EVIAVIA RỌKẸ JỌN

1 Eware nọ Jesu Kristi o dhesẹ via,* nọ Ọghẹnẹ o rovie via kẹe,+ re o dhesẹ kẹ erigbo riẹ+ eware nọ e te via hrọ kẹle na. Jesu o vi ukọ-odhiwu riẹ ọ tẹ rọ ẹkwoma riẹ rehọ eka dhesẹ ae kẹ Jọn ọrigbo riẹ,+ 2 ọnọ o se isẹri kpahe ẹme nọ Ọghẹnẹ ọ ta gbe isẹri nọ Jesu Kristi o se, ẹhẹ, eware kpobi nọ ọ ruẹ. 3 Eva e rẹ were ohwo nọ o bi se eme eruẹaruẹ nana do via gbe enọ i bi yo, gbe enọ i bi ru lele eware nọ a kere fihọ iẹe,+ keme oke nọ a fihọ na o kẹle no.

4 Mẹ Jọn, me bi kere se ikoko ihrẹ+ nọ e rrọ ubrotọ Esia:

Jọ wha reawere uwowou ulogbo gbe udhedhẹ no obọ “Ọnọ ọ rrọ, nọ ọ jọ, nọ ọ be tha na”+ ze, je no obọ izi ihrẹ+ nọ e rrọ aro agbara-uvie riẹ ze, 5 je no obọ Jesu Kristi ze ọnọ ọ rrọ “Osẹri nọ A re Fievahọ*+ na,” “ọmọ ọsosuọ nọ a kpare no uwhu ze,”+ gbe “Osu ivie akpọ na.”+

Ajọ ọnọ o you omai+ nọ ọ rehọ azẹ obọriẹ si omai no igbo izieraha mai+— 6 ọnọ o ru omai re ma jọ ivie*+ gbe izerẹ+ kẹ Ọghẹnẹ gbe Ọsẹ riẹ na—o wo oruaro gbe ogaga bẹdẹ bẹdẹ. Ami.

7 Rri! Ọ be nyaze avọ ẹgho,+ yọ ibiaro kpobi e te ruẹ e riẹ, te ahwo nọ a duwu i rie; yọ erua otọakpọ na kpobi e te rọ abọ tehe igbama rai avọ uweri fiki riẹ.+ Ẹhẹ, ere o te jọ. Ami.

8 “Mẹ họ Alfa gbe Omẹga,”*+ ere Jihova* Ọghẹnẹ ọ ta, “Ọnọ ọ rrọ, nọ ọ jọ, nọ ọ be tha na, Erumeru na.”+

9 Mẹ Jọn, oniọvo rai gbe ọnọ ọ be ruẹ uye+ je bi thihakọ+ wọhọ owhai, gbe ọnọ o ti lele owhai jọ uvie+ na fiki usu nọ ma rrọ kugbe Jesu,+ mẹ jọ ukoliko Patmọs fiki ẹme nọ mẹ be ta kpahe Ọghẹnẹ gbe isẹri-ise kpahe Jesu. 10 Ẹzi na o ru omẹ jọ evaọ ẹdẹ Olori na, mẹ tẹ jọ obemu mẹ yo edo urru ogaga jọ nọ o wọhọ edo ọgba, 11 nọ o be ta nọ: “Kere eware nọ whọ be ruẹ na fihọ uko-obe re who vi ei se ikoko ihrẹ na: evaọ Ẹfisọs,+ evaọ Smaena,+ evaọ Pẹgamọm,+ evaọ Thiatira,+ evaọ Sadis,+ evaọ Filadelfia,+ gbe evaọ Laodisia.”+

12 Me te kuomarẹriẹ re mẹ ruẹ ohwo nọ ọ be ta ẹme kẹ omẹ na, nọ me kuomarẹriẹ, mẹ tẹ ruẹ ekpọ-edada ikpẹ igoru ihrẹ,+ 13 yọ evaọ udevie ekpọ-edada ikpẹ na mẹ ruẹ ohwo jọ nọ ọ wọhọ ọmọ ohwo,+ nọ o ku ewu othethei nọ o theri te obọ awọ riẹ họ jẹ rehọ ẹwẹ-ohọ igoru mu udu. 14 Ofariẹ, uzou riẹ gbe eto uzou riẹ e jọ fuafo wọhọ iwhulu ọfuafo, wọhọ ekpalekpa-ame, yọ ibiaro riẹ e jọ wọhọ ebruerae,+ 15 awọ riẹ ọ jọ wọhọ ekọpa owowoma+ nọ o bi lo nwranwranwra evaọ umuwou-erae, urru riẹ o jọ wọhọ edo ame obuobu. 16 Isi ihrẹ+ e jọ obọze riẹ, avọ ọgbọdọ akọava nọ ọ rrọ thethei jẹ rrọ dada+ nọ u wolo no unu riẹ ze, ovao* riẹ o jọ wọhọ ọre nọ o bi lo nwranwranwra.+ 17 Nọ mẹ ruẹ e riẹ, me te kie fihọ aro riẹ wọhọ ohwo nọ o whu no.

Ọ tẹ rehọ obọze riẹ kpahe omẹ ọ tẹ ta nọ: “Jọ ozọ u mu owhẹ hẹ. Mẹ họ ọrọ Ọsosuọ+ gbe ọrọ Urere na,+ 18 gbe ọnọ ọ rrọ uzuazọ na,+ me whu,+ rekọ rri! mẹ rrọ uzuazọ, bẹdẹ bẹdẹ,+ yọ isiavẹ uwhu gbe erọ Uki* e rrọ omẹ obọ.+ 19 Fikiere kere eware nọ whọ ruẹ na fihotọ, gbe eware nọ e be via enẹna gbe eware nọ e te via nọ enana e tẹ vrẹ no. 20 Isi ihrẹ nọ whọ ruẹ evaọ obọze mẹ na gbe ekpọ-edada ikpẹ igoru ihrẹ na yọ oware udidi ọrẹri: Isi ihrẹ na i dikihẹ kẹ enyukọ* ikoko ihrẹ na, yọ ekpọ-edada ikpẹ ihrẹ na i dikihẹ kẹ ikoko ihrẹ na.+

2 “Kere se ọnyukọ*+ ukoko nọ o rrọ Ẹfisọs+ nọ: Enẹ ọnọ o kru isi ihrẹ na họ obọze riẹ na, nọ ọ be nya evaọ udevie ekpọ-edada ikpẹ igoru ihrẹ+ na ọ ta: 2 ‘Mẹ riẹ eware nọ who bi ru, iruo egaga ra gbe ithihakọ ra gbe nọ whọ rẹ kẹ ahwo oyoma uvẹ vievie he, yọ whọ dawo ahwo nọ a bi se omarai ikọ,+ rekọ nọ a rrọ ikọ họ, whọ tẹ ruẹ nọ eterue a rrọ. 3 Who bi thihakọ re, yọ who dikihẹ whawha fiki odẹ mẹ,+ oma o re rrọ owhẹ hẹ.+ 4 Rekọ, me muẹrohọ oware jọ nọ who bi ru thọ, whọ nyasiọ uyoyou nọ who wo oke ọsosuọ ba no.

5 “‘Fikiere kareghẹhọ oria nọ who kie no ze na, re who kurẹriẹ+ je ru eware nọ who je ru oke ọsosuọ na. Who gbe ru ere he, mẹ te nyabru owhẹ ze, me ve ti si ọkpọ-edada ukpẹ+ ra no oria riẹ, ajokpanọ who kurẹriẹ.+ 6 Rekọ, whọ be riẹ ru evaọ onana: who mukpahe eware nọ utu Nikoleyọs+ a bi ru, enọ me mukpahe re. 7 Jọ ọnọ o wo ezọ o yo ẹme nọ ẹzi na ọ be ta kẹ ikoko na:+ Mẹ te kẹ ohwo nọ o fi kparobọ+ uvẹ re ọ re ibi ure uzuazọ+ na, onọ o rrọ evaọ aparadase Ọghẹnẹ.’

8 “Kere se ọnyukọ* ukoko nọ o rrọ Smaena nọ: Enẹ ‘ọrọ Ọsosuọ gbe ọrọ Urere na,’+ ọnọ o whu jẹ wariẹ ziọ uzuazọ+ na ọ ta: 9 ‘Mẹ riẹ uye nọ whọ be ruẹ gbe uvuhu nọ o rrọ owhẹ oma—rekọ who fe+—gbe eme-aghọ ahwo nọ a bi se omarai ahwo Ju rekọ nọ a rrọ ahwo Ju hu, nọ a rrọ isinagọgo* Setan.+ 10 Jọ ozọ eware nọ whọ be te ruẹ uye rai u mu owhẹ hẹ.+ Rri! Ẹdhọ ọ te hai gbolo owhai ejọ fihọ uwou-odi re a ruẹse dawo owhai te oka, yọ wha te ruẹ uye edẹ ikpe. Kru ẹrọwọ ra makọ rite uwhu, mẹ te kẹ owhẹ etu-uvie uzuazọ.+ 11 Jọ ọnọ o wo ezọ o yo+ ẹme nọ ẹzi na ọ be ta kẹ ikoko na: Ọnọ o fi kparobọ+ o ti whu uwhu avọ ivẹ na vievie he.’+

12 “Kere se ọnyukọ* ukoko nọ o rrọ Pẹgamọm nọ: Enẹ ọnọ o wo ọgbọdọ akọava nọ ọ rrọ thethei jẹ rrọ dada na+ ọ ta: 13 ‘Mẹ riẹ oria nọ whọ be rria, koyehọ, oria nọ agbara-uvie Setan ọ rrọ; ghele na whọ gbẹ dadamu abọ mẹ,*+ whọ vro ẹrọwọ nọ who fihọ omẹ hẹ+ makọ evaọ oke Antipas, osẹri mẹ nọ a re fievahọ*+ na, ọnọ a kpe+ evaọ abotọ rai, evaọ oria nọ Setan ọ be rria.

14 “‘Rekọ, me muẹrohọ umutho eware jọ nọ who bi ru thọ, ahwo jọ a rrọ udevie ra nọ a bi lele uwuhrẹ Belam,+ ọnọ o wuhrẹ Belak+ inọ o fi utho ezoruẹ họ kẹ emọ Izrẹl, re a re eware nọ a ro dhe idhe kẹ emedhọ je duomahọ ọfariẹ-ogbe.*+ 15 Ere ọvona re, enọ i bi lele uwuhrẹ utu Nikoleyọs+ e rrọ udevie ra re. 16 Fikiere kurẹriẹ. Who gbe ru ere he, mẹ be nyabru owhẹ ze vẹrẹ vẹrẹ, mẹ vẹ te rehọ ọgbọdọ othethei nọ ọ rrọ unu mẹ+ na fi ae ẹmo.

17 “‘Jọ ọnọ o wo ezọ o yo ẹme nọ ẹzi na ọ be ta kẹ ikoko na:+ Ọnọ o fi kparobọ+ mẹ te jọ emana nọ a si no+ na kẹe ejọ, mẹ vẹ te jẹ kẹe ubiutho ofuafo, yọ a kere odẹ okpokpọ fihọ ubiutho na, onọ ohwo ọvo ọ riẹ hẹ ajokpaọ ọnọ a be rehọ iẹe kẹ na.’

18 “Kere se ọnyukọ* ukoko nọ o rrọ Thiatira+ nọ: Enana họ eware nọ Ọmọ Ọghẹnẹ ọ ta, ọnọ ibiaro riẹ e wọhọ ebruerae,+ yọ awọ riẹ e wọhọ emamọ ekọpa:+ 19 ‘Mẹ riẹ eware nọ who bi ru, uyoyou gbe ẹrọwọ gbe odibọgba gbe ithihakọ ra, yọ eware nọ who bi ru enẹna i vi enọ who ru evaọ oke ọsosuọ.

20 “‘Rekọ, me muẹrohọ oware jọ nọ who bi ru thọ, whọ be kẹ aye nọ a re se Jezibẹl+ na uvẹ, ọnọ o bi se omariẹ ọruẹaro-aye, yọ o bi wuhrẹ jẹ viẹ idibo mẹ họ re a duomahọ ọfariẹ-ogbe*+ jẹ re eware nọ a ro dhe idhe kẹ emedhọ. 21 Mẹ kẹ riẹ oke re o kurẹriẹ, rekọ ọ gwọlọ kurẹriẹ no ọfariẹ-ogbe* riẹ hẹ. 22 Rri! Me bi ti gbolo iei fihọ ehwa ẹyao, jẹ rọ uye ulogbo kẹ enọ i bi lele iei bruẹnwae, ajokpanọ a kurẹriẹ no eware nọ o bi ru na. 23 Yọ mẹ te rehọ ẹyao ọgaga kpe emọ riẹ, re ikoko na kpobi a riẹ nọ mẹ họ ọnọ ọ rẹ kiẹ iroro nọ e mai diwi* gbe udu na riwi, mẹ vẹ te hwosa kẹ owhai omomọvo wọhọ epanọ wha ru.+

24 “‘Rekọ, mẹ be ta kẹ owhai otu nọ i kiọkọ evaọ Thiatira, ahwo kpobi nọ a bi lele uwuhrẹ nana ha, enọ i du riẹ eware nọ a bi se “eware ididi Setan” he+ inọ: Mẹ be wọ owha ofa fihọ owhai uzou hu. 25 Ghele na, kru oware nọ who wo na ga bẹsenọ mẹ rẹ nyaze.+ 26 Ọnọ o fi kparobọ je lele edhere mẹ rite urere mẹ te kẹe udu nọ o ti ro su erẹwho na,+ 27 yọ ọ te rehọ ọkpọ ayọno su ahwo na,+ a ve ti whu ehehẹhẹ wọhọ okwakwa nọ a rọ ọviẹ ma, wọhọ epaọ udu-esuo nọ Ọsẹ mẹ ọ kẹ omẹ. 28 Yọ mẹ te kẹe esi ohiohiẹ na.+ 29 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’

3 “Kere se ọnyukọ* ukoko nọ o rrọ Sadis nọ: Enana họ eware nọ ọnọ o wo izi ihrẹ Ọghẹnẹ+ gbe isi ihrẹ+ na ọ ta: ‘Mẹ riẹ eware nọ who bi ru, a bi rri owhẹ nọ* whọ rrọ uzuazọ, rekọ who whu no.+ 2 Muẹrohotọ,+ re whọ bọ eware nọ i kiọkọ nọ e kẹle uwhu no na ga, keme mẹ ruẹ nọ who ri ru iruo ra gba ha* evaọ aro Ọghẹnẹ mẹ. 3 Fikiere, hai roro kpahe* eware nọ a kẹ owhẹ gbe eware nọ who yo, re whọ jẹ hai koko ai je kurẹriẹ.+ Whọ gbẹ rọwo no owezẹ ze he, mẹ te nyaze wọhọ oji hrọ,+ whọ te riẹ auwa nọ mẹ te rọ nyabru owhẹ ze he.+

4 “‘Rekọ, who wo umutho ahwo* jọ evaọ Sadis nọ a gbe iwu rai ku hu,+ yọ a ti ku iwu efuafo họ lele omẹ nya,+ keme a te. 5 Ọnọ o fi kparobọ+ o ti ku iwu efuafo+ họ, yọ me ti voro* odẹ riẹ no obe uzuazọ+ na vievie he, rekọ me ti dhesẹ nọ mẹ riẹ odẹ riẹ evaọ aro Ọsẹ mẹ gbe ikọ-odhiwu riẹ.+ 6 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’

7 “Kere se ọnyukọ* ukoko nọ o rrọ Filadelfia nọ: Enana họ eware nọ ọnọ ọ rrọ ọrẹri+ na ọ ta, ọnọ ọ rrọ ọrọ uzẹme,+ nọ o wo usiavẹ Devidi,+ nọ o te rovie no ohwo ọvo ọ sae kare he, yọ ọ tẹ kare no ohwo ọvo ọ sai rovie he: 8 ‘Mẹ riẹ eware nọ who bi ru, rri! me rovie ẹthẹ fihọ aro ra,+ onọ ohwo ọvo ọ sae kare he. Mẹ riẹ nọ who wo umutho ogaga jọ, yọ who ru lele ẹme mẹ, uruemu ra u dhesẹ nọ whọ siọ odẹ mẹ hẹ. 9 Rri! Enọ e rrọ isinagọgo* Setan nọ e be ta nọ ahwo Ju a rrọ rekọ nọ a rrọ ahwo Ju hu+ nọ a be ta ọrue na, me ti ru ae nyaze ti guzou kpotọ* kẹ owhẹ je ru ae riẹ nọ me you owhẹ. 10 Fikinọ who ru lele ẹme nọ who yo kpahe ithihakọ mẹ,*+ mẹ te thọ owhẹ no auwa odawọ na,+ onọ u ti te otọakpọ na soso, re a dawo enọ e be rria otọakpọ na. 11 Mẹ be nyaze vẹrẹ vẹrẹ.+ Gbe kru oware nọ who wo na ga, re ohwo ọvo o gbe mi owhẹ etu-uvie+ ra ha.

12 “‘Ọnọ o fi kparobọ, me ti ru ei fihọ upila evaọ etẹmpol Ọghẹnẹ mẹ, yọ oware ovo u ti si ei no etẹe vievie he, me ti kere odẹ Ọghẹnẹ mẹ+ gbe odẹ okpẹwho Ọghẹnẹ mẹ fihọ iẹe uzou, Jerusalẹm Ọkpokpọ+ na nọ o bi no obọ odhiwu ze, no obọ Ọghẹnẹ mẹ ze, gbe odẹ okpokpọ mẹ na.+ 13 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’

14 “Kere se ọnyukọ* ukoko nọ o rrọ Laodisia+ nọ: Enana họ eware nọ Ami+ na ọ ta, osẹri+ uzẹme nọ a re fievahọ na,*+ ọnọ ọ rrọ emuhọ emama Ọghẹnẹ:+ 15 ‘Mẹ riẹ eware nọ who bi ru, who dhẹ hẹ yọ whọ rrorro ho. O hae were omẹ orọnọ who dhẹ hayo whọ rrorro. 16 Fikiere, me ti nwo owhẹ kufiẹ no unu mẹ fikinọ whọ rrọ ruọruọruọ, whọ rrorro ho+ yọ who dhẹ hẹ.+ 17 Whọ be ta nọ, “Me fe+ je wo ekwakwa buobu yọ oware ovo o kare omẹ hẹ,” rekọ whọ riẹ hẹ inọ whọ rrọ iyiyẹ, kare evawere, yogbe, tuaro jẹ rrọ ẹbẹba, 18 fikiere, mẹ be kẹ owhẹ ohrẹ nọ whọ dẹ igoru nọ a rọ erae ru fo no mi omẹ re whọ sai fe, gbe iwu efuafo nọ who re kuhọ re a siọ ẹba ra ba ẹruẹ+ re oma o siọ owhẹ ba ẹvuọ, gbe umu ibiaro nọ who re gbehọ ibiaro ra+ re whọ sae ruẹ ude.+

19 “‘Ahwo kpobi nọ me you, mẹ rẹ whọku ai jẹ kpọ ae vi.+ Fikiere wo ajọwha je kurẹriẹ.+ 20 Rri! Me dikihẹ unuẹthẹ bi kporo. Ohwo kpobi nọ o yo urru mẹ o je rovie ẹthẹ, mẹ te ruọ uwou riẹ me ve ti lele iei re emu owọwọ, ọyomariẹ o ve ti lele omẹ re re. 21 Mẹ te kẹ ọnọ o fi kparobọ+ uvẹ re ọ keria kugbe omẹ evaọ agbara-uvie+ mẹ, wọhọ epanọ me fi kparobọ nọ mẹ jẹ keria+ kugbe Ọsẹ mẹ evaọ agbara-uvie riẹ na. 22 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’”

4 Nọ onana o vrẹ no, mẹ tẹ ruẹ ẹthẹ nọ o rovie fihọ evaọ obọ odhiwu, yọ edo urru ọsosuọ nọ me yo nọ o jẹ ta ẹme kẹ omẹ na o jọ wọhọ edo ọgba, o ta nọ: “Nyaze obọ ehru obonẹ, me ti dhesẹ eware nọ e te via hrọ kẹ owhẹ.” 2 Kẹsena ogaga ẹzi na o tẹ nwane ruọ omẹ oma, whaọ rri! agbara-uvie ọ rrọ obọ odhiwu, yọ ohwo jọ ọ keria agbara-uvie na.+ 3 Ọnọ ọ keria agbara-uvie na ọ wọhọ utho jaspa+ gbe utho sadiọs,* yọ usi-ame nọ o wọhọ utho ẹmerald+ o wariẹ agbara-uvie na họ.

4 Egbara-uvie udhegbene e wariẹ agbara-uvie na họ, mẹ tẹ ruẹ ekpako udhegbene+ nọ i ku iwu efuafo họ nọ e keria egbara-uvie nana, yọ a ku itu-uvie igoru họ uzou. 5 Elo egbrara+ gbe edo irru gbe edo egbrara+ i je no agbara-uvie na ze; yọ ikpẹ erae ihrẹ nọ e be ware e rrọ aro agbara-uvie na, enana i dikihẹ kẹ izi ihrẹ Ọghẹnẹ.+ 6 Oware jọ nọ o wọhọ abade ighẹgbe,+ onọ o wọhọ kristal* o jọ aro agbara-uvie na.

Yọ emama ene nọ e rrọ uzuazọ+ nọ i wo ibiaro vọ oma te obaro te obemu e jọ udevie na* wariẹ agbara-uvie na họ. 7 Omama ọsosuọ nọ o rrọ uzuazọ o jọ wọhọ okpohrokpo,+ omama avọ ivẹ nọ o rrọ uzuazọ o jọ wọhọ eruẹ,+ omama avọ esa nọ o rrọ uzuazọ+ o wo ovao nọ o wọhọ orọ ohwo, yọ omama avọ ene nọ o rrọ uzuazọ+ o jọ wọhọ ugo nọ o be rra.+ 8 Emama ene nọ e rrọ uzuazọ na ọvuọvo o wo ibekpe ezeza; ibiaro e vọ omarai soso, te obotọ rai.+ Yọ te aso te uvo a ruabọhọ bi bo inọ: “Ọrẹri, ọrẹri, ọrẹri na họ Jihova*+ Ọghẹnẹ, Erumeru na, ọnọ ọ jọ, nọ ọ rrọ, nọ ọ be tha na.”+

9 Oke kpobi nọ emama nọ e rrọ uzuazọ na a tẹ be rehọ oruaro gbe ọghọ gbe uyere kẹ Ọnọ ọ keria agbara-uvie na, Ọnọ ọ rrọ uzuazọ bẹdẹ bẹdẹ na,+ 10 ekpako udhegbene na+ a ve kigwẹ fihọ aro Ọnọ ọ keria agbara-uvie na a vẹ gọ Ọnọ ọ rrọ uzuazọ bẹdẹ bẹdẹ na, je gbolo itu-uvie rai fihọ aro agbara-uvie na be ta nọ: 11 “Who te, Jihova* Ọghẹnẹ mai, re who wo* oruaro+ na gbe ọghọ+ na gbe ogaga+ na, keme whẹ họ ọnọ ọ ma eware kpobi,+ yọ fiki oreva ra a rọ ziọ uzuazọ, oye whọ rọ ma ae.”

5 Mẹ tẹ jọ obọze Ọnọ ọ keria agbara-uvie na+ ruẹ uko-obe nọ a kere eme fihọ tabọ tabọ* riẹ, nọ a rọ eka ihrẹ gba di kekeke. 2 Mẹ tẹ ruẹ ukọ-odhiwu ọgaga jọ nọ ọ be rọ urru oruarua bo nọ: “Ono o te nọ ọ rẹ kpare eka nọ a fihọ uko-obe na re o rovie iei?” 3 Rekọ ohwo ọvo evaọ odhiwu hayo otọakpọ hayo obotọ otọakpọ na ọ sai rovie uko-obe na hayo rri eware nọ e riẹe eva ha. 4 Mẹ tẹ jẹ viẹ gaga keme a ruẹ ohwo ọvo nọ o te nọ o re rovie uko-obe na hayo rri eware nọ e riẹe eva ha. 5 Rekọ omọvo ekpako na ọ tẹ ta kẹ omẹ nọ: “Whọ gbẹ viẹ hẹ. Rri! Okpohrokpo orua Juda,+ ọnọ ọ rrọ owọ-ure+ Devidi+ o fi kparobọ no,+ fikiere ọ rẹ sai si eka ihrẹ na no re o rovie uko-obe na.”

6 Mẹ tẹ ruẹ omogodẹ+ jọ nọ o wọhọ nọ a kpe+ no nọ o dikihẹ aro* agbara-uvie na gbe emama ene nọ e rrọ uzuazọ na gbe udevie ekpako na,+ nọ o wo izei ihrẹ gbe ibiaro ihrẹ, yọ ibiaro na i dikihẹ kẹ izi ihrẹ Ọghẹnẹ+ nọ a vi ruọ otọakpọ na soso. 7 Ọ tẹ nwane nya lahwe ọ tẹ rehọ uko-obe na no obọze Ọnọ ọ keria agbara-uvie na.+ 8 Nọ ọ rehọ uko-obe na, emama ene nọ e rrọ uzuazọ na gbe ekpako udhegbene+ na a te kigwẹ fihọ aro Omogodẹ na, omomọvo o kru akpata, yọ a wo imidhe ikokodo igoru nọ insẹnse e vọ eva. (Insẹnse na i dikihẹ kẹ elẹ erẹri na.)+ 9 A tẹ be so ole ọkpokpọ,+ inọ: “Who te ọnọ ọ rẹ rehọ uko-obe na je si eka na no, keme a kpe owhẹ whọ tẹ rehọ azẹ ra dẹ ahwo kẹ Ọghẹnẹ+ no orua kpobi, ẹrọunu* kpobi, utu ahwo gbe orẹwho kpobi ze,+ 10 who te ru ae re a jọ ivie*+ gbe izerẹ kẹ Ọghẹnẹ mai,+ yọ a te jọ ivie+ nọ i ti su otọakpọ na.”

11 Mẹ tẹ ruẹ je yo edo urru ikọ-odhiwu buobu nọ e wariẹ agbara-uvie na gbe emama nọ e rrọ uzuazọ na gbe ekpako na họ, yọ a rrọ buobu gbidi gbidi* gbe idu eko idu buobu,+ 12 yọ a jẹ rọ urru oruarua ta nọ: “Omogodẹ nọ a kpe na+ o te ọnọ o re wo ogaga, efe, areghẹ, ẹgba, ọghọ, oruaro gbe ujiro* na.”+

13 Me te yo edo emama kpobi nọ e rrọ odhiwu gbe otọakpọ gbe obotọ otọakpọ na+ gbe abade, gbe eware kpobi nọ e rrọ eva rai nọ e be ta nọ: “Ọnọ ọ keria agbara-uvie na+ gbe Omogodẹ na+ a re wo ujiro,* ọghọ,+ oruaro, gbe ogaga na bẹdẹ bẹdẹ.”+ 14 Emama ene nọ e rrọ uzuazọ na a jẹ ta nọ: “Ami,” ekpako na a te kigwẹ gọ Ọghẹnẹ.

6 Mẹ tẹ ruẹ Omogodẹ na+ nọ o si ovo jọ evaọ usu eka ihrẹ na no,+ me te yo nọ ọvo jọ evaọ usu emama ene nọ e rrọ uzuazọ na+ ọ rehọ urru nọ u do wọhọ agbrara ta nọ: “Nyaze!” 2 Mẹ tẹ ruẹ anyenya ọfuafo,+ yọ ọnọ ọ keria ehru riẹ o kru uze; a kẹ riẹ etu-uvie,+ ọ tẹ dhẹ vrẹ bi fi kparobọ, re o fi kparobọ riẹriẹriẹ.+

3 Nọ o si oka avọ ivẹ na no, me te yo nọ omama avọ ivẹ nọ o rrọ uzuazọ na+ ọ ta nọ: “Nyaze!” 4 Anyenya ọfa ọ tẹ lahwe, anyenya nọ ọ rrọ wawae wọhọ erae, yọ a kẹ ọnọ ọ keria ehru riẹ udu re o si udhedhẹ no otọakpọ na re ahwo a kpe ohwohwo, a kẹ riẹ ọgbọdọ ologbo.+

5 Nọ o si oka avọ esa+ na no, me te yo nọ omama avọ esa nọ o rrọ uzuazọ na+ ọ ta nọ: “Nyaze!” Kẹsena mẹ tẹ ruẹ anyenya obiebi, yọ ọnọ ọ keria ehru riẹ o kru iskeli họ obọ. 6 Me te yo edo jọ nọ o wọhọ urru evaọ udevie emama ene nọ e rrọ uzuazọ na nọ o ta nọ: “Unuigho ugbogbo* iwhiti họ dinariọs,*+ yọ unuigho igbogbo esa ebali họ dinariọs; rekọ whọ raha ewhri olivi na gbe enwaene na ha.”+

7 Nọ o si oka avọ ene na no, me te yo urru omama avọ ene nọ o rrọ uzuazọ na+ nọ ọ ta nọ: “Nyaze!” 8 Mẹ tẹ ruẹ anyenya ọviẹviẹ, yọ odẹ ọnọ ọ keria ehru riẹ họ Uwhu. Yọ Uki* u bi lele iei kpekpekpe. A kẹ rai udu kpahe abọvo abane otọakpọ na, re a rehọ ọgbọdọ othethei gbe ohọo+ gbe ẹyao ọgaga gbe erao ijihẹ otọakpọ na+ ro kpe ahwo.

9 Nọ o si oka avọ isoi na no, mẹ tẹ jọ otọ agbada-idhe na+ ruẹ izuazọ*+ enọ a kpe fiki ẹme Ọghẹnẹ gbe fiki isẹri nọ a se.+ 10 A tẹ rọ urru oruarua bo nọ: “Ẹvẹ u ti kri te, Olori nọ Ọ Mai Kpehru, nọ ọ rrọ ọrẹri jẹ rrọ ọrọ uzẹme na,+ re who te bruoziẹ ahwo nọ a be rria otọakpọ na jẹ kioja azẹ mai?”+ 11 A tẹ rehọ ewu othethei ọfuafo kẹ ae omomọvo,+ a tẹ ta kẹ ae nọ a gbe serihọ omojọ, bẹsenọ unu ibe erigbo rai gbe inievo rai nọ a bi ti kpe wọhọ ae omarai o rẹ gba no.+

12 Mẹ ruẹ e riẹ nọ o si oka avọ ezeza na no, otọ u te nuhu gaga; ọre na ọ tẹ jọ biebi wọhọ ohọ-ekpa* nọ a rọ eto* ru, ọvẹre na kpobi ọ tẹ wọhọ azẹ,+ 13 isi obọ ehru* i te kie fihọ otọakpọ na wọhọ epanọ ibi ure ifigi nọ e re ware he e rẹ kpare kie nọ ofou ọgaga o te fou rie. 14 Odhiwu na ọ tẹ vrẹ no wọhọ uko-obe nọ a bi kpiri,+ ugbehru kpobi gbe ukoliko kpobi u te no oria riẹ.+ 15 Kẹsena ivie otọakpọ na, enọ e rrọ ahwo ologbo evaọ esuo, enọ i wuzou egbaẹmo, edafe, egba, erigbo kpobi gbe emuyẹ kpobi a te dhere ighogho-itho gbe udevie igbehru-itho.+ 16 A tẹ be ta kẹ igbehru gbe itho na nọ: “Wha kie ruru omai+ re wha ko omai dhere no ovao Ọnọ ọ keria agbara-uvie na+ je no ofu Omogodẹ na,+ 17 keme ẹdẹ ologbo ọrọ ofu rai ọ ze no,+ kọ ono ọ rẹ sai dikihẹ?”+

7 Nọ onana o vrẹ no, mẹ tẹ ruẹ ikọ-odhiwu ene nọ i dikihẹ ibienẹ ene akpọ na, nọ i kru ifou ene akpọ na daji kokoroko, re ofou ọvo o gbe fou ruọ otọakpọ na hayo abade hayo ure ọvo ho. 2 Mẹ tẹ ruẹ ukọ-odhiwu ọfa nọ o bi no obọ ovatha-ọre ze, yọ o kru oware nọ a re ro kpe oka họ eware orọ Ọghẹnẹ nọ ọ rrọ uzuazọ na; ọ tẹ rọ urru oruarua bo se ikọ-odhiwu ene nọ a kẹ udu re a raha eware otọakpọ na gbe abade na, 3 inọ: “Wha du raha eware otọakpọ na hayo abade na hayo ire na ha, bẹsenọ ma re kpe oka họ+ aruezo+ erigbo Ọghẹnẹ mai no.”

4 Me te yo unu ahwo nọ a kpe oka họ na, idu udhuhrẹ-gbene (144,000),+ nọ a kpe oka họ evaọ orua kpobi orọ emezae Izrẹl:+

9 Nọ onana o vrẹ no, mẹ tẹ ruẹ ogbotu obuobu, nọ ohwo ọvo ọ sai kele he, nọ i no erẹwho, erua, itu ahwo gbe erọunu*+ kpobi ze, nọ i dikihẹ aro agbara-uvie na gbe Omogodẹ na, a ku iwu ithethei efuafo họ;+ yọ eya iriẹ e rrọ abọ rai.+ 10 Yọ a be rọ urru oruarua ta nọ: “Obọ Ọghẹnẹ mai nọ ọ keria agbara-uvie na+ gbe Omogodẹ na+ esiwo mai o no ze.”

11 Ikọ-odhiwu na kpobi a dikihẹ wariẹ agbara-uvie na gbe ekpako na+ gbe emama ene nọ e rrọ uzuazọ na họ, a te kigwẹ vovao tuotọ evaọ aro agbara-uvie na, a tẹ gọ Ọghẹnẹ, 12 yọ a be ta nọ: “Ami! Jọ ujiro na, gbe oruaro na, gbe areghẹ na, gbe uyere na, gbe ọghọ na, gbe ogaga na, gbe ẹgba na e jọ erọ Ọghẹnẹ mai bẹdẹ bẹdẹ.+ Ami.”

13 Kẹsena, omọvo ekpako na ọ tẹ nọ omẹ nọ: “Ahwo nana nọ a ku iwu ithethei efuafo họ na,+ yọ amono, kọ bovẹ a no ze?” 14 Mẹ tẹ nwane ta kẹe nọ: “Olori mẹ, whẹ họ ọnọ ọ riẹ.” Ọ tẹ ta kẹ omẹ nọ: “Enana họ enọ i no uye ulogbo na ze,+ yọ a fọrọ iwu ithethei rai je ru ae fo no evaọ azẹ Omogodẹ na.+ 15 Oyejabọ nọ a rọ rrọ aro agbara-uvie Ọghẹnẹ na, yọ a bi ru iruo ọrẹri kẹe* te aso te uvo evaọ etẹmpol riẹ; yọ Ọnọ ọ keria agbara-uvie+ na ọ te rehọ uwou-udhu riẹ ruru ai.+ 16 Ohọo u gbe ti kpe ai hi yọ uruame u gbe ti kpe ai ofa ha, yọ erri ọre na hayo ẹrrorro ọgaga o gbe ti mu ai hi,+ 17 keme Omogodẹ na+ nọ ọ rrọ aro* agbara-uvie na ọ te sẹro rai wọhọ othuru-igodẹ,+ o ti su ai kpohọ iyeri-ame erọ ame uzuazọ.*+ Yọ Ọghẹnẹ o ti ririe irui-oviẹ kpobi no aro rai.”+

8 Nọ o+ si oka avọ ihrẹ na+ no, oria kpobi o tẹ fọ rirẹ evaọ odhiwu oware wọhọ ubro auwa. 2 Mẹ tẹ ruẹ ikọ-odhiwu ihrẹ+ nọ i dikihẹ aro Ọghẹnẹ, a tẹ rehọ egba ihrẹ kẹ ae.

3 Ukọ-odhiwu ọfa jọ nọ o kru omodhe insẹnse* ọrọ igoru ọ tẹ nyaze o te dikihẹ kẹle agbada-idhe na,+ a tẹ kẹe insẹnse+ buobu re ọ mahe evaọ ehru agbada-idhe igoru+ nọ ọ rrọ aro agbara-uvie na evaọ okenọ erẹri na a be lẹ na. 4 Iwiri insẹnse nọ i je kuye no obọ ukọ-odhiwu na ze na i te kuye lele elẹ+ erẹri na kpobọ aro Ọghẹnẹ. 5 Rekọ ukọ-odhiwu na ọ tẹ nwane jọ agbada-idhe na wọ erae vọ eva omodhe insẹnse na o te ku ai fihọ otọakpọ na. Egbrara e tẹ va, me te yo edo irru jẹ ruẹ elo egbrara+ gbe otọ nọ u nuhu. 6 Ikọ-odhiwu ihrẹ nọ i kru egba ihrẹ+ na a tẹ ruẹrẹ oma kpahe re a kporo egba na.

7 Ọrọ ọsosuọ o te kporo ọgba riẹ. Oso-itho avọ erae nọ azẹ ọ gua kugbe ọ tẹ romavia, a te ku ei fihọ otọakpọ na;+ abọvo abasa otọakpọ na o tẹ to no, abọvo abasa ire na e tẹ to no, ẹbe ọrọrọ kpobi ọ tẹ to no.+

8 Ukọ-odhiwu avọ ivẹ o te kporo ọgba riẹ. Kẹsena a te gbolo oware jọ nọ o wọhọ ugbehru ulogbo nọ o be ware erae fihọ abade na.+ Abọvo abasa abade na o te zihe ruọ azẹ;+ 9 abọvo abasa emama nọ e rrọ uzuazọ* evaọ abade na i te whu,+ abọvo abasa ekọ ilogbo na i te zue.

10 Ukọ-odhiwu avọ esa o te kporo ọgba riẹ. Esi ologbo jọ nọ o bi lo wọhọ ukpẹ o te kie no obọ odhiwu ze, o te kie fihọ abọvo abasa ithẹ na gbe iyeri-ame.*+ 11 Odẹ esi na họ Ẹbe Ọyayare. Abọvo abasa ame na o te muhọ ẹyare wọhọ ẹbe ọyayare, ame na o te kpe ibuobu ahwo na, keme a zihe i rie ruọ ame ọyayare no.+

12 Ukọ-odhiwu avọ ene o te kporo ọgba riẹ. A tẹ tehe abọvo abasa ọre na+ gbe abọvo abasa ọvẹre na gbe abọvo abasa isi na, re abọvo abasa rai o muebi,+ re a gbẹ ruẹ elo evaọ abọvo abasa okpẹdoke na ha, ere aso na re.

13 Mẹ tẹ ruẹ ugo jọ nọ o be rra evaọ idadeghe na je yo nọ o be rọ urru oruarua ta nọ: “Uye, uye, uye+ u ti te ahwo nọ a be rria otọakpọ na fiki egba nọ ikọ-odhiwu esa nọ i kiọkọ na i bi ti kporo na!”+

9 Ukọ-odhiwu avọ isoi o te kporo ọgba riẹ.+ Mẹ tẹ ruẹ esi nọ o kie no obọ odhiwu ziọ otọakpọ, yọ a kẹ riẹ usiavẹ unu ọgọdọ odidi na.+ 2 O te rovie unu ọgọdọ odidi na, iwiri i te kuye no unu ọgọdọ na ze wọhọ iwiri uwou-erae ulogbo, iwiri na i te ru ọre na muebi,+ ere i ru ofou na re. 3 Ebaka-ẹkpẹ i te no iwiri na ze ruọ otọakpọ na,+ yọ a kẹ rai udu, oghẹrẹ udu nọ ewhọhro-imuomu otọakpọ na a wo na. 4 A ta kẹ ae nọ a du raha ẹbe nọ ọ rrọ otọakpọ na hayo ekakọ hayo ure ovo ho, ajokpaọ ahwo nọ a wo oka Ọghẹnẹ evaọ aruezo rai hi na.+

5 A kẹ ebaka-ẹkpẹ na uvẹ, orọnikọ re a kpe ahwo na ha, rekọ re a lahiẹ ae evaọ emerae isoi, yọ olahiẹ na o wọhọ epaọ ọrọ ọwhọhro-omuomu nọ ọ sa ohwo.+ 6 Evaọ edẹ yena ahwo a ti se uwhu rekọ a te ruẹ e riẹ vievie he, a te gwọlọ whu, rekọ uwhu o te dhẹ siọ ae ba.

7 Ebaka-ẹkpẹ na e jọ wọhọ enyenya nọ e ruẹrẹ oma kpahe kẹ ẹmo;+ eware nọ e wọhọ itu-uvie igoru e jọ uzou rai, yọ ovao rai o jọ wọhọ ovao ohwo-akpọ, 8 rekọ eto rai e jọ wọhọ eto eyae. Ibiakọ rai e jọ wọhọ ibiakọ ikpohrokpo,+ 9 yọ a whẹ ẹgọ-igbama họ nọ o wọhọ ẹgọ-igbama ayọno. Edo ibekpe rai o wọhọ edo ekẹkẹ nọ enyenya i bi si nọ e be họrọ kpohọ ẹmo.+ 10 Ofariẹ, a wo iweli nọ a rẹ rọ sa wọhọ ewhọhro-imuomu, yọ iweli rai ogaga nọ a rẹ rọ nwa ahwo na oma evaọ emerae isoi o rrọ.+ 11 A wo ovie, ọye họ ukọ-odhiwu nọ o wuzou ọgọdọ odidi na.+ Evaọ Hibru odẹ riẹ Abadọn,* rekọ evaọ Griki odẹ riẹ Apoliọn.*

12 Uye ọsosuọ o vrẹ no. Rri! Iye ivẹ efa+ e be tha nọ eware nana e tẹ vrẹ no.

13 Ukọ-odhiwu avọ ezeza+ o te kporo ọgba riẹ.+ Me te yo urru ovo jọ nọ u do no izei agbada-idhe igoru+ nọ ọ rrọ aro Ọghẹnẹ na ze, 14 nọ o ta kẹ ukọ-odhiwu avọ ezeza nọ o kru ọgba na nọ: “Rra ikọ-odhiwu ene nọ a gba fihọ obọ ethẹ ologbo nọ a re se Yufretis na no.”+ 15 Ọ tẹ rra ikọ-odhiwu ene na no, enọ a ruẹrẹ kpahe kẹ auwa gbe ẹdẹ gbe amara gbe ukpe na re a kpe abọvo abasa ahwo na no.

16 Unu egbaẹmo nọ e be dhẹ enyenya na o jọ idu ikpe eko idu ikpe akuava;* Me yo epanọ a bu te. 17 Enẹ enyenya na gbe ahwo nọ a keria ehru rai nọ mẹ ruẹ evaọ eruẹaruẹ na a jọ: A whẹ ẹgọ-igbama họ nọ o rrọ wawae wọhọ erae je wo ekọlọ iburu gbe ekọlọ iyẹlo nọ ọ wọhọ isọ-ọre, uzou enyenya na e jọ wọhọ uzou ikpohrokpo,+ yọ erae gbe iwiri gbe isọ-ọre i je no unu rai ze. 18 Iye esa nana, koyehọ erae na, iwiri na gbe isọ-ọre nọ i no unu rai ze na i te kpe abọvo abasa ahwo na. 19 Keme ogaga enyenya na o rrọ unu rai gbe iweli rai, iweli rai e wọhọ eraomuomu yọ i wo uzou, enana a rẹ rọ nwa ahwo oma.

20 Rekọ ahwo nọ a kiọkọ nọ iye nana i kpe he a kurẹriẹ no eware nọ a je ru hu, a siọ idhivẹri ba ẹgọ họ gbe emedhọ igoru gbe erọ isiliva, ekọpa, itho gbe ire, enọ e rẹ sae ruẹ ude he, yo ẹme he, hayo nya ha.+ 21 A kurẹriẹ no ahwo-okpe gbe iruẹru-imizi gbe ọfariẹ-ogbe* gbe uji-utho ho.

10 Mẹ tẹ ruẹ ukọ-odhiwu ọgaga ọfa nọ o bi no obọ odhiwu ze, nọ ọ rehọ ẹgho gọ ẹgọ,* yọ usi-ame o jọ uzou riẹ, ovao riẹ o wọhọ ọre,+ awọ riẹ e jọ wọhọ ipila erae, 2 yọ uko-obe osese nọ a rovie fihọ o rrọ obọ riẹ. O te fi owọ obọze riẹ họ abade, je fi owọ ẹkpẹlobọ riẹ họ otọakpọ na, 3 ọ tẹ rehọ urru oruarua bo wọhọ epaọ okpohrokpo nọ o bi do enu.+ Nọ o bo, irru egbrara ihrẹ+ na e tẹ ta ẹme.

4 Whaọ okenọ egbrara ihrẹ na e ta ẹme, mẹ jẹ gwọlọ kere, rekọ me te yo urru jọ nọ u do no obọ odhiwu ze+ nọ: “Eware nọ egbrara ihrẹ na e ta na, ko ai dhere,* who kere ai fihotọ họ.” 5 Ukọ-odhiwu nọ mẹ ruẹ nọ o dikihẹ abade avọ otọakpọ na ọ tẹ kpare obọze riẹ rri obọ odhiwu, 6 ọ tẹ rehọ odẹ Ọnọ ọ rrọ uzuazọ bẹdẹ bẹdẹ na+ duwu iyei, ọnọ ọ ma odhiwu avọ eware nọ e riẹe eva, gbe otọakpọ avọ eware nọ e riẹe eva, gbe abade avọ eware nọ e riẹe eva,+ inọ: “Oke oraha o gbẹ te jariẹ ofa ha. 7 Rekọ evaọ oke nọ ukọ-odhiwu avọ ihrẹ+ na o bi ti kporo ọgba riẹ,+ oware udidi ọrẹri+ nọ Ọghẹnẹ o whowho usi uwoma riẹ kẹ erigbo riẹ eruẹaro na+ u ti gine rugba.”

8 Me te yo urru nọ u do no obọ odhiwu ze+ na nọ o be wariẹ ta ẹme kẹ omẹ nọ: “Nyae rehọ uko-obe nọ a rovie fihọ nọ o rrọ obọ ukọ-odhiwu nọ o dikihẹ abade avọ otọakpọ na.”+ 9 Mẹ tẹ nyabru ukọ-odhiwu na, mẹ tẹ ta kẹe nọ ọ kẹ omẹ uko-obe osese na. Ọ tẹ ta kẹ omẹ nọ: “Mi omẹ re whọ re iẹe no,+ o te yare evaọ obọ eva ra, rekọ evaọ unu ra o te mere wọhọ ọnyọ.” 10 Mẹ tẹ rehọ uko-obe osese na no obọ ukọ-odhiwu na, mẹ tẹ re iẹe,+ o jẹ mere wọhọ ọnyọ evaọ unu mẹ;+ rekọ nọ mẹ re iẹe silọ no, o tẹ jẹ yare evaọ obọ eva mẹ. 11 A tẹ ta kẹ omẹ nọ: “Whọ rẹ wariẹ ruẹaro hrọ kpahe itu ahwo, erẹwho, erọunu* gbe ivie buobu.”

11 A tẹ kẹ omẹ ukpoko nọ o wọhọ ọkpọ,*+ yọ ọ be ta nọ: “Kpama re whọ ma oria aruẹri etẹmpol Ọghẹnẹ gbe agbada-idhe na gbe ahwo nọ a be jariẹ gọ. 2 Rekọ who du ma ighẹ nọ ọ rrọ otafe oria aruẹri etẹmpol na ha, se iẹe ba riẹriẹriẹ, keme a rehọ e riẹ kẹ erẹwho na no, yọ a te rọ evawọ thihi okpẹwho ọrẹri+ na evaọ emerae udhuvẹ-gbivẹ.+ 3 Me ti ru isẹri ivẹ mẹ ruẹaro evaọ edẹ odu ọvo gbe egba ivẹ gbe udhosa (1,260) avọ ehọ-ekpa* nọ a ku họ.” 4 Ahwo nana họ enọ a rehọ ire olivi ivẹ na+ gbe ekpọ-edada ikpẹ ivẹ na+ dhesẹ, yọ a dikihẹ aro Olori otọakpọ na.+

5 Ohwo jọ ọ tẹ gwọlọ nwa ae oma, erae i re no unu rai ze e vẹ mahe ewegrẹ rai no. Ohwo jọ ọ tẹ gwọlọ nwa ae oma, ere a re ro kpei no. 6 Ahwo nana a wo udu nọ a re ro wuhu ehru* na di+ re oso ọ gbẹ rrọ họ+ evaọ edẹ nọ a be rọ ruẹaro na, a te je wo udu nọ a re ro zihe ame ruọ azẹ+ jẹ rehọ oghẹrẹ uye kpobi te otọakpọ na oke kpobi nọ a gwọlọ.

7 Nọ a te ru iruo isẹri-ise rai re no, arao ojihẹ nọ o no ọgọdọ odidi na ze na o ti fi ae ẹmo, fi ae kparobọ je kpe ae no.+ 8 Iri rai e te jọ oko-ore* okpẹwho ologbo na nọ a re se Sọdọm gbe Ijipti evaọ odẹme, oria nọ a jọ kare Olori rai fihọ ure kpe re. 9 Ejọ evaọ usu ahwo na, erua, erọunu* gbe erẹwho na a ti rri iri rai evaọ edẹ esa gbe ubro,+ yọ a te rọwo nọ a wọ iri rai fihọ uki hi. 10 Ahwo nọ a be rria otọakpọ na a te ghọghọ fiki rai je ru ehaa, a ti vi ekẹ se ohwohwo, keme eruẹaro ivẹ nana a je gboja kẹ ahwo nọ a be rria otọakpọ na.

11 Nọ edẹ esa gbe ubro na e vrẹ no, ẹzi uzuazọ nọ u no obọ Ọghẹnẹ ze o tẹ ruọ ae oma,+ a tẹ kpama dikihẹ, ozọ ulogbo u te mu ahwo nọ a ruẹ e rai. 12 A te yo urru oruarua jọ nọ u no obọ odhiwu ze nọ o ta kẹ ae nọ: “Wha nyaze obọ ehru obonẹ.” A te kpobọ odhiwu evaọ ẹgho, yọ ewegrẹ rai a ruẹ e rai.* 13 Evaọ auwa yena, otọ u te nuhu gaga, abọvo abakpe okpẹwho na o te zurie kie; otọ nọ u nuhu na u kpe ahwo idu ihrẹ (7,000), ozọ u te mu ahwo nọ a kiọkọ, a tẹ rọ oruaro kẹ Ọghẹnẹ obọ odhiwu.

14 Uye avọ ivẹ+ o vrẹ no. Rri! Uye avọ esa o be tha kpata kpata.

15 Ukọ-odhiwu avọ ihrẹ o te kporo ọgba riẹ.+ Me te yo edo irru eruarua jọ evaọ obọ odhiwu nọ e be ta nọ: “Uvie akpọ na u zihe ruọ Uvie Olori mai+ gbe orọ Kristi riẹ+ no, yọ o ti su wọhọ ovie bẹdẹ bẹdẹ.”+

16 Ekpako udhegbene+ nọ e keria egbara-uvie rai evaọ aro Ọghẹnẹ na a te kie vovao tuotọ a tẹ gọ Ọghẹnẹ, 17 yọ a be ta nọ: “Ma yere owhẹ, Jihova* Ọghẹnẹ, Erumeru na, ọnọ ọ rrọ,+ nọ ọ jọ, keme whọ rehọ ogaga ulogbo ra muhọ esu no wọhọ ovie.+ 18 Rekọ ofu o te mu erẹwho na, ofu ra ọ tẹ ze, oke nọ a fihọ na u te te nọ a re ro bruoziẹ enọ i whu no, hwosa kẹ+ erigbo ra eruẹaro na+ gbe erẹri na gbe ahwo nọ a be dhozọ odẹ ra, te esese te ilogbo, jẹ raha enọ e be raha otọakpọ na.”+

19 A te rovie oria aruẹri etẹmpol Ọghẹnẹ nọ o rrọ obọ odhiwu, a tẹ ruẹ etehe ọvọ riẹ evaọ oria aruẹri etẹmpol riẹ.+ Elo egbrara e tẹ romavia, te edo irru, egbrara gbe otọ nọ u nuhu gbe oso-itho ọgaga.

12 Kẹsena oka ulogbo jọ o tẹ romavia evaọ obọ odhiwu: Aye jọ+ ọ rehọ ọre gọ ẹgọ,* yọ ọvẹre na ọ rrọ otọ awọ riẹ, etu-uvie nọ o wo isi ikpegbivẹ ọ rrọ uzou riẹ, 2 yọ o dihọ. O te je bo fiki edada gbe ẹrova epanọ o re ro yẹ.

3 Oka ofa jọ o tẹ romavia evaọ obọ odhiwu. Rri! Araomuomu idudu ologbo jọ nọ ọ rrọ wawae wọhọ erae,+ nọ o wo izou ihrẹ avọ izei ikpe, yọ itu-uvie* ihrẹ e rrọ izou na; 4 ọ tẹ rehọ uweli riẹ si abọvo abasa isi+ obọ odhiwu, o te gbolo ai fihọ otọakpọ na.+ Araomuomu idudu na o te dikihẹ aro aye+ nọ o bi ti yẹ na be hẹrẹ, re nọ ọ tẹ nwani yẹ no ọ vẹ lọ ọmọ riẹ no.

5 O te yẹ ọmọzae,+ ẹhẹ, ọzae, othuru-igodẹ nọ ọ te rehọ ọkpọ ayọno su erẹwho na kpobi.+ A tẹ nwani vo* ọmọ na bru Ọghẹnẹ kpobọ agbara-uvie riẹ. 6 Aye na ọ tẹ dhẹ kpobọ udhude, obonọ Ọghẹnẹ ọ jọ ruẹrẹ oria họ kẹe, yọ a te jọ etẹe kuọ ẹe edẹ odu ọvo gbe egba ivẹ gbe udhosa (1,260).+

7 Ẹmo o te du lahwe evaọ obọ odhiwu: Maekẹl*+ avọ ikọ-odhiwu riẹ a tẹ jẹ họre araomuomu idudu na, araomuomu idudu na avọ ikọ-odhiwu riẹ a tẹ jẹ họre ai re, 8 rekọ a kparobọ họ,* yọ a gbẹ kẹ ae uvẹ re a jọ oria ovo evaọ obọ odhiwu hu. 9 Fikiere a te gbolo araomuomu idudu ologbo+ na fihọ otọ, araomuomu anwae+ na, ọnọ a re se Ẹdhọ+ gbe Setan,+ nọ o bi su akpọ* na soso thọ na;+ a gbolo i rie fihọ otọakpọ,+ yọ a gbolo ikọ-odhiwu riẹ lele iei. 10 Me te yo urru oruarua jọ evaọ obọ odhiwu nọ o ta nọ:

“Obọnana esiwo+ gbe ogaga gbe Uvie Ọghẹnẹ mai+ gbe udu-esuo Kristi riẹ o ze no, keme a gbolo oguiguẹgu nọ o re gu eware fihọ inievo mai uzou na fihọ otọ no, ọnọ o re gu ai te aso te uvo evaọ aro Ọghẹnẹ mai!+ 11 A fi rie kparobọ+ fiki azẹ Omogodẹ na+ gbe fiki ovuẹ isẹri-ise rai,+ yọ a you uzuazọ* rai hi,+ makọ okenọ a rẹriẹ ovao dhe uwhu dede. 12 Fiki onana, wha ghọghọ whai idhiwu gbe enọ e be rria ae eva! Uye u te otọakpọ gbe abade+ no, keme Ẹdhọ ọ ziọ otọ bru owhai ze no, o wo ofu ọgaga keme ọ riẹ nọ omoke kakao o wo.”+

13 Nọ araomuomu idudu na ọ ruẹ nọ a gbolo i rie fihọ otọakpọ no,+ o te kpokpo aye+ nọ o yẹ ọmọzae na. 14 Rekọ a tẹ rehọ ibekpe ivẹ erọ ugo+ ulogbo kẹ aye na, re ọ rra kpohọ oria riẹ evaọ udhude na, oria nọ a te jọ kuọ ẹe evaọ oke, eke gbe ubro oke,*+ oria nọ araomuomu+ na ọ gbẹ te jọ ruẹ e riẹ hẹ.

15 Araomuomu na o te nwo ame buobu nọ o wọhọ ethẹ no unu riẹ ze ku aye na re ọ da ame whu. 16 Rekọ otọakpọ na o te fiobọhọ kẹ aye na, otọakpọ na o te rovie unu riẹ o tẹ da ame nọ araomuomu idudu na o nwo no unu ze na no. 17 Fikiere eva aye na e tẹ dha araomuomu idudu na gaga, ọ tẹ nyai fi enọ i kiọkọ evaọ emọ* aye na+ ẹmo, enọ i bi koko ijaje Ọghẹnẹ je wo iruo isẹri-ise kpahe Jesu.+

13 O* te dikihẹ ehru uwẹkpẹ abade na.

Mẹ tẹ ruẹ arao ojihẹ+ jọ nọ o bi no evaọ abade+ na ze, o wo izei ikpe gbe izou ihrẹ, yọ itu-uvie* ikpe e rrọ izei ikpe na, rekọ edẹ ekela e rrọ izou na. 2 Arao ojihẹ nọ mẹ ruẹ na ọ jọ wọhọ okeke, rekọ awọ riẹ e jọ wọhọ erọ adaka, yọ unu riẹ o jọ wọhọ unu okpohrokpo. Araomuomu idudu+ na ọ tẹ kẹ arao ojihẹ na ogaga, agbara-uvie, gbe udu-esuo ulogbo.+

3 Mẹ tẹ ruẹ inọ, o wọhọ nọ a nwa uzou ovo riẹ jọ oma gaga, rekọ omonwa riẹ nọ o rẹ sae wha uwhu ze na u kpo no,+ akpọ na kpobi a te lele arao ojihẹ na yọ ọ be were ae oma. 4 A tẹ gọ araomuomu idudu na fikinọ ọ kẹ arao ojihẹ na udu-esuo, a tẹ ta eme nana rọ gọ arao ojihẹ na: “Ono ọ wọhọ arao ojihẹ na, kọ ono ọ rẹ sai lele iei fi ẹmo?” 5 A tẹ kẹe unu nọ ọ rẹ rọ ta ikpeme gbe eme-aghọ, jẹ kẹe udu nọ o re ro ru eware evaọ emerae udhuvẹ-gbivẹ.+ 6 O te rovie unu riẹ be ta eme-aghọ+ kpahe Ọghẹnẹ, be ta eme-aghọ kpahe odẹ riẹ gbe oria nọ ọ be rria, makọ enọ e be rria obọ odhiwu.+ 7 A kẹ riẹ uvẹ re o fi erẹri na ẹmo je fi ae kparobọ,+ a tẹ jẹ kẹe udu nọ o re ro su erua gbe itu ahwo gbe erọunu* gbe erẹwho kpobi. 8 Yọ ahwo kpobi nọ a be rria otọakpọ na a te gọe. No emuhọ akpọ* na ze, a kere odẹ rai ọvuọvo fihọ uko-obe uzuazọ+ ọrọ Omogodẹ nọ a kpe na+ ha.

9 Otẹrọnọ ohwo jọ o wo ezọ, jọ o yo.+ 10 Otẹrọnọ o gbahọ nọ ohwo jọ o re kpohọ igbo, o ti kpohọ igbo. Otẹrọnọ ohwo jọ ọ rehọ ọgbọdọ kpe ohwo,* a rẹ rehọ ọgbọdọ kpei hrọ.+ Etenẹ o jọ gwọlọ ithihakọ+ gbe ẹrọwọ+ mi erẹri na.+

11 Kẹsena mẹ tẹ ruẹ arao ojihẹ ọfa nọ o bi no otọakpọ na ze, o wo izei ivẹ wọhọ erọ omogodẹ, rekọ o te mu ẹme họ ẹta wọhọ araomuomu idudu.+ 12 Ọ tẹ be rehọ udu kpobi nọ arao ojihẹ ọsosuọ+ na o wo ro ruiruo evaọ aro riẹ. O te ru otọakpọ na gbe ahwo nọ a be rria eva riẹ gọ arao ojihẹ ọsosuọ na, ọnọ omonwa riẹ nọ o rẹ sae wha uwhu ze u kpo no na.+ 13 Yọ o bi ru eware eka ilogbo, bi tube ru erae kie no obọ odhiwu ze fihọ otọakpọ na evaọ aro ahwo-akpọ.

14 O bi su ahwo nọ a be rria otọakpọ na thọ fiki eware eka nọ a kẹ riẹ uvẹ nọ o ru evaọ aro arao ojihẹ na, yọ ọ be ta kẹ ahwo nọ a be rria otọakpọ na nọ a ru ẹmema+ kẹ arao ojihẹ nọ a rọ ọgbọdọ duwu rekọ nọ o dhidhi aro vi na.+ 15 A kẹ riẹ uvẹ re ọ kẹ ẹmema arao ojihẹ na ẹwẹ,* re ẹmema arao ojihẹ na ọ ta ẹme je ru re a kpe ahwo kpobi nọ a se nọ a rẹ gọ ẹmema arao ojihẹ na ha.

16 Ọ tẹ be gba ahwo kpobi họ, te esese te ilogbo, te edafe te iyogbe, te emuyẹ te erigbo, re a kpe oka họ obọze rai hayo aruezo rai,+ 17 re ohwo ọvo ọ gbẹ sae dẹ hayo zẹ hẹ ajokpaọ ohwo nọ o wo oka na, odẹ+ arao ojihẹ na hayo inọmba odẹ riẹ.+ 18 Etenẹ o jọ gwọlọ areghẹ: Jọ ọnọ o wo otoriẹ udidi o kele inọmba arao ojihẹ na, keme inọmba ohwo-akpọ* o rrọ, inọmba riẹ họ 666.+

14 Kẹsena mẹ tẹ ruẹ Omogodẹ na+ nọ o dikihẹ Ugbehru Zayọn,+ avọ ahwo idu udhuhrẹ-gbene (144,000)+ nọ e rrọ kugbei, enọ a kere odẹ riẹ avọ odẹ Ọsẹ riẹ+ họ aruezo rai. 2 Me te yo edo jọ nọ o bi no obọ odhiwu ze wọhọ edo ame obuobu jẹ wọhọ edo agbrara ọgaga; edo nọ me yo na o wọhọ uvou ahwo nọ a be so ile je bi kporo ekpata rai. 3 A be so ole nọ o wọhọ ole ọkpokpọ+ evaọ aro agbara-uvie na gbe aro emama ene nọ e rrọ uzuazọ+ na avọ ekpako na,+ yọ ohwo ọvo ọ sae riẹ ole na ha ajokpaọ ahwo idu udhuhrẹ-gbene (144,000)+ na, nọ a dẹ no otọakpọ na vrẹ. 4 Enana họ enọ i zue omarai hi, nọ i lele eyae wezẹ hẹ; evaọ uzẹme, a rrọ kọkọ.+ Enana họ enọ i bi lele Omogodẹ na ẹsikpobi kpohọ oria kpobi nọ ọ be nya.+ A dẹ enana+ no udevie ahwo-akpọ ze wọhọ ibi ọsosuọ+ rọkẹ Ọghẹnẹ gbe Omogodẹ na, 5 yọ a ruẹ eviẹhọ evuevo evaọ unu rai hi; a kare epe.+

6 Mẹ tẹ ruẹ ukọ-odhiwu ọfa nọ ọ be rra evaọ idadeghe,* yọ o bi whowho usi uwoma ebẹdẹ bẹdẹ kẹ enọ e be rria otọakpọ na, kẹ orẹwho, orua, ẹrọunu* gbe utu ahwo kpobi.+ 7 Ọ jẹ rọ urru oruarua ta nọ: “Wha dhozọ Ọghẹnẹ jẹ kẹe oruaro, keme auwa ẹdhoguo riẹ o te no,+ fikiere wha gọ Ọnọ ọ ma odhiwu na gbe otọakpọ na gbe abade+ na gbe iyeri-ame* na.”

8 Ukọ-odhiwu ọfa, ọrọ avọ ivẹ o te lele iei, be ta nọ: “O kie no! Babilọn Ologbo+ na o kie no,+ ọnọ o ru erẹwho na kpobi da enwaene isiuru egaga* ọfariẹ-ogbe*+ riẹ!”

9 Ukọ-odhiwu ọfa, ọrọ avọ esa o te lele ai, be rọ urru oruarua ta nọ: “Otẹrọnọ ohwo jọ ọ gọ arao ojihẹ+ na avọ ẹmema riẹ, jẹ rọwo nọ a kpe oka họ aruezo hayo obọ riẹ,+ 10 ọ te da enwaene ofu Ọghẹnẹ re, onọ a gua ha nọ a ku fihọ egho ofu ọgaga Riẹ,+ a vẹ te rehọ erae gbe isọ-ọre+ lahiẹ iẹe evaọ aro ikọ-odhiwu erẹri na gbe aro Omogodẹ na. 11 Iwiri olahiẹ rai i ti kuye bẹdẹ bẹdẹ,+ yọ te aso te uvo a wo eriosehọ họ, enọ e be gọ arao ojihẹ na avọ ẹmema riẹ, gbe ohwo kpobi nọ o wo oka odẹ+ riẹ. 12 Etenẹ o jọ gwọlọ ithihakọ mi erẹri na,+ enọ i bi koko ijaje Ọghẹnẹ je kru ẹrọwọ+ nọ a fihọ* Jesu gaga.”

13 Me te yo urru jọ nọ u no obọ odhiwu ze, nọ o ta nọ, “Kere nọ: Eva e were ahwo nọ a whu evaọ usu rai kugbe Olori na+ no umuo oke nana vrẹ. Ẹhẹ, ẹzi na ọ be ta nọ, jọ a serihọ no iruo egaga rai, keme eware nọ a ru i bi lele ai ovavo.”*

14 Kẹsena mẹ tẹ ruẹ ẹgho ọfuafo, yọ ohwo jọ ọ keria ehru ẹgho na nọ ọ wọhọ ọmọ ohwo,+ avọ etu-uvie igoru nọ o rrọ uzou riẹ yọ o kru ojale odada họ obọ.

15 Ukọ-odhiwu ọfa o te no oria aruẹri etẹmpol na ze, be rọ urru oruarua ta kẹ ọnọ ọ keria ehru ẹgho na nọ: “Rehọ ojale ra muhọ ẹkọrọ, keme auwa ẹkọrọ o te no, yọ ekakọ otọakpọ na e ware ziezi no.”+ 16 Ọnọ ọ keria ehru ẹgho na o te dhe ojale riẹ họ otọakpọ na, ọ tẹ kọrọ ekakọ otọakpọ na.

17 Ukọ-odhiwu ọfa o te je no oria aruẹri etẹmpol nọ o rrọ obọ odhiwu na ze, yọ o kru ojale odada re.

18 Ukọ-odhiwu ọfa o te je no oria agbada-idhe na ze, yọ o wo udu nọ o re ro ru erae na epanọ u je rie. Ọ tẹ rọ urru oruarua bo se ukọ-odhiwu nọ o kru ojale odada na nọ: “Rehọ ojale odada ra muhọ ẹkọrọ re who koko ewhala evaene otọakpọ na họ, keme ibi riẹ e ware no.”+ 19 Ukọ-odhiwu na o te dhe ojale riẹ họ otọakpọ na o te koko evaene otọakpọ na họ, o te gbolo iei fihọ ọgọdọ udi-uruo ulogbo orọ evedha Ọghẹnẹ.+ 20 A te thihi ibi evaene nọ e rrọ ọgọdọ udi-uruo na evaọ otafe okpẹwho na, azẹ o te no ọgọdọ udi-uruo na ze nọ o kpehru te ifi nọ a rọ gba enu enyenya na je thabọ te istediọmo odu ọvo gbe egba ezeza (1,600).*

15 Mẹ tẹ jọ obọ odhiwu ruẹ oka ofa jọ, onọ o rrọ ruaro je gbunu, ikọ-odhiwu ihrẹ+ nọ i kru iye ihrẹ. Enana họ erọ urere, keme ẹkwoma rai ofu Ọghẹnẹ o ti ro kuhọ.+

2 Mẹ tẹ ruẹ oware jọ nọ o wọhọ abade ighẹgbe+ nọ a gua erae kugbe, yọ ahwo nọ a kparobọ+ vi arao ojihẹ na avọ ẹmema riẹ+ gbe inọmba odẹ riẹ+ a dikihẹ akotọ abade ighẹgbe na, yọ a kru ekpata Ọghẹnẹ. 3 A jẹ so ole Mosis+ ọrigbo Ọghẹnẹ gbe ole Omogodẹ na,+ inọ:

“Iruo ra e rrọ ruaro je gbunu,+ Jihova* Ọghẹnẹ, Erumeru na.+ Idhere ra i kiẹrẹe jẹ rrọ uvi idhere,+ Ovie ebẹdẹ bẹdẹ.+ 4 Ono ọ rẹ ginẹ dhozọ ra ha, Jihova,* jẹ rọ orro kẹ odẹ ra ha?+ Keme whẹ ọvo họ ọnọ o re ru oware nọ o gba ẹsikpobi! Erẹwho na kpobi a te nyaze te gọ owhẹ evaọ aro ra,+ keme izi ikiẹrẹe ra i dhesẹ oma via no.”

5 Nọ onana o vrẹ no, mẹ tẹ ruẹ oria aruẹri ọrọ uwou-udhu isẹri+ na nọ a rovie evaọ obọ odhiwu,+ 6 ikọ-odhiwu ihrẹ nọ i kru iye ihrẹ+ na a te no oria aruẹri na ze, yọ a ku iwu efuafo erọ ehọ-elọlọhọ nọ i bi lo họ avọ ẹwẹ-ohọ igoru nọ a ro mu udu wariẹ. 7 Omọvo emama ene nọ e rrọ uzuazọ na ọ kẹ ikọ-odhiwu ihrẹ na imidhe ikokodo igoru ihrẹ nọ e vọ avọ ofu Ọghẹnẹ,+ ọnọ ọ rrọ uzuazọ bẹdẹ bẹdẹ na. 8 Oria aruẹri na o tẹ vọ avọ iwiri fiki oruaro Ọghẹnẹ+ gbe fiki ogaga riẹ, yọ ohwo ọvo ọ sae ruọ oria aruẹri na ha bẹsenọ iye ihrẹ+ ikọ-odhiwu ihrẹ na i ro re.

16 Me te yo urru oruarua jọ nọ u no oria aruẹri+ na ze nọ o ta kẹ ikọ-odhiwu ihrẹ na nọ: “Wha nyai ku imidhe ihrẹ ofu Ọghẹnẹ na fihọ otọakpọ na.”+

2 Ọrọ ọsosuọ ọ tẹ nya, o te ku eware nọ e rrọ omodhe okokodo riẹ fihọ otọakpọ na.+ Ola uyoma+ o tẹ ruọ ahwo nọ a wo oka arao ojihẹ+ na oma gbe enọ e jẹ gọ ẹmema riẹ.+

3 Ọrọ avọ ivẹ o te ku eware nọ e rrọ omodhe okokodo riẹ fihọ abade na.+ Abade na o te zihe ruọ azẹ,+ wọhọ azẹ ohwo nọ o whu no, omama* kpobi nọ o rrọ uzuazọ evaọ abade na+ u te whu.

4 Ọrọ avọ esa o te ku eware nọ e rrọ omodhe okokodo riẹ fihọ ithẹ gbe iyeri-ame* na.+ I te zihe ruọ azẹ.+ 5 Me te yo nọ ukọ-odhiwu nọ a kẹ udu ame obuobu na ọ be ta nọ: “Whẹ Ọnọ ọ rrọ, nọ ọ jọ,+ Ọnọ o re ru oware nọ o gba ẹsikpobi,+ who kiẹrẹe, keme who bruoziẹ+ eware nana, 6 fikinọ a kpe azẹ erẹri gbe eruẹaro,+ whọ tẹ kẹ ae azẹ da;+ oye u fo kẹ ae.”+ 7 Me te yo nọ agbada-idhe na ọ be ta nọ: “Ere, Jihova* Ọghẹnẹ, Erumeru na,+ iziẹibro* ra e rrọ gbagba je kiẹrẹe.”+

8 Ọrọ avọ ene o te ku eware nọ e rrọ omodhe okokodo riẹ fihọ ọre na,+ a tẹ kẹ ọre na udu re ọ rehọ ẹrrorro mahe ahwo na oma wọhọ erae. 9 Ẹrrorro ọgaga na ọ tẹ mahe ahwo na oma, rekọ a tẹ ta eme-aghọ kpahe odẹ Ọghẹnẹ, ọnọ o wo udu nọ ọ rọ kẹ iye nana, yọ a kurẹriẹ hẹ re a kẹe oruaro.

10 Ọrọ avọ isoi o te ku eware nọ e rrọ omodhe okokodo riẹ fihọ agbara-uvie arao ojihẹ na. Uvie riẹ u te muebi,+ a tẹ be rowo akọ fiki edada, 11 a tẹ ta eme-aghọ kpahe Ọghẹnẹ obọ odhiwu fiki edada gbe ela rai, yọ a kurẹriẹ no iruo iyoma rai hi.

12 Ọrọ avọ ezeza o te ku eware nọ e rrọ omodhe okokodo riẹ fihọ ethẹ Yufretis ologbo na,+ ame riẹ ọ tẹ kpọ no+ re a ruẹrẹ edhere họ kẹ ivie+ nọ i bi no obọ ovatha-ọre ze.

13 Mẹ tẹ ruẹ eme igbegbe* esa nọ e wọhọ ikere nọ i bi no unu araomuomu idudu na+ gbe unu arao ojihẹ na gbe unu ọruẹaro ọrue na ze. 14 Evaọ uzẹme, enana yọ eme nọ i no obọ idhivẹri ze. A bi ru eware eka.+ A tẹ nyabru ivie otọakpọ na soso, re a koko ae họ kẹ ẹmo+ ẹdẹ ologbo Ọghẹnẹ Erumeru na.+

15 “Rri! Mẹ be nyaze wọhọ oji.+ Eva e te were ohwo nọ ọ jaja aro vi+ jẹ sẹro iwu ehru riẹ, re ọ gbẹ nya ẹbẹba ha onọ o rẹ lẹliẹ ahwo rri rie oma o vẹ vuọ ẹe.”+

16 A te koko ae họ kpohọ oria nọ a rẹ rọ ẹvẹrẹ Hibru se Amagidọn.*+

17 Ọrọ avọ ihrẹ o te ku eware nọ e rrọ omodhe okokodo riẹ fihọ ofou na. Urru oruarua jọ u te no oria aruẹri na ze,+ no agbara-uvie na ze, be ta nọ: “U rugba no!” 18 Elo egbrara e tẹ romavia, gbe edo irru gbe egbrara, yọ otọ u nuhu gaga, utionọ o re via ẹdẹvo ho anwẹnọ ahwo a be rọ rria otọakpọ na,+ otọ nọ u nuhu na o ga thesiwa jẹ kẹre gaga. 19 Okpẹwho ologbo na+ o tẹ bẹre kpohọ abọ esa, ikpewho erẹwho na i te kie; Ọghẹnẹ ọ tẹ kareghẹhọ Babilọn Ologbo na,+ re ọ kẹe egho enwaene ofu ọgaga riẹ da.+ 20 Ofariẹ, ikoliko kpobi e tẹ dhẹ, yọ a gbẹ ruẹ igbehru hu.+ 21 Kẹsena oso-itho ologbo ọ tẹ rrọ no obọ odhiwu ze fihọ ahwo,+ onọ utho ovuovo riẹ o joma gbẹdẹ te etalẹnte,* ahwo na a tẹ ta eme-aghọ kpahe Ọghẹnẹ fiki uye oso-itho+ na, keme a re ruẹ oghẹrẹ uye utioye ẹdẹvo ho.

17 Omọvo ikọ-odhiwu ihrẹ nọ i kru imidhe ikokodo ihrẹ+ na ọ tẹ nyaze, ọ tẹ ta kẹ omẹ nọ: “Nyaze, re me dhesẹ oziẹ nọ a brukpe ogberẹ ologbo na kẹ owhẹ, ọnọ ọ keria ehru ame buobu+ na, 2 ọnọ ivie otọakpọ na a lele gbe-ọfariẹ,*+ ọnọ enwaene ọfariẹ-ogbe* riẹ u mu ahwo nọ a be rria otọakpọ na.”+

3 Ọ tẹ rọ ogaga ẹzi na wọ omẹ kpobọ udhude. Mẹ tẹ ruẹ aye jọ nọ ọ keria ehru arao ojihẹ ọwawae nọ edẹ ekela e vọ oma, o te je wo izou ihrẹ avọ izei ikpe. 4 Aye na o ku ewu ekọlọ ogorurẹ+ gbe ewu ọwawae họ, yọ ọ rehọ igoru gbe itho eghaghae gbe izuu+ whẹ erru họ oma, o te je kru egho igoru họ obọ onọ o vọ avọ eware etọtọ gbe eware igbegbe ọfariẹ-ogbe* riẹ. 5 A kere odẹ jọ fihọ aruezo riẹ, onọ o rrọ oware udidi: “Babilọn Ologbo na, oni igberẹ+ gbe eware etọtọ otọakpọ na.”+ 6 Mẹ ruẹ nọ aye na ọ da azẹ erẹri na gbe azẹ isẹri Jesu+ vọ eva.

Nọ mẹ ruẹ e riẹ, u gbe omẹ unu gaga. 7 Fikiere ukọ-odhiwu na ọ tẹ ta kẹ omẹ nọ: “Fikieme u ro gbe owhẹ unu? Mẹ te vuẹ owhẹ oware udidi jọ kpahe aye na+ gbe arao ojihẹ nọ ọ wọ riẹ na nọ o wo izou ihrẹ avọ izei ikpe na:+ 8 Arao ojihẹ nọ whọ ruẹ na ọ jọ vẹre, rekọ ọ gbẹ rrọ họ, ghele na o bi ti no ọgọdọ odidi na ze,+ yọ a te raha iẹe no. Enọ e be rria otọakpọ na, nọ a kere odẹ rai fihọ uko-obe uzuazọ+ na ha no emuhọ akpọ* na ze, u ti gbe ai unu okenọ a tẹ ruẹ nọ arao ojihẹ na ọ jọ vẹre, rekọ ọ gbẹ rrọ họ, ghele na ọ te wariẹ jariẹ.

9 “Onana o gwọlọ otoriẹ* avọ areghẹ: Izou ihrẹ+ na i dikihẹ kẹ igbehru ihrẹ, enọ aye na ọ keria ehru rai. 10 Ivie ihrẹ e riẹ: Isoi i kie no, ọvo jọ ọ rrọ, ọnọ o kiọkọ ọ re nyaze he; rekọ okenọ ọ tẹ nyaze, ọ te jariẹ omoke kakao. 11 Arao ojihẹ nọ ọ jọ vẹre rekọ nọ ọ gbẹ rrọ họ+ na ọ tẹ jẹ rrọ ovie avọ eree, rekọ oma ivie ihrẹ na o no ze, yọ a te raha iẹe no.

12 “Izei ikpe nọ whọ ruẹ na i dikihẹ kẹ ivie ikpe nọ a re kẹ uvie no ho, rekọ a kẹ rai udu nọ a rẹ rọ jọ ivie evaọ auwa ọvo kugbe arao ojihẹ na. 13 Enana i wo iroro evo, fikiere a tẹ rọ ogaga gbe udu nọ a wo kẹ arao ojihẹ na. 14 Enana a ti lele Omogodẹ na+ họre, rekọ fikinọ Omogodẹ na họ Olori ilori gbe Ovie ivie,+ Omogodẹ na o ti fi ae kparobọ.+ Ere ọvona, enọ e rrọ kugbei nọ a se jẹ salọ nọ i kru ẹrọwọ rai a ti ru ere.”+

15 Ọ tẹ ta kẹ omẹ nọ: “Ame obuobu nọ whọ ruẹ na, nọ ogberẹ na ọ keria na u dikihẹ kẹ itu ahwo, ogbotu, erẹwho gbe erọunu.*+ 16 Izei ikpe+ nọ whọ ruẹ na gbe arao ojihẹ+ na a ti mukpahe ogberẹ+ na a ve ti fi ei họ ababọ jẹ bae fihọ, a vẹ te re uwo-oma riẹ no jẹ rehọ erae mahe iẹe no riẹriẹriẹ.+ 17 Keme Ọghẹnẹ o fi iroro na họ udu rai re a ru ẹjiroro riẹ,+ ẹhẹ, re a ru iroro evo nọ a wo na gba ẹkwoma uvie rai nọ a rọ kẹ arao ojihẹ na,+ bẹsenọ eme Ọghẹnẹ i re rugba no. 18 Aye+ nọ whọ ruẹ na o dikihẹ kẹ okpẹwho ologbo na nọ o wo uvie nọ u bi su ivie otọakpọ na.”

18 Nọ onana o vrẹ no mẹ tẹ ruẹ ukọ-odhiwu ọfa nọ o bi no obọ odhiwu ze avọ ogaga* ulogbo, oruaro riẹ o tẹ whẹ elo họ otọakpọ na. 2 Ọ tẹ rehọ urru ogaga bo nọ: “O kie no! Babilọn Ologbo na o kie no,+ o zihe ruọ oria nọ idhivẹri gbe oghẹrẹ ẹzi ogbegbe* kpobi gbe oghẹrẹ evra nọ e fo ho kpobi nọ ahwo a mukpahe e be rria no.+ 3 Fiki enwaene isiuru egaga* ọfariẹ-ogbe* riẹ, erẹwho na kpobi a kie ruọ ẹbẹbẹ no,+ ivie otọakpọ na a lele i rie gbe-ọfariẹ,+ yọ egba-ihreki* otọakpọ na a fe no fiki uzuazọ akpọriọ nọ o vrẹta nọ o bi yeri ababọ omovuọ.”

4 Me te yo urru ofa jọ nọ u no obọ odhiwu ze nọ o be ta nọ: “Wha no eva riẹ no, ahwo mẹ,+ otẹrọnọ wha gwọlọ lele iei wobọ evaọ izieraha riẹ hẹ, gbe otẹrọnọ wha gwọlọ nọ iye riẹ jọ i te owhai hi.+ 5 Keme izieraha riẹ i kpehru te obọ odhiwu no,+ yọ Ọghẹnẹ ọ kareghẹhọ iruẹru okienyẹ* riẹ no.+ 6 Ru ei kele oghẹrẹ nọ o ru amọfa na,+ ẹhẹ, hwa eware nọ o ru zihe kẹe akuava;+ egho+ udi nọ ọ gua na, gua utioye kẹe akuava.+ 7 Ru olahiẹ gbe uweri riẹ ga te epanọ ọ kpare omariẹ kpehru te gbe epanọ o yeri uzuazọ akpọriọ nọ o vrẹta ababọ omovuọ te. Keme ọ be jọ udu riẹ ta ẹsikpobi nọ, ‘Mẹ keria wọhọ ovie-aye, mẹ rrọ aye-uku hu, yọ mẹ te rọ ẹro ruẹ uweri vievie he.’+ 8 Oyejabọ nọ iye riẹ e te rọ tha evaọ ẹdẹ ọvo, uwhu gbe uweri gbe ohọo, yọ a te rehọ erae mahe iẹe+ no riẹriẹriẹ, keme Jihova* Ọghẹnẹ nọ o bruoziẹ kpei na ọ rrọ gaga.+

9 “Ivie otọakpọ na nọ i lele i rie gbe-ọfariẹ* je lele iei yeri uzuazọ akpọriọ nọ o vrẹta ababọ omovuọ na a te viẹ jẹ rọ abọ tehe igbama rai avọ uweri fiki riẹ okenọ a te ruẹ iwiri erae nọ a be rọ mahe iẹe. 10 A ti dikihẹ ugbo fiki ozọ olahiẹ nọ u bi tei, a vẹ te ta nọ: ‘U yoma kẹhẹ, u yoma kẹhẹ, O whẹ okpẹwho ologbo na,+ Babilọn okpẹwho ọgaga na, keme evaọ auwa ọvo ẹdhoguo ra ọ rọ ze!’

11 “Ofariẹ, egba-ihreki otọakpọ na a be viẹ je weri fiki riẹ keme ohwo ọvo ọ gbẹ riẹ nọ ọ be dẹ eware ibuobu rai hi, 12 eware ibuobu rai na họ igoru, isiliva, itho eghaghae, izuu, emamọ ehọ-elọlọhọ, ehọ ekọlọ ogorurẹ, ehọ silki gbe ehọ ewawae; gbe eware kpobi nọ a rehọ ire nọ i re gbo ore awere ru; gbe oghẹrẹ eware kpobi nọ a rọ akọ-eni ru, gbe eware nọ a rọ ire eghaghae, ekọpa, ayọno gbe marbo ru; 13 gbe sinamọn, eware nọ i re gbo ore awere nọ i no obọ India ze, insẹnse, udẹ nọ u re gbo ore awere, frankinsẹns, enwaene, ewhri olivi, emamọ eflawa iwuwuru, iwhiti, iruẹ, igodẹ, enyenya, ekẹkẹ, erigbo, ẹhẹ ahwo-akpọ.* 14 Emamọ ubi-ure nọ o rẹ were owhẹ* gaga na o gbẹ riẹ hẹ, yọ obọdẹ emu gbe obọdẹ eware na kpobi e rayẹ siọ owhẹ ba no, a gbẹ te ruẹ e rai ofa ha.

15 “Egba-ihreki nọ e jẹ zẹ eware nana, enọ e rọ ẹkwoma riẹ fe na, a ti dikihẹ ugbo fiki ozọ olahiẹ nọ u bi tei, a vẹ te viẹ je weri, 16 be ta nọ: ‘U yoma kẹhẹ, u yoma kẹhẹ, okpẹwho ologbo na, nọ ọ rehọ emamọ ehọ-elọlọhọ, ehọ ekọlọ ogorurẹ gbe ehọ ewawae gọ ẹgọ, jẹ rọ eware osẹ igoru gbe itho eghaghae gbe izuu whẹ erru họ oma na,+ 17 keme evaọ auwa ọvo efe obuobu yena ọ raha no!’

“Ahwo kpobi nọ a wuzou ekọ ilogbo gbe ahwo kpobi nọ a rẹ ruọ ekọ gbe ibiekọ gbe ahwo kpobi nọ a rẹ kọ okọ evaọ abade na a te dikihẹ ugbo, 18 a te bi bo nọ a bi rri iwiri erae nọ a be rọ mahe iẹe na, a tẹ ta nọ: ‘Okpẹwho vẹ ọ wọhọ okpẹwho ologbo na?’ 19 A tẹ whẹ ovu ku uzou rai bi bo, be viẹ je bi weri, be ta nọ: ‘U yoma kẹhẹ, u yoma kẹhẹ, okpẹwho ologbo na, ọnọ ahwo kpobi nọ a wo ekọ ilogbo evaọ abade a rọ ẹkwoma riẹ fe, keme evaọ auwa ọvo a raha e riẹ no!’+

20 “Wha ghọghọ fiki riẹ, O odhiwu,+ te owhai erẹri na,+ ikọ na gbe eruẹaro na, keme Ọghẹnẹ o bruoziẹ kpei no fiki rai!”+

21 Ukọ-odhiwu ọgaga jọ ọ tẹ wọ utho nọ o wọhọ utho ulogbo nọ a re ro wuhu eware, o te gbolo iei fihọ abade na, be ta nọ: “Ere a ti gbolo Babilọn okpẹwho ologbo na fihọ otọ ẹsiẹvo, yọ a gbẹ te ruẹ e riẹ ofa ha.+ 22 A gbẹ te jọ eva ra yo edo eso-ile nọ i bi kporo ekpata ha, edo ikporo-ile, edo enọ i re kporo urete, gbe edo enọ i re kporo egba. A gbẹ te jọ eva ra ruẹ ọwena ọvo vievie he nọ o bi ru oghẹrẹ iruo jọ, yọ a gbẹ te jọ eva ra yo edo utho nọ a re ro wuhu eware vievie he. 23 Elo ukpẹ o gbẹ te jọ eva ra lo vievie he, yọ a gbẹ te jọ eva ra yo urru ọva gbe orọ ọmọtibobo ofa ha; keme egba-ihreki ra e jọ ahwo ologbo evaọ otọakpọ na, yọ whọ rehọ iruẹru-imizi+ ra su erẹwho na kpobi thọ. 24 Ẹhẹ, eva riẹ a jọ ruẹ azẹ eruẹaro gbe erẹri na+ gbe azẹ ahwo kpobi nọ a kpe evaọ otọakpọ na.”+

19 Nọ onana o vrẹ no, me te yo urru oruarua jọ nọ o wọhọ orọ ogbotu obuobu evaọ obọ odhiwu. A ta nọ: “Wha jiri Jah!*+ Obọ Ọghẹnẹ mai esiwo na, oruaro na gbe ogaga na o rrọ, 2 keme oziẹobro riẹ ọ rrọ gbagba je kiẹrẹe.+ O bruoziẹ kpe ogberẹ ologbo na no ọnọ ọ rehọ ọfariẹ-ogbe* riẹ ro gbe otọakpọ na ku, yọ ọ kioja azẹ erigbo riẹ nọ i wholo abọ* ogberẹ na no.”+ 3 A tẹ nwane ta orọ avọ isiava nọ: “Wha jiri Jah!*+ Yọ iwiri ọraha ogberẹ na i bi kuye bẹdẹ bẹdẹ.”+

4 Ekpako udhegbene+ na gbe emama ene nọ e rrọ uzuazọ+ na a te kigwẹ gọ Ọghẹnẹ, ọnọ ọ keria agbara-uvie na, a tẹ ta nọ: “Ami! Wha jiri Jah!”*+

5 Ofariẹ, urru jọ u te no agbara-uvie na ze nọ o ta nọ: “Wha hai jiri Ọghẹnẹ mai, whai erigbo riẹ kpobi+ nọ e be dhozọ riẹ, te esese te ilogbo.”+

6 Me te yo edo jọ nọ o wọhọ urru ogbotu obuobu, jẹ wọhọ edo ame obuobu jẹ wọhọ edo egbrara egaga. A ta nọ: “Wha jiri Jah,*+ keme Jihova* Ọghẹnẹ mai, Erumeru na+ o muhọ esu no wọhọ ovie!+ 7 Joma ghọghọ jẹ wereva gaga, jẹ rehọ oruaro kẹe, keme orọo Omogodẹ na u te no yọ aye riẹ ọ ruẹrẹ oma kpahe no. 8 Ẹhẹ, a kẹ riẹ uvẹ re ọ rehọ emamọ ehọ-elọlọhọ nọ e rrọ nwranwranwra jẹ fo rọ gọ ẹgọ—keme emamọ ehọ-elọlọhọ na i dikihẹ kẹ iruẹru ikiẹrẹe erẹri na.”+

9 Ọ tẹ ta kẹ omẹ nọ, “Kere nọ: Eva e were enọ a zizie kpohọ emu owọwọ ọrọ ehaa orọo Omogodẹ na.”+ Ọ tẹ jẹ ta kẹ omẹ nọ: “Eme nana yọ eme Ọghẹnẹ nọ a re fievahọ.” 10 Me te kigwẹ fihọ aro riẹ re mẹ gọe. Rekọ ọ tẹ ta kẹ omẹ nọ: “Yọroma! Who ru ere he!+ Ibe ọrigbo ra gheghe mẹ rrọ gbe ọrọ inievo ra nọ i wo iruo isẹri-ise kpahe Jesu.+ Gọ Ọghẹnẹ!+ Keme isẹri-ise kpahe Jesu họ oware nọ o rẹ wha eruẹaruẹ ze.”+

11 Mẹ ruẹ odhiwu nọ o rovie, gbe anyenya ọfuafo+ jọ. A se ọnọ ọ keria ehru riẹ Ọnọ A re Fievahọ+ gbe Ọrọ Uzẹme,+ o re bruoziẹ je fi ẹmo nọ o kiẹrẹe.+ 12 Ibiaro riẹ yọ ebruerae,+ yọ itu-uvie* buobu e rrọ uzou riẹ. O wo odẹ nọ a kere fihọ oma riẹ nọ ohwo ọvo ọ riẹ hẹ ajokpaọ ọyomariẹ ọvo, 13 o ku ewu ehru họ nọ azẹ o gbe,* yọ odẹ nọ a bi sei họ, Ẹme Ọghẹnẹ.+ 14 Ofariẹ, egbaẹmo obọ odhiwu nọ e rrọ ehru enyenya efuafo a je lele iei, yọ a rehọ emamọ ehọ-elọlọhọ nọ e rrọ fuafo jẹ fo rọ gọ ẹgọ. 15 Ọgbọdọ nọ ọ rrọ thethei jẹ rrọ dada u wolo no unu riẹ ze+ nọ o re ro kpe erẹwho na, yọ ọ te rehọ ọkpọ ayọno su ai wọhọ othuru-igodẹ.+ Ofariẹ, o ti thihi ibi-ire nọ e rrọ ọgọdọ udi-uruo ofu Ọghẹnẹ Erumeru na.+ 16 A kere odẹ jọ fihọ ewu ehru riẹ, ẹhẹ, evaọ ekpokpowọ riẹ, oye họ Ovie ivie gbe Olori ilori.+

17 Mẹ tẹ jẹ ruẹ ukọ-odhiwu jọ nọ o dikihẹ ọre na, ọ tẹ rehọ urru oruarua bo jẹ ta kẹ evra kpobi nọ e rẹ rra evaọ idadeghe* na nọ: “Wha nyaze, wha kokohọ kẹ emu owọwọ ologbo Ọghẹnẹ,+ 18 re wha re uwo-oma ivie gbe uwo-oma enọ i wuzou egbaẹmo gbe uwo-oma egba+ gbe uwo-oma enyenya avọ enọ e keria ehru rai,+ gbe uwo-oma ahwo kpobi, te orọ emuyẹ te erigbo te orọ ahwo esese te ilogbo.”

19 Mẹ tẹ ruẹ arao ojihẹ na gbe ivie otọakpọ na avọ egbaẹmo rai nọ a kokohọ re a lele ọnọ ọ keria anyenya na avọ egbaẹmo riẹ fi ẹmo.+ 20 A te mu arao ojihẹ na avọ ọruẹaro ọrue+ nọ ọ jẹ jọ aro riẹ ru eware eka na, enọ o ro su ahwo nọ a wo oka arao ojihẹ+ na thọ gbe ahwo nọ a be gọ ẹmema riẹ.+ Epanọ a gbẹ rọ rrọ uzuazọ na, a te gbolo aimava fihọ ẹtẹre erae nọ isọ-ọre e be jọ to.+ 21 Rekọ a tẹ rehọ ọgbọdọ othethei nọ u wolo no unu ọnọ ọ keria anyenya+ na ze na ro kpe ahwo nọ a kiọkọ. Evra na kpobi a tẹ re iwo-oma rai vọ eva.+

20 Mẹ tẹ ruẹ ukọ-odhiwu jọ nọ o bi no obọ odhiwu ze avọ usiavẹ unu ọgọdọ odidi na+ gbe ogbregba ologbo nọ o rrọ obọ riẹ. 2 O te mu araomuomu idudu na,+ araomuomu anwae na,+ ọnọ ọ rrọ Ẹdhọ+ gbe Setan+ na, ọ tẹ rọ ogbregba kare iẹe ikpe odu (1,000). 3 O te gbolo iei fihọ ọgọdọ odidi na,+ ọ tẹ kare iẹe dhei je fi oka họ ehru riẹ, re o gbe su erẹwho na thọ ofa ha bẹsenọ ikpe odu (1,000) na i re re no. Nọ onana o tẹ vrẹ no a ve ti siobọnoi evaọ omoke kakao.+

4 Mẹ tẹ ruẹ egbara-uvie yọ a kẹ enọ e keria ae udu nọ a re ro bruoziẹ. Ẹhẹ, mẹ ruẹ ahwo* nọ a kpe* fiki isẹri nọ a se kpahe Jesu gbe ẹme nọ a ta kpahe Ọghẹnẹ, gbe enọ e gọ arao ojihẹ na hayo ẹmema riẹ hẹ, yọ a rọwo nọ a kpe oka họ aruezo rai hayo obọ rai hi.+ A tẹ ziọ uzuazọ, a tẹ jọ ivie je lele Kristi su+ evaọ ikpe odu (1,000). 5 (Ahwo nọ a whu no nọ a kiọkọ+ a ziọ uzuazọ họ bẹsenọ ikpe odu na i ro re.) Onana họ ẹkparomatha ọsosuọ na.+ 6 Ohwo kpobi nọ a kpare ze evaọ ẹkparomatha ọsosuọ+ na o re wo evawere ọ tẹ jẹ rrọ ọrẹri; uwhu avọ ivẹ+ na u wo ogaga evaọ oma rai hi,+ rekọ a te jọ izerẹ+ Ọghẹnẹ gbe erọ Kristi, yọ a te jọ ivie nọ i ti lele iei su evaọ ikpe odu (1,000).+

7 Ikpe odu (1,000) na e tẹ nwani re no, a ti siobọno Setan no uwou-odi ze, 8 ọ vẹ te nyai su erẹwho nọ e rrọ ibienẹ ene akpọ na thọ, Gọg avọ Magọg, re o koko ai họ kẹ ẹmo na. Unu ahwo nana o te jọ wọhọ uwẹkpẹ abade. 9 A tẹ nyaruọ otọakpọ na soso jẹ wariẹ evuẹ erẹri na họ gbe okpẹwho nọ Ọghẹnẹ o you na. Rekọ erae i te no obọ odhiwu ze e tẹ mahe ae no.+ 10 A te gbolo Ẹdhọ nọ o je su ai thọ na fihọ ẹtẹre erae avọ isọ-ọre, oria nọ arao ojihẹ+ na gbe ọruẹaro ọrue na a rrọ no vẹre;+ yọ a te lahiẹ ae* te aso te uvo bẹdẹ bẹdẹ.

11 Mẹ tẹ ruẹ agbara-uvie ọfuafo ologbo jọ gbe Ọnọ ọ keria agbara-uvie na.+ Otọakpọ na gbe odhiwu na e tẹ dhẹ no aro riẹ,+ a gbẹ ruẹ e rai ofa ha. 12 Mẹ tẹ ruẹ enọ i whu no, te ilogbo te esese nọ i dikihẹ aro agbara-uvie na, yọ a rovie iko-ebe fihọ. Rekọ a te rovie uko-obe ofa jọ; uko-obe uzuazọ.+ A tẹ rehọ eware nọ a kere fihọ iko-ebe na ro bruoziẹ enọ i whu no na wọhọ epanọ a ru.+ 13 Abade o te siobọno enọ i whu nọ e rrọ eva riẹ, uwhu gbe Uki* a te siobọno enọ i whu nọ e rrọ eva rai, a te bruoziẹ rai omomọvo wọhọ epanọ a ru.+ 14 A te gbolo uwhu gbe Uki* fihọ ẹtẹre erae na.+ Ẹtẹre erae na+ u dikihẹ kẹ uwhu avọ ivẹ na.+ 15 Ofariẹ, ohwo kpobi nọ a ruẹ odẹ riẹ evaọ obe uzuazọ na ha,+ a te gbolo iei fihọ ẹtẹre erae na.+

21 Mẹ tẹ ruẹ odhiwu ọkpokpọ avọ otọakpọ ọkpokpọ;+ keme odhiwu anwae na avọ otọakpọ anwae na e vrẹ no,+ yọ abade+ na ọ gbẹ riẹ hẹ. 2 Mẹ tẹ jẹ ruẹ okpẹwho ọrẹri na, Jerusalẹm Ọkpokpọ na, nọ o bi no obọ odhiwu ze, no obọ Ọghẹnẹ ze,+ yọ ọ wọhọ ọmọtibobo nọ a gọ ẹgọ owowoma be hẹrẹ ọzae riẹ.+ 3 Kẹsena me te yo urru oruarua jọ nọ u no agbara-uvie na ze nọ o ta nọ: “Rri! Uwou* Ọghẹnẹ o rrọ udevie ahwo-akpọ, ọ te rria kugbe ae, yọ a te jọ ahwo riẹ. Ọghẹnẹ omariẹ ọ te jọ kugbe ae.+ 4 Yọ o ti ririe irui-oviẹ kpobi no aro rai,+ uwhu o gbẹ te jọ ofa ha,+ yọ uweri hayo oviẹ hayo edada e gbẹ te jọ ofa ha.+ Eware anwae na e vrẹ no.”

5 Ọnọ ọ keria agbara-uvie na+ ọ tẹ ta nọ: “Rri! Me bi ru eware kpobi họ ekpokpọ.”+ Ọ tẹ jẹ ta nọ: “Kere, keme eme nana yọ eme nọ a re fievahọ,* e tẹ jẹ rrọ uzẹme.” 6 Ọ tẹ ta kẹ omẹ nọ: “I rugba no! Mẹ họ Alfa gbe Omẹga,* emuhọ gbe ekuhọ na.+ Ohwo kpobi nọ uruame u bi kpe, mẹ te jọ eyeri-ame ọrọ ame uzuazọ na kẹe* re ọ da ọvọvẹ.*+ 7 Ohwo kpobi nọ o bi fi kparobọ ọ te reuku eware nana, mẹ te jọ Ọghẹnẹ riẹ, ọ vẹ te jọ ọmọ mẹ. 8 Rekọ edhozọ gbe ahwo nọ a wo ẹrọwọ họ+ gbe ahwo nọ a bi ru eware etọtọ gbe enọ i re kpe ahwo+ gbe enọ i bi gbe-ọfariẹ*+ gbe enọ i bi ru iruẹru-imizi gbe egedhọ gbe eterue na kpobi,+ a te jọ evaọ ẹtẹre nọ erae avọ isọ-ọre e be jọ to na.+ Onana u dikihẹ kẹ uwhu avọ ivẹ na.”+

9 Omọvo ikọ-odhiwu ihrẹ nọ i kru imidhe ikokodo ihrẹ enọ iye ihrẹ urere+ na e vọ eva na ọ tẹ nyaze ọ tẹ ta kẹ omẹ nọ: “Nyaze, re me dhesẹ ọmọtibobo na, aye Omogodẹ na+ kẹ owhẹ.” 10 Fikiere ọ tẹ rọ ogaga ẹzi na wọ omẹ vrẹ kpohọ ugbehru ulogbo jọ nọ u kpehru gaga, o te dhesẹ Jerusalẹm okpẹwho ọrẹri na kẹ omẹ nọ o bi no obọ odhiwu ze, no obọ Ọghẹnẹ ze,+ 11 yọ o wo oruaro Ọghẹnẹ.+ O je lo wọhọ utho nọ o rrọ ghaghae gaga, wọhọ utho jaspa nọ u bi lo nwranwranwra wọhọ kristal.*+ 12 U wo ugbẹhẹ ulogbo nọ u kpehru gaga yọ u wo inuethẹ ikpegbivẹ, avọ ikọ-odhiwu ikpegbivẹ nọ e rrọ inuethẹ na, yọ a kere edẹ erua ikpegbivẹ erọ emezae Izrẹl fihọ inuethẹ na. 13 Inuethẹ esa e jọ ofẹ ovatha-ọre, evaọ ofẹ ẹkpẹlobọ ovatha-ọre inuethẹ esa, evaọ ofẹ obọze ovatha-ọre inuethẹ esa, evaọ ofẹ ukiediwo-ọre inuethẹ esa.+ 14 Ugbẹhẹ okpẹwho na u te je wo itho otọhotọ ikpegbivẹ, yọ a kere edẹ ikpegbivẹ erọ ikọ ikpegbivẹ+ Omogodẹ na fihọ ae.

15 Whaọ, ọnọ ọ jẹ ta ẹme kẹ omẹ na o kru ọkpọ* igoru nọ ọ gwọlọ rọ ma okpẹwho na avọ inuethẹ riẹ gbe ugbẹhẹ riẹ.+ 16 Okpẹwho na o wo abọ ene nọ e rrọ ẹrẹrẹe, uthethei riẹ avọ okẹkẹe riẹ ẹrẹrẹe. Ọ tẹ rehọ ọkpọ na ma okpẹwho na, u te istediọmo idu ikpegbivẹ (12,000);* te uthethei te okẹkẹe te ekpehru riẹ ẹrẹrẹe. 17 Ọ tẹ jẹ ma ugbẹhẹ riẹ, u te ikiubiti udhuhrẹ-gbene (144),* wọhọ epanọ ohwo-akpọ ọ rẹ ma oware, evaọ oke ovona o tẹ jẹ rrọ epanọ ukọ-odhiwu ọ rẹ ma oware. 18 Whaọ, itho jaspa+ a rọ ma ugbẹhẹ na, okpẹwho na kọ emamọ igoru nọ o wọhọ ighẹgbe nọ a rẹ ruẹ lafi. 19 A rehọ oghẹrẹ itho eghaghae kpobi rọ whẹ erru họ otọhotọ ugbẹhẹ okpẹwho na: orọ otọhotọ ọsosuọ họ jaspa, orọ avọ ivẹ safaya, orọ avọ esa kalsidoni, orọ avọ ene ẹmerald, 20 orọ avọ isoi sardoniks, orọ avọ ezeza sardiọs, orọ avọ ihrẹ krisolaet, orọ avọ eree bẹril, orọ avọ izii topaz, orọ avọ ikpe krisopras, orọ avọ ikpegbọvo hayasint, orọ avọ ikpegbivẹ ametist. 21 Ofariẹ, inuethẹ ikpegbivẹ na i wo izuu ikpegbivẹ; uzuu ọvo a ro ru unuẹthẹ ọvuọvo. Emamọ igoru a ro ru oko-ore* okpẹwho na, yọ o wọhọ ighẹgbe nọ a rẹ ruẹ lafi.

22 Mẹ ruẹ etẹmpol evaọ eva riẹ hẹ, keme Jihova* Ọghẹnẹ Erumeru na+ họ etẹmpol riẹ, ere Omogodẹ na re. 23 U du gwọlọ nọ ọre hayo ọvẹre o re lo fihọ okpẹwho na ha, keme oruaro Ọghẹnẹ o whẹ elo fihọ iẹe no,+ yọ ukpẹ riẹ họ Omogodẹ na.+ 24 Elo riẹ erẹwho na a te rọ ruẹ ude nya,+ yọ ivie otọakpọ na a te rọ oruaro rai ziọ eva riẹ. 25 A te kare inuethẹ riẹ vievie he evaọ okpẹdoke na soso, keme aso ọ te jọ etẹe he.+ 26 Yọ a te rọ oruaro gbe ọghọ erẹwho na ziọ eva riẹ.+ 27 Rekọ oware kpobi nọ u gbeku gbe ohwo kpobi nọ o bi ru oware otọtọ jẹ vọ avọ eviẹhọ ọ te ruọ eva riẹ vievie he;+ enọ a kere odẹ rai fihọ uko-obe uzuazọ Omogodẹ na ọvo a te ruọ eva riẹ.+

22 O te dhesẹ ethẹ ame uzuazọ kẹ omẹ,+ onọ o rrọ gogogo nọ a rẹ ruẹ lafi wọhọ kristal,* nọ o bi kporo no agbara-uvie Ọghẹnẹ gbe ọrọ Omogodẹ na ze,+ 2 yọ o bi kporo ruọ udevie oko-ore* okpẹwho na. Ire uzuazọ nọ e be mọ ibi isia ikpegbivẹ e jọ tabọ tabọ ethẹ na, e rẹ mọ kamara kamara. Ebe ire na e jọ kẹ usiwo erẹwho na.+

3 Ehao ebọwo evuevo e gbẹ te jariẹ hẹ. Rekọ agbara-uvie Ọghẹnẹ gbe ọrọ Omogodẹ na+ e te jọ okpẹwho na, yọ erigbo riẹ a te gọe;* 4 a te ruẹ ovao riẹ,+ odẹ riẹ o te jọ aruezo rai.+ 5 Ofariẹ, aso ọ gbẹ te jariẹ hẹ,+ yọ a du gwọlọ elo ukpẹ hayo elo ọre he keme Jihova* Ọghẹnẹ o ti lo fihọ ai,+ yọ a te jọ ivie nọ i ti su bẹdẹ bẹdẹ.+

6 Ọ tẹ ta kẹ omẹ nọ: “Eme nana yọ eme nọ a re fievahọ,* e tẹ jẹ rrọ uzẹme;+ Jihova,* Ọghẹnẹ nọ ọ rehọ eruẹaro na ta ẹme,+ o vi ukọ-odhiwu riẹ re o dhesẹ kẹ erigbo riẹ eware nọ e te via hrọ kẹle na. 7 Rri! mẹ be nyaze vẹrẹ vẹrẹ.+ Jọ eva e were ohwo kpobi nọ o bi ru lele eme eruẹaruẹ nọ e rrọ uko-obe nana.”+

8 Whaọ, mẹ Jọn họ ọnọ o je yo jẹ ruẹ eware nana. Nọ me yo jẹ ruẹ e rai, me te kigwẹ fihọ aro ukọ-odhiwu nọ o je dhesẹ eware nana kẹ omẹ na re mẹ gọe. 9 Rekọ ọ tẹ ta kẹ omẹ nọ: “Yọroma! Who ru ere he! Ibe ọrigbo ra gheghe mẹ rrọ gbe ọrọ inievo ra eruẹaro na gbe enọ i bi ru lele eme nọ e rrọ uko-obe nana. Gọ Ọghẹnẹ.”+

10 Ọ tẹ jẹ ta kẹ omẹ nọ: “Who du ko eme eruẹaruẹ nọ e rrọ uko-obe nana dhere he,* keme oke nọ a fihọ na o kẹle no. 11 Jọ ohwo nọ o bi ru umuomu ọ ruabọhọ umuomu, jọ ohwo nọ o bi ru eware etọtọ ọ ruabọhọ eware etọtọ riẹ; jọ ohwo nọ o kiẹrẹe ọ ruabọhọ ẹrẹreokie riẹ, jọ ohwo nọ ọ rrọ ọrẹri ọ gbẹ jọ ọrẹri.

12 “‘Rri! mẹ be nyaze vẹrẹ vẹrẹ, osohwa nọ mẹ te kẹ o rrọ omẹ obọ, yọ mẹ te hwosa kẹ omomọvo wọhọ epanọ iruo riẹ e rrọ.+ 13 Mẹ họ Alfa gbe Omẹga,*+ ọrọ ọsosuọ gbe ọrọ urere na, emuhọ gbe ekuhọ na. 14 Jọ eva e were ahwo nọ a fọrọ iwu ithethei rai,+ re a sai wo udu nọ a rẹ rọ nyae re ibi ire uzuazọ na,+ gbe re a sae kẹ ae uvẹ rehọ inuethẹ na ruọ eva okpẹwho na.+ 15 Rọkẹ erakọ* na, gbe enọ i re ru iruẹru-imizi gbe enọ i bi gbe-ọfariẹ* gbe enọ i re kpe ahwo gbe egedhọ gbe ohwo kpobi nọ ọrue-ọta ọ rẹ were, nọ o re gu ọrue, obọ otafe a te jọ.’+

16 “‘Mẹ Jesu, me vi ukọ-odhiwu mẹ re ọ vuẹ* owhai kpahe eware nana nọ e rrọ kẹ ikoko na. Mẹ họ owọ-ure gbe ọmọ Devidi+ gbe esi ohiohiẹ ọnwranwra na.’”+

17 Ẹzi na avọ ọmọtibobo na+ a tẹ be ta nọ, “Nyaze!” jọ ohwo kpobi nọ o bi yo ọ ta nọ, “Nyaze!” jọ ohwo kpobi nọ uruame u bi kpe ọ nyaze;+ jọ ohwo kpobi nọ ọ gwọlọ, ọ da ame uzuazọ ọvọvẹ.+

18 “Mẹ be vuẹ ohwo kpobi nọ o bi yo eme eruẹaruẹ nọ e rrọ uko-obe nana nọ: Otẹrọnọ ohwo jọ o fiba eware nana,+ Ọghẹnẹ o ti fi iye nọ a kere fihọ uko-obe nana ba kẹe;+ 19 yọ otẹrọnọ ohwo jọ o si no eme eruẹaruẹ nọ e rrọ uko-obe nana, Ọghẹnẹ o ti si ẹkẹ riẹ no ire uzuazọ na,+ yọ a te kẹe uvẹ ruọ okpẹwho ọrẹri na+ ha, eware nọ a kere kpahe evaọ uko-obe nana.

20 “Ọnọ o se isẹri kpahe eware nana ọ tẹ ta nọ, ‘Ẹhẹ, mẹ be nyaze vẹrẹ vẹrẹ.’”+

“Ami! Nyaze, Olori Jesu.”

21 Jọ Olori na Jesu o gbe dhesẹ uwowou ulogbo riẹ kẹ erẹri na.