ILETA ỌSOSUỌ PITA

1 Pita, ukọ+ Jesu Kristi, ro se enọ e be rria ubroke nọ e vaha ruọ eria sa-sa evaọ Pọntọs, Galesha, Kapadosia,+ Esia, gbe Bithinia, enọ a salọ 2 wọhọ epanọ Ọghẹnẹ Ọsẹ na ọ jiroro na fihọ otọ,+ enọ a rọ ẹzi ọfuafo na ru fo,+ re a ruẹse jọ enọ i re yoẹme gbe enọ a frẹ azẹ Jesu Kristi ku:+

Jọ Ọghẹnẹ o dhesẹ uwowou ulogbo riẹ kẹ owhai je ru owhai wo udhedhẹ vi epaọ anwẹdẹ.

3 Jọ ujiro u te Ọghẹnẹ, Ọsẹ Olori mai Jesu Kristi, keme fiki ohrọ ulogbo riẹ, o ru nọ a rọ wariẹ yẹ omai+ re ma wo ẹruore nọ o muẹro*+ ẹkwoma Jesu Kristi nọ a kpare no uwhu ze,+ 4 re ma wo ukuoriọ nọ u re gbo ho, nọ u gbeku hu, nọ o rẹ hiẹ hẹ.+ A ruẹrẹ e riẹ họ obọ idhiwu na kẹ owhai,+ 5 enọ ogaga Ọghẹnẹ o be sẹro fiki ẹrọwọ rai re a wo esiwo nọ a bi ti dhesẹ via evaọ etoke urere na. 6 Fiki onana wha be ghọghọ gaga, dede na evaọ omoke jọ, otẹrọnọ o gbahọ nọ ere o rẹ jọ, edawọ sa-sa e be wha idhọvẹ se owhai,+ 7 re ẹrọwọ rai nọ a be dawo na,+ onọ u wo aghare vi igoru nọ o rẹ raha dede nọ a rọ erae dawo iẹe* no na, o ruẹse wha ujiro gbe oruaro gbe ọghọ ze evaọ oke edhesẹvia Jesu Kristi.+ 8 Dede nọ wha ruẹ e riẹ vievie he, wha you rie. Dede nọ wha be ruẹ e riẹ obọnana ha, wha fi ẹrọwọ họ iẹe jẹ be ghọghọ gaga avọ oghọghọ ulogbo nọ a sai gbiku riẹ hẹ, 9 keme u mu owhai ẹro nọ wha ti wo utee ẹrọwọ rai na tobọ, koyehọ esiwo rai.*+

10 Eruẹaro nọ e ruẹaro kpahe uwowou ulogbo nọ o dhesẹ kẹ owhai na a nabe nọ kpahe esiwo nana jẹ romatotọ kiẹ kpahe iẹe.+ 11 A ruabọhọ jẹ kiẹ kpahe ugogo oke hayo ezi nọ ẹzi ọfuafo na nọ ọ jọ oma rai o je dhesẹ kpahe Kristi na,+ nọ o je se isẹri kpahotọ kpahe eware nọ Kristi ọ te ruẹ uye rai+ gbe oruaro nọ u ti lele iei. 12 A dhesẹ via kẹ ae nọ orọnikọ omobọ rai a be gbodibo kẹ hẹ, rekọ rọkẹ owhai, rọ kpahe oware nọ a whowho via kẹ owhai no na ẹkwoma enọ i whowho usi uwoma na kẹ owhai avọ obufihọ ẹzi ọfuafo nọ o no obọ odhiwu ze.+ O rrọ isiuru ikọ-odhiwu na gaga re a wo otoriẹ uzedhe eware nana.

13 Fikiere, wha ruẹrẹ iroro rai kpahe kẹ iruo;+ wha sẹro iroro rai ziezi;+ wha fi ẹruore rai họ uwowou ulogbo nọ a ti dhesẹ kẹ owhai evaọ oke edhesẹvia Jesu Kristi na. 14 Wọhọ emọ nọ i bi yoẹme, wha gbẹ kuvẹ hẹ re isiuru nọ wha wo vẹre evaọ okenọ wha jọ igbori e kpọ* owhai, 15 rekọ wọhọ Ọrẹri nọ o se owhai na, whai omarai wha jọ ọrẹri evaọ uruemu rai kpobi,+ 16 keme a kere nọ: “Wha rẹ jọ ọrẹri hrọ, keme mẹ ọrẹri.”+

17 Yọ otẹrọnọ wha bi se Ọsẹ na, ọnọ o re bruoziẹ ababọ ọriẹwẹ+ lele epanọ iruo omomọvo e rrọ na, wha rọ ozodhẹ yeri uzuazọ+ evaọ ubroke nọ wha be rria na. 18 Keme wha riẹ nọ orọnikọ eware nọ e rẹ raha, wọhọ isiliva hayo igoru, a ro si owhai no igbo*+ edhere uzuazọ ufofe rai hi, onọ esẹ-esẹ rai a fihọ otọ kẹ owhai.* 19 Rekọ azẹ ọghaghae a ro siwi owhai,+ onọ o wọhọ orọ omogodẹ nọ ọ rrọ omakọkọ jẹ kare epe,+ orọ Kristi.+ 20 Uzẹme, Ọghẹnẹ ọ salọ e riẹ taure akpọ na o te ti muhọ,*+ rekọ a dhesẹ i rie via evaọ obọ urere etoke nana fiki rai.+ 21 Ẹkwoma riẹ wha rọ rọwo Ọghẹnẹ,+ ọnọ ọ kpare riẹ no uwhu ze+ jẹ kẹe oruaro,+ re wha ruẹsi fi ẹrọwọ gbe ẹruore rai họ Ọghẹnẹ.

22 Enẹna nọ wha ru omarai* fo no ẹkwoma ẹmeoyo kẹ uzẹme na, onọ o wha riẹ ze nọ wha ro wo uyoyou-inievo nọ o kare eviẹhọ na,+ wha you ohwohwo gaga no udu ze.+ 23 Keme a wariẹ yẹ owhai no,+ orọnikọ ẹkwoma ubi nọ u re gbo ho rekọ ẹkwoma ubi nọ u re gbo ho,*+ ẹkwoma ẹme Ọghẹnẹ nọ ọ rrọ uzuazọ jẹ rrọ bẹdẹ bẹdẹ na.+ 24 Keme “uwo kpobi o* wọhọ ẹbe, yọ oruaro riẹ kpobi o wọhọ ododo obọ ẹwọ; ẹbe na o te whu no, ododo na ọ vẹ kpare kie, 25 rekọ ẹme Jihova* ọ rẹ jọ bẹdẹ bẹdẹ.”+ Yọ “ẹme” nana họ usi uwoma na nọ a whowho kẹ owhai na.+

2 Fikiere, wha siobọno eyoma kpobi+ gbe ẹghẹ gbe eviẹhọ gbe ihri-eriọ gbe eme iyoma eta kpobi. 2 Wọhọ emọboba nọ a yẹ obọ,+ wha wo isiuru kẹ ame-ivie ẹme na nọ a rọ oware ofa gua ha na, re wha ruẹse rọ ẹkwoma riẹ rro te epanọ wha re ro wo esiwo,+ 3 keme wha dawo jẹ ruẹ no nọ Olori na ọ rrọ wowou.

4 Nọ wha be nyabru utho nọ o rrọ uzuazọ ze na, onọ ahwo a se,+ rekọ nọ Ọghẹnẹ ọ salọ, nọ o rrọ ghaghae kẹe na,+ 5 whai omarai nọ e rrọ itho nọ e rrọ uzuazọ na, a be rehọ owhai bọ uwou ẹkwoma ẹzi Ọghẹnẹ,+ re wha jọ utu izerẹ ọrẹri, re wha ruẹsi dhe idhe nọ e rọwokugbe ẹzi Ọghẹnẹ,+ enọ ọ rẹ jẹrehọ ẹkwoma Jesu Kristi.+ 6 Keme a jọ Ikereakere na ta nọ: “Rri! Mẹ be wọ utho nọ a salọ họ otọ evaọ Zayọn, utho ubienẹ otọhotọ oghaghae, yọ ohwo ọvuọvo nọ o bi fi ẹrọwọ họ iẹe nọ u re kiekpe* ọ riẹ hẹ.”+

7 Fikiere, whai ọ rrọ ghaghae kẹ, keme wha rọwo e riẹ; rekọ rọkẹ enọ e rọwo ho, “utho nọ ebebabọ na e se,+ oye u zihe ruọ utho ubienẹ nọ o mai wuzou* no na”+ 8 gbe “utho ezoruẹ gbe utho ọzadhe.”+ A bi zoruẹ fikinọ a be rọwo ru lele ẹme na ha. Yọ enẹ a ta nọ o rẹ jọ kẹ ahwo otiọye. 9 Rekọ whai yọ “uyẹ nọ a salọ, izerẹ nọ e rrọ ivie, orẹwho ọrẹri,+ ahwo nọ a rẹ jọ okwakwa obọdẹ,+ re wha ruẹse jọ oria kpobi whowho ewoma”*+ Ọnọ o se owhai no ebi ziọ elo igbunu riẹ.+ 10 Keme a rri owhai fihọ ahwo vẹre he, rekọ enẹna whai yọ ahwo Ọghẹnẹ;+ a dhesẹ ohrọ kẹ owhai vẹre he, rekọ enẹna a dhesẹ ohrọ kẹ owhai no.+

11 Iyoyou, mẹ be tuduhọ owhai awọ nọ wọhọ enọ e rrọ orẹwho ọfa gbe enọ e be rria ubroke,+ wha hai siomano isiuru uwo+ nọ i bi fi owhai* ẹmo na.+ 12 Wha sẹro emamọ uruemu rai evaọ udevie erẹwho na,+ re nọ a tẹ be ta nọ whai yọ enọ i bi ru oware uyoma, a vẹ te ruẹ iruo iwoma rai,+ u ve ti ru nọ a te rọ kẹ Ọghẹnẹ oruaro evaọ ẹdẹ ọkiẹriwo riẹ.

13 Fiki Olori na, wha romakpotọ kẹ ọruẹrẹfihotọ* ohwo-akpọ kpobi,+ makọ ovie+ keme o kpehru vi amọfa, 14 hayo isu ubrotọ keme ọye ọ kẹ rai udu re a kẹ enọ i bi ru oware uyoma uye, rekọ a ve jiri enọ i bi ru ewoma.+ 15 Keme oreva Ọghẹnẹ o rrọ inọ wha te bi ru ewoma, wha sai ruru unu* enọ e kare iroro nọ e be rọ ogbori ta ẹme.+ 16 Wha yeri wọhọ emuyẹ,+ wha du rehọ ufuoma rai rọ foma ru eyoma ha,+ rekọ wọhọ erigbo Ọghẹnẹ.+ 17 Wha rọ ọghọ kẹ oghẹrẹ ahwo kpobi,+ wha you inievo na kpobi,+ wha dhozọ Ọghẹnẹ,+ wha rọ ọghọ kẹ ovie.+

18 Jọ idibo e romakpotọ kẹ ilori rai avọ uvi ozodhẹ,+ orọnikọ ilori nọ i woma je wo ororokẹ* ọvo ho, rekọ te enọ o rrọ bẹbẹ re a ru eva were. 19 Keme emamọ oware o rrọ nọ ohwo o te bi thihakọ ẹbẹbẹ* jẹ be ruẹ uye okienyẹ fikinọ ọ gwọlọ wo emamọ obruoziẹ-iroro evaọ aro Ọghẹnẹ.+ 20 Kọ didi erere ọ riẹ nọ a te bi kpe owhẹ fikinọ whọ raha uzi yọ who bi thihakọ riẹ?+ Rekọ otẹrọnọ who bi thihakọ uye fikinọ who bi ru ewoma, onana yọ oware nọ u kiehọ evaọ aro Ọghẹnẹ.+

21 Ẹhẹ, fiki onana a ro se owhai, keme makọ Kristi dede ọ ruẹ uye kẹ owhai,+ ọ nyasiọ oriruo ba kẹ owhai re wha lele ithihi riẹ kpekpekpe.+ 22 Ọ raha uzi ovo ho,+ yọ a jọ unu riẹ ruẹ eviẹhọ họ.+ 23 Nọ a jẹ lae eka,*+ ọ la eka* zihe he.+ Nọ ọ jẹ ruẹ uye,+ o seha kẹ enọ e jẹ kẹe uye he, rekọ o mu omariẹ họ obọ Ọnọ o re bruoziẹ+ okiẹrẹe na. 24 Ọyomariẹ ọ wọ izieraha mai+ họ ugboma obọriẹ evaọ ehru ure na,+ re ma ruẹsi whu evaọ abọ izieraha,* ma ve yeri uzuazọ ẹrẹreokie. Yọ “ẹkwoma omonwa riẹ a ro siwi owhai.”+ 25 Keme wha jọ wọhọ igodẹ nọ i bi vru,+ rekọ enẹna wha zihe bru othuru-igodẹ+ gbe ọsẹro uzuazọ* rai ze no.

3 Epọvo na re, whai eyae wha romakpotọ kẹ ezae rai,+ re otẹrọnọ ejọ i bi lele Ẹme Ọghẹnẹ hẹ, ẹsejọhọ a vẹ te rọ fiki emamọ uruemu eyae rai kurẹriẹ ababọ ẹme nọ a ta kẹ ae,+ 2 keme a be rọ ẹro ruẹ uruemu ezi* rai+ gbe adhẹẹ odidi nọ wha wo. 3 Wha jọ osẹ* rai o jọ orọ okafe he—igbeto ime gbe eware osẹ igoru+ hayo emamọ iwu nọ a re kuhọ— 4 rekọ jọ o jọ orọ ohwo odidi obọ udu na nọ o rehọ ẹzi udhedhẹ gbe ẹwolẹ gọ ẹgọ nọ o re gbo ho,*+ onọ o rrọ ghaghae gaga evaọ aro Ọghẹnẹ. 5 Keme enẹ eyae nọ e jọ ọrẹri evaọ oke nọ u kpemu nọ i fi ẹruore rai họ Ọghẹnẹ a jẹ rọ whẹ erru họ omarai, a jẹ romakpotọ kẹ ezae rai, 6 nwane wọhọ epanọ Sera o je yoẹme kẹ Abraham, nọ o je sei olori.+ Whai yọ emọ riẹ otẹrọnọ wha ruabọhọ ewoma oruo, wha gbẹ jẹ kuvẹ re oware ovo u ru ozọ mu owhai hi.+

7 Epọvo na re, whai ezae, wha hae rehọ otoriẹ lele eyae rai yeri.* Wha rọ ọghọ kẹ ae+ wọhọ epanọ wha re ru okwakwa nọ o rrọ hẹhẹhẹ gaga na, nọ orọnọ te ai te owhai wha gbẹ rrọ ereuku+ uzuazọ fiki aruoriwo ologbo Ọghẹnẹ, re elẹ rai i gbe brudhe he.

8 Orọ urere, jọ whai kpobi wha wo iroro evo,*+ wo ororokẹ kẹ ohwohwo, wo uyoyou-inievo, uvi ọdawẹ,+ gbe omaurokpotọ.+ 9 Wha rehọ eyoma hwosa eyoma ha+ hayo rọ ekela hwosa ekela ha.+ Ukpoye, wha rehọ emamọ ẹme* hwa zihe,+ keme fiki onana a ro se owhai, re wha ruẹse reuku oghale.

10 Keme “ohwo kpobi nọ uzuazọ o were, ọ tẹ jẹ gwọlọ ruẹ edẹ iwoma ọ rẹ kpọ ẹrọo riẹ re o siọ eme iyoma ba ẹta,+ yọ ọ rẹ rehọ igbenu riẹ ta eme eviẹhọ họ. 11 Jọ o siomano oware nọ u yoma+ re o ru oware nọ u woma;+ jọ ọ gwọlọ udhedhẹ je lei.*+ 12 Keme ibiaro Jihova* i bi rri ikiẹrẹe na, yọ ezọ riẹ i bi yo olẹ ayare-ọgaga rai,+ rekọ ovao Jihova* o wọso enọ i bi ru eware iyoma.”+

13 Evaọ uzẹme, ono ọ rẹ nwa owhai oma nọ wha tẹ be rọ ajọwha ru oware nọ u woma?+ 14 Rekọ wha tẹ make be ruẹ uye fiki ẹrẹreokie, jọ eva e were owhai.+ Ghele na, wha dhozọ oware nọ a be dhozọ riẹ hẹ,* wha ruawa gbe he.+ 15 Rekọ wha jọ udu rai rọwo inọ Kristi họ Olori, ọ tẹ jẹ rrọ ọrẹri, wha ruẹrẹ oma kpahe ẹsikpobi re wha ta ẹkẹ-unu rai kẹ ohwo kpobi nọ ọ nọ owhai kpahe ẹjiroro nọ wha ro wo ẹruore nọ wha wo na, rekọ wha ru ere avọ udu uwowolẹ+ gbe adhẹẹ odidi.+

16 Wha sẹro emamọ obruoziẹ-iroro rai,+ re evaọ edhere kpobi nọ a be rọ ta ẹme wọso owhai, oma o vẹ te vuọ enọ e be ta ẹme wọso owhai+ na fiki emamọ uruemu rai, nọ wha rrọ enọ i bi lele Kristi na.+ 17 Keme o mai woma re wha ruẹ uye fikinọ wha bi ru ewoma,+ o tẹ rrọ oreva Ọghẹnẹ nọ ọ rẹ kuvẹ riẹ, viukpenọ wha rẹ ruẹ uye fikinọ wha bi ru eyoma.+ 18 Keme Kristi o whu ẹsiẹvo rọkẹ oke kpobi fiki izieraha ahwo,+ ohwo okiẹrẹe nọ o whu fiki ahwo nọ a kiẹrẹe he,+ re ọ ruẹsi su owhai bru Ọghẹnẹ.+ A kpe rie evaọ oma uwo+ rekọ a kpare riẹ ziọ uzuazọ evaọ oma ẹzi.+ 19 Enẹ ọ rọ nyavrẹ, o te whowho ovuẹ kẹ izi nọ e rrọ uwou-odi,+ 20 enọ e ghẹmeeyo vẹre evaọ okenọ Ọghẹnẹ ọ jẹ rọ odiri hẹrẹ* evaọ ẹdẹ Noa,+ okenọ a je ro ku okọ na,+ onọ umutho ahwo, koyehọ imaree* a ruọ eva nọ a rọ zọ evaọ owhe na.+

21 Oware nọ o wọhọ onana, koyehọ ame-ọhọ, u bi siwi owhai enẹna re (orọnikọ ẹkwoma egbegbe nọ a rẹ họ no ugboma na ha, rekọ ẹkwoma Ọghẹnẹ nọ a rẹ yare inọ ọ kẹ ohwo emamọ obruoziẹ-iroro),+ fiki ẹkparomatha Jesu Kristi. 22 Ọ rrọ obọze Ọghẹnẹ,+ keme o kpohọ odhiwu, Ọghẹnẹ o te ru ikọ-odhiwu gbe enọ i wo udu-esuo gbe ogaga re a jọ otọ riẹ.+

4 Nọ orọnọ Kristi ọ ruẹ uye evaọ oma uwo na,+ whai omarai re wha ruẹrẹ oma kpahe re wha wo oghẹrẹ iroro* riẹ; keme ohwo nọ ọ ruẹ uye evaọ oma uwo na o siobọno uzioraha no,+ 2 re ọ gbẹ rehọ edẹ uzuazọ riẹ nọ i kiọkọ evaọ oma uwo na ro yeri uzuazọ kẹ isiuru ahwo-akpọ họ,+ rekọ rọkẹ oreva Ọghẹnẹ.+ 3 Keme oke nọ o vrẹ no nọ wha je ro ru oreva erẹwho na u te,+ okenọ wha je zue evaọ iruemu nọ i fo ho nọ a re ru ababọ omovuọ,* wo isiuru egaga kẹ oware uyoma, jẹ da idi vrẹta, ru ehaa nọ a rẹ jọ ru eware odode,* ehaa idieda, gbe edhọgọ etọtọ.+ 4 U bi gbe ae unu inọ wha gbe bi kuomagbe ai evaọ iruemu iyoma yena ha, fikiere a tẹ be ta eme iyoma kpahe owhai.+ 5 Rekọ ahwo nana a ti gu epanọ a ru te kẹ ọnọ ọ ruẹrẹ oma kpahe no re o bruoziẹ enọ e rrọ uzuazọ gbe enọ i whu no.+ 6 Ẹhẹ, fiki onana a ro whowho usi uwoma na kẹ enọ i whu no na re,+ re dede nọ a bruoziẹ rai no evaọ uwo evaọ eriwo ahwo, a vẹ te sae rria uzuazọ rọwokugbe ẹzi na evaọ eriwo Ọghẹnẹ.

7 Rekọ urere eware kpobi o kẹle no. Fikiere, wha wo iroro nọ e gba,+ jẹ jaja aro vi* evaọ abọ olẹ.+ 8 Maero, wha wo uyoyou ogaga kẹ ohwohwo,+ keme uyoyou u re ruru izieraha buobu.+ 9 Wha hai dede ohwohwo rehọ ababọ ẹgo.+ 10 Jọ whai omomọvo ọ rehọ okẹ nọ a kẹ riẹ rọ gbodibo kẹ ohwohwo wọhọ emamọ idibo nọ Ọghẹnẹ o dhesẹ uwowou ulogbo riẹ kẹ, onọ o dhesẹ via evaọ oghoghẹrẹ idhere sa-sa.+ 11 Otẹrọnọ ohwo jọ ọ be ta ẹme, jọ ọ ta eme nọ i no obọ Ọghẹnẹ ze; otẹrọnọ ohwo jọ ọ be gbodibo, jọ ọ rẹroso ẹgba nọ Ọghẹnẹ ọ rẹ kẹ;+ re a ruẹse rọ oruaro kẹ Ọghẹnẹ evaọ eware kpobi+ ẹkwoma Jesu Kristi. Ọye o wo oruaro gbe ogaga bẹdẹ bẹdẹ. Ami.

12 Iyoyou, jọ u gbe owhai unu hu inọ edawọ nọ e wọhọ erae i bi te owhai,+ wọhọ ẹsenọ oware aghẹruẹ jọ o be via kẹ owhai. 13 Ukpoye, wha gbẹ hae ghọghọ+ fiki epanọ wha bi wobọ te evaọ uye-oruẹ Kristi,+ re wha ruẹse ghọghọ jẹ wereva gaga evaọ okenọ a ti dhesẹ oruaro riẹ via.+ 14 Otẹrọnọ a be poviẹ owhai* fiki odẹ Kristi, jọ eva e were owhai,+ keme ẹzi oruaro, koyehọ ẹzi Ọghẹnẹ, ọ rrọ owhai oma.

15 Rekọ, jọ ohwo ọvo evaọ usu rai ọ ruẹ uye fikinọ ọ rrọ ogbulegbu hayo oji hayo orumuomu hayo ọnọ o re mu dhomahọ eme amọfa ha.+ 16 Rekọ otẹrọnọ ohwo jọ ọ be ruẹ uye fikinọ ọ rrọ Oleleikristi, jọ oma o vuọ ẹe he,+ rekọ jọ ọ gbẹ hae kẹ Ọghẹnẹ oruaro nọ a be rọ odẹ nana sei na. 17 Keme enẹna họ oke nọ a fihọ nọ ẹdhoguo na o re ro muhọ, yọ uwou Ọghẹnẹ o ti jo muhọ.+ Whaọ otẹrọnọ mai u bi ro muhọ,+ kọ ẹvẹ o te jọ kẹ enọ e rọwo yoẹme kẹ usi uwoma Ọghẹnẹ na ha?+ 18 “Yọ otẹrọnọ udugaga a bi ro siwi ohwo okiẹrẹe, kọ eme ọ te via kẹ ohwo nọ ọ riẹ Ọghẹnẹ hẹ gbe ọrahauzi?”+ 19 Fikiere, jọ enọ e be ruẹ uye fikinọ a bi ru oreva Ọghẹnẹ a gbẹ hai mu omarai* họ obọ* Ọmemama nọ a re fievahọ nọ a bi ru ewoma na.+

5 Fikiere, mẹ nọ ọ rrọ ọkpako ukoko re, nọ ọ rọ ẹro ruẹ eware nọ Kristi ọ ruẹ uye rai gbe ọnọ o ti wobọ evaọ oruaro nọ a bi ti dhesẹ via na,+ mẹ be yare* ekpako nọ e rrọ udevie rai nọ: 2 Wha sẹro uthuru Ọghẹnẹ+ nọ a rọ kẹ owhai nọ wha rẹrote, wha ru iruo esẹro,* orọnikọ wọhọ oware ọgbahọ họ, rekọ avọ unevaze evaọ aro Ọghẹnẹ;+ orọnọ fiki erere nọ a rẹ rọ ewhariọ wo ho,+ rekọ avọ ọwhọ; 3 yọ orọnikọ wha re ru omarai ilori kẹ enọ e rrọ ukuoriọ Ọghẹnẹ hẹ,+ rekọ wha rẹ jọ oriruo kẹ uthuru na.+ 4 Yọ okenọ a te dhesẹ othuru-igodẹ ologbo na+ via no, a te kẹ owhai etu-uvie oruaro nọ o rẹ hiẹ hẹ.+

5 Epọvo na re, whai ezae nọ e gbẹ maha, wha romakpotọ kẹ ekpako na.+ Rekọ jọ whai kpobi wha rọ omaurokpotọ* gọ ẹgọ ro lele ohwohwo yeri, keme Ọghẹnẹ ọ rẹ wọso enọ i wo omorro, rekọ o re dhesẹ uwowou ulogbo kẹ enọ i wo omaurokpotọ.+

6 Fikiere, wha hrẹ omarai kpotọ fihọ otọ obọ ulogbo Ọghẹnẹ, re ọ ruẹse kpare owhai kpehru nọ oke u te te.+ 7 Wha gbolo awaọruọ* rai kpobi kẹe,+ keme ọ be daezọ rai.+ 8 Wha sẹro iroro rai, wha hai rou.*+ Ọwegrẹ rai, Ẹdhọ, ọ be nya kpenẹ avọ enẹ wọhọ okpohrokpo nọ o bi do enu, be gwọlọ ohwo nọ ọ rẹ re no.+ 9 Rekọ wha dikihẹ ga wọso ẹe,+ wha jọ gaga evaọ ẹrọwọ na, keme wha riẹ nọ inievo rai kpobi* evaọ akpọ na soso a be ruẹ oghẹrẹ iye evona.+ 10 Rekọ nọ wha tẹ ruẹ uye omoke jọ no, Ọghẹnẹ nọ ọ vọ avọ uwowou ulogbo na, nọ o se owhai ziọ oruaro ebẹdẹ bẹdẹ riẹ+ fiki usu nọ wha rrọ kugbe Kristi, o ti wuhrẹ owhai totọ. O ti ru owhai ga,+ o ti ru owhai dikihẹ ga,+ o ti ru owhai dowọ muotọ ziezi. 11 Ọye o wo ogaga bẹdẹ bẹdẹ. Ami.

12 Ẹkwoma Silvanọs,*+ oniọvo nọ me rri nọ o bi kru ẹrọwọ riẹ, me ro kere umutho eme nana se owhai na, re mẹ tuduhọ owhai awọ je se isẹri uzẹme inọ onana họ uvi uwowou ulogbo Ọghẹnẹ. Wha dikihẹ ga evaọ eva riẹ. 13 Aye* nọ ọ rrọ evaọ Babilọn, ọnọ a salọ wọhọ owhai, o bi yere owhai, Mak+ ọmọzae mẹ, o bi yere owhai re. 14 Wha rọ ẹviọlọ uyoyou yere ohwohwo.

Jọ udhedhẹ u te owhai kpobi nọ e rrọ usu kugbe Kristi.