ILETA ỌSOSUỌ RO SE AHWO TẸSALONIKA

1 Mẹ Pọl, Silvanọs,*+ gbe Timoti,+ ro se ukoko obọ Tẹsalonika nọ o rrọ usu kugbe Ọghẹnẹ Ọsẹ na gbe Olori na Jesu Kristi:

Jọ Ọghẹnẹ o dhesẹ uwowou ulogbo kẹ owhai jẹ kẹ owhai udhedhẹ.

2 Ma re yere Ọghẹnẹ ẹsikpobi nọ ma tẹ be fodẹ owhai kpobi evaọ elẹ mai,+ 3 keme ma be hae kareghẹhọ iruo ẹrọwọ rai gbe iruo egaga nọ wha bi ru fiki uyoyou, gbe ithihakọ rai fiki ẹruore+ nọ wha fihọ Olori mai Jesu Kristi evaọ aro Ọghẹnẹ gbe Ọsẹ mai. 4 Ma riẹ nọ ọye ọ salọ owhai, inievo nọ Ọghẹnẹ o you, 5 keme usi uwoma nọ ma ta kẹ owhai o jọ orọ ẹmeunu ọvo ho, rekọ avọ ogaga gbe ẹzi ọfuafo gbe imuẹro egaga, yọ wha riẹ oghẹrẹ nọ ma ru omamai evaọ udevie rai re o sae kẹ owhai erere. 6 Yọ wha be rọ aro kele omai+ gbe Olori na,+ keme ma ruẹ nọ wha jẹ ẹme na rehọ evaọ udevie ukpokpoma ogaga+ avọ oghọghọ nọ ẹzi ọfuafo na ọ kẹ owhai, 7 wha te ti zihe ruọ oriruo kẹ enọ e rọwo na kpobi evaọ Masidonia gbe Akeya.

8 Uzẹme riẹ họ, orọnikọ ẹme Jihova* ọ rọ ẹkwoma rai do ruọ Masidonia gbe Akeya no ọvo ho, rekọ ẹrọwọ nọ wha fihọ Ọghẹnẹ u do ruọ oria kpobi no,+ fikiere u gbe du gwọlọ nọ ma rẹ ta ẹme ọvo ho. 9 Keme ae omarai a gbẹ be ta kpahe epanọ ma rọ nyabru owhai ze evaọ oke ọsosuọ gbe epanọ wha rọ nyasiọ emedhọ rai+ ba je kurẹriẹ bru Ọghẹnẹ ze re wha gbodibo kẹ Ọghẹnẹ uzẹme nọ ọ rrọ uzuazọ na, 10 jẹ hẹrẹ Ọmọ riẹ nọ o bi no obọ idhiwu na ze,+ ọnọ ọ kpare no uwhu ze, koyehọ Jesu, ọnọ o bi siwi omai no ofu nọ ọ be tha na.+

2 Whai omarai wha riẹ vevẹ, inievo, inọ iweze nọ ma weze bru owhai ze e jọ uvrẹvru hu.+ 2 Keme dede nọ ma ruẹ uye evaọ oke ọsosuọ, a te je gboja kẹ omai evaọ Filipai+ wọhọ epanọ wha riẹ, ma rọ ẹkwoma Ọghẹnẹ mai gudu* nọ ma ro whowho usi uwoma Ọghẹnẹ kẹ owhai+ ghelọ ọwọsuọ ọgaga.* 3 Keme orọnikọ iroro ethọthọ hayo iroro igbegbe hayo eviẹhọ ma rọ tuduhọ owhai awọ họ, 4 rekọ, nọ orọnọ Ọghẹnẹ ọ jẹ omai rehọ o je mu usi uwoma na họ omai obọ na, ma be ta ẹme, orọnikọ re ma ru ahwo-akpọ eva were he rekọ Ọghẹnẹ, ọnọ ọ be kiẹ udu mai riwi.+

5 Uzẹme, wha riẹ nọ ma ta eme eviẹhọ ro jiri owhai hi hayo rehọ oma ọviẹwẹ lele owhai yeri fiki uvou-uthei hi;+ Ọghẹnẹ họ osẹri mai! 6 Yọ ma be gwọlọ ujiro no obọ ahwo ze he, te obọ rai hayo obọ amọfa jọ, dede nọ ma rẹ sai ru omamai họ owha ogbẹgbẹdẹ kẹ owhai fikinọ mai yọ ikọ Kristi.+ 7 Ukpoye, ma jọ wolẹ evaọ udevie rai wọhọ epaọ oniọmọ nọ ọ be romatotọ rẹrote emọboba riẹ.* 8 Fikinọ ma you owhai gaga, ma gba riẹ mu* nọ orọnikọ usi uwoma Ọghẹnẹ ọvo ma rẹ ta kẹ owhai hi rekọ te uzuazọ* mai nọ ma re siobọno fiki rai+ keme wha rrọ ghaghae kẹ omai gaga.+

9 Inievo, mẹ riẹ vevẹ nọ wha kareghẹhọ iruo egaga gbe omolahiẹ mai. Ma je ru iruo te aso te uvo re ma gbẹ jọ owha ogbẹgbẹdẹ kẹ owhai ọvuọvo ho+ okenọ ma je whowho usi uwoma Ọghẹnẹ kẹ owhai. 10 Wha sai se isẹri onana, yọ Ọghẹnẹ ọ riẹ re inọ ma dhesẹ nọ mai yọ enọ a re fievahọ, enọ i kiẹrẹe, jẹ kare afuẹwẹ evaọ oghẹrẹ nọ ma ro yerikugbe owhai enọ e rọwo. 11 Wha riẹ vevẹ nọ ma jẹ tuduhọ owhai awọ jẹ sasa owhai oma jẹ kẹ owhai omomọvo ohrẹ,+ nwane wọhọ epanọ ọsẹ+ o re ru emọ riẹ, 12 re wha sae gbẹ nya evaọ edhere nọ ọ rẹ were Ọghẹnẹ,+ ọnọ o bi se owhai ziọ Uvie+ gbe oruaro riẹ na.+

13 Ẹhẹ, oyejabọ nọ ma bi ro yere Ọghẹnẹ ẹsikpobi na,+ keme nọ wha yo ẹme Ọghẹnẹ, onọ wha jọ unu mai yo, wha jẹ riẹ rehọ, orọnikọ wọhọ ẹme ahwo-akpọ họ rekọ wọhọ epanọ o ginẹ rrọ, ẹme Ọghẹnẹ, onọ u bi ru iruo evaọ omarai enọ e rọwo na. 14 Keme inievo, wha rọ aro kele ikoko Ọghẹnẹ nọ e rrọ usu kugbe Kristi Jesu evaọ Judia, keme wha jọ obọ ahwo orẹwho obọrai ruẹ uye+ eware evona nọ ae omarai a be ruẹ re evaọ obọ ahwo Ju, 15 enọ i tube kpe Olori na Jesu+ gbe eruẹaro na je kpokpo omai.+ Ofariẹ, a bi ru Ọghẹnẹ eva were he rekọ a be wọso oware nọ o rẹ wha ewoma se ahwo kpobi, 16 keme a be daoma whaha omai re ma gbẹ ta usi uwoma kẹ ahwo erẹwho na ha re a sae zọ.+ A be rọ enẹ ru izieraha rai vọ kpọhọhwẹ ẹsikpobi. Rekọ ofu riẹ o bru rai ze no.+

17 Inievo, nọ a hẹriẹ omai no owhai* evaọ omoke jọ (nọ ma gbẹ jẹ ruẹ owhai hi, rekọ wha jọ iroro mai), ma dawo edhere kpobi re ma ruẹ owhai* fiki isiuru egaga nọ ma wo kpahe owhai. 18 Fiki onana ma jẹ gwọlọ nọ ma rẹ nyabru owhai ze, ẹhẹ, mẹ Pọl, mẹ daoma orọnikọ ẹsiẹvo ho rekọ isiava soso; ghele na Setan o bru omai dhe. 19 Kọ eme họ ẹruore mai hayo oghọghọ mai hayo etu-uvie evawere mai evaọ aro Olori mai Jesu evaọ oke ọzino* riẹ? Kọ ogbẹrọnọ owhai?+ 20 Evaọ uzẹme, whai họ oruaro gbe oghọghọ mai.

3 Fikiere nọ ma gbẹ jẹ sai thihakọ riẹ hẹ, ma tẹ jiroro nọ o mai woma re mai ọvo ma gbẹ jọ Athẹns;+ 2 ma te vi Timoti bru owhai ze,+ oniọvo mai gbe ọgbodibo* Ọghẹnẹ evaọ iruo usi uwoma kpahe Kristi, re ọ bọ owhai ga* jẹ sasa owhai oma evaọ ẹrọwọ rai, 3 re ikpokpoma nana i gbe ru ohwo ọvo whrehe he.* Keme whai omarai wha riẹ nọ ma rẹ siọ uye eware itieye ba ẹruẹ hẹ.*+ 4 Keme nọ ma jọ kugbe owhai, ma vuẹ owhai kpahotọ nọ ma te ruẹ uye ukpokpoma, yọ oye o via no na, nwane wọhọ epanọ wha riẹ.+ 5 Oyejabọ nọ, okenọ mẹ gbẹ jẹ sai thihakọ riẹ hẹ, me ro vi ohwo ze re mẹ riẹ epanọ wha bi kru ẹrọwọ rai te,+ keme o sae jọ nọ Ọdawo-Ahwo na+ ọ dawo owhai no, yọ ẹsejọhọ iruo mai i zihe ruọ uvrẹvru no.

6 Rekọ Timoti nọ ọ nwani no oborai ze na+ ọ vuẹ omai emamọ usi kpahe ẹrọwọ gbe uyoyou rai no, inọ wha be hae kareghẹhọ omai avọ evawere ẹsikpobi, gbe nọ u bi si owhai urru re wha ruẹ omai wọhọ epanọ u bi si omai urru re ma ruẹ owhai re na. 7 Inievo, oyejabọ nọ evaọ ebẹbẹ* gbe ukpokpoma mai kpobi, ma bi ro wo omosasọ fiki rai gbe ẹrọwọ nọ wha bi dhesẹ.+ 8 Keme o rẹ kẹ omai ẹgba* otẹrọnọ wha dikihẹ ga evaọ Olori na. 9 Ma be sae ruẹ unu yere Ọghẹnẹ fiki rai hi rọkẹ oghọghọ ulogbo nọ ma be jọ aro Ọghẹnẹ wo fiki rai. 10 Ma be rọ udu mai kpobi lẹ olẹ ayare-ọgaga te aso te uvo re ma sae ruẹ owhai* je fiobọhọ kẹ owhai evaọ oria nọ ẹrọwọ rai ọ jọ ga tere he.+

11 Jọ Ọghẹnẹ Ọsẹ mai gbe Olori mai Jesu ọ gbẹ edhere kẹ omai re ma sae nyabru owhai ze. 12 U te no ere no, jọ Olori na o ru owhai vihọ, ẹhẹ, re wha vọ avọ uyoyou kẹ ohwohwo+ jẹ rọkẹ ahwo kpobi, wọhọ epanọ ma you owhai na, 13 re ọ ruẹsi ru udu rai ga, kare afuẹwẹ jẹ jọ ọrẹri evaọ aro Ọghẹnẹ+ gbe Ọsẹ mai evaọ oke ọzino* Olori mai Jesu+ gbe erẹri riẹ kpobi.

4 Orọ urere, inievo, ma vuẹ owhai no epanọ u fo nọ wha re yeri re wha sai ru Ọghẹnẹ eva were,+ yọ wha bi gine ru ere. Whaọ, ma be rọ odẹ Olori na Jesu tuduhọ owhai awọ jẹ lẹ owhai nọ wha ruabọhọ onana ziezi. 2 Keme wha riẹ ehrẹ* nọ ma kẹ owhai nọ i no obọ Olori na Jesu ze.

3 Onana họ oreva Ọghẹnẹ, inọ wha jọ ọrẹri+ je siomano ọfariẹ-ogbe.*+ 4 U fo re omomọvo rai ọ riẹ epanọ o re ro su oma*+ riẹ re ọ sae jọ ọrẹri+ je wo ọghọ, 5 orọnikọ avọ isiuru egaga kẹ owezẹ ọzae-avọ-aye nọ e vrẹta ha+ wọhọ epaọ erẹwho na nọ e riẹ Ọghẹnẹ hẹ.+ 6 Jọ ohwo ọvo ọ nya vrẹ umuo nọ u fo ho re ọ wha oniọvo riẹ re evaọ ẹme nana, keme Jihova* ọ rẹ rọ ahwo nọ a ru eware nana kpobi guẹdhọ, wọhọ epanọ ma vuẹ owhai vẹre jẹ vẹvẹ owhai unu gaga re. 7 Keme orọnikọ Ọghẹnẹ o se omai re ma yeri uzuazọ ugbegbe he rekọ re ma jọ ọrẹri.+ 8 Fikiere, ohwo nọ o bi rri uwuhrẹ nana vo, orọnikọ ohwo-akpọ o bi rri vo ho rekọ Ọghẹnẹ,+ ọnọ ọ be kẹ owhai ẹzi ọfuafo riẹ.+

9 Rekọ, kpahe uyoyou-inievo, u du gwọlọ nọ ma re kere se owhai hi,+ keme Ọghẹnẹ o wuhrẹ owhai nọ wha you ohwohwo.+ 10 Evaọ uzẹme, wha bi ru ere kẹ inievo kpobi nọ e rrọ Masidonia soso. Rekọ, inievo, ma be tuduhọ owhai awọ nọ wha hai gbe ru onana ziezi.* 11 Wha gbaemu nọ wha rẹ rria dhedhẹ+ jẹ tẹrovi orọ obọrai+ jẹ rọ abọ rai ru iruo,+ wọhọ epanọ ma ta kẹ owhai, 12 re ahwo obọ otafe a ruẹ nọ wha be rria kpatiẹ+ gbe nọ oware ovo o kare owhai hi.

13 Ofariẹ, inievo, ma gwọlọ nọ wha jọ igbori hi* kpahe enọ i whu no,*+ re wha gbe weri wọhọ ahwo edekọ na ha enọ i wo ẹruore he.+ 14 Keme ma tẹ rọwo inọ Jesu o whu jẹ kparoma ze,+ ere ọvona ma rẹ rọwo re inọ Ọghẹnẹ ọ te kpare enọ i kie ruọ owezẹ uwhu nọ e rrọ usu kugbe Jesu ze re a jọ kugbei.+ 15 Ma be ta onana kẹ owhai wọhọ epanọ o rrọ ẹme Jihova* inọ, mai nọ e te gbẹ jọ uzuazọ evaọ oke ọzino* Olori na ma te karo kẹ enọ i kie ruọ owezẹ uwhu anwẹdẹ hẹ; 16 keme Olori na omariẹ o ti no obọ odhiwu ze, ọ vẹ te rehọ urru oruarua orọ ukọ-odhiwu oride+ ro se avọ ọgba Ọghẹnẹ nọ o kru, enọ e rrọ usu kugbe Kristi nọ i whu no a vẹ te kake kparoma.+ 17 Kẹsena mai nọ e gbẹ rrọ uzuazọ ma ve ti kuomagbe ai, a vẹ te rọ ẹgho rehọ omai vrẹ+ bru Olori na+ evaọ ehru na; ma vẹ te jọ kugbe Olori na ẹsikpobi.+ 18 Fikiere, wha hae rọ eme nana sasa ohwohwo oma.

5 Whaọ inievo, u du gwọlọ nọ ma re kere se owhai kpahe oke gbe ezi na ha. 2 Keme whai omarai wha riẹ ziezi nọ ẹdẹ Jihova*+ ọ be tha nwane wọhọ epaọ oji evaọ aso.+ 3 Oke kpobi nọ a te ta nọ, “Udhedhẹ gbe omofọwẹ!” ọraha idudhe ọ vẹ te nwani te ai,+ nwane wọhọ epanọ edada eyẹ i re kru aye nọ o dihọ na, yọ a te sae dhẹ vabọ vievie he. 4 Rekọ whai inievo, wha rrọ ebi hi, nọ ẹdẹ na ọ rẹ rọ ruọ owhai ọza wọhọ epanọ elo irioke ọ rẹ ruọ iji ọza na, 5 keme whai kpobi emọ elo gbe emọ uvo.+ Ma rrọ usu kugbe aso hayo ebi hi.+

6 Fikiere, ajọ ma wezẹ vrẹ hẹ wọhọ ahwo edekọ na,+ rekọ joma jaja aro vi+ jẹ sẹro iroro mai.+ 7 Keme enọ e rẹ wezẹ, aso a rẹ wezẹ, yọ enọ e rẹ da idi vrẹ oma, aso a rẹ da idi vrẹ oma.+ 8 Rekọ mai nọ e rrọ emọ uvo, joma sẹro iroro mai, jẹ whẹ ẹgọ-igbama ọrọ ẹrọwọ gbe uyoyou họ jẹ rehọ ẹruore esiwo na tu wọhọ etu-ọgaga,+ 9 keme orọnikọ Ọghẹnẹ ọ salọ omai rọkẹ ofu riẹ hẹ, rekọ re ma wo esiwo+ ẹkwoma Olori mai Jesu Kristi. 10 O whu kẹ omai,+ re o tẹ make rọnọ ma kpe aro fihọ hayo ma rrọ owezẹ,* ma vẹ te jọ uzuazọ kugbei.+ 11 Fikiere, wha gbẹ hae tuduhọ ohwohwo awọ* jẹ hae bọ ohwohwo ga,+ nwane wọhọ epanọ wha bi ru na.

12 Inievo, ma be lẹ owhai nọ wha rọ adhẹẹ kẹ enọ i bi ru iruo gaga evaọ udevie rai na, enọ e be sẹro rai evaọ Olori na jẹ be hrẹ owhai; 13 re wha je wo ororokẹ ologbo avọ uyoyou rọkẹ ae fiki iruo rai.+ Wha rria dhedhẹ kugbe ohwohwo.+ 14 Evaọ abọdekọ riẹ inievo, ma be tuduhọ owhai awọ nọ wha vẹvẹ enọ e rrọ kpatiẹ hẹ unu,*+ wha ta eme omosasọ kẹ enọ e rrọ ọkora,* wha tha enọ e ga ha uke, wha wo odiri kẹ ahwo kpobi.+ 15 Ajọ ohwo ọvo ọ rọ eyoma hwosa eyoma kẹ ohwo ọvo ho,+ rekọ wha hae daoma ru ewoma kẹ ohwohwo, te amọfa kpobi.+

16 Wha hae ghọghọ ẹsikpobi.+ 17 Wha hae lẹ kẹse kẹse.+ 18 Wha kẹ uyere evaọ oware kpobi.+ Onana họ oreva Ọghẹnẹ kẹ owhai evaọ Kristi Jesu. 19 Wha furie erae ẹzi na ha.+ 20 Wha rri eruẹaruẹ vo ho.+ 21 Wha vuhu eware kpobi mu;+ wha kru onọ u woma ga. 22 Wha siomano oghẹrẹ umuomu kpobi.+

23 Jọ Ọghẹnẹ udhedhẹ na omariẹ o ru owhai fo riẹriẹriẹ. Jọ o ru re ẹzi gbe uzuazọ* gbe ugboma rai inievo na e jọ kọkọ evaọ kabọ kabọ jẹ kare afuẹwẹ evaọ oke ọzino* Olori mai Jesu Kristi.+ 24 Ọnọ o bi se owhai na o re ru ẹme riẹ gba, yọ o ti gine ru onana.

25 Inievo, wha gbẹ hae lẹ roro omai.+

26 Wha rọ ẹviọlọ ọrẹri yere inievo na kpobi.

27 Mẹ be rọ odẹ Olori na lẹ owhai gaga inọ wha ru re a se ileta nana kẹ inievo na kpobi.+

28 Jọ Olori mai Jesu Kristi o dhesẹ uwowou ulogbo riẹ kẹ owhai.