Mosis Avọ Erọn A Ruẹ Fẹro

OKENỌ Mosis ozihe kpohọ Ijipti, o te gbe iku eka nọ evia kpobi kẹ Erọn oniọvo riẹ. Nọ Mosis avọ Erọn adhesẹ eka na kpobi kẹ Izrẹl, ai kpobi a tẹ rọwo nọ Jihova ọ rọ kugbae.

Kẹsena Mosis avọ Erọn a tẹ nya e ruẹ Fẹro. A tẹ ta kẹe nọ: ‘Jihova Ọghẹnẹ Izrẹl ọ ta nọ: “Jọ ahwo mẹ akpo eva edẹ esa re asa e gọ omẹ eva igbruẹwọ na.”’ Rekọ Fẹro o te yonọ: ‘Mẹ rọwo Jihova ha. Yọ Me bi ti si obọno Izrẹl kpo ho.’

Eva ejẹ dha Fẹro, keme ahwo na a gwọlọ rehọ no oke iruo re ae gọ Jihova. Fikiere ọ tẹ gbai họ ru iruo ga viere. Ahwo-Izrẹl a tẹ fuọ Mosis fiki epanọ a ru rai yoma te, Mosis o te weri. Rekọ Jihova ọ tẹ ta kẹe nọ okpokpo oma ha. ‘Me ti rue Fẹro siobọ no ahwo mẹ kpo,’ ere Jihova ọ ta.

Mosis avọ Erọn awariẹ nya e ruẹ Fẹro. Oke nana aru oka. Erọn ogbolo ọkpọ riẹ fihọ otọ, o te zihe ruọ araomuomu ologbo. Rekọ ahwo iwareghẹ ọ Fẹro a te gbolo ekpọ fihọ otọ re, eraomuomu e tẹ r’oma via. Rekọ rri! Araomuomu ọ Erọn ọbe lọ eraomuomu ọ iwareghẹ na no. Tenẹna Fẹro osiobọno Ahwo-Izrẹl kpo ho.

Fikiere oke u tete nọ Jihova o rero wuhrẹ Fẹro oware jọ. Kọ whọ riẹ epanọ o rurie? Iye 10 hayo ikpokpoma ilogbo nọ ọ rọze rọkẹ Ijipti.

Nọ iye buobu evrẹ no, Fẹro o te se Mosis ọ tẹ ta nọ: ‘Da uyena ji, re me ti si obọno Izrẹl kpo.’ Rekọ nọ uye na uje serihọ Fẹro o ve nwene iroro riẹ. Ọ gbẹ jọ ahwo na kpo ho. Rekọ ukuhọ riẹ, nọ uye avọ 10 na ovrẹ no, Fẹro o te si obọ no Ahwo-Izrẹl kpo.

Kọ whọ riẹ uye ovuovo eva iye 10 na? Rovie ẹwẹ obe na re ma wuhrẹ kpahae.