Osisase Ọghaghae:

Kọ who roro nọ whọ kẹle Ọghẹnẹ? Rọkẹ ibuobu, oyena o wọhọ oware nọ o lọhọ họ. Ahwo jọ a rẹ dhozọ nnọ o thabọ hrọ; amọfa a re roro nọ a te vievie he re a si kẹle iẹe. Dede na, Ebaibol na ọ tuduhọ omai awọ avọ uyoyou inọ: ‘Si kẹle Ọghẹnẹ, o re ti si kẹle owhẹ.’ (Jemis 4:8) Ọ tubẹ kẹ egegagọ riẹ imuẹro inọ: “Mẹ, ỌNOWO na Ọghẹnẹ ra, o kru obọze ra na; mẹ họ ọnọ ọ ta kẹ owhẹ, ‘Ozọ umu owhẹ hẹ, me ti fiobọhọ kẹ owhẹ.’”—Aizaya 41:13.

Ẹvẹ ma sae rọ daoma wo usu okpekpe utioye na kugbe Ọghẹnẹ? Evaọ usu kpobi nọ ma rrọ, ọgbakugbe na ọ rẹ roma hwa ohwo na nọ whọ rẹ riẹ, ewo isiuru gbe ovuhumuo kẹ ekwakwa oghẹrẹsa riẹ. Fikiere ekwakwa gbe idhere Ọghẹnẹ, wọhọ epanọ a dhesẹ i rai via evaọ Ebaibol na, yọ izoẹme nọ e r’oja nọ a re wuhrẹ kpahe. Eroro kpahe edhere nọ Jihova o re ro dhesẹ ekwakwa riẹ na ovuovo, ẹruẹ epanọ Jesu Kristi o dhesẹ i rai gbagba, gbe otoriẹ epanọ ma sai ro wo ai u ti si omai kẹle Ọghẹnẹ. Ma te ruẹ nọ Jihova họ Osu ehrugbakpọ nọ o te je fo. Fibae, ọye họ Ọsẹ nọ mai kpobi ma gwọlọ. Fikinọ o wo ogaga, o kiẹrẹe, o wo areghẹ, jẹ vọ avọ uyoyou, o re kiemu ku emọ ẹrọwọ riẹ hẹ.

Jọ obe onana u fiobọhọ k’owhẹ si kẹle Jihova Ọghẹnẹ viere, re whọ bọ usu nọ o rẹ hẹriẹ hẹ kugbei re whọ sae rria re who jiri iei bẹdẹ bẹdẹ.