ILETA AVỌ IVẸ RO SE AHWO KỌRINT

1 Pọl, ukọ Kristi Jesu wọhọ epaọ oreva Ọghẹnẹ, gbe Timoti+ oniọvo mai, ro se ukoko Ọghẹnẹ nọ o rrọ Kọrint, gbe erẹri na kpobi nọ e rrọ Akeya soso.+

2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.

3 Jọ ujiro u te Ọghẹnẹ, Ọsẹ Olori mai Jesu Kristi,+ Ọsẹ nọ o wo ohrọ-oriọ+ gbe Ọghẹnẹ omosasọ kpobi,+ 4 ọnọ ọ rẹ sasa omai oma* evaọ edawọ* mai kpobi,+ re ma sae rọ omosasọ nọ ma wo no obọ Ọghẹnẹ ze+ rọ sasa amọfa oma+ evaọ oghẹrẹ odawọ* kpobi nọ a rrọ. 5 Wọhọ epanọ ma be ruẹ uye gaga fiki Kristi na,+ ere ọvona ma bi wo omosasọ gaga ẹkwoma Kristi. 6 Whaọ ma tẹ rẹriẹ ovao dhe edawọ,* o rrọ kẹ omosasọ gbe esiwo rai; yọ ma te bi wo omosasọ, o rrọ kẹ omosasọ rai, onọ u re fiobọhọ kẹ owhai thihakọ oghẹrẹ uye nọ u bi te omai na. 7 Fikiere, ẹruore mai kpahe owhai o bi nuhu hu, keme ma riẹ nọ wọhọ epanọ wha bi lele omai ruẹ uye na, wha ti lele omai wo omosasọ re.+

8 Inievo, ma gwọlọ nọ wha jọ igbori uye nọ o bẹ omai evaọ ubrotọ Esia ha.+ Uye nọ u te omai oma o ga thesiwa, o ga vi omai, te epanọ ma je ro roro nọ ma te zọ họ.+ 9 Evaọ uzẹme, o jọ omai oma nọ a bruoziẹ uwhu kpe omai no. Onana o via re ma gbẹ rẹroso omobọ mai hi rekọ Ọghẹnẹ+ nọ ọ rẹ kpare enọ i whu no ze. 10 Uwhu dẹẹ ọ thọ omai no yọ ọ te gbẹ thọ omai, ọye ma fi ẹruore mai họ inọ ọ te gbẹ hae thọ omai.+ 11 Whai omarai, wha sai fiobọhọ kẹ omai ẹkwoma olẹ ayare-ọgaga nọ wha rẹ lẹ kẹ omai+ re ahwo buobu a rọ fiki mai jiri Ọghẹnẹ rọkẹ obọ nọ o bi fihọ kẹ omai fikinọ o yo elẹ nọ ahwo buobu a be lẹ.*+

12 Onana họ oware nọ ma bi ro seha, obruoziẹ-iroro mai o bi se isẹri kẹ omai inọ uruemu ọrẹri gbe eva efuafo ma bi ro yeri evaọ akpọ na, maero evaọ udevie rai, orọnikọ avọ areghẹ ohwo-akpọ họ+ rekọ uwowou ulogbo Ọghẹnẹ. 13 Keme evaọ uzẹme, eware nọ wha rẹ sai se* je wo otoriẹ rai ọvo ma bi kere se owhai, yọ me rẹro nọ wha ti gbe wo otoriẹ eware nana vọvọ,* 14 wọhọ epanọ wha vuhumu omojọ no na inọ wha sae rọ omai seha, wọhọ epanọ ma te rọ owhai seha re evaọ ẹdẹ Olori mai Jesu.

15 Fiki imuẹro nana, mẹ jẹ gwọlọ nọ mẹ rẹ kake nyabru owhai ze tao, re wha sai wo uvẹ avọ ivẹ nọ wha rẹ rọ ghọghọ;* 16 keme me wo rie họ iroro nọ mẹ rẹ nyabru owhai ze nọ me ti kpobọ Masidonia, je zihe no obọ Masidonia bru owhai ze, me ve no oborai kpobọ Judia.+ 17 Whaọ, nọ mẹ jiroro nana, kọ me rri rie jeve jeve? Hayo kọ isiuru obọmẹ me bi le, nọ mẹ rẹ rọ ta nọ “Ee, Ee” me ve nwene unu ta nọ “Ijo, ijo”? 18 Uzẹme ma be ta kẹ owhai na, wha rẹ sai fievahọ Ọghẹnẹ. Ma re yo “Ee” kpakiyọ “Ijo” ma wo họ iroro ho. 19 Keme Ọmọ Ọghẹnẹ, Jesu Kristi, ọnọ mẹ avọ Silvanọs* gbe Timoti+ ma whowho kẹ owhai, ọ rẹ ta nọ “Ee” kpakiyọ “Ijo” ho, rekọ “Ee” riẹ yọ “Ee.” 20 Makọ epanọ eyaa Ọghẹnẹ i bu te kẹhẹ, i bi rugba ẹkwoma riẹ.+ Fikiere, ẹkwoma riẹ ma be rọ ta kẹ Ọghẹnẹ nọ “Ami,”+ onọ o be wha oruaro se Ọghẹnẹ. 21 Rekọ Ọghẹnẹ họ ọnọ ọ kẹ imuẹro inọ mai avọ owhai yọ erọ Kristi, yọ ọye o wholo omai.+ 22 O te je fi oka riẹ họ omai no,+ yọ ọ kẹ omai imuẹro oware nọ o be tha na* no, koyehọ ẹzi na+ nọ ọ kẹ omai evaọ udu mai.

23 Ọghẹnẹ họ osẹri mẹ inọ mẹ gwọlọ fi ọkora họ owhai oma ha, oye mẹ gbẹ re rọ nyaze Kọrint he na. 24 Orọnikọ mai họ ilori kẹ ẹrọwọ rai hi,+ rekọ mai yọ ibe iruiruo rai nọ i bi fiobọhọ kẹ owhai wo oghọghọ, keme fiki ẹrọwọ rai wha ro dikihẹ.

2 Mẹ gba riẹ mu no inọ mẹ rẹ gbẹ wariẹ weze bru owhai ze avọ ọkora ha. 2 Keme mẹ tẹ wha ọkora se owhai, kọ amono a te sasa omẹ oma kpakiyọ whai họ enọ e hae sasa omẹ oma? 3 Me kere ileta yena se owhai, re nọ mẹ tẹ nyaze, me gbe weri fiki ahwo nọ a hae wha oghọghọ se omẹ hẹ, keme u mu omẹ ẹro nọ oware nọ o rẹ wha oghọghọ se omẹ o rẹ wha oghọghọ se owhai kpobi re. 4 Evaọ uye gbe ẹrova ọgaga me ro kere se owhai avọ irui-oviẹ buobu, orọnikọ re mẹ wha ọkora se owhai hi,+ rekọ re me ru owhai riẹ epanọ uyoyou nọ me wo kẹ owhai o ga te.

5 Whaọ otẹrọnọ ohwo jọ ọ wha ọkora ze,+ whai kpobi ọ wha ọkora se orọnikọ omẹ hẹ. Rekọ mẹ gwọlọ ta onana ga hrọ họ. 6 Ọwhọkuo nọ ogbotu a kẹ riẹ na u te kẹ ọzae otiọye na; 7 enẹna wha rọvrẹ riẹ jẹ sasa iẹe oma,+ re ọkora ọgaga ọ gbẹ dae oma fia ha.*+ 8 Fikiere mẹ be tuduhọ owhai awọ nọ wha dhesẹ kẹe nọ wha you rie.+ 9 Oware ofa nọ o lẹliẹ omẹ kere ileta yena se owhai họ: re mẹ riẹ sọ wha ti dhesẹ nọ wha bi yoẹme evaọ eware kpobi. 10 Wha tẹ rọ oware jọ nọ ohwo o ru thọ rọvrẹ riẹ, mẹ rọvrẹ riẹ re. Evaọ uzẹme, oware kpobi nọ mẹ rọvrẹ ohwo jọ (otẹrọnọ mẹ rọ oware jọ vrẹ ohwo), me ru ere fiki rai evaọ aro Kristi, 11 re Setan o gbe fi omai kparobọ họ*+ keme ma rrọ igbori eghẹ* riẹ hẹ.+

12 Whaọ nọ me te Troas+ re me whowho usi uwoma kpahe Kristi, jẹ ruẹ ẹthẹ nọ o rovie kẹ omẹ evaọ iruo Olori na, 13 udu mẹ u te otọ họ fikinọ mẹ ruẹ Taitọs+ oniọvo mẹ hẹ. Fikiere me te yere ai ‘kodẹ’ je no etẹe kpobọ Masidonia.+

14 Rekọ uyere u te Ọghẹnẹ ọnọ o bi su omai ẹsikpobi evaọ uje obokparọ evaọ usu kugbe Kristi na, ọnọ ọ be rọ ẹkwoma mai vaha* ore awere eriariẹ riẹ evaọ oria kpobi! 15 Keme rọkẹ Ọghẹnẹ, mai yọ ore awere orọ Kristi evaọ udevie enọ a bi ti siwi gbe udevie enọ a be te raha; 16 rọkẹ utu avọ ivẹ na, ore* uwhu nọ u bi su kpohọ uwhu,+ rọkẹ utu ọsosuọ na ore awere uzuazọ nọ u bi su kpohọ uzuazọ. Kọ ono o te kẹ iruo nana? 17 Mai; keme ma be zẹ ẹme Ọghẹnẹ hẹ*+ wọhọ epanọ ahwo buobu a bi ru, rekọ ma be rọ oruọzewọ ta ẹme wọhọ epanọ Ọghẹnẹ o vi omai, ẹhẹ, evaọ aro Ọghẹnẹ gbe evaọ usu kugbe Kristi.

3 Kọ ma rẹ wariẹ dhesẹ omamai kẹ owhai inọ mai yọ emamọ ahwo? Hayo, wọhọ ahwo jọ, kọ o gwọlọ nọ ma re kere ileta nọ ma re ro jiri omamai se owhai, hayo re wha kere kpahe omai? 2 Whai họ ileta mai,+ nọ a kere fihọ idu mai nọ ahwo-akpọ kpobi a riẹ je bi se. 3 O rrọ vevẹ nọ whai yọ ileta Kristi nọ mai egbodibo ma kere,+ onọ a rọ ẹzi Ọghẹnẹ nọ ọ rrọ uzuazọ na kere orọnikọ ame-ugbẹ hẹ, yọ uwo-oma a kere ileta na fihọ, eva idu,+ orọnikọ ewẹ-itho ekpakpala ha.+

4 Ma wo oghẹrẹ evaifihọ nana kpahe Ọghẹnẹ ẹkwoma Kristi. 5 Orọnikọ ma be ta nọ ẹgba mai ma ro te ziezi kẹ iruo nana ha, rekọ ọnọ o ru omai te ziezi họ Ọghẹnẹ,+ 6 ọnọ o ru omai te ziezi re ma jọ egbodibo ọvọ ọkpokpọ,+ orọnikọ ọrọ izi nọ a kere fihotọ họ,+ rekọ ọrọ ẹzi na; keme izi nọ a kere fihotọ na e rẹ wha obrukpe uwhu ze,+ rekọ ẹzi na o re ru ohwo jọ uzuazọ.+

7 Whaọ, otẹrọnọ Uzi nọ o rẹ wha uwhu ze na, onọ a kere fihọ itho+ na u wo oruaro te epanọ ahwo Izrẹl a jẹ sai ro rri ovao Mosis hi fiki oruaro nọ o jọ ovao riẹ,+ yọ oruaro yena o te hiẹ no, 8 kọ iruo nọ ẹzi na+ o bi ru i gbe wo oruaro viere?+ 9 Keme otẹrọnọ Uzi nọ o be wha obrukpe+ ze na u wo oruaro,+ oware nọ o be wha ẹrẹreokie ze na u re wo oruaro viere thethabọ!+ 10 Evaọ uzẹme, makọ onọ a ru re u wo oruaro vẹre na, a ba oruaro riẹ noi no fiki oruaro nọ o rro vi ei nọ o ze.+ 11 Otẹrọnọ onọ a ti si no otọ a rehọ e riẹ ze avọ oruaro,+ kiyọ onọ a te nyaseba o ti wo oruaro viere thethabọ!+

12 Fiki oghẹrẹ ẹruore nana nọ ma wo na,+ ma be ta ẹme ududu, 13 yọ ma bi ru wọhọ Mosis hi ọnọ ọ jẹ hae rọ ohọ ruru ovao+ re ahwo Izrẹl a gbẹ tẹrovi ekuhọ oware nọ a ti si no otọ na ha. 14 Rekọ iroro rai i wuhu di.+ Rite inẹnẹ na, ohọ ovona u gbe di ude rai nọ a te bi se ọvọ anwae na,+ keme ẹkwoma Kristi ọvo a sai ro si ei no.+ 15 Evaọ uzẹme, rite inẹnẹ na oke kpobi nọ a te bi se eme Mosis,+ ohọ u re ruru idu rai.+ 16 Rekọ nọ ohwo o te kurẹriẹ bru Jihova,* a ve si ohọ na no.+ 17 Jihova* yọ Ẹzi,+ yọ oria nọ ẹzi Jihova* ọ rrọ, ufuoma o rẹ jọ etẹe.+ 18 Mai kpobi, ma be rọ ovao nọ ohọ u ruru hu dhesẹ oruaro Jihova* via wọhọ ighẹgbe, yọ ma bi nwene re ma jọ uwoho riẹ, bi no oruaro ruọ oruaro, nwane wọhọ epanọ Jihova* nọ ọ rrọ Ẹzi na*+ o bi ru ei fihọ.

4 Fikiere, nọ orọnọ ma wo iruo odibọgba nana fiki ohrọ nọ a re omai na, o be bẹ omai no ho. 2 Rekọ ma siobọno eware omovuọ nọ a rẹ lẹlẹ ru no. Ma be rọ ẹghẹ ru eware hayo nwene ẹme Ọghẹnẹ hẹ;+ rekọ ma be rọ uzẹme na nọ ma bi dhesẹ via ro fi emamọ oriruo hotọ kẹ ahwo kpobi* evaọ aro Ọghẹnẹ.+ 3 Otẹrọnọ usi uwoma nọ ma bi whowho na u dhere, u dhere kẹ enọ a be te raha,* 4 enọ e rọwo ho+ nọ ọghẹnẹ uyero-akpọ* nana+ o wuhu iroro rai di no, re elo* usi uwoma oruaro kpahe Kristi, ọnọ ọ rrọ uwoho Ọghẹnẹ na,+ o gbe lo mu ai hi.+ 5 Keme orọnikọ omobọ mai ma be ta kpahe he, rekọ Jesu Kristi inọ ọye họ Olori, gbe nọ mai yọ erigbo rai fiki Jesu. 6 Keme Ọghẹnẹ họ ọnọ ọ ta nọ: “Jọ elo na o lo no ebi ze,”+ yọ o fi elo họ idu mai no re elo obọdẹ eriariẹ Ọghẹnẹ nọ o no ovao Kristi ze o lo mu ai.+

7 Rekọ, ma wo efe nana+ evaọ ekwakwa nọ a rọ ẹkpẹ ma,*+ re u dhesẹ via nọ Ọghẹnẹ họ ọnọ ọ be kẹ omai ogaga nọ u vi ogaga orọnikọ obọmai u bi no ze he.+ 8 A be nwẹ omai evaọ kabọ kabọ, rekọ a keke omai ba ugbẹhẹ hẹ; eware i re dhe omai ọvẹ, rekọ idhere na kpobi i di hi;*+ 9 a bi kpokpo omai, rekọ a gbabọkẹ omai hi;+ a be rọ omai fotọ, rekọ ma bi whu hu.+ 10 Ẹsikpobi ma be rọ ovao dhe eware oja nọ e rẹ wha uwhu ze wọhọ epanọ o jọ kẹ Jesu,+ re uzuazọ Jesu o ruẹsi dhesẹ oma via evaọ oma mai re. 11 Mai nọ ma rrọ uzuazọ ma be rọ ovao dhe uwhu ẹsikpobi+ fiki Jesu, re uzuazọ Jesu o ruẹsi dhesẹ oma via re evaọ ugboma mai nọ u re whu. 12 Fikiere uwhu o rrọ iruo evaọ oma mai rekọ owhai kọ uzuazọ.

13 Fikinọ ma wo oghẹrẹ ẹrọwọ* ọvona nọ a kere kpahe nọ: “Me wo ẹrọwọ, fikiere mẹ ta ẹme”;+ mai omamai ma wo ẹrọwọ fikiere ma be ta ẹme, 14 keme ma riẹ nọ Ọnọ ọ kpare Jesu ze ọ te kpare omai ze re wọhọ epanọ ọ kpare Jesu ze na, ọ vẹ rehọ omai gbe owhai ziọ aro riẹ.+ 15 Eware nana kpobi e rrọ fiki rai, re ahwo buobu a sai wo erere no uwowou ulogbo Ọghẹnẹ ze keme amọfa buobu a be kẹ Ọghẹnẹ uyere onọ o be wha oruaro sei.+

16 Fikiere, o be bẹ omai no ho, rekọ o tẹ make rọnọ ugboma mai o be raha no, ababọ avro, ohwo nọ ma rrọ evaọ obeva ọ be kpokpọ kẹdẹ kẹdẹ. 17 Keme dede nọ uye* nọ ma be rẹriẹ ovao ku o rrọ ubroke jẹ rrọ vovori, o be lẹliẹ omai wo oruaro nọ u bi dhe ẹruẹruọ,* onọ o rẹ jọ bẹdẹ bẹdẹ.+ 18 Orọnikọ eware nọ ma be ruẹ eye ma be tẹrovi hi, rekọ eware nọ a re ruẹ hẹ.+ Keme eware nọ ma be ruẹ e rẹ jọ ubroke, rekọ eware nọ a re ruẹ hẹ* e rẹ jọ bẹdẹ bẹdẹ.

5 Ma riẹ nọ otẹrọnọ a kporo* uwou otọakpọ mai, uwou-udhu nana no,+ Ọghẹnẹ ọ te kẹ omai uwou nọ a rọ abọ bọ họ,+ nọ o te jọ bẹdẹ bẹdẹ evaọ obọ idhiwu. 2 Keme ma bi dimẹ evaọ uwou nana,* be rọ ọwhọ rẹro onọ ma te whẹ họ nọ a ruẹrẹhọ kẹ omai* no obọ odhiwu ze,*+ 3 re okenọ ma te whẹe họ, ma gbẹ jọ ẹbẹba ha. 4 Evaọ uzẹme, mai nọ ma rrọ uwou-udhu nana ma bi dimẹ, ma wo awaọruọ ọgaga keme ma gwọlọ si onana no ho, rekọ ma gwọlọ whẹ odekọ na họ,+ re uzuazọ o ruẹse rehọ ẹta ugboma nọ u re whu na.+ 5 Ọghẹnẹ họ ọnọ ọ ruẹrẹ omai họ kẹ onana,+ ọnọ ọ kẹ omai ẹzi na wọhọ imuẹro oware nọ o be tha na.*+

6 Fikiere udu o rrọ omai awọ ẹsikpobi yọ ma riẹ nọ, nọ uwou mai o rrọ ugboma nana, ma sae jọ kugbe Olori na ha,+ 7 keme ẹrọwọ ma be rọ nya, orọnikọ eware nọ ma be ruẹ hẹ. 8 Rekọ udu o rrọ omai awọ, yọ o mae were omai re ma nyasiọ ugboma nana ba re ma jọ uwou kugbe Olori na.+ 9 Fikiere, te ma rrọ uwou kugbei hayo ma rrọ kugbei hi, ma gba riẹ mu nọ ma re ru eware nọ ọ rẹ rọ jẹ omai rehọ. 10 Keme mai kpobi ma te romavia* hrọ evaọ aro akaba oziẹobro Kristi, re omomọvo o ti wo osa eware nọ o ru nọ ọ jọ ugboma nana, te uwoma hayo uyoma.*+

11 Fikiere, nọ ma riẹ nọ u fo re ma dhozọ Olori na, ma be tẹzẹ ahwo re a gaviezọ, rekọ Ọghẹnẹ ọ riẹ omai ziezi.* Me rẹro nọ obruoziẹ-iroro rai o fiobọhọ kẹ owhai riẹ omai ziezi no re. 12 Ma be wariẹ dhesẹ omamai kẹ owhai inọ mai yọ emamọ ahwo ho, rekọ ma be vuẹ owhai oware nọ o rẹ sae kẹ owhai udu rehọ omai seha, re wha sae kpahe ẹme kẹ enọ e rẹ rehọ eware okafe seha+ viukpọ oware nọ o rrọ udu. 13 Keme otẹrọnọ mai yọ enọ iroro rai e gba ha,+ o rrọ ere fiki Ọghẹnẹ; otẹrọnọ ma wo iroro nọ e gba, o rrọ ere fiki rai. 14 Uyoyou nọ Kristi na o wo o be wọ omai, keme ona họ oware nọ ma wo otoriẹ riẹ, inọ ọzae ọvo o whu kẹ ahwo kpobi;+ keme ahwo kpobi a whu no. 15 O whu kẹ ahwo kpobi re enọ e rrọ uzuazọ a gbẹ rria kẹ omobọ rai hi,+ rekọ rọkẹ ọnọ o whu kẹ ae nọ a kpare ze.

16 Fikiere, no enẹna vrẹ, ma gbẹ be rehọ eriwo ohwo-akpọ rri ohwo ọvo ho.+ O tẹ make rọnọ ma riẹ Kristi vẹre wọhọ ohwo-akpọ, ma gbẹ riẹe ere ofa vievie he.+ 17 Fikiere, ohwo kpobi nọ ọ rrọ usu kugbe Kristi yọ omama okpokpọ;+ eware anwae e vrẹ no; rri! eware ekpokpọ e ze no. 18 Obọ Ọghẹnẹ eware kpobi i no ze, ọnọ ọ rehọ ẹkwoma Kristi ruẹrẹ omai họ kugbe ọyomariẹ,+ ọ tẹ kẹ omai odibọgba ọrọ ahwo-ọruẹrẹhọ na,+ 19 onọ Ọghẹnẹ ọ be rọ rehọ ẹkwoma Kristi ruẹrẹ akpọ na họ kugbe ọyomariẹ,+ o bi kele iruthọ rai rọ kẹ ae he,+ yọ o mu ovuẹ ọrọ ahwo-ọruẹrẹhọ na họ omai obọ.+

20 Fikiere, mai yọ etota*+ nọ i bi dikihẹ kẹ Kristi,+ wọhọ ẹsenọ Ọghẹnẹ ọ be rọ ẹkwoma mai lẹ ahwo. Wọhọ enọ i dikihẹ kẹ Kristi ma be lẹ nọ: “Wha ruẹrẹhọ kugbe Ọghẹnẹ.” 21 O ru ohwo nọ ọ riẹ uzioraha ha+ re ọ jọ idhe uzioraha* fiki mai, re ma sae rọ ẹkwoma riẹ kiẹrẹe evaọ aro Ọghẹnẹ.+

6 Nọ ma bi lele iei ru iruo na,+ ma be tuduhọ owhai awọ re inọ, nọ wha jẹ uwowou ulogbo Ọghẹnẹ rehọ no na, wha ru re ẹjiroro riẹ o jọ uvrẹvru hu.+ 2 Keme ọ ta nọ: “Evaọ oke ọjẹrehọ, me yo kẹ owhẹ, yọ evaọ ẹdẹ esiwo, me fiobọhọ kẹ owhẹ.”+ Rri, enẹna họ ugogo oke ọjẹrehọ na. Rri, enẹna họ ẹdẹ esiwo.

3 Ma bi ru oware ovo nọ o rẹ wha ezoruẹ ze he, re a gbẹ jọ odibọgba mai ruẹ oware afuẹwẹ hẹ;+ 4 rekọ evaọ edhere kpobi, ma bi dhesẹ nọ mai yọ egbodibo Ọghẹnẹ,+ ẹkwoma ithihakọ evaọ eware buobu, ikpokpoma, oke uye, uyero obẹbẹ,+ 5 ukpe, efihọ uwou-odi,+ ozighi, iruo egaga, ababọ owezẹ evaọ aso, gbe ababọ emu unuẹse buobu;+ 6 ẹkwoma uzuazọ ẹfuọ, eriariẹ, odiri,+ uwowou,+ ẹzi ọfuafo, uyoyou nọ o kare eviẹhọ,+ 7 ẹta eme uzẹme, ogaga Ọghẹnẹ,+ ekwakwa ẹmo ẹrẹreokie+ nọ ma kru họ obọze* gbe ẹkpẹlobọ.* 8 Ma bi je dhesẹ nọ mai yọ egbodibo Ọghẹnẹ nọ a te bi jiri omai je kpomovuọ họ omai oma, a tẹ be ta eme iyoma gbe eme iwoma kpahe omai. A bi rri omai nọ mai yọ eviẹahwohọ rekọ ma be ta uzẹme, 9 a bi rri omai nọ ohwo ọvo ọ riẹ omai hi, rekọ a riẹ omai, a bi rri omai nọ ma bi whu* rekọ ma rrọ uzuazọ,+ a bi rri omai nọ a be kẹ omai uye,* rekọ ma whu hu,+ 10 a bi rri omai wọhọ enọ i bi weri rekọ ma be ghọghọ ẹsikpobi, wọhọ iyogbe rekọ ma bi ru ibuobu fe, wọhọ enọ i wo oware ovo ho rekọ ma wo eware kpobi.+

11 Ma rovie unu mai ta ẹme kẹ owhai ziezi,* whai ahwo Kọrint, yọ ma rovie udu mai fihọ gbaladha. 12 Oware ovo o za omai dhe he* evaọ uyoyou nọ ma bi dhesẹ kẹ owhai,+ rekọ eware jọ e be za owhai dhe evaọ uyoyou nọ wha bi dhesẹ kẹ omai. 13 Fikiere, mẹ be ta kẹ owhai wọhọ emọ mẹ inọ, whai omarai, wha rovie udu rai fihọ gbaladha re.*+

14 Wha mu usu kugbe* enọ e rọwo ho ho.+ Didi usu ẹrẹreokie o wo kugbe emuemu?+ Hayo didi usu elo o wo kugbe ebi?+ 15 Ofariẹ, didi okugbe ọ rrọ udevie Kristi avọ Belial?*+ Hayo kọ eme ohwo nọ ọ rọwo* avọ ọnọ ọ rọwo ho a wo kugbe?*+ 16 Kọ didi okugbe ọ rrọ udevie etẹmpol Ọghẹnẹ avọ emedhọ?+ Keme mai yọ etẹmpol Ọghẹnẹ nọ ọ rrọ uzuazọ;+ wọhọ epanọ Ọghẹnẹ ọ ta nọ: “Mẹ te rria udevie rai+ jẹ nya evaọ udevie rai, mẹ te jọ Ọghẹnẹ rai, a vẹ te jọ ahwo mẹ.”+ 17 “‘Fikiere, wha no udevie rai no, jẹ hẹriẹ oma no ai,’ ere Jihova* ọ ta, ‘yọ wha gbẹ rọ obọ te oware ugbegbe na ha’”;+ “‘me ve ti dede owhai rehọ.’”+ 18 “‘Mẹ vẹ te jọ ọsẹ rai,+ wha vẹ te jọ emezae gbe emetẹ mẹ,’+ ere Jihova* Erumeru na ọ ta.”

7 Fikiere iyoyou, nọ orọnọ a ya eyaa nana kẹ omai na,+ wha joma ru omamai fo no eware kpobi nọ i re zue oma gbe ẹzi,+ re ma jọ ọrẹri ziezi nọ ma be dhozọ Ọghẹnẹ na.

2 Jọ wha jẹ omai rehọ evaọ udu rai.+ Ma ru ohwo ọvo thọ họ, ma raha uruemu ohwo ọvo ho, ma wha ohwo ọvo re he.+ 3 Orọnikọ mẹ be ta onana ro brukpe owhai hi. Keme mẹ ta vẹre no inọ ma you owhai no udu mai ze, te ma whu hayo ma rrọ uzuazọ. 4 Mẹ be ta ẹme kẹ owhai ududu. Mẹ be rehọ owhai seha gaga. Me wo omosasọ; yọ oghọghọ o da omẹ oma fia ghelọ oja-oriọ mai kpobi.+

5 Evaọ uzẹme, nọ ma te Masidonia,+ oma o fọ omai* hi, rekọ ma jẹ reoja evaọ kabọ kabọ, ohọre o jọ obọ otafe, yọ ozọ o jọ obeva. 6 Rekọ Ọghẹnẹ nọ ọ rẹ sasa enọ e rrọ ọkora oma na,+ ọ rehọ ẹnyaze Taitọs sasa omai oma; 7 yọ orọnikọ ẹkwoma ẹnyaze riẹ na ọvo ho, rekọ te omosasọ nọ ọyomariẹ o wo fiki rai, keme o gbiku kẹ omai kpahe epanọ wha bi ro rẹro mẹ, uweri ogaga nọ wha rrọ, gbe nọ wha be ruawa gaga* kpahe omẹ; onana u ru omẹ ghọghọ gaga.

8 Keme o tẹ make rọnọ mẹ rọ ileta mẹ wha ọkora se owhai,+ o da omẹ hẹ. O tẹ make rọnọ o da omẹ vẹre (keme mẹ ruẹ nọ ileta na o wha ọkora se owhai, evaọ omoke jọ), 9 enẹna mẹ be ghọghọ, orọnọ fikinọ wha jọ ọkora ọvo ho, rekọ fikinọ ọkora na u ru owhai kurẹriẹ. Ọkora rai o rọwokugbe oreva Ọghẹnẹ, fikiere eme mai e wha uye se owhai hi. 10 Keme ọkora nọ o rọwokugbe oreva Ọghẹnẹ o rẹ wha ekurẹriẹ ze onọ u re su kpohọ esiwo, yọ a rẹ vioja riẹ hẹ;+ rekọ ọkora akpọ na o rẹ wha uwhu ze. 11 Ọkora rai nọ o rọwokugbe oreva Ọghẹnẹ na o kẹ owhai ajọwha ọgaga, ẹhẹ, u ru owhai si afuẹwẹ no uzou rai, dha eva kpahe oruthọ na, wo ozodhẹ Ọghẹnẹ, isiuru, ọwhọ, jẹ kpọ oware nọ o thọ na vi!+ Evaọ kabọ kabọ, wha dhesẹ nọ abọ rai ọ fo* evaọ ẹme nana. 12 Dede nọ me kere ileta se owhai, orọnikọ fiki ọnọ o ru thọ na me ro kere iei hi,+ yọ orọnọ fiki ọnọ a ru thọ na ha, rekọ re ajọwha nọ wha wo kẹ omai o sai dhesẹ oma via evaọ aro Ọghẹnẹ. 13 Oyejabọ nọ ma ro wo omosasọ na.

Rekọ, u te no omosasọ nọ ma wo na no, ma ghọghọ gaga re fiki oghọghọ nọ Taitọs o wo, keme whai kpobi wha sasa e riẹ oma. 14 Keme otẹrọnọ mẹ rehọ owhai seha kẹe, wha ru oma vuọ omẹ hẹ; rekọ wọhọ epanọ eme kpobi nọ ma ta kẹ owhai e rrọ uzẹme na, ere eha nọ ma rehọ owhai se kẹ Taitọs e rrọ uzẹme re. 15 Epọvo na re, uvi uyoyou nọ o wo kẹ owhai o be ga nọ ọ be kareghẹhọ epanọ whai kpobi wha ro yoẹme,+ gbe epanọ wha ro dede iei rehọ avọ ozọ gbe enuhu. 16 Mẹ be ghọghọ inọ evaọ kabọ kabọ me fievahọ owhai.*

8 Inievo, ma gwọlọ nọ wha riẹ kpahe uwowou ulogbo nọ Ọghẹnẹ o dhesẹ kẹ ikoko obọ Masidonia.+ 2 Evaọ okenọ a jẹ reoja evaọ otọ odawọ ulogbo, oghọghọ ulogbo rai gbe uvuhu ogaga rai u ru ọghoruo rai viodẹ.* 3 Keme onọ a wo a kẹ,+ ẹhẹ, me se isẹri inọ a tube ru vrẹ epanọ a wo te dede,+ 4 yọ a jẹ tubẹ rọ udu obọrai lẹ omai gaga re a wo uvẹ-ọghọ nọ a rẹ rọ kẹ okẹ uwowou, re a wobọ evaọ odibọgba ogbodhẹ kẹ erẹri na.+ 5 Yọ a tube ru vi epanọ ma rẹro riẹ, keme orọ ọsosuọ, a rọ omarai kẹ Olori na gbe omai wọhọ epaọ oreva Ọghẹnẹ. 6 Fikiere, ma tuduhọ Taitọs+ awọ inọ iruo nọ ọ jọ udevie rai muhọ na, jọ o ru ei te urere, koyehọ re o mi okẹ uwowou nọ wha rọ ze na. 7 Rekọ wọhọ epanọ wha be riẹ ru evaọ eware kpobi na, evaọ ẹrọwọ gbe ẹmeunu gbe eriariẹ gbe ajọwha gbe evaọ edhesẹ oghẹrẹ uyoyou nọ ma wo kẹ owhai na, jọ wha ruabọhọ oghẹrẹ ẹzi ọghoruo* nana re.+

8 Orọnikọ mẹ be ta onana ro jie uzi kẹ owhai hi, rekọ re me ru owhai riẹ ajọwha nọ amọfa a wo jẹ riẹ sọ uyoyou rai u gine no eva ze. 9 Keme wha riẹ uwowou ulogbo nọ Olori mai Jesu Kristi o dhesẹ, inọ dede nọ o fe, o zihe ruọ oyogbe fiki rai,+ re wha ruẹsi fe ẹkwoma uvuhu riẹ.

10 Iroro mẹ evaọ ẹme nana ọna:+ Onana o rrọ kẹ erere rai, keme ukpe soso o vrẹ no na nọ wha ro mu ei họ je dhesẹ via nọ wha ginẹ gwọlọ ru ei. 11 Fikiere enẹna, jọ wha ru oware nọ wha muhọ na te urere, re wha rọ ọwhọ nọ wha ro mu ei họ na ru ei te oka, wọhọ epaọ onọ wha wo. 12 Keme ọwhọ na ọ tẹ riẹ no, oyena Ọghẹnẹ ọ rẹ jẹrehọ wọhọ epaọ onọ ohwo o wo,+ orọnikọ onọ ohwo o wo ho ho. 13 Keme orọnikọ mẹ gwọlọ ru ei lọhọ kẹ amọfa me ve ru ei ga kẹ owhai hi; 14 rekọ re a ru eware kpobi fihọ ẹrẹrẹe, wha rọ onọ wha wo buobu enẹna rọ vọ kẹ ae evaọ onọ o kare rae, re a sae jẹ rehọ onọ a wo buobu rọ vọ kẹ owhai re evaọ onọ o kare owhai, re eware kpobi e sae jọ ẹrẹrẹe. 15 Wọhọ epanọ a kere nọ: “Ohwo nọ o wo buobu o wo bu hrọ họ, yọ ohwo nọ o wo kakao o wo kawo hrọ họ.”+

16 Uyere u te Ọghẹnẹ ọnọ o ru Taitọs wo ọkpọ ọdawẹ ọvona kẹ owhai,+ 17 keme o ru lele uduotahawọ nọ a kẹ riẹ, rekọ fikinọ ọyomariẹ o wo ọwhọ na re, ọ fialoma via be nyabru owhai ze. 18 Rekọ ma bi vi oniọvo mai na lele iei, ọnọ a bi jiri evaọ ikoko na kpobi fiki omodawọ riẹ evaọ iruo usi uwoma na. 19 Orọnikọ ere ọvo ho, ikoko na a tẹ jẹ rehọ iẹe mu re o kuomagbe omai evaọ erẹ mai nọ ma be ghale okẹ uwowou nana, onọ o te wha orro se Olori na je dhesẹ via nọ ma ruẹrẹ oma kpahe re ma fiobọhọ kẹ amọfa. 20 Fikiere, ma be whaha oware kpobi nọ ohwo jọ ọ sae rọ jọ oma mai ruẹ afuẹwẹ evaọ azọhọ unevaze nana nọ ma be ghale na.+ 21 Keme ma bi ‘ru eware kpobi avọ oruọzewọ, orọnikọ evaọ aro Jihova* ọvo ho, rekọ evaọ aro ahwo re.’+

22 Ma bi je vi oniọvo mai na lele ai, ọnọ ma dawo unuẹse buobu jẹ ruẹ vuhumu no evaọ eware buobu inọ o re ru iruo gaga jẹ romatotọ ru eware, yọ enẹna ọ be daoma gaga vi epaọ anwẹdẹ fikinọ o fievahọ owhai gaga. 23 Rekọ otẹrọnọ wha wo avro jọ kpahe Taitọs, jọ wha riẹ nọ ibe oruiruo mẹ* ọ rrọ, o bi ru iruo fiki ewoma rai; hayo otẹrọnọ wha wo avro jọ kpahe inievo mai, jọ wha riẹ nọ enyukọ* a rrọ kẹ ikoko na yọ a be wha orro se Kristi. 24 Fikiere, wha dhesẹ uyoyou rai via kẹ ae+ je ru ikoko na ruẹ oware nọ ma rọ rehọ owhai seha.

9 Whaọ kpahe odibọgba kẹ erẹri na,+ u du gwọlọ nọ me re kere se owhai hi, 2 keme mẹ riẹ unevaze rai, yọ mẹ be rọ onana seha kẹ inievo obọ Masidonia inọ inievo obọ Akeya a ruẹrẹ oma kpahe te ukpe no, yọ ajọwha rai o fi ọwhọ họ ibuobu rai oma no. 3 Rekọ me bi vi inievo na ze re eha nọ ma be rọ owhai se evaọ onana o gbẹ jọ ufofe he, gbe re wha sae ginẹ ruẹrẹ oma kpahe wọhọ epanọ mẹ ta kpahe owhai. 4 O gbẹ rrọ ere he, nọ inievo obọ Masidonia a te lele omẹ nyaze a jẹ ruẹ nọ wha ruẹrẹ oma kpahe he, oma o te vuọ omai gbe owhai fiki eva nọ ma fihọ owhai. 5 Fikiere mẹ ruẹ nọ u wuzou re mẹ tuduhọ inievo na awọ inọ a kake nyabru owhai ze re a mi ekẹ ibuobu nọ wha ya eyaa riẹ na kpahotọ, re nọ ma tẹ nyaze, yọ wha ruẹrẹ e riẹ kpahe no, u ve dhesẹ nọ unevaze wha rọ kẹ okẹ na orọnikọ ọgbahọ họ.

6 Rekọ kpahe onana, ohwo kpobi nọ ọ be kọ kakao o re vu kakao re, ohwo kpobi nọ ọ be kọ buobu o re vu buobu re.+ 7 Jọ ohwo kpobi o ru wọhọ epanọ ọ gba riẹ mu evaọ udu riẹ, orọnikọ avọ ẹgo* ho hayo ọgbahọ họ,+ keme Ọghẹnẹ o re you ohwo nọ ọ rẹ rọ evawere kẹ okẹ.+

8 Ofariẹ, Ọghẹnẹ ọ rẹ sai dhesẹ uwowou ulogbo riẹ kẹ owhai vọvọ re wha ruẹsi wo eware kpobi dobọ ziezi ẹsikpobi, je wo eware buobu nọ wha re ro ru iruo iwoma kpobi.+ 9 (Nwane wọhọ epanọ a kere nọ: “Ọ ghale eware* kẹ ahwo buobu; ọ kẹ iyogbe na. Ẹrẹreokie riẹ ọ rẹ jọ bẹdẹ bẹdẹ.”+ 10 Whaọ Ọnọ ọ rẹ rọ ibi buobu kẹ ọkibi jẹ kẹ ahwo ebrẹdi buobu nọ a rẹ re na, ọ te kẹ owhai ibi buobu nọ wha rẹ kọ, yọ o ti ru nọ wha ti ro vu eware buobu no iruo ẹrẹreokie rai ze.) 11 O bi ru owhai fe evaọ eware kpobi re wha sai ru ọghọ evaọ kabọ kabọ, onọ u bi ru nọ a be rọ rehọ ẹkwoma mai yere Ọghẹnẹ; 12 keme iruo odibọgba orọ obufihọ kẹ amọfa na o rrọ rọkẹ ẹruorote ẹgwọlọ erẹri na ọvo ho+ rekọ re o jẹ lẹliẹ ibuobu yere Ọghẹnẹ. 13 Fiki imuẹro nọ odibọgba ogbodhẹ nana o be kẹ, a bi jiri Ọghẹnẹ keme wha bi ru lele usi uwoma kpahe Kristi na, wọhọ epanọ wha whowho via evaọ ẹgbede, gbe fikinọ wha be rọ unevaze zọhọ eware ro fiobọhọ kẹ ae gbe ahwo kpobi.+ 14 Yọ a be lẹ olẹ ayare-ọgaga roro owhai bi dhesẹ nọ a you owhai fiki uwowou ulogbo nọ a rẹ ruẹ ọkpọ riẹ hẹ nọ Ọghẹnẹ o dhesẹ kẹ owhai.

15 Uyere u te Ọghẹnẹ fiki okẹ ọvọvẹ riẹ nọ a rẹ sae ruẹ unu gbiku riẹ hẹ na.

10 Whaọ mẹ Pọl mẹ be rehọ ẹwolẹ gbe uwowou Kristi+ lẹ owhai, dede nọ mẹ rẹ wọhọ ọyẹlẹ nọ mẹ tẹ rrọ kugbe owhai ovao dhe ovao,+ mẹ rẹ ta ẹme ududu kẹ owhai okenọ mẹ rrọ kugbe owhai hi.+ 2 Mẹ be lẹ nọ mẹ tẹ nyaze, jọ udu mẹ o lọhọ re mẹ siọ oware ogaga nọ me wo họ iroro ba eru kpahe enọ i bi rri omai wọhọ ẹsenọ ma be rọ iroro akpọ na ru eware. 3 Keme dede nọ mai yọ ahwo-akpọ, orọnikọ ẹgba gbe eriariẹ ohwo-akpọ ma bi ro fi ẹmo ho. 4 Ekwakwa ẹmo-ofio mai e rrọ erọ akpọ na ha,+ rekọ Ọghẹnẹ họ ọnọ ọ be kẹ omai ogaga+ nọ ma rẹ rọ raha eware nọ e dowọ muotọ gaga. 5 Keme ma be raha iroro ethọthọ gbe oware ukpehru kpobi nọ a ru be rọ wọso eriariẹ Ọghẹnẹ,+ yọ ma bi mu oghẹrẹ iroro kpobi imu re u ru ahwo yoẹme kẹ Kristi; 6 yọ ma ruẹrẹ oma kpahe re ma kẹ ahwo uye kpahe aghẹmeeyo kpobi nọ a dhesẹ,+ nọ wha tẹ nwane jọ kabọ kabọ dhesẹ ẹmeoyo rai no.

7 Okafe wha bi rri ro bruoziẹ. U te mu ohwo jọ ẹro nọ ọ rrọ ọrọ Kristi, jọ ọ wariẹ roro kpahe onana: Wọhọ epanọ ọ rrọ ọrọ Kristi na, ere ma rrọ re. 8 Keme o tẹ make rọnọ mẹ dina seha ga hrọ kpahe udu nọ Olori na ọ kẹ omai inọ ma rọ bọ owhai ga orọnikọ re ma ro whrehe owhai hi,+ oma o rẹ vuọ omẹ hẹ. 9 Keme mẹ gwọlọ re o jọ wọhọ ẹsenọ mẹ be rọ ileta mẹ ro guegue owhai hi. 10 Keme a be ta nọ: “Ileta riẹ i re wo ẹgba je duobọte ohwo, rekọ nọ ọ tẹ rrọ kugbe omai ọ wọhọ ọyẹlẹ, yọ ẹmeọta riẹ o re siuru hu.” 11 Jọ ohwo otiọye ọ riẹ inọ oware nọ ma jọ ileta mai ta* okenọ ma rrọ kugbe owhai hi, oye ma ti ru* re okenọ ma tẹ rrọ kugbe owhai.+ 12 Ma rẹ dariẹ kele omamai kugbe ejọ hayo rọ omamai wawo ejọ nọ ae ọvo a bi dhesẹ omarai fihọ emamọ ahwo ho.+ Rekọ nọ a be rehọ oware nọ u kiehọ evaọ ibiaro rai wawo omarai jẹ be rehọ omarai wawo ohwohwo na, u dhesẹ nọ a kare otoriẹ.+

13 Rekọ, ma re seha vrẹ uwhru oria nọ a kẹ omai hi, ehaise mai o rẹ jọ umuo ẹkwotọ nọ Ọghẹnẹ ọ ghale* kẹ omai, ma rẹ nyavrẹ uwhru mai hi. Whai yọ abọjọ ẹkwotọ mai.+ 14 Evaọ uzẹme, orọnikọ ma be nyavrẹ uwhru mai hi wọhọ ẹsenọ ẹkwotọ mai o te oborai hi, keme mai họ ahwo ọsosuọ nọ a wha usi uwoma kpahe Kristi te owhai oma.+ 15 Ijo, orọnikọ otafe ẹkwotọ mai ma bi jo seha ha, koyehọ iruo omọfa, rekọ ma wo ẹruore inọ, nọ ẹrọwọ rai o bi dhe ẹgẹga na, iruo nọ ma ru na i ti vihọ, evaọ ẹkwotọ mai na. Onana o vẹ te lẹliẹ omai ru viere, 16 re ma sai whowho usi uwoma na evaọ erẹwho efa, re ma gbẹ rehọ iruo nọ a ru no evaọ ẹkwotọ omọfa ro seha ha. 17 “Rekọ jọ ọnọ o bi seha, ọ rehọ Jihova* seha.”+ 18 Keme orọnikọ ohwo nọ ọye ọvo o bi dhesẹ omariẹ fihọ emamọ ohwo a rẹ jẹrehọ họ,+ rekọ ohwo nọ Jihova* o dhesẹ fihọ emamọ ohwo.+

11 Me bi rẹro nọ wha ti thihakọ kẹ omẹ evaọ eme mẹ nọ e dina kare iroro na. Uzẹme riẹ họ, wha bi thihakọ kẹ omẹ. 2 Keme mẹ be re ihri fiki rai wọhọ epaọ ihri-eriọ* Ọghẹnẹ, keme mẹ sa owhai họ otọ kẹ ọzae ọvo, Kristi, yọ mẹ gwọlọ rehọ owhai kẹe wọhọ ọmọtẹ-kọkọ.*+ 3 Rekọ ozọ u bi mu omẹ inọ wọhọ epanọ araomuomu na ọ rehọ ẹghẹ riẹ viẹ Ivi họ na,+ ọ sai gbe iroro rai ku, wha ve ti gbabọkẹ oruọzewọ gbe uzuazọ nọ o kare ọfariẹ-ogbe* nọ ma re yeri nọ u fo kẹ Kristi.+ 4 Keme epanọ o rrọ na, ohwo jọ ọ tẹ nyabru owhai ze bi whowho Jesu ọfa viukpọ ọnọ ma whowho kẹ owhai na, hayo ọ wha oghẹrẹ ẹzi ọfa ze viukpọ onọ wha wo vẹre na, hayo usi uwoma ofa viukpọ onọ wha jẹrehọ+ na, wha bi dede iei rehọ lọlọhọ. 5 Mẹ ruẹ nọ obọdẹ ikọ rai na a woma vi omẹ evaọ oware ovo ho.+ 6 Rekọ o tẹ make rọnọ me wo onaa ẹme+ he, mẹ rrọ ere he evaọ eriariẹ; yọ ma dhesẹ onana via kẹ owhai evaọ edhere kpobi gbe evaọ oware kpobi.

7 Hayo kọ mẹ raha uzi nọ me ro ru omamẹ kpotọ re a sae kpare owhai kpehru, nọ mẹ rọ rehọ evawere whowho usi uwoma Ọghẹnẹ kẹ owhai ọvọvẹ?+ 8 Mẹ whaha ikoko efa eware nọ u fo nọ a re wo* nọ mẹ jẹ eware nọ a rọ ze* rehọ re mẹ sae gbodibo kẹ owhai.+ 9 Ghele na, okenọ mẹ jọ kugbe owhai nọ eware e kare omẹ obọ, mẹ jọ owha kẹ ohwo ọvo ho, keme inievo nọ i no obọ Masidonia ze a kẹ omẹ eware kpobi nọ e kare omẹ.+ Ẹhẹ, evaọ edhere kpobi, mẹ daoma re mẹ siọ owha ba ẹjọ kẹ owhai, yọ me ti gbe ru ere.+ 10 Nọ mẹ be ta uzẹme wọhọ Kristi na, mẹ rẹ siọ ehaise nana ba ha+ evaọ ibrotọ Akeya. 11 Fikieme me bi ro ru onana? Kọ fikinọ me you owhai hi? Ọghẹnẹ ọ riẹ nọ me you owhai.

12 Rekọ me ti gbe ru oware nọ me bi ru na,+ re mẹ raha eviẹhọ enọ e be gwọlọ oware* nọ a rẹ rọ jọ ẹrẹrẹe kugbe omai evaọ eware* nọ a bi ro seha na. 13 Keme ezae itieye na yọ ikọ erue, iruiruo eviẹhọ, nọ i re ku oma eviẹhọ họ ro ru omarai wọhọ ikọ Kristi.+ 14 Onana u gbunu hu keme Setan omariẹ ọ be hae ku oma eviẹhọ họ ro ru omariẹ wọhọ ukọ-odhiwu elo.+ 15 Fikiere o rrọ okpoware he otẹrọnọ idibo riẹ a be hai ku oma eviẹhọ họ ro ru omarai wọhọ egbodibo ẹrẹreokie. Rekọ ukuhọ rai o te jọ wọhọ epaọ iruo rai.+

16 Mẹ be wariẹ ta nọ: Jọ ohwo ọvo o roro nọ mẹ kare iroro ho. Rekọ wha tẹ maki roro ere, jọ wha rehọ omẹ wọhọ ohwo nọ ọ kare iroro, re mẹ sai seha omojọ re. 17 Eme nọ mẹ be ta obọnana o wọhọ epaọ oriruo Olori na ha, rekọ wọhọ epaọ ohwo nọ ọ kare iroro nọ ọ rẹ rẹroso omobọ riẹ nọ o bi seha. 18 Nọ orọnọ ibuobu a be rehọ eware akpọ na* seha na, me ti seha re. 19 Nọ orọnọ wha “wo areghẹ” gaga na, wha rọ evawere thihakọ kẹ enọ e kare iroro. 20 Evaọ uzẹme, wha bi thihakọ kẹ ohwo kpobi nọ o bi ru owhai họ erigbo, nọ o bi gboro eware rai, nọ o bi fru eware rai rehọ, nọ o bi ru omariẹ ohwo ologbo kẹ owhai, gbe ọnọ ọ be tehe owhai ovao.

21 Mẹ be ta onana avọ omovuọ keme ahwo jọ a bi rri omai wọhọ ẹsenọ ma rrọ eyẹlẹ.

Rekọ otẹrọnọ ahwo jọ a bi ru eware ududu—mẹ be ta onana wọhọ ohwo nọ ọ kare iroro—me bi ru eware ududu re. 22 Kọ ahwo Hibru a rrọ? Ere omẹ re.+ Kọ ahwo Izrẹl a rrọ? Ere omẹ re. Kọ emọ* Abraham a rrọ? Ere omẹ re.+ 23 Egbodibo Kristi a rrọ? Mẹ be kẹ uyo wọhọ ọruẹ, mẹ rrọ ere vi ai: Me ru iruo vi ai,+ a fi omẹ họ uwou-odi unuẹse buobu vi ai, a kpe omẹ unuẹse buobu,+ yọ ẹsibuobu mẹ kẹle uwhu.+ 24 Isiasoi ahwo Ju a fa omẹ eviaviẹ ọvo o no udhuvẹ,*+ 25 isiasa a rọ ekpọ fa omẹ,+ a rọ itho fi omẹ ẹsiẹvo,+ isiasa okọ u zue omẹ,+ aso ọvo gbe okpẹdoke mẹ jọ ame evaọ abade ọraragha; 26 evaọ erẹ ẹsibuobu, mẹ jọ ọza evaọ ithẹ, ọza evaọ obọ igbulegbu, ọza evaọ obọ ahwo obọmẹ,+ ọza evaọ obọ ahwo erẹwho efa,+ ọza evaọ okpẹwho,+ ọza evaọ udhude, ọza evaọ abade, ọza evaọ udevie inievo erue, 27 evaọ iruo egaga avọ omolahiẹ, aso buobu ababọ owezẹ,+ ohọo gbe uruame,+ ababọ emu unuẹse buobu,+ evaọ ekpahe gbe ababọ ewu.*

28 U te no eware yena nọ i te ugboma mẹ na no, u wo oware jọ nọ u bi kpokpo udu mẹ* kẹdẹ kẹdẹ: awaọruọ kpahe ikoko na kpobi.+ 29 Ono oma o rẹ lọhọ nọ oma o gbẹ lọhọ omẹ hẹ? Ono a re ru zoruẹ nọ eva e gbẹ dha omẹ hẹ?

30 Otẹrọnọ me re seha, eware nọ i bi dhesẹ nọ mẹ ga ha me re ro seha. 31 Ọghẹnẹ gbe Ọsẹ Olori na Jesu, Ọnọ a re jiri bẹdẹ bẹdẹ, ọ riẹ nọ ọrue mẹ be ta ha. 32 Evaọ Damaskọs, osu jọ evaọ otọ Aritas ovie na o je rou* okpẹwho na re ọ ruẹsi mu omẹ, 33 rekọ a te fi omẹ họ ekete, a tẹ rọ unu unwido jọ evaọ ugbẹhẹ okpẹwho na si omẹ kpotọ,+ mẹ tẹ vae abọ.

12 Me re seha. Mẹ riẹ nọ o rẹ kẹ erere he. Ghele na, mẹ te ta kpahe eruẹaruẹ+ gbe eviavia igbunu nọ i no obọ Olori na ze.+ 2 Mẹ riẹ ọzae jọ nọ ọ rrọ usu kugbe Kristi. Ikpe ikpegbene nọ e vrẹ a rehọ e riẹ vrẹ idudhe kpohọ odhiwu avọ esa, sọ oma uwo a rọ rehọ iẹe vrẹ hayo oma uwo ho mẹ riẹ hẹ; Ọghẹnẹ ọ riẹ. 3 Ẹhẹ, mẹ riẹ ọzae otiọye na. Sọ oma uwo a rọ rehọ iẹe vrẹ hayo oma uwo ho mẹ riẹ hẹ; Ọghẹnẹ ọ riẹ. 4 Nọ a rehọ iẹe vrẹ kpohọ aparadase, o yo eme nọ a rẹ sae ta ha, nọ i fo eme nọ ohwo ọ rẹ ta ha. 5 Mẹ rẹ rehọ ohwo otiọye na seha, rekọ mẹ rẹ rehọ omobọ mẹ seha ha, ajokpaọ eria nọ mẹ jọ ga ha. 6 Keme mẹ tẹ tubẹ gwọlọ seha, u ti dhesẹ nọ mẹ kare iroro ho, keme uzẹme na mẹ te ta. Rekọ me bi ru ere he, re ohwo ọvo o gbe jiri omẹ vi oware nọ ọ be jọ oma mẹ ruẹ hẹ hayo nọ o bi yo mi omẹ, 7 fikinọ eviavia igbunu itieye na i te omẹ obọ.

Re me gbe fu uke ga hrọ họ, a kẹ omẹ unwe evaọ oma+ mẹ nọ u bi duwu omẹ, ukọ Setan re ọ hae tehe* omẹ, re me gbe fu uke ga hrọ họ. 8 Isiasa mẹ lẹ Olori na kpahe onana inọ jọ u no omẹ oma. 9 Rekọ ọ ta kẹ omẹ nọ: “Uwowou ulogbo nọ me dhesẹ kẹ owhẹ u te, keme evaọ oma enọ e ga ha ogaga mẹ u re jo dhesẹ oma via vọvọ.”+ Fikiere avọ evawere, mẹ rẹ rọ eware nọ mẹ jọ ga ha seha, re ogaga Kristi o ruẹsi ruru omẹ wọhọ uwou-udhu. 10 Fikiere oma o rẹ were omẹ okenọ mẹ ga ha, nọ a tẹ be poviẹ omẹ, nọ eware e tẹ rrọ omẹ oma gaga, nọ ukpokpoma gbe ebẹbẹ i te te omẹ fiki Kristi. Keme okenọ mẹ ga ha, ẹsiẹe me re wo ogaga.+

11 Me zihe ruọ ohwo nọ ọ kare iroro no. Whai wha ru omẹ zihe ruọ ere, keme whai u fo nọ wha re dhesẹ omẹ inọ mẹ yọ emamọ ohwo. Obọdẹ ikọ rai na a woma vi omẹ evaọ oware ovo ho, dede nọ mẹ yọ ohwo ọvo ho.+ 12 Evaọ uzẹme, me gine dhesẹ nọ ukọ ọ rrọ udevie rai ẹkwoma ithihakọ egaga+ gbe eware eka gbe eware igbunu avọ iruo ilogbo nọ me ru evaọ udevie rai.+ 13 Edhere vẹ me ro rri ikoko edekọ na aro vi owhai, u te no owha ẹruorote mẹ nọ mẹ wọ họ owhai uzou hu?+ Olẹ, wha rọ oruthọ nana rọvrẹ omẹ.

14 Rri! Onana họ orọ avọ isiasa nọ mẹ be rọ wọ nọ mẹ rẹ nyabru owhai ze, yọ mẹ te jọ owha kẹ owhai hi. Orọnikọ ekwakwa rai mẹ be gwọlọ họ+ rekọ owhai; keme orọnikọ emọ+ họ enọ e rẹ kọ okọ kokohọ kẹ esẹgbini rai hi rekọ esẹgbini e rẹ kọ okọ kokohọ kẹ emọ rai. 15 Rọkẹ omẹ, mẹ rẹ rọ evawere rehọ eware mẹ kpobi gbe uzuazọ mẹ gbodibo fiki rai.+ Otẹrọnọ me you owhai ga tere, kọ mẹ wha re you tere he? 16 O make rrọ ere na, mẹ rọ uye bẹ owhai hi.+ Ghele na, wha be ta nọ me wo “ẹghẹ” gbe inọ “eviẹhọ” mẹ rọ ruọ owhai oma. 17 Kọ mẹ rọ ẹkwoma ọjọ evaọ usu ahwo nọ me vi se owhai na gbaviẹ oware jọ mi owhai? 18 Mẹ tuduhọ Taitọs awọ nọ ọ nyabru owhai ze, me te je vi oniọvo jọ lele iei. Taitọs ọ gbaviẹ oware ovo mi owhai hi, manikọ ere he?+ Ẹzi ọvona mẹ gbe ọyomariẹ ma dhesẹ, o gbẹ rrọ ere? Oghẹrẹ ovona ma ru, o gbẹ rrọ ere?

19 Kọ wha bi roro nọ ẹkẹ-unu mai ma bi gu kẹ owhai evaọ eme nọ wha ta kpahe omai na? Evaọ aro Ọghẹnẹ ma be jọ ta ẹme nana wọhọ ilele Kristi. Rekọ iyoyou, eware kpobi nọ ma bi ru, ma bi ru ai rọ bọ owhai ga. 20 Keme ozọ u bi mu omẹ inọ mẹ tẹ nyaze, ẹsejọhọ mẹ te ruẹ owhai oghẹrẹ nọ mẹ gwọlọ họ, yọ wha te ruẹ omẹ oghẹrẹ nọ wha gwọlọ gbe he, ukpoye kọ eware nana mẹ te ruẹ evaọ udevie rai: ẹwhọ, ihri-eriọ, ofu-omuo, ohẹriẹ, eme iyoma eta, iguẹgu,* uke-ufuo avọ omorro, gbe ozighi. 21 Ẹsejọhọ, nọ mẹ te wariẹ nyaze na, Ọghẹnẹ mẹ o ti ru omẹ oma vo evaọ udevie rai, me ve ti weri fiki ibuobu nọ e raha uzi vẹre nọ i ri kurẹriẹ hẹ no egbegbe rai, ọfariẹ-ogbe,* gbe uruemu nọ u fo ho nọ a re ru ababọ omovuọ.*

13 Onana họ orọ avọ esa nọ mẹ be rọ nyabru owhai ze. “Isẹri* imava hayo isẹri imasa a re ro vuhu uzẹme oware kpobi nọ o via.”+ 2 Dede nọ mẹ rrọ kugbe owhai obọnana ha, o wọhọ ẹsenọ mẹ rrọ kugbe owhai orọ avọ isiava, yọ mẹ be kẹ enọ e raha uzi vẹre na gbe otu nọ i kiọkọ kpobi unuovẹvẹ kpahotọ inọ, mẹ tẹ sae wariẹ nyaze, mẹ te kẹ ae uvẹ hẹ, 3 nọ orọnọ wha be gwọlọ imuẹro nọ i re dhesẹ nọ Kristi, ọnọ ọ rrọ ọyẹlẹ kẹ owhai hi rekọ ọgba evaọ udevie rai na, ọye ọ be ginẹ rọ omẹ ta ẹme na. 4 Evaọ uzẹme, a kare riẹ fihọ ure kpe fikinọ ọ ga ha, rekọ ọ rrọ uzuazọ fiki ogaga Ọghẹnẹ.+ Ẹhẹ, ma ga ha wọhọ epanọ ọ jọ, rekọ ma ti lele iei rria+ fiki ogaga Ọghẹnẹ nọ o rrọ oma rai ru iruo.+

5 Wha hae dawo sọ wha gbẹ rrọ ẹrọwọ na; wha hai dhesẹ oghẹrẹ ohwo nọ wha rrọ via.+ Hayo kọ wha gbẹ riẹ nọ Jesu Kristi ọ rrọ usu kugbe owhai? Ajokpanọ a siọ owhai no. 6 Me bi rẹro nọ wha ti vuhumu nọ Ọghẹnẹ ọ siọ omai hi.

7 Ma be lẹ se Ọghẹnẹ inọ jọ wha ru oware ovo thọ họ, orọnikọ re a rri omai nọ a jẹ omai rehọ no ho rekọ re wha sai ru oware uwoma, o tẹ make rọnọ ma wọhọ enọ a se no. 8 Keme ma sai ru oware ovo wọso uzẹme na ha, rekọ rọkẹ uzẹme na ọvo. 9 Evaọ uzẹme, ma rẹ ghọghọ oke kpobi nọ ma ga ha rekọ nọ wha tẹ rrọ gaga. Yọ onana họ oware nọ mẹ be lẹ kẹ re a kpọ owhai vi. 10 Oyejabọ nọ me ro kere eware nana se owhai nọ mẹ rrọ kugbe owhai hi na, re nọ mẹ tẹ nyaze, me gbe ru owhai gaga ha evaọ eroruiruo udu nọ Olori na ọ kẹ omẹ+ nọ mẹ rẹ rọ bọ owhai ga orọnikọ re me ro whrehe owhai hi.

11 Ukuhọ riẹ, inievo, wha hae ghọghọ, wha hae kpọ iroro rai vi, wha hai wo omosasọ,+ wha hai wo iroro evo,+ wha hae rria dhedhẹ;+ Ọghẹnẹ uyoyou gbe ọrọ udhedhẹ+ na ọ te jọ kugbe owhai. 12 Wha rọ ẹviọlọ ọrẹri yere ohwohwo. 13 Erẹri na kpobi a vi uyere rai se owhai.

14 Jọ Olori na Jesu Kristi o dhesẹ uwowou ulogbo riẹ kẹ owhai kpobi, jọ Ọghẹnẹ o dhesẹ uyoyou kẹ owhai kpobi, jẹ kẹ owhai kpobi ẹzi ọfuafo na nọ wha bi wo erere no ze na.