ILETA RO SE AHWO ẸFISỌS

1 Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, me bi kere ileta nana ro se erẹri nọ e rrọ Ẹfisọs,+ nọ i bi kru ẹrọwọ rai evaọ usu kugbe Kristi Jesu:

2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.

3 Jọ ujiro u te Ọghẹnẹ, Ọsẹ Olori mai Jesu Kristi, keme ọ rọ ẹkwoma ẹzi riẹ kẹ omai oghẹrẹ eghale kpobi no evaọ eria obọ idhiwu na fikinọ ma rrọ usu kugbe Kristi.+ 4 Ọ salọ omai re ma jọ usu kugbe Kristi taure akpọ na o te ti muhọ,* re uyoyou nọ ma wo kẹ Ọghẹnẹ u ru omai jọ ọrẹri jẹ kare epe+ evaọ aro riẹ. 5 Keme ọ jiroro riẹ kpahotọ no anwẹdẹ+ inọ o ti zihe omai ruọ emọ* obọriẹ+ ẹkwoma Jesu Kristi wọhọ epanọ o were riẹ jẹ rrọ oreva riẹ,+ 6 re ahwo a jiri ei fiki uwowou ulogbo+ nọ o dhesẹ kẹ omai ẹkwoma ọmọ oyoyou riẹ.+ 7 Fiki uwowou ulogbo riẹ, ọ rehọ ẹkwoma azẹ Ọmọ riẹ+ hwa osa ẹtanigbo ro si omai no igbo, koyehọ erọvrẹ iruthọ mai.+

8 Ọghẹnẹ o dhesẹ uwowou ulogbo nana kẹ omai evaọ areghẹ gbe otoriẹ kpobi nọ ọ kẹ omai, 9 ẹkwoma eware ididi ọrẹri+ erọ oreva riẹ nọ ọ fere via kẹ omai. Fikinọ o were riẹ, ọ jiroro nọ 10 o re ru ọruẹrẹfihotọ nọ ọ rẹ rọ kpọ eware nọ etoke nọ o fihọ o tẹ gba no, re o koko eware kpobi họ kugbe evaọ Kristi, te eware nọ e rrọ obọ idhiwu na gbe eware nọ e rrọ otọakpọ na.+ Ẹhẹ, evaọ eva riẹ, 11 evaọ ọnọ ma rrọ usu kugbe na, ọnọ a rehọ omai mu kugbe re ma gbẹ jọ ereuku,+ keme a jiroro riẹ kpahotọ no anwẹdẹ wọhọ epaọ ẹjiroro ọnọ o re ru eware kpobi wọhọ epanọ ọ jiroro rai lele oreva riẹ. 12 O ru onana re a sae rọ ẹkwoma mai nọ e kaki wo ẹruore kpahe Kristi na jiri Ọghẹnẹ jẹ kẹe oruaro. 13 Rekọ wha fi ẹruore họ iẹe re nọ wha yo ẹme uzẹme na no, koyehọ usi uwoma kpahe esiwo rai. Nọ wha rọwo no, a tẹ rọ ẹkwoma riẹ rehọ ẹzi ọfuafo nọ a ya eyaa riẹ na kpe oka họ owhai,+ 14 onọ o rrọ imuẹro nọ a kẹ kpahotọ* rọkẹ ukuoriọ mai.+ Ẹjiroro onana họ re a rọ ẹkwoma ẹtanigbo+ si ahwo* Ọghẹnẹ no igbo,+ onọ o te wha ujiro sei.

15 Oyejabọ re nọ, anwẹnọ me ro yo kpahe ẹrọwọ nọ wha fihọ Olori na Jesu gbe uyoyou nọ wha bi dhesẹ kẹ erẹri na kpobi, 16 mẹ re siọ uyere ba ẹkẹ vievie he fiki rai. Mẹ be fodẹ owhai ẹsikpobi evaọ elẹ mẹ, 17 inọ jọ Ọghẹnẹ Olori mai Jesu Kristi, Ọsẹ oruaro na, ọ kẹ owhai ẹzi areghẹ gbe ẹzi nọ wha re ro wo eriariẹ egbagba ọrọ eware nọ ọ fere via kpahe omariẹ.+ 18 O rovie ibiaro udu rai no, re wha ruẹse riẹ ẹruore nọ o se owhai ze kẹ, efe obọdẹ nọ ọ te kẹ erẹri na wọhọ ukuoriọ,+ 19 re wha jẹ riẹ epanọ ogaga riẹ nọ ọ kẹ omai enọ e rọwo na o rro te.+ Onana u dhesẹ oma via no evaọ iruo nọ ẹgba ologbo riẹ u bi ru, 20 onọ o dhesẹ via kpahe Kristi evaọ okenọ ọ kpare iẹe no uwhu ze jẹ rehọ iẹe keria obọze riẹ+ evaọ eria obọ idhiwu na, 21 kpehru thethabọ vi egọmeti gbe udu-esuo gbe ogaga gbe isuẹsu gbe odẹ kpobi,+ orọnikọ evaọ uyero-akpọ* nana ọvo ho rekọ te onọ o be tha na. 22 O te je fi eware kpobi họ otọ awọ riẹ,+ jẹ rehọ iẹe mu ọnọ o wuzou eware kpobi evaọ ukoko na,+ 23 onọ o rrọ ugboma riẹ,+ onọ o vọ avọ ọnọ o re ru eware kpobi jọ vọvọ evaọ kabọ kabọ na.

2 Ofariẹ, Ọghẹnẹ o ru owhai ziọ uzuazọ dede nọ wha whu no vẹre fiki iruthọ gbe izieraha rai,+ 2 enọ wha jẹ jọ nya evaọ oke jọ wọhọ epaọ ahwo uyero-akpọ* nana,+ wọhọ epaọ oreva osu nọ ọ be kpọ ofou na,+ ẹzi+ nọ ọ be kpọ emọ aghẹmeeyo. 3 Ẹhẹ, evaọ oke jọ mai kpobi ma jọ udevie rai je ru eware lele isiuru uwo mai,+ ma je ru oreva uwo na gbe orọ iroro mai,+ yọ no oke nọ a ro yẹ omai ze, ma reabe ofu Ọghẹnẹ+ wọhọ amọfa kpobi. 4 Rekọ fikinọ Ọghẹnẹ ọ vọ avọ ohrọ,+ gbe fiki uyoyou ulogbo nọ o wo kẹ omai,+ 5 o ru omai ziọ uzuazọ kugbe Kristi, makọ evaọ okenọ ma ro whu no fiki iruthọ+—a siwi owhai no fiki uwowou ulogbo. 6 U te no ere no, ọ kpare omai ze kugbei jẹ rehọ omai keria kugbei evaọ eria obọ idhiwu na fikinọ ma rrọ usu kugbe Kristi Jesu,+ 7 re ọ ruẹse jọ uyero-akpọ* sa-sa nọ e be tha na dhesẹ uwowou ulogbo riẹ nọ o dafia fiki aruoriwo nọ o wo kẹ omai enọ e rrọ usu kugbe Kristi Jesu.

8 Uwowou ulogbo nana o wha riẹ ze nọ a ro siwi owhai fiki ẹrọwọ rai,+ yọ orọnọ fiki omodawọ rai hi; ukpoye okẹ Ọghẹnẹ o rrọ. 9 Ijo, o rrọ fiki iruo nọ ohwo o ru hu,+ re ohwo ọvo ọ gbẹ ruẹ oware ovuovo ro seha ha. 10 Mai yọ iruo abọ Ọghẹnẹ,* yọ ọ ma omai+ ẹkwoma usu nọ ma rrọ kugbe Kristi Jesu+ re ma ru iruo iwoma, enọ Ọghẹnẹ ọ jiroro rai fihọ otọ no anwẹdẹ inọ ma ti ru.

11 Fikiere, wha kareghẹhọ nọ evaọ oke jọ, enọ a rọ abọ ahwo-akpọ yawo evaọ ugboma na a jẹ hai se owhai nọ e rrọ ahwo erẹwho efa na otu nọ e yawo ho. 12 Evaọ oke yena wha riẹ Kristi hi, wha wo usu kugbe orẹwho Izrẹl he, wha jọ erara kẹ evọ eyaa na;+ wha wo ẹruore he, yọ wha riẹ Ọghẹnẹ hẹ evaọ akpọ na.+ 13 Rekọ enẹna nọ wha rrọ usu kugbe Kristi Jesu na, whai enọ i thabọ no Ọghẹnẹ vẹre na, wha kẹle riẹ no fiki azẹ Kristi. 14 Keme ọye o ru omai wo udhedhẹ,+ ọnọ o ru itu ivẹ na zihe ruọ ọvo+ je kporo ugbẹhẹ nọ o jọ udevie rai nọ o hẹriẹ e rai.+ 15 Ọ rehọ ẹkwoma uwo riẹ nọ o ro dhe idhe si egrẹ na no, Uzi nọ u wo ijaje sa-sa na, re ọ ruẹsi ru itu ivẹ na nọ e rrọ usu kugbe ọyomariẹ na zihe ruọ ohwo ọkpokpọ ọvo,+ re ọ jẹ wha udhedhẹ ze, 16 re ọ ruẹrẹ itu ahwo ivẹ na họ ugboma ovo kugbe Ọghẹnẹ ẹkwoma ure-oja* na,+ keme ọ rehọ omariẹ si egrẹ na no otọ no.+ 17 Yọ ọ nyaze, o te whowho usi uwoma udhedhẹ kẹ owhai enọ i thabọ vẹre gbe otu nọ e kẹle, 18 keme ẹkwoma riẹ, mai itu ahwo ivẹ na ma wo uvẹ nọ ma rẹ rọ rehọ ẹkwoma ẹzi ọvo lẹ se Ọsẹ na.

19 Fikiere wha gbẹ rrọ erara gbe ahwo orẹwho ọfa ha,+ rekọ whai yọ emotọ+ kugbe erẹri na, wha tẹ jẹ rrọ ahwo uwou Ọghẹnẹ,+ 20 yọ a bọ owhai fihọ otọhotọ ikọ gbe eruẹaro na no,+ yọ Kristi Jesu omariẹ họ utho ubienẹ otọhotọ na.+ 21 Uwou na soso nọ o rrọ usu kugbei na, nọ a be whẹ abọ sa-sa riẹ họ kugbe ziezi na,+ o be nyaharo bi zihe ruọ etẹmpol ọrẹri kẹ Jihova.*+ 22 Whai nọ wha rrọ usu kugbei na, a be bọ owhai kugbe zihe ruọ oria kẹ Ọghẹnẹ nọ ọ rẹ rria ẹkwoma ẹzi.+

3 Fiki onana, mẹ Pọl, ọnọ ọ rrọ uwou-odi+ fiki Kristi Jesu gbe fiki rai, ahwo erẹwho na— 2 otẹrọnọ wha gine yo kpahe owha-iruo nọ a kẹ omẹ+ re me ro fiobọhọ kẹ owhai wo erere no uwowou ulogbo Ọghẹnẹ ze, 3 inọ ẹkwoma eviavia a rọ fere oware udidi ọrẹri na via kẹ omẹ, wọhọ epanọ me kere kpẹkpẹe vẹre no na. 4 Fikiere, okenọ wha ti se onana, wha ti vuhumu nọ me wo otoriẹ oware udidi ọrẹri+ nọ u kiekpahe Kristi na. 5 Evaọ ige nọ e vrẹ a fere oware udidi nana via kẹ emọ ahwo ho wọhọ epanọ a rehọ ẹzi fere iẹe via no enẹna kẹ ikọ gbe eruẹaro riẹ nọ e rrọ ọrẹri,+ 6 inọ, ahwo erẹwho na, nọ a rrọ usu kugbe Kristi Jesu gbe fiki usi uwoma na, a te jọ ibe ereuku kugbei jẹ jọ ahwo ugboma ovona,+ je lele omai reuku eyaa na. 7 Me zihe ruọ ọgbodibo nọ ọ be ta kpahe oware udidi nana fiki okẹ ọvọvẹ uwowou ulogbo Ọghẹnẹ, onọ ọ kẹ omẹ ẹkwoma ogaga riẹ.+

8 A dhesẹ uwowou ulogbo nana kẹ omẹ,+ mẹ nọ ọ kawo vi ọnọ ọ mae kawo evaọ usu erẹri na kpobi,+ re me whowho usi uwoma kpahe ugbidigbi efe Kristi kẹ erẹwho na, 9 je ru ahwo kpobi ruẹ epanọ a be rọ kpọ eware nọ i wobọ kugbe oware udidi ọrẹri+ na, onọ Ọghẹnẹ nọ ọ ma eware kpobi na ọ ko dhere evaọ ige kpobi nọ e vrẹ no. 10 Onana o jọ ere, re enẹna a ruẹse rọ ẹkwoma ukoko na+ fere areghẹ ologbo Ọghẹnẹ nọ ọ rrọ eghegha na via kẹ egọmeti gbe udu-esuo nọ e rrọ eria obọ idhiwu na.+ 11 Onana o rrọ epaọ ẹjiroro ebẹdẹ bẹdẹ riẹ nọ ọ jiroro nọ o ti ru ẹkwoma Kristi na,+ Jesu Olori mai, 12 ọnọ ma rọ ẹkwoma riẹ wo uvẹ nana nọ ma be rọ ta ẹme ududu jẹ be sae lẹ se Ọghẹnẹ+ avọ evaifihọ fiki ẹrọwọ nọ ma fihọ iẹe. 13 Fikiere mẹ be lẹ owhai nọ wha whrehe he fiki ikpokpoma nọ i bi te omẹ fiki rai, keme enana e te wha oruaro se owhai.+

14 Fiki onana mẹ be hai kigwẹ lẹ se Ọsẹ na, 15 ọnọ ọ kẹ uviuwou kpobi evaọ obọ odhiwu gbe evaọ otọakpọ odẹ. 16 Mẹ be lẹ nọ ọ rọ fiki oruaro riẹ nọ o dafia fiobọhọ kẹ owhai jọ gaga evaọ ohwo nọ wha rrọ evaọ obeva,+ ẹkwoma ogaga ẹzi riẹ, 17 re Kristi ọ jẹ rria evaọ udu rai avọ uyoyou fiki ẹrọwọ rai.+ Jọ wha dada owọ mu otọ+ jẹ jọ gaga evaọ otọhotọ na,+ 18 re wọhọ erẹri na kpobi wha ruẹse robọ kotọ wo otoriẹ okẹkẹe gbe uthethei gbe ekpehru gbe ekodo uzẹme na ziezi, 19 re wha jẹ riẹ uyoyou Kristi na,+ onọ u vi eriariẹ, wha vẹ ruẹse vọ avọ iruemu iwoma kpobi nọ i re no obọ Ọghẹnẹ ze.

20 Whaọ jọ ọnọ ọ rẹ sae rehọ ogaga riẹ nọ u bi ru iruo evaọ oma mai+ ru eware buobu gbidi gbidi kẹ omai vi eware kpobi nọ ma yare hayo nọ ma roro na,+ 21 o wo oruaro na ẹkwoma ukoko na gbe Kristi Jesu evaọ ige kpobi, bẹdẹ bẹdẹ. Ami.

4 Fikiere, mẹ nọ ọ rrọ uwou-odi+ fiki Olori na, mẹ be lẹ owhai nọ wha yeri uzuazọ nọ u fo+ use nọ a se owhai na, 2 avọ omaurokpotọ*+ gbe ẹwolẹ ẹsikpobi, avọ odiri,+ wha rọ uyoyou thihakọ kẹ ohwohwo,+ 3 jẹ daoma gaga re wha yọrọ okugbe ọvo nọ ẹzi na ọ be wha ze evaọ udhedhẹ nọ o be gba owhai kugbe na.+ 4 Ugboma ọvo ọ riẹ,+ gbe ẹzi ọvo,+ nwane wọhọ epanọ a se owhai ziọ ẹruore ọvo na;+ 5 Olori ọvo,+ ẹrọwọ ọvo, ame-ọhọ ọvo; 6 Ọghẹnẹ ọvo nọ ọ rrọ Ọsẹ ahwo kpobi, ọnọ o wuzou ahwo kpobi jẹ be rehọ ẹkwoma ahwo kpobi ruiruo je bi ruiruo evaọ oma ahwo kpobi.

7 Ọghẹnẹ o dhesẹ uwowou ulogbo kẹ omai omomọvo. Onana u bi dhesẹ oma via evaọ oghẹrẹ nọ Kristi ọ rọ ghale okẹ ọvọvẹ na kẹ omai.+ 8 Keme o ta nọ: “Nọ o muvrẹ kpobọ ehru, ọ wha ahwo nọ a mu rehọ vrẹ; ọ tẹ rehọ ezae kẹ ekẹ.”+ 9 Whaọ eme ẹme na o dhesẹ inọ, “o muvrẹ kpobọ ehru” rekọ inọ o no ehru ziọ otọ re, koyehọ otọakpọ na? 10 Uzedhe ọnọ o no ehru ziọ otọ na ọye ọvona o muvrẹ kpobọ ehru+ thethabọ vrẹ idhiwu na kpobi,+ re ọ ruẹsi ru eware kpobi gba.

11 Ọ rehọ ejọ mu ikọ,+ ejọ eruẹaro,+ ejọ etausiuwoma,+ ejọ esẹro* gbe iwuhrẹ,+ 12 re a ruẹse kpọ erẹri na ruẹrẹhọ,* re a gbodibo kẹ amọfa, re a bọ ugboma Kristi* na ga,+ 13 bẹsenọ mai kpobi ma rẹ jọ ọvo* no evaọ ẹrọwọ na gbe evaọ eriariẹ egbagba kpahe Ọmọ Ọghẹnẹ, nọ ma rẹ rro te ohwo ziezi no,+ koyehọ, kpako ziezi te ohwo no wọhọ epanọ Kristi ọ rrọ. 14 Fikiere u fo re ma gbẹ jọ emaha ha, enọ ofou oghẹrẹ iwuhrẹ kpobi+ o re fou kpenẹ avọ enẹ wọhọ oware nọ ẹkporo o bi fi jẹ wọ kpenẹ avọ enẹ fiki ẹghẹ ahwo gbe omaa eviẹhọ nọ a re ro su ai thọ. 15 Rekọ joma ta uzẹme, re uyoyou u ru omai wo ẹnyaharo evaọ eware kpobi rọwokugbe ọnọ o wuzou na, Kristi.+ 16 Ugboma na soso o jẹhọ ohwohwo no oma riẹ ze,+ a tẹ jẹ ruẹrẹ iẹe họ re u ruiruo kugbe ẹkwoma ezo-oma na kpobi nọ e rẹ tha ohwohwo uke. Nọ okwakwa kpobi evaọ oma na u te bi ruiruo ziezi, o rẹ lẹliẹ ugboma na rro nọ o be rọ uyoyou bọ omobọ riẹ ga na.+

17 Fikiere mẹ be ta onana jẹ be tuduhọ owhai awọ evaọ Olori na, inọ wha gbe yeri uzuazọ wọhọ epanọ erẹwho na i bi yeri hi,+ enọ i bi lele iroro ifofe rai.+ 18 A rrọ ebi evaọ iroro rai jẹ hẹriẹ oma no uzuazọ nọ o rrọ orọ Ọghẹnẹ, fikinọ a rrọ igbori, gbe fikinọ udu rai o rrọ gaga.* 19 Fikinọ a zẹ omovuọ rai no riẹriẹriẹ, a rọ omarai kẹ uruemu nọ u fo ho nọ a re ru ababọ omovuọ,*+ bi ru oghoghẹrẹ eware igbegbe kpobi avọ uvou-uthei.

20 Rekọ orọnikọ enẹ wha wuhrẹ mi Kristi hi, 21 o tẹ ginẹ rrọ uzẹme nọ wha yo oware nọ ọ ta, o te je wuhrẹ owhai, nwane wọhọ epanọ uzẹme o rrọ eva Jesu. 22 A wuhrẹ owhai nọ wha ba uruemu anwae na no oma,+ onọ o rọwokugbe oghẹrẹ uzuazọ nọ wha je yeri vẹre, onọ o be rọ ẹkwoma isiuru eviẹhọ riẹ gbe owhai ku.+ 23 Wha gbẹ hai ru ẹzi* nọ ọ be kpọ iroro* rai kpokpọ,+ 24 jẹ whẹ uruemu okpokpọ na họ oma,+ onọ a ma lele oreva Ọghẹnẹ evaọ uvi ẹrẹreokie gbe uyoyou nọ o rẹ hiẹ hẹ.

25 Fikiere, enẹna nọ wha siobọno eviẹhọ no na, whai omomọvo ọ hae ta uzẹme kẹ ọrivẹ riẹ,+ keme mai yọ ekwakwa ugboma ọvo na.+ 26 Wha sai mu ofu, rekọ wha raha uzi hi;+ wha kuvẹ re ọre o kiediwi yọ wha gbe bi mu ofu hu;+ 27 wha kẹ Ẹdhọ uvẹ hẹ.+ 28 Jọ ọnọ o re tho uji o gbe tho ofa ha; rekọ jọ o ru iruo egaga, ọ rehọ abọ riẹ ru iruo iwoma,+ re ọ sai wo oware nọ ọ rẹ kẹ ọnọ o wo ho.+ 29 Jọ ẹme ọtọtọ o no unu rai ze he,+ rekọ ẹme owoma nọ ọ rẹ bọ amọfa ga ọvo, re o wha erere se enọ i bi yoi.+ 30 Ofariẹ, wha ru eva dha* ẹzi ọfuafo Ọghẹnẹ hẹ,+ onọ a ro kpe oka họ owhai no+ rọ kẹ ẹdẹ nọ a ti ro siobọno owhai ẹkwoma ẹtanigbo.+

31 Wha siobọno oghẹrẹ ẹgo oyoma kpobi,+ evedha, ofu, edo, eme ekela,+ jegbe oware uyoma kpobi.+ 32 Rekọ wha dhesẹ uwowou kẹ ohwohwo, wo uvi ọdawẹ,+ wha rọvrẹ ohwohwo riẹriẹriẹ nwane wọhọ epanọ Ọghẹnẹ ọ rọ ẹkwoma Kristi rọvrẹ owhai no re riẹriẹriẹ na.+

5 Fikiere, wha rọ aro kele Ọghẹnẹ,+ wọhọ emọ iyoyou, 2 re wha hae rọ uyoyou yeri,+ wọhọ epanọ Kristi o you omai*+ o te siobọno omariẹ fiki mai* wọhọ idheidhe nọ i re gbo ore awere se Ọghẹnẹ.+

3 Jọ a tubẹ fodẹ ọfariẹ-ogbe* gbe oghẹrẹ egbegbe ọvuọvo hayo uvou-uthei evaọ udevie rai hi,+ wọhọ epanọ u fo kẹ ahwo ọrẹri;+ 4 hayo uruemu omovuọ hayo eme igheghẹ eta hayo eme oworu nọ a rẹ ta rọ hwehwẹ hẹ,+ keme eware nana i fo ho, ukpoye kọ uyere ma rẹ kẹ Ọghẹnẹ.+ 5 Keme wha riẹ onana je vuhu ei mu inọ, ohwo ọvo nọ o bi gbe-ọfariẹ*+ hayo ohwo ogbegbe hayo ohwo nọ o wo uvou-uthethei,+ onọ u dhesẹ nọ ohwo yena yọ ọgẹdhọ, nọ o re wo ukuoriọ ọvo evaọ Uvie Kristi gbe orọ Ọghẹnẹ ọ rrọ họ.+

6 Wha jọ ohwo ọvo ọ rehọ eme ifofe viẹ owhai họ họ, keme fiki eware itieye na ofu Ọghẹnẹ o bi ro bru emọ aghẹmeeyo ze. 7 Fikiere, wha kuomagbe ae he; 8 keme wha jọ ebi vẹre, rekọ enẹna wha rrọ elo+ fikinọ wha rrọ usu kugbe Olori na.+ Wha gbẹ hae nya wọhọ emọ elo, 9 keme ibi nọ elo ọ rẹ mọ họ oghẹrẹ ewoma kpobi gbe ẹrẹreokie gbe uzẹme.+ 10 Wha hae daoma ruẹ nọ onọ Olori na ọ jẹrehọ wha bi ru;+ 11 re wha siọ obọ ba ewo evaọ iruo ifofe nọ e rrọ iruo ebi;+ ukpoye, wha fere ae via. 12 Keme eware nọ a be lẹlẹ ru e rẹ vuoma nọ a tẹ ta ae via dede. 13 Whaọ eware kpobi nọ a be fere via, elo na họ oware nọ u bi dhesẹ ae via, keme oware kpobi nọ a bi dhesẹ via u zihe ruọ elo no. 14 Fikiere, ikere na e ta nọ: “Rọwo ze, O ọwezẹ-owezẹ, jẹ kparoma no uwhu ze,+ Kristi na o ve ti lo mu owhẹ.”+

15 Fikiere, wha fiẹrohotọ ziezi re wha ruẹ nọ oghẹrẹ nọ wha be nya o rrọ wọhọ igheghẹ hẹ rekọ wọhọ ahwo nọ a wo areghẹ, 16 wha hae rehọ oke rai ruiruo evaọ edhere nọ ọ mai woma,*+ keme edẹ na e rrọ muomu. 17 Fiki onana, wha jọ gheghẹ hẹ, rekọ wha gbẹ hae daoma wo otoriẹ oware nọ oreva Jihova* o rrọ.+ 18 Ofariẹ, wha da udi* vrẹ oma ha,+ onọ o rẹ wha ugberuo ze, ukpoye, wha jọ ẹzi na ọ vọ owhai oma ẹsikpobi. 19 Wha so ilezi, ile nọ a re ro jiri Ọghẹnẹ, gbe ile+ nọ a rẹ rọ gọ Ọghẹnẹ kẹ ohwohwo,*+ jẹ jọ udu rai so ile kẹ Jihova,*+ 20 wha hai yere+ Ọghẹnẹ gbe Ọsẹ mai kẹ eware kpobi kẹse kẹse evaọ odẹ Olori mai, Jesu Kristi.+

21 Wha romakpotọ kẹ ohwohwo+ fiki ozodhẹ Kristi. 22 Jọ eyae e romakpotọ kẹ ezae rai+ wọhọ epanọ a bi ru kẹ Olori na, 23 keme ọzae họ ọnọ o wuzou aye riẹ+ wọhọ epanọ Kristi o wuzou ukoko na,+ ugboma riẹ, onọ ọ rrọ osiwi riẹ na. 24 Ẹhẹ, wọhọ epanọ ukoko na o be romakpotọ kẹ Kristi na, jọ eyae i ru epọvo na kẹ ezae rai re evaọ oware kpobi. 25 Ezae, wha gbẹ hai you eyae rai,+ wọhọ epanọ Kristi o you ukoko na o je siobọno omariẹ fiki riẹ na,+ 26 re ọ ruẹsi ru ei fo, be rọ ame họe fihọ fuafo, koyehọ ẹkwoma ẹme Ọghẹnẹ,+ 27 re ukoko na o ruẹsi wo erru evaọ aro riẹ, ababọ oka hayo oma nọ u si iriẹ hayo oware utioye jọ kpobi,+ rekọ o rẹ jọ ọrẹri jẹ kare epe.+

28 Epọvo na u fo nọ ezae i re you eyae rai wọhọ ugboma obọrai. Ọzae nọ o you aye riẹ, yọ omobọ riẹ o you na, 29 keme ọzae ọvo o re mukpahe ugboma* obọriẹ hẹ, rekọ ọ rẹ kuọ oma na je rri rie ghaghae, wọhọ epanọ Kristi o bi ru ukoko na, 30 keme mai yọ ekwakwa ugboma riẹ.+ 31 “Fiki onana ọzae ọ rẹ nyasiọ ọsẹ riẹ gbe oni riẹ ba ọ vẹ talamu* aye riẹ, aimava na a vẹ jọ uwo ovo.”+ 32 Oware udidi ọrẹri nana+ yọ okpoware. Whaọ, Kristi gbe ukoko na mẹ be ta kpahe na.+ 33 Ghele na, whai omomọvo o re you aye riẹ hrọ+ wọhọ epanọ o you omobọ riẹ; evaọ abọdekọ riẹ, jọ aye o wo adhẹẹ odidi kẹ ọzae riẹ.+

6 Whai emọ, wha yoẹme kẹ esẹgbini rai+ evaọ oghẹrẹ nọ o rẹ were Olori na, keme onana u kiẹrẹe. 2 “Rọ ọghọ kẹ ọsẹ ra avọ oni ra”+ họ ujaje ọsosuọ nọ a jie avọ eyaa, inọ: 3 “Re o ruẹsi woma kẹ owhẹ,* whọ vẹ ruẹse gbẹ jọ otọakpọ na oke krẹkri.” 4 Whai esẹ, wha ru emọ rai eva dha ha,+ rekọ wha gbẹ hae rehọ ọwhọkuo+ gbe ehrẹ* Jihova* rọ yọrọ ae.+

5 Whai erigbo, wha yoẹme kẹ enọ e rrọ ilori rai evaọ otọakpọ,*+ wha ru ei no udu rai ze avọ ozodhẹ gbe enuhu, wọhọ ẹsenọ wha bi ru ei kẹ Kristi, 6 orọnikọ okenọ a te bi rri owhai ọvo ho re wha ruẹsi ru ahwo eva were,+ rekọ wọhọ erigbo Kristi nọ e be rọ udu* kpobi ru oreva Ọghẹnẹ.+ 7 Wha rọ emamọ eva gbodibo wọhọ ẹsenọ wha bi ru ei kẹ Jihova*+ orọnikọ ahwo ho, 8 keme wha riẹ nọ ewoma kpobi nọ ohwo o ru, o ti wo osohwa riẹ no obọ Jihova* ze,+ makọ ọ rrọ ọrigbo hayo ọmuyẹ. 9 Yọ whai ilori, wha yerikugbe ai epọvo na re, wha guegue ai hi, keme wha riẹ nọ ọnọ ọ rrọ Olori kẹ ae gbe owhai omarai ọ rrọ obọ idhiwu na,+ yọ o wo ọriẹwẹ hẹ.

10 Orọ urere, wha gbẹ hai wo ogaga+ no obọ Olori na ze je no ẹgba ologbo riẹ ze. 11 Wha whẹ ẹgọ-ẹmo ọsoso+ nọ o no obọ Ọghẹnẹ ze na họ oma re wha sai dikihẹ ga wọso iruẹru ẹghẹ* Ẹdhọ; 12 keme ma wo ohọre,*+ yọ orọnikọ azẹ gbe uwo ma bi lele họre he, rekọ ma bi lele egọmeti na họre, bi lele enọ e rrọ udu-esuo na họre, bi lele isu akpọ ebi nana họre, bi lele izi imuomu+ nọ e rrọ obọ eria idhiwu na họre. 13 Fiki onana, wha whẹ ẹgọ-ẹmo ọsoso nọ o no obọ Ọghẹnẹ ze na họ oma,+ re wha sai mudhe evaọ ẹdẹ omuomu na je dikihẹ ga nọ wha te ru eware na kpobi gba no.

14 Fikiere wha dikihẹ ga avọ umueku uzẹme na nọ wha rọ gba eku rai wariẹ,+ avọ ẹgọ-igbama ẹrẹreokie nọ wha kuhọ,+ 15 gbe awọ rai nọ wha rẹ ruẹrẹ kpahe re wha whowho usi uwoma udhedhẹ na.+ 16 U te no enana kpobi no, wha tọlọ ojese ologbo ẹrọwọ na,+ onọ wha sai ro furie ese* kpobi nọ e be ware erae nọ omuomu na ọ be sa.+ 17 Ofariẹ, wha rọ etu-ọgaga esiwo na tu,+ re wha je kru ọgbọdọ ẹzi na, koyehọ, ẹme Ọghẹnẹ,+ 18 wha hae jọ evaọ uyero kpobi lẹ oghẹrẹ olẹ kpobi+ gbe oghẹrẹ olẹ ayare-ọgaga kpobi evaọ ẹzi.+ Fiki onana, wha jaja aro vi ẹsikpobi, re wha hae lẹ olẹ ayare-ọgaga roro erẹri na kpobi. 19 Wha lẹ roro omẹ re, re a ruẹse kẹ omẹ eme nọ mẹ rẹ ta okenọ me te rovie unu mẹ, mẹ vẹ sae ta ẹme ududu kpahe oware udidi ọrẹri usi uwoma na,+ 20 onọ mẹ rọ fiki riẹ rrọ ọnyukọ+ avọ egbregba nọ a rọ kare omẹ, re mẹ jẹ sae ta kpahe iẹe ududu wọhọ epanọ u fo nọ mẹ rẹ tae.

21 Whaọ, re wha ruẹse riẹ kpahe iruẹru mẹ gbe epanọ eware e rrọ kẹ omẹ, Tikikọs,+ oniọvo oyoyou gbe odibo Olori na nọ o wo ẹrọwọ, o ti gbiku eware kpobi kẹ owhai.+ 22 Fiki ugogo ẹjiroro nana me bi ro vi ei bru owhai ze, re wha ruẹse riẹ epanọ ma rrọ, ọ vẹ jẹ sasa owhai oma.

23 Jọ inievo na a wo udhedhẹ gbe uyoyou gbe ẹrọwọ no obọ Ọghẹnẹ Ọsẹ na gbe Olori na Jesu Kristi ze. 24 Jọ Ọghẹnẹ o dhesẹ uwowou ulogbo riẹ kẹ ahwo kpobi nọ a wo uyoyou nọ o rẹ hiẹ hẹ kẹ Olori mai Jesu Kristi.