Iruo Igbunu Evaọ Abade Ọwawae Na

Nọ Fẹro ọ nwani yo nọ ahwo Izrẹl a no Ijipti no, o te nwene iroro nọ ọ gbẹ gwọlọ siobọno ai hi. Ọ tẹ ta kẹ egbaẹmo riẹ nọ: ‘Wha ruẹrẹ ekẹkẹ-ẹmo mẹ na kpobi họ, re ma le ahwo Izrẹl na! Ma riẹ ma hai siobọno ai kpo ho.’ Fẹro avọ ahwo riẹ a te mu ahwo Izrẹl họ ele.

Jihova ọ jẹ rehọ ẹgho su ahwo riẹ evaọ oke uvo, evaọ aso kọ erae. O su rai te Abade Ọwawae na, ọ tẹ ta kẹ ai nọ a fa evuẹ kẹle etẹe.

Ahwo Izrẹl a tẹ ruẹ Fẹro avọ egbaẹmo riẹ nọ a bi le ai ze. A sae dhẹ hẹ keme abade na o bru rai dhe, yọ egbaẹmo Fẹro e rrọ obemu tha. A tẹ be viẹ kẹ Mosis nọ: ‘Ma bi ti whu kufiẹ! Whẹ hae nyasiọ omai ba obọ Ijipti.’ Rekọ Mosis ọ tẹ ta kẹ ai nọ: ‘Jọ ozọ u mu owhai hi. Wha hẹrẹ re wha ruẹ epanọ Jihova o ti ro siwi omai.’ Mosis o gine fievahọ Jihova, o gbẹ rrọ ere?

Jihova ọ tẹ ta kẹ ahwo Izrẹl nọ a ruẹrẹ oma kpahe re a ruọ edhere. Evaọ aso yena, Jihova o te fi ẹgho nọ o bi ro su ai na họ udevie ahwo Izrẹl avọ ahwo Ijipti. Ebi ọ tẹ jọ abọ ahwo Ijipti rekọ elo ọ rrọ abọ ahwo Izrẹl.

Jihova ọ tẹ ta kẹ Mosis nọ ọ rriẹ obọ riẹ rri abade na. Kẹsena Jihova o te ru nọ ofou ọgaga o ro fou bẹsenọ oke o rọ ke. Abade na ọ tẹ hẹriẹ kpohọ abava, edhere ọ tẹ rrọ udevie abade na. Ahwo Izrẹl nọ a bu ima buobu na a tẹ nya otọ oyaya fa abade na vrẹ. Evaọ oke yena yọ ame na o dikihẹ tabọ tabọ wọhọ ugbẹhẹ.

Fẹro avọ egbaẹmo riẹ a te le ahwo Izrẹl ruọ abade na evaọ otọ oyaya na. Jihova o te ru egbaẹmo Ijipti reghe no. Etẹ ekẹkẹ-ẹmo rai i te muhọ ẹkpare no. Egbaẹmo Ijipti i te muhọ ebo inọ: ‘Ma zihe kpo! Jihova ọ be họre kẹ ahwo Izrẹl.’

Jihova ọ tẹ ta kẹ Mosis nọ: ‘Rriẹ obọ ra rri abade na.’ Ẹsiẹvo na, ame abade na nọ o dikihẹ wọhọ ugbẹhẹ na, o te hwẹ ruru egbaẹmo Ijipti. Fẹro avọ ahwo riẹ a te whu. Makọ omọvo dede ọ zọ họ.

Evaọ abọdekọ abade na, ogbotu ahwo Izrẹl soso a tẹ be so ile jiri Ọghẹnẹ inọ: “So ole kẹ Jihova, keme ọ kpare omariẹ kpehru gaga no.O gbolo anyenya na avọ ọnọ ọ be dhẹe fihọ abade na no.” Nọ ahwo na a jẹ so ole na, yọ eyae na i bi gbile je kporo ejẹjẹ. Aikpobi a jẹ ghọghọ inọ a no igbo no.