Eyere Obiala, Ivotu, gbe Iruo nọ E Whomahọ Iruo Isoja Ha
Eyere Obiala. Isẹri Jihova a rọwo inọ re a r’uzou kpotọ kẹ obiala hayo re a yere iei avọ ole nọ a rẹ so, yọ uruemu egagọ nọ a re ro dhesẹ inọ obọ orẹwho hayo isu riẹ esiwo u re no ze, orọnikọ obọ Ọghẹnẹ hẹ. (Aizaya 43:11; 1 Ahwo Kọrint 10:14; 1 Jọn 5:21) Osu otiọye na jọ họ Nebukadneza ovie Babilọn anwae. Re ọ ruẹsi dhesẹ oruaro gbe ọwhọ nọ o wo kẹ egagọ, osu ologbo nana ọ rehọ ẹmema ologbo jọ vi ọ tẹ gba ahwo nọ a rrọ otọ esuo riẹ họ inọ a r’uzou kpotọ kẹe nọ a te yo edo ile. Rekọ emoha esa Hibru—Shedrak, Mishak, gbe Abẹdnigo—a rọwo inọ a rẹ r’uzou kpotọ kẹ ẹmema na ha, o tẹ make rọnọ uwhu u re noi ze dede.—Daniẹl, uzou avọ 3.
Carlton Hayes ogbiku na, o kere nọ: “Evaọ oke mai na, obiala yọ oware nọ ahwo a be gọ.” O fibae nọ: “Ezae a re ku etu n’uzou nọ a tẹ be rehọ obiala nya aro rai vrẹ; yọ eketa a kere eme buobu ro jiri obiala no, emaha a rẹ jẹ suile ro jiri obiala.” Ọ tẹ jẹ ta nọ, erẹwho a wo “edẹ ọrẹri” nọ a re koko, wọhọ ẹdẹ Avene ọrọ amara Ahrẹ evaọ obọ America, gbe edẹ nọ a rẹ rọ kareghẹhọ “enọ e họre kẹ orẹwho rai nọ a rehọ wọhọ erezi.” Evaọ ehaa jọ nọ a je ru evaọ obọ Brazil, alakpa-ẹmo ologbo jọ ọ ta nọ: “Wọhọ epanọ a rẹ gọ orẹwho na . . . ere ma be gọ obiala na.” Ẹhẹ, obe ofeme-ulogbo na, The Encyclopedia Americana o ta okejọ nọ: “Wọhọ epanọ a rehọ uruwhere wọhọ ọrẹri na, ere a rehọ obiala na.”
Obe ofeme-ulogbo nọ ma jọ obehru fodẹ na o ta kẹlena inọ ile orẹwho “yọ eme nọ a re ro dhesẹ uyoyou nọ ahwo a wo kẹ erẹwho rai, yọ evaọ ẹsibuobu i re kugbe olẹ nọ a rẹ lẹ se Ọghẹnẹ re ọ thọ ahwo erẹwho na hayo isu rai.” Fikiere, Isẹri Jihova a roro thọ họ nọ a tẹ ta nọ ehaa erẹwho nọ a re jo yere obiala hayo suile orẹwho yọ abọjọ egagọ. Evaọ uzẹme, nọ ọ jẹ t’ẹme kpahe emọ Isẹri Jihova nọ e se inọ a re yere obiala ha, obe na The American Character o ta nọ: “Okọto Ukpehru na o jọ edhọ buobu nọ a gu bruoziẹ no inọ eyere obiala na u wo obọ kpahe egagọ.”
Dede nọ Isẹri Jihova a re w’obọ họ evaọ ehaa nọ a rri nọ e wọso Ikereakere na, a rẹ whaha ohwo nọ ọ gwọlọ ru ere he. A te je wo adhẹẹ kẹ ebiala nọ i dikihẹ kẹ erẹwho sa-sa, yọ a rehọ isu nọ a ro mu na wọhọ enọ e be ‘gbodibo kẹ Ọghẹnẹ.’ (Ahwo Rom 13:1-4) Fikiere, Isẹri Jihova a bi ru lele uduotahawọ nọ o ta nọ a lẹ roro “ivie gbe ahwo nọ a rọ ekua ilogbo.” Rekọ ẹjiroro nọ ma be rọ lẹ họ “re ma ruẹse yere uzuazọ udhedhẹ avọ omofọwẹ, uzuazọ ohwo Ọghẹnẹ avọ ọghọ ọ rọ kẹ oma eva edhere kpobi.”—1 Timoti 2:2.
Ivotu nọ a rẹ rọ salọ ahwo fihọ ọkwa egọmeti. Uvi Ileleikristi a rẹ whaha amọfa ha inọ a votu hu. A rẹ t’ẹme wọso ivotu nọ a bi ru hu, yọ a re yoẹme kẹ isu nọ a ro mu. O make rọ ere na, a re wobọ evaọ esuo-ohrowo erẹwho na ha. (Matiu 22:21; 1 Pita 3:16) Eme u fo nọ Oleleikristi o re ru nọ ọ tẹ rrọ orẹwho nọ ivotu e jẹ rrọ ọgbahọ kẹ ohwo kpobi hayo ọ tẹ rọ oria nọ a rẹ jọ mukpahe ahwo nọ a rọwo kpohọ oria ivotu na ha? Nọ Oleleikristi nọ ọ rrọ otọ uyero utioye na ọ tẹ kareghẹhọ nọ Shedrak, Mishak, gbe Abẹdnigo a nya kpohọ otọ-opraprara Dura, ọ sae jiroro nọ o re kpohọ oria ivotu na nọ obroziẹ-iroro riẹ ọ tẹ kẹe uvẹ. Rekọ ọ rẹ yọroma re ọ siọ ohwo jọ ba evotu kẹ. U fo re o wo ehri-izi ezeza nana họ iroro:
1. Ilele Jesu a rrọ “erọ akpọ na ha.”—Jọn 15:19.
2. Ileleikristi a rọ kẹ Kristi avọ Uvie riẹ.—Jọn 18:36; 2 Ahwo Kọrint 5:20.
3. Orọwọ ovona ukoko Ileleikristi na kpobi u wo, yọ ọkpọ uyoyou Kristi u ku ahwo ukoko na kpobi kugbe.—1 Ahwo Kọrint 1:10; Ahwo Kọlọsi 3:14.
4. Oware kpobi nọ ohwo nọ a ro mu ọkwa o ru o rrọ uzou enọ e rehọ e riẹ mu re.—Muẹrohọ ehri-izi nọ e rrọ 1 Samuẹle 8:5, 10-18 gbe 1 Timoti 5:22.
5. Nọ emọ Izrẹl a ta nọ a rehọ ovie mu kẹ ae, Jihova ọ rehọ e riẹ nọ a siọ Ọyomariẹ.—1 Samuẹle 8:7.
6. Fikinọ Ileleikristi a bi dhomahọ esuo ho, a rẹ t’ẹme ududu nọ a tẹ be ta kẹ oghẹrẹ ahwo kpobi kpahe Uvie Ọghẹnẹ.—Matiu 24:14; 28:19, 20; Ahwo Hibru 10:35.
Iruo nọ E Whomahọ Iruo Isoja Ha. Evaọ erẹwho jọ, a rẹ kẹ ahwo nọ a siọ iruo isoja iruo nọ e whomahọ iruo isoja ha nọ a re ru evaọ unuoke jọ. Nọ ma tẹ rẹriẹ ovao ku iroro-ejẹ kpahe ẹme nana, ma rẹ lẹ kpahe iẹe, ma sae jẹ t’ẹme na kẹ Oleleikristi nọ ọ kpako evaọ abọ-ẹzi re ma rehọ iẹe jiroro kugbe, kẹsena mai ọvo ma vẹ tẹ jiroro onọ ma re ru.—Itẹ 2:1-5; Ahwo Filipai 4:5.
Ebaibol e ta kẹ omai nọ ma “romakpotọ kẹ isuisuẹsu gbe enọ a rọ udu kẹ, re [ma hai] yoẹme, jẹ thọomavẹre kẹ iruo oruọzewọ kpobi . . . dhesẹ uvi evaidhedhẹ.” (Taitọs 3:1, 2) Fiki onana, ma rẹ sae nọ oma mai enọ nana: ‘Kọ iruo nana e te lẹliẹ omẹ jọ abọjọ hayo ru omẹ wobọ kugbe egagọ erue?’ (Maeka 4:3, 5; 2 Ahwo Kọrint 6:16, 17) ‘Kọ iruo nana i ti ru ei bẹbẹ kẹ omẹ hayo whaha omẹ ẹnyate owha-iruo mẹ wọhọ Oleleikristi?’ (Matiu 28:19, 20; Ahwo Ẹfẹsọs 6:4; Ahwo Hibru 10:24, 25) ‘Evaọ abọdekọ riẹ, kọ iruo nana e te kẹ omẹ uvẹ ru iruo odibọgba mẹ kẹre haro, tubẹ k’ome uvẹ jọ ọkobaro oke-kpobi dede?’—Ahwo Hibru 6:11, 12.
Otẹrọnọ Oleleikristi ọ jiroro nọ ọ rẹ rehọ iruo nọ a kẹ riẹ na viukpenọ o re kpohọ uwou-odi, ibe Ileleikristi riẹ a rẹ fo ẹe he. (Ahwo Rom 14:10) Rekọ o te roro nọ ọ sai ti ru iruo itieye na ha, amọfa a rẹ fo ẹe gbe he.—1 Ahwo Kọrint 10:29; 2 Ahwo Kọrint 1:24.