ILETA RO SE AHWO ROM

1 Pọl, ọrigbo Kristi Jesu nọ a se re ọ jọ ukọ, nọ a salọ kẹ usi uwoma Ọghẹnẹ,+ 2 onọ ọ ya eyaa riẹ anwẹdẹ evaọ Ikereakere efuafo na ẹkwoma eruẹaro riẹ, 3 kpahe Ọmọ riẹ, ọnọ ohwo uyẹ* Devidi o yẹ+ wọhọ ohwo-akpọ,* 4 rekọ ọnọ a rọ ogaga ẹzi ọfuafo dhesẹ via nọ Ọmọ Ọghẹnẹ+ ẹkwoma uwhu nọ a kpare riẹ no ze,+ ẹhẹ, Jesu Kristi Olori mai. 5 A rọ ẹkwoma riẹ dhesẹ uwowou ulogbo kẹ omẹ* jẹ kẹ omẹ* iruo ukọ+ re ahwo erẹwho na kpobi a ruẹsi yoẹme kẹe fiki ẹrọwọ nọ a fihọ iẹe,+ re o wha orro se odẹ riẹ, 6 yọ udevie erẹwho nana a jọ se owhai re na, re wha jọ erọ Jesu Kristi— 7 ro se enọ Ọghẹnẹ o you kpobi evaọ Rom, enọ a se re a jọ erẹri:

Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.

8 Orọ ọsosuọ, me bi yere Ọghẹnẹ mẹ ẹkwoma Jesu Kristi fiki rai kpobi, keme a be jọ akpọ na soso ta kpahe ẹrọwọ rai. 9 Ọghẹnẹ nọ mẹ be rọ oma mẹ kpobi gọ* evaọ ewhowho usi uwoma kpahe Ọmọ riẹ na, ọ rẹ sai se isẹri kẹ omẹ inọ mẹ be hae fodẹ owhai ẹsikpobi evaọ elẹ mẹ,+ 10 be lẹ nọ otẹrọnọ o sae lọhọ evaọ onana, mẹ sae nyabru owhai ze o tẹ rrọ oreva Ọghẹnẹ. 11 Keme u bi si omẹ urru re mẹ ruẹ owhai, re mẹ kẹ owhai ekẹ jọ nọ i no obọ Ọghẹnẹ ze re wha sae jọ gaga evaọ ẹrọwọ na; 12 hayo, re ma sae tuduhọ ohwohwo awọ+ ẹkwoma ẹrọwọ mai, te ọrai te ọmẹ.

13 Rekọ inievo, mẹ gwọlọ nọ wha riẹ onana, inọ ẹsibuobu mẹ jiroro nọ mẹ rẹ nyabru owhai ze, re mẹ sae jọ iruo usi uwoma ota mẹ na wo ibi jọ re evaọ udevie rai, wọhọ epanọ mẹ jọ erẹwho efa wo na, rekọ oware jọ o be hae whaha omẹ rite enẹna. 14 Mẹ reosa ahwo Griki gbe ahwo erẹwho efa,* iwoareghẹ gbe enọ i wo areghẹ hẹ; 15 fikiere ọwhọ ọ da omẹ oma fia re me whowho usi uwoma na kẹ owhai re evaọ Rom.+ 16 Keme oma o be vuọ omẹ hẹ re me whowho usi uwoma na;+ evaọ uzẹme oye họ obọdẹ edhere nọ Ọghẹnẹ ọ be rọ wha esiwo se enọ i wo ẹrọwọ,+ kake rọkẹ ahwo Ju,+ kẹsena kọ ahwo Griki re.+ 17 Keme rọkẹ enọ i wo ẹrọwọ a be ruẹ nọ Ọghẹnẹ ọ be rọ ẹkwoma usi uwoma na dhesẹ ẹrẹreokie riẹ via, onana o vẹ bọ ẹrọwọ rai ga,+ wọhọ epanọ a kere nọ: “Rekọ ohwo okiẹrẹe o ti wo uzuazọ fiki ẹrọwọ.”+

18 Keme ofu Ọghẹnẹ+ o bi no obọ odhiwu ze fiki ahwo kpobi nọ i bi yoẹme kẹe he gbe enọ i kiẹrẹe he, enọ e be rọ edhere omuomu nẹ uzẹme na nyaotọ,+ 19 keme eware nọ i fo nọ a rẹ riẹ kpahe Ọghẹnẹ i dhesẹ oma via vevẹ evaọ udevie rai, Ọghẹnẹ o ru rai vevẹ kẹ ae.+ 20 Keme dede nọ a rẹ ruẹ Ọghẹnẹ hẹ, no anwọ okenọ ọ rọ ma akpọ na ze ahwo a be sai wo otoriẹ oghẹrẹ nọ ọ rrọ, a be jọ eware nọ ọ ma ruẹ onana,+ makọ ogaga ebẹdẹ riẹ+ gbe inọ ọye họ Ọghẹnẹ,+ fikiere a wo unoma ha. 21 Keme dede nọ a riẹ Ọghẹnẹ, a kẹ riẹ oruaro wọhọ Ọghẹnẹ hẹ, hayo kẹe uyere he, rekọ iroro rai i zihe ruọ ifofe, udu ugheghẹ rai u te muebi.+ 22 Dede nọ a be ta nọ a wo areghẹ, a zihe ruọ igheghẹ no, 23 a be rehọ oruaro nọ a rẹ rọ kẹ Ọghẹnẹ nọ o wo ugboma nọ u re gbo ho na kẹ emema ahwo-akpọ gbe evra gbe erao awọ ane gbe erao nọ e rẹ katiẹ* nọ i re whu.+

24 Fikiere, Ọghẹnẹ ọ tẹ kẹ ae uvẹ re a ru lele isiuru igbegbe nọ e rrọ udu rai, re a si ọghọ no omarai. 25 A rehọ ọrue nwene uzẹme Ọghẹnẹ, a tẹ be rọ ọghọ ologbo kẹ emama jẹ gọ* ae viukpọ Ọmemama na, ọnọ a re jiri bẹdẹ bẹdẹ. Ami. 26 Oyejabọ nọ Ọghẹnẹ ọ jẹ kẹ ae uvẹ re isiuru egaga kẹ owezẹ ọzae-avọ-aye nọ e rẹ wha omovuọ ze i su ai,+ keme eyae nọ e rrọ udevie rai a nyasiọ ezae nọ a re lele wezẹ ba a te bi lele ibe eyae rai wezẹ, onọ u wo ohẹriẹ no epanọ Ọghẹnẹ ọ ma riẹ no emuhọ ze;+ 27 epọvo na re, ezae na a nyasiọ eyae nọ a re lele wezẹ ba a te bi wo isiuru egaga kẹ omoma rai, ezae i te bi lele ezae wezẹ,+ bi ru oware otọtọ jẹ be jọ omarai wo osohwa emuemu rai vọvọ.+

28 Yọ fikinọ a gwọlọ daezọ Ọghẹnẹ hẹ,* Ọghẹnẹ ọ tẹ kẹ ae uvẹ re a wo iroro ethọthọ, re a ru eware nọ i fo ho.+ 29 A je ru oghoghẹrẹ eware nọ i fo vievie he,+ emuemu, uvou-uthei,*+ gbe eyoma, ihri-eriọ,+ ohwo-okpe,+ ẹwhọ, eviẹhọ,+ gbe egrẹ-ọjẹ,+ a rrọ iguiguẹgu, 30 enọ e rẹ ta amọfa raha,+ enọ i mukpahe Ọghẹnẹ, ahwo orivo, omorro, ehaise, enọ e rẹ ma omaa eware iyoma,* enọ e rẹ ghẹmeeyo kẹ esẹgbini,+ 31 a kare otoriẹ,+ a re koko eyaa ha, a wo uyoyou kẹ ibe ahwo-akpọ rai hi, a tẹ jẹ kare ohrọ-oriọ. 32 Dede nọ ahwo nana a riẹ uzi ukiẹrẹe Ọghẹnẹ ziezi, inọ enọ i bi ru eware nana a fo uwhu,+ a bi ru ai jẹ be jẹ enọ i bi ru ai rehọ re.

2 Fikiere, oghẹrẹ ohwo kpobi nọ whọ rrọ kẹhẹ,+ who wo unoma ha, nọ whọ tẹ be rọ omọfa guẹdhọ; keme nọ whọ be rọ omọfa guẹdhọ na yọ who bi brukpe omara re, fikinọ whẹ ọnọ ọ be rọ omọfa guẹdhọ na who bi ru eware evona.+ 2 Whaọ ma riẹ nọ oziẹobro Ọghẹnẹ kpahe enọ i bi ru eware itieye na o rrọ gbagba.

3 Kọ who roro nọ whẹ nọ ọ be rọ ahwo nọ a bi ru eware itieye na guẹdhọ kpakiyọ who bi ru ae re, whọ te va ẹdhoguo Ọghẹnẹ abọ? 4 Hayo kọ who bi rri uwowou+ gbe iroro ekparevrẹ*+ gbe odiri+ ologbo riẹ vo, fikinọ whọ riẹ hẹ inọ Ọghẹnẹ ọ be rọ fiki uwowou riẹ fiobọhọ kẹ owhẹ re who kurẹriẹ?+ 5 Rekọ fiki udu ogaga ra gbe fikinọ whọ be rọwo kurẹriẹ hẹ, who bi koko ofu họ kẹ omara, onọ o te tha evaọ ẹdẹ ofu Ọghẹnẹ gbe edhesẹvia oziẹobro okiẹrẹe riẹ.+ 6 Yọ ọ te hwosa kẹ omomọvo wọhọ epanọ iruo riẹ e rrọ:+ 7 uzuazọ ebẹdẹ bẹdẹ rọkẹ enọ e be gwọlọ oruaro gbe ọghọ gbe ugboma nọ u re gbo ho+ ẹkwoma iruo iwoma nọ a be ruabọhọ; 8 rekọ, rọkẹ enọ e rẹ gwọlọ ẹwhọ nọ e be ghẹmeeyo kẹ uzẹme na jẹ romakẹ emuemu, ofu gbe evedha Ọghẹnẹ o ti te ai.+ 9 Uye gbe idhọvẹ i ti te ohwo* kpobi nọ o bi ru oware uyoma, ahwo Ju o te kaki te, kẹsena u ve ti te ahwo Griki re; 10 rekọ oruaro gbe ọghọ gbe udhedhẹ i ti te ohwo kpobi nọ o bi ru oware uwoma, ahwo Ju o te kaki te,+ kẹsena u ve ti te ahwo Griki re.+ 11 Keme Ọghẹnẹ o wo ọriẹwẹ hẹ.+

12 Ahwo kpobi nọ a wo uzi hi nọ a ru oware uyoma, a ti whu dede nọ a wo uzi hi;+ rekọ ahwo kpobi nọ a raha uzi yọ a rrọ otọ uzi, a te rọ uzi gu ae ẹdhọ.+ 13 Keme orọnikọ enọ i bi yo uzi họ enọ i kiẹrẹe evaọ aro Ọghẹnẹ hẹ, rekọ enọ i bi koko uzi họ enọ o ti kuenu kẹ inọ a kiẹrẹe.+ 14 Keme nọ ahwo erẹwho na nọ a wo uzi hi+ a tẹ be rọ iroro obọrai ru eware nọ e rọwokugbe uzi na, ahwo nana, dede nọ a wo uzi hi, a bi dhesẹ via inọ a wo uzi evaọ omarai. 15 Ahwo nana a bi dhesẹ nọ Ọghẹnẹ o kere ẹjiroro uzi na fihọ udu rai, obruoziẹ-iroro rai o te je bi se isẹri, yọ iroro obọrai i bi* brukpe ae hayo bru kẹ ae. 16 A te ruẹ onana vevẹ evaọ ẹdẹ nọ Ọghẹnẹ ọ te rehọ ẹkwoma Kristi Jesu gu ahwo-akpọ ẹdhọ kpahe eware nọ a ko dhere,+ wọhọ epanọ me bi whowho evaọ usi uwoma na.

17 Otẹrọnọ who wo odẹ na inọ whẹ yọ ohwo Ju,+ yọ whọ rẹroso uzi jẹ be rọ usu ra kugbe Ọghẹnẹ seha, 18 whọ tẹ jẹ riẹ oreva riẹ jẹ jẹ eware nọ i kiehọ rehọ fikinọ a wuhrẹ* owhẹ Uzi na no,+ 19 u te je mu owhẹ ẹro nọ whẹ yọ ọnọ o re su enọ i tuaro, jẹ rrọ elo rọkẹ enọ e rrọ ebi, 20 ọnọ ọ rẹ kpọ igheghẹ họ, ọnọ o re wuhrẹ emaha, who te je wo otoriẹ ugogo eriariẹ gbe uzẹme Uzi na— 21 kọ whẹ nọ o bi wuhrẹ omọfa, who gbe wuhrẹ omara re?+ Whẹ nọ ọ be ta nọ, “Who tho uji hi,”+ kọ who bi tho uji? 22 Whẹ nọ ọ be ta nọ, “Who bruẹnwae he,”+ kọ who bi bruẹnwae? Whẹ nọ emedhọ e rẹ tọtọ oma, kọ who bi tho ekwakwa iwou edhọ? 23 Whẹ nọ ọ be rọ uzi seha, kọ who bi si ọghọ no Ọghẹnẹ oma ẹkwoma Uzi na nọ whọ be raha? 24 Keme “a be jọ udevie erẹwho na ta eme-aghọ kpahe odẹ Ọghẹnẹ fiki rai,” nwane wọhọ epanọ a kere.+

25 Evaọ uzẹme, oware ovo nọ o rẹ lẹliẹ oyawo+ wha erere ze họ nọ who te bi koko uzi;+ rekọ whọ tẹ be raha uzi, oyawo ra u zihe ruọ ababọ oyawo no. 26 Fikiere, ohwo nọ ọ yawo ho+ o te bi ru eware nọ i kiẹrẹe nọ Uzi na o gwọlọ, dede nọ ọ yawo ho a re rri rie wọhọ ọnọ ọ yawo, o gbẹ rrọ ere?+ 27 Yọ ohwo nọ ọ yawo ho ọ te rọ ẹkwoma Uzi na nọ o bi koko ro brukpe owhẹ nọ ọ be raha uzi dede nọ who wo Uzi na nọ a kere fihotọ whọ tẹ jẹ yawo. 28 Keme a rẹ jọ ohwo Ju evaọ okafe he,+ yọ oyawo o rrọ oware okafe he, orọ uwo na.+ 29 Rekọ ohwo Ju họ ọnọ ọ rrọ ohwo Ju evaọ obeva,+ yọ oyawo riẹ orọ udu+ ẹkwoma ẹzi, orọnikọ ẹkwoma izi nọ a kere fihotọ họ.+ Obọ Ọghẹnẹ ujiro ohwo yena u re no ze orọnikọ obọ ahwo ho.+

3 Oghẹrẹ vẹ ahwo Ju a ro wo erere vi amọfa, hayo kọ eme họ erere oyawo? 2 Erere ologbo ọ riẹ evaọ kabọ kabọ. Orọ ọsosuọ, a mu evuẹ ọrẹri nọ i no obọ Ọghẹnẹ ze họ ae obọ.+ 3 Kọ eme ma rẹ sae ta kpahe onana? Otẹrọnọ otujọ a wo ẹrọwọ họ, kọ ababọ ẹrọwọ rai u dhesẹ nọ Ọghẹnẹ ọ gbẹ rrọ ọnọ o re ru ẹme riẹ gba ha?* 4 Kakaka! Ọghẹnẹ ọ rẹ ta uzẹme+ o tẹ make rọnọ ohwo kpobi yọ ọtọrue,+ wọhọ epanọ a kere nọ: “Re a sae ruẹ inọ eme ra i kiẹrẹe, whọ vẹ jẹ sae rease nọ a te bi gu owhẹ ẹdhọ.”+ 5 Rekọ otẹrọnọ emuemu mai o rẹ lẹliẹ ẹrẹreokie Ọghẹnẹ dhesẹ oma via, kọ eme ma rẹ ta? Kọ Ọghẹnẹ o ru thọ nọ o te mu ofu? (Epaọ iroro ohwo-akpọ mẹ be rọ ta ẹme na.) 6 Vievie! O gbe ru ere he, ẹvẹ Ọghẹnẹ o ti ro gu akpọ na ẹdhọ?+

7 Rekọ otẹrọnọ ọrue mẹ u bi ru uzẹme Ọghẹnẹ dhesẹ oma via ziezi nọ o be wha oruaro sei, kọ fikieme a bi ro gu omẹ ẹdhọ inọ mẹ yọ ọrahauzi? 8 O tẹ rrọ ere, kọ ma gbẹ dhugbẹ ta epanọ ezae jọ i bi gu ọrue fihọ omai uzou nọ ma be ta na, inọ, “Joma ru eware iyoma re eware iwoma e sae romavia”? Oziẹ nọ a ti brukpe ezae yena yọ uvioziẹ.+

9 Kọ ẹvẹ ma roro? Kọ mai o mai woma kẹ? Vievie! Keme ma ta no vẹre inọ te ahwo Ju te ahwo Griki a rrọ otọ uzioraha;+ 10 wọhọ epanọ a kere nọ: “Ohwo okiẹrẹe ọvuọvo ọ riẹ hẹ, makọ omọvo dede;+ 11 ọvuọvo o wo otoriẹ udidi hi; ọvuọvo ọ be gwọlọ Ọghẹnẹ hẹ. 12 Ahwo kpobi a nyathọ no, aikpobi a gbe fioka ha; ọvuọvo ọ riẹ nọ ọ rrọ wowou hu, makọ omọvo dede.”+ 13 “Edhuru rai yọ uki nọ u kpefihọ; a rehọ ẹrọo rai viẹ ahwo họ no.”+ “Obi eraomuomu* ọ rrọ obeva igbenu rai.”+ 14 “Yọ ehao ebọwo gbe evedha e vọ unu rai.”+ 15 “Awọ rai e rẹ dhẹ vẹrẹ vẹrẹ nyai kpe azẹ.”+ 16 “Ọraha avọ uye e rrọ idhere rai, 17 yọ a re riẹ edhere udhedhẹ hẹ.”+ 18 “Ozodhẹ Ọghẹnẹ o rrọ ẹro* rai hi.”+

19 Whaọ ma riẹ nọ eware kpobi nọ Uzi na o ta, o ta rai kẹ ahwo nọ a rrọ otọ Uzi na, re ohwo ọvuọvo ọ gbẹ ruẹ ẹme ta ha, akpọ na soso ọ vẹ jẹ reabe evaọ obọ Ọghẹnẹ je fo kẹ uye.+ 20 Fikiere, a ti kuenu kẹ ohwo* ọvo inọ o kiẹrẹe evaọ aro riẹ hẹ fiki eruo eware nọ uzi o ta,+ keme uzi u ru omai riẹ oware nọ uzioraha o rrọ vevẹ.+

21 Whaọ enẹna o rrọ vevẹ inọ ababọ Uzi na ohwo ọ rẹ sai kiẹrẹe evaọ aro Ọghẹnẹ,+ wọhọ epanọ Uzi na gbe Eruẹaro na i se isẹri riẹ na,+ 22 ẹhẹ, ohwo ọ rẹ sai kiẹrẹe evaọ aro Ọghẹnẹ ẹkwoma ẹrọwọ nọ o fihọ Jesu Kristi, yọ onana o lọhọ kẹ ahwo kpobi nọ a wo ẹrọwọ. Ohẹriẹ o rrọ udevie rai hi.+ 23 Keme ahwo kpobi a raha uzi no, a be sai dhesẹ oruaro Ọghẹnẹ via ha.+ 24 Okẹ ọvọvẹ+ o rrọ nọ o bi ro kuenu kẹ ai inọ a kiẹrẹe fiki aruoriwo*+ riẹ ẹkwoma osa ẹtanigbo nọ Kristi Jesu ọ hwa re a siobọno ai.+ 25 Ọghẹnẹ ọ rehọ e riẹ kẹ re ọ jọ idhe nọ a rẹ rọ ruẹrẹhọ kugbei*+ ẹkwoma ẹrọwọ nọ a re fihọ azẹ riẹ.+ O ru onana re o dhesẹ ẹrẹreokie riẹ via, keme Ọghẹnẹ ọ jẹ rọ fiki odiri* riẹ rehọ izieraha ahwo rọvrẹ rai evaọ okenọ u kpemu. 26 O ru onana re o dhesẹ ẹrẹreokie riẹ via+ evaọ oke nana, re ọ sai kiẹrẹe nọ ọ tẹ be ta nọ ohwo nọ o fi ẹrọwọ họ Jesu o kiẹrẹe.+

27 Kọ ma wo ẹjiroro nọ ma re ro seha? Vievie. Fiki uzi vẹ? Orọ iruo nọ ahwo a re ru?+ Ijo, rekọ uzi ẹrọwọ nọ a re wo. 28 Keme ma ruẹ nọ a re kuenu kẹ ohwo inọ o kiẹrẹe ẹkwoma ẹrọwọ orọnikọ fiki eruo eware nọ uzi o ta ha.+ 29 Hayo kọ Ọghẹnẹ ahwo Ju ọvo ọ rrọ?+ Kọ ọ gbẹ rrọ Ọghẹnẹ ahwo erẹwho na re?+ Ẹhẹ, ọrọ ahwo erẹwho na re.+ 30 Nọ Ọghẹnẹ ọ rrọ ọvo na,+ o ti kuenu kẹ ahwo nọ a yawo inọ a kiẹrẹe+ fiki ẹrọwọ rai je kuenu kẹ enọ e yawo ho inọ a kiẹrẹe+ fiki ẹrọwọ rai. 31 Nọ o rrọ ere na, kọ ma be rehọ ẹrọwọ mai si uzi no otọ? Vievie! Ukpoye, ma bi kru uzi ga.+

4 Nọ o rrọ ere na, didi erere ma rẹ ta nọ o te Abraham ọsẹ-esẹ mai wọhọ ohwo-akpọ?* 2 Wọhọ oriruo, o hae jọ nọ fiki iruo a ro kuenu kẹ Abraham inọ o kiẹrẹe, ọ hai wo ẹjiroro nọ o re ro seha, rekọ ọ rẹ sai ru ere evaọ aro Ọghẹnẹ hẹ. 3 Kọ ogbẹrọnọ enẹ ikereakere na e ta? “Abraham o fi ẹrọwọ họ Jihova,* a te kele iei kẹe wọhọ ẹrẹreokie.”+ 4 Whaọ ohwo nọ o bi ru iruo, a re kele osa nọ a hwa kẹe wọhọ uwowou ulogbo ho, rekọ wọhọ osa* nọ a kru rie. 5 Evaọ abọdekọ riẹ, ohwo nọ o bi ru iruo ho rekọ nọ o fi ẹrọwọ họ Ọnọ o re kuenu kẹ ọrahauzi inọ o kiẹrẹe na, a re kele ẹrọwọ riẹ wọhọ ẹrẹreokie.+ 6 Wọhọ epanọ Devidi ọ ta re kpahe evawere ohwo nọ Ọghẹnẹ o rri nọ o kiẹrẹe* orọnikọ fiki iruo ho, inọ: 7 “Jọ eva e were enọ a kpairoro vrẹ eware imuomu nọ a ru jẹ rọ izieraha rai rọvrẹ* no; 8 jọ eva e were ohwo nọ Jihova* o ti kele izieraha riẹ kẹ vievie he.”+

9 Kọ ahwo nọ a yawo ọvo a re wo evawere nana manikọ te enọ e yawo ho?+ Keme ma be ta nọ: “A kele ẹrọwọ Abraham kẹe wọhọ ẹrẹreokie.”+ 10 Oke vẹ a ro kele ẹrọwọ riẹ wọhọ ẹrẹreokie? Okenọ ọ yawo no manikọ okenọ ọ re yawo ho? Okenọ ọ re yawo ho, nọ ọ jọ ohwo nọ ọ yawo ho. 11 Ọghẹnẹ ọ tẹ ta kẹ Abraham nọ ọ yawo re o jọ oka*+ inọ o kiẹrẹe fiki ẹrọwọ nọ o wo evaọ okenọ ọ re yawo ho, re ọ sae jọ ọsẹ ahwo kpobi nọ a wo ẹrọwọ+ dede nọ a yawo ho, a vẹ sae ta nọ a kiẹrẹe;* 12 yọ re ọ sae jọ ọsẹ emọ nọ e yawo, orọnikọ rọkẹ enọ i se oyawo gboja ọvo ho, rekọ te enọ e be nya kpatiẹ nọ i wo oghẹrẹ ẹrọwọ nọ Abraham ọsẹ mai+ o wo evaọ okenọ ọ re yawo ho.

13 Keme orọnikọ fiki uzi na nọ a je koko oye a rọ ya eyaa na kẹ Abraham hayo ọmọ* riẹ hẹ inọ ọ te reuku akpọ jọ,*+ rekọ fiki ẹrẹreokie nọ ọ rọ ẹkwoma ẹrọwọ wo.+ 14 Keme otẹrọnọ enọ i se Uzi na gboja gaga họ ereuku na, kiyọ ẹrọwọ o fioka ha, eyaa na e tẹ jẹ rrọ ofofe. 15 Evaọ uzẹme, Uzi na o rẹ wha ofu ze,+ rekọ uzi o gbẹ rrọ họ, uzioraha ọ rẹ gbẹ jariẹ hẹ.+

16 Oyejabọ nọ o rọ rọnọ ẹkwoma ẹrọwọ a re ro wo eyaa na, re o ruẹse jọ fiki uwowou ulogbo,+ re eyaa na e sae jọ rọkẹ emọ* riẹ kpobi,+ orọnikọ rọkẹ enọ i bi koko Uzi na ọvo ho, rekọ te enọ e be rọ aro kele ẹrọwọ Abraham, ọnọ ọ rrọ ọsẹ mai kpobi.+ 17 (Nwane wọhọ epanọ a kere nọ: “Mẹ rehọ owhẹ mu ọsẹ erẹwho buobu.”)+ Onana o via evaọ aro Ọghẹnẹ, ọnọ o fi ẹrọwọ họ na, ọnọ o re zihe enọ i whu no ziọ uzuazọ je dhesẹ eware nọ e re via ha wọhọ ẹsenọ e via no.* 18 Dede nọ o wọhọ nọ o gbe wo ẹruore he, ọ rọ fiki ẹruore wo ẹrọwọ inọ ọ te sae jọ ọsẹ erẹwho buobu wọhọ epanọ a ya eyaa kẹe inọ: “Ere emọ* ra e te jọ.”+ 19 Yọ dede nọ ẹrọwọ riẹ o whrehe he, o rri ugboma riẹ inọ o joma whu no (keme ọ kpako te oware wọhọ ikpe udhusoi no),+ gbe edhede Sera nọ o whu no.*+ 20 Rekọ fiki eyaa Ọghẹnẹ, ẹrọwọ riẹ o whrehe he; ukpoye ẹrọwọ riẹ ọ kẹ riẹ ẹgba, ọ tẹ rọ ere kẹ Ọghẹnẹ oruaro, 21 yọ u mu rie ẹro ziezi nọ oware nọ Ọghẹnẹ ọ ya eyaa riẹ na Ọ te sai ru ei gba.+ 22 Fikiere “a te kele iei kẹe wọhọ ẹrẹreokie.”+

23 Rekọ orọnọ fiki riẹ ọvo a ro kere eme nana ha inọ “a te kele oyena kẹe,”+ 24 rekọ fiki mai re enọ a ti kele iei kẹ, keme ma fi ẹrọwọ họ Ọnọ ọ kpare Jesu Olori mai no uwhu ze na.+ 25 Ọ kuvẹ re a kpei fiki iruthọ mai+ yọ a kpare riẹ ze re a ruẹsi kuenu kẹ omai inọ ma kiẹrẹe.+

5 Fikiere nọ a rọ fiki ẹrọwọ kuenu kẹ omai nọ ma kiẹrẹe no na,+ joma reawere udhedhẹ* kugbe Ọghẹnẹ ẹkwoma Olori mai Jesu Kristi,+ 2 ọnọ a rọ fiki ẹrọwọ nọ ma fihọ iẹe dhesẹ uwowou ulogbo nana nọ ma be reawere riẹ na kẹ omai;+ yọ joma ghọghọ* fiki ẹruore oruaro Ọghẹnẹ nọ ma bi ti wo. 3 Orọnikọ ere ọvo ho, rekọ joma ghọghọ* nọ ma tẹ rrọ uye,+ nọ ma riẹ nọ uye o rẹ wha ithihakọ ze na;+ 4 ithihakọ o vẹ wha ọjẹrehọ Ọghẹnẹ ze;+ ọjẹrehọ Ọghẹnẹ o vẹ wha ẹruore ze,+ 5 yọ ẹruore na o re kiekpe ohwo ho;+ keme Ọghẹnẹ ọ rehọ ẹkwoma ẹzi ọfuafo riẹ nọ ọ kẹ omai rọ uyoyou riẹ vọ udu mai no.+

6 Keme okenọ ma gbẹ jọ erahaizi,+ Kristi o whu kẹ enọ e riẹ Ọghẹnẹ hẹ evaọ oke nọ a fihọ. 7 Keme o re bẹbẹ re ohwo jọ o whu kẹ ohwo okiẹrẹe; rekọ ẹsejọhọ rọkẹ ohwo owoma, ohwo jọ ọ sae rọwo nọ o re whu kẹe. 8 Rekọ Ọghẹnẹ o dhesẹ oghẹrẹ nọ uyoyou riẹ o rrọ via kẹ omai, keme nọ ma gbẹ jọ erahaizi, Kristi o whu kẹ omai.+ 9 Whaọ enẹna nọ a rọ ẹkwoma azẹ riẹ kuenu kẹ omai nọ ma kiẹrẹe no na,+ u muẹro nọ a te rọ ẹkwoma riẹ siwi omai no ofu Ọghẹnẹ.+ 10 Keme otẹrọnọ okenọ ma jọ ewegrẹ a ruẹrẹ omai họ kugbe Ọghẹnẹ ẹkwoma uwhu Ọmọ riẹ,+ enẹna nọ ma ruẹrẹhọ kugbei no na, u muẹro gaga nọ a ti siwi omai ẹkwoma uzuazọ riẹ. 11 Orọnikọ ere ọvo ho, ma be ghọghọ re fiki usu nọ ma wo kugbe Ọghẹnẹ ẹkwoma Olori mai Jesu Kristi, ọnọ ma rọ ẹkwoma riẹ ruẹrẹhọ kugbe Ọghẹnẹ no na.+

12 Fikiere, wọhọ epanọ uzioraha o rọ ẹkwoma omọvo* ruọ akpọ na, uwhu u je no uzioraha ze na,+ ere uwhu u ro te ahwo kpobi oma keme aikpobi a raha uzi no+—. 13 Keme uzioraha o rrọ akpọ na no taure Uzi na o tẹ te ze, rekọ a rẹ rọ uzioraha kru ohwo ọvo ho nọ uzi o gbẹ riẹ hẹ.+ 14 Ghele na, uwhu u su wọhọ ovie no oke Adamu rite oke Mosis, u je su makọ enọ e raha uzi wọhọ epaọ uzioraha Adamu hu, ọnọ ọ rọ edhere jọ tho ọnọ a je rẹro riẹ na.+

15 Rekọ okẹ na u wo ohẹriẹ no oruthọ* na. Keme otẹrọnọ oruthọ ọzae ọvo o wha uwhu se ahwo buobu, uwowou ulogbo Ọghẹnẹ gbe okẹ ọvọvẹ riẹ ẹkwoma uwowou ulogbo ọzae ọvo,+ Jesu Kristi o be wha irere buobu* se ahwo buobu.+ 16 Ofariẹ, oware nọ okẹ ọvọvẹ na o wha ze u wo ohẹriẹ no onọ uzioraha ọzae ọvo na o wha ze.+ Keme oruthọ ọvo o wha oziẹ obrukpe ze,+ rekọ okẹ nọ Ọghẹnẹ ọ kẹ nọ iruthọ buobu e romavia no o wha riẹ ze nọ a ro rri ahwo buobu kiẹrẹe.+ 17 Keme otẹrọnọ fiki oruthọ ọzae ọvo uwhu u su wọhọ ovie ẹkwoma riẹ,+ u muẹro nọ enọ a dhesẹ uwowou ulogbo buobu kẹ jẹ kẹ okẹ ọvọvẹ ẹrẹreokie+ na a te jọ ivie nọ i ti su+ je wo uzuazọ ẹkwoma omọvo nana, Jesu Kristi.+

18 Fikiere wọhọ epanọ oruthọ ọvo ọ wha obrukpe se oghẹrẹ ahwo kpobi na,+ ere ọvona oware ukiẹrẹe ọvo o wha riẹ ze nọ a bi ro kuenu kẹ oghẹrẹ ahwo kpobi+ nọ a kiẹrẹe re a jọ uzuazọ.+ 19 Keme wọhọ epanọ aghẹmeeyo ọzae ọvo o ru ahwo buobu zihe ruọ erahaizi na,+ ere ọvona a te rọ fiki ẹmeoyo omọvo ru ahwo buobu kiẹrẹe.+ 20 Whaọ a rehọ Uzi na ze re iruthọ i vihọ.+ Rekọ epanọ ahwo a raha izi bu te, ere uwowou ulogbo Ọghẹnẹ u bu te re. 21 Fiki ẹjiroro vẹ? Re wọhọ epanọ uzioraha u su wọhọ ovie,+ nọ o wha uwhu ze na, ere ọvona uwowou ulogbo u ti su wọhọ ovie evaọ ẹrẹreokie re o wha uzuazọ ebẹdẹ bẹdẹ ze ẹkwoma Jesu Kristi Olori mai.+

6 Nọ o rrọ ere na, eme ma rẹ ta? Kọ ma rẹ ruabọhọ uzioraha re Ọghẹnẹ ọ ruẹsi dhesẹ uwowou ulogbo buobu kẹ omai? 2 Vievie! Nọ ma ruẹ nọ ma whu kẹ uzioraha no na,+ kọ ma rẹ gbẹ ruabọhọ jọ eva riẹ yeri?+ 3 Hayo kọ wha gbẹ riẹ nọ mai kpobi nọ e họ-ame fihọ Kristi Jesu na,+ ma họ-ame fihọ uwhu riẹ?+ 4 Fikiere a ki omai kugbei ẹkwoma ame-ọhọ nọ ma họ fihọ uwhu riẹ,+ re wọhọ epanọ a kpare Kristi no uwhu ze ẹkwoma oruaro Ọsẹ na, ere ọvona ma re yeri uzuazọ okpokpọ re.+ 5 Otẹrọnọ ma kuomagbei evaọ oghẹrẹ uwhu nọ o whu,+ ma ti kuomagbei re evaọ oghẹrẹ ẹkparomatha riẹ.+ 6 Keme ma riẹ nọ a tehe uruemu anwae mai fihọ ure kugbei,+ re oma uzioraha mai u gbe wo ẹgba ha,+ re ma gbẹ jọ erigbo kẹ uzioraha ha.+ 7 Keme ọnọ o whu no yọ a si uzioraha riẹ noi uzou no.*

8 Ofariẹ, otẹrọnọ ma lele Kristi whu, ma rọwo nọ ma te rria kugbei re. 9 Keme ma riẹ nọ enẹna nọ a kpare Kristi no uwhu ze no na,+ o gbe ti whu ofa ha;+ uwhu o gbẹ jọ olori kẹe he. 10 Keme uwhu nọ o whu na, o whu ẹsiẹvo rọkẹ oke kpobi fiki uzioraha,*+ rekọ uzuazọ nọ ọ be rria, ọ be rriae kẹ Ọghẹnẹ. 11 Epọvo na re, wha rri omarai nọ wha whu kẹ uzioraha no rekọ wha be rria kẹ Ọghẹnẹ ẹkwoma Kristi Jesu.+

12 Fikiere, wha kuvẹ hẹ re uzioraha u gbe su owhai wọhọ ovie evaọ ugboma rai nana nọ u re whu na,+ re wha ru lele isiuru ugboma rai. 13 Yọ wha gbẹ rehọ oma* rai kẹ uzioraha ha wọhọ ekwakwa nọ e rrọ rọkẹ emuemu, rekọ wha rehọ omarai kẹ Ọghẹnẹ wọhọ enọ e kparoma no uwhu ze no, wha vẹ jẹ rehọ oma* rai kẹ Ọghẹnẹ wọhọ ekwakwa nọ e rrọ rọkẹ ẹrẹreokie.+ 14 Wha kuvẹ vievie he re uzioraha o jọ olori kẹ owhai, nọ orọnọ wha rrọ otọ uzi hi+ rekọ otọ uwowou ulogbo na.+

15 Kọ eme ma rẹ sae ta? Kọ ma rẹ raha uzi fikinọ ma rrọ otọ uzi hi rekọ otọ uwowou ulogbo?+ Vievie! 16 Kọ wha gbẹ riẹ nọ wha tẹ be romakẹ ohwo jọ wọhọ erigbo nọ i re yoẹme, whai yọ erigbo kẹ ọnọ wha bi yoẹme kẹ na,+ o gbẹ rrọ igbo uzioraha+ nọ u re su kpohọ uwhu hu+ o vẹ jọ orọ ẹmeoyo nọ u re su kpohọ ẹrẹreokie? 17 Rekọ uyere u te Ọghẹnẹ inọ dede nọ wha jọ erigbo kẹ uzioraha vẹre, wha yoẹme no udu ze kẹ oghẹrẹ uwuhrẹ nọ a rehọ owhai ziọ otọ riẹ na. 18 Ẹhẹ, nọ a si owhai no igbo uzioraha no na,+ wha te zihe ruọ erigbo ẹrẹreokie.+ 19 Eme nọ i re vẹ ahwo-akpọ ẹro mẹ be rọ ta ẹme kẹ owhai na fiki uwo rai nọ o ga ha; nwane wọhọ epanọ wha rehọ ekwakwa oma rai ru erigbo kẹ egbegbe avọ emuemu nọ u re su kpohọ emuemu* na, enẹna wha rehọ ekwakwa oma rai ru erigbo kẹ ẹrẹreokie nọ u re ru owhai jọ ọrẹri.+ 20 Keme okenọ wha jọ erigbo kẹ emuemu, wha jọ otọ ẹrẹreokie he.

21 Oghẹrẹ ubi vẹ wha jẹ mọ evaọ oke yena? Eware nọ e be vuọ owhai oma enẹna. Keme uwhu họ ekuhọ eware yena.+ 22 Rekọ, enẹna nọ a si owhai no otọ igbo uzioraha no nọ wha je zihe ruọ erigbo kẹ Ọghẹnẹ no na, wha be mọ ubi rai evaọ edhere ọrẹri,+ yọ uzuazọ ebẹdẹ bẹdẹ u ti noi ze.+ 23 Keme osa nọ uzioraha o rẹ hwa họ uwhu,+ rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ+ ẹkwoma Kristi Jesu Olori mai.+

7 Inievo, kọ o sae jọ nọ wha riẹ hẹ (keme mẹ be ta ẹme kẹ enọ e riẹ uzi) inọ Uzi na o rrọ olori kẹ ohwo nọ ọ rrọ otọ riẹ evaọ edẹ uzuazọ riẹ kpobi? 2 Wọhọ oriruo, uzi o gba aye nọ ọ rọo no họ inọ ọ rẹ jọ kugbe ọzae riẹ nọ ọzae na ọ rrọ uzuazọ na; rekọ nọ ọzae riẹ o te whu, yọ o no otọ uzi ọzae riẹ no.+ 3 Fikiere nọ ọzae riẹ ọ rrọ uzuazọ na, a re sei obruẹnwae nọ ọ tẹ rọo ọzae ọfa.+ Rekọ nọ ọzae riẹ o te whu, yọ o no otọ uzi riẹ no, fikiere a re sei obruẹnwae he nọ ọ tẹ rọo ọzae ọfa.+

4 Fikiere, inievo mẹ, epọvo na a ru owhai whu no ro si owhai no otọ Uzi na ẹkwoma ugboma Kristi, re wha ruẹsi zihe ruọ erọ Kristi,+ ọnọ a kpare no uwhu ze na,+ re ma mọ ubi kẹ Ọghẹnẹ.+ 5 Keme okenọ ma jẹ rria lele isiuru uwo, isiuru iyoma nọ Uzi na o fere via na i je su oma* mai, re ma ruẹsi ru eware nọ e rẹ wha uwhu ze.+ 6 Rekọ a si omai no otọ Uzi na no,+ keme ma whu kẹ onọ o jẹ rọ ifi gba omai na no, re ma sae jọ erigbo evaọ edhere ọkpokpọ ẹkwoma ẹzi na,+ orọnikọ evaọ edhere anwae na ha orọ uzi na nọ a kere fihotọ.+

7 Kọ eme ma rẹ ta? Kọ Uzi na o thọ?* Vievie! Evaọ uzẹme, mẹ hae riẹ oware nọ uzioraha o rrọ họ o gbẹ rrọ Uzi na ha.+ Wọhọ oriruo, mẹ hae riẹ nọ urusio eware amọfa o thọ họ Uzi na o gbẹ ta ha inọ: “Who siuru oware omọfa vievie he.”+ 8 Rekọ fiki ujaje na, uzioraha o fere koghẹrẹ koghẹrẹ urusio eware amọfa nọ o rrọ eva mẹ via, keme okenọ uzi o jariẹ hẹ, uzioraha o jariẹ hẹ.+ 9 Evaọ uzẹme, evaọ okenọ uzi o jariẹ hẹ mẹ jọ uzuazọ. Rekọ nọ ujaje na o ze, uzioraha o tẹ ziọ uzuazọ, rekọ me te whu.+ 10 Yọ ujaje nana nọ o hai su kpohọ uzuazọ,+ mẹ ruẹ nọ u su kpohọ uwhu. 11 Keme uzioraha o rọ uvẹ nọ uzi na o kẹ riẹ liẹliẹ omẹ họ, o tẹ rọ ẹkwoma riẹ kpe omẹ. 12 Fikiere Uzi na omariẹ o rrọ ọrẹri, yọ ujaje na o rrọ ọrẹri, u kiẹrẹe je woma.+

13 Kọ oware uwoma oye o wha uwhu se omẹ na? Vievie! Rekọ uzioraha oye o rehọ ẹkwoma oware uwoma wha uwhu se omẹ re o ruẹsi dhesẹ oware nọ uzioraha o rrọ via.+ Yọ ujaje na u dhesẹ via nọ uzioraha u yoma gaga.+ 14 Keme ma riẹ nọ obọ Ọghẹnẹ Uzi na u no ze, rekọ mẹ uwo, a zẹ omẹ fihọ otọ uzioraha.+ 15 Me wo otoriẹ oware nọ me bi ru hu. Keme oware nọ mẹ gwọlọ ru, me bi ru ei hi, rekọ oware nọ me mukpahe me bi ru. 16 Rekọ otẹrọnọ oware nọ mẹ gwọlọ ru hu oye me bi ru, mẹ rọwo nọ Uzi na u woma. 17 Whaọ mẹ o bi ru eware nana ha, rekọ uzioraha nọ o rrọ eva mẹ.+ 18 Keme mẹ riẹ nọ oware uwoma ovo o rrọ eva mẹ hẹ, koyehọ evaọ uwo mẹ; keme mẹ gwọlọ ru oware uwoma, rekọ me wo ẹgba nọ me re ro ru ei hi.+ 19 Keme oware uwoma nọ mẹ gwọlọ ru me bi ru ei hi, rekọ oware uyoma nọ mẹ gwọlọ ru hu oye mẹ be hai ru. 20 Otẹrọnọ oware nọ mẹ gwọlọ ru hu oye me bi ru, kiyọ mẹ o bi ru ei na ha, rekọ uzioraha nọ o be rria oma mẹ.

21 Fikiere mẹ jọ oma mẹ ruẹ uzi nana: Nọ mẹ tẹ gwọlọ ru oware nọ u kiehọ, oware uyoma o vẹ romavia.+ 22 Evaọ udu mẹ, o ginẹ rrọ isiuru mẹ re me koko uzi Ọghẹnẹ,+ 23 rekọ mẹ be jọ oma* mẹ ruẹ uzi ofa jọ nọ u bi lele uzi iroro mẹ fi ẹmo,+ u te bi su omẹ kpohọ igbo uzi uzioraha+ nọ o rrọ oma* mẹ. 24 Me fioka ohwo ho! Ono o ti siwi omẹ no ugboma nọ u bi su omẹ kpohọ uwhu nana? 25 Uyere u te Ọghẹnẹ ẹkwoma Jesu Kristi Olori mai! Fikiere, mẹ rrọ ọrigbo kẹ uzi Ọghẹnẹ evaọ iroro mẹ, rekọ evaọ uwo mẹ, mẹ rrọ ọrigbo kẹ uzi uzioraha.+

8 Fikiere enọ e rrọ usu kugbe Kristi Jesu a wo obrukpe he. 2 Keme uzi ẹzi ọfuafo na nọ o rẹ rọ uzuazọ kẹ enọ e rrọ usu kugbe Kristi Jesu na u si owhai no igbo+ uzi uzioraha gbe orọ uwhu no. 3 Oware nọ Uzi na o sai ru hu+ fikinọ uwo na u ru nọ u gbe ro wo ẹgba ha,+ Ọghẹnẹ o ru rie ẹkwoma Ọmọ riẹ nọ o vi ze,+ ọnọ o wo oghẹrẹ oma ahwo-akpọ nọ a gba ha,+ re o si uzioraha no otọ. Ọ tẹ rọ ere brukpe uzioraha evaọ uwo na, 4 re ma sai ru eware ikiẹrẹe nọ Uzi na o gwọlọ gba+ fikinọ ma bi ru* lele uwo na ha rekọ ma bi ru lele ẹzi na.+ 5 Keme enọ i bi yeri uzuazọ rai lele uwo na a re fi iroro rai họ eware uwo,+ rekọ enọ i bi yeri uzuazọ rai lele ẹzi na a re fi iroro rai họ eware ẹzi na.+ 6 Keme iroro nọ a re fihọ eware uwo o rẹ wha uwhu ze,+ rekọ iroro nọ a re fihọ eware ẹzi o rẹ wha uzuazọ gbe udhedhẹ ze;+ 7 iroro nọ a re fihọ eware uwo u re ru ohwo họ ọwegrẹ Ọghẹnẹ,+ keme uwo na o rẹ romakpotọ kẹ uzi Ọghẹnẹ hẹ, ẹhẹ, o rẹ sai ru ere vievie he. 8 Fikiere ahwo nọ a bi lele isiuru uwo a rẹ sai ru Ọghẹnẹ eva were he.

9 Rekọ ẹzi Ọghẹnẹ ọ tẹ ginẹ rrọ owhai oma, kiyọ wha bi yeri uzuazọ nọ o rọwokugbe ẹzi na,+ orọnikọ uwo ho. Otẹrọnọ ohwo jọ o wo ẹzi Kristi hi, ohwo nana ọ rrọ ọriẹ hẹ. 10 Rekọ wha tẹ rrọ usu kugbe Kristi,+ yọ ugboma na u whu no fiki uzioraha, ẹzi na ọ vẹ kẹ uzuazọ fiki ẹrẹreokie. 11 Otẹrọnọ ẹzi ọnọ ọ kpare Jesu no uwhu ze na ọ rrọ owhai oma, ọnọ ọ kpare Kristi Jesu no uwhu ze na+ o ti ru ugboma rai nọ u re whu na jọ uzuazọ+ ẹkwoma ẹzi riẹ nọ ọ rrọ owhai oma.

12 Fikiere, inievo, oware jọ o riẹ nọ o gba omai họ nọ ma re ru, ma re yeri uzuazọ mai lele uwo ho;+ 13 keme wha te bi yeri uzuazọ rai lele uwo, wha ti whu hrọ; rekọ wha tẹ rọ ẹkwoma ẹzi na kpe iruemu uwo no oma rai,+ wha ti wo uzuazọ.+ 14 Keme ahwo kpobi nọ ẹzi Ọghẹnẹ ọ be kpọ yọ emọ Ọghẹnẹ.+ 15 Orọnikọ ẹzi nọ o re fi ohwo họ igbo ọye a kẹ owhai hi, onọ o rẹ wariẹ wha ozọ ze, rekọ a kẹ owhai ẹzi nọ a ro ru owhai họ emọ, ẹzi nọ ọ be wọ omai bo nọ: “Abba,* Ọsẹ!”+ 16 Ẹzi na omariẹ o re se isẹri kugbe ẹzi mai+ inọ mai yọ emọ Ọghẹnẹ.+ 17 Fikiere otẹrọnọ mai yọ emọ, mai yọ ereuku re, enọ Ọghẹnẹ ọ te kẹ ukuoriọ, ibe ereuku+ kugbe Kristi, thakpinọ ma lele i rie ruẹ uye+ re ma sai lele iei wo oruaro re.+

18 Fikiere me se uye-oruẹ oke nana gboware ovo ho nọ mẹ tẹ rehọ iẹe wawo oruaro nọ a ti dhesẹ via evaọ oma mai.+ 19 Keme emama na e be rọ ọwhọ rẹro oke nọ a ti ro dhesẹ emọ Ọghẹnẹ via.+ 20 Keme o ru re emama na a yeri uzuazọ ufofe,+ orọnikọ fiki oreva emama na ha rekọ fiki oreva ọnọ o ru rie na, avọ ẹruore nọ ọ kẹ rai 21 inọ emama na omarai re a ti no igbo+ egbogbo je wo ufuoma oruaro ọrọ emọ Ọghẹnẹ. 22 Keme ma riẹ nọ emama kpobi a bi dimẹ jẹ be ruẹ uye edada kugbe rite enẹna. 23 Orọnikọ ere ọvo ho, rekọ mai omamai re enọ i wo ubi ọsosuọ na, koyehọ ẹzi na, ẹhẹ, ma be jọ eva mai dimẹ+ nọ ma be rọ ọwhọ hẹrẹ okenọ a ti ru omai họ emọ,+ okenọ a te rọ ẹkwoma ẹtanigbo na si omai no ugboma iwo mai na. 24 Keme a rọ ẹruore nana siwi omai; rekọ ẹruore nọ o rugba no o gbẹ rrọ ẹruore he, keme nọ ohwo ọ tẹ ruẹ oware no, kọ o re je rẹro riẹ? 25 Rekọ ma te bi rẹro+ oware nọ ma re ruẹ hẹ,+ ma rẹ rọ ọwhọ hẹrẹ iẹe avọ ithihakọ.+

26 Epọvo na re, ẹzi na o re kuobọgbe fiobọhọ kẹ omai evaọ eria nọ ma jọ ga ha;+ keme ẹbẹbẹ na họ ma riẹ oware nọ ma rẹ lẹ kẹ hẹ wọhọ epanọ o gwọlọ, rekọ ẹzi na o re fiobọhọ kẹ omai yare nọ ma te bi dimẹ eva obeva.* 27 Rekọ ọnọ ọ rẹ kiẹ udu riwi+ na ọ riẹ oware nọ ẹzi na o bi ru, keme o be yare eware nọ e rọwokugbe oreva Ọghẹnẹ kẹ erẹri na.

28 Ma riẹ nọ Ọghẹnẹ o bi ru iruo riẹ kpobi rọwokugbe ohwohwo rọkẹ ewoma enọ i you Ọghẹnẹ, enọ a se na wọhọ epaọ ẹjiroro riẹ;+ 29 keme ọ jiroro na no anwẹdẹ inọ enọ ọ kake rẹriẹ ovao ku na a rẹ te jọ wọhọ Ọmọ riẹ,+ re ọ ruẹse jọ ọmọ ọsosuọ+ evaọ udevie inievo buobu.+ 30 Ofariẹ, enọ ọ jiroro kpahe no anwẹdẹ+ na eye o se re;+ yọ enọ o se na eye o kuenu kẹ re inọ a kiẹrẹe.+ Ukuhọ riẹ, enọ o kuenu kẹ inọ a kiẹrẹe na eye ọ kẹ oruaro re.+

31 Kọ eme ma rẹ ta kpahe eware nana? Ọghẹnẹ ọ tẹ rrọ abọ mai, ono ọ rẹ sae rọsuọ omai?+ 32 Nọ orọnọ ọ tubẹ rọ Ọmọ obọriẹ gboke he rekọ o siobọnoi fiki mai kpobi na,+ kọ tei te Ọmọ na a gbẹ te rọ evawere kẹ omai eware efa kpobi? 33 Ono ọ rẹ sae ta nọ enọ Ọghẹnẹ ọ salọ na a reabe?+ Ọghẹnẹ họ ọnọ o kuenu kẹ ae nọ a kiẹrẹe.+ 34 Ono o re brukpe ai? Kristi Jesu họ ọnọ o whu, ẹhẹ, tubẹ mae rro, ọnọ a kpare no uwhu ze, ọnọ ọ rrọ obọze Ọghẹnẹ+ jẹ be yare Ọghẹnẹ kẹ omai re.+

35 Ono ọ rẹ hẹriẹ omai no uyoyou Kristi?+ Kọ uye hayo idhọvẹ hayo ukpokpoma hayo ohọo hayo ẹbẹba hayo ozọ hayo ọgbọdọ?+ 36 Nwane wọhọ epanọ a kere nọ: “Fiki ra ma be rọ rẹriẹ ovao dhe uwhu kẹse kẹse; a rehọ omai wọhọ igodẹ nọ a re kpe.”+ 37 Ghele na, ma be kparobọ evaọ udevie eware nana kpobi+ ẹkwoma ọnọ o you omai na. 38 Keme u mu omẹ ẹro inọ makọ uwhu hayo uzuazọ hayo ikọ-odhiwu hayo egọmeti, hayo eware nọ e rrọ enẹna hayo eware nọ e te tha hayo ogaga+ 39 hayo ekpehru hayo edidi hayo omama ofa jọ kpobi o rẹ sae hẹriẹ omai no uyoyou Ọghẹnẹ hẹ onọ o rrọ eva Kristi Jesu Olori mai.

9 Uzẹme na mẹ be ta na keme mẹ yọ olele ọrọ Kristi; mẹ be ta ọrue he. Ẹkwoma ẹzi ọfuafo na obruoziẹ-iroro mẹ o bi se isẹri kẹ omẹ, 2 inọ uweri ogaga gbe edada nọ i bi serihọ họ e rrọ udu mẹ. 3 Keme o hae were omẹ o hae jọ nọ mẹ họ ọnọ a hẹriẹ no Kristi, nọ ọ rẹ ruẹ uye fiki inievo mẹ, imoni mẹ nọ ma gbẹ rrọ uwo ovo, 4 enọ e rrọ ahwo Izrẹl. Ae Ọghẹnẹ ọ rehọ wọhọ emọ,+ enọ i wo oruaro na gbe evọ na+ gbe Uzi na+ gbe iruo ọrẹri+ na gbe eyaa na.+ 5 A tẹ jẹ rrọ emọ esẹ-ode na,+ yọ oma rai Kristi na o no ze wọhọ ohwo-akpọ.*+ Jọ ujiro u te Ọghẹnẹ bẹdẹ bẹdẹ, ọnọ o wuzou ahwo kpobi. Ami.

6 Dede na, onana u dhesẹ nọ ẹme Ọghẹnẹ o rugba ha ha. Keme orọnikọ enọ a yẹ kẹ Izrẹl kpobi a ginẹ rrọ “emọ Izrẹl” he.+ 7 Yọ orọnikọ aikpobi a rrọ emọ fikinọ a rrọ emọ* Abraham ho;+ ukpoye: “Oma Aiziki ọnọ a ti se ọmọ* ra o ti no ze.”+ 8 Koyehọ, orọnikọ fikinọ a yẹ ohwo kẹ Abraham a rẹ rọ jọ* emọ Ọghẹnẹ hẹ,+ rekọ emọ nọ a ya eyaa kpahe na họ+ enọ a kele wọhọ emọ* na. 9 Keme enẹ ọ ya eyaa na: “Evaọ oke utiona mẹ te nyaze yọ Sera o ti yẹ ọmọzae.”+ 10 Yọ orọnikọ oke yena ọvo ho, rekọ te okenọ Rebeka o dieva ejime họ kẹ Aiziki, ọsẹ-esẹ mai;+ 11 keme okenọ a ri yẹ emọ na dede he, yọ a ri ru oware uwoma hayo uyoma ovo ho, re ẹjiroro Ọghẹnẹ kpahe ẹsalọ na o jọ inọ obọ Ọghẹnẹ nọ o bi se na o rrọ, orọnikọ fiki iruo ho, 12 a ta kẹe* nọ: “Ọrọ ọkpako na ọ te jọ ọrigbo kẹ ọrọ ọmaha na.”+ 13 Nwane wọhọ epanọ a kere nọ: “Jekọp me you, rekọ me mukpahe Esọ.”+

14 Kọ eme ma rẹ ta? Kọ Ọghẹnẹ o re kienyẹ ahwo? Vievie!+ 15 Keme ọ ta kẹ Mosis nọ: “Mẹ te re ohrọ ohwo kpobi nọ mẹ gwọlọ re ohrọ, yọ me ti dhesẹ ọdawẹ kẹ ohwo kpobi nọ mẹ gwọlọ dhesẹ ọdawẹ kẹ.”+ 16 Fikiere, orọnikọ o roma hwa oware nọ ohwo ọ gwọlọ hayo epanọ ọ daoma te he,* rekọ o rrọ obọ Ọghẹnẹ ọnọ o wo ohrọ-oriọ.+ 17 Enẹ ikereakere na e ta kpahe Fẹro: “Fiki ugogo ẹjiroro nana me ro vu owhẹ wa uzuazọ: re mẹ rọ ẹkwoma ra dhesẹ ogaga mẹ via, gbe re a jọ otọakpọ na soso whowho odẹ mẹ.”+ 18 Fikiere ọ rẹ re ohwo kpobi nọ u je rie ohrọ, rekọ ọ rẹ kẹ ohwo kpobi nọ u je rie uvẹ re o wo udu ogaga.+

19 Fikiere wha te nọ omẹ nọ: “Kọ fikieme ọ gbẹ be rọ fo ahwo inọ a ru thọ? Kọ ono ọ rẹ sae za oreva riẹ dhe?” 20 Rekọ whẹ yọ ono nọ ọ rẹ za ẹme zihe kẹ Ọghẹnẹ?+ Kọ oware nọ a ma ọ rẹ sae ta kẹ ọnọ ọ ma riẹ nọ, “Fikieme whọ rọ ma omẹ enẹ?”+ 21 Emejọ? Kọ ọmebẹ o gbe wo udu nọ ọ rẹ rọ jọ ukulu ọviẹ+ ọvona rehọ ọviẹ ma okwakwa nọ u wo ọghọ, gbe onọ u wo ọghọ họ? 22 Kọ eme ọ thọ otẹrọnọ Ọghẹnẹ o wo udu nọ o re ro dhesẹ ofu riẹ gbe ogaga riẹ via, rekọ ọ rọ odiri ologbo thihakọ kẹ ekwakwa ofu nọ i fo ọraha? 23 Kọ ẹvẹ otẹrọnọ o ru onana re o dhesẹ oruaro ulogbo riẹ via kẹ ekwakwa nọ i fo ohrọ-oriọ,+ enọ ọ ruẹrẹ kpahe no anwẹdẹ rọkẹ oruaro, 24 koyehọ omai, enọ o se, orọnikọ no udevie ahwo Ju ọvo ze he rekọ no udevie erẹwho na ze re,+ eme o jọ oyena thọ? 25 O wọhọ epanọ ọ jọ obe Hosia ta re inọ: “Enọ e rrọ ahwo mẹ hẹ+ me ti se ai ‘ahwo mẹ,’ yọ aye nọ a you hu na me ti sei ‘oyoyou’;+ 26 yọ evaọ oria nọ a jọ ta kẹ ae inọ, ‘Whai yọ ahwo mẹ hẹ,’ a te jọ etẹe se ai ‘emọ Ọghẹnẹ nọ ọ rrọ uzuazọ na.’”+

27 Ofariẹ, Aizaya o bo via kpahe Izrẹl nọ: “Emọ Izrẹl a tẹ make rrọ buobu wọhọ uwẹkpẹ abade, ikiọkotọ na ọvo a ti siwi.+ 28 Keme Jihova* o ti gu otọakpọ na ẹdhọ, yọ o ti bruoziẹ riẹ kpobi ababọ oke oraha.”*+ 29 Ofariẹ, nwane wọhọ epanọ Aizaya ọ ruẹaro: “Ogbẹrọnọ Jihova* olori egbaẹmo na ọ nyasiọ emọ* jọ ba kẹ omai hi, ma hae te jọ wọhọ Sọdọm, yọ ma hae te jọ wọhọ Gomora.”+

30 Kọ eme ma rẹ ta kpahe onana? Inọ ahwo erẹwho na, dede nọ a jẹ daoma re a kiẹrẹe he,+ a kiẹrẹe fiki ẹrọwọ;+ 31 rekọ Izrẹl, dede nọ a jẹ daoma koko uzi ẹrẹreokie, a sai koko uzi yena ha. 32 Emejabọ? Keme a je ru onana avọ ẹrọwọ họ, rekọ wọhọ ẹsenọ a te rọ iruo ro woi tobọ. A te zoruẹ fiki “utho ezoruẹ” na;+ 33 wọhọ epanọ a kere nọ: “Rri! Mẹ be wọ utho+ ezoruẹ gbe utho ọzadhe họ otọ evaọ Zayọn, rekọ ohwo nọ o fi ẹrọwọ họ iẹe u ti kiekpei hi.”+

10 Inievo, ẹgwọlọ udu mẹ gbe oware nọ mẹ be yare Ọghẹnẹ kẹ ae gaga họ re a wo esiwo.+ 2 Keme me bi se isẹri kẹ ae inọ a wo ajọwha Ọghẹnẹ ọgọ,+ rekọ a be rọ eriariẹ egbagba ru ei hi. 3 Keme, fikinọ a riẹ ẹrẹreokie Ọghẹnẹ hẹ+ rekọ a be gwọlọ rehọ orọ obọrai mu,+ a rọ omarai kẹ ẹrẹreokie Ọghẹnẹ hẹ.+ 4 Keme Kristi họ ekuhọ Uzi na,+ re ohwo kpobi nọ o bi fi ẹrọwọ họ iẹe ọ sai kiẹrẹe.+

5 Keme Mosis o kere kpahe ẹrẹreokie nọ u re no Uzi na ze, inọ: “Ohwo nọ o bi ru eware nana ọ rẹ jọ uzuazọ fiki rai.”+ 6 Rekọ a ta kpahe ẹrẹreokie nọ o re no ẹrọwọ ze, inọ: “Whọ jọ udu ra ta ha inọ,+ ‘Ono o ti kpobọ odhiwu?’+ koyehọ, re ọ rehọ Kristi ziọ otọ, 7 hayo, ‘Ono o ti kpobọ ọgọdọ odidi?’+ koyehọ, re ọ kpare Kristi no uwhu ze.” 8 Rekọ eme Ikereakere na e ta? E ta nọ: “Ẹme na ọ kẹle owhẹ, o rrọ unu ra gbe eva udu ra”;+ koyehọ, “ẹme” ẹrọwọ na, onọ ma bi whowho na. 9 Keme whọ tẹ jọ ẹgbede rọ unu ra whowho inọ Jesu họ Olori,+ je wo ẹrọwọ evaọ udu ra inọ Ọghẹnẹ ọ kpare riẹ no uwhu ze, a ti siwi owhẹ. 10 Keme evaọ udu na ohwo o re jo wo ẹrọwọ nọ u re ru ei kiẹrẹe, rekọ unu na ohwo o re ro whowho via kẹ amọfa+ re o wo esiwo.

11 Keme ikereakere na e ta nọ: “Ohwo ọvuọvo nọ o fi ẹrọwọ họ iẹe nọ u re kiekpe ọ riẹ hẹ.”+ 12 Keme ohẹriẹ o rrọ udevie ahwo Ju avọ ahwo Griki hi.+ Olori ọvona o wuzou rai kpobi, ọnọ o re ku eghale ku* ahwo kpobi nọ a bi se odẹ riẹ. 13 Keme “ohwo kpobi nọ o bi se odẹ Jihova* a ti siwi ei.”+ 14 Rekọ, ẹvẹ a re ro sei otẹrọnọ a ri fi ẹrọwọ họ iẹe he? Kọ ẹvẹ a re ro fi ẹrọwọ họ ọnọ a ri yo kpahe he? Kọ ẹvẹ a re ro yo ababọ ohwo jọ nọ o re whowho ovuẹ na? 15 Kọ ẹvẹ a re ro whowho ovuẹ na ajokpanọ a vi rai?+ Nwane wọhọ epanọ a kere nọ: “Rri erru nọ ọ rrọ awọ enọ e be ta usi uwoma orọ emamọ eware!”+

16 Ghele na, orọnikọ ahwo kpobi a dede usi uwoma na rehọ họ. Keme Aizaya ọ ta nọ: “Jihova,* ono o fi ẹrọwọ họ oware nọ a yo mi omai?”*+ 17 Fikiere ohwo o re wo ẹrọwọ nọ o te yo kpahe oware no.+ Yọ oware nọ a yo na, ẹkwoma ẹme nọ a ta kpahe Kristi a ro yoi. 18 Rekọ mẹ be nọ inọ, Kọ a yo ẹme na ha? A yo. Evaọ uzẹme, “edo rai o do ruọ otọakpọ na soso, yọ ovuẹ rai u te oka avọ oka otọakpọ na.”+ 19 Rekọ mẹ be nọ inọ, Kọ emọ Izrẹl a gbẹ riẹ onana? A riẹ.+ Orọ ọsosuọ, Mosis ọ ta nọ: “Mẹ te rehọ orẹwho nọ u fioka ha ru owhai re ihri; mẹ te rọ orẹwho ogheghẹ ru owhai mu ofu ọgaga.”+ 20 Rekọ Aizaya ọ ta ududu inọ: “Enọ e jẹ gwọlọ omẹ hẹ a ruẹ omẹ;+ enọ e jẹ nekpẹ mẹ hẹ a tẹ te riẹ omẹ.”+ 21 Rekọ ọ ta kpahe Izrẹl nọ: “Okpẹdoke na soso* mẹ rriẹ abọ mẹ kẹ ahwo aghẹmeeyo nọ a wo udu ogaga.”+

11 Fikiere mẹ be nọ inọ, Kọ Ọghẹnẹ ọ siọ ahwo riẹ?+ Vievie! Keme mẹ yọ ohwo Izrẹl re, ọmọ* Abraham, nọ o no orua Bẹnjamin ze. 2 Ọghẹnẹ ọ siọ ahwo riẹ hẹ, enọ ọ kake rẹriẹ ovao ku.+ Kọ wha gbẹ riẹ eme nọ ikereakere na e ta kpahe Elaejah, okenọ o je bo se Ọghẹnẹ fiki eware nọ emọ Izrẹl a je ru? 3 “Jihova,* a kpe eruẹaro ra no, a kporo egbada-idhe ra no, mẹ ọvo o kiọkọ, yọ enẹna a be gwọlọ uzuazọ* mẹ kpe.”+ 4 Ghele na, eme Ọghẹnẹ ọ ta kẹe? “Me gbe wo ahwo idu ihrẹ (7,000) nọ i kiọkọ kẹ omẹ nọ ighilawọ rai i ri kigwẹ kẹ Bale he.”+ 5 Epọvo na, evaọ oke nana re, ejọ i kiọkọ+ nọ Ọghẹnẹ ọ salọ fiki uwowou ulogbo riẹ. 6 Whaọ o tẹ rrọ fiki uwowou ulogbo,+ kiyọ o gbẹ rrọ fiki iruo ho;+ o tẹ rrọ fiki iruo, o rẹ gbẹ jọ uwowou ulogbo ho.

7 Kọ eme ma rẹ ta? Oware nọ Izrẹl ọ be rọ ọwhọ gwọlọ o wo rie te obọ họ, rekọ u te enọ a salọ na obọ.+ Enọ i kiọkọ a wuhu iroro rai di,+ 8 nwane wọhọ epanọ a kere nọ: “Ọghẹnẹ ọ kẹ rai ẹzi owezẹ udidi,+ ibiaro nọ e rẹ ruẹ ude he, gbe ezọ nọ i re yo ẹme he, rite inẹnẹ na.”+ 9 Ofariẹ, Devidi ọ ta nọ: “Jọ emẹjẹ rai o zihe ruọ agbefẹ gbe ẹta gbe utho ezoruẹ gbe osa emuemu rai. 10 Jọ ibiaro rai i thuru ebi re a gbẹ ruẹ ude he, re a je zulẹ uke ẹsikpobi.”+

11 Fikiere mẹ be nọ inọ, Kọ a zoruẹ je kie totọ riẹriẹriẹ? Vievie! Rekọ ọnyathọ rai u rovie uvẹ esiwo kẹ ahwo erẹwho na, re u ru ai re ihri.+ 12 Whaọ otẹrọnọ ọnyathọ rai o wha eghale se akpọ na, yọ ekiekpotọ rai o wha eghale se ahwo erẹwho na,+ eghale nọ i ti te ahwo i ti bu kẹhẹ nọ unu rai o tẹ gba no!

13 Whaọ mẹ be ta ẹme kẹ owhai enọ e rrọ ahwo erẹwho na. Nọ orọnọ mẹ yọ ukọ rọkẹ erẹwho na,+ me bi bru ọghọ họ odibọgba mẹ,*+ 14 re mẹ ruẹ sọ mẹ sae rọ edhere jọ ru ahwo orẹwho mẹ* re ihri re mẹ rọ ere siwi ejọ evaọ udevie rai. 15 Keme otẹrọnọ ẹse nọ ọ se rai+ o lẹliẹ akpọ na wo uvẹ ẹruẹrẹhọ kugbe Ọghẹnẹ, edederehọ rai u ti ru ai no uwhu wariẹ ziọ uzuazọ. 16 Ofariẹ, otẹrọnọ abọ ukulu na nọ a rehọ wọhọ ibi ọsosuọ ọ rrọ ọrẹri, oma ukulu na soso o rrọ ọrẹri re; yọ otẹrọnọ owọ ure o rrọ ọrẹri, egha na e rrọ ọrẹri re.

17 Rekọ otẹrọnọ a gbẹre egha na jọ no, a jẹ rehọ owhai nọ e rrọ egha ure olivi ẹri ze, a jẹ gba owhai fihọ ure na kugbe ai, wha je bi lele ai da emamọ ame nọ o bi no awọ ure olivi na ze, 18 wha fu uke* kẹ egha nọ a gbẹre no na ha. Rekọ wha te bi fu uke* kẹ ae,+ wha kareghẹhọ nọ orọnikọ whai wha ru awọ ure na dikihẹ hẹ, awọ ure na i ru owhai dikihẹ. 19 Whaọ, wha te ta nọ: “A gbẹre egha jọ no re a ruẹse gba omai fihọ ure na.”+ 20 Ginọ ere! A gbẹre rai no fikinọ a kare ẹrọwọ,+ rekọ fiki ẹrọwọ rai wha rọ daji ure na.+ Wha bru omorro ho, rekọ wha dhozọ. 21 Keme otẹrọnọ Ọghẹnẹ o vu egha nọ e ta no oma ure na ze wa ha, o ti vu owhai wa gbe he wha te ru epọvo na. 22 Fikiere, wha hae kareghẹhọ aruoriwo+ gbe evedha Ọghẹnẹ. Ọ be dha eva kẹ enọ i kie na,+ rekọ wha wo aruoriwo riẹ, thakpinọ wha ruabọhọ bi ru epanọ wha rẹ rọ daji aruoriwo riẹ; o gbẹ rrọ ere he, a te gbẹre owhai no re. 23 Yọ ae omarai re, a tẹ wariẹ wo ẹrọwọ, a te gba ae zihe fihọ ure na,+ keme Ọghẹnẹ ọ rẹ sae gba ae zihe fihọ iẹe. 24 Keme otẹrọnọ a gbẹre owhai no ure olivi ẹwọ na ze a tẹ gba owhai fihọ ure olivi nọ a kọ, onọ u wo ohẹriẹ no epanọ Ọghẹnẹ ọ ma riẹ no otọ ze, o rẹ mae lọhọ re a gba egha nọ i no oma ure olivi na ze dẹẹ zihe fihọ ure na.

25 Keme mẹ gwọlọ nọ wha jọ igbori oware udidi ọrẹri nana ha,+ inievo, re wha siọ omarai ba erri inọ wha wo areghẹ gaga. Oware udidi ọrẹri na họ: Emọ Izrẹl a wuhu iroro rai di bẹsenọ a re koko unu ahwo erẹwho na họ gba no, 26 enẹ a ti ro siwi Izrẹl kpobi.+ Nwane wọhọ epanọ a kere nọ: “Osiwi na o ti no Zayọn ze,+ o ve ti si iruemu iyoma no Jekọp no. 27 Yọ onana họ ọvọ nọ mẹ te re kugbe ai,+ okenọ mẹ te rehọ izieraha rai rọvrẹ rai.”+ 28 Evaọ uzẹme, a rrọ ewegrẹ Ọghẹnẹ fikinọ a siọ usi uwoma na, onọ o wha erere se owhai. Rekọ fikinọ Ọghẹnẹ ọ rọ fiki esẹ-esẹ rai salọ ejọ, o rri rai ghaghae.+ 29 Keme Ọghẹnẹ ọ rẹ vioja ekẹ gbe use riẹ hẹ. 30 Keme wọhọ epanọ wha jẹ ghẹmeeyo kẹ Ọghẹnẹ vẹre na,+ rekọ a jẹ re owhai ohrọ+ fiki aghẹmeeyo rai* na,+ 31 ere ọvona ae omarai a ghẹmeeyo enẹna, onọ o wha ohrọ-oriọ se owhai, re a ruẹsi dhesẹ ohrọ-oriọ kẹ ai re enẹna. 32 Keme Ọghẹnẹ ọ kẹ rai kpobi uvẹ re a ghẹmeeyo,+ re ọ ruẹsi dhesẹ ohrọ-oriọ kẹ aikpobi.+

33 O, rri epanọ efe Ọghẹnẹ avọ areghẹ gbe eriariẹ riẹ i kodo te! A rẹ sae kiẹ otọ iziẹibro riẹ via ha, yọ a rẹ sae gwọlọ idhere riẹ via ha. 34 Keme “ono ọ riẹ iroro Jihova,* hayo kọ ono họ ọkiroro riẹ?”+ 35 Hayo, “ono ọ kake kẹe oware jọ, nọ o jẹ gbae họ nọ ọ rẹ hwae zihe kẹe?”+ 36 Keme obọriẹ eware kpobi i no ze, ọye ọ ma rai, yọ fiki riẹ a rọ rrọ uzuazọ. Jọ oruaro u tei bẹdẹ bẹdẹ. Ami.

12 Fikiere, inievo, mẹ be lẹ owhai fiki ọdawẹ nọ Ọghẹnẹ o wo inọ wha rehọ ugboma rai dhe idhe+ nọ e rrọ uzuazọ, ọrẹri,+ onọ Ọghẹnẹ ọ rẹ jẹrehọ, re wha rọ ẹgba iroro rai ru iruo ọrẹri kẹe.*+ 2 Wha gbẹ kuvẹ re uyero-akpọ* nana o kpọ* owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene,+ re wha sai ru omarai wo imuẹro+ kpahe oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.

3 Keme fiki uwowou ulogbo nọ a dhesẹ kẹ omẹ, mẹ be ta kẹ owhai kpobi inọ ajọ ohwo ọvo o roro omariẹ kpehru vi epanọ u fo ho,+ rekọ wha roro evaọ oghẹrẹ nọ u re dhesẹ nọ wha wo iroro nọ e gba, wọhọ epaọ utho ẹrọwọ nọ Ọghẹnẹ ọ kẹ* omomọvo.+ 4 Keme wọhọ epanọ ma wo ekwakwa sa-sa evaọ ugboma ovona,+ rekọ aikpobi a wo iruo evona ha na, 5 ere ọvona, dede nọ ma rrọ buobu, mai yọ ugboma ọvo evaọ usu kugbe Kristi, rekọ mai omomọvo yọ ekwakwa nọ e jẹhọ* ohwohwo.+ 6 Nọ orọnọ ma wo ekẹ sa-sa wọhọ epaọ uwowou ulogbo nọ a dhesẹ kẹ omai na,+ o tẹ rrọ orọ eruẹaruẹ, joma ruẹaro wọhọ epanọ ẹrọwọ mai o te; 7 hayo o tẹ rrọ odibọgba, joma ruabọhọ odibọgba na; hayo ọnọ o re wuhrẹ, jọ ọ ruabọhọ ewuhrẹ riẹ;+ 8 hayo ọnọ ọ rẹ tuduhọ ahwo awọ,* jọ ọ kẹ uduotahawọ;*+ ọnọ ọ be kẹ,* jọ ọ kẹ buobu;+ ọnọ ọ be sẹro,* jọ ọ romatotọ ru ei avọ ọwhọ;*+ ọnọ ọ rẹ re ohrọ, jọ o ru ei avọ evawere.+

9 Jọ uyoyou rai o jọ ababọ eviẹhọ.+ Wo utuoma kẹ oware uyoma;+ talamu oware uwoma. 10 Wha wo uvi uyoyou-inievo kẹ ohwohwo. Evaọ ọghọ ọrọkẹ ohwohwo, kobaro.*+ 11 Wha goma iruo,* wha moyẹlẹ hẹ.*+ Jọ ẹzi na o fi ọwhọ họ owhai oma.+ Ru iruo ọrigbo kẹ Jihova.*+ 12 Wha ghọghọ evaọ ẹruore na. Thihakọ evaọ otọ uye.+ Ruabọhọ olẹ.+ 13 Wha ghale eware nọ wha wo kugbe erẹri na wọhọ epaọ ẹgwọlọ rai.+ Wo uruemu ọrara-odederehọ.+ 14 Wha hae lẹ ẹro eghale kẹ enọ i bi kpokpo owhai;+ wha lẹ ẹro eghale kẹ ahwo, wha duwu ahwo iyei hi.+ 15 Lele enọ e be ghọghọ ghọghọ; lele enọ e be viẹ viẹ. 16 Wha ru amọfa epanọ wha bi ru omarai; wha fi iroro rai họ ikpeware he,* rekọ wha romakẹ eware esese.+ Wha rri omarai inọ wha wo areghẹ gaga ha.+

17 Wha rọ eyoma hwosa eyoma kẹ ohwo ọvo ho.+ Wha roro kpahe oware nọ ahwo kpobi a rri nọ u woma.* 18 O tẹ lọhọ, nọ orọnọ obọ rai o rrọ na, wha lele ahwo kpobi rria dhedhẹ.+ 19 Iyoyou, wha kioja kẹ omobọ rai hi, rekọ wha kuvẹ kẹ ofu Ọghẹnẹ;+ keme a kere nọ: “‘Orukele ọmẹ; mẹ te hwa zihe,’ ere Jihova* ọ ta.”+ 20 Rekọ “ohọo u te bi kpe ọwegrẹ ra, kẹe emu re; uruame u te bi kpei, kẹe oware nọ ọ rẹ da; keme ẹkwoma enẹ oruo, who ti koko iwowo-erae fihọ iẹe uzou.”*+ 21 Whọ kuvẹ re eyoma o fi owhẹ kparobọ họ, rekọ hae rehọ ewoma ro fi eyoma kparobọ.+

13 Jọ ohwo* kpobi ọ romakpotọ kẹ enọ i wo udu-esuo okpehru,+ keme udu-esuo ọvuọvo ọ riẹ hẹ ajokpaọ onọ Ọghẹnẹ ọ kuvẹ riẹ;+ Ọghẹnẹ họ ọnọ o ru nọ enọ i bi su na a ro wo umutho udu-esuo nọ a wo na.+ 2 Fikiere ohwo kpobi nọ ọ be wọso enọ i bi su na yọ ọ be wọso ọruẹrẹfihotọ Ọghẹnẹ; enọ e wọso ọruẹrẹfihotọ na a te wha obrukpe se omarai. 3 Keme a rẹ dhozọ isu yena, orọnikọ enọ i bi ru oware uwoma e rẹ dhozọ rai hi rekọ enọ i bi ru oware uyoma.+ Kọ wha gwọlọ jọ ahwo nọ a rẹ dhozọ isu na ha? Wha hai ru ewoma,+ a ti jiri owhai; 4 keme ọgbodibo Ọghẹnẹ ọ rrọ rọkẹ ewoma rai. Rekọ wha te bi ru oware uyoma, jọ ozọ u mu owhai, keme gheghe ọ be rọ wha ọgbọdọ họ. Ọgbodibo Ọghẹnẹ ọ rrọ, nọ o re ru orukele, nọ o re ro mu ofu* kẹ ọnọ o bi ru eyoma.

5 Fikiere o roja gaga re wha romakpotọ, orọnikọ fiki ofu yena ọvo ho rekọ fiki obruoziẹ-iroro rai re.+ 6 Oyejabọ nọ wha be rọ hwa osa-uzou re na; keme idibo Ọghẹnẹ nọ i bi ru iruo kẹ ahwo a rrọ re a ruẹsi ru ẹjiroro nana gba kẹse kẹse. 7 Wha kẹ ahwo kpobi onọ u te rai: ọnọ ọ gwọlọ osa-uzou, wha hwa osa-uzou kẹe;+ ọnọ ọ gwọlọ azọhọ, wha hwa azọhọ kẹe; ọnọ ọ gwọlọ ozodhẹ, wha wo oghẹrẹ ozodhẹ otiọye kẹe;+ ọnọ ọ gwọlọ ọghọ, wha kẹe oghẹrẹ ọghọ otiọye.+

8 Wha reosa ohwo ọvo oware ovo ho, ajokpaọ uyoyou nọ wha re wo kẹ ohwohwo;+ keme ohwo kpobi nọ o you ọrivẹ riẹ o bi ru uzi na gba.+ 9 Keme uzi na nọ o ta nọ, “Who re bruẹnwae vievie he,+ who re kpe ohwo vievie he,+ who re tho uji vievie he,+ who siuru oware omọfa vievie he,”+ gbe ujaje ofa kpobi nọ o riẹ, aikpobi e gba ekru evaọ ẹme nana: “Who re you ọrivẹ ra wọhọ omobọ ra hrọ.”+ 10 Uyoyou u re ru ọrivẹ riẹ eyoma ha;+ fikiere, uyoyou họ orugba uzi na.+

11 Wha ru onana re keme wha riẹ ezi na inọ okenọ wha rẹ rọ rọwo no owezẹ ze u te no,+ keme enẹna esiwo mai ọ kẹle no vi oke nọ ma ro kurẹriẹ.* 12 Aso na o thabọ gaga no; oke o kẹle ẹke no. Fikiere joma siobọno iruo ebi+ re ma whẹ ekwakwa ẹmo erọ elo họ.+ 13 Joma yeri uzuazọ nọ o rrọ kpatiẹ+ wọhọ enọ e be nya evaọ aruvo, orọnikọ evaọ ehaa nọ a rẹ jọ ru eware odode* avọ idieda-thomawa ha, orọnikọ evaọ ọfariẹ-ogbe avọ uruemu nọ u fo ho nọ a re ru ababọ omovuọ họ,*+ orọnikọ evaọ ẹwhọ avọ ihri-eriọ họ.+ 14 Rekọ joma whẹ uruemu Olori na Jesu Kristi họ oma,+ orọnikọ ma rẹ ma omaa epanọ ma re ro ru eware isiuru uwo ho.+

14 Dede ohwo nọ ẹrọwọ riẹ ọ ga ha rehọ,+ rekọ who bruoziẹ hẹ evaọ oware nọ ahwo a jọ wo ọvuọ iroro riẹ.* 2 Ẹrọwọ ohwo jọ ọ rẹ sae kẹe uvẹ re oware kpobi, rekọ ohwo nọ ẹrọwọ riẹ ọ ga ha ọ sae gwọlọ re ẹbe ọvo. 3 Jọ ọnọ ọ be re o rri ọnọ ọ be re he vo ho, yọ ọnọ ọ be re he ọ rọ ọnọ ọ be re na guẹdhọ họ,+ keme Ọghẹnẹ o dede ohwo yena rehọ no. 4 Whẹ yọ ono nọ ọ rẹ rọ odibo omọfa guẹdhọ?+ Olori riẹ họ ọnọ ọ rẹ ta sọ o dikihẹ hayo o kie.+ Yọ o ti dikihẹ keme Jihova* ọ rẹ sai ru ei dikihẹ.

5 Ohwo jọ ọ sai rri ẹdẹ jọ inọ ọ rro vi ẹdẹ ọfa;+ omọfa ọ sai rri edẹ na kpobi ẹrẹrẹe;+ jọ ohwo kpobi ọ ruẹ inọ oware nọ o roro u mu rie ẹro ziezi. 6 Ohwo nọ o bi koko ẹdẹ na, o bi koko iei rọ kẹ Jihova* orro. Yọ ọnọ ọ be re, ọ be re rọ kẹ Jihova* orro, keme ọ be lẹ yere Ọghẹnẹ;+ yọ ọnọ ọ be re he, o bi ru ei rọ kẹ Jihova* orro keme ọ be lẹ yere Ọghẹnẹ.+ 7 Evaọ uzẹme, mai ọvuọvo ọ be rria kẹ omobọ riẹ ọvo ho,+ yọ ohwo ọvo o re whu kẹ omobọ riẹ ọvo ho. 8 Keme ma tẹ rrọ uzuazọ, ma rrọ uzuazọ kẹ Jihova,*+ yọ ma te whu, ma whu kẹ Jihova.* Fikiere, te ma rrọ uzuazọ te ma whu, Jihova* o wo omai.+ 9 Keme fiki onana Kristi o ro whu jẹ wariẹ ziọ uzuazọ, re ọ ruẹse jọ Olori enọ i whu no gbe enọ e rrọ uzuazọ.+

10 Rekọ fikieme whọ be rọ rehọ oniọvo ra guẹdhọ?+ Hayo fikieme who bi ro rri oniọvo ra inọ o fioka ha? Keme mai kpobi ma ti dikihẹ aro akaba oziẹobro Ọghẹnẹ.+ 11 Keme a kere nọ: “‘Nọ mẹ rrọ uzuazọ na,’+ ere Jihova* ọ ta, ‘mẹ eghilowọ kpobi o ti kigwẹ kẹ, yọ ẹrọo kpobi o ti dhesẹ nọ o vuhu Ọghẹnẹ mu.’”+ 12 Fikiere, mai omomọvo o ti gu ẹkẹ-unu riẹ kẹ Ọghẹnẹ.+

13 Fikiere, joma gbẹ rọ ohwohwo guẹdhọ họ,+ rekọ gbaemu inọ who re fi utho ezoruẹ hayo ọzadhe họ kẹ oniọvo ho.+ 14 Mẹ riẹ, u te je mu omẹ ẹro evaọ Olori na Jesu inọ oware ovo o rrọ gbegbe he;+ ajokpaọ okenọ ohwo o te rri oware gbegbe ẹsiẹe o rẹ jọ gbegbe kẹe. 15 Keme otẹrọnọ who bi ru oniọvo ra eva dha fiki emu, kiyọ who gbe bi dhesẹ uyoyou hu.+ Whọ rehọ emu ra rọ raha* ohwo yena ha, ọnọ Kristi o whu kẹ na.+ 16 Fikiere, who ru re a ta eme iyoma kpahe ewoma nọ who bi ru hu. 17 Keme orọnọ ẹkwoma emuọriọ gbe idieda a rẹ rọ ruọ Uvie Ọghẹnẹ hẹ,+ rekọ ẹkwoma ẹrẹreokie gbe udhedhẹ gbe oghọghọ nọ ẹzi ọfuafo o re ru ohwo wo. 18 Keme ohwo kpobi nọ ọ be rọ edhere otiọna gbodibo kẹ Kristi ọ rẹ were Ọghẹnẹ jẹ were ahwo.

19 Fikiere, joma hai ru eware nọ e rẹ wha udhedhẹ ze+ gbe eware nọ e rẹ bọ ohwohwo ga.+ 20 Wha siọ iruo Ọghẹnẹ ba ekporo fihọ otọ fiki emu gheghe.+ Ginọ uzẹme inọ eware kpobi e rrọ fuafo, rekọ o rẹ jọ oware enwoma* re ohwo ọ re emu otẹrọnọ o te wha ezoruẹ ze.+ 21 O mai woma re whọ siọ arao ba ẹre, siọ enwaene ba ẹda, hayo oware ofa kpobi nọ o rẹ lẹliẹ oniọvo ra zoruẹ.+ 22 Jọ ẹrọwọ ra o jọ onọ o rẹ jọ udevie ra avọ Ọghẹnẹ. Jọ eva e were ohwo nọ ọ rẹ rọ oware nọ u kiehọ evaọ aro riẹ ro bruoziẹ omariẹ hẹ. 23 Rekọ o te wo avro, yọ o wo obrukpe no nọ ọ tẹ re, keme ọ be re avọ ẹrọwọ họ. Evaọ uzẹme, oware kpobi nọ a rọ ẹrọwọ ru hu yọ uzioraha.

15 Rekọ u fo re mai nọ e ga a hai fiobọhọ kẹ enọ e ga ha evaọ ẹrọwọ je thihakọ kẹ ai,+ orọnikọ ma re ru eva were omobọ mai hi.+ 2 Jọ mai omomọvo o ru eva were ọrivẹ riẹ, onọ o rẹ kẹe erere, re o bọe ga.+ 3 Keme makọ Kristi o ru omobọ riẹ eva were he,+ rekọ wọhọ epanọ a kere nọ: “Eka nọ ahwo a be la owhẹ i hwẹ ku uzou mẹ no.”+ 4 Keme eware kpobi nọ a kere fihotọ anwẹdẹ na a kere ai re ma wuhrẹ no ai ze,+ re ma rọ ẹkwoma ithihakọ mai+ gbe omosasọ nọ u re no Ikereakere na ze wo ẹruore.+ 5 Jọ Ọghẹnẹ nọ ọ rẹ kẹ ithihakọ gbe omosasọ na o fiobọhọ kẹ owhai re wha jọ udevie rai wo oghẹrẹ iroro Kristi Jesu, 6 re wha rehọ okugbe+ gbe urru* ovo rọ oruaro kẹ Ọghẹnẹ gbe Ọsẹ Olori mai, Jesu Kristi.

7 Fikiere, wha dede ohwohwo rehọ,*+ nwane wọhọ epanọ Kristi o dede owhai rehọ na,+ re o wha oruaro se Ọghẹnẹ. 8 Keme mẹ be ta kẹ owhai nọ Kristi o zihe ruọ ọgbodibo enọ e yawo+ re ọ ruẹsi dhesẹ nọ Ọghẹnẹ ọ rẹ ta uzẹme, re o kẹ imuẹro inọ Ọghẹnẹ o ti ru eyaa nọ Ọ ya kẹ esẹ-esẹ rai gba,+ 9 gbe re erẹwho na a sae kẹ Ọghẹnẹ oruaro fiki ohrọ-oriọ riẹ.+ Nwane wọhọ epanọ a kere nọ: “Oyejabọ nọ mẹ te rọ jọ ẹgbede jiri owhẹ evaọ udevie erẹwho na, yọ mẹ te so ile jiri odẹ ra.”+ 10 Ọ tẹ jẹ ta nọ: “Whai erẹwho, wha ghọghọ kugbe ahwo riẹ.”+ 11 Gbe nọ: “Wha jiri Jihova,* whai erẹwho na kpobi, jọ ahwo na kpobi a jiri ei.”+ 12 Aizaya ọ tẹ jẹ ta nọ: “Owọ-ure Jẹsi ọ te tha,+ ọnọ o ti su erẹwho buobu;+ ọye erẹwho na a ti fi ẹruore rai họ.”+ 13 Jọ Ọghẹnẹ nọ ọ rẹ kẹ ẹruore na ọ kẹ owhai oghọghọ gbe udhedhẹ ulogbo fiki eva nọ wha fihọ iẹe, re ẹruore rai ọ ruẹse jọ gaga* ẹkwoma ogaga ẹzi ọfuafo na.+

14 Whaọ mẹ omamẹ me wo imuẹro kpahe owhai, inievo mẹ, inọ ewoma oruo ọ da owhai oma fia, inọ wha wo eriariẹ kpobi gbe nọ wha be sae kẹ ohwohwo ohrẹ.* 15 Rekọ, me kere kpahe ugogo eware jọ vevẹ se owhai, re mẹ rọ wariẹ kareghẹhọ owhai, fiki uwowou ulogbo nọ Ọghẹnẹ o dhesẹ kẹ omẹ 16 re mẹ jọ ọgbodibo Kristi Jesu rọkẹ erẹwho na.+ Me bi ru iruo ọrẹri orọ ewhowho usi uwoma Ọghẹnẹ,+ re erẹwho nana e sae jọ idhe nọ Ọghẹnẹ ọ rẹ jẹrehọ, onọ ẹzi ọfuafo o ru fo no.

17 Fikiere me wo ẹjiroro nọ mẹ rẹ rọ ghọghọ evaọ Kristi Jesu kpahe eware nọ e rrọ erọ Ọghẹnẹ. 18 Keme mẹ rẹ rọ udu obọmẹ ta kpahe oware ovo ho ajokpaọ eware nọ Kristi ọ rọ ẹkwoma mẹ ru re erẹwho na a sai yoẹme. O ru onana ẹkwoma eme gbe iruo mẹ, 19 eware eka gbe eware igbunu,+ ogaga ẹzi Ọghẹnẹ, fikiere no Jerusalẹm gbe ewho nọ e wariẹ oyena họ je rite ugbo obọ Ilirikọm, mẹ romatotọ whowho usi uwoma kpahe Kristi.+ 20 Enẹ mẹ rọ gbaemu re mẹ siọ usi uwoma na ba ẹta evaọ oria nọ a jọ ta kpahe odẹ Kristi no, re mẹ gbẹ bọ họ otọhotọ omọfa ha; 21 rekọ wọhọ epanọ a kere nọ: “Enọ a re ta kẹ kpahe iẹe he a te ruẹ, yọ enọ i ri yo kpahe iẹe he a ti wo otoriẹ.”+

22 Onana o whaha omẹ unuẹse buobu nọ mẹ gbẹ re rọ nyabru owhai ze he. 23 Rekọ enẹna, ẹkwotọ ọvo o gbe kiọkọ eria nana ha nọ mẹ re jọ ta usi uwoma na ha, yọ anwọ ikpe buobu* ze na o rrọ isiuru mẹ re mẹ nyabru owhai ze. 24 Fikiere me bi rẹro nọ okenọ me ti kpobọ Spen, mẹ te ruẹ owhai, wha ve je su omẹ họ aro nọ mẹ tẹ raha oke jọ kugbe owhai no. 25 Rekọ obọnana mẹ gwọlọ ruọ edhere kpobọ Jerusalẹm re mẹ nyae gbodibo kẹ erẹri na.+ 26 Keme inievo nọ e rrọ Masidonia avọ Akeya a rọ evawere zọhọ eware rai ze bi ro se iyogbe nọ e rrọ udevie erẹri na evaọ obọ Jerusalẹm.+ 27 Uzẹme, evawere a ro ru ere, ẹhẹ, a reosa rai; keme otẹrọnọ erẹwho na a bi wo erere no iruo nọ erẹri na a bi ru evaọ egagọ Ọghẹnẹ ze, o gba rai họ nọ a rẹ rehọ ekwakwa rai rọ gbodibo kẹ ae.+ 28 Fikiere nọ mẹ tẹ rehọ eware nọ a zọhọ ze na* te ai oma gbẹsinẹdẹ no, mẹ te nya orọ oborai nọ me ti kpobọ Spen. 29 Ofariẹ, mẹ riẹ nọ okenọ mẹ te nyabru owhai ze, mẹ te wha eghale buobu no obọ Kristi ze.

30 Whaọ inievo, mẹ be rọ ẹkwoma Olori mai Jesu Kristi gbe uyoyou orọ ẹzi na tuduhọ owhai awọ, inọ wha kuomagbe omẹ lẹ gaga se Ọghẹnẹ rọkẹ omẹ,+ 31 re a sai siwi omẹ+ no obọ enọ e rrọ ilele Jesu hu* evaọ Judia gbe re erẹri na a sae jẹ eware nọ mẹ be wha kpobọ* Jerusalẹm na rehọ,+ 32 re nọ o tẹ rrọ oreva Ọghẹnẹ, mẹ vẹ te nyabru owhai ze avọ oghọghọ, ma ve wo omosasọ kugbe. 33 Ajọ Ọghẹnẹ nọ ọ rẹ kẹ udhedhẹ na ọ jọ kugbe owhai kpobi.+ Ami.

16 Me bi dhesẹ* Fibi oniọvo-ọmọtẹ mai kẹ owhai, ọnọ ọ rrọ ọgbodibo evaọ ukoko obọ Sẹnkria,+ 2 re wha dede iei rehọ evaọ Olori na wọhọ epanọ u fo erẹri na, jẹ kẹe oghẹrẹ obufihọ kpobi nọ ọ gwọlọ,+ keme ọyomariẹ ọ tha ibuobu uke no re, te omẹ.

3 Wha yere Priska* avọ Akwila kẹ omẹ,+ ibe iruiruo mẹ evaọ Kristi Jesu, 4 enọ i fi uzuazọ rai họ ọza no fiki mẹ,*+ enọ ikoko kpobi nọ e rrọ erẹwho na a bi yere orọnikọ mẹ ọvo ho. 5 Wha yere ukoko nọ o rrọ uwou rai re.+ Wha yere Epainetọs oyoyou mẹ na, ọnọ ọ rrọ ubi ọsosuọ Esia rọkẹ Kristi. 6 Wha yere Meri, ọnọ o ru iruo gaga kẹ owhai no. 7 Wha yere Andronikọs avọ Junias imoni mẹ+ gbe enọ ma gbẹ jọ uwou-odi, ezae nọ ikọ na a riẹ ziezi, a tẹ jẹ rrọ usu kugbe Kristi kri vi omẹ no.

8 Wha yere Ampliatọs, oyoyou mẹ evaọ Olori na. 9 Wha yere Obanọs, ibe oruiruo mai evaọ Kristi, gbe Stakis oyoyou mẹ na. 10 Wha yere Apẹlis, ọnọ o wo emamọ odẹ kugbe* Kristi. Wha yere ahwo uwou Aristobulọs. 11 Wha yere Herodiọn, omoni mẹ. Wha yere ahwo uwou Nasisọs enọ e rrọ evaọ Olori na. 12 Wha yere Traifina avọ Traifosa, eyae nọ i bi ru iruo gaga evaọ Olori na. Wha yere Pẹsis, oyoyou mai na, keme o ru iruo gaga no evaọ Olori na. 13 Wha yere Rufọs, ọnọ Olori na ọ salọ, gbe oni riẹ, ọnọ ọ rrọ oni mẹ re. 14 Wha yere Asinkritọs, Fligọn, Hẹmis, Patrọbas, Hemas, gbe inievo nọ e rrọ kugbe ai. 15 Wha yere Filọlọgọs avọ Julia, Nirọs avọ oniọvo-ọmọtẹ riẹ, avọ Olimpas, gbe erẹri na kpobi nọ e rrọ kugbe ai. 16 Wha rọ ẹviọlọ ọrẹri yere ohwohwo. Ikoko Kristi na kpobi a yere owhai.

17 Inievo, mẹ be tuduhọ owhai awọ inọ wha fiẹrohọ ahwo nọ a rẹ wha ohẹriẹ ze gbe eware nọ e rẹ wha ezoruẹ ze, nọ e wọso eware nọ wha wuhrẹ no, re wha kẹnoma kẹ ae.+ 18 Keme ahwo otiọye na a rrọ erigbo Olori mai Kristi hi, rekọ erọ isiuru* obọrai, yọ a rẹ rọ eme awere gbe eme ujiro igbenu su udu enọ i rri otọ mu hu thọ. 19 Ahwo kpobi a riẹ kpahe ẹmeoyo rai no, fikiere mẹ be ghọghọ fiki rai. Rekọ mẹ gwọlọ nọ wha jọ enọ i wo areghẹ evaọ oware uwoma, rekọ igbori evaọ oware uyoma.+ 20 Ọghẹnẹ nọ ọ rẹ kẹ udhedhẹ na, ọ te whọlọ Setan+ no evaọ otọ awọ rai kẹle na. Jọ Olori mai Jesu o dhesẹ uwowou ulogbo riẹ kẹ owhai.

21 Timoti ibe oruiruo mẹ o yere owhai, Lusiọs, Jesin, gbe Sosipata imoni mẹ, a yere owhai re.+

22 Mẹ Tẹtiọs, ọnọ ọ rọ obọ riẹ kere ileta nana, o yere owhai enọ e rrọ evaọ Olori na.

23 Geyọs,+ ọnọ mẹ rrọ uwou riẹ, nọ ukoko na soso a re kokohọ evaọ uwou riẹ, o yere owhai. Ẹrastọs, okrigho* okpẹwho na, o yere owhai, yọ Kuatọs oniọvo riẹ o yere owhai re. 24 *——

25 Ọghẹnẹ ọ rẹ sai ru owhai ga. Onana o rọwokugbe usi uwoma nọ me whowho gbe ovuẹ kpahe Jesu Kristi, jẹ rọwokugbe ẹferevia oware udidi ọrẹri+ nọ a ko dhere anwọ oke krẹkri ze na, 26 rekọ onọ a dhesẹ* via no enẹna. Yọ ẹkwoma Ikereakere eruẹaro na erẹwho na kpobi a riẹ kpahe oware udidi nana no. Onana o rọwokugbe ujaje Ọghẹnẹ ebẹdẹ bẹdẹ na, re erẹwho na kpobi a fi ẹrọwọ họ iẹe a vẹ rọ fiki ere yoẹme kẹe. 27 Jọ oruaro u te Ọghẹnẹ, ọnọ ọye ọvo o wo areghẹ kpobi na,+ ẹkwoma Jesu Kristi bẹdẹ bẹdẹ. Ami.