Uzou Avọ 8
Ẹdhẹvabọ no Obọ Osu-Ọtuaro
JOSẸF ọ rọwo Meri kpama no owezẹ re ọ kẹe usi okpakpata jọ. Ẹnjẹle Jihova ọ nwane roma via kẹe obọ, anọ: “Kparoma, whọ rehọ ọmọfofa na gbe oni riẹ, wha dhẹ kpobọ Ijipti, wha jọ etẹe bẹsenọ mẹ te ta kẹ owhẹ; keme Herọd ọ be te guọlọ ọmọfofa na, re o kpe i.”
Ovovẹrẹ, imasa na a tẹ dhẹ. Yọ o nwane rọ ẹruoke keme Herọd ọ riẹ no nọ ebuẹva-isi na a viẹ riẹ họ no gbe nọ a no orẹwho na no. Kareghẹhọ, a hai zihe bru ei nọ a ruẹ Jesu no. Ofu o te mu Herọd. Fikiere evaọ omodawọ re o kpe Jesu, o te j’uzi nọ a kpe emezae nọ e rọ Bẹtlẹhẹm kpobi gbe ekwotọ riẹ no enọ e kpako te ikpe ivẹ kpotọ. Eme nọ o yo no unu ebuẹva-isi nọ i no obọ Ovatha-Ọre ze na o ro fi unu ikpe na họ enẹ na.
Ekpe emaha emezae na kpobi yọ oware imuozọ gaga! Isoja Herọd a du uzou ruọ n’uwou ruọ uwou. Yọ nọ a tẹ ruẹ ọmaha ọmọzae, a vẹ sae riẹ no obọ oni riẹ. Ma riẹ unu emọ nọ a kpe he, rekọ oviẹ ulogbo gbe enuobro ọ ini e rọ orugba eruẹaruẹ Ebaibol nọ Jerimaya ọruaro Ọghẹnẹ na ọ ruẹ.
Evaọ oke nana, Josẹf avọ uviuwou riẹ a te Ijipti no oma kọkọ, yọ obei a be rria enẹna. Rekọ aso jọ ẹnjẹle Jihova ọ tẹ wariẹ roma via kẹ Josẹf evaọ ewezẹ. Ẹnjẹle na ọ tẹ ta nọ: “Kparoma, whọ rehọ ọmọfofa na gbe oni riẹ, wha kpobọ otọ Izrẹl, keme ahwo nọ a guọlọ nọ a re si uzuazọ ọmọfofa na no a whu no.” Fikiere evaọ orugba eruẹaruẹ Ebaibol ọfa nọ ọ ta nọ a re ti se Ọmọ Ọghẹnẹ no Ijipti ze, uviuwou na a te zihe kpohọ orẹwho rai.
O sae jọ nọ Josẹf ọ gwọlọ wohọ Judia, oria nọ a jọ vẹre evaọ ẹwho Bẹtlẹhẹm taure a tẹ te dhẹ kpohọ Ijipti. Rekọ o te yo nọ ọmọzae ọgeva Herọd Akẹlọs ọye ọ rọ ovie Judia enẹna, yọ evaọ ewezẹ ofa Jihova ọ tẹ vẹvẹ iẹe unu kpahe enwoma na. Fikiere Josẹf avọ uviuwou riẹ a te kpohọ ofẹ ẹkpẹlobọ-ọre a te wohọ ẹwho Nazarẹt evaọ Galili. Evaọ okegbe ọnana, onọ u siomano udevie egagọ uzuazọ ahwo Ju, Jesu ọ jẹ rro whẹro. Matiu 2:13-23; Jerimaya 31:15; Hosia 11:1.
▪ Nọ ebuẹva-isi na a zihe ze he, didi oware uyoma Herọd Ovie na o ru, rekọ ẹvẹ a rọ thọ Jesu?
▪ Nọ o zihe no Ijipti ze, eme jabọ Josẹf ọ gbẹ wariẹ wohọ Bẹtlẹhẹm ho?
▪ Didi eruẹaruẹ Ebaibol i rugba evaọ etoke nana?