ILETA RO SE AHWO KỌLỌSI

1 Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, gbe Timoti+ oniọvo mai 2 ro se erẹri na, gbe inievo nọ i bi kru ẹrọwọ rai evaọ usu kugbe Kristi nọ e rrọ obọ Kọlọsi:

Jọ Ọghẹnẹ Ọsẹ mai o dhesẹ uwowou ulogbo kẹ owhai jẹ kẹ owhai udhedhẹ.

3 Ma be hai yere Ọghẹnẹ, Ọsẹ Olori mai Jesu Kristi ẹsikpobi nọ ma tẹ be lẹ roro owhai, 4 keme ma yo kpahe ẹrọwọ nọ wha fihọ Kristi Jesu gbe uyoyou nọ wha wo kẹ erẹri na kpobi 5 fiki ẹruore eware nọ a ruẹrẹhọ kẹ owhai evaọ obọ idhiwu na.+ Wha kaki yo kpahe ẹruore nana ẹkwoma ovuẹ uzẹme orọ usi uwoma na, 6 onọ u bru owhai ze no. Nwane wọhọ epanọ usi uwoma na o be mọ ibi jẹ be nyaharo evaọ akpọ na soso na,+ ere ọvona u bi ru re evaọ udevie rai anwọ ẹdẹ nọ wha ro yo jẹ ginẹ riẹ uzedhe oware nọ uwowou ulogbo Ọghẹnẹ o rrọ. 7 Wha wuhrẹ oyena mi Ẹpafras, ibe ọrigbo oyoyou mai, ọnọ ọ rrọ ọgbodibo Kristi nọ o wo ẹrọwọ,+ nọ o bi ru iruo nọ ma hai ti ru. 8 Ọ vuẹ omai re kpahe uyoyou rai nọ ẹzi Ọghẹnẹ ọ be wọ owhai dhesẹ.*

9 Oyejabọ re nọ anwọ ẹdẹ nọ ma ro yo kpahe iẹe, ma re siọ owhai ba ẹlẹ roro vievie he,+ ma tẹ jẹ be yare nọ eriariẹ egbagba+ oreva riẹ e da owhai oma fia re wha wo areghẹ kpobi gbe otoriẹ nọ ẹzi riẹ ọ rẹ kẹ,+ 10 re wha ruẹsi yeri uzuazọ nọ u fo evaọ aro Jihova* jẹ ruẹsi ru ei eva were ziezi nọ wha be ruabọhọ ru iruo iwoma kpobi jẹ be nyaharo evaọ eriariẹ egbagba Ọghẹnẹ na.+ 11 Jọ ẹgba ologbo riẹ u ru owhai wo ogaga kpobi+ re wha sai thihakọ eware kpobi avọ odiri gbe oghọghọ, 12 nọ wha bi yere Ọsẹ na, ọnọ o ru owhai te enọ i ti wobọ evaọ ukuoriọ erẹri+ nọ e rrọ elo na.

13 O siwi omai no ogaga ebi,+ o te fi omai họ otọ uvie Ọmọ oyoyou riẹ, 14 ọnọ a rọ ẹkwoma riẹ hwa osa ẹtanigbo ro si omai no igbo, koyehọ erọvrẹ izieraha mai.+ 15 Ọye họ uwoho Ọghẹnẹ nọ a rẹ ruẹ hẹ na,+ ọmọ ọsosuọ evaọ emama kpobi;+ 16 keme ẹkwoma riẹ a rọ ma eware efa kpobi evaọ obọ idhiwu na gbe otọakpọ na, eware nọ a rẹ ruẹ gbe eware nọ a rẹ ruẹ hẹ,+ makọ egbara-uvie hayo ọkwa-ilori hayo egọmeti hayo udu-esuo. A ma eware efa kpobi ẹkwoma riẹ+ jẹ rọ kẹe. 17 Ofariẹ, ọ kake rọ eware efa kpobi rrọ,+ yọ ẹkwoma riẹ eware efa kpobi e rọ ze, 18 yọ ọye o wuzou ugboma na, koyehọ ukoko na.+ Ọye họ emuhọ na, ọrọ ọsosuọ nọ a kpare no uwhu ze,+ re ọ ruẹse jọ ọrọ ọsosuọ evaọ eware kpobi; 19 keme o were Ọghẹnẹ re eware kpobi e vọ oma riẹ,+ 20 re ọ jẹ rehọ ẹkwoma riẹ ruẹrẹ eware efa kpobi+ họ kugbe ọyomariẹ, makọ eware nọ e rrọ otọakpọ na hayo eware nọ e rrọ obọ idhiwu na. O bi ru udhedhẹ kugbe ai ẹkwoma azẹ+ Kristi nọ o hwẹ evaọ ure-oja* na.

21 Evaọ uzẹme, whai enọ e hẹriẹ oma no Ọghẹnẹ jẹ jọ ewegrẹ riẹ vẹre fikinọ wha fi iroro rai họ iruo imuomu, 22 ọ rọ ẹkwoma uwhu ọnọ ọ rehọ ugboma uwo riẹ dhe idhe na rọ ruẹrẹ owhai họ kugbe omariẹ no enẹna, re ọ ruẹsi ru owhai jọ ọrẹri, kare epe jẹ kare afuẹwẹ evaọ aro riẹ+— 23 thakpinọ wha ruabọhọ ẹrọwọ na,+ dadamu otọhotọ na+ je dikihẹ ga+ re a gbe go owhai siọ ẹruore usi uwoma na ba ha, onọ wha yo gbe onọ a whowho evaọ udevie emama kpobi nọ e rrọ otọ odhiwu na.+ Mẹ Pọl, me zihe ruọ ọgbodibo re mẹ ta usi uwoma nana.+

24 Mẹ be ghọghọ enẹna evaọ iye nọ i bi te omẹ fiki rai,+ yọ ikpokpoma Kristi i bi te omẹ, enọ i ri te uwo mẹ vẹre he fiki ugboma riẹ,+ koyehọ ukoko na.+ 25 Me zihe ruọ ọgbodibo ukoko nana wọhọ epaọ iruo orieyero+ nọ Ọghẹnẹ ọ kẹ omẹ fiki rai, re me whowho ẹme Ọghẹnẹ ziezi, 26 oware udidi ọrẹri+ nọ a ko dhere evaọ uyero-akpọ* sa-sa nọ e vrẹ+ gbe ige nọ e vrẹ. Rekọ enẹna a fere riẹ via kẹ erẹri riẹ no,+ 27 enọ o were Ọghẹnẹ re o dhesẹ efe obuobu oware udidi ọrẹri+ nana via kẹ evaọ udevie erẹwho na. Oware udidi ọrẹri na họ Kristi nọ ọ rrọ usu kugbe owhai, gbe ẹruore ọrọ oruaro riẹ.+ 28 Ọye ma bi whowho, be vẹvẹ ahwo kpobi unu kpahe jẹ be rọ areghẹ kpobi wuhrẹ ahwo kpobi kpahe, re ohwo kpobi nọ ma be rehọ kẹ Ọghẹnẹ ọ ruẹse jọ ọnọ ọ kpako evaọ usu kugbe Kristi.+ 29 Fiki onana me bi gine ru iruo gaga, be daoma mẹ kpobi avọ ẹgba riẹ nọ o be jọ oma mẹ ruiruo evaọ edhere ologbo.+

2 Mẹ gwọlọ nọ wha riẹ epanọ mẹ be daoma ga te fiki rai gbe fiki inievo nọ e rrọ obọ Laodisia+ gbe fiki ahwo kpobi nọ a re ruẹ omẹ hẹ.* 2 Onana o rrọ ere re a ruẹsi wo omosasọ+ evaọ udu rai, re a ruẹse jọ okugbe ọvo evaọ uyoyou+ je wo efe kpobi nọ o re no otoriẹ uvevẹ nọ a re wo ze, a vẹ sai wo eriariẹ egbagba kpahe oware udidi ọrẹri Ọghẹnẹ, koyehọ Kristi.+ 3 A nabe ko efe areghẹ gbe eriariẹ kpobi dhere họ oma riẹ.+ 4 Mẹ be ta onana re ohwo ọvo ọ gbẹ rehọ eme ẹghẹ rọ viẹ owhai họ họ. 5 Dede nọ mẹ rrọ kugbe owhai evaọ ugboma ha, mẹ rrọ kugbe owhai evaọ ẹzi, be ghọghọ fikinọ mẹ be ruẹ epanọ wha bi ru eware kpatiẹ+ gbe epanọ ẹrọwọ nọ wha fihọ Kristi ọ ga te.+

6 Fikiere, nọ wha jẹ Kristi Jesu, Olori na rehọ no na, wha ruabọhọ usu nọ wha rrọ kugbei na, 7 wha dada awọ mu otọ jẹ bọ omarai ga+ evaọ Kristi je dikihẹ ga ziezi evaọ ẹrọwọ na+ wọhọ epanọ a wuhrẹ owhai, wha vẹ jẹ hae kẹ uyere ẹsikpobi.+

8 Wha muẹrohotọ re ohwo ọvo o gbe mu owhai rehọ họ* ẹkwoma eriariẹ akpọ na gbe eviẹhọ ifofe+ nọ i no iwuhrẹ ahwo gbe eware esese akpọ na ze nọ e rọwokugbe Kristi hi; 9 keme evaọ oma riẹ a rẹ jọ ruẹ oghẹrẹ kpobi nọ Ọghẹnẹ ọ rrọ dẹẹ.+ 10 Fikiere wha wo eware kpobi no ẹkwoma riẹ, ọnọ o wuzou egọmeti gbe udu-esuo kpobi na.+ 11 Fiki usu nọ wha rrọ kugbei, a yawo owhai oyawo nọ a rehọ abọ ru hu, rekọ onọ a rẹ jọ si oma uwo na no,+ oyawo nọ o rrọ orọ Kristi.+ 12 Keme a ki owhai kugbei evaọ ame-ọhọ riẹ,+ yọ fiki usu rai kugbei a kpare owhai ze+ kugbei fiki ẹrọwọ nọ wha fihọ iruo igbunu Ọghẹnẹ, ọnọ ọ kpare riẹ no uwhu ze.+

13 Ofariẹ, dede nọ wha whu no vẹre fiki iruthọ rai, yọ wha yawo evaọ uwo ho, Ọghẹnẹ o ru owhai ziọ uzuazọ kugbei.+ Ọ rọ fiki uwowou riẹ rọ iruthọ mai kpobi rọvrẹ omai+ 14 je voro obe nọ a rehọ obọ kere na no,+ onọ o vọ avọ izi+ jẹ rọsuọ omai.+ O si rie no otọ ẹkwoma ure-oja* na nọ ọ tehe riẹ fihọ.+ 15 Ọ rehọ ẹkwoma onana* ba egọmeti gbe enọ i wo udu-esuo fihọ no jẹ rehọ ae lahwe evaọ ẹgbede wọhọ enọ o fi kparobọ,+ be rehọ ae luje obokparọ.

16 Fikiere, wha kẹ ohwo ọvo uvẹ hẹ re ọ rehọ owhai guẹdhọ fiki oware nọ wha be re jẹ be da,+ hayo fiki eruo ehaa jọ hayo ehaa ọvẹre ọkpokpọ+ hayo ekoko ẹdijala.+ 17 Eware yena yọ uwoho eware nọ e be tha,+ rekọ Kristi na họ uzedhe oware na.+ 18 Wha kẹ ohwo ọvo uvẹ re ọ whaha owhai ewo osa na ha,+ ohwo nọ o re dhesẹ omaurokpotọ eviẹhọ gbe ọnọ ọ rẹ gọ ikọ-odhiwu,* nọ ọ rẹ dadamu eware nọ ọ ta nọ ọ ruẹ. Eriwo ohwo-akpọ nọ o wo o re ru ei fu uke ababọ emamọ ẹjiroro, 19 yọ ọ talamu uzou na ha,+ onọ o be kẹ ugboma na soso eware nọ o gwọlọ jẹ be rọ ẹkwoma ezo-oma gbe iriẹ-oma jẹ ekwakwa ugboma na họ ohwohwo, je bi ru ugboma na rro avọ obufihọ Ọghẹnẹ.+

20 Otẹrọnọ wha lele Kristi whu evaọ eware esese akpọ na,+ fikieme wha bi ro yeri wọhọ ẹsenọ wha gbẹ rrọ abọ akpọ na ẹkwoma ekoko izi nọ e ta nọ:+ 21 “Whọ tọlọ họ, hayo dawo ho, hayo dhobọte he,” 22 kpakiyọ eware nana yọ eware nọ e rẹ raha no nọ a tẹ be rehọ ai ru iruo, wọhọ epaọ ijaje gbe iwuhrẹ ahwo-akpọ?+ 23 Dede nọ o rẹ wọhọ ẹsenọ areghẹ ọ rrọ eware yena nọ ohwo ọ tẹ be gọ evaọ oghẹrẹ nọ o roro je bi dhesẹ omaurokpotọ eviẹhọ, jẹ be lahiẹ omobọ riẹ,+ i re fiobọhọ evaọ ẹhọre isiuru uwo na ha.

3 Rekọ otẹrọnọ a kpare owhai ze kugbe Kristi,+ wha gbẹ hae gwọlọ eware nọ e rrọ obọ odhiwu, obonọ Kristi ọ jọ keria obọze Ọghẹnẹ.+ 2 Wha fi iroro rai kpobi họ eware nọ e rrọ obọ odhiwu,+ orọnikọ eware nọ e rrọ otọakpọ na ha.+ 3 Keme wha whu, yọ a si uzuazọ rai no họ obọ Kristi wọhọ epaọ oreva Ọghẹnẹ. 4 Okenọ a ti dhesẹ Kristi na via, ọnọ ọ wha uzuazọ ze na,+ a ti dhesẹ owhai via kugbei re evaọ oruaro.+

5 Fikiere wha kpe isiuru ugboma rai+ nọ e rrọ erọ akpọ na no, ọfariẹ-ogbe,* egbegbe, isiuru egaga kẹ owezẹ ọzae-avọ-aye nọ e vrẹta,+ ekpehre isiuru, gbe uvou-uthei, onọ o rrọ ẹdhọgọ. 6 Fiki eware yena ofu Ọghẹnẹ ọ be rọ nyaze. 7 Uzuazọ utioye na whai omarai wha je yeri vẹre.+ 8 Rekọ enẹna wha re siobọno eware nana kpobi hrọ: ofu, evedha, eyoma,+ ekela,+ gbe eme etọtọ eta.+ 9 Wha ta ọrue kẹ ohwohwo ho.+ Wha ba uruemu* anwae na+ avọ iruẹru riẹ no oma no, 10 wha vẹ whẹ uruemu okpokpọ na họ oma,+ onọ a be rọ ẹkwoma eriariẹ egbagba ru kpokpọ re o jọ wọhọ uwoho Ọnọ ọ ma riẹ.+ 11 Evaọ onana, ohẹriẹ o rrọ udevie ohwo Griki avọ ohwo Ju hu, ọnọ ọ yawo avọ ọnọ ọ yawo ho ho, te ohwo orẹwho ọfa, ohwo Sitia,* ọrigbo, hayo ọmuyẹ; rekọ Kristi họ eware kpobi, ọ tẹ jẹ rrọ evaọ aikpobi.+

12 Fikiere, nọ wha rrọ enọ Ọghẹnẹ ọ salọ,+ nọ e rrọ ọrẹri, nọ o you na, wha whẹ eware nana họ oma: ọdawẹ avọ uvi uyoyou,+ uwowou, omaurokpotọ,*+ ẹwolẹ,+ gbe odiri.+ 13 Wha gbẹ hai thihakọ kẹ ohwohwo jẹ rọvrẹ ohwohwo riẹriẹriẹ+ nọ ohwo jọ ọ tẹ maki wo oware jọ nọ u re ru ei go kpahe omọfa.+ Wọhọ epanọ Jihova* ọ rọvrẹ owhai riẹriẹriẹ na, wha re ru epọvo na hrọ re.+ 14 Rekọ u te no eware nana kpobi no, wha whẹ uyoyou họ oma,+ keme o rẹ wha okugbe ọkpekpe ze.+

15 Ofariẹ, jọ udhedhẹ Kristi na u su udu rai,*+ keme a se owhai ziọ udhedhẹ yena re wha jọ ugboma ovo. Wha hai dhesẹ nọ wha wo edẹro. 16 Jọ ẹme Kristi ọ jọ eva rai ruiruo ziezi re o kẹ owhai areghẹ kpobi. Wha gbẹ hai wuhrẹ jẹ tuduhọ ohwohwo awọ* avọ ilezi,+ ile nọ a re ro jiri Ọghẹnẹ, ile uyere* nọ a rẹ so rọ gọ Ọghẹnẹ, jẹ jọ udu rai so ile kẹ Jihova.*+ 17 Ẹme kpobi nọ wha be ta hayo oware kpobi nọ wha bi ru, wha ru oware kpobi evaọ odẹ Olori na Jesu, hae rọ ẹkwoma riẹ yere Ọghẹnẹ, Ọsẹ na.+

18 Whai eyae, wha romakpotọ kẹ ezae rai,+ wọhọ epanọ u fo evaọ Olori na. 19 Whai ezae, wha gbẹ hai you eyae rai,+ wha dha eva kẹ ae gaga ha.*+ 20 Whai emọ, wha yoẹme kẹ esẹgbini rai evaọ oware kpobi,+ keme onana o rẹ were Olori na. 21 Whai esẹ, wha ru uzou dhe* emọ rai hi,+ re a gbẹ jọ ọkọkora ha.* 22 Whai erigbo, wha yoẹme evaọ oware kpobi kẹ enọ e rrọ ilori rai evaọ otọakpọ* na,+ orọnikọ okenọ a te bi rri owhai ọvo ho re wha ruẹsi ru ahwo eva were, rekọ wha ru ei no udu ze, avọ ozodhẹ Jihova.* 23 Oware kpobi nọ wha bi ru, wha rọ udu kpobi ru ei wọhọ ẹsenọ wha bi ru ei kẹ Jihova,*+ orọnikọ ahwo ho, 24 keme wha riẹ nọ obọ Jihova* wha te jọ wo ukuoriọ na wọhọ osohwa.+ Wha gbodibo kẹ Olori na, Kristi. 25 Evaọ uzẹme, ohwo nọ o bi ru eyoma, a te hwosa eyoma na kẹe,+ keme ọriẹwẹ ọ riẹ hẹ.+

4 Whai ilori, wha yerikugbe erigbo rai evaọ edhere okiẹrẹe gbe oghẹrẹ nọ u fo, keme wha riẹ nọ whai omarai wha wo Olori nọ ọ rrọ obọ odhiwu.+

2 Wha ruabọhọ olẹ,+ hae jaja aro vi evaọ olẹ avọ uyere-okẹ.+ 3 Evaọ oke ovona, wha hae lẹ roro omai re,+ inọ Ọghẹnẹ o rovie ẹthẹ kẹ omai nọ ma rẹ rọ ta ẹme riẹ, re ma sai whowho oware udidi ọrẹri nọ u kiekpahe Kristi na, onọ mẹ rọ fiki riẹ rrọ uwou-odi na,+ 4 gbe re mẹ sai whowho iei vevẹ wọhọ epanọ u fo nọ me re ru.

5 Wha hae rọ areghẹ yerikugbe ahwo obọ otafe, wha hae rehọ oke rai ruiruo ziezi.*+ 6 Jọ eme rai e hae jọ wowou ẹsikpobi, wọhọ ẹsenọ a fi uwhei họ ae,+ re wha riẹ epanọ wha rẹ rọ kẹ ohwo kpobi uyo.+

7 Tikikọs,+ oniọvo oyoyou mẹ gbe odibo nọ o wo ẹrọwọ gbe ibe ọrigbo mẹ evaọ Olori na, o ti gbiku eware kpobi nọ i kiekpahe omẹ kẹ owhai. 8 Me bi vi ei bru owhai ze re wha riẹ epanọ ma rrọ, o ve je ru udu rai sasa. 9 Ọyomariẹ avọ Onẹsimọs+ nọ ọ rrọ oniọvo oyoyou mẹ nọ o wo ẹrọwọ, ọnọ o no oborai ze, a be nyaze; a ti gbiku eware kpobi nọ e rrọ obonẹ via kẹ owhai.

10 Aristakọs+ nọ ma gbẹ rrọ uwou-odi o bi yere owhai, Mak,+ ọnọ avọ Banabas a rrọ emọ-inievo o bi yere owhai re (ọnọ ma vuẹ owhai nọ wha dede rehọ+ nọ ọ tẹ nyabru owhai ze na), 11 gbe Jesu, ọnọ a re se Jọstọs, enọ e rrọ usu enọ e yawo. Ahwo nana ọvo họ ibe iruiruo mẹ evaọ iruo Uvie Ọghẹnẹ, yọ a rrọ omosasọ ulogbo* kẹ omẹ. 12 Ẹpafras,+ ọrigbo Kristi Jesu nọ o no oborai ze o bi yere owhai. Ọ be lẹ gaga roro owhai ẹsikpobi, re wha ruẹsi dikihẹ ga ziezi je wo imuẹro egaga kpahe oreva Ọghẹnẹ kpobi. 13 Keme me bi se isẹri kẹe inọ ọ be daoma gaga fiki rai gbe fiki inievo nọ e rrọ Laodisia gbe Haerapolis.

14 Luk,+ ọbo-imu oyoyou na o bi yere owhai, Dimas+ o bi yere owhai re. 15 Wha yere inievo obọ Laodisia kẹ omẹ, wha yere Nimfa oniọvo-ọmọtẹ mai gbe ukoko nọ o rrọ uwou riẹ.+ 16 Okenọ wha te se ileta nana no, wha ru re a sei+ evaọ ukoko obọ Laodisia re, wha ve je se onọ u no obọ Laodisia ze. 17 Wha vẹ jẹ ta kẹ Akipọs+ nọ: “Muẹrohọ iruo odibọgba nọ whọ jẹrehọ evaọ Olori na, re whọ ruẹsi ru ei gba.”

18 Mẹ Pọl, mẹ be rọ obọ mẹ kere eme uyere nana.+ Wha hae kareghẹhọ omẹ evaọ uwou-odi+ nọ mẹ rrọ na. Jọ Ọghẹnẹ o dhesẹ uwowou ulogbo kẹ owhai.