Jekọp O Kpohọ Heran

WHỌ riẹ ahwo ọnana nọ Jekọp ọ be ta ẹme kẹ na? Nọ Jekọp ọ nya edẹ buobu no, o te zerai eva abotọ ozae. A jẹ rehọ ẹro te igodẹ rai. Jekọp ọ tẹ nọ: ‘Diẹse wha no ze?’

A tẹ ta nọ, ‘Heran.’

Jekọp ọ tẹ nọ nnọ, ‘Wha riẹ Leban?’

A te yo nọ, ‘E. Rri, ọmọtẹ riẹ ọ be nya tha na, avọ uthuru igodẹ ọsẹ riẹ.’ Kọ whọ sae ruẹ Reshẹl nọ ọ be nya tha eva ugbo uthabọ na?

Nọ Jekọp ọ ruẹ Reshẹl avọ igodẹ Leban, oniọvo oni riẹ, ọ tẹ nya i ghelie utho no ozae na no re igodẹ na e sae d’ame. Kẹsena Jekọp ọ tẹ viọlọ Reshẹl, je dhesẹ oma riẹ kẹe. Ọwhọ ọ tẹ ruọ ọmọtẹ na oma, koyehọ ọ dhẹ nya e vuẹ Leban ọsẹ riẹ.

Eva e were Leban gaga re Jekọp ọ ria kugbe i. Nọ Jekọp ọ jẹ yare re ọ rọo Reshẹl, eva e tẹ were Leban. Dede, ọ ta kẹ Jekọp nọ ọye o re ru iruo ẹwọ kẹe ikpe ihrẹ re Reshẹl o te tei obọ. Fiki nọ o you Reshẹl gaga Jekọp o te ru onana. Rekọ nọ oke orọo na u te, whọ riẹ oware nọ o via?

Leban ọ tẹ rehọ Lia ọmọtẹ ọkpako riẹ kẹ Jekọp rehọ ẹta Reshẹl. Nọ Jekọp ọ jẹ rọwo nọ o re ru iruo kẹ Leban ikpe ihrẹ efa, Leban ọ tẹ jẹ rọ Reshẹl kẹe wọhọ aye. Eva oke oyena, Ọghẹnẹ ọ k’uvẹ nọ ahwo a sae rehọ vi aye ọvo. Rekọ enẹna, wọhọ epanọ Ebaibol o dhesẹ, ọzae o re wo aye ọvuọvo.