ILETA JEMIS

1 Jemis,+ ọrigbo Ọghẹnẹ gbe ọrọ Olori na Jesu Kristi, ro se erua ikpegbivẹ na nọ e vaha ruọ eria sa-sa:

Me yere owhai!

2 Inievo mẹ, wha ghọghọ gaga nọ oghoghẹrẹ edawọ i te bi te owhai,+ 3 keme wha riẹ nọ ẹrọwọ rai nọ a dawo evaọ edhere nana o rẹ wha ithihakọ ze.+ 4 Rekọ wha kuvẹ re ithihakọ i ru iruo riẹ gba, re wha sae gbunu jẹ kare afuẹwẹ evaọ kabọ kabọ, oware ovo o gbẹ kare owhai hi.+

5 Fikiere, otẹrọnọ ohwo jọ evaọ usu rai o wo areghẹ tere he, jọ ọ hae yare Ọghẹnẹ,+ keme ọ rẹ kẹ ahwo kpobi no eva ze buobu, yọ ọ rẹ poviẹ ohwo ho,*+ ọ te rehọ iẹe kẹe.+ 6 Rekọ jọ ọ hae yare avọ ẹrọwọ,+ jọ ọ vro vievie he,+ keme ọnọ ọ be vro ọ wọhọ ẹkporo abade nọ ofou ọ be wọ fi kpenẹ avọ enẹ. 7 Evaọ uzẹme, jọ ohwo yena o rẹro nọ o ti wo oware jọ mi Jihova* ha; 8 ohwo yena yọ ọnọ ọ rẹ sae jiroro evo dhobọ họ,+ nọ ọ dọmu hu evaọ idhere riẹ kpobi.

9 Rekọ jọ oniọvo nọ ọ rrọ oruori ọ ghọghọ* fikinọ a kpare riẹ kpehru no,+ 10 jọ ọnọ ọ rrọ ọdafe ọ ghọghọ fikinọ a hrẹ riẹ kpotọ no,+ keme wọhọ ododo obọ ẹwọ o ti lo no. 11 Keme nwane wọhọ epanọ ọre ọ rẹ bẹre ze avọ ẹrrorro ọgaga riẹ u ve ru okakọ obọ ẹwọ whu, ododo riẹ ọ vẹ kpare no, o gbe wo erru hu na, ere ọvona re ọdafe o ti whu evaọ udevie eware nọ o bi le.+

12 Eva e were ohwo nọ ọ ruabọhọ bi thihakọ odawọ,+ keme nọ Ọghẹnẹ o te kuenu kẹe no, o ti wo etu-uvie uzuazọ,+ onọ Jihova* ọ ya eyaa nọ ọ te kẹ enọ i you Rie te urere.+ 13 Nọ odawọ u te te ohwo jọ, jọ ọ ta ha inọ: “Ọghẹnẹ ọ be dawo omẹ na.” Keme a sae rọ eware imuomu rọ dawo Ọghẹnẹ hẹ, yọ ọyomariẹ ọ rẹ rehọ eware itieye dawo ohwo ọvo ho. 14 Rekọ odawọ u re te omomọvo fiki isiuru obọriẹ+ nọ e rẹ wọe jẹ lẹliẹe họ.* 15 Kẹsena nọ isiuru na i te dihọ no, i ve yẹ uzioraha; nọ ohwo ọ jẹ raha uzi no, o vẹ wha uwhu ze.+

16 Inievo iyoyou mẹ, jọ a su owhai thọ họ. 17 Okẹ uwoma kpobi gbe okẹ ogbagba kpobi obọ ehru u re no ze,+ obọ Ọsẹ elo obọ ehru na* u re no ze,+ ọnọ o re nwene he wọhọ uwoho nọ u re go.+ 18 Fikinọ o rrọ oreva riẹ, ọ rọ ẹkwoma ẹme uzẹme na+ rehọ omai lahwe, re ma zihe ruọ ibi ọsosuọ nọ ọ salọ evaọ emama riẹ.+

19 Jọ wha riẹ onana inievo iyoyou mẹ: O gba họ nọ ohwo kpobi ọ rẹ jọ ọnọ ọ rẹ kake gaviezọ, ọnọ ọ rẹ rọ okpakpa ta ẹme he,+ ọnọ ọ rẹ kaki mu ofu hu,+ 20 keme ofu ohwo-akpọ u re ru ei ru oware nọ u kiẹrẹe evaọ aro Ọghẹnẹ hẹ.+ 21 Fikiere, wha siobọno egbegbe kpobi gbe oghẹrẹ eyoma kpobi,*+ re wha rọ ẹwolẹ jẹ ẹme nọ a be kọ fihọ udu rai na rehọ, onọ o rẹ sai siwi owhai.*

22 Rekọ, wha jọ enọ i re ru lele ẹme na+ orọnikọ enọ i re yo ọvo ho, nọ wha be rọ rehọ iroro ethọthọ viẹ omarai họ. 23 Keme otẹrọnọ ohwo jọ ọ tẹ rrọ ọnọ o re yo ẹme na rekọ o re ru ei hi,+ ọ wọhọ ohwo nọ o bi rri ovao riẹ evaọ ughẹgbe. 24 Keme o re rri omariẹ, nọ ọ jẹ nyavrẹ no, oghẹrẹ ohwo nọ ọ rrọ o vẹ nwane thọrọ iẹe ẹro. 25 Rekọ ohwo nọ o re rri uzi ogbagba+ nọ o rẹ wha ufuoma ze na kokodo, ọ vẹ jẹ ruabọhọ iẹe, yọ ọnọ o bi ru lele ẹme na, orọnikọ ọnọ o yo no o vẹ thọrọ iẹe ẹro ho; yọ o ti wo evawere evaọ oware nọ o bi ru na.+

26 Otẹrọnọ ohwo jọ o te bi roro nọ ọ be gọ Ọghẹnẹ, rekọ ọ rẹ kpọ* ẹrọo riẹ hẹ,+ ọ be viẹ udu obọriẹ họ, egagọ riẹ e tẹ jẹ rrọ ofofe. 27 Oghẹrẹ egagọ nọ e rrọ fuafo nọ u gbeku hu evaọ aro Ọghẹnẹ gbe Ọsẹ mai họ: re a rẹrote emọ nọ i wo esẹgbini hi+ avọ eyae-uku+ evaọ oke uye rai,+ jegbe re ohwo o ru omariẹ kare epe evaọ akpọ na.+

2 Inievo mẹ, kọ a sae ta nọ wha bi lele ẹrọwọ Olori mai Jesu Kristi nọ o wo oruaro na kpakiyọ wha bi dhesẹ ọriẹwẹ?+ 2 Keme otẹrọnọ ohwo nọ ọ whẹ emero igoru họ iziabọ riẹ jẹ gọ ẹgọ owowoma ọ ziọ oria nọ wha kokohọ, yọ oyogbe nọ o ku ewu ogbegbe họ ọ nyaze re, 3 kọ wha re rri ọnọ ọ gọ ẹgọ owowoma na avọ ọghọ wha vẹ ta kẹe nọ, “Nyaze te keria emamọ oria nana,” rekọ wha vẹ ta kẹ oyogbe na nọ, “Whẹ, gbe dikihẹ” hayo, “Keria oria yena nọ o rrọ otọ akpala nọ mẹ rẹ rọ awọ mẹ kpahe na”?+ 4 O tẹ rrọ ere, kọ ogbẹrọnọ wha bi rri utu ahwo jọ woma vi ejọ,+ kọ wha gbe ri zihe ruọ ibruoziẹ nọ i bi bruoziẹ omuomu no?+

5 Wha gaviezọ, inievo iyoyou mẹ. Kọ ogbẹrọnọ enọ a rri fihọ iyogbe evaọ akpọ na eye Ọghẹnẹ ọ salọ re a fe evaọ ẹrọwọ+ jẹ jọ ereuku Uvie na, onọ ọ ya eyaa riẹ kẹ enọ i you rie?+ 6 Rekọ wha bi kpomovuọ họ iyogbe na oma. Kọ ogbẹrọnọ edafe na họ enọ i bi kienyẹ owhai+ je bi tu owhai ẹdhọ kpohọ ekọto? 7 Kọ ogbẹrọnọ ae a be ta eme-aghọ kpahe odẹ uwoma nọ a ro se owhai na? 8 Whaọ, otẹrọnọ wha bi koko obọdẹ uzi Ovie na wọhọ epanọ o rrọ ikereakere na inọ, “Who re you ọrivẹ ra wọhọ omobọ ra hrọ,”+ kiyọ wha be riẹ ru. 9 Rekọ otẹrọnọ wha ruabọhọ bi dhesẹ ọriẹwẹ,+ wha be raha uzi, yọ uzi na u brukpe* owhai nọ whai yọ erahaizi.+

10 Keme otẹrọnọ ohwo jọ o bi koko izi na kpobi, rekọ ọ tẹ nyathọ evaọ uzi ovo jọ, yọ ọ raha izi na kpobi no.+ 11 Keme ọnọ ọ ta nọ, “Who re bruẹnwae vievie he,”+ ọye ọvona ọ ta nọ, “Who re kpe ohwo vievie he.”+ Fikiere, otẹrọnọ who bruẹnwae he rekọ who te kpe ohwo, whẹ yọ ọnọ ọ be raha uzi. 12 Wha hae ta ẹme je ru eware wọhọ epanọ enọ a be te rehọ uzi emuyẹ*+ bruoziẹ rai a bi ru. 13 Keme ohwo nọ ọ rẹ re ohrọ họ a te re ohrọ riẹ gbe he okenọ a te rehọ iẹe guẹdhọ.+ Ohwo nọ ọ rẹ re ohrọ ọ rẹ kparobọ evaọ ẹdhoguo.*

14 Inievo mẹ, kọ didi erere ọ riẹ otẹrọnọ ohwo jọ ọ be ta nọ o wo ẹrọwọ rekọ o bi ru iruo ro dhesẹ iẹe via ha?+ Ẹrọwọ yena ọ sai siwi ei hi, kọ ọ sai siwi ei?+ 15 Otẹrọnọ inievo-emezae hayo inievo-emetẹ jọ a wo ewu nọ a re kuhọ họ,* yọ a wo emu nọ o re te ai re evaọ okpẹdẹ na ha, 16 ghele na ohwo jọ evaọ usu rai ọ tẹ be ta kẹ ae nọ, “Wha jọ tou; ajọ wha ruẹ ewu kuhọ jẹ re eva vọ,” rekọ wha kẹ rai oware nọ o kare rai hi, didi erere ọ riẹ?+ 17 Epọvo na re, ẹrọwọ nọ a be rọ iruo dhesẹ via ha, o whu no.+

18 Rekọ, ohwo jọ ọ sae ta nọ: “Who wo ẹrọwọ, me te wo iruo. Ẹvẹ whọ sai ro dhesẹ nọ who wo ẹrọwọ kpakiyọ who bi ru iruo ho? Mẹ te rọ iruo mẹ dhesẹ via kẹ owhẹ nọ me wo ẹrọwọ.” 19 Whọ rọwo nọ Ọghẹnẹ ọvo ọ rrọ, o gbẹ rrọ ere? Whọ be riẹ ru. Rekọ idhivẹri na e rọwo re, yọ a bi nuhu fiki ozọ.+ 20 O, whẹ ọnọ o wo iroro ho na, kọ whọ ginẹ gwọlọ riẹ inọ ẹrọwọ nọ a be rọ iruo dhesẹ via ha yọ ofofe? 21 Kọ ogbẹrọnọ fiki iruo a ro kuenu kẹ Abraham ọsẹ mai inọ o kiẹrẹe okenọ ọ gba Aiziki ọmọzae riẹ fihọ agbada-idhe na no?+ 22 Whọ ruẹ nọ o wo ẹrọwọ o te je ru iruo, yọ iruo riẹ i ru ẹrọwọ riẹ gbunu,+ 23 ikereakere na i te rugba onọ o ta nọ: “Abraham o fi ẹrọwọ họ Jihova,* a te kele iei kẹe wọhọ ẹrẹreokie,”+ a te sei ogbẹnyusu Jihova.*+

24 Wha ruẹ nọ a re kuenu kẹ ohwo nọ o kiẹrẹe fiki iruo orọnọ fiki ẹrọwọ ọvo ho. 25 Ere ọvona, kọ ogbẹrọnọ fiki iruo a ro kuenu kẹ Rehab ogberẹ na inọ o kiẹrẹe, okenọ o dede enyukọ na rehọ ziezi no je dhesẹ edhere ọfa kẹ ae nọ a rọ dhẹ?+ 26 Evaọ uzẹme, wọhọ epanọ ugboma nọ u wo ẹzi hi* u whu no na,+ ere ọvona ẹrọwọ nọ a be rọ iruo dhesẹ via ha o whu no re.+

3 Inievo mẹ, orọnikọ whai kpobi wha rẹ jọ iwuhrẹ hẹ, keme wha riẹ nọ mai nọ ma rrọ iwuhrẹ na ma ti wo ẹdhoguo nọ ọ mae ga.*+ 2 Keme mai kpobi ma re zoruẹ* unuẹse buobu.+ Otẹrọnọ ohwo jọ ọ rẹ ta ẹme thọ họ, kiyọ ohwo ọgbagba ọ rrọ, nọ ọ rẹ sae kpọ* oma riẹ soso re. 3 Nọ ma tẹ rọ ifi gba unu enyenya re a yoẹme kẹ omai, ma rẹ rọ ere kpọ oma rai soso re. 4 Rri ekọ ilogbo re: Dede nọ e rrọ ruaro gaga yọ ofou ọgaga ọ rẹ wọ ae dhẹ, uvi osese gheghe a rẹ rọ kpọ ae kpohọ oria kpobi nọ ohwo nọ ọ rrọ emuokọ na ọ gwọlọ nọ o re kpohọ.

5 Ere ọvona re, ẹrọo na yọ okwakwa osese evaọ ugboma na, ghele na o re seha ilogbo. A rẹ sae rehọ erae esese gheghe tu erae họ igbrẹwọ soso! 6 Ẹrọo na yọ erae re.+ Ẹrọo na yọ okwakwa nọ o vọ avọ emuemu evaọ usu ekwakwa nọ e rrọ ugboma mai na, keme o re gbe oma na soso ku+ je tu erae họ uzuazọ ohwo soso,* yọ Gehena* o re tu erae họ iẹe. 7 Ahwo-akpọ a rẹ sai thuru koghẹrẹ koghẹrẹ erao ẹwọ gbe evra gbe eware nọ e rẹ katiẹ hayo si gbe emama obọ abade, e vẹ reria kugbe ahwo, yọ ahwo-akpọ a gine thuru ae nọ e reria kugbe ahwo no. 8 Rekọ ohwo-akpọ ọvo ọ rẹ sai thuru ẹrọo na reria ha. Ọ rẹ bẹ ẹkpọ jẹ wha enwoma ze, ọ vọ avọ enua nọ e rẹ wha uwhu ze.+ 9 Ma rẹ rehọ iẹe jiri Jihova,* Ọsẹ na, ghele na ma rẹ rehọ iẹe la ahwo eka, enọ a ma “tho Ọghẹnẹ.”+ 10 Evaọ unu ovona eghale gbe ekela i bi no ze.

Inievo mẹ, u kiehọ họ re eware e via enẹ.+ 11 Emamọ ame* avọ ame ọyayare i re no eyeri-ame ọvona ze he, o rẹ via ere? 12 Inievo mẹ, ure ifigi o rẹ mọ ibi olivi hi, yọ ure evaene o rẹ mọ ibi ifigi hi, o rẹ via ere?+ Yọ emamọ ame ọ rẹ sai no ame uwhei ze he.

13 Ono o wo areghẹ gbe otoriẹ evaọ udevie rai? Jọ ọ rehọ emamọ uruemu riẹ dhesẹ via inọ ẹwolẹ nọ areghẹ ọ rẹ wha ze o bi ro ru iruo riẹ. 14 Rekọ otẹrọnọ ihri-eriọ egaga+ gbe ẹwhọ*+ e rrọ udu rai, wha gbe seha+ jẹ ta ọrue wọso uzẹme na ha. 15 Onana họ areghẹ nọ o no obọ ehru ze he; oyena yọ orọ otọakpọ,+ orọ erao, gbe orọ idhivẹri. 16 Keme oria kpobi nọ ihri-eriọ gbe ẹwhọ* e rrọ, ozighi gbe eware iyoma kpobi+ e rẹ jariẹ re.

17 Rekọ enẹ areghẹ nọ o no obọ ehru ze ọ rẹ jọ, orọ ọsosuọ kpobi, ọ rẹ jọ fuafo,+ ọ rẹ jẹ rria dhedhẹ kugbe amọfa,+ o re dhesẹ nọ o wo iroro,*+ rọ unevaze yoẹme, vọ avọ ohrọ-oriọ gbe ewoma oruo,+ o wo ọriẹwẹ hẹ,+ o wo eviẹhọ họ.+ 18 Ofariẹ, a rẹ kọ ubi ẹrẹreokie evaọ uyero udhedhẹ+ rọkẹ enọ i bi ru udhedhẹ.*+

4 Eme ọ be wha ẹmo gbe ohọre nọ e rrọ udevie rai na ze? Kọ ogbẹrọnọ isiuru uwo nọ e rrọ oma rai* họre owhai e be wha onana ze?+ 2 Eware i bi si owhai urru, rekọ wha bi wo ai tobọ họ. Wha bi mukpahe* ohwohwo je bi siuru eware amọfa, ghele na wha be sai wo ai tobọ họ. Wha be họre je bi fi ẹmo.+ Wha bi wo ho keme wha be yare he. 3 Nọ wha tẹ make yare dede, wha bi wo ho keme fiki ẹjiroro ọthọthọ wha be rọ yare, re wha rehọ ae wha isiuru uwo rai họ aro.

4 Ibruẹnwae,* kọ wha gbẹ riẹ nọ usu kugbe akpọ na yọ egrẹ kugbe Ọghẹnẹ? Fikiere, ohwo kpobi nọ ọ gwọlọ jọ ogbẹnyusu akpọ na o bi ru omariẹ họ ọwegrẹ Ọghẹnẹ.+ 5 Hayo kọ wha bi roro nọ igheghe ikereakere na e rọ ta nọ: “Ẹzi nọ ọ be rria eva mai o bi siuru eware avọ ihri-eriọ”?+ 6 Rekọ, uwowou ulogbo nọ Ọghẹnẹ o re dhesẹ o rro vi ẹzi yena. Oyejabọ nọ ikereakere na e rọ ta nọ: “Ọghẹnẹ ọ rẹ wọso enọ i wo omorro,+ rekọ o re dhesẹ uwowou ulogbo kẹ enọ i wo omaurokpotọ.”+

7 Fikiere, wha rehọ omarai kẹ Ọghẹnẹ;+ rekọ wha wọso Ẹdhọ,+ ọ te dhẹ siọ owhai ba.+ 8 Wha si kẹle Ọghẹnẹ, o re ti si kẹle owhai.+ Wha wozẹ abọ rai fo, whai erahaizi,+ je ru udu rai fo,+ whai enọ e be sae jiroro evo dhobọ họ. 9 Wha jọ ọkọkora, wha weri jẹ viẹ.+ Jọ ehwẹ rai i zihe ruọ uweri, jọ oghọghọ rai u zihe ruọ ọkora ọgaga. 10 Wha hrẹ omarai kpotọ evaọ aro Jihova,*+ ọ te kpare owhai kpehru.+

11 Inievo, wha gbẹ ta ẹme wọso ohwohwo ho.+ Ohwo kpobi nọ ọ be ta ẹme wọso oniọvo hayo bruoziẹ kpe oniọvo riẹ ọ be ta ẹme wọso uzi je bi bruoziẹ kpe uzi. Whaọ, otẹrọnọ who bi bruoziẹ kpe uzi, kiyọ whẹ yọ ọnọ o bi koko uzi hi, rekọ obruoziẹ. 12 Ọkẹ-Uzi gbe Obruoziẹ+ ọvo ọ riẹ, ọnọ ọ rẹ sai siwi jẹ sae raha.+ Rekọ, ono họ owhẹ nọ who re ro bruoziẹ kpe ọrivẹ ra?+

13 Wha gaviezọ whai enọ e rẹ ta nọ: “Nẹnẹ hayo odẹnotha ma ti kpohọ okpẹwho yena ma vẹ rria etẹe ẹgbukpe, ma te thueki ma ve wo erere,”+ 14 rekọ wha riẹ oware nọ o te via kẹ uzuazọ rai odẹnotha ha.+ Keme whai yọ igrigri nọ e rẹ romavia omoke jọ e vẹ rayẹ no.+ 15 Ukpoye, u fo re wha ta nọ: “O tẹ ruọ Jihova,*+ ma te jọ uzuazọ ma ve ti ru onana hayo oyena.” 16 Rekọ wha be rọ ehaise rai ya-oma. Ehaise itieye na kpobi yọ umuomu. 17 Fikiere, otẹrọnọ ohwo jọ ọ riẹ epanọ o re ru oware nọ u kiehọ rekọ o bi ru ei hi, yọ uzioraha rọ kẹe.+

5 Wha gaviezọ whai edafe, wha viẹ je bo gaga fiki eware iyoma nọ i bi bru owhai ze.+ 2 Ekwakwa efe rai i gbo no, yọ emera e re iwu rai no.+ 3 Igoru gbe isiliva rai i mu ekagba no, ekagba na i ti se isẹri kpe owhai, yọ e te re uwo-oma rai no. Eware nọ wha kokohọ na e te wọhọ erae evaọ edẹ urere na.+ 4 Rri! Osa iruiruo nọ i vu idhu rai nọ wha rọwo hwa ha u bi bo via, yọ edo oviẹ enọ i vu idhu na nọ a be viẹ kẹ obufihọ u do te ezọ Jihova* olori egbaẹmo no.+ 5 Uzuazọ akpọriọ gbe omaweromẹ wha bi yeri evaọ otọakpọ na. Wha ru udu rai rrọ poriẹ poriẹ evaọ ẹdẹ ikpakpe na.+ 6 Wha brukpe je kpe okiẹrẹe na no. Oyejabọ nọ ọ be rọ wọso owhai na.

7 Fikiere inievo, wha wo odiri bọo oke ọzino* Olori na.+ Rri! Ọwhẹrẹ ọ rẹ hẹrẹ ibi iwoma otọ na, ọ rẹ rọ odiri hẹrẹ bẹsenọ oso ọsosuọ ezi na gbe oso urere ezi na e rẹ rrọ.+ 8 Whai omarai wha wo odiri re;+ wha kru udu rai ga keme oke ọzino* Olori na o kẹle no.+

9 Inievo, wha go* kpahe ohwohwo ho, re a siọ owhai ba ebrukpe.+ Rri! Obruoziẹ na o dikihẹ aro inuethẹ na. 10 Inievo, wha lele oriruo eruẹaro na nọ e ruẹ uye eware iyoma+ je dhesẹ nọ a wo odiri na,+ enọ e rọ odẹ Jihova* ta ẹme.+ 11 Rri! Ma rẹ sae ta nọ enọ i thihakọ a re wo evawere.*+ Wha yo kpahe ithihakọ Job+ jẹ ruẹ epanọ Jihova* o ru kẹe uwhremu na,+ onọ u dhesẹ nọ Jihova* ọ rrọ yoyou gaga* je wo ohrọ-oriọ.+

12 Maero inievo mẹ, wha siọ iyei iduwu ba, wha rehọ odhiwu hayo otọakpọ hayo oware ofa jọ kpobi ro duwu iyei hi. Rekọ jọ “Ee” rai o jọ Ee, “Ijo” rai o jọ Ijo,+ re a gbẹ rọ owhai guẹdhọ họ.

13 Kọ ohwo jọ ọ rrọ udevie rai nọ o wo ẹbẹbẹ? Jọ ọ ruabọhọ olẹ.+ Kọ ohwo jọ ọ riẹ nọ eva e be were? Jọ ọ so ilezi.+ 14 Kọ ohwo jọ ọ riẹ nọ ọ be mọ evaọ udevie rai? Jọ o se ekpako+ ukoko na, re a lẹ kẹe, jẹ rọ ewhri wholo iei+ evaọ odẹ Jihova.* 15 Olẹ nọ a rọ ẹrọwọ lẹ u ve ti ru ọnọ ọ be mọ* na ga, Jihova* ọ vẹ te kpare iẹe kpama. Ofariẹ, otẹrọnọ ọ raha izi, a te rọvrẹ riẹ.

16 Fikiere wha feva izieraha rai via+ kẹ ohwohwo jẹ lẹ kẹ ohwohwo, re a ruẹsi siwi owhai. Olẹ ayare-ọgaga ohwo okiẹrẹe u re ru iruo gaga.*+ 17 Elaejah ọ jọ ohwo wọhọ omai na, ghele na nọ ọ lẹ gaga inọ jọ oso ọ rrọ họ, oso ọ ginẹ rrọ ku otọ na ikpe esa gbe emerae ezeza ha.+ 18 Kẹsena nọ ọ wariẹ lẹ, oso ọ tẹ rrọ no odhiwu ze, ekakọ otọ na e tẹ mọ ibi.+

19 Inievo mẹ, otẹrọnọ a su ohwo jọ nọ ọ rrọ udevie rai thọ no uzẹme na, omọfa jọ o je fiobọhọ kẹe zihe ze, 20 wha riẹ nọ ohwo kpobi nọ o fiobọhọ kẹ ọrahauzi kurẹriẹ+ no edhere ọthọthọ riẹ o ti siwi ei* no uwhu je ti ruru izieraha buobu.+