ILETA AVỌ IVẸ RO SE TIMOTI

1 Pọl, ọnọ ọ rrọ ukọ Kristi Jesu fiki oreva Ọghẹnẹ, wọhọ epaọ eyaa uzuazọ na onọ a re wo ẹkwoma Kristi Jesu,+ 2 ro se Timoti, ọmọ oyoyou mẹ:+

Jọ Ọghẹnẹ Ọsẹ na gbe Olori mai Kristi Jesu a dhesẹ uwowou ulogbo gbe ohrọ-oriọ kẹ owhẹ jẹ kẹ owhẹ udhedhẹ.

3 Me bi yere Ọghẹnẹ, ọnọ mẹ be gọ* wọhọ epanọ esẹ-esẹ mẹ a ru, yọ mẹ be gọ avọ obruoziẹ-iroro ọfuafo, be kareghẹhọ owhẹ ẹsikpobi evaọ elẹ ayare-ọgaga mẹ te aso te uvo. 4 Nọ mẹ be kareghẹhọ irui-oviẹ ra, u bi si omẹ urru re mẹ ruẹ owhẹ, re oghọghọ o vọ omẹ eva. 5 Keme mẹ be kareghẹhọ ẹrọwọ ra nọ ọ kare eviẹhọ,+ onọ o kaki dhesẹ oma via evaọ oma Lọis oni-ode ra gbe Yunisi oni ra, onọ u mu omẹ ẹro nọ who wo re.

6 Fiki onana mẹ be kareghẹhọ owhẹ nọ hae rehọ okẹ Ọghẹnẹ nọ who wo na ruiruo avọ ajọwha wọhọ ẹsenọ who bi fou erae, okẹ nọ u te owhẹ obọ okenọ mẹ rọ abọ kpahe owhẹ.+ 7 Keme orọnikọ ẹzi ozodhẹ oye Ọghẹnẹ ọ kẹ omai hi,+ rekọ ọrọ ogaga+ gbe uyoyou gbe iroro nọ e gba. 8 Fikiere whọ jọ oma isẹri-ise kpahe Olori mai o vuọ owhẹ hẹ,+ hayo jọ oma o vuọ owhẹ fiki mẹ hẹ, ọnọ ọ rrọ uwou-odi fiki riẹ, rekọ ruẹrẹ oma kpahe inọ whọ rẹ ruẹ uye+ fiki usi uwoma na ẹkwoma ogaga Ọghẹnẹ nọ whọ rẹ rẹroso.+ 9 O siwi omai je se omai re ma jọ erẹri,+ orọnọ fiki iruo mai hi, rekọ fiki ẹjiroro riẹ gbe uwowou ulogbo riẹ.+ Ẹkwoma Kristi Jesu a rọ kẹ omai onana ugbanwẹdẹ, 10 rekọ enẹna a ru rie vẹ ziezi no ẹkwoma omarọvia Osiwi mai, Kristi Jesu,+ ọnọ o si uwhu no otọ+ je dhesẹ epanọ a re ro wo uzuazọ+ gbe ugboma nọ u re gbo ho+ ẹkwoma usi uwoma na,+ 11 onọ a rọ fiki riẹ rehọ omẹ mu ọtausiuwoma gbe ukọ gbe owuhrẹ.+

12 Fiki onana mẹ be rọ ruẹ uye eware nana re,+ rekọ oma o be vuọ omẹ hẹ.+ Keme mẹ riẹ Ọnọ me fievahọ, yọ u mu omẹ ẹro nọ ọ sae sẹro oware nọ me mu họ iẹe obọ ri bọo ẹdẹ yena.+ 13 Gbẹ nya lele oriruo* emamọ eme*+ nọ who yo mi omẹ gbe ẹrọwọ avọ uyoyou nọ who wo fiki usu ra kugbe Kristi Jesu. 14 Rehọ ẹkwoma obufihọ ẹzi ọfuafo nọ ọ rrọ omai oma na sẹro emamọ oware nana nọ a mu họ owhẹ obọ na.+

15 Whọ riẹ nọ ezae kpobi nọ e rrọ ubrotọ Esia+ a nyasiọ omẹ ba no, te Fajẹlọs gbe Hẹmojẹnis. 16 Jọ Olori na ọ re ohrọ ahwo uwou Ọnẹsiforọs,+ keme ọ jẹ sasa omẹ oma ẹsikpobi, yọ oma o vo riẹ hẹ fikinọ mẹ rrọ uwou-odi. 17 Ukpoye, okenọ ọ ziọ Rom, ọ romatotọ gwọlọ omẹ bẹsenọ ọ rọ ruẹ omẹ. 18 Jọ Olori na o ru re Jihova* ọ re ohrọ riẹ evaọ ẹdẹ yena. Yọ whọ riẹ kpahe iruo kpobi nọ o ru evaọ obọ Ẹfisọs.

2 Fikiere, whẹ ọmọ mẹ,+ gbẹ hai wo ogaga evaọ uwowou ulogbo nọ o rrọ Kristi Jesu; 2 yọ kpahe eware nọ who yo mi omẹ, enọ ahwo buobu a se isẹri kpahe na,+ mu eware nana họ ezae nọ i wo ẹrọwọ obọ, re ae omarai a sai te ziezi, te epanọ a re ro wuhrẹ amọfa. 3 Wọhọ emamọ osoja+ Kristi Jesu, ruẹrẹ oma kpahe nọ whọ rẹ ruẹ uye.+ 4 Ohwo nọ ọ rrọ osoja o re dhomahọ ekiọthuọ akpọ* họ,* re ọ ruẹsi wo ọjẹrehọ ọnọ o fi odẹ riẹ hotọ re ọ jọ osoja. 5 Makọ evaọ arozaha oma-uhrowo, a re du ku etu-ọghọ họ ohwo nọ ọ jariẹ wobọ họ ajokpanọ o ru lele izi na.+ 6 Ọwhẹrẹ nọ o ru iruo gaga họ ohwo ọsosuọ nọ ọ rẹ re ibi ekakọ na. 7 Hai roro kpahe eware nọ mẹ be ta na kẹse kẹse; Olori na ọ te kẹ owhẹ otoriẹ* evaọ eware kpobi.

8 Kareghẹhọ nọ a kpare Jesu Kristi no uwhu ze+ gbe nọ ọmọ Devidi* ọ rrọ,+ wọhọ epaọ usi uwoma nọ mẹ be ta na,+ 9 onọ mẹ be rọ fiki riẹ ruẹ uye jẹ rrọ uwou-odi wọhọ ogbulegbu na.+ Rekọ ẹme Ọghẹnẹ ọ rrọ uwou-odi hi.+ 10 Onana o wha riẹ ze nọ me bi ro thihakọ eware kpobi fiki enọ a salọ na,+ re ae omarai a sai wo esiwo nọ o ti te ai obọ ẹkwoma Kristi Jesu avọ oruaro ebẹdẹ bẹdẹ. 11 Ẹme nana yọ ẹme nọ a re fievahọ: Evaọ uzẹme, otẹrọnọ ma lele i rie whu, ma ti lele iei rria re;+ 12 ma tẹ ruabọhọ bi thihakọ, ma te jọ ivie nọ i ti lele iei su re;+ ma tẹ vro riẹ, ọ te vro omai re;+ 13 ma gbẹ maki ru ẹme mai gba ha, o re ru ẹme riẹ gba,* keme ọ sae vro omariẹ hẹ.

14 Hae kareghẹhọ ae eware nana, ta kẹ ae* evaọ aro Ọghẹnẹ inọ a du si ikẹ fiki eme he, onọ o rẹ kẹ erere ọvo ho keme o rẹ wha enwoma* se enọ e be gaviezọ. 15 Dawo ẹgba ra kpobi re whọ jọ ọnọ Ọghẹnẹ ọ rẹ jẹrehọ, oruiruo nọ o wo oware ovo nọ o rẹ lẹliẹ oma vuọ ẹe he, nọ o re wuhrẹ jẹ fa otọ ẹme uzẹme na gbagba.+ 16 Rekọ siọ eme ifofe nọ e wọso oware nọ o rrọ ọrẹri,+ keme i re su kpohọ emuemu buobu, 17 yọ ẹme rai ọ rẹ vaha wọhọ ola uyoma. Himẹnayọs gbe Falitọs a rrọ usu rai.+ 18 Ezae nana a nyasiọ uzẹme na ba no, be ta nọ ẹkparomatha na ọ romavia no,+ yọ a be raha ẹrọwọ otujọ no. 19 Ghele na, otọhotọ ọgaga Ọghẹnẹ u gbe dikihẹ, yọ u wo oka nana, “Jihova* ọ riẹ enọ e rrọ eriẹ,”+ gbe nọ, “Jọ ohwo kpobi nọ o bi se odẹ Jihova*+ o siobọno emuemu.”

20 Whaọ evaọ uwou ulogbo ekwakwa sa-sa e rẹ jariẹ, orọnikọ erọ igoru gbe isiliva ọvo ho rekọ te erọ ure gbe ọviẹ, yọ ejọ e rrọ kẹ iruo nọ i wo ọghọ rekọ efa rọkẹ iruo nọ e kare ọghọ. 21 Fikiere nọ ohwo ọ tẹ be kẹnoma kẹ enọ e kare ọghọ na, ọ te jọ okwakwa nọ o rrọ kẹ iruo nọ i wo ọghọ, nọ a ru fo no, nọ u wo iruo kẹ ọnọ o wo rie, nọ a ruẹrẹhọ kẹ iruo iwoma kpobi. 22 Fikiere dhẹ siọ isiuru uzoge ba, rekọ le ẹrẹreokie, ẹrọwọ, uyoyou, udhedhẹ, kugbe enọ e be rọ udu ofuafo se Olori na.

23 Ofariẹ, whaha avro-ọvro ogheghẹ nọ o wo otọ họ,+ keme e rẹ wha ohọre ze. 24 Keme o gwọlọ nọ odibo Olori na ọ rẹ họre he, rekọ ọ rẹ jọ wolẹ kugbe ahwo kpobi,*+ ọ rẹ jọ ọnọ ọ rẹ sai wuhrẹ ahwo, nyẹ oma riẹ nọ a te ru ei thọ,+ 25 ọ rẹ rọ ẹwolẹ wuhrẹ enọ e be rọwo iwuhrẹ na ha.+ Ẹsejọhọ Ọghẹnẹ o ti ru ai kurẹriẹ,* a ve wo eriariẹ egbagba uzẹme na,+ 26 a ve ti rri otọ mu jẹ dhẹ vabọ no agbefẹ Ẹdhọ, keme a vuhumu no nọ o mu rai ọkpokpọ re a ru oreva riẹ.+

3 Rekọ riẹ onana inọ evaọ edẹ urere na,+ oke obẹbẹ nọ o rẹ bẹ ẹria o te jọ. 2 Keme ahwo a ti you omobọ rai, you ugho, seha, wo omorro, ta eme-aghọ, ghẹmeeyo kẹ esẹgbini, kare uyere-ọghọ, a ti ru ẹme rai gba ha, 3 a ti wo uyoyou kẹ ibe ahwo-akpọ rai hi, a te rọwo ru ọtamuo ho, a te ta ahwo raha, a ti wo oma-onyẹ hẹ, a ti mu ofu-ọkpoo, a ti you oware uwoma ha, 4 a ti vivie ahwo, veghe uzou, fu uke avọ omorro, a ti you omaweromẹ viukpenọ a re you Ọghẹnẹ, 5 a ti ru wọhọ ẹsenọ a be gọ Ọghẹnẹ rekọ a be rọ uruemu rai dhesẹ nọ a siọ ogaga riẹ;+ kẹnoma kẹ ahwo otiọye na. 6 Udevie ahwo nana ezae nọ e rẹ rọ ẹghẹ ruọ iwou ahwo a re no ze, a vẹ rọ unu awere liẹliẹ eyae nọ e ga ha nọ izieraha e vọ oma, nọ isiuru sa-sa e be kpọ, 7 a bi wuhrẹ ẹsikpobi rekọ a be sai wo eriariẹ egbagba uzẹme na ha.

8 Whaọ wọhọ epanọ Janis avọ Jambris a wọso Mosis na, ere ọvona ezae nana a be wọso uzẹme na. Iroro ezae itieye na i gbeku no riẹriẹriẹ, Ọghẹnẹ ọ se rai no keme a bi yeri uzuazọ nọ o rọwokugbe ẹrọwọ na ha. 9 Rekọ a ti wo ẹnyaharo viere he, keme ugheghẹ rai u ti dhesẹ oma via vevẹ kẹ ahwo kpobi, wọhọ epanọ o via kẹ ezae ivẹ yena.+ 10 Rekọ who bi lele uwuhrẹ mẹ kpekpekpe, te edhere uzuazọ mẹ,+ utee mẹ, ẹrọwọ mẹ, odiri mẹ, uyoyou mẹ, ithihakọ mẹ, 11 yọ whọ riẹ ikpokpoma gbe iye nọ i te omẹ evaọ Antiọk,+ Aikoniọm,+ gbe Listra.+ Me thihakọ ikpokpoma nana yọ Olori na o siwi omẹ no aikpobi.+ 12 Evaọ uzẹme, ahwo kpobi nọ a gwọlọ yeri uzuazọ omarọkẹ Ọghẹnẹ evaọ usu kugbe Kristi Jesu a ti kpokpo ai re.+ 13 Rekọ ahwo omuomu gbe eviẹahwohọ a ti no onọ u yoma ruọ onọ o mai yoma, su ahwo thọ yọ a bi su ai thọ re.+

14 Rekọ whẹ, ruabọhọ eware nọ who wuhrẹ nọ a fiobọhọ kẹ owhẹ vuhumu nọ whọ rọwo na,+ keme whọ riẹ obọ ahwo nọ who jo wuhrẹ ai 15 gbe nọ, no oke ọmọfofa ze+ whọ rọ riẹ ikereakere efuafo na,+ enọ e rẹ sai ru owhẹ wo areghẹ nọ o rẹ wha esiwo ze ẹkwoma ẹrọwọ nọ a re fihọ Kristi Jesu.+ 16 Ẹkwoma ẹzi Ọghẹnẹ a ro kere Ikereakere na kpobi,+ yọ e rẹ kẹ erere nọ a tẹ be rehọ ai wuhrẹ,+ kẹ uthubro, kpọ eware vi, whọku ohwo evaọ ẹrẹreokie,+ 17 re ohwo Ọghẹnẹ ọ sai te ziezi, ruẹrẹ oma kpahe ziezi kẹ iruo iwoma kpobi.

4 Mẹ be ta kẹ owhẹ evaọ aro Ọghẹnẹ avọ Kristi Jesu, ọnọ o ti bruoziẹ+ enọ e rrọ uzuazọ gbe enọ i whu no+ evaọ oke omarọvia riẹ+ gbe okenọ ọ te tha evaọ Uvie riẹ:+ 2 Vuẹ ẹme na;+ ru onana kpata kpata, evaọ oke uwoma gbe oke obẹbẹ; kẹ ọwhọkuo,+ kẹ unuovẹvẹ ogaga, kẹ uduotahawọ avọ odiri ọgaga gbe onaa ewuhrẹ kpobi.+ 3 Keme oke o te tha nọ ahwo a gbẹ te jẹ emamọ iwuhrẹ*+ na rehọ họ, rekọ wọhọ epaọ isiuru obọrai, a ti koko iwuhrẹ họ kẹ omarai re a wuhrẹ ae eware nọ e rẹ were ai ezọ.*+ 4 A te gbẹ gaviezọ kẹ uzẹme na ha, ukpoye a te gaviezọ kẹ iku erue. 5 Rekọ rọkẹ owhẹ, sẹro iroro ra evaọ eware kpobi, thihakọ uyero obẹbẹ,+ ru iruo ọtausiuwoma,* ru iruo odibọgba ra gba ziezi.+

6 Keme a mu omẹ họ eku no wọhọ idhe udi,*+ yọ oke obusino mẹ+ o kẹle no. 7 Mẹ họre emamọ ohọre na no,+ mẹ dhẹ ohrẹ na te urere no,+ me ru lele ẹrọwọ na no. 8 No umuo enẹna vrẹ, a ruẹrẹ etu-uvie ẹrẹreokie họ kẹ omẹ no,+ onọ Olori na, obruoziẹ okiẹrẹe na+ ọ te kẹ omẹ wọhọ osohwa evaọ ẹdẹ yena,+ yọ orọnọ omẹ ọvo ho rekọ te ahwo kpobi nọ omarọvia riẹ o be were.

9 Dawo ẹgba ra kpobi re whọ nyabru omẹ ze kẹle. 10 Keme Dimas+ ọ nyasiọ omẹ ba no fikinọ o you uyero-akpọ* nana, o kpobọ Tẹsalonika no, Krẹsẹns o kpobọ Galesha, Taitọs o kpobọ Dalmesha. 11 Luk ọvo ọ rrọ kugbe omẹ. Rehọ Mak kugbe oma ze keme o wo obufihọ kẹ omẹ evaọ odibọgba na. 12 Rekọ me vi Tikikọs+ kpobọ Ẹfisọs no. 13 Nọ whọ te nyaze, wha otogbo nọ mẹ rọ kẹ Kapọs kru evaọ Troas na ze, gbe iko-ebe na, maero kọ erọ oviẹ-erao na.

14 Alẹkzanda odhogu-ekọpa na o ru omẹ eware iyoma buobu. Jihova* ọ te hwosa kẹe wọhọ epaọ iruo riẹ.+ 15 Yọroma kẹe gaga re keme ọ wọso ovuẹ mai na thesiwa.

16 Evaọ oke ọsosuọ nọ me ro gu ẹkẹ-unu mẹ, ohwo ọvo ọ jọ abọ mẹ hẹ, rekọ aikpobi a nyasiọ omẹ ba—jọ a rọ oyena hwosa kẹ ae he. 17 Rekọ Olori na o dikihẹ gba omẹ ọ tẹ kẹ omẹ ogaga, re mẹ sai whowho usi uwoma na totọ, re erẹwho na kpobi a sai yoi;+ yọ o siwi omẹ no unu okpohrokpo.+ 18 Olori na o ti siwi omẹ no eware imuomu kpobi, yọ ọ te sẹro mẹ re mẹ ruọ Uvie obọ odhiwu riẹ.+ Jọ oruaro u tei bẹdẹ bẹdẹ. Ami.

19 Yere Priska avọ Akwila+ gbe ahwo uwou Ọnẹsiforọs+ kẹ omẹ.

20 Ẹrastọs+ ọ daji obọ Kọrint, rekọ mẹ nyasiọ Trọfimọs+ ba obọ Malitọs fikinọ ọ jẹ mọ. 21 Dawo ẹgba ra kpobi re who te obonẹ taure ezi ekpahe* o te te.

Yubulọs o vi uyere se owhẹ, Pudẹns gbe Laenọs gbe Klodia gbe inievo na kpobi a bi yere owhẹ re.

22 Ajọ Olori na ọ jọ kugbe owhẹ nọ who bi dhesẹ emamọ ẹzi na. Jọ o dhesẹ uwowou ulogbo riẹ kẹ owhai ẹsikpobi.