Eme-Oseliọ — UWOU-EBE ITANẸTE ọrọ Uwou-Eroro

Uwuhrẹ 3

Eme-Oseliọ

Eme o gwọlọ nọ who re ru?

Se ẹme ọvuọvo gbagba. Onana u dhesẹ (1) oghẹrẹ edo ọgbagba nọ a re ro se eme do, (2) ẹgba nọ a re fihọ ibieme nọ i fo gbe, (3) evaọ evẹrẹ buobu ẹro nọ a re muhọ usi nọ a sihọ ubiẹme.

FIKIEME U JE WUZOU?

Emamọ oseliọ o re fiba ọghọ ovuẹ nọ ma bi whowho na. O rẹ sai ru ọnọ ọ be gaviezọ na fi iroro riẹ họ ovuẹ nọ ma be kẹ viukpọ ethobọ evaọ ẹme-ose.

ORỌNIKỌ Ileleikristi kpobi i kpohọ isukulu ikpe buobu hu. A tube dhesẹ Pita gbe Jọn ikọ na wọhọ “ahwo gheghe nọ a kpohọ isukulu egagọ họ.” (Iruẹru 4:13, NW ) Ghele na, u wuzou re ma whaha adhẹẹ nọ a re sino ovuẹ uzẹme Ebaibol na ẹkwoma eme nọ a re se thọ.

Eware nọ A re Roro Kpahe. Ma wo uvumọ ẹko izi ẹme-ose ọvo nọ o kie kpahe evẹrẹ kpobi hi. A re kere evẹrẹ buobu lele ibieme rai. U te no ibieme Latin na no, ibieme efa e riẹ wọhọ erọ Arabic, Cyrillic, Griki, gbe Hibru na. Viukpọ ibieme, ẹvẹrẹ China nọ a re kere o wo oghẹrẹ isi nọ a re si jẹhọ ohwohwo. Ibieme nana i re dikihẹ kẹ ẹme hayo abọjọ ẹme. Dede nọ evẹrẹ Japan gbe Korea i momo ibieme rai no China ze, a rẹ sae rọ ibieme na dikihẹ kẹ oghoghẹrẹ edo buobu nọ i wo otofa ovona ha.

Evaọ evẹrẹ nọ i wo ibiẹme, ẹme-oseliọ o gwọlọ efihiruo edo nọ o fo kẹ ubiẹme kpobi hayo ọguakugbe ibieme sa-sa. Okenọ ẹvẹrẹ otiọye na o te wo izi ẹme-ose nọ o nya aro-ọvo, wọhọ epanọ o rọ kẹ Griki, ẹvẹrẹ Spen, gbe Zulu, uye na o rẹ ga tere he. Ghele na, okpomahọ nọ amọfa a re wo kpahe ẹvẹrẹ o rẹ sae wha ẹme-ose nọ o re tho oria nọ eme na i muhọ no ze. Fikiere, a rẹ sai se ugogo ubiẹme jọ hayo ibiẹme jọ oghẹrẹ sa-sa hayo, ẹsejọ, a re tube se ai via vievie he. U fo nọ whọ rẹ kareghẹhọ enana kpobi who ve fi ai h’iruo evaọ ẹmeọta ra. Evaọ ẹvẹrẹ ahwo China, ẹme-oseliọ o rẹ gwọlọ ibieme idu buobu nọ a rẹ riẹ fihọ uzou. Evaọ evẹrẹ jọ, otofa ẹme u re nwene evaọ okenọ a te nwene uvo sei. Ohwo o gbe muẹrohọ abọ ọnana ziezi evaọ ẹvẹrẹ hẹ o sae lẹliẹ ohwo kẹ ovuẹ othọthọ.

Otẹrọnọ ẹvẹrẹ o wo ibieme nọ e rẹ jọ ekru, u wuzou re a fiẹgba họ ekru nọ o fo na. Evẹrẹ buobu nọ e rọ ere i wo edhere nọ a re lele evaọ oria nọ a re fiẹgba họ. Evaọ eme jọ nọ a re jo lele edhere ọyena ha, u re wo oka jọ nọ a rẹ sai kpehọ ubiẹme nọ a kere na. Onana u re fiobọhọ ru ẹme-oseliọ lọhọ. Rekọ, otẹrọnọ izi na e gbẹ nya aro-ọvo ho, ẹbẹbẹ na ọ rẹ ga viere. Re a fi ei kparobọ o gwọlọ eme buobu nọ a rẹ riẹ fihọ uzou.

Evaọ evẹrẹ jọ, oka nọ a re kpehọ eme yọ oware nọ u wuzou gaga nọ a re roro kpahe. Eka nana e sae jọ ehru hayo otọ ibiẹme jọ, wọhọ: è, é, ô, ñ, ō, ŭ, č, ö, ç. A rẹ sai kere eka eyena, hayo a re rẹro mi osisase na nọ o re fi ai họ iẹe wọhọ epanọ eme nọ e wariẹ ẹme na họ i dhesẹ. U te kie fihọ orọ avivẹ na, whọ rẹ ruẹrẹ oma kpahe gaga otẹrọnọ a k’owhẹ isase ẹgbede.

Kpahe ẹme-ose, egbefẹ jọ e riẹ nọ ma rẹ whaha. Ohwo o te bi sioma t’ẹme o sai dhesẹ uruemu omoya, tubọ oheri dede. Ere o rọ re kpahe ẹme-ose nọ o kie kpo no. U re si iroro bru oruẹme na ọvo. Evaọ abọdekọ riẹ, o rẹ jọ ziezi re a whaha afẹ ọdekọ riẹ ọrọ eme nọ a re duenu họ odode. Ma ta kpahe eme enana jọ no evaọ otọ uzoẹme na “Eme nọ A rẹ Ta Vevẹ.”

Emamọ ẹme-ose ọrọ eme ẹvẹrẹ o rẹ sai wo ohẹriẹ no orẹwho ruọ orẹwho, tube no abọjọ orẹwho ruọ abọfa orẹwho ovona dede. Ohwo nọ o no orẹwho ofa ze ọ sae rọ ẹrọo-unu ọfa jẹ ẹvẹrẹ ẹwho na. Obe-ofeme o sai dhesẹ idhere sa-sa nọ a re ro se ẹme jọ. Otẹrọnọ ohwo o gbe kpohọ isukulu tere he hayo otẹrọnọ ẹvẹrẹ nọ ọ be jẹ enẹna ọ gbẹ rọ ẹvẹrẹ riẹ hẹ, o re wo erere gaga ẹkwoma ezọgaviẹ kẹ enọ e rẹ jẹ ẹvẹrẹ na ziezi ọ vẹ rọ ere kpọ ẹme-ose riẹ lele ọrai. Wọhọ Isẹri Jihova, ma gwọlọ t’ẹme evaọ edhere nọ o re fi ọghọ họ ovuẹ nọ ma bi whowho gbe evaọ edhere nọ ahwo nọ a rọ okegbe mai a rẹ rọ riotọ riẹ.

Evaọ ẹmeọta ekẹdẹ kẹdẹ, o rẹ mai woma re ma rọ eme nọ ma riẹ t’ẹme. Ẹme-ose ọ rẹ jọ ẹbẹbẹ hẹ evaọ okenọ ohwo ọ tẹ be t’ẹme gheghe. Ghele na, nọ who te bi se do via, whọ te nyaku eme jọ nọ whọ rẹ rọ t’ẹme kẹdẹ kẹdẹ hẹ. Yọ Isẹri Jihova a re se do via gaga. Ma re se Ebaibol na kẹ ahwo evaọ okenọ ma te bi se isẹri kẹ ae. A re se inievo-emezae jọ re a se idhe-eme evaọ etoke Uwuhrẹ Uwou-Eroro na hayo eva Uwuhrẹ Obe Ukoko. U wuzou re ma se gbagba re ma no ere siọ ọghọ ba e si no ovuẹ na ẹkwoma eme nọ ma re se thọ.

Kọ o rẹ jọ bẹbẹ k’owhẹ re who se edẹ jọ nọ e rọ Ebaibol na? Evaọ Oyibo, a re si usi fihọ ehru ubiẹme nọ a re fiẹgba họ. Otẹrọnọ ekru-ibiẹme nọ a siusi họ na o rọ ubiẹme edo kuhọ, a re se ubiẹme edo na thethei. Otẹrọnọ ubiẹme nọ o rọ orọ edo ho ekru-ibiẹme o ro kuhọ, koyehọ a re se ubiẹme edo nọ o rọ ekru-ibiẹme na kpẹkpẹe.

Idhere nọ A re Ro Ru Ẹnyaharo. Ahwo buobu nọ a wo ẹbẹbẹ ẹme-ose a riẹ nọ a wo ẹbẹbẹ na ha. Otẹrọnọ ọsẹro isukulu ra ọ riobọhọ abọjọ ẹme-ose ra nọ o fo ẹkpọvi, wo ovuhumuo kẹ ẹwo riẹ. Whọ tẹ riẹ ẹbẹbẹ na no, ẹvẹ who re ro ru ẹnyaharo?

Orọ ọsosuọ, okenọ who te wo ẹme nọ a re jo se do via, rehọ oke ro rri obe-ofeme. Rri eme nọ whọ riẹ hẹ. Whọ gbẹ riẹ epanọ a rẹ rehọ obe-ofeme ruiruo ho, rovie kpohọ ewẹ-obe ọsosuọ nọ a jọ dhesẹ eka nọ e rọ obe na hayo, u te fo, ta kẹ ohwo jọ re o dhesẹ ai k’owhẹ. Obe-ofeme na u ti dhesẹ oria nọ who re fiẹgba họ k’owhẹ. Evaọ eria jọ, u re wo oghẹrẹ sa-sa nọ a re ro se ẹme jọ, wọhọ epanọ oria nọ whọ be jọ rọ ẹme na ruiruo u dhesẹ. Ẹme nọ who rri kpobi, sei do via unuẹse buobu taure who te ti ruru obe-ofeme na.

Edhere avivẹ nọ a rẹ rọ nyaharo evaọ ẹme-ose họ ẹkwoma ese kẹ omọfa—ohwo nọ ọ rẹ riẹ eme se—whọ vẹ ta kẹe re ọ kpọ osethọ ra vi.

Edhere avesa nọ a rẹ rọ nyaharo evaọ ẹme-ose họ ẹkwoma emamọ ezọgaviẹ kẹ enọ e riẹ ẹmeta ziezi. Otẹrọnọ who wo ekasẹte itepu erọ Ebaibọl ọ New World Translation hayo erọ emagazini Uwou-Eroro gbe Awake! na, rehọ enana ruiruo ziezi. Nọ whọ be gaviezọ na, muẹrohọ eme nọ a se hẹrioma no oghẹrẹ nọ who re se ai. Kere ai fihọ otọ, re who wuhrẹ ai. Oke o be nyaharo na, osethọ o ti no ẹmeọta ra, yọ onana u ti ru ẹmeọta ra woma viere.

EPANỌ A RẸ RỌ NYAHARO EVAỌ ẸME-OSE

Wuhrẹ epanọ a rẹ rehọ obe-ofeme ruiruo ziezi.

Ta kẹ ohwo nọ o re se ziezi re ọ gaviezọ k’owhẹ re ọ k’owhẹ ohrẹ.

Muẹrohọ ẹme-ose ahwo nọ a riẹ ẹme ẹta ziezi; rehọ iẹe rọ wawo ọra.

ORIA IRUO: Kpoka họ eme nọ whọ riẹ hẹ evaọ Olezi avọ 83 hayo evaọ abọjọ Ebaibol na nọ ọ rọ ẹbẹbẹ k’owhẹ. Rehọ obe-ofeme ruiruo hayo nyabru ohwo nọ ọ riẹ ẹvẹrẹ na ziezi. Muẹrohọ ekru-eme nọ a re fiẹgba họ evaọ edẹ ahwo nọ e rọ awọ Ebaibol nana; se edẹ na kpobi do via. Kẹsena who ve se oria na kpobi do via.

Mẹ gwọlọ wuhrẹ epanọ a re se eme enana gbagba

․․․․․․․․․․․․․․․․․․․․ ․․․․․․․․․․․․․․․․․․․․ ․․․․․․․․․․․․․․․․․․․․