ILETA AVỌ IVẸ RO SE AHWO TẸSALONIKA

1 Pọl, Silvanọs,* gbe Timoti,+ ro se ukoko obọ Tẹsalonika nọ o rrọ usu kugbe Ọghẹnẹ Ọsẹ mai gbe Olori na Jesu Kristi:

2 Jọ Ọghẹnẹ Ọsẹ na gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.

3 Inievo, o gba omai họ ẹsikpobi re ma yere Ọghẹnẹ fiki rai. Onana u kiehọ, keme ẹrọwọ rai o bi dhe ẹgẹga, yọ uyoyou nọ whai kpobi wha wo kẹ ohwohwo u bi dhe ẹgẹga re.+ 4 Fikiere ma be rọ owhai seha+ evaọ udevie ikoko Ọghẹnẹ fiki ithihakọ avọ ẹrọwọ nọ wha wo evaọ udevie ikpokpoma rai kpobi gbe ẹgaga* nọ wha be reoja riẹ.*+ 5 Onana yọ imuẹro oziẹobro okiẹrẹe Ọghẹnẹ, onọ u ru nọ a ro rri owhai nọ wha te kẹ Uvie Ọghẹnẹ, onọ wha be rọ fiki riẹ ruẹ uye na.+

6 Evaọ uzẹme, u kiehọ re Ọghẹnẹ ọ rehọ uye hwosa kẹ enọ e be wha uye se owhai.+ 7 Rekọ whai nọ e be ruẹ uye na, a te kẹ owhai ufuoma kugbe omai evaọ okenọ Olori na Jesu ọ te romavia+ no odhiwu ze avọ ikọ-odhiwu egaga riẹ+ 8 evaọ ebruerae, nọ ọ te rehọ uye kẹ enọ e riẹ Ọghẹnẹ hẹ gbe enọ i bi yoẹme kẹ usi uwoma kpahe Olori mai Jesu hu.+ 9 Ahwo nana a ti wo obrukpe ọrọ ọraha ebẹdẹ bẹdẹ,+ a vẹ te rọ ere no aro Olori na je no ẹgba ologbo riẹ, 10 evaọ okenọ ọ te nyaze re o wo oruaro kugbe erẹri riẹ na, yọ evaọ ẹdẹ yena akpọ o ti gbe ahwo kpobi nọ a fi ẹrọwọ họ iẹe unu. Nọ orọnọ wha rọwo isẹri nọ ma se na, wha te jọ usu rai.

11 Fiki onana ma be hae lẹ roro owhai ẹsikpobi inọ Ọghẹnẹ mai o rri owhai nọ wha te kẹ use riẹ+ jẹ rehọ ogaga riẹ ru eware iwoma kpobi nọ ọ gwọlọ ru je fiobọhọ kẹ owhai ru iruo ẹrọwọ rai te urere. 12 Ẹjiroro onana họ re oruaro u te odẹ Olori mai Jesu ẹkwoma rai, re wha je wo oruaro fiki usu nọ wha rrọ kugbei, wọhọ epaọ uwowou ulogbo Ọghẹnẹ mai gbe ọrọ Olori na Jesu Kristi.

2 Rekọ, inievo, kpahe ọzino* Olori mai Jesu Kristi+ gbe epanọ a ti ro koko omai họ re ma jọ kugbei,+ ma be ta kẹ owhai nọ 2 wha kuvẹ hẹ re iroro rai i reghe hayo re ozọ u mu owhai fiki ẹme nọ a ta nọ o no obọ Ọghẹnẹ* ze+ hayo fiki ẹmeunu hayo fiki ileta nọ o wọhọ nọ i no obọ mai ze, nọ otujọ a be rọ ta nọ ẹdẹ Jihova*+ o te otọ no.

3 Wha jọ ohwo ọvo o su owhai thọ* evaọ edhere ọvuọvo ho, keme ẹdẹ yena ọ rẹ ze he ajokpanọ ẹsiọ-orọwọ*+ na o rẹ romavia tao, a ve je dhesẹ ohwo nọ o re koko uzi hi+ na via, ọmọ ọraha na.+ 4 Ohwo ọwọsuọ ọ rrọ yọ ọ te kpare omariẹ kpehru vi ohwo kpobi nọ a bi se ọghẹnẹ hayo oware kpobi nọ a be gọ,* ọ vẹ te keria etẹmpol Ọghẹnẹ, re ọ jọ ẹgbede dhesẹ omariẹ fihọ ọghẹnẹ. 5 Kọ wha gbẹ kareghẹhọ nọ okenọ mẹ gbẹ jọ kugbe owhai, mẹ jẹ ta eme nana kẹ owhai?

6 Whaọ wha riẹ oware nọ o be dae ji na, re a ti dhesẹ iẹe via nọ oke riẹ u te te. 7 Uzẹme, ọnana nọ o re koko uzi hi na o mu iruo họ no,+ yọ a ri rri rie mu hu, rekọ o te jọ ere bẹsenọ ọnọ ọ be dae ji na ọ rẹ nyavrẹ no. 8 Kẹsena a ve ti dhesẹ ọnọ o re koko uzi hi na via, ọnọ Olori na Jesu ọ te rọ ẹzi unu riẹ raha+ je si no otọ evaọ okenọ ọzino* riẹ o ti dhesẹ oma via.+ 9 Ọnọ o re koko uzi hi na ọ rrọ fiki ẹgba nọ Setan ọ be kẹe+ ro ru iruo igbunu kpobi gbe eware eka avọ eware igbunu nọ ọ be rọ viẹ ahwo họ,+ 10 jẹ be rọ edhere oyoma kpobi rọ viẹ enọ a be te raha no họ,+ onana yọ osohwa rai keme a jẹ uzẹme na rehọ họ yọ a you uzẹme na ha re a sai siwi ai. 11 Oyejabọ nọ Ọghẹnẹ ọ rọ kuvẹ re a viẹ ae họ, re a ruẹse rọwo ọrue,+ 12 re aikpobi a ruẹsi wo obrukpe keme a rọwo uzẹme na ha rekọ a romakẹ emuemu.

13 O gba omai họ ẹsikpobi re ma yere Ọghẹnẹ fiki rai, inievo nọ Jihova* o you, keme no emuhọ ze Ọghẹnẹ ọ salọ owhai+ re wha wo esiwo ẹkwoma ẹzi riẹ nọ o ro ru owhai fo+ gbe ẹrọwọ nọ wha fihọ uzẹme na. 14 Ọ rehọ ẹkwoma usi uwoma nọ ma bi whowho se owhai kẹ onana, re wha sai wo oruaro Olori mai Jesu Kristi.+ 15 Fikiere, inievo, wha dikihẹ ga+ je kru eware nọ a wuhrẹ owhai na ga ẹsikpobi,+ o tẹ make rrọ ẹkwoma ovuẹ unu hayo ileta nọ ma kere se owhai. 16 Ofariẹ, jọ Olori mai Jesu Kristi gbe Ọghẹnẹ Ọsẹ mai, ọnọ o you omai+ jẹ kẹ omai omosasọ ebẹdẹ bẹdẹ gbe emamọ ẹruore+ ẹkwoma uwowou ulogbo na, 17 o ru udu rai sasa je ru owhai ga* re wha sai ru oware uwoma kpobi jẹ ta eme iwoma kpobi.

3 Orọ urere, inievo, wha hae lẹ roro omai,+ re ẹme Jihova* o gbe do ruọ oria kpobi vẹrẹ vẹrẹ,+ re a jẹ jẹe rehọ avọ ọghọ nwane wọhọ epanọ o rrọ evaọ udevie rai na, 2 re a je siwi omai no obọ ahwo omuomu nọ a rẹ wha enwoma se amọfa,+ keme ẹrọwọ yọ oware nọ ahwo kpobi a wo ho.+ 3 Rekọ Olori na o re ru ẹme riẹ gba, yọ ọ te kẹ owhai ẹgba jẹ thọ owhai no obọ omuomu na. 4 Ofariẹ, ma fievahọ owhai evaọ Olori na inọ wha bi ru eware nọ ma ta yọ wha ti gbe ru ere. 5 Jọ Olori na ọ gbẹ hae kpọ udu rai gbẹsinẹdẹ re wha you Ọghẹnẹ+ je wo ithihakọ+ nọ wha rẹ rọ ruabọhọ lele Kristi.

6 Inievo, ma be kẹ owhai ohrẹ evaọ odẹ Olori mai Jesu Kristi, inọ wha siomano oniọvo kpobi nọ ọ be nya kpatiẹ hẹ,+ nọ o bi ru eware nọ i wo ohẹriẹ no enọ ma wuhrẹ owhai.*+ 7 Whai omarai wha riẹ epanọ u fo nọ wha re ru re wha rọ aro kele omai,+ keme ma dhesẹ uruemu nọ o rrọ kpatiẹ hẹ evaọ udevie rai hi, 8 yọ ma re emu ohwo ọvo ọvọvẹ hẹ.*+ Ukpoye, ma je ru iruo egaga avọ omolahiẹ te aso te uvo re ma gbẹ wọ owha ogbẹgbẹdẹ họ owhai ọvuọvo uzou hu.+ 9 Orọnikọ ma wo udu nọ ma sai ro ru ere he he,+ rekọ ma gwọlọ jọ oriruo kẹ owhai nọ wha rẹ rọ aro kele.+ 10 Evaọ uzẹme, okenọ ma jọ kugbe owhai, ma jẹ hae kẹ owhai ujaje nana inọ: “Otẹrọnọ ohwo jọ ọ gwọlọ ru iruo ho, wha kẹe emu re gbe he.”+ 11 Keme ma bi yo nọ ejọ evaọ udevie rai a be nya* kpatiẹ hẹ,+ a bi ru iruo vievie he rekọ a bi dhomahọ eware nọ i te rai hi.+ 12 Ma be rọ odẹ Olori na Jesu Kristi ta kẹ ahwo otiọye na jẹ be tuduhọ ae awọ nọ a ru iruo rai dhedhẹ jẹ re emu nọ a rọ obọ rai ru iruo kẹ.+

13 Rọkẹ owhai, inievo, wha jọ oware uwoma uruo o bẹ owhai no ho. 14 Rekọ otẹrọnọ ohwo jọ o bi ru lele eme mai hi enọ ma jọ ileta nana ta na, wha kpe oka họ ohwo nana je bru usu noi,+ re oma o vuọ ẹe. 15 Ghele na wha rehọ iẹe wọhọ ọwegrẹ hẹ rekọ wha gbẹ hae kẹe ohrẹ+ wọhọ oniọvo.

16 Jọ Olori udhedhẹ na ọ kẹ owhai udhedhẹ kẹse kẹse evaọ edhere kpobi.+ Jọ Olori na ọ jọ kugbe owhai kpobi.

17 Mẹ Pọl, mẹ be rọ obọ mẹ kere eme uyere nana ro se owhai,+ onọ o rrọ oka evaọ ileta mẹ kpobi; enẹ me re kere.

18 Jọ Olori mai Jesu Kristi o dhesẹ uwowou ulogbo riẹ kẹ owhai kpobi.