ILETA RO SE AHWO GALESHA

1 Mẹ Pọl yọ ukọ, orọnọ ahwo jọ a rehọ omẹ mu hu, yọ orọnọ ẹkwoma ohwo jọ a rọ rehọ omẹ mu hu, rekọ enọ e rehọ omẹ mu họ Jesu Kristi+ gbe Ọghẹnẹ Ọsẹ na,+ ọnọ ọ kpare riẹ no uwhu ze, 2 mẹ avọ inievo na kpobi nọ e rrọ kugbe omẹ, ma bi kere se ikoko obọ Galesha:

3 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ. 4 Jesu o whu fiki izieraha mai+ re ọ ruẹsi siwi omai no uyero-akpọ* omuomu nana+ wọhọ epaọ oreva Ọghẹnẹ gbe Ọsẹ mai.+ 5 Jọ oruaro u tei bẹdẹ bẹdẹ. Ami.

6 U bi gbe omẹ unu inọ wha nwani mu ọnọ ọ rọ ẹkwoma uwowou ulogbo Kristi se owhai na họ ẹnyaseba no, wha tẹ be gaviezọ kẹ oghẹrẹ usi uwoma ofa jọ.+ 7 Orọnikọ usi uwoma ofa jọ o riẹ hẹ; rekọ otujọ e riẹ nọ i bi kpokpo owhai+ jẹ be gwọlọ rẹriẹ usi uwoma kpahe Kristi na. 8 Rekọ, o tẹ make rọnọ mai hayo ukọ-odhiwu jọ o whowho usi uwoma jọ kẹ owhai, onọ u wo ohẹriẹ no onọ ma whowho kẹ owhai na, jọ uye u tei.* 9 Wọhọ epanọ ma ta no vẹre na, mẹ be wariẹ ta nọ, Ohwo kpobi nọ o bi whowho usi uwoma jọ kẹ owhai, onọ u wo ohẹriẹ no onọ wha rọwo na, jọ uye u tei.*

10 Kọ ọjẹrehọ ahwo mẹ be gwọlọ manikọ ọrọ Ọghẹnẹ? Hayo kọ ahwo mẹ be gwọlọ ru eva were? Otẹrọnọ ahwo me gbe bi ru eva were, kiyọ mẹ ọrigbo Kristi hi. 11 Keme mẹ gwọlọ nọ wha riẹ, inievo, inọ usi uwoma nọ me whowho kẹ owhai na orọnikọ obọ ohwo-akpọ u no ze he;+ 12 keme orọnikọ ohwo-akpọ ọ rehọ e riẹ kẹ omẹ hẹ, yọ orọnọ ohwo jọ o wuhrẹ omẹ hẹ, rekọ Jesu Kristi o dhesẹ i rie via kẹ omẹ.

13 Wha yo kpahe uruemu nọ me wo vẹre okenọ mẹ jọ egagọ ahwo Ju,+ inọ me je kpokpo ukoko Ọghẹnẹ gaga* jẹ gwọlọ raha iẹe muotọ;+ 14 yọ me je wo ẹnyaharo evaọ egagọ ahwo Ju vi ehwa mẹ buobu evaọ orẹwho mẹ, keme me wo ajọwha kẹ iruemu oke anwae esẹ mẹ vi ai thethabọ.+ 15 Rekọ nọ Ọghẹnẹ, ọnọ ọ rehọ omẹ no edhede oni mẹ ze, je se omẹ fiki uwowou ulogbo riẹ,+ o rri nọ u woma 16 re ọ rehọ ẹkwoma mẹ dhesẹ Ọmọ riẹ via, re mẹ sai whowho usi uwoma kpahe iẹe kẹ erẹwho na,+ mẹ nyae nọ mi ohwo-akpọ* ọvuọvo okioke yena ha; 17 yọ me kpobọ Jerusalẹm bru enọ e rrọ ikọ no taure me te ti zihe ruọ ukọ họ, rekọ me kpobọ Arebia, kẹsena me te zihe kpobọ Damaskọs.+

18 Nọ ikpe esa e vrẹ no, me te kpobọ Jerusalẹm+ nyae ruẹ Sifas,*+ mẹ tẹ jọ kugbei edẹ ikpegbisoi. 19 Rekọ mẹ ruẹ ikọ edekọ na ọvuọvo ho, ajokpaọ Jemis+ oniọvo Olori na. 20 Whaọ, kpahe eware nọ me bi kere se owhai na, mẹ be jọ aro Ọghẹnẹ ta kẹ owhai nọ mẹ be ta ọrue he.

21 Kẹsena me te no etẹe kpohọ ibrotọ Siria gbe Silisia.+ 22 Rekọ ikoko Ileleikristi nọ e rrọ Judia e riẹ omẹ evaọ ovao ho. 23 Oware nọ a je yo ọvo họ: “Ọzae nọ o je kpokpo omai+ vẹre na o bi whowho usi uwoma na enẹna kpahe orọwọ nọ ọ jẹ raha no na.”+ 24 Fikiere a te mu Ọghẹnẹ họ ejiri fiki mẹ.

2 Kẹsena nọ ikpe ikpegbene e vrẹ no, mẹ avọ Banabas+ ma tẹ wariẹ kpobọ Jerusalẹm, yọ mẹ wha Taitọs lele oma re.+ 2 Mẹ nya kpohọ obei keme Olori na o dhesẹ via kẹ omẹ nọ mẹ nya, me te gbiku usi uwoma nọ mẹ be jọ erẹwho na ta kẹ ae. Rekọ ezae nọ e viodẹ ọvo nọ i kokohọ me gbiku nana kẹ, re u mu omẹ ẹro sọ ohrẹ nọ mẹ be dhẹ na hayo onọ mẹ dhẹ no, o rrọ uvrẹvru hu. 3 Rekọ, makọ Taitọs+ nọ ọ jọ kugbe omẹ dede, ọnọ ọ rrọ ohwo Griki, a gba riẹ họ họ inọ ọ yawo.+ 4 Rekọ ẹme yena ọ romavia fiki inievo erue, enọ e lẹlẹ ruọ+ ukoko na re a kiotọ ufuoma+ nọ ma wo fiki usu nọ ma rrọ kugbe Kristi Jesu, re a ruẹsi ru omai jọ erigbo riẹriẹriẹ;+ 5 ma fi oma họ otọ hayo kẹ ae uvẹ hẹ,+ ijo, makọ evaọ omoke jọ* dede, re uzẹme usi uwoma na o gbẹ sae jọ eva rai.

6 Rọ kpahe inievo nọ o wọhọ nọ e viodẹ na,+ oghẹrẹ ahwo nọ a jọ kẹhẹ u muẹme kẹ omẹ hẹ, keme orọnikọ oghẹrẹ nọ ohwo ọ rrọ evaọ okafe oye Ọghẹnẹ o re rri hi, yọ inievo yena nọ a bi rri kpekpehru na a wuhrẹ omẹ oware okpokpọ ovuovo ho. 7 Ukpoye, nọ a ruẹ nọ a rehọ omẹ mu no re mẹ ta usi uwoma na kẹ enọ e yawo ho,+ nwane wọhọ epanọ a rehọ Pita mu rọkẹ enọ e yawo na— 8 keme ọnọ ọ kẹ Pita ogaga re ọ jọ ukọ kẹ enọ e yawo na ọye ọ kẹ omẹ ogaga re, re mẹ jọ ukọ kẹ ahwo erẹwho na+— 9 yọ nọ a ruẹ uwowou ulogbo nọ Ọghẹnẹ o dhesẹ kẹ omẹ,+ Jemis+ avọ Sifas* gbe Jọn, enọ e jọ wọhọ ipila evaọ ukoko na, a tẹ suọ omẹ avọ Banabas+ obọ ro dhesẹ nọ a rọwo re ma nyabru ahwo erẹwho na, ae omarai a vẹ nyabru enọ e yawo. 10 Oware nọ a ta kpobi họ, joma wo iyogbe na họ iroro, yọ mẹ be ginẹ daoma ru onana re.+

11 Rekọ nọ Sifas*+ ọ ziọ Antiọk,+ mẹ whọku ei ovao dhe ovao,* keme o gine ru thọ.* 12 Keme taure ezae jọ nọ Jemis+ o vi ze a tẹ te nyaze, ọ jẹ hai lele ahwo erẹwho na re emu;+ rekọ nọ a nyaze no, ọ tẹ se onana ba eru, ọ tẹ hẹriẹ oma no ai fiki ozọ otu nọ e yawo na.+ 13 Ahwo Ju nọ a kiọkọ a kuomagbei re evaọ ẹghẹ* nana, yọ makọ Banabas dede o kuomagbe ai evaọ ẹghẹ* rai na. 14 Rekọ nọ mẹ ruẹ nọ a be nya lele uzẹme usi uwoma na ha,+ mẹ tẹ ta kẹ Sifas* evaọ iraro rai kpobi nọ: “Otẹrọnọ whẹ nọ ọ rrọ ohwo Ju o bi ru wọhọ ahwo erẹwho na, orọnikọ wọhọ ahwo Ju hu, ẹvẹ whọ be rọ gba ahwo erẹwho na họ re a ru lele uruemu ahwo Ju?”+

15 Mai nọ a yẹ wọhọ ahwo Ju, orọnikọ erahaizi nọ i no erẹwho na ze he, 16 ma vuhumu nọ ẹkwoma ẹrọwọ+ nọ ohwo o fihọ Jesu Kristi+ ọvo a re ro kuenu kẹe nọ o kiẹrẹe, orọnikọ fiki eruo eware nọ uzi o ta ha. Fikiere ma fi ẹrọwọ họ Kristi Jesu no, re a ruẹse rọ fiki ẹrọwọ nọ ma fihọ Kristi kuenu kẹ omai nọ ma kiẹrẹe, orọnikọ fiki eruo eware nọ uzi o ta ha, keme a ti kuenu kẹ ohwo* ọvo inọ o kiẹrẹe he fiki eruo eware nọ uzi o ta.+ 17 Kọ otẹrọnọ a bi rri omai wọhọ erahaizi re fikinọ ma be gwọlọ nọ a rọ ẹkwoma Kristi kuenu kẹ omai nọ ma kiẹrẹe, kọ u dhesẹ nọ Kristi ọ be tuduhọ omai awọ nọ ma raha uzi? O rrọ ere vievie he! 18 Otẹrọnọ uzedhe eware nọ me kporo kuotọ no mẹ be wariẹ bọ, kiyọ me bi dhesẹ nọ ọrahauzi mẹ rrọ. 19 Keme mẹ rọ ẹkwoma ekoko uzi whu no evaọ abọ uzi,+ re mẹ ruẹse jọ uzuazọ evaọ abọ Ọghẹnẹ. 20 A tehe omẹ fihọ ure na kugbe Kristi no.+ Orọnikọ mẹ ọ rrọ uzuazọ na ha,+ rekọ Kristi họ ọnọ ọ be rria evaọ oma mẹ. Evaọ uzẹme, oware nọ o be kpọ uzuazọ nọ me bi yeri enẹna evaọ uwo na họ ẹrọwọ nọ me fihọ Ọmọ Ọghẹnẹ,+ ọnọ o you omẹ, o te siobọno omariẹ fiki mẹ.+ 21 Mẹ be se* uwowou ulogbo nọ Ọghẹnẹ o dhesẹ kẹ omẹ hẹ,+ keme otẹrọnọ ẹkwoma ekoko uzi a re ro kiẹrẹe, kiyọ Kristi o whu kufiẹ.+

3 O whai ahwo Galesha nọ a wo areghẹ hẹ! Ono ọ viẹ owhai họ ruọ uyero uyoma nana,+ whai nọ a dhesẹ Jesu Kristi vevẹ kẹ inọ a tehe riẹ fihọ ure?+ 2 Mẹ gwọlọ nọ owhai onọ nana:* Kọ ẹzi na o te owhai obọ fiki eruo eware nọ uzi o ta manikọ fiki ẹrọwọ nọ wha fihọ ẹme nọ wha yo?+ 3 Kọ ere wha ghẹ te? Nọ wha muhọ, wha je lele ekpakpọ ẹzi na,* kọ edhere uwo wha bi lele ro kuhọ?*+ 4 Kọ uye sa-sa nọ o bẹ owhai na, o bẹ owhai kufiẹ? Me roro ere he! 5 Nọ o rrọ ere na, kọ ọnọ ọ be kẹ owhai ẹzi na je bi ru iruo igbunu+ evaọ udevie rai na o bi ru enana kpobi fikinọ wha ru eware nọ uzi o ta manikọ fiki ẹrọwọ nọ wha fihọ ẹme nọ wha yo? 6 Nwane wọhọ epanọ Abraham “o fi ẹrọwọ họ Jihova,* a te kele iei kẹe wọhọ ẹrẹreokie.”+

7 Ababọ avro, wha riẹ nọ enọ i wo ẹrọwọ eye họ emezae Abraham.+ 8 Whaọ nọ ikereakere na e jẹ ta kpahe oware nọ o te via evaọ obaro inọ Ọghẹnẹ o ti kuenu kẹ ahwo erẹwho na inọ a kiẹrẹe fiki ẹrọwọ, i whowho usi uwoma na kẹ Abraham kpahotọ, inọ: “Ẹkwoma ra erẹwho na kpobi i ti ro wo oghale.”+ 9 Fikiere enọ i wo ẹrọwọ i bi wo eghale nọ i te Abraham nọ o wo ẹrọwọ na.+

10 Ahwo kpobi nọ a rẹroso eruo eware nọ uzi o ta, uye o rrọ ae uzou, keme a kere nọ: “Uye u te ohwo kpobi nọ o bi koko eware kpobi nọ a kere fihọ uko-obe Uzi na ẹsikpobi hi, nọ o bi ru ai hi.”+ 11 Ofariẹ, o rrọ vevẹ nọ a re kuenu kẹ ohwo ọvo inọ o kiẹrẹe evaọ aro Ọghẹnẹ fiki ekoko uzi hi,+ keme “ohwo okiẹrẹe o ti wo uzuazọ fiki ẹrọwọ.”+ 12 Whaọ, u du gwọlọ ẹrọwọ re a te koko Uzi na ha. Ukpoye, “ohwo kpobi nọ o bi ru eware nana o ti wo uzuazọ fiki rai.”+ 13 Kristi ọ dẹ omai,+ o te si omai+ no uye Uzi na, ọ tẹ rọ enẹ zihe ruọ ọnọ a bọwo ehao* viukpọ omai, keme a kere nọ: “Ohwo kpobi nọ a kare fihọ ure yọ ọnọ a bọwo ehao.”*+ 14 Onana o rrọ enẹ re eghale nọ a ya eyaa rai kẹ Abraham na i te erẹwho na obọ ẹkwoma Kristi Jesu,+ re ẹzi nọ a ya eyaa riẹ na o ruẹsi te omai obọ+ fiki ẹrọwọ mai.

15 Inievo, mẹ be rọ oware nọ ahwo-akpọ a riẹ rọ kẹ ọtadhesẹ: A tẹ whobọhọ ọvọ no, o tẹ make rọnọ ohwo-akpọ ọvo ọ whobọhọ iẹe, omọfa ọ rẹ sae raha iẹe he hayo fibae he. 16 Whaọ Abraham avọ ọmọ* riẹ a ya eyaa na kẹ. Orọnikọ o ta nọ “gbe emọ*+ ra” ha, wọhọ ẹsenọ e rrọ buobu. Ukpoye, o ta nọ, “gbe ọmọ* ra,” koyehọ omọvo, ọnọ ọ rrọ Kristi.+ 17 Ofariẹ, mẹ be ta onana: Uzi na, onọ Ọghẹnẹ ọ kẹ nọ ikpe egba ene gbe ọgba (430) e vrẹ no,+ o raha ọvọ nọ Ọghẹnẹ ọ re kugbe Abraham na ha, u si eyaa na no otọ họ. 18 Keme otẹrọnọ fiki ekoko uzi a re ro wo ukuoriọ na, kiyọ o gbẹ rrọ fiki eyaa ha; rekọ Ọghẹnẹ ọ rehọ ukuoriọ na kẹ Abraham ẹkwoma eyaa.+

19 Kọ fikieme a rọ kẹ Uzi na? A kẹ Uzi na re u ru iruthọ dhesẹ oma via,+ bẹsenọ ọmọ* nọ a ya eyaa na kẹ ọ rẹ nyaze;+ Ọghẹnẹ ọ rehọ e riẹ kẹ ikọ-odhiwu,+ a tẹ rehọ iẹe kẹ obruthe ro se ahwo na.+ 20 Nọ ahwo a te bu vrẹ omọvo a jẹ gwọlọ obruthe, rekọ Ọghẹnẹ ọvo ọ ya eyaa na. 21 Kọ Uzi na o wọso eyaa Ọghẹnẹ? Vievie! Keme otẹrọnọ a kẹ ahwo uzi nọ o rẹ sae wha uzuazọ ze no, kiyọ uzi o hai ru ahwo kiẹrẹe. 22 Rekọ Ikereakere na i fi ahwo kpobi họ otọ igbo uzioraha, re eghale nọ a ya eyaa rai nọ i re te ohwo nọ o fi ẹrọwọ họ Jesu Kristi e ruẹsi te enọ i wo ẹrọwọ obọ.

23 Rekọ taure ẹrọwọ na ọ tẹ te ze, uzi o jẹ kpọ omai, ma jọ igbo riẹ, yọ ma je rẹro ẹrọwọ nọ a be te fere via.+ 24 Fikiere Uzi na o jọ ọsẹro* mai nọ o su omai bru Kristi,+ re a ruẹsi kuenu kẹ omai nọ ma kiẹrẹe fiki ẹrọwọ.+ 25 Rekọ enẹna nọ ẹrọwọ na ọ ze no na,+ ma gbẹ rrọ otọ ọsẹro ho.*+

26 Evaọ uzẹme, whai kpobi emọ Ọghẹnẹ+ fiki ẹrọwọ nọ wha fihọ Kristi Jesu.+ 27 Keme whai kpobi nọ e họ-ame fihọ Kristi wha wọhọ Kristi no.+ 28 Fikiere ohẹriẹ o rrọ udevie ohwo Ju avọ ohwo Griki hi,+ ohẹriẹ o rrọ udevie ọrigbo avọ ọmuyẹ hẹ,+ ohẹriẹ o rrọ udevie ọzae avọ aye he,+ keme whai kpobi ọvo evaọ usu kugbe Kristi Jesu.+ 29 Ofariẹ, otẹrọnọ wha rrọ erọ Kristi, whai ginọ emọ* Abraham,+ ereuku+ fiki eyaa.+

4 Whaọ mẹ be ta kẹ owhai nọ, ọreuku na ọ tẹ gbẹ rrọ ọmaha, o wo ohẹriẹ no ọrigbo ho, dede nọ ọye họ olori eware kpobi, 2 keme ọ gbẹ rrọ otọ enọ e be sẹro riẹ gbe irieyero bọo ẹdẹ nọ ọsẹ riẹ o fihọ. 3 Epọvo na re, okenọ ma jọ emaha, ma jọ erigbo kẹ eware esese akpọ na re.+ 4 Rekọ nọ okenọ Ọghẹnẹ o fihọ u te ziezi no, o te vi Ọmọ riẹ ze, ọnọ aye o yẹ,+ ọnọ a yẹ fihọ otọ uzi,+ 5 re ọ ruẹse dẹ enọ e rrọ otọ uzi no igbo,+ re Ọghẹnẹ ọ ruẹsi ru omai zihe ruọ emọ* riẹ.+

6 Whaọ fikinọ whai yọ emọ,* Ọghẹnẹ o fi ẹzi+ Ọmọ riẹ họ udu mai,+ yọ ẹzi na o bi bo nọ: “Abba,* Ọsẹ.”+ 7 Fikiere whai omomọvo ọ gbẹ rrọ ọrigbo ho rekọ ọmọ;* yọ otẹrọnọ ọmọ* wha rrọ, kiyọ Ọghẹnẹ o ru owhai ereuku no re.+

8 Rekọ, okenọ wha re riẹ Ọghẹnẹ hẹ, wha jọ erigbo kẹ enọ e rrọ eghẹnẹ hẹ. 9 Rekọ enẹna nọ wha riẹ Ọghẹnẹ no na, hayo, nọ Ọghẹnẹ ọ riẹ owhai no na, ẹvẹ wha be rọ wariẹ zihe bru eware esese ifofe nọ i fioka ha,+ jẹ be gwọlọ wariẹ gbodibo kẹ ae?+ 10 Wha be robọ kotọ koko edẹ gbe emerae+ gbe ezi sa-sa, gbe ikpe. 11 Ozọ u bi mu omẹ kẹ owhai inọ, o wọhọ nọ oma nọ mẹ dawo evaọ omarai uvrẹvru.

12 Inievo, mẹ be lẹ owhai, wha jọ wọhọ omẹ, keme mẹ jọ epanọ wha rrọ na oke jọ re.+ Wha ru omẹ oware ovo thọ họ. 13 Rekọ wha riẹ nọ ẹyao o ru omẹ wo uvẹ ọsosuọ nọ me ro whowho usi uwoma na kẹ owhai. 14 Yọ dede nọ ẹyao mẹ ọ jọ odawọ kẹ owhai, wha rri omẹ vo ho hayo rri omẹ tọtọtọ họ;* rekọ wha dede omẹ rehọ wọhọ ukọ-odhiwu Ọghẹnẹ, wọhọ Kristi Jesu. 15 Kọ evawere nọ wha je wo evaọ oke ẹdẹ na o rrọ? Keme me re se isẹri kẹ owhai inọ, o hae lọhọ, wha hai ti vre ibiaro rai no kẹ omẹ.+ 16 Kọ me zihe ruọ ọwegrẹ rai no fikinọ mẹ be ta uzẹme na kẹ owhai? 17 Ahwo jọ a be daoma gaga re a wo owhai tobọ, orọnọ fiki emamọ ẹjiroro ho; a gwọlọ hẹriẹ owhai no omẹ, re wha ruẹse rọ ọwhọ lele ai. 18 Rekọ, u re woma nọ ohwo jọ ọ tẹ be daoma gaga re o wo owhai tobọ fiki emamọ ẹjiroro, yọ orọnọ okenọ mẹ rrọ kugbe owhai ọvo ho, 19 emọ esese mẹ,+ enọ mẹ be rọ fiki rai wariẹ wo edada eyẹ bẹsenọ wha rẹ rọ jọ wọhọ Kristi no. 20 Dodokọ mẹ sae jọ kugbe owhai obọnana re mẹ rọ edhere ọfa ta ẹme na, keme mẹ gbẹ riẹ oware nọ me re ru kpahe owhai hi.

21 Wha ta kẹ omẹ, whai enọ e gwọlọ jọ otọ uzi na, Kọ wha be gaviezọ kẹ Uzi na? 22 Wọhọ oriruo, a kere nọ Abraham o wo emezae ivẹ, odibo-ọmọtẹ na o yẹ+ ọjọ, aye nọ ọ rrọ ọmuyẹ na o yẹ ọjọ;+ 23 rekọ ọrọ odibo-ọmọtẹ na yọ ọnọ a rọ ẹkwoma udihọ gheghe* yẹ,+ ọrọ aye ọmuyẹ na kọ ẹkwoma eyaa.+ 24 Eware nana i wo otofa ẹwoho; keme eyae ivẹ nana i dikihẹ kẹ evọ ivẹ, a re ọjọ evaọ Ugbehru Saena,+ onọ u yẹ emọ nọ e rrọ igbo, oye họ Hega. 25 Whaọ Hega o dikihẹ kẹ Saena,+ ugbehru jọ evaọ Arebia, yọ o dikihẹ kẹ Jerusalẹm inẹnẹ na, keme Jerusalẹm avọ emọ riẹ e rrọ igbo. 26 Rekọ Jerusalẹm obọ ehru na yọ ọmuyẹ, yọ ọye họ oni mai.

27 Keme a kere nọ: “Ghọghọ, whẹ aye nọ ọ rrọ ọga nọ o bi yẹ hẹ; bo ubo oghọghọ, whẹ aye nọ o bi wo edada eyẹ hẹ na; keme emọ aye nọ ọ rrọ ababọ na i bu vi erọ aye nọ o wo ọzae na.”+ 28 Whaọ inievo, whai yọ emọ eyaa na wọhọ epanọ Aiziki ọ jọ.+ 29 Rekọ nwane wọhọ epanọ ọnọ a rọ ẹkwoma udihọ gheghe* yẹ na o mu ọnọ a rọ ẹkwoma ẹzi yẹ họ ekpokpo na,+ ere o rrọ enẹna re.+ 30 Ghele na, kọ eme ikereakere na e ta? “Le odibo-ọmọtẹ na avọ ọmọzae riẹ vrẹ, keme ọmọzae odibo-ọmọtẹ na ọ sai lele ọmọzae nọ aye ọmuyẹ na o yẹ jọ ọreuku vievie he.”+ 31 Fikiere, inievo, mai yọ emọ odibo-ọmọtẹ hẹ rekọ erọ aye ọmuyẹ na.

5 Re ma wo ufuoma yena Kristi o ro si omai no igbo. Fikiere, wha dikihẹ ga,+ wha kuvẹ re a wariẹ gba owhai fihọ owhowha erigbo ho.+

2 Rri! Mẹ Pọl, mẹ be ta kẹ owhai nọ otẹrọnọ wha tẹ yawo, oware nọ Kristi o ru u ti wo erere ọvo kẹ owhai hi.+ 3 Mẹ be wariẹ ta kẹ ohwo kpobi nọ ọ yawo inọ o gba riẹ họ nọ o re koko Uzi na soso.+ 4 Wha hẹriẹ no Kristi no, whai enọ e be gwọlọ nọ a kuenu kẹ ae nọ a kiẹrẹe fiki uzi;+ wha kie no uwowou ulogbo riẹ no. 5 Rọkẹ omai, ma be rehọ ẹkwoma ẹzi rọ ọwhọ hẹrẹ epanọ ma ti ro kiẹrẹe fiki ẹrọwọ. 6 Keme evaọ usu kugbe Kristi Jesu, te ohwo ọ yawo hayo ọ yawo ho u muẹme he,+ rekọ oware nọ o roja họ ẹrọwọ nọ a rẹ rọ uyoyou dhesẹ via.

7 Wha jẹ dhẹ ziezi vẹre.+ Kọ ono ọ whaha owhai nọ wha gbẹ be rọ nya lele uzẹme na ha? 8 Orọnikọ obọ Ọnọ o bi se owhai na oghẹrẹ ẹtẹzẹ nana u no ze he. 9 Ẹvi* ọsese o re ru ukulu soso fu.+ 10 U mu omẹ ẹro nọ whai nọ e rrọ usu kugbe Olori na+ wha ti wo oghẹrẹ iroro efa ha; rekọ ohwo nọ ọ be wha ẹbẹbẹ se owhai na,+ oghẹrẹ ohwo kpobi nọ ọ rrọ kẹhẹ, o ti wo obrukpe nọ o fo rie. 11 Rọkẹ omẹ, inievo, otẹrọnọ mẹ gbẹ be suobọhọ oyawo, kọ fikieme a gbe bi ro kpokpo omẹ? O tẹ rrọ ere, kiyọ utho ezoruẹ nọ ure-oja*+ na o wha ze na u no otọ no. 12 O hae were omẹ otẹrọnọ ezae nọ e be gwọlọ wha ozighi fihọ owhai oma na a rẹ wharọ oma obọrai.*

13 A se owhai ze re wha wo ufuoma, inievo; rekọ wha rehọ ufuoma nana wọhọ uvẹ nọ wha re ro le isiuru uwo ho,+ rekọ wha rọ uyoyou gbodibo kẹ ohwohwo.+ 14 Keme ujaje ọvo u ru Uzi na soso gba,* oye họ: “Who re you ọrivẹ ra wọhọ omobọ ra hrọ.”+ 15 Rekọ, otẹrọnọ wha be họre jẹ be nwa ohwohwo oma,+ wha muẹrohotọ, o gbẹ rrọ ere he, wha ti kpe ohwohwo no.+

16 Rekọ mẹ be ta nọ, Wha hae nya lele ekpakpọ ẹzi na,+ wha ti ru eware isiuru uwo vievie he.+ 17 Keme eware nọ i re si uwo na urru e rẹ were ẹzi na ha, yọ erọ ẹzi na e rẹ were uwo na ha; ivẹ na e wọso ohwohwo, o tẹ be whae ze nọ uzedhe eware nọ wha gwọlọ ru, wha gbe bi ro ru ai hi.+ 18 Ofariẹ, otẹrọnọ ẹzi na o bi su owhai, yọ wha rrọ otọ uzi hi.

19 Whaọ a rẹ ruẹ iruo uwo vevẹ, eye họ ọfariẹ-ogbe,*+ egbegbe, uruemu nọ u fo ho nọ a re ru ababọ omovuọ,*+ 20 ẹdhọgọ, iruẹru-imizi,*+ egrẹ-ọjẹ, ohọre, ihri-eriọ, ofu-ọkpoo, ẹwhọ, ohẹriẹ, ẹtohọ itu sa-sa, 21 isiuru kẹ eware amọfa, idieda-thomawa,+ ehaa nọ a rẹ jọ ru eware odode,* gbe eware itienana.+ Mẹ be vẹvẹ owhai unu kpahe eware enana, wọhọ epanọ mẹ vẹvẹ owhai unu no vẹre, inọ enọ i bi ru eware itieye na a te reuku Uvie Ọghẹnẹ hẹ.+

22 Evaọ abọdekọ riẹ, ubi ẹzi na họ uyoyou, oghọghọ, udhedhẹ, odiri,* uwowou, ewoma,+ ẹrọwọ, 23 ẹwolẹ, oma-onyẹ.*+ Uzi ovo o wọso eware itieye na ha. 24 Ofariẹ, enọ e rrọ erọ Kristi Jesu a tehe uwo na avọ isiuru gbe ẹgwọlọ riẹ fihọ ure na no.+

25 Otẹrọnọ ẹzi na ọ be kpọ uzuazọ mai, joma yeri uzuazọ mai kpatiẹ ẹsikpobi lele ekpakpọ ẹzi na.+ 26 Wha joma wo omorro ho,+ ma wha oma-uhrowo fihọ udevie mai hi,+ ma re ohwohwo ihri gbe he.

6 Inievo, o tẹ make rọnọ ohwo jọ ọ jẹ owọ othọthọ taure ọ tẹ te riẹ, whai enọ e nyate itee Ikereakere na wha daoma kpọ ohwo otiọye na họ avọ ẹzi ẹwolẹ.+ Rekọ wha muẹrohọ omobọ rai+ fiki ozọ nọ odawọ o sai te owhai re.+ 2 Wha hai fiobọhọ wọ ewha egbẹgbẹdẹ ohwohwo,+ enẹ wha re ro ru uzi Kristi na gba.+ 3 Keme otẹrọnọ ohwo jọ o bi roro nọ ọyomariẹ yọ ohwo jọ kpakiyọ ọ rrọ oware ovo ho,+ ọ be viẹ omobọ riẹ họ. 4 Rekọ jọ omomọvo ọ kiẹ iruẹru obọriẹ riwi,+ kẹsena o ve ti wo oghọghọ no iruẹru obọriẹ ọvo ze, orọnikọ ọ rẹ rehọ omariẹ wawo omọfa ha.+ 5 Keme ohwo kpobi ọ te wọ ọvuọ owha riẹ.*+

6 Ofariẹ, jọ ohwo kpobi nọ a bi wuhrẹ* ẹme na ọ jọ eware iwoma kpobi nọ o wo ghale kẹ ọnọ o bi wuhrẹ* iẹe na.+

7 Jọ a su owhai thọ họ: Ọghẹnẹ ọ rrọ ọnọ a rẹ viẹhọ họ. Keme oware kpobi nọ ohwo ọ be kọ, oye o ti vu re;+ 8 keme ohwo nọ ọ be rọ iroro uwo riẹ kọ, o ti vu egbogbo no uwo riẹ na ze, rekọ ohwo nọ ọ be kọ wọhọ epanọ ẹzi na ọ be kpọe, o ti vu uzuazọ ebẹdẹ bẹdẹ no ẹzi na ze.+ 9 Fikiere, ma jọ oware uwoma uruo o bẹ omai no ho, keme nọ oke u te te, ma te kọrọ ibi riẹ otẹrọnọ oma o gbẹ rrọ omai no ho.*+ 10 Fikiere, nọ ma gbe wo uvẹ na,* joma ru oware uwoma kẹ ahwo kpobi, rekọ maero rọkẹ enọ ma gbẹ rrọ ẹrọwọ na.

11 Wha rri epanọ ibieme na i kpoko te, obọ mẹ me ro kere ileta nana se owhai.

12 Ahwo kpobi nọ a be gwọlọ jọ emamọ ahwo evaọ aro ahwo-akpọ* họ enọ e be gwọlọ gba owhai họ yawo, a bi ru onana re a siọ ae ba ekpokpo fiki ure-oja* Kristi na. 13 Keme makọ ahwo nọ a be yawo na dede a bi koko Uzi na ha,+ rekọ a gwọlọ nọ wha yawo re a ruẹse ruẹ oware nọ a re ro seha evaọ oma* rai. 14 Rekọ mẹ rẹ rehọ oware ovo seha vievie he ajokpaọ ure-oja* Olori mai Jesu Kristi,+ ọnọ a rọ ẹkwoma riẹ kpe akpọ na no* evaọ eriwo mẹ, yọ evaọ eriwo akpọ na a kpe omẹ no. 15 Keme te ohwo ọ yawo hayo ọ yawo ho u muẹme he,+ rekọ oware nọ u muẹme họ omama okpokpọ nọ ohwo ọ rẹ jọ.+ 16 Rọ kpahe ahwo kpobi nọ a be nya kpatiẹ lele eriwo nana, koyehọ Izrẹl Ọghẹnẹ,+ jọ a wo udhedhẹ gbe ohrọ-oriọ Ọghẹnẹ.

17 No umuo enẹna vrẹ, jọ ohwo ọvo o kpokpo omẹ hẹ, keme eka nọ i dhesẹ nọ mẹ yọ ọrigbo Jesu e rrọ omẹ oma.+

18 Inievo, jọ Olori mai Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na. Ami.