ILETA ỌSOSUỌ RO SE TIMOTI

1 Pọl, ukọ Kristi Jesu wọhọ epaọ ujaje Ọghẹnẹ Osiwi mai gbe ọrọ Kristi Jesu ọnọ ọ rrọ ẹruore mai,+ 2 ro se Timoti,*+ uvi ọmọ+ evaọ ẹrọwọ na:

Jọ Ọghẹnẹ Ọsẹ na gbe Kristi Jesu Olori mai a dhesẹ uwowou ulogbo gbe ohrọ-oriọ kẹ owhẹ jẹ kẹ owhẹ udhedhẹ.

3 Wọhọ epanọ mẹ tuduhọ owhẹ awọ inọ whọ jọ Ẹfisọs okenọ me je ru re me kpobọ Masidonia, ere ọvona mẹ be vuẹ owhẹ enẹna, re whọ vẹvẹ otujọ unu inọ a wuhrẹ iwuhrẹ erue he, 4 hayo gaviezọ kẹ iku erue+ hayo iku uyẹ-ukele he. Eware itieye na e rẹ kẹ erere ọvo ho,+ ukpoye kọ e rẹ lẹliẹ ahwo ta onọ a roro ku kpobi viukpọ eware nọ i bi no obọ Ọghẹnẹ ze nọ e rẹ bọ ẹrọwọ ga. 5 Ẹjiroro ohrẹ* nana họ re a wo uyoyou+ nọ u no udu ofuafo ze je no emamọ obruoziẹ-iroro ze je no ẹrọwọ+ nọ ọ kare eviẹhọ ze. 6 Fikinọ a bi gbabọkẹ eware nana, otujọ a be romakẹ eme ifofe.+ 7 A gwọlọ jọ enọ i re wuhrẹ ahwo+ uzi, rekọ a wo otoriẹ eware nọ a be ta ha hayo eware nọ a bi si ikẹ rai kekeke na ha.

8 Whaọ ma riẹ nọ Uzi na u woma otẹrọnọ ohwo o bi lele iei epanọ u fo,* 9 vuhumu inọ orọnikọ fiki ohwo okiẹrẹe a ro fi uzi họ họ rekọ fiki enọ i re koko uzi hi+ gbe otu ọwọsuọ, enọ e riẹ Ọghẹnẹ hẹ gbe erahaizi, enọ i re ru ẹme rai gba ha* gbe enọ i re rri eware nọ e rrọ ọrẹri vo, enọ i re kpe esẹ rai no gbe enọ i re kpe ini rai no, enọ i re kpe ahwo, 10 enọ i bi gbe-ọfariẹ,* ezae nọ i re lele ezae wezẹ,* enọ i re mu ahwo rehọ, eterue, enọ i re koko eyaa ha,* gbe eware efa kpobi nọ e wọso omamọ uwuhrẹ* na,+ 11 wọhọ epaọ usi uwoma orọ Ọghẹnẹ evawere na, onọ a mu họ omẹ obọ.+

12 Me bi yere Kristi Jesu Olori mai, ọnọ ọ kẹ omẹ ogaga, keme o rri omẹ nọ me wo ẹrọwọ, ọ tẹ kẹ omẹ iruo odibọgba,+ 13 dede nọ evaọ oke ọsosuọ mẹ jọ ọnọ ọ jẹ ta eme-aghọ, ọnọ o je kpokpo ilele riẹ, jẹ ta eme ẹsọ kẹ ae.+ Rekọ Ọghẹnẹ ọ re ohrọ mẹ, keme ogbori gbe ababọ ẹrọwọ me je ro ru eware nana. 14 Rekọ uwowou ulogbo nọ Olori mai o dhesẹ kẹ omẹ o rro wo umuo ho, te ẹrọwọ gbe uyoyou fiki usu mẹ kugbe Kristi Jesu. 15 Ẹme nana yọ ẹme nọ a re fievahọ jẹ rọ udu kpobi jẹrehọ, inọ: Kristi Jesu ọ ziọ akpọ na ti siwi erahaizi.+ Evaọ usu enana mẹ họ ọnọ ọ mai yoma.+ 16 Rekọ, a re ohrọ mẹ re Kristi Jesu ọ rọ ẹkwoma mẹ nọ ọ mai yoma na dhesẹ odiri riẹ kpobi via, ọ rọ omẹ dhesẹ oriruo kẹ enọ i ti fi ẹrọwọ rai họ iẹe re a wo uzuazọ ebẹdẹ bẹdẹ.+

17 Whaọ, jọ Ovie ebẹdẹ bẹdẹ na,+ ọnọ o wo ugboma nọ u re gbo ho,+ ọnọ a rẹ ruẹ hẹ,+ Ọghẹnẹ ọvo na,+ o wo ọghọ gbe oruaro bẹdẹ bẹdẹ. Ami.

18 Mẹ be kẹ owhẹ ohrẹ* nana, Timoti ọmọ mẹ, rọwokugbe eruẹaruẹ nọ a ruẹ kpahe owhẹ, inọ whọ te sae rọ ẹkwoma eware nana ruabọhọ fi emamọ ẹmo na,+ 19 kru ẹrọwọ je wo emamọ obruoziẹ-iroro,+ enọ otujọ a gbabọkẹ no, u te ru nọ ẹrọwọ rai o ro vru no wọhọ okọ nọ u zue. 20 Himẹnayọs+ avọ Alẹkzanda a rrọ usu ahwo nana, yọ me siobọno ae kẹ Setan no+ re a rọ ẹkwoma ọwhọkuo wuhrẹ inọ u fo ho re a ta eme-aghọ.

2 Fikiere, orọ ọsosuọ kpobi, mẹ be tuduhọ owhai awọ nọ wha hae lẹ roro oghẹrẹ ahwo kpobi, wha hai ru ere avọ olẹ ayare-ọgaga, elẹ, elẹ nọ a rẹ lẹ roro amọfa gbe uyere-okẹ. 2 Wha hae lẹ roro ivie gbe ahwo kpobi nọ a rrọ ekwa ikpehru,*+ re ma sai gbe yeri uzuazọ udhedhẹ avọ omarọkẹ Ọghẹnẹ gbe osegboja nọ o no udu kpobi ze.+ 3 Onana họ onọ u kiehọ gbe onọ u wo ọjẹrehọ evaọ aro Osiwi mai, Ọghẹnẹ,+ 4 ọnọ o rrọ oreva riẹ inọ oghẹrẹ ahwo kpobi a wo esiwo+ je wo eriariẹ egbagba uzẹme na. 5 Keme Ọghẹnẹ ọvo ọ rrọ,+ yọ obruthe ọvo+ ọ rrọ udevie Ọghẹnẹ avọ ahwo-akpọ,+ Kristi Jesu, ọzae+ 6 nọ ọ rọ uzuazọ riẹ hwa osa ẹtanigbo nọ o rrọ ẹrẹrẹe rọkẹ ahwo kpobi*+—onana họ oware nọ a re se isẹri kpahe evaọ ẹruoke riẹ. 7 Fiki isẹri-ise nana+ a rọ rehọ omẹ mu ọtausiuwoma gbe ukọ,+ ọnọ o re wuhrẹ ahwo erẹwho na+ kpahe ẹrọwọ gbe uzẹme na, uzẹme mẹ be ta na, mẹ be ta ọrue he.

8 Fikiere mẹ gwọlọ nọ evaọ oria kpobi ezae na a rẹ lẹ, kpare abọ ọrẹri kpehru,+ ababọ evedha+ gbe ikẹ-isio.+ 9 Ere ọvona re, jọ eyae na a gọ ẹgọ nọ o kiehọ,* nọ ọ rrọ owowa je dhesẹ nọ a wo iroro nọ e gba,* orọnikọ orọ igbeto-ime gbe igoru hayo izuu hayo iwu nọ e ghare gaga ha,+ 10 rekọ evaọ oghẹrẹ nọ u fo eyae nọ e ta nọ a be gọ Ọghẹnẹ,+ koyehọ ẹkwoma iruo iwoma.

11 Nọ a te bi wuhrẹ aye, jọ ọ fọ tou* avọ omaurokpotọ.+ 12 Mẹ kẹ aye uvẹ hẹ re o wuhrẹ hayo re o su ọzae, rekọ ọ rẹ fọ tou.*+ 13 Keme Adamu a kake ma, kẹsena a tẹ ma Ivi.+ 14 U te no ere no, a viẹ Adamu họ họ, rekọ a viẹ aye na họ totọ+ o te zihe ruọ ọrahauzi. 15 O make rrọ ere na, a te thọ aye ẹkwoma emọ-iyẹ,+ thakpinọ ọ* ruabọhọ ẹrọwọ gbe uyoyou gbe uzuazọ ọrẹri avọ iroro nọ e gba.*+

3 Ẹme nana yọ ẹme nọ a re fievahọ: Otẹrọnọ ọzae jọ ọ be daoma re o te ohwo nọ ọ rẹ jọ ọsẹro,+ emamọ iruo ọ be gwọlọ na. 2 Fikiere ọsẹro ọ rẹ kare afuẹwẹ, ọzae nọ o wo aye ọvo, uruemu riẹ o rẹ jọ owowa, o re wo iroro nọ e gba,*+ jọ kpatiẹ, dede erara rehọ,+ ọ rẹ jọ ọnọ ọ rẹ sai wuhrẹ ahwo,+ 3 ọ rẹ jọ ọgba-udi hi,+ ọ rẹ jọ ohwo ozighi hi,* rekọ ohwo nọ o wo iroro,*+ ohwo nọ ẹwhọ ọ rẹ were he,+ ohwo nọ o you ugho ho,+ 4 ọzae nọ ọ be sẹro* uviuwou riẹ ziezi, nọ emọ riẹ e be romakpotọ avọ osegboja kpobi+ 5 (keme otẹrọnọ ọzae ọ riẹ epanọ ọ rẹ rọ sẹro* uviuwou riẹ hẹ, ẹvẹ ọ sae rọ rẹrote ukoko Ọghẹnẹ?), 6 ọ rẹ jọ ohwo nọ o kurẹriẹ obọ họ,+ keme ẹsejọhọ ọ sai fu uke avọ omorro o ve ti kie ruọ oghẹrẹ obrukpe nọ o te Ẹdhọ. 7 Ofariẹ, ọ rẹ jẹ jọ ohwo nọ ahwo obọ otafe a be ta emamọ ẹme kpahe,*+ re a gbẹ poviẹ ẹe he* yọ o gbe je kie ruọ agbefẹ Ẹdhọ họ.

8 Epọvo na re, idibo iruiruo a rẹ jọ ahwo nọ a wo osegboja, a rẹ jọ ahwo eme-ivẹ hẹ,* a rẹ jọ enọ e rẹ da udi buobu hu, a re wo uvou-uthethei kẹ erere nọ a rẹ rọ ewhariọ wo ho,+ 9 a rẹ jọ enọ e be rọ obruoziẹ-iroro ọfuafo yọrọ ẹrọwọ na, onọ o rrọ oware udidi ọrẹri.+

10 Ofariẹ, jọ a kake dawo ae sọ a te;* kẹsena a vẹ jọ egbodibo, nọ a tẹ kare afuẹwẹ.+

11 Epọvo na re, eyae e rẹ jọ ahwo nọ a wo osegboja, a rẹ jọ enọ e rẹ ta ahwo raha ha,+ uruemu rai o rẹ jọ owowa, a re dhesẹ ẹrọwọ* evaọ eware kpobi.+

12 Idibo iruiruo e rẹ jọ ezae nọ i wo aye ọvo, nọ e be sẹro emọ rai gbe uviuwou rai ziezi. 13 Keme ezae nọ e be gbodibo evaọ emamọ edhere a bi wo emamọ edikihẹ jẹ be sae ta ẹme ududu ziezi kpahe ẹrọwọ na evaọ Kristi Jesu.

14 Me bi kere eware nana se owhẹ dede nọ me bi rẹro nọ mẹ te nyabru owhai ze kẹle na, 15 rekọ otẹrọnọ mẹ kake nyaze he, whọ vẹ riẹ epanọ u fo nọ who re yeri evaọ uviuwou Ọghẹnẹ,+ onọ o rrọ ukoko Ọghẹnẹ nọ ọ rrọ uzuazọ na, upila gbe ẹthẹẹ uzẹme na. 16 Evaọ uzẹme, oware udidi ọrẹri orọ omarọkẹ Ọghẹnẹ nana yọ okpoware: ‘Ọ romavia evaọ oma uwo,+ a kuenu kẹe inọ o kiẹrẹe evaọ oma ẹzi,+ ọ romavia kẹ ikọ-odhiwu,+ a whowho usi riẹ evaọ erẹwho na,+ a fi ẹrọwọ họ iẹe evaọ akpọ na,+ a rehọ e riẹ vrẹ kpohọ ehru avọ oruaro.’

4 Rekọ, ẹme nọ o no obọ Ọghẹnẹ ze o ta* vevẹ nọ evaọ obaro, otujọ a ti kie no ẹrọwọ na, gaviezọ kẹ eme eviẹhọ nọ a ta nọ i no obọ Ọghẹnẹ ze*+ gbe iwuhrẹ idhivẹri, 2 ẹkwoma eviẹhọ ahwo nọ a be ta erue,+ enọ obruoziẹ-iroro rai o whu-ikpi no wọhọ ohọroma nọ a rọ ayọno ọrrorro mahe. 3 A be ghọ orọo+ je jie uzi kẹ ahwo inọ a siọ oghẹrẹ emu jọ ba ẹre,+ emu nọ Ọghẹnẹ ọ ma inọ enọ i wo ẹrọwọ+ jẹ riẹ uzẹme na gbagba a rẹ re+ avọ uyere-okẹ. 4 Keme emama Ọghẹnẹ kpobi i woma,+ a rẹ ghọ oware ovo ho+ thakpinọ a be re iẹe avọ uyere-okẹ, 5 keme ẹme Ọghẹnẹ gbe olẹ nọ a lẹ fihọ iẹe u ru rie fo no.

6 Whọ tẹ be kẹ inievo na ohrẹ nana, whọ te jọ emamọ ọgbodibo Kristi Jesu, ọnọ a rọ eme ẹrọwọ na gbe erọ emamọ uwuhrẹ nọ who bi lele kpekpekpe na rọ ko.+ 7 Siọ iku erue nọ e rẹ wha ọghọ se Ọghẹnẹ hẹ,+ itienọ ekpọkueyae e rẹ ta. Ukpoye, wuhrẹ omara avọ utee orọ omarọkẹ Ọghẹnẹ. 8 Keme oma na nọ a re ru jaja* o rẹ kẹ umutho erere, rekọ omarọkẹ Ọghẹnẹ o rẹ kẹ erere evaọ eware kpobi, keme u wo eyaa orọ uzuazọ enẹna gbe uzuazọ nọ o be tha.+ 9 Ẹme yena yọ ẹme nọ a re fievahọ jẹ rọ udu kpobi jẹrehọ. 10 Oyejabọ nọ ma bi ro ru iruo gaga jẹ be daoma kpobi,+ keme ma fi ẹruore mai họ Ọghẹnẹ nọ ọ rrọ uzuazọ, ọnọ ọ rrọ Osiwi+ oghẹrẹ ahwo kpobi,+ maero kọ enọ i wo ẹrọwọ.

11 Hae kẹ ijaje nana jẹ hae rehọ ai wuhrẹ ahwo. 12 Who ru re ohwo ọvo o rri owhẹ vo ho fikinọ whọ rrọ ọmaha. Ukpoye, jọ oriruo kẹ enọ i wo ẹrọwọ na evaọ ẹmeọta, evaọ uruemu, evaọ uyoyou, evaọ ẹrọwọ, evaọ uruemu ofuafo.* 13 Bẹsenọ mẹ rẹ nyaze, gbẹ hae romakẹ isase ẹgbede,+ hae kẹ uduotahawọ* je wuhrẹ ahwo. 14 Who gbabọkẹ okẹ nọ who wo na ha onọ a kẹ owhẹ ẹkwoma eruẹaruẹ okenọ ugboma ekpako na a rọ abọ rai kpahe owhẹ.+ 15 Romatotọ roro* kpahe eware nana; rọ oma kpobi kẹ ae, re ahwo kpobi a sae ruẹ ẹnyaharo ra vevẹ. 16 Hai muẹrohọ omara gbe ewuhrẹ ra kẹse kẹse.+ Ruabọhọ eware nana, keme enẹ oruo who ti ro siwi omara gbe enọ e gaviezọ kẹ owhẹ.+

5 Who doku ọzae nọ ọ kpako no ho.+ Ukpoye, ta ẹme kẹe wọhọ ọsẹ, ta ẹme kẹ ezae nọ e gbẹ maha wọhọ inievo-emezae, 2 eyae nọ e kpako no wọhọ ini, ivovo-eyae wọhọ inievo-emetẹ, avọ uruemu ofuafo* evaọ kabọ kabọ.

3 Wo ororokẹ* rọkẹ eyae-uku nọ e ginẹ rrọ eyae-uku.*+ 4 Rekọ otẹrọnọ aye-uku jọ o wo emọ hayo emọ-iruọmọ, jọ enana a kaki dhesẹ omarọkẹ Ọghẹnẹ evaọ uviuwou rai,+ jọ a hae hwa zihe kẹ esẹgbini avọ esẹ-ode gbe ini-ode rai wọhọ epanọ u fo nọ a re ru kẹ ae,+ keme onana o rẹ were Ọghẹnẹ.+ 5 Aye nọ ọ ginẹ rrọ aye-uku nọ akpọ ọ be bẹ nọ o wo ohwo ho o fi ẹruore riẹ họ Ọghẹnẹ,+ yọ ọ rẹ ruabọhọ olẹ ayare-ọgaga gbe olẹ te aso te uvo.+ 6 Rekọ ọnọ ọ be romakẹ omaweromẹ ugboma na o whu no dede nọ ọ rrọ uzuazọ. 7 Fikiere hae kẹ ehrẹ* nana, re a ruẹse kare afuẹwẹ. 8 Evaọ uzẹme, otẹrọnọ ohwo jọ ọ be rẹrote ahwo riẹ hẹ, maero kọ enọ e rrọ ahwo uviuwou riẹ, ọ vro ẹrọwọ na no je yoma vi ohwo nọ o wo ẹrọwọ họ.+

9 A re kere odẹ aye-uku kugbe edẹ ahwo nọ a bi fiobọhọ kẹ otẹrọnọ ọ maha vrẹ ikpe udhosa ha, yọ ọ jọ aye nọ o wo ọzae ọvo, 10 ọnọ ahwo a riẹ nọ o ru iruo iwoma,+ otẹrọnọ ọ yọrọ emọ riẹ ziezi,+ otẹrọnọ o dede erara rehọ,+ otẹrọnọ ọ wozẹ awọ erẹri na,+ otẹrọnọ o fiobọhọ kẹ enọ e be reoja,+ otẹrọnọ ọ romakẹ iruo iwoma kpobi.

11 Evaọ abọdekọ riẹ, a re kere odẹ eyae-uku nọ e rrọ uvovo-eyae fihọ iẹe he, keme nọ isiuru owezẹ ọzae-avọ-aye o tẹ be wha ẹbẹbẹ fihọ usu rai kugbe Kristi, a rẹ gwọlọ rọo. 12 A ti wo obrukpe keme a gbabọkẹ ẹrọwọ ọsosuọ nọ a dhesẹ via no.* 13 Evaọ oke ovona, a rẹ gwọlọ ru iruo ho, a re no uwou jọ ruọ ofa; ẹhẹ, orọnikọ a bi ru iruo ho ọvo ho, rekọ a rrọ iguiguẹgu re gbe enọ i re dhomahọ eme amọfa,+ ta kpahe eware nọ i fo nọ a rẹ ta ha. 14 Fikiere mẹ gwọlọ nọ eyae-uku nọ e rrọ uvovo-eyae a rọo,+ yẹ emọ,+ rẹrote uviuwou, re otu ọwọsuọ a gbẹ ruẹ oware ovo nọ a rẹ rọ ta eme iyoma ha. 15 Evaọ uzẹme, ejọ i no edhere na no bi lele Setan. 16 Otẹrọnọ aye nọ ọ rrọ Oleleikristi o wo imoni nọ e rrọ eyae-uku, jọ o fiobọhọ kẹ ae, re owha na o gbẹ jọ ukoko na uzou hu. Ukoko na o vẹ sai fiobọhọ kẹ eyae-uku nọ e ginẹ rrọ eyae-uku.*+

17 Jọ a rri ekpako nọ i bi ru iruo ẹruọsa rai ziezi+ wọhọ enọ i te ahwo nọ a rẹ kẹ ọghọ akuava,+ maero kọ enọ i bi ru iruo gaga evaọ ẹmeọta gbe amọfa owuhrẹ.+ 18 Keme ikereakere na e ta nọ, “Whọ rẹ gba unu eruẹ vievie he nọ o te bi si ibi no igbe ekakọ,”+ e tẹ jẹ ta nọ, “Oruiruo o te ọnọ a rẹ hwosa iruo riẹ kẹ.”+ 19 Whọ nwane rọwo ho nọ a tẹ ta nọ ọkpako o ru oware uyoma jọ, ajokpanọ who wo imuẹro erọ isisẹri ivẹ hayo esa.+ 20 Jọ iraro ahwo kpobi whọku+ ahwo nọ a be raha uzi,+ re o jọ unuovẹvẹ kẹ enọ i kiọkọ.* 21 Mẹ be jọ aro Ọghẹnẹ gbe Kristi Jesu gbe ikọ-odhiwu nọ a salọ na ta kẹ owhẹ nọ who ru lele ehrẹ nana ababọ omagbẹre hayo ọriẹwẹ.+

22 Whọ rehọ okpakpa rọ abọ kpahe ohwo ọvo ho;*+ hayo wobọ evaọ izieraha amọfa ha; yọrọ uruemu ofuafo.

23 Whọ gbẹ da ame ofa ha,* rekọ da umutho udi fiki eva ra na gbe ẹyao nọ who bi dhe ẹmẹmọ na.

24 Izieraha ahwo jọ e rẹ bẹre oma via kẹ ahwo kpobi, onọ o rẹ wha obrukpe se ae ovavo, rekọ erọ amọfa e rẹ bẹre oma via evaọ obaro.+ 25 Ere ọvona re, iruo iwoma i re dhesẹ oma via kẹ ahwo kpobi,+ yọ enọ e rrọ ere he e sai dhere ribri hi.+

6 Jọ enọ e rrọ erigbo* a gbẹ hae kẹ ilori rai ọghọ odidi,+ re ahwo a gbẹ ta eme iyoma kpahe odẹ Ọghẹnẹ gbe iwuhrẹ riẹ hẹ.+ 2 Ofariẹ, jọ enọ ilori rai e rrọ Ileleikristi* a rri rai vo ho fikinọ a rrọ inievo. Ukpoye, jọ a tubẹ gbodibo viere, keme enọ i bi wo erere no emamọ iruo rai ze yọ ibe Ileleikristi* nọ e rrọ inievo iyoyou rai.

Gbẹ hai wuhrẹ ahwo eware nana jẹ hae kẹ ehrẹ nana. 3 Otẹrọnọ ohwo jọ o bi wuhrẹ uwuhrẹ ofa jọ yọ ọ rọwokugbe omamọ uwuhrẹ*+ na ha, onọ u no obọ Olori mai Jesu Kristi ze gbe onọ u dhesẹ oware nọ omarọkẹ Ọghẹnẹ o rrọ,+ 4 ohwo yena o bi fu uke avọ omorro yọ o wo otoriẹ oware ovo ho.+ Avro-ọvro gbe ikẹ-isio kpahe eme e da riẹ oma fia.*+ Eware nọ i re no enana ze họ ihri-eriọ, ohọre, ọtaraha,* iviẹro iyoma, 5 ẹwhọ kẹse kẹse fiki eme nọ i te oware ovo ho, onọ ezae nọ iroro rai i gbeku no+ nọ a gbe wo otoriẹ uzẹme na ha a rẹ wha ze, bi roro nọ omarọkẹ Ọghẹnẹ yọ oware nọ ohwo ọ rẹ rọ wha erere se omobọ riẹ.+ 6 Ababọ avro, erere ologbo ọ rrọ omarọkẹ Ọghẹnẹ+ nọ ohwo o te wo edẹro.* 7 Keme ma wha oware ovo ziọ akpọ na ha, yọ ma sae wha oware ovo noi gbe he.+ 8 Fikiere, ma te wo emuore* gbe iwu,* eware nana e rẹ da omai ẹro.+

9 Rekọ ahwo nọ a gba riẹ mu nọ a re fe a re kie ruọ odawọ gbe agbefẹ+ gbe isiuru igheghẹ gbe erọ enwoma buobu nọ i re su ahwo kpohọ ọraha gbe uwhu.+ 10 Keme uyoyou ugho yọ ehri oghẹrẹ eware iyoma kpobi, yọ fiki uyoyou nana nọ a bi kie lele, otujọ a reghe no ẹrọwọ na no jẹ rọ eware edada buobu duwu omarai soso no.+

11 Rekọ, whẹ ohwo Ọghẹnẹ, dhẹ siọ eware nana ba. Ukpoye, le ẹrẹreokie, omarọkẹ Ọghẹnẹ, ẹrọwọ, uyoyou, ithihakọ, gbe ẹwolẹ.+ 12 Họre emamọ ohọre ẹrọwọ na; dadabọ mu uzuazọ ebẹdẹ bẹdẹ nọ a rọ fiki riẹ se owhẹ na gaga, onọ whọ jọ ẹgbede whowho via evaọ iraro isisẹri buobu.

13 Evaọ aro Ọghẹnẹ ọnọ ọ be sẹro eware kpobi nọ e rrọ uzuazọ, gbe Kristi Jesu ọnọ ọ jọ ẹgbede se emamọ isẹri kẹ Pọntiọs Pailet,+ mẹ be ta kẹ owhẹ nọ, 14 koko ijaje na evaọ edhere nọ ọ kare epe jẹ kare afuẹwẹ ri bọo oke nọ Olori mai Jesu Kristi o ti dhesẹ oma via.+ 15 Nọ oke nọ a fihọ na u te te, Osu ọvo nọ o wo ogaga ulogbo je wo evawere na o ti dhesẹ oma via. Ọye họ Ovie enọ e rrọ ivie gbe Olori enọ e rrọ ilori,+ 16 ọye ọvo họ ọnọ o re whu hu,+ ọnọ ọ rrọ oria elo nọ a rẹ sai te vievie he,+ ọnọ ohwo ọvo ọ re ruẹ hẹ hayo sae ruẹ hẹ.+ Jọ o wo ọghọ gbe ogaga bẹdẹ bẹdẹ. Ami.

17 Ta kẹ* enọ i fe evaọ uyero-akpọ* nana inọ a wọ oma kpehru hu,* gbe nọ a du rọ ẹruore rai kpahe efe nọ o muẹro ho ho,+ rekọ a rọ ẹruore rai kpahe Ọghẹnẹ, ọnọ ọ be kẹ omai eware kpobi dafia nọ ma be reawere rai.+ 18 Ta kẹ ae nọ a hai ru ewoma, a fe evaọ iruo iwoma, a hai ru ọghọ,* siobọno kẹ amọfa,+ 19 a vẹ rọ ere bi koko efe nọ oware ovo u re ru hu họ kẹ omarai, onọ o rrọ emamọ otọhotọ kẹ obaro na,+ re a sae dadabọ mu uvi uzuazọ na.+

20 Timoti, sẹro oware nọ a mu họ owhẹ obọ na ziezi,+ kẹnoma kẹ eme ifofe nọ e wọso eware nọ e rrọ ọrẹri gbe eware nọ e wọso uzẹme na nọ a bi se ugbese nọ “eriariẹ.”+ 21 Otujọ a kie no ẹrọwọ na no fiki eriariẹ itieye na nọ a bi ro dhesẹ oma.

Jọ Ọghẹnẹ o dhesẹ uwowou ulogbo riẹ kẹ owhai.