” 21 Nọ a yo eme nana no, a te kpobọ etẹmpol na nọ oke o ke no, a te muhọ ewuhrẹ.

Nọ ozerẹ okpehru na avọ enọ e rrọ kugbei a nyaze a te se ogbẹgwae Sanhẹdrin na gbe ekpako emọ Izrẹl kpobi koko, a te vi ahwo re a nyae rehọ ikọ na no obọ uwou-odi ziọ aro rai. 22 Rekọ nọ elakpa na a te obei, a ruẹ e rai evaọ uwou-odi na ha. Fikiere a te zihe ze a tẹ ta oware nọ a ruẹ, 23 inọ: “Ma ruẹ ethẹ uwou-odi na nọ a kare ziezi, yọ iroiro na a dikihẹ inuethẹ na, rekọ nọ ma rovie ruọ eva ma ruẹ ohwo ọvo ho.” 24 Whaọ nọ oletu etẹmpol na gbe ilori izerẹ na a yo eme nana, a tẹ jẹ ruawa kpahe oware nọ u ti no onana ze. 25 Rekọ ohwo jọ ọ tẹ nyaze ọ tẹ vuẹ ae nọ: “Rri! Ezae nọ wha fihọ uwou-odi na a rrọ evaọ etẹmpol na, a dikihẹ obei bi wuhrẹ ahwo.” 26 Kẹsena oletu na avọ elakpa riẹ a tẹ nyai mu ai ze, rekọ ababọ ozighi keme ozọ u je mu ai nọ ahwo na a te rọ itho fi ai.+

27 A tẹ rehọ ai ze jẹ rehọ ai dikihẹ aro ogbẹgwae Sanhẹdrin na. Kẹsena ozerẹ okpehru na ọ tẹ nọ ae enọ, 28 jẹ ta kẹ ae nọ: “Ma vẹvẹ owhai unu gaga inọ wha gbẹ rọ odẹ nana wuhrẹ ahwo ho,+ ghele na rri! wha rehọ uwuhrẹ rai vọ Jerusalẹm no, yọ wha gba riẹ mu nọ wha rẹ gba azẹ ọzae nana họ uzou mai.”+ 29 Pita avọ ikọ edekọ na a tẹ ta nọ: “Ọghẹnẹ họ osu nọ ma re yoẹme kẹ orọnikọ ahwo ho.+ 30 Ọghẹnẹ esẹ-esẹ mai ọ kpare Jesu no uwhu ze, ọnọ wha kpe nọ wha kare iẹe fihọ ure.+ 31 Ọghẹnẹ ọ kpare riẹ kpehru nọ ọ rehọ iẹe mu Ọnyukọ Ologbo+ gbe Osiwi+ evaọ obọze riẹ,+ re o fiobọhọ kẹ Izrẹl kurẹriẹ je wo erọvrẹ izieraha.+ 32 Mai yọ isẹri eware nana,+ yọ ere ẹzi ọfuafo na re,+ onọ Ọghẹnẹ ọ rọ kẹ enọ i bi yoẹme kẹe wọhọ osu.”

33 Nọ a yo eme nana, eva e tẹ dha ae thesiwa,* a tẹ gwọlọ nọ a re kpe ai no. 34 Rekọ ohwo Farisi jọ nọ a re se Gamaliẹl+ ọ tẹ kpama evaọ Sanhẹdrin na; ọ jọ owuhrẹ Uzi na nọ ahwo kpobi a wo adhẹẹ kẹ, ọ tẹ ta nọ a rehọ ikọ na ruọ otafe evaọ omoke jọ. 35 Kẹsena ọ tẹ ta kẹ ae nọ: “Whai ahwo Izrẹl, wha yọroma kpahe oware nọ wha gwọlọ ru ezae nana. 36 Wọhọ oriruo, oke jọ nọ u kpemu, Tiudas o mu ze, be ta nọ ọyomariẹ yọ ohwo jọ re, yọ ezae buobu, oware wọhọ egba ene (400) a kuomagbei. Rekọ a te ti kpei, enọ i je lele iei kpobi a tẹ vahabọ, ma gbe yo edo rai viere he. 37 Nọ u noi no, Judas ohwo Galili na o te mu ze evaọ etoke odẹ-ukerefihotọ na, o te si ahwo lele oma. Ọzae yena o whu re, enọ i je lele iei kpobi a tẹ vahabọ. 38 Fikiere, epanọ eware na e rrọ na, mẹ be ta kẹ owhai nọ, wha dhomahọ ẹme ezae nana ha, rekọ wha vu ai wa. Keme otẹrọnọ obọ ahwo oye omaa hayo iruo nana i no ze, i ti kie; 39 rekọ otẹrọnọ obọ Ọghẹnẹ i no ze, wha te sae whaha ae he.+ O gbẹ rrọ ere he, wha te ruẹ nọ Ọghẹnẹ omariẹ wha be họre na.”+ 40 Fikiere a te lele ohrẹ riẹ, a te se ikọ na ruọ eva, a tẹ fa ae,*+ a tẹ vẹvẹ ai unu inọ a gbẹ rọ odẹ Jesu ta ẹme ofa ha, a te siobọno ai.

41 Fikiere a tẹ nyavrẹ no aro ogbẹgwae Sanhẹdrin na be ghọghọ+ fikinọ Ọghẹnẹ o rri rai te ahwo nọ a re kpomovuọ họ oma fiki odẹ Jesu. 42 Yọ kẹdẹ kẹdẹ evaọ etẹmpol na gbe no uwou ruọ uwou+ a ruabọhọ je wuhrẹ ahwo ababọ eriosehọ je whowho usi uwoma na kpahe Kristi na, Jesu.+

6 Whaọ evaọ oke yena, nọ ilele na i bi vihọ na, ahwo Ju nọ a be jẹ Griki a tẹ be ta oware nọ o be kẹ ae uye kpahe ahwo Ju nọ a be jẹ Hibru, keme a je rri eyae-uku rai vo evaọ emu nọ a be ghale kẹdẹ kẹdẹ na.+ 2 Fikiere Ikpegbivẹ na a te se ogbotu ilele na kokohọ a tẹ ta nọ: “U kiehọ họ* re ma brobọno ewuhrẹ ẹme Ọghẹnẹ re ma ghale emu fihọ ehru emẹjẹ.+ 3 Fikiere inievo, whai ọvo wha jọ udevie rai salọ ezae ihrẹ+ nọ i wo odẹ-ezi,* enọ e vọ avọ ẹzi ọfuafo gbe areghẹ,+ re ma rehọ ai mu enọ e rẹ rẹrote iruo nana nọ i wuzou na;+ 4 re ma romakẹ olẹ gbe ewuhrẹ ẹme Ọghẹnẹ.” 5 Ẹme nọ a ta na ọ were ogbotu na kpobi, a tẹ salọ Stivin, ọzae nọ ọ vọ avọ ẹrọwọ gbe ẹzi ọfuafo, te Filip,+ Prokorọs, Nikenọ, Taemọn, Pamẹnas, gbe Nikoleyọs, ohwo Antiọk nọ o kurẹriẹ ruọ egagọ ahwo Ju vẹre. 6 A tẹ rehọ ai bru ikọ na ze, nọ ikọ na a lẹ no, a tẹ rọ obọ kpahe ae uzou.+

7 Fikiere, ẹme Ọghẹnẹ o te je do ruọ eria kpobi,+ unu ilele na u te je dhe ebuebu gaga+ evaọ Jerusalẹm; yọ ogbotu izerẹ buobu i je kurẹriẹ ziọ ẹrọwọ na.+

8 Whaọ Stivin, ọnọ aruoriwo gbe ogaga Ọghẹnẹ o vọ oma, o je ru eware igbunu gbe eware eka evaọ udevie ahwo na. 9 Rekọ ezae jọ erọ utu nọ a je se Isinagọgo* Enọ A Si No Igbo na a tẹ nyaze, gbe ahwo Sairini gbe ahwo Alekzandria jọ, gbe ejọ nọ i no obọ Silisia gbe Esia ze re a lele Stivin vro avro. 10 Rekọ a sae rọ oma za areghẹ gbe ẹzi ọfuafo nọ ọ jẹ kpọe ta ẹme he.+ 11 Kẹsena a tẹ lẹlẹ bẹbẹ ahwo jọ họ re a ta nọ: “Ma yo nọ ọ jẹ ta eme-aghọ kpahe Mosis gbe Ọghẹnẹ.” 12 A tẹ bẹbẹ ahwo na gbe ekpako na gbe otu ikere-obe na họ, a te su ruru iei idudhe, a tẹ jabọ kru ei a tẹ rehọ iẹe vrẹ kpobọ Sanhẹdrin na. 13 A tẹ rehọ isisẹri erue ze enọ e ta nọ: “Ọzae nana ọ be siọ eme iyoma ba ẹta kpahe oria ọrẹri nana gbe Uzi na ha. 14 Wọhọ oriruo, ma yo nọ ọ jẹ ta nọ Jesu ohwo Nazarẹt na o ti kporo uwou nana fihọ otọ je nwene izi gbe iruemu nọ Mosis o fihotọ kẹ omai.”

15 Epanọ enọ e rrọ Sanhẹdrin na kpobi a rọ tẹrovi ei na, a tẹ ruẹ nọ ovao riẹ o wọhọ ovao ukọ-odhiwu.

7 Rekọ ozerẹ okpehru na ọ tẹ nọe nọ: “Kọ eme nana uzẹme?” 2 Stivin ọ tẹ kẹ uyo nọ: “Whai ezae, inievo gbe esẹ, wha gaviezọ. Ọghẹnẹ oruaro na ọ romavia kẹ ọsẹ-esẹ mai Abraham okenọ ọ jọ obọ Mẹsopotemia, taure o te ti muọ obọ Heran họ ẹria,+ 3 ọ tẹ ta kẹe nọ: ‘Nya no ẹkwotọ ra gbe udevie imoni ra re whọ ziọ ẹkwotọ nọ me bi ti dhesẹ kẹ owhẹ.’+ 4 Ọ tẹ nya no ẹkwotọ ahwo Kaldia o te muọ Heran họ ẹria. Nọ ọsẹ riẹ o whu no,+ Ọghẹnẹ ọ tẹ ta kẹe nọ ọ kwa no etẹe ziọ ẹkwotọ nana nọ wha be rria na.+ 5 Ghele na, Ọghẹnẹ ọ kẹ riẹ ukuoriọ ovo evaọ otọ na ha, ijo, makọ oria nọ u re tei fi owọ riẹ họ dede; rekọ ọ ya eyaa nọ ọ te rọ otọ na kẹe re o jọ oriẹ, jẹ rọkẹ emọ* riẹ evaọ ẹdẹfa,+ dede nọ evaọ oke yena o ri wo ọmọ họ. 6 Ofariẹ, Ọghẹnẹ ọ ta kẹe nọ emọ riẹ e* te jọ erara evaọ ẹkwotọ nọ ọ rrọ ọrai hi, ahwo na a vẹ te rehọ ai ru erigbo je gboja kẹ ae ikpe egba ene (400).+ 7 Ọghẹnẹ ọ ta nọ: ‘Me ti gu orẹwho nọ a ti ru iruo ọrigbo kẹ na ẹdhọ,+ nọ onana o tẹ vrẹ no a ve ti no obei ze a vẹ te gọ omẹ uvi ẹgọ* evaọ oria nana.’+

8 “Ọ re ọvọ oyawo kugbei re,+ o te ti yẹ Aiziki,+ ọ tẹ yawo iẹe evaọ ẹdẹ avọ eree,+ Aiziki o te yẹ* Jekọp, Jekọp o te yẹ enọ i wuzou inuwou* ikpegbivẹ na. 9 Enọ i wuzou inuwou na a tẹ jẹ re Josẹf ihri,+ a tẹ zẹe kpobọ Ijipti.+ Rekọ Ọghẹnẹ ọ jọ kugbei,+ 10 yọ o siwi rie no ikpokpoma riẹ kpobi je ru ei wo areghẹ gbe aruoriwo evaọ aro Fẹro ovie Ijipti. Fẹro ọ tẹ rehọ iẹe mu re o su Ijipti gbe uwou riẹ soso.+ 11 Rekọ ohọo u te je mu evaọ Ijipti gbe Kenan soso, ẹhẹ, o jọ uye ulogbo, esẹ-esẹ mai a gbẹ jẹ ruẹ oware ovo re he.+ 12 Rekọ Jekọp o te yo nọ emu ọ* rrọ obọ Ijipti, o te vi esẹ-esẹ mai nya orọ ọsosuọ.+ 13 Nọ a zihe orọ avọ isiava, Josẹf o te dhesẹ oma riẹ kẹ inievo riẹ, Fẹro ọ tẹ te riẹ ahwo uwou Josẹf.+ 14 Fikiere Josẹf o te vi uwou nya inọ a rehọ Jekọp ọsẹ riẹ gbe imoni riẹ kpobi no obei ze,+ aikpobi a bu te ahwo* udhosa gbe ikpegbisoi.+ 15 Jekọp ọ tẹ kwa kpobọ Ijipti,+ yọ obei ọ jọ whu,+ ere esẹ-esẹ mai re.+ 16 Yọ a wọ rai kpobọ Shẹkẹm, a te ki ai họ uki nọ Abraham ọ rehọ ugho isiliva dẹ mi emezae Hamọ evaọ Shẹkẹm.+

17 “Nọ oke erugba eyaa nọ Ọghẹnẹ ọ ya kẹ Abraham o be kẹle no, ahwo na a te vihọ je bu gaga evaọ Ijipti, 18 bẹsenọ ovie ọfa o ro muọ Ijipti họ esuo, ọnọ ọ riẹ Josẹf ho.+ 19 Ovie nana ọ rọ ẹghẹ gboja kẹ uyẹ mai jẹ gba esẹ mai họ gbabọkẹ emọboba rai, re a siọ uzuazọ ba ẹjọ.+ 20 Oke yena a ro yẹ Mosis, yọ o wo erru thesiwa.* A yọrọ e riẹ* emerae esa evaọ uwou ọsẹ riẹ.+ 21 Rekọ okenọ a wọe fihọ oria jọ nyaseba,*+ ọmọtẹ Fẹro ọ tẹ wọe rehọ, ọ tẹ yọrọ iẹe wọhọ ọmọ obọriẹ.+ 22 Fikiere a te wuhrẹ Mosis ereghẹ Ijipti kpobi. Evaọ uzẹme, eme riẹ i wo ẹgba yọ o ru ikpeware.+

23 “Nọ o te ikpe udhuvẹ no, o tẹ ziọ iroro riẹ* nọ o re weze bru* inievo riẹ, emọ Izrẹl.+ 24 Nọ ọ ruẹ ọjọ rai nọ ohwo Ijipti jọ ọ be lahiẹ, ọ tẹ thothọ riẹ, o te kpe ohwo Ijipti na no, ọ tẹ rọ ere kioja kẹ ọnọ a jẹ lahiẹ na. 25 O roro nọ inievo riẹ a ti vuhumu nọ Ọghẹnẹ ọ be rọ ẹkwoma riẹ siwi ae, rekọ a vuhu onana mu hu. 26 Okiokiọ riẹ nọ ọ nyabru ae, ọ tẹ ruẹ ejọ rai nọ e be họre, ọ tẹ be daoma ruẹrẹ ae họ, be ta nọ: ‘Ezae, whai inievo. Fikieme wha be rọ họre ohwohwo?’ 27 Rekọ ọnọ ọ jẹ họre ọrivẹ riẹ na o te tunyei họ akotọ, inọ: ‘Ono ọ rehọ owhẹ mu osu gbe obruoziẹ kẹ omai? 28 Kọ whọ gwọlọ kpe omẹ no epanọ who kpe ohwo Ijipti na odẹnukpo?’ 29 Nọ Mosis o yo onana, ọ tẹ dhẹ kpobọ ẹkwotọ Midian, ọ tẹ jọ ọrara evaọ obei, ọ tẹ jọ obei yẹ emezae ivẹ.+

30 “Nọ ikpe udhuvẹ e vrẹ no, ukọ-odhiwu jọ ọ tẹ romavia kẹe evaọ udhude nọ Ugbehru Saena o rrọ evaọ erae nọ e jẹ ware evaọ ure inwe.+ 31 Nọ Mosis ọ ruẹ oware nana, u te gbei unu. Rekọ epanọ ọ be rọ nya kẹle iẹe re o rri rie ziezi na, o te yo urru Jihova:* 32 ‘Mẹ họ Ọghẹnẹ esẹ-esẹ ra, Ọghẹnẹ Abraham gbe ọrọ Aiziki gbe ọrọ Jekọp.’+ Mosis o te muhọ enuhu, o gbe yiwi rri rie ziezi viere he. 33 Jihova* ọ tẹ ta kẹe nọ: ‘Ba eviẹ ra no awọ ra, keme oria nọ who dikihẹ na yọ otọ ọrẹri. 34 Mẹ ruẹ okienyẹ ahwo mẹ nọ a rrọ obọ Ijipti no, me te je yo imẹ-idio rai no,+ yọ mẹ nyaze no re me siwi ai. Nyaze, me ti vi owhẹ kpobọ Ijipti.’ 35 Mosis ọvona nọ a se, ọnọ a ta kẹ nọ: ‘Ono ọ rehọ owhẹ mu osu gbe obruoziẹ?’+ na, ọye Ọghẹnẹ o vi+ ẹkwoma ukọ-odhiwu nọ ọ romavia kẹe evaọ ure inwe, re ọ jọ osu gbe osiwi. 36 Ọzae nana o su rai no Ijipti,+ avọ eware igbunu gbe eware eka nọ o ru evaọ Ijipti+ gbe Abade Ọwawae na+ gbe udhude na evaọ ikpe udhuvẹ.+

37 “Mosis nana họ ọnọ ọ ta kẹ ahwo Izrẹl nọ: ‘Ọghẹnẹ ọ te jọ udevie inievo rai rọ ọruẹaro nọ ọ wọhọ omẹ ro mu kẹ owhai.’+ 38 Ọnana họ ọnọ avọ ukoko na a gbẹ jọ evaọ udhude na kugbe ukọ-odhiwu+ nọ ọ ta ẹme kẹe+ evaọ Ugbehru Saena je kugbe esẹ-esẹ mai, yọ a kẹ riẹ evuẹ ọrẹri nọ e rẹ jọ ribri inọ ọ kẹ omai.+ 39 Esẹ-esẹ mai a rọwo yoẹme kẹe he, rekọ a tunye i rie họ akotọ,+ yọ a jọ udu rai kuomarẹriẹ zihe kpobọ Ijipti,+ 40 be ta kẹ Erọn nọ: ‘Ru eghẹnẹ kẹ omai nọ e rẹ karo kẹ omai. Keme ma riẹ oware nọ o via kẹ Mosis nana ha, ọnọ o su omai no ẹkwotọ Ijipti ze.’+ 41 Fikiere a tẹ ma ọmọ-eruẹ evaọ edẹ yena, a te dhe idhe kẹ ẹmẹdhọ na je mu ehaa họ eru fiki oware nọ a rehọ abọ rai ru na.+ 42 Fikiere Ọghẹnẹ ọ tẹ nyase ae ba re a gọ* ogbaẹmo obọ odhiwu na,+ nwane wọhọ epanọ a kere fihọ obe Eruẹaro na nọ: ‘Orọnikọ mẹ họ ọnọ wha jẹ kẹ ekẹ je dhe idhe kẹ ikpe udhuvẹ evaọ udhude na ha, manikọ omẹ, O uwou Izrẹl? 43 Rekọ uwou ẹdhọ Molọk+ gbe esi ẹdhọ Refan nọ wha wọ, emema nọ wha ma nọ wha jẹ gọ. Fikiere me ti vi owhai kpohọ igbo evaọ oria nọ u thabọ vi Babilọn.’+

44 “Esẹ-esẹ mai a jọ udhude na wo uwou-udhu isẹri na, wọhọ epanọ Ọghẹnẹ o dhesẹ okenọ ọ jẹ ta kẹ Mosis re ọ bọe lele oriruo nọ ọ ruẹ na.+ 45 A nyase iẹe ba kẹ esẹ-esẹ mai, yọ a wọ riẹ lele oma okenọ a lele Joshua ruọ ẹkwotọ nọ erẹwho na a jọ,+ enọ Ọghẹnẹ o le no kẹ esẹ-esẹ mai.+ Etenẹ o jọ ri bọo oke Devidi. 46 O wo aruoriwo evaọ aro Ọghẹnẹ, ọ tẹ yare nọ ọ kẹe uvẹ re ọ bọ uwou kẹ Ọghẹnẹ Jekọp.+ 47 Rekọ Solomọn họ ọnọ ọ bọ uwou kẹe.+ 48 Rekọ, Ọnọ Ọ Mai Kpehru na ọ rẹ rria iwou nọ a rọ abọ bọ họ,+ nwane wọhọ epanọ ọruẹaro na ọ ta inọ: 49 ‘Odhiwu na họ agbara-uvie mẹ,+ yọ otọakpọ na họ akpala nọ mẹ rẹ rọ awọ kpahe.+ Oghẹrẹ uwou vẹ wha rẹ sae bọ kẹ omẹ? ere Jihova* ọ ta. Hayo kọ diẹse họ oria eriosehọ mẹ? 50 Obọ mẹ u ru eware nana kpobi, o gbẹ rrọ ere?’+

51 “Whai enọ i wo udu ogaga, nọ ẹme ọ rẹ ruọ ezọ họ,* wha be wọso ẹzi ọfuafo na ẹsikpobi; wọhọ epanọ esẹ-esẹ rai a ru, ere wha bi ru.+ 52 Ọvẹ evaọ usu eruẹaro na esẹ-esẹ rai a kpokpo ho?+ Ẹhẹ, a kpe enọ i whowho ẹnyaze ọnọ o kiẹrẹe na taure ọ tẹ te ze,+ ọnọ wha vivie je kpe na,+ 53 whai enọ a kẹ Uzi na, onọ a rọ ẹkwoma ukọ-odhiwu kpeze ze,+ rekọ wha koko i rie he.”

54 Nọ a yo eme nana eva e tẹ dha ae thesiwa evaọ udu rai,* a te mu akọ họ ẹre bi mu ofu kẹe. 55 Rekọ avọ ẹzi ọfuafo nọ ọ vọ riẹ oma, o te rri kpobọ odhiwu, ọ tẹ ruẹ oruaro Ọghẹnẹ gbe Jesu nọ o dikihẹ obọze Ọghẹnẹ,+ 56 ọ tẹ ta nọ: “Rri! Mẹ ruẹ idhiwu na nọ i rovie gbe Ọmọ ohwo+ nọ o dikihẹ obọze Ọghẹnẹ.”+ 57 Nọ a yo onana a te bo avọ urru oruarua a tẹ rọ abọ di ezọ rai, aikpobi a tẹ họrọ mu ei ẹsiẹvo. 58 Nọ a si rie ruọ otafe okpẹwho na no, a tẹ be rọ itho fi ei.+ Enọ i se isẹri+ kpei na a tẹ ba iwu ehru rai no fihọ aro ọmoha jọ nọ a re se Sọl.+ 59 Epanọ a jẹ rọ rehọ itho fi Stivin na, ọ tẹ yare nọ: “Olori Jesu, rehọ uzuazọ* mẹ.” 60 Kẹsena, nọ o kigwẹ, ọ tẹ rọ urru ogaga bo via nọ: “Jihova,* who kele uzioraha nana rọ kẹ ae he.”+ Nọ ọ ta onana no, o te kie ruọ owezẹ uwhu.

8 Whaọ Sọl ọ rọwo fihọ ekpe Stivin.+

Evaọ ẹdẹ yena, ukpokpoma ulogbo u te ukoko nọ o jọ Jerusalẹm; ilele na kpobi a tẹ vahabọ ruọ ubrotọ Judia gbe Sameria soso, ajokpaọ ikọ na.+ 2 Rekọ ezae nọ i se egagọ gboja a tẹ wọ Stivin nyai ki, a te weri gaga fiki riẹ. 3 Sọl o te mu ukoko na họ ekpokpo gaga. Ọ jẹ vẹruọ iwou rai unọjọ utọjọ, bi si ezae gbe eyae ruọ otafe, ọ vẹ nyai fi ai họ uwou-odi.+

4 Rekọ enọ e vahabọ na a ruọ ẹkwotọ na soso, a te je whowho usi uwoma ẹme Ọghẹnẹ.+ 5 Whaọ Filip o kpobọ okpẹwho Sameria,*+ o te mu ae họ ẹta kẹ kpahe Kristi. 6 Ogbotu ahwo na kpobi a je muẹrohọ eme nọ Filip ọ jẹ ta, yọ a be gaviezọ jẹ ruẹ eware eka nọ o bi ru. 7 Keme ibuobu rai a wo izi igbegbe yọ izi igbegbe na e jẹ hai bo gaga i ve no ai oma ze.+ Ofariẹ, o siwi ibuobu nọ okie o kie gbe emo. 8 Fikiere oghọghọ ulogbo o tẹ jọ okpẹwho yena.

9 Whaọ ọzae jọ ọ jọ okpẹwho na nọ a re se Saemọn, ọnọ ọ be hai ru iruẹru emajiki anwẹdẹ nọ i bi gbe ahwo Sameria unu, bi dhesẹ oma nọ ọyomariẹ yọ ohwo ologbo. 10 Ahwo na kpobi, no ọnọ ọ mae kawo rite ọnọ ọ mae rro, a jẹ hae gaviezọ kẹe jẹ ta nọ: “Ọzae nana họ Ogaga Ọghẹnẹ, onọ a re se Ulogbo.” 11 Fikiere a jẹ hae gaviezọ kẹe keme u dina kri no nọ ọ be hae rọ rehọ iruẹru emajiki riẹ ru akpọ gbe ai unu. 12 Rekọ nọ a rọwo eme Filip nọ o je whowho usi uwoma kpahe Uvie Ọghẹnẹ+ gbe odẹ Jesu Kristi, te ezae te eyae a tẹ jẹ họ-ame.+ 13 Saemọn omariẹ o kurẹriẹ* re, nọ ọ họ-ame no ọ jẹ hae jọ kugbe Filip+ ẹsikpobi; yọ eware eka gbe iruo igbunu ilogbo nọ ọ jẹ ruẹ i gbe rie unu.

14 Nọ ikọ na evaọ obọ Jerusalẹm a yo nọ ahwo Sameria a jẹ ẹme Ọghẹnẹ rehọ no,+ a te vi Pita avọ Jọn bru rai; 15 a tẹ nya a tẹ lẹ kẹ ae re ẹzi ọfuafo na o te ae obọ.+ 16 Keme ẹzi na o ri te ae ọvuọvo obọ họ, rekọ odẹ Olori na Jesu ọvo a rọ họ ae ame no.+ 17 A tẹ rehọ abọ kpahe ae,+ ẹzi ọfuafo na o te mu ae obọ họ ete.

18 Nọ Saemọn ọ ruẹ nọ ẹzi na o bi te ahwo obọ ẹkwoma abọ nọ ikọ na a be rọ kpahe ae, ọ tẹ be rehọ ugho kẹ ikọ na, 19 inọ: “Wha kẹ omẹ ẹgba* nana re, re ohwo kpobi nọ mẹ rọ abọ mẹ kpahe ọ sai wo ẹzi ọfuafo.” 20 Rekọ Pita ọ tẹ ta kẹe nọ: “Jọ whẹ avọ isiliva ra wha gbẹ raha kufiẹ, keme who roro nọ whọ sae rọ ugho dẹ okẹ ọvọvẹ Ọghẹnẹ.+ 21 Who wo obọ hayo ẹkẹ ọvo evaọ iruo nana ha, keme udu ra o fo ho evaọ aro Ọghẹnẹ. 22 Fikiere kurẹriẹ no eyoma ra nana, re whọ yare Jihova,* o tẹ ruọ ẹe, ọ te rehọ iroro imuomu nọ e rrọ udu ra na rọvrẹ owhẹ; 23 keme mẹ ruẹ nọ whẹ yọ enua* ọyayare gbe ọrigbo emuemu.” 24 Saemọn ọ tẹ ta kẹ ae nọ: “Ivie, wha lẹ Jihova* kẹ omẹ re eware nọ wha ta na ọvuọvo e siọ omẹ ba ẹvia kẹ.”

25 Fikiere, nọ a romatotọ se isẹri jẹ ta ẹme Jihova* kẹ ae no, a tẹ ruọ edhere bi zihe kpohọ Jerusalẹm, a te bi whowho usi uwoma na evaọ iwhre ahwo Sameria buobu.+

26 Rekọ ukọ-odhiwu Jihova*+ ọ tẹ ta kẹ Filip nọ: “Kpama re who kpohọ ofẹ obọze ovatha-ọre, kpohọ edhere nọ o kuwhrẹrẹ no Jerusalẹm kpobọ Gaza na.” (Udhude edhere nana ọ nyavrẹ.) 27 Ọ tẹ kpama ọ tẹ nya, ọ tẹ ruẹ ọwharọ* Ẹtiopia jọ, ọzae nọ o wo ọkwa ologbo evaọ otọ Kandase ovie-aye ahwo Ẹtiopia, ọye ọ jẹ rẹrote efe riẹ kpobi. Ọzae na o kpohọ Jerusalẹm nyae gọ,+ 28 o te je zihe kpo yọ ọ keria akẹkẹ riẹ bi se eruẹaruẹ Aizaya do via. 29 Ẹzi na ọ tẹ ta kẹ Filip nọ: “Nya, dhẹ bru akẹkẹ nana.” 30 Filip ọ tẹ dhẹ tei oma, o te yo nọ ọzae na o bi se eruẹaruẹ Aizaya do via, ọ tẹ nọe nọ: “Kọ whọ ginẹ riẹ* oware nọ who bi se na?” 31 Ọ tẹ ta nọ: “Kọ ẹvẹ mẹ sae rọ riẹe ajokpanọ ohwo jọ o fiobọhọ kẹ omẹ?” Ọ tẹ yare Filip nọ ọ ruọ akẹkẹ na re ọ keria gbae. 32 Whaọ oria Ikereakere nọ o je se na ona: “A su rie ze wọhọ ogodẹ kpohọ oria nọ a rẹ jọ kpe erao, jẹ wọhọ omogodẹ nọ ọ fọ rirẹ rọkẹ ohwo nọ o bi bru eto riẹ, ere o rovie unu riẹ hẹ.+ 33 Okenọ a je kpomovuọ họ iẹe oma, a rehọ uvioziẹ se iẹe ba.+ Kọ ono ọ te sai gbiku eware nọ e via evaọ oge riẹ kpobi? Keme a kpe rie no otọakpọ na no.”+

34 Ọwharọ na ọ tẹ ta kẹ Filip nọ: “Ivie vuẹ omẹ, ono ọruẹaro na ọ be ta onana kpahe? Omobọ riẹ manikọ omọfa jọ?” 35 Filip o te mu ẹme họ, ọ tẹ rọ oria ikereakere nana muhọ, o te whowho usi uwoma kpahe Jesu kẹe. 36 Epanọ a rọ rrọ edhere be dhẹ vrẹ na, a te te ẹtẹre-ame jọ, ọwharọ na ọ tẹ ta nọ: “Rri! Ame ọ rrọ etenẹ; eme ọ rẹ whaha omẹ ame-ọhọ?” 37 *—— 38 Ọ tẹ ta nọ akẹkẹ na ọ daji, Filip avọ ọwharọ na a te nwrotọ ruọ eva ame na, ọ tẹ họe ame. 39 Nọ a no eva ame na ze, ẹzi Jihova* o te su Filip vrẹ vẹrẹ vẹrẹ, ọwharọ na ọ gbẹ ruẹ e riẹ viere he, ọ tẹ ruabọhọ erẹ riẹ be ghọghọ. 40 Rekọ Filip ọ tẹ ruẹ omariẹ evaọ Ashdọd, ọ tẹ nya ẹkwotọ na vrẹ bi whowho usi uwoma na evaọ ikpewho na kpobi bẹsenọ o ro te Sisaria.+

9 Rekọ avọ ofu nọ ọ gbẹ vọ Sọl eva, yọ ọ gba riẹ mu nọ o re kpe ilele Olori na no,+ ọ tẹ nyabru ozerẹ okpehru na 2 ọ tẹ yare iẹe re ọ kẹe ileta ro se isinagọgo* nọ e rrọ obọ Damaskọs, re ọ sai mu ohwo kpobi nọ ọ ruẹ nọ ọ rrọ Edhere Na+ ziọ Jerusalẹm, te ezae te eyae.

3 Whaọ, epanọ ọ rọ rrọ edhere be kẹle Damaskọs no na, idudhe na elo o te lo no obọ odhiwu ze wariẹe họ,+ 4 o te kie fihọ otọ, o te yo urru jọ nọ o ta kẹe nọ: “Sọl, Sọl, fikieme who bi ro kpokpo omẹ?” 5 Ọ tẹ nọ inọ: “Whẹ yọ ono, Olori?” Ọ tẹ ta nọ: “Mẹ yọ Jesu,+ ọnọ who bi kpokpo na.+ 6 Rekọ kpama re whọ ruọ eva okpẹwho na, a te vuẹ owhẹ oware nọ who re ru.” 7 Whaọ, ezae nọ a gbe je kpohọ erẹ na a dikihẹ ọvo, a jẹ sae ta ẹme he, a je yo edo urru na rekọ a jẹ ruẹ ohwo ọvo ho.+ 8 Kẹsena Sọl ọ tẹ kpama no otọ, yọ dede nọ ibiaro riẹ i rovie fihọ ọ jẹ ruẹ oware ovo ho. Fikiere a te kru rie obọ, a te su ei ruọ Damaskọs. 9 Evaọ edẹ esa ọ ruẹ oware ovo ho,+ yọ ọ re emu hayo da oware ovo ho.

10 Olele jọ nọ a re se Ananayas+ ọ jọ Damaskọs, Olori na ọ tẹ romavia kẹe evaọ eruẹaruẹ, o te sei nọ: “Ananayas!” O te yo nọ: “Mẹ na, Olori.” 11 Olori na ọ tẹ ta kẹe nọ: “Kpama, re who kpobọ iyẹrẹ nọ a re se Ọliọliọ, whọ vẹ nọ onọ ọzae jọ nọ a re se Sọl, ohwo obọ Tasọs,+ evaọ uwou Judas. Keme rri! ọ be lẹ, 12 yọ ọ jọ eruẹaruẹ ruẹ ọzae jọ nọ a re se Ananayas nọ ọ nyabru rie ze nọ ọ rọ abọ kpahe iẹe re ọ sae wariẹ ruẹ ude.”+ 13 Rekọ Ananayas ọ tẹ ta nọ: “Olori, me yo mi ahwo buobu no kpahe ọzae nana, kpahe eware iyoma kpobi nọ o ru erẹri ra evaọ obọ Jerusalẹm. 14 Yọ ọ nyaze obonẹ avọ udu nọ ilori izerẹ na a kẹ riẹ re o mu ahwo kpobi nọ a bi se odẹ ra.”*+ 15 Rekọ Olori na ọ tẹ ta kẹe nọ: “Nya, keme ọzae nana yọ ohwo nọ mẹ salọ no+ re o whowho odẹ mẹ kẹ erẹwho na,+ te ivie+ gbe emọ Izrẹl. 16 Yọ me ti dhesẹ kẹe vevẹ eware kpobi nọ ọ te ruẹ uye rai hrọ fiki odẹ mẹ.”+

17 Fikiere Ananayas ọ tẹ nya ọ tẹ ruọ eva uwou na, ọ tẹ rọ abọ kpahe iẹe jẹ ta nọ: “Sọl, oniọvo, Olori na Jesu, ọnọ ọ romavia kẹ owhẹ evaọ edhere okenọ whọ jẹ nyaze na, o vi omẹ ze re whọ sae wariẹ ruẹ ude jẹ vọ avọ ẹzi ọfuafo.”+ 18 Ẹsiẹvo na, eware nọ e wọhọ egbẹ i te kie no aro riẹ ze, ọ tẹ wariẹ mu ude họ ẹruẹ. Ọ tẹ kpama, a tẹ họe ame, 19 ọ tẹ re emu o te wo ẹgba.

Ọ jọ kugbe ilele na edẹ jọ evaọ Damaskọs,+ 20 ọ tẹ nwani muhọ ẹta kpahe Jesu evaọ isinagọgo* na, inọ ọnana họ Ọmọ Ọghẹnẹ. 21 Rekọ u je gbe ahwo kpobi nọ a je yo eme riẹ unu, yọ a jẹ ta nọ: “Kọ ogbẹrọnọ ọzae nana o je kpokpo enọ e rrọ Jerusalẹm nọ i bi se odẹ nana?+ Kọ ogbẹrọnọ ọ nyaze obonẹ re ọ ruẹsi mu ai jẹ rehọ ai* se ilori izerẹ na?”+ 22 Rekọ Sọl o te gbe je wo ogaga viere, ọ jẹ ta eme nọ i je gbe ahwo Ju nọ a rrọ Damaskọs unu nọ ọ be kẹ imuẹro ivevẹ unọjọ utọjọ inọ Jesu họ Kristi na.+

23 Whaọ nọ edẹ buobu e vrẹ no, ahwo Ju na a tẹ lẹlẹ gba ẹgwae nọ a re kpei no.+ 24 Rekọ Sọl ọ tẹ te riẹ kpahe ẹgwae oyoma nọ a lẹlẹ gba kpahe iẹe na. Yọ a je rou* inuethẹ okpẹwho na kiọkiọkiọ te aso te uvo re a ruẹsi kpei no. 25 Fikiere ilele riẹ a tẹ wọe fihọ ekete, a tẹ rọ eghogho jọ nọ ọ rrọ ugbẹhẹ na si ei kpotọ evaọ aso.+

26 Nọ o te Jerusalẹm no,+ ọ tẹ daoma re o kuomagbe ilele na, rekọ ozọ riẹ u je mu aikpobi keme a rọwo ho inọ o zihe ruọ olele no. 27 Fikiere Banabas+ o te fiobọhọ kẹe, o te su ei bru ikọ na, o te gbiku na kpobi kẹ ae epanọ Sọl ọ rọ jọ edhere ruẹ Olori+ na gbe nọ Olori na ọ ta ẹme kẹ Sọl, gbe epanọ Sọl ọ rọ jọ Damaskọs ta ẹme ududu kpahe odẹ Jesu.+ 28 Fikiere ọ tẹ jọ kugbe ai, be nya kpohọ oria kpobi nọ u je rie evaọ* Jerusalẹm, be ta ẹme ududu kpahe odẹ Olori na. 29 O je lele ahwo Ju nọ e rẹ jẹ Griki ta ẹme jẹ vro avro, rekọ ahwo nana a je ru epanọ a re ro kpei no.+ 30 Nọ inievo na a riẹ kpahe onana, a tẹ rehọ iẹe kpohọ Sisaria, a tẹ jọ etẹe vi ei kpohọ Tasọs.+

31 Kẹsena ukoko na evaọ Judia gbe Galili gbe Sameria+ soso o tẹ te ruọ etoke udhedhẹ, be ga evaọ ẹrọwọ na; u te bi dhe evievihọ nọ o be nya evaọ ozodhẹ Jihova* je bi wo omosasọ nọ ẹzi ọfuafo+ na ọ rẹ kẹ na.

32 Whaọ nọ Pita ọ jẹ nya ubrotọ na soso duwu, ọ nyabru erẹri na nọ e jẹ rria Lida+ re. 33 Ọ tẹ jọ etẹe ruẹ ọzae jọ nọ a re se Aniyas, ọnọ o kiẹzẹ ehwa anwọ ikpe eree keme okie o kie rie. 34 Pita ọ tẹ ta kẹe nọ: “Aniyas, Jesu Kristi o siwi owhẹ no.+ Kpama re whọ ruẹrẹ ehwa ra họ.”+ Ẹsiẹvo na ọ tẹ kpama. 35 Nọ ahwo kpobi nọ a be rria Lida gbe Otọ Opraprara Sharọn a ruẹ e riẹ, a te kurẹriẹ bru Olori na ze.

36 Whaọ olele jọ ọ jọ Jọpa nọ a re se Tabita, onọ otofa riẹ o rrọ “Dọkas.”* Ọ vọ avọ ewoma oruo gbe ekẹ ohrọ nọ ọ jẹ hae kẹ. 37 Rekọ ẹyao o te ti kru rie, o te whu. A tẹ họe, a tẹ wọe fihọ ubruwou obehru jọ. 38 Nọ orọnọ Lida o kẹle Jọpa na, nọ ilele na a yo nọ Pita ọ rrọ okpẹwho ọyena, a te vi ezae ivẹ bru ei re a lẹe nọ: “Ivie nyabru omai ze ababọ oke oraha.” 39 Pita ọ tẹ kpama o te lele ai. Nọ o te etẹe, a te su ei kpohọ ubruwou obehru na; eyae-uku na kpobi a tẹ nyabru rie ze, be viẹ je bi dhesẹ iwu sa-sa gbe iwu ithethei* buobu nọ Dọkas o ko evaọ okenọ ọ jọ uzuazọ. 40 Pita ọ tẹ ta kẹ ahwo na kpobi inọ a ruọ otafe,+ o te kigwẹ, ọ tẹ lẹ. Kẹsena nọ ọ rẹriẹ ovao rri ori na, ọ tẹ ta nọ: “Tabita, kpama!” O te rovie aro riẹ, nọ ọ ruẹ Pita, ọ tẹ kpama keria.+ 41 Pita ọ tẹ rriẹ obọ kẹe, o te kru rie dikihẹ, o te se erẹri na gbe eyae-uku na, o te dhesẹ iẹe kẹ ae inọ ọ ziọ uzuazọ no.+ 42 Usi nana u te do ruọ Jọpa soso, ibuobu i te kurẹriẹ bru Olori na ze.+ 43 Ọ tẹ gbẹ jọ Jọpa edẹ buobu evaọ uwou Saemọn ọnọ o re ru oviẹ-erao lọhọ.+

10 Whaọ ọzae jọ ọ jọ Sisaria nọ a re se Kọniliọs, oletu ogbaẹmo* ọrọ ogbaẹmo nọ a je se ẹko* Itali. 2 Ọ jọ ohwo nọ o se egagọ gboja nọ ọ be dhozọ Ọghẹnẹ, ere ahwo uwou riẹ kpobi re, ọ jẹ hae kẹ ahwo na ekẹ ohrọ buobu, yọ ọ jẹ hae lẹ olẹ ayare-ọgaga se Ọghẹnẹ ẹsikpobi. 3 Ẹdẹ jọ evaọ oware wọhọ auwa avọ izii,*+ ọ tẹ ruẹ ukọ-odhiwu Ọghẹnẹ nọ ọ romavia kẹe vevẹ evaọ eruẹaruẹ, o te sei nọ: “Kọniliọs!” 4 Kọniliọs o te bi rri rie avọ ozọ, ọ tẹ nọe nọ: “Eme, Olori?” Ọ tẹ ta kẹe nọ: “Ọghẹnẹ o yo elẹ ra no ọ tẹ jẹ kareghẹhọ* ekẹ ohrọ ra no.+ 5 Fikiere vi ahwo kpobọ Jọpa re a nyai se ọzae jọ nọ odẹ riẹ o rrọ Saemọn, ọnọ a re se Pita. 6 Ọzae nana ọ kpahe uwou Saemọn,* ọnọ o re ru oviẹ-erao lọhọ nọ uwou riẹ o rrọ akotọ abade na.” 7 Nọ ukọ-odhiwu nọ ọ ta ẹme kẹe na ọ nwane nyavrẹ no, o te se idibo ivẹ riẹ gbe osoja jọ nọ o se egagọ gboja evaọ usu enọ e jẹ gbodibo kẹe, 8 o te gbiku na kpobi kẹ ae je vi ai kpobọ Jọpa.

9 Ẹdẹ nọ o lele i rie, nọ a rrọ edhere be kẹle okpẹwho na no, Pita o te kpobọ ehru uwou na evaọ oware wọhọ auwa avọ ezeza* nyae lẹ. 10 Rekọ ohọo u te je kpei gaga ọ tẹ gwọlọ nọ ọ rẹ re emu. Nọ a je there emu na, o tẹ wọhọ ẹsenọ owezẹ u su ei, ọ tẹ be ruẹ eruẹaruẹ,+ 11 ọ tẹ ruẹ odhiwu nọ o rovie gbe oware jọ* nọ u bi no obọ ehru ze nọ o wọhọ ẹwẹ-ohọ ologbo nọ a be rọ ibiezọ ene riẹ siobọno ziọ otọ; 12 yọ oghoghẹrẹ erao kpobi nọ i wo awọ ane te erao nọ e rẹ katiẹ* evaọ otọakpọ na, gbe evra obọ ehru e rrọ eva riẹ. 13 Urru jọ o tẹ ta kẹe nọ: “Kpama, Pita, kpe re whọ re!” 14 Rekọ Pita ọ tẹ ta nọ: “Kakaka, Olori, keme mẹ re re oware otọtọ gbe onọ o fo ho ẹdẹvo ho.”+ 15 Urru na o tẹ wariẹ ta ẹme kẹe orọ avọ isiava nọ: “Who gbe se eware nọ Ọghẹnẹ o ru fo no eware etọtọ họ.” 16 Onana o via orọ avọ isiasa, a tẹ nwane rehọ oware nọ o wọhọ ẹwẹ-ohọ* na kpohọ odhiwu.

17 Nọ Pita o gbe bi roro avọ igbunu kpahe oware nọ eruẹaruẹ na i dhesẹ na, evaọ oke nana ezae nọ Kọniliọs o vi na, enọ e nọ onọ uwou Saemọn no na a ro dikihẹ unuẹthẹ na.+ 18 A tẹ jọ etẹe se, a tẹ nọ sọ Saemọn nọ a re se Pita ọ kpahe etẹe. 19 Nọ Pita o gbe bi roro didi kpahe eruẹaruẹ na, ẹzi na+ ọ tẹ ta kẹe nọ: “Rri! Ezae esa jọ a be nọ onọ ra. 20 Fikiere kpama, nwrotọ re who lele ai, whọ vro vievie he, keme mẹ o vi rai ze.” 21 Pita o te nwrotọ bru ezae na jẹ ta nọ: “Mẹ na, ọnọ wha be gwọlọ na. Fikieme wha rọ nyaze?” 22 A tẹ ta nọ: “Kọniliọs,+ oletu ogbaẹmo, ọzae nọ o kiẹrẹe jẹ be dhozọ Ọghẹnẹ, ọnọ ahwo Ju kpobi a be ta emamọ ẹme kpahe ọye o vi omai ze. Ọghẹnẹ ọ rehọ ẹkwoma ukọ-odhiwu ọrẹri jọ ta kẹe nọ o vi ahwo ze ti se owhẹ re whọ nyaze uwou riẹ re o yo eme nọ whọ te ta.” 23 Fikiere ọ tẹ ta kẹ ae nọ a ruọ uwou, a tẹ jọ erara riẹ.

Okiokiọ riẹ ọ tẹ kpama, o te lele ai, yọ inievo jọ evaọ Jọpa a lele i rie nya. 24 Ẹdẹ nọ o lele i rie, ọ tẹ ruọ eva Sisaria. Whaọ Kọniliọs o bi rẹro rai no vẹre, yọ o se imoni gbe egbẹnyusu ekpekpe riẹ kokohọ no. 25 Nọ Pita o te uwou na, Kọniliọs ọ tẹ nyabru rie ze, kigwẹ fihọ aro riẹ o te guzou kpotọ kẹe. 26 Rekọ Pita o te kru rie kpama, ta nọ: “Kpama; mẹ yọ ohwo-akpọ gheghe re.”+ 27 Nọ o bi lele iei ta ẹme na, ọ tẹ ruọ eva uwou na ọ tẹ ruẹ ahwo buobu nọ a kokohọ. 28 Ọ tẹ ta kẹ ae nọ: “Wha riẹ vevẹ epanọ o thọ te re ohwo Ju o kuomagbe hayo nyabru ohwo uyẹ ofa,+ rekọ Ọghẹnẹ o dhesẹ kẹ omẹ no inọ me du se ohwo ọvo ọtọtọ hayo ọnọ ọ fo ho ho.+ 29 Fikiere nọ a nyaze ti se omẹ, mẹ tẹ nyaze, mẹ se he. Fikiere, mẹ be nọ owhai oware nọ o lẹliẹ owhai vi ahwo ze ti se omẹ.”

30 Kẹsena Kọniliọs ọ tẹ ta nọ: “Edẹ ene nọ e vrẹ, nọ ma te kele no umuo auwa nana kpemu, mẹ jẹ lẹ evaọ uwou mẹ evaọ auwa avọ izi;* ẹsiẹvo na ọzae jọ nọ o ku iwu enwranwra họ o te dikihẹ aro mẹ 31 ọ tẹ ta nọ: ‘Kọniliọs, Ọghẹnẹ o yo elẹ ra no ọ tẹ jẹ kareghẹhọ* ekẹ ohrọ ra no. 32 Fikiere, vi ahwo kpobọ Jọpa re a nyai se Saemọn nọ a re je se Pita. Ọzae nana ọ kpahe uwou Saemọn, ọnọ o re ru oviẹ-erao lọhọ nọ uwou riẹ o rrọ akotọ abade na.’+ 33 Mẹ tẹ nwani vi ahwo ze ti se owhẹ, yọ whọ riẹ ru nọ whọ rọ nyaze. Obọnana mai kpobi ma rrọ aro Ọghẹnẹ re ma yo eme kpobi nọ Jihova* ọ vuẹ owhẹ nọ whọ ta.”

34 Kẹsena Pita o te mu ẹme họ ẹta, ọ tẹ ta nọ: “Obọnana mẹ ruẹ vevẹ no inọ Ọghẹnẹ o wo ọriẹwẹ hẹ,+ 35 rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.+ 36 O vi ẹme riẹ se emọ Izrẹl re ọ vuẹ ae usi uwoma orọ udhedhẹ+ ẹkwoma Jesu Kristi, ọnana họ Olori ahwo kpobi.+ 37 Wha riẹ oware nọ ahwo a jẹ ta kpahe evaọ Judia soso, muhọ no Galili vrẹ,+ nọ etoke nọ Jọn ọ jẹ rọ ta ẹme kpahe ame-ọhọ o vrẹ no: 38 ẹme kpahe Jesu nọ o no Nazarẹt ze na, epanọ Ọghẹnẹ ọ rọ rehọ ẹzi ọfuafo+ wholo iei jẹ kẹe ogaga, ọ tẹ nya ẹkwotọ na soso duwu bi ru ewoma je bi siwi ahwo kpobi nọ Ẹdhọ ọ jẹ lahiẹ,+ keme Ọghẹnẹ ọ jọ kugbei.+ 39 Yọ mai yọ isẹri eware kpobi nọ o ru evaọ ewho ahwo Ju gbe evaọ Jerusalẹm; rekọ a kpe rie ẹkwoma ure nọ a kare riẹ fihọ. 40 Ọghẹnẹ ọ kpare riẹ ze evaọ ẹdẹ avọ esa+ jẹ kẹe uvẹ nọ o ro dhesẹ omariẹ via,* 41 orọnikọ rọkẹ ahwo na kpobi hi, rekọ rọkẹ isisẹri nọ Ọghẹnẹ ọ salọ kpahotọ no, koyehọ mai, enọ i lele i rie re emu jẹ da nọ ọ kparoma no uwhu ze no.+ 42 U te no ere no, o jie uzi kẹ omai inọ ma vuẹ ahwo je se isẹri ziezi+ inọ ọnana họ ọnọ Ọghẹnẹ o ro mu re ọ jọ obruoziẹ enọ e rrọ uzuazọ gbe enọ i whu no.+ 43 Eruẹaro na kpobi a se isẹri kpahe iẹe,+ inọ ohwo kpobi nọ o fi ẹrọwọ họ iẹe o re wo erọvrẹ izieraha ẹkwoma odẹ riẹ.”+

44 Nọ Pita ọ gbẹ jẹ ta ẹme kpahe eware nana, ẹzi ọfuafo na o te te enọ i bi yo eme riẹ na kpobi obọ.+ 45 U te gbe ilele* nọ e yawo nọ i lele Pita nyaze na unu gaga, keme a ku ẹzi ọfuafo na nọ o rrọ okẹ ọvọvẹ ku ahwo erẹwho na re. 46 Keme a yo nọ a jẹ jẹ evẹrẹ* erẹwho efa* je bi jiri Ọghẹnẹ.+ Kẹsena Pita ọ tẹ ta nọ: 47 “Kọ ohwo jọ ọ sae ta nọ a rehọ ame rọ họ ahwo nana ame he,+ enọ ẹzi ọfuafo na o te obọ no wọhọ epanọ o te omai obọ na?” 48 Ọ tẹ kẹ udu inọ a họ ae ame evaọ odẹ Jesu Kristi.+ A tẹ lẹe re ọ jọ kugbe ai evaọ edẹ jọ.

11 Whaọ ikọ na gbe inievo nọ e jọ obọ Judia a te yo nọ ahwo erẹwho na a jẹ ẹme Ọghẹnẹ rehọ no re. 2 Fikiere nọ Pita ọ ziọ obọ Jerusalẹm, otu nọ ọ be ta nọ oyawo o rrọ ọgbahọ+ a te mu ei họ ẹfo,* 3 be ta nọ: “Whọ ruọ uwou ahwo nọ a yawo ho je lele ai re emu.” 4 Kẹsena Pita ọ tẹ rọ unu kotọ gbiku na kpobi kẹ ae, inọ:

5 “Mẹ jọ okpẹwho Jọpa jẹ lẹ, mẹ tẹ jọ eruẹaruẹ ruẹ oware* jọ nọ u bi no obọ ehru ze nọ o wọhọ ẹwẹ-ohọ ologbo nọ a be rọ ibiezọ ene riẹ siobọno ziọ otọ no obọ odhiwu ze, o tẹ ziọ aro mẹ.+ 6 Nọ me rri rie ziezi, mẹ tẹ ruẹ erao nọ i wo awọ ane evaọ otọakpọ na, erao ẹwọ, erao nọ e rẹ katiẹ,* gbe evra obọ ehru. 7 Me te je yo urru jọ nọ o ta kẹ omẹ nọ: ‘Kpama, Pita, kpe re whọ re!’ 8 Rekọ mẹ tẹ ta nọ, ‘Kakaka, Olori, keme oware otọtọ gbe onọ o fo ho u ri te unu mẹ ẹdẹvo ho.’ 9 Evaọ orọ avọ isiava, urru nọ u no obọ odhiwu ze na o tẹ ta kẹ omẹ nọ: ‘Who gbe se eware nọ Ọghẹnẹ o ru fo no eware etọtọ họ.’ 10 Onana o via orọ avọ isiasa, a te si eware na kpobi zihe kpobọ odhiwu. 11 Evaọ oke ovona ezae esa jọ i dikihẹ aro uwou nọ ma jọ na, enọ a vi no obọ Sisaria bru omẹ ze.+ 12 Kẹsena ẹzi na ọ tẹ ta kẹ omẹ nọ me lele ai, inọ mẹ vro vievie he. Rekọ inievo ezeza nana a lele omẹ nya re, ma tẹ ruọ eva uwou ọzae na.

13 “O te gbiku kẹ omai epanọ ọ rọ ruẹ ukọ-odhiwu nọ ọ ziọ uwou riẹ jẹ ta nọ: ‘Vi ahwo kpobọ Jọpa nyai se Saemọn nọ a re je se Pita,+ 14 ọ rẹ te vuẹ owhẹ eware nọ i ti ru owhẹ avọ ahwo uwou ra kpobi wo esiwo.’ 15 Rekọ nọ me mu ẹme họ ẹta, ẹzi ọfuafo na o te te ae obọ wọhọ epanọ o via kẹ omai re evaọ oke ọsosuọ na.+ 16 Onana o tẹ lẹliẹ omẹ kareghẹhọ ẹme Olori na nọ ọ jẹ hae ta nọ: ‘Jọn ọ rọ ame họ ahwo ame,+ rekọ a te rọ ẹzi ọfuafo họ owhai ame.’+ 17 Kọ otẹrọnọ Ọghẹnẹ ọ kẹ rai okẹ ọvọvẹ ovona nọ ọ kẹ omai enọ i fi ẹrọwọ họ Olori na Jesu Kristi, ono họ omẹ nọ ọ rẹ sae za Ọghẹnẹ dhe?”*+

18 Nọ a yo eme nana, a gbe si ẹme na viere he,* a tẹ kẹ Ọghẹnẹ oruaro, be ta nọ: “Koyehọ Ọghẹnẹ ọ kẹ ahwo erẹwho na uvẹ ekurẹriẹ no re, re a ruẹsi wo uzuazọ.”+

19 Whaọ ilele na nọ e vahabọ+ fiki ukpokpoma nọ u du lahwe evaọ okenọ a ro kpe Stivin na a te ugbo obọ Fonisia, Saiprọs, gbe Antiọk, rekọ ahwo Ju ọvo a jẹ ta ẹme Ọghẹnẹ kẹ.+ 20 Rekọ ezae jọ evaọ usu rai i no Saiprọs gbe Sairini ziọ obọ Antiọk a te mu ẹme họ ẹta kẹ ahwo nọ a be jẹ Griki, bi whowho usi uwoma orọ Olori na Jesu. 21 Ofariẹ, obọ Jihova* o jọ kugbe ai, ahwo buobu a tẹ rọwo a te kurẹriẹ bru Olori na ze.+

22 Usi rai u te do te ukoko nọ o jọ Jerusalẹm, a te vi Banabas+ kpobọ Antiọk. 23 Nọ o te etẹe ọ jẹ ruẹ epanọ Ọghẹnẹ o bi ro dhesẹ uwowou ulogbo riẹ kẹ ae, ọ tẹ ghọghọ ọ tẹ be tuduhọ aikpobi awọ inọ jọ a gbaemu nọ a re dikihẹ ga evaọ Olori na;+ 24 keme Banabas ọ jọ emamọ ohwo yọ ọ vọ avọ ẹzi ọfuafo gbe ẹrọwọ. Ogbotu ahwo buobu a te kurẹriẹ bru Olori na ze.+ 25 Fikiere o te kpobọ Tasọs re ọ romatotọ gwọlọ Sọl.+ 26 Nọ ọ ruẹ e riẹ no, ọ tẹ rehọ iẹe ziọ obọ Antiọk. Fikiere, evaọ ukpe soso a te je kuomagbe inievo na evaọ ukoko na, yọ a wuhrẹ ogbotu ahwo buobu. Evaọ Antiọk a jọ kaki se ilele na Ileleikristi, yọ obọ Ọghẹnẹ onana u no ze.+

27 Evaọ oke yena eruẹaro+ i no obọ Jerusalẹm ziọ Antiọk. 28 Omọvo rai jọ nọ a re se Agabọs+ ọ tẹ kpama ọ tẹ rọ ẹkwoma ẹzi na ruẹaro inọ ohọo ogaga u bi ti mu evaọ otọakpọ na+ soso, onọ o ginẹ via evaọ oke Klọdiọs. 29 Fikiere ilele na a tẹ jiroro nọ a rẹ zọhọ eware, wọhọ epaọ onọ omomọvo ọ rẹ sae rehọ ze,+ re a rọ dhogbo*+ bru inievo nọ e be rria Judia; 30 a te gine ru ere, a te mu ae họ Banabas avọ Sọl obọ ro se ekpako na.+

12 Evaọ oke yena Herọd ovie na o te je gboja kẹ ahwo ukoko na jọ.+ 2 Ọ rọ ọgbọdọ kpe Jemis oniọvo Jọn.+ 3 Nọ ọ ruẹ nọ onana o were ahwo Ju na, o te mu Pita re. (Onana o via evaọ etoke Ehaa Ebrẹdi nọ Ọ Kare Ẹvi na.)+ 4 O te kru ei o te fi ei họ uwou-odi,+ ọ tẹ rehọ iẹe kẹ eko isoja ene re a rou rie* unọjọ utọjọ, isoja ene e jọ ẹko ọvuọvo, yọ o jariẹ iroro nọ ọ te rehọ iẹe lahwe* evaọ aro ahwo na nọ a te ru ehaa Ọnyavrẹ na no. 5 Fikiere Pita ọ tẹ jọ uwou-odi na, rekọ ukoko na o jẹ lẹ gaga se Ọghẹnẹ fiki riẹ.+

6 Whaọ nọ Herọd o bi ti ru re ọ rehọ iẹe lahwe, evaọ aso yena Pita ọ jẹ wezẹ avọ egbregba ivẹ nọ a rọ kare iẹe fihọ udevie isoja ivẹ, yọ isoja nọ e jọ unuẹthẹ na a bi rou uwou-odi na. 7 Rekọ rri! ukọ-odhiwu Jihova* o te dikihẹ etẹe,+ elo jọ o te lo evaọ ubrukpẹ uwou-odi na. Nọ ọ rọ obọ te Pita abefẹ, ọ tẹ rọwo iẹe no owezẹ ze, ọ tẹ ta kẹe nọ: “Kpama vẹrẹ vẹrẹ!” Egbregba na i te kie no abọ riẹ.+ 8 Ukọ-odhiwu na ọ tẹ ta kẹe nọ: “Ku ewu ra họ* je fi eviẹ ra họ.” O te ru ere. Ukuhọ riẹ, ọ tẹ ta kẹe nọ: “Ku ewu ehru ra họ re who lele omẹ.” 9 Ọ tẹ ruọ otafe, o te bi lele iei, rekọ ọ riẹ hẹ inọ oware nọ a be rọ ẹkwoma ukọ-odhiwu na ru na ginọ aruakpọ. Evaọ uzẹme, o roro nọ ọ be ruẹ eruẹaruẹ. 10 Nọ a nya utu isoja ọsosuọ gbe ọrọ avọ ivẹ na vrẹ no, a te te unuẹthẹ ayọno nọ a re ro no uwou-odi na ruọ okpẹwho na, ẹthẹ na ọvo o te rovie kẹ ae. Nọ a ruọ otafe no, a tẹ nya eva iyẹrẹ jọ, ẹsiẹvo na, ukọ-odhiwu na ọ tẹ nyase iẹe ba. 11 Nọ Pita o vuhu oware nọ o be via na mu no, ọ tẹ ta nọ: “Obọnana mẹ ginẹ riẹ nọ Jihova* o vi ukọ-odhiwu riẹ ze ti siwi omẹ no obọ Herọd je no eware kpobi nọ ahwo Ju a bi rẹro nọ e te via.”+

12 Nọ o vuhu onana mu no, o te kpobọ uwou Meri, oni Jọn nọ a re je se Mak,+ oria nọ ilele na buobu a kokohọ jẹ lẹ. 13 Nọ o kporo ẹthẹ unuighẹ na, odibo-ọmọtẹ nọ a re se Roda ọ tẹ nyaze re o rovie ẹthẹ na. 14 Nọ o vuhu uvou Pita, oghọghọ ogaga o jariẹ rovie ẹthẹ na ha, rekọ ọ tẹ dhẹ zihe ruọ eva uwou ọ tẹ ta kẹ ae nọ Pita ọ rrọ obọ unuẹthẹ ighẹ na. 15 A tẹ ta kẹe nọ: “Oware jọ u bi kpokpo owhẹ.” Rekọ ọ tẹ gbẹ be ta nọ uzẹme ọ be ta na. A te muhọ ẹta nọ: “Kiyọ ukọ-odhiwu riẹ.” 16 Rekọ Pita ọ tẹ gbẹ jọ etẹe bi kporo ẹthẹ na. Nọ a rovie ẹthẹ na, a tẹ ruẹ e riẹ, akpọ o te gbe ai unu. 17 Rekọ ọ tẹ rọ obọ ta kẹ ae nọ a fibo, o te gbiku na kpobi kẹ ae epanọ Jihova* o ro si ei no uwou-odi na ze, ọ tẹ ta nọ: “Wha niyẹrẹ eware nana kẹ Jemis+ gbe inievo na.” Kẹsena ọ tẹ ruọ otafe o te kpohọ oria ofa.

18 Whaọ nọ oke o ke no, isoja na a tẹ jọ awawa kpahe oware nọ a gbẹ be ruẹ Pita ha. 19 Herọd ọ tẹ romatotọ gwọlọ iẹe, rekọ nọ ọ ruẹ e riẹ hẹ ọ tẹ jẹ nọ isoja na enọ, ọ tẹ ta nọ a rehọ ae vrẹ re a kẹ ae uye;+ o te no Judia kpobọ Sisaria, ọ tẹ jọ etẹe omoke jọ.

20 Whaọ Herọd ọ jẹ dha eva kpahe* ahwo Taya avọ Saedọn. Fikiere a tẹ rọ ẹjiroro ọvo nyabru ei ze, nọ a lẹ Blastọs ọzae nọ o wuzou iruẹru uwou* ovie na inọ o fiobọhọ kẹ ae no, a tẹ be yare inọ a gwọlọ re udhedhẹ o jọ udevie rai avọ ovie na, keme a jẹ hae fa emu no ẹkwotọ ovie na ziọ ẹwho rai. 21 Evaọ ẹdẹ nọ a fihọ, Herọd ọ tẹ gọ obọdẹ ẹgọ ovie ọ tẹ keria akaba oziẹobro na, ọ tẹ be ta ẹme kẹ ahwo na evaọ ẹgbede. 22 Kẹsena ahwo nọ a kokohọ na a te muhọ ebo nọ: “Nọ urru ọghẹnẹ, orọnikọ orọ ohwo-akpọ họ!” 23 Ẹsiẹvo na, ukọ-odhiwu Jihova* ọ tẹ rọ ẹyao tehe iẹe, keme ọ rehọ oruaro na kẹ Ọghẹnẹ hẹ, ihoi e tẹ re iẹe, o te whu.

24 Rekọ ẹme Jihova* o te je do ruọ eria kpobi, ahwo buobu a te bi kurẹriẹ.+

25 Nọ Banabas+ avọ Sọl a jọ Jerusalẹm ru iruo ogbodhẹ na no,+ a te zihe ze jẹ rehọ Jọn+ nọ a re je se Mak kugbe oma.

13 Whaọ eruẹaro gbe iwuhrẹ a jọ ukoko nọ o jọ Antiọk:+ Banabas, Simiọn nọ a je se Naija, Lusiọs ọrọ Sairini, Manaen ọnọ avọ Herọd osu ubrotọ na a gbe kpohọ isukulu, gbe Sọl. 2 Epanọ a be rọ gọ* Jihova* jẹ be siọ emuọriọ ba na, ẹzi ọfuafo na ọ tẹ vuẹ ae nọ: “Wha salọ Banabas avọ Sọl+ fihọ akotọ kẹ omẹ rọkẹ iruo nọ me se rai ze kẹ.”+ 3 Kẹsena nọ a siọ emuọriọ ba jẹ lẹ no, a tẹ rọ abọ kpahe ae, a te vi ae vrẹ.

4 Fikiere ezae nana nọ ẹzi ọfuafo na o vi na a te kpobọ Sẹlusia, a te no etẹe ruọ okọ kpohọ Saiprọs. 5 Nọ a te Salamis, a te mu ẹme Ọghẹnẹ họ ewhowho evaọ isinagọgo* ahwo Ju. Jọn ọ tẹ jẹ gbodibo* kẹ ae.+

6 Nọ a nya ukoliko na soso duwu rite obọ Pefọs no, a tẹ nyaku ọzae Ju jọ nọ a re se Ba-Jesu, ọnọ ọ jọ ọgbẹva gbe ọruẹaro ọrue. 7 Ọ jọ kugbe Sẹjiọs Pọlọs ọba ubrotọ* na, ọzae nọ o wo eriariẹ ziezi. Ọzae nana o te se Banabas avọ Sọl keme o jariẹ oja gaga nọ o re yo ẹme Ọghẹnẹ. 8 Rekọ Ẹlimas* ọgbẹva na, (keme otofa Ẹlimas oye) ọ tẹ jẹ wọso ae, jẹ daoma whaha ọba ubrotọ na re ọ siọ ẹrọwọ ba efihọ Olori na. 9 Sọl, ọnọ a re je se Pọl, avọ ẹzi ọfuafo nọ ọ vọ riẹ oma o te rri rie kiọkiọkiọ 10 ọ tẹ ta nọ: “O ọzae nọ oghẹrẹ iwhayo kpobi gbe oghẹrẹ umuomu kpobi o da oma fia, whẹ ọmọ Ẹdhọ,+ whẹ ọwegrẹ oware kpobi nọ u kiẹrẹe, kọ whọ gbẹ siọ idhere egbagba Jihova* ba ẹraha?* 11 Rri! Obọ Jihova* u mu owhẹ no, who ti tuaro, whọ te ruẹ elo ọre na ha evaọ omoke jọ.” Ẹsiẹvo na ẹgho avọ ebi ọlala i te ruru iei, ọ tẹ be nya wariẹ be gwọlọ ohwo nọ o re kru rie obọ re o su ei. 12 Nọ ọba ubrotọ na ọ ruẹ oware nọ o via na, o te zihe ruọ olele Jesu,* keme ewuhrẹ Jihova* o gbe rie unu.

13 Pọl avọ egbẹnya riẹ a tẹ jọ Pefọs ruọ okọ fa abade vrẹ, a te te Pẹga nọ ọ rrọ Pamfilia. Rekọ Jọn+ ọ tẹ nyase ae ba o te zihe kpohọ Jerusalẹm.+ 14 Rekọ ae omarai a te no Pẹga ziọ Antiọk nọ ọ rrọ Pisidia. Nọ a ruọ isinagọgo*+ na evaọ ẹdẹ Ẹdijala, a tẹ keria. 15 Nọ isase ẹgbede orọ Uzi+ na gbe ebe Eruẹaro na i kuhọ no, enọ i wuzou evaọ isinagọgo* na a te vi uwou se ai inọ: “Ezae, inievo, otẹrọnọ wha wo ẹme uduotahawọ jọ kẹ ahwo na, wha tae.” 16 Fikiere Pọl ọ tẹ kpama, nọ o nuhu obọ riẹ, ọ tẹ ta nọ:

“Whai ahwo Izrẹl gbe amọfa nọ a be dhozọ Ọghẹnẹ, wha gaviezọ. 17 Ọghẹnẹ ahwo Izrẹl ọ salọ esẹ-esẹ mai, yọ ọ kpare rai kpehru okenọ a jọ erara evaọ ẹkwotọ Ijipti, ọ tẹ rehọ ai no eva riẹ ze avọ ogaga ulogbo.*+ 18 Yọ evaọ etoke oware wọhọ ikpe udhuvẹ, o thihakọ kẹ ai evaọ udhude na.+ 19 Nọ ọ raha erẹwho ihrẹ no evaọ ẹkwotọ Kenan, ọ tẹ rehọ otọ rai kẹ ae re a rọ reuku.+ 20 Eware yena kpobi e via evaọ oware wọhọ ikpe egba ene gbe udhuvẹ-gbikpe (450).

“Nọ onana o vrẹ no ọ tẹ kẹ ae ibruoziẹ ri bọo oke Samuẹle ọruẹaro na.+ 21 Kẹsena a tẹ yare nọ a gwọlọ ovie,+ Ọghẹnẹ ọ tẹ kẹ ae Sọl ọmọzae Kish, ohwo orua Bẹnjamin,+ ọnọ o su rai ikpe udhuvẹ. 22 Nọ Ọghẹnẹ o si ei no ovie no, ọ tẹ rehọ Devidi mu ovie kẹ ae,+ ọnọ o se isẹri kpahe nọ: ‘Mẹ ruẹ Devidi ọmọzae Jẹsi+ no, ọzae nọ o kiehọ udu mẹ;+ o ti ru eware kpobi nọ mẹ gwọlọ.’ 23 Wọhọ epanọ Ọghẹnẹ ọ ya eyaa, ọ kẹ Izrẹl osiwi no, Jesu, ọnọ o no oma ọmọ* ọzae nana ze.+ 24 Taure ọyena ọ tẹ te romavia, Jọn ọ jọ ẹgbede whowho kẹ ahwo Izrẹl kpobi inọ a họ-ame re o jọ oka ekurẹriẹ rai.+ 25 Rekọ evaọ obọ ekuhọ iruo Jọn, Jọn ọ jẹ ta nọ: ‘Ono wha roro nọ mẹ rrọ? Mẹ họ ọye he. Rekọ rri! Ọjọ ọ rrọ emu mẹ nyaze nọ me te epanọ mẹ sae rọ rra ifi eviẹ nọ o kuhọ awọ họ.’+

26 “Whai ahwo, inievo, whai emọ uyẹ Abraham gbe amọfa nọ a rrọ udevie rai nọ e be dhozọ Ọghẹnẹ, a vi ovuẹ esiwo nana se omai no.+ 27 Ahwo nọ a be rria Jerusalẹm gbe isu rai a vuhu ọnana mu hu, rekọ, okenọ a je gu ei ẹdhọ, a ru eware nọ Eruẹaro na a ta gba,+ enọ a be hai se do via evaọ ẹdijala kpobi. 28 Dede nọ a jọ oma riẹ ruẹ oware nọ o ro fo uwhu hu,+ a ta kẹ Pailet nọ a gwọlọ nọ a kpei no.+ 29 Nọ a ru eware kpobi nọ a kere kpahe iẹe gba no, a tẹ rehọ iẹe no ure na ziọ otọ jẹ wọe fihọ uki.*+ 30 Rekọ Ọghẹnẹ ọ kpare riẹ no uwhu ze,+ 31 yọ evaọ edẹ buobu o dhesẹ oma via kẹ enọ i lele i rie no Galili kpohọ Jerusalẹm. Enana họ enọ i bi se isẹri kpahe iẹe kẹ ahwo na.+

32 “Fikiere ma be vuẹ owhai usi uwoma orọ eyaa nọ a ya kẹ esẹ-ode na. 33 Ọghẹnẹ o ru eware nana kpobi gba kẹ omai emọ rai, ẹkwoma Jesu nọ ọ kpare no uwhu ze;+ wọhọ epanọ a kere fihọ olezi avọ ivẹ na inọ: ‘Whẹ yọ ọmọzae mẹ; nẹnẹ na me zihe ruọ ọsẹ ra no.’+ 34 Fikinọ Ọ kpare riẹ no uwhu ze no, yọ o gbe ti zihe kpohọ ọnọ o re gbo ofa vievie he, Ọ ta nọ: ‘Me ti dhesẹ uyoyou nọ o rẹ hiẹ hẹ nọ mẹ ya eyaa rai kẹ Devidi na kẹ owhai, onọ a re fievahọ.’*+ 35 Fikiere ọ tẹ jọ olezi ọfa ta nọ: ‘Whọ te kuvẹ re ọnọ ọ talamu owhẹ na o gbo ho.’+ 36 Whaọ, Devidi ọ gọ* Ọghẹnẹ evaọ etoke riẹ, o te ti kie ruọ owezẹ uwhu, a te ki ei kugbe esẹ-esẹ riẹ, o te gbo.+ 37 Rekọ, ọnọ Ọghẹnẹ ọ kpare no uwhu ze na, o gbo ho.+

38 “Fikiere, jọ wha riẹ onana inievo inọ ma bi whowho kẹ owhai nọ ẹkwoma ohwo nana a sai ro wo erọvrẹ izieraha,+ 39 yọ evaọ eware kpobi nọ Uzi Mosis na o sai jo ru owhai kare abe he,+ ohwo kpobi nọ ọ rọwo a re kuenu kẹe nọ ọ kare abe fiki ohwo nana.+ 40 Fikiere, wha yọroma re oware nana nọ a ta evaọ ebe Eruẹaro na o gbẹ via kẹ owhai hi inọ: 41 ‘Wha rri rie, whai otu ọjẹfiẹ, jọ u gbe owhai unu, re wha je whu, keme me bi ru iruo jọ evaọ edẹ rai, iruo nọ wha te rọwo vievie he nọ ohwo jọ ọ tẹ make rọ unu kotọ gbiku riẹ kẹ owhai.’”+

42 Whaọ nọ a jẹ nyavrẹ, ahwo na a tẹ be lẹ ae nọ a wariẹ ta kpahe eme nana evaọ Ẹdijala nọ ọ be tha. 43 Fikiere nọ egagọ e fa no evaọ isinagọgo* na, ibuobu ahwo Ju na gbe enọ i kurẹriẹ ziọ egagọ ahwo Ju nọ e be gọ Ọghẹnẹ a te lele Pọl avọ Banabas, enọ e jọ usu eme nọ a ta kẹ ae tuduhọ ae awọ inọ a ruabọhọ eware nọ Ọghẹnẹ o re gbe ro dhesẹ uwowou ulogbo kẹ ae.+

44 Ẹdijala nọ o lele i rie, enwenọ ahwo okpẹwho na kpobi a kokohọ re a yo ẹme Jihova.* 45 Nọ ahwo Ju na a ruẹ ogbotu na, a tẹ vọ avọ ihri-eriọ a tẹ jẹ ta eme-aghọ wọso eware nọ Pọl ọ jẹ ta.+ 46 Kẹsena Pọl avọ Banabas a tẹ ta kẹ ae ududu nọ: “O roja inọ whai a rẹ kake ta ẹme Ọghẹnẹ kẹ.+ Nọ wha be se iẹe je bi rri omarai nọ wha te ahwo nọ a re wo uzuazọ ebẹdẹ bẹdẹ hẹ na, rri! ma be nyabru ahwo erẹwho na.+ 47 Keme Jihova* ọ rehọ eme nana jie uzi kẹ omai inọ: ‘Mẹ rehọ owhẹ mu no re whọ jọ elo kẹ erẹwho na, re whọ wha esiwo se ahwo rite oka avọ oka otọakpọ na.’”+

48 Nọ ahwo erẹwho na a yo onana, a te muhọ ẹghọghọ je bi jiri ẹme Jihova,* ahwo kpobi nọ a wo emamọ eva, nọ a ti wo uzuazọ ebẹdẹ bẹdẹ a te kurẹriẹ.* 49 Ofariẹ, a je whowho ẹme Jihova* evaọ orẹwho na soso. 50 Rekọ ahwo Ju na a tẹ lẹliẹ eyae nọ a riẹ odẹ nọ e be dhozọ Ọghẹnẹ họ gbe ezae nọ e viodẹ evaọ okpẹwho na, a te ru nọ a ro mu+ Pọl avọ Banabas họ ekpokpo, a te le ai no ẹwho rai. 51 A tẹ tehe* ovu no awọ rai, a te kpohọ Aikoniọm.+ 52 Ilele na a tẹ gbẹ vọ avọ oghọghọ+ gbe ẹzi ọfuafo.

14 Whaọ evaọ Aikoniọm, Pọl avọ Banabas a tẹ ruọ isinagọgo* ahwo Ju, a tẹ ta ẹme ziezi te epanọ ogbotu obuobu ahwo Ju gbe ahwo Griki a ro kurẹriẹ.* 2 Rekọ ahwo Ju nọ a rọwo ho a tẹ lẹliẹ ahwo* erẹwho na họ jẹ ta udu rai raha wọso inievo na.+ 3 Fikiere a tẹ jọ etẹe oke krẹkri, yọ a jẹ ta ẹme ududu fiki udu nọ Jihova* ọ kẹ rai. Ọ kẹ rai ogaga nọ a je ro ru eware eka gbe eware igbunu ro dhesẹ nọ ẹme riẹ a be ta, koyehọ, ovuẹ kpahe uwowou ulogbo riẹ.+ 4 Rekọ ogbotu obuobu ahwo okpẹwho na a tẹ ghale abava; ejọ e jọ abọ ahwo Ju na, edekọ kọ abọ ikọ na. 5 Nọ ahwo erẹwho na avọ ahwo Ju gbe isu rai a jowọ inọ a re ru ai oma vo jẹ rọ itho fi ai,+ 6 ahwo jọ a tẹ vuẹ ae, a tẹ dhẹ kpohọ Likonia, Listra gbe Dẹbi, gbe ewho nọ e wariẹ oyena họ.+ 7 A tẹ jọ obei je whowho usi uwoma na.

8 Whaọ evaọ Listra, ọzae jọ ọ jariẹ nọ ọ keria nọ awọ riẹ ọ ko. Ọ ko no eva ze, ọ re nya ẹdẹvo ho. 9 Ọzae nana ọ jẹ gaviezọ kẹ ẹme nọ Pọl ọ jẹ ta. Nọ Pọl o rri rie ziezi jẹ ruẹ nọ o wo ẹrọwọ nọ a sai siwi ei,+ 10 ọ tẹ rọ urru oruarua ta nọ: “Kpama whọ rọ awọ ra dikihẹ.” Ọzae na ọ tẹ sakpama je muhọ ẹnya.+ 11 Nọ ogbotu na a ruẹ oware nọ Pọl o ru na, a tẹ rehọ ẹvẹrẹ ahwo Likonia bo nọ: “Eghẹnẹ na i zihe oma ruọ ahwo-akpọ jẹ nyabru omai ze no!”+ 12 A te je se Banabas nọ Zus, rekọ Pọl kọ Hẹmis, keme ọye ọ jẹ mae ta ẹme.* 13 Ozerẹ Zus, ọnọ etẹmpol riẹ ọ jọ oria nọ a rẹ rọ ruọ okpẹwho na, ọ tẹ rehọ iruẹ gbe etu-idodo* ziọ obọ inuethẹ ẹwho na jẹ gwọlọ nọ tei te ogbotu na a re dhe idhe.

14 Rekọ nọ ikọ na Banabas avọ Pọl a yo kpahe onana, a tẹ bẹre iwu rai a te duola ruọ udevie ogbotu na je bi bo nọ: 15 “Ezae, fikieme wha bi ro ru eware nana? Mai yọ ahwo-akpọ gheghe nọ a gba ha wọhọ owhai re.+ Ma bi whowho usi uwoma na kẹ owhai, re wha kurẹriẹ no eware ifofe nana bru Ọghẹnẹ nọ ọ rrọ uzuazọ na ze, ọnọ ọ ma odhiwu gbe otọakpọ na gbe abade gbe eware kpobi nọ e rrọ eva rai.+ 16 Evaọ ige nọ e vrẹ, ọ kẹ erẹwho na kpobi uvẹ re a ru epanọ u je rai,+ 17 dede nọ ọ ko oghẹrẹ ohwo nọ ọ rrọ dhere he*+ keme o bi ru ewoma ẹkwoma iso gbe ezi-ezi nọ ekakọ e rẹ rọ mọ ziezi nọ ọ be kẹ owhai,+ ọ be kẹ owhai emuore buobu jẹ be rọ oghọghọ vọ udu rai.”+ 18 Ghele eme nana kpobi nọ a ta na, udugaga a sae rọ whaha ogbotu na nọ a gbe ro dhe idhe kẹ ae he.

19 Rekọ ahwo Ju a te no obọ Antiọk gbe Aikoniọm ze a tẹ bẹbẹ ogbotu na họ,+ a tẹ rọ itho fi Pọl je si ei ruọ otafe okpẹwho na, bi roro nọ o whu no.+ 20 Rekọ nọ ilele na a nyaze jẹ wariẹe họ, ọ tẹ kpama ọ tẹ ruọ eva okpẹwho na. Okiokiọ riẹ tei te Banabas a te kpohọ Dẹbi.+ 21 Nọ a jọ okpẹwho yena whowho usi uwoma na je fiobọhọ kẹ ahwo buobu zihe ruọ ilele no, a te zihe kpobọ Listra, Aikoniọm, gbe Antiọk. 22 A tẹ jọ obei jẹ bọ ilele* na ga,+ be tuduhọ ae awọ nọ a daji ẹrọwọ na jẹ be ta nọ: “Evaọ udevie ikpokpoma buobu nọ i re te omai hrọ ma te rọ ruọ Uvie Ọghẹnẹ.”+ 23 Ofariẹ, a tẹ rọ ekpako mu kẹ ae evaọ ukoko kpobi,+ yọ a be lẹ jẹ siọ emuọriọ ba,+ a te mu ai họ Jihova* obọ, ọnọ a rọwo no na.

24 Kẹsena a tẹ nya Pisidia vrẹ kpohọ Pamfilia,+ 25 nọ a jọ Pẹga whowho ẹme na no, a te kpohọ Atalaya. 26 A tẹ jọ etẹe ruọ okọ kpohọ Antiọk, oria nọ inievo na a kake jọ yare inọ jọ Ọghẹnẹ o dhesẹ uwowou ulogbo kẹ ae evaọ iruo na, onọ a kuhọ no enẹna.+

27 Nọ a te etẹe je koko inievo na kpobi họ no, a te gbiku eware buobu nọ Ọghẹnẹ o ru ẹkwoma rai, gbe nọ o rovie edhere nọ a re ro wo ẹrọwọ* kẹ erẹwho na no.+ 28 Fikiere a tẹ raha oke krẹkri kugbe ilele na.

15 Whaọ ezae jọ i no obọ Judia ze a te mu inievo na họ ewuhrẹ inọ: “Ajokpanọ wha rẹ yawo wọhọ epanọ uzi Mosis o ta,+ o gbẹ rrọ ere he, wha sai wo esiwo ho.” 2 Rekọ nọ Pọl avọ Banabas a lele ai si ikẹ gaga jẹ vro avro no, a te ru ọruẹrẹfihotọ re Pọl, Banabas, gbe amọfa jọ a nyabru ikọ na gbe ekpako na evaọ obọ Jerusalẹm+ fiki ẹme* nana.

3 Fikiere nọ inievo ukoko na a su ai họ aro omojọ no, ezae nana a tẹ ruabọhọ onya rai nya Fonisia gbe Sameria vrẹ, be rọ unu kotọ gbiku kẹ ae epanọ ahwo erẹwho na a bi ro kurẹriẹ, a tẹ be rọ ere wha oghọghọ ulogbo se inievo na kpobi. 4 Nọ a te Jerusalẹm, ukoko na gbe ikọ na gbe ekpako na a te dede ae rehọ sasasa, a te gbiku eware buobu nọ Ọghẹnẹ ọ rọ ẹkwoma rai ru no. 5 Rekọ ahwo utu Farisi jọ nọ a zihe ruọ ilele* no a tẹ kpama no egbara rai, a tẹ ta nọ: “O roja re a yawo ai je jie uzi kẹ ai inọ a koko Uzi Mosis.”+

6 Fikiere ikọ na gbe ekpako na a te kokohọ re a jiroro kpahe ẹme nana. 7 Nọ a ta ẹme na gaga lelehie no,* Pita ọ tẹ kpama ọ tẹ ta kẹ ae nọ: “Ezae, inievo, wha riẹ nọ no emuhọ ze, Ọghẹnẹ ọ salọ omẹ evaọ udevie rai re ahwo erẹwho na a sae jọ unu mẹ yo usi uwoma na re a kurẹriẹ.+ 8 Yọ Ọghẹnẹ, ọnọ ọ riẹ udu ahwo,+ ọ kẹ imuẹro nọ ọ jẹ rai rehọ no ẹkwoma ẹzi ọfuafo nọ ọ kẹ rai+ wọhọ epanọ ọ kẹ omai re. 9 Yọ o rri rai inọ a wo ohẹriẹ no omai hi,+ rekọ o ru udu rai fo fiki ẹrọwọ rai.+ 10 Kọ fikieme wha be rọ dawo Ọghẹnẹ ẹkwoma owhowha nọ wha be gwọlọ gba họ uriohọ ilele na,+ onọ esẹ-esẹ mai gbe omai a sae wọ họ?+ 11 Ukpoye, ma wo ẹrọwọ inọ ma ti wo esiwo ẹkwoma uwowou ulogbo Olori na Jesu,+ yọ ere ọvona o rrọ kẹ ae re.”+

12 Fikiere aikpobi a tẹ fọ tou, a tẹ be gaviezọ nọ Banabas avọ Pọl a bi gbiku eware eka gbe eware igbunu buobu nọ Ọghẹnẹ o ru ẹkwoma rai evaọ udevie ahwo erẹwho na. 13 Nọ a gbiku na re no, Jemis ọ tẹ ta nọ: “Ezae, inievo, wha gaviezọ kẹ omẹ. 14 Simiọn*+ ọ romatotọ gbiku kẹ omai no kpahe orọ ọsosuọ nọ Ọghẹnẹ ọ rọ rẹriẹ ovao rri erẹwho na re ọ jọ udevie rai rehọ ahwo kẹ odẹ riẹ.+ 15 Yọ eme Eruẹaro na e rọwokugbe onana, wọhọ epanọ a kere nọ: 16 ‘Nọ eware nana e tẹ vrẹ no, me ti zihe ze mẹ vẹ te wariẹ kpare uwou-udhu* Devidi nọ u kie fihọ otọ no na; mẹ te wariẹ bọ eria riẹ nọ e raha je ru ei fihọ epanọ o jọ, 17 re ahwo nọ a kiọkọ a sae rọ eva rai kpobi gwọlọ Jihova,* te ai te ahwo erẹwho na kpobi, ahwo nọ a rọ odẹ mẹ se, ere Jihova* ọ ta, ọnọ o bi ru eware nana,+ 18 enọ a riẹ no anwae ze.’+ 19 Fikiere iroro mẹ họ, wha joma rọ uye bẹ ahwo erẹwho na ha, enọ i bi kurẹriẹ bru Ọghẹnẹ ze na,+ 20 rekọ joma kere se ai re a siomano eware nọ i wobọ kugbe ẹdhọgọ,+ siomano ọfariẹ-ogbe,*+ erao nọ a kpe nọ a bru uriohọ họ, je no azẹ.+ 21 Keme no anwae ze, Mosis o wo ahwo nọ a bi whowho eme riẹ evaọ ikpewho sa-sa, keme a be hae jọ isinagọgo* se eme riẹ do via evaọ ẹdijala kpobi.”+

22 Kẹsena ikọ na avọ ekpako na gbe ukoko na soso a tẹ jiroro nọ a re vi ahwo nọ a salọ evaọ udevie rai lele Pọl avọ Banabas kpobọ Antiọk; ahwo nọ a vi họ Judas ọnọ a re se Basabas gbe Saelas,+ ezae nọ e jẹ kobaro evaọ udevie inievo na. 23 A te kere eme nana jẹ rehọ iẹe kẹ ae ro se inievo na:

“Ikọ na gbe ekpako na, inievo rai, ro se inievo nọ e rrọ Antiọk,+ Siria, avọ Silisia, enọ e rrọ ahwo erẹwho na: Wha do! 24 Fikinọ ma yo nọ ejọ i no udevie mai ze, a tẹ rọ eme rai wha ozighi họ owhai oma+ be gwọlọ raha ẹrọwọ rai,* dede nọ ma ta ere kẹ ae he, 25 ma rọ iroro evo rọwo inọ ma rẹ salọ ahwo vi bru owhai ze kugbe inievo iyoyou mai nana Banabas avọ Pọl, 26 ezae nọ i fi uzuazọ* rai họ ọza no fiki odẹ Olori mai Jesu Kristi.+ 27 Fikiere ma bi vi Judas avọ Saelas ze, re a jẹ rọ unu rai ta eware evo nana kẹ owhai.+ 28 Keme ẹzi ọfuafo+ na gbe omai omamai ma gba riẹ mu no inọ ma re fi ewha efa ba kẹ owhai hi, ajokpaọ eware nana nọ e roja na: 29 inọ wha hai siomano eware nọ a ro dhe idhe kẹ emedhọ,+ no azẹ,+ no erao nọ a kpe nọ a bru uriohọ họ,+ je no ọfariẹ-ogbe.*+ Wha tẹ romatotọ siomano eware nana, u ti woma kẹ owhai. Jọ wha wo omokpokpọ!”*

30 Ezae nana a tẹ ruọ edhere, a te kpobọ Antiọk, a te koko inievo na kpobi họ a tẹ kẹ ae ileta na. 31 Nọ a sei no, a tẹ ghọghọ fiki uduotahawọ na. 32 Yọ fikinọ Judas avọ Saelas a jọ eruẹaro re, a kẹ evuẹ buobu rọ tuduhọ inievo na awọ jẹ bọ ae ga.+ 33 Nọ a jọ etẹe omoke jọ no, inievo na a tẹ ta kẹ ae nọ a nya tou nọ a bi zihe bru inievo nọ i vi rai ze na. 34 *—— 35 Rekọ Pọl avọ Banabas a tẹ gbẹ jọ Antiọk, bi wuhrẹ ahwo je bi whowho usi uwoma ẹme Jihova,* yọ amọfa buobu a kuomagbe ai je ru onana.

36 Nọ edẹ jọ e vrẹ no, Pọl ọ tẹ ta kẹ Banabas nọ: “Joma zihe enẹna* bru inievo na evaọ ikpewho kpobi nọ ma jọ whowho ẹme Jihova* re ma ruẹ epanọ a rrọ.”+ 37 Banabas ọ gba riẹ mu nọ ọ rẹ rehọ Jọn kugbe oma, ọnọ a re se Mak.+ 38 Rekọ o were Pọl ho re a rehọ iẹe kugbe oma keme ọ nyase ae ba evaọ obọ Pamfilia, o lele i rai kpohọ iruo na ha.+ 39 Fikiere ẹwhọ ọgaga o te du lahwe, a tẹ hẹrioma no ohwohwo; Banabas+ ọ tẹ rehọ Mak kugbe oma, a tẹ ruọ okọ kpohọ Saiprọs. 40 Pọl ọ tẹ salọ Saelas, a tẹ ruọ edhere nọ inievo na a lẹ no inọ jọ Jihova* o dhesẹ uwowou ulogbo kẹ ae.+ 41 Ọ tẹ nyate Siria gbe Silisia, yọ ọ be bọ ikoko na ga.

16 Kẹsena Pọl o te te Dẹbi je te Listra.+ Whaọ olele jọ nọ a re se Timoti+ ọ jọ etẹe, ọmọzae aye Ju jọ nọ ọ rrọ Oleleikristi rekọ ọsẹ riẹ ohwo Griki, 2 yọ inievo nọ e rrọ Listra gbe Aikoniọm a ta emamọ ẹme kpahe iẹe. 3 Pọl ọ tẹ ta nọ ọ gwọlọ nọ Timoti o lele iei, ọ tẹ rehọ iẹe ọ tẹ yawo iẹe fiki ahwo Ju nọ a jọ eria nọ a be te nya na,+ keme aikpobi a riẹ nọ ọsẹ riẹ yọ ohwo Griki. 4 Nọ a bi no okpẹwho ruọ okpẹwho na, yọ a be vuẹ inievo na izi nọ ikọ na gbe ekpako na evaọ obọ Jerusalẹm a rọwo fihọ na re a koko ai.+ 5 Fikiere ikoko na e tẹ jọ gaga evaọ ẹrọwọ na je bi vihọ no ẹdẹ te ẹdẹ.

6 Ofariẹ, a nya orọ Frijia gbe ubrotọ Galesha,+ keme ẹzi ọfuafo na ọ whaha e rai inọ a ta ẹme na evaọ ubrotọ Esia ha. 7 Whaọ nọ a te Misia, a tẹ daoma epanọ a re ro kpohọ Bithinia,+ rekọ ẹzi Jesu ọ kẹ rai uvẹ hẹ. 8 Fikiere a tẹ nya akotọ* Misia vrẹ a te kpohọ Troas. 9 Evaọ aso Pọl ọ tẹ ruẹ eruẹaruẹ jọ, ọzae Masidonia jọ o dikihẹ etẹe be lẹe nọ: “Nyaze obọ Masidonia re who fiobọhọ kẹ omai.” 10 Nọ ọ nwane ruẹ eruẹaruẹ na no, ma tẹ wọ re ma kpohọ Masidonia, keme ma rehọ e riẹ nọ Ọghẹnẹ o se omai no re ma whowho usi uwoma na kẹ ae.

11 Fikiere ma tẹ jọ Troas ruọ okọ fa abade vrẹ, ma te kpohọ Samọtres ovavo, rekọ okiokiọ riẹ ma te kpohọ Neapọlis; 12 ma te no etẹe kpohọ Filipai,+ nọ o rrọ otọ esuo Rom, onọ o rrọ okpẹwho nọ o mae viodẹ evaọ ubrotọ Masidonia. Ma jọ okpẹwho nana evaọ edẹ jọ. 13 Evaọ ẹdẹ Ẹdijala ma te kpohọ otafe okpẹwho na kẹle ethẹ jọ, oria nọ ma roro nọ ahwo a re kokohọ jọ lẹ, ma tẹ keria je mu usi uwoma họ ẹta kẹ eyae nọ i kokohọ etẹe. 14 Aye jọ nọ a re se Lidia, nọ ọ rẹ zẹ ehọ ogorurẹ, nọ o no okpẹwho Thiatira+ ze jẹ be gọ Ọghẹnẹ, ọ jẹ gaviezọ, Jihova* o te rovie udu riẹ ziezi re ọ nabe kezọ ziezi kẹ eme nọ Pọl ọ jẹ ta.* 15 Whaọ nọ tei te ahwo uwou riẹ a họ-ame no,+ ọ tẹ lẹ omai nọ: “Wha te rri omẹ nọ mẹ be gọ Jihova* avọ ẹrọwọ, wha nyaze re wha jọ uwou mẹ.” Ọ tẹzẹ omai te epanọ ma rọ nya.

16 Whaọ ẹdẹ jọ nọ ma je kpohọ oria olẹ na, odibo-ọmọtẹ jọ nọ o wo ẹzi ogbegbe, nọ idhivẹri ọ jẹ kẹ ẹgba aruọruẹ+ ọ tẹ nyaku omai. Ọ jẹ hae rọ ẹva-ọgba* riẹ wha erere buobu se ilori riẹ. 17 Ọmọtẹ nana ọ jẹ hai lele Pọl gbe omai yọ o bi bo nọ: “Ezae nana yọ idibo Ọghẹnẹ nọ Ọ Mai Kpehru na,+ yọ a bi whowho edhere esiwo kẹ owhai.” 18 O je ru onana edẹ buobu. Uwhremu na o tẹ vẹso Pọl no, o te kuomarẹriẹ ọ tẹ ta kẹ idhivẹri na nọ: “Mẹ rehọ odẹ Jesu Kristi ta kẹ owhẹ nọ noi oma no.” Ọ tẹ nwani noi oma no evaọ auwa yena.+

19 Nọ ilori riẹ a ruẹ nọ oware nọ o jẹ wha erere se ai o gbẹ riẹ hẹ,+ a te kru Pọl avọ Saelas a te si ai kpohọ oria eki na bru isu na.+ 20 Nọ a rehọ ai bru iguẹdhọ ẹwho na ze, a tẹ ta nọ: “Ezae nana a be wha ozighi fihọ okpẹwho mai na gaga.+ Ahwo Ju a rrọ, 21 yọ a bi wuhrẹ eware* nọ i fo kẹ omai hi, nọ ma rẹ sai ru hu, nọ o wọso uzi mai, keme mai yọ ahwo Rom.” 22 Ogbotu na kpobi a tẹ wọ ruru ai, yọ nọ a bẹre iwu rai no ai oma no, iguẹdhọ ẹwho na, a tẹ ta nọ a rọ ekpọ fa ae.+ 23 Nọ a fa ae gaga no, a te fi ai họ uwou-odi jẹ vẹvẹ oriekarọ na unu inọ o rou rai ziezi.+ 24 Fiki unuovẹvẹ yena, o te fi ai họ uwou-odi obeva jẹ kare awọ rai fihọ ewẹ-ekpala ekarọ.*

25 Rekọ evaọ ubrobọ udevie aso, Pọl avọ Saelas a tẹ jẹ lẹ jẹ be so ole ro jiri Ọghẹnẹ,+ yọ ahwo uwou-odi na a be gaviezọ kẹ ae. 26 Idudhe na, otọ u te nuhu gaga, otọhotọ uwou-odi na u te nuhu. Ofariẹ, ethẹ na kpobi e tẹ nwani rovie fihọ, eware nọ a rọ kare ahwo na kpobi e tẹ rra no.+ 27 Nọ oriekarọ na o jojo no owezẹ ze jẹ ruẹ nọ ethẹ uwou-odi na i rovie fihọ, o te wolo ọgbọdọ riẹ be gwọlọ kpe omariẹ no, keme o roro nọ ahwo uwou-odi na a dhẹ no.+ 28 Rekọ Pọl ọ tẹ rọ urru oruarua bo sei nọ: “Who kpe omara ha keme mai kpobi ma rrọ etenẹ!” 29 Ọ tẹ ta nọ a rọ ikpẹ sei, ọ tẹ dhẹ ruọ eva uwou-odi na bi nuhu avọ ozọ, o te kie fihọ aro Pọl avọ Saelas. 30 Ọ tẹ rehọ ae ruọ otafe ọ tẹ ta nọ: “Ega, eme me re ru hrọ re mẹ sai wo esiwo?” 31 A tẹ ta nọ: “Rọwo Olori na Jesu, who ti wo esiwo, te owhẹ te ahwo uwou ra.”+ 32 Kẹsena a tẹ ta ẹme Jihova* kẹe avọ ahwo uwou riẹ kpobi. 33 Ọ tẹ rehọ ae vrẹ evaọ aso yena jẹ wozẹ emela rai. Tei te ahwo uwou riẹ kpobi a tẹ họ-ame ababọ oke oraha.+ 34 Ọ tẹ rehọ ae ziọ uwou riẹ jẹ wọ emu fihọ emẹjẹ kẹ ae, ọyomariẹ avọ ahwo uwou riẹ kpobi a tẹ ghọghọ gaga fikinọ ọ rọwo Ọghẹnẹ no.

35 Nọ oke o ke no, iguẹdhọ ẹwho na a te vi elakpa-ikpokpo nyae ta nọ: “Siobọno ezae na.” 36 Oriekarọ na ọ tẹ vuẹ Pọl uwou na inọ: “Iguẹdhọ ẹwho na a vi ahwo ze inọ a siobọno owhai imava na. Fikiere wha ruọ otafe re wha nyavrẹ tou.” 37 Rekọ Pọl ọ tẹ ta kẹ ae nọ: “A fa omai evaọ ẹgbede dede nọ ma reabe he,* yọ mai ahwo Rom,+ a te fi omai họ uwou-odi. Kọ a be gwọlọ lẹlẹ siobọno omai? Vievie! Jọ ae ọvo a nyaze re a su omai ruọ otafe.” 38 Elakpa-ikpokpo na a tẹ ta eme nana kẹ iguẹdhọ ẹwho na. Nọ a yo nọ ezae nana yọ ahwo Rom,+ ozọ u te mu ai. 39 Fikiere a tẹ nyaze, a te wounu kẹ ae, nọ a su ai ruọ otafe no, a tẹ lẹ ae nọ a no okpẹwho na. 40 Rekọ nọ a no uwou-odi na ze no, a te kpobọ uwou Lidia; nọ a ruẹ inievo na, a tẹ tuduhọ ae awọ,+ a tẹ nyavrẹ.

17 A tẹ nya Amfipọlis avọ Apolonia vrẹ, a te te Tẹsalonika,+ oria nọ isinagọgo* ahwo Ju o jọ. 2 Wọhọ epaọ uruemu Pọl,+ ọ tẹ ruọ eva bru rai, yọ evaọ edijala esa ọ rehọ Ikereakere na lele ai jiroro,+ 3 jẹ rọ eware nọ a kere fihotọ dhesẹ vevẹ jẹ kẹ imuẹro inọ u fo re Kristi na ọ ruẹ uye+ jẹ kparoma no uwhu ze,+ be ta nọ: “Ọnana họ Kristi na, Jesu nana nọ me bi whowho kẹ owhai na.” 4 Fikiere ejọ rai a te zihe ruọ ilele Jesu,* a te kuomagbe Pọl avọ Saelas,+ yọ ere ogbotu buobu ọrọ ahwo Griki nọ a jẹ gọ Ọghẹnẹ a ru re gbe ibuobu eyae jọ nọ e viodẹ.

5 Rekọ fiki ihri-eriọ,+ ahwo Ju na a te koko ezae imuomu jọ nọ i je ghoro evaọ oria eki na họ, a tẹ wọ wọhọ otu-ugbarugba, wha ozighi fihọ okpẹwho na soso. A tẹ vẹruọ uwou Jesin be gwọlọ Pọl avọ Saelas re a rehọ ae ziọ otafe kẹ otu-ugbarugba na. 6 Nọ a ruẹ e rai hi, a te si Jesin avọ inievo na jọ bru isu okpẹwho na, be ta nọ: “Ezae nana nọ e gale otọakpọ na soso uzou vi* no na a ziọ obonẹ no re,+ 7 yọ Jesin o dede i rai rehọ fihọ uwou riẹ. Ezae nana kpobi a be wọso izi Siza, be ta nọ ovie ọfa jọ ọ riẹ, Jesu.”+ 8 Nọ ogbotu na avọ isu okpẹwho na a yo onana, ozọ u te mu ai; 9 nọ Jesin avọ inievo edekọ na a kẹ ae imuẹro nọ a gwọlọ ziezi no,* a te siobọno ai.

10 Nọ aso ọ nwani te, inievo na a te vi Pọl avọ Saelas kpobọ Bẹria. Nọ a te obei, a tẹ ruọ eva isinagọgo* ahwo Ju. 11 Whaọ ahwo nana a wo emamọ eva vi enọ e rrọ Tẹsalonika, keme a rọ osegboja ọgaga jẹ ẹme na rehọ, be romatotọ kiẹ Ikereakere na riwi kẹdẹ kẹdẹ re a ruẹ sọ ere eware nana e ginẹ rrọ. 12 Fikiere ibuobu rai i te zihe ruọ ilele,* yọ ere ibuobu eyae Griki nọ e viodẹ gbe ezae Griki jọ nọ e viodẹ a ru re. 13 Rekọ nọ ahwo Ju nọ e rrọ obọ Tẹsalonika a yo nọ Pọl ọ be jọ Bẹria whowho ẹme Ọghẹnẹ re, a tẹ nyaze te bẹbẹ ogbotu na họ ru ozighi.+ 14 Inievo na a tẹ nwani su Pọl vrẹ kpobọ abade na,+ rekọ Saelas avọ Timoti a tẹ gbẹ daji etẹe. 15 Rekọ enọ i je su Pọl na a lele i rie te ugbo obọ Athẹns, nọ Pọl ọ vuẹ ae no inọ a ta kẹ Saelas avọ Timoti+ re a nyabru rie ze vẹrẹ vẹrẹ, a te zihe.

16 Whaọ nọ Pọl ọ jẹ hẹrẹ ae evaọ Athẹns, o tẹ jẹ kẹe uye gaga nọ ọ ruẹ nọ emedhọ e vọ okpẹwho na. 17 Fikiere ọ tẹ jẹ jọ isinagọgo* na rehọ ẹme Ọghẹnẹ lele ahwo Ju na gbe amọfa nọ a be gọ Ọghẹnẹ jiroro, yọ o je ru epọvo na re kẹdẹ kẹdẹ evaọ oria eki na kugbe enọ ọ ruẹ kpobi. 18 Rekọ egba-eriariẹ Ẹpikurọs gbe Stoik jọ a te je lele iei vro avro, yọ ejọ e jẹ ta nọ: “Eme ọnana nọ o re gu ọriọriọ na ọ gwọlọ ta?” Efa e vẹ be ta nọ: “O wọhọ nọ ọ be ta kpahe eghẹnẹ erẹwho efa nọ ma riẹ hẹ.” A jẹ ta ere keme o je whowho usi uwoma kpahe Jesu gbe ẹkparomatha na.+ 19 Fikiere a te kru rie a tẹ rehọ iẹe kpohọ Areopagọs* na, be ta nọ: “Kọ whọ sai ru omai riẹ otọ uwuhrẹ okpokpọ nana nọ whọ be ta kpahe na? 20 Keme whọ be ta kpahe eware jọ nọ ma ri yo ẹdẹvo ho, yọ ma gwọlọ riẹ otọ eware nana.” 21 Evaọ uzẹme, ahwo Athẹns kpobi gbe ahwo erẹwho efa nọ e be rria* etẹe a rẹ rehọ oke eriosehọ rai ru oware ofa ha ajokpaọ iku nọ a re gbe kpahe oware okpokpọ jọ hayo gaviezọ kẹ oware okpokpọ jọ. 22 Pọl o te dikihẹ udevie Areopagọs+ na ọ tẹ ta nọ:

“Whai ahwo Athẹns, mẹ ruẹ nọ evaọ eware kpobi wha wo ozodhẹ eghẹnẹ na* vi amọfa.+ 23 Wọhọ oriruo, nọ mẹ jẹ nyavrẹ jẹ be romatotọ muẹrohọ eware nọ wha be rọ ọghọ ologbo kẹ,* mẹ tubẹ ruẹ agbada-idhe jọ nọ a kere fihọ nọ ‘Rọkẹ Ọghẹnẹ nọ A Riẹ Hẹ.’ Fikiere, ọnọ wha be gọ nọ wha riẹ hẹ na, ọye me bi whowho kẹ owhai na. 24 Ọghẹnẹ nọ ọ ma akpọ na gbe eware kpobi nọ e rrọ eva riẹ, ọye họ Olori odhiwu gbe otọakpọ na,+ fikiere ọ rẹ rria etẹmpol nọ a rọ abọ bọ họ;+ 25 yọ o du gwọlọ obufihọ ahwo-akpọ họ wọhọ ẹsenọ oware jọ o kare iẹe,+ keme ọye ọ be kẹ ahwo kpobi uzuazọ gbe ẹwẹ+ gbe eware kpobi. 26 Ọ ma ahwo erẹwho na kpobi no oma ọzae ọvo+ ze re a rria otọakpọ na soso,+ yọ o fi oke sa-sa họ gbe umuo oria nọ ahwo a rẹ rria,+ 27 re a ruẹse gwọlọ Ọghẹnẹ, otẹrọnọ a rẹ sae gwọlọ iẹe ziezi a rẹ ginẹ ruẹ e riẹ,+ rekọ, evaọ uzẹme o thabọ no omai omomọvo ho. 28 Keme ọye o ru nọ ma ro wo uzuazọ, be nya jẹ be rria, nwane wọhọ epanọ eketa obọrai jọ a ta inọ, ‘Keme mai yọ emọ* riẹ re.’

29 “Fikiere, nọ orọnọ mai yọ emọ Ọghẹnẹ+ na, u fo ho re ma roro nọ Ọghẹnẹ ọ wọhọ igoru hayo isiliva hayo utho, wọhọ oware nọ ọwena jọ o ru gbe oware nọ ahwo-akpọ a rehọ onaa rai ru.+ 30 Uzẹme, Ọghẹnẹ ọ kpairoro vrẹ oke ogbori yena no;+ rekọ enẹna ọ be ta kẹ ahwo kpobi evaọ oria kpobi nọ a kurẹriẹ. 31 Keme o fi ẹdẹ họ no nọ ọ jiroro nọ o ti ro bruoziẹ+ akpọ na soso evaọ ẹrẹreokie ẹkwoma ohwo nọ o ro mu no, yọ ọ kẹ ahwo kpobi imuẹro no ẹkwoma uwhu nọ ọ kpare riẹ no ze.”+

32 Whaọ nọ a yo ẹme ẹkparomatha enọ i whu no, ejọ i te mu ẹkoko họ ese,+ efa e tẹ ta nọ: “Ma te wariẹ yo mi owhẹ kpahe onana oke ofa.” 33 Fikiere Pọl ọ tẹ nyase ae ba, 34 rekọ ezae jọ a te kuomagbei a te zihe ruọ ilele.* Ejọ rai họ Diọnisiọs, ọnọ ọ jọ obruoziẹ evaọ okọto Areopagọs na, gbe aye jọ nọ a re se Damaris, gbe amọfa.

18 Nọ onana o vrẹ no, o te no Athẹns ziọ obọ Kọrint. 2 Ọ tẹ ruẹ ohwo Ju jọ nọ a re se Akwila,+ ọmotọ Pọntọs nọ avọ aye riẹ Prisila a no obọ Itali ze kẹle na, keme Klọdiọs o jie uzi nọ ahwo Ju kpobi a no Rom. Fikiere ọ tẹ nyabru rai, 3 yọ fikinọ oghẹrẹ iruo ọvona a je ru, ọ tẹ jẹ rria uwou rai, je lele ai ru iruo+ keme enọ i re ru iwou-udhu a jọ. 4 Ọ jẹ hae jọ isinagọgo* na kẹ ovuẹ*+ evaọ ẹdijala kpobi,+ yọ ọ jẹ ta ẹme ruọ ahwo Ju gbe ahwo Griki oma.

5 Whaọ nọ Saelas+ avọ Timoti+ a no obọ Masidonia ze no, Pọl ọ tẹ jẹ rehọ oke riẹ kpobi vuẹ ẹme na, bi se isẹri kẹ ahwo Ju ro dhesẹ nọ Jesu họ Kristi na.+ 6 Rekọ nọ a gbẹ be wọso ẹe jẹ be ta eme ẹsọ, o te nuhu iwu ehru riẹ+ jẹ ta kẹ ae nọ: “Jọ azẹ rai ọ jọ uzou obọrai.+ Abọ mẹ ọ fo.+ No umuo enẹna vrẹ mẹ te nyabru ahwo erẹwho na.”+ 7 Fikiere o te no etẹe* o te kpobọ uwou ọzae jọ nọ a re se Tishọs Jọstọs, ọnọ ọ be gọ Ọghẹnẹ, nọ uwou riẹ o kẹle isinagọgo* na. 8 Rekọ Krispọs,+ ọnọ o wuzou evaọ isinagọgo* na o te zihe ruọ olele* Olori na, te ahwo uwou riẹ kpobi. Ibuobu ahwo Kọrint nọ a yo ẹme na a te mu ẹrọwọ họ efihọ Olori na, a tẹ họ-ame. 9 Ofariẹ, evaọ aso, Olori na ọ tẹ ta kẹ Pọl evaọ eruẹaruẹ nọ: “Jọ ozọ u mu owhẹ hẹ, rekọ gbẹ hai whowho ẹme na, who fibo ho, 10 keme mẹ rrọ kugbe owhẹ+ yọ ohwo ọvo ọ te họre owhẹ jẹ nwa owhẹ oma ha; keme me wo ahwo buobu evaọ okpẹwho nana.” 11 Fikiere ọ tẹ jọ etẹe ẹgbukpe gbe emerae ezeza, bi wuhrẹ ae ẹme Ọghẹnẹ.

12 Nọ Gallio ọ jọ ọba ubrotọ* Akeya, ahwo Ju a te kuomagbe wọso Pọl a tẹ rehọ iẹe kpohọ oria akaba oziẹobro na, 13 be ta nọ: “Ọzae nana ọ be bẹbẹ ahwo họ re a gọ Ọghẹnẹ evaọ edhere nọ o wọso uzi na.” 14 Rekọ epanọ Pọl ọ be te rọ ta ẹme na, Gallio ọ tẹ ta kẹ ahwo Ju na nọ: “O hae jọ nọ fiki oruthọ jọ hayo uzioraha ulogbo jọ wha rọ nyaze, O ahwo Ju, mẹ hai wo ẹjiroro nọ mẹ rẹ rọ gaviezọ kẹ owhai avọ odiri. 15 Rekọ otẹrọnọ fiki ikẹ-isio kpahe ẹmeunu, edẹ ahwo, gbe uzi obọrai,+ whai ọvo wha nyai ku ẹme na họ. Mẹ gwọlọ jọ obruoziẹ eware nana ha.” 16 O te le ai vrẹ no akaba oziẹobro na. 17 Fikiere aikpobi a te kru Sostẹnes,+ ọnọ o wuzou evaọ isinagọgo* na a te mu ei họ ekpe evaọ aro akaba oziẹobro na. Rekọ Gallio o dhomahọ eware nana vievie he.

18 Rekọ, nọ Pọl ọ gbẹ rria etẹe edẹ buobu no, ọ tẹ ta kẹ inievo na nọ a jọ tou, ọ tẹ ruọ okọ re o kpohọ Siria, yọ Prisila avọ Akwila a jọ kugbei. Ọ jọ Sẹnkria+ bru eto riẹ kpẹre, keme ọ ya eyaa jọ. 19 A te ti te Ẹfisọs, ọ tẹ nyase ae ba etẹe; ọ tẹ ruọ eva isinagọgo* o te lele ahwo Ju jiroro.+ 20 Dede nọ a jẹ lẹe nọ ọ gbẹ jọ kugbe ai, ọ rọwo ho 21 rekọ ọ tẹ ta kẹ ae nọ a jọ tou jẹ ta nọ: “Mẹ te wariẹ zihe bru owhai ze o tẹ ruọ Jihova.”* Ọ tẹ jọ Ẹfisọs ruọ okọ fa abade vrẹ, 22 ọ tẹ ziọ obọ Sisaria. O te no etẹe nyavrẹ,* o te yere ukoko na, kẹsena o te kpobọ Antiọk.+

23 Nọ ọ jọ etẹe raha omoke jọ no, o te no etẹe, o te je no oria ruọ oria evaọ ubrotọ Galesha gbe Frijia,+ be bọ ilele na kpobi ga.+

24 Whaọ ohwo Ju jọ nọ a re se Apọlọs,+ ọmotọ Alẹkzandria, ọ ziọ Ẹfisọs; ọzae nọ ọ riẹ ẹme ẹta ziezi, ọ tẹ jẹ riẹ Ikereakere na ziezi. 25 A wuhrẹ* ọzae nana edhere Jihova* yọ fikinọ ẹzi na o fi ọwhọ họ iẹe oma ọ jẹ ta ẹme je wuhrẹ eware kpahe Jesu gbagba, rekọ ame-ọhọ Jọn ọvo ọ riẹ kpahe. 26 O te mu ẹme Ọghẹnẹ họ ẹta ududu evaọ isinagọgo* na, nọ Prisila avọ Akwila+ a yo eme riẹ, a tẹ rehọ iẹe fihọ usu rai a te ru idhere Ọghẹnẹ vẹ kẹe gbagba vi epanọ ọ riẹ vẹre. 27 Ofariẹ, fikinọ ọ gwọlọ kpobọ Akeya, inievo na a te kere se ilele nọ e rrọ obei, be tuduhọ ae awọ re a dede iei rehọ sasasa. Fikiere nọ o te obei, o fiobọhọ gaga kẹ enọ e rehọ fiki uwowou ulogbo Ọghẹnẹ zihe ruọ ilele no;* 28 keme ọ jọ evaọ ẹgbede jẹ rehọ ọwhọ ọgaga dhesẹ via vevẹ inọ ahwo Ju a wo otoriẹ othọthọ, yọ o bi dhesẹ kẹ ai no Ikereakere na ze inọ Jesu họ Kristi na.+

19 Whaọ evaọ etoke yena, nọ Apọlọs+ ọ jọ Kọrint, Pọl ọ tẹ nya orọ okpa ziọ Ẹfisọs.+ Ọ tẹ jọ etẹe ruẹ ilele jọ 2 ọ tẹ nọ ae nọ: “Kọ ẹzi ọfuafo o te owhai obọ okenọ wha ro zihe ruọ ilele Jesu?”*+ A tẹ kẹe uyo nọ: “Ma ri yo vievie he inọ ẹzi ọfuafo ọ riẹ.” 3 Fikiere ọ tẹ nọ ae nọ: “O tẹ rrọ ere, ame-ọhọ vẹ a rọ họ owhai?” A tẹ ta nọ: “Ame-ọhọ Jọn.”+ 4 Pọl ọ tẹ ta nọ: “Ame-ọhọ nọ Jọn ọ jẹ họ ahwo o jọ ame-ọhọ nọ o rrọ oka ekurẹriẹ,+ yọ ọ jẹ ta kẹ ahwo na inọ a fi ẹrọwọ họ ọnọ ọ rrọ emu riẹ nyaze,+ koyehọ, Jesu.” 5 Nọ a yo onana, a tẹ họ-ame evaọ odẹ Olori na Jesu. 6 Nọ Pọl ọ rehọ obọ kpahe ae, ẹzi ọfuafo o te te ai obọ,+ a te mu evẹrẹ erẹwho efa* họ ẹjẹ jẹ be ruẹaro.+ 7 Ahwo na kpobi a bu te oware wọhọ ezae ikpegbivẹ.

8 Evaọ emerae esa ọ jẹ hae ruọ isinagọgo*+ na jẹ ta ẹme ududu, yọ ọ jẹ hae kẹ evuẹ jẹ rehọ onaa ta ẹme daruọ ahwo oma kpahe Uvie Ọghẹnẹ.+ 9 Rekọ nọ ejọ e jẹ rọwo vievie he,* be ta eme iyoma kpahe Edhere Na+ evaọ iraro ogbotu na, o te siomano ai+ jẹ hẹriẹ ilele na no ai no, yọ ọ jẹ hae kẹ evuẹ kẹdẹ kẹdẹ evaọ ọgwa isukulu Tiranọs. 10 O ru onana ikpe ivẹ, u te ru nọ ahwo kpobi nọ a jẹ rria ubrotọ Esia a ro yo ẹme Olori na, te ahwo Ju gbe ahwo Griki.

11 Ọghẹnẹ o te gbe je ru iruo igbunu ilogbo ẹkwoma Pọl,+ 12 te epanọ a jẹ rọ rehọ emehọ gbe eprọno nọ i te rie oma ro se ahwo nọ a be mọ,+ eyao rai i te kpo, izi imuomu na i te no ae oma.+ 13 Rekọ ahwo Ju jọ nọ a je no oria ruọ oria bi le idhivẹri no ahwo oma a jẹ gwọlọ rọ odẹ Olori na Jesu ro le izi imuomu no re; a jẹ ta nọ: “Mẹ be rọ odẹ Jesu ọnọ Pọl o bi whowho na rọ whọku owhẹ.”+ 14 Whaọ emezae ihrẹ erọ olori izerẹ ahwo Ju nọ a re se Skiva a je ru onana. 15 Rekọ ẹzi omuomu na ọ tẹ ta kẹ ae nọ: “Mẹ riẹ Jesu+ mẹ tẹ jẹ riẹ Pọl;+ kọ whai yọ amono?” 16 Kẹsena ọzae nọ ẹzi omuomu na ọ rrọ oma na ọ tẹ họrọ mu ae, mu ae họ ekpe unọjọ utọjọ, ọ tẹ ga obọ vi ae, fikiere a tẹ dhẹ no uwou na ẹbẹba* avọ ela nọ e vọ rae oma. 17 Ahwo kpobi a tẹ te riẹ kpahe onana, te ahwo Ju gbe ahwo Griki nọ a jẹ rria Ẹfisọs; ozọ o tẹ ruọ aikpobi oma, a tẹ jẹ kẹ odẹ Olori na Jesu orro. 18 Yọ ibuobu nọ i zihe ruọ ilele* no a jẹ nyaze te feva eware nọ a ru. 19 Evaọ uzẹme, ibuobu nọ i je ru iruẹru emajiki a kwa ebe rai kokohọ a tẹ mahe ae evaọ iraro ahwo kpobi.+ Nọ a roro unuigho rai kpobi kugbe, i te ewẹ isiliva idu udhuvẹ-gbikpe (50,000). 20 Fikiere evaọ edhere ologbo, ẹme Jihova* o te je do ruọ eria kpobi jẹ be kparobọ.+

21 Nọ eware nana e vrẹ no, Pọl ọ tẹ gbaemu evaọ udu* riẹ inọ ọ tẹ nya Masidonia+ gbe Akeya re no, o ti kpobọ Jerusalẹm.+ Ọ ta nọ: “Me te te obei no, mẹ te siọ Rom ba ete he.”+ 22 Fikiere o te vi imava jọ nọ i je fiobọhọ kẹe kpobọ Masidonia, Timoti+ avọ Ẹrastọs,+ rekọ ọyomariẹ ọ tẹ gbẹ jọ ubrotọ Esia omoke jọ.

23 Evaọ oke yena, ukpokpoma ulogbo+ u te du lahwe rọsuọ Edhere Na.+ 24 Keme ọzae jọ nọ a re se Demitriọs, ọnọ ọ jọ odhogu-isiliva nọ ọ jẹ hae rọ isiliva ru imiwou* ẹdhọ Atẹmis, o je ru nọ ewena a je ro wo igho buobu.+ 25 O te koko ibe iruiruo riẹ gbe amọfa nọ i bi ru eware itieye na họ ọ tẹ ta nọ: “Ezae, wha riẹ vevẹ nọ okọ nana ma bi wo efe mai no ze. 26 Wha be ruẹ je bi yo epanọ Pọl nana ọ rọ tẹzẹ ahwo buobu họ nwene iroro rai no, yọ orọnọ evaọ Ẹfisọs+ ọvo ho rekọ evaọ enwenọ ubrotọ Esia soso, be ta nọ eghẹnẹ nọ a rọ abọ ma yọ eghẹnẹ vievie he.+ 27 Ofariẹ, ozọ nọ u bi mu omẹ orọnikọ okọ mai nọ a be te ta eme iyoma kpahe ọvo ho, rekọ inọ a ti gbe se etẹmpol ọghẹnẹ-aye ologbo na Atẹmis gboware ovo ho, yọ a gbẹ te kẹ ọghẹnẹ-aye nana nọ a be gọ evaọ ubrotọ Esia soso gbe evaọ otọakpọ na soso na orro nọ u fo rie he.” 28 Nọ a yo onana eva e tẹ dha ae thesiwa, a te muhọ ebo nọ: “Atẹmis ọrọ ahwo Ẹfisọs ọ rrọ ruaro!”

29 Okpẹwho na ọ tẹ jọ zighi zighi, aikpobi a tẹ họrọ ruọ afe-arozaha na ẹsiẹvo, yọ a bi si Geyọs avọ Aristakọs+ lele oma, ahwo Masidonia nọ i je lele Pọl evaọ erẹ riẹ. 30 Whaọ Pọl ọ jẹ gwọlọ nọ ọ rẹ ruọ eva bru ahwo na, rekọ ilele na a rọwo kẹe he. 31 Makọ ejọ evaọ usu enọ i wuzou ehaa gbe arozaha na, nọ e jọ egbẹnyusu riẹ a vi uwou sei be lẹe nọ ọ ruọ eva afe-arozaha na ha re ọ siọ uzuazọ riẹ ba efihọ ọza. 32 Ahwo na jọ a bi bo be ta oware jọ yọ efa a be ta ofa; keme ogbotu na ọ jọ zighi zighi, yọ ibuobu rai a riẹ ẹjiroro nọ a ro kokohọ họ. 33 Fikiere a te kru Alẹkzanda no udevie ogbotu na ze, ahwo Ju na a te gele iei kpobọ aro, Alẹkzanda o te veghe obọ ro dhesẹ nọ ọ gwọlọ gu ẹkẹ-unu riẹ kẹ ahwo na. 34 Rekọ nọ a vuhu iei nọ ohwo Ju ọ rrọ, aikpobi a tẹ be rọ urru ovo bo evaọ oware wọhọ euwa ivẹ inọ: “Atẹmis ọrọ ahwo Ẹfisọs ọ rrọ ruaro!”

35 Nọ okere-obe okpẹwho na o ru ogbotu na fibo no ọ tẹ ta nọ: “Ahwo Ẹfisọs, ohwo-akpọ vẹ ọ riẹ hẹ inọ okpẹwho Ẹfisọs họ ọnọ ọ be rẹrote etẹmpol Atẹmis gbe ẹmema nọ o kie no ehru ze na? 36 Nọ orọnọ a rẹ sae vro eware nana ha na, wha rọ udu kpotọ, wha du rọ okpakpa ru oware ovo ho. 37 Whaọ ezae nana nọ wha rọ ze na a tho ekwakwa etẹmpol hayo ta eme-aghọ kpahe ọghẹnẹ-aye mai na ha. 38 Fikiere otẹrọnọ Demitriọs+ avọ ewena nọ e rrọ kugbei a wo ẹme kugbe ohwo jọ, ma wo edẹ ekọto, ma te je wo eba ubrotọ;* jọ a nyaze te ta oware nọ ọjọ o ro ru ọjọ thọ. 39 Rekọ otẹrọnọ wha be gwọlọ oware ofa jọ nọ u vi onana, obọ ogbẹgwae nọ u re kokohọ ẹsikpobi na ọvo a rẹ jọ tae. 40 Keme a rẹ sae rọ fiki oware nọ o via nẹnẹ na ro si uzi mu omai inọ ma be kpareso egọmeti, nọ orọnọ ma rẹ sae ruẹ oware ovo ta inọ oye o wha ozighi nana ze he na.” 41 Nọ ọ ta eme nana no, ọ tẹ ta kẹ ogbotu na nọ a kpo.

20 Nọ ozighi na o serihọ no, Pọl ọ tẹ vuẹ se ilele na nọ a nyaze, nọ ọ tuduhọ ae awọ jẹ ta kẹ ae nọ a jọ tou no, ọ tẹ ruọ edhere bi kpohọ Masidonia. 2 Nọ ọ nya ibrotọ yena vrẹ jẹ ta eme buobu rọ tuduhọ ilele nọ e jọ obei awọ no, o te te Grisi. 3 Ọ jọ etẹe emerae esa, rekọ fikinọ ahwo Ju na a gba ẹgwae oyoma kpahe iẹe+ okenọ ọ jẹ gwọlọ nọ ọ rẹ ruọ okọ kpobọ Siria, ọ tẹ jiroro nọ ọ rẹ rehọ orọ Masidonia zihe. 4 Ahwo nọ a jọ kugbei họ Sopata ọmọzae Pirọs ọrọ obọ Bẹria gbe Aristakọs+ avọ Sekundos erọ obọ Tẹsalonika, Geyọs ọrọ obọ Dẹbi, Timoti+ gbe Tikikọs+ avọ Trọfimọs+ nọ i no ubrotọ Esia ze. 5 Ezae nana a tẹ kake nya a tẹ jẹ hẹrẹ omai evaọ Troas; 6 rekọ ma tẹ jọ Filipai ruọ okọ fa abade vrẹ nọ edẹ Ehaa Ebrẹdi nọ Ọ Kare Ẹvi+ na e gba no, yọ evaọ oware wọhọ edẹ isoi ma te te ae oma evaọ Troas, ma tẹ jọ etẹe edẹ ihrẹ.

7 Evaọ ẹdẹ ọsosuọ oka na,* nọ ma kokohọ re ma re emu, Pọl ọ tẹ jẹ ta ẹme Ọghẹnẹ kẹ ae keme o bi ti no etẹe evaọ okiokiọ riẹ; yọ ọ ta ẹme rite udevie aso. 8 Fikiere a rọ ikpẹ buobu tu ubruwou ehru nọ ma kokohọ na. 9 Whaọ ọmọzae jọ nọ a re se Yutikọs ọ keria unwido, o te kie ruọ owezẹ udidi nọ Pọl ọ gbẹ jẹ ta ẹme na, owezẹ na u te ru ei kie no edhe avọ esa uwou ehru na fihọ otọ, nọ a te etẹe a tẹ ruẹ nọ o whu no. 10 Rekọ Pọl o te kpobọ otọ, o te kie ruru iei jẹ gbae họ oma+ ọ tẹ ta nọ: “Wha gbe ru edo ho, ọ rrọ uzuazọ.”*+ 11 Ọ tẹ wariẹ gadiẹ kpobọ ehru, ọ tẹ rehọ emu na,* ọ tẹ re. Ọ ruabọhọ ẹmeọta riẹ oke krẹkri, bẹsenọ oke o rọ ke, kẹsena ọ tẹ ruọ edhere vrẹ. 12 A tẹ rehọ ọmọzae na vrẹ, yọ a ghọghọ gaga fikinọ ọ wariẹ ziọ uzuazọ no.

13 Ma tẹ karo kpobọ okọ ulogbo na ma te mu obọ Asọs họ ebi kpohọ, oria nọ Pọl ọ te jọ ruọ okọ na kugbe omai, wọhọ epanọ ọ ta kẹ omai, keme ọ gwọlọ nọ ọ rẹ nya owotọ kpohọ obei. 14 Nọ ọ nyabru omai ze evaọ Asọs, ọ tẹ ruọ okọ na kugbe omai ma te kpobọ Mitilini. 15 Nọ ma lehọ no etẹe okiokiọ riẹ, ma te te Kiọs, rekọ ẹdẹ nọ o lele i rie ma te bi kpahe Samọs jẹ raha omoke evaọ etẹe, okiokiọ riẹ ma te te Malitọs. 16 Pọl ọ jiroro nọ ọ rẹ ruọ otọ evaọ Ẹfisọs ho,+ re ọ gbẹ raha oke ovo evaọ ubrotọ Esia ha, keme o je ru ovẹrẹ re o te Jerusalẹm+ evaọ ẹdẹ Ehaa Pẹntikọst na otẹrọnọ o rẹ sae lọhọ.

17 Rekọ, ọ jọ Malitọs vi uwou kpobọ Ẹfisọs inọ ekpako ukoko na a nyaze. 18 Nọ a nyabru rie ze ọ tẹ ta kẹ ae nọ: “Wha riẹ epanọ me ru omamẹ evaọ udevie rai anwọ ẹdẹ ọsosuọ nọ mẹ rọ rehọ ithihi te ubrotọ Esia,+ 19 be rọ omaurokpotọ*+ kpobi gbodibo kẹ Olori na avọ irui-oviẹ gbe edawọ nọ i te omẹ fiki egwae iyoma nọ ahwo Ju a gba, 20 ghele na, mẹ siọ ẹme ọvuọvo nọ ọ rẹ kẹ erere* ba ẹta kẹ owhai hi, yọ mẹ siọ owhai ba ewuhrẹ hẹ evaọ ẹgbede+ je no uwou ruọ uwou.+ 21 Rekọ mẹ romatotọ se isẹri kẹ ahwo Ju gbe ahwo Griki inọ a kurẹriẹ+ bru Ọghẹnẹ ze je fi ẹrọwọ họ Olori mai Jesu.+ 22 Whaọ enẹna, o gba omẹ họ nọ me re kpohọ Jerusalẹm wọhọ epanọ ẹzi na ọ gwọlọ, dede nọ mẹ riẹ oware nọ o te jọ obei via kẹ omẹ hẹ, 23 ajokpaọ oware nọ ẹzi ọfuafo na o bi dhe omẹ ẹtẹta kẹ nọ me bi no okpẹwho ruọ okpẹwho na inọ uwou-odi gbe ikpokpoma e be hẹrẹ omẹ.+ 24 Rekọ me rri uzuazọ* mẹ wọhọ okpoware* ovo ho, thakpinọ mẹ dhẹ ohrẹ mẹ na te urere+ je ru iruo odibọgba nọ Olori na Jesu ọ kẹ omẹ na gba inọ me se isẹri ziezi kpahe usi uwoma orọ uwowou ulogbo Ọghẹnẹ.

25 “Whaọ enẹna, mẹ riẹ nọ ọvuọvo evaọ usu rai nọ mẹ ta usi uwoma Uvie na kẹ na ọ te gbẹ ruẹ ovao mẹ ofa ha. 26 Fikiere, mẹ gwọlọ nọ wha jọ isẹri mẹ nẹnẹ na inọ azẹ ohwo ọvo ọ rrọ omẹ uzou hu,+ 27 keme mẹ siọ ehrẹ* Ọghẹnẹ kpobi ba ẹta kẹ owhai hi.+ 28 Wha muẹrohọ* omarai+ gbe uthuru na soso, enọ ẹzi ọfuafo na ọ rehọ owhai mu esẹro+ evaọ udevie rai, re wha sẹro ukoko Ọghẹnẹ,+ onọ ọ rehọ azẹ Ọmọ obọriẹ dẹ.+ 29 Mẹ riẹ nọ mẹ te nyavrẹ no na, ijera egeva e te ruọ udevie rai+ yọ a ti tete uthuru na ha, 30 yọ evaọ udevie rai na ezae e te romavia a vẹ te ta eme eviẹhọ re a ruẹsi si ilele na lele oma.+

31 “Fikiere wha jaja aro vi, jẹ kareghẹhọ ẹsikpobi inọ ikpe esa soso,+ te aso te uvo, mẹ jẹ hrẹ owhai omomọvo avọ irui-oviẹ ẹsikpobi. 32 Whaọ enẹna, me bi mu owhai họ Ọghẹnẹ obọ gbe ẹme uwowou ulogbo riẹ, ẹme nọ ọ rẹ sae bọ owhai ga je ru owhai wo ukuoriọ na kugbe enọ a ru fo no na kpobi.+ 33 Me siuru isiliva hayo igoru hayo ewu ohwo ọvo ho.+ 34 Whai omarai wha riẹ nọ abọ mẹ nana me ro ru iruo rọ rẹrote ẹgwọlọ mẹ+ gbe ẹgwọlọ ahwo nọ a rrọ kugbe omẹ. 35 Me dhesẹ kẹ owhai evaọ eware kpobi inọ wha te bi ru iruo gaga epọvo na re,+ wha re fiobọhọ kẹ enọ e ga ha, wha ve je wo ẹme Olori na Jesu họ iroro, nọ ọyomariẹ ọ ta nọ: ‘Ẹkẹ evawere e mae rrọ+ vi emio.’”

36 Nọ ọ ta eme nana no, ọyomariẹ avọ ahwo na kpobi a te kigwẹ a tẹ lẹ. 37 Inievo na kpobi a te muhọ ẹviẹ gaga, a tẹ gbalọ* Pọl jẹ nabe viọlọ iẹe,* 38 keme ẹme nọ ọ ta na ọ da rai gaga inọ a te gbẹ ruẹ ovao riẹ ofa ha.+ Kẹsena a te su ei kpobọ okọ na.

21 Nọ ma rọ udugaga nyase ae ba je lehọ no, ma te bi okọ na lele ofou ovavo rite Kọs, evaọ okiokiọ riẹ ma te kpobọ Rods, je no etẹe kpohọ Patara. 2 Nọ ma ruẹ okọ ulogbo nọ o be fa vrẹ kpohọ Fonisia, ma tẹ ruọ eva riẹ u te bi vrẹ. 3 Nọ ma te oria nọ ma jọ kparo ruẹ ukoliko Saiprọs, ma tẹ rọ ofẹ ẹkpẹlobọ* bi vrẹ riẹ, ma te bi vrẹ kpohọ Siria ma tẹ kpahe Taya, oria nọ a te jọ wọ ewha no okọ na fihọ otọ. 4 Ma tẹ gwọlọ ilele na, nọ ma ruẹ e rai no ma tẹ jọ etẹe edẹ ihrẹ. Rekọ ẹkwoma ẹzi ọfuafo na, ilele na a ta kẹ Pọl unuẹse buobu inọ ọ rọ ithihi te Jerusalẹm ho.+ 5 Nọ oke ukpo mai u te no, ma tẹ wọ, ma tẹ ruabọhọ erẹ mai, rekọ aikpobi, te eyae te emaha na, a te su omai bẹsenọ ma rọ ruọ otafe okpẹwho na. Nọ ma kigwẹ evaọ unueri na ma tẹ lẹ 6 jẹ ta kẹ ohwohwo nọ wha jọ tou. Kẹsena ma tẹ ruọ eva okọ na, a te zihe kpobọ iwou rai.

7 Okọ na u te bi no Taya ma te te Tolẹmais, ma te yere inievo na jẹ jọ kugbe ai ẹdẹ ọvo. 8 Okiokiọ riẹ okọ na u te lehọ ma te te Sisaria, ma tẹ ruọ uwou Filip ọtausiuwoma na, ọnọ ọ jọ omọvo ezae ihrẹ nọ a salọ na,+ ma tẹ jọ kugbei. 9 Ọzae nana o wo emetẹ ene nọ i wo ezae he* enọ e jẹ ruẹaro.+ 10 Nọ ma rria etẹe edẹ buobu no, ọruẹaro jọ nọ a re se Agabọs+ o te no obọ Judia ze. 11 Ọ tẹ nyabru omai ze ọ tẹ rehọ umueku Pọl, ọ tẹ rehọ iẹe gba abọ gbe awọ obọriẹ, ọ tẹ ta nọ: “Enẹ ẹzi ọfuafo na ọ ta, ‘Enẹ ahwo Ju nọ e rrọ Jerusalẹm+ a te gba ọzae nọ o wo umueku nana, a vẹ rehọ iẹe kẹ ahwo erẹwho na.’”+ 12 Nọ ma yo eme nana, te omai te inievo nọ e rrọ ẹwho na ma te mu ei họ ẹlẹ inọ o kpohọ Jerusalẹm ho. 13 Pọl ọ tẹ ta nọ: “Kọ fikieme wha be rọ viẹ be gwọlọ fi oyẹlẹ họ omẹ oma* evaọ oware nọ mẹ gba mu no nọ me re ru? Jọ u mu owhai ẹro inọ orọnikọ mẹ ruẹrẹ oma kpahe re a rọ ifi gba omẹ ọvo ho rekọ re me je whu evaọ Jerusalẹm fiki odẹ Olori na Jesu.”+ 14 Nọ ma sae ta iroro riẹ nwene he, ma gbe si ẹme na viere he* ma tẹ ta nọ: “Jọ oreva Jihova* u rugba.”

15 Nọ edẹ nana e vrẹ no, ma tẹ ruẹrẹ oma họ kẹ erẹ na ma te mu obọ Jerusalẹm họ ekpohọ. 16 Ilele na jọ nọ i no Sisaria ze a lele omai re, a te su omai kpobọ uwou Mnason ohwo Saiprọs, ọnọ ọ rrọ omọvo ilele nọ e kaki kurẹriẹ, keme uwou riẹ ma be te kpahe. 17 Nọ ma te Jerusalẹm, inievo na a dede omai rehọ avọ evawere. 18 Rekọ okiokiọ riẹ te Pọl te omai ma tẹ nyabru Jemis,+ yọ ekpako na kpobi a jariẹ. 19 O te yere ai ọ tẹ rọ unu kotọ gbiku eware nọ Ọghẹnẹ o ru evaọ udevie erẹwho na ẹkwoma odibọgba riẹ.

20 Nọ a yo eme nana a te mu Ọghẹnẹ họ ejiri, rekọ a tẹ ta kẹe nọ: “Oniọvo, whọ riẹ nọ ahwo Ju idu buobu a zihe ruọ ilele Jesu* no, yọ a se Uzi na gboja gaga.+ 21 Rekọ a yo nọ ahwo a be ta kpahe owhẹ inọ who bi wuhrẹ ahwo Ju kpobi nọ a rrọ udevie erẹwho na inọ a gbabọkẹ uzi Mosis, inọ whọ be ta kẹ ae nọ a yawo emọ rai hi hayo nya lele iruemu mai nọ i no anwae ze he.+ 22 Kọ eme ma re ru kpahe onana? A te seba eyo ho inọ whọ nyaze no. 23 Fikiere ru onọ ma be te ta kẹ owhẹ na: Ma wo ezae ene jọ nọ a ya eyaa kẹ Ọghẹnẹ. 24 Rehọ ezae nana kugbe oma re whọ nyai voro oma ra gbe oma ezae na jẹ hwosa araha rai, re a nware eto uzou rai no. Ohwo kpobi ọ vẹ te riẹ nọ eme nọ a bi yo kpahe owhẹ na ọrue, gbe nọ who bi ru eware kpatiẹ, je bi koko Uzi na re.+ 25 Rọkẹ ilele* na nọ e rrọ ahwo erẹwho na, ma kere iroro nọ ma jẹ na se ai no inọ a siomano eware nọ a ro dhe idhe kẹ emedhọ,+ no azẹ,+ erao nọ a kpe nọ a bru uriohọ họ,+ gbe ọfariẹ-ogbe.”*+

26 Okiokiọ riẹ Pọl ọ tẹ rehọ ezae na kugbe oma o te voro oma riẹ gbe oma ezae na,+ a tẹ ruọ eva etẹmpol na re a fodẹ oke nọ edẹ omavoro na e te rọ gba a ve dhe idhe fiki rai omomọvo.

27 Whaọ nọ edẹ ihrẹ na e kẹle ekuhọ no, nọ ahwo Ju nọ a no obọ Esia ze a ruẹ e riẹ evaọ etẹmpol na, a te mu ozighi họ ẹwha fihọ ogbotu na soso, a te kru rie, 28 bi bo nọ: “Ahwo Izrẹl, wha dhẹ ze! Ọzae nana họ ọnọ ọ be jọ oria kpobi wuhrẹ ahwo kpobi re a wọso ahwo mai gbe Uzi mai gbe oria nana. Mai yoma dede na, ọ tubẹ wha ahwo Griki ziọ etẹmpol na je zue oria ọrẹri nana no.”+ 29 Keme a ruẹ Trọfimọs+ ohwo Ẹfisọs na kugbe Pọl evaọ okpẹwho na vẹre, a te roro nọ Pọl ọ rehọ e riẹ ruọ eva etẹmpol na. 30 Okpẹwho na soso ọ tẹ jọ zighi zighi, ahwo a tẹ be dhẹ ze kokohọ, a te kru Pọl a te si ei ruọ otafe etẹmpol na, a tẹ nwani si ethẹ na họ. 31 Epanọ a jẹ rọ gwọlọ kpei no na, usi na u te do te ọnọ o wuzou ẹko ogbaẹmo na oma inọ Jerusalẹm soso o duwuku no; 32 ọ tẹ nwane rehọ isoja gbe iletu egbaẹmo kugbe oma, a tẹ dhẹ bru rai. Nọ a ruẹ ọnọ o wuzou ogbaẹmo na avọ isoja na, a tẹ siọ Pọl ba ekpe.

33 Ọnọ o wuzou ogbaẹmo na ọ tẹ nyate ai oma, o te kru Pọl, ọ tẹ ta nọ a rọ egbregba ivẹ rọ kare iẹe;+ ọ tẹ nọ re ọ riẹ ohwo nọ ọ rrọ gbe oware nọ o ru. 34 Rekọ ejọ evaọ ogbotu na a be ta ojọ, yọ efa a be ta ofa. Fikinọ ọ be sai kru ẹme ọvo dhobọ họ fiki edo na, ọ tẹ ta kẹ isoja na nọ a rehọ Pọl kpohọ ogba isoja na. 35 Rekọ nọ o te oria nọ a rẹ rọ gadiẹ kpohọ ogba isoja na, isoja na a tẹ wọe fiki ozighi ogbotu na, 36 keme ogbotu ahwo na a je su lele ai, bi bo nọ: “Wha kpei no!”

37 Epanọ a je ti ro su ei ruọ evaọ ogba isoja na, Pọl ọ tẹ nọ ọnọ o wuzou ogbaẹmo na nọ: “Kọ whọ sae kẹ omẹ uvẹ re mẹ ta ẹme jọ kẹ owhẹ?” Ọ tẹ nọ Pọl nọ: “Whọ sae jẹ Griki? 38 Kọ ogbẹrọnọ whẹ họ ohwo Ijipti nọ ọ bẹbẹ ahwo họ kpareso egọmeti evaọ oke jọ nọ o vrẹ na, ọnọ o su igbulegbu idu ene (4,000) kpobọ udhude na?” 39 Pọl ọ tẹ ta nọ: “Evaọ uzẹme, mẹ yọ ohwo Ju,+ ọrọ Tasọs+ evaọ Silisia, okpẹwho nọ ahwo kpobi a riẹ. Fikiere mẹ lẹ owhẹ, kẹ omẹ uvẹ re mẹ ta ẹme kẹ ahwo na.” 40 Nọ ọ kẹe uvẹ no, yọ Pọl o dikihẹ oria nọ a rẹ rọ gadiẹ kpohọ ogba isoja na, o te veghe obọ rọ ta kẹ ahwo na nọ a fibo. Nọ a fọ rirẹ no, ọ tẹ be rọ ẹvẹrẹ Hibru+ ta ẹme kẹ ae, inọ:

22 “Whai ahwo, inievo gbe esẹ, jọ wha yo ẹkẹ-unu mẹ nọ me bi ti gu kẹ owhai na.”+ 2 Whaọ nọ a ruẹ nọ ẹvẹrẹ Hibru ọ be rọ ta ẹme kẹ ae, a tẹ fọ viere, ọ tẹ ta nọ: 3 “Mẹ yọ ohwo Ju,+ ọnọ a yẹ evaọ Tasọs ọrọ Silisia,+ rekọ evaọ okpẹwho nana Gamaliẹl+ ọ jọ wuhrẹ omẹ, a wuhrẹ omẹ epanọ mẹ rẹ rọ romatotọ koko Uzi nọ esẹ mai a koko,+ me te je wo ajọwha evaọ egagọ Ọghẹnẹ wọhọ epanọ whai kpobi wha wo nẹnẹ na.+ 4 Me kpokpo enọ e rrọ Edhere nana je ru nọ a ro kpe ai, me je mu* te ezae te eyae fihọ uwou-odi,+ 5 wọhọ epanọ ozerẹ okpehru na gbe ekpako na kpobi a rẹ sai se isẹri. Mẹ rehọ ileta mi ai re, nọ me re ro se inievo mai nọ e rrọ obọ Damaskọs, mẹ tẹ ruọ edhere re mẹ nyai mu enọ e rrọ obei ziọ Jerusalẹm re a kẹ ae uye.

6 “Rekọ epanọ mẹ rọ jọ edhere be kẹle Damaskọs no na, evaọ oware wọhọ ọre-tuzou, idudhe na elo ọgaga jọ o te lo no ehru ze wariẹ omẹ họ,+ 7 me te kie fihọ otọ, me te yo urru jọ nọ o ta kẹ omẹ nọ: ‘Sọl, Sọl, fikieme who bi ro kpokpo omẹ?’ 8 Mẹ tẹ nọ inọ: ‘Whẹ yọ ono, Olori?’ Ọ tẹ ta kẹ omẹ nọ: ‘Mẹ yọ Jesu, ohwo Nazarẹt na, ọnọ who bi kpokpo na.’ 9 Whaọ, ezae nọ e jọ kugbe omẹ a ruẹ elo na rekọ a yo urru ohwo nọ ọ jẹ ta ẹme kẹ omẹ na ha. 10 Mẹ tẹ nọ inọ: ‘Eme me re ru, Olori?’ Olori na ọ tẹ ta kẹ omẹ nọ: ‘Kpama, re whọ ruọ Damaskọs, a te jọ etẹe vuẹ owhẹ eware kpobi nọ a ruẹrẹ fihọ kẹ owhẹ no nọ who ti ru.’+ 11 Rekọ fikinọ mẹ jẹ ruẹ ude he fiki epanọ elo na ọ ga te, enọ e jọ kugbe omẹ a te kru omẹ obọ, a te su omẹ ruọ eva Damaskọs.

12 “Kẹsena ọzae nọ a re se Ananayas, ọnọ o se egagọ gboja, nọ o bi koko Uzi na, ọnọ ahwo Ju kpobi nọ a be rria etẹe a be ta emamọ ẹme riẹ, 13 ọ tẹ nyabru omẹ ze. O te dikihẹ gba omẹ jẹ ta kẹ omẹ nọ: ‘Sọl, oniọvo, wariẹ ruẹ ude!’ Mẹ tẹ nwane kpare ovao, mẹ tẹ ruẹ e riẹ.+ 14 Ọ tẹ ta nọ: ‘Ọghẹnẹ esẹ-esẹ mai ọ salọ owhẹ no re whọ te riẹ oreva riẹ re whọ jẹ ruẹ ọnọ o kiẹrẹe na+ je yo urru riẹ, 15 keme who ti se isẹri kpahe iẹe rọkẹ ahwo kpobi kpahe eware nọ whọ ruẹ je yo no na.+ 16 Kọ fikieme whọ be rọ raha oke? Kpama, re whọ họ-ame, a te rọ izieraha+ ra rọvrẹ owhẹ* ẹkwoma odẹ riẹ nọ who re se.’+

17 “Rekọ nọ me zihe ziọ Jerusalẹm+ no nọ mẹ jẹ lẹ evaọ etẹmpol na, mẹ tẹ ruẹ eruẹaruẹ, 18 mẹ tẹ ruẹ e riẹ nọ ọ be ta kẹ omẹ nọ: ‘Ovẹrẹ, dhẹ no Jerusalẹm kpata kpata, keme a te rọwo isẹri nọ who bi se kpahe omẹ na ha.’+ 19 Mẹ tẹ ta nọ: ‘Olori, ae omarai a riẹ nọ me je no isinagọgo* ruọ isinagọgo jẹ hai mu enọ e rọwo owhẹ fihọ uwou-odi jẹ fa ae;+ 20 yọ okenọ a je kpe Stivin osẹri ra, mẹ jọ etẹe yọ mẹ rọwo fihọ ekpe riẹ je rou* iwu enọ i je kpei na.’+ 21 Ghele na ọ tẹ ta kẹ omẹ nọ: ‘Nya, keme me ti vi owhẹ kpohọ erẹwho nọ e rrọ ugbothabọ.’”+

22 Whaọ a jẹ gaviezọ kẹe rite ẹme nana. Kẹsena a tẹ kpare irru rai, bi bo nọ: “Wha kpe ohwo otiọnana no, keme o fo ohwo nọ ọ rẹ jọ uzuazọ họ!” 23 Fikinọ a je bo, bi gbolo iwu ehru rai kpenẹ avọ enẹ, jẹ be whẹ ovu kpehru,+ 24 ọnọ o wuzou ogbaẹmo na ọ tẹ ta nọ a rehọ Pọl ruọ eva ogba isoja na re a fae jẹ nọe enọ, re a sae riẹ ugogo oware nọ Pọl o ru nọ a bi ro bo na. 25 Rekọ nọ a rriẹ Pọl fihọ otọ no re a fae, ọ tẹ ta kẹ oletu ogbaẹmo nọ o dikihẹ etẹe nọ: “Kọ u fo re wha fa ohwo Rom* nọ a ri bruoziẹ kpe he?”*+ 26 Whaọ nọ oletu ogbaẹmo na o yo onana, ọ tẹ nyabru ọnọ o wuzou ogbaẹmo na ọ tẹ ta kẹe nọ: “Kọ eme who bi ti ru na? Keme ọzae nana yọ ohwo Rom.” 27 Fikiere ọnọ o wuzou ogbaẹmo na ọ tẹ nyabru rie ọ tẹ ta kẹe nọ: “Ta kẹ omẹ, whẹ yọ ohwo Rom?” Ọ tẹ kẹ uyo nọ: “Ee.” 28 Ọnọ o wuzou ogbaẹmo na ọ tẹ ta nọ: “Igho buobu mẹ rọ dẹ udu nọ mẹ rọ rrọ ọmotọ Rom na.” Pọl ọ tẹ ta nọ: “Rekọ a yẹ omẹ ọmotọ Rom.”+

29 Fikiere, ezae nọ i je ti gboja kẹe jẹ nọe enọ na a tẹ nwani zihe oma; ozọ u te mu ọnọ o wuzou ogbaẹmo na nọ ọ riẹ nọ ohwo Rom ọ rrọ, gbe nọ ọ rehọ egbregba kare iẹe.+

30 Fikiere evaọ ẹdẹ nọ o lele i rie, fikinọ ọ jẹ gwọlọ riẹ ugogo oware nọ o soriẹ nọ ahwo Ju na a je ro gu eware fihọ iẹe uzou, ọ tẹ ta nọ a si egbregba noi, o te se ilori izerẹ na gbe ogbẹgwae Sanhẹdrin na soso kokohọ. Kẹsena ọ tẹ rehọ Pọl ze ro dikihẹ udevie rai.+

23 Nọ Pọl ọ nabi rri ogbẹgwae Sanhẹdrin na ziezi, ọ tẹ ta nọ: “Whai ahwo, inievo, avọ obruoziẹ-iroro ọfuafo+ me bi ro yeri evaọ aro Ọghẹnẹ rite inẹnẹ na.” 2 Ananayas ozerẹ okpehru na ọ tẹ ta kẹ ahwo nọ a dikihẹ kẹle Pọl nọ a tehe enu riẹ. 3 Kẹsena Pọl ọ tẹ ta kẹe nọ: “Ọghẹnẹ ọ te tehe owhẹ, whẹ ọviẹwẹ na.* Kọ whọ keria re whọ rọ Uzi na gu omẹ ẹdhọ yọ whẹ omara whọ be raha Uzi na be ta nọ a tehe omẹ?” 4 Enọ i dikihẹ etẹe a tẹ ta kẹe nọ: “Kọ whọ be la ozerẹ okpehru Ọghẹnẹ eka?” 5 Pọl ọ tẹ ta nọ: “Inievo, mẹ riẹ nọ ozerẹ okpehru ọ rrọ họ. Keme a kere nọ, ‘Whọ rẹ ta ẹme oyoma kpahe osu ahwo ra vievie he.’”+

6 Whaọ nọ Pọl o muẹrohọ nọ abọjọ ogbotu na yọ otu Sadusi abọdekọ kọ otu Farisi, o te bo evaọ ogbẹgwae Sanhẹdrin na nọ: “Whai ahwo, inievo, mẹ yọ ohwo Farisi,+ ọmọ ahwo Farisi. Fiki ẹruore ẹkparomatha enọ i whu no na a be rọ rehọ omẹ gu ẹdhọ na.” 7 Fiki onana nọ ọ ta na, ikẹ-isio egaga e tẹ ruọ udevie otu Farisi gbe otu Sadusi na, ohẹriẹ o tẹ ruọ udevie ahwo nọ a kokohọ na. 8 Keme otu Sadusi a ta nọ ẹkparomatha hayo ikọ-odhiwu hayo emama ẹzi e rrọ họ, rekọ otu Farisi a rọwo* enana kpobi.+ 9 Fikiere edo ọ tẹ vọ oria kpobi, ikere-obe jọ nọ e rrọ otu Farisi na a tẹ kpama a tẹ be ta avọ edo nọ: “Ma jọ oma ọzae nana ruẹ oruthọ ọvuọvo ho, rekọ otẹrọnọ omama ẹzi jọ hayo ukọ-odhiwu jọ ọ ta ẹme kẹe+—.” 10 Nọ ikẹ-isio na e te ga raha no, ozọ u te je mu ọnọ o wuzou ogbaẹmo na inọ a be te sawo Pọl ekekẹ no, ọ tẹ ta kẹ isoja na nọ a nyai si ei no udevie rai ze re a rehọ iẹe ziọ ogba isoja na.

11 Rekọ aso ẹdẹ yena, Olori na o te dikihẹ kẹle iẹe, ọ tẹ ta nọ: “Kru udu ga!+ Keme wọhọ epanọ who bi se isẹri kpahe omẹ ziezi evaọ Jerusalẹm na, ere who ti se isẹri re evaọ Rom.”+

12 Nọ oke o ke no, ahwo Ju na a tẹ lẹlẹ gba ẹgwae je duwu omarai iyei nọ a rẹ re emu hayo da oware ovo ho bẹsenọ a re kpe Pọl no. 13 Enọ e gba ẹgwae nana nọ i duwu omarai iyei na a bu vi ezae udhuvẹ. 14 Ezae nana a tẹ nyabru ilori izerẹ na gbe ekpako na a tẹ ta nọ: “Ma duwu omamai iyei* nọ ma rẹ re oware ovo vievie he bẹsenọ ma re kpe Pọl no. 15 Fikiere jọ owhai avọ ogbẹgwae Sanhẹdrin na wha vuẹ ọnọ o wuzou ogbaẹmo na nọ ọ rehọ iẹe se owhai wọhọ ẹsenọ wha gwọlọ kiẹ otọ ẹme riẹ na ziezi. Rekọ taure o te ti te obonẹ, yọ ma ruẹrẹ oma kpahe no re ma kpei no.”

16 Rekọ ọmọ oniọvo-ọmọtẹ Pọl o te yo kpahe omaa nọ a ti ro dhere hẹrẹ Pọl re a kpei na, o te kpobọ ogba isoja na, ọ tẹ vuẹ Pọl. 17 Pọl o te se omọvo iletu egbaẹmo na ọ tẹ ta kẹe nọ: “Rehọ ọmọzae nana se ọnọ o wuzou ogbaẹmo na, keme o wo ẹme jọ nọ ọ gwọlọ ta kẹe.” 18 Fikiere ọ tẹ rehọ iẹe nyabru ọnọ o wuzou ogbaẹmo na jẹ ta nọ: “Pọl nọ ọ rrọ uwou-odi na o se omẹ ọ tẹ ta kẹ omẹ nọ mẹ rehọ ọmọzae nana bru owhẹ ze, keme o wo ẹme jọ nọ ọ gwọlọ ta kẹ owhẹ.” 19 Ọnọ o wuzou ogbaẹmo na o te kru rie obọ a te kpohọ oria nọ ohwo ọ rrọ họ, ọ tẹ nọe nọ: “Eme whọ gwọlọ ta kẹ omẹ?” 20 Ọ tẹ ta nọ: “Ahwo Ju na a ta mu no inọ a te ta kẹ owhẹ re whọ rehọ Pọl ziọ obọ ogbẹgwae Sanhẹdrin na odẹnotha wọhọ ẹsenọ a gwọlọ kiẹ otọ ẹme riẹ na ziezi.+ 21 Rekọ who du rọwo kẹ ae he, keme ezae nọ i bu vi udhuvẹ evaọ usu rai a bi ti dhere hẹrẹ iẹe, yọ a duwu omarai iyei* nọ a rẹ re emu hayo da ha bẹsenọ a re kpei no;+ a ruẹrẹ oma kpahe no be hẹrẹ epanọ whọ te rọ rọwo fihọ ayare rai na.” 22 Fikiere ọnọ o wuzou ogbaẹmo na o te siobọno ọmọzae na vrẹ nọ ọ ta kẹe no inọ: “Whọ ta kẹ ohwo ọvo ho inọ whọ ta ẹme nana kẹ omẹ.”

23 O te se iletu egbaẹmo ivẹ jọ ọ tẹ ta kẹ ae nọ: “Wha ruẹrẹ isoja egba ivẹ (200) họ, gbe edhẹ-enyenya udhosa-gbikpe avọ ezae egba ivẹ (200) nọ e rẹ wha izuẹ, re a ruọ edhere kpobọ Sisaria evaọ auwa avọ esa aso na.* 24 Wha vẹ jẹ ruẹrẹ enyenya họ kẹ Pọl nọ e rẹ wọe se Fẹliks ọba na gbẹsinẹdẹ.” 25 O te kere eme nana fihọ ileta inọ:

26 “Klọdiọs Lisias ro se Ọnoworro na, Fẹliks Ọba na: Me yere owhẹ! 27 Ahwo Ju a mu ọzae nana, yọ a je ti kpei no, rekọ mẹ tẹ dhẹ nya vẹrẹ vẹrẹ avọ isoja ro siwi ei no abọ rai,+ keme me yo nọ ohwo Rom ọ rrọ.+ 28 Yọ fikinọ mẹ gwọlọ riẹ oware nọ a be ta nọ o ru thọ, mẹ tẹ rehọ iẹe kpohọ ogbẹgwae Sanhẹdrin rai.+ 29 Mẹ tẹ ruẹ nọ eware jọ kpahe Uzi rai a be ta nọ o ru,+ rekọ a gu oware ovo nọ o ro fo uwhu hayo uwou-odi hi. 30 Rekọ fikinọ a vuẹ omẹ nọ ahwo jọ a gba ẹgwae oyoma kpahe iẹe,+ me bi vi ei se owhẹ obọnana, yọ mẹ te ta kẹ enọ i bi gu eware fihọ iẹe uzou na re a te jọ aro ra ta oware nọ o ru.”

31 Fikiere isoja nana a tẹ rehọ Pọl+ wọhọ epanọ a ta kẹ ae na a tẹ rehọ iẹe kpohọ Antipatris evaọ aso. 32 Okiokiọ riẹ, a tẹ kẹ uvẹ re edhẹ-enyenya na avọ iẹe a ruabọhọ erẹ na, rekọ ae omarai a te zihe kpobọ ogba isoja na. 33 Edhẹ-enyenya na a tẹ ruọ Sisaria a tẹ rehọ ileta na kẹ ọba na jẹ rehọ Pọl kẹe. 34 O te se ileta na jẹ nọe ubrotọ nọ o no ze, ọ tẹ vuẹe nọ ubrotọ Silisia.+ 35 Ọ tẹ ta nọ: “Mẹ te romatotọ gaviezọ kẹ ẹdhọ ra nọ enọ i bi gu eware fihọ owhẹ uzou na a tẹ nyaze no.”+ Ọ tẹ ta nọ isoja a rou rie* evaọ ighẹ* Herọd ovie na.

24 Nọ edẹ isoi e ruọ emu no, Ananayas ozerẹ okpehru na+ gbe ekpako na jọ gbe ọtota* jọ nọ a re se Tẹtulọs a tẹ nyaze ti gu ẹdhọ nọ a wo kugbe Pọl kẹ ọba na.+ 2 Nọ a se Tẹtulọs nọ ọ ta ẹme, o te mu eme họ egu fihọ Pọl uzou. Ọ ta nọ:

“Ma wo udhedhẹ ulogbo evaọ otọ esuo ra, yọ fiki areghẹ nọ who bi ro ru eware, emamọ eware e be romavia evaọ orẹwho nana, 3 ma be jọ oria kpobi ruẹ onana ẹsikpobi je bi yere owhẹ ziezi, O Ọnoworro na, Fẹliks. 4 Rekọ re mẹ siọ oke ra ba ẹraha viere, mẹ be lẹ owhẹ nọ who thihakọ gaviezọ kẹ omai omojọ. 5 Keme ma ruẹ nọ ọzae nana yọ amara-ọraha,*+ nọ ọ be bẹbẹ ahwo Ju kpobi họ evaọ otọakpọ na soso re a kpareso egọmeti,+ ọ tẹ jẹ rrọ ọnọ ọ be kobaro kẹ utu ahwo Nazarẹt na.+ 6 Yọ ọ jẹ gwọlọ zue etẹmpol na re, fikiere ma te mu ei.+ 7 *—— 8 Nọ whẹ ọvo whọ tẹ kiẹe riwi, who ti vuhu eware nana kpobi nọ ma be ta kpahe iẹe na mu.”

9 Kẹsena ahwo Ju na a te ku unu rai gbei be ta nọ eware nana ginọ uzẹme. 10 Nọ ọba na o fi uzou kẹ Pọl nọ ọ ta ẹme, Pọl ọ tẹ ta nọ:

“Fikinọ mẹ riẹ nọ whọ rrọ obruoziẹ kẹ orẹwho nana ikpe buobu no, o were omẹ re me gu ẹkẹ-unu mẹ.+ 11 Whọ tẹ nọ whọ te ruẹ nọ, o re vrẹ edẹ ikpegbivẹ hẹ nọ me ro kpobọ Jerusalẹm nyae gọ;+ 12 yọ a ruẹ omẹ evaọ etẹmpol na nọ me je lele ohwo ọvo vro avro hayo jẹ bẹbẹ ahwo họ ru ozighi hi, te eva isinagọgo* na hayo okpẹwho na soso. 13 Yọ a rẹ sae ruẹ uvumọ imuẹro kẹ owhẹ kpahe eware nọ a bi gu fihọ omẹ uzou obọnana ha. 14 Rekọ mẹ rọwo onana inọ edhere nana nọ a bi se utu na, oye họ edhere nọ mẹ be rọ gọ* Ọghẹnẹ esẹ-esẹ mẹ,+ yọ mẹ rọwo eware kpobi nọ a kere fihọ Uzi na gbe ebe Eruẹaro na.+ 15 Yọ me wo ẹruore kpahe Ọghẹnẹ, ẹruore nọ ezae nana a wo re, inọ ẹkparomatha+ enọ i kiẹrẹe gbe enọ i kiẹrẹe he+ ọ te jọ. 16 Fiki onana, mẹ be daoma ẹsikpobi re mẹ yọrọ obruoziẹ-iroro ọfuafo* evaọ aro Ọghẹnẹ gbe ahwo.+ 17 Nọ ikpe buobu e vrẹ no, mẹ tẹ nyaze re mẹ rọ ekẹ ohrọ se orẹwho mẹ,+ re me je dhe idhe. 18 Nọ me je ru eware nana, a ruẹ omẹ evaọ etẹmpol na inọ me voro oma wọhọ epanọ uzi na o ta,+ rekọ a ruẹ omẹ avọ ogbotu hu yọ me je ru ozighi hi. Rekọ ahwo Ju jọ a jariẹ nọ a no ubrotọ Esia ze, 19 enọ u fo nọ e hae jọ etenẹ re a jọ aro ra ta eware nọ me ru thọ, otẹrọnọ a sae ginẹ ruẹ oware jọ gu kpahe omẹ.+ 20 Hayo jọ ezae nọ e rrọ etenẹ na a ta oruthọ nọ a ruẹ evaọ omamẹ okenọ me dikihẹ aro ogbẹgwae Sanhẹdrin na, 21 ajokpaọ fiki oware ovo nana nọ mẹ ta evaọ okenọ me dikihẹ udevie rai inọ: ‘Fiki ẹruore ẹkparomatha enọ i whu no na a be rọ rehọ omẹ gu ẹdhọ evaọ aro rai na!’”+

22 Rekọ fikinọ Fẹliks ọ riẹ uzẹme na ziezi kpahe Edhere na,+ ọ tẹ va ẹdhọ rai na jẹ ta nọ: “Oke kpobi nọ Lisias ọnọ o wuzou ogbaẹmo na ọ nyaze, me ti bruoziẹ ẹme rai na.” 23 Ọ tẹ ta kẹ oletu ogbaẹmo na nọ a fi Pọl họ uwou-odi, rekọ a kẹe umutho ufuoma jọ, gbe nọ a rẹ kẹ ahwo riẹ uvẹ re a nyaze te rẹrotei.

24 Nọ edẹ jọ e vrẹ no, Fẹliks ọ tẹ nyaze avọ Drusila aye riẹ, ọnọ ọ rrọ ohwo Ju, o te vi ahwo nyai se Pọl jẹ gaviezọ kẹe nọ ọ jẹ ta kpahe ẹrọwọ nọ a re fihọ Kristi Jesu.+ 25 Rekọ nọ Pọl ọ jẹ ta kpahe ẹrẹreokie, oma-onyẹ, gbe ẹdhoguo nọ ọ be tha na,+ ozọ u te mu Fẹliks, ọ tẹ ta nọ: “Nyavrẹ tao, rekọ nọ me te wo uvẹ mẹ te wariẹ vi ahwo ze ti se owhẹ.” 26 Rekọ evaọ oke ovona o je rẹro nọ Pọl ọ te kẹe ugho. Fiki oyena, o je vi ahwo nyai sei unuẹse buobu o ve lele iei ta ẹme. 27 Rekọ nọ ikpe ivẹ e vrẹ no, Pọsiọs Fẹstọs ọ tẹ rehọ ẹta Fẹliks; yọ fikinọ Fẹliks ọ gwọlọ nọ eva riẹ e were ahwo Ju,+ ọ tẹ nyasiọ Pọl ba uwou-odi.

25 Fikiere nọ Fẹstọs+ ọ ziọ ubrotọ na je muhọ esu no, nọ edẹ esa e jẹ vrẹ no o te no Sisaria kpobọ Jerusalẹm. 2 Ilori izerẹ na avọ ezae nọ e viodẹ erọ ahwo Ju a te gu eme kẹe kpahe Pọl.+ Fikiere a te mu Fẹstọs họ ẹlẹ 3 inọ o ru oware jọ kẹ ae,* inọ o vi uwou nya re a rehọ Pọl ziọ Jerusalẹm. Rekọ a wo omaa inọ a ti dhere hẹrẹ Pọl re a kpei no evaọ edhere.+ 4 Rekọ Fẹstọs ọ tẹ ta nọ obọ Sisaria oye Pọl ọ rẹ gbẹ jọ, gbe nọ ọyomariẹ o bi ti zihe kpohọ obei kẹle. 5 Ọ ta nọ: “Jọ enọ e rrọ isu evaọ udevie rai a lele omẹ nya re a ta eware nọ o ru otẹrọnọ ọzae na o gine ru oware jọ thọ.”+

6 Fikiere nọ ọ raha oware wọhọ edẹ eree hayo ikpe kugbe ai no, o te zihe kpobọ Sisaria, okiokiọ riẹ ọ tẹ keria akaba oziẹobro na jẹ ta nọ a rehọ Pọl ze. 7 Nọ ọ ruọ eva, ahwo Ju nọ a no obọ Jerusalẹm ze a te dikihẹ wariẹe họ, be ta eware iyoma buobu kpahe iẹe, enọ a be sae kẹ imuẹro ọvo kpahe he.+

8 Rekọ Pọl o te gu ẹkẹ-unu riẹ nọ: “Mẹ thọ uzi ọvo mukpahe Uzi ahwo Ju hayo etẹmpol na hayo Siza ha.”+ 9 Fikinọ Fẹstọs ọ gwọlọ ru re eva riẹ e were ahwo Ju na,+ ọ tẹ kpahe kẹ Pọl nọ: “Kọ whọ gwọlọ nọ who re kpobọ Jerusalẹm re a jọ aro mẹ gu owhẹ ẹdhọ evaọ obei kpahe eware nana?” 10 Rekọ Pọl ọ tẹ ta nọ: “Aro akaba oziẹobro Siza me dikihẹ na, oria nọ u fo nọ a rẹ jọ gu omẹ ẹdhọ. Me ru ahwo Ju na oware ovo thọ họ, wọhọ epanọ whẹ omara whọ be ruẹ vevẹ na. 11 O tẹ ginẹ rọnọ me ru thọ yọ me ru oware nọ me ro fo uwhu,+ orọnikọ mẹ be lẹ nọ a siọ omẹ ba ekpe he; rekọ otẹrọnọ eku gheghe ezae nana a be gba fihọ omẹ uzou na, ohwo ọvo ọ rẹ sae rehọ omẹ kẹ ae re ọ ruẹsi ru ai eva were he. Mẹ kpare ẹdhọ mẹ bru Siza!”+ 12 Kẹsena nọ Fẹstọs o lele ogbẹgwae ekiroro riẹ ta ẹme no, ọ tẹ ta nọ: “Siza whọ kpare ẹdhọ ra bru; yọ obọ Siza whọ te nya.”

13 Nọ edẹ jọ e vrẹ no, Agripa ovie na avọ Benaisi a tẹ ziọ Sisaria ti yere Fẹstọs. 14 Nọ orọnọ a te jọ etẹe edẹ jọ na, Fẹstọs o te fi ẹme Pọl họ otọ kẹ ovie na, inọ:

“Ọzae jọ ọ riẹ nọ Fẹliks ọ nyaseba uwou-odi, 15 yọ okenọ me kpobọ Jerusalẹm, ilori izerẹ na gbe ekpako ahwo Ju a ta eme jọ kpahe iẹe kẹ omẹ,+ be ta nọ me bruoziẹ uwhu kpei. 16 Rekọ mẹ tẹ ta kẹ ae nọ o rrọ uruemu ahwo Rom hu re a siobọno ohwo kẹ ahwo jọ ro ru ae eva were, ababọ uvẹ nọ a rẹ kẹ ohwo na gu ẹkẹ-unu riẹ evaọ iraro enọ e ta nọ o ru thọ na.+ 17 Fikiere nọ a nyaze, mẹ raha oke he, rekọ okiokiọ riẹ mẹ tẹ keria akaba oziẹobro na jẹ ta nọ a rehọ ọzae na ze. 18 Nọ ahwo nọ a gu eware fihọ iẹe uzou na a kpama muhọ egu, a ta eware iyoma evuevo nọ me je rẹro rai kpahe iẹe he.+ 19 Avro gheghe a wo kugbei kpahe egagọ*+ rai gbe ọzae jọ nọ a re se Jesu ọnọ o whu rekọ nọ Pọl ọ be suobọhọ ta nọ ọ rrọ uzuazọ.+ 20 Fikinọ mẹ riẹ onọ me re ru evaọ ẹme na ha, mẹ tẹ nọe sọ o te were iẹe re o kpobọ Jerusalẹm re a jọ obei rehọ iẹe gu ẹdhọ.+ 21 Rekọ nọ Pọl ọ yare nọ a nyase iẹe ba uwou-odi re ọ hẹrẹ oziẹ Ọgọstọs na,*+ mẹ tẹ ta nọ ọ gbẹ jọ uwou-odi bẹsenọ me re vi ei bru Siza.”

22 Kẹsena Agripa ọ tẹ ta kẹ Fẹstọs nọ: “Mẹ gwọlọ nọ ọzae na o re gu ẹkẹ-unu riẹ kẹ omẹ.”+ Ọ tẹ ta nọ: “Odẹnotha, who ti yo ẹkẹ-unu riẹ.” 23 Fikiere evaọ okiokiọ riẹ, Agripa avọ Benaisi a tẹ nyaze avọ oma-udhesẹ ulogbo a tẹ ruọ eva ọgwa ẹdhoguo na, yọ enọ i wuzou egbaẹmo gbe ikpahwo okpẹwho na a jọ kugbe ae, nọ Fẹstọs ọ kẹ udu no, a tẹ rehọ Pọl ze. 24 Fẹstọs ọ tẹ ta nọ: “Agripa Ovie gbe owhai kpobi nọ a rrọ etenẹ kugbe omai, wha be ruẹ ọzae nana, ọnọ ahwo Ju soso a yare omẹ kpahe evaọ obọ Jerusalẹm gbe evaọ etenẹ, je bo nọ o fo ohwo nọ ọ rẹ gbẹ jọ uzuazọ họ.+ 25 Rekọ me muẹrohọ nọ o ru oware ọvo thọ nọ o ro fo uwhu hu.+ Fikiere nọ ọzae nana ọ kpare ẹdhọ riẹ bru Ọgọstọs, mẹ tẹ jiroro nọ me re vi ei nya. 26 Rekọ me wo ugogo oware ọvo nọ me re kere kpahe iẹe se Olori mẹ hẹ. Oyejabọ nọ mẹ rọ rehọ iẹe ziọ aro rai kpobi na, maero kọ owhẹ, Agripa Ovie, re nọ wha tẹ kiẹ otọ ẹme riẹ ziezi no, mẹ vẹ sae ruẹ oware jọ kere. 27 Keme o wọhọ oware ugheghẹ kẹ omẹ re me vi ohwo nọ ọ rrọ uwou-odi sei ababọ eware nọ a ta nọ o ru nọ mẹ rẹ fodẹ.”

26 Agripa+ ọ tẹ ta kẹ Pọl nọ: “Who wo uvẹ nọ whọ sai ro gu ẹkẹ-unu ra.” Kẹsena Pọl ọ tẹ rriẹ obọ riẹ o te mu ẹkẹ-unu riẹ họ egu, inọ:

2 “Agripa Ovie, eva e were omẹ nọ aro ra mẹ be te jọ gu ẹkẹ-unu mẹ nẹnẹ na kpahe eware kpobi nọ ahwo Ju a gu fihọ omẹ uzou na,+ 3 maero nọ orọnọ whọ riẹ iruemu ahwo Ju kpobi totọ na gbe eware avro sa-sa nọ e rrọ udevie ahwo Ju. Fikiere mẹ be lẹ owhẹ nọ rọ odiri gaviezọ kẹ omẹ.

4 “Evaọ uzẹme, ahwo Ju kpobi nọ a riẹ omẹ anwẹdẹ a riẹ oghẹrẹ uzuazọ nọ me yeri no emaha ze evaọ udevie ahwo* mẹ gbe evaọ Jerusalẹm,+ 5 yọ o tẹ ruọ ae nọ a re se isẹri, a riẹ nọ me yeri uzuazọ ohwo Farisi,+ utu egagọ mai nọ a rẹ jọ lele uzi te oka.+ 6 Rekọ fiki ẹruore kpahe eyaa nọ Ọghẹnẹ ọ ya kẹ esẹ-esẹ mai+ a be rọ rehọ omẹ gu ẹdhọ na; 7 eyaa nana ọvona erua ikpegbivẹ mai a bi rẹro erugba rai nọ o be lẹliẹ ae gọ* Ọghẹnẹ te aso te uvo avọ ajọwha. Fiki ẹruore nana ahwo Ju a bi ro gu eware fihọ omẹ uzou na,+ O Ovie.

8 “Fikieme wha gbẹ be rọ rọwo ho* inọ Ọghẹnẹ ọ rẹ kpare ahwo no uwhu ze? 9 Rọkẹ omẹ, u mu omẹ ẹro vẹre inọ u fo re mẹ rọ edhere kpobi wọso odẹ Jesu ohwo Nazarẹt na. 10 Ere me gine ru evaọ Jerusalẹm, mẹ kare erẹri na buobu fihọ iwou-odi,+ keme ilori izerẹ na a kẹ omẹ udu;+ yọ a tẹ gwọlọ kpe ai no, mẹ jẹ rọwo fihọ ekpe rai. 11 Mẹ kẹ rai uye unuẹse buobu evaọ isinagọgo* na kpobi re mẹ gba ae họ siọ ẹrọwọ rai; yọ fikinọ eva rai e jẹ dha omẹ gaga, mẹ tubẹ nya kpohọ ewho efa re me kpokpo ae.

12 “Nọ me je ru eware nana, ẹdẹ jọ mẹ tẹ jọ edhere je kpobọ Damaskọs avọ udu nọ ilori izerẹ na a kẹ omẹ, 13 nọ mẹ jọ edhere na evaọ ọre-tuzou, O Ovie, elo jọ nọ ọ ga vi ọrọ ọre na o te lo no obọ ehru ze wariẹ omẹ họ gbe enọ ma gbẹ jọ usu.+ 14 Nọ mai kpobi ma kie fihọ otọ no, me te yo urru jọ nọ o rehọ ẹvẹrẹ Hibru ta kẹ omẹ nọ: ‘Sọl, Sọl, fikieme who bi ro kpokpo omẹ? Ekpọ esiọsiọle* nọ whọ be rọ owọ fa na i bi ru eware ga kẹ owhẹ.’ 15 Rekọ mẹ tẹ nọ inọ: ‘Whẹ yọ ono, Olori?’ Olori na ọ tẹ ta nọ: ‘Mẹ yọ Jesu, ọnọ who bi kpokpo na. 16 Rekọ kpama dikihẹ. Fiki onana mẹ jẹ romavia kẹ owhẹ, re mẹ salọ owhẹ wọhọ odibo gbe osẹri ọrọ eware nọ whọ ruẹ no na gbe enọ me ti dhesẹ kẹ owhẹ kpahe omamẹ.+ 17 Mẹ te thọ owhẹ no obọ ahwo nana gbe ahwo erẹwho na enọ me bi vi owhẹ bru na+ 18 re who rovie ibiaro rai,+ je ku ae rẹriẹ no ebi+ ziọ elo,+ je no obọ ogaga Setan+ bru Ọghẹnẹ, re a ruẹsi wo erọvrẹ izieraha+ gbe ukuoriọ evaọ udevie enọ a ru fo no fiki ẹrọwọ rai nọ a fihọ omẹ.’

19 “Fikiere, Agripa Ovie, mẹ ghẹmeeyo kẹ ọnọ ọ romavia kẹ omẹ no obọ odhiwu ze na ha, 20 mẹ tẹ kake rọ ovuẹ na se ahwo nọ a rrọ Damaskọs,+ kẹsena mẹ tẹ nyabru ahwo nọ a rrọ Jerusalẹm,+ gbe ewho Judia soso, je ro se ahwo erẹwho na, inọ a kurẹriẹ re a je bru Ọghẹnẹ ze ẹkwoma eruo eware nọ i re dhesẹ ekurẹriẹ.+ 21 Fiki onana ahwo Ju na a ro kru omẹ evaọ etẹmpol na jẹ gwọlọ nọ a re kpe omẹ no.+ 22 Rekọ fikinọ Ọghẹnẹ o bi fiobọhọ kẹ omẹ, mẹ ruabọhọ bi se isẹri rite inẹnẹ na rọkẹ ahwo esese gbe ilogbo, yọ mẹ ta oware ofa ha ajokpaọ eware nọ Eruẹaro na gbe Mosis a ta nọ e te via,+ 23 inọ Kristi na ọ te ruẹ uye,+ yọ epanọ ọ rrọ ohwo ọsosuọ nọ a te kpare no uwhu ze,+ o ti whowho elo rọkẹ ahwo nana jẹ rọkẹ erẹwho na.”+

24 Whaọ epanọ Pọl ọ jẹ rọ ta eware nana ro gu ẹkẹ-unu riẹ na, Fẹstọs ọ tẹ rọ urru oruarua ta nọ: “Pọl, iroro ra e gbẹ gba ha! Uwuhrẹ ogaga u bi mi owhẹ iroro no!” 25 Rekọ Pọl ọ tẹ ta nọ: “Iroro mẹ e gba, Fẹstọs Ọnoworro na, mẹ be ta eme uzẹme gbe erọ iroro nọ e gba. 26 Evaọ uzẹme, ovie na nọ mẹ be ta ẹme kẹ ababọ ozọ na ọ riẹ kpahe eware nana ziezi; u mu omẹ ẹro nọ eware nana ọvuọvo i vo rie ẹro ho, keme a ru enana ọvuọvo evaọ oria nọ u siomano ho.+ 27 Agripa Ovie, kọ whọ rọwo eme Eruẹaro na? Mẹ riẹ nọ whọ rọwo.” 28 Rekọ Agripa ọ tẹ ta kẹ Pọl nọ: “O te raha oke he, whọ te ta omẹ kurẹriẹ zihe ruọ Oleleikristi no.” 29 Pọl ọ tẹ ta nọ: “Mẹ be lẹ nọ te o rẹ raha oke te o rẹ raha oke he, orọnikọ whẹ ọvo ho rekọ ahwo kpobi nọ a bi yo ẹme mẹ nẹnẹ na a rẹ jọ wọhọ omẹ, ababọ egbregba uwou-odi nana.”

30 Kẹsena ovie na ọ tẹ kpama, ọba na gbe Benaisi gbe ezae nọ e keria kugbe ae a tẹ kpama re. 31 Rekọ nọ a jẹ nyavrẹ, a tẹ be ta kẹ ohwohwo nọ: “Ọzae nana o ru oware ọvo thọ nọ o ro fo uwhu hayo ẹkarefihọ uwou-odi hi.”+ 32 Agripa ọ tẹ ta kẹ Fẹstọs nọ: “Ma hẹ sai siobọno ọzae nana ọ gbẹ kpare ẹdhọ riẹ bru Siza+ no ho.”

27 Fikinọ a jiroro nọ ma ruọ okọ kpobọ Itali,+ a tẹ rehọ Pọl gbe amọfa nọ a rrọ uwou-odi kẹ oletu ogbaẹmo nọ a re se Juliọs, ọrọ ẹko ogbaẹmo Ọgọstọs. 2 Nọ ma ruọ okọ ulogbo jọ nọ u no obọ Adramitiọm ze nọ o gwọlọ kpohọ eria nọ ekọ e rẹ kpahe nọ e rrọ akotọ abade evaọ ubrotọ Esia, ma te muhọ ebi vrẹ; Aristakọs+ ohwo Masidonia nọ o no obọ Tẹsalonika ze ọ jọ kugbe omai. 3 Okiokiọ riẹ okọ na o tẹ kpahe Saedọn, yọ Juliọs o dhesẹ uwowou* kẹ Pọl, ọ kẹ riẹ uvẹ re ọ nyabru egbẹnyusu riẹ re a rẹrotei.

4 Nọ ma lehọ no etẹe ma te bi akakotọ Saiprọs, keme ofou na ọ rọsuọ omai. 5 Kẹsena ma tẹ fa abade ọraragha na vrẹ, ma te je bi akakotọ Silisia avọ Pamfilia, ma tẹ kpahe oria nọ ekọ e rẹ kpahe nọ o rrọ Mira evaọ Lisia. 6 Oletu ogbaẹmo na ọ tẹ jọ etẹe ruẹ okọ ulogbo jọ nọ u no obọ Alẹkzandria ze nọ u bi kpohọ Itali, ọ tẹ ta nọ ma ruọ ẹe. 7 Nọ okọ na o bi ẹmẹrera edẹ buobu no, ma tẹ rọ udugaga te Konaidọs. Fikinọ ofou na ọ kẹ omai uvẹ bi ososo na vrẹ hẹ, ma te bi akakotọ Kriti evaọ ofẹ Salmoni, oria nọ ofou na ọ jọ ga tere he. 8 Nọ ma be rọ udugaga bi vrẹ na, ma te te oria nọ a re se Unueri Uwoma, onọ o kẹle okpẹwho Lasea.

9 Whaọ, ma jọ etẹe raha oke gaga no, yọ u te oke nọ o gbẹ rọ foma ha no re a bi evaọ abade na keme oke emuọriọ-ọseba ọrọ Ẹdẹ Omavoro+ na dede o vrẹ no, Pọl ọ tẹ jiroro jọ ze 10 kẹ ae nọ: “Ezae, mẹ be ruẹ nọ okpẹtu o ti no erẹ nana ze, yọ orọnikọ ewha na gbe okọ na ọvo i bi ti vru hu rekọ te uzuazọ* mai.” 11 Rekọ oletu ogbaẹmo na ọ tẹ gaviezọ kẹ ẹme ọkpokọ na gbe ọnọ o wo okọ na viukpọ ẹme Pọl. 12 Fikinọ unueri nana u fo oria nọ a rẹ jọ evaọ ezi ekpahe he,* ibuobu evaọ okọ na a tẹ ta nọ ma bi no etẹe, re a ruẹ sọ ma sai te Finiks re ma jọ etẹe evaọ ezi ekpahe na, unueri Kriti nọ u wo inu ivẹ, ojọ u rri ofẹ obọze ẹkpẹlobọ ovatha-ọre, odekọ kọ ẹkpẹlobọ obọze ovatha-ọre.

13 Nọ ofou nọ o je no obọze ovatha-ọre na ze o je fou ẹmẹrera, a te je roro nọ a te sai te Finiks, a te si umuokọ no ame, a te lehọ bi bi akakotọ Kriti vrẹ. 14 Rekọ u ri kri hi na, ofou ọgaga nọ a re se Yurakuilo* o te mu okọ na họ efou. 15 Epanọ ofou na o je fou okọ na gaga yọ o jọ bẹbẹ re okọ na o rọ ovao dhe ofou na, ma tẹ seba ebio, ofou na ọ tẹ be wọ omai vrẹ. 16 Ọ tẹ wọ omai vẹrẹ vẹrẹ kẹle ukoliko osese jọ nọ a re se Kauda oria nọ ofou na o jọ ga tere he, ghele na udugaga ma sai ro kru okọ osese* nọ o rrọ emuokọ na daji. 17 Rekọ nọ a si rie ruọ eva no, a tẹ rọ eware gba obọ ẹruokọ nọ a bi bi na, yọ fiki ozọ inọ okọ na o sai ti mu uwẹkpẹ Siatis,* a tẹ rra ifi nọ i kru ewẹ-ohọ okọ na, ehọ na e tẹ ziọ otọ, fikiere okọ na o te muhọ esu. 18 Fikinọ ofou ọwhibo na o je fou omai gaga, a te mu eware họ egbolo no okọ na re u vori evaọ okiokiọ riẹ. 19 Evaọ ẹdẹ avọ esa, ae ọvo a tẹ rehọ obọ rai gbolo ifi gbe ekwakwa okọ na efa fihọ ame.

20 Nọ ọre hayo isi e romavia edẹ buobu hu, yọ ofou ọwhibo* o bi fou omai, ẹruore inọ ma te zọ ọ gbẹ jariẹ hẹ. 21 Nọ ahwo na a jọ eveva te edẹ buobu no, Pọl o te dikihẹ evaọ udevie rai ọ tẹ ta nọ: “Ezae, o hae jọ nọ wha jẹ ohrẹ mẹ rehọ, ma hai lehọ no Kriti hi, yọ ma hae ruẹ uye nana ha, eware nọ i bi vru na e hai vru hu.+ 22 Ghele na mẹ be tuduhọ owhai awọ nọ wha kru udu ga, keme ohwo* ọvo o ti whu hu, okọ na ọvo o ti vru. 23 Aso nana ukọ-odhiwu+ Ọghẹnẹ nọ o wo omẹ, nọ mẹ be gọ* na o dikihẹ kẹle omẹ, 24 ọ tẹ ta nọ, ‘Ozọ u mu owhẹ hẹ, Pọl. Who ti dikihẹ aro Siza+ hrọ, yọ rri! Ọghẹnẹ ọ be rọ fiki ra siwi ahwo kpobi nọ a rrọ okọ na kugbe owhẹ.’ 25 Fikiere wha kru udu ga, ezae, keme me fievahọ Ọghẹnẹ inọ o te via epanọ ọ ta kẹ omẹ na ẹrẹrẹe. 26 Rekọ okọ na o ti zue omai kẹle ukoliko jọ.”+

27 Whaọ nọ u te aso avọ ikpegbene no yọ ofou o bi fou omai kpenẹ avọ enẹ evaọ Abade Adria, evaọ udevie aso ibiokọ na a te je roro nọ a be kẹle okpa jọ no. 28 A te dhe oware họ ame re a riẹ epanọ oria na u diwi te, a tẹ ruẹ nọ u diwi te efatọmo udhe,* a te bi omojọ jẹ wariẹ dhe oware họ ame na, a tẹ ruẹ nọ u diwi te efatọmo ikpegbisoi.* 29 Fiki ozọ nọ ma ti bi ruọ ehru itho, a tẹ jọ obọ emuokọ na gbolo imuokọ ene fihọ ame, a tẹ be lẹ re oke o ke vẹrẹ. 30 Rekọ nọ ibiokọ na a jẹ gwọlọ dhẹ no okọ na, a jẹ be wọ okọ osese na fihọ ame, bi ru wọhọ ẹsenọ a be gwọlọ jọ obọ ẹruokọ na fi imuokọ họ ame, 31 Pọl ọ tẹ ta kẹ oletu ogbaẹmo na avọ isoja na nọ: “Ajokpanọ ezae nana a rẹ daji okọ na, o gbẹ rrọ ere he wha te zọ họ.”+ 32 Isoja na a te bru ifi okọ osese na no, u te su vrẹ.

33 Nọ oke o be joma ke no, Pọl ọ tẹ be tuduhọ ahwo na kpobi awọ nọ a re emu o tẹ make kawo, be ta nọ: “Nẹnẹ họ ẹdẹ avọ ikpegbene nọ wha rọ rrọ awawa bi rẹro na ababọ emu nọ wha be re. 34 Fikiere mẹ be tuduhọ owhai awọ nọ wha re emu; keme o rrọ kẹ ewoma rai, keme makọ ubioto uzou omọvo rai dede o ti vru hu.” 35 Nọ ọ ta onana no, ọ tẹ tọlọ ebrẹdi, ọ tẹ jọ iraro rai kpobi lẹ yere Ọghẹnẹ, ọ tẹ bẹre iẹe, o te muhọ ẹre. 36 Aikpobi a te kru udu ga, ae omarai a te mu emu họ ẹre. 37 Mai kpobi nọ ma jọ okọ na, ma bu te ahwo* egba ivẹ gbe udhosa gbe ikpegbezeza (276). 38 Nọ a re eva vọ no, a te gbolo iwhiti nọ e rrọ okọ na fihọ abade na re okọ na o ruẹsi vori.+

39 Nọ oke o ke no, a je vuhu obonọ okpa o rrọ họ,+ rekọ a jẹ ruẹ oria jọ nọ uwẹkpẹ o rrọ, a tẹ gbaemu nọ a rẹ kpahe etẹe otẹrọnọ o sae lọhọ. 40 Fikiere a te bru ifi imuokọ na no i te kie fihọ abade na, a tẹ jẹ rra ifi nọ a rọ gba ivi na no; nọ a kpare ẹwẹ-ohọ nọ o rrọ obọ ẹruokọ na kpehru rri ofou na no, a te mu obọ unueri na họ ebi kpohọ. 41 Nọ a bi te oria nọ uwẹkpẹ u kokohọ evaọ otọ ame na, a te bi okọ na ruọ uwẹkpẹ na, ẹruokọ na o te mu, rekọ ẹkporo na ọ tẹ be tehe emuokọ na o te muhọ ebru ibribro.+ 42 Fikiere isoja na a tẹ jiroro nọ a re kpe ahwo uwou-odi na no, re ọvuọvo ọ gbẹ ya ame vrẹ dhẹ vabọ họ. 43 Rekọ oletu ogbaẹmo na ọ gba riẹ mu nọ o re siwi uzuazọ Pọl, ọ tẹ whaha ae oware nọ a jẹ gwọlọ ru na. Ọ tẹ ta kẹ enọ e rẹ sae ya ame re a la ruọ abade na re a kake ya kpahe okpa, 44 kẹsena enọ i kiọkọ a ve ti lele ai, ejọ evaọ ehru ewẹ-ekpala, ejọ ehru ewẹ okọ na. Ere ahwo na kpobi a ro te okpa gbẹsinẹdẹ.+

28 Nọ ma te okpa gbẹsinẹdẹ no, ma tẹ riẹ nọ a re se ukoliko na Mọlta.+ 2 Ahwo nọ a be ta ẹvẹrẹ mai hi* na a dhesẹ uwowou* kẹ omai evaọ edhere ologbo. A dede omai rehọ sasasa je koko erae họ fiki oso nọ ọ jẹ rrọ gbe ekpahe nọ e jariẹ. 3 Rekọ nọ Pọl o koko ekru ire họ jẹ wọe fihọ erae na, ọriwhẹ o te noi ze fiki ẹrrorro erae na ọ tẹ tatakọ họ* obọ riẹ. 4 Nọ ahwo nọ a be ta ẹvẹrẹ mai hi na a ruẹ araomuomu nọ o wo obi nọ o bi veghe evaọ obọ riẹ, a tẹ be ta kẹ ohwohwo nọ: “Ababọ avro, ọzae nana yọ ojihẹ, dede nọ o no abade na te okpa gbẹsinẹdẹ, Uvioziẹ* o kuvẹ hẹ re ọ gbẹ jọ uzuazọ.” 5 Rekọ ọ tẹ frẹ araomuomu na fihọ erae na yọ oware uyoma ovo o via kẹe he. 6 Ahwo na a je rẹro nọ oma riẹ u ti fu hayo o ti kie fihọ otọ whu idudhe. Nọ a hẹrẹ oke krẹkri no jẹ ruẹ nọ oware uyoma ovo o via kẹe he, a te nwene iroro rai je muhọ ẹta nọ Pọl yọ ọghẹnẹ.

7 Whaọ ọzae nọ ọ viodẹ evaọ ukoliko na nọ a re se Pọbliọs o wo etọ kẹle oria yena, yọ o dede omai rehọ jẹ rẹrote omai ziezi evaọ edẹ esa. 8 Evaọ oke yena yọ ọsẹ Pọbliọs o kiẹzẹ ehwa nọ ọ be mọ ifiva yọ eva-iyoma e be dae, Pọl ọ tẹ nyabru rie ọ tẹ lẹ, rọ abọ kpahe iẹe, o te siwi ei.+ 9 Nọ onana o via no, amọfa evaọ ukoliko na nọ a jẹ mọ a te mu ei họ ẹnyabru ze re o siwi ai.+ 10 A kẹ omai ekẹ buobu re, yọ okenọ ma jẹ gwọlọ lehọ, a kwa eware kpobi nọ ma rẹ sae rọ rẹrote omamai kẹ omai.

11 Nọ emerae esa e vrẹ no, ma tẹ ruọ okọ nọ u wo oka nana “Emezae Zus.” Obọ Alẹkzandria okọ na u no ze yọ o jọ ukoliko na evaọ ezi ekpahe* na. 12 Nọ ma te oria nọ ekọ e rẹ kpahe evaọ Sirakus, ma tẹ jọ etẹe edẹ esa; 13 ma te no etẹe bi vrẹ, ma te te Rigiọm. Ẹdẹ nọ o lele i rie, ofou obọze ovatha-ọre o te fou ze, ma te ti te Putẹoli evaọ ẹdẹ avọ ivẹ. 14 Ma jọ etenẹ ruẹ inievo na, a tẹ lẹ omai re ma jọ kugbe ae edẹ ihrẹ, kọ etẹe ma no rọ ovao rri Rom. 15 Nọ inievo na e jọ obei yo kpahe omai, a tẹ ziọ ugbo obọ Oria Eki Apiọs gbe Iwhre Iwou Esa ti zere omai. Nọ Pọl ọ ruẹ e rai, o te yere Ọghẹnẹ je kru udu ga.+ 16 Ukuhọ riẹ nọ ma te Rom, a kẹ Pọl uvẹ re ọye ọvo ọ rria uwou avọ osoja nọ o bi rou rie.*

17 Rekọ nọ edẹ esa e vrẹ no, o te se ezae nọ e viodẹ evaọ usu ahwo Ju kokohọ. Nọ a kokohọ no, ọ tẹ ta kẹ ae nọ: “Ezae, inievo, dede nọ me ru oware ovo wọso ahwo na hayo iruemu esẹ-esẹ mai hi,+ a mu omẹ fihọ uwou-odi evaọ obọ Jerusalẹm a tẹ rehọ omẹ kẹ ahwo Rom.+ 18 Nọ a kiẹ omẹ riwi no,+ a jẹ gwọlọ siobọno omẹ keme a ruẹ oware ovo nọ me ru thọ nọ a re ro kpe omẹ hẹ.+ 19 Rekọ fikinọ ahwo Ju na a rọwo ho, mẹ tẹ tubẹ kpare ẹdhọ na bru Siza ze,+ rekọ orọnikọ me wo oware uyoma jọ nọ mẹ gwọlọ gu kpahe orẹwho mẹ hẹ. 20 Fiki onana mẹ rọ yare nọ mẹ rẹ ruẹ owhai je lele owhai ta ẹme, keme fiki ọnọ Izrẹl o bi rẹro riẹ anwẹdẹ na a rọ rehọ egbregba nana kare omẹ na.”+ 21 A tẹ ta kẹe nọ: “A ri kere ileta evuevo se omai no obọ Judia ze kpahe owhẹ hẹ, yọ ohwo ọvo evaọ usu inievo nọ i no obei ze ọ re niyẹrẹ hayo ta ẹme oyoma ọvo kpahe owhẹ hẹ. 22 Rekọ ma ruẹ nọ u fo re ma yo ẹkẹ unu ra, keme evaọ uzẹme, ma riẹ nọ ahwo a be ta ẹme oyoma kpahe utu nana+ evaọ eria kpobi.”+

23 A te fi ẹdẹ họ nọ a te rọ nyabru rie ze, a te zurie ziọ oria nọ ọ jẹ rria na bu vi epaọ ọsosuọ. O te ru ẹme na vẹ kẹ ae ẹkwoma isẹri nọ o se ziezi kpahe Uvie Ọghẹnẹ no ohiohiẹ rite owọwọ, ọ ta eme no Uzi Mosis+ gbe ebe Eruẹaro na+ ze re o ro ru ae rọwo Jesu.+ 24 Ejọ i te mu eme nọ ọ ta họ ẹrọwo; efa e rọwo ho. 25 Fikinọ a rọwokugbe ohwohwo ho, a te muhọ ẹnyavrẹ, Pọl ọ tẹ ta nọ:

“Ẹzi ọfuafo na ọ rehọ ẹkwoma Aizaya ọruẹaro na ta gba nọ ọ ta kẹ esẹ-esẹ rai 26 inọ, ‘Nyabru ahwo nana re whọ ta nọ: “Wha ti gine yo rekọ wha ti wo otoriẹ vievie he, yọ wha ti gine rri rekọ wha te ruẹ vievie he.+ 27 Keme udu ahwo nana o rrọ gaga, yọ a be rọ ezọ rai yo rekọ a be daezọ họ, a fare ibiaro rai, re a gbẹ rehọ ibiaro rai ruẹ ude jẹ rehọ ezọ rai yo jẹ jọ udu rai wo otoriẹ ẹme na je kurẹriẹ vievie he, re mẹ siọ ae ba esiwi.”’+ 28 Fikiere, jọ wha riẹ nọ a whowho ovuẹ esiwo nana nọ o bi no obọ Ọghẹnẹ ze na kẹ erẹwho na+ no; yọ ababọ avro, a te gaviezọ kẹe.”+ 29 *——

30 Ọ tẹ jọ etẹe ikpe ivẹ soso evaọ uwou riẹ nọ ọ haya,+ yọ o je dede ahwo kpobi nọ a nyabru rie ze rehọ sasasa, 31 je whowho Uvie Ọghẹnẹ kẹ ae je wuhrẹ ae kpahe Olori na Jesu Kristi ududu,*+ ababọ awhaha.