ILETA RO SE AHWO HIBRU

1 Evaọ oke krẹkri nọ u kpemu, Ọghẹnẹ ọ rehọ ẹkwoma eruẹaro na ta ẹme kẹ esẹ-esẹ mai unuẹse buobu gbe evaọ idhere buobu.+ 2 Whaọ evaọ urere edẹ nana ọ rehọ ẹkwoma Ọmọ riẹ ta ẹme kẹ omai no,+ ọnọ o ro mu ọreuku eware kpobi+ jẹ rọ ẹkwoma riẹ ma uyero-akpọ sa-sa* na.+ 3 Ọye họ uwoho oruaro Ọghẹnẹ+ gbe oghẹrẹ ohwo nọ ọ rrọ dẹẹ,+ ọ be rọ ẹme riẹ nọ o wo ẹgba ru eware kpobi jọ uzuazọ. Yọ nọ o ru omai fo no izieraha mai no,+ ọ tẹ keria obọze Erumeru na evaọ obọ odhiwu.+ 4 Fikiere ọ rro vi ikọ-odhiwu no,+ te epanọ ọ rọ reuku odẹ nọ u wo orro vi odẹ rai.+

5 Wọhọ oriruo, ukọ-odhiwu vẹ Ọghẹnẹ ọ ta kẹ ẹdẹ jọ no nọ: “Whẹ yọ ọmọzae mẹ; nẹnẹ na me zihe ruọ ọsẹ ra no”?+ Gbe inọ: “Mẹ te jọ ọsẹ riẹ, ọ vẹ te jọ ọmọzae mẹ”?+ 6 Rekọ rọ kpahe okenọ ọ te rọ wariẹ rehọ Ọmọ ọsosuọ riẹ+ ziọ otọakpọ na, ọ ta nọ: “Jọ ikọ-odhiwu Ọghẹnẹ kpobi a guzou kpotọ kẹe.”

7 Ofariẹ, ọ ta kpahe ikọ-odhiwu na nọ: “Ọ ma ikọ-odhiwu riẹ izi, egbodibo*+ riẹ kọ ebruerae.”+ 8 Rekọ ọ ta kpahe Ọmọ na nọ: “Ọghẹnẹ họ agbara-uvie ra+ bẹdẹ bẹdẹ, ọkpọ-isuẹsu Uvie ra yọ ọkpọ-isuẹsu ẹrẹreokie.* 9 Who you ẹrẹreokie, who te mukpahe emuemu. Oyejabọ nọ Ọghẹnẹ, Ọghẹnẹ ra, ọ rọ rehọ ewhri oghọghọ wholo owhẹ+ vi egbẹnya ra na.”+ 10 Ofariẹ: “O Olori, evaọ emuhọ, whọ wọ otọhotọ otọakpọ na họ, idhiwu na yọ iruo abọ ra re. 11 E te raha no, rekọ whọ te gbẹ jariẹ; yọ wọhọ ewu, aikpobi e te who no, 12 who ti kpiri ai wọhọ epanọ a re kpiri ogbru, yọ who ti nwene ai wọhọ ewu. Rekọ whọ rrọ epọvo na, yọ ikpe ra i ti wo ekuhọ vievie he.”+

13 Rekọ ukọ-odhiwu vẹ ọ ta kẹ ẹdẹ jọ no nọ: “Keria obọze mẹ bẹsenọ me re ru ewegrẹ ra họ akpala nọ whọ rẹ rọ awọ ra kpahe”?+ 14 Kọ ogbẹrọnọ izi nọ i bi ru iruo ọrẹri*+ aikpobi a rrọ, enọ a vi re a gbodibo kẹ enọ i ti wo* esiwo?

2 Oyejabọ nọ o rọ roja re ma gaviezọ ziezi kẹ eware nọ ma yo no,+ re ma gbe su vrẹ vievie he.+ 2 Keme otẹrọnọ ẹme nọ a rọ ẹkwoma ikọ-odhiwu ta+ o rugba, yọ a rọ uye kẹ ohwo kpobi nọ ọ raha uzi gbe ọnọ ọ ghẹmeeyo wọhọ epanọ uvioziẹ o gwọlọ,+ 3 ẹvẹ ma te sae rọ vabọ otẹrọnọ ma gbabọkẹ esiwo ologbo otiọye na?+ Keme ẹkwoma Olori mai a rọ kake ta kpahe iẹe,+ enọ i yo rie i te se isẹri kpahe iẹe kẹ omai, 4 yọ Ọghẹnẹ o kuomagbe isẹri-ise na ẹkwoma eware eka gbe eware igbunu avọ iruo ilogbo sa-sa+ gbe ẹzi ọfuafo nọ ọ ghale kẹ ae wọhọ epaọ oreva riẹ.+

5 Keme orọnikọ otọ ikọ-odhiwu o fi akpọ* nọ ọ be tha na họ họ,+ onọ ma be ta ẹme kpahe na. 6 Rekọ evaọ oria jọ osisẹri jọ ọ ta nọ: “Kọ ono họ ohwo-akpọ nọ whọ be rọ kareghẹhọ iẹe, hayo ọmọ ohwo nọ whọ be rọ rẹrotei?+ 7 Who ru rie kpotọ omojọ vi ikọ-odhiwu; whọ rehọ oruaro gbe ọghọ ro tu ei uzou, jẹ rehọ iẹe mu ọnọ o wuzou iruo abọ ra. 8 Who fi eware kpobi họ otọ awọ riẹ.”+ Nọ orọnọ o fi eware kpobi họ otọ riẹ na,+ oware ovuovo o riẹ hẹ nọ Ọghẹnẹ o fihọ otọ riẹ hẹ.+ Rekọ enẹna, ma re ruẹ nọ eware kpobi e rrọ otọ riẹ no ho.+ 9 Rekọ ma be ruẹ Jesu, ọnọ a ru kpotọ omojọ vi ikọ-odhiwu vẹre na,+ nọ a rehọ oruaro gbe ọghọ hwosa kẹ no fikinọ ọ ruẹ uye uwhu.+ O whu rọkẹ ahwo kpobi fiki uwowou ulogbo Ọghẹnẹ.+

10 Keme re ọ ruẹsi ru emọ buobu wo oruaro, u kiehọ re ọnọ eware kpobi e rrọ rọkẹ, e tẹ jẹ rọ ẹkwoma riẹ rrọ na,+ o ru Ọnyukọ Ologbo ọrọ esiwo rai na+ gbunu ẹkwoma eware sa-sa nọ ọ ruẹ uye rai.+ 11 Keme, te ọnọ o bi ru ai fo te enọ o bi ru fo na,+ aikpobi obọ omọvo a no ze,+ fiki onana oma o be vuọ ẹe he re o se ai inievo,+ 12 wọhọ epanọ ọ ta nọ: “Me ti whowho odẹ ra kẹ inievo mẹ; mẹ te jọ udevie ukoko na so ole jiri owhẹ.”+ 13 Ọ tẹ jẹ ta nọ: “Ọye me ti fievahọ.”+ Ọ tẹ jẹ ta nọ: “Rri! Mẹ avọ emọ esese nọ Jihova* ọ kẹ omẹ.”+

14 Fikiere, nọ orọnọ “emọ esese” na yọ enọ i wo azẹ gbe uwo na, ọyomariẹ o te zihe ruọ ere re,+ re ọ ruẹse rọ ẹkwoma uwhu riẹ raha ọnọ o wo ogaga nọ ọ rẹ rọ wha uwhu ze na,+ koyehọ Ẹdhọ,+ 15 re ọ ruẹsi si ahwo kpobi nọ a rrọ igbo evaọ edẹ uzuazọ rai kpobi fiki ozọ uwhu no igbo.+ 16 Keme orọnikọ ikọ-odhiwu o bi fiobọhọ kẹ hẹ, rekọ emọ* Abraham o bi fiobọhọ kẹ.+ 17 Fikiere, o te zihe ruọ epaọ “inievo” riẹ evaọ kabọ kabọ,+ re ọ sae jọ ozerẹ okpehru nọ o wo ohrọ-oriọ gbe ọnọ a re fievahọ evaọ eware nọ i kiekpahe Ọghẹnẹ, re ọ sai dhe idhe ẹruẹrẹhọ*+ rọkẹ izieraha ahwo na.+ 18 Nọ orọnọ ọyomariẹ ọ ruẹ uye evaọ okenọ a jẹ dawo iẹe na,+ ọ rẹ sae nyaze ti fiobọhọ kẹ enọ a be dawo.+

3 Fikiere, inievo nọ e rrọ ọrẹri, nọ e rrọ usu enọ i wo use* obọ odhiwu na,+ wha roro kpahe ukọ na gbe ozerẹ okpehru nọ ma bi whowho via nọ ma fi ẹrọwọ họ na—Jesu.+ 2 O yoẹme kẹ Ọnọ ọ rehọ e riẹ mu,+ wọhọ epanọ Mosis o ru re evaọ uwou Ọyena soso.+ 3 Keme a rri rie nọ o* te ọnọ oruaro riẹ+ u re vi orọ Mosis, nọ orọnọ ohwo nọ ọ bọ uwou o re wo ọghọ vi uwou na. 4 Ẹhẹ, uwou kpobi u wo ohwo nọ ọ bọ riẹ, rekọ ọnọ ọ ma eware kpobi họ Ọghẹnẹ. 5 Whaọ Mosis ọ jọ odibo nọ o yoẹme evaọ uwou Ọyena soso, onọ o jọ isẹri eware nọ a te ta kpahe evaọ obaro, 6 rekọ Kristi yọ ọmọ nọ o yoẹme+ evaọ oghẹrẹ nọ ọ rọ rẹrote uwou Ọghẹnẹ.+ Mai họ uwou Riẹ otẹrọnọ ma be ginẹ ruabọhọ ru eware nọ e rẹ kẹ omai uvẹ ta ẹme ududu je kru ẹruore nọ ma bi ro seha na gaga rite urere.

7 Fikiere, wọhọ epanọ ẹzi ọfuafo na ọ ta,+ “Nẹnẹ, otẹrọnọ wha gaviezọ kẹ urru riẹ, 8 wha ru udu rai gaga ha wọhọ epanọ a ru nọ o wha evedha egaga ze, evaọ ẹdẹ nọ a rọ dawo omẹ evaọ udhude na,+ 9 oria nọ esẹ-esẹ rai e jọ dawo omẹ, dede nọ a ruẹ iruo mẹ evaọ ikpe udhuvẹ.+ 10 Oyejabọ nọ oge nana o ro tu omẹ oma, mẹ tẹ ta nọ: ‘A be hae nyathọ ẹsikpobi evaọ udu rai, yọ a re riẹ idhere mẹ hẹ.’ 11 Fikiere me te duwu iyei fiki eva nọ e dha omẹ inọ: ‘A te ruọ eva eriosehọ mẹ hẹ.’”+

12 Inievo, wha yọroma re whai ọvuọvo o gbe wo udu umuomu nọ o kare ẹrọwọ vievie he ẹkwoma oma-usino Ọghẹnẹ nọ ọ rrọ uzuazọ na;+ 13 rekọ wha gbẹ hae tuduhọ ohwohwo awọ kẹdẹ kẹdẹ nọ oke nọ a re se “Nẹnẹ”+ o gbẹ riẹ na, re ogaga eviẹhọ uzioraha o gbẹ lẹliẹ udu rai ọvuọvo jọ gaga ha. 14 Keme ma te ginẹ jọ usu enọ i bi wobọ kugbe Kristi otẹrọnọ ma kru evaifihọ nọ ma wo evaọ emuhọ na gaga rite urere ọvo.+ 15 Wọhọ epanọ a ta nọ, “Nẹnẹ, otẹrọnọ wha gaviezọ kẹ urru riẹ, wha ru udu rai gaga ha wọhọ epanọ a ru nọ o wha evedha egaga ze.”+

16 Amono a yo, nọ a ru Ọghẹnẹ eva dha gaga ghele? Kọ ogbẹrọnọ ahwo kpobi nọ Mosis o su no Ijipti ze?+ 17 Ofariẹ, amono a tu Ọghẹnẹ oma ikpe udhuvẹ?+ Kọ ogbẹrọnọ enọ e raha uzi, enọ i whu evaọ udhude na?+ 18 Kọ amono o duwu iyei nọ a te ruọ eva eriosehọ riẹ hẹ? Kọ ogbẹrọnọ enọ e ghẹmeeyo? 19 Fikiere ma ruẹ nọ a sae ruọ eva eriosehọ riẹ hẹ fikinọ a kare ẹrọwọ.+

4 Fikiere, nọ eyaa nọ a rẹ rọ ruọ eva eriosehọ riẹ e gbẹ riẹ na, joma yọroma* re ohwo ọvo evaọ usu rai ọ siọ uvẹ nọ a re ro wo eyaa na ba ekufiẹ.+ 2 Keme a whowho usi uwoma na kẹ omai no re wọhọ epanọ a whowho kẹ ai;+ rekọ ẹme nọ a yo na ọ kẹ rai erere he keme a wo ẹrọwọ wọhọ otu nọ o yoẹme he. 3 Mai nọ ma wo ẹrọwọ na ma rẹ ruọ eva eriosehọ na, wọhọ epanọ ọ ta nọ: “Fikiere me te duwu iyei fiki eva nọ e dha omẹ inọ, ‘A te ruọ eva eriosehọ mẹ hẹ,’”+ dede nọ iruo riẹ i kuhọ no anwọ emuhọ akpọ* na ze.+ 4 Keme ọ jọ oria jọ ta kpahe ẹdẹ avọ ihrẹ na nọ: “Ọghẹnẹ o te serihọ evaọ ẹdẹ avọ ihrẹ na rono iruo riẹ kpobi,”+ 5 ghele na ọ wariẹ ta nọ: “A te ruọ eva eriosehọ mẹ hẹ.”+

6 Fikiere, nọ orọnọ o gbẹ lọhọ re ahwo jọ a ruọ eva riẹ na, yọ enọ a kaki whowho usi uwoma na kẹ a ruọ eva riẹ hẹ fiki aghẹmeeyo na,+ 7 ọ wariẹ fi ẹdẹ jọ họ nọ ikpe buobu e vrẹ no okenọ ọ ta evaọ olezi Devidi nọ “Nẹnẹ”; nwane wọhọ epanọ ileta nana e ta no vẹre na inọ, “Nẹnẹ, otẹrọnọ wha gaviezọ kẹ urru riẹ, wha ru udu rai gaga ha.”+ 8 Keme o hae jọ nọ Joshua+ o su rai ruọ oria eriosehọ no, Ọghẹnẹ ọ gbẹ hae ta kpahe ẹdẹ ọfa ha nọ oyena o vrẹ no. 9 Fikiere ẹdijala eriosehọ ọ gbẹ riẹ rọkẹ ahwo Ọghẹnẹ.+ 10 Keme ohwo nọ ọ ruọ eva eriosehọ Ọghẹnẹ no yọ o serihọ no re evaọ iruo obọriẹ, nwane wọhọ epanọ Ọghẹnẹ o serihọ no evaọ iruo riẹ na.+

11 Fikiere joma dawo ẹgba mai kpobi re ma ruọ eva eriosehọ yena, re ohwo ọvo o gbe kie ruọ ọkpọ aghẹmeeyo yena ha.+ 12 Keme ẹme Ọghẹnẹ ọ rrọ uzuazọ, o te je wo ẹgba,+ yọ ọ da vi ọgbọdọ akọava,+ o re duwu thabọ te epanọ o rẹ rọ fere oghẹrẹ nọ ohwo ọ ginẹ rrọ evaọ okafe* gbe obeva* via, gbe ezo-oma avọ iwhri ighogho-enwa na, yọ o rẹ sae kiẹ iroro gbe ẹjiroro udu na via. 13 Yọ omama ọvuọvo ọ riẹ hẹ nọ u dhere evaọ aro riẹ,+ rekọ eware kpobi e bafihọ je rovie fihọ gbaladha evaọ aro ọnọ ma ti gu epanọ ma ru te kẹ hrọ.+

14 Fikiere, nọ orọnọ ma wo ozerẹ okpehru ologbo ọnọ ọ ruọ eva idhiwu no na, koyehọ Jesu Ọmọ Ọghẹnẹ,+ joma gbẹ hai whowho ẹrọwọ nọ ma fihọ iẹe via.+ 15 Keme orọnikọ ozerẹ okpehru nọ ọ rẹ sai roro kẹ omai hi evaọ oria nọ ma jọ ga ha ma wo ho,+ rekọ ọnọ a dawo no evaọ kabọ kabọ wọhọ omai ma wo, rekọ nọ ọ kare uzioraha.+ 16 Fikiere, joma nya kẹle agbara-uvie Ọghẹnẹ nọ o re dhesẹ uwowou ulogbo* na jẹ lẹ sei ududu,+ re ọ ruẹsi dhesẹ ohrọ gbe uwowou ulogbo kẹ omai evaọ ẹruoke nọ ma tẹ gwọlọ obufihọ.

5 Keme ohwo kpobi nọ a rehọ no udevie ahwo ze ro mu ozerẹ okpehru, a rehọ e riẹ mu fiki ahwo na re ọ rẹrote eware nọ i kiekpahe Ọghẹnẹ,+ re ọ ruẹse rehọ ekẹ rai se Ọghẹnẹ je dhe idhe fiki izieraha rai.+ 2 Ọ rẹ sai wo ọdawẹ kẹ* enọ e rrọ igbori gbe enọ e raha uzi* keme ọ riẹ nọ ọyomariẹ ọ rẹ raha uzi re, 3 fikiere o gba riẹ họ nọ o re dhe idhe fiki izieraha obọriẹ nwane wọhọ epanọ o re dhe idhe fiki izieraha ahwo na.+

4 Ohwo ọ rẹ rehọ omobọ riẹ mu ọkwa ọghọ nana ha, rekọ okenọ Ọghẹnẹ o te sei ọvo u re ro tei obọ, nwane wọhọ epanọ o jọ kẹ Erọn na.+ 5 Epọvo na re, orọnikọ Kristi ọvo ọ kẹ omobọ riẹ oruaro+ nọ ọ rọ rrọ ozerẹ okpehru hu, rekọ ọnọ ọ kẹ riẹ oruaro yena họ Ọnọ ọ ta kẹe nọ: “Whẹ yọ ọmọzae mẹ; nẹnẹ na me zihe ruọ ọsẹ ra no.”+ 6 Wọhọ epanọ ọ ta evaọ oria ofa re inọ, “Whẹ yọ ozerẹ bẹdẹ bẹdẹ wọhọ epaọ Mẹlkizẹdẹk.”+

7 Okenọ Kristi ọ jọ uzuazọ evaọ otọakpọ,* ọ lẹ elẹ ayare-ọgaga gbe elẹ ayare, avọ urru oruarua gbe irui-oviẹ+ se Ọnọ ọ rẹ sai siwi ei no uwhu, yọ o yo elẹ riẹ fikinọ o wo ozodhẹ Ọghẹnẹ. 8 Dede nọ ọmọzae riẹ ọ rrọ, o wuhrẹ ẹmeoyo no eware nọ ọ ruẹ uye rai ze.+ 9 Kẹsena nọ a ru ei te gbagba no,+ o te zihe ruọ ọnọ ahwo kpobi nọ a bi yoẹme kẹe a rẹ rọ ẹkwoma riẹ wo esiwo ebẹdẹ bẹdẹ,+ 10 keme Ọghẹnẹ ọ rehọ e riẹ mu ozerẹ okpehru no wọhọ epaọ Mẹlkizẹdẹk.+

11 Eware buobu e riẹ nọ ma rẹ ta kpahe iẹe, rekọ e be bẹ omai ẹta keme wha rrọ dokpo dokpo evaọ iyayo rai.* 12 Keme, dede nọ iwuhrẹ u fo nọ wha rẹ jọ enẹna,* wha wariẹ gwọlọ ohwo nọ o re wuhrẹ owhai eware esese+ ovuẹ ọrẹri Ọghẹnẹ no emuhọ ze, wha tẹ wariẹ zihe ruọ enọ a rẹ kẹ ame-ivie orọnikọ emu ọgaga ha. 13 Keme ohwo kpobi nọ ọ gbẹ be da ame-ivie ọ riẹ ẹme ẹrẹreokie Ọghẹnẹ hẹ keme ọmaha ọ rrọ.+ 14 Rekọ emu ọgaga ọ rrọ kẹ ahwo nọ a kpako, enọ i wuhrẹ ẹgba orimuo* rai no ẹkwoma iruo nọ a be rehọ iẹe ru, re a sai vuhu oware uwoma gbe uyoma.

6 Fikiere, enẹna nọ ma wuhrẹ vrẹ iwuhrẹ ọsosuọ kpahe Kristi no na,+ joma daoma ziezi nyaharo te ọkpako, orọnikọ ma rẹ wariẹ ru otọhotọ họ,+ koyehọ re ma je wuhrẹ kpahe ekurẹriẹ no iruo ifofe gbe ẹrọwọ nọ a re fihọ Ọghẹnẹ, 2 uwuhrẹ kpahe oghoghẹrẹ ame-ọhọ gbe abọ nọ a rẹ rọ kpahe ahwo uzou,+ ẹkparomatha enọ i whu no+ gbe ẹdhoguo ebẹdẹ bẹdẹ. 3 Yọ ma ti ru onana, otẹrọnọ Ọghẹnẹ ọ tẹ ginẹ kuvẹ riẹ.

4 Keme rọ kpahe enọ e ruẹ elo na no vẹre,+ gbe enọ okẹ ọvọvẹ obọ odhiwu u te obọ, gbe enọ ẹzi ọfuafo o te obọ, 5 gbe enọ emamọ ẹme Ọghẹnẹ o te obọ, gbe enọ e ruẹ ogaga uyero-akpọ* nọ o be tha na no, 6 rekọ nọ i kie no,+ o lọhọ họ re a ru ai wariẹ kurẹriẹ, keme ae omarai a wariẹ tehe Ọmọ Ọghẹnẹ fihọ ure na kẹ omarai jẹ wha omovuọ sei evaọ ẹgbede.+ 7 Keme otọ na u re wo oghale no obọ Ọghẹnẹ ze evaọ okenọ ame oso nọ ọ rẹ rrọ fihọ iẹe kẹse kẹse na o tẹ daruọ ẹe, kẹsena u ve ru ekakọ mọ emamọ ibi kẹ enọ e kọ rai. 8 Rekọ otẹrọnọ idhigbo gbe enwẹnwẹ i di noi ze, a re gbabọkẹe, yọ o kẹle oke nọ a rẹ rọ bọwo iẹe ehao no, ukuhọ riẹ a vẹ mahe iẹe no.

9 Rekọ kpahe owhai, iyoyou, u mu omai ẹro nọ wha bi ru eware iwoma, eware nọ e rẹ wha esiwo ze, dede nọ ma be ta ẹme enẹ. 10 Keme Ọghẹnẹ ọ rrọ ohwo nọ o kiẹrẹe he he nọ iruo rai gbe uyoyou nọ wha dhesẹ kẹ odẹ riẹ+ e rẹ rọ thọrọ iẹe ẹro, nọ wha rọ gbodibo jẹ be ruabọhọ gbodibo kẹ erẹri na. 11 Rekọ ma gwọlọ nọ whai omomọvo o gbe dhesẹ ajọwha ọvona re ẹruore na o mu owhai ẹro ziezi+ rite urere,+ 12 re wha gbẹ moyẹlẹ hẹ,+ rekọ wha rẹ rọ aro kele enọ e rọ ẹkwoma ẹrọwọ gbe odiri reuku eyaa na.

13 Keme okenọ Ọghẹnẹ ọ ya eyaa kẹ Abraham, nọ orọnọ omọfa ọ rro vrẹ ọyomariẹ nọ ọ sai ro duwu iyei he na, ọ rehọ omobọ riẹ duwu iyei,+ 14 inọ: “Mẹ te ghale owhẹ hrọ, yọ me ti ru owhẹ vihọ hrọ.”+ 15 Fikiere, nọ Abraham o wo odiri oke krẹkri no, o te wo eyaa nana tobọ. 16 Keme ohwo nọ ọ rro vi ai ọye ahwo a re ro duwu iyei, yọ a te duwu iyei no yọ ẹwhọ kpobi o kuhọ no, keme oyena o rẹ kẹ imuẹro ẹme nọ a ta.+ 17 Ere ọvona re, nọ Ọghẹnẹ ọ jiroro nọ ọ rẹ kẹ ereuku eyaa na+ imuẹro viere inọ ẹjiroro riẹ o re nwene he, o te duwu iyei rọ kẹ imuẹro na,* 18 re ẹkwoma eware ivẹ* nọ i re nwene he nọ Ọghẹnẹ ọ sae jọ ta ọrue he na,+ mai nọ e dhẹ ziọ oria adhẹzọ na no e ruẹsi wo uduotahawọ ogaga nọ ma rẹ rọ dadabọ mu ẹruore nọ a fihọ aro mai na. 19 Ẹruore nana nọ ma wo na+ o wọhọ umuokọ rọkẹ uzuazọ mai, u muẹro jẹ rrọ gaga, yọ o nyaruọ obemu ekọtini na,+ 20 oria nọ ọnọ ọ kobaro ọ ruọ eva no fiki mai, koyehọ Jesu,+ ọnọ o zihe ruọ ozerẹ okpehru wọhọ epaọ Mẹlkizẹdẹk bẹdẹ bẹdẹ.+

7 Keme Mẹlkizẹdẹk nana, ovie Salẹm, ozerẹ Ọghẹnẹ nọ Ọ Mai Kpehru na, o zere Abraham okenọ Abraham o je zihe kpozi no ohọre nọ o jo fi ivie na kparobọ, ọ tẹ lẹ ẹro eghale kẹe,+ 2 Abraham ọ tẹ rehọ* abọvo abakpe eware kpobi kẹe. Orọ ọsosuọ, otofa odẹ riẹ họ “Ovie Ẹrẹreokie,” ọ tẹ jẹ rrọ ovie Salẹm, koyehọ “Ovie Udhedhẹ.” 3 Fikinọ o wo ọsẹ hẹ, o wo oni hi, o wo oria ọvo nọ a kere uyẹ riẹ fihọ họ, yọ o wo okenọ a ro yẹe he hayo okenọ o ro whu hu, rekọ fikinọ a ru rie tho Ọmọ Ọghẹnẹ, ọ rrọ ozerẹ oke kpobi.*+

4 Rri epanọ ọzae nana ọ rro te, ọnọ Abraham nọ o wuzou unuwou* na ọ kẹ abọvo abakpe eware nọ e mai woma evaọ egbo-ẹmo na.+ 5 Uzẹme, wọhọ epanọ o rrọ Uzi na, a jie uzi kẹ emezae Livae+ nọ a ro mu izerẹ inọ a rehọ abọvo abakpe eware mi ahwo na,+ koyehọ inievo rai, dede nọ enana yọ ahwo uyẹ Abraham.* 6 Rekọ ọzae nana nọ o no orua Livae ze he na ọ rehọ abọvo abakpe mi Abraham, ọnọ Ọghẹnẹ ọ ya eyaa kẹ na, ọ tẹ lẹ ẹro eghale kẹe.+ 7 Whaọ o rrọ vevẹ inọ ọnọ ọ mae rro ọye ọ rẹ lẹ ẹro eghale kẹ ọnọ ọ kawo vi ei. 8 Ahwo Livae nọ a jẹ rehọ abọvo abakpe na a re whu, rekọ ọzae ọdekọ nọ a kẹ abọvo abakpe na, Ikereakere na i se isẹri kpahe iẹe nọ ọ rrọ uzuazọ.+ 9 Yọ a sae ta nọ makọ Livae dede, ọnọ a jẹ kẹ abọvo abakpe na, ọ hwa abọvo abakpe ẹkwoma Abraham, 10 keme okenọ Mẹlkizẹdẹk o ro zere Abraham na, yọ Livae ọ gbẹ jọ usu emọ nọ a te jọ uyẹ ọsẹ-esẹ riẹ yẹ evaọ obaro.*+

11 O hae jọ nọ a rẹ sae jọ gbagba ẹkwoma iruẹru ọkwa-ozerẹ ahwo Livae+ (keme o jọ abọjọ Uzi na nọ a rọ kẹ ahwo na), kọ o hae gbẹ gwọlọ nọ a rọ ozerẹ ọfa mu, ọnọ a ta nọ ọ wọhọ epaọ Mẹlkizẹdẹk+ orọnikọ wọhọ epaọ Erọn ho? 12 Keme nọ orọnọ a bi nwene ọkwa-ozerẹ na, o roja nọ a re nwene Uzi na re.+ 13 Keme ọzae nọ a ta eme nana kpahe na o no orua ọfa ze, yọ ohwo ọvo evaọ orua yena o ri ru iruo evaọ agbada-idhe na ha.+ 14 O rrọ vevẹ nọ orua Juda Olori mai o no ze,+ rekọ Mosis ọ ta oware ovo kpahe izerẹ nọ i re no orua yena ze he.

15 Onana u tube vẹ viere okenọ ozerẹ ọfa ọ romavia,+ ọnọ ọ wọhọ Mẹlkizẹdẹk,+ 16 ọnọ o zihe ruọ ozerẹ, orọnọ fikinọ o no orua nọ uzi o fodẹ nọ ozerẹ o re no ze ze he, rekọ ẹkwoma ogaga uzuazọ nọ a rẹ sae raha ha.+ 17 Keme a se isẹri kpahe iẹe nọ: “Whẹ yọ ozerẹ bẹdẹ bẹdẹ wọhọ epaọ Mẹlkizẹdẹk.”+

18 Fikiere a si ujaje ọsosuọ na no keme u wo ẹgba ha, yọ u wo iruo ho.+ 19 Keme Uzi na u ru oware ovo rrọ gbagba ha,+ rekọ ẹruore nọ ọ mai woma nọ Ọghẹnẹ ọ rọ ze u ru ere,+ onọ ma be rọ ẹkwoma riẹ si kẹle iẹe.+ 20 Ofariẹ, nọ orọnọ avọ iyei iduwu Ọghẹnẹ ọ rọ kẹe ọkwa-ozerẹ na 21 (keme ezae jọ e riẹ nọ i zihe ruọ izerẹ ababọ iyei nọ a duwu fiki rai, rekọ ọzae nana o zihe ruọ ozerẹ avọ iyei nọ Ọghẹnẹ o duwu fiki riẹ nọ ọ ta nọ: “Jihova* o duwu iyei no, yọ o ti nwene iroro riẹ hẹ,* ‘Whẹ yọ ozerẹ bẹdẹ bẹdẹ’”),+ 22 fikiere Jesu họ ọnọ a rọ kẹ imuẹro* ọvọ nọ ọ mai woma.+ 23 Ofariẹ, ahwo buobu a zihe ruọ izerẹ unọjọ utọjọ+ keme enọ a ro mu a jẹ sai ru iruo na ribri hi fiki uwhu, 24 rekọ fikinọ ọ rrọ uzuazọ bẹdẹ bẹdẹ,+ amọfa a rẹ rehọ ọkwa-ozerẹ riẹ hẹ. 25 Fikiere ọ rẹ sai je siwi enọ e be rọ ẹkwoma riẹ bru Ọghẹnẹ ze riẹriẹriẹ, keme ọ rrọ uzuazọ ẹsikpobi re ọ lẹ Ọghẹnẹ kẹ ae.+

26 U woma kẹhẹ nọ ma ro wo ozerẹ okpehru otiọye nọ ọ roma kpobi kẹ Ọghẹnẹ, nọ ọ kare afuẹwẹ,+ kare epe, wo ohẹriẹ no erahaizi, a tẹ jẹ kpare iẹe kpehru vi idhiwu na.+ 27 Wo ohẹriẹ no izerẹ ikpehru yena, o du gwọlọ nọ o re dhe idhe kẹdẹ kẹdẹ hẹ,+ orọ ọsosuọ rọkẹ izieraha obọriẹ,+ kẹsena rọkẹ erọ ahwo na, keme o ru onana ẹsiẹvo rọkẹ oke kpobi okenọ ọ rehọ omobọ riẹ dhe idhe.+ 28 Keme evaọ otọ Uzi na, ezae nọ e gba ha a je ro mu izerẹ ikpehru,+ rekọ Ọmọ nọ a ru fihọ gbagba+ bẹdẹ bẹdẹ no a ro mu evaọ iyei nọ a duwu+ okenọ Uzi na o vrẹ no.

8 Whaọ ugogo ẹme nọ ma be ta na ọna: Ma wo oghẹrẹ ozerẹ okpehru otiọnana,+ yọ ọ keria obọze agbara-uvie Erumeru na evaọ obọ idhiwu na,+ 2 ọ rrọ ọgbodibo* oria ọrẹri na+ gbe uvi uwou-udhu na, onọ Jihova* o ro vi, orọnikọ ohwo-akpọ họ. 3 Keme a rẹ rehọ ozerẹ okpehru kpobi mu re ọ rehọ ekẹ se Ọghẹnẹ je dhe idhe; fikiere o roja nọ ọnana ọ rẹ rọ oware jọ dhe idhe re.+ 4 O hae jọ nọ ọ rrọ otọakpọ, ọ hae te jọ ozerẹ hẹ+ nọ orọnọ ezae e riẹ vẹre nọ e rẹ rọ ekẹ se Ọghẹnẹ wọhọ epanọ Uzi na o ta na. 5 Ezae nana i bi ru iruo ọrẹri, onọ o rrọ oriruo gbe uwoho+ eware obọ odhiwu;+ nwane wọhọ epanọ Ọghẹnẹ o jie uzi kẹ Mosis taure o te ti mu uwou-udhu na họ ẹbọ: Ọ ta nọ: “Ruẹ nọ who ru eware kpobi lele oriruo nọ me dhesẹ kẹ owhẹ evaọ ugbehru na.”+ 6 Rekọ enẹna a kẹ Jesu iruo nọ e mai woma* no keme ọ rrọ obruthe+ ọvọ nọ ọ mai woma+ re, ọvọ nọ a re lele uzi, onọ u wo eyaa nọ e mai woma.+

7 O hae jọ nọ ọvọ ọsosuọ yena ọ kare afuẹwẹ, a hae gwọlọ ọrọ avọ ivẹ hẹ.+ 8 Keme ọ jọ oma ahwo na ruẹ afuẹwẹ nọ ọ ta nọ: “‘Rri! Edẹ e be tha,’ ere Jihova* ọ ta, ‘nọ mẹ te re ọvọ ọkpokpọ kugbe uwou Izrẹl gbe uwou Juda. 9 O te jọ wọhọ ọvọ nọ mẹ re kugbe esẹ-esẹ rai hi evaọ ẹdẹ nọ me ro kru ai obọ re me su ai no ẹkwotọ Ijipti,+ keme a daji ọvọ mẹ hẹ, fikiere mẹ gbẹ jẹ rẹrote ai hi,’ ere Jihova* ọ ta.

10 “‘Keme onana họ ọvọ nọ mẹ te re kugbe uwou Izrẹl nọ edẹ yena e tẹ vrẹ no,’ ere Jihova* ọ ta. ‘Me ti fi izi mẹ họ iroro rai, yọ udu rai me ti kere ai fihọ.+ Mẹ te jọ Ọghẹnẹ rai, a vẹ te jọ ahwo mẹ.+

11 “‘Ae omomọvo o gbe ti wuhrẹ ohwo orẹwho riẹ hayo omoni riẹ hẹ, inọ: “Riẹ Jihova!”* Keme aikpobi a te riẹ omẹ, no ọnọ ọ mae kawo rite ọnọ ọ mae rro evaọ usu rai. 12 Keme me ti dhesẹ ohrọ-oriọ kẹ ae evaọ iruẹru iyoma rai, yọ mẹ gbẹ te kareghẹhọ izieraha rai ofa ha.’”+

13 Nọ orọnọ ọ fodẹ “ọvọ ọkpokpọ” na, u dhesẹ nọ o ru ọrọ ọsosuọ na họ onọ u gbe wo iruo ho no.+ Whaọ, onọ u gbe wo iruo ho jẹ be who no na o be te vrẹ no riẹriẹriẹ kẹle.+

9 Ọvọ ọsosuọ na o wo izi nọ a je lele evaọ iruo ọrẹri gbe oria ọrẹri+ evaọ otọakpọ. 2 Keme uwou-udhu nọ a bọ na u wo ubrukpẹ ọsosuọ, onọ eware nana e jọ: ọkpọ-edada ukpẹ+ na gbe emẹjẹ na avọ ebrẹdi nọ a ro mudhe kẹ Ọghẹnẹ* nọ a fihọ iẹe;+ yọ a se rie Oria Ọrẹri na.+ 3 Rekọ obemu ekọtini avọ ivẹ+ na ubrukpẹ obeva uwou-udhu na nọ a se Ọrẹri Erẹri na+ o jọ. 4 Eware nọ e jọ oria Ọrẹri Erẹri na họ, omodhe insẹnse igoru+ gbe etehe ọvọ na+ nọ a rehọ igoru tamu oma riẹ soso,+ yọ omothẹ igoru nọ a fi emana họ+ gbe ọkpọ Erọn nọ ọ dhẹ idodo+ gbe ewẹ-itho ekpakpala eme ọvọ na+ e jọ eva etehe ọvọ na; 5 yọ emema chẹrub ivẹ nọ i bi lo e jọ ehru riẹ, nọ uwoho rai u ruru ururu ẹruẹrẹhọ na.*+ Rekọ orọnọ oke nana ma rẹ rọ ta eme buobu kpahe eware nana ha.

6 Nọ a ru eware nana enẹ no, izerẹ na e jẹ hae ruọ ubrukpẹ ọsosuọ uwou-udhu na kẹse kẹse nyai ru iruo ọrẹri na;+ 7 rekọ ozerẹ okpehru na ọvo ọ rẹ ruọ ubrukpẹ avọ ivẹ na ẹsiẹvo ẹgbukpe,+ yọ ọ rẹ ruọ eva ababọ azẹ hẹ,+ onọ o re ro dhe idhe kẹ omariẹ+ jẹ rọkẹ izieraha nọ ahwo na+ a rọ ogbori raha. 8 Fikiere ẹzi ọfuafo na o dhesẹ vevẹ nọ okenọ uwou-udhu ọsosuọ na o jariẹ yọ a ri dhesẹ edhere nọ a rẹ rọ ruọ oria ọrẹri na via ha.+ 9 Uwou-udhu nana o rrọ oware oriruo kẹ oke nana,+ yọ evaọ ọruẹrẹfihotọ nana a be kẹ ekẹ je bi dhe idhe.+ Rekọ, eware nana e rẹ sai ru obruoziẹ-iroro ohwo nọ o bi ru iruo ọrẹri jọ gbagba ha.+ 10 Eware nọ i wobọ kpahe kpobi họ emu gbe idi gbe oghoghẹrẹ idhere nọ a re ro ru oma ahwo hayo eware fo.*+ E jọ izi nọ i kiekpahe ugboma na,+ yọ a fi rai họ bọo oke nọ a fihọ nọ a rẹ rọ kpọ eware vi.

11 Rekọ nọ Kristi ọ nyaze wọhọ ozerẹ okpehru ọrọ emamọ eware nọ e via no na, ọ ruọ eva uwou-udhu nọ o mae rro jẹ mae rrọ gbagba na, onọ a rọ abọ bọ họ, koyehọ, onọ o rrọ orọ otọakpọ na ha. 12 Ọ ruọ oria ọrẹri na, orọnikọ avọ azẹ ewe gbe ọrọ emọ iruẹ hẹ, rekọ avọ azẹ obọriẹ,+ onọ o ru ẹsiẹvo rọkẹ oke kpobi, ọ tẹ wha esiwo* ebẹdẹ bẹdẹ se omai.+ 13 Keme otẹrọnọ azẹ ewe gbe ọrọ iruẹ+ gbe enwo ọmọ eruẹ nọ a frẹ ku enọ i zue oma u re ru ai fo evaọ ugboma,+ 14 ẹvẹ azẹ Kristi,+ ọnọ ọ rehọ ẹkwoma ẹzi ebẹdẹ bẹdẹ na rọ omariẹ dhe idhe nọ e kare epe kẹ Ọghẹnẹ, u re ru obruoziẹ-iroro mai fo no iruo ifofe+ te re ma sai ru iruo ọrẹri kẹ Ọghẹnẹ nọ ọ rrọ uzuazọ na?+

15 Oyejabọ nọ ọ rọ rrọ obruthe ọvọ ọkpokpọ,+ keme o whu rọ hwosa ẹtanigbo+ ro si ai no igbo izieraha nọ a raha evaọ otọ ọvọ ọsosuọ na, re enọ a se na a ruẹsi wo eyaa ukuoriọ ebẹdẹ bẹdẹ na.+ 16 Keme nọ a tẹ re ọvọ kugbe Ọghẹnẹ, o rẹ gwọlọ nọ ohwo-akpọ nọ ọ re ọvọ na* o re whu, 17 keme uwhu u re ru ọvọ wo iruo, nọ orọnọ ọvọ o re wo iruo ho nọ ohwo-akpọ nọ ọ re ọvọ na ọ tẹ gbẹ rrọ uzuazọ na. 18 Fikiere ọvọ ọsosuọ na o mu iruo họ ababọ azẹ hẹ. 19 Keme nọ Mosis ọ fodẹ ijaje kpobi nọ e rrọ evaọ Uzi na kẹ ahwo na kpobi no, ọ tẹ rehọ azẹ emọ iruẹ gbe ọrọ ewe, ọ tẹ rọ ame gua ae. Ọ tẹ rehọ iwhulu ọwawae ọgbagba nọ a gba fihọ umure hisọp rọ frẹ azẹ na ku obe* na gbe ahwo na kpobi, 20 ọ tẹ ta nọ: “Onana họ azẹ ọvọ nọ Ọghẹnẹ o jie uzi kẹ owhai nọ wha re koko na.”+ 21 Ọ tẹ jẹ frẹ azẹ na ku uwou-udhu na gbe ekwakwa kpobi nọ a bi ro ru iruo ọrẹri* na.+ 22 Ẹhẹ, wọhọ epanọ o jọ evaọ otọ Uzi na, azẹ a re ro ru enwenọ eware kpobi fo,+ yọ a gbe ku azẹ lahwe he, a rẹ rọ izieraha rọvrẹ ohwo ho.+

23 Fikiere, o roja nọ a rẹ rọ idhere nana ro ru eware nọ e rrọ oriruo eware+ obọ idhiwu na fo,+ rekọ eware obọ idhiwu na e gwọlọ idheidhe nọ i woma vi enana thethabọ. 24 Keme orọnikọ oria ọrẹri nọ a rọ abọ bọ+ oye Kristi ọ ruọ eva ha, onọ o rrọ oriruo ugogo oria na,+ rekọ ọ ruọ odhiwu dẹẹ,+ re ọ romavia evaọ aro* Ọghẹnẹ fiki mai.+ 25 Orọnikọ o ru onana re ọ hae rọ omariẹ dhe idhe kẹse kẹse he, wọhọ epanọ ozerẹ okpehru na ọ jẹ hae ruọ eva oria ọrẹri na kukpe kukpe+ avọ azẹ nọ ọ rrọ ọriẹ hẹ. 26 O hae jọ ere, ọ hae ruẹ uye unuẹse buobu no emuhọ akpọ na ze.* Rekọ enẹna o dhesẹ omariẹ via ẹsiẹvo rọkẹ oke kpobi evaọ urere uyero-akpọ* na re o si uzioraha no ẹkwoma omariẹ nọ o ro dhe idhe.+ 27 Yọ nwane wọhọ epanọ ahwo a re whu ẹsiẹvo rọkẹ oke kpobi, kẹsena a ve gu ai ẹdhọ na, 28 ere Kristi ọ rọ omariẹ dhe idhe ẹsiẹvo rọkẹ oke kpobi re ọ wha izieraha ahwo buobu vrẹ;+ yọ orọ avọ isiava nọ ọ te romavia, o te jọ re ọ wha uzioraha vrẹ hẹ,* yọ enọ e be rọ ọwhọ gwọlọ iẹe re o siwi ai a te ruẹ e riẹ.+

10 Keme nọ orọnọ Uzi na u wo uwoho+ eware iwoma nọ e te tha na,+ orọnọ ugogo eware na dẹẹ hẹ na, o* rẹ sae rọ ẹkwoma idheidhe nọ a re dhe ẹsikpobi kukpe kukpe na ro ru enọ e be gọ Ọghẹnẹ jọ gbagba vievie he.+ 2 O hae jọ nọ ere o rrọ, kọ a gbẹ hae siọ idheidhe nọ a jẹ hai dhe na ba? Keme nọ a te ru enọ i bi ru iruo ọrẹri fo no a re gbe wo udu obrukpe fiki izieraha ofa ha. 3 Ukpoye, idheidhe nana i je ru ae kareghẹhọ izieraha rai kukpe kukpe,+ 4 keme o lọhọ họ re azẹ iruẹ gbe ọrọ ewe o si izieraha no.

5 Fikiere, nọ ọ nyaze akpọ na, ọ ta nọ: “‘Whọ gwọlọ idheidhe erao gbe idhe efa ha, rekọ whọ ruẹrẹ ugboma họ kẹ omẹ. 6 Who wo evawere kpahe idhe emahọ gbe idhe uzioraha ha.’+ 7 Fikiere mẹ tẹ ta nọ: ‘Rri! Mẹ nyaze no (a jọ uko-obe na* kere kpahe omẹ) re me ru oreva ra, O Ọghẹnẹ.’”+ 8 Nọ ọ kake ta no nọ: “Whọ gwọlọ idheidhe erao gbe idhe efa gbe idhe emahọ gbe idhe uzioraha ha, yọ who wo evawere kpahe ae he,” koyehọ, idheidhe nọ a re dhe wọhọ epanọ Uzi na o ta, 9 kẹsena ọ tẹ ta nọ: “Rri! Mẹ nyaze no re me ru oreva ra.”+ O si ọruẹrẹfihotọ ọsosuọ na no re ọ ruẹse rehọ ọrọ avọ ivẹ na mu. 10 A rọ ẹkwoma “oreva”+ nana ru omai fo no ẹkwoma ugboma Jesu Kristi nọ o ro dhe idhe ẹsiẹvo rọkẹ oke kpobi.+

11 Ofariẹ, ozerẹ kpobi ọ rẹ ruọ oria iruo riẹ kẹdẹ kẹdẹ re o ru iruo ọrẹri*+ je dhe oghẹrẹ idhe evona ẹsikpobi,+ enọ e rẹ sai si izieraha no riẹriẹriẹ vievie he.+ 12 Rekọ ọzae nana o dhe idhe ẹsiẹvo fiki izieraha rọkẹ oke kpobi, ọ tẹ keria obọze Ọghẹnẹ,+ 13 no oke yena vrẹ, ọ be hẹrẹ bẹsenọ a re ru ewegrẹ riẹ họ akpala nọ ọ rẹ rọ awọ riẹ kpahe.+ 14 Keme ẹkwoma idheidhe ẹsiẹvo o ro ru enọ a bi ru fo na rrọ gbagba+ rọkẹ oke kpobi. 15 Ofariẹ, ẹzi ọfuafo na o se isẹri onana kẹ omai re, keme nọ ọ ta no inọ: 16 “‘Onana họ ọvọ nọ mẹ te re kugbe ae nọ edẹ yena e tẹ vrẹ no,’ ere Jihova* ọ ta. ‘Me ti fi izi mẹ họ udu rai, yọ iroro rai me ti kere ai fihọ.’”+ 17 Kẹsena ọ tẹ ta nọ: “Mẹ gbẹ te kareghẹhọ izieraha rai gbe iruẹru iyoma rai ofa ha.”+ 18 Whaọ nọ a tẹ rehọ enana rọvrẹ ae no, o gbẹ gwọlọ idhe nọ a re dhe fiki uzioraha ha.

19 Fikiere, inievo, nọ orọnọ ma rẹ sae nya edhere nọ a rẹ rọ ruọ oria ọrẹri na+ ududu fiki azẹ Jesu na, 20 onọ o rovie kẹ omai wọhọ edhere ọkpokpọ nọ a re ro kpohọ uzuazọ ẹkwoma ekọtini na+ nọ ọ nyavrẹ, koyehọ, uwo riẹ, 21 o tẹ jẹ rọnọ ma wo ozerẹ ologbo nọ ọ be rẹrote uwou Ọghẹnẹ na,+ 22 joma rehọ udu ofuafo gbe ẹrọwọ ọgaga nyabru Ọghẹnẹ, nọ orọnọ a ru udu mai gbe obruoziẹ-iroro omuomu+ mai fo no na ẹkwoma oware* nọ a frẹ ku omai gbe ugboma mai nọ a rọ ame ọfuafo họ fo no na.+ 23 Joma dadamu ewhowho via ẹruore mai na ababọ enuhu,+ keme ọnọ ọ ya eyaa na o re ru ẹme riẹ gba. 24 Joma roro kpahe* ohwohwo re ma sai ru* ohwohwo dhesẹ uyoyou je ru iruo iwoma,+ 25 ma re gbabọkẹ omakokohọ mai hi+ wọhọ epaọ uruemu otujọ, rekọ ma rẹ tuduhọ ohwohwo awọ,+ maero kọ enẹna nọ wha be ruẹ nọ ẹdẹ na o bi si kẹle na.+

26 Keme otẹrọnọ ma te bi keke aro fihọ raha uzi nọ ma wuhrẹ eriariẹ egbagba uzẹme na+ no na, idheidhe ọfa kẹ izieraha o gbẹ riẹ hẹ,+ 27 rekọ oware nọ a re rẹro riẹ họ ẹdhoguo imuozọ gbe ofu ọgaga nọ ọ be te raha enọ e be wọso.+ 28 Ohwo kpobi nọ o dhesẹ orivo kẹ Uzi Mosis o re whu nọ imava hayo imasa i te se isẹri kpahe iẹe, a rẹ re iẹe ohrọ họ.+ 29 Kọ ẹvẹ wha roro nọ uye nọ u re te ohwo nọ o thihi Ọmọ Ọghẹnẹ nyaotọ o rẹ rro te, ọnọ o rri azẹ ọvọ+ na nọ a ro ru ei fo na fihọ oware evere gheghe, jẹ rọ orivo wha ekela se ẹzi nọ Ọghẹnẹ ọ be rọ ẹkwoma riẹ dhesẹ uwowou ulogbo riẹ via?+ 30 Keme ma riẹ Ọnọ ọ ta nọ: “Orukele ọmẹ; mẹ te hwa zihe.” Gbe nọ: “Jihova* o ti bruoziẹ ahwo riẹ.”+ 31 O rrọ oware imuozọ re ohwo o kie fihọ abọ Ọghẹnẹ nọ ọ rrọ uzuazọ na.

32 Rekọ, wha hae kareghẹhọ oke nọ u kpemu, okenọ wha ruẹ elo uzẹme na no,+ wha thihakọ edawọ ilogbo avọ iye sa-sa. 33 Evaọ ẹsejọ a jẹ poviẹ owhai jẹ kẹ owhai uye evaọ ẹgbede,* yọ ẹsejọ wha jọ kugbe* enọ e jẹ ruẹ uye utioye na. 34 Keme wha je weri kẹ inievo nọ e jọ uwou-odi, yọ wha jẹ ghọghọ dede nọ a gboro eyero rai rehọ,+ keme wha riẹ nọ wha wo ukuoriọ nọ u woma vi eware yena, onọ o rẹ raha ha.+

35 Fikiere, wha ku uvẹ nọ wha rẹ rọ ta ẹme ududu na fiẹ hẹ, onọ wha te jọ wo osohwa ulogbo na.+ 36 Keme o gwọlọ nọ wha re thihakọ,+ re nọ wha te ru oreva Ọghẹnẹ no, wha vẹ ruẹsi wo orugba eyaa na. 37 Keme “omoke kakao gheghe” u kiọkọ,+ yọ “ọnọ ọ be nyaze na ọ te ze, ọ te raha oke he.”+ 38 “Rekọ ohwo okiẹrẹe mẹ na o ti wo uzuazọ fiki ẹrọwọ,”+ yọ, “otẹrọnọ o si uke kpemu, eva riẹ e te were omẹ* hẹ.”+ 39 Whaọ ma rrọ oghẹrẹ ahwo nọ a re si uke kpemu kpohọ ọraha ha,+ rekọ oghẹrẹ ahwo nọ a wo ẹrọwọ nọ o re siwi uzuazọ* mai.

11 Ẹrọwọ họ imuẹro inọ oware nọ a bi rẹro riẹ o te via,+ gbe oware nọ o kẹ imuẹro ivevẹ* inọ eware nọ a rẹ ruẹ hẹ e ginẹ rrọ. 2 Fikinọ ahwo oke anwae* a wo oghẹrẹ ẹrọwọ nana, Ọghẹnẹ o dhesẹ via nọ ọ jẹ rai rehọ.

3 Fiki ẹrọwọ, ma vuhumu nọ ẹkwoma ẹme Ọghẹnẹ a rọ ruẹrẹ uyero-akpọ sa-sa* na họ, onọ u ru nọ oware nọ a rẹ ruẹ o rọ romavia no eware nọ a rẹ ruẹ hẹ ze.

4 Fiki ẹrọwọ, Ebẹle o dhe idhe kẹ Ọghẹnẹ, onọ u wo aghare vi orọ Keni,+ yọ a rọ fiki ẹrọwọ yena se isẹri kpahe iẹe inọ o kiẹrẹe, keme Ọghẹnẹ ọ jẹ ekẹ riẹ rehọ,*+ yọ dede nọ o whu no, ọ gbẹ be ta ẹme+ ẹkwoma ẹrọwọ riẹ.

5 Fiki ẹrọwọ, a rehọ Enọk+ vrẹ re o gbe whu uwhu oja ha, yọ a gbẹ jọ oria ovo ruẹ e riẹ hẹ keme Ọghẹnẹ ọ rehọ e riẹ vrẹ no;+ keme taure a tẹ te rehọ iẹe vrẹ, a se isẹri kpahe iẹe nọ o ru Ọghẹnẹ eva were ziezi. 6 Ofariẹ, ababọ ẹrọwọ ohwo ọ rẹ sai ru Ọghẹnẹ eva were ziezi hi, keme ohwo kpobi nọ o bi bru Ọghẹnẹ ze ọ rẹ rọwo nọ ọ rrọ* gbe nọ ọ rẹ hwosa kẹ enọ e be rọ ọwhọ gwọlọ iẹe.+

7 Fiki ẹrọwọ, nọ Ọghẹnẹ ọ kẹ Noa+ unuovẹvẹ kpahe eware nọ a re ruẹ hẹ,+ o dhesẹ nọ o wo ozodhẹ Ọghẹnẹ, o te ku okọ+ re ọ ruẹsi siwi uviuwou riẹ; yọ ọ rọ ẹkwoma ẹrọwọ nana dhesẹ nọ akpọ na ọ reabe,+ a tẹ rọ fiki ẹrọwọ nọ o wo kuenu kẹe nọ o kiẹrẹe.

8 Fiki ẹrọwọ, okenọ a se Abraham,+ o yoẹme ẹkwoma oria nọ ọ te rọ reuku nọ o kpohọ; ọ nyavrẹ dede nọ ọ riẹ obonọ o je kpohọ họ.+ 9 Fiki ẹrọwọ, ọ rria wọhọ ọrara evaọ ẹkwotọ eyaa na wọhọ ohwo nọ ọ rrọ orẹwho ọfa,+ ọ jẹ rria iwou-udhu+ yọ Aiziki avọ Jekọp a jọ kugbei, enọ a gbẹ ya eyaa ọvona kẹ.+ 10 Keme ọ jẹ hẹrẹ okpẹwho nọ u wo uvi otọhotọ, onọ Ọghẹnẹ ọ ma omaa riẹ jẹ bọ.+

11 Fiki ẹrọwọ re, a kẹ Sera ogaga nọ o ro dieva ọmọ* họ, dede nọ ọ kpako vrẹ ọmọ-oyẹ no,+ keme o rri Ọnọ ọ ya eyaa na inọ o re ru ẹme riẹ gba.* 12 Fiki onana, a rọ ẹkwoma ọzae ọvo, ọnọ ọ wọhọ ohwo nọ o whu no+ yẹ emọ+ nọ e rrọ buobu wọhọ isi obọ ehru, je bu wọhọ uwẹkpẹ akotọ abade nọ a rẹ sai kele mu hu.+

13 Ahwo nana kpobi a whu avọ ẹrọwọ dede nọ a ruẹ orugba eyaa na ha;+ rekọ a ruẹ e rai evaọ ugbo+ a te dede ai rehọ je whowho via nọ ae yọ erara gbe enọ e be rria ubroke evaọ ẹkwotọ na. 14 Keme enọ e be ta ẹme enẹ, a bi dhesẹ via nọ a be rọ ọwhọ gwọlọ oria nọ o te jọ orọ obọrai. 15 Ghele na, o hae jọ nọ a jẹ kareghẹhọ oria nọ a no ze na,+ a hai ti wo uvẹ nọ a re ro zihe. 16 Rekọ enẹna a be daoma re a wo oria nọ o mai woma, koyehọ, onọ u wobọ kugbe obọ odhiwu. Fikiere, oma rai o be vuọ Ọghẹnẹ hẹ re a sei Ọghẹnẹ rai,+ keme ọ ruẹrẹ okpẹwho jọ fihọ kẹ ai no.+

17 Fiki ẹrọwọ, nọ a dawo Abraham,+ ọ jẹ te rọ Aiziki dhe idhe,—ọzae nọ ọ rọ evawere dede eyaa na rehọ na ọ jẹ te rọ ọmọzae ọvo riẹ dhe idhe no+— 18 dede nọ a ta kẹe no vẹre inọ: “Oma Aiziki ọnọ a ti se ọmọ* ra o ti no ze.”+ 19 Rekọ o wo iroro nọ Ọghẹnẹ ọ rẹ sae kpare iẹe no uwhu ze dede, yọ o gine woi tobọ no uwhu ze, onọ o jọ oware oriruo.+

20 Fiki ẹrọwọ re, Aiziki ọ ghale Jekọp+ avọ Esọ,+ ọ ta kpahe eware nọ e rrọ obaro tha.

21 Fiki ẹrọwọ, nọ Jekọp ọ kẹle uwhu no,+ ọ ghale emezae Josẹf ọvuọvo+ je guzou kpotọ gọ Ọghẹnẹ avọ ọkpọ nọ o kru rọ tha omariẹ.+

22 Fiki ẹrọwọ, nọ Josẹf ọ kẹle uwhu no, ọ ta nọ emọ Izrẹl i ti no Ijipti, ọ tẹ vuẹ ae* oware nọ a re ru kpahe igbenwa* riẹ.+

23 Fiki ẹrọwọ, ọsẹgboni Mosis a ko riẹ dhere emerae esa nọ a yẹi no,+ keme a ruẹ nọ ọmọ na o wo erru,+ yọ a dhozọ uzi ovie na ha.+ 24 Fiki ẹrọwọ, nọ Mosis ọ rro te ohwo no,+ ọ rọwo nọ a sei ọmọzae ọmọtẹ Fẹro ho,+ 25 ọ salọ nọ a rẹ lahiẹ iẹe kugbe ahwo Ọghẹnẹ ukpenọ o re wo omaweromẹ ubroke ọrọ uzioraha, 26 keme o rri ekela nọ i te rie fikinọ ọ rrọ Kristi* na wọhọ efe nọ o rro vi efe Ijipti, keme ọ tẹrovi osohwa na. 27 Fiki ẹrọwọ, o no Ijipti,+ orọnikọ ọ jẹ dhozọ ofu ovie na ha,+ keme o dikihẹ ga ẹsikpobi wọhọ ẹsenọ ọ be ruẹ Ọnọ a rẹ ruẹ hẹ na.+ 28 Fiki ẹrọwọ, o ru ehaa Ọnyavrẹ na jẹ frẹ azẹ na, re okpikpakpe na o gbe kpe* emọ ọsosuọ rai hi.+

29 Fiki ẹrọwọ, a nya Abade Ọwawae na vrẹ wọhọ epaọ otọ oyaya,+ rekọ okenọ ahwo Ijipti a nyaruọ iẹe, ame na o te ruru ai.+

30 Fiki ẹrọwọ, igbẹhẹ Jẹriko i kie fihọ otọ nọ ahwo na a nya igbẹhẹ na wariẹ họ edẹ ihrẹ no.+ 31 Fiki ẹrọwọ, Rehab ogberẹ na o lele otu aghẹmeeyo na whu hu, keme o dede ekiotọ na rehọ ziezi.+

32 Kọ eme ọfa mẹ rẹ sae ta? Keme oke u ti te he otẹrọnọ mẹ rẹ ta kpahe Gidiọn,+ Berak,+ Samsin,+ Jẹfta,+ Devidi+ jegbe Samuẹle+ avọ eruẹaro edekọ na. 33 Fiki ẹrọwọ, a fi ekwotọ-ivie kparobọ,+ a wha ẹrẹreokie ze, eyaa i te rai obọ,+ a ruru enu ikpohrokpo,+ 34 a raha ogaga erae,+ a vabọ no akọ ọgbọdọ,+ dede nọ a ga ha a ru rai jọ egba,+ a jọ egba evaọ ẹmo,+ a fi egbaẹmo nọ e wọ ohọre ze kparobọ.+ 35 Eyae i dede ahwo rai nọ a kpare no uwhu ze rehọ,+ rekọ a gboja kẹ ezae efa fikinọ a rọwo vro ẹrọwọ rai hi re a ruẹsi siobọno ai, a ru onana re a ruẹsi wo ẹkparomatha nọ ọ mai woma na tobọ. 36 Ẹhẹ, a se ejọ ẹkoko jẹ fa ae, tube viere dede, a rọ egbregba+ kare ejọ je fi ai họ iwou-odi.+ 37 A rọ itho fi ai,+ a dawo e rai, a bẹre rai ewẹ ivẹ,* a rọ ọgbọdọ kpe ai,+ a jẹ hai ku oviẹ-igodẹ gbe oviẹ-ewe họ,+ a ruẹ uye ọbẹwẹ, ukpokpoma,+ a lahiẹ e rai;+ 38 a woma vi ahwo nọ a rẹ jọ akpọ otiọnana. A je ghoro kpenẹ avọ enẹ evaọ idhude gbe igbehru gbe ighogho-itho+ gbe ighogho otọakpọ na.

39 Yọ dede nọ a ta ẹme ezi kpahe ahwo nana kpobi fiki ẹrọwọ rai, a ruẹ orugba eyaa na ha, 40 keme Ọghẹnẹ o wo oware jọ nọ o mai woma họ iroro kẹ omai,+ re a gbe ru ae jọ gbagba siọ omai ba ha.

12 Fikiere, nọ ma wo isẹri buobu nọ e wọhọ ẹgho nọ e wariẹ omai họ na, joma gbolo owha ogbẹgbẹdẹ kpobi kufiẹ gbe uzioraha nọ ma re kie ro lọlọhọ na,+ re ma rọ ithihakọ dhẹ ohrẹ nọ a fihọ kẹ omai na,+ 2 nọ ma be tẹrovi Ọnyukọ Ologbo ọrọ ẹrọwọ mai gbe Ọnọ o bi ru ẹrọwọ mai gbunu na, Jesu.+ Fiki oghọghọ nọ a fihọ aro riẹ o thihakọ ure-oja,* ọ daezọ omovuọ họ, yọ enẹna ọ keria obọze agbara-uvie Ọghẹnẹ.+ 3 Wha romatotọ roro kpahe ọnọ o thihakọ ẹpoviẹ ọgaga otiọye evaọ obọ erahaizi+ nọ e jẹ wha enwoma se omobọ rai, re oma o gbẹ rrọ owhai hi nọ o rẹ rọ bẹ owhai* no.+

4 Evaọ ohọre nọ wha be họre wọso uzioraha yena, wha re họre te epanọ azẹ rai o ro hwẹ hẹ. 5 Yọ uduotahawọ nọ a jọ se owhai emezae riẹ na o thọrọ owhai ẹro no riẹriẹriẹ, onọ o ta nọ: “Ọmọzae mẹ, who rri ọwhọkuo nọ o no obọ Jihova* ze vo ho, yọ o bẹ owhẹ no ho nọ ọ tẹ kpọ owhẹ họ; 6 keme enọ Jihova* o you ọ rẹ whọku, ẹhẹ, ọ rẹ fa* ohwo kpobi nọ ọ rehọ wọhọ ọmọzae riẹ.”+

7 O gwọlọ nọ wha re thihakọ keme oyena yọ abọjọ ọwhọkuo* nọ a be kẹ owhai. Ọghẹnẹ o bi yeri kugbe owhai wọhọ emezae riẹ.+ Kọ ọmọzae jọ ọ rrọ nọ ọsẹ riẹ ọ rẹ whọku hu?+ 8 Rekọ otẹrọnọ ọwhọkuo nana o ri te owhai kpobi hi, kiyọ whai emọ omọfa, orọnikọ emezae riẹ hẹ. 9 Ofariẹ, esẹ nọ i yẹ omai* a jẹ hae whọku omai, yọ ma jẹ kẹ ae adhẹẹ. Kọ ma gbẹ rehọ evawere romakpotọ viere kẹ Ọsẹ nọ ọ rehọ ẹzi ọfuafo salọ omai na re ma ruẹse jọ uzuazọ?+ 10 Keme esẹ mai e jẹ whọku omai omoke wọhọ epanọ u kiehọ evaọ aro rai, rekọ ọ be whọku omai rọkẹ erere mai re ma sae jọ ọrẹri wọhọ ọyomariẹ.+ 11 Evaọ uzẹme, ọwhọkuo ọvo ọ riẹ hẹ nọ o wọhọ nọ o rẹ kẹ evawere evaọ okioke nọ a rọ kẹe, ukpoye o rẹ da;* rekọ uwhremu na, u re ru ahwo nọ o wuhrẹ no mọ ubi udhedhẹ nọ u re no ẹrẹreokie ze.

12 Fikiere, wha ru abọ nọ i kie fihọ otọ yọlọ na ga je ru ighilawọ nọ e ga ha na ga,+ 13 jẹ hai ru idhere nọ awọ rai ọ be nya liọ,+ re abọ-oma na nọ ọ ko na o gbe no ẹta ha, ukpoye, u ve kpo ruẹrẹhọ. 14 Wha daoma lele ahwo kpobi rria dhedhẹ,+ jẹ jọ ọrẹri,*+ keme ababọ onana ohwo ọvo ọ sae ruẹ Olori na ha. 15 Wha muẹrohotọ ziezi re ohwo nọ Ọghẹnẹ o re dhesẹ uwowou ulogbo riẹ kẹ hẹ ọ gbẹ jọ udevie rai hi, re owọ-ure enua ovo o gbe vi lahwe re o wha uye ze je gbe ibuobu ku hu.+ 16 Wha re je muẹrohotọ re wha ruẹ nọ ohwo ọvo ọ rrọ udevie rai nọ o bi gbe-ọfariẹ* hẹ hayo ohwo nọ o se eware nọ e rrọ ọrẹri gboja ha, wọhọ Esọ, ọnọ o siobọno ọkwa ọmọ-ọkpako nọ ọ jọ fiki emu ẹsiẹvo.+ 17 Keme wha riẹ nọ uwhremu na nọ ọ jẹ gwọlọ nọ o re wo oghale na, a rọwo kẹe he; keme dede nọ ọ viẹ gaga re ọsẹ riẹ o nwene iroro,+ oviẹ riẹ u nwene oware ovo ho.*

18 Keme orọnikọ ugbehru nọ a rẹ sae rọ obọ te oye wha nyaze kẹle he,+ onọ erae e be jọ to,+ nọ ẹgho ọlala gbe ebi ọlala gbe ofou ọwhibo e rrọ,+ 19 nọ a jọ yo edo ọgba+ gbe uvou nọ o be ta ẹme,+ onọ ahwo na a yo, a tẹ jẹ lẹ nọ a gbẹ ta ẹme kẹ ae vrẹ ere he.+ 20 Keme ozọ u mu rai gaga fiki ujaje na, inọ: “O tẹ make rọnọ arao ọ rọ oma te ugbehru na dede, a rẹ rọ itho fi ei kpe.”+ 21 Eware nọ e jẹ romavia na i muozọ gaga te epanọ Mosis ọ rọ ta nọ: “Ozọ u bi mu omẹ, me te je bi nuhu.”+ 22 Rekọ wha nyaze kẹle Ugbehru Zayọn+ gbe okpẹwho Ọghẹnẹ nọ ọ rrọ uzuazọ na no, Jerusalẹm obọ odhiwu,+ gbe ikọ-odhiwu gbidi gbidi* 23 nọ i kokohọ,+ gbe ukoko ọmọ ọsosuọ na nọ a kere edẹ rai họ obọ idhiwu na no, gbe Ọghẹnẹ nọ ọ rrọ Obruoziẹ ahwo kpobi,+ gbe uzuazọ ikiẹrẹe na+ nọ a rọ ẹzi salọ nọ a ru gbagba no,+ 24 gbe Jesu obruthe+ ọvọ ọkpokpọ,+ gbe azẹ nọ a frẹ ku omai na, nọ o be ta ẹme evaọ edhere nọ o woma vi azẹ Ebẹle.+

25 Wha daoma ruẹ nọ wha gaviezọ* kẹ ọnọ ọ be ta ẹme na. Keme otẹrọnọ enọ e gaviezọ họ rọkẹ ọnọ ọ jẹ kẹ unuovẹvẹ Ọghẹnẹ evaọ otọakpọ a sae vabọ họ, ma rẹ sae vabọ vievie he otẹrọnọ ma kiukeku ọnọ ọ be ta ẹme no obọ idhiwu na ze na.+ 26 Evaọ oke yena, uvou riẹ u nuhu otọakpọ na,+ rekọ enẹna ọ ya eyaa no inọ: “Me ti nuhu otọakpọ na ẹsiẹvo ọfa, yọ orọnikọ otọakpọ na ọvo ho, rekọ te odhiwu na re.”+ 27 Whaọ ẹme na “ẹsiẹvo ọfa” u dhesẹ esino eware nọ o bi nuhu na, eware nọ e rrọ iruo-abọ amọfa, re eware nọ o nuhu hu e ruẹsi kiọkọ. 28 Fikiere, nọ orọnọ ma ti wo Uvie nọ a rẹ sai nuhu hu na, joma gbe wo uwowou ulogbo Ọghẹnẹ, onọ ma rẹ sae rọ ẹkwoma riẹ ru iruo ọrẹri evaọ edhere nọ ọ rẹ jẹrehọ, avọ ozodhẹ Ọghẹnẹ gbe ọwhewhe. 29 Keme Ọghẹnẹ mai yọ erae nọ e rẹ to oware muotọ.+

13 Wha gbẹ hai dhesẹ uyoyou-inievo.+ 2 Jọ uruemu ọrara-odederehọ*+ o thọrọ owhai ẹro ho, keme ere otujọ a rọ ghọ ikọ-odhiwu dede nọ a riẹ hẹ.+ 3 Wha hai wo enọ e rrọ uwou-odi*+ họ iroro wọhọ ẹsenọ a fi owhai họ uwou-odi kugbe ai,+ gbe enọ a be lahiẹ, nọ orọnọ whai omarai wha rrọ ugboma na re na.* 4 Jọ ahwo kpobi a rọ ọghọ kẹ orọo, jọ a zue ehwa orọo na ha,+ keme Ọghẹnẹ ọ te rehọ enọ i bi gbe-ọfariẹ* gbe ibruẹnwae guẹdhọ.+ 5 Jọ edhere uzuazọ rai o kare uyoyou ugho,+ jọ onọ wha wo o da owhai ẹro.+ Keme ọ ta nọ: “Mẹ te nyasiọ owhẹ ba vievie he, yọ me ti gbabọkẹ owhẹ vievie he.”+ 6 Fikiere, ma sai kru udu ga ziezi, ma vẹ ta nọ: “Jihova* họ ọnọ o bi fiobọhọ kẹ omẹ; ozọ u re mu omẹ hẹ. Eme ohwo ọ rẹ sai ru omẹ?”+

7 Wha kareghẹhọ enọ e be kobaro evaọ udevie rai,+ enọ e ta ẹme Ọghẹnẹ kẹ owhai, yọ nọ wha bi muẹrohọ eware iwoma nọ i bi no uruemu rai ze na wha rọ aro kele ẹrọwọ rai.+

8 Epanọ Jesu Kristi ọ jọ odẹnukpo, ere ọvona ọ rrọ nẹnẹ, yọ ere ọ te jọ bẹdẹ bẹdẹ.

9 Wha kuvẹ re iwuhrẹ sa-sa nọ i wo ohẹriẹ no enọ ma rọwo na i su owhai thọ họ, keme o mai woma re uwowou ulogbo Ọghẹnẹ o bọ udu na ga viukpọ emuore jọ,* enọ e rẹ kẹ otu nọ e roma kẹ ae erere he.+

10 Ma wo agbada-idhe jọ, onọ ahwo nọ a bi ru iruo ọrẹri evaọ uwou-udhu na a wo udu nọ a rẹ rọ jariẹ re oware ovo ho.+ 11 Keme oma erao nọ ozerẹ okpehru na ọ rehọ azẹ rai ruọ oria ọrẹri na rọkẹ idhe uzioraha na, a rẹ mahe ai no evaọ otafe evuẹ na.+ 12 Fikiere, Jesu ọ ruẹ uye evaọ obọ otafe unuẹthẹ okpẹwho na re,+ re ọ ruẹse rọ azẹ obọriẹ ru ahwo na fo.+ 13 Nọ o rrọ ere na, joma nyabru ei evaọ obọ otafe evuẹ na, re ma wọ owha ekela nọ ọ wọ,+ 14 keme ma jọ etenẹ wo okpẹwho nọ o rrọ ribri hi, ukpoye ma be rọ ọwhọ gwọlọ onọ o be tha na.+ 15 Joma rọ ẹkwoma riẹ dhe idhe ujiro+ kẹ Ọghẹnẹ ẹsikpobi, koyehọ, unu mai+ nọ u re* whowho odẹ riẹ via evaọ ẹgbede.+ 16 Ofariẹ, jọ ewoma oruo gbe oware nọ wha wo nọ wha rẹ ghale kugbe amọfa o thọrọ owhai ẹro ho,+ keme idheidhe itieye e rẹ were Ọghẹnẹ ziezi.+

17 Wha yoẹme kẹ enọ e be kobaro evaọ udevie rai+ jẹ romakpotọ kẹ ae,+ keme a be sẹro rai,* yọ a ti gu epanọ a ru te,+ re a ruẹsi ru onana avọ oghọghọ orọnikọ unuofiẹ hẹ, keme oyena o rẹ wha enwoma se owhai.

18 Wha gbẹ hae lẹ roro omai, keme u mu omai ẹro nọ ma wo obruoziẹ-iroro ọfuafo* nọ ma be gwọlọ ru eware kpobi avọ oruọzewọ na.+ 19 Rekọ mẹ be tuduhọ owhai awọ gaga inọ wha lẹ re a ruẹsi zihe omẹ se owhai vẹrẹ.

20 Enẹna, jọ Ọghẹnẹ udhedhẹ na, ọnọ ọ kpare othuru-igodẹ ologbo+ ọrọ igodẹ na no uwhu ze na, Olori mai Jesu nọ o wo azẹ ọvọ ebẹdẹ bẹdẹ na, 21 ọ kẹ owhai eware iwoma kpobi nọ wha re ro ru oreva riẹ. Ọ be rọ ẹkwoma Jesu Kristi jọ oma mai ru iruo nọ e rẹ were iẹe ziezi. Jọ oruaro u tei bẹdẹ bẹdẹ. Ami.

22 Whaọ inievo, mẹ be tuduhọ owhai awọ nọ wha rọ odiri gaviezọ kẹ eme uduotahawọ nana, keme ileta ekpẹkpẹ me kere se owhai na. 23 Mẹ gwọlọ nọ wha riẹ nọ a siobọno Timoti oniọvo mai no. Ọ tẹ kake nyaze, ma te gbẹ nyaze te ruẹ owhai.

24 Wha yere ahwo kpobi nọ a be kobaro evaọ udevie rai gbe erẹri na kpobi kẹ omẹ. Inievo nọ e rrọ Itali+ a bi yere owhai.

25 Jọ Ọghẹnẹ o dhesẹ uwowou ulogbo riẹ kẹ owhai kpobi.