Bovẹ Who Bi Yere Uzuazọ Ra Riwi?
• Ahwo buobu a duwu oma le no họ iruẹru uzuazọ ekẹkẹ kẹdẹ te epanọ a gbe bi ro roro kpahe obonọ a bi yeri uzuazọ rai riwi hi.
• Ebaibol na i ru omai riẹ kpahe eware igbunu nọ e rrọ obaro. E tẹ jẹ vẹvẹ unu nnọ ikoko ahwo-akpọ a te ruẹ ozighi ologbo wariẹ akpọ soso họ. Re ma sai wo erere no eware nọ Ebaibol na e ta kẹ omai na ze jẹ whaha okpẹtu, ma rẹ jẹ emamọ owọ vẹrẹ vẹrẹ.
• Ahwo jọ a riẹ nọ a riẹ oware nọ Ebaibol na e ta jẹ be daoma fi ei họ iruo, rekọ a kẹ awa-ọruọ uzuazọ uvẹ re o reghe ai.
• Kọ obonọ who bi yeri uzuazọ riwi o be were owhẹ eva? Whọ tẹ be ma omaa eware, kọ who bi roro kpahe epanọ eware nana e rẹ sai kpomahọ itee nọ who fihọ evaọ uzuazọ?
[Ẹkpẹti/Uwoho nọ o rrọ ẹwẹ-obe avọ 9]
Eme Ọ Mae Rrọ Oja kẹ Owhẹ?
Evẹ whọ rẹ rọ karo evaọ eware nọ e rrọ obotọ na? Kere inọmba họ ae unọjọ utọjọ.
Ibuobu rai yọ eware nọ i fo nọ ohwo o re ru, rekọ a tẹ ta kẹ owhẹ nọ whọ salọ, ovẹ o te jọ orọ ọsosuọ? orọ avivẹ? rri du oka?
․․․ Eware ẹkeriotọ omawere/aroza oma urusasa
․․․ Iruo mẹ hayo okọ mẹ
․․․ Omakpokpọ mẹ
․․․ Evawere mẹ
․․․ Ọrivẹ-orọo mẹ
․․․ Ọsẹgboni mẹ
․․․ Emọ mẹ
․․․ Emamọ uwou, emamọ iwu
․․․ Aro nọ mẹ rẹ jọ evaọ oware nọ me bi ru kpobi
․․․ Egagọ Ọghẹnẹ
[Ẹkpẹti nọ o rrọ ẹwẹ-obe avọ 10, 11]
Kọ Iroro-Ejẹ Ra I Bi Su Owhẹ Kpohọ Obonọ Whọ Ghinẹ Gwọlọ Nya?
RORO KPAHE ENỌ NANA
EWARE ẸKERIOTỌ OMAWERE/AROZA OMA URUSASA: Kọ oghẹrẹ aroza mẹ u bi ru oma sasa omẹ? Kọ abọ riẹ jọ ọ rẹ sai fi uzuazọ mẹ họ ọza hayo tube ru omẹ fihọ ọmo? Kọ o rrọ oghẹrẹ “omaweromẹ” nọ o rẹ sae kẹ omosasọ ubroke rekọ nọ o rẹ sae wha idhọvẹ ikrẹkri ze? O tẹ make rọnọ eware ẹkeriotọ nọ mẹ salọ e rrọ ziezi, kọ mẹ be raha oke fihọ ai hrọ te epanọ me gbe bi ro wo uvẹ kẹ eware nọ e mae r’oja ha?
IRUO HAYO OKỌ MẸ: Kọ eware nọ e r’oja evaọ uzuazọ ọvo mẹ be rehọ iẹe gwọlọ, hayo kọ mẹ wọhọ ọrigbo kẹe? Kọ o be rehọ oke gbe ẹgba mẹ te epanọ u bi ro fi omokpokpọ mẹ họ ọza? Kọ o rẹ mae were omẹ re mẹ raha oke bu viere evaọ iruo mẹ manikọ re mẹ raha oke kugbe ọrivẹ-orọo hayo emọ mẹ? Otẹrọnọ ọga iruo mẹ ọ gwọlọ nọ me ru iruo jọ nọ i re kpokpo iroro mẹ hayo nọ i re gele isiuru abọ-ẹzi họ akotọ, kọ me re ru iruo na re a siọ omẹ ba esino iruo?
OMAKPOKPỌ MẸ: Kọ mẹ be rehọ iẹe jeve jeve, hayo kọ mẹ be hae yọrọ oma re mẹ ruẹ nnọ mẹ rrọ sasasa ẹsikpobi? Kọ ẹme omokpokpọ mẹ ọvo mẹ rẹ ta ẹsikpobi? Kọ oghẹrẹ nọ mẹ be rọ ẹro te oma mẹ u bi dhesẹ nọ me wo ọdawẹ kẹ uviuwou mẹ?
EVAWERE MẸ: Kọ oye mẹ rọ karo? Kọ mẹ be rehọ iẹe karo kẹ evawere ọrivẹ-orọo mẹ hayo uviuwou mẹ? Kọ edhere nọ mẹ be rọ gwọlọ iẹe u fo ọnọ ọ be gọ Ọghẹnẹ uzẹme na?
ỌRIVẸ-ORỌO MẸ: Kọ mẹ be rehọ ọrivẹ-orọo mẹ wọhọ ogbẹnya okenọ o tẹ were omẹ ọvo? Kọ mẹ be rọ ọghọ yeri kugbe ọrivẹ-orọo mẹ, wọhọ ọnọ o fo adhẹẹ? Kọ me bi fi Ọghẹnẹ họ iroro evaọ oghẹrẹ nọ me bi rri ọrivẹ-orọo mẹ?
ỌSẸGBONI MẸ: Mẹ tẹ gbẹ rrọ ọmaha, kọ me bi yoẹme kẹ ọsẹgboni mẹ—a tẹ ta ẹme k’omẹ, kọ mẹ be rọ adhẹẹ kuyo, ru iruo nọ a k’omẹ, kọ me bi no otafe ze evaọ oke nọ a fihọ k’omẹ, whaha usu gbe iruẹru nọ a vẹvẹ omẹ unu kpahe? Kọ otẹrọnọ mẹ dina kpako no, mẹ be rehọ adhẹẹ gaviezọ kẹ ọsẹgboni mẹ, fi obọ họ kẹ ae ziezi evaọ okenọ o tẹ gwọlọ ere? Kọ okenọ u jie omẹ ọvo me bi ro ru ai ziezi hayo kọ ohrẹ Ẹme Ọghẹnẹ o be kpọ oghẹrẹ nọ me bi yeri kugbe ai?
EMỌ MẸ: Kọ mẹ rehọ e riẹ wọhọ owha-iruo mẹ re me wuhrẹ emọ mẹ emamọ uruemu, manikọ me rẹro nnọ isukulu i re wuhrẹ ae? Kọ mẹ be raha oke kugbe emọ mẹ, manikọ me bi rẹro nnọ TV, kọmputa, hayo eware arozaha efa i re ru iruo yena? Kọ mẹ be whọ ku emọ mẹ ziezi evaọ okenọ a tẹ la ijaje Ọghẹnẹ vrẹ, manikọ okenọ oware nọ a ru o tẹ dha omẹ eva ọvo mẹ jẹ whọ ku ae?
EMAMỌ UWOU, EMAMỌ IWU: Eme ọ be kpọ ẹro nọ me bi ro te ugboma, ẹgọ, gbe ekwakwa mẹ—oghẹrẹ ubiẹro nọ mẹ gwọlọ nọ erivẹ a ro rri omẹ? fiki ewoma uviuwou mẹ? fikinọ mẹ yọ ọg’Ọghẹnẹ?
ARO NỌ MẸ RẸ JỌ EVAỌ OWARE NỌ ME BI RU KPOBI: Kọ me bi roro nnọ u wuzou re mẹ riẹ eware ru ziezi? Kọ mẹ rẹ daoma jọ ọnọ ọ mai woma kpaobọ? Kọ o rẹ k’omẹ uye otẹrọnọ omọfa o ru oware jọ woma vi omẹ?
EGAGỌ ỌGHẸNẸ: Kọ ewo ọjẹrehọ Ọghẹnẹ ọ r’oja k’omẹ vi ewo ọjẹrehọ ọrivẹ-orọo mẹ, emọ, ọsẹgboni, hayo ọga iruo mẹ? Re mẹ ruẹsi le oghẹrẹ eyero uzuazọ jọ nọ mẹ gwọlọ, kọ me re gele iruo Ọghẹnẹ họ oria avivẹ?
ROMA TOTỌ RORO KPAHE OHRẸ EBAIBOL NA
Ẹvẹ egagọ Ọghẹnẹ e rrọ oja te evaọ uzuazọ ra?
Ọtausiwoma Na 12:13: “Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.”
NỌ OMA RA NỌ: Kọ edhere uzuazọ mẹ u dhesẹ nnọ me bi rri eware ere? Kọ ẹmeoyo kẹ ijaje Ọghẹnẹ oye o be kpọ epanọ me re wo oke te kẹ eware obọ uwou, erọ iruo, hayo erọ isukulu? Manikọ eware efa hayo otunyẹ uzuazọ eye e be kpọ epanọ me re wo oke te kẹ Ọghẹnẹ?
Didi oghẹrẹ usu who wo kugbe Ọghẹnẹ?
Itẹ 3:5, 6: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.”
Matiu 4:10: “Whọ rẹ gọ Ọnowo na Ọghẹnẹ ra, iruo riẹ eye evo who re ruẹ.”
NỌ OMA RA NỌ: Kọ ere udu mẹ o rrọ kpahe Ọghẹnẹ? Kọ iruẹru ikẹdẹ kẹdẹ mẹ, gbe oghẹrẹ nọ me bi yeri kugbe ebẹbẹ, i bi dhesẹ nnọ me wo evaifihọ gbe omarọkẹ utioye na?
Ẹvẹ ese gbe ewuhrẹ Ebaibol na i wuzou te k’owhẹ?
Jọn 17:3: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”
NỌ OMA RA NỌ: Kọ epanọ mẹ rehọ ese Ẹme Ọghẹnẹ gbe epanọ me bi roro kpahe iẹe diwi te u dhesẹ nnọ mẹ ghinẹ rọwo eme yena?
Ẹvẹ ekpohọ iwuhrẹ ukoko Ileleikristi na u wuzou te k’owhẹ?
Ahwo Hibru 10:24, 25: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, . . . ofa riẹ, wha riẹ nọ ẹdẹ na ọ kẹlino.”
Olezi 122:1: “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO!’ ”
NỌ OMA RA NỌ: Kọ edhere uzuazọ mẹ o bi dhesẹ ovuhumuo kẹ ujaje nana nọ o rrọ Ẹme Ọghẹnẹ na? Evaọ amara nọ o kpo na, kọ iwuhrẹ ukoko jọ i vo omẹ fikinọ mẹ rọ ilale eware efa jọ karo?
Kọ who bi wo abọ ziezi evaọ ẹmeọta kẹ amọfa kpahe Ọghẹnẹ gbe ẹjiroro riẹ?
Matiu 24:14: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi . . . ; kẹsena urere u te zi te.”
Matiu 28:19, 20: “Fikiere wha wuhrẹ ahwo erẹwho kpobi, . . . wha wuhrẹ ai, re a ru eware kpobi nọ mẹ vuẹ owhai.”
Olezi 96:2: “Suole kẹ ỌNOWO, oghale u te odẹ riẹ; ta eme usiwo riẹ kẹdẹ kẹdẹ.”
NỌ OMA RA NỌ: Kọ mẹ be kẹ iruo nana osegboja nọ u fo nọ mẹ rẹ kẹe evaọ uzuazọ mẹ? Kọ abọ nọ mẹ be jariẹ wo u bi dhesẹ nọ mẹ riẹ epanọ oke nọ ma be rria na o kpata te?