ILETA RO SE TAITỌS

1 Pọl ọrigbo Ọghẹnẹ gbe ukọ Jesu Kristi, wọhọ epaọ ẹrọwọ enọ Ọghẹnẹ ọ salọ gbe eriariẹ egbagba uzẹme na nọ e rọwokugbe omarọkẹ Ọghẹnẹ 2 onọ u no ẹruore uzuazọ ebẹdẹ bẹdẹ+ ze, nọ Ọghẹnẹ nọ ọ rẹ sae ta ọrue he+ na ọ ya eyaa riẹ ugbanwẹdẹ; 3 rekọ nọ oke nọ o fihọ u te, o dhesẹ ẹme riẹ via ẹkwoma usi uwoma ota nọ a mu họ omẹ obọ+ na, wọhọ epaọ ujaje Osiwi mai, Ọghẹnẹ; 4 ro se Taitọs, uvi ọmọ nọ ma gbe wo ẹrọwọ ọvona:

Jọ Ọghẹnẹ Ọsẹ na gbe Kristi Jesu Osiwi mai a dhesẹ uwowou ulogbo kẹ owhẹ jẹ kẹ owhẹ udhedhẹ.

5 Mẹ nyasiọ owhẹ ba Kriti re whọ kpọ eware nọ e thọ* vi jẹ rehọ ekpako mu no okpẹwho ruọ okpẹwho, wọhọ epanọ mẹ ta kẹ owhẹ: 6 otẹrọnọ ọzae jọ ọ riẹ nọ ọ kare afuẹwẹ, nọ o wo aye ọvo, nọ emọ riẹ e rọwo, yọ ahwo a be ta kpahe ae he inọ a bi yeri uzuazọ ofafariẹ* hayo a rrọ ahwo ọwọsuọ.+ 7 Keme ọsẹro yọ orieyero Ọghẹnẹ, fikiere ọ rẹ kare afuẹwẹ, o re wo udu ogaga ha,+ ọ rẹ kaki mu ofu hu,+ ọ rẹ jọ ọgba-udi hi, ọ rẹ jọ ohwo ozighi hi,* o re wo uvou-uthethei kẹ erere nọ a rẹ rọ ewhariọ wo ho, 8 rekọ ọ rẹ jọ ọnọ o re dede erara rehọ,+ ọnọ o you ewoma, ọnọ o wo iroro nọ e gba,*+ ọnọ o kiẹrẹe, ọnọ a re fievahọ,*+ ọnọ o wo oma-onyẹ,*+ 9 ọnọ ọ be nya lele ẹme uzẹme* na whawha evaọ onaa ewuhrẹ riẹ,+ re ọ sae rọ uwuhrẹ ogbagba*+ tuduhọ ahwo awọ jẹ whọku+ enọ e be ta ẹme wọso uwuhrẹ na.

10 Keme ahwo ọwọsuọ buobu a riẹ, enọ e be ta ogbẹta, gbe eviẹahwohọ, maero enọ i bi si ikẹ inọ ahwo a rẹ yawo.+ 11 O roja re a ruru unu rai, keme ezae nana a be raha ẹrọwọ iviuwou soso ẹkwoma eware nọ i fo ho nọ a bi wuhrẹ fiki erere nọ a rẹ rọ ewhariọ wo. 12 Omọvo rai jọ, ọruẹaro obọrai, ọ ta nọ: “Ọrue ọvo ahwo Kriti a rẹ ta, erao ijihẹ a rrọ, egba-ore nọ i re ru iruo ho.”

13 Isẹri nana uzẹme. Fiki ugogo ẹjiroro nana, hae whọku ae gaga re a sae jọ gaga evaọ ẹrọwọ na, 14 re a gbẹ gaviezọ kẹ iku-esia ahwo Ju hu gbe ijaje ezae nọ e nyasiọ uzẹme na ba. 15 Eware kpobi e rrọ fuafo kẹ ahwo nọ a rrọ fuafo;+ rekọ rọkẹ ahwo nọ a rrọ gbegbe jẹ kare ẹrọwọ, oware ovo o fo ho, keme iroro rai gbe obruoziẹ-iroro rai i gbeku no.+ 16 A rẹ jọ ẹgbede ta nọ a riẹ Ọghẹnẹ, rekọ a be rọ iruo rai rọ se iẹe,+ keme a rrọ tọtọtọ jẹ be ghẹmeeyo, yọ a te kẹ oghẹrẹ iruo iwoma evuevo ho.

2 Rekọ whẹ omara, hae ta eme nọ e rọwokugbe omamọ uwuhrẹ* na.+ 2 Jọ ezae nọ e kpako no a wo uruemu nọ o rrọ owowa, osegboja, iroro nọ e gba, ẹrọwọ ọgaga, uyoyou udidi, gbe ithihakọ egaga. 3 Epọvo na re, jọ eyae nọ e kpako no a wo uruemu nọ o rẹ wha ọghọ se Ọghẹnẹ, a rẹ jọ enọ e rẹ ta ahwo raha ha, hayo romakẹ idieda ibuobu hu, a rẹ jọ enọ i re wuhrẹ oware nọ u woma, 4 re a sae hrẹ* uvovo-eyae na inọ a you ezae rai, je you emọ rai, 5 re a wo iroro nọ e gba, wo uruemu ofuafo, ru iruo evaọ uwou,* ru ewoma, romakpotọ kẹ ezae rai,+ re ahwo a gbẹ ta eme iyoma kpahe ẹme Ọghẹnẹ hẹ.

6 Epọvo na re, hae tuduhọ ezae nọ e gbẹ maha awọ inọ a wo iroro nọ e gba,+ 7 jọ oriruo ọrọ iruo iwoma evaọ kabọ kabọ. Wuhrẹ ahwo oware nọ o gba* avọ osegboja kpobi,+ 8 ru ere avọ emamọ eme* nọ a rẹ jọ ruẹ afuẹwẹ hẹ,+ re oma o ruẹse vuọ enọ e be wọso omai, fikinọ a te ruẹ oware uyoma* ovo ta kpahe omai hi.+ 9 Jọ erigbo a romakpotọ kẹ ilori rai evaọ oware kpobi,+ jẹ daoma ru ae eva were, yọ a za ẹme zihe kẹ ae he, 10 a tho eware rai hi,+ rekọ jọ a dhesẹ nọ ae yọ ahwo nọ a rẹ sai fievahọ riẹriẹriẹ, re a sae jọ kabọ kabọ whẹ erru họ uwuhrẹ Osiwi mai, Ọghẹnẹ.+

11 Keme uwowou ulogbo Ọghẹnẹ u dhesẹ oma via no, be wha esiwo se oghẹrẹ ahwo kpobi.+ 12 U bi wuhrẹ omai re ma siọ emuemu gbe isiuru akpọ,+ re ma yeri uzuazọ avọ iroro nọ e gba gbe ẹrẹreokie gbe omarọkẹ Ọghẹnẹ evaọ udevie uyero-akpọ* nana,+ 13 nọ ma be hẹrẹ erugba ẹruore evawere+ na gbe odhesẹvia oruaro orọ Ọghẹnẹ ologbo na gbe orọ Osiwi mai Jesu Kristi, 14 ọnọ o siobọno uzuazọ riẹ kẹ omai+ re o si* omai no igbo+ oghẹrẹ emuemu kpobi je ru omai fo kẹ omariẹ re o wo ahwo nọ a rẹ jọ okwakwa obọdẹ riẹ, nọ i wo ajọwha kẹ iruo iwoma.+

15 Hae ta eme nana, hae kẹ uduotahawọ* jẹ kẹ ọwhọkuo ududu.+ Who ru re ohwo ọvo o rri owhẹ vo ho.

3 Hae kareghẹhọ ae inọ a romakpotọ je yoẹme kẹ egọmeti gbe enọ i wo udu-esuo,+ inọ a ruẹrẹ oma kpahe kẹ iruo iwoma kpobi, 2 inọ a ta ẹme oyoma kpahe ohwo ọvo ho, a jọ enọ ẹwhọ ọ rẹ were he, rekọ a jọ enọ i wo iroro,*+ jọ wolẹ evaọ kabọ kabọ kugbe ahwo kpobi.+ 3 Keme mai omamai re ma jọ igheghẹ oke jọ, ma jẹ ghẹmeeyo, a je su omai thọ, ma jọ erigbo kẹ isiuru gbe omaweromẹ sa-sa, ma je zue evaọ eyoma, ma jẹ re ihri, ma je ru eware etọtọ, ma je mukpahe ohwohwo.

4 Rekọ nọ Osiwi mai, Ọghẹnẹ o dhesẹ uwowou+ gbe uyoyou riẹ kẹ ahwo-akpọ, 5 (orọnikọ fiki iruo ikiẹrẹe jọ nọ ma ru hu,+ rekọ fiki ohrọ-oriọ riẹ),+ o siwi omai ẹkwoma ẹhọ nọ ọ họ omai fo nọ u ru omai ziọ uzuazọ+ gbe ẹkwoma ẹzi ọfuafo nọ o ro ru omai kpokpọ.+ 6 Ọ rọ ẹkwoma Jesu Kristi Osiwi mai ku ẹzi nana ku omai ziezi,*+ 7 re nọ ọ tẹ rọ ẹkwoma uwowou ulogbo riẹ+ kuenu kẹ omai nọ ma kiẹrẹe no, ma vẹ sae jọ ereuku+ wọhọ epaọ ẹruore uzuazọ ebẹdẹ bẹdẹ na.+

8 Nọ eme nọ a re fievahọ, yọ mẹ gwọlọ nọ whọ hai fiẹgba họ eme nana, re enọ e rọwo Ọghẹnẹ a gbẹ sai fi iroro rai họ eruo iruo iwoma. Eware nana i woma yọ e rẹ kẹ ahwo erere.

9 Rekọ who wobọ vievie he evaọ avro-ọvro ogheghẹ gbe iku uyẹ-ukele gbe ẹwhọ gbe ohọre fiki Uzi na, keme e rẹ kẹ erere he, e tẹ jẹ rrọ eware ifofe.+ 10 Otẹrọnọ ohwo jọ o bi ru amọfa hẹriẹ oma fihọ utu,*+ siọ ohwo yena+ nọ whọ tẹ kẹe ohrẹ* orọ ọsosuọ gbe orọ avọ ivẹ no,+ 11 keme whọ riẹ nọ ohwo otiọye ọ nyasiọ edhere na ba no, ọ be raha uzi yọ o brukpe omobọ riẹ no.

12 Okenọ me te vi Atẹmas hayo Tikikọs+ bru owhẹ ze, dawo ẹgba ra kpobi re whọ nyabru omẹ ze obọ Nikọpọlis, keme etẹe mẹ jiroro nọ mẹ te jọ evaọ ezi ekpahe na. 13 Kẹ Zinas nọ ọ riẹ Uzi na ziezi na gbe Apọlọs eware nọ a gwọlọ re oware ovo o gbẹ kare ae evaọ erẹ rai na ha.+ 14 Rekọ jọ ahwo mai a wuhrẹ epanọ a re ru iruo iwoma re, re a sai fiobọhọ evaọ eware nọ a jọ gwọlọ obufihọ kpata kpata,+ re a gbẹ jọ enọ e be mọ ibi hi hi.+

15 Enọ e rrọ kugbe omẹ kpobi a vi uyere rai se owhẹ. Yere enọ i you omai evaọ ẹrọwọ na kẹ omẹ.

Jọ Ọghẹnẹ o dhesẹ uwowou ulogbo riẹ kẹ owhai kpobi ẹsikpobi.